Российская Православная Церковь

по благословенію Архіерейскаго Сѵнода Россійской Православной Церкви

Православный календарь

Ака́ѳістъ

А҆ка́ѳїстъ ст҃о́мꙋ бл҃же́нномꙋ і҆ѡа́ннꙋ ᲂу҆́стюжскомꙋ чꙋдотво́рцꙋ.

Прп. Иоанна Устюжского, Христа ради юрод. (1494) 11 июня 2026

Конда́къ а҃

И҆збра́нный ᲂу҆го́дниче хрⷭ҇то́въ и҆ предста́телю на́шъ ᲂу҆ ст҃ы́ѧ трⷪ҇цы, і҆ѡа́нне всебл҃же́нне, похва́льными пѣ́сньми ѿ любвѐ дꙋше́вныѧ ᲂу҆блажа́емъ тѧ̀ застꙋ́пника и҆ покрови́телѧ на́шего. ты́ же, ꙗ҆́кѡ и҆мѣ́ѧй дерзнове́нїе ко гдⷭ҇ꙋ, ѿ всѧ́кихъ бѣ́дъ и҆ напа́стей свободѝ на́съ, да зове́мъ тѝ:

Ра́дꙋйсѧ, і҆ѡа́нне, пресла́вный чꙋдотво́рче.

І҆́косъ а҃

А҆́гг҃ли ра́довахꙋсѧ житїю̀ твоемꙋ̀, свѧ́тче бж҃їй і҆ѡа́нне: всѧ̑ бо земна̑ѧ во ᲂу҆ме́ты вмѣни́лъ є҆сѝ, нищетꙋ́ же во́льнꙋю ѿ ю҆́ности до гро́ба претерпѣва́ѧ, хрⷭ҇та̀ ра́ди ю҆ро́дъ бы́лъ є҆сѝ. тѣ́мже ᲂу҆блажа́емъ тѧ̀:

Ра́дꙋйсѧ, соверше́нный нестѧжа́телю, є҆ди́но то́чїю рꙋ́бище раздра́нное и҆мѣ́вый ѡ҆ чре́слѣхъ твои́хъ: ра́дꙋйсѧ, по́стниче, во дни̑ среды̀ и҆ пѧтка̀ ничто́же вкꙋша́вый.

Ра́дꙋйсѧ, во́ине хрⷭ҇то́въ, бл҃года́тїю є҆гѡ̀ мі́ръ, пло́ть и҆ дїа́вола побѣди́вый: ра́дꙋйсѧ, мл҃твенниче, рꙋ́цѣ ко гдⷭ҇ꙋ ѡ҆ творѧ́щихъ непра́вдꙋ воздѣва́вый.

Ра́дꙋйсѧ, ст҃а́гѡ проко́пїа, хрⷭ҇та̀ ра́ди ю҆ро́дивагѡ, и҆́стинный подража́телю: ра́дꙋйсѧ, свѧ́тость житїѧ̀ твоегѡ̀ бꙋ́йствомъ ю҆ро́да мꙋ́дрѣ сокрыва́вый.

Ра́дꙋйсѧ, і҆ѡа́нне, пресла́вный чꙋдотво́рче.

Конда́къ в҃

Ви́дѧ сꙋето́ю мі́ра сегѡ̀ ѡ҆слѣпле́нныхъ, досажда́ющихъ и҆ ѡ҆скорблѧ́ющихъ тѧ̀ непови́ннѡ, не гнѣ́валсѧ є҆сѝ на гони́телей и҆ ѡ҆би́дѧщихъ тѧ̀, бл҃же́нне і҆ѡа́нне, но моли́лсѧ є҆сѝ ѡ҆ таковы́хъ въ сокрꙋше́нїи дꙋ́ха глаго́лѧ бг҃ꙋ: А҆ллилꙋ́їа.

І҆́косъ в҃

Ра́зꙋмъ бг҃опросвѣще́нъ и҆мѣ́ѧ, пребл҃же́нне і҆ѡа́нне, бѣ́галъ є҆сѝ сла́вы человѣ́ческїѧ: ю҆ро́дствꙋѧ же при́снѡ по сто́гнамъ гра́да ᲂу҆́стюга, мнѡ́га досаждє́нїѧ и҆ скѡ́рби претерпѣ́лъ є҆сѝ хрⷭ҇та̀ ра́ди. тѣ́мже досто́итъ тѝ зва́ти:

Ра́дꙋйсѧ, самопроизво́льный мч҃ниче, бїє́нїѧ, ѡ҆плева̑нїѧ и҆ поношє́нїѧ ѿ неразꙋ́мныхъ человѣ̑къ претерпѣ́вый: ра́дꙋйсѧ, за ѡ҆скорби́телей и҆ гони́телей твои́хъ непамѧтоѕло́бивый мл҃твенниче.

Ра́дꙋйсѧ, стра̑сти пло́ти твоеѧ̀ гла́домъ и҆ жа́ждею ᲂу҆мертви́вый: ра́дꙋйсѧ, чистото́ю дꙋше́вною и҆ тѣле́сною бл҃голѣ́пнѡ преꙋкра́шенный.

Ра́дꙋйсѧ, нището́ю ѡ҆богати́выйсѧ: ра́дꙋйсѧ, нищетꙋ̀ сїю̀ па́че сокро́вищъ всегѡ̀ мі́ра возлюби́вый.

Ра́дꙋйсѧ, і҆ѡа́нне, пресла́вный чꙋдотво́рче.

Конда́къ г҃

Си́ла чⷭ҇тна́го и҆ животворѧ́щаго крⷭ҇та̀ гдⷭ҇нѧ росода́тельнꙋ пе́щь содѣ́ла тѝ, ꙗ҆́коже и҆ногда̀ а҆́гг҃лъ прпⷣбнымъ ѻ҆трокѡ́мъ, ѽ і҆ѡа́нне бл҃же́нне! ѡ҆гради́всѧ бо кре́стнымъ зна́менїемъ, возле́глъ є҆сѝ на горѧ́щемъ ᲂу҆́глїи въ пещѝ собо́рныѧ ᲂу҆спе́нскїѧ це́ркве, всѣ́хъ подвиза́ѧ вопи́ти ѡ҆ се́мъ творцꙋ̀ чꙋде́съ бг҃ꙋ: А҆ллилꙋ́їа.

І҆́косъ г҃

И҆мы́й бл҃го́е помышле́нїе ѡ҆ бг҃оꙋго́дномъ житїѝ твое́мъ, ᲂу҆спе́нскагѡ собо́ра і҆ере́й григо́рїй по вече́рнемъ бг҃ослꙋже́нїи ᲂу҆таи́сѧ за две́рїю хра́ма, да ᲂу҆вѣ́сть, что̀ твори́ши, є҆ди́нъ пребыва́ѧ. ты́ же, ѽ і҆ѡа́нне бг҃облаже́нне, сотвори́въ мл҃твꙋ за глаго́лющихъ ле́сть и҆ творѧ́щихъ непра́вдꙋ, ѡ҆гради́всѧ кре́стнымъ зна́менїемъ, возле́глъ є҆сѝ въ пе́щь на горѧ́щее ᲂу҆́глїе. є҆гда́ же і҆ере́й, ᲂу҆́жасомъ ѡ҆б̾ѧ́тъ бы́въ сицева́гѡ ра́ди видѣ́нїѧ, вни́де, ты̀ ᲂу҆̀бо, а҆́бїе и҆сто́ргсѧ и҆з̾ пе́щи, ре́клъ є҆сѝ: є҆́же са́мъ ᲂу҆зрѣ́лъ є҆сѝ, да никомꙋ́же повѣ́даеши до кончи́ны моеѧ̀. сегѡ̀ ра́ди рце́мъ всѝ:

Ра́дꙋйсѧ, си́лою чⷭ҇тна́гѡ и҆ животворѧ́щагѡ крⷭ҇та̀ гдⷭ҇нѧ на горѧ́щемъ ᲂу҆́глїи без̾ вре́да сохране́нный: ра́дꙋйсѧ, росо́ю дх҃а прест҃а́гѡ ѡ҆роше́нный.

Ра́дꙋйсѧ, пла́менемъ любвѐ ꙗ҆́же къ бг҃ꙋ и҆ бли́жнемꙋ пла́мень пе́щный ᲂу҆стꙋди́вый: ра́дꙋйсѧ, те́плый мл҃твенниче, при хра́мѣ бг҃ома́тере по всѧ̑ нѡ́щи примета́тисѧ и҆зво́ливый.

Ра́дꙋйсѧ, хрⷭ҇тїа́нскихъ добродѣ́телей под̾ личи́ною безꙋ́мїѧ подви́жниче: ра́дꙋйсѧ, бꙋ́йствомъ твои́мъ премꙋ́дрыѧ посрами́вый.

Ра́дꙋйсѧ, і҆ѡа́нне, пресла́вный чꙋдотво́рче.

Конда́къ д҃

Бꙋ́рею напа́стей при́снѡ волнꙋ́емое жите́йское мо́ре бл҃года́тїю бж҃їею немо́креннѡ проше́дъ, бл҃же́нне і҆ѡа́нне, дости́глъ є҆сѝ вѣчнобл҃же́ннагѡ приста́нища, и҆дѣ́же нѣ́сть болѣ́знь, ни печа́ль, ни воздыха́нїе. та́мѡ ᲂу҆̀бо почива́ѧ со а҆́гг҃лы и҆ всѣ́ми ст҃ы́ми, пое́ши бг҃ꙋ: А҆ллилꙋ́їа.

І҆́косъ д҃

Слы́шащи болѧ́щаѧ марі́а, ᲂу҆́стюжскагѡ намѣ́стника ѳео́дѡра жена̀, ꙗ҆́кѡ и҆́маши ѡ҆би́лїе бл҃года́ти бж҃їѧ, посла̀ слꙋгꙋ̀ своего̀, да про́ситъ моли́твъ твои́хъ ѡ҆ и҆сцѣле́нїи є҆ѧ̀. ты́ же, ᲂу҆го́дниче бж҃їй і҆ѡа́нне, а҆́ки въ безꙋ́мїи возопи́лъ є҆сѝ слꙋзѣ̀: здра́вствꙋй, до́брый кнѧ́же со кнѧги́нею. ѻ҆ба́че є҆гда̀ слꙋга̀ возврати́сѧ въ до́мъ госпожѝ своеѧ̀, ᲂу҆зрѣ̀ ю҆̀ и҆сцѣлѣ́вшꙋ ѿ жесто́кагѡ недꙋ́га. сегѡ̀ ра́ди глаго́лемъ тѝ:

Ра́дꙋйсѧ, є҆ди́нѣмъ сло́вомъ тѧ̑жкїѧ недꙋ́ги и҆сцѣли́вый: ра́дꙋйсѧ, болѧ́щꙋю марі́ю и҆ разсла́бленнꙋю а҆поллїна́рїю мл҃твою ᲂу҆врачева́вый.

Ра́дꙋйсѧ, бѣснова́тꙋю є҆ѵфросѵ́нїю ѿ мꙋчи́тельства дїа́вола и҆зба́вивый: ра́дꙋйсѧ, ꙗ҆́кѡ и҆ ны́нѣ моли́твъ твои́хъ бѣ́си ѕѣлѡ̀ трепе́щꙋтъ.

Ра́дꙋйсѧ, гра́да ᲂу҆́стюга ра́досте неѿ̾е́млемаѧ: ра́дꙋйсѧ, всѣ́хъ притека́ющихъ къ тебѣ̀ ᲂу҆тѣше́нїе пресла́дкое.

Ра́дꙋйсѧ, і҆ѡа́нне, пресла́вный чꙋдотво́рче.

Конда́къ є҃

Бг҃оте́чнѣй ѕвѣздѣ̀ подо́бенъ бы́лъ є҆сѝ, бл҃же́нне і҆ѡа́нне: ше́ствꙋѧ бо по сто́гнамъ гра́да ᲂу҆́стюга, восходи́лъ є҆сѝ бл҃года́тїю бж҃їею ѿ си́лы въ си́лꙋ, и҆ безꙋ́мствꙋѧ пред̾ человѣ́ки, бж҃е́ственныѧ премⷣрости и҆спо́лненъ бы́лъ є҆сѝ ѿ бг҃а, непреста́ннѡ воспѣва́ѧ томꙋ̀ є҆ди́номꙋ: А҆ллилꙋ́їа.

І҆́косъ є҃

Ви́дѧ, ꙗ҆́кѡ въ мі́рѣ се́мъ, во ѕлѣ̀ лежа́щемъ, нѣ́сть жите́йскїѧ сла́дости печа́ли неприча́стны, многоско́рбное житїѐ ѿ ю҆́ности воспрїѧ́лъ є҆сѝ, бл҃же́нне і҆ѡа́нне. мы́ же грѣ́шнїи, ᲂу҆блажа́юще терпѣ́нїе твоѐ, зове́мъ тѝ такова̑ѧ:

Ра́дꙋйсѧ ны́нѣ на нб҃сѝ, зане́же препла́ваѧ пꙋчи́нꙋ жите́йскагѡ мо́рѧ на землѝ пла́калъ є҆сѝ: ра́дꙋйсѧ, бл҃же́нне, мно́га бо мзда̀ твоѧ̀ на нб҃сѝ.

Ра́дꙋйсѧ, соприча́стниче нбⷭ҇ныхъ бла̑гъ, и҆́хже ѻ҆́ко не ви́дѣ, и҆ ᲂу҆́хо не слы́ша, и҆ на се́рдце человѣ́кꙋ не взыдо́ша: ра́дꙋйсѧ, сонаслѣ́дниче достоѧ́нїѧ, є҆́же ᲂу҆гото́ва бг҃ъ лю́бѧщымъ є҆го̀.

Ра́дꙋйсѧ, гра́да ᲂу҆́стюга застꙋ́пниче: ра́дꙋйсѧ, вѣ́рою къ тебѣ̀ притека́ющихъ покрови́телю.

Ра́дꙋйсѧ, і҆ѡа́нне, пресла́вный чꙋдотво́рче.

Конда́къ ѕ҃

Проповѣ́данїе є҆ѵⷢ҇льское, є҆́же не скрыва́ти себѣ̀ сокро́вища на землѝ, соверше́ннѡ соблюда́ѧ, не стѧжа́лъ є҆сѝ ни зла́та, ни сребра̀, но то́чїю є҆ди́но рꙋ́бище раздра́нное, въ не́мже зи́мꙋ и҆ лѣ́то неѡбꙋве́нъ пребыва́ѧ воспѣва́лъ є҆сѝ хрⷭ҇тꙋ̀ бг҃ꙋ: А҆ллилꙋ́їа.

І҆́косъ ѕ҃

Возсїѧ́й на́мъ свѣ́томъ твоегѡ̀ бл҃горазꙋ́мїѧ, бл҃же́нне і҆ѡа́нне: безꙋ́мствꙋѧ бо при́снѡ пред̾ человѣ́ки, ты̀ ᲂу҆разꙋмѣ́лъ є҆сѝ глꙋбинꙋ̀ бж҃е́ственныѧ премⷣрости, ꙗ҆́кѡ не мꙋ́дрыхъ мі́ра сегѡ̀, но бꙋ́ихъ ѡ҆ хрⷭ҇тѣ̀ и҆збра̀ бг҃ъ въ жили́ще бл҃года́ти своеѧ̀. є҆ѧ́же ѡ҆би́льнѡ преиспо́лненъ сы́й, прїимѝ ѿ на́съ сицева̑ѧ:

Ра́дꙋйсѧ, ѿ ᲂу҆тѣ́шителѧ дх҃а и҆́стины ѡ҆бра́дованный: ра́дꙋйсѧ, на землѝ и҆ на нб҃сѝ просла́вленный.

Ра́дꙋйсѧ, ᲂу҆́зкими враты̀ и҆ тѣ́снымъ пꙋте́мъ всѐ житїѐ ше́ствовавый: ра́дꙋйсѧ, црⷭ҇твїѧ бж҃їѧ ᲂу҆се́рдный взыска́телю.

Ра́дꙋйсѧ, нищеты̀ самопроизво́льныѧ ѡ҆́бразе: ра́дꙋйсѧ, смире́нїѧ хрⷭ҇то́ва подража́телю.

Ра́дꙋйсѧ, і҆ѡа́нне, пресла́вный чꙋдотво́рче.

Конда́къ з҃

Хотѧ̀ ѿ взо́ра человѣ́ча ст҃о́е житїѐ и҆ ди̑вныѧ по́двиги твоѧ̑ сокры́ти, бл҃же́нне і҆ѡа́нне, ю҆ро́дствовалъ є҆сѝ пред̾ человѣ́ки по всѧ̑ дни̑, въ нѡ́щи же пребыва́ѧ въ непреста́нной моли́твѣ, и҆з̾ глꙋбины̀ дꙋшѝ взыва́лъ є҆сѝ ѡ҆ все́мъ бг҃ꙋ: А҆ллилꙋ́їа.

І҆́косъ з҃

Но́вагѡ и҆ ди́внагѡ житїѧ̀ ꙗ҆ви́сѧ первонача́льникъ въ землѝ рѡссі́йстѣй бл҃же́нный проко́пїй хрⷭ҇та̀ ра́ди ю҆ро́дивый, є҆гѡ́же и҆́стинный подража́тель показа́лсѧ є҆сѝ, бл҃же́нне і҆ѡа́нне. тѣ́мже велича́емъ тѧ̀:

Ра́дꙋйсѧ, до́брѣ ᲂу҆разꙋмѣ́вый глаго́лъ бж҃їй: ка́ѧ по́льза человѣ́кꙋ, а҆́ще мі́ръ ве́сь прїѡбрѧ́щетъ и҆ ѡ҆тщети́тъ дꙋ́шꙋ свою̀: ра́дꙋйсѧ, си́хъ ра́ди слове́съ гдⷭ҇нихъ многоско́рбное и҆ многоплаче́вное житїѐ воспрїе́мый.

Ра́дꙋйсѧ, ра́достїю неѿ̾е́млемою во вѣ́ки: ра́дꙋйсѧ, просла́вленный бг҃омъ и҆ человѣ́ки.

Ра́дꙋйсѧ, дх҃о́вными по́двиги въ та́йнѣ подвиза́выйсѧ: ра́дꙋйсѧ, црⷭ҇твїе нбⷭ҇ное си́ми стѧжа́вый.

Ра́дꙋйсѧ, і҆ѡа́нне, пресла́вный чꙋдотво́рче.

Конда́къ и҃

Стра́нно и҆ чꙋ́дно житїѐ твоѐ, і҆ѡа́нне всехва́льне: бѣ́гаѧ бо по сто́гнамъ гра́да ᲂу҆́стюга, а҆́лчбꙋ и҆ жа́ждꙋ претерпѣва́лъ є҆сѝ, ничто́же ѿ когѡ̀ взима́ѧ, и҆ та́кѡ ю҆́нꙋю пло́ть твою̀ дꙋ́хꙋ покорѧ́ѧ, всегда̀ воспѣва́лъ є҆сѝ трїеди́номꙋ бг҃ꙋ: А҆ллилꙋ́їа.

І҆́косъ и҃

Ве́сь мі́ръ правосла́вный мл҃твеннѡ призыва́етъ тѧ̀ ꙗ҆́кѡ вели́каго ᲂу҆го́дника хрⷭ҇то́ва, достобл҃же́нне і҆ѡа́нне, и҆ сїѧ̑ зове́тъ тѝ въ похвалꙋ̀:

Ра́дꙋйсѧ, ѡ҆бѣтова́нїй хрⷭ҇то́выхъ наслѣ́дниче: ра́дꙋйсѧ, вре́менною ско́рбїю вѣ́чнагѡ ᲂу҆тѣше́нїѧ сподо́бивыйсѧ.

Ра́дꙋйсѧ, а҆́лчбою и҆ жа́ждою пло́ть твою̀ дꙋ́хꙋ покори́вый: ра́дꙋйсѧ, а҆́гг҃лѡвъ и҆ всѣ́хъ ст҃ы́хъ собесѣ́дниче.

Ра́дꙋйсѧ, ѡ҆ все́мъ мі́рѣ правосла́внѣмъ мл҃твенниче: ра́дꙋйсѧ, землѝ рѡссі́йскїѧ те́плый пред̾ бг҃омъ застꙋ́пниче.

Ра́дꙋйсѧ, і҆ѡа́нне, пресла́вный чꙋдотво́рче.

Конда́къ ѳ҃

Всѧ́кагѡ грѣха̀ бѣ́галъ є҆сѝ а҆́ки ꙗ҆́да смертоно́сна, ᲂу҆го́дниче хрⷭ҇то́въ і҆ѡа́нне, и҆ сегѡ̀ ра́ди сподо́билсѧ є҆сѝ црⷭ҇твїѧ хрⷭ҇то́ва. тѣ́мже мо́лимтисѧ, помѧнѝ и҆ на́съ многогрѣ́шныхъ, ко ст҃ѣ́й трⷪ҇цѣ во ᲂу҆миле́нїи зовꙋ́щихъ: А҆ллилꙋ́їа.

І҆́косъ ѳ҃

Виті́йство на́ше скꙋ́дное не довлѣ́етъ къ похвалѣ̀ и҆́мене твоегѡ̀, ᲂу҆го́дниче хрⷭ҇то́въ і҆ѡа́нне. ѻ҆ба́че мо́лимтисѧ, не ѿри́ни ѿ любвѐ дꙋше́вныѧ зовꙋ́щихъ тѝ такова̑ѧ:

Ра́дꙋйсѧ, бж҃е́ственныхъ дарѡ́въ носи́телю: ра́дꙋйсѧ, молѧ́щымсѧ тебѣ̀ ско́рый помо́щниче.

Ра́дꙋйсѧ, почита́ющымъ сщ҃е́ннꙋю па́мѧть твою̀ вѣ́чныхъ бла̑гъ хода́таю: ра́дꙋйсѧ, скорбѧ́щихъ ско́рый ᲂу҆тѣ́шителю.

Ра́дꙋйсѧ, до́брый сѣ́ѧтелю бл҃гоче́стїѧ: ра́дꙋйсѧ, ѡ҆бличи́телю всѧ́кагѡ нече́стїѧ.

Ра́дꙋйсѧ, і҆ѡа́нне, пресла́вный чꙋдотво́рче.

Конда́къ і҃

Сп҃са́ѧ дꙋ́шꙋ твою̀, бл҃же́нне і҆ѡа́нне, не восхотѣ́лъ є҆сѝ рабо́тати бг҃ꙋ и҆ мамѡ́нѣ, но є҆ди́номꙋ бг҃ꙋ то́чїю. тѣ́мже ны́нѣ ꙗ҆́кѡ вѣ́рный ра́бъ влⷣцѣ своемꙋ̀ предстои́ши на нб҃сѣ́хъ, поѧ̀ є҆мꙋ̀ хвале́бнꙋю пѣ́снь: А҆ллилꙋ́їа.

І҆́косъ і҃

Стѣна̀ є҆сѝ непоколеби́ма, бл҃же́нне і҆ѡа́нне, всѣ̑мъ съ вѣ́рою прибѣга́ющымъ къ мл҃твенномꙋ предста́тельствꙋ твоемꙋ̀. тѣ́мже припа́дающе мо́лимтисѧ ꙗ҆́кѡ и҆мꙋ́щемꙋ ве́лїе дерзнове́нїе ᲂу҆ хрⷭ҇та̀ бг҃а, моли́сѧ ѡ҆ на́съ грѣ́шныхъ, почита́ющихъ тѧ̀ зва̑нїи си́ми:

Ра́дꙋйсѧ, правосла́вныхъ хрⷭ҇тїа́нъ тве́рдое ѡ҆гражде́нїе: ра́дꙋйсѧ, ст҃ы́ѧ цр҃кве бг҃олѣ́пное ᲂу҆краше́нїе.

Ра́дꙋйсѧ, многоско́рбное твоѐ тече́нїе бл҃гоче́стнѡ сконча́вый: ра́дꙋйсѧ, по сконча́нїи ѻ҆́нагѡ въ пресвѣ́тлыхъ ра́йскихъ ѡ҆би́телехъ всели́выйсѧ.

Ра́дꙋйсѧ, всѐ житїѐ твоѐ во ᲂу҆гожде́нїе бг҃ꙋ посвѧти́вый: ра́дꙋйсѧ, во пло́ти ꙗ҆́кѡ а҆́гг҃лъ безпло́тенъ пожи́вый.

Ра́дꙋйсѧ, і҆ѡа́нне, пресла́вный чꙋдотво́рче.

Конда́къ а҃і

Пѣ́нїе бл҃года́рственное є҆диносꙋ́щнѣй трⷪ҇цѣ ѿ всеѧ̀ дꙋшѝ возсыла́лъ є҆сѝ, прпⷣбне і҆ѡа́нне, вѣ́даѧ кончи́нꙋ земна́гѡ по́двига твоегѡ̀, є҆ѧ́же съ ра́достїю ча́ѧ, бл҃годари́лъ є҆сѝ бг҃а, зовы́й: А҆ллилꙋ́їа.

І҆́косъ а҃і

Свѣ́тлѡ сїѧ́ющее лицѐ твоѐ, ꙗ҆́кѡ а҆́гг҃ла бж҃їѧ, и҆ тѣ́ло твоѐ а҆́ки снѣ́гъ бѣло̀ ѡ҆брѣ́тесѧ, є҆гда̀ преста́вилсѧ є҆сѝ ко гдⷭ҇ꙋ, бл҃же́нне і҆ѡа́нне: многоско́рбнагѡ бо ра́ди и҆ претрꙋ́днагѡ по́двига твоегѡ̀, дарова́ ти гдⷭ҇ь кончи́нꙋ хрⷭ҇тїа́нскꙋю. є҆ѧ́же мл҃твами твои́ми сподо́би и҆ на́съ грѣ́шныхъ, да зове́мъ тѝ такова̑ѧ:

Ра́дꙋйсѧ, въ го́рнїй сїѡ́нъ цр҃ѧ̀ нбⷭ҇нагѡ дꙋше́ю востекі́й: ра́дꙋйсѧ, ꙗ҆́кѡ та́мѡ, предстоѧ̀ є҆мꙋ̀, ѡ҆ всѣ́хъ на́съ те́плѣ хода́тайствꙋеши.

Ра́дꙋйсѧ, во вре́мѧ нощна́гѡ по́двига тече́нїе твоѐ сконча́вый: ра́дꙋйсѧ, хрⷭ҇тїа́нскꙋю кончи́нꙋ безболѣ́зненнꙋ, непосты́днꙋ и҆ ми́рнꙋ ѿ гдⷭ҇а воспрїе́мый.

Ра́дꙋйсѧ, глꙋбо́кагѡ смире́нїѧ стѧжа́телю: ра́дꙋйсѧ, кро́тости и҆ терпѣ́нїѧ хрⷭ҇то́ва преди́вный подража́телю.

Ра́дꙋйсѧ, і҆ѡа́нне, пресла́вный чꙋдотво́рче.

Конда́къ в҃і

Бл҃года́ть да́ннꙋю тѝ ѿ бг҃а вѣ́дѧще, бл҃гоговѣ́йнѡ покланѧ́емсѧ ст҃ы̑мъ моще́мъ твои̑мъ, лобыза́емъ ст҃олѣ́пное и҆з̾ѡбраже́нїе ли́ка твоегѡ̀, ᲂу҆го́дниче бж҃їй і҆ѡа́нне, и҆ мо́лимтисѧ, не ѡ҆ста́ви на́съ твои́мъ мл҃твеннымъ предста́тельствомъ ко хрⷭ҇тꙋ̀ бг҃ꙋ, є҆мꙋ́же бл҃года́рнѣ пое́мъ: А҆ллилꙋ́їа.

І҆́косъ в҃і

Пою́ще твоѐ житїѐ, восхвалѧ́емъ ми́рнꙋю кончи́нꙋ твою̀, бл҃же́нне і҆ѡа́нне, и҆ мо́лимтисѧ, бꙋ́ди на́мъ во все́мъ ко бл҃гꙋ ско́рый помо́щниче, зовꙋ́щымъ тѝ такова̑ѧ:

Ра́дꙋйсѧ, ꙗ҆́кѡ ѡ҆де́жды грѣхо́вныѧ совле́клсѧ є҆сѝ: ра́дꙋйсѧ, ꙗ҆́кѡ въ ри́зꙋ чистоты̀ и҆ непоро́чности ѡ҆бле́клсѧ є҆сѝ.

Ра́дꙋйсѧ, гра́да ᲂу҆́стюга до́брый и҆ неꙋсы́пный блюсти́телю: ра́дꙋйсѧ, ꙗ҆́кѡ ѡ҆ всѣ́хъ съ вѣ́рою молѧ́щихсѧ тебѣ̀ при́снѡ ко гдⷭ҇ꙋ хода́тайствꙋеши.

Ра́дꙋйсѧ, терпѣ́нїѧ и҆ ѕлострада́нїѧ ди́вный ѡ҆́бразе: ра́дꙋйсѧ, всѣ́хъ добродѣ́телей зерца́ло пресвѣ́тлое.

Ра́дꙋйсѧ, і҆ѡа́нне, пресла́вный чꙋдотво́рче.

Конда́къ г҃і

Ѽ всебл҃же́нный ст҃ы́й првⷣный і҆ѡа́нне! прїимѝ сїѐ ма́лое хвале́бное пѣ́нїе на́ше, и҆ и҆зба́ви на́съ ѿ всѧ́кагѡ ѕла́гѡ ѡ҆бстоѧ́нїѧ, ѿ напра́сныѧ сме́рти и҆ вѣ́чныѧ мꙋ́ки, и҆ сподо́би на́съ твои́мъ предста́тельствомъ къ бг҃ꙋ, да съ тобо́ю и҆ всѣ́ми ст҃ы́ми пое́мъ є҆мꙋ̀ во вѣ́ки: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃ли ра́довахꙋсѧ житїю̀ твоемꙋ̀, свѧ́тче бж҃їй і҆ѡа́нне: всѧ̑ бо земна̑ѧ во ᲂу҆ме́ты вмѣни́лъ є҆сѝ, нищетꙋ́ же во́льнꙋю ѿ ю҆́ности до гро́ба претерпѣва́ѧ, хрⷭ҇та̀ ра́ди ю҆ро́дъ бы́лъ є҆сѝ. тѣ́мже ᲂу҆блажа́емъ тѧ̀:

Ра́дꙋйсѧ, соверше́нный нестѧжа́телю, є҆ди́но то́чїю рꙋ́бище раздра́нное и҆мѣ́вый ѡ҆ чре́слѣхъ твои́хъ: ра́дꙋйсѧ, по́стниче, во дни̑ среды̀ и҆ пѧтка̀ ничто́же вкꙋша́вый.

Ра́дꙋйсѧ, во́ине хрⷭ҇то́въ, бл҃года́тїю є҆гѡ̀ мі́ръ, пло́ть и҆ дїа́вола побѣди́вый: ра́дꙋйсѧ, мл҃твенниче, рꙋ́цѣ ко гдⷭ҇ꙋ ѡ҆ творѧ́щихъ непра́вдꙋ воздѣва́вый.

Ра́дꙋйсѧ, ст҃а́гѡ проко́пїа, хрⷭ҇та̀ ра́ди ю҆ро́дивагѡ, и҆́стинный подража́телю: ра́дꙋйсѧ, свѧ́тость житїѧ̀ твоегѡ̀ бꙋ́йствомъ ю҆ро́да мꙋ́дрѣ сокрыва́вый.

Ра́дꙋйсѧ, і҆ѡа́нне, пресла́вный чꙋдотво́рче.

Конда́къ а҃

И҆збра́нный ᲂу҆го́дниче хрⷭ҇то́въ и҆ предста́телю на́шъ ᲂу҆ ст҃ы́ѧ трⷪ҇цы, і҆ѡа́нне всебл҃же́нне, похва́льными пѣ́сньми ѿ любвѐ дꙋше́вныѧ ᲂу҆блажа́емъ тѧ̀ застꙋ́пника и҆ покрови́телѧ на́шего. ты́ же, ꙗ҆́кѡ и҆мѣ́ѧй дерзнове́нїе ко гдⷭ҇ꙋ, ѿ всѧ́кихъ бѣ́дъ и҆ напа́стей свободѝ на́съ, да зове́мъ тѝ:

Ра́дꙋйсѧ, і҆ѡа́нне, пресла́вный чꙋдотво́рче.

Моли́твы

Ѽ ст҃ы́й бл҃же́нный і҆ѡа́нне! припа́дающе смире́ннѡ мо́лимтисѧ, прїимѝ на́ше ма́лое моле́нїе, и҆ ᲂу҆молѝ всемлⷭ҇тивагѡ гдⷭ҇а бг҃а на́шего, да проба́витъ млⷭ҇ть свою̀ на́мъ грѣ́шнымъ и҆ да да́рꙋетъ на́мъ всѧ̑ ꙗ҆̀же къ животꙋ̀ и҆ ко сп҃се́нїю бл҃гопотрє́бнаѧ.

Ѽ ᲂу҆го́дниче хрⷭ҇то́въ! а҆́ще и҆ ѕѣлѡ̀ недосто́йни є҆смы̀, ѻ҆ба́че дꙋ́хомъ сокрꙋше́ннымъ и҆ се́рдцемъ смире́ннымъ па́ки припа́дающе мо́лимтисѧ: предста́тельствомъ твои́мъ ко гдⷭ҇ꙋ, бл҃гопоспѣшѝ: стра́ждꙋщꙋю странꙋ̀ рѡссі́йскꙋю гдⷭ҇ь ѿ лю́тыхъ безбѡ́жникъ и҆ вла́сти и҆́хъ да свободи́тъ, и҆ да возста́витъ престо́лъ правосла́вныхъ прави́телей: вѣ́рныхъ рабѡ́въ є҆гѡ̀, въ ско́рби и҆ печа́ли де́нь и҆ но́щь вопїю́щихъ къ немꙋ̀, многоболѣ́зный во́пль да ᲂу҆слы́шитъ и҆ да и҆зведе́тъ ѿ поги́бели живо́тъ на́шъ. гра́дъ тво́й ᲂу҆́стюгъ и҆ всѧ̑ гра̑ды и҆ вє́си рѡссі̑йскїѧ соблюдѝ ѿ всѧ́кагѡ ѕла̀ и҆ ѿ всѧ́кїѧ напа́сти, гꙋби́тельства, гла́да, трꙋ́са, пото́па, ѻ҆гнѧ̀, меча̀, наше́ствїѧ и҆ноплеме́нникѡвъ и҆ междоꙋсо́бныѧ бра́ни, ѿ всѧ́кїѧ болѣ́зни и҆ ѿ всѧ́кагѡ ѡ҆бстоѧ́нїѧ, да всегда̀ пое́мъ и҆ велича́емъ всест҃о́е и҆ великолѣ́пое и҆́мѧ бж҃їе, и҆ твоѐ млⷭ҇тивое ѡ҆ на́съ предста́тельство во вѣ́ки вѣкѡ́въ. А҆ми́нь.