Канѡ́нъ ст҃о́мꙋ мꙋ́ченикꙋ є҆рме́ю кѡма́нскомꙋ

Звезда́, сия́ющая Боже́ственным све́том, муче́ния сия́нием позна́н бы́л еси́, све́тло вся́ озаря́я, ве́рою чи́стою тя́, Ерме́е, чту́щия.

Вы́ну воззре́нием, е́же к Бо́гу, вся́ презре́в, я́же в житии́, му́чениче му́дре, в му́ченическия вше́л еси́ по́двиги и врага́ держа́вно победи́л еси́.

Красе́н виде́нием и душе́ю сы́й, Ерме́е, вво́инился еси́ Царю́ Небе́сному и Сего́, му́чениче, до конца́ враги́ смири́л еси́.

Не поже́ршу ти́ и́долом, блаже́нне, твоя́ исторго́ша зу́бы, че́люсти мы́сленных сокруши́л еси́ льво́в и побе́ды оде́ялся венце́м неувяда́ющим.

Украше́ние бы́л еси́ страда́льцев, му́дре, благода́тию Богосия́нною. Те́мже, и́же в ми́ре, благоче́стно тя́ почита́ем.

Хвалу́ Бо́гу на́шему, че́люстем твои́м сокруша́емым, му́чениче му́дре, тя́ укре́пльшему, благода́рно воспева́л еси́.

Си́лою Боже́ственнаго Ду́ха ты́ укрепля́емь, прему́дре, си́льнаго, ра́дуяся, в зло́бе смири́л еси́ зми́я.

То́ки крове́й твои́х многобо́жия о́гнь погаси́ша, ве́рным же роса́ яви́шася, страстоте́рпче му́чениче досточу́дне.

Тро́ическою благода́тию, му́чениче, ороша́емь, пребыва́еши неопали́мь, посреди́ пла́мене стоя́ три́ дни́, всесла́вне.

Ли́к Небе́сных си́л свы́ше смотря́ше до́блесть, и по́двиг твои́х кре́пости, страда́льче Ерме́е, дивя́ся.

Сокруша́емь те́лом, му́чениче пресла́вне, мно́гими му́ками сокруше́ние соде́лал еси́ в поги́бель истука́нным благода́тию, сего́ ра́ди все́х благочести́вых благода́тию Боже́ственною исцеля́еши душе́вная сокруше́ния.

Го́рькими отра́вы, му́чениче, напое́н пребыва́еши невреди́мь, во изве́стну ве́ру призыва́я си́х Пода́теля, претворя́ема твои́м све́тлым чудоде́йством к муче́ния красоте́ пресве́тло.

Ника́коже уклони́лся еси́ стоя́ния лу́чшаго, блаже́нне, укрепля́ющаго тя́, и утвержда́юща, и исправля́юща по́двиги вся́, е́же к нему́ бы́вшее, прозря́ нра́ва простото́ю.

Всеце́ло к Бо́гу, всеблаже́нне, име́я жела́ние, боле́зни и терза́ния Боже́ственнаго твоего́ телесе́, я́коже ино́му стра́ждущу, терпе́л еси́, ра́дуяся, венца́ прозира́я.

Претерпе́л еси́ кре́пко жи́л твои́х отъя́тие, Ерме́е, му́чениче Христо́в, врага́ многоко́зненнаго жи́лы истерза́я благода́тию и му́жеству вся́кому о́браз явля́яся.

Изощре́н огне́м Христо́вы любве́, я́ко обою́ду о́стр вои́стинну бы́л еси́ ме́чь во́инства безбо́жная, я́ко тве́рд ору́жник, посека́я явле́нно.

К Бо́гу зря́, могу́щему спасти́, ума́ пра́востию, претерпе́л еси́ боле́зни, Ерме́е, до́бляго твоего́ те́ла, воспева́я: оте́ц на́ших Бо́же, благослове́н еси́.

Кропле́нием твои́х крове́й о́гнь угаси́л еси́ безбо́жия, в пла́мень же вше́д, не опали́лся еси́ отню́д, воспева́я, пребога́те: оте́ц на́ших Бо́же, благослове́н еси́.

Блажи́т тя́ вся́ка Це́рковь, зря́щи до́блести твоя́, благода́ть же чуде́с и побе́дныя по́чести, я́же подаде́ тебе́ Госпо́дь, му́чениче Ерме́е му́дре, све́тло подвиза́вшуся.

Беззако́нных веле́ние, зако́ном укрепля́емь и́стинным, страда́льче Ерме́е, ра́дуяся, преоби́дел еси́: и по́двиги вели́кими, блаже́нне, терпя́, прия́л еси́ я́же в Вы́шних жили́ща во ве́ки.

Не ужаса́юся вся́каго боле́зней веле́ния пребыва́ема, ни принесу́ че́сти не су́щим бого́м, — взыва́л еси́, всеблаже́нне, — еди́наго то́кмо чту́ Иису́са Го́спода, при Понти́йстем Пила́те распе́ншагося.

Пожре́тися ше́л еси́, я́ко овча́ незло́биво, му́чениче Ерме́е, за Поже́ршагося на́с ра́ди, я́ко овча́те, и же́ртвы ме́рзкия вся́ от земли́ отъе́мшаго, те́мже во хвале́нии досто́йно тя́ пое́м.

Ви́дети сподо́бился еси́, разреши́вся от пло́ти, страстоте́рпче прехва́льне, блага́я, я́же тебе́ угото́ва Бо́г и с тобо́ю пострада́вшим и низло́жшим лука́ваго. С ни́миже на́м спасти́ся Го́спода моли́, му́чениче Ерме́е достохва́льне.

Красе́н тво́й ви́д и пре́жде твоего́ страда́ния, красне́йши яви́ся, му́дре по по́двизех чу́дных, а́нгельскою све́тлостию укра́шен, сла́вне. Те́мже и к кра́сным восте́кл еси́ черто́гом, побе́дными венцы́ удобре́н.

Во́инство преоби́дел еси́ земно́е, Царю́ Небе́сному во́инствуеши, му́чениче му́дре, Его́же си́лою кре́пкою де́монския полки́ вся́ потреби́л еси́ держа́вно и побе́дными венцы́ зако́нно увя́злся еси́, о на́с моли́ всегда́.

Па́мять твоя́ наста́ светоза́рная, на́ша мы́сли просвеща́ющи луча́ми по́двиг твои́х тве́рдых, в не́йже мо́лим тя́: име́яй дерзнове́ние ко Христу́, моли́ непреста́нно улучи́ти на́м ми́лость в Де́нь Су́дный.

Ѕвѣзда̀ сїѧ́ющаѧ бжⷭ҇твеннымъ свѣ́томъ, мꙋче́нїѧ сїѧ́нїемъ позна́нъ бы́лъ є҆сѝ, свѣ́тлѡ всѧ̑ ѡ҆зарѧ́ѧ, вѣ́рою чи́стою тѧ̀, є҆рме́е, чтꙋ́щыѧ.

Вы́нꙋ воззрѣ́нїемъ є҆́же къ бг҃ꙋ, всѧ̑ презрѣ́въ ꙗ҆̀же въ житїѝ, мч҃ниче мꙋ́дре, въ мꙋ́ченичєскїѧ вше́лъ є҆сѝ по́двиги, и҆ врага̀ держа́внѡ побѣди́лъ є҆сѝ.

Красе́нъ видѣ́нїемъ и҆ дꙋше́ю сы́й, є҆рме́е, вво́инилсѧ є҆сѝ цр҃ю̀ нбⷭ҇номꙋ, и҆ сегѡ̀, мꙋ́чениче, до конца̀ врагѝ смири́лъ є҆сѝ.

Не поже́ршꙋ тѝ і҆́дѡлѡмъ, бл҃же́нне, твоѧ̀ и҆сторго́ша зꙋ́бы, чє́люсти мы́сленныхъ сокрꙋши́лъ є҆сѝ львѡ́въ, и҆ побѣ́ды ѡ҆дѣ́ѧлсѧ вѣнце́мъ неꙋвѧда́ющимъ.

Оу҆краше́нїе бы́лъ є҆сѝ страда́льцєвъ, мꙋ́дре, благода́тїю бг҃осїѧ́нною. тѣ́мже и҆̀же въ мі́рѣ, благоче́стнѡ тѧ̀ почита́емъ.

Хвалꙋ̀ бг҃ꙋ на́шемꙋ, че́люстемъ твои̑мъ сокрꙋша́ємымъ, мꙋ́чениче мꙋ́дре, тѧ̀ ᲂу҆крѣ́пльшемꙋ благода́рнѡ воспѣва́лъ є҆сѝ.

Си́лою бжⷭ҇твеннагѡ дх҃а ты̀ ᲂу҆крѣплѧ́емь, премꙋ́дре, си́льнаго ра́дꙋѧсѧ въ ѕло́бѣ смири́лъ є҆сѝ ѕмі́ѧ.

То́ки крове́й твои́хъ многобо́жїѧ ѻ҆́гнь погаси́ша: вѣ̑рнымъ же роса̀ ꙗ҆ви́шасѧ, страстоте́рпче мч҃ниче досточꙋ́дне.

Трⷪ҇ческою бл҃года́тїю, мч҃ниче, ѡ҆роша́емь, пребыва́еши неѡпали́мь, посредѝ пла́мене стоѧ̀ трѝ днѝ, всесла́вне.

Ли́къ нбⷭ҇ныхъ си́лъ свы́ше смотрѧ́ше до́блесть, и҆ пѡ́двигъ твои́хъ крѣ́пости, страда́льче є҆рме́е, дивѧ́сѧ.

Сокрꙋша́емь тѣ́ломъ, мч҃ниче пресла́вне, мно́гими мꙋ́ками сокрꙋше́нїе содѣ́лалъ є҆сѝ въ поги́бель и҆стꙋка̑ннымъ, благода́тїю. сегѡ̀ ра́ди всѣ́хъ благочести́выхъ, бл҃года́тїю бжⷭ҇твенною, и҆сцѣлѧ́еши дꙋшє́внаѧ сокрꙋшє́нїѧ.

Го́рькими ѡ҆тра́вы, мꙋ́чениче, напое́нъ, пребыва́еши невреди́мь, во и҆звѣ́стнꙋ вѣ́рꙋ призыва́ѧ си́хъ пода́телѧ, претворѧ́ема твои́мъ свѣ́тлымъ чꙋдодѣ́йствомъ къ мꙋче́нїѧ красотѣ̀ пресвѣ́тлѡ.

Ника́коже ᲂу҆клони́лсѧ є҆сѝ стоѧ́нїѧ лꙋ́чшагѡ, бл҃же́нне, ᲂу҆крѣплѧ́ющагѡ тѧ̀ и҆ ᲂу҆твержда́юща, и҆ и҆справлѧ́юща по́двиги всѧ̑, є҆́же къ немꙋ̀ бы́вшее, прозрѧ̀ нра́ва простото́ю.

Всецѣ́ло къ бг҃ꙋ, всебл҃же́нне, и҆мѣ́ѧ жела́нїе, болѣ̑зни и҆ терза̑нїѧ, бжⷭ҇твеннагѡ твоегѡ̀ тѣлесѐ, ꙗ҆́коже и҆но́мꙋ стра́ждꙋщꙋ, терпѣ́лъ є҆сѝ ра́дꙋѧсѧ, вѣнца̀ прозира́ѧ.

Претерпѣ́лъ є҆сѝ крѣ́пкѡ жи́лъ твои́хъ ѿѧ́тїе, є҆рме́е мꙋ́чениче хрⷭ҇то́въ, врага̀ многоко́зненнагѡ жи̑лы и҆стерза́ѧ благода́тїю, и҆ мꙋ́жествꙋ всѧ́комꙋ ѻ҆́бразъ ꙗ҆влѧ́ѧсѧ.

И҆з̾ѡщре́нъ ѻ҆гне́мъ хрⷭ҇то́вы любвѐ, ꙗ҆́кѡ ѻ҆бою́дꙋ ѻ҆́стръ вои́стиннꙋ бы́лъ є҆сѝ ме́чь, вѡ́инства безбѡ́жнаѧ, ꙗ҆́кѡ тве́рдъ ѻ҆рꙋ́жникъ, посѣка́ѧ ꙗ҆вле́ннѡ.

Къ бг҃ꙋ зрѧ̀ могꙋ́щемꙋ спастѝ, ᲂу҆ма̀ пра́востїю, претерпѣ́лъ є҆сѝ болѣ́зни, є҆рме́е, до́блѧгѡ твоегѡ̀ тѣ́ла, воспѣва́ѧ: ѻ҆тє́цъ на́шихъ бж҃е, бл҃гослове́нъ є҆сѝ.

Кропле́нїемъ твои́хъ крове́й ѻ҆́гнь ᲂу҆гаси́лъ є҆сѝ безбо́жїѧ, въ пла́мень же вше́дъ, не ѡ҆пали́лсѧ є҆сѝ ѿню́дъ, воспѣва́ѧ, пребога́те: ѻ҆тє́цъ на́шихъ бж҃е, бл҃гослове́нъ є҆сѝ.

Блажи́тъ тѧ̀ всѧ́ка цр҃ковь, зрѧ́щи до́блєсти твоѧ̑, благода́ть же чꙋде́съ, и҆ побѣ̑дныѧ по́чєсти, ꙗ҆̀же подадѐ тебѣ̀ гдⷭ҇ь, мꙋ́чениче є҆рме́е мꙋ́дре, свѣ́тлѡ подвиза́вшꙋсѧ.

Беззако́нныхъ велѣ́нїе, зако́номъ ᲂу҆крѣплѧ́емь и҆́стиннымъ, страда́льче є҆рме́е, ра́дꙋѧсѧ преѡби́дѣлъ є҆сѝ: и҆ по́двиги вели́кими, блаже́нне, терпѧ̀ прїѧ́лъ є҆сѝ, ꙗ҆̀же въ вы́шнихъ жили̑ща во вѣ́ки.

Не ᲂу҆жаса́юсѧ всѧ́кагѡ болѣ́зней велѣ́нїѧ пребыва́ема, ни принесꙋ̀ че́сти не сꙋ́щымъ богѡ́мъ,– взыва́лъ є҆сѝ, всеблаже́нне,– є҆ди́наго то́кмѡ чтꙋ̀ і҆и҃са гдⷭ҇а, при понті́йстѣмъ пїла́тѣ распе́ншагосѧ.

Пожре́тисѧ ше́лъ є҆сѝ ꙗ҆́кѡ ѻ҆вча̀ неѕло́биво, мч҃ниче є҆рме́е, за поже́ршагосѧ на́съ ра́ди ꙗ҆́кѡ ѻ҆вча́те, и҆ жє́ртвы мє́рзкїѧ всѧ̑ ѿ землѝ ѿе́мшаго: тѣ́мже во хвале́нїи досто́йнѡ тѧ̀ пое́мъ.

Ви́дѣти сподо́билсѧ є҆сѝ, разрѣши́всѧ ѿ пло́ти, страстоте́рпче прехва́льне, бл҃га̑ѧ, ꙗ҆̀же тебѣ̀ ᲂу҆гото́ва бг҃ъ, и҆ съ тобо́ю пострада́вшымъ, и҆ низло́жшымъ лꙋка́ваго. съ ни́миже на́мъ спасти́сѧ гдⷭ҇а молѝ, мч҃ниче є҆рме́е достохва́льне.

Красе́нъ тво́й ви́дъ и҆ пре́жде твоегѡ̀ страда́нїѧ, краснѣ́йши ꙗ҆ви́сѧ, мꙋ́дре, по по́двизѣхъ чꙋ́дныхъ, а҆́гг҃льскою свѣ́тлостїю ᲂу҆кра́шенъ, сла́вне. тѣ́мже и҆ къ кра̑снымъ восте́клъ є҆сѝ черто́гѡмъ, побѣ́дными вѣнцы̑ ᲂу҆добре́нъ.

Во́инство преѡби́дѣлъ є҆сѝ земно́е, цр҃ю̀ нбⷭ҇номꙋ во́инствꙋеши, мч҃ниче мꙋ́дре. є҆гѡ́же си́лою крѣ́пкою де́мѡнскїѧ полкѝ всѧ̑ потреби́лъ є҆сѝ держа́внѡ, и҆ побѣ́дными вѣнцы̑ зако́ннѡ ᲂу҆вѧ́злсѧ є҆сѝ, ѡ҆ на́съ молѝ всегда̀.

Па́мѧть твоѧ̀ наста̀ свѣтоза́рнаѧ, на́шѧ мы̑сли просвѣща́ющи лꙋча́ми пѡ́двигъ твои́хъ тве́рдыхъ. въ не́йже мо́лимъ тѧ̀: и҆мѣ́ѧй дерзнове́нїе ко хрⷭ҇тꙋ̀, молѝ непреста́ннѡ, ᲂу҆лꙋчи́ти на́мъ ми́лость въ де́нь сꙋ́дный.