Кондак 1
Избра́нный воево́до во́инов духо́вных, в пусты́ни оби́тели возгради́вый и мно́жество и́нок собра́вый, свя́тостию жития́ и чудесы́ просия́вый и Бо́гу до́бре угоди́вый, преподо́бне о́тче Диони́сие! Восхваля́ем тя́ с любо́вию, засту́пника на́шего. Ты́ же, я́ко име́яй дерзнове́ние ко Го́споду, моли́твами твои́ми от вся́ких на́с бе́д свободи́, да зове́м ти́:
Ра́дуйся, Диони́сие, вели́кий чудотво́рче.
Икос 1
А́нгел земны́й и челове́к небе́сный бы́л еси́, преподо́бне о́тче Диони́сие, утаи́вый от на́с по смире́нию твоему́ ро́д тво́й и роди́тели твоя́, да уве́римся, я́ко от Бо́га к на́м прише́л еси́, равноа́нгельнаго жития́ до́брый учи́телю, приведы́й ко Го́споду мно́гия ду́шы челове́ческия о́бразом жития́ твоего́ свята́го и уче́нием твои́м боже́ственным. Те́мже ублажа́ем тя́ и пое́м ти́ си́це:
Ра́дуйся, звездо́ пресве́тлая, полу́нощную страну́ духо́вно просвети́вшая; ра́дуйся, свети́льниче немерца́яй Бо́жия благода́ти.
Ра́дуйся, Ева́нгелиа Христо́ва ве́рный послу́шателю; ра́дуйся, я́ко взе́м кре́ст тво́й, во сле́д Христа́ усе́рдно от ю́ности и до ста́рости масти́тыя ходи́л еси́.
Ра́дуйся, подви́жническое духо́вное житие́ возлюби́вый; ра́дуйся, стопы́ твоя́ на пу́ть спасе́ния неукло́нно напра́вивый.
Ра́дуйся, уси́ленно еди́наго на потре́бу взыска́вый; ра́дуйся, бла́га нетле́нная и ве́чная па́че тле́нных и скороги́бнущих возжела́вый.
Ра́дуйся, тесноту́ и ско́рбь и́ноческаго жития́ избра́вый; ра́дуйся, сожи́тельства с преподо́бными иска́вый.
Ра́дуйся, смире́нием святы́м благоукраше́нный; ра́дуйся, терпе́нием кре́пким вся́ искуше́ния вра́жия отрази́вый.
Ра́дуйся, Диони́сие, вели́кий чудотво́рче.
Кондак 2
Ви́дев преподо́бный игу́мен Диони́сий, прозорли́выми очесы́ свои́ми благопло́дную добро́ту ду́шы твоея́, преподо́бне о́тче, егда́ прише́л еси́ к нему́ во оби́тель Спа́со-Ка́менскую, прия́т тя́ с любо́вию и наставля́ше богому́дре на по́двиги духо́вныя; ты́ же, преблаже́нне, вся́ словеса́ его́ слага́л еси́ в се́рдце твое́м, и яви́лся еси́ до́брый учени́к до́браго учи́теля, зовы́й ку́пно с ни́м Небе́сному Учи́телю Христу́ немо́лчную пе́снь: Аллилу́иа.
Икос 2
Разуме́в тя́ сосу́д избра́н Бо́жия благода́ти бы́ти, игу́мен Диони́сий возлюби́ тя́, о́тче преподо́бне, и постриже́ во святы́й и́ноческий о́браз, наименова́в тя́ в постриже́нии и́менем свои́м Диони́сий, да бу́деши ему́ подража́тель и́менем и де́лы преподо́бными. Сие́ воспомина́юще, с любо́вию тебе́ зове́м:
Ра́дуйся, и́ноче боголюбе́зный, во́лю твою́ во́ли Бо́жией повину́вый; ра́дуйся, по Бо́зе послуша́ние соверше́нное настоя́телю твоему́ яви́вый.
Ра́дуйся, за кро́тость нра́ва все́ю бра́тиею люби́мый; ра́дуйся, тяготы́ бли́жних твои́х с любо́вию носи́вый.
Ра́дуйся, во труде́х и по́двизех и́ноческих преуспе́вый; ра́дуйся, вся́ послуша́ния монасты́рская без ро́пота исполня́вый.
Ра́дуйся, пра́здность душегуби́тельную возненави́девый; ра́дуйся, моли́твы и бде́ния всено́щныя возлюби́вый.
Ра́дуйся, пе́рвый на моли́тву во хра́м Бо́жий приходи́вый; ра́дуйся, после́дний по сконча́нии богослуже́ния из него́ исходи́вый.
Ра́дуйся, примета́выйся усе́рдно в дому́ Бо́жии; ра́дуйся, я́ко ду́шу твою́ в до́м Ду́ху Свято́му угото́вал еси́.
Ра́дуйся, Диони́сие, вели́кий чудотво́рче.
Кондак 3
Си́лою Всевы́шняго укрепля́емый, вся́ искуше́ния диа́вольская бо́дренными моли́твами твои́ми победи́л еси́, о́тче Диони́сие, и в новонача́лии и́ночестем вели́к подви́жник показа́лся еси́, о не́мже игу́мен Диони́сий и бра́тия его́ ра́довахуся и сла́вляху Бо́га, пою́ще Ему́: Аллилу́иа.
Икос 3
Име́я по́мысл чи́ст и непоро́чну ду́шу, и ви́дев себе́ почита́ема в Спа́со-Ка́менстей оби́тели, о́тче Диони́сие, я́ко смире́ния рачи́тель, умы́слил еси́ бежа́ти отту́ду в безмо́лвие пусты́ни, да не превозноше́нием су́етным уловле́н бу́деши. Те́мже, получи́в благослове́ние твоего́ настоя́теля, вку́пе со дру́гом твои́м, преподо́бным Пахо́мием, удали́лся еси́ из оби́тели в пусты́нное ме́сто, на святу́ю Лу́ку, и та́мо безмо́лвно пребыва́л еси́ в посте́х и моли́твах, иде́же, а́ки срета́юща тя́, земна́го а́нгела и небе́снаго челове́ка, благоумиле́нно вопие́м ти́:
Ра́дуйся, безмо́лвия рачи́телю, пусты́ню духо́вно уплодоноси́вый; ра́дуйся, подви́жническим житие́м твои́м сию́ просла́вивый.
Ра́дуйся, дре́во благопло́дное, при вода́х пусты́нных возра́стшее; ра́дуйся, плоды́ мно́гия Христу́ принесы́й.
Ра́дуйся, сла́дость безмо́лвия пусты́ннаго вкуси́вый; ра́дуйся, посто́м и воздержа́нием пло́ть твою́ ду́ху покори́вый.
Ра́дуйся, моли́твами сле́зными пла́мень страсте́й в себе́ угаси́вый; ра́дуйся, безстра́стие благода́тное стяжа́вый.
Ра́дуйся, богомы́слием непреста́нным у́м тво́й просвети́вый; ра́дуйся, трезве́ние моли́твенное приобреты́й.
Ра́дуйся, боже́ственнаго и́мене Иису́с Христо́ва немо́лчный призыва́телю; ра́дуйся, за́поведей Христо́вых ре́вностный храни́телю.
Ра́дуйся, Диони́сие, вели́кий чудотво́рче.
Кондак 4
Бу́ря искуше́ний диа́вольских не поколеба́ твоего́ терпе́ния и му́жества в пусты́ни, преподо́бне о́тче, но я́ко кре́пкий адама́нт, не измени́лся еси́ от прираже́ний дре́вняго зми́я человекоуби́йцы, и сия́ кре́пкими моли́твами твои́ми победоно́сно отрази́л еси́, во смире́нии глубо́цем пребыва́я и со слеза́ми вопия́ ко Го́споду: Аллилу́иа.
Икос 4
Слы́шим тя́, преподо́бне о́тче, хра́м Бо́жий во и́мя вели́каго святи́теля и чудотво́рца Никола́а в пусты́ни твое́й, на святе́й Лу́це, люботру́дно созда́вшаго, к нему́же во иере́а посвяще́н бы́л еси́ от руки́ архиепи́скопа Росто́вскаго Григо́риа, и я́ко храмозда́тель благослове́нный и священнотаи́нник Бо́жия благода́ти, досто́йно слы́шиши от на́с сицева́я:
Ра́дуйся, хра́м Бо́жий в души́ твое́й созда́вый; ра́дуйся, же́ртвы непоро́чныя Бо́гови принесы́й.
Ра́дуйся, преподо́бно и пра́ведно пожи́вый; ра́дуйся, дерзнове́ние мно́гое ко Го́споду стяжа́вый.
Ра́дуйся, моли́твами твои́ми зна́мения и чудеса́ соверша́яй; ра́дуйся, благода́ти Бо́жия преиспо́лненный.
Ра́дуйся, блаже́нный храмозда́телю; ра́дуйся, оби́тели пусты́нныя основа́телю.
Ра́дуйся, мно́гая ча́да духо́вная собра́вый; ра́дуйся, ко спасе́нию и́х до́бре руководи́вый.
Ра́дуйся, пра́вило преподо́бнаго и́ноческаго жития́; ра́дуйся, о́бразе богоугожде́ния и́стиннаго.
Ра́дуйся, Диони́сие, вели́кий чудотво́рче.
Кондак 5
Богому́дре управля́л еси́, о́тче Диони́сие, оби́телию пусты́нною на святе́й Лу́це, я́же кри́н в пусты́ни, процвете́ духо́вно: оба́че, стужи́в си́ молво́ю челове́ческою, настоя́тельство в не́й вручи́л еси́ спо́стнику твоему́, преподо́бному Пахо́мию, са́м же удали́лся еси́ в пусты́ню глубоча́йшую, на реку́ Глуши́цу, да та́мо еди́н Еди́ному Бо́гу возмо́жеши невозбра́нно пе́ти а́нгельскую пе́снь: Аллилу́иа.
Икос 5
Ви́дев красоту́ ме́ста пусты́ннаго в лесно́й де́бри, на реце́ Глуши́це, о́тче преподо́бне, и слы́шав на не́м зво́н церко́вный, позна́л еси́ во́лю Бо́жию, та́мо тебе́ всели́тися и оби́тель возгради́ти; те́мже помоли́вся со слеза́ми, ке́ллию ма́лу под дре́вом чере́мховым та́мо себе́ постро́ил еси́, освяти́в ме́сто о́ное во оби́тель во и́мя Пресвяты́я Богоро́дицы, честна́го и сла́внаго Ея́ Покро́ва, иде́же мы́ ны́не тя́ ублажа́ем и пое́м:
Ра́дуйся, пустынножи́телей сла́во и похвало́; ра́дуйся, ди́вный избра́нниче Бо́жий, де́брь пусты́нную и́ноки насели́вый.
Ра́дуйся, ла́вру пресла́вную та́мо сооруди́вый; ра́дуйся, изря́дный слуго́ Пресвяты́я Богоро́дицы.
Ра́дуйся, ве́рный уго́дниче Сы́на Ея́ и Бо́га; ра́дуйся, при́сный раде́телю о душа́х челове́ческих.
Ра́дуйся, сотвори́вый свое́ спасе́ние труды́ и моли́твами, и ины́я тому́жде научи́вый; ра́дуйся, ве́лий нарече́нный во Ца́рствии Небе́снем.
Ра́дуйся, го́рлице пустыннолюби́вая, Глуши́цкую де́брь пе́нием моли́твенным огласи́вшая; ра́дуйся, в пусты́ни славосло́вии непреста́нными Бо́га сла́вивый.
Ра́дуйся, сле́з твои́х тече́ньми безпло́дную зе́млю духо́вно напои́вый; ра́дуйся, прозябе́ния богоуго́дная на не́й возрасти́вый.
Ра́дуйся, Диони́сие, вели́кий чудотво́рче.
Кондак 6
Пропове́дает пусты́нная Ла́вра твоя́, о́тче Диони́сие, труды́ и по́двиги твоя́, при устрое́нии ея́ подъя́тыя, ка́ко сооружа́я в не́й хра́мы Бо́жия, рука́ма твои́ма ко труду́ де́лателей прикаса́лся еси́, ико́ны же святы́я для ни́х благоле́пно написа́л еси́, иску́сный иконопи́сец бы́в. Те́мже ны́не во хра́мах небе́сных почива́еши и лицезре́ния Бо́жия наслажда́ешися, зовы́й все́х Творцу́ со а́нгелы и святы́ми: Аллилу́иа.
Икос 6
Возсия́л еси́ я́ко со́лнце пресве́тлое в пусты́ни Глуши́цтей, о́тче Диони́сие, и сия́нием до́брых де́л твои́х привле́кл еси́ во оби́тель твою́ мно́ги ревни́тели богоугожде́ния и́стиннаго, и́же стека́хуся к тебе́ отвсю́ду, да руково́дствуеши и́х ко спасе́нию; и та́ко мно́гая ча́да о Христе́ стяжа́л еси́, преблаже́нне, от ни́хже уго́дницы Бо́жии, преподо́бнии ученицы́ твои́, Амфило́хий, Мака́рий, Тара́сий и Феодо́сий, вку́пе с тобо́ю в лице́ святы́х просла́влени су́ть от Го́спода. С ни́ми у́бо тя́ восхваля́ем и зове́м:
Ра́дуйся, а́вво богому́дрый, и́нок мно́жество собра́вый; ра́дуйся, даро́в Свята́го Ду́ха сосу́де непоро́чный.
Ра́дуйся, ученики́ святы́я и богоуго́дныя духо́вно воспита́вый; ра́дуйся, ку́пно с ни́ми на небеси́ и на земли́ просла́вленный.
Ра́дуйся, общежи́тие бра́тское во оби́тели твое́й учреди́вый; ра́дуйся, уста́вы его́ са́м ве́рно всегда́ храни́вый.
Ра́дуйся, послуша́ние име́ти бра́тии твое́й законоположи́вый; ра́дуйся, непослуша́ние в ни́х гро́зно наказа́вый.
Ра́дуйся, я́ко ми́лостыню убо́гим неоску́дно подава́л еси́; ра́дуйся, я́ко во дни́ гла́да во оби́тели твое́й мно́ги препита́л еси́.
Ра́дуйся, тате́м похи́тившым достоя́ние оби́тели твоея́, не мсти́вый; ра́дуйся, добро́м за зло́ и́м возда́вый.
Ра́дуйся, Диони́сие, вели́кий чудотво́рче.
Кондак 7
Хотя́ вра́г спасе́ния челове́ческаго устраши́ти тя́, преподо́бне о́тче, привиде́нии свои́ми смуща́ше тя́ во вре́мя нощны́я твоея́ моли́твы, и два́жды бие́нием лю́тым ура́ни твое́ те́ло, я́ко бы́ти на не́м я́звам мно́гим; оба́че ты́ непоколеби́м в по́двизе твое́м пребы́л еси́, и я́звы сия́ до́блественне носи́л еси́, я́ко во́ин Иису́с Христо́в и му́чеников сострада́лец. Те́мже вла́сть ве́лию на ду́хи нечи́стыя от Го́спода получи́л еси́, я́ко про́чее не дерза́ти и́м приступи́ти к тебе́, внегда́ пе́л еси́ Бо́гу: Аллилу́иа.
Икос 7
Но́вую оби́тель и́ноческую в пусты́ни Сосно́вецтей возгради́л еси́, преподо́бне о́тче, и в не́й хра́м Бо́жий, во и́мя Предте́чи Госпо́дня Иоа́нна, созда́л еси́, в ню́же из ла́вры твоея́ на безмо́лвие уединя́лся еси́, и запове́дал еси́, да та́мо по кончи́не твое́й погребе́н бу́деши, да не запусте́ет ме́сто сие́, тобо́ю возлю́бленное. Помина́юще у́бо таково́е твое́ о безмо́лвии раче́ние и благо́е ко сме́рти приуготовле́ние, зове́м ти́:
Ра́дуйся, ма́слино благопло́дная, в пусты́ни возра́стшая; ра́дуйся, еле́ем до́брых де́л твои́х ду́шы ве́рных умасти́вый.
Ра́дуйся, дре́вних вели́ких преподо́бных оте́ц ди́вный подража́телю; ра́дуйся, Фиваи́ды Росси́йския основа́телю.
Ра́дуйся, до ста́рости масти́тыя Бо́гу неле́ностно послужи́вый; ра́дуйся, хле́б су́х еди́ножды в де́нь вкуша́вый.
Ра́дуйся, в посте́ суро́вем и моли́твах непреста́нных всю́ жи́знь твою́ препроводи́вый; ра́дуйся, поко́й теле́сный возненави́девый.
Ра́дуйся, кни́ги и ико́ны святы́я трудолю́бно писа́вый; ра́дуйся, сна́ и отдохнове́ния ма́ло приима́вый.
Ра́дуйся, вся́ твори́вый во сла́ву Бо́жию и на по́льзу душе́вную бли́жних твои́х; ра́дуйся, всего́ себе́ в же́ртву благоприя́тну Бо́гови принесы́й.
Ра́дуйся, Диони́сие, вели́кий чудотво́рче.
Кондак 8
Стра́нника и прише́льца в ми́ре се́м помышля́я себе́ бы́ти, преподо́бне о́тче, о часе́ сме́ртнем непреста́нно па́мятовал еси́, и моги́лу себе́ в Сосно́вецтей оби́тели твое́й рука́ма ископа́л еси́, над не́юже моли́твенно пла́кал еси́, воспомина́я сме́рть и су́д Бо́жий. Мо́лим тя́, уго́дниче Бо́жий, приме́ром твои́м святы́м научи́ и ны́ гре́шныя не забыва́ти гро́знаго часа́ сме́ртнаго, но при́сно гото́витися к нему́ и благоумиле́нно пе́ти Бо́гу: Аллилу́иа.
Икос 8
Ве́сь в Бо́зе бы́в, преподо́бне о́тче, о Бо́зе и благоугожде́нии Ему́ бесе́довал еси́ со ученики́ твои́ми, со слеза́ми умоля́л и́х ве́рно храни́ти за́поведи Христо́вы. Те́мже, я́ко возше́дый на высоту́ соверше́нства духо́внаго, виде́ний и открове́ний боже́ственных сподо́бился еси́, и прозорли́вства да́р свы́ше получи́л еси́, да и мы́ тебе́ пое́м:
Ра́дуйся, врачу́ благоиску́сный неду́гов душе́вных; ра́дуйся, бу́дущая я́ко настоя́щая прови́девый.
Ра́дуйся, а́нгела Бо́жия ви́дети сподо́бивыйся; ра́дуйся, о умноже́нии бра́тии во оби́тели твое́й извеще́ние от него́ прие́мый.
Ра́дуйся, благоволе́нием Пресвяты́я Богоро́дицы осене́нный; ра́дуйся, хра́м Бо́жий прекра́сен во и́мя Ея́ Свято́е сооруди́вый.
Ра́дуйся, мно́гия хра́мы Бо́жия не то́кмо во оби́телех твои́х, но и во окре́стных ве́сех люботру́дно постро́ивый; ра́дуйся, о славосло́вии Бо́жии зело́ поревнова́вый.
Ра́дуйся, ни́щий ду́хом, но мно́гия духо́вно обогати́вый; ра́дуйся, кро́ткий се́рдцем, с ненави́девшими тя́ ми́рен бы́вый.
Ра́дуйся, и́стинный Христо́в подо́бниче; ра́дуйся, ангелонра́вный челове́че.
Ра́дуйся, Диони́сие, вели́кий чудотво́рче.
Кондак 9
Вси́ ученицы́ твои́, преподо́бне о́тче, го́рце пла́каху, егда́ собра́в и́х, пове́дал еси́ и́м приближе́ние твоея́ кончи́ны, и настоя́теля и́м, вме́сто себе́, преподо́бнаго Амфило́хиа поста́вил еси́, запове́дав тому́ блюсти́ уста́в общежи́тельный во твои́х оби́телех и ве́рно руководи́ти бра́тию твою́ ко спасе́нию, да благоприя́тно пою́т Бо́гу: Аллилу́иа.
Икос 9
Вети́и челове́честии не довле́ют ко изглаго́ланию любве́ твоея́ святы́я, преподо́бне о́тче Диони́сие, ея́же ко ученико́м твои́м преиспо́лнен бы́л еси́, егда́ возлежа́ на одре́ сме́ртнем, после́днее поуче́ние и́м сотвори́л еси́, богому́дренно увеща́я и́х любо́вь име́ти между́ собо́ю и ничто́же предпочита́ти па́че любве́ Христо́вы. О се́м умиля́ющеся душа́ми на́шими, вопие́м ти́:
Ра́дуйся, свяще́нное главо́, Тро́ическою заре́ю свы́ше озаре́нная; ра́дуйся, исто́чниче медото́чный уче́ния боже́ственнаго.
Ра́дуйся, ученики́ твоя́ прии́скренне возлюби́вый; ра́дуйся, вся́ ну́жная ко спасе́нию и́м возвести́вый.
Ра́дуйся, всю́ бра́тию твою́ прости́вый и благослови́вый; ра́дуйся, посме́ртныя моли́твы твоя́ и́м обетова́вый.
Ра́дуйся, я́ко све́тел и ра́достен на одре́ сме́ртнем возлежа́л еси́; ра́дуйся, я́ко благонаде́жен о спасе́нии твое́м бы́л еси́.
Ра́дуйся, свя́то и богоуго́дно тече́ние земно́е соверши́вый; ра́дуйся, че́стно и преподо́бно о Го́споде почи́вый.
Ра́дуйся, я́ко три́ дни́ пред кончи́ною твое́ю в соверше́ннем безмо́лвии препроводи́л еси́; ра́дуйся, я́ко моли́твы богоумиле́нныя Го́сподеви возноси́л еси́.
Ра́дуйся, Диони́сие, вели́кий чудотво́рче.
Кондак 10
Спасе́ния души́ твоея́ и благоустрое́ния святы́я оби́тели твоея́ с пла́чем проси́л еси́ у Го́спода Иису́са Христа́ и Пречи́стыя Его́ Ма́тере, преподо́бне о́тче Диони́сие, и извеще́ние благо́е получи́л еси́ от Пресвяты́я Богоро́дицы, я́ко вся́ проси́мая тобо́ю испо́лнена бу́дут, и я́ко Сама́ Она́ бу́дет при́сная Покрови́тельница и Засту́пница оби́тели твоея́. Те́мже ра́достно воспе́л еси́ Сы́ну Ея́ и Бо́гу: Аллилу́иа.
Икос 10
Царя́ Небе́снаго Христа́ ра́б бы́л еси́, преподо́бне о́тче, во вся́ дни́ жития́ твоего́ земна́го: те́мже и кончи́ною преди́вною просла́ви тя́ Госпо́дь, я́ко и́стиннаго уго́дника Своего́; све́том бо небе́сным возсия́ лице́ твое́ при исхо́де твое́м, и вене́ц сия́яй ви́дим бы́сть на главе́ твое́й, и вся́ ке́ллиа твоя́ испо́лнися благоуха́ния, егда́ преда́л еси́ святу́ю ду́шу твою́ в ру́це Бо́жии. О се́м чудя́щеся, а́ки надгро́бную пе́снь прино́сим ти́ благохвале́ния такова́я:
Ра́дуйся, вели́кий уго́дниче Бо́жий, я́ко све́тлою кончи́ною твое́ю ученики́ твоя́ удиви́л еси́; ра́дуйся, я́ко пла́чь и́х утеше́нием духо́вным измени́л еси́.
Ра́дуйся, сиротство́ и́х духо́вно вознагради́вый; ра́дуйся, печа́ль и́х благода́тно утоли́вый.
Ра́дуйся, вечноблаже́нныя жи́зни насле́дниче; ра́дуйся, нетле́нныя ра́дости святы́х соприча́стниче.
Ра́дуйся, венцено́сче, от Христо́вы десни́цы увенча́нный; ра́дуйся, сия́нием Трисо́лнечным озаре́нный.
Ра́дуйся, во све́тлостех святы́х опочи́вый; ра́дуйся, воздая́ние трудо́м твои́м та́мо получи́вый.
Ра́дуйся, оби́тели твоея́ святы́я похвало́ и ра́дование; ра́дуйся, Це́ркве Христо́вы благода́тное украше́ние.
Ра́дуйся, Диони́сие, вели́кий чудотво́рче.
Кондак 11
Пе́ние погреба́льное со слеза́ми мно́гими соверша́ху ученицы́ твои́, преподо́бне о́тче, над те́лом твои́м святы́м, провожда́юще тя́ к ме́сту сме́ртнаго твоего́ упокое́ния во оби́тель Сосно́вецкую: и се́ а́бие ста́ ко́нь, и́же гро́б тво́й везя́ше, и не дви́гашеся по пути́. Сие́ же ви́дев, преподо́бный Амфило́хий повеле́, да и́ный, люби́мый тобо́ю ко́нь впряже́н бу́дет в колесни́цу: и то́й ле́гце довезе́ тя́ до моги́лы; сицево́е погребе́ние твое́ благогове́йно воспомина́юще, пое́м Ди́вному во святы́х Свои́х Бо́гу хвале́бную пе́снь: Аллилу́иа.
Икос 11
Светопода́тельный свети́льник Бо́жия благода́ти явля́ешися и по сме́рти, преподо́бне о́тче Диони́сие, соверша́я чудеса́ мно́гая от свята́го твоего́ гро́ба, от него́же неду́жнии исцеля́хуся, слепи́и зре́ние получа́ху, беснова́тии от мучи́тельства диа́воля свобожда́хуся, и все́м тре́бующым оби́льно ми́лость Бо́жия подава́шеся. Сего́ ра́ди вопие́м ти́ усе́рдно:
Ра́дуйся, благода́тных даро́в всеще́дрый пода́телю; ра́дуйся, неду́гов злы́х прогони́телю.
Ра́дуйся, врачу́ безме́здный и скоропредста́тельный; ра́дуйся, целе́бниче благода́тный.
Ра́дуйся, в со́ниих и виде́ниих ве́рныя посеща́яй; ра́дуйся, бли́жним и да́льним по́мощь твою́ явля́яй.
Ра́дуйся, разсла́бленных укрепи́телю; ра́дуйся, на ду́хи нечи́стыя кре́пкий вои́телю.
Ра́дуйся, от привиде́ний и страхова́ний вра́жиих мно́гия изба́вивый; ра́дуйся, беснова́тых от томле́ния диа́воля свободи́вый.
Ра́дуйся, хода́таю на́ш при́сный; ра́дуйся, моли́твенниче за ны́ немо́лчный.
Ра́дуйся, Диони́сие, вели́кий чудотво́рче.
Кондак 12
Благода́ть Бо́жия, осеня́ющая святу́ю и многоцеле́бную ра́ку моще́й твои́х, преподо́бне о́тче Диони́сие, и кре́пкое предста́тельство твое́ ко Го́споду о все́х, с ве́рою притека́ющих ко твоему́ заступле́нию, уве́риша во свя́тости твое́й Собо́р святи́телей святы́я Всеросси́йския Це́ркве, и́же торже́ственно к ли́ку святы́х Бо́жиих тя́ причто́ша и чудотво́рца пресла́вна тя́ наименова́ша, пою́ще Бо́гу, тя́ просла́вльшему, пе́снь: Аллилу́иа.
Икос 12
Пое́м по́двиги и чудотворе́ния твоя́, вели́кий уго́дниче Бо́жий, прославля́ем благосе́рдие твое́ и ми́лость ко вся́цей души́ христиа́нстей, по́мощи от тебе́ и́щущей, не таи́м вели́ких благодея́ний твои́х, явле́нных и при́сно явля́емых тобо́ю ве́рующым и моле́бно соверша́юще святу́ю па́мять твою́, во псалме́х и пе́снех духо́вных, си́це благоумиле́нно тебе́ зове́м:
Ра́дуйся, Пресвяты́я Влады́чицы Богоро́дицы всеусе́рдный почита́телю; ра́дуйся, а́нгельских лико́в собесе́дниче.
Ра́дуйся, Предте́чи Госпо́дня пустыннолюби́вый подража́телю; ра́дуйся, патриа́рхов ветхозаве́тных непоро́чным житие́м подо́бниче.
Ра́дуйся, проро́ком Бо́жиим прозорли́востию равноче́стный; ра́дуйся, апо́столом Христо́вым пра́вою ве́рою единонра́вный.
Ра́дуйся, святи́телей богому́дрых прехва́льный учениче́; ра́дуйся, му́чеников многострада́льных в терпе́нии соревнова́телю.
Ра́дуйся, преподо́бных све́тлая красото́; ра́дуйся, пра́ведных сонасле́дниче.
Ра́дуйся, все́х святы́х при́сный дру́же.
Ра́дуйся, Диони́сие, вели́кий чудотво́рче.
Кондак 13
О вели́кий уго́дниче Бо́жий и пресла́вный чудотво́рче, преподо́бне о́тче Диони́сие! Вонми́ гла́су моле́ний и пе́ний на́ших, в похвалу́ тебе́ приноси́мых, и умоли́ Го́спода Бо́га изба́вити на́с от гее́нны о́гненныя и сподо́бити блаже́нства святы́х, да ку́пно с тобо́ю вопие́м Ему́ во ве́ки: Аллилу́иа.
Повтор
Этот кондак читается трижды, затем икос 1-й и кондак 1-й.
Икос 1
А́нгел земны́й и челове́к небе́сный бы́л еси́, преподо́бне о́тче Диони́сие, утаи́вый от на́с по смире́нию твоему́ ро́д тво́й и роди́тели твоя́, да уве́римся, я́ко от Бо́га к на́м прише́л еси́, равноа́нгельнаго жития́ до́брый учи́телю, приведы́й ко Го́споду мно́гия ду́шы челове́ческия о́бразом жития́ твоего́ свята́го и уче́нием твои́м боже́ственным. Те́мже ублажа́ем тя́ и пое́м ти́ си́це:
Ра́дуйся, звездо́ пресве́тлая, полу́нощную страну́ духо́вно просвети́вшая; ра́дуйся, свети́льниче немерца́яй Бо́жия благода́ти.
Ра́дуйся, Ева́нгелиа Христо́ва ве́рный послу́шателю; ра́дуйся, я́ко взе́м кре́ст тво́й, во сле́д Христа́ усе́рдно от ю́ности и до ста́рости масти́тыя ходи́л еси́.
Ра́дуйся, подви́жническое духо́вное житие́ возлюби́вый; ра́дуйся, стопы́ твоя́ на пу́ть спасе́ния неукло́нно напра́вивый.
Ра́дуйся, уси́ленно еди́наго на потре́бу взыска́вый; ра́дуйся, бла́га нетле́нная и ве́чная па́че тле́нных и скороги́бнущих возжела́вый.
Ра́дуйся, тесноту́ и ско́рбь и́ноческаго жития́ избра́вый; ра́дуйся, сожи́тельства с преподо́бными иска́вый.
Ра́дуйся, смире́нием святы́м благоукраше́нный; ра́дуйся, терпе́нием кре́пким вся́ искуше́ния вра́жия отрази́вый.
Ра́дуйся, Диони́сие, вели́кий чудотво́рче.
Кондак 1
Избра́нный воево́до во́инов духо́вных, в пусты́ни оби́тели возгради́вый и мно́жество и́нок собра́вый, свя́тостию жития́ и чудесы́ просия́вый и Бо́гу до́бре угоди́вый, преподо́бне о́тче Диони́сие! Восхваля́ем тя́ с любо́вию, засту́пника на́шего. Ты́ же, я́ко име́яй дерзнове́ние ко Го́споду, моли́твами твои́ми от вся́ких на́с бе́д свободи́, да зове́м ти́:
Ра́дуйся, Диони́сие, вели́кий чудотво́рче.
Молитвы
О свяще́нная главо́, преди́вный подви́жниче, пресла́вный чудотво́рче, преподо́бне и богоно́сне о́тче Диони́сие! К тебе́ прибега́ем с ве́рою и мо́лимся с любо́вию от души́: помоли́ся за ны́ гре́шныя ко Го́споду, Воздая́телю и Промысли́телю на́шему, и испроси́ на́м от Него́ вели́кия и бога́тыя ми́лости: здра́вие, благоде́нствие, земли́ плодоно́сие, возду́ха благорастворе́ние, ми́рное и безмяте́жное во благоче́стии житие́, ве́ры Правосла́вныя умноже́ние, оби́тели твое́й святе́й благоустрое́ние, и все́м подвиза́ющымся в не́й и на поклоне́ние приходя́щым ми́лость Бо́жию и спасе́ние; и па́ки припа́дающе к тебе́, я́ко ча́да твоя́, отца́ на́м су́ща, про́сим: святы́ми моли́твами твои́ми приведи́ на́с в ти́хое приста́нище жи́зни ве́чныя, и сподо́би на́с житие́ сие́ вре́менное благоче́стно и богоуго́дно сконча́ти, ми́рную христиа́нскую кончи́ну получи́ти и унасле́довати Ца́рствие Небе́сное, человеколю́бием, бла́гостию и ми́лостию Отца́, и Сы́на, и Свята́го Ду́ха, в Тро́ице сла́вимаго Бо́га, и твои́м святы́м заступле́нием, во ве́ки веко́в. Ами́нь.
О вели́кий Христо́в уго́дниче, святы́й и многомо́щный на́ш предста́телю и всея́ се́верныя Во́логодския страны́ небе́сный покрови́телю, преподо́бне и преблаже́нне о́тче Диони́сие! Ты́ на Небеси́ Престо́лу Пресвяты́я Тро́ицы со а́нгелы предстои́ши, зде́ же на земли́, во всечестне́м се́м хра́ме, святы́ми моща́ми твои́ми почива́еши, и да́нною ти́ си́лою свы́ше благода́тию многоразли́чныя соверша́еши чудеса́, неду́жным исцеле́ния подава́я; ты́ святы́я и преподо́бныя ученики́ стяжа́л еси́ на ме́сте се́м, Амфило́хиа, Мака́риа, Тара́сиа и Феодо́сиа, с ни́миже ны́не ра́дости нетле́нныя во оби́телех небе́сных наслажда́ешися и на многомо́щныя моли́твы за на́с гре́шных сия́ вку́пе с тобо́ю подвиза́еши. При́зри у́бо ми́лостивно на предстоя́щыя честне́й ра́це твое́й лю́ди, умиле́нно моля́щыяся и прося́щыя от тебе́ по́мощи и заступле́ния. Простри́ моли́твенно ко Го́споду Бо́гу преподо́бнеи твои́ ру́це, и я́ко име́яй ве́лие к Нему́ дерзнове́ние, испроси́ на́м от Него́ оставле́ние согреше́ний на́ших во́льных и нево́льных; в боле́знех стра́ждущым да́руй исцеле́ние, скорбя́щым утеше́ние низпосли́, бе́дствующым ско́рую по́мощь твою́ пода́ждь, все́м же чту́щым тя́ поми́лование и спасе́ние и во все́м благо́м благо́е поспеше́ние исхода́тайствуй: да твои́м святы́м предста́тельством получи́вше благода́ть и ми́лость от Го́спода, Ца́рствие Небе́сное унасле́дуем, и вку́пе с тобо́ю и со ученики́ твои́ми просла́вим вели́кое человеколю́бие Триеди́наго Бо́га, Отца́ и Сы́на, и Свята́го Ду́ха, во ве́ки веко́в. Ами́нь.
Конда́къ а҃
И҆збра́нный воево́до во́инѡвъ дх҃о́вныхъ, въ пꙋсты́ни ѡ҆би́тєли возгради́вый и҆ мно́жество и҆́нѡкъ собра́вый, ст҃остїю житїѧ̀ и҆ чꙋдесы̀ просїѧ́вый и҆ бо́гꙋ до́брѣ ᲂу҆годи́вый, прпⷣбне ѻ҆́ч҃е дїонѵ́сїе! восхвалѧ́емъ тѧ̀ съ любо́вїю, застꙋ́пника на́шего. ты̀ же, ꙗ҆́кѡ и҆мѣ́ѧй дерзнове́нїе ко гдⷭ҇ꙋ, мл҃твами твои́ми ѿ всѧ́кихъ на́съ бѣ́дъ свободѝ, да зове́мъ тѝ:
Ра́дꙋйсѧ, дїонѵ́сїе, вели́кїй чꙋдотво́рче.
І҆́косъ а҃
А҆́гг҃лъ земны́й и҆ человѣ́къ нбⷭ҇ный бы́лъ є҆сѝ, прпⷣбне ѻ҆́ч҃е дїонѵ́сїе, ᲂу҆таи́вый ѿ на́съ по смире́нїю твоемꙋ̀ ро́дъ тво́й и҆ роди́тели твоѧ̑, да ᲂу҆вѣ́римсѧ, ꙗ҆́кѡ ѿ бг҃а къ на́мъ прише́лъ є҆сѝ, равноа́гг҃льнагѡ житїѧ̀ до́брый ᲂу҆чи́телю, приведы́й ко гдⷭ҇ꙋ мнѡ́гїѧ дꙋ́шы человѣ́ческїѧ ѡ҆́бразомъ житїѧ̀ твоегѡ̀ ст҃а́гѡ и҆ ᲂу҆че́нїемъ твои́мъ бжⷭ҇твеннымъ. тѣ́мже ᲂу҆бл҃жа́емъ тѧ̀ и҆ пое́мъ тѝ си́це:
Ра́дꙋйсѧ, ѕвѣздо̀ пресвѣ́тлаѧ, полꙋ́нощнꙋю странꙋ̀ дꙋхо́внѡ просвѣти́вшаѧ: ра́дꙋйсѧ, свѣти́льниче немерца́ѧй бж҃їѧ блгⷣти.
Ра́дꙋйсѧ, є҆ѵⷢ҇лїа хрⷭ҇то́ва вѣ́рный послꙋ́шателю: ра́дꙋйсѧ, ꙗ҆́кѡ взе́мъ крⷭ҇тъ тво́й, во слѣ́дъ хрⷭ҇та̀ ᲂу҆се́рднѡ ѿ ю҆́ности и҆ до ста́рости масти́тыѧ ходи́лъ є҆сѝ.
Ра́дꙋйсѧ, подви́жническое дх҃о́вное житїѐ возлюби́вый: ра́дꙋйсѧ, стѡпы̀ твоѧ̑ на пꙋ́ть сп҃се́нїѧ неꙋкло́ннѡ напра́вивый.
Ра́дꙋйсѧ, ᲂу҆си́леннѡ є҆ди́наго на потре́бꙋ взыска́вый: ра́дꙋйсѧ, бла̑га нетлѣ̑ннаѧ и҆ вѣ̑чнаѧ па́че тлѣ́нныхъ и҆ скороги́бнꙋщихъ возжела́вый.
Ра́дꙋйсѧ, тѣснотꙋ̀ и҆ ско́рбь и҆́ноческагѡ житїѧ̀ и҆збра́вый: ра́дꙋйсѧ, сожи́тельства съ прпⷣбными и҆ска́вый.
Ра́дꙋйсѧ, смире́нїемъ ст҃ы́мъ бл҃гоꙋкраше́нный: ра́дꙋйсѧ, терпѣ́нїемъ крѣ́пкимъ всѧ̑ и҆скꙋшє́нїѧ вра̑жїѧ ѿрази́вый.
Ра́дꙋйсѧ, дїонѵ́сїе, вели́кїй чꙋдотво́рче.
Конда́къ в҃
Ви́дѣвъ прпⷣбный и҆гꙋ́менъ дїонѵ́сїй, прозорли́выми ѻ҆чесы̀ свои́ми бл҃гопло́днꙋю добро́тꙋ дꙋ́шы твоеѧ̀, прпⷣбне ѻ҆́ч҃е, є҆гда̀ прише́лъ є҆сѝ къ немꙋ̀ во ѡ҆би́тель спа́со-ка́менскꙋю, прїѧ́тъ тѧ̀ съ любо́вїю и҆ наставлѧ́ше бг҃омꙋ́дрѣ на по́двиги дꙋхѡ́вныѧ. ты̀ же, пребл҃же́нне, всѧ̑ словеса̀ є҆гѡ̀ слага́лъ є҆сѝ въ се́рдцѣ твое́мъ, и҆ ꙗ҆ви́лсѧ є҆сѝ до́брый ᲂу҆чени́къ до́брагѡ ᲂу҆чи́телѧ, зовы́й кꙋ́пнѡ съ ни́мъ нбⷭ҇номꙋ ᲂу҆чт҃лю хрⷭ҇тꙋ̀ немо́лчнꙋю пѣ́снь: А҆ллилꙋ́їа.
І҆́косъ в҃
Разꙋмѣ́въ тѧ̀ сосꙋ́дъ и҆збра́нъ бж҃їѧ блгⷣти бы́ти, и҆гꙋ́менъ дїонѵ́сїй возлюбѝ тѧ̀, ѻ҆́ч҃е прпⷣбне, и҆ пострижѐ во ст҃ы́й и҆́ноческїй ѡ҆́бразъ, наименова́въ тѧ̀ въ постриже́нїи и҆́менемъ свои́мъ дїонѵ́сїй, да бꙋ́деши є҆мꙋ̀ подража́тель и҆́менемъ и҆ дѣ́лы прпⷣбными. сїѐ воспомина́юще, съ любо́вїю тебѣ̀ зове́мъ:
Ра́дꙋйсѧ, и҆́ноче бг҃олюбе́зный, во́лю твою̀ во́ли бж҃їей повинꙋ́вый: ра́дꙋйсѧ, по бз҃ѣ послꙋша́нїе соверше́нное настоѧ́телю твоемꙋ̀ ꙗ҆ви́вый.
Ра́дꙋйсѧ, за кро́тость нра́ва все́ю бра́тїею люби́мый: ра́дꙋйсѧ, тѧгѡты̀ бли́жнихъ твои́хъ съ любо́вїю носи́вый.
Ра́дꙋйсѧ, во трꙋдѣ́хъ и҆ по́двизѣхъ и҆́ноческихъ преꙋспѣ́вый: ра́дꙋйсѧ, всѧ̑ послꙋша̑нїѧ монасты̑рскаѧ без̾ ро́пота и҆сполнѧ́вый.
Ра́дꙋйсѧ, пра́здность дꙋшегꙋби́тельнꙋю возненави́дѣвый: ра́дꙋйсѧ, моли̑твы и҆ бдѣ̑нїѧ всенѡ́щныѧ возлюби́вый.
Ра́дꙋйсѧ, пе́рвый на моли́твꙋ во хра́мъ бж҃їй приходи́вый: ра́дꙋйсѧ, послѣ́днїй по сконча́нїи бг҃ослꙋже́нїѧ и҆з̾ негѡ̀ и҆сходи́вый.
Ра́дꙋйсѧ, примета́выйсѧ ᲂу҆се́рднѡ въ домꙋ̀ бж҃їи: ра́дꙋйсѧ, ꙗ҆́кѡ дꙋ́шꙋ твою̀ въ до́мъ дх҃ꙋ ст҃о́мꙋ ᲂу҆гото́валъ є҆сѝ.
Ра́дꙋйсѧ, дїонѵ́сїе, вели́кїй чꙋдотво́рче.
Конда́къ г҃
Си́лою всевы́шнѧгѡ ᲂу҆крѣплѧ́емый, всѧ̑ и҆скꙋшє́нїѧ дїа́вѡльскаѧ бо́дренными мл҃твами твои́ми побѣди́лъ є҆сѝ, ѻ҆́ч҃е дїонѵ́сїе, и҆ въ новонача́лїи и҆́ночестѣмъ вели́къ подви́жникъ показа́лсѧ є҆сѝ, ѡ҆ не́мже и҆гꙋ́менъ дїонѵ́сїй и҆ бра́тїѧ є҆гѡ̀ ра́довахꙋсѧ и҆ сла́влѧхꙋ бг҃а, пою́ще є҆мꙋ̀: А҆ллилꙋ́їа.
І҆́косъ г҃
И҆мѣ́ѧ по́мыслъ чи́стъ и҆ непоро́чнꙋ дꙋ́шꙋ, и҆ ви́дѣвъ себє̀ почита́ема въ спа́со-ка́менстѣй ѡ҆би́тели, ѻ҆́тче дїонѵ́сїе, ꙗ҆́кѡ смире́нїѧ рачи́тель, ᲂу҆мы́слилъ є҆сѝ бѣжа́ти ѿтꙋ́дꙋ въ безмо́лвїе пꙋсты́ни, да не превозноше́нїемъ сꙋ́етнымъ ᲂу҆ловле́нъ бꙋ́деши. тѣ́мже, полꙋчи́въ бл҃гослове́нїе твоегѡ̀ настоѧ́телѧ, вкꙋ́пѣ со дрꙋ́гомъ твои́мъ, прпⷣбнымъ пахѡ́мїемъ, ᲂу҆дали́лсѧ є҆сѝ и҆з̾ ѡ҆би́тели въ пꙋсты́нное мѣ́сто, на ст҃ꙋ́ю лꙋ́кꙋ, и҆ та́мѡ безмо́лвнѡ пребыва́лъ є҆сѝ въ постѣ́хъ и҆ мл҃твахъ, и҆дѣ́же, а҆́ки срѣта́юща тѧ̀, земна́го а҆́гг҃ла и҆ нбⷭ҇нагѡ человѣ́ка, бл҃гоꙋмиле́ннѡ вопїе́мъ тѝ:
Ра́дꙋйсѧ, безмо́лвїѧ рачи́телю, пꙋсты́ню дꙋхо́внѡ ᲂу҆плодоноси́вый: ра́дꙋйсѧ, подви́жническимъ житїе́мъ твои́мъ сїю̀ просла́вивый.
Ра́дꙋйсѧ, дре́во бл҃гопло́дное, при вода́хъ пꙋсты́нныхъ возра́стшее: ра́дꙋйсѧ, плоды̀ мнѡ́гїѧ хрⷭ҇тꙋ̀ принесы́й.
Ра́дꙋйсѧ, сла́дость безмо́лвїѧ пꙋсты́ннагѡ вкꙋси́вый: ра́дꙋйсѧ, посто́мъ и҆ воздержа́нїемъ пло́ть твою̀ дꙋ́хꙋ покори́вый.
Ра́дꙋйсѧ, мл҃твами сле́зными пла́мень страсте́й въ себѣ̀ ᲂу҆гаси́вый: ра́дꙋйсѧ, безстра́стїе бл҃года́тное стѧжа́вый.
Ра́дꙋйсѧ, бг҃омы́слїемъ непреста́ннымъ ᲂу҆́мъ тво́й просвѣти́вый: ра́дꙋйсѧ, трезвѣ́нїе мл҃твенное прїѡбрѣты́й.
Ра́дꙋйсѧ, бжⷭ҇твеннагѡ и҆́мене і҆и҃съ хрⷭ҇то́ва немо́лчный призыва́телю: ра́дꙋйсѧ, за́повѣдей хрⷭ҇то́выхъ ре́вностный храни́телю.
Ра́дꙋйсѧ, дїонѵ́сїе, вели́кїй чꙋдотво́рче.
Конда́къ д҃
Бꙋ́рѧ и҆скꙋше́нїй дїа́вольскихъ не поколеба̀ твоегѡ̀ терпѣ́нїѧ и҆ мꙋ́жества въ пꙋсты́ни, прпⷣбне ѻ҆́тче, но ꙗ҆́кѡ крѣ́пкїй а҆дама́нтъ, не и҆змѣни́лсѧ є҆сѝ ѿ прираже́нїй дре́внѧгѡ ѕмі́ѧ человѣкоꙋбі́йцы, и҆ сїѧ̑ крѣ́пкими мл҃твами твои́ми побѣдоно́снѡ ѿрази́лъ є҆сѝ, во смире́нїи глꙋбо́цѣмъ пребыва́ѧ и҆ со слеза́ми вопїѧ̀ ко гдⷭ҇ꙋ: А҆ллилꙋ́їа.
І҆́косъ д҃
Слы́шимъ тѧ̀, прпⷣбне ѻ҆́тче, хра́мъ бж҃їй во и҆́мѧ вели́кагѡ ст҃и́телѧ и҆ чꙋдотво́рца нїкола́а въ пꙋсты́ни твое́й, на ст҃ѣ́й лꙋ́цѣ, люботрꙋ́днѡ созда́вшаго, къ немꙋ́же во і҆ере́а посщ҃е́нъ бы́лъ є҆сѝ ѿ рꙋкѝ а҆рхїепⷭ҇кпа росто́вскагѡ григо́рїа, и҆ ꙗ҆́кѡ храмозда́тель бл҃гослове́нный и҆ сщ҃еннотаи́нникъ бж҃їѧ блгⷣти, досто́йнѡ слы́шиши ѿ на́съ сицева̑ѧ:
Ра́дꙋйсѧ, хра́мъ бж҃їй въ дꙋшѝ твое́й созда́вый: ра́дꙋйсѧ, жє́ртвы непорѡ́чныѧ бг҃ови принесы́й.
Ра́дꙋйсѧ, прпⷣбнѡ и҆ првⷣнѡ пожи́вый: ра́дꙋйсѧ, дерзнове́нїе мно́гое ко гдⷭ҇ꙋ стѧжа́вый.
Ра́дꙋйсѧ, мл҃твами твои́ми зна́мєнїѧ и҆ чꙋдєса̀ соверша́ѧй: ра́дꙋйсѧ, блгⷣти бж҃їѧ преиспо́лненный.
Ра́дꙋйсѧ, бл҃же́нный храмозда́телю: ра́дꙋйсѧ, ѡ҆би́тели пꙋсты́нныѧ ѡ҆снова́телю.
Ра́дꙋйсѧ, мнѡ́гаѧ ча̑да дꙋхѡ́внаѧ собра́вый: ра́дꙋйсѧ, ко сп҃се́нїю и҆́хъ до́брѣ рꙋководи́вый.
Ра́дꙋйсѧ, пра́вило прпⷣбнагѡ и҆́ноческагѡ житїѧ̑: ра́дꙋйсѧ, ѡ҆́бразе бг҃оꙋгожде́нїѧ и҆́стиннагѡ.
Ра́дꙋйсѧ, дїонѵ́сїе, вели́кїй чꙋдотво́рче.
Конда́къ є҃
Бг҃омꙋ́дре ᲂу҆правлѧ́лъ є҆сѝ, ѻ҆́тче дїонѵ́сїе, ѡ҆би́телїю пꙋсты́нною на ст҃ѣ́й лꙋ́цѣ, ꙗ҆́же крі́нъ въ пꙋсты́ни, процвѣтѐ дꙋхо́внѡ: ѻ҆ба́че, стꙋжи́въ сѝ молво́ю человѣ́ческою, настоѧ́тельство въ не́й врꙋчи́лъ є҆сѝ спо́стникꙋ твоемꙋ̀, прпⷣбномꙋ пахѡ́мїю, са́мъ же ᲂу҆дали́лсѧ є҆сѝ въ пꙋсты́ню глꙋбоча́йшꙋю, на рекꙋ̀ глꙋши́цꙋ, да та́мѡ є҆ди́нъ є҆ди́номꙋ бг҃ꙋ возмо́жеши невозбра́ннѡ пѣ́ти а҆́гг҃льскꙋю пѣ́снь: А҆ллилꙋ́їа.
І҆́косъ є҃
Ви́дѣвъ красотꙋ̀ мѣ́ста пꙋсты́ннагѡ въ лѣсно́й де́бри, на рѣцѣ̀ глꙋши́цѣ, ѻ҆́тче прпⷣбне, и҆ слы́шавъ на не́мъ зво́нъ цр҃ко́вный, позна́лъ є҆сѝ во́лю бж҃їю, та́мѡ тебѣ̀ всели́тисѧ и҆ ѡ҆би́тель возгради́ти. тѣ́мже помоли́всѧ со слеза́ми, ке́ллїю ма́лꙋ под̾ дре́вомъ чере́мховымъ та́мѡ себѣ̀ постро́илъ є҆сѝ, ѡ҆ст҃и́въ мѣ́сто ѻ҆́ное во ѡ҆би́тель во и҆́мѧ прест҃ы́ѧ бцⷣы, честна́гѡ и҆ сла́внагѡ є҆ѧ̀ покро́ва, и҆дѣ́же мы̀ ны́нѣ тѧ̀ ᲂу҆блажа́емъ и҆ пое́мъ:
Ра́дꙋйсѧ, пꙋстынножи́телей сла́во и҆ похвало̀: ра́дꙋйсѧ, ди́вный и҆збра́нниче бж҃їй, де́брь пꙋсты́ннꙋю и҆́ноки насели́вый.
Ра́дꙋйсѧ, ла́ѵрꙋ пресла́внꙋю та́мѡ соѡрꙋди́вый: ра́дꙋйсѧ, и҆зрѧ́дный слꙋго̀ прест҃ы́ѧ бцⷣы.
Ра́дꙋйсѧ, вѣ́рный ᲂу҆го́дниче сн҃а є҆ѧ̀ и҆ бг҃а: ра́дꙋйсѧ, при́сный радѣ́телю ѡ҆ дꙋша́хъ человѣ́ческихъ.
Ра́дꙋйсѧ, сотвори́вый своѐ сп҃се́нїе трꙋды̀ и҆ мл҃твами, и҆ и҆ны́ѧ томꙋ́ждѣ наꙋчи́вый: ра́дꙋйсѧ, ве́лїй нарече́нный во црⷭ҇твїи нбⷭ҇нѣмъ.
Ра́дꙋйсѧ, го́рлице пꙋстыннолюби́ваѧ, глꙋши́цкꙋю де́брь пѣ́нїемъ мл҃твеннымъ ѡ҆гласи́вшаѧ: ра́дꙋйсѧ, въ пꙋсты́ни славослѡ́вїи непреста́нными бг҃а сла́вивый.
Ра́дꙋйсѧ, сле́зъ твои́хъ тече́ньми безпло́днꙋю зе́млю дꙋхо́внѡ напои́вый: ра́дꙋйсѧ, прозѧбє́нїѧ бг҃оꙋгѡ́днаѧ на не́й возрасти́вый.
Ра́дꙋйсѧ, дїонѵ́сїе, вели́кїй чꙋдотво́рче.
Конда́къ ѕ҃
Проповѣ́даетъ пꙋсты́ннаѧ ла́ѵра твоѧ̀, ѻ҆́тче дїонѵ́сїе, трꙋды̀ и҆ по́двиги твоѧ̑, при ᲂу҆строе́нїи є҆ѧ̀ под̾ѧ́тыѧ, ка́кѡ соѡрꙋжа́ѧ въ не́й хра́мы бж҃їѧ, рꙋка́ма твои́ма ко трꙋдꙋ̀ дѣ́лателей прикаса́лсѧ є҆сѝ, і҆кѡ̑ны же ст҃ы́ѧ длѧ ни́хъ бл҃голѣ́пнѡ написа́лъ є҆сѝ, и҆скꙋ́сный і҆кѡнопи́сецъ бы́въ. тѣ́мже ны́нѣ во хра́махъ нбⷭ҇ныхъ почива́еши и҆ лицезрѣ́нїѧ бж҃їѧ наслажда́ешисѧ, зовы́й всѣ́хъ творцꙋ̀ со а҆́гг҃лы и҆ ст҃ы́ми: А҆ллилꙋ́їа.
І҆́косъ ѕ҃
Возсїѧ́лъ є҆сѝ ꙗ҆́кѡ со́лнце пресвѣ́тлое въ пꙋсты́ни глꙋши́цтѣй, ѻ҆́тче дїонѵ́сїе, и҆ сїѧ́нїемъ до́брыхъ дѣ́лъ твои́хъ привле́клъ є҆сѝ во ѡ҆би́тель твою̀ мнѡ́ги ревни́тели бг҃оꙋгожде́нїѧ и҆́стиннагѡ, и҆́же стека́хꙋсѧ къ тебѣ̀ ѿвсю́дꙋ, да рꙋково́дствꙋеши и҆́хъ ко сп҃се́нїю: и҆ та́кѡ мнѡ́гаѧ ча̑да ѡ҆ хрⷭ҇тѣ̀ стѧжа́лъ є҆сѝ, пребл҃же́нне, ѿ ни́хже ᲂу҆го́дницы бж҃їи, прпⷣбнїи ᲂу҆ченицы̀ твоѝ, а҆мфїло́хїй, мака́рїй, тара́сїй и҆ ѳеодо́сїй, вкꙋ́пѣ съ тобо́ю въ лицѣ̀ ст҃ы́хъ просла́влени сꙋ́ть ѿ гдⷭ҇а. съ ни́ми ᲂу҆̀бо тѧ̀ восхвалѧ́емъ и҆ зове́мъ:
Ра́дꙋйсѧ, а҆́вво бг҃омꙋ́дрый, и҆́нѡкъ мно́жество собра́вый: ра́дꙋйсѧ, дарѡ́въ ст҃а́гѡ дх҃а сосꙋ́де непоро́чный.
Ра́дꙋйсѧ, ᲂу҆ченикѝ ст҃ы̑ѧ и҆ бг҃оꙋгѡ́дныѧ дꙋхо́внѡ воспита́вый: ра́дꙋйсѧ, кꙋ́пнѡ съ ни́ми на нб҃сѝ и҆ на землѝ просла́вленный.
Ра́дꙋйсѧ, ѻ҆бщежи́тїе бра́тское во ѡ҆би́тели твое́й ᲂу҆чреди́вый: ра́дꙋйсѧ, ᲂу҆ста́вы є҆гѡ̀ са́мъ вѣ́рнѡ всегда̀ храни́вый.
Ра́дꙋйсѧ, послꙋша́нїе и҆мѣ́ти бра́тїи твое́й законоположи́вый: ра́дꙋйсѧ, непослꙋша́нїе въ ни́хъ гро́знѡ наказа́вый.
Ра́дꙋйсѧ, ꙗ҆́кѡ ми́лостыню ᲂу҆бѡ́гимъ неѡскꙋ́днѡ подава́лъ є҆сѝ: ра́дꙋйсѧ, ꙗ҆́кѡ во дни̑ гла́да во ѡ҆би́тели твое́й мнѡ́ги препита́лъ є҆сѝ.
Ра́дꙋйсѧ, татє́мъ, похи́тившымъ достоѧ́нїе ѡ҆би́тели твоеѧ̀, не мсти́вый: ра́дꙋйсѧ, добро́мъ за ѕло̀ и҆̀мъ возда́вый.
Ра́дꙋйсѧ, дїонѵ́сїе, вели́кїй чꙋдотво́рче.
Конда́къ з҃
Хотѧ̀ вра́гъ сп҃се́нїѧ человѣ́ческагѡ ᲂу҆страши́ти тѧ̀, прпⷣбне ѻ҆́ч҃е, привидѣ̑нїи свои́ми смꙋща́ше тѧ̀ во вре́мѧ нощны́ѧ твоеѧ̀ мл҃твы, и҆ два́жды бїе́нїемъ лю́тымъ ᲂу҆ра́ни твоѐ тѣ́ло, ꙗ҆́кѡ бы́ти на не́мъ ꙗ҆́звамъ мнѡ́гимъ: ѻ҆ба́че ты̀ непоколеби́мъ въ по́двизѣ твое́мъ пребы́лъ є҆сѝ, и҆ ꙗ҆́звы сїѧ̑ до́блественнѣ носи́лъ є҆сѝ, ꙗ҆́кѡ во́инъ і҆и҃съ хрⷭ҇то́въ и҆ мч҃нкѡвъ сострада́лецъ. тѣ́мже вла́сть ве́лїю на дꙋ̑хи нечи̑стыѧ ѿ гдⷭ҇а полꙋчи́лъ є҆сѝ, ꙗ҆́кѡ про́чее не дерза́ти и҆́мъ пристꙋпи́ти къ тебѣ̀, внегда̀ пѣ́лъ є҆сѝ бг҃ꙋ: А҆ллилꙋ́їа.
І҆́косъ з҃
Но́вꙋю ѡ҆би́тель и҆́ноческꙋю въ пꙋсты́ни сосно́вецтѣй возгради́лъ є҆сѝ, прпⷣбне ѻ҆́ч҃е, и҆ въ не́й хра́мъ бж҃їй, во и҆́мѧ прⷣте́чи гдⷭ҇нѧ і҆ѡа́нна, созда́лъ є҆сѝ, въ ню́же и҆з̾ ла́ѵры твоеѧ̀ на безмо́лвїе ᲂу҆единѧ́лсѧ є҆сѝ, и҆ заповѣ́далъ є҆сѝ, да та́мѡ по кончи́нѣ твое́й погребе́нъ бꙋ́деши, да не запꙋстѣ́етъ мѣ́сто сїѐ, тобо́ю возлю́бленное. помина́юще ᲂу҆̀бо таково́е твоѐ ѡ҆ безмо́лвїи раче́нїе и҆ бл҃го́е ко сме́рти прїꙋготовле́нїе, зове́мъ тѝ:
Ра́дꙋйсѧ, ма́слино бл҃гопло́днаѧ, въ пꙋсты́ни возра́стшаѧ: ра́дꙋйсѧ, є҆ле́емъ до́брыхъ дѣ́лъ твои́хъ дꙋ́шы вѣ́рныхъ ᲂу҆масти́вый.
Ра́дꙋйсѧ, дре́внихъ вели́кихъ прпⷣбныхъ ѻ҆тє́цъ ди́вный подража́телю: ра́дꙋйсѧ, ѳїваі́ды рѡссі́йскїѧ ѡ҆снова́телю.
Ра́дꙋйсѧ, до ста́рости масти́тыѧ бг҃ꙋ нелѣ́ностнѡ послꙋжи́вый: ра́дꙋйсѧ, хлѣ́бъ сꙋ́хъ є҆ди́ножды въ де́нь вкꙋша́вый.
Ра́дꙋйсѧ, въ постѣ̀ сꙋро́вѣмъ и҆ мл҃твахъ непреста́нныхъ всю̀ жи́знь твою̀ препроводи́вый: ра́дꙋйсѧ, поко́й тѣле́сный возненави́дѣвый.
Ра́дꙋйсѧ, кни̑ги и҆ і҆кѡ́ны ст҃ы́ѧ трꙋдолю́бнѡ писа́вый: ра́дꙋйсѧ, сна̀ и҆ ѿдохнове́нїѧ ма́лѡ прїима́вый.
Ра́дꙋйсѧ, всѧ̑ твори́вый во сла́вꙋ бж҃їю и҆ на по́льзꙋ дꙋше́внꙋю бли́жнихъ твои́хъ: ра́дꙋйсѧ, всего̀ себє̀ въ же́ртвꙋ бл҃гопрїѧ́тнꙋ бг҃ови принесы́й.
Ра́дꙋйсѧ, дїонѵ́сїе, вели́кїй чꙋдотво́рче.
Конда́къ и҃
Стра́нника и҆ прише́льца въ мі́рѣ се́мъ помышлѧ́ѧ себѐ бы́ти, прпⷣбне ѻ҆́ч҃е, ѡ҆ часѣ̀ сме́ртнѣмъ непреста́ннѡ па́мѧтовалъ є҆сѝ, и҆ моги́лꙋ себѣ̀ въ сосно́вецтѣй ѡ҆би́тели твое́й рꙋка́ма и҆скопа́лъ є҆сѝ, над̾ не́юже моли́твеннѡ пла́калъ є҆сѝ, воспомина́ѧ сме́рть и҆ сꙋ́дъ бж҃їй. мо́лимъ тѧ̀, ᲂу҆го́дниче бж҃їй, примѣ́ромъ твои́мъ ст҃ы́мъ наꙋчѝ и҆ ны̀ грѣ̑шныѧ не забыва́ти гро́знагѡ часа̀ сме́ртнагѡ, но при́снѡ гото́витисѧ къ немꙋ̀ и҆ бл҃гоꙋмиле́ннѡ пѣ́ти бг҃ꙋ: А҆ллилꙋ́їа.
І҆́косъ и҃
Ве́сь въ бз҃ѣ бы́въ, прпⷣбне ѻ҆́ч҃е, ѡ҆ бз҃ѣ и҆ бл҃гоꙋгожде́нїи є҆мꙋ̀ бесѣ́довалъ є҆сѝ со ᲂу҆ченикѝ твои́ми, со слеза́ми ᲂу҆молѧ́лъ и҆́хъ вѣ́рнѡ храни́ти за́пѡвѣди хрⷭ҇то́вы. тѣ́мже, ꙗ҆́кѡ возше́дый на высотꙋ̀ соверше́нства дх҃о́внагѡ, видѣ́нїй и҆ ѿкрове́нїй бжⷭ҇твенныхъ сподо́билсѧ є҆сѝ, и҆ прозорли́вства да́ръ свы́ше полꙋчи́лъ є҆сѝ, да и҆ мы̀ тебѣ̀ пое́мъ:
Ра́дꙋйсѧ, врачꙋ̀ бл҃гоискꙋ́сный недꙋ́гѡвъ дꙋше́вныхъ: ра́дꙋйсѧ, бꙋ̑дꙋщаѧ ꙗ҆́кѡ настоѧ̑щаѧ прови́дѣвый.
Ра́дꙋйсѧ, а҆́гг҃ла бж҃їѧ ви́дѣти сподо́бивыйсѧ: ра́дꙋйсѧ, ѡ҆ ᲂу҆множе́нїи бра́тїи во ѡ҆би́тели твое́й и҆звѣще́нїе ѿ негѡ̀ прїе́мый.
Ра́дꙋйсѧ, бл҃говоле́нїемъ прест҃ы́ѧ бцⷣы ѡ҆сѣне́нный: ра́дꙋйсѧ, хра́мъ бж҃їй прекра́сенъ во и҆́мѧ є҆ѧ̀ ст҃о́е соѡрꙋди́вый.
Ра́дꙋйсѧ, мнѡ́гїѧ хра́мы бж҃їѧ не то́кмѡ во ѡ҆би́телехъ твои́хъ, но и҆ во ѡ҆кре́стныхъ ве́сехъ люботрꙋ́днѡ постро́ивый: ра́дꙋйсѧ, ѡ҆ славосло́вїи бж҃їи ѕѣлѡ̀ поревнова́вый.
Ра́дꙋйсѧ, ни́щїй дꙋ́хомъ, но мнѡ́гїѧ дꙋхо́внѡ ѡ҆богати́вый: ра́дꙋйсѧ, кро́ткїй се́рдцемъ, съ ненави́девшими тѧ̀ ми́ренъ бы́вый.
Ра́дꙋйсѧ, и҆́стинный хрⷭ҇то́въ подо́бниче: ра́дꙋйсѧ, а҆гг҃лонра́вный человѣ́че.
Ра́дꙋйсѧ, дїонѵ́сїе, вели́кїй чꙋдотво́рче.
Конда́къ ѳ҃
Всѝ ᲂу҆ченицы̀ твоѝ, прпⷣбне ѻ҆́тче, го́рцѣ пла́кахꙋ, є҆гда̀ собра́въ и҆́хъ, повѣ́далъ є҆сѝ и҆̀мъ приближе́нїе твоеѧ̀ кончи́ны, и҆ настоѧ́телѧ и҆́мъ, вмѣ́сто себє̀, прпⷣбнаго а҆мфїло́хїа поста́вилъ є҆сѝ, заповѣ́давъ томꙋ̀ блюстѝ ᲂу҆ста́въ ѻ҆бщежи́тельный во твои́хъ ѡ҆би́телехъ и҆ вѣ́рнѡ рꙋководи́ти бра́тїю твою̀ ко сп҃се́нїю, да бл҃гопрїѧ́тнѡ пою́тъ бг҃ꙋ: А҆ллилꙋ́їа.
І҆́косъ ѳ҃
Вѣті̑и человѣ́честїи не довлѣ́ютъ ко и҆зглаго́ланїю любвѐ твоеѧ̀ ст҃ы́ѧ, прпⷣбне ѻ҆́тче дїонѵ́сїе, є҆ѧ́же ко ᲂу҆ченикѡ́мъ твои̑мъ преиспо́лненъ бы́лъ є҆сѝ, є҆гда̀ возлежа̀ на ѻ҆дрѐ сме́ртнѣмъ, послѣ́днее поꙋче́нїе и҆̀мъ сотвори́лъ є҆сѝ, бг҃омꙋ́дреннѡ ᲂу҆вѣща́ѧ и҆́хъ любо́вь и҆мѣ́ти междꙋ̀ собо́ю и҆ ничто́же предпочита́ти па́че любвѐ хрⷭ҇то́вы. ѡ҆ се́мъ ᲂу҆милѧ́ющесѧ дꙋша́ми на́шими, вопїе́мъ тѝ:
Ра́дꙋйсѧ, сщ҃е́нное главо̀, трⷪ҇ческою заре́ю свы́ше ѡ҆заре́ннаѧ: ра́дꙋйсѧ, и҆сто́чниче медото́чный ᲂу҆че́нїѧ бжⷭ҇твеннагѡ.
Ра́дꙋйсѧ, ᲂу҆ченикѝ твоѧ̑ прїи́скреннѣ возлюби́вый: ра́дꙋйсѧ, всѧ̑ нꙋ́жнаѧ ко сп҃се́нїю и҆̀мъ возвѣсти́вый.
Ра́дꙋйсѧ, всю̀ бра́тїю твою̀ прости́вый и҆ бл҃гослови́вый: ра́дꙋйсѧ, посмє́ртныѧ мл҃твы твоѧ̑ и҆̀мъ ѡ҆бѣтова́вый.
Ра́дꙋйсѧ, ꙗ҆́кѡ свѣ́телъ и҆ ра́достенъ на ѻ҆дрѣ̀ сме́ртнѣмъ возлежа́лъ є҆сѝ: ра́дꙋйсѧ, ꙗ҆́кѡ бл҃гонаде́женъ ѡ҆ сп҃се́нїи твое́мъ бы́лъ є҆сѝ.
Ра́дꙋйсѧ, свѧ́тѡ и҆ бг҃оꙋго́днѡ тече́нїе земно́е соверши́вый: ра́дꙋйсѧ, че́стнѡ и҆ прпⷣбнѡ ѡ҆ гдⷭ҇ѣ почи́вый.
Ра́дꙋйсѧ, ꙗ҆́кѡ трѝ дни̑ пред̾ кончи́ною твое́ю въ соверше́ннѣмъ безмо́лвїи препроводи́лъ є҆сѝ: ра́дꙋйсѧ, ꙗ҆́кѡ мл҃твы бг҃оꙋмилє́нныѧ гдⷭ҇еви возноси́лъ є҆сѝ.
Ра́дꙋйсѧ, дїонѵ́сїе, вели́кїй чꙋдотво́рче.
Конда́къ і҃
Спасе́нїѧ дꙋшѝ твоеѧ̀ и҆ бл҃гоꙋстрое́нїѧ ст҃ы́ѧ ѡ҆би́тели твоеѧ̀ съ пла́чемъ проси́лъ є҆сѝ ᲂу҆ гдⷭ҇а і҆и҃са хрⷭ҇та̀ и҆ пречⷭ҇тыѧ є҆гѡ̀ мт҃ре, прпⷣбне ѻ҆́ч҃е дїонѵ́сїе, и҆ и҆звѣще́нїе бл҃го́е полꙋчи́лъ є҆сѝ ѿ прест҃ы́ѧ бцⷣы, ꙗ҆́кѡ всѧ̑ проси̑маѧ тобо́ю и҆спо́лнєна бꙋ́дꙋтъ, и҆ ꙗ҆́кѡ сама̀ ѻ҆на̀ бꙋ́детъ при́снаѧ покрови́тельница и҆ застꙋ́пница ѡ҆би́тели твоеѧ̀. тѣ́мже ра́достнѡ воспѣ́лъ є҆сѝ сн҃ꙋ є҆ѧ̀ и҆ бг҃ꙋ: А҆ллилꙋ́їа.
І҆́косъ і҃
Цр҃ѧ̀ нбⷭ҇нагѡ хрⷭ҇та̀ ра́бъ бы́лъ є҆сѝ, прпⷣбне ѻ҆́ч҃е, во всѧ̑ дни̑ житїѧ̀ твоегѡ̀ земна́гѡ: тѣ́мже и҆ кончи́ною преди́вною просла́ви тѧ̀ гдⷭ҇ь, ꙗ҆́кѡ и҆́стиннагѡ ᲂу҆го́дника своегѡ̀: свѣ́томъ бо нбⷭ҇нымъ возсїѧ̀ лицѐ твоѐ при и҆схо́дѣ твое́мъ, и҆ вѣне́цъ сїѧ́ѧй ви́димъ бы́сть на главѣ̀ твое́й, и҆ всѧ̀ ке́ллїа твоѧ̀ и҆спо́лнисѧ бл҃гоꙋха́нїѧ, є҆гда̀ преда́лъ є҆сѝ ст҃ꙋ́ю дꙋ́шꙋ твою̀ въ рꙋ́цѣ бж҃їи. ѡ҆ се́мъ чꙋдѧ́щесѧ, а҆́ки надгро́бнꙋю пѣ́снь прино́симъ тѝ бл҃гохвалє́нїѧ такова̑ѧ:
Ра́дꙋйсѧ, вели́кїй ᲂу҆го́дниче бж҃їй, ꙗ҆́кѡ свѣ́тлою кончи́ною твое́ю ᲂу҆ченикѝ твоѧ̑ ᲂу҆диви́лъ є҆сѝ: ра́дꙋйсѧ, ꙗ҆́кѡ пла́чь и҆́хъ ᲂу҆тѣше́нїемъ дꙋхо́внымъ и҆змѣни́лъ є҆сѝ.
Ра́дꙋйсѧ, сиротство̀ и҆́хъ дꙋхо́внѡ вознагради́вый: ра́дꙋйсѧ, печа́ль и҆́хъ бл҃года́тнѡ ᲂу҆толи́вый.
Ра́дꙋйсѧ, вечнобл҃же́нныѧ жи́зни наслѣ́дниче: ра́дꙋйсѧ, нетлѣ́нныѧ ра́дости ст҃ы́хъ соприча́стниче.
Ра́дꙋйсѧ, вѣнцено́сче, ѿ хрⷭ҇то́вы десни́цы ᲂу҆вѣнча́нный: ра́дꙋйсѧ, сїѧ́нїемъ трисо́лнечнымъ ѡ҆заре́нный.
Ра́дꙋйсѧ, во свѣ́тлостехъ ст҃ы́хъ ѡ҆почи́вый: ра́дꙋйсѧ, воздаѧ́нїе трꙋдѡ́мъ твои̑мъ та́мѡ полꙋчи́вый.
Ра́дꙋйсѧ, ѡ҆би́тели твоеѧ̀ ст҃ы́ѧ похвало̀ и҆ ра́дованїе: ра́дꙋйсѧ, цр҃кве хрⷭ҇то́вы бл҃года́тное ᲂу҆краше́нїе.
Ра́дꙋйсѧ, дїонѵ́сїе, вели́кїй чꙋдотво́рче.
Конда́къ а҃і
Пѣ́нїе погреба́льное со слеза́ми мно́гими соверша́хꙋ ᲂу҆ченицы̀ твоѝ, прпⷣбне ѻ҆́ч҃е, надъ тѣ́ломъ твои́мъ ст҃ы́мъ, провожда́юще тѧ̀ къ мѣ́стꙋ сме́ртнагѡ твоегѡ̀ ᲂу҆покое́нїѧ во ѡ҆би́тель сосно́вецкꙋю: и҆ сѐ а҆́бїе ста̀ ко́нь, и҆́же гро́бъ тво́й везѧ́ше, и҆ не дви́гашесѧ по пꙋтѝ. сїѐ же ви́дѣвъ, прпⷣбный а҆мфїло́хїй повелѣ̀, да и҆́ный, люби́мый тобо́ю ко́нь впрѧже́нъ бꙋ́детъ въ колесни́цꙋ: и҆ то́й ле́гцѣ довезѐ тѧ̀ до моги́лы. сицево́е погребе́нїе твоѐ бл҃гоговѣ́йнѡ воспомина́юще, пое́мъ ди́вномꙋ во ст҃ы́хъ свои́хъ бг҃ꙋ хвале́бнꙋю пѣ́снь: А҆ллилꙋ́їа.
І҆́косъ а҃і
Свѣтопода́тельный свѣти́льникъ бж҃їѧ блгⷣти ꙗ҆влѧ́ешисѧ и҆ по сме́рти, прпⷣбне ѻ҆́ч҃е дїонѵ́сїе, соверша́ѧ чꙋдеса̀ мнѡ́гаѧ ѿ ст҃а́гѡ твоегѡ̀ гро́ба, ѿ него́же недꙋ́жнїи и҆сцѣлѧ́хꙋсѧ, слѣпі́и зрѣ́нїе полꙋча́хꙋ, бѣснова́тїи ѿ мꙋчи́тельства дїа́волѧ свобожда́хꙋсѧ, и҆ всѣ̑мъ тре́бꙋющымъ ѡ҆би́льнѡ млⷭ҇ть бж҃їѧ подава́шесѧ. сегѡ̀ ра́ди вопїе́мъ тѝ ᲂу҆се́рднѡ:
Ра́дꙋйсѧ, бл҃года́тныхъ дарѡ́въ всеще́дрый пода́телю: ра́дꙋйсѧ, недꙋ́гѡвъ ѕлы́хъ прогони́телю.
Ра́дꙋйсѧ, врачꙋ̀ безме́здный и҆ скоропредста́тельный: ра́дꙋйсѧ, цѣле́бниче бл҃года́тный.
Ра́дꙋйсѧ, въ со́нїихъ и҆ видѣ́нїихъ вѣ̑рныѧ посѣща́ѧй: ра́дꙋйсѧ, бли̑жнимъ и҆ да̑льнимъ по́мощь твою̀ ꙗ҆влѧ́ѧй.
Ра́дꙋйсѧ, разсла́бленныхъ ᲂу҆крѣпи́телю: ра́дꙋйсѧ, на дꙋ̑хи нечи̑стыѧ крѣ́пкїй вои́телю.
Ра́дꙋйсѧ, ѿ привидѣ́нїй и҆ страхова́нїй вра́жїихъ мнѡ́гїѧ и҆зба́вивый: ра́дꙋйсѧ, бѣснова́тыхъ ѿ томле́нїѧ дїа́волѧ свободи́вый.
Ра́дꙋйсѧ, хода́таю на́шъ при́сный: ра́дꙋйсѧ, мл҃твенниче за ны̀ немо́лчный.
Ра́дꙋйсѧ, дїонѵ́сїе, вели́кїй чꙋдотво́рче.
Конда́къ в҃і
Блгⷣть бж҃їѧ, ѡ҆сѣнѧ́ющаѧ ст҃ꙋ́ю и҆ многоцѣле́бнꙋю ра́кꙋ моще́й твои́хъ, прпⷣбне ѻ҆́ч҃е дїонѵ́сїе, и҆ крѣ́пкое предста́тельство твоѐ ко гдⷭ҇ꙋ ѡ҆ всѣ́хъ, съ вѣ́рою притека́ющихъ ко твоемꙋ̀ застꙋпле́нїю, ᲂувѣ́риша во ст҃ости твое́й собо́ръ ст҃и́телей ст҃ы́ѧ всерѡссі́йскїѧ цр҃кве, и҆̀же торже́ственнѡ къ ли́кꙋ ст҃ы́хъ бж҃їихъ тѧ̀ причто́ша и҆ чꙋдотво́рца пресла́вна тѧ̀ наименова́ша, пою́ще бг҃ꙋ, тѧ̀ просла́вльшемꙋ, пѣ́снь: А҆ллилꙋ́їа.
І҆́косъ в҃і
Пое́мъ по́двиги и҆ чꙋдотворє́нїѧ твоѧ̑, вели́кїй ᲂу҆го́дниче бж҃їй, прославлѧ́емъ бл҃госе́рдїе твоѐ и҆ ми́лость ко всѧ́цѣй дꙋшѝ хрⷭ҇тїа́нстѣй, по́мощи ѿ тебє̀ и҆́щꙋщей, не таи́мъ вели́кихъ бл҃годѣѧ́нїй твои́хъ, ꙗ҆вле́нныхъ и҆ при́снѡ ꙗ҆влѧ́емыхъ тобо́ю вѣ́рꙋющымъ и҆ моле́бнѡ соверша́юще ст҃ꙋ́ю па́мѧть твою̀, во ѱалмѣ́хъ и҆ пѣ́снехъ дꙋхо́вныхъ, си́це бл҃гоꙋмиле́ннѡ тебѣ̀ зове́мъ:
Ра́дꙋйсѧ, прест҃ы́ѧ влⷣчцы бцⷣы всеꙋсе́рдный почита́телю: ра́дꙋйсѧ, а҆́гг҃льскихъ ликѡ́въ собесѣ́дниче.
Ра́дꙋйсѧ, предте́чи гдⷭ҇нѧ пꙋстыннолюби́вый подража́телю: ра́дꙋйсѧ, патрїа́рхѡвъ ветхозавѣ́тныхъ непорѡ́чнымъ житїе́мъ подо́бниче.
Ра́дꙋйсѧ, прⷪ҇ро́кѡмъ бж҃їимъ прозорли́востїю равноче́стный: ра́дꙋйсѧ, а҆пⷭ҇лѡмъ хрⷭ҇то́вымъ пра́вою вѣ́рою є҆динонра́вный.
Ра́дꙋйсѧ, ст҃и́телей бг҃омꙋ́дрыхъ прехва́льный ᲂу҆ченичѐ: ра́дꙋйсѧ, мч҃никѡвъ многострада́льныхъ въ терпѣ́нїи соревнова́телю.
Ра́дꙋйсѧ, прпⷣбныхъ свѣ́тлаѧ красото̀: ра́дꙋйсѧ, пра́ведныхъ сонаслѣ́дниче.
Ра́дꙋйсѧ, всѣ́хъ ст҃ы́хъ при́сный дрꙋ́же.
Ра́дꙋйсѧ, дїонѵ́сїе, вели́кїй чꙋдотво́рче.
Конда́къ г҃і
Ѽ вели́кїй ᲂу҆го́дниче бж҃їй и҆ пресла́вный чꙋдотво́рче, прпⷣбне ѻ҆́ч҃е дїонѵ́сїе! вонмѝ гла́сꙋ моле́нїй и҆ пѣ́нїй на́шихъ, въ похвалꙋ̀ тебѣ̀ приноси́мыхъ, и҆ ᲂу҆молѝ гдⷭ҇а бг҃а и҆зба́вити на́съ ѿ гее́нны ѻ҆́гненныѧ и҆ сподо́бити бл҃же́нства ст҃ы́хъ, да кꙋ́пнѡ съ тобо́ю вопїе́мъ є҆мꙋ̀ во вѣ́ки: А҆ллилꙋ́їа.
Повто́ръ
Сей конда́къ глаго́лется три́жды, та́же і҆́косъ а҃-й и҆ конда́къ а҃-й.
І҆́косъ а҃
А҆́гг҃лъ земны́й и҆ человѣ́къ нбⷭ҇ный бы́лъ є҆сѝ, прпⷣбне ѻ҆́ч҃е дїонѵ́сїе, ᲂу҆таи́вый ѿ на́съ по смире́нїю твоемꙋ̀ ро́дъ тво́й и҆ роди́тели твоѧ̑, да ᲂу҆вѣ́римсѧ, ꙗ҆́кѡ ѿ бг҃а къ на́мъ прише́лъ є҆сѝ, равноа́гг҃льнагѡ житїѧ̀ до́брый ᲂу҆чи́телю, приведы́й ко гдⷭ҇ꙋ мнѡ́гїѧ дꙋ́шы человѣ́ческїѧ ѡ҆́бразомъ житїѧ̀ твоегѡ̀ ст҃а́гѡ и҆ ᲂу҆че́нїемъ твои́мъ бжⷭ҇твеннымъ. тѣ́мже ᲂу҆бл҃жа́емъ тѧ̀ и҆ пое́мъ тѝ си́це:
Ра́дꙋйсѧ, ѕвѣздо̀ пресвѣ́тлаѧ, полꙋ́нощнꙋю странꙋ̀ дꙋхо́внѡ просвѣти́вшаѧ: ра́дꙋйсѧ, свѣти́льниче немерца́ѧй бж҃їѧ блгⷣти.
Ра́дꙋйсѧ, є҆ѵⷢ҇лїа хрⷭ҇то́ва вѣ́рный послꙋ́шателю: ра́дꙋйсѧ, ꙗ҆́кѡ взе́мъ крⷭ҇тъ тво́й, во слѣ́дъ хрⷭ҇та̀ ᲂу҆се́рднѡ ѿ ю҆́ности и҆ до ста́рости масти́тыѧ ходи́лъ є҆сѝ.
Ра́дꙋйсѧ, подви́жническое дх҃о́вное житїѐ возлюби́вый: ра́дꙋйсѧ, стѡпы̀ твоѧ̑ на пꙋ́ть сп҃се́нїѧ неꙋкло́ннѡ напра́вивый.
Ра́дꙋйсѧ, ᲂу҆си́леннѡ є҆ди́наго на потре́бꙋ взыска́вый: ра́дꙋйсѧ, бла̑га нетлѣ̑ннаѧ и҆ вѣ̑чнаѧ па́че тлѣ́нныхъ и҆ скороги́бнꙋщихъ возжела́вый.
Ра́дꙋйсѧ, тѣснотꙋ̀ и҆ ско́рбь и҆́ноческагѡ житїѧ̀ и҆збра́вый: ра́дꙋйсѧ, сожи́тельства съ прпⷣбными и҆ска́вый.
Ра́дꙋйсѧ, смире́нїемъ ст҃ы́мъ бл҃гоꙋкраше́нный: ра́дꙋйсѧ, терпѣ́нїемъ крѣ́пкимъ всѧ̑ и҆скꙋшє́нїѧ вра̑жїѧ ѿрази́вый.
Ра́дꙋйсѧ, дїонѵ́сїе, вели́кїй чꙋдотво́рче.
Конда́къ а҃
И҆збра́нный воево́до во́инѡвъ дх҃о́вныхъ, въ пꙋсты́ни ѡ҆би́тєли возгради́вый и҆ мно́жество и҆́нѡкъ собра́вый, ст҃остїю житїѧ̀ и҆ чꙋдесы̀ просїѧ́вый и҆ бо́гꙋ до́брѣ ᲂу҆годи́вый, прпⷣбне ѻ҆́ч҃е дїонѵ́сїе! восхвалѧ́емъ тѧ̀ съ любо́вїю, застꙋ́пника на́шего. ты̀ же, ꙗ҆́кѡ и҆мѣ́ѧй дерзнове́нїе ко гдⷭ҇ꙋ, мл҃твами твои́ми ѿ всѧ́кихъ на́съ бѣ́дъ свободѝ, да зове́мъ тѝ:
Ра́дꙋйсѧ, дїонѵ́сїе, вели́кїй чꙋдотво́рче.
Моли́твы
Ѽ сщ҃е́ннаѧ главо̀, преди́вный подви́жниче, пресла́вный чꙋдотво́рче, прпⷣбне и҆ бг҃оно́сне ѻ҆́ч҃е дїонѵ́сїе! къ тебѣ̀ прибѣга́емъ съ вѣ́рою и҆ мо́лимсѧ съ любо́вїю ѿ дꙋшѝ: помоли́сѧ за ны̀ грѣ̑шныѧ ко гдⷭ҇ꙋ, воздаѧ́телю и҆ промысли́телю на́шемꙋ, и҆ и҆спросѝ на́мъ ѿ негѡ̀ вели̑кїѧ и҆ бога̑тыѧ ми́лѡсти: здра́вїе, бл҃годе́нствїе, землѝ плодоно́сїе, воздꙋ́ха бл҃горастворе́нїе, ми́рное и҆ безмѧте́жное во бл҃гоче́стїи житїѐ, вѣ́ры правосла́вныѧ ᲂу҆множе́нїе, ѡ҆би́тели твое́й ст҃ѣ́й бл҃гоꙋстрое́нїе, и҆ всѣ̑мъ подвиза́ющымсѧ въ не́й и҆ на поклоне́нїе приходѧ́щымъ млⷭ҇ть бж҃їю и҆ сп҃се́нїе. и҆ па́ки припа́дающе къ тебѣ̀, ꙗ҆́кѡ ча̑да твоѧ̑, ѻ҆тца̀ на́мъ сꙋ́ща, про́симъ: ст҃ы́ми мл҃твами твои́ми приведѝ на́съ въ ти́хое приста́нище жи́зни вѣ́чныѧ, и҆ сподо́би на́съ житїѐ сїѐ вре́менное бл҃гоче́стнѡ и҆ бг҃оꙋго́днѡ сконча́ти, ми́рнꙋю хрⷭ҇тїа́нскꙋю кончи́нꙋ полꙋчи́ти и҆ ᲂу҆наслѣ́довати црⷭ҇твїе нбⷭ҇ное, человѣколю́бїемъ, бл҃гостїю и҆ млⷭ҇тїю ѻ҆ц҃а̀, и҆ сн҃а, и҆ ст҃а́гѡ дх҃а, въ трⷪ҇цѣ сла́вимагѡ бг҃а, и҆ твои́мъ ст҃ы́мъ застꙋпле́нїемъ, во вѣ́ки вѣкѡ́въ. А҆ми́нь.
Ѽ вели́кїй хрⷭ҇то́въ ᲂу҆го́дниче, ст҃ы́й и҆ многомо́щный на́шъ предста́телю и҆ всеѧ̀ сѣ́верныѧ во́логодскїѧ страны̀ нбⷭ҇ный покрови́телю, прпⷣбне и҆ пребл҃же́нне ѻ҆́ч҃е дїонѵ́сїе! ты̀ на нб҃сѝ прⷭ҇то́лꙋ прест҃ы́ѧ трⷪ҇цы со а҆́гг҃лы предстои́ши, здѣ̀ же на землѝ, во всечестнѣ́мъ се́мъ хра́мѣ, ст҃ы́ми моща́ми твои́ми почива́еши, и҆ да́нною тѝ си́лою свы́ше бл҃года́тїю многоразли̑чныѧ соверша́еши чꙋдеса̀, недꙋ́жнымъ и҆сцѣле́нїѧ подава́ѧ. ты̀ ст҃ы́ѧ и҆ прпⷣбныѧ ᲂу҆ченикѝ стѧжа́лъ є҆сѝ на мѣ́стѣ се́мъ, а҆мфїло́хїа, мака́рїа, тара́сїа и҆ ѳеодо́сїа, съ ни́миже ны́нѣ ра́дости нетлѣ́нныѧ во ѡ҆би́телехъ нбⷭ҇ныхъ наслажда́ешисѧ и҆ на многомѡ́щныѧ мл҃твы за на́съ грѣ́шныхъ сїѧ̑ вкꙋ́пѣ съ тобо́ю подвиза́еши. при́зри ᲂу҆̀бо ми́лостивнѡ на предстоѧ́щыѧ честнѣ́й ра́цѣ твое́й лю́ди, ᲂу҆миле́ннѡ молѧ́щыѧсѧ и҆ просѧ́щыѧ ѿ тебє̀ по́мощи и҆ застꙋпле́нїѧ. прострѝ мл҃твеннѡ ко гдⷭ҇ꙋ бг҃ꙋ прпⷣбнѣи твоѝ рꙋ́цѣ, и҆ ꙗ҆́кѡ и҆мѣ́ѧй ве́лїе къ немꙋ̀ дерзнове́нїе, и҆спросѝ на́мъ ѿ негѡ̀ ѡ҆ставле́нїе согрѣше́нїй на́шихъ во́льныхъ и҆ нево́льныхъ. въ болѣ́знехъ стра́ждꙋщымъ да́рꙋй и҆сцѣле́нїе, скорбѧ́щымъ ᲂу҆тѣше́нїе низпослѝ, бѣ́дствꙋющымъ ско́рꙋю по́мощь твою̀ пода́ждь, всѣ̑мъ же чтꙋ́щымъ тѧ̀ поми́лованїе и҆ сп҃се́нїе и҆ во все́мъ благо́мъ благо́е поспѣше́нїе и҆схода́тайствꙋй: да твои̑мъ ст҃ы̑мъ предста́тельствомъ полꙋчи́вше блгⷣть и҆ млⷭ҇ть ѿ гдⷭ҇а, црⷭ҇твїе нбⷭ҇ное ᲂу҆наслѣ́дꙋемъ, и҆ вкꙋ́пѣ съ тобо́ю и҆ со ᲂу҆ченикѝ твои́ми просла́вимъ вели́кое человѣколю́бїе трїеди́наго бг҃а, ѻ҆ц҃а̀ и҆ сн҃а, и҆ ст҃а́гѡ дх҃а, во вѣ́ки вѣкѡ́въ. А҆ми́нь.