Канон святым преподобным отцам Амфилохию и Дионисию Глушицким, чудотворцам

Сше́дшаго с Небе́с и на Кресте́ ру́це Просте́ршаго подража́тели, блаже́ннии, те́м распя́сте себе́ ми́рови, и ми́р ва́ми распина́шеся, и сего́ ра́ди всели́стеся во Ца́рствие Небе́сное, чудотво́рцы яви́стеся вои́стину преди́внии.

Творца́ все́х Бо́га возлюби́сте, преподо́бнии, мирску́ю му́дрость всю́ отве́ргше, о земны́х неради́вше, Небе́сных бла́г наслади́вшеся со А́нгельскими ли́ки, с ни́миже моля́щеся, не забу́дите на́с, ча́д свои́х.

Ре́вность духо́вную в сердца́х свои́х прие́мше, всле́д Бо́га усе́рдно потеко́сте и сего́ ра́ди просла́вистеся в Боже́ственней Того́ сла́ве, у Него́ же обрести́ на́м испроси́те ве́лию ми́лость.

Бы́сть в пусты́нях гнездя́щася А́нгели, доброде́тельным житие́м свои́м ми́р озаря́юща, Диони́сия блаже́ннаго обре́те, преподо́бне Амфило́хие, ему́ же после́дствовав, Спа́су все́х угоди́л еси́.

Моле́нием свои́м непреста́нным и всенощны́м предстоя́нием, Пречи́стую Богоро́дицу Помо́щницу иму́ще, бесо́вския полки́ от оби́тели ва́шея прогони́ли есте́. Те́м и приходя́щим к ва́м подава́ете ско́рое исцеле́ние.

Се́, мы́ оста́вихом вся́, по Госпо́дню словеси́ сотвори́сте и всле́д Того́ изыдо́сте, те́м мзду́ стори́чную прия́сте и Живо́т ве́чный насле́довасте со все́ми святы́ми, с ни́ми же моля́щеся о на́с не преста́йте, отцы́ блаже́ннии.

Ру́це просте́рше, о на́с мольбу́ ко Влады́це приноша́йте, ста́ду ва́шему от до́лг разреше́ние прося́ще, и́мате бо послу́шающаго Влады́ку все́й тва́ри, твори́т бо во́лю боя́щихся Его́ и моли́тву и́х послу́шает.

Сконча́сте тече́ние, житие́ свое́ до́бре соверши́вше, блаже́ннии, прия́телище бы́сте Пресвяты́я Тро́ицы, те́м моли́теся в ми́ре сохране́нным бы́ти ве́рным лю́дем, правове́рно ва́с почита́ющим.

Любо́вию Бо́жиею распаля́стеся, святи́и, ми́р ве́сь оста́вльше, пусты́ню достиго́сте, в не́й же А́нгельски пожи́ли есте́ и ны́не, в Черто́зех Небе́сных со все́ми святы́ми веселя́щеся, непреста́нно о на́с моли́теся.

Смире́н по́мысл и ду́шу свою́ сокруше́нную иму́ще, вы́ну прилепля́шеся Бо́гови и на Того́ упова́ние о души́ свое́й возло́жше, толпы́ бесо́вския, я́ко пра́х, разгна́сте, исцеля́ете неду́ги душе́вныя вку́пе и теле́сныя.

Ю́ность теле́сную отве́ргше, посто́м и бде́нием удручи́ли есте́ пло́ти своя́, те́м и святы́м житие́м свои́м ве́сь ми́р просвети́ли есте́, Богоблаже́ннии.

Его́же и́щущи, при́сно жела́емаго ва́ми блаже́нства Небе́снаго Ца́рствия, о не́м бо подвиза́стеся в поще́ниих и бде́ниих, души́ свои́ изда́сте в ру́це Бо́жии; сему́ и на́м получи́ти моли́теся при́сно, блаже́ннии.

Возгреме́ли бы́ша до Небе́с моли́твы ва́ша, святи́и, я́ко гро́м, Святы́м Ду́хом гремя́ше, возду́шный же ду́х, я́ко ды́м, разгоня́ше, от неду́г разреше́ние ве́рным подава́ющи. Те́м я́ко засту́пники на́ша и к Бо́гу хода́таи, непреста́нно ва́с почита́ем.

Вы́шняго прибе́жище положи́сте себе́ и упова́ние, в пусты́нях, да я́ко в черто́зех све́тлых, пребыва́юще, во а́лчбе и жа́жде жи́знь свою́ провожда́юще, те́м и оби́тели себе́ во и́мя Пресвяты́я Богоро́дицы сотвори́сте, Ея́же моли́твами от зо́л на́с изба́вите.

И́гу Госпо́дню вы́я прекло́нше, жите́йских мо́лв избего́сте, те́сным и приско́рбным путе́м ше́ствовавше, простра́нства о́наго Небе́снаго дости́гли есте́, его́же и на́м сподо́бленным бы́ти, святи́и, моли́теся.

Вмени́вше уме́ты вся́, я́же на земли́ су́щая, вся́ко жела́ние и тща́ние показа́сте, взыска́юще, да Христа́ приобря́щете, Его́же обре́тше, посеща́йте ше́ствующих путе́м ва́шим, и́хже сниска́сте труда́ми свои́ми, отцы́ блаже́ннии.

На Небеси́ пребыва́юще, неотсту́пно с на́ми пребу́дите, назира́юще на́с, ча́д свои́х, непреста́нно моли́тву к Бо́гу, отцы́, о на́с сотвори́те, я́ко да моле́нием ва́шим от все́х зо́л на́с изба́вите.

Ни о́ны пусты́нная страши́лища устраши́ша ва́с, ни челове́к злы́х нахожде́ния, ни лука́вых бесо́в преще́ния, ни ле́т долгота́, ни ску́дость ме́стная, но вся́ преодоле́вше терпе́нием, и сего́ ра́ди со Христо́м ца́рствуете в несконча́емыя ве́ки.

Свети́ла вели́кая, чудотво́рцы преди́внии, Диони́сие со Амфило́хием, посети́те на́с в боле́знех на́ших, здра́вие все́м притека́ющим к ва́м вско́ре подава́юще, разреши́те на́с от грехо́вных у́з, ту́не прия́сте, ту́не и дади́те на́м.

Я́коже обеща́стеся спожи́ти неразлу́чно в жи́зни се́й, си́це и по сме́рти ва́шей изво́листе погребе́нным бы́ти еди́ным телесе́м ва́шим, от ни́х же чуде́с излива́ете тре́бующим исцеле́ние, и Христа́ непреста́нно сла́вящим.

Но́щь, я́ко де́нь, вменя́шеся ва́ми, преподо́бнии, не да́вше поко́я телесе́м ва́шим, ни ве́ждома дрема́ния, но безпреста́ни тече́ние творя́ще к Бо́гу посто́м и моли́твами, до́ндеже сподо́бистеся прия́ти пра́ведных селе́ние.

Равно́ А́нгелом житие́ стяжа́л еси́, Диони́сие, те́м равноа́нгельна в пусты́нях кры́ющася, обре́т тя́ блаже́нный Амфило́хий, и сего́ ра́ди соревнова́ше ти́ в житии́ твое́м, твоему́ внима́юще нра́ву Боголюбе́зному.

Подо́бящеся Христу́ своему́, кро́тко житие́ и смире́нно в жи́зни се́й стяжа́ли есте́. Те́м и поко́й обрето́сте душа́м ва́шим, его́же ра́ди жи́знь сию́ во слеза́х и в воздыха́ниих изнури́ли есте́.

Моле́ние сие́ не пре́зрите, отцы́ досточу́днии, и́же от недосто́йных у́ст мои́х ва́м приноси́мое, и, прия́в, сего́ донеси́те Творцу́ и Бо́гу, прося́ще у Него́ обрести́ ми́лость во вся́ ве́ки.