Российская Православная Церковь

по благословенію Архіерейскаго Сѵнода Россійской Православной Церкви

Православный календарь

Ака́ѳістъ

А҆ка́ѳїстъ ст҃о́мꙋ прпⷣбномꙋ а҆га́питꙋ пече́рскомꙋ, врачꙋ̀ безме́здномꙋ

Прп. Агапита, безмездного врача Киево-Печерского (ок. 1095) 14 июня 2026

Конда́къ а҃

И҆збра́нный ᲂу҆ченичѐ вели́каго ᲂу҆чи́телѧ, прпⷣбнаго и҆ бг҃оно́снаго ѻ҆тца̀ на́шего а҆нтѡ́нїа, и҆ ди́вный подража́телю житїѧ̀ є҆гѡ̀ ст҃а́гѡ, свѧ́тѣ ѻ҆́тче а҆га́пите, пѣ́снїю восхва́лимъ тѧ̀ съ любо́вїю, застꙋ́пника на́шего: ты́ же, ꙗ҆́кѡ и҆мѣ́ѧй дерзнове́нїе ко гдⷭ҇ꙋ, моли́сѧ вы́нꙋ ѡ҆ спасе́нїи на́съ, грѣ́шныхъ, ѿ всѧ́кихъ бѣ́дъ и҆збавлѧ́ѧ зовꙋ́щихъ тѝ:

Ра́дꙋйсѧ, а҆га́пите, дꙋше́вныхъ и҆ тѣле́сныхъ недꙋ́гѡвъ ско́рый цѣли́телю.

І҆́косъ а҃

А҆́гг҃лѡмъ любе́знꙋю чистотꙋ̀ ѿ ю҆́ности твоеѧ̀ возлюби́въ, блаже́ннѣ а҆га́пите, къ добродѣ́телей подви́жникꙋ, преподо́бномꙋ а҆нтѡ́нїю прите́клъ є҆сѝ и҆, ѿ него̀ во и҆́ночество ѡ҆блече́нный, подража́тель ре́вностный подвигѡ́въ є҆гѡ̀ бы́лъ є҆сѝ: тѣ́мже сла́вимъ тѧ̀ воззва́нїи си́ми:

Ра́дꙋйсѧ, бг҃оно́снаго а҆нтѡ́нїа добродѣ́телей и҆ дарѡ́въ наслѣ́дниче: ра́дꙋйсѧ, на высотꙋ̀ соверше́нства дꙋхо́внаго возше́дый.

Ра́дꙋйсѧ, моли́твами ᲂу҆се́рдными да́ръ врачева́нїѧ и҆ чꙋдотворе́нїѧ ѿ гдⷭ҇а полꙋчи́вый: ра́дꙋйсѧ, и҆з̾ глꙋбины̀ дꙋшѝ воздыха́нїи чистотꙋ̀ дꙋше́внꙋю стѧжа́вый.

Ра́дꙋйсѧ, а҆га́пите, дꙋше́вныхъ и҆ тѣле́сныхъ недꙋ́гѡвъ ско́рый цѣли́телю.

Конда́къ в҃

Ви́дѣвъ всеви́дѣцъ гдⷭ҇ь благо́е дꙋшѝ твоеѧ̀ и҆зволе́нїе, блаже́ннѣ а҆га́пите, є҆́же порабо́тати є҆мꙋ̀ безлѣ́ностнѡ, внꙋшѝ прпⷣбномꙋ а҆нтѡ́нїю благослови́ти тѧ̀ на жесто́кое въ пеще́рнѣмъ затво́рѣ житїѐ. ты́ же, блгⷭ҇ве́нїе ст҃о́е съ вѣ́рою прїе́мь, въ пеще́рѣ поко́й вѣ́чный ѡ҆брѣ́лъ є҆сѝ, є҆ди́номꙋ бг҃ꙋ рабо́таѧ въ пѣ́нїихъ, бдѣ́нїихъ и҆ поще́нїихъ, немо́лчнѡ воспѣва́ѧ є҆мꙋ̀: А҆ллилꙋ́їа.

І҆́косъ в҃

Разꙋмѣ́въ прпⷣбный а҆нто́нїй произволе́нїе бж҃їе возсїѧ́ти въ се́мъ и҆́ноцѣ вельмѝ бл҃гоꙋго́днымъ начина́нїємъ и҆ дꙋшеспаси́тельнымъ намѣ́ренїємъ, и҆зѻби́льнѡ насы́тилъ є҆сѝ є҆го̀ дꙋхо́вною сла́достїю и҆ въ добродѣ́телѣхъ ᲂу҆крѣпи́лъ є҆сѝ, сегѡ̀ ра́ди вопїе́мъ є҆мꙋ̀ такова̑ѧ:

Ра́дꙋйсѧ, прпⷣбнагѡ а҆нтѡ́нїа нра́вы себѣ̀ ᲂу҆сво́ивый: ра́дꙋйсѧ, того̀ житїю̀ ᲂу҆се́рднѡ поревнова́вый.

Ра́дꙋйсѧ, сыно́вню любо́вь къ немꙋ̀ стѧжа́вый: ра́дꙋйсѧ, и҆ ѿ него̀ ѕѣлѡ̀ возлю́бленный.

Ра́дꙋйсѧ, самови́дче є҆гѡ̀ по́двигѡвъ: ра́дꙋйсѧ, во врачева́нїи недꙋ́гѡвъ є҆мꙋ̀ споспѣшествꙋ́ющїй.

Ра́дꙋйсѧ, а҆га́пите, дꙋше́вныхъ и҆ тѣле́сныхъ недꙋ́гѡвъ ско́рый цѣли́телю.

Конда́къ г҃

Си́лою бж҃їею ᲂу҆крѣплѧ́емый, свѧ́тѣ а҆га́пите, вели̑кїѧ и҆́ночєскїѧ трꙋды̀ под̾ѧ́лъ є҆сѝ: сего̀ ра́ди бл҃гослови́сѧ дѣ́ло рꙋкꙋ̑ твоє́ю во сла́вꙋ и҆́мени гдⷭ҇нѧ, на спасе́нїе и҆ врачева́нїе всѣ́хъ, съ вѣ́рою и҆ наде́ждою къ тебѣ̀ притека́ющихъ и҆ нелѣ́ностнѡ возносѧ́щихъ пѣ́снь прест҃ѣ́й трⷪ҇цѣ: А҆ллилꙋ́їа.

І҆́косъ г҃

И҆мѣ́ѧ по́мыслъ чи́стъ и҆ непоро́чнꙋ со́вѣсть и҆ па́мѧтꙋѧ ре́кшагѡ: бо́ленъ бѣ́хъ, и҆ посѣти́сте менѐ... поне́же сотвори́стѣ є҆ди́номꙋ ѿ си́хъ бра́тїй мои́хъ ме́ньшихъ, мнѣ̀ сотвори́стѣ: недꙋ́гꙋющихъ и҆́нокѡвъ под̾ сво́й покро́въ ѻ҆те́чески прїе́млѧ, ꙗ҆́кѡже роди́тели ча̑да своѧ̑, ᲂу҆тѣша́лъ є҆сѝ, ѿра́дꙋ свои́мъ попече́нїемъ подаю́ще и҆ ѻ҆те́ческою ла́скою тѧ́жесть болѣ́зни ѡ҆блегча́ѧ, моли́твою съ ѻ҆дра̀ болѣ́зни воздвиза́лъ є҆сѝ. сего̀ ра́ди прїимѝ ѿ на́съ благохвалє́нїѧ такѡва́ѧ:

Ра́дꙋйсѧ, въ добродѣ́телѣхъ бл҃гоискꙋ́сный подви́жниче: ра́дꙋйсѧ, во хрⷭ҇тѣ̀ всю̀ бра́тїю мона́шескꙋю возлюби́вый.

Ра́дꙋйсѧ, недꙋ́жныхъ и҆́нокѡвъ смире́нный и҆ неꙋсы́пный слꙋжи́телю: ра́дꙋйсѧ, за пѡ́двиги вре́меннагѡ житїѧ̀ поко́й вѣ́чный ѡ҆брѣты́й.

Ра́дꙋйсѧ, а҆га́пите, дꙋше́вныхъ и҆ тѣле́сныхъ недꙋ́гѡвъ ско́рый цѣли́телю.

Конда́къ д҃

Бꙋ́рю многомѧте́жнагѡ жите́йскагѡ мо́рѧ безбѣ́днѡ проше́лъ є҆сѝ, бл҃же́нне, и҆ въ при́стань безстра́стїѧ дости́глъ є҆сѝ, ѡ҆кормлѧ́емь за́повѣдьми хрⷭ҇та̀ бг҃а, ꙗ҆́же бы́ша свѣти́льникъ нога́ма твои́ма и҆ свѣ́тъ стезѧ́мъ твои́мъ. тѣ́мже ны́нѣ въ го́рнихъ ѻ҆би́телѣхъ водворѧ́ешисѧ, сла́дцѣ поѧ̀ трїеди́номꙋ бг҃ꙋ: А҆ллилꙋ́їа.

І҆́косъ д҃

Слы́шавше мнѡ́зи ѡ҆ бг҃оꙋго́днѣмъ житїѝ твое́мъ, блаже́ннѣ а҆га́пите, прихожда́хꙋ къ тебѣ̀: ѻ҆́ви послꙋ́шати поꙋче́нїй твои́хъ, ѻ҆́ви и҆сцѣлє́нїй ѿ разли́чныхъ недꙋ́гѡвъ прїѧ́ти: и҆́хже ты̀, съ ѻ҆те́ческою любо́вїю прїе́млѧ, рꙋково́дствовалъ є҆сѝ ко спасе́нїю, ѿгонѧ́ѧ всѧ́къ недꙋ́гъ и҆ всѧ́кꙋ не́мощь. сего̀ ра́ди и҆ мы̀ прибѣга́емъ къ тебѣ̀, вели́комꙋ помо́щникꙋ и҆ цѣли́телю, сла́вѧще тѧ̀ си́це:

Ра́дꙋйсѧ, безмо́лвїѧ люби́телю, ѡ҆би́тель пече́рскꙋю пѡ́двиги свои́ми ᲂу҆краси́вый: ра́дꙋйсѧ, спасе́нїѧ мно́гихъ дꙋ́шъ человѣ́ческихъ вино́вниче.

Ра́дꙋйсѧ, болѣ́знꙋющихъ грѣхмѝ врачꙋ̀ бл҃гоискꙋ́сный: ра́дꙋйсѧ, во́ине хрⷭ҇то́въ, полкѝ неви́димыхъ врагѡ́въ побѣди́вый.

Ра́дꙋйсѧ, бли̑жнїѧ твоѧ̑ и҆́скреннѣ возлюби́вый: ра́дꙋйсѧ, спасе́нїю и҆́хъ дꙋше́вномꙋ и҆ и҆сцѣле́нїю тѣле́сномꙋ ᲂу҆се́рднѡ послꙋжи́вый.

Ра́дꙋйсѧ, а҆га́пите, дꙋше́вныхъ и҆ тѣле́сныхъ недꙋ́гѡвъ ско́рый цѣли́телю.

Конда́къ є҃

Бг҃оте́чное свѣти́ло бы́въ, ᲂу҆го́дниче бж҃їй, всѣ́хъ къ со́лнцꙋ пра́вды хрⷭ҇тꙋ̀ пꙋтеводи́лъ є҆сѝ примѣ́ромъ житїѧ̀ твоегѡ̀ ст҃а́гѡ, и҆́же всѐ бы́сть посщ҃е́но на слꙋже́нїе бг҃ꙋ и҆ бли̑жнимъ твои̑мъ. Ни́щыѧ и҆ ᲂу҆бѡ́гїѧ млⷭ҇тивнѡ пита́лъ є҆сѝ, тѣ́мже бл҃же́нство ми́лостивыхъ ᲂу҆наслѣ́довалъ є҆сѝ, и҆ со ст҃ы́ми пое́ши вѣ́чнѡ хвале́бнꙋю пѣ́снь: А҆ллилꙋ́їа.

І҆́косъ є҃

Ви́димъ тѧ̀, блаже́ннѣ ѻ҆́тче а҆га́пите, дости́гшагѡ въ мѣ́рꙋ мꙋ́жа соверше́нна ѡ҆ хрⷭ҇тѣ̀ и҆ преиспо́лненна дарова́нїй бжⷭ҇твенныхъ, въ є҆ѵⷢ҇лїи хрⷭ҇то́вомъ ѡ҆бѣтова́нныхъ вѣ̑рнымъ послѣ́дователємъ бг҃а сло́ва. тѣ́мже, чꙋдѧ́щесѧ твои̑мъ подвигѡ́мъ, пое́мъ тѝ хвале́бнѡ:

Ра́дꙋйсѧ, въ глꙋбинѣ̀ се́рдца би́серъ драгі́й гдⷭ҇а і҆и҃са хрⷭ҇та̀ ѡ҆брѣты́й: ра́дꙋйсѧ, и҆́мѧ є҆гѡ̀ бжⷭ҇твенное во ᲂу҆стѣ́хъ и҆ въ се́рдцѣ свое́мъ вы́нꙋ и҆мѣ́вый.

Ра́дꙋйсѧ, на землѣ̀ а҆лка́вый и҆ жажда́вый, ны́нѣ же нетлѣ́нныѧ пи́щи на нб҃сѝ насыща́ѧйсѧ: ра́дꙋйсѧ, нищетꙋ̀ храни́вый, ни́щихъ ѿ гла́да и҆збавлѧ́ѧй.

Ра́дꙋйсѧ, и҆́го хрⷭ҇то́во благо́е и҆ ле́гкое и҆́скреннѣ возлюби́вый.

Ра́дꙋйсѧ, а҆га́пите, дꙋше́вныхъ и҆ тѣле́сныхъ недꙋ́гѡвъ ско́рый цѣли́телю.

Конда́къ ѕ҃

Проповѣ́дникъ бы́въ житїе́мъ твои́мъ є҆ѵⷢ҇льскихъ добродѣ́телей, ѻ҆́тче бл҃же́нне, пло́ть твою̀ посто́мъ и҆ моли́твою порабо́тилъ є҆сѝ и҆ во сла́вꙋ бж҃їю пожи́лъ є҆сѝ: лꙋча́ми свои́хъ подвигѡ́въ всеѕло́бнагѡ врага̀, а҆рмѧ́нина нечести́вагѡ, за́вистїю и҆ гнѣ́вомъ пали́маго и҆ свои́ми ѕлѡ́стными ᲂу҆хищре́ньми веселѧ́щагосѧ, не то́кмѡ посрами́лъ є҆сѝ, но и҆ къ свѣ́тꙋ хрⷭ҇то́вой и҆́стины приве́лъ є҆сѝ, поꙋча́ѧ за всѐ благодари́ти и҆ славосло́вити гдⷭ҇а, поѧ̀ є҆мꙋ̀: А҆ллилꙋ́їа.

І҆́косъ ѕ҃

Возсїѧ́въ въ пеще́рѣ ст҃ы́ѧ ѡ҆би́тели сїѧ̀, ꙗ҆́кѡ бг҃оно́сное свѣти́ло, блаже́ннѣ а҆га́пите, свѣ́томъ до́брыхъ дѣ́лъ и҆ врачева́нїй ᲂу҆мили́лъ є҆сѝ дꙋ́ши и҆ сердца̀ человѣ́кѡвъ, а҆ нечести́вагѡ врача̀ и҆ зави́стника и҆ є҆гѡ̀ безстꙋ́дное безꙋ́мїе посрами́лъ є҆сѝ. тѣ́мъ ᲂу҆́бѡ тебѣ̀, ст҃о́мꙋ и҆ блаже́нномꙋ ᲂу҆го́дникꙋ, ᲂу҆ми́льнѡ зове́мъ:

Ра́дꙋйсѧ, врачева́нїе нечести́вагѡ а҆рмѧ́нина посрами́вый: ра́дꙋйсѧ, ѡ҆брече́ннаго на сме́рть тѣ́мъ же а҆рмѧ́ниномъ недꙋ́гꙋющагѡ со ѻ҆дра̀ болѣ́зни воздви́гнꙋвый.

Ра́дꙋйсѧ, ѡ҆сꙋжде́ннаго на сме́рть и҆ напое́ннаго сме́ртнымъ ꙗ҆́домъ чꙋде́снѡ и҆сцѣли́вый и҆ ѿ сме́рти и҆зба́вивый: ра́дꙋйсѧ, и҆спи́вый сме́ртный ꙗ҆́дъ ѿ врага̀ и҆, по сло́вꙋ гдⷭ҇ню: а҆́ще что̀ и҆ сме́ртно и҆спїю́тъ, не вреди́тъ и҆́хъ, живо́тъ невреди́мый сохрани́вый.

Ра́дꙋйсѧ, ѕло́бꙋ и҆ кова́рство врагѡ́въ свои́хъ посрами́вый.

Ра́дꙋйсѧ, а҆га́пите, дꙋше́вныхъ и҆ тѣле́сныхъ недꙋ́гѡвъ ско́рый цѣли́телю.

Конда́къ з҃

Хотѣ́нїе є҆ди́ное и҆мѣ́лъ є҆сѝ, блаже́ннѣ ѻ҆́тче, є҆́же бг҃ꙋ ᲂу҆гожда́ти и҆ спасе́нїю дꙋше́вномꙋ и҆ здра́вїю тѣле́сномꙋ бли́жнихъ твои́хъ благоче́стнѡ слꙋжи́ти. тѣ́мже ке́ллїа твоѧ̀ пеще́рнаѧ бы́сть враче́бница благоѡти́шнаѧ всѧ́комꙋ человѣ́кꙋ ни́щемꙋ и҆ бога́томꙋ, кнѧ́зю и҆ ᲂу҆бо́гомꙋ. ты́ же, є҆ди́ное въ се́рдцѣ и҆мѣ́ѧ: всѣ̑мъ всѧ̑ бы́ти, врачева́лъ є҆сѝ, не взира́ѧ на лицѣ̀, призыва́ѧ всѣ́хъ кꙋ́пнѡ се́рдцемъ и҆ ᲂу҆сты̀ немо́лчнѡ возглаша́ти бг҃ꙋ: А҆ллилꙋ́їа.

І҆́косъ з҃

Но́вагѡ тѧ̀ чꙋдотво́рца вели́каго позна̀ сла́вный кнѧ́зь влади́мїръ монома́хъ, на ѻ҆дрѣ̀ болѣ́зни возлежа̀, пребыва́ѧ при кончи́нѣ свое́й, сле́знѡ моли́лъ є҆сѝ тѧ̀ притещѝ и҆ и҆сцѣли́ти є҆го̀. но ты̀, мона́шескїй ѻ҆бѣ́тъ соблюда́ѧ, николи́же стѣ́нъ ѡ҆би́тели ѡ҆ставлѧ́ти, посла́лъ є҆сѝ ѕе́лїе ѿ трапе́зы своеѧ̀, и҆ кнѧ́зь, вкꙋси́въ є҆го̀, здра́въ воста́ша. таково́й си́лѣ твоегѡ̀ чꙋдотворе́нїѧ и҆ нелицепрїѧ́тїѧ дивѧ́щесѧ, вопїе́мъ тѝ хвале́бнѡ:

Ра́дꙋйсѧ, крі́не пеще́рнаго прозѧбе́нїѧ: ра́дꙋйсѧ, мѵ́ра хрⷭ҇то́ва благоꙋха́нїе.

Ра́дꙋйсѧ, не скры́вый тала́нтъ врачева́нїѧ, тебѣ̀ домовлⷣкою врꙋче́нный: ра́дꙋйсѧ, ра́ди си́льныхъ мі́ра сего̀ ѻ҆бѣ́та и҆́ноческагѡ не нарꙋ́шивый.

Ра́дꙋйсѧ, сла́вы ра́ди вы́шнѧгѡ зва́нїѧ сла́вꙋ человѣ́ческꙋю ни во что́же вмѣни́вый: ра́дꙋйсѧ, вели́каго кнѧ́зѧ влади́мїра монома́ха съ ѻ҆дра̀ сме́ртнагѡ недꙋ́га бы́лїемъ, тобо́ю бл҃гослове́ннымъ, и҆ моли́твою под̾ѧ́лъ є҆сѝ.

Ра́дꙋйсѧ, а҆га́пите, дꙋше́вныхъ и҆ тѣле́сныхъ недꙋ́гѡвъ ско́рый цѣли́телю.

Конда́къ и҃

Стра́нника и҆ прише́льца въ мі́рѣ се́мъ помышлѧ́лъ є҆сѝ себѐ бы́ти, а҆га́пите бл҃же́нне, тѣ́мже ѡ҆ бога́тствѣ земнѣ́мъ всѧ́кое попече́нїе ѿложи́лъ є҆сѝ. всѧ́кое стѧжа́нїе сꙋ́етное возбранѧ́ѧ, приходѧ́щихъ къ тебѣ̀ раздѣлѧ́ти достоѧ́нїе своѐ съ ни́щею бра́тїею и҆ въ є҆ѧ̀ лицѣ̀ самомꙋ̀ хрⷭ҇тꙋ̀ слꙋжи́ти поꙋча́лъ є҆сѝ, немо́лчнѡ воспѣва́ѧ хвале́бнꙋю пѣ́снь: А҆ллилꙋ́їа.

І҆́косъ и҃

Ве́сь въ бз҃ѣ бы́въ, ѻ҆́тче блаже́нне, ѡ҆ бз҃ѣ и҆ ᲂу҆гожде́нїи є҆мꙋ̀ при́снѡ поꙋча́лъ є҆сѝ, ᲂу҆молѧ́ѧ ничто́же предпочита́ти па́че любвѐ хрⷭ҇то́вы и҆, па́мѧтꙋѧ рече́нное хрⷭ҇то́мъ: не собира́йте себѣ̀ сокро́вища на землѝ, и҆дѣ́же мо́ль и҆ ржа̀ и҆стреблѧ́ютъ, но собира́йте себѣ̀ сокро́вища на нб҃сѝ, не пожела́лъ є҆сѝ ра́ди бла̑гъ вре́менныхъ лиши́тисѧ бла́гъ вѣ́чныхъ, ѿверга́лъ є҆сѝ всѧ̑ да̑ры, тебѣ̀ кнѧ́земъ приноси́мыѧ, поꙋча́ѧ раздава́ти и҆̀хъ ни́щей бра́тїи и҆ ᲂу҆бѡ́гимъ. тѣ́мже и҆ мы̀, таково́е твоѐ нищелю́бїе восхвалѧ́ѧ, зове́мъ тѝ си́це:

Ра́дꙋйсѧ, блаже́нство ни́щихъ дꙋ́хомъ ᲂу҆наслѣ́довавый: ра́дꙋйсѧ, нищетꙋ̀ па́че бога́тства возлюби́вый.

Ра́дꙋйсѧ, мздꙋ̀ за своѐ врачева́нїе ѿвергі́й и҆ разда́ти ю҆̀ ни́щымъ и҆ ᲂу҆бѡ́гимъ повелѣ́вый: ра́дꙋйсѧ, послѣ̑днїѧ ᲂу҆крꙋ̑хи хлѣ́ба своегѡ̀ съ неимꙋ́щими раздѣлѧ́ти поꙋча́вый.

Ра́дꙋйсѧ, любо́вь къ бг҃ꙋ любо́вїю къ бли́жнимъ свои́мъ свидѣ́тельствовавый: ра́дꙋйсѧ, похвала́ми моли́твенными до дне́сь въ ѡ҆би́тели пече́рской ѕѣлѡ̀ почита́емый.

Ра́дꙋйсѧ, а҆га́пите, дꙋше́вныхъ и҆ тѣле́сныхъ недꙋ́гѡвъ ско́рый цѣли́телю.

Конда́къ ѳ҃

Всѣ̑мъ приходи́вшымъ въ ѡ҆би́тель моли́твъ и҆ врачева́нїѧ ра́ди, блаже́нне ѻ҆́тче, ди́внѡ бы́сть ви́дѣти тебѐ, ни́щетнѡ въ ке́ллїи твое́й пребыва́ющаго, ѻ҆ба́че ты̀, всѣ́хъ ра́вною любо́вїю прїе́млѧ, коемꙋ́ждо сло́во ᲂу҆тѣше́нїѧ и҆лѝ и҆сцѣле́нїе подава́лъ є҆сѝ, наꙋча́ѧ пѣ́ти вино́вникꙋ всѣ́хъ благи́хъ бг҃ꙋ: А҆ллилꙋ́їа.

І҆́косъ ѳ҃

Виті̑ѧ многовѣща̑нныѧ не возмо́гꙋтъ досто́йнѡ воспѣ́ти пѡ́двиги и҆ чꙋдотворє́нїѧ твоѧ̑, блаже́ннѣ а҆га́пите, мы́ же, таково́мꙋ житїю̀ твоемꙋ̀ дивѧ́щесѧ, дерза́емъ вѣнча́ти тебѐ, а҆́ще и҆ недосто́йнїи, похвала́ми таковы́ми:

Ра́дꙋйсѧ, на скрижа́лѣхъ се́рдца твоегѡ̀ зако́нъ хрⷭ҇то́въ написа́вый: ра́дꙋйсѧ, ѿ глꙋбины̀ серде́чныѧ дѡ́браѧ и҆ дꙋшеспаси́тєльнаѧ наставлє́нїѧ человѣ́кѡмъ и҆зноси́вый.

Ра́дꙋйсѧ, пеще́рный граждани́не, гра̑ды и҆ вє́си напо́лнивый сла́вою твои́хъ чꙋдотворе́нїй: ра́дꙋйсѧ, бг҃омъ возлю́бленный и҆ бли́жними твои́ми бл҃гословлѧ́емый.

Ра́дꙋйсѧ, ѻ҆́бразъ соверше́нства ѡ҆ хрⷭ҇тѣ̀ въ себѣ̀ ꙗ҆ви́вый: ра́дꙋйсѧ, и҆́го хрⷭ҇то́во, благо́е и҆ ле́гкое, и҆́скреннѣ возлюби́вый.

Ра́дꙋйсѧ, а҆га́пите, дꙋше́вныхъ и҆ тѣле́сныхъ недꙋ́гѡвъ ско́рый цѣли́телю.

Конда́къ і҃

Спасе́нїѧ наде́ждꙋ стѧжа́лъ є҆сѝ при и҆схо́дѣ твое́мъ, блаже́нне ѻ҆́тче а҆га́пите, и҆ ꙗ҆́кѡ пшени́ца зрѣ́лаѧ, во вре́мѧ пожа́тїѧ, кончи́ною благо́ю пресели́лсѧ є҆сѝ въ де́нь, тебѣ̀ пре́жде пред̾ꙋка́занный гдⷭ҇емъ во ѡ҆би́тели гѡ́рнїѧ, прїѧ́ти мздꙋ̀ ѿ рꙋкѝ првⷣнагѡ мздовоздаѧ́телѧ хрⷭ҇та̀, и҆́же вчинѝ дꙋ́шꙋ твою̀ со дꙋ̑хи ст҃ы́хъ, немо́лчнѡ возглаша́ющихъ пред̾ престо́ломъ сла́вы є҆гѡ̀ побѣ́днꙋю пѣ́снь: А҆ллилꙋ́їа.

І҆́косъ і҃

Царѧ̀ нбⷭ҇нагѡ хрⷭ҇та̀ вѣ́рный ра́бъ и҆ послѣ́дователь бы́лъ є҆сѝ, ѻ҆́тче а҆га́пите, тѣ́мже по нело́жномꙋ є҆гѡ̀ глаго́лꙋ: и҆дѣ́же є҆́смь а҆́зъ, тꙋ̀ и҆ слꙋга̀ мо́й бꙋ́детъ, мы̀, чтꙋ́ще тѧ̀, вѣ́рꙋемъ несꙋмнѣ́ннѡ, ꙗ҆́кѡ ты̀ со хрⷭ҇то́мъ во ѻ҆би́телехъ блаже́нства вѣ́чнагѡ водворѧ́ешисѧ и҆ ра́дости нетлѣ́нныѧ наслажда́ешисѧ, ꙗ҆́кѡ и҆́стинный тогѡ̀ ᲂу҆го́дникъ: ѿ на́съ же слы́шиши благохвалє́нїѧ сїѧ̑:

Ра́дꙋйсѧ, предсказа́нїѧ нечести́вагѡ а҆рмѧ́нина ѡ҆ твое́й сме́рти посрами́вый: ра́дꙋйсѧ, ѡ҆ днѣ̀ твоеѧ̀ блаже́нныѧ кончи́ны ѿ гдⷭ҇а и҆звѣще́нный.

Ра́дꙋйсѧ, дꙋ́шꙋ твою̀ въ рꙋ́цѣ гдⷭ҇а ра́достнѡ преда́вый: ра́дꙋйсѧ, ѿкрове́ннымъ лице́мъ сла́вꙋ трисїѧ́ннаго бжⷭ҇тва̀ созерца́ѧй.

Ра́дꙋйсѧ, тѣ́ломъ сме́ртнымъ въ пеще́рѣ погребе́нный: ра́дꙋйсѧ, дꙋше́ю безсме́ртною къ сїѡ́нꙋ го́рнемꙋ воспари́вый.

Ра́дꙋйсѧ, а҆га́пите, дꙋше́вныхъ и҆ тѣле́сныхъ недꙋ́гѡвъ ско́рый цѣли́телю.

Конда́къ а҃і

Пѣ́нїе прест҃ѣ́й бцⷣѣ прино́сиши, блаже́нне ѻ҆́тче на́шъ а҆га́пите, ѡ҆ ѡ҆би́тели твое́й ст҃ѣ́й и҆ подвиза́ющихсѧ въ не́й, и҆ ѡ҆ всѣ́хъ съ любо́вїю къ тебѣ̀ притека́ющихъ при́снѡ хода́тайствꙋеши, просѧ̀ ми́ра свы́ше и҆ благопоспѣше́нїѧ всѣ̑мъ, возносѧ́щымъ достодо́лжныѧ похвалы̑ трїеди́номꙋ бг҃ꙋ, воспѣва́ѧ є҆мꙋ̀: А҆ллилꙋ́їа.

І҆́косъ а҃і

Свѣти́льника тѧ̀ до́брыхъ дѣ́лъ, блаже́нне ѻ҆́тче, и҆сповѣ́дꙋемъ бы́ти и҆ прославлѧ́емъ просла́вльшагѡ тѧ̀ гдⷭ҇а, и҆́же чꙋдесы̑ мнѡ́гими мо́щи твоѧ̑ ѡ҆зна́менова: стрꙋи́ бо и҆сцѣлє́нїй блгⷣтныхъ и҆сточа́еши ѿ ни́хъ недꙋ̑жнымъ и҆ подвиза́еши вѣ̑рныѧ вопи́ти тебѣ̀:

Ра́дꙋйсѧ, земны́й а҆́гг҃ле и҆ нбⷭ҇ный человѣ́че: ра́дꙋйсѧ, безме́зднагѡ врачева́нїѧ и҆сто́чниче.

Ра́дꙋйсѧ, мѵ́ра многоцѣле́бнагѡ преиспо́лненный фїа́ле: ра́дꙋйсѧ, ѿ ра́ки твоеѧ̀ ст҃ы́ѧ и҆сцѣлє́нїѧ ѻ҆би́льнѡ подава́ѧй.

Ра́дꙋйсѧ, скорбѧ́щихъ ᲂу҆тѣ́шителю: ра́дꙋйсѧ, ᲂу҆ныва́ющихъ ѡ҆бодри́телю.

Ра́дꙋйсѧ, а҆га́пите, дꙋше́вныхъ и҆ тѣле́сныхъ недꙋ́гѡвъ ско́рый цѣли́телю.

Конда́къ в҃і

Благода́ть гдⷭ҇ню и҆спросѝ на́мъ, ѻ҆́тче а҆га́пите, почита́ющимъ съ любо́вїю ст҃ꙋ́ю па́мѧть твою̀ и҆ ᲂу҆се́рднѡ притека́ющымъ къ честнѣ́й ра́цѣ моще́й твои́хъ, ѿ неѧ́же чꙋдє́сныѧ и҆сцѣлє́нїѧ подае́ши недꙋ́жнымъ. тебѣ́ бо, чꙋдотворе́нїѧ да́ромъ ѿ бг҃а просла́вленномꙋ, прилѣ́жнѡ мо́лимсѧ: и҆сцѣлѝ на̑ша недꙋ́ги дꙋшє́вныѧ и҆ тѣлє́сныѧ и҆ помозѝ на́мъ предста́тельствомъ твои́мъ спасе́нїе вѣ́чное полꙋчи́ти, да вкꙋ́пѣ съ тобо́ю воспое́мъ ди́вномꙋ во ст҃ы́хъ свои́хъ бг҃ꙋ: А҆ллилꙋ́їа.

І҆́косъ в҃і

Пою́ще по́двиги твоѧ̀, блаже́нне ѻ҆́тче, ᲂу҆блажа́емъ равноа́гг҃льное житїѐ твоѐ, диви́мсѧ чꙋдотворє́нїемъ твои́мъ, моли́твеннѡ почита́емъ ст҃ꙋ́ю па́мѧть твою̀ и҆, припа́дающе къ ра́цѣ моще́й твои́хъ, ᲂу҆ми́льнѡ взыва́емъ:

Ра́дꙋйсѧ, прест҃ы́ѧ бцⷣы досто́йный моли́твенниче: ра́дꙋйсѧ, пещерожи́телей сла́во и҆ похвало̀.

Ра́дꙋйсѧ, ст҃ы́ѧ ѡ҆би́тели пече́рскїѧ, вкꙋ́пѣ съ а҆нтѡ́нїемъ и҆ ѳеодо́сїемъ, при́сное ѡ҆хране́нїе: ра́дꙋйсѧ, подвиза́ющихсѧ въ не́й бл҃гонаде́жное застꙋпле́нїе.

Ра́дꙋйсѧ, приходѧ́щихъ въ ню̀ на поклоне́нїе благі́й предста́телю: ра́дꙋйсѧ, почита́ющихъ па́мѧть твою̀ нбⷭ҇ный покрови́телю.

Ра́дꙋйсѧ, а҆га́пите, дꙋше́вныхъ и҆ тѣле́сныхъ недꙋ́гѡвъ ско́рый цѣли́телю.

Конда́къ г҃і

Ѽ, преблаже́нне ѻ҆́тче а҆га́пите! ты̀ горѣ̀ на нб҃сѝ, мы́ же до́лꙋ на землѝ, ᲂу҆далє́нныѧ ѿ тебє̀ не толи́ко мѣ́стомъ, коли́ко грѣхо́вною нечистото́ю на́шею, ѻ҆ба́че дерза́емъ приноси́ти тебѣ̀ сїѐ ма́лое похва́льное пѣ́нїе, є҆го́же млⷭ҇тивно прїе́мь, молѝ гдⷭ҇а и҆ влⷣкꙋ на́шего и҆зба́вити на́съ поги́бели вѣ́чныѧ и҆ сподо́бити блаже́нства свѧты́хъ, вопїю́щихъ є҆мꙋ̀ вѣ́чнѡ хвале́бнꙋю пѣ́снь: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃лѡмъ любе́знꙋю чистотꙋ̀ ѿ ю҆́ности твоеѧ̀ возлюби́въ, блаже́ннѣ а҆га́пите, къ добродѣ́телей подви́жникꙋ, преподо́бномꙋ а҆нтѡ́нїю прите́клъ є҆сѝ и҆, ѿ него̀ во и҆́ночество ѡ҆блече́нный, подража́тель ре́вностный подвигѡ́въ є҆гѡ̀ бы́лъ є҆сѝ: тѣ́мже сла́вимъ тѧ̀ воззва́нїи си́ми:

Ра́дꙋйсѧ, бг҃оно́снаго а҆нтѡ́нїа добродѣ́телей и҆ дарѡ́въ наслѣ́дниче: ра́дꙋйсѧ, на высотꙋ̀ соверше́нства дꙋхо́внаго возше́дый.

Ра́дꙋйсѧ, моли́твами ᲂу҆се́рдными да́ръ врачева́нїѧ и҆ чꙋдотворе́нїѧ ѿ гдⷭ҇а полꙋчи́вый: ра́дꙋйсѧ, и҆з̾ глꙋбины̀ дꙋшѝ воздыха́нїи чистотꙋ̀ дꙋше́внꙋю стѧжа́вый.

Ра́дꙋйсѧ, а҆га́пите, дꙋше́вныхъ и҆ тѣле́сныхъ недꙋ́гѡвъ ско́рый цѣли́телю.

Конда́къ а҃

И҆збра́нный ᲂу҆ченичѐ вели́каго ᲂу҆чи́телѧ, прпⷣбнаго и҆ бг҃оно́снаго ѻ҆тца̀ на́шего а҆нтѡ́нїа, и҆ ди́вный подража́телю житїѧ̀ є҆гѡ̀ ст҃а́гѡ, свѧ́тѣ ѻ҆́тче а҆га́пите, пѣ́снїю восхва́лимъ тѧ̀ съ любо́вїю, застꙋ́пника на́шего: ты́ же, ꙗ҆́кѡ и҆мѣ́ѧй дерзнове́нїе ко гдⷭ҇ꙋ, моли́сѧ вы́нꙋ ѡ҆ спасе́нїи на́съ, грѣ́шныхъ, ѿ всѧ́кихъ бѣ́дъ и҆збавлѧ́ѧ зовꙋ́щихъ тѝ:

Ра́дꙋйсѧ, а҆га́пите, дꙋше́вныхъ и҆ тѣле́сныхъ недꙋ́гѡвъ ско́рый цѣли́телю.

Моли́твы

Ѽ, всеблаже́нне а҆га́пите, земны́й а҆́гг҃ле и҆ нбⷭ҇ный человѣ́че! припа́даемъ къ тебѣ̀ съ вѣ́рою и҆ любо́вїю и҆ мо́лимъ ти сѧ прилѣ́жнѡ: ꙗ҆вѝ на́мъ, смирє́ннымъ и҆ грѣ̑шнымъ, ст҃о́е своѐ застꙋпле́нїе: се́ бо грѣ̑хъ ра́ди на́шихъ не и҆́мамы свобо́ды ча̑дъ бж҃їихъ проси́ти ѡ҆ потре́бахъ на́шихъ гдⷭ҇а и҆ влⷣкꙋ на́шегѡ, но тебѐ, моли́твенника благопрїѧ́тна, къ немꙋ̀ предлага́емъ и҆ про́симъ тѧ̀ со ᲂу҆се́рдїемъ мнѡ́гимъ: и҆спросѝ на́мъ ѿ бла́гости є҆гѡ̀ благопотрє́бныѧ да̑ры дꙋша́мъ и҆ тѣлесє́мъ на̑шимъ: вѣ́рꙋ пра́вꙋ, любо́вь ко всѣ̑мъ нелицемѣ́рнꙋ, въ ѕлострада́нїихъ терпѣ́нїе, тѧ́жкими болѣ́зньми ѡ҆держи̑мымъ ѿ недꙋ́гѡвъ и҆сцѣле́нїе, под̾ бре́менемъ скорбе́й и҆ напа́стей неꙋдобоноси́мыхъ па́дающымъ и҆ житїѧ̀ своегѡ̀ ѿча́ѧвшымсѧ твои́ми моли́твами полꙋчи́ти ско́рое ѡ҆блегче́нїе и҆ и҆збавле́нїе.

Не забꙋ́ди, блаже́нне ѻ҆́тче, и҆ ѡ҆би́тель твою̀ ст҃ꙋ́ю, при́снѡ тѧ̀ чтꙋ́щꙋю, и҆ соблюдѝ ю҆̀ и҆ всѣ́хъ, живꙋ́щихъ и҆ подвиза́ющихсѧ въ не́й и҆ на поклоне́нїе въ ню̀ приходѧ́щихъ, невреди́мыми ѿ и҆скꙋшє́нїй дїа́вольскихъ и҆ всѧ́кагѡ ѕла̀. є҆гда́ же приспѣ́етъ на́ше ѿ вре́меннагѡ сего̀ житїѧ̀ ѿше́ствїе и҆ къ вѣ́чности преселе́нїе, не лишѝ на́съ по́мощи твоеѧ̀ нбⷭ҇ныѧ, но мл҃твами твои́ми всѣ́хъ на́съ приведѝ въ приста́нище спасе́нїѧ и҆ наслѣ̑дники ꙗ҆вѝ на́съ бы́ти всесвѣ́тлагѡ црⷭ҇твїѧ хрⷭ҇то́ва, да пое́мъ и҆ сла́вимъ неизречє́нныѧ щедрѡ́ты человѣколю́бца бг҃а, ѻ҆ц҃а̀ и҆ сн҃а и҆ ст҃а́гѡ дх҃а, и҆ твоѐ вкꙋ́пѣ съ прпⷣбными а҆нтѡ́нїемъ и҆ ѳеодо́сїемъ ѻ҆те́ческое застꙋпле́нїе во вѣ́ки вѣкѡ́въ. а҆ми́нь.

Ѽ, прпⷣбне ѻ҆́тче а҆га́пите! воззрѝ на на́съ ми́лостивно и҆ къ землѝ приве́рженныхъ возведѝ къ высотѣ̀ нбⷭ҇нѣй. ты̀ горѣ̀ на нб҃сѝ, мы̀ на землѝ ни́зꙋ, ᲂу҆далены̀ ѿ тебє̀ не толи́ко мѣ́стомъ, є҆ли́кѡ грѣха́ми свои́ми и҆ беззакѡ́нїи, но къ тебѣ̀ прибѣга́емъ и҆ взыва́емъ: наста́ви на́съ ходи́ти пꙋте́мъ твои́мъ, вразꙋмѝ и҆ рꙋково́дствꙋй на́съ. всѧ̀ твоѧ̀ ст҃а́ѧ жи́знь бы́сть зерца́ломъ всѧ́кїѧ добродѣ́тели. не преста́ни, ᲂу҆го́дниче бж҃їй, ѡ҆ на́съ вопи́ти ко гдⷭ҇ꙋ. и҆спросѝ предста́тельствомъ твои́мъ ᲂу҆ всеми́лостиваго бг҃а на́шегѡ ми́ръ це́ркви є҆гѡ̀, под̾ зна́менїемъ креста̀ во́инствꙋющей, согла́сїе въ вѣ́рѣ и҆ є҆диномꙋ́дрїе, сꙋемꙋ́дрїѧ же и҆ раско́лѡвъ и҆стребле́нїе, ᲂу҆твержде́нїе во благи́хъ дѣ́лѣхъ, больны̑мъ и҆сцѣле́нїе, печа̑льнымъ ᲂу҆тѣше́нїе, ѡ҆би́жєннымъ застꙋпле́нїе, бѣ́дствꙋющымъ по́мощь. не посрамѝ на́съ, къ тебѣ̀ съ вѣ́рою притека́ющихъ. всѝ правосла́внїи хрїстїа́не, твои́ми чꙋдесы̑ и҆спо́лненнїи и҆ ми́лостьми ѡ҆благодѣ́тельствованнїи, и҆сповѣ́даютъ тѧ̀ бы́ти своего̀ покрови́телѧ и҆ застꙋ́пника. ꙗ҆вѝ дрє́внїѧ ми́лѡсти твоѧ̀, и҆́хже ѻ҆тцє́мъ вспомоществова́лъ є҆сѝ, не ѿри́ни и҆ на́съ, ча́дъ и҆́хъ, стопа́ми и҆́хъ къ тебѣ̀ ше́ствꙋющихъ. предстоѧ́ще всечестнѣ́й і҆кѡ́нѣ твое́й, ꙗ҆́кѡ тебѣ̀ жи́вꙋ сꙋ́щꙋ, припа́даемъ и҆ мо́лимсѧ: прїимѝ молє́нїѧ на̑ша и҆ вознесѝ и҆́хъ на же́ртвенникъ благоꙋтро́бїѧ бж҃їѧ, да прїи́мемъ тобо́ю благода́ть и҆ бл҃говре́меннꙋю въ нꙋ́ждѣхъ на́шихъ по́мощь. ᲂу҆крѣпѝ на́съ, малодꙋ́шныхъ, и҆ ᲂу҆твердѝ въ вѣ́рѣ, да несомнѣ́ннѡ ᲂу҆пова́емъ полꙋчи́ти всѧ̑ блага̑ѧ ѿ благосе́рдїѧ влады́ки моли́твами твои́ми. ѽ, превели́кїй ᲂу҆го́дниче бж҃їй! всѣ̑мъ на́мъ, съ вѣ́рою притека́ющымъ къ тебѣ̀, помозѝ предста́тельствомъ твои́мъ ко гдⷭ҇ꙋ и҆ всѣ́хъ на́съ ᲂу҆пра́ви въ ми́рѣ и҆ покаѧ́нїи сконча́ти живо́тъ на́шъ и҆ пресели́тисѧ со ᲂу҆пова́нїемъ въ блажє́нныѧ нѣ̑дра а҆враа́мова, и҆дѣ́же ты̀ ра́достнѡ ны́нѣ почива́еши, прославлѧ́ѧ со всѣ́ми свѧты́ми бг҃а, въ трⷪ҇цѣ сла́вимаго, ѻ҆ц҃а̀ и҆ сн҃а и҆ ст҃а́гѡ дх҃а, ны́нѣ и҆ при́снѡ и҆ во вѣ́ки вѣкѡ́въ. а҆ми́нь.

Ѽ, прпⷣбне и҆ бг҃оно́сне ѻ҆́тче на́шъ а҆га́пите, слꙋго̀ бж҃їй преизрѧ́днѣйшїй, чꙋдотво́рче и҆ врачꙋ̀ всемлⷭ҇тивый, всѣ́мъ съ вѣ́рою и҆ любо́вїю тѧ̀ призыва́ющимъ ско́рый помо́щниче и҆ те́плый застꙋ́пниче! Ꙗ҆́кѡ свѣти́льникъ пресвѣ́тлый, ты̀ просїѧ́лъ є҆сѝ житїе́мъ добродѣ́тельнымъ въ гора́хъ кі́евскихъ на па́жити бг҃ома́тери, тѣ́мже припа́дающе къ ра́цѣ многоцѣле́бныхъ моще́й твои́хъ, со стра́хомъ покланѧ́емсѧ и҆ любо́вїю лобыза́емъ, и҆з̾ глꙋбины̀ се́рдца къ тебѣ̀ взыва́ѧ: помозѝ на́мъ, ᲂу҆го́дниче бж҃їй, помѧнѝ на́съ пред̾ гдⷭ҇емъ и҆ и҆спросѝ на́мъ ѿ него̀ ѡ҆ставле́нїе согрѣше́нїй на́шихъ во́льныхъ и҆ нево́льныхъ, въ недꙋ́зѣхъ стра́ждꙋщимъ ско́рое и҆сцѣле́нїе пода́ждь, пꙋтеше́ствꙋющымъ застꙋпле́нїе, скорбѧ́щымъ ᲂу҆тѣше́нїе, бѣ́дствꙋющымъ по́мощь и҆ и҆збавле́нїе и҆ всѧ̑ потрє́бнаѧ ко спⷭ҇нїю. Ꙗ҆́кѡ да твои́ми, ѻ҆́тче, свѧты́ми моли́твами полꙋчи́вше блгⷣть и҆ млⷭ҇ть ѿ всемлⷭ҇тиваго сп҃са и҆ гдⷭ҇а на́шегѡ і҆и҃са хрⷭ҇та̀, возвели́чимъ и҆ просла́вимъ препѣ́тое и҆́мѧ є҆гѡ̀, є҆мꙋ́же со ѻ҆ц҃е́мъ и҆ ст҃ы́мъ дх҃омъ сла́ва и҆ держа́ва во вѣ́ки, а҆ми́нь.