Кондак 1
Избра́нному защи́тителю и побо́рнику христиа́нства, проти́внику и низложи́телю нече́стия, новоявле́нному му́ченику, и́стинному во́ину Христо́ву, я́ко звезда́ пресве́тлая Восто́чней Це́ркви возсия́вшему, и весе́лия ве́рных испо́лнившему, ны́не от всея́ души́ благода́рственная и похва́льная пе́ния прино́сим, с любо́вию пою́ще:
Ра́дуйся, Иоа́нне, великому́чениче Христо́в.
Икос 1
А́нгелом возлю́бленно и уго́дно бы́сть и пре́жде страда́ния житие́ твое́, страстоте́рпче Христо́в Иоа́нне, телесе́м бо пе́рстным обложе́н сы́й, житие́ а́нгельское на земли́ показа́л еси́ ми́лостыньми и непреста́нными моли́твами, та́же и страда́нии. Те́мже у́бо по достоя́нию сия́ похва́льная прино́сим ти́:
Ра́дуйся, я́ко поще́нии и непреста́нными моли́твами твои́ми уподо́бился еси́ А́нгелом.
Ра́дуйся, я́ко ми́лостыньми и слеза́ми твои́ми устраши́л еси́ де́моны; ра́дуйся, я́ко уте́шил еси́ скорбя́щия. Ра́дуйся, я́ко вспомоществова́л еси́ боля́щия.
Ра́дуйся, я́ко в ме́ртвеннем телеси́ показа́лся еси́ а́нгел земны́й; ра́дуйся, я́ко мудрова́нием бы́л еси́ челове́к Небе́сный.
Ра́дуйся, от благове́рных роди́телей произше́дый; ра́дуйся, правосла́вную ве́ру да́же до конца́ сохрани́вый.
Ра́дуйся, от сла́внаго гра́да Трапезу́нда произра́стший; ра́дуйся, вся́кими доброде́тельми соверше́нно укра́шенный.
Ра́дуйся, купе́ц иску́сен на мо́ре показа́выйся; ра́дуйся, ку́плю душе́вную до́бре упра́вивый.
Ра́дуйся, Иоа́нне, великому́чениче Христо́в.
Кондак 2
Ви́дя, му́чениче Христо́в, лука́вство диа́вола чрез инове́рнаго возни́кшее на тя́, во е́же бы удали́ти тя́ от правосла́вныя ве́ры, и, да́нною ти́ от Бо́га прему́дростию, уразумева́л еси́ кова́рства вра́жия, благода́тию Вы́шняго не уловле́н о́нема пребыва́ше, и сего́ ра́ди воспе́л еси́: Аллилу́иа.
Икос 2
Разуме́л еси́, треблаже́нне, наноси́мую на тя́ еретика́ Реи́за клевету́ к Бе́лаго гра́да нечести́вому епа́рху, а́ки бы ты́ изво́лил еси́ отступи́ти от и́стинныя христиа́нския ве́ры; и а́ще о́ный и нужда́шеся вся́ким о́бразом, преклоня́я тя́, но ты́ ника́коже победи́м пребы́л еси́. Те́мже по достоя́нию слы́шиши от на́с такова́я:
Ра́дуйся, лжи́ваго Реи́за обличи́вый; ра́дуйся, подо́бно столпу́ непоколеби́м пребы́вый.
Ра́дуйся, ле́сти епа́рха ни во что́же вмени́вый; ра́дуйся, ве́рных во благоче́стии укрепи́вый.
Ра́дуйся, я́ко пожре́ти со́лнцу и денни́це не восхоте́л еси́; ра́дуйся, я́ко си́м нечести́вому ка́дию поруга́лся еси́.
Ра́дуйся, Созда́теля свети́л Еди́наго в Тро́ице Бо́га именова́вый; ра́дуйся, све́тлую Христо́ву ве́ру испове́давый.
Ра́дуйся, я́ко о́ная свети́ла тва́рь бы́ти, а не бо́ги ре́кл еси́; ра́дуйся, сего́ ра́ди от тира́на му́чимый.
Ра́дуйся, епа́рха пред все́ми обличи́вый; ра́дуйся, того́ ко благоче́стию преклони́ти тща́выйся.
Ра́дуйся, Иоа́нне, великому́чениче Христо́в.
Кондак 3
Си́лою благода́ти Свята́го Ду́ха укрепля́емь, со мно́гим дерзнове́нием веща́ше ко иге́мону, хра́брый во́ине Иису́сов: «Не наде́йся, о тира́не, я́ко а́з когда́-ли́бо от Христа́ моего́ отреку́ся и тва́ри вме́сто Творца́ поклоню́ся! Да не бу́дет ми́ сего́, до́ндеже еще́ дыха́ние и́мам». И сему́ та́ко бы́вшу, ве́лиим гла́сом воспе́л еси́: Аллилу́иа.
Икос 3
Име́я в лице́ твое́м, страстоте́рпче Христо́в, весе́лие, глаго́лаше ко епа́рху де́рзостно, и не бе́ в тебе́ опа́сство, ниже́ боя́знь. Злочести́вый же, не моги́й терпе́ти бо́лее и я́ростию возгара́яся, повеле́ принести́ па́лицы и обнажи́ти тя́. Ты́ же, а́ки бы и́ну си́м бы́ти, та́ко обре́лся еси́. Сего́ ра́ди глаго́лем ти́ такова́я:
Ра́дуйся, ви́дев па́лицы ты́я, ника́коже убоя́выйся; ра́дуйся, зря́ ины́я, крепча́йше тира́ну сопротивоста́вый.
Ра́дуйся, тле́нных оде́жд совлече́нный; ра́дуйся, в порфи́ру нетле́ния на небеси́ облече́нный.
Ра́дуйся, я́ко устраша́ем бы́л еси́ сме́ртными муче́нии; ра́дуйся, я́ко мучи́тель па́че разъяря́шеся твои́м о си́х небреже́нием.
Ра́дуйся, я́ко лю́та тира́на пред все́ми предстоя́вшими посрами́л еси́; ра́дуйся, я́ко и́стинна раба́ Бо́жия себе́ бы́ти испове́дал еси́.
Ра́дуйся, уче́ния оте́ц твои́х до́бре содержа́вый; ра́дуйся, бого́м иге́моновым пожре́ти не восхоте́вый.
Ра́дуйся, я́ко нечести́вому без закосне́ния тя́ му́чити ре́кл еси́; ра́дуйся, я́ко сего́ ра́ди в Ца́рствии Небе́снем скоре́е водвори́лся еси́.
Ра́дуйся, Иоа́нне, великому́чениче Христо́в.
Кондак 4
Бу́рю муче́ний наведе́ на тя́, о многострада́льне, нечести́вый мучи́тель, твоя́ глаго́лы услы́шав, егда́ изре́кл еси́, я́ко Творцу́ покланя́ешися, а не созда́нию, и е́же преклони́ти тя́ к своему́ хоте́нию отча́яся, безу́мне ди́виим гне́вом возгоре́ся и нача́т тя́ му́чити. Ты́ же, му́чениче Христо́в, му́жественне терпя́, укрепля́ющу тя́ Бо́гу, с весе́лием воспе́л еси́: Аллилу́иа.
Икос 4
Слы́шаша ве́рнии, я́ко бы́сть се́рдце твое́ адама́нтово, егда́ любве́ ра́ди Жела́емаго тобо́ю пострада́л еси́, блаже́нне му́чениче Христо́в, ни во что́же вмени́в муче́ния, благода́тию Бо́жиею укрепля́емь, гне́в мучи́теля, а́ки а́спида, попра́в, и на тяжча́йшая муче́ния ра́достне поте́кл еси́. Сего́ ра́ди слы́шиши от на́с сицева́я:
Ра́дуйся, муче́ний ра́ди растяже́нный ни́зу на земли́; ра́дуйся, о́чи ума́ твоего́ име́вый горе́ к Небеси́.
Ра́дуйся, я́ко па́лицами без ми́лости бие́н бы́в, не изнемо́гл еси́; ра́дуйся, я́ко мучи́тели, лю́те му́чившии тя́, ослабе́ша.
Ра́дуйся, раздробле́ние своего́ телесе́ до́блественне стерпе́вый; ра́дуйся, си́м мучи́теля па́че на гне́в подви́гнувый.
Ра́дуйся, я́ко от многобие́ния пло́ть твоя́ от косте́й отделя́шеся; ра́дуйся, я́ко сие́ зря́ще, во́инство Небе́сное удивля́шеся.
Ра́дуйся, кро́вию твое́ю зе́млю обагри́вый; ра́дуйся, си́м сатану́ под ногу́ твое́ю попра́вый.
Ра́дуйся, за сие́ Влады́це Христу́ вознесы́й благодаре́ния. Ра́дуйся, я́ко То́й тя́ укрепи́ и на тяжча́йшая муче́ния.
Ра́дуйся, Иоа́нне, великому́чениче Христо́в.
Кондак 5
Боготе́чней звезде́, путеводи́вшей дре́вле волхвы́ к Со́лнцу пра́ведному, уподо́бился еси́, великому́чениче Христо́в, приводя́ к позна́нию и́стиннаго Бо́га, Ему́же ти́ моля́щуся, вя́щшаго гне́ва му́чившии тя́ сы́нове поги́бельнии исполня́хуся и люте́е тя́ му́чиша, я́ко и гла́су твоему́ оскуде́ти. Ты́ же, страстоте́рпче, муче́ния му́жественне претерпе́л еси́, укрепи́вшему тя́ Христу́ из глубины́ се́рдца взыва́я: Аллилу́иа.
Икос 5
Ви́девше тя́ ве́рнии, по повеле́нию иге́монову вери́гами свя́зана, во́ине Христо́в Иоа́нне, вве́ржена в темни́цу и на тяжча́йшая муче́ния блюдо́ма, и всю́ пло́ть твою́ от бие́ния раздробле́ну, удивля́хуся. Па́ки же ти́ на су́д предста́вшу, пред мучи́телем стоя́ше с лице́м весе́лым. Нечести́вый же ка́дий зело́ удиви́ся и устраши́ся. Мы́ же тя́ срета́ем похвала́ми сицевы́ми:
Ра́дуйся, я́ко Христа́ ра́ди вери́гами свя́зан бы́л еси́; ра́дуйся, я́ко си́ми диа́вола отню́д устраши́л еси́.
Ра́дуйся, во узи́лищи мра́чнем заключе́нный обита́вый; ра́дуйся, по си́х в пресве́тлый ра́й всели́выйся.
Ра́дуйся, я́ко ты́, тяжча́йшими ра́нами по всему́ телеси́ бы́в я́звлен, возвесели́ся; ра́дуйся, я́ко неи́стовый мучи́тель сему́ зело́ удиви́ся.
Ра́дуйся, я́ко пренебре́гл еси́ твои́х ра́н теле́сных исцеле́ний; ра́дуйся, я́ко си́м душа́ твоя́ красне́йше процвете́.
Ра́дуйся, я́ко челове́к тво́й вне́шний разруши́ся; ра́дуйся, я́ко вну́тренний прия́т лу́чшее обновле́ние.
Ра́дуйся, я́ко мучи́тель на тя́ угото́ва тяжча́йшая муче́ния; ра́дуйся, я́ко и о́ная с любо́вию прия́л еси́.
Ра́дуйся, Иоа́нне, великому́чениче Христо́в.
Кондак 6
Пропове́дал еси́, достосла́вне му́чениче Христо́в, и́стинную ве́ру и е́же по сме́рти иму́щее бы́ти воздая́ние, о не́мже мы́слию внима́я, до́блественне терпя́ше страда́ния: строга́ние и рва́ние пло́ти твоея́. Сего́ ра́ди мно́жае испо́лнися гне́ва уро́див тира́н, и я́ко ди́вий зве́рь рыка́я, повеле́ жесточа́йше му́чити тя́ и без ми́лости би́ти. Ты́ же, о се́м небреги́й, вопия́ше Бо́гу: Аллилу́иа.
Икос 6
Возсия́л еси́ му́ченическим по́двигом, страстоте́рпче Христо́в Иоа́нне, я́коже свети́ло пресве́тлое: та́ко бо от нечести́вых му́чашеся, я́ко и вну́тренняя твоя́ разседо́шася, мучи́тели же твои́ изнемого́ша от неми́лостивых ударе́ний. Ты́ же, до́блий во́ине Христо́в, не премени́л еси́ по́мысла к жела́нному ти́ Го́споду Иису́су устремле́ннаго, но па́че во глубине́ серде́чней моля́шеся Ему́, да да́рует ти́ да́же до конца́ терпе́ние. Сего́ ра́ди и мы́, моли́твами твои́ми защища́еми, вопие́м тебе́ такова́я:
Ра́дуйся, я́ко за Христа́ неми́лостивне бие́н бы́в, не погуби́л еси́ терпе́ния; ра́дуйся, я́ко вся́ претерпе́л еси́, укрепле́н бы́в благода́ти свы́ше посеще́нием.
Ра́дуйся, я́ко бию́щии тя́, утружде́ни бы́вше, пременя́хуся; ра́дуйся, я́ко му́чившии тя́ я́ростию распыха́хуся.
Ра́дуйся, я́ко ви́девшии тя́ ве́рнии жа́лости исполня́хуся; ра́дуйся, я́ко вси́ на позо́рище собра́вшиися за суровство́ мучи́теля укори́ша.
Ра́дуйся, я́ко спребыва́вшии ти́ А́нгели по́двиги твоя́ похвали́ша; ра́дуйся, я́ко ура́нена бы́сть пло́ть твоя́ и да́же до вну́тренних разсе́деся.
Ра́дуйся, я́ко у́м тво́й пребы́сть в Бо́зе тя́ укрепля́ющем; ра́дуйся, Христо́вым страсте́м в телеси́ твое́м приобщи́выйся.
Ра́дуйся, от Го́спода неувяда́емаго на Небеси́ венца́ сподо́бльшийся.
Ра́дуйся, Иоа́нне, великому́чениче Христо́в.
Кондак 7
Хотя́ злочести́вый мучи́тель к своему́ хоте́нию преклони́ти тя́, блаже́нне му́чениче, и не име́я люте́йших муче́ний, повеле́ привести́ свире́паго коня́, и святи́и твои́ но́зе ко о́шибу его́ кре́пко привяза́ти, и по все́м сто́гном гра́да влачи́ти. Ты́ же, во́ине Христо́в, та́ко влачи́м, позо́р бы́л еси́ А́нгелом и челове́ком, Бо́гу поя́: Аллилу́иа.
Икос 7
Но́ву и необы́чну умы́сли нечести́вый ка́дий на тя́ му́ку, страстоте́рпче Христо́в: влачи́му бо ти́ ско́ро ко́нем, ча́сти от телесе́ твоего́ на ка́менех отрева́емы остава́хуся, глава́ сокруша́шеся. Ве́рнии же, ви́девшии тя́, о укрепле́нии твое́м Го́спода моля́ху. Ты́ же, горе́ у́м к Бо́гу име́я, в та́йне Тому́ предстоя́ше. Сего́ ра́ди и мы́, раби́ твои́, удивля́ющеся, сия́ похва́льная воспису́ем ти́:
Ра́дуйся, я́ко муче́нием твои́м пропове́дник Святы́я Тро́ицы бы́л еси́; ра́дуйся, я́ко кре́пким терпе́нием твои́м основа́ние благи́я ве́ры яви́лся еси́.
Ра́дуйся, огне́м неизрече́нныя е́же к Бо́гу любве́ разжже́нный; ра́дуйся, сего́ ра́ди раздробле́ние твоея́ пло́ти претерпе́вый.
Ра́дуйся, я́ко сотвори́ся вино́вен весе́лия А́нгелом; ра́дуйся, я́ко бы́л еси́ позо́р умиле́ния ве́рным.
Ра́дуйся, я́ко свята́я глава́ твоя́, влачи́ма Христа́ ра́ди, о ка́мение сокруша́шеся; ра́дуйся, я́ко моли́твами твои́ми глава́ неви́димаго зми́я сотре́ся.
Ра́дуйся, я́ко исте́кшею твое́ю кро́вию земля́ обагри́ся; ра́дуйся, я́ко Христо́с ти́ во Ца́рствии Небе́снем вене́ц нетле́ния дарова́.
Ра́дуйся, Го́спода ра́ди на земли́ пострада́вый; ра́дуйся, с Ни́м на Небесе́х воцари́выйся.
Ра́дуйся, Иоа́нне, великому́чениче Христо́в.
Кондак 8
Стра́нную си́лу нечести́вии иуде́и в тебе́ ви́деша, му́чениче Христо́в, егда́ свире́пым ко́нем влачи́ша тя́ по сто́гном гра́да. О́вии у́бо посмева́хуся ти́, о́вии скривля́ху ли́ца своя́ и я́же име́яху в рука́х мета́ху на тя́, ини́и же глумля́хуся и неподо́бная де́яху. Ты́ же, благи́й ра́бе Госпо́день, со благодаре́нием терпе́л еси́ сия́, укрепля́ющу тя́ Бо́гу непреста́нно поя́: Аллилу́иа.
Икос 8
Вся́ му́ки ти́ претерпе́вшу, блаже́нне страстоте́рпче, и на коне́ц тече́ния по́двиг твои́х дости́гшу, еди́н от посмева́ющихтися иуде́й, ко хра́мине свое́й восте́к и взе́м ме́ч обнаже́н, си́м честну́ю и святу́ю главу́ твою́ отсече́ и та́ко све́тлую твою́ ду́шу в ру́це тобо́ю жела́ннаго Христа́ преда́л еси́. Те́мже и слы́шиши от на́с сицева́я:
Ра́дуйся, я́ко от иуде́й посмея́ния и поруга́ния Христа́ ра́ди прия́л еси́; ра́дуйся, я́ко си́м поруга́нному и́ми Спа́су после́довал еси́.
Ра́дуйся, от нечести́вых многоразли́чно му́ченный; ра́дуйся, за Христа́, на́с ра́ди пострада́вшаго, му́ки до́бле претерпе́вый.
Ра́дуйся, я́ко ро́д неве́рный мече́м главу́ твою́ отсече́; ра́дуйся, я́ко Госпо́дь пресве́тлым венце́м сию́ увенча́.
Ра́дуйся, я́ко по́двиг тво́й страда́льческий тогда́ сконча́ся; ра́дуйся, я́ко с му́ченицы во оби́телех Небе́сных ку́пно прославля́ешися.
Ра́дуйся, я́ко и́мамы ве́рнии тя́ прете́плаго к Бо́гу хода́тая; ра́дуйся, я́ко моле́ния твоя́ прия́тна Ему́ су́ть.
Ра́дуйся, я́ко па́мять твоя́ в Це́ркви Христо́вей честна́ есть; ра́дуйся, я́ко и́мя твое́ услажда́ет все́х правосла́вных.
Ра́дуйся, Иоа́нне, великому́чениче Христо́в.
Кондак 9
Ви́девше ве́рнии по изше́ствии святы́я твоея́ души́ от телесе́, пресла́вне му́чениче, святы́я мо́щи твоя́ непогребе́нны и презира́емы, возскорбе́ша. Наста́вшей же но́щи, сто́лп да́же до небесе́ над святы́ми твои́ми моща́ми ви́ден бы́сть, свещи́ горя́ху, и му́жие в бе́лыя ри́зы облече́нни, кадя́ще о́крест свята́го телесе́ твоего́, поя́ху неизрече́нная и свяще́нная словеса́, с ни́ми же и ты́ воспева́ше Бо́гу: Аллилу́иа.
Икос 9
Вети́я красноречи́вии не мо́гут изрещи́ пе́ние, от А́нгел бы́вшее, воспева́вшееся о́крест святы́х твои́х моще́й, преблаже́нне му́чениче. Еди́н же от иуде́й сие́ слы́шав, помышля́ше земны́х бы́ти челове́к, напря́г бо лу́к и пусти́в стрелу́, покуша́шеся порази́ти пою́щия, но ничто́же успе́ окая́нный се́й, все́м бо бы́сть сожале́ния зре́лище. Те́мже и мы́, о сицево́м чудеси́ удивля́ющеся, зове́м ти́ такова́я:
Ра́дуйся, удосто́ивыйся надгро́бнаго а́нгельскаго пе́ния; ра́дуйся, я́ко Христо́с с Небесе́ призре́ на святы́я мо́щи твоя́.
Ра́дуйся, я́ко ви́ден бы́сть над ни́ми сто́лп о́гненный да́же до небесе́; ра́дуйся, я́ко чу́до сие́ мно́гих ужаси́.
Ра́дуйся, я́ко о́ный иудея́нин Бо́жиим мще́нием нака́зан бы́сть; ра́дуйся, я́ко сие́ в вя́щшую сла́ву святы́х твои́х моще́й соде́яся.
Ра́дуйся, я́ко лю́дие на позо́р нака́заннаго нечести́вца стеко́шася; ра́дуйся, я́ко то́й по испове́дании греха́ пред все́ми исцели́ся.
Ра́дуйся, я́ко уве́дев мучи́тель о чудеси́ се́м зело́ устраши́ся; ра́дуйся, я́ко сего́ ра́ди христиа́ном погребсти́ тя́ повеле́.
Ра́дуйся, я́ко це́рковь прия́т честно́е те́ло твое́; ра́дуйся, я́ко во оби́телех Небе́сных всели́ся свята́я душа́ твоя́.
Ра́дуйся, Иоа́нне, великому́чениче Христо́в.
Кондак 10
Хотя́щу, сла́вне му́чениче Христо́в, оклевета́телю и преда́телю твоему́ честно́е и многострада́льное твое́ те́ло укра́сти и во свое́ оте́чество принести́, яви́лся еси́, во́ине Христо́в, а́бие о́ныя це́ркви иере́ю во сне́ и о се́м возвести́л еси́ ему́. То́й же, в це́рковь прите́к, честны́я твоя́ мо́щи из руку́ та́тя отъя́т, с ра́достию Бо́гу поя́: Аллилу́иа.
Икос 10
Егда́, му́чениче Христо́в, честны́я и святы́я твоя́ мо́щи от иноро́дных Бо́жиим Про́мыслом спасе́ни бы́ша и во олтари́ поста́вишася бли́з святы́я трапе́зы, иде́же А́гнец Бо́жий всегда́ за спасе́ние на́ше жре́тся, Ему́же и ты́ же́ртва жива́я прине́слся еси́, тогда́ ве́рни, о се́м уве́девше, просла́виша Всеще́драго Бо́га, прославля́ющаго святы́я Своя́. С ни́миже и мы́ похва́льная пе́ния сия́ прино́сим ти́:
Ра́дуйся, я́ко твоя́ святы́я мо́щи неукра́дени и невреди́ми пребы́ша; ра́дуйся, я́ко инове́рный посра́млен и то́щ прогна́ся.
Ра́дуйся, я́ко от иере́й честны́я твоя́ мо́щи во олтари́ положе́ни бы́ша; ра́дуйся, я́ко о се́м ве́рнии возра́довашася.
Ра́дуйся, я́ко сто́лп о́гненный с небесе́ над ни́ми явля́шеся; ра́дуйся, я́ко иногда́ к ни́м А́нгели нисходи́ша.
Ра́дуйся, мно́жицею благоуха́ние неизрече́нно от о́ных исхожда́ше; ра́дуйся, я́ко вся́ческих боле́зней ве́рнии чрез о́ныя исцеля́ются.
Ра́дуйся, я́ко си́ми непреста́нно чудеса́ содева́ются; ра́дуйся, я́ко и́ми и де́мони от мно́гих изгоня́ются.
Ра́дуйся, я́ко содева́емых тобо́ю чуде́с веща́ние повсю́ду про́йде; ра́дуйся, я́ко до коне́ц земли́ твоя́ ве́сть дости́же.
Ра́дуйся, Иоа́нне, великому́чениче Христо́в.
Кондак 11
Пе́ния похва́льнаго не́сть, по достоя́нию похвали́ти могу́щаго благоле́пие благода́ти чуде́с, я́же от честны́х и святы́х твои́х моще́й быва́ют, достосла́вне му́чениче Христо́в. Не то́чию прости́и лю́дие, но и ца́рие, и кня́зи чту́т, и покланя́ются, и лобыза́ют я́ с любо́вию. Сего́ ра́ди, я́ко име́яй дерзнове́ние ко Влады́це все́х Бо́гу, испроси́ на́м все́м в жи́зни се́й теле́снаго здра́вия и во благи́х нра́вех утвержде́ния, в бу́дущем же ве́це Небе́сных благи́х восприя́тия, пою́щим Бо́гу: Аллилу́иа.
Икос 11
Светоприе́мная свеща́ су́ть честны́я и святы́я твоя́ мо́щи, многострада́льне му́чениче Христо́в Иоа́нне. На све́щнице Це́ркви Христо́вы поста́влени, просвеща́ющия на мно́гое вре́мя ме́сто, на не́мже пострада́л еси́, та́же благоволе́нием Бо́жиим, тща́нием же благочести́ваго господа́ря пренесени́ в Молдовлахи́ю, непреста́нно све́тят, и все́м с ве́рою и любо́вию прибега́ющим ко о́ным лучи́ чуде́с излива́ют. Мы́ же, сея́ благода́ти прича́стницы бы́вше, прино́сим ти́ такова́я:
Ра́дуйся, луче́ незаходи́маго и мы́сленнаго све́та; ра́дуйся, всю́ поднебе́сную просвеща́яй.
Ра́дуйся, пресве́тлая денни́це дне́ невече́рняго; ра́дуйся, сми́рно, Це́рковь Христо́ву вы́ну облагоуха́ющая.
Ра́дуйся, изволе́нием Бо́жиим от на́с удале́н бы́вый; ра́дуйся, и во стра́нствии твое́м луча́ми благода́ти Христо́вы просия́вый.
Ра́дуйся, смотре́нием Госпо́дним па́ки к на́м возврати́выйся; ра́дуйся, все́х приходя́щих ко святы́м твои́м моще́м Небе́снаго благоуха́ния сподобля́яй.
Ра́дуйся, сосу́де ми́ра Христо́ва неистощава́ем и неизче́тных боле́зней врачева́ние содержа́щь; ра́дуйся, все́м прося́щим бла́г преизоби́льный пода́телю.
Ра́дуйся, благода́ть и сла́ву, от Царя́ Небе́снаго на тя́ излия́нную, прие́мый; Ра́дуйся, вся́ческих боле́зней исцеле́ния оби́льно подава́яй.
Ра́дуйся, Иоа́нне, великому́чениче Христо́в.
Кондак 12
Благода́ть прия́л еси́ от Бо́га, всехва́льне и многострада́льне му́чениче, исцеля́ти вся́кия боле́зни и неду́ги душе́вныя и теле́сныя. Те́мже ны́не предстоя́щи Христу́, во страда́ниих твои́х тя́ укрепи́вшему, не преста́ни хода́тайствовати все́м на́м теле́снаго здра́вия и душе́внаго спасе́ния, со благогове́нием и любо́вию чту́щим святу́ю па́мять твою́ и непреста́нно пою́щим Бо́гу: Аллилу́иа.
Икос 12
Пое́м, почита́ем, сла́вим, ублажа́ем многоболе́зненная страда́ния твоя́, терпе́ние бо до конца́ до́блественне подъе́м, тве́рдость адама́нтову показа́л еси́, за ня́же Подвигополо́жник Христо́с Госпо́дь на земли́ и на Небеси́ тя́ просла́ви и на́м, недосто́йным, засту́пника и хода́тая тя́ дарова́, свя́те победоно́сче, великому́чениче Христо́в Иоа́нне, вопию́щим ти́ сицева́я:
Ра́дуйся, я́ко те́лом на́м спребыва́я, водворя́ешися душе́ю с во́и Небе́сными; ра́дуйся, я́ко по мно́зех страда́ниих твои́х прия́т тя́ Госпо́дь во упокое́ние ве́чное.
Ра́дуйся, во оби́тели Небе́сныя му́ченическими ли́цы и а́нгельскими провожде́нный; ра́дуйся, сла́вою и че́стию пресла́вно десни́цею Царя́ Христа́ увенча́нный.
Ра́дуйся, я́ко мзда́ мно́га во све́тлостех святы́х тебе́ угото́вася; ра́дуйся, я́ко сокро́вище некра́домое на Небеси́ приобре́л еси́.
Ра́дуйся, во искуше́ниих и ну́ждах те́плый на́ш предста́телю; ра́дуйся, ра́дости и сла́вы ве́чныя всеще́дрейший на́м хода́таю.
Ра́дуйся, немощны́м неистощи́мый исто́чниче исцеле́ния; ра́дуйся, источа́яй непреста́нное скорбя́щим утеше́ние.
Ра́дуйся, я́ко тобо́ю избавля́емся от все́х зо́л душе́вных и теле́сных; ра́дуйся, я́ко тобо́ю наде́емся улучи́ти бла́г Небе́сных.
Ра́дуйся, Иоа́нне, великому́чениче Христо́в.
Кондак 13
О многострада́льне, свя́те великому́чениче Христо́в Иоа́нне, приими́ сие́ от скве́рных усте́н на́ших со умиле́нием приноси́мое ти́ моле́ние и от все́х неду́г душе́вных и теле́сных, от вра́г ви́димых и неви́димых и ве́чныя му́ки богогоприя́тными твои́ми моли́твами на́с изба́ви, да с тобо́ю ку́пно в бу́дущем ве́це, во оби́телех святы́х, пое́м Бо́гу: Аллилу́иа.
Повтор
Этот кондак читается трижды, затем икос 1-й и кондак 1-й.
Икос 1
А́нгелом возлю́бленно и уго́дно бы́сть и пре́жде страда́ния житие́ твое́, страстоте́рпче Христо́в Иоа́нне, телесе́м бо пе́рстным обложе́н сы́й, житие́ а́нгельское на земли́ показа́л еси́ ми́лостыньми и непреста́нными моли́твами, та́же и страда́нии. Те́мже у́бо по достоя́нию сия́ похва́льная прино́сим ти́:
Ра́дуйся, я́ко поще́нии и непреста́нными моли́твами твои́ми уподо́бился еси́ А́нгелом.
Ра́дуйся, я́ко ми́лостыньми и слеза́ми твои́ми устраши́л еси́ де́моны; ра́дуйся, я́ко уте́шил еси́ скорбя́щия. Ра́дуйся, я́ко вспомоществова́л еси́ боля́щия.
Ра́дуйся, я́ко в ме́ртвеннем телеси́ показа́лся еси́ а́нгел земны́й; ра́дуйся, я́ко мудрова́нием бы́л еси́ челове́к Небе́сный.
Ра́дуйся, от благове́рных роди́телей произше́дый; ра́дуйся, правосла́вную ве́ру да́же до конца́ сохрани́вый.
Ра́дуйся, от сла́внаго гра́да Трапезу́нда произра́стший; ра́дуйся, вся́кими доброде́тельми соверше́нно укра́шенный.
Ра́дуйся, купе́ц иску́сен на мо́ре показа́выйся; ра́дуйся, ку́плю душе́вную до́бре упра́вивый.
Ра́дуйся, Иоа́нне, великому́чениче Христо́в.
Кондак 1
Избра́нному защи́тителю и побо́рнику христиа́нства, проти́внику и низложи́телю нече́стия, новоявле́нному му́ченику, и́стинному во́ину Христо́ву, я́ко звезда́ пресве́тлая Восто́чней Це́ркви возсия́вшему, и весе́лия ве́рных испо́лнившему, ны́не от всея́ души́ благода́рственная и похва́льная пе́ния прино́сим, с любо́вию пою́ще:
Ра́дуйся, Иоа́нне, великому́чениче Христо́в.
Молитвы
О, святы́й многострада́льче и великому́чениче Христо́в Иоа́нне, ты́ от ю́ности твоея́ кре́ст в се́рдце свое́м нося́, по́ст, моли́тву и ми́лостыню па́че все́х бла́г земны́х предпоче́л еси́. Того́ ра́ди от неве́рнаго Реи́за за́вистию и ле́стию злочести́вому епа́рху пре́дан бы́л еси́, по подо́бию пре́даннаго за ны́ Спаси́теля ми́ра, Го́спода на́шего Иису́са Христа́. На сме́рть оклевета́н, обру́ган и убие́н бы́в, земна́я блага́я ни во что́же вмени́л еси́, прия́т бо сме́рть за испове́дание и прославле́ние в Тро́ице Еди́наго Бо́га. Сего́ ра́ди Вы́шний Созда́тель просла́ви тебе́ нетле́нием пло́ти, и по сме́рти твое́й между́ му́чениками, а́ще и после́днейша, оба́че пе́рвым му́чеником единонра́вна, единоче́стна и сострада́тельна тя́ яви́ и просла́ви мо́щи твоя́ нетле́нием и благоуха́нием, неду́гующым, си́лу целе́бную чрез тя́ да́рует. Приими́ у́бо моле́ние на́ше, я́ко во единонадеся́тый ча́с прише́дших и ничто́же досто́йно сотво́рших, поми́лованным бы́ти и мзды́ Небе́сныя не лиши́тися на́м исхода́тайствуй, святы́ми твои́ми и богоприя́тными моли́твами у Престо́ла Христа́ Царя́ Небе́снаго, ему́же сла́ва подоба́ет, че́сть и поклоне́ние, со Отце́м и Святы́м Ду́хом, ны́не и при́сно, и во ве́ки веко́в. Ами́нь.
Конда́къ а҃
И҆збра́нномꙋ защи́тителю и҆ побо́рникꙋ хрⷭ҇тїа́нства, проти́вникꙋ и҆ низложи́телю нече́стїѧ, новоѧвле́нномꙋ мꙋ́ченикꙋ, и҆́стинномꙋ во́инꙋ хрⷭ҇то́вꙋ, ꙗ҆́кѡ ѕвѣзда̀ пресвѣ́тлаѧ восто́чнѣй цр҃кви возсїѧ́вшемꙋ, и҆ весе́лїѧ вѣ́рныхъ и҆спо́лнившемꙋ, ны́нѣ ѿ всеѧ̀ дꙋшѝ бл҃года́рственнаѧ и҆ похва́льнаѧ пѣ́нїѧ прино́симъ, съ любо́вїю пою́ще:
Ра́дꙋйсѧ, і҆ѡа́нне, великомꙋ́чениче хрⷭ҇то́въ.
І҆́косъ а҃
А҆́гг҃лѡмъ возлю́бленно и҆ ᲂу҆го́дно бы́сть и҆ пре́жде страда́нїѧ житїѐ твоѐ, страстоте́рпче хрⷭ҇то́въ і҆ѡа́нне, тѣлесе́мъ бо пе́рстнымъ ѡ҆бложе́нъ сы́й, житїѐ а҆́гг҃льское на землѝ показа́лъ є҆сѝ ми́лостыньми и҆ непреста́нными мл҃твами, та́же и҆ страда́нїи. Тѣ́мже ᲂу҆́бѡ по достоѧ́нїю сїѧ̀ похва́льнаѧ прино́симъ тѝ:
Ра́дꙋйсѧ, ꙗ҆́кѡ поще́нїи и҆ непреста́нными мл҃твами твои́ми ᲂу҆подо́билсѧ є҆сѝ а҆́гг҃лѡмъ. Ра́дꙋйсѧ, ꙗ҆́кѡ ми́лостыньми и҆ слеза́ми твои́ми ᲂу҆страши́лъ є҆сѝ де́мѡны.
Ра́дꙋйсѧ, ꙗ҆́кѡ ᲂу҆тѣ́шилъ є҆сѝ скорбѧ́щїѧ. Ра́дꙋйсѧ, ꙗ҆́кѡ вспомоществова́лъ є҆сѝ болѧ́щїѧ.
Ра́дꙋйсѧ, ꙗ҆́кѡ въ ме́ртвеннемъ тѣлесѝ показа́лсѧ є҆сѝ а҆́гг҃лъ земны́й. Ра́дꙋйсѧ, ꙗ҆́кѡ мꙋдрова́нїемъ бы́лъ є҆сѝ чл҃вѣ́къ нбⷭ҇ный.
Ра́дꙋйсѧ, ѿ бл҃говѣ́рныхъ роди́телей произше́дый. Ра́дꙋйсѧ, правосла́внꙋю вѣ́рꙋ да́же до конца̀ сохрани́вый.
Ра́дꙋйсѧ, ѿ сла́внагѡ гра́да трапезꙋ́нда произра́стшїй. Ра́дꙋйсѧ, всѧ́кими добродѣ́тельми соверше́ннѡ ᲂу҆кра́шенный.
Ра́дꙋйсѧ, кꙋпе́цъ и҆скꙋ́сенъ на мо́рѣ показа́выйсѧ. Ра́дꙋйсѧ, кꙋ́плю дꙋше́внꙋю до́брѣ ᲂу҆пра́вивый.
Ра́дꙋйсѧ, і҆ѡа́нне, великомꙋ́чениче хрⷭ҇то́въ.
Конда́къ в҃
Ви́дѧ, мꙋ́чениче хрⷭ҇то́въ, лꙋка́вство дїа́вола чрез̾ и҆новѣ́рнагѡ возни́кшее на тѧ̀, во є҆́же бы ᲂу҆дали́ти тѧ̀ ѿ правосла́вныѧ вѣ́ры, и҆, да́нною тѝ ѿ бг҃а премꙋ́дростїю, ᲂу҆разꙋмѣва́лъ є҆сѝ кова́рства вра́жїѧ, бл҃года́тїю вы́шнѧгѡ не ᲂу҆ловле́нъ ѻ҆́нѣма пребыва́ше, и҆ сегѡ̀ ра́ди воспѣ́лъ є҆сѝ: А҆ллилꙋ́їа.
І҆́косъ в҃
Разꙋмѣ́лъ є҆сѝ, требл҃же́нне, наноси́мꙋю на тѧ̀ є҆ретїка̀ реи́за клеветꙋ̀ къ бѣ́лагѡ гра́да нечести́вомꙋ є҆па́рхꙋ, а҆́ки бы ты̀ и҆зво́лилъ є҆сѝ ѿстꙋпи́ти ѿ и҆́стинныѧ хрⷭ҇тїа́нскїѧ вѣ́ры: и҆ а҆́ще ѻ҆́ный и҆ нꙋжда́шесѧ всѧ́кимъ ѻ҆́бразомъ, преклонѧ́ѧ тѧ̀, но ты̀ ника́коже побѣди́мъ пребы́лъ є҆сѝ. Тѣ́мже по достоѧ́нїю слы́шиши ѿ на́съ такова̑ѧ:
Ра́дꙋйсѧ, лжи́вагѡ реи́за ѡ҆бличи́вый. Ра́дꙋйсѧ, подо́бнѡ столпꙋ̀ непоколеби́мъ пребы́вый.
Ра́дꙋйсѧ, ле́сти є҆па́рха ни во что́же вмѣни́вый. Ра́дꙋйсѧ, вѣ́рныхъ во бл҃гоче́стїи ᲂу҆крѣпи́вый.
Ра́дꙋйсѧ, ꙗ҆́кѡ пожре́ти со́лнцꙋ и҆ денни́це не восхотѣ́лъ є҆сѝ. Ра́дꙋйсѧ, ꙗ҆́кѡ си́мъ нечести́вомꙋ ка́дїю порꙋга́лсѧ є҆сѝ.
Ра́дꙋйсѧ, созда́телѧ свѣти̑лъ є҆ди́нагѡ въ трⷪ҇цѣ бг҃а и҆менова́вый. Ра́дꙋйсѧ, свѣ́тлꙋю хрⷭ҇то́вꙋ вѣ́рꙋ и҆сповѣ́давый.
Ра́дꙋйсѧ, ꙗ҆́кѡ ѻ҆́наѧ свѣти́ла тва́рь бы́ти, а҆ не бо́ги ре́клъ є҆сѝ. Ра́дꙋйсѧ, сегѡ̀ ра́ди ѿ тѷра́на мꙋ́чимый.
Ра́дꙋйсѧ, є҆па́рха пред̾ всѣ́ми ѡ҆бличи́вый. Ра́дꙋйсѧ, тогѡ̀ ко бл҃гоче́стїю преклони́ти тща́выйсѧ.
Ра́дꙋйсѧ, і҆ѡа́нне, великомꙋ́чениче хрⷭ҇то́въ.
Конда́къ г҃
Си́лою бл҃года́ти ст҃а́гѡ дх҃а ᲂу҆крѣплѧ́емь, со мно́гимъ дерзнове́нїемъ вѣща́ше ко и҆ге́мѡнꙋ, хра́брый во́ине і҆и҃совъ: не надѣ́йсѧ, ѡ҆ тѷра́не, ꙗ҆́кѡ а҆́зъ когда̀ ли́бо ѿ хрⷭ҇та̀ моегѡ̀ ѿрекꙋ́сѧ и҆ тва́ри вмѣ́стѡ творца̀ поклоню́сѧ. Да не бꙋ́детъ мѝ сегѡ̀, до́ндеже є҆щѐ дыха́нїе и҆́мамъ. И҆ семꙋ̀ та́кѡ бы́вшꙋ, ве́лїимъ гла́сомъ воспѣ́лъ є҆сѝ: А҆ллилꙋ́їа.
І҆́косъ г҃
И҆мѣ́ѧ въ лицѣ̀ твое́мъ, страстоте́рпче хрⷭ҇то́въ, весе́лїе, глаго́лаше ко є҆па́рхꙋ де́рзостнѡ, и҆ не бѣ̀ въ тебѣ̀ ѻ҆па́сство, нижѐ боѧ́знь. Ѕлочести́вый же, не могі́й терпѣ́ти бо́лѣе и҆ ꙗ҆́ростїю возгара́ѧсѧ, повелѣ̀ принестѝ па́лицы и҆ ѡ҆бнажи́ти тѧ̀. Ты́ же, а҆́ки бы и҆́нꙋ си́мъ бы́ти, та́кѡ ѡ҆бре́лсѧ є҆сѝ. Сегѡ̀ ра́ди глаго́лемъ тѝ такова̑ѧ:
Ра́дꙋйсѧ, ви́дѣвъ па́лицы ты́ѧ, ника́коже ᲂу҆боѧ́выйсѧ. Ра́дꙋйсѧ, зрѧ̀ и҆ны́ѧ крѣпча́йше тѷра́нꙋ сопротивоста́вый.
Ра́дꙋйсѧ, тлѣ́нныхъ ѻ҆де́ждъ совлече́нный. Ра́дꙋйсѧ, въ порфѵ́рꙋ нетлѣ́нїѧ на нб҃сѝ ѡ҆блече́нный.
Ра́дꙋйсѧ, ꙗ҆́кѡ ᲂу҆страша́емъ бы́лъ є҆сѝ сме́ртными мꙋче́нїи. Ра́дꙋйсѧ, ꙗ҆́кѡ мꙋчи́тель па́че раз̾ѧрѧ́шесѧ твои́мъ ѡ҆ си́хъ небреже́нїемъ.
Ра́дꙋйсѧ, ꙗ҆́кѡ лю́та тѷра́на пред̾ всѣ́ми предстоѧ́вшими посрами́лъ є҆сѝ. Ра́дꙋйсѧ, ꙗ҆́кѡ и҆́стинна раба̀ бж҃їѧ себѐ бы́ти и҆сповѣ́далъ є҆сѝ.
Ра́дꙋйсѧ, ᲂу҆че́нїѧ ѻ҆тє́цъ твои́хъ до́брѣ содержа́вый. Ра́дꙋйсѧ, богѡ́мъ и҆ге́мѡновымъ пожре́ти не восхотѣ́вый.
Ра́дꙋйсѧ, ꙗ҆́кѡ нечести́вомꙋ без̾ закоснѣ́нїѧ тѧ̀ мꙋ́чити ре́клъ є҆сѝ. Ра́дꙋйсѧ, ꙗ҆́кѡ сегѡ̀ ра́ди въ црⷭ҇твїи нбⷭ҇нѣмъ скорѣ́е водвори́лсѧ є҆сѝ.
Ра́дꙋйсѧ, і҆ѡа́нне, великомꙋ́чениче хрⷭ҇то́въ.
Конда́къ д҃
Бꙋ́рю мꙋче́нїй наведѐ на тѧ̀, ѡ҆ многострада́льне, нечести́вый мꙋчи́тель, твоѧ̀ глаго́лы ᲂу҆слы́шавъ, є҆гда̀ и҆зре́клъ є҆сѝ, ꙗ҆́кѡ творцꙋ̀ покланѧ́ешисѧ, а҆ не созда́нїю, и҆ є҆́же преклони́ти тѧ̀ къ своемꙋ̀ хотѣ́нїю ѿча́ѧсѧ, безꙋ́мнѣ ди́вїимъ гнѣ́вомъ возгорѣ́сѧ и҆ нача́тъ тѧ̀ мꙋ́чити. Ты́ же, мꙋ́чениче хрⷭ҇то́въ, мꙋ́жественнѣ терпѧ̀, ᲂу҆крѣплѧ́ющꙋ тѧ̀ бг҃ꙋ, съ весе́лїемъ воспѣ́лъ є҆сѝ: А҆ллилꙋ́їа.
І҆́косъ д҃
Слы́шаша вѣ́рнїи, ꙗ҆́кѡ бы́сть се́рдце твоѐ а҆дама́нтово, є҆гда̀ любвѐ ра́ди жела́емагѡ тобо́ю пострада́лъ є҆сѝ, бл҃же́ннѣ мꙋ́чениче хрⷭ҇то́въ, ни во что́же вмѣни́въ мꙋче́нїѧ, бл҃года́тїю бж҃їею ᲂу҆крѣплѧ́емь, гнѣ́въ мꙋчи́телѧ а҆́ки а҆́спїда попра́въ, и҆ на тѧжча́йшаѧ мꙋче́нїѧ ра́достнѣ поте́клъ є҆сѝ. Сегѡ̀ ра́ди слы́шиши ѿ на́съ сицева̑ѧ:
Ра́дꙋйсѧ, мꙋче́нїй ра́ди растѧже́нный ни́зꙋ на землѝ. Ра́дꙋйсѧ, ѻ҆́чи ᲂу҆ма̀ твоегѡ̀ и҆мѣ́вый горѣ̀ къ нб҃сѝ.
Ра́дꙋйсѧ, ꙗ҆́кѡ па́лицами без̾ ми́лости бїе́нъ бы́въ, не и҆знемо́глъ є҆сѝ. Ра́дꙋйсѧ, ꙗ҆́кѡ мꙋчи́тели, лю́тѣ мꙋ́чившїи тѧ̀, ѡ҆слабѣ́ша.
Ра́дꙋйсѧ, раздробле́нїе своегѡ̀ тѣлесѐ до́блественне стерпѣ́вый. Ра́дꙋйсѧ, си́мъ мꙋчи́телѧ па́че на гнѣ́въ подви́гнꙋвый.
Ра́дꙋйсѧ, ꙗ҆́кѡ ѿ многобїе́нїѧ пло́ть твоѧ̀ ѿ косте́й ѿдѣлѧ́шесѧ. Ра́дꙋйсѧ, ꙗ҆́кѡ сїѐ зрѧ́ще, во́инство нбⷭ҇ное ᲂу҆дивлѧ́шесѧ.
Ра́дꙋйсѧ, кро́вїю твое́ю зе́млю ѡ҆багри́вый. Ра́дꙋйсѧ, си́мъ сатанꙋ̀ под̾ ногꙋ̑ твое́ю попра́вый.
Ра́дꙋйсѧ, за сїѐ влⷣцѣ хрⷭ҇тꙋ̀ вознесы́й бл҃годаре́нїѧ. Ра́дꙋйсѧ, ꙗ҆́кѡ то́й тѧ̀ ᲂу҆крѣпѝ и҆ на тѧжча́йшаѧ мꙋче́нїѧ.
Ра́дꙋйсѧ, і҆ѡа́нне, великомꙋ́чениче хрⷭ҇то́въ.
Конда́къ є҃
Бг҃оте́чнѣй ѕвѣздѣ̀, пꙋтеводи́вшей дре́вле волхвы̀ къ со́лнцꙋ пра́ведномꙋ, ᲂу҆подо́билсѧ є҆сѝ, великомꙋ́чениче хрⷭ҇то́въ, приводѧ̀ къ позна́нїю и҆́стиннагѡ бг҃а, є҆мꙋ́же тѝ молѧ́щꙋсѧ, вѧ́щшагѡ гнѣ́ва мꙋ́чившїи тѧ̀ сы́нове поги́бельнїи и҆сполнѧ́хꙋсѧ и҆ лютѣ́е тѧ̀ мꙋ́чиша, ꙗ҆́кѡ и҆ гла́сꙋ твоемꙋ̀ ѡ҆скꙋдѣ́ти. Ты́ же, страстоте́рпче, мꙋче́нїѧ мꙋ́жественнѣ претерпѣ́лъ є҆сѝ, ᲂу҆крѣпи́вшемꙋ тѧ̀ хрⷭ҇тꙋ̀ и҆з̾ глꙋбины̀ срⷣца взыва́ѧ: А҆ллилꙋ́їа.
І҆́косъ є҃
Ви́дѣвше тѧ̀ вѣ́рнїи, по повелѣ́нїю и҆ге́мѡновꙋ вери́гами свѧ́зана, во́ине хрⷭ҇то́въ і҆ѡа́нне, вве́ржена въ темни́цꙋ и҆ на тѧжча́йшаѧ мꙋче́нїѧ блюдо́ма, и҆ всю̀ пло́ть твою̀ ѿ бїе́нїѧ раздробле́нꙋ, ᲂу҆дивлѧ́хꙋсѧ. Па́ки же тѝ на сꙋ́дъ предста́вшꙋ, пред̾ мꙋчи́телемъ стоѧ́ше съ лице́мъ весе́лымъ. Нечести́вый же ка́дїй ѕѣлѡ̀ ᲂу҆диви́сѧ и҆ ᲂу҆страши́сѧ. Мы́ же тѧ̀ срѣта́емъ похвала́ми сицевы́ми:
Ра́дꙋйсѧ, ꙗ҆́кѡ хрⷭ҇та̀ ра́ди вери́гами свѧ́занъ бы́лъ є҆сѝ. Ра́дꙋйсѧ, ꙗ҆́кѡ си́ми дїа́вола ѿню́дъ ᲂу҆страши́лъ є҆сѝ.
Ра́дꙋйсѧ, во ᲂу҆зи́лищи мра́чнѣмъ заключе́нный ѡ҆бита́вый. Ра́дꙋйсѧ, по си́хъ въ пресвѣ́тлый ра́й всели́выйсѧ
Ра́дꙋйсѧ, ꙗ҆́кѡ ты̀, тѧжча́йшими ра́нами по всемꙋ̀ тѣлесѝ бы́въ ꙗ҆́звленъ, возвесели́сѧ. Ра́дꙋйсѧ, ꙗ҆́кѡ неи́стовый мꙋчи́тель семꙋ̀ ѕѣлѡ̀ ᲂу҆диви́сѧ.
Ра́дꙋйсѧ, ꙗ҆́кѡ пренебре́глъ є҆сѝ твои́хъ ра́нъ тѣле́сныхъ и҆сцѣле́нїй. Ра́дꙋйсѧ, ꙗ҆́кѡ си́мъ дꙋша̀ твоѧ̀ краснѣ́йше процвѣтѐ.
Ра́дꙋйсѧ, ꙗ҆́кѡ чл҃вѣ́къ тво́й вне́шнїй разрꙋши́сѧ. Ра́дꙋйсѧ, ꙗ҆́кѡ внꙋ́треннїй прїѧ́тъ лꙋ́чшее ѡ҆бновле́нїе.
Ра́дꙋйсѧ, ꙗ҆́кѡ мꙋчи́тель на тѧ̀ ᲂу҆гото́ва тѧжча́йшаѧ мꙋче́нїѧ. Ра́дꙋйсѧ, ꙗ҆́кѡ и҆ ѻ҆́наѧ съ любо́вїю прїѧ́лъ є҆сѝ.
Ра́дꙋйсѧ, і҆ѡа́нне, великомꙋ́чениче хрⷭ҇то́въ.
Конда́къ ѕ҃
Проповѣ́далъ є҆сѝ, достосла́вне мꙋ́чениче хрⷭ҇то́въ, и҆́стиннꙋю вѣ́рꙋ и҆ є҆́же по сме́рти и҆мꙋ́щее бы́ти воздаѧ́нїе, ѡ҆ не́мже мы́слїю внима́ѧ, до́блественнѣ терпѧ́ше страда́нїѧ: строга́нїе и҆ рва́нїе пло́ти твоеѧ̀. Сегѡ̀ ра́ди мно́жае и҆спо́лнисѧ гнѣ́ва ᲂу҆ро́дивъ тѷра́нъ, и҆ ꙗ҆́кѡ ди́вїй ѕвѣ́рь рыка́ѧ, повелѣ̀ жесточа́йше мꙋ́чити тѧ̀ и҆ без̾ ми́лости би́ти. Ты́ же, ѡ҆ се́мъ небрегі́й, вопїѧ́ше бг҃ꙋ: А҆ллилꙋ́їа.
І҆́косъ ѕ҃
Возсїѧ́лъ є҆сѝ мꙋ́ченическимъ по́двигомъ, страстоте́рпче хрⷭ҇то́въ і҆ѡа́нне, ꙗ҆́коже свѣти́ло пресвѣ́тлое. Та́кѡ бо ѿ нечести́выхъ мꙋ́чашесѧ, ꙗ҆́кѡ и҆ внꙋ́трєннѧѧ твоѧ̀ разсѣдо́шасѧ, мꙋчи́тели же твоѝ и҆знемого́ша ѿ неми́лостивыхъ ᲂу҆даре́нїй. Ты́ же, до́блїй во́ине хрⷭ҇то́въ, не премѣни́лъ є҆сѝ по́мысла къ жела́нномꙋ тѝ гдⷭ҇ꙋ і҆и҃сꙋ ᲂу҆стремле́ннагѡ, но па́че во глꙋбинѣ̀ серде́чнѣй молѧ́шесѧ є҆мꙋ̀, да да́рꙋетъ тѝ да́же до конца̀ терпѣ́нїе. Сегѡ̀ ра́ди и҆ мы̀, мл҃твами твои́ми защища́еми, вопїе́мъ тебѣ̀ такова̑ѧ:
Ра́дꙋйсѧ, ꙗ҆́кѡ за хрⷭ҇та̀ неми́лостивнѣ бїе́нъ бы́въ, не погꙋби́лъ є҆сѝ терпѣ́нїѧ. Ра́дꙋйсѧ, ꙗ҆́кѡ всѧ̀ претерпѣ́лъ є҆сѝ, ᲂу҆крѣпле́нъ бы́въ бл҃года́ти свы́ше посѣще́нїемъ.
Ра́дꙋйсѧ, ꙗ҆́кѡ бїю́щїи тѧ̀, ᲂу҆трꙋжде́ни бы́вше, премѣнѧ́хꙋсѧ. Ра́дꙋйсѧ, ꙗ҆́кѡ мꙋ́чившїи тѧ̀ ꙗ҆́ростїю распыха́хꙋсѧ.
Ра́дꙋйсѧ, ꙗ҆́кѡ ви́дѣвшїи тѧ̀ вѣ́рнїи жа́лости и҆сполнѧ́хꙋсѧ. Ра́дꙋйсѧ, ꙗ҆́кѡ всѝ на позо́рищѣ собра́вшїисѧ за сꙋровство̀ мꙋчи́телѧ ᲂу҆кори́ша.
Ра́дꙋйсѧ, ꙗ҆́кѡ спребыва́вшїи тѝ а҆́гг҃ли по́двиги твоѧ̀ похвали́ша. Ра́дꙋйсѧ, ꙗ҆́кѡ ᲂу҆ра́нена бы́сть пло́ть твоѧ̀ и҆ да́же до внꙋ́треннихъ разсѣ́десѧ.
Ра́дꙋйсѧ, ꙗ҆́кѡ ᲂу҆́мъ тво́й пребы́сть въ бз҃ѣ тѧ̀ ᲂу҆крѣплѧ́ющемъ. Ра́дꙋйсѧ, хрⷭ҇то́вымъ страсте́мъ въ тѣлесѝ твое́мъ прїѡбщи́выйсѧ.
Ра́дꙋйсѧ, ѿ гдⷭ҇а неꙋвѧда́емагѡ на нб҃сѝ вѣнца̀ сподо́бльшїйсѧ.
Ра́дꙋйсѧ, і҆ѡа́нне, великомꙋ́чениче хрⷭ҇то́въ.
Конда́къ з҃
Хотѧ̀ ѕлочести́вый мꙋчи́тель къ своемꙋ̀ хотѣ̑нїю преклони́ти тѧ̀, бл҃же́нне мꙋ́чениче, и҆ не и҆мѣ́ѧ лютѣ́йшихъ мꙋче́нїй, повелѣ̀ привестѝ свирѣ́пагѡ конѧ̀, и҆ ст҃і́и твоѝ но́зѣ ко ѻ҆́шибꙋ є҆гѡ̀ крѣ́пкѡ привѧза́ти, и҆ по всѣ́мъ сто́гнѡмъ гра́да влачи́ти. Ты́ же, во́ине хрⷭ҇то́въ, та́кѡ влачи́мъ, позо́ръ бы́лъ є҆сѝ а҆́гг҃лѡмъ и҆ чл҃вѣ́кѡмъ, бг҃ꙋ поѧ̀: А҆ллилꙋ́їа.
І҆́косъ з҃
Но́вꙋ и҆ неѡбы́чнꙋ ᲂу҆мы́сли нечести́вый ка́дїй на тѧ̀ мꙋ́кꙋ, страстоте́рпче хрⷭ҇то́въ: влачи́мꙋ бо тѝ ско́ро ко́немъ, ча́сти ѿ тѣлесѐ твоегѡ̀ на ка́менехъ ѿрева́емы ѡ҆става́хꙋсѧ, глава̀ сокрꙋша́шесѧ. Вѣ́рнїи же, ви́дѣвшїи тѧ̀, ѡ҆ ᲂу҆крѣпле́нїи твое́мъ гдⷭ҇а молѧ́хꙋ. Ты́ же, горѣ̀ ᲂу҆́мъ къ бг҃ꙋ и҆мѣ́ѧ, въ та́йнѣ томꙋ̀ предстоѧ́ше. Сегѡ̀ ра́ди и҆ мы̀, рабѝ твоѝ, ᲂу҆дивлѧ́ющесѧ, сїѧ̀ похва́льнаѧ восписꙋ́емъ тѝ:
Ра́дꙋйсѧ, ꙗ҆́кѡ мꙋче́нїемъ твои́мъ проповѣ́дникъ ст҃ы́ѧ трⷪ҇цы бы́лъ є҆сѝ. Ра́дꙋйсѧ, ꙗ҆́кѡ крѣ́пкимъ терпѣ́нїемъ твои́мъ ѡ҆снова́нїе бл҃гі́ѧ вѣ́ры ꙗ҆ви́лсѧ є҆сѝ.
Ра́дꙋйсѧ, ѻ҆гне́мъ неизрече́нныѧ є҆́же къ бг҃ꙋ любвѐ разжже́нный. Ра́дꙋйсѧ, сегѡ̀ ра́ди раздробле́нїе твоеѧ̀ пло́ти претерпѣ́вый.
Ра́дꙋйсѧ, ꙗ҆́кѡ сотвори́сѧ вино́венъ весе́лїѧ а҆́гг҃лѡмъ. Ра́дꙋйсѧ, ꙗ҆́кѡ бы́лъ є҆сѝ позо́ръ ᲂу҆миле́нїѧ вѣ́рнымъ.
Ра́дꙋйсѧ, ꙗ҆́кѡ ст҃а́ѧ глава̀ твоѧ̀ влачи́ма хрⷭ҇та̀ ра́ди ѡ҆ ка́менїе сокрꙋша́шесѧ. Ра́дꙋйсѧ, ꙗ҆́кѡ мл҃твами твои́ми глава̀ неви́димагѡ ѕмі́ѧ сотре́сѧ.
Ра́дꙋйсѧ, ꙗ҆́кѡ и҆сте́кшею твое́ю кро́вїю землѧ̀ ѡ҆багри́сѧ. Ра́дꙋйсѧ, ꙗ҆́кѡ хрⷭ҇то́съ тѝ во црⷭ҇твїи нбⷭ҇нѣмъ вѣне́цъ нетлѣ́нїѧ дарова̀.
Ра́дꙋйсѧ, гдⷭ҇а ра́ди на землѝ пострада́вый. Ра́дꙋйсѧ, съ ни́мъ на нб҃сѣ́хъ воцари́выйсѧ.
Ра́дꙋйсѧ, і҆ѡа́нне, великомꙋ́чениче хрⷭ҇то́въ.
Конда́къ и҃
Стра́ннꙋю си́лꙋ нечести́вїи і҆ꙋдє́и въ тебѣ̀ ви́дѣша, мꙋ́чениче хрⷭ҇то́въ, є҆гда̀ свирѣ́пымъ ко́немъ влачи́ша тѧ̀ по сто́гнѡмъ гра́да. Ѻ҆́вїи ᲂу҆́бѡ посмѣва́хꙋсѧ тѝ, ѻ҆́вїи скривлѧ́хꙋ ли́ца своѧ̀ и҆ ꙗ҆́же и҆мѣ́ѧхꙋ въ рꙋка́хъ мета́хꙋ на тѧ̀, и҆ні́и же глꙋмлѧ́хꙋсѧ и҆ неподо́бнаѧ дѣ́ѧхꙋ. Ты́ же, бл҃гі́й ра́бе гдⷭ҇ень, со бл҃годаре́нїемъ терпѣ́лъ є҆сѝ сїѧ̀, ᲂу҆крѣплѧ́ющꙋ тѧ̀ бг҃ꙋ непреста́ннѡ поѧ̀: А҆ллилꙋ́їа.
І҆́косъ и҃
Всѧ̀ мꙋ́ки тѝ претерпѣ́вшꙋ, бл҃же́нне страстоте́рпче, и҆ на коне́цъ тече́нїѧ по́двигъ твои́хъ дости́гшꙋ, є҆ди́нъ ѿ посмѣва́ющихтисѧ і҆ꙋде́й, ко хра́минѣ свое́й восте́къ и҆ взе́мъ ме́чь ѡ҆бнаже́нъ, си́мъ честнꙋ́ю и҆ ст҃ꙋ́ю главꙋ̀ твою̀ ѿсѣчѐ и҆ та́кѡ свѣ́тлꙋю твою̀ дꙋ́шꙋ въ рꙋ́цѣ тобо́ю жела́ннагѡ хрⷭ҇та̀ преда́лъ є҆сѝ. Тѣ́мже и҆ слы́шиши ѿ на́съ сицева́ѧ:
Ра́дꙋйсѧ, ꙗ҆́кѡ ѿ і҆ꙋдє́й посмѣѧ́нїѧ и҆ порꙋга́нїѧ хрⷭ҇та̀ ра́ди прїѧ́лъ є҆сѝ. Ра́дꙋйсѧ, ꙗ҆́кѡ си́мъ порꙋга́нномꙋ и҆́ми сп҃сꙋ послѣ́довалъ є҆сѝ.
Ра́дꙋйсѧ, ѿ нечести́выхъ многоразли́чнѡ мꙋ́ченный. Ра́дꙋйсѧ, за хрⷭ҇та̀, на́съ ра́ди пострада́вшаго, мꙋ́ки до́блѣ претерпѣ́вый.
Ра́дꙋйсѧ, ꙗ҆́кѡ ро́дъ невѣ́рный мече́мъ главꙋ̀ твою̀ ѿсѣчѐ. Ра́дꙋйсѧ, ꙗ҆́кѡ гдⷭ҇ь пресвѣ́тлымъ вѣнце́мъ сїю̀ ᲂу҆вѣнча̀.
Ра́дꙋйсѧ, ꙗ҆́кѡ по́двигъ тво́й страда́льческїй тогда̀ сконча́сѧ. Ра́дꙋйсѧ, ꙗ҆́кѡ съ мꙋ́ченицы во ѻ҆би́телехъ нбⷭ҇ныхъ кꙋ́пнѡ прославлѧ́ешисѧ.
Ра́дꙋйсѧ, ꙗ҆́кѡ и҆́мамы вѣ́рнїи тѧ̀ прете́плагѡ къ бг҃ꙋ хода́таѧ. Ра́дꙋйсѧ, ꙗ҆́кѡ молє́нїѧ твоѧ̀ прїѧ́тна є҆мꙋ̀ сꙋ́ть.
Ра́дꙋйсѧ, ꙗ҆́кѡ па́мѧть твоѧ̀ въ цр҃кви хрⷭ҇то́вѣй чтⷭ҇на́ є҆сть. Ра́дꙋйсѧ, ꙗ҆́кѡ и҆́мѧ твоѐ ᲂу҆слажда́етъ всѣ́хъ правосла́вныхъ.
Ра́дꙋйсѧ, і҆ѡа́нне, великомꙋ́чениче хрⷭ҇то́въ.
Конда́къ ѳ҃
Ви́дѣвше вѣ́рнїи по и҆зше́ствїи ст҃ы́ѧ твоеѧ̀ дꙋшѝ ѿ тѣлесѐ, пресла́вне мч҃ниче, ст҃ы́ѧ мо́щи твоѧ̀ непогребе́нны и҆ презира́емы, возскорбе́ша. Наста́вшей же но́щи, сто́лпъ да́же до нб҃сѐ над̾ ст҃ы́ми твои́ми моща́ми ви́дѣнъ бы́сть, свѣщѝ горѧ́хꙋ, и҆ мꙋ́жїе въ бѣ̑лыѧ ри̑зы ѡ҆блече́нни, кадѧ́ще ѡ҆́крестъ ст҃а́гѡ тѣлесѐ твоегѡ̀, поѧ́хꙋ неизрече́ннаѧ и҆ сщ҃е́ннаѧ словеса̀. Съ ни́ми же и҆ ты̀ воспѣва́ше бг҃ꙋ: А҆ллилꙋ́їа.
І҆́косъ ѳ҃
Вѣті̑ѧ красноречи́вїи не мо́гꙋтъ и҆зрещѝ пѣ́нїе ѿ а҆́гг҃лъ бы́вшее, воспѣва́вшеесѧ ѡ҆́крестъ ст҃ы́хъ твои́хъ моще́й, пребл҃же́нне мꙋ́чениче. Є҆ди́нъ же ѿ і҆ꙋдє́й сїѐ слы́шавъ, помышлѧ́ше земны́хъ бы́ти чл҃вѣ́къ, напрѧ́гъ бо лꙋ́къ и҆ пꙋсти́въ стрѣлꙋ̀, покꙋша́шесѧ порази́ти пою́щїѧ, но ничто́же ᲂу҆спѣ̀ ѡ҆каѧ́нный се́й, всѣ́мъ бо бы́сть сожалѣ́нїѧ зрѣ́лище. Тѣ́мже и҆ мы̀, ѡ҆ сицево́мъ чꙋдесѝ ᲂу҆дивлѧ́ющесѧ, зове́мъ тѝ такова̑ѧ:
Ра́дꙋйсѧ, ᲂу҆досто́ивыйсѧ надгро́бнагѡ а҆́гг҃льскагѡ пѣ́нїѧ. Ра́дꙋйсѧ, ꙗ҆́кѡ хрⷭ҇то́съ съ нб҃сѐ призрѣ̀ на ст҃ы́ѧ мо́щи твоѧ̀.
Ра́дꙋйсѧ, ꙗ҆́кѡ ви́дѣнъ бы́сть над̾ ни́ми сто́лпъ ѻ҆́гненный да́же до нб҃сѐ. Ра́дꙋйсѧ, ꙗ҆́кѡ чꙋ́до сїѐ мно́гихъ ᲂу҆жасѝ.
Ра́дꙋйсѧ, ꙗ҆́кѡ ѻ҆́ный і҆ꙋдеѧ́нинъ бж҃їимъ мще́нїемъ нака́занъ бы́сть. Ра́дꙋйсѧ, ꙗ҆́кѡ сїѐ въ вѧ́щшꙋю сла́вꙋ ст҃ы́хъ твои́хъ моще́й содѣ́ѧсѧ.
Ра́дꙋйсѧ, ꙗ҆́кѡ лю́дїе на позо́ръ нака́заннагѡ нечести́вца стеко́шасѧ. Ра́дꙋйсѧ, ꙗ҆́кѡ то́й по и҆сповѣ́данїи грѣха̀ пред̾ всѣ́ми и҆сцѣли́сѧ.
Ра́дꙋйсѧ, ꙗ҆́кѡ ᲂу҆вѣ́дѣвъ мꙋчи́тель ѡ҆ чꙋдесѝ се́мъ ѕѣлѡ̀ ᲂу҆страши́сѧ. Ра́дꙋйсѧ, ꙗ҆́кѡ сегѡ̀ ра́ди хрⷭ҇тїа́нѡмъ погребстѝ тѧ̀ повелѣ̀.
Ра́дꙋйсѧ, ꙗ҆́кѡ цр҃ковь прїѧ́тъ чтⷭ҇но́е тѣ́ло твоѐ. Ра́дꙋйсѧ, ꙗ҆́кѡ во ѻ҆би́телехъ нбⷭ҇ныхъ всели́сѧ ст҃а́ѧ дꙋша̀ твоѧ̀.
Ра́дꙋйсѧ, і҆ѡа́нне, великомꙋ́чениче хрⷭ҇то́въ.
Конда́къ і҃
Хотѧ́щꙋ, сла́вне мꙋ́чениче хрⷭ҇то́въ, ѡ҆клевета́телю и҆ преда́телю твоемꙋ̀ чтⷭ҇но́е и҆ многострада́льное твоѐ тѣ́ло ᲂу҆кра́сти и҆ во своѐ ѻ҆те́чество принестѝ, ꙗ҆ви́лсѧ є҆сѝ, во́ине хрⷭ҇то́въ, а҆́бїе ѻ҆́ныѧ цр҃кви і҆ере́ю во снѣ̀ и҆ ѡ҆ се́мъ возвѣсти́лъ є҆сѝ є҆мꙋ̀. То́й же, въ цр҃ковь прите́къ, чⷭ҇тны́ѧ твоѧ̀ мо́щи и҆з̾ рꙋкꙋ̀ та́тѧ ѿ̾ѧ́тъ, съ ра́достїю бг҃ꙋ поѧ̀: А҆ллилꙋ́їа.
І҆́косъ і҃
Є҆гда̀, мꙋ́чениче хрⷭ҇то́въ, чтⷭ҇ны́ѧ и҆ ст҃ы́ѧ твоѧ̀ мо́щи ѿ и҆норо́дныхъ бж҃їимъ про́мысломъ сп҃се́ни бы́ша и҆ во ѻ҆лтарѝ поста́вишасѧ бли́зъ ст҃ы́ѧ трапе́зы, и҆дѣ́же а҆́гнецъ бж҃їй всегда̀ за сп҃се́нїе на́ше жре́тсѧ, є҆мꙋ́же и҆ ты̀ же́ртва жива́ѧ прине́слсѧ є҆сѝ, тогда̀ вѣ́рни, ѡ҆ се́мъ ᲂу҆вѣ́дѣвше, просла́виша всеще́драгѡ бг҃а, прославлѧ́ющагѡ ст҃ы́ѧ своѧ̀. Съ ни́миже и҆ мы̀ похва́льнаѧ пѣ́нїѧ сїѧ̀ прино́симъ тѝ:
Ра́дꙋйсѧ, ꙗ҆́кѡ твоѧ̀ ст҃ы́ѧ мо́щи неꙋкра́дени и҆ невреди́ми пребы́ша. Ра́дꙋйсѧ, ꙗ҆́кѡ и҆новѣ́рный посра́мленъ и҆ то́щь прогна́сѧ.
Ра́дꙋйсѧ, ꙗ҆́кѡ ѿ і҆ере́й чⷭ҇тны́ѧ твоѧ̀ мо́щи во ѻ҆лтарѝ положе́ни бы́ша. Ра́дꙋйсѧ, ꙗ҆́кѡ ѡ҆ се́мъ вѣ́рнїи возра́довашасѧ.
Ра́дꙋйсѧ, ꙗ҆́кѡ сто́лпъ ѻ҆́гненный съ нб҃сѐ над̾ ни́ми ꙗ҆влѧ́шесѧ. Ра́дꙋйсѧ, ꙗ҆́кѡ и҆ногда̀ къ ни́мъ а҆́гг҃ли нисходи́ша.
Ра́дꙋйсѧ, мно́жицею бл҃гоꙋха́нїе неизрече́ннѡ ѿ ѻ҆́ныхъ и҆схожда́ше. Ра́дꙋйсѧ, ꙗ҆́кѡ всѧ́ческихъ болѣ́зней вѣ́рнїи чрез̾ ѻ҆́ныѧ и҆сцѣлѧ́ютсѧ.
Ра́дꙋйсѧ, ꙗ҆́кѡ си́ми непреста́ннѡ чꙋдеса̀ содѣва́ютсѧ. Ра́дꙋйсѧ, ꙗ҆́кѡ и҆́ми и҆ де́мони ѿ мно́гихъ и҆згонѧ́ютсѧ.
Ра́дꙋйсѧ, ꙗ҆́кѡ содѣва́емыхъ тобо́ю чꙋде́съ вѣща́нїе повсю́дꙋ про́йде. Ра́дꙋйсѧ, ꙗ҆́кѡ до коне́цъ землѝ твоѧ̀ вѣ́сть дости́же.
Ра́дꙋйсѧ, і҆ѡа́нне, великомꙋ́чениче хрⷭ҇то́въ.
Конда́къ а҃і
Пѣ́нїѧ похва́льнагѡ нѣ́сть, по достоѧ́нїю похвали́ти могꙋ́щагѡ бл҃голѣ́пїе бл҃года́ти чꙋде́съ, ꙗ҆́же ѿ чⷭ҇тны́хъ и҆ ст҃ы́хъ твои́хъ моще́й быва́ютъ, достосла́вне мꙋ́чениче хрⷭ҇то́въ. Не то́чїю прості́и лю́дїе, но и҆ ца́рїе и҆ кнѧ́зи чтꙋ́тъ, и҆ покланѧ́ютсѧ, и҆ лобыза́ютъ ѧ҆̀ съ любо́вїю. Сегѡ̀ ра́ди, ꙗ҆́кѡ и҆мѣ́ѧй дерзнове́нїе ко влⷣцѣ всѣ́хъ бг҃ꙋ, и҆спросѝ на́мъ всѣ́мъ въ жи́зни се́й тѣле́снагѡ здра́вїѧ и҆ во бл҃ги́хъ нра́вѣхъ ᲂу҆твержде́нїѧ, въ бꙋ́дꙋщемъ же вѣ́цѣ нбⷭ҇ныхъ бл҃ги́хъ воспрїѧ́тїѧ, пою́щымъ бг҃ꙋ: А҆ллилꙋ́їа.
І҆́косъ а҃і
Свѣтопрїе́мнаѧ свѣща̀ сꙋ́ть чтⷭ҇ны́ѧ и҆ ст҃ы́ѧ твоѧ̀ мо́щи, многострада́льне мч҃ниче хрⷭ҇то́въ і҆ѡа́нне. На свѣ́щнице цр҃кви хрⷭ҇то́вы поста́влени, просвѣща́ющїѧ на мно́гое вре́мѧ мѣ́сто, на не́мже пострада́лъ є҆сѝ, та́же бл҃говоле́нїемъ бж҃їимъ, тща́нїемъ же бл҃гочести́вагѡ господа́рѧ пренесенѝ въ молдовлахі́ю, непреста́ннѡ свѣ́тѧтъ и҆ всѣ́мъ, съ вѣ́рою и҆ любо́вїю прибѣга́ющымъ ко ѻ҆́нымъ, лꙋчѝ чꙋде́съ и҆злива́ютъ. Мы́ же, сеѧ̀ бл҃года́ти прича́стницы бы́вше, прино́симъ тѝ такова̑ѧ:
Ра́дꙋйсѧ, лꙋчѐ незаходи́магѡ и҆ мы́сленнагѡ свѣ́та. Ра́дꙋйсѧ, всю̀ поднбⷭ҇нꙋю просвѣща́ѧй.
Ра́дꙋйсѧ, пресвѣ́тлаѧ денни́це днѐ невече́рнѧгѡ. Ра́дꙋйсѧ, смѵ́рно, цр҃ковь хрⷭ҇то́вꙋ вы́нꙋ ѡ҆бл҃гоꙋха́ющаѧ.
Ра́дꙋйсѧ, и҆зволе́нїемъ бж҃їимъ ѿ на́съ ᲂу҆дале́нъ бы́вый. Ра́дꙋйсѧ, и҆ во стра́нствїи твое́мъ лꙋча́ми бл҃года́ти хрⷭ҇то́вы просїѧ́вый.
Ра́дꙋйсѧ, смотре́нїемъ гдⷭ҇нимъ па́ки къ на́мъ возврати́выйсѧ. Ра́дꙋйсѧ, всѣ́хъ приходѧ́щихъ ко ст҃ы́мъ твои́мъ мощє́мъ нбⷭ҇нагѡ бл҃гоꙋха́нїѧ сподоблѧ́ѧй.
Ра́дꙋйсѧ, сосꙋ́де мѵ́ра хрⷭ҇то́ва неистощава́емъ и҆ неизче́тныхъ болѣ́зней врачева́нїе содержа́щь. Ра́дꙋйсѧ, всѣ́мъ просѧ́щымъ бл҃гъ преизѡби́льный пода́телю.
Ра́дꙋйсѧ, бл҃года́ть и҆ сла́вꙋ ѿ цр҃ѧ̀ нбⷭ҇нагѡ на тѧ̀ и҆злїѧ́ннꙋю прїе́мый. Ра́дꙋйсѧ, всѧ́ческихъ болѣ́зней и҆сцѣлє́нїѧ ѡ҆би́льнѡ подава́ѧй.
Ра́дꙋйсѧ, і҆ѡа́нне, великомꙋ́чениче хрⷭ҇то́въ.
Конда́къ в҃і
Бл҃года́ть прїѧ́лъ є҆сѝ ѿ бг҃а, всехва́льне и҆ многострада́льне мꙋ́чениче, и҆сцѣлѧ́ти всѧ́кїѧ болѣ́зни и҆ недꙋ́ги дꙋше́вныѧ и҆ тѣле́сныѧ. тѣ́мже ны́нѣ предстоѧ́щи хрⷭ҇тꙋ̀, во страда́нїихъ твои́хъ тѧ̀ ᲂу҆крѣпи́вшемꙋ, не преста́ни хода́тайствовати всѣ́мъ на́мъ тѣле́снагѡ здра́вїѧ и҆ дꙋше́внагѡ сп҃се́нїѧ, со бл҃гоговѣ́нїемъ и҆ любо́вїю чтꙋ́щымъ ст҃ꙋ́ю па́мѧть твою̀ и҆ непреста́ннѡ пою́щымъ бг҃ꙋ: А҆ллилꙋ́їа.
І҆́косъ в҃і
Пое́мъ, почита́емъ, сла́вимъ, ᲂу҆бл҃жа́емъ многоболѣ́зненнаѧ страда́нїѧ твоѧ̀, терпѣ́нїе бо до конца̀ до́блественнѣ под̾е́мъ, тве́рдость а҆дама́нтовꙋ показа́лъ є҆сѝ, за нѧ́же подвигополо́жникъ хрⷭ҇то́съ гдⷭ҇ь на землѝ и҆ на нб҃сѝ тѧ̀ просла́ви и҆ на́мъ недосто́йнымъ застꙋ́пника и҆ хода́таѧ тѧ̀ дарова̀, ст҃ѣ побѣдоно́сче, великомꙋ́чениче хрⷭ҇то́въ і҆ѡа́нне, вопїю́щымъ тѝ сицева̑ѧ:
Ра́дꙋйсѧ, ꙗ҆́кѡ тѣ́ломъ на́мъ спребыва́ѧ, водворѧ́ешисѧ дꙋше́ю съ во́и нбⷭ҇ными. Ра́дꙋйсѧ, ꙗ҆́кѡ по мно́зѣхъ страда́нїихъ твои́хъ прїѧ́тъ тѧ̀ гдⷭ҇ь во ᲂу҆покое́нїе вѣ́чное.
Ра́дꙋйсѧ, во ѻ҆би́тели нбⷭ҇ныѧ мꙋ́ченическими ли́цы и҆ а҆́гг҃льскими провожде́нный. Ра́дꙋйсѧ, сла́вою и҆ че́стїю пресла́внѡ десни́цею цр҃ѧ̀ хрⷭ҇та̀ ᲂу҆вѣнча́нный.
Ра́дꙋйсѧ, ꙗ҆́кѡ мзда̀ мно́га во свѣ́тлостехъ ст҃ы́хъ тебѣ̀ ᲂу҆гото́васѧ. Ра́дꙋйсѧ, ꙗ҆́кѡ сокро́вище некра́домое на нб҃сѝ прїѡбрѣ́лъ є҆сѝ.
Ра́дꙋйсѧ, во и҆скꙋше́нїихъ и҆ нꙋ́ждахъ те́плый на́шъ предста́телю. Ра́дꙋйсѧ, ра́дости и҆ сла́вы вѣ́чныѧ всеще́дрѣйшїй на́мъ хода́таю.
Ра́дꙋйсѧ, немощны́мъ неистощи́мый и҆сто́чниче и҆сцѣле́нїѧ. Ра́дꙋйсѧ, и҆сточа́ѧй непреста́нное скорбѧ́щимъ ᲂу҆тѣше́нїе.
Ра́дꙋйсѧ, ꙗ҆́кѡ тобо́ю и҆збавлѧ́емсѧ ѿ всѣ́хъ ѕѡ́лъ дꙋше́вныхъ и҆ тѣле́сныхъ. Ра́дꙋйсѧ, ꙗ҆́кѡ тобо́ю надѣ́емсѧ ᲂу҆лꙋчи́ти бл҃гъ нбⷭ҇ныхъ.
Ра́дꙋйсѧ, і҆ѡа́нне, великомꙋ́чениче хрⷭ҇то́въ.
Конда́къ г҃і
Ѽ, многострада́льне, ст҃ѣ великомꙋ́чениче хрⷭ҇то́въ і҆ѡа́нне, прїимѝ сїѐ ѿ скве́рныхъ ᲂу҆сте́нъ на́шихъ со ᲂу҆миле́нїемъ приноси́мое тѝ моле́нїе, и҆ ѿ всѣ́хъ недꙋ́гъ дꙋше́вныхъ и҆ тѣле́сныхъ, ѿ вра́гъ ви́димыхъ и҆ неви́димыхъ, и҆ вѣ́чныѧ мꙋ́ки бг҃огопрїѧ́тными твои́ми мл҃твами на́съ и҆зба́ви, да съ тобо́ю кꙋ́пнѡ въ бꙋ́дꙋщемъ вѣ́цѣ, во ѻ҆би́телехъ ст҃ы́хъ, пое́мъ бг҃ꙋ: А҆ллилꙋ́їа.
Повто́ръ
Сей конда́къ глаго́лется три́жды, та́же і҆́косъ а҃-й и҆ конда́къ а҃-й.
І҆́косъ а҃
А҆́гг҃лѡмъ возлю́бленно и҆ ᲂу҆го́дно бы́сть и҆ пре́жде страда́нїѧ житїѐ твоѐ, страстоте́рпче хрⷭ҇то́въ і҆ѡа́нне, тѣлесе́мъ бо пе́рстнымъ ѡ҆бложе́нъ сы́й, житїѐ а҆́гг҃льское на землѝ показа́лъ є҆сѝ ми́лостыньми и҆ непреста́нными мл҃твами, та́же и҆ страда́нїи. Тѣ́мже ᲂу҆́бѡ по достоѧ́нїю сїѧ̀ похва́льнаѧ прино́симъ тѝ:
Ра́дꙋйсѧ, ꙗ҆́кѡ поще́нїи и҆ непреста́нными мл҃твами твои́ми ᲂу҆подо́билсѧ є҆сѝ а҆́гг҃лѡмъ. Ра́дꙋйсѧ, ꙗ҆́кѡ ми́лостыньми и҆ слеза́ми твои́ми ᲂу҆страши́лъ є҆сѝ де́мѡны.
Ра́дꙋйсѧ, ꙗ҆́кѡ ᲂу҆тѣ́шилъ є҆сѝ скорбѧ́щїѧ. Ра́дꙋйсѧ, ꙗ҆́кѡ вспомоществова́лъ є҆сѝ болѧ́щїѧ.
Ра́дꙋйсѧ, ꙗ҆́кѡ въ ме́ртвеннемъ тѣлесѝ показа́лсѧ є҆сѝ а҆́гг҃лъ земны́й. Ра́дꙋйсѧ, ꙗ҆́кѡ мꙋдрова́нїемъ бы́лъ є҆сѝ чл҃вѣ́къ нбⷭ҇ный.
Ра́дꙋйсѧ, ѿ бл҃говѣ́рныхъ роди́телей произше́дый. Ра́дꙋйсѧ, правосла́внꙋю вѣ́рꙋ да́же до конца̀ сохрани́вый.
Ра́дꙋйсѧ, ѿ сла́внагѡ гра́да трапезꙋ́нда произра́стшїй. Ра́дꙋйсѧ, всѧ́кими добродѣ́тельми соверше́ннѡ ᲂу҆кра́шенный.
Ра́дꙋйсѧ, кꙋпе́цъ и҆скꙋ́сенъ на мо́рѣ показа́выйсѧ. Ра́дꙋйсѧ, кꙋ́плю дꙋше́внꙋю до́брѣ ᲂу҆пра́вивый.
Ра́дꙋйсѧ, і҆ѡа́нне, великомꙋ́чениче хрⷭ҇то́въ.
Конда́къ а҃
И҆збра́нномꙋ защи́тителю и҆ побо́рникꙋ хрⷭ҇тїа́нства, проти́вникꙋ и҆ низложи́телю нече́стїѧ, новоѧвле́нномꙋ мꙋ́ченикꙋ, и҆́стинномꙋ во́инꙋ хрⷭ҇то́вꙋ, ꙗ҆́кѡ ѕвѣзда̀ пресвѣ́тлаѧ восто́чнѣй цр҃кви возсїѧ́вшемꙋ, и҆ весе́лїѧ вѣ́рныхъ и҆спо́лнившемꙋ, ны́нѣ ѿ всеѧ̀ дꙋшѝ бл҃года́рственнаѧ и҆ похва́льнаѧ пѣ́нїѧ прино́симъ, съ любо́вїю пою́ще:
Ра́дꙋйсѧ, і҆ѡа́нне, великомꙋ́чениче хрⷭ҇то́въ.
Моли́твы
Ѽ, ст҃ы́й многострада́льче и҆ великомꙋ́чениче хрⷭ҇то́въ і҆ѡа́нне, ты̀ ѿ ю҆́ности твоеѧ̀ крⷭ҇тъ въ се́рдцѣ свое́мъ носѧ̀, по́стъ, мл҃твꙋ и҆ ми́лостыню па́че всѣ́хъ бл҃гъ земны́хъ предпоче́лъ є҆сѝ. Тогѡ̀ ра́ди ѿ невѣ́рнагѡ реи́за за́вистїю и҆ ле́стїю ѕлочести́вомꙋ є҆па́рхꙋ пре́данъ бы́лъ є҆сѝ, по подо́бїю пре́даннагѡ за ны̀ спⷭ҇телѧ мі́ра, гдⷭ҇а на́шегѡ і҆и҃са хрⷭ҇та̀. На сме́рть ѡ҆клевета́нъ, ѡ҆брꙋ́ганъ и҆ ᲂу҆бїе́нъ бы́въ, земна́ѧ бл҃га́ѧ ни во что́же вмѣни́лъ є҆сѝ, прїѧ́тъ бо сме́рть за и҆сповѣ́данїе и҆ прославле́нїе въ трⷪ҇цѣ є҆ди́нагѡ бг҃а. Сегѡ̀ ра́ди вы́шнїй созда́тель просла́ви тебѣ̀ нетлѣ́нїемъ пло́ти, и҆ по сме́рти твое́й междꙋ̀ мꙋ́чениками, а҆́ще и҆ послѣ́днѣйша, ѻ҆ба́че пе́рвымъ мꙋ́ченикѡмъ є҆динонра́вна, є҆диноче́стна и҆ сострада́тельна тѧ̀ ꙗ҆вѝ и҆ просла́ви мо́щи твоѧ̀ нетлѣ́нїемъ и҆ бл҃гоꙋха́нїемъ, недꙋ́гꙋющымъ, си́лꙋ цѣле́бнꙋю чрез̾ тѧ̀ да́рꙋетъ. Прїимѝ ᲂу҆́бѡ моле́нїе на́ше, ꙗ҆́кѡ во є҆динонадесѧ́тый ча́съ прише́дшихъ и҆ ничто́же досто́йнѡ сотво́ршихъ, поми́лованнымъ бы́ти и҆ мзды̀ нбⷭ҇ныѧ не лиши́тисѧ на́мъ и҆схода́тайствꙋй, ст҃ы́ми твои́ми и҆ бг҃опрїѧ́тными мл҃твами ᲂу҆ прⷭ҇то́ла хрⷭ҇та̀ цр҃ѧ̀ нбⷭ҇нагѡ, є҆мꙋ́же сла́ва подоба́етъ, че́сть и҆ поклоне́нїе, со ѻ҆ц҃е́мъ и҆ ст҃ы́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.