Кондак 1
Избра́нный чудотво́рче, уго́дниче Христо́в, к тебе́ прибега́ем и тебе́ ми́ли ся де́ем, услы́ши на́с в ча́с се́й, моля́щихся тебе́, и бу́ди на́м ско́рый помо́щник и засту́пник, да твои́ми моли́твами изба́вльшеся от вся́ких бе́д, вопие́м ти́:
Ра́дуйся, Паи́сие преподо́бне.
Икос 1
А́нгела во пло́ти су́ща тя́ зна́ем, о́тче преподо́бне, и сего́ ра́ди призыва́ем тя́, предста́ни на́м ско́ро в по́мощь и изба́ви на́с от вся́каго зла́, да тобо́ю спа́сшеся, всегда́ вопие́м ти́:
Ра́дуйся, от утро́бы ма́терния освяще́нный; ра́дуйся, све́том богове́дения просвеще́нный.
Ра́дуйся, я́ко ми́ра сего́ красоту́ ни во что́ же вмени́вый; ра́дуйся, я́ко а́нгельское житие́ возлюби́вый.
Ра́дуйся, я́ко собра́л еси́ и́нок мно́жество; ра́дуйся, я́ко научи́л еси́ име́ти кре́пкое му́жество.
Ра́дуйся, я́ко уче́нием твои́м мно́зи получи́ша спасе́ние; ра́дуйся, я́ко тобо́ю улучи́ша о́бщее небе́сное селе́ние.
Ра́дуйся, я́ко чи́сте зри́ши Святу́ю Тро́ицу; ра́дуйся, я́ко всегда́ о на́с мо́лиши Пресвяту́ю Богоро́дицу. Ра́дуйся, я́ко вся́ проше́ния на́ша исполня́ются;
Ра́дуйся, Паи́сие преподо́бне.
Кондак 2
Ви́дящи теле́сныма очи́ма от Бо́га по́сланный к тебе́ Пречи́стыя Богома́тере о́браз, принесе́нный боля́рином Иоа́нном Овином, ра́дости мно́гия напо́лнився, вско́ре повеле́нное от а́нгел де́лом соверши́л еси́, вопия́ к Бо́гу: Аллилу́иа.
Икос 2
Ра́зум тве́рдый во удивле́нии свое́м сохраня́я, о́тче преподо́бне, ви́дев боля́рина во внеза́пном измене́нии, вопроси́л еси́ его́ о приклю́чшихся ему́, уве́дев же бы́вшая, ра́довашеся. Сего́ ра́ди и мы́ вопие́м ти́:
Ра́дуйся, от ру́к Иоа́нновых о́браз Богоро́дичен прие́мый; ра́дуйся, я́ко вся́ дни́ живота́ своего́ ему́ послужи́вый.
Ра́дуйся, я́ко о́бразом те́м Влады́ка Христо́с оби́тель твою́ просла́ви; ра́дуйся, я́ко и тебе́ оби́тели тоя́ высоча́йшаго па́стыря поста́ви.
Ра́дуйся, я́ко чудесе́м, от о́браза быва́емым, самови́дец яви́ся; ра́дуйся, я́ко того́ ра́ди во все́й Росси́и и́мя твое́ просла́вися.
Ра́дуйся, я́ко от все́х стра́н наро́ди во оби́тель твою́ притека́ху; ра́дуйся, я́ко твои́ми моли́твами от о́браза Богоро́дична вся́ поле́зная приима́ху.
Ра́дуйся, ста́да Христо́ва слове́сных ове́ц до́брый па́стырю; ра́дуйся, наста́вниче заблу́ждших и благи́й учи́телю.
Ра́дуйся, избавля́яй во тме́ прегреше́ний блудя́щих; ра́дуйся, наставля́яй на пу́ть спасе́ния хотя́щих.
Ра́дуйся, Паи́сие преподо́бне.
Кондак 3
Си́лою Вы́шняго по́сланнии к тебе́ два́ а́нгела, нося́ще о́браз Пречи́стыя Богоро́дицы, срето́ша не́коего благогове́йна челове́ка и́менем Иоа́нна, вручи́вше его́, неви́димы бы́ша от о́чию его́, о́н же, о́браз прие́м, возопи́ к Бо́гу: Аллилу́иа.
Икос 3
Иму́щи сомне́ние в се́рдцы свое́м боля́рин Иоа́нн о ю́ношах, прине́сших о́браз Пречи́стыя Богоро́дицы, вско́ре возврати́ся в до́м сво́й, хотя́щи па́ки ви́дети и́х, не улучи́в же ви́дети и́х, прите́к во оби́тель твою́, вопия́ше тебе́:
Ра́дуйся, о́тче, о́браза Богома́тере храни́телю; ра́дуйся, Пресвяты́я Тро́ицы служи́телю.
Ра́дуйся, недове́домыя та́йны зри́телю; ра́дуйся, чудесе́м, от о́браза быва́емым, блюсти́телю.
Ра́дуйся, преподо́бных все́х изве́стная похвало́; ра́дуйся, по́стников многослову́щая сла́во.
Ра́дуйся, мона́хов боже́ственное пра́вило; ра́дуйся, все́й Га́личской стране́ вели́кое свети́ло.
Ра́дуйся, а́нгелов собесе́дниче; ра́дуйся, святы́м все́м соприча́стниче. Ра́дуйся, Тро́ицы Святы́я чи́стый служи́телю.
Ра́дуйся, Паи́сие преподо́бне.
Кондак 4
Бу́рю вну́трь име́яй мно́гих смуще́ний, а́з многогре́шный недоумева́юся, ка́ко возмогу́ досто́йно воспе́ти твоя́ по́двиги, преподо́бне, никто́же бо от челове́к ны́нешняго ро́да мо́жет я́ исчести́, а́ще бы и ри́торски кто́ глаго́лати восхоте́л. Сего́ ра́ди Бо́гу, тя́ прославля́ющему, дерза́юще воспева́ем: Аллилу́иа.
Икос 4
Слы́шаще гра́да Га́лича и окре́стных градо́в наро́ди о принесе́нии а́нгелы Пречи́стыя Богоро́дицы о́браза во оби́тель твою́, преподо́бне, стека́хуся отвсю́ду, нося́ще неду́жныя своя́, жела́юще получи́ти исцеле́ние, е́же моли́твами и прикоснове́нием же пречу́днаго о́браза получи́вше, отхожда́ху в до́мы своя́, ра́дующеся. Мы́ же, дивя́щеся, похва́льная вопие́м:
Ра́дуйся, о христиа́нстем ро́де те́плый к Бо́гу хода́таю; ра́дуйся, неду́жным и ско́рбным здра́вия пода́телю.
Ра́дуйся, я́ко твои́ми моли́твами оби́тель твоя́, я́ко со́лнце, просвети́ся; ра́дуйся, я́ко о не́й наро́д не то́чию ви́девый, но и слы́шавый возвесели́ся.
Ра́дуйся, я́ко ученицы́ твои́ душа́ми просвеща́хуся; ра́дуйся, я́ко твои́ми чудесы́ теле́сне веселя́хуся.
Ра́дуйся, я́ко твои́ми моли́твами от се́тей вра́жиих свобожда́емся; ра́дуйся, я́ко от ра́ки твоея́ святы́я благоуха́ния насыща́емся.
Ра́дуйся, я́ко прикоснове́нием тоя́ же ра́ки от боле́зней исцелева́хуся; ра́дуйся, я́ко таковы́й да́р от Бо́га прия́л еси́.
Ра́дуйся, я́ко приходя́щим к тебе́ с ве́рою неоску́дно исцеле́ние подава́еши; ра́дуйся, Паи́сие преподо́бне.
Кондак 5
Боготе́чная звезда́ яви́лся еси́, преподо́бне, Це́рковь Святу́ю, а́ки не́бо, украси́л еси́, о́браз, по́сланный со двема́ а́нгелома, в не́й поста́вив, и от все́х стра́н ве́рнии ра́ди моле́ния во оби́тель твою́ стека́хуся; ты́ же да́нною от Христа́ Бо́га тебе́ благода́тию те́х озаря́л еси́, я́коже чудесы́, та́ко и уче́нием наставля́я и́х на пу́ть спасе́ния и повелева́я вопи́ти к Бо́гу: Аллилу́иа.
Икос 5
Ви́дев учени́к тво́й преподо́бный Иа́ков во оби́тели святе́й созда́нную тобо́ю и боля́рином Иоа́нном це́рковь возгоре́вшуся, в не́йже принесе́нный а́нгелы Пречи́стыя Богоро́дицы о́браз стоя́ше, ре́вностию разже́гся, и всю́ наде́жду на Са́мую Богома́терь и на твои́ моли́твы возложи́в, разби́в две́ри бревно́м и сквозе́ пла́мень в це́рковь вни́де, и о́браз Богоро́дицы изнесе́, пла́мени же отвсю́ду окружа́ющу его́, о́браз ничто́же пострада́л. Сего́ ра́ди похва́льная прино́сим ти́, вопию́ще:
Ра́дуйся, тве́рдое ве́ры основа́ние; ра́дуйся, в таковы́х кре́пкое имы́й упова́ние.
Ра́дуйся, такова́ ученика́ стяжа́вый; ра́дуйся, на тве́рдем краеуго́льном ка́мени того́ назда́вый.
Ра́дуйся, я́ко уче́нием свои́м, а не млеко́м сего́ воспита́; ра́дуйся, я́ко в несомне́нную ве́ру сего́ наказа́.
Ра́дуйтеся, я́ко о́ба Го́споду угоди́ста; ра́дуйтеся, я́ко мно́ги ученики́ свои́м уче́нием воздои́ста.
Ра́дуйтеся, я́ко мно́гим ко спасе́нию яви́стася предводи́тели; ра́дуйтеся, я́ко и на́м от волко́в а́дских бы́сте храни́тели.
Ра́дуйтеся, я́ко ку́пно предстоите́ Святе́й Тро́ице; ра́дуйтеся, я́ко Царю́ небесе́ и земли́ о на́с мо́литеся.
Ра́дуйся, Паи́сие преподо́бне.
Кондак 6
Пропове́данную а́нгелы принесе́нием честна́го о́браза Пречи́стыя Богоро́дицы ми́лость, хотя́щую бы́ти ро́ду христиа́нскому, возбуди́ ве́рнии, и на созида́ние но́выя це́ркве от име́ний свои́х подая́ше ки́йждо по си́ле свое́й. Ты́ же, преподо́бне, о́ным подая́нием но́вую це́рковь вско́ре воздви́гл еси́ и к соде́йствующему в се́м Бо́гу возопи́л еси́: Аллилу́иа.
Икос 6
Возсия́ во оби́тели новосозда́нная це́рковь, а́ки второ́е со́лнце на небе́снем кру́зе, наро́ди же, ви́девше сие́, ра́довахуся и, любо́вию притека́юще, от неистощи́маго исто́чника целе́б о́браза Пресвяты́я Богоро́дицы да́ры прие́млюще и восхваля́юще тя́, си́це вопия́ху:
Ра́дуйся, до́брый виногра́да Христо́ва строи́телю; ра́дуйся, ста́да Его́ храни́телю.
Ра́дуйся, все́м ве́рным во спасе́ние учи́телю; ра́дуйся, те́м же до Ца́рствия Небе́снаго предводи́телю.
Ра́дуйся, незло́бивых ста́да Христо́ва ове́ц во еди́но совокупи́телю; ра́дуйся, злосмра́дных ко́злищ от ста́да Христо́ва прогони́телю.
Ра́дуйся, моли́твенниче о на́с к Бо́гу те́плый; ра́дуйся, хода́таю к Богоро́дице о на́с ско́рый.
Ра́дуйся, я́ко тобо́ю дерзнове́ние в моли́тве к Богоро́дице име́ем; ра́дуйся, я́ко тобо́ю вся́ поле́зная от Бо́га прие́млем.
Ра́дуйся, ско́рый на́ш помо́щниче; ра́дуйся, гото́вый на́ш засту́пниче.
Ра́дуйся, Паи́сие преподо́бне.
Кондак 7
Хотя́щу вели́кому кня́зю Моско́вскому Васи́лию плени́ти уде́л кня́зя Гео́ргиа, прише́д в страны́ Га́личския насто́льный дя́ди своего́ гра́д Га́лич, тогда́ же взя́т и чудотво́рный о́браз, его́же принесо́ша а́нгели, и отнесе́ его́ в сво́й насто́льный гра́д Москву́, и а́ки пле́нницу заключи́л еси́, преслу́шав моле́ние твое́, преподо́бне; ты́ же, наде́явся несомне́нно, я́ко па́ки о́браз к ва́м во оби́тель возврати́тся, пе́л еси́ Бо́гу пе́снь а́нгельскую: Аллилу́иа.
Икос 7
Но́вое бе́ чу́до и у́жаса испо́лненное тогда́, принесе́ну бо бы́вшу о́бразу Цари́цы Небе́сныя в Москву́ и в це́ркви заключе́нну, замки́ и печа́тьми утвержде́нну; и стра́жами обстои́ма свободи́вшая Ада́ма и Е́ву от а́да, храни́ма а́ки пле́нница, неви́димою же си́лою Бо́жиею тоя́ же но́щи обре́теся в твое́й честне́й оби́тели в це́ркви; ты́ же, сию́ ощути́в, ра́достне похва́льная к Богоро́дице возсыла́ше, си́це глаго́люще:
Ра́дуйся, Ада́мово исправле́ние и Е́вино свобожде́ние; ра́дуйся, проро́ков оглаше́ние и апо́столов удобре́ние.
Ра́дуйся, мучи́теля безчелове́чнаго измета́ющая от нача́льства; ра́дуйся, Сы́на Своего́ и Бо́га кре́пкую си́лу показа́вшая.
Ра́дуйся, мо́ре, потопи́вшее го́рдую лю́тость вели́каго кня́зя; ра́дуйся, ка́меню, напои́вый на́с жа́ждущих пото́ком чуде́с Твои́х.
Ра́дуйся, судию́, непра́веден су́д судя́щаго, обличи́вшая; ра́дуйся, во тме́ плаче́вней на́с гре́шных просвети́вшая.
Ра́дуйся, ро́ждшая ра́дость всему́ ми́ру; ра́дуйся, отгна́вшая от все́х ве́рных печа́лей зи́му.
Ра́дуйся, я́ко прише́ствием Свята́го Ти́ о́браза и на́м ра́дость дарова́; ра́дуйся, я́ко пре́жнюю на́шу печа́ль всю́ отгна́. Ра́дуйся, Ма́ти Госпо́дня.
Кондак 8
Стра́нное сие́ и пресла́вное чу́до егда́ уве́де вели́кий кня́зь Васи́лий, тогда́ печа́ли и у́жаса се́рдце свое́ испо́лни, зазира́ше себе́, ка́ко сия́ дерзнове́нно соде́ла, его́же не ле́ть де́лати, и сего́ ра́ди со слеза́ми и рыда́нием моля́шеся к Богоро́дице, да яви́т ему́ о о́бразе Свое́м. Егда́ же от по́сланных извести́ся, я́ко во оби́тели твое́й, преподо́бне о́тче, яви́ся, отню́дуже наси́лием бы́сть тогда́ взята́, воспе́л еси́ к Бо́гу пе́снь а́нгельскую: Аллилу́иа.
Икос 8
Ве́сь ра́дости испо́лнився вели́кий кня́зь и синкли́т его́ о обре́тении чудотво́рнаго о́браза Пречи́стыя Богоро́дицы, и дивя́щеся неизрече́нной Бо́жией прему́дрости, ка́ко неви́димо си́лою Сы́на Своего́ из це́ркве изы́де, замко́м и печа́тем це́лым су́щим и стра́жем бдя́щим. Мы́ же, ве́дяще, я́ко твои́х ра́ди моли́тв сия́ соде́яся, вопие́м ти́:
Ра́дуйся, све́тлый свети́льниче; ра́дуйся, па́стырю слове́сных ове́ц.
Ра́дуйся, мона́хов и́стинный оте́ц; ра́дуйся, я́ко твои́ми моли́твами вели́каго кня́зя суро́вое дерзнове́ние обличи́вый.
Ра́дуйся, я́ко его́ вся́ тще́тная мы́сль упраздни́ся; ра́дуйся, я́ко ты́ во смире́нии свое́м возвесели́ся.
Ра́дуйся, я́ко чудотво́рный о́браз сподо́бися зре́ти; ра́дуйся, я́ко пред ни́м вся́ дни́ живота́ своего́ изво́лил еси́ бде́ти.
Ра́дуйся, я́ко и по сме́рти свое́й Са́мую Пречи́стую Богоро́дицу зри́ши; ра́дуйся, я́ко Престо́лу Сы́на Ея́ предстои́ши.
Ра́дуйся, Паи́сие преподо́бне.
Кондак 9
Вся́кое естество́ а́нгельское удиви́ся вели́кому дарова́нию, свы́ше от Бо́га тебе́ да́нному, преподо́бне, я́ко в немощне́й свое́й челове́честей пло́ти сы́й, по всему́ уподо́бися а́нгелом, и си́лою Вы́шняго укрепля́емь, во все́х доброде́телех дово́льно изоби́ловал еси́, сего́ ра́ди чи́стою свое́ю душе́ю причте́н ко а́нгельским си́лам, пою́щи всеси́льному Бо́гу: Аллилу́иа.
Икос 9
Вити́йския и ри́торския многовеща́нныя глаго́лы вся́ отве́ргши, и́стинным свои́м се́рдцем и чи́стою со́вестию в пе́снех велича́ем тя́, преподо́бне, и почита́ем богоуго́дная твоя́ дела́ и сла́ву, приглаша́юще пе́ти тебе́ такова́я:
Ра́дуйся, я́ко Христа́ ра́ди распя́тся ми́рови; ра́дуйся, я́ко вся́ мирска́я во уме́ты вмени́вый.
Ра́дуйся, я́ко пло́ть свою́ порабо́тивый ду́ху; ра́дуйся, я́ко ду́хом служа́ше Бо́гови де́нь и но́щь.
Ра́дуйся, я́ко те́лом живя́ше во юдо́ли земне́й; ра́дуйся, я́ко душе́вное еси́ о́ко пася́ше во Иерусали́ме го́рнем.
Ра́дуйся, и ны́не та́мо пребыва́еши; ра́дуйся, я́ко на́с, на земли́ су́щих, не оставля́еши.
Ра́дуйся, я́ко о на́с гре́шных мольбы́ Бо́гу прино́сиши; ра́дуйся, я́ко от Него́ к на́м ми́лость хода́тайством свои́м изно́сиши.
Ра́дуйся, я́ко мы́ тя за сия́ благодари́м; ра́дуйся, я́ко и́мя твое́ свято́е всегда́ сла́вим.
Ра́дуйся, Паи́сие преподо́бне.
Кондак 10
Спасти́ся хотя́щим во́ждь бы́л еси́, преподо́бне, и ны́не на́м гре́шным, спасе́ния жела́ющим, помози́ святы́ми твои́ми моли́твами; и я́коже жи́в сы́й, мно́ги ученики́ своя́, Христо́ви угоди́вших, предста́вив, та́ко и на́с, свободи́в от пре́лести грехо́вныя, чи́стых Христу́ предста́ви, да зове́м Ему́: Аллилу́иа.
Икос 10
Стена́ кре́пкая и необори́мая, и покро́в бы́л еси́ свои́м ученико́м, защища́я и́х от волко́в а́дских, сохраня́я от стреля́ний бесо́вских, и ны́не на́м гре́шным бу́ди стена́ и покро́в, прибега́ющим к тебе́ и тре́бующим от тебе́ по́мощи, да зове́м ти́:
Ра́дуйся, отце́в сла́во; ра́дуйся, преподо́бных похвало́.
Ра́дуйся, по́стников украше́ние; ра́дуйся, му́чеников соприча́стниче.
Ра́дуйся, пустынножи́телем соо́бщниче; ра́дуйся, и́стинныя христиа́нския ве́ры ревни́телю.
Ра́дуйся, проти́вящихся ве́ре святе́й искорени́телю; ра́дуйся, церко́вное украше́ние.
Ра́дуйся, оби́тели святе́й разшире́ние; ра́дуйся, я́ко оби́тель твоя́ ны́не моли́твами твои́ми стои́т неруши́ма. Ра́дуйся, я́ко и во ве́ки и́мать стоя́ти невреди́ма.
Ра́дуйся, Паи́сие преподо́бне.
Кондак 11
Пе́нием вся́ким Бо́га и Его́ Пречи́стую Богома́терь, живы́й на земли́ прославля́л еси́ вся́ дни́ живота́ твоего́, сего́ ра́ди и мзду́ трудо́в свои́х восприя́в, всели́лся еси́ в небе́сных селе́ниих, иде́же вы́ну пою́т а́нгельстии чи́нове; с ни́ми же па́ки живы́й, пое́ши всегда́ к Бо́гу пе́снь сию́: Аллилу́иа.
Икос 11
Светоприе́мный све́щник на ме́сте высо́це, а не под спу́дом стоя́й, во тме́ грехо́вней су́щии зри́м тя́, преподо́бне, с невеще́ственными бо в вы́шних предстои́ши Престо́лу Пресвяты́я Тро́ицы, ра́дости превели́кия испо́лнився и боже́ственными луча́ми трисо́лнечнаго све́та осиява́емь, облиста́еши ве́рных, вопию́щих тебе́ такова́я:
Ра́дуйся, заре́, явля́ющая покая́нием де́нь спасе́ния; ра́дуйся, все́х гре́шных покая́нием ко Христу́ приводя́й.
Ра́дуйся, да́нным ти́ от Христа́ ключе́м Ца́рствие Небе́сное отверза́еши; ра́дуйся, покая́нием гре́шников в него́ вво́диши.
Ра́дуйся, ко́рмчию корабля́ Христо́ва, в не́мже спасо́шася мно́зи; ра́дуйся, я́ко уче́нием свои́м многотеку́щую источи́л еси́ реку́.
Ра́дуйся, я́ко жа́ждущих твоего́ уче́ния напои́л еси́ пото́ком сла́дости; ра́дуйся, я́ко твоего́ уче́ния реко́ю доплы́хом в ти́хое приста́нище.
Ра́дуйся, я́ко приста́хом в ти́хое приста́нище; ра́дуйся, я́ко насле́довахом зе́млю обетова́нную. Ра́дуйся, я́ко получи́хом пре́жде мно́гих ле́т обеща́нное.
Ра́дуйся, Паи́сие преподо́бне.
Кондак 12
Благода́ть даде́ся тебе́ от Бо́га, я́ко и про́чим святы́м, цели́ти ду́ши и телеса́ с ве́рою притека́ющим к ра́це твое́й святе́й. Сего́ ра́ди молю́ ти ся, преподо́бне Паи́сие, и, к ра́це твое́й святе́й припа́дая, вопию́: исцели́ мою́ ду́шу и боле́знь во здра́вие вско́ре премени́, да тобо́ю получи́в здра́вие, воспою́ Бо́гови пе́снь а́нгельскую: Аллилу́иа.
Икос 12
Пою́ще твоя́ труды́ и по́двиги, преподо́бне, восхваля́ем тя́ вси́, я́ко от ю́ности своея́ яви́лся еси́ хра́м Свята́го Ду́ха; сего́ ра́ди к ра́це твое́й честне́й во хра́м Бо́жия Ма́тере притека́юще, вопие́м ти́:
Ра́дуйся, врачу́ душа́ми боле́знующих; ра́дуйся, цели́телю теле́сными неду́ги озло́бленных.
Ра́дуйся, наказа́телю су́щим во мла́дости; ра́дуйся, же́зле су́щим в ста́рости.
Ра́дуйся, я́ко свята́я твоя́ душа́ в небе́сных ски́ниях почива́ет; ра́дуйся, я́ко и́мя твое́ свято́е на земли́ прославля́емо быва́ет.
Ра́дуйся, я́ко призыва́нием и́мени твоего́ свята́го боле́зни врачу́ются; ра́дуйся, я́ко прикоснове́нием гро́ба твоего́ свята́го неду́зи разреша́ются.
Ра́дуйся, твои́ми моли́твами бесну́ющиися от мучи́тельства диа́воля свобожда́ются; ра́дуйся, я́ко вся́кая я́зва в лю́дех цели́тся; Ра́дуйся, я́ко вси́, притека́ющии ко гро́бу твоему́ с ве́рою, спаса́ются.
Ра́дуйся, Паи́сие преподо́бне.
Кондак 13
О всеблаже́нный и приснопа́мятный уго́дниче Бо́жий, преподо́бне о́тче Паи́сие, предстоя́ Престо́лу Влады́ки Христа́, не забу́ди на́с гре́шных и ны́нешнее на́ше приими́ приноше́ние, всегда́ о на́с пребу́ди моля́йся, изба́витися на́м от напа́стей и вся́ких боле́зней, и ве́чнаго муче́ния благоприя́тным твои́м хода́тайством, да с тобо́ю воспева́ем к Бо́гу всегда́: Аллилу́иа.
Повтор
Этот кондак читается трижды, затем икос 1-й и кондак 1-й.
Икос 1
А́нгела во пло́ти су́ща тя́ зна́ем, о́тче преподо́бне, и сего́ ра́ди призыва́ем тя́, предста́ни на́м ско́ро в по́мощь и изба́ви на́с от вся́каго зла́, да тобо́ю спа́сшеся, всегда́ вопие́м ти́:
Ра́дуйся, от утро́бы ма́терния освяще́нный; ра́дуйся, све́том богове́дения просвеще́нный.
Ра́дуйся, я́ко ми́ра сего́ красоту́ ни во что́ же вмени́вый; ра́дуйся, я́ко а́нгельское житие́ возлюби́вый.
Ра́дуйся, я́ко собра́л еси́ и́нок мно́жество; ра́дуйся, я́ко научи́л еси́ име́ти кре́пкое му́жество.
Ра́дуйся, я́ко уче́нием твои́м мно́зи получи́ша спасе́ние; ра́дуйся, я́ко тобо́ю улучи́ша о́бщее небе́сное селе́ние.
Ра́дуйся, я́ко чи́сте зри́ши Святу́ю Тро́ицу; ра́дуйся, я́ко всегда́ о на́с мо́лиши Пресвяту́ю Богоро́дицу. Ра́дуйся, я́ко вся́ проше́ния на́ша исполня́ются;
Ра́дуйся, Паи́сие преподо́бне.
Кондак 1
Избра́нный чудотво́рче, уго́дниче Христо́в, к тебе́ прибега́ем и тебе́ ми́ли ся де́ем, услы́ши на́с в ча́с се́й, моля́щихся тебе́, и бу́ди на́м ско́рый помо́щник и засту́пник, да твои́ми моли́твами изба́вльшеся от вся́ких бе́д, вопие́м ти́:
Ра́дуйся, Паи́сие преподо́бне.
Молитвы
О свяще́нная главо́, преподо́бне о́тче, преблаже́нне а́вво Паи́сие вели́кий! Не забу́ди ни́щих свои́х до конца́, но помина́й на́с всегда́ во святы́х свои́х и богоприя́тных моли́твах. Помяни́ ста́до свое́, е́же са́м упа́сл еси́, и не забу́ди посеща́ти ча́д свои́х, моли́, о́тче на́ш, и ны́не за ны́, де́ти твоя́ духо́вныя, я́ко име́яй дерзнове́ние к Небе́сному Царю́, не премолчи́ за ны́, вопия́ ко Го́споду, и не пре́зри на́с, ве́рою и любо́вию чту́щих тя́, но помина́й на́с, недосто́йных, у Престо́ла Вседержи́телева, и не преста́й моля́ся за на́с ко Христу́ Бо́гу, и́бо дана́ тебе́ бы́сть благода́ть за ны́ моли́тися. Не мни́м бо тя́ су́ща ме́ртва: а́ще бо и те́лом преста́вился еси́ от на́с, но и по сме́рти у́бо жи́в сы́й пребыва́еши неотсту́пно от на́с ду́хом, сохраня́я на́с от стре́л вра́жиих и вся́кия пре́лести бесо́вския и ко́зней диа́вольских. Па́стырю на́ш до́брый, а́ще бо и моще́й твои́х ра́ка пред очи́ма на́шима ви́дима е́сть всегда́, но свята́я твоя́ душа́ со а́нгельскими во́инствы, со безпло́тными си́лами у Престо́ла Вседержи́телева предстоя́щи, досто́йно весели́тся. На́м бо ве́дущим у́бо тя́ вои́стинну и по сме́рти я́ко жи́ву ти́ су́щу, тебе́ припа́даем и тебе́ мо́лимся и тебе́ ми́ли ся де́ем, е́же моли́тися о на́с всеси́льному Бо́гу о по́льзе ду́ш на́ших и испроси́ти на́м вре́мя на покая́ние, и невозбра́нно прейти́ от земли́ на не́бо, мыта́рств же го́рьких, бесо́в и возду́шных князе́й, и ве́чныя му́ки изба́витися, и Небе́сному Ца́рствию насле́дником бы́ти со все́ми, и́же от ве́ка угоди́вшими Го́споду на́шему Иису́су Христу́, Ему́же подоба́ет вся́кая сла́ва, че́сть и поклоне́ние со Безнача́льным Его́ Отце́м и с Пресвяты́м и Благи́м и Животворя́щим Его́ Ду́хом, ны́не и при́сно и во ве́ки веко́в. Ами́нь.
Конда́къ а҃
И҆збра́нный чꙋдотво́рче ᲂу҆го́дниче хрⷭ҇то́въ, къ тебѣ̀ прибѣга́емъ и҆ тебѣ̀ ми́ли сѧ дѣ́емъ, ᲂу҆слы́ши на́съ въ ча́съ се́й молѧ́щихсѧ тебѣ̀, и҆ бꙋ́ди на́мъ ско́рый помо́щникъ и҆ застꙋ́пникъ, да твои́ми мл҃твами и҆зба́вльшесѧ ѿ всѧ́кихъ бѣ́дъ вопїе́мъ тѝ:
Ра́дꙋйсѧ, паі́сїе прпⷣбне.
І҆́косъ а҃
А҆́гг҃ла во пло́ти сꙋ́ща тѧ̀ зна́емъ, ѻ҆́ч҃е прпⷣбне, и҆ сегѡ̀ ра́ди призыва́емъ тѧ̀: предста́ни на́мъ ско́рѡ въ по́мощь, и҆ и҆зба́ви на́съ ѿ всѧ́кагѡ ѕла̀, да тобо́ю спа́сшесѧ, всегда̀ вопїе́мъ тѝ:
Ра́дꙋйсѧ, ѿ ᲂу҆тро́бы ма́тернїѧ ѡ҆свѧще́нный. Ра́дꙋйсѧ, свѣ́томъ бг҃овѣ́денїѧ просвѣще́нный.
Ра́дꙋйсѧ, ꙗ҆́кѡ мі́ра сегѡ̀ красотꙋ̀ ни во что́ же вмѣни́вый. Ра́дꙋйсѧ, ꙗ҆́кѡ а҆́гг҃льское житїѐ возлюби́вый.
Ра́дꙋйсѧ, ꙗ҆́кѡ собра́лъ є҆сѝ и҆́нѡкъ мно́жество. Ра́дꙋйсѧ, ꙗ҆́кѡ наꙋчи́лъ є҆сѝ и҆мѣ́ти крѣ́пкое мꙋ́жество.
Ра́дꙋйсѧ, ꙗ҆́кѡ ᲂу҆че́нїемъ твои́мъ мно́зи полꙋчи́ша сп҃се́нїе. Ра́дꙋйсѧ, ꙗ҆́кѡ тобо́ю ᲂу҆лꙋчи́ша ѻ҆́бщее нбⷭ҇ное селе́нїе.
Ра́дꙋйсѧ, ꙗ҆́кѡ чи́стъ, зри́ши ст҃ꙋ́ю трⷪ҇цꙋ. Ра́дꙋйсѧ, ꙗ҆́кѡ всегда̀ ѡ҆ на́съ мо́лиши прест҃ꙋ́ю бцⷣꙋ. Ра́дꙋйсѧ, ꙗ҆́кѡ всѧ̑ прошє́нїѧ на̑ша и҆сполнѧ́ютсѧ.
Ра́дꙋйсѧ, паі́сїе прпⷣбне.
Конда́къ в҃
Ви́дѧщи тѣле́сныма ѻ҆чи́ма ѿ бг҃а по́сланный къ тебѣ̀ пречⷭ҇тыѧ бг҃омт҃ре ѡ҆́бразъ, принесе́нный болѧ́риномъ і҆ѡа́нномъ, ра́дости мно́гїѧ напо́лнивсѧ, вско́рѣ повелѣ́нное ѿ а҆́гг҃лъ дѣ́ломъ соверши́лъ є҆сѝ, вопїѧ̀ къ бг҃ꙋ: А҆ллилꙋ́їа.
І҆́косъ в҃
Ра́зꙋмъ тве́рдый во ᲂу҆дивле́нїи свое́мъ сохранѧ́ѧ, ѻ҆́ч҃е прпⷣбне, ви́дѣвъ болѧ́рина во внеза́пномъ и҆змѣне́нїи, вопроси́лъ є҆сѝ є҆го̀ ѡ҆ приклю́чшихсѧ є҆мꙋ̀, ᲂу҆вѣ́дѣвъ же бы̑вшаѧ ра́довашесѧ, сегѡ̀ ра́ди и҆ мы̀ вопїе́мъ тѝ:
Ра́дꙋйсѧ, ѿ рꙋ́къ і҆ѡа́нновыхъ ѡ҆́бразъ бг҃оро́диченъ прїе́мый. Ра́дꙋйсѧ, ꙗ҆́кѡ всѧ̑ дни̑ живота̀ своегѡ̀ є҆мꙋ̀ послꙋжи́вый.
Ра́дꙋйсѧ, ꙗ҆́кѡ ѡ҆́бразомъ тѣ́мъ влⷣка хрⷭ҇то́съ ѡ҆би́тель твою̀ просла́ви. Ра́дꙋйсѧ, ꙗ҆́кѡ и҆ тебѐ ѡ҆би́тели тоѧ̀ высоча́йшаго па́стырѧ поста́ви.
Ра́дꙋйсѧ, ꙗ҆́кѡ чꙋдесє́мъ ѿ ѡ҆́браза быва́ємымъ самови́децъ ꙗ҆ви́сѧ. Ра́дꙋйсѧ, ꙗ҆́кѡ того̀ ра́ди во все́й рѡссі́и и҆́мѧ твоѐ просла́висѧ.
Ра́дꙋйсѧ, ꙗ҆́кѡ ѿ всѣ́хъ стра́нъ наро́ди во ѡ҆би́тель твою̀ притека́хꙋ. Ра́дꙋйсѧ, ꙗ҆́кѡ твои́ми мл҃твами ѿ ѡ҆́браза бг҃оро́дична всѧ̑ полє́знаѧ прїима́хꙋ.
Ра́дꙋйсѧ, ста́да хрⷭ҇то́ва, слове́сныхъ ѻ҆ве́цъ до́брый па́стырю. Ра́дꙋйсѧ, наста́вниче заблꙋ́ждшихъ и҆ бл҃гі́й ᲂу҆чи́телю.
Ра́дꙋйсѧ, и҆збавлѧ́ѧй во тмѣ̀ прегрѣше́нїй блꙋдѧ́щихъ. Ра́дꙋйсѧ, наставлѧ́ѧй на пꙋ́ть сп҃се́нїѧ хотѧ́щихъ.
Ра́дꙋйсѧ, паі́сїе прпⷣбне.
Конда́къ г҃
Си́лою вы́шнѧгѡ по́сланнїи къ тебѣ̀ два̀ а҆́гг҃ла, носѧ́ще ѡ҆́бразъ пречⷭ҇тыѧ бцⷣы, срѣто́ша нѣ́коего бл҃гоговѣ́йна человѣ́ка и҆́менемъ і҆ѡа́нна, врꙋчи́вше є҆го̀ неви́димы бы́ша ѿ ѻ҆́чїю є҆гѡ̀, ѻ҆́нъ же ѡ҆́бразъ прїе́мъ, возопѝ къ бг҃ꙋ: А҆ллилꙋ́їа.
І҆́косъ г҃
И҆мꙋ́щи сомнѣ́нїе въ се́рдцы свое́мъ болѧ́ринъ і҆ѡа́ннъ ѡ҆ ю҆́ношахъ, прине́сшихъ ѡ҆́бразъ пречⷭ҇тыѧ бцⷣы, вско́рѣ возврати́сѧ въ до́мъ сво́й, хотѧ́щи па́ки ви́дѣти и҆̀хъ, не ᲂу҆лꙋчи́въ же ви́дѣти и҆́хъ, прите́къ во ѡ҆би́тель твою̀ вопїѧ́ше тебѣ̀:
Ра́дꙋйсѧ, ѻ҆́ч҃е, ѡ҆́браза бг҃омт҃ре храни́телю. Ра́дꙋйсѧ, прест҃ы́ѧ трⷪ҇цы слꙋжи́телю.
Ра́дꙋйсѧ, недовѣ́домыѧ та́йны зри́телю. Ра́дꙋйсѧ, чꙋдесє́мъ, ѿ ѡ҆́браза быва́ємымъ блюсти́телю.
Ра́дꙋйсѧ, прпⷣбныхъ всѣ́хъ и҆звѣ́стнаѧ похвало̀. Ра́дꙋйсѧ, по́стникѡвъ многословꙋ́щаѧ сла́во.
Ра́дꙋйсѧ, мона́хѡвъ бж҃е́ственное пра́вило. Ра́дꙋйсѧ, все́й га́личской странѣ̀ вели́кое свѣти́ло.
Ра́дꙋйсѧ, а҆́гг҃лѡвъ собесѣ́дниче. Ра́дꙋйсѧ, ст҃ы̑мъ всѣ̑мъ соприча́стниче. Ра́дꙋйсѧ, трⷪ҇цы ст҃ы́ѧ чи́стый слꙋжи́телю.
Ра́дꙋйсѧ, паі́сїе прпⷣбне.
Конда́къ д҃
Бꙋ́рю внꙋ́трь и҆мѣ́ѧй мно́гихъ смꙋще́нїй, а҆́зъ многогрѣ́шный недоꙋмѣва́юсѧ, ка́кѡ возмогꙋ̀ досто́йнѡ воспѣ́ти твоѧ̑ по́двиги прпⷣбне; никто́же бо ѿ человѣ̑къ ны́нѣшнѧгѡ ро́да мо́жетъ ѧ҆̀ и҆счестѝ, а҆́ще бы и҆ ри́торски кто̀ глаго́лати восхотѣ́лъ, сегѡ̀ ра́ди бг҃ꙋ тѧ̀ прославлѧ́ющемꙋ дерза́юще воспѣва́емъ: А҆ллилꙋ́їа.
І҆́косъ д҃
Слы́шаще гра́да га́лича и҆ ѡ҆кре́стныхъ градѡ́въ наро́ди ѡ҆ принесе́нїи а҆́гг҃лы пречⷭ҇тыѧ бцⷣы ѡ҆́браза во ѡ҆би́тель твою̀, прпⷣбне, стека́хꙋсѧ ѿвсю́дꙋ, носѧ́ще недꙋ̑жныѧ своѧ̑, жела́юще полꙋчи́ти и҆сцѣле́нїе, є҆́же мл҃твами и҆ прикоснове́нїемъ же пречꙋ́днагѡ ѡ҆́браза полꙋчи́вше, ѿхожда́хꙋ въ до́мы своѧ̑ ра́дꙋющесѧ. мы́ же дивѧ́щесѧ похва̑льнаѧ вопїе́мъ:
Ра́дꙋйсѧ, ѡ҆ хрⷭ҇тїа́нстѣмъ ро́дѣ те́плый къ бг҃ꙋ хода́таю. Ра́дꙋйсѧ, недꙋ́жнымъ и҆ скѡ́рбнымъ здра́вїѧ пода́телю.
Ра́дꙋйсѧ, ꙗ҆́кѡ твои́ми мл҃твами ѡ҆би́тель твоѧ̀ ꙗ҆́кѡ со́лнце просвѣти́сѧ. Ра́дꙋйсѧ, ꙗ҆́кѡ ѡ҆ не́й наро́дъ не то́чїю ви́дѣвый, но и҆ слы́шавый возвесели́сѧ.
Ра́дꙋйсѧ, ꙗ҆́кѡ ᲂу҆ченицы̀ твоѝ дꙋша́ми просвѣща́хꙋсѧ. Ра́дꙋйсѧ, ꙗ҆́кѡ твои́ми чꙋдесы̀ тѣле́снѣ веселѧ́хꙋсѧ.
Ра́дꙋйсѧ, ꙗ҆́кѡ твои́ми мл҃твами ѿ сѣ́тей вра́жїихъ свобожда́емсѧ. Ра́дꙋйсѧ, ꙗ҆́кѡ ѿ ра́ки твоеѧ̀ ст҃ы́ѧ бл҃гоꙋха́нїѧ насыща́емсѧ.
Ра́дꙋйсѧ, ꙗ҆́кѡ прикоснове́нїемъ тоѧ̀ же ра́ки ѿ болѣ́зней и҆сцѣлева́хꙋсѧ. Ра́дꙋйсѧ, ꙗ҆́кѡ таковы́й да́ръ ѿ бг҃а прїѧ́лъ є҆сѝ.
Ра́дꙋйсѧ, ꙗ҆́кѡ приходѧ́щымъ къ тебѣ̀ съ вѣ́рою неѡскꙋ́днѡ и҆сцѣле́нїе подава́еши. Ра́дꙋйсѧ, паі́сїе прпⷣбне.
Конда́къ є҃
Бг҃оте́чнаѧ ѕвѣзда̀ ꙗ҆ви́лсѧ є҆сѝ прпⷣбне, цр҃ковь ст҃ꙋ́ю а҆́ки нб҃о ᲂу҆краси́лъ є҆сѝ, ѡ҆́бразъ по́сланный со двѣма̀ а҆́гг҃лома въ не́й поста́вивъ, и҆ ѿ всѣ́хъ стра́нъ вѣ́рнїи ра́ди моле́нїѧ во ѡ҆би́тель твою̀ стека́хꙋсѧ: ты́ же да́нною ѿ хрⷭ҇та̀ бг҃а тебѣ̀ бл҃года́тїю тѣ́хъ ѡ҆зарѧ́лъ є҆сѝ, ꙗ҆́коже чꙋдесы̀, та́кѡ и҆ ᲂу҆че́нїемъ наставлѧ́ѧ и҆̀хъ на пꙋ́ть сп҃се́нїѧ, и҆ повелѣва́ѧ вопи́ти къ бг҃ꙋ: А҆ллилꙋ́їа.
І҆́косъ є҃
Ви́дѣвъ ᲂу҆чени́къ тво́й прпⷣбный і҆а́кѡвъ во ѡ҆би́тели ст҃ѣ́й, созда́ннꙋю тобо́ю и҆ болѧ́риномъ і҆ѡа́нномъ, цр҃ковь возгорѣ́вшꙋсѧ, въ не́йже принесе́нный а҆́гг҃лы пречⷭ҇тыѧ бцⷣы ѡ҆́бразъ стоѧ́ше, ре́вностїю разже́гсѧ и҆ всю̀ наде́ждꙋ на са́мꙋю бг҃омт҃рь и҆ на твоѝ мл҃твы возложи́въ, разби́въ двє́ри бревно́мъ и҆ сквозѣ̀ пла́мень въ цр҃ковь вни́де, и҆ ѡ҆́бразъ бцⷣы и҆знесѐ, пла́мени же ѿвсю́дꙋ ѡ҆крꙋжа́ющꙋ є҆го̀, ѡ҆́бразъ ничто́же пострада́лъ. сегѡ̀ ра́ди похва̑льнаѧ прино́симъ тѝ вопїю́ще:
Ра́дꙋйсѧ, тве́рдое вѣ́ры ѡ҆снова́нїе. Ра́дꙋйсѧ, въ таковы́хъ крѣ́пкое и҆мы́й ᲂу҆пова́нїе.
Ра́дꙋйсѧ, такова̀ ᲂу҆ченика̀ стѧжа́вый. Ра́дꙋйсѧ, на тве́рдѣмъ краеꙋго́льномъ ка́мени того̀ назда́вый.
Ра́дꙋйсѧ, ꙗ҆́кѡ ᲂу҆че́нїемъ свои́мъ, а҆ не млеко́мъ сего̀ воспита̀. Ра́дꙋйсѧ, ꙗ҆́кѡ въ несомнѣ́ннꙋю вѣ́рꙋ сего̀ наказа̀.
Ра́дꙋйтесѧ, ꙗ҆́кѡ ѻ҆́ба гдⷭ҇ꙋ ᲂу҆годи́ста. Ра́дꙋйтесѧ, ꙗ҆́кѡ мнѡ́ги ᲂу҆ченикѝ свои́мъ ᲂу҆че́нїемъ воздои́ста.
Ра́дꙋйтесѧ, ꙗ҆́кѡ мнѡ́гимъ ко сп҃се́нїю ꙗ҆ви́стасѧ предводи́тели. Ра́дꙋйтесѧ, ꙗ҆́кѡ и҆ на́мъ ѿ волкѡ́въ а҆́дскихъ бы́сте храни́тели.
Ра́дꙋйтесѧ, ꙗ҆́кѡ кꙋ́пнѡ предстоитѐ ст҃ѣ́й трⷪ҇цѣ. Ра́дꙋйтесѧ, ꙗ҆́кѡ цр҃ю̀ нб҃сѐ и҆ землѝ ѡ҆ на́съ мо́литесѧ.
Ра́дꙋйсѧ, паі́сїе прпⷣбне.
Конда́къ ѕ҃
Проповѣ́даннꙋю а҆́гг҃лы принесе́нїемъ честна́гѡ ѡ҆́браза пречⷭ҇тыѧ бцⷣы млⷭ҇ть, хотѧ́щꙋю бы́ти ро́дꙋ хрⷭ҇тїа́нскомꙋ, возбꙋдѝ вѣ́рнїи, и҆ на созида́нїе но́выѧ цр҃кве ѿ и҆мѣ́нїй свои́хъ подаѧ́ше кі́йждо по си́лѣ свое́й, ты́ же прпⷣбне, ѻ҆́нымъ подаѧ́нїемъ но́вꙋю цр҃ковь вско́рѣ воздви́глъ є҆сѝ, и҆ къ содѣ́йствꙋющемꙋ въ се́мъ бг҃ꙋ возопи́лъ є҆сѝ: А҆ллилꙋ́їа.
І҆́косъ ѕ҃
Возсїѧ̀ во ѡ҆би́тели новосозда́ннаѧ цр҃ковь а҆́ки второ́е со́лнце на нбⷭ҇нѣмъ крꙋ́зѣ, наро́ди же ви́дѣвше сїѐ ра́довахꙋсѧ, и҆ любо́вїю притека́юще, ѿ неистощи́магѡ и҆сто́чника цѣле́бъ ѡ҆́браза прест҃ы́ѧ бцⷣы да́ры прїе́млюще, и҆ восхвалѧ́юще тѧ̀ си́це вопїѧ́хꙋ:
Ра́дꙋйсѧ, до́брый вїногра́да хрⷭ҇то́ва строи́телю. Ра́дꙋйсѧ, ста́да є҆гѡ̀ храни́телю.
Ра́дꙋйсѧ, всѣ̑мъ вѣ̑рнымъ во сп҃се́нїе ᲂу҆чи́телю. Ра́дꙋйсѧ, тѣ̑мъ же до црⷭ҇твїѧ нбⷭ҇нагѡ предводи́телю.
Ра́дꙋйсѧ, неѕло́бивыхъ ста́да хрⷭ҇то́ва ѻ҆ве́цъ во є҆ди́но совокꙋпи́телю. Ра́дꙋйсѧ, ѕлосмра́дныхъ кѡ́злищъ ѿ ста́да хрⷭ҇то́ва прогони́телю.
Ра́дꙋйсѧ, мл҃твенниче ѡ҆ на́съ къ бг҃ꙋ те́плый. Ра́дꙋйсѧ, хода́таю къ бцⷣѣ ѡ҆ на́съ ско́рый.
Ра́дꙋйсѧ, ꙗ҆́кѡ тобо́ю дерзнове́нїе въ мл҃твѣ къ бцⷣѣ и҆мѣ́емъ. Ра́дꙋйсѧ, ꙗ҆́кѡ тобо́ю всѧ̑ полє́знаѧ ѿ бг҃а прїе́млемъ.
Ра́дꙋйсѧ, ско́рый на́шъ помо́щниче. Ра́дꙋйсѧ, гото́вый на́шъ застꙋ́пниче.
Ра́дꙋйсѧ, паі́сїе прпⷣбне.
Конда́къ з҃
Хотѧ́щꙋ вели́комꙋ кнѧ́зю моско́вскомꙋ васі́лїю плѣни́ти ᲂу҆дѣ́лъ кнѧ́зѧ геѡ́ргїа, прише́дъ въ страны̀ га́личскїѧ насто́льный дѧ́ди своегѡ̀ гра́дъ га́личь, тогда́ же взѧ́тъ и҆ чꙋдотво́рный ѡ҆́бразъ, є҆го́же принесо́ша а҆́гг҃ли, и҆ ѿнесѐ є҆го̀ въ сво́й насто́льный гра́дъ москвꙋ̀, и҆ а҆́ки плѣ́нницꙋ заключи́лъ є҆сѝ, преслꙋ́шавъ моле́нїе твоѐ прпⷣбне. ты́ же надѣ́ѧвсѧ несомне́ннѡ ꙗ҆́кѡ па́ки ѡ҆́бразъ къ ва́мъ во ѡ҆би́тель возврати́тсѧ, пѣ́лъ є҆сѝ бг҃ꙋ пѣ́снь а҆́гг҃льскꙋю: А҆ллилꙋ́їа.
І҆́косъ з҃
Но́вое бѣ̀ чꙋ́до и҆ ᲂу҆́жаса и҆спо́лненное тогда̀, принесе́нꙋ бо бы́вшꙋ ѡ҆́бразꙋ цр҃и́цы нбⷭ҇ныѧ въ москвꙋ̀ и҆ въ цр҃кви заключе́ннꙋ замки̑ и҆ печа̑тьми ᲂу҆тверждє́ннꙋ, и҆ стра́жами ѡ҆бстои́ма свободи́вшаѧ а҆да́ма и҆ є҆́ѵꙋ ѿ а҆́да, храни́ма а҆́ки плѣ́нница: неви́димою же си́лою бж҃їею тоѧ́ же но́щи ѡ҆брѣ́тесѧ въ твое́й честнѣ́й ѡ҆би́тели въ цр҃кви. ты́ же сїю̀ ѡ҆щꙋти́въ, ра́достнѣ похва̑льнаѧ къ бцⷣѣ возсыла́ше, си́це глаго́люще:
Ра́дꙋйсѧ, а҆да́мово и҆справле́нїе и҆ є҆́ѵино свобожде́нїе. Ра́дꙋйсѧ, проро́кѡвъ ѡ҆глаше́нїе и҆ а҆пⷭ҇толѡвъ ᲂу҆добре́нїе.
Ра́дꙋйсѧ, мꙋчи́телѧ безчеловѣ́чнаго и҆змета́ющаѧ ѿ нача́льства. Ра́дꙋйсѧ, сн҃а и҆ бг҃а крѣ́пкꙋю си́лꙋ показа́вшаѧ.
Ра́дꙋйсѧ, мо́ре, потопи́вшее го́рдꙋю лю́тость вели́кагѡ кнѧ́зѧ. Ра́дꙋйсѧ, ка́меню, напои́вый на́съ жа́ждꙋщихъ пото́комъ чꙋде́съ твои́хъ.
Ра́дꙋйсѧ, сꙋдїю̀ непра́веденъ сꙋ́дъ сꙋдѧ́щаго, ѡ҆бличи́вшаѧ. Ра́дꙋйсѧ, во тмѣ̀ плаче́внѣй на́съ грѣ́шныхъ просвѣти́вшаѧ.
Ра́дꙋйсѧ, ро́ждшаѧ ра́дость всемꙋ̀ мі́рꙋ. Ра́дꙋйсѧ, ѿгна́вшаѧ ѿ всѣ́хъ вѣ́рныхъ печа́лей зи́мꙋ.
Ра́дꙋйсѧ, ꙗ҆́кѡ прише́ствїемъ ст҃а́гѡ тѝ ѡ҆́браза и҆ на́мъ ра́дость дарова̀. Ра́дꙋйсѧ, ꙗ҆́кѡ пре́жнюю на́шꙋ печа́ль всю̀ ѿгна̀. Ра́дꙋйсѧ, мт҃и гдⷭ҇нѧ.
Конда́къ и҃
Стра́нное сїѐ и҆ пресла́вное чꙋ́до є҆гда̀ ᲂу҆вѣ́дѣ вели́кїй кнѧ́зь васі́лїй, тогда̀ печа́ли и҆ ᲂу҆́жаса се́рдце своѐ и҆спо́лни, зазира́ше себѐ, ка́кѡ сїѧ̑ дерзнове́ннѡ содѣ́ла, є҆гѡ́же не лѣ́ть дѣ́лати, и҆ сегѡ̀ ра́ди со слеза́ми и҆ рыда́нїемъ молѧ́шесѧ къ бцⷣѣ, да ꙗ҆ви́тъ є҆мꙋ̀ ѡ҆ ѡ҆́бразѣ свое́мъ: є҆гда́ же ѿ по́сланныхъ и҆звѣсти́сѧ, ꙗ҆́кѡ во ѡ҆би́тели твое́й, прпⷣбне ѻ҆́ч҃е, ꙗ҆ви́сѧ, ѿню́дꙋже наси́лїемъ бы́сть тогда̀ взѧта̀, воспѣ́лъ є҆сѝ къ бг҃ꙋ пѣ́снь а҆́гг҃льскꙋю: А҆ллилꙋ́їа.
І҆́косъ и҃
Ве́сь ра́дости и҆спо́лнивсѧ вели́кїй кнѧ́зь и҆ сѷгкли́тъ є҆гѡ̀ ѡ҆ ѡ҆брѣ́тенїи чꙋдотво́рнагѡ ѡ҆́браза пречⷭ҇тыѧ бцⷣы и҆ дивѧ́щесѧ неизрече́ннѣй бж҃їей премⷣрости, ка́кѡ неви́димѡ си́лою сн҃а своегѡ̀ и҆з̾ цр҃кве и҆зы́де, замкѡ́мъ и҆ печа́темъ цѣ̑лымъ сꙋ́щымъ и҆ стра́жємъ бдѧ́щымъ, мы́ же вѣ́дѧще, ꙗ҆́кѡ твои́хъ ра́ди мл҃твъ сїѧ̑ содѣ́ѧсѧ вопїе́мъ тѝ:
Ра́дꙋйсѧ, свѣ́тлый свѣти́льниче. Ра́дꙋйсѧ, па́стырю слове́сныхъ ѻ҆ве́цъ.
Ра́дꙋйсѧ, мона́хѡвъ и҆́стинный ѻ҆те́цъ. Ра́дꙋйсѧ, ꙗ҆́кѡ твои́ми мл҃твами вели́кагѡ кнѧ́зѧ сꙋро́вое дерзнове́нїе ѡ҆бличи́вый.
Ра́дꙋйсѧ, ꙗ҆́кѡ є҆гѡ̀ всѧ̀ тще́тнаѧ мы́сль ᲂу҆праздни́сѧ. Ра́дꙋйсѧ, ꙗ҆́кѡ ты̀ во смире́нїи свое́мъ возвесели́сѧ.
Ра́дꙋйсѧ, ꙗ҆́кѡ чꙋдотво́рный ѡ҆́бразъ сподо́бисѧ зрѣ́ти. Ра́дꙋйсѧ, ꙗ҆́кѡ пред̾ ни́мъ всѧ̑ дни̑ живота̀ своегѡ̀ и҆зво́лилъ є҆сѝ бдѣ́ти.
Ра́дꙋйсѧ, ꙗ҆́кѡ и҆ по сме́рти свое́й са́мꙋю пречⷭ҇тꙋю бцⷣꙋ зри́ши. Ра́дꙋйсѧ, ꙗ҆́кѡ прⷭ҇то́лꙋ сн҃а є҆ѧ̀ предстои́ши.
Ра́дꙋйсѧ, паі́сїе прпⷣбне.
Конда́къ ѳ҃
Всѧ́кое є҆стество̀ а҆́гг҃льское ᲂу҆диви́сѧ, вели́комꙋ дарова́нїю свы́ше ѿ бг҃а тебѣ̀ да́нномꙋ прпⷣбне, ꙗ҆́кѡ и҆ въ немощнѣ́й свое́й человѣ́честѣй пло́ти сы́й, по всемꙋ̀ ᲂу҆подо́бисѧ а҆́гг҃лѡмъ, и҆ си́лою вы́шнѧгѡ ᲂу҆крѣплѧ́емь, во всѣ́хъ добродѣ́телехъ дово́льнѡ и҆з̾ѡби́ловалъ є҆сѝ, сегѡ̀ ра́ди чⷭ҇тою свое́ю дꙋше́ю причте́нъ ко а҆́гг҃льскимъ си́ламъ, пою́щи всеси́льномꙋ бг҃ꙋ: А҆ллилꙋ́їа.
І҆́косъ ѳ҃
Виті̑йскїѧ и҆ ри́тѡрскїѧ многовѣща̑нныѧ глаго́лы всѧ̑ ѿве́ргши, и҆́стиннымъ свои́мъ се́рдцемъ и҆ чи́стою со́вѣстїю въ пѣ́снехъ велича́емъ тѧ̀ прпⷣбне, и҆ почита́емъ бг҃оꙋгѡ́днаѧ твоѧ̑ дѣла̀ и҆ сла́вꙋ, приглаша́юще пѣ́ти тебѣ̀ такѡва́ѧ:
Ра́дꙋйсѧ, ꙗ҆́кѡ хрⷭ҇та̀ ра́ди распѧ́тсѧ мі́рови. Ра́дꙋйсѧ, ꙗ҆́кѡ всѧ̑ мїрска̑ѧ во ᲂу҆ме́ты вмѣни́вый.
Ра́дꙋйсѧ, ꙗ҆́кѡ пло́ть свою̀ порабо́тивый дꙋ́хꙋ. Ра́дꙋйсѧ, ꙗ҆́кѡ дх҃омъ слꙋжа́ше бг҃ови де́нь и҆ но́щь.
Ра́дꙋйсѧ, ꙗ҆́кѡ тѣ́ломъ живѧ́ше во ю҆до́ли земнѣ́й. Ра́дꙋйсѧ, ꙗ҆́кѡ дꙋше́вное є҆сѝ ѻ҆́ко пасѧ́ше во і҆ерⷭ҇ли́мѣ го́рнѣмъ.
Ра́дꙋйсѧ, и҆ ны́нѣ та́мѡ пребыва́еши. Ра́дꙋйсѧ, ꙗ҆́кѡ на́съ на землѝ сꙋ́щихъ не ѡ҆ставлѧ́еши.
Ра́дꙋйсѧ, ꙗ҆́кѡ ѡ҆ на́съ грѣ́шныхъ мольбы̑ бг҃ꙋ прино́сиши. Ра́дꙋйсѧ, ꙗ҆́кѡ ѿ негѡ̀ къ на́мъ млⷭ҇ть хода́тайствомъ свои́мъ и҆зно́сиши.
Ра́дꙋйсѧ, ꙗ҆́кѡ мы́ тѧ за сїѧ̑ бл҃годари́мъ. Ра́дꙋйсѧ, ꙗ҆́кѡ и҆́мѧ твоѐ ст҃о́е всегда̀ сла́вимъ.
Ра́дꙋйсѧ, паі́сїе прпⷣбне.
Конда́къ і҃
Сп҃сти́сѧ хотѧ́щымъ во́ждь бы́лъ є҆сѝ прпⷣбне, и҆ ны́нѣ на́мъ грѣ̑шнымъ сп҃се́нїѧ жела́ющымъ помозѝ ст҃ы́ми твои́ми мл҃твами, и҆ ꙗ҆́коже жи́въ сы́й мнѡ́ги ᲂу҆ченикѝ своѧ̑ хрⷭ҇то́ви ᲂу҆годи́вшихъ предста́вивъ, та́кѡ и҆ на́съ свободи́въ ѿ пре́лести грѣхо́вныѧ чⷭ҇тыхъ хрⷭ҇тꙋ̀ предста́ви, да зове́мъ є҆мꙋ̀: А҆ллилꙋ́їа.
І҆́косъ і҃
Стѣна̀ крѣ́пкаѧ и҆ неѡбори́маѧ, и҆ покро́въ бы́лъ є҆сѝ свои̑мъ ᲂу҆ченикѡ́мъ, защища́ѧ и҆̀хъ ѿ волкѡ́въ а҆́дскихъ, сохранѧ́ѧ ѿ стрѣлѧ́нїй бѣсо́вскихъ, и҆ ны́нѣ на́мъ грѣ̑шнымъ бꙋ́ди стѣна̀ и҆ покро́въ прибѣга́ющымъ къ тебѣ̀, и҆ тре́бꙋющымъ ѿ тебє̀ по́мощи, да зове́мъ тѝ:
Ра́дꙋйсѧ, ѻ҆ц҃є́въ сла́во. Ра́дꙋйсѧ, прпⷣбныхъ похвало̀.
Ра́дꙋйсѧ, по́стникѡвъ ᲂу҆краше́нїе. Ра́дꙋйсѧ, мч҃никѡвъ соприча́стниче.
Ра́дꙋйсѧ, пꙋстынножи́телємъ соѻ́бщниче. Ра́дꙋйсѧ, и҆́стинныѧ хрⷭ҇тїа́нскїѧ вѣ́ры ревни́телю.
Ра́дꙋйсѧ, проти́вѧщихсѧ вѣ́рѣ ст҃ѣ́й и҆скорени́телю. Ра́дꙋйсѧ, цр҃ко́вное ᲂу҆краше́нїе.
Ра́дꙋйсѧ, ѡ҆би́тели ст҃ѣ́й разшире́нїе. Ра́дꙋйсѧ, ꙗ҆́кѡ ѡ҆би́тель твоѧ̀ ны́нѣ моли́твами твои́ми стои́тъ нерꙋши́ма. Ра́дꙋйсѧ, ꙗ҆́кѡ и҆ во вѣ́ки и҆́мать стоѧ́ти невреди́ма.
Ра́дꙋйсѧ, паі́сїе прпⷣбне.
Конда́къ а҃і
Пѣ́нїемъ всѧ́кимъ бг҃а и҆ є҆гѡ̀ пречⷭ҇тꙋю бг҃омт҃рь, живы́й на землѝ прославлѧ́лъ є҆сѝ всѧ̑ дни̑ живота̀ твоегѡ̀, сегѡ̀ ра́ди и҆ мздꙋ̀ трꙋдѡ́въ свои́хъ воспрїѧ́въ, всели́лсѧ є҆сѝ въ нбⷭ҇ныхъ селе́нїихъ, и҆дѣ́же вы́нꙋ пою́тъ а҆́гг҃льстїи чи́нове, съ ни́ми же па́ки живы́й пое́ши всегда̀ къ бг҃ꙋ пѣ́снь сїю̀: А҆ллилꙋ́їа.
І҆́косъ а҃і
Свѣтопрїе́мный свѣ́щникъ на мѣ́стѣ высо́цѣ, а҆ не под̾ спꙋ́домъ стоѧ́й, во тмѣ̀ грѣхо́внѣй сꙋ́щїи зри́мъ тѧ̀ прпⷣбне, съ невеще́ственными бо въ вы́шнихъ предстои́ши прⷭ҇то́лꙋ прест҃ы́ѧ трⷪ҇цы, ра́дости превели́кїѧ и҆спо́лнивсѧ и҆ бж҃е́ственными лꙋча́ми трисо́лнечнагѡ свѣ́та ѡ҆сїѧва́емь, ѡ҆блиста́еши вѣ́рныхъ, вопїю́щихъ тебѣ̀ такѡва́ѧ:
Ра́дꙋйсѧ, зарѐ, ꙗ҆влѧ́ющаѧ покаѧ́нїемъ де́нь сп҃се́нїѧ. Ра́дꙋйсѧ, всѣ́хъ грѣ́шныхъ покаѧ́нїемъ ко хрⷭ҇тꙋ̀ приводѧ́й.
Ра́дꙋйсѧ, да́ннымъ тѝ ѿ хрⷭ҇та̀ ключе́мъ црⷭ҇твїе нбⷭ҇ное ѿверза́еши. Ра́дꙋйсѧ, покаѧ́нїемъ грѣ́шникѡвъ въ негѡ̀ вво́диши.
Ра́дꙋйсѧ, ко́рмчїю кораблѧ̀ хрⷭ҇то́ва, въ не́мже спасо́шасѧ мно́зи. Ра́дꙋйсѧ, ꙗ҆́кѡ ᲂу҆че́нїемъ свои́мъ многотекꙋ́щꙋю и҆сточи́лъ є҆сѝ рѣкꙋ̀.
Ра́дꙋйсѧ, ꙗ҆́кѡ жа́ждꙋщихъ твоегѡ̀ ᲂу҆че́нїѧ напои́лъ є҆сѝ пото́комъ сла́дости. Ра́дꙋйсѧ, ꙗ҆́кѡ твоегѡ̀ ᲂу҆че́нїѧ рѣко́ю доплы́хомъ въ ти́хое приста́нище.
Ра́дꙋйсѧ, ꙗ҆́кѡ приста́хомъ въ ти́хое приста́нище. Ра́дꙋйсѧ, ꙗ҆́кѡ наслѣ́довахомъ зе́млю ѡ҆бѣтова́ннꙋю. Ра́дꙋйсѧ, ꙗ҆́кѡ полꙋчи́хомъ пре́жде мно́гихъ лѣ́тъ ѡ҆бѣща́нное.
Ра́дꙋйсѧ, паі́сїе прпⷣбне.
Конда́къ в҃і
Блгⷣть даде́сѧ тебѣ̀ ѿ бг҃а, ꙗ҆́кѡ и҆ про́чымъ ст҃ы̑мъ цѣли́ти дꙋ́шы и҆ тѣлеса̀ съ вѣ́рою притека́ющымъ къ ра́цѣ твое́й ст҃ѣ́й: сегѡ̀ ра́ди молю́ ти сѧ прпⷣбне паі́сїе, и҆ къ ра́цѣ твое́й ст҃ѣ́й припа́даѧ, вопїю̀: и҆сцѣлѝ мою̀ дꙋ́шꙋ, и҆ болѣ́знь во здра́вїе вско́рѣ премѣнѝ, да тобо́ю полꙋчи́въ здра́вїе, воспою̀ бг҃ови пѣ́снь а҆́гг҃льскꙋю: А҆ллилꙋ́їа.
І҆́косъ в҃і
Пою́ще твоѧ̑ трꙋды̀ и҆ по́двиги прпⷣбне, восхвалѧ́емъ тѧ̀ всѝ, ꙗ҆́кѡ ѿ ю҆́ности своеѧ̀ ꙗ҆ви́лсѧ є҆сѝ хра́мъ ст҃а́гѡ дх҃а: сегѡ̀ ра́ди къ ра́цѣ твое́й честнѣ́й во хра́мъ бж҃їѧ мт҃ре притека́юще, вопїе́мъ тѝ:
Ра́дꙋйсѧ, врачꙋ̀ дꙋша́ми болѣ́знꙋющихъ. Ра́дꙋйсѧ, цѣли́телю тѣле́сными недꙋ́ги ѡ҆ѕло́бленныхъ.
Ра́дꙋйсѧ, наказа́телю сꙋ́щымъ во мла́дости. Ра́дꙋйсѧ, же́зле сꙋ́щымъ въ ста́рости.
Ра́дꙋйсѧ, ꙗ҆́кѡ ст҃а́ѧ твоѧ̀ дш҃а̀ въ нбⷭ҇ныхъ ски́нїѧхъ почива́етъ. Ра́дꙋйсѧ, ꙗ҆́кѡ и҆́мѧ твоѐ ст҃о́е на землѝ прославлѧ́емо быва́етъ.
Ра́дꙋйсѧ, ꙗ҆́кѡ призыва́нїемъ и҆́мени твоегѡ̀ ст҃а́гѡ бѡлѣ́зни врачꙋ́ютсѧ. Ра́дꙋйсѧ, ꙗ҆́кѡ прикоснове́нїемъ гро́ба твоегѡ̀ ст҃а́гѡ недꙋ́зи разрѣша́ютсѧ.
Ра́дꙋйсѧ, ꙗ҆́кѡ твои́ми мл҃твами бѣснꙋ́ющїисѧ ѿ мꙋчи́тельства дїа́волѧ свобожда́ютсѧ. Ра́дꙋйсѧ, ꙗ҆́кѡ всѧ́каѧ ꙗ҆́зва въ лю́дехъ цѣли́тсѧ. Ра́дꙋйсѧ, ꙗ҆́кѡ всѝ притека́ющїи ко гро́бꙋ твоемꙋ̀ съ вѣ́рою сп҃са́ютсѧ.
Ра́дꙋйсѧ, паі́сїе прпⷣбне.
Конда́къ г҃і
Ѽ всебл҃же́нный и҆ приснопа́мѧтный ᲂу҆го́дниче бж҃їй прпⷣбне ѻ҆́ч҃е паі́сїе, предстоѧ̀ прⷭ҇то́лꙋ влⷣки хрⷭ҇та̀ не забꙋ́ди на́съ грѣ́шныхъ, и҆ ны́нѣшнее на́ше прїимѝ приноше́нїе, всегда̀ ѡ҆ на́съ пребꙋ́ди молѧ́йсѧ, и҆зба́витисѧ на́мъ ѿ напа́стей и҆ всѧ́кихъ болѣ́зней, и҆ вѣ́чнагѡ мꙋче́нїѧ бл҃гопрїѧ́тнымъ твои́мъ хода́тайствомъ, да съ тобо́ю воспѣва́емъ къ бг҃ꙋ всегда̀: А҆ллилꙋ́їа.
Повто́ръ
Сей конда́къ глаго́лется три́жды, та́же і҆́косъ а҃-й и҆ конда́къ а҃-й.
І҆́косъ а҃
А҆́гг҃ла во пло́ти сꙋ́ща тѧ̀ зна́емъ, ѻ҆́ч҃е прпⷣбне, и҆ сегѡ̀ ра́ди призыва́емъ тѧ̀: предста́ни на́мъ ско́рѡ въ по́мощь, и҆ и҆зба́ви на́съ ѿ всѧ́кагѡ ѕла̀, да тобо́ю спа́сшесѧ, всегда̀ вопїе́мъ тѝ:
Ра́дꙋйсѧ, ѿ ᲂу҆тро́бы ма́тернїѧ ѡ҆свѧще́нный. Ра́дꙋйсѧ, свѣ́томъ бг҃овѣ́денїѧ просвѣще́нный.
Ра́дꙋйсѧ, ꙗ҆́кѡ мі́ра сегѡ̀ красотꙋ̀ ни во что́ же вмѣни́вый. Ра́дꙋйсѧ, ꙗ҆́кѡ а҆́гг҃льское житїѐ возлюби́вый.
Ра́дꙋйсѧ, ꙗ҆́кѡ собра́лъ є҆сѝ и҆́нѡкъ мно́жество. Ра́дꙋйсѧ, ꙗ҆́кѡ наꙋчи́лъ є҆сѝ и҆мѣ́ти крѣ́пкое мꙋ́жество.
Ра́дꙋйсѧ, ꙗ҆́кѡ ᲂу҆че́нїемъ твои́мъ мно́зи полꙋчи́ша сп҃се́нїе. Ра́дꙋйсѧ, ꙗ҆́кѡ тобо́ю ᲂу҆лꙋчи́ша ѻ҆́бщее нбⷭ҇ное селе́нїе.
Ра́дꙋйсѧ, ꙗ҆́кѡ чи́стъ, зри́ши ст҃ꙋ́ю трⷪ҇цꙋ. Ра́дꙋйсѧ, ꙗ҆́кѡ всегда̀ ѡ҆ на́съ мо́лиши прест҃ꙋ́ю бцⷣꙋ. Ра́дꙋйсѧ, ꙗ҆́кѡ всѧ̑ прошє́нїѧ на̑ша и҆сполнѧ́ютсѧ.
Ра́дꙋйсѧ, паі́сїе прпⷣбне.
Конда́къ а҃
И҆збра́нный чꙋдотво́рче ᲂу҆го́дниче хрⷭ҇то́въ, къ тебѣ̀ прибѣга́емъ и҆ тебѣ̀ ми́ли сѧ дѣ́емъ, ᲂу҆слы́ши на́съ въ ча́съ се́й молѧ́щихсѧ тебѣ̀, и҆ бꙋ́ди на́мъ ско́рый помо́щникъ и҆ застꙋ́пникъ, да твои́ми мл҃твами и҆зба́вльшесѧ ѿ всѧ́кихъ бѣ́дъ вопїе́мъ тѝ:
Ра́дꙋйсѧ, паі́сїе прпⷣбне.
Моли́твы
Ѽ сщ҃е́ннаѧ главо̀, прпⷣбне ѻ҆́ч҃е пребл҃же́нне а҆́вво паі́сїе вели́кїй! не забꙋ́ди ни́щихъ свои́хъ до конца̀, но помина́й на́съ всегда̀ во ст҃ы́хъ свои́хъ и҆ бг҃опрїѧ́тныхъ мл҃твахъ, помѧнѝ ста́до своѐ є҆́же са́мъ ᲂу҆па́слъ є҆сѝ, и҆ не забꙋ́ди посѣща́ти ча́дъ свои́хъ, молѝ ѻ҆́ч҃е на́шъ и҆ ны́нѣ за ны̀, дѣ́ти твоѧ̑ дꙋхѡ́вныѧ, ꙗ҆́кѡ и҆мѣ́ѧй дерзнове́нїе къ нбⷭ҇номꙋ цр҃ю̀, не премолчѝ за ны̀ вопїѧ̀ ко гдⷭ҇ꙋ, и҆ не пре́зри на́съ вѣ́рою и҆ любо́вїю чтꙋ́щихъ тѧ̀: но помина́й на́съ недосто́йныхъ ᲂу҆ прⷭ҇то́ла вседержи́телева, и҆ не преста́й молѧ́сѧ за на́съ ко хрⷭ҇тꙋ̀ бг҃ꙋ, и҆́бо дана̀ тебѣ̀ бы́сть блгⷣть за ны̀ моли́тисѧ, не мни́мъ бо тѧ̀ сꙋ́ща ме́ртва, а҆́ще бо и҆ тѣ́ломъ преста́вилсѧ є҆сѝ ѿ на́съ, но и҆ по сме́рти ᲂу҆́бѡ жи́въ пребыва́еши неѿстꙋ́пнѡ ѿ на́съ дꙋ́хомъ, сохранѧ́ѧ на́съ ѿ стрѣ́лъ вра́жїихъ, всѧ́кїѧ пре́лести бѣсо́вскїѧ и҆ ко́зней дїа́вольскихъ, па́стырю на́шъ до́брый: а҆́ще бо и҆ моще́й твои́хъ ра́ка пред̾ ѻ҆чи́ма на́шима ви́дима є҆́сть всегда̀, но ст҃а́ѧ твоѧ̀ дꙋша̀ со а҆́гг҃льскими во́инствы, со безпло́тными си́лами ᲂу҆ прⷭ҇то́ла вседержи́телева предстоѧ́щи досто́йнѡ весели́тсѧ, на́мъ бо вѣ́дꙋщымъ ᲂу҆́бѡ тѧ̀ вои́стиннꙋ и҆ по сме́рти ꙗ҆́кѡ жи́вꙋ тѝ сꙋ́щꙋ, тебѣ̀ припа́даемъ, и҆ тебѣ̀ мо́лимсѧ, и҆ тебѣ̀ ми́ли сѧ дѣ́емъ є҆́же моли́тисѧ ѡ҆ на́съ всеси́льномꙋ бг҃ꙋ ѡ҆ по́льзѣ дꙋ́шъ на́шихъ, и҆ и҆спроси́ти на́мъ вре́мѧ на покаѧ́нїе, и҆ невозбра́ннѡ прейтѝ ѿ землѝ на нб҃о, мыта́рствъ же го́рькихъ, бѣсѡ́въ и҆ воздꙋ́шныхъ кнѧзе́й, и҆ вѣ́чныѧ мꙋ́ки и҆зба́витисѧ, и҆ нбⷭ҇номꙋ црⷭ҇твїю наслѣ́дникѡмъ бы́ти со всѣ́ми и҆̀же ѿ вѣ́ка ᲂу҆годи́вшими гдⷭ҇ꙋ на́шемꙋ і҆и҃сꙋ хрⷭ҇тꙋ̀, є҆мꙋ́же подоба́етъ всѧ́каѧ сла́ва, че́сть и҆ поклоне́нїе со безнача́льнымъ є҆гѡ̀ ѻ҆ц҃е́мъ, и҆ съ прест҃ы́мъ, и҆ бл҃ги́мъ, и҆ животворѧ́щимъ є҆гѡ̀ дꙋ́хомъ, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.