Канѡ́нъ ст҃о́мꙋ сщ҃енномꙋ́ченикꙋ ѳеодо́тꙋ а҆гкѵ́рскомꙋ

Богосия́нную тя́ звезду́ мы́сленное показа́в Со́лнце на высоте́ Своея́ Це́ркве, всю́ зе́млю блиста́ньми, блаже́нне, твои́х страда́ний уясни́.

От ю́на во́зраста возложе́н бы́в Бо́гу, Феодо́те, богода́нными доброде́тельми ду́шу просвети́л еси́ я́ве и ми́р честны́ми страда́нии украси́л еси́.

Сла́вный му́ченик, смотря́я льсти́ваго мре́жи, просте́рты на земли́, всю́ду прохожда́ше, ду́ши уче́ньми благочести́вых утвержда́я благода́тию.

Вы́ну взира́я к Бо́гу очесы́ у́мными, приснопа́мятне му́чениче, не чу́л еси́ ра́н, телеси́ приближа́ющихся, и му́ками всю́ду одержи́мь.

Ника́коже, му́чениче, прило́ги боле́зненными поколеба́лся еси́, ни ласка́нии беззако́нных, на ка́мени тве́рдыя ве́ры Христо́вы водруже́н, сла́вне Феодо́те.

Сокруша́я те́ло мно́гими ра́нами, гони́тель не возмо́же отню́д твоея́ кре́пости душе́вныя разсла́бити, Боже́ственною любо́вию Спа́са, блаже́нне, утвержда́емь.

Му́дростию слове́с твои́х и де́л благода́тию тмы́ предста́теля я́ве посрами́л еси́, Феодо́те, и побе́ду взя́л еси́ на него́, сла́вно подви́гся.

Огне́м страда́ний твои́х я́ве запали́л еси́ многобо́жную ле́сть и, я́ко свеща́, Ду́хом Святы́м, му́чениче, вже́гся та́йно, подсо́лнечную просвети́л еси́.

Кре́пко, сла́вне, в ре́бра стру́жемь и зе́льными боле́зньми я́ко вои́стинну всю́ду окруже́н, непоколе́блемь умо́м позна́лся еси́ ве́ры ра́ди, приснопа́мятне.

Терпе́нием твои́м, му́чениче му́дре, беззако́ннующих стремле́ния, и му́к озлобле́ния, и опале́ния я́ве терпе́л еси́, Боже́ственным посо́бием огражде́н.

Пропове́дуя сло́во благочести́вое, пу́тная ше́ствия дале́че, му́чениче богому́дре, ше́ствовал еси́ и заблужде́нныя к све́ту обрати́л еси́, тмо́ю води́мыя су́етства.

Воздви́жен бы́в, я́коже а́гнец, му́чениче, на дре́во, желе́зных ногте́й терпи́ши терза́ния, я́коже безпло́тен, блаже́нне, умерщвле́ния дебельство́ совлача́я.

Пома́зал еси́ словесы́ твои́ми свяще́нными чи́стыя к подвиго́м жены́, и, низло́жше, му́чениче, врага́ му́жескими боре́нии, нетле́ния венцы́ исплето́ша.

Кре́постию ду́ха ду́шу огради́в, лука́вствия ду́хи терпе́нием ра́н низложи́л еси́ и побе́ды вене́ц от Бо́га прия́л еси́, досточу́дне.

Ка́плями крове́й твои́х и́дольский пла́мень, му́чениче Христо́в, погаси́л еси́ и росо́ю боле́зней твои́х благочести́вых ду́ши ороси́л еси́, от пла́мене пре́лести изба́вив.

Огне́м, богоблаже́нне, боле́зней твои́х запале́ние и́дольское угаси́л еси́, кро́вными же пото́ки погрузи́л еси́ враги́ безпло́тныя, Феодо́те, вопия́: благослове́н еси́, Бо́же оте́ц на́ших.

Я́ко фимиа́м благово́нен, прине́слся еси́, му́дре, Подвигополо́жнику твоему́, Боже́ственною благода́тию злосмра́дную ле́сть низлага́я. Те́м пое́ши ра́достно: благослове́н еси́, Бо́же оте́ц на́ших.

Соблю́д твоя́ словеса́ Фо́рт святы́й, богоно́сному Фо́ртону отдаде́ тя́, хра́му на воздви́жение че́стну, на очище́ние все́х благочести́вых, в снабде́ние душа́м, му́чениче Феодо́те.

Непоколеби́мь сто́лп, забра́ло непрекло́нно, непобеди́мая стена́, степе́нь ве́ры, да́ние Боже́ственное, благоче́стия побо́рник, пре́лести губи́тель показа́лся еси́, страстоно́сче.

Правле́нием Боже́ственныя благода́ти, прему́дре, му́к преше́л еси́ вели́кую пучи́ну и ти́хая, ра́дуяся, дости́гл еси́, сла́вне, приста́нища го́рняго Ца́рствия.

Ше́ствия и стези́ твоя́ напра́вишася ко Христу́, все́х Бо́гу и Го́споду, Ему́же в ру́це ду́х тво́й пре́дал еси́, му́чениче страстоно́сче, Феодо́те треблаже́нне.

Да сла́вы улучи́ши о́ныя, страстоте́рпче, ви́димую, ра́дуяся, преоби́дел еси́ и, Боже́ственным ма́нием к ра́нам отлучи́вся, не ужа́слся еси́ мучи́тельных ви́д и сме́рти го́рькия. Те́мже с му́ченики венча́лся еси́, подви́гся.

Яви́лся еси́ хра́м, му́чениче, чи́ст Тро́ицы зда́нием дея́ний, Феодо́те пребога́те, Боже́ственных, страда́ний же све́тлых сия́нием укра́шен. Те́мже хра́мы де́монския истука́нныя, му́дре, Боже́ственною Уте́шителя си́лою я́ве низве́ргл еси́.

Иска́пающая гора́ Боже́ственную сла́дость яви́лся еси́, исто́чник чуде́с, пучи́на же, сла́вне, Боже́ственных дарова́ний, струя́ светла́ Свята́го Ду́ха, ду́ши напоя́я, и потопля́я стра́сти, и все́м хода́тайствуя, му́чениче, благоче́стно пою́щим тя́, ра́дование.

Бг҃осїѧ́ннꙋю тѧ̀ ѕвѣздꙋ̀ мы́сленное показа́въ сл҃нце, на высотѣ̀ своеѧ̀ цр҃кве, всю̀ зе́млю блиста́ньми, бл҃же́нне, твои́хъ страда́нїй ᲂу҆ѧснѝ.

Ѿ ю҆́на во́зраста возложе́нъ бы́въ бг҃ꙋ, ѳеодо́те, бг҃ода́нными добродѣ́тельми дꙋ́шꙋ просвѣти́лъ є҆сѝ ꙗ҆́вѣ, и҆ мі́ръ чⷭ҇тны́ми страда̑нїи ᲂу҆краси́лъ є҆сѝ.

Сла́вный мꙋ́ченикъ смотрѧ́ѧ льсти́вагѡ мрє́жи простє́рты на землѝ, всю́дꙋ прохожда́ше, дꙋ́шы ᲂу҆че́ньми бл҃гочести́выхъ ᲂу҆твержда́ѧ благода́тїю.

Вы́нꙋ взира́ѧ къ бг҃ꙋ ѻ҆чесы̀ ᲂу҆́мными, приснопа́мѧтне мꙋ́чениче, не чꙋ́лъ є҆сѝ ра́нъ тѣлесѝ приближа́ющихсѧ, и҆ мꙋ́ками всю́дꙋ ѡ҆держи́мь.

Ника́коже, мꙋ́чениче, прилѡ́ги болѣ́зненными поколеба́лсѧ є҆сѝ, ни ласка̑нїи беззако́нныхъ, на ка́мени тве́рдыѧ вѣ́ры хрⷭ҇то́вы водрꙋже́нъ, сла́вне ѳеодо́те.

Сокрꙋша́ѧ тѣ́ло мно́гими ра́нами гони́тель, не возмо́же ѿню́дъ твоеѧ̀ крѣ́пости дꙋше́вныѧ разсла́бити, бж҃е́ственною любо́вїю сп҃са, бл҃же́нне, ᲂу҆твержда́емь.

Мꙋ́дростїю слове́съ твои́хъ, и҆ дѣ́лъ бл҃года́тїю, тмы̀ предста́телѧ ꙗ҆́вѣ посрами́лъ є҆сѝ, ѳеодо́те, и҆ побѣ́дꙋ взѧ́лъ є҆сѝ на него̀, сла́внѡ подви́гсѧ.

Ѻ҆гне́мъ страда́нїй твои́хъ ꙗ҆́вѣ запали́лъ є҆сѝ многобо́жнꙋю ле́сть: и҆ ꙗ҆́кѡ свѣща̀ дх҃омъ ст҃ы́мъ, мꙋ́чениче, вже́гсѧ та́йнѡ, подсо́лнечнꙋю просвѣти́лъ є҆сѝ.

Крѣ́пкѡ, сла́вне, въ ре́бра стрꙋ́жемь, и҆ ѕѣ́льными болѣ́зньми ꙗ҆́кѡ вои́стиннꙋ всю́дꙋ ѡ҆крꙋже́нъ, непоколе́блемь ᲂу҆мо́мъ позна́лсѧ є҆сѝ, вѣ́ры ра́ди, приснопа́мѧтне.

Терпѣ́нїемъ твои́мъ, мꙋ́чениче мꙋ́дре, беззако́ннꙋющихъ стремлє́нїѧ, и҆ мꙋ́къ ѡ҆ѕлоблє́нїѧ, и҆ ѡ҆палє́нїѧ ꙗ҆́вѣ терпѣ́лъ є҆сѝ, бжⷭ҇твеннымъ посо́бїемъ ѡ҆гражде́нъ.

Проповѣ́дꙋѧ сло́во благочести́вое, пꙋ̑тнаѧ шє́ствїѧ дале́че, мч҃ниче бг҃омꙋ́дре, ше́ствовалъ є҆сѝ, и҆ заблꙋждє́нныѧ къ свѣ́тꙋ ѡ҆брати́лъ є҆сѝ, тмо́ю води̑мыѧ сꙋ́етства.

Воздви́женъ бы́въ ꙗ҆́коже а҆́гнецъ, мꙋ́чениче, на дре́во, желѣ́зныхъ ногте́й терпи́ши терза̑нїѧ, ꙗ҆́коже безпло́тенъ, бл҃же́нне, ᲂу҆мерщвле́нїѧ дебельство̀ совлача́ѧ.

Пома́залъ є҆сѝ словесы̀ твои́ми свѧще́нными, чи̑стыѧ къ подвигѡ́мъ жєны̀, и҆ низло́жше, мꙋ́чениче, врага̀ мꙋ́жескими борє́нїи, нетлѣ́нїѧ вѣнцы̀ и҆сплето́ша.

Крѣ́постїю дх҃а дꙋ́шꙋ ѡ҆гради́въ, лꙋка́вствїѧ дꙋ́хи терпѣ́нїемъ ра́нъ низложи́лъ є҆сѝ, и҆ побѣ́ды вѣне́цъ ѿ бг҃а прїѧ́лъ є҆сѝ, досточꙋ́дне.

Ка́плѧми крове́й твои́хъ, і҆́дѡльскїй пла́мень, мꙋ́чениче хрⷭ҇то́въ погаси́лъ є҆сѝ, и҆ росо́ю болѣ́зней твои́хъ, бл҃гочести́выхъ дꙋ́шы ѡ҆роси́лъ є҆сѝ, ѿ пла́мене пре́лести и҆зба́вивъ.

Ѻ҆гне́мъ, бг҃облаже́нне, болѣ́зней твои́хъ запале́нїе і҆́дѡльское ᲂу҆гаси́лъ є҆сѝ: кро́вными же потѡ́ки погрꙋзи́лъ є҆сѝ врагѝ безплѡ́тныѧ, ѳеодо́те, вопїѧ̀: бл҃гослове́нъ є҆сѝ, бж҃е ѻ҆тє́цъ на́шихъ.

Ꙗ҆́кѡ ѳѷмїа́мъ бл҃гово́ненъ прине́слсѧ є҆сѝ, мꙋ́дре, подвигополо́жникꙋ твоемꙋ̀, бж҃е́ственною благода́тїю, ѕлосмра́днꙋю ле́сть низлага́ѧ. тѣ́мъ пое́ши ра́достнѡ: благослове́нъ є҆сѝ, бж҃е ѻ҆тє́цъ на́шихъ.

Соблю́дъ твоѧ̑ словеса̀ фо́ртъ свѧты́й, бг҃оно́сномꙋ фо́ртонꙋ ѿдаде́ тѧ, хра́мꙋ на воздви́женїе чⷭ҇тнꙋ, на ѡ҆чище́нїе всѣ́хъ благочести́выхъ, въ снабдѣ́нїе дꙋша́мъ, мꙋ́чениче ѳеодо́те.

Непоколеби́мь сто́лпъ, забра́ло непрекло́нно, непобѣди́маѧ стѣна̀, степе́нь вѣ́ры, да́нїе бж҃е́ственное, благоче́стїѧ побо́рникъ, пре́лести гꙋби́тель показа́лсѧ є҆сѝ, страстоно́сче.

Правле́нїемъ бж҃е́ственныѧ бл҃года́ти, премꙋ́дре, мꙋ́къ преше́лъ є҆сѝ вели́кꙋю пꙋчи́нꙋ, и҆ ти̑хаѧ ра́дꙋѧсѧ дости́глъ є҆сѝ, сла́вне, приста̑нища го́рнѧгѡ црⷭ҇твїѧ.

Шє́ствїѧ и҆ стєзѝ твоѧ̑ напра́вишасѧ ко хрⷭ҇тꙋ̀ всѣ́хъ бг҃ꙋ и҆ гдⷭ҇ꙋ: є҆мꙋ́же въ рꙋ́цѣ дх҃ъ тво́й пре́далъ є҆сѝ, мꙋ́чениче страстоно́сче ѳеодо́те треблаже́нне.

Да сла́вы ᲂу҆лꙋчи́ши ѻ҆́ныѧ, стрⷭ҇тоте́рпче, ви́димꙋю ра́дꙋѧсѧ преѡби́дѣлъ є҆сѝ, и҆ бж҃е́ственнымъ ма́нїемъ къ ра́намъ ѿлꙋчи́всѧ, не ᲂу҆жа́слсѧ є҆сѝ мꙋчи́тельныхъ ви̑дъ, и҆ сме́рти го́рькїѧ. тѣ́мже съ мꙋ́чєники вѣнча́лсѧ є҆сѝ подви́гсѧ.

Ꙗ҆ви́лсѧ є҆сѝ хра́мъ, мꙋ́чениче, чи́стъ трⷪ҇цы, зда́нїемъ дѣѧ̑нїй, ѳеодо́те пребога́те, бжⷭ҇твенныхъ, страда́нїй же свѣ́тлыхъ сїѧ́нїемъ ᲂу҆кра́шенъ. тѣ́мже хра́мы дє́мѡнскїѧ и҆стꙋка̑нныѧ, мꙋ́дре, бж҃е́ственною ᲂу҆тѣ́шителѧ си́лою, ꙗ҆́вѣ низве́рглъ є҆сѝ.

И҆ска́пающаѧ гора̀ бж҃е́ственнꙋю сла́дость, ꙗ҆ви́лсѧ є҆сѝ и҆сто́чникъ чꙋде́съ, пꙋчи́на же, сла́вне, бжⷭ҇твенныхъ дарова́нїй, стрꙋѧ̀ свѣтла̀ ст҃а́гѡ дх҃а, дꙋ́шы напоѧ́ѧ, и҆ потоплѧ́ѧ стра̑сти, и҆ всѣ̑мъ хода́тайствꙋѧ, мꙋ́чениче, бл҃гоче́стнѡ пою́щымъ тѧ̀ ра́дованїе.