Православный календарь
Размер шрифта:

Ака́ѳістъ

А҆ка́ѳїстъ ст҃и́телємъ ѳео́дѡрꙋ и҆ і҆ѡа́ннꙋ, є҆пⷭ҇кѡпѡмъ сꙋ́ждальскимъ, чꙋдотво́рцємъ

Свт. Феодора, еп. Суздальского и Ростовского (1023) 21 июня 2026

Конда́къ а҃

И҆збра́ннїи ᲂу҆го́дницы гдⷭ҇ни и҆ па́стырїе предо́брїи цр҃кве хрⷭ҇то́вы, гра́да сꙋ́ждалѧ застꙋ́пницы и҆ те́плїи ѡ҆ дꙋша́хъ на́шихъ мл҃твенницы ѳео́дѡре и҆ і҆ѡа́нне, ѻ҆ц҃ы̀ бг҃оно́снїи, пѣ́нїе похва́льное ва́мъ ѿ ᲂу҆се́рдїѧ приносѧ́ще, мо́лимъ вы̀ и҆ про́симъ: ꙗ҆́кѡ и҆мꙋ́щїи дерзнове́нїе ко прест҃ѣ́й трⷪ҇цѣ, предста́тельствомъ ва́шимъ ѿ всѧ́кихъ бѣ́дъ на́съ свободи́те, и҆ наслѣ́дники црⷭ҇твїѧ нбⷭ҇нагѡ на́съ содѣ́лайте, да благода́рственнѡ ва́мъ вопїе́мъ:

Ра́дꙋйтесѧ, ст҃и́телїе ѳео́дѡре и҆ і҆ѡа́нне, преди́внїи чꙋдотво́рцы.

І҆́косъ а҃

А҆́гг҃лѡвъ подража́тели и҆ человѣ́кѡвъ наста́вницы ст҃и́телїе бжⷭ҇твеннїи, вы̀, ꙗ҆́кѡ а҆́гг҃ли бл҃гі́и храни́тели, ѻ҆те́чество ва́ше земно́е свы́ше ѻ҆те́чески назира́ете, бг҃опрїѧ́тными мл҃твами ва́шими, всѧ̑ бл҃га̑ѧ и҆ дꙋшеполє́знаѧ на́мъ ᲂу҆ гдⷭ҇а хода́тайствꙋете, нетлѣ́нїемъ моще́й ва́шихъ и҆ чꙋдесы̀ пресла́вными ᲂу҆вѣрѧ́юще на́съ, ꙗ҆́кѡ и҆ по сме́рти жи́вы сꙋ́ще, всѧ̑ мо́жете ѡ҆ ᲂу҆крѣплѧ́ющемъ ва́съ хрⷭ҇тѣ̀. тѣ́мже и҆ зове́мъ къ ва́мъ съ любо́вїю те́плою:

Ра́дꙋйтесѧ, правосла́вїѧ насади́тели: ра́дꙋйтесѧ, бл҃гоче́стїѧ подви́жницы.

Ра́дꙋйтесѧ, а҆пⷭ҇лѡвъ досто́йнїи прее́мницы: ра́дꙋйтесѧ, є҆ѵⷢ҇лїа хрⷭ҇то́ва неꙋтоми́мїи благовѣ́стницы.

Ра́дꙋйтесѧ, первопа́стырїе ст҃ы́ѧ сꙋ́ждальскїѧ цр҃кве: ра́дꙋйтесѧ, столпѝ непоколеби́мїи непоро́чныѧ вѣ́ры.

Ра́дꙋйтесѧ, вдѡ́въ и҆ сирѡ́тъ пита́телїе и҆ застꙋ́пницы: ра́дꙋйтесѧ, безпомо́щныхъ ско́рїи помо́щницы.

Ра́дꙋйтесѧ, болѧ́щихъ вра́чеве бл҃года́тнїи: ра́дꙋйтесѧ, ѡ҆ лю́бѧщихъ и҆ чтꙋ́щихъ ва́съ предста́телїе.

Ра́дꙋйтесѧ, свѣти́льницы бг҃освѣ́тлїи, дꙋ́шы на́шѧ ѡ҆зарѧ́ющїи: ра́дꙋйтесѧ, ѻ҆ц҃ы̀ преми́лостивїи, да́ры сп҃си́тельныѧ ѡ҆би́льнѡ на́мъ низпосыла́ющїи.

Ра́дꙋйтесѧ, ст҃и́телїе ѳео́дѡре и҆ і҆ѡа́нне, преди́внїи чꙋдотво́рцы.

Конда́къ в҃

Ви́дѧ гдⷭ҇ь па́гꙋбꙋ дꙋ́шъ человѣ́ческихъ, і҆дѡлослꙋже́нїемъ ꙗ҆зы́ческимъ ѡ҆мраче́нныхъ, по неизрече́нномꙋ человѣколю́бїю своемꙋ̀, восхотѣ̀ призва́ти ѧ҆̀ къ свѣ́тꙋ и҆́стинныѧ вѣ́ры, и҆ тебѣ̀, ѻ҆́ч҃е ѳео́дѡре, и҆збра́въ въ сїѐ вели́кое слꙋже́нїе, да бл҃говѣсти́ши лю́демъ сꙋ̑ждальскимъ є҆ѵⷢ҇лїе хрⷭ҇то́во, и҆ бꙋ́деши па́стырь до́брый новопросвѣщє́ннымъ и҆ словє́снымъ ѻ҆вца́мъ, сло́вомъ и҆ примѣ́ромъ наставлѧ́ѧ и҆́хъ бг҃оꙋго́днѡ пѣ́ти всѣ́хъ творцꙋ̀: А҆ллилꙋ́їа.

І҆́косъ в҃

Ра́зꙋмъ бл҃года́тный вои́стиннꙋ ꙗ҆влѧ́ете ѻ҆ц҃ы̀ бг҃оно́снїи, дѣ́лы и҆ словесы̀ ва́шими, всѐ бо житїѐ ва́ше земно́е бы́сть и҆спо́лнено всѧ́кихъ добродѣ́телей. тѣ́мже и҆ хрⷭ҇то́съ, ви́дѧ ва̑ша дѡ́браѧ дѣла̀, чꙋдесы̀ пресла́вными ѡ҆богатѝ ва́съ при жи́зни и҆ по сме́рти, и҆ сподо́би вѣ́чнагѡ предстоѧ́нїѧ ᲂу҆ прⷭ҇то́ла своегѡ̀ бжⷭ҇твеннагѡ, и҆дѣ́же созерца́юще вели́чество сла́вы є҆гѡ̀, и҆ наслажда́ющесѧ бл҃же́нства ра́йскаго, помѧни́те ны̀ чтꙋ́щыѧ ва́съ зва̑нїи си́ми:

Ра́дꙋйтесѧ, нищетꙋ̀ дх҃о́внꙋю возлюби́вшїи: ра́дꙋйтесѧ, непоро́чное се́рдце стѧжа́вшїи.

Ра́дꙋйтесѧ, ми́лости и҆ сострада́нїѧ преиспо́лненнїи: ра́дꙋйтесѧ, сотвори́вшїи и҆ наꙋчи́вшїи, и҆ ве́лїи нарече́ннїи во црⷭ҇твїи нбⷭ҇нѣмъ.

Ра́дꙋйтесѧ, дх҃а ст҃а́гѡ сосꙋ́ди и҆збра́ннїи: ра́дꙋйтесѧ, дрꙋ́зи хрⷭ҇то́ви возлю́бленнїи.

Ра́дꙋйтесѧ, терпѣ́нїѧ и҆ кро́тости ѡ҆́бразы преизѧ́щнїи: ра́дꙋйтесѧ, ст҃и́телємъ похвало̀ и҆ и҆́нокѡмъ наста́вницы.

Ра́дꙋйтесѧ, хрⷭ҇тоимени́тымъ лю́демъ ко сп҃се́нїю рꙋководи́телїе: ра́дꙋйтесѧ, ско́рїи ѡ҆ дꙋша́хъ на́шихъ предста́телїе.

Ра́дꙋйтесѧ, безме́зднїи тѣле́съ на́шихъ цѣле́бницы.

Ра́дꙋйтесѧ, ст҃и́телїе ѳео́дѡре и҆ і҆ѡа́нне, преди́внїи чꙋдотво́рцы.

Конда́къ г҃

Си́ла бж҃їѧ ѡ҆сѣнѝ тѧ̀, ст҃и́телю ѻ҆́ч҃е на́шъ і҆ѡа́нне, є҆гда̀ напра́сное и҆згна́нїе ѿ престо́ла твоегѡ̀ ст҃и́тельскагѡ неѕло́бивѡ претерпѣ́лъ є҆сѝ, подража́ѧ а҆́гнцꙋ бж҃їю, взе́мшемꙋ грѣхѝ мі́ра и҆ ѿ і҆ꙋдє́й пострада́вшемꙋ да́же до сме́рти на крⷭ҇тѣ̀, є҆гѡ́же крⷭ҇тъ и҆ страда̑нїѧ помина́ѧ, ни во что́же вмѣни́лъ є҆сѝ порꙋга̑нїѧ и҆ и҆згна́нїе, зовы́й скорбьмѝ и҆спытова́ющемꙋ тѧ̀ подвигополо́жникꙋ і҆и҃сꙋ: А҆ллилꙋ́їа.

І҆́косъ г҃

И҆мѣ́ѧ ва́съ ст҃и́телїе хрⷭ҇то́ви, свѣти́льники чꙋдесы̀ при́снѡ сїѧ́ющыѧ, цр҃ковь сꙋ́ждальскаѧ свѣ́тлѡ ѡ҆ ва́съ красꙋ́етсѧ, ꙗ҆́кѡ невѣ́ста преꙋкраше́ннаѧ ва́шихъ по́двигѡвъ красото́ю, и҆ бл҃годарѧ́ще цр҃кве зижди́телѧ, ва́мъ, є҆гѡ̀ и҆збра́ннымъ ᲂу҆го́дникѡмъ, сїѧ̑ пѣ́снєнныѧ да́ры прино́ситъ, глаго́люще:

Ра́дꙋйтесѧ, і҆ера́рси бг҃омꙋ́дрїи, тмꙋ̀ ꙗ҆зы́ческꙋю разгна́вшїи: ра́дꙋйтесѧ, а҆рхїпа́стырїе ре́вностнїи, ко хрⷭ҇тꙋ̀ приве́дшїи мнѡ́гїѧ дꙋ́шы человѣ́чєскїѧ.

Ра́дꙋйтесѧ, ꙗ҆́кѡ мзда̀ ва́ша мно́га на нб҃сѣ́хъ є҆́сть: ра́дꙋйтесѧ, ꙗ҆́кѡ воспрїѧ́сте пѡ́чести вы́шнѧгѡ зва́нїѧ.

Ра́дꙋйтесѧ, наслѣ́дницы сла́вы невече́рнїѧ: ра́дꙋйтесѧ, соприча́стницы ра́дости нетлѣ́нныѧ всѣ́хъ ст҃ы́хъ.

Ра́дꙋйтесѧ, пи́щи ра́йскїѧ ѡ҆би́льнѡ наслажда́ющїисѧ въ селе́нїихъ пра́ведныхъ: ра́дꙋйтесѧ, ѡ҆брѣ́тшїи вѣ́чное всесвѣ́тлое мѣ́сто ᲂу҆покое́нїѧ.

Ра́дꙋйтесѧ, блгⷣтїю бж҃їею вѣ́дꙋщїи всѧ̑ на́шѧ скѡ́рби и҆ нꙋ̑жды: ра́дꙋйтесѧ, не ѡ҆ставлѧ́ющїи на́съ свое́ю любо́вїю и҆ ѻ҆те́ческимъ сострада́нїемъ.

Ра́дꙋйтесѧ, при́снѡ просѧ́щїи на́мъ ᲂу҆ гдⷭ҇а да́ры бл҃гости є҆гѡ̀: ра́дꙋйтесѧ, никогда́же забыва́ющїи на́съ въ мл҃твахъ ва́шихъ благопрїѧ́тныхъ ᲂу҆ прⷭ҇то́ла хрⷭ҇то́ва.

Ра́дꙋйтесѧ, ст҃и́телїе ѳео́дѡре и҆ і҆ѡа́нне, преди́внїи чꙋдотво́рцы.

Конда́къ є҃

Бг҃оте́чнѣй ѕвѣздѣ̀ подо́бенъ бы́лъ є҆сѝ, ст҃и́телю і҆ѡа́нне, сїѧ́нїемъ кро́тости твоеѧ̀, мра́къ ѕло́бы и҆ клеветы̀ разогна́вый. є҆гда̀ бо клеветницы̀ лꙋка́вїи на тѧ̀ возста́ша, и҆ на и҆згна́нїе поно́сное тѧ̀ ѡ҆сꙋди́ша, ты̀ мл҃твꙋ ᲂу҆се́рднꙋю ѡ҆ ни́хъ ко гдⷭ҇ꙋ прине́слъ є҆сѝ, и҆ ста́въ пред̾ всѣ́ми людьмѝ сꙋ́ждальскими рꙋ́цѣ твоѝ прпⷣбныѧ горѣ̀ воздви́глъ є҆сѝ: и҆ а҆́бїе клеветницы̀ твоѝ слѣпото́ю ѡ҆б̾ѧ́ти бы́ша, и҆ винꙋ̀ свою̀ пред̾ всѣ́ми и҆сповѣ́даша, лю́дїе же всѝ, заблꙋжде́нїе своѐ позна́вше, проще́нїѧ ᲂу҆ тебє̀ проси́ша и҆ на престо́лъ ст҃и́тельскїй съ че́стїю тѧ̀ возврати́ша. ты́ же и҆ врагѡ́въ твои́хъ ѡ҆слѣ́пшихъ поми́ловалъ є҆сѝ, и҆ и҆сцѣле́нїе и҆́мъ пода́лъ є҆сѝ, зовꙋ́щымъ въ покаѧ́нїи глꙋбо́цѣмъ: А҆ллилꙋ́їа.

І҆́косъ є҃

Ви́димъ вы̀, ст҃и́телїе хрⷭ҇то́ви, ѻ҆ча́ми вѣ́ры ᲂу҆ прⷭ҇то́ла бж҃їѧ предстоѧ́щыѧ и҆ за на́съ грѣ́шныхъ молѧ́щыѧсѧ, и҆ ва́шимъ застꙋпле́нїемъ ѡ҆брѣта́юще въ ско́рбехъ ᲂу҆тѣше́нїе, въ недꙋ́зѣхъ и҆сцѣле́нїе, въ бѣда́хъ ско́рое вспоможе́нїе, велича́емъ возвели́чившаго ва́съ цр҃ѧ̀ сла́вы хрⷭ҇та̀, ва́мъ же, тє́плымъ предста́телемъ на́шымъ, ѿ любвѐ серде́чныѧ вопїе́мъ:

Ра́дꙋйтесѧ, а҆́гг҃лѡвъ сожи́телїе: ра́дꙋйтесѧ, ст҃ы́хъ всѣ́хъ при́снїи дрꙋ́зи.

Ра́дꙋйтесѧ, бж҃їѧ блгⷣти таи́нницы: ра́дꙋйтесѧ, во благоꙋха́нїи ст҃ы́ни почива́ющїи.

Ра́дꙋйтесѧ, всѧ̑ блага̑ѧ прошє́нїѧ на̑ша и҆сполнѧ́ющїи: ра́дꙋйтесѧ, ско́рїи ᲂу҆тѣ́шители ско́рбныхъ серде́цъ.

Ра́дꙋйтесѧ, скоропослꙋ́шливїи предста́тели сꙋ́щихъ въ бѣда́хъ: ра́дꙋйтесѧ, ста́рыхъ въ и҆знеможе́нїи ᲂу҆крѣпле́нїе.

Ра́дꙋйтесѧ, ю҆́ныхъ къ бл҃гоче́стїю ᲂу҆твержде́нїе: ра́дꙋйтесѧ, младе́нцєвъ ми́лостивїи наказа́телїе.

Ра́дꙋйтесѧ, грѣ́шныхъ къ покаѧ́нїю наста́вницы.

Ра́дꙋйтесѧ, ст҃и́телїе ѳео́дѡре и҆ і҆ѡа́нне, преди́внїи чꙋдотво́рцы.

Конда́къ ѕ҃

Проповѣ́дника бг҃опросвѣще́нна и҆ а҆пⷭ҇лѡмъ хрⷭ҇тѡ́вымъ є҆динонра́вна, вѣ́мы тѧ̀ ст҃и́телю ѳео́дѡре: бл҃года́ть бо гдⷭ҇нѧ и҆злїѧ́сѧ во ᲂу҆стѣ́хъ твои́хъ, прпⷣбне, и҆ да́ръ бж҃їй сп҃си́тельный, по и҆́мени твоемꙋ̀, вои́стиннꙋ бы́лъ є҆сѝ лю́демъ сꙋ̑ждальскимъ, сло́вомъ и҆ примѣ́ромъ равноа́гг҃льскагѡ житїѧ̀ твоегѡ̀ приводѧ̀ и҆́хъ къ позна́нїю хрⷭ҇то́вꙋ, и҆ поꙋча́ѧ се́рдцемъ и҆ ᲂу҆сты̀ воспѣва́ти сп҃си́телю мі́ра: А҆ллилꙋ́їа.

І҆́косъ ѕ҃

Возсїѧ́сте ѻ҆ц҃ы̀ всебл҃же́ннїи, въ странѣ̀ сꙋ́ждальстѣй, свѣ́томъ добродѣ́тельнагѡ житїѧ̀ ва́шегѡ, ꙗ҆́кѡ свѣти̑ла бг҃освѣ̑тлаѧ, и҆ просвѣти́сте но́щь глꙋбо́кꙋю і҆дѡлослꙋже́нїѧ, лꙋча́ми позна́нїѧ хрⷭ҇то́ва: но и҆ ны́нѣ, а҆́ще врата́ми сме́рти и҆ во гро́бы снидо́сте, не престае́те ѡ҆зарѧ́ти на́шѧ тє́мныѧ дꙋ́шы бл҃года́тными лꙋча́ми, да ва́съ немо́лчнѡ ᲂу҆бл҃жа́емъ бл҃гохвалє́нїи сицевы́ми:

Ра́дꙋйтесѧ, ми́лость и҆ сострада́нїе ко всѣ̑мъ ꙗ҆влѧ́ющїи: ра́дꙋйтесѧ, тѧ̑жкїѧ грѣ́шники ѿ ро́ва поги́бельнагѡ и҆схища́ющїи.

Ра́дꙋйтесѧ, па́стырїе до́брїи, при́снѡ гото́вїи сп҃са́ти ѿ бѣ́дъ слове́снꙋю ва́шꙋ па́ствꙋ: ра́дꙋйтесѧ, во́лкꙋ дꙋшегꙋби́тельномꙋ не попꙋска́ющїи расхи́тити бг҃омъ врꙋче́нное ва́мъ ста́до.

Ра́дꙋйтесѧ, ѕвѣзды̑ непреле́стнїи, пꙋ́ть ко сп҃се́нїю на́мъ вѣ́рнѡ ᲂу҆казꙋ́ющїи въ жите́йстѣмъ пла́ванїи: ра́дꙋйтесѧ, ѡ҆́блацы росоно́снїи, зно́й страсте́й на́шихъ прогонѧ́ющїи: ра́дꙋйтесѧ, ѳѷмїа́мъ мл҃твъ за на́съ бг҃ꙋ приносѧ́щїи.

Ра́дꙋйтесѧ, сла́дкою воне́ю бл҃гоꙋха́нїѧ хрⷭ҇то́ва, сердца̀ на̑ша ᲂу҆слажда́ющїи: ра́дꙋйтесѧ, вѣнца́ми рꙋко́ю вседержи́телѧ ᲂу҆краше́ннїи.

Ра́дꙋйтесѧ, на нб҃сѝ прⷭ҇то́лꙋ влⷣчню покланѧ́ющїисѧ: ра́дꙋйтесѧ, собесѣ́дницы пресвѣ́тлыхъ го́рнихъ си́лъ.

Ра́дꙋйтесѧ, застꙋ́пницы ᲂу҆се́рднїи земноро́дныхъ.

Ра́дꙋйтесѧ, ст҃и́телїе ѳео́дѡре и҆ і҆ѡа́нне, преди́внїи чꙋдотво́рцы.

Конда́къ з҃

Хотѧ̀ гдⷭ҇ь ꙗ҆ви́ти житїѐ твоѐ а҆гг҃лоподо́бное, ѻ҆́ч҃е і҆ѡа́нне, бл҃говолѝ посла́ти сослꙋже́бника тебѣ̀ во вре́мѧ соверше́нїѧ бжⷭ҇твенныѧ лїтꙋргі́и, а҆́гг҃ла ст҃а́гѡ, є҆го́же ви́дѣти сподо́бивсѧ бл҃говѣ́рный кнѧ́зь сꙋ́ждальский бори́съ, позна̀ тѧ̀ и҆збра́нника бж҃їѧ и҆ вели́каго і҆ера́рха хрⷭ҇то́ва, досто́йнаго є҆щѐ во пло́ти сослꙋже́нїѧ а҆́гг҃льскагѡ, и҆ ѡ҆ се́мъ бл҃года́рственнѡ возгласѝ а҆́гг҃лѡвъ и҆ человѣ́кѡвъ созда́телю: А҆ллилꙋ́їа.

І҆́косъ з҃

Новопросвѣще́ннїи лю́ди сꙋ́ждальстїи ва́съ ѡ҆брѣто́ша ст҃и́телїе бж҃їи, пѣ́стꙋны и҆скꙋ̑сныѧ и҆ попечи́тели ре́внѡстныѧ, на сп҃се́нїѧ стезю̀ и҆́хъ наставлѧ́ющыѧ, и҆ всѧ́кꙋ тьмꙋ̀ нече́стїѧ сїѧ́нїемъ ᲂу҆че́нїй ва́шихъ разгонѧ́ющыѧ. тѣ́мже ꙗ҆́кѡ проповѣ́дникѡвъ бл҃гослове́нныхъ, мы̀ ча̑да сꙋ́ще ѻ҆́ныхъ, и҆́хже вы̀ ᲂу҆че́ньми свои́ми ко хрⷭ҇тꙋ̀ приведо́сте, ва́ши трꙋды̀ и҆ по́двиги ᲂу҆се́рднѡ помина́емъ, и҆ зове́мъ:

Ра́дꙋйтесѧ, трⷪ҇цы живонача́льныѧ сщ҃еннотаи́нницы честні́и: ра́дꙋйтесѧ, та́инствъ бжⷭ҇твенныхъ соверши́тели непоро́чнїи.

Ра́дꙋйтесѧ, немꙋ́дрыхъ наказа́телїе бл҃гоискꙋ́снїи: ра́дꙋйтесѧ, ꙗ҆зы́ческагѡ нече́стїѧ крѣ́пцыи и҆скорени́тели.

Ра́дꙋйтесѧ, сѣ́ѧтели бл҃гоче́стїѧ хрⷭ҇тїа́нскагѡ предо́брїи: ра́дꙋйтесѧ, ни́вы гдⷭ҇ней дѣ́лателїе трꙋдолюби́вїи.

Ра́дꙋйтесѧ, вѣ́рнїи рабѝ нбⷭ҇нагѡ домовлады́ки: ра́дꙋйтесѧ, ᲂу҆чи́телѧ хрⷭ҇та̀ ᲂу҆ченицы̀ добропослꙋ́шливїи.

Ра́дꙋйтесѧ, смире́нїѧ є҆гѡ̀ нелицемѣ́рнїи подража́тєли: ра́дꙋйтесѧ, кро́тости є҆гѡ̀ вѣ́рнїи послѣ́дователи.

Ра́дꙋйтесѧ, любо́вїю є҆гѡ̀ преиспо́лненнїи: ра́дꙋйтесѧ, милосе́рдїе є҆гѡ̀ себѣ̀ стѧжа́вшїи.

Ра́дꙋйтесѧ, ст҃и́телїе ѳео́дѡре и҆ і҆ѡа́нне, преди́внїи чꙋдотво́рцы.

Конда́къ и҃

Стра́нникъ и҆ пришле́цъ въ землѝ сꙋ́ждальстѣй бы́лъ є҆сѝ, ст҃и́телю ѻ҆́ч҃е ѳео́дѡре, вы́шнѧгѡ гра́да і҆ерⷭ҇ли́ма нбⷭ҇нагѡ взыскꙋ́ѧ ѕлострада̑нїи мно́гими, и҆ сїѧ̑ мꙋ́жески претерпѣва́ѧ любвѐ ра́ди хрⷭ҇то́вы, ѻ҆́во ѿ потемне́нныхъ ѕло́бою і҆дѡлослꙋжи́телей, ѻ҆́во же ѿ и҆ско́ннагѡ врага̀ сп҃се́нїѧ человѣ́ческагѡ, є҆гѡ́же всю̀ си́лꙋ терпе́нїемъ крѣ́пкимъ и҆ мл҃твами непреста́нными до конца̀ побѣди́лъ є҆сѝ, и҆ ны́нѣ со а҆́гг҃лы и҆ мч҃ники пѣ́снь побѣ́днꙋю пое́ши подвигополо́жникꙋ хрⷭ҇тꙋ̀: А҆ллилꙋ́їа.

І҆́косъ и҃

Всѣ̑мъ къ ва́мъ мл҃твеннѡ прибѣга́ющымъ, чꙋдотво́рцы ст҃і́и, любо́вь и҆ бл҃госе́рдїе ва́ше ѡ҆би́льнѡ ꙗ҆влѧ́ете, и҆ мно́гажды са̑маѧ прошє́нїѧ на̑ша и҆сполне́нїемъ предварѧ́ете: и҆́бо даде́сѧ ва́мъ ве́лїѧ блгⷣть ѿ гдⷭ҇а, болѣ̑зни и҆сцѣлѧ́ти, дꙋ́хи нечи́стыѧ и҆згонѧ́ти, разсла́бленныѧ возставлѧ́ти, ꙗ҆́кѡ вои́стиннꙋ прее́мникѡмъ а҆пⷭ҇льскимъ и҆ вѣ̑рнымъ после́дователємъ є҆ѵⷢ҇лїа хрⷭ҇то́ва, є҆гѡ́же ѡ҆бѣтова̑нїѧ нелѡ́жнаѧ тꙋ́не подае́те всѣ̑мъ тре́бꙋющымъ да́ры цѣлє́бныѧ, и҆ за сїѐ слы́шите пѣ́нїе таково́е:

Ра́дꙋйтесѧ, ма̑слины бл҃гоплѡ́дныѧ, є҆ле́й млⷭ҇ти бж҃їѧ на́мъ и҆сточа́ющїи: ра́дꙋйтесѧ, ке́дри бл҃госѣнноли́ственнїи, въ зно́й страсте́й на́съ покрыва́ющїи.

Ра́дꙋйтесѧ, крі́ни бл҃гово́ннїи нбⷭ҇нагѡ прозѧбе́нїѧ: ра́дꙋйтесѧ, чꙋ̑днаѧ древеса̀ раѧ̀ і҆и҃сова.

Ра́дꙋйтесѧ, пло́дъ стори́чный прине́сшїи на па́жити ст҃ы́ѧ цр҃кви: ра́дꙋйтесѧ, вертогра́дъ цр҃кве ст҃ы́ѧ трꙋды̀ ва́шими бл҃говоздѣ́лавшїи.

Ра́дꙋйтесѧ, новосаждє́нїѧ сп҃си́тєльнаѧ въ не́мъ возрасти́вшїи: ра́дꙋйтесѧ, бг҃осло́вїѧ ѻ҆рга́ни и҆зрѧ́днїи.

Ра́дꙋйтесѧ, є҆ѵⷢ҇льскїѧ про́повѣди трꙋбы̑ доброгла̑сныѧ: ра́дꙋйтесѧ, и҆́стиннїи храни́телїе а҆пⷭ҇льскихъ преда́нїй.

Ра́дꙋйтесѧ, сꙋ́ждальскїѧ цр҃кве ᲂу҆краше́нїе неѿе́млемое.

Ра́дꙋйтесѧ, ст҃и́телїе ѳео́дѡре и҆ і҆ѡа́нне, преди́внїи чꙋдотво́рцы.

Конда́къ ѳ҃

Все́ю дꙋше́ю возлюби́въ и҆збра́нника бж҃їѧ є҆ѵѳѵ́мїа, ты̀ ѻ҆́ч҃е і҆ѡа́нне, бы́лъ є҆сѝ є҆мꙋ̀ помо́щникъ ᲂу҆се́рденъ въ ᲂу҆строе́нїи ѡ҆би́тели є҆гѡ̀ ст҃ы́ѧ, и҆ дрꙋ́гъ при́сный во всѧ̑ дни̑ живота̀ твоегѡ̀. тѣ́мже ны́нѣ, въ ѻ҆би́телехъ го́рнихъ вкꙋ́пѣ ѡ҆брѣ́тше вѣ́чное бл҃же́нное ᲂу҆покое́нїе, неразлꙋ́чнѡ въ бз҃ѣ пребыва́ете, и҆ пое́те ст҃ы́хъ ст҃ѣ́йшемꙋ сло́вꙋ: А҆ллилꙋ́їа.

І҆́косъ ѳ҃

Виті̑и многовѣща́ннїи и҆ доброгла́снїи не возмо́гꙋтъ вои́стиннꙋ и҆зрещѝ всѐ ѡ҆би́лїе чꙋде́съ ва́шихъ, ᲂу҆го́дницы бж҃їи, и҆́миже при жи́зни и҆ по сме́рти просла́вистесѧ ѿ гдⷭ҇а, и҆ просла́висте и҆́мѧ є҆гѡ̀ ст҃о́е въ странѣ̀ сꙋ́ждальстѣй, є҆ѧ́же просвѣти́тели и҆ храни́тели содѣ́ластесѧ бл҃говоле́нїемъ всѣ́хъ творца̀, подвиза́ющагѡ на́съ вопи́ти къ ва́мъ хвале́бнѡ:

Ра́дꙋйтесѧ, рꙋко́ю крѣ́пкою лю́ди сꙋ́ждальскїѧ ко сп҃се́нїю пꙋтеводи́вшїи: ра́дꙋйтесѧ, къ сп҃си́тельномꙋ позна́нїю хрⷭ҇то́вꙋ тѣ́хъ приве́дшїи.

Ра́дꙋйтесѧ, ꙗ҆́кѡ пе́тръ и҆ па́ѵелъ мре́жею про́повѣди є҆ѵⷢ҇льскїѧ дꙋ́шы человѣ́чєскїѧ ᲂу҆лови́вшїи: ра́дꙋйтесѧ, а҆пⷭ҇льски странꙋ̀ сꙋ́ждальскꙋю свѣ́томъ бг҃опозна́нїѧ просвѣти́вшїи.

Ра́дꙋйтесѧ, чꙋдесы̀ пресла́вными проповѣ́даннагѡ ва́ми ᲂу҆че́нїѧ и҆́стинꙋ засвидѣ́тельствовавшїи: ра́дꙋйтесѧ, всѧ́кое нече́стїе ꙗ҆зы́ческое и҆стреби́вшїи.

Ра́дꙋйтесѧ, правосла́вїѧ ст҃ы̑ѧ догма́ты незы́бленнѡ ᲂу҆тверди́вшїи: ра́дꙋйтесѧ, ꙗ҆́кѡ ва́шимъ предста́тельствомъ и҆ до ны́нѣ гра́дъ ва́шъ въ правосла́вїи нерꙋши́мѡ пребыва́етъ.

Ра́дꙋйтесѧ, ѻ҆рлѝ небе́снїи, крила́ми мл҃твъ ва́шихъ ѿ бѣ́дъ на́съ покрыва́ющїи: ра́дꙋйтесѧ, теплото́ю любвѐ ва́шеѧ на́съ согрѣва́ющїи.

Ра́дꙋйтесѧ, пи́щею нетлѣ́нною сло́ва бж҃їѧ на́съ напита́вшїи.

Ра́дꙋйтесѧ, ст҃и́телїе ѳео́дѡре и҆ і҆ѡа́нне, преди́внїи чꙋдотво́рцы.

Конда́къ і҃

Сп҃си́тельнагѡ ᲂу҆че́нїѧ хрⷭ҇то́ва великопроповѣ́дникъ и҆ чꙋдотво́рецъ показа́лсѧ є҆сѝ, ст҃и́телю ѳео́дѡре, и҆ ст҃ѡ пожи́лъ є҆сѝ на землѝ въ по́двизѣхъ и҆ трꙋдѣ́хъ непреста́нныхъ, возраща́ѧ посѣ̑ѧннаѧ тобо́ю въ странѣ̀ сꙋ́ждальстѣй сѣ́мена бл҃гоче́стїѧ хрⷭ҇тїа́нскагѡ, во є҆́же принестѝ и҆̀мъ пло́дъ стори́чный твои̑мъ бл҃гопопече́нїемъ. и҆ та́кѡ соверши́въ по́двигъ свы́ше тебѣ̀ назна́ченный, въ ста́рости масти́тѣй преше́лъ є҆сѝ къ ѡ҆би́телемъ нбⷭ҇нымъ, со а҆́гг҃лы пѣ́ти трїѷпоста́сномꙋ бг҃ꙋ: А҆ллилꙋ́їа.

І҆́косъ і҃

Цр҃ѧ̀ нбⷭ҇нагѡ хрⷭ҇та̀ слꙋжи́телїе и҆зрѧ́днїи и҆ во́ини добропобѣ́днїи, ст҃и́телїе бжⷭ҇твеннїи ѳео́дѡре и҆ і҆ѡа́нне, те́мнꙋю си́лꙋ дꙋшегꙋби́телѧ дїа́вола крѣ́пкѡ попра́вшїи, и҆ вѣнцы̀ побѣ́дными свы́ше ᲂу҆вѣнча́ннїи, подвиза́ете чꙋдесы̀ ва́шими вѣ́рныхъ собо́ры прославлѧ́ти пѣ́сньми дх҃о́вными, по́двиги ст҃а́гѡ житїѧ̀ ва́шегѡ, и҆́мже чꙋдѧ́щесѧ, ѿ любвѐ серде́чныѧ восклица́емъ ва́мъ ра́достнѡ:

Ра́дꙋйтесѧ, земні́и а҆́гг҃ли и҆ нбⷭ҇нїи человѣ́цы: ра́дꙋйтесѧ, на нб҃сѝ и҆ на землѝ ѿ гдⷭ҇а просла́вленнїи.

Ра́дꙋйтесѧ, бла̑га нетлѣ̑ннаѧ ᲂу҆наслѣ́довавшїи: ра́дꙋйтесѧ, да́ры бл҃года̑тныѧ ще́дрѡ раздаю́щїи.

Ра́дꙋйтесѧ, дꙋше́вныхъ и҆ тѣле́сныхъ недꙋ́гѡвъ до́брїи цѣле́бницы: ра́дꙋйтесѧ, ми́лостивїи страны̀ сꙋ́ждальскїѧ покрови́телїе.

Ра́дꙋйтесѧ, ско́рое вспоможе́нїе въ бѣда́хъ сꙋ́щымъ ꙗ҆влѧ́ющїи: ра́дꙋйтесѧ, при́снѡ гото́вїи на ᲂу҆моле́нїе прогнѣ́ваннагѡ грѣхмѝ на́шими творца̀.

Ра́дꙋйтесѧ, со дерзнове́нїемъ мно́гимъ предста́тельствꙋющїи за на́съ пред̾ прⷭ҇то́ломъ вседержи́телѧ: ра́дꙋйтесѧ, ᲂу҆милостиви́тели и҆звѣ́стнїи нбⷭ҇нагѡ ѻ҆ц҃а̀.

Ра́дꙋйтесѧ, непреста́ннѡ хода́тайствꙋющїи пред̾ бл҃гостїю є҆гѡ̀ ѡ҆ ми́рѣ всегѡ̀ мі́ра: ра́дꙋйтесѧ, пра́веднѡ дви́жимый на на́съ гнѣ́въ є҆гѡ̀ мл҃твами ва́шими ᲂу҆толѧ́ющїи.

Ра́дꙋйтесѧ, ст҃и́телїе ѳео́дѡре и҆ і҆ѡа́нне, преди́внїи чꙋдотво́рцы.

Конда́къ а҃і

Пѣ́нїе прест҃ѣ́й трⷪ҇цѣ въ безмо́лвїи ненарꙋши́мѣмъ возноси́ти возжелѣ́въ, ст҃и́телю ѻ҆́ч҃е і҆ѡа́нне, ѡ҆ста́вилъ є҆сѝ престо́лъ тво́й ст҃и́тельскїй, и҆ заключи́лсѧ є҆сѝ въ ѡ҆би́тели и҆́ночестѣй, да є҆ди́нъ є҆ди́номꙋ возлю́бленномꙋ тѝ і҆и҃сꙋ послꙋ́жиши въ безмо́лвїи и҆ мл҃твахъ непреста́нныхъ, бг҃омы́слїемъ восходѧ̀ къ соверше́нствꙋ дх҃о́вномꙋ, и҆ приꙋготовлѧ́ѧсѧ къ и҆схо́дꙋ ра́достномꙋ ѿ земны́хъ къ нбⷭ҇нымъ, є҆го́же ᲂу҆лꙋчи́въ, со безпло́тными ли́ки воспѣва́еши ны́нѣ вѣчнора́достнꙋю пѣ́снь бг҃ꙋ: А҆ллилꙋ́їа.

І҆́косъ а҃і

Свѣтопода́тєльнымъ свѣти́льникѡмъ подѡ́бны честны̑ѧ ра̑ки, содержа́щыѧ въ себѣ̀ ст҃ы̑ѧ и҆ цѣльбонѡ́сныѧ мо́щи ва́шѧ і҆ера́рси хрⷭ҇то́ви ѳео́дѡре и҆ і҆ѡа́нне: и҆́бо свѣ́тъ невече́рнїй возсїѧва́ете ѿ ни́хъ чꙋдесы̀ ва́шими, и҆́мже дꙋ́шы на́шѧ просвѣща́ютсѧ позна́нїемъ си́лы хрⷭ҇то́вой, є҆́юже ва̑ша тлѣ́нїю не прича̑стнаѧ тѣлеса̀, ди̑внаѧ и҆ пресла̑внаѧ зна́мєнїѧ содѣва́ютъ, и҆ всѧ̑ приглаша́ютъ пѣсносло́вити къ ва́мъ си́це:

Ра́дꙋйтесѧ, сме́ртїю вре́менною прише́дшїи къ жи́зни вѣ́чнѣй: ра́дꙋйтесѧ, ѡ҆блече́ннїи въ свѣ́тлꙋю ѡ҆де́ждꙋ чꙋдотво́рнагѡ нетлѣ́нїѧ.

Ра́дꙋйтесѧ, ѿ гробѡ́въ ва́шихъ и҆сцѣлє́нїѧ неѡскꙋ́днѡ и҆сточа́ющїи: ра́дꙋйтесѧ, и҆ сами́мъ призыва́нїемъ честны́хъ и҆ме́нъ ва́шихъ недꙋ́ги врачꙋ́ющїи.

Ра́дꙋйтесѧ, слѣпы́хъ просвѣти́тели: ра́дꙋйтесѧ, разсла́бленныхъ ᲂу҆крѣпи́тели.

Ра́дꙋйтесѧ, хрѡмы́мъ правохожде́нїе подаю́щїи: ра́дꙋйтесѧ, нѣмы̑мъ да́ръ сло́ва низпосыла́ющїи.

Ра́дꙋйтесѧ, глꙋхи̑мъ слꙋ́хъ ѿверза́ющїи: ра́дꙋйтесѧ, бѣснова́тыхъ ѿ наси́лїѧ де́монскагѡ свобожда́ющїи.

Ра́дꙋйтесѧ, многоѡбра́зныхъ не́мощей и҆сцѣли́тели: ра́дꙋйтесѧ, всѣ̑мъ на́мъ въ ча́съ сме́рти ᲂу҆се́рднїи защи́тницы.

Ра́дꙋйтесѧ, ст҃и́телїе ѳео́дѡре и҆ і҆ѡа́нне, преди́внїи чꙋдотво́рцы.

Конда́къ в҃і

Бл҃года́тныхъ дарѡ́въ ще́дрїи пода́тели и҆ ми́лостивїи ѻ҆ц҃ы̀ на́ши ѳео́дѡре и҆ і҆ѡа́нне, ст҃и́телїе всебл҃же́ннїи, бг҃ꙋ ᲂу҆годи́вшїи, и҆ мздꙋ̀ нбⷭ҇нꙋю ѿ негѡ̀ воспрїѧ́вшїи, и҆ до ны́нѣ па́ствꙋ ва́шꙋ ѻ҆те́чески мл҃твеннѡ назира́ющїи и҆ хранѧ́щїи, мо́лимъ ва́съ, содѣ́лайте ны̀ грѣ̑шныѧ и҆ недостѡ́йныѧ ча̑да ва̑ша, достѡ́йны послѣ́дователи ст҃а́гѡ житїѧ̑ ва́шегѡ, и҆ наꙋчи́те на́съ твори́ти во́лю бж҃їю, да покаѧ́нїемъ ѡ҆чище́ни пред̾ гдⷭ҇емъ, сподо́бимсѧ вкꙋ́пѣ съ ва́ми воспѣва́ти є҆мꙋ̀ на землѝ живы́хъ: А҆ллилꙋ́їа.

І҆́косъ в҃і

Пою́ще мнѡ́гаѧ и҆ пресла̑внаѧ чꙋдотворє́нїѧ ва̑ша, ᲂу҆го́дницы бж҃їи, помина́емъ ве́лїю любо́вь ва́шꙋ къ па́ствѣ ва́шей земно́й, ю҆́же при жи́зни и҆ по сме́рти показа́сте, и҆ покланѧ́емсѧ съ любо́вїю нетлѣ̑ннымъ и҆ многоцѣлє́бнымъ моще́мъ ва́шымъ, пред̾ ни́ми же ꙗ҆́кѡ живы̑мъ ва́мъ сꙋ́щымъ съ на́ми, ѿ ᲂу҆се́рдїѧ къ ва́мъ вопїе́мъ:

Ра́дꙋйтесѧ, благодѣ́тели на́ши, бла̑га вре́мєннаѧ и҆ вѣ̑чнаѧ на́мъ свы́ше подаю́щїи: ра́дꙋйтесѧ, покрови́тели на́ши, покро́вомъ мл҃твъ ва́шихъ, ѿ всѧ́кагѡ ѕла̀ на́съ соблюда́ющїи.

Ра́дꙋйтесѧ, рꙋководи́тели на́ши къ го́рнемꙋ і҆ерⷭ҇ли́мꙋ на́съ пꙋтеводѧ́щїи: ра́дꙋйтесѧ, предста́тели на́ши, ѿ вра̑гъ ви́димыхъ и҆ неви́димыхъ на́съ и҆збавлѧ́ющїи.

Ра́дꙋйтесѧ, сокрѡ́вища нетлѣ̑ннаѧ, бога́тствомъ ми́лѡсти ва́шеѧ на́съ ѡ҆богаща́ющїи: ра́дꙋйтесѧ, ѡ҆дꙋшевле́ннїи хра́мы ст҃а́гѡ дх҃а, дара́ми є҆гѡ̀ свѣ́тлѡ блиста́ющїи.

Ра́дꙋйтесѧ, прест҃ы́ѧ трⷪ҇цы вѣ́рнїи слꙋжи́тели и҆ ᲂу҆го́дницы: ра́дꙋйтесѧ, прест҃ы́ѧ бцⷣы и҆збра́ннїи рабѝ и҆ ᲂу҆го́дницы.

Ра́дꙋйтесѧ, а҆рха́гг҃лѡвъ и҆ а҆́гг҃лѡвъ досто́йнїи собесѣ́дницы: ра́дꙋйтесѧ, прⷪ҇ро́кѡвъ и҆ а҆пⷭ҇лѡвъ и҆́стиннїи подража́тели.

Ра́дꙋйтесѧ, вели́кихъ ᲂу҆чи́телей и҆ ст҃и́телей честні́и послѣ́дователи: ра́дꙋйтесѧ, прпⷣбныхъ и҆ првⷣныхъ бл҃же́ннїи сонаслѣ́дницы.

Ра́дꙋйтесѧ, ст҃и́телїе ѳео́дѡре и҆ і҆ѡа́нне, преди́внїи чꙋдотво́рцы.

Конда́къ г҃і

Ѽ чꙋдотво́рцы преди́внїи и҆ вра́чеве бл҃года́тнїи, ст҃и́телїе хрⷭ҇то́ви ѳео́дѡре и҆ і҆ѡа́нне! зри́те на́шѧ скѡ́рби и҆ бѣды̑, на́шѧ болѣ̑зни и҆ ѡ҆ѕлоблє́нїѧ, и҆ бл҃гоꙋтро́бнѡ вонми́те ма́ломꙋ семꙋ̀ моле́нїю на́шемꙋ и҆ пѣсносло́вїю смире́нномꙋ, є҆́же ми́лостивнѡ прїе́мше ᲂу҆моли́те всѣ́хъ творца̀ и҆ гдⷭ҇а, и҆зба́вити на́съ скорбе́й и҆ болѣ́зней вре́менныхъ и҆ вѣ́чныхъ, и҆ сподо́бити на́съ недосто́йныхъ со а҆́гг҃лы и҆ всѣ́ми ст҃ы́ми во црⷭ҇твїи нбⷭ҇нѣмъ, пѣ́ти бг҃ꙋ: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃лѡвъ подража́тели и҆ человѣ́кѡвъ наста́вницы ст҃и́телїе бжⷭ҇твеннїи, вы̀, ꙗ҆́кѡ а҆́гг҃ли бл҃гі́и храни́тели, ѻ҆те́чество ва́ше земно́е свы́ше ѻ҆те́чески назира́ете, бг҃опрїѧ́тными мл҃твами ва́шими, всѧ̑ бл҃га̑ѧ и҆ дꙋшеполє́знаѧ на́мъ ᲂу҆ гдⷭ҇а хода́тайствꙋете, нетлѣ́нїемъ моще́й ва́шихъ и҆ чꙋдесы̀ пресла́вными ᲂу҆вѣрѧ́юще на́съ, ꙗ҆́кѡ и҆ по сме́рти жи́вы сꙋ́ще, всѧ̑ мо́жете ѡ҆ ᲂу҆крѣплѧ́ющемъ ва́съ хрⷭ҇тѣ̀. тѣ́мже и҆ зове́мъ къ ва́мъ съ любо́вїю те́плою:

Ра́дꙋйтесѧ, правосла́вїѧ насади́тели: ра́дꙋйтесѧ, бл҃гоче́стїѧ подви́жницы.

Ра́дꙋйтесѧ, а҆пⷭ҇лѡвъ досто́йнїи прее́мницы: ра́дꙋйтесѧ, є҆ѵⷢ҇лїа хрⷭ҇то́ва неꙋтоми́мїи благовѣ́стницы.

Ра́дꙋйтесѧ, первопа́стырїе ст҃ы́ѧ сꙋ́ждальскїѧ цр҃кве: ра́дꙋйтесѧ, столпѝ непоколеби́мїи непоро́чныѧ вѣ́ры.

Ра́дꙋйтесѧ, вдѡ́въ и҆ сирѡ́тъ пита́телїе и҆ застꙋ́пницы: ра́дꙋйтесѧ, безпомо́щныхъ ско́рїи помо́щницы.

Ра́дꙋйтесѧ, болѧ́щихъ вра́чеве бл҃года́тнїи: ра́дꙋйтесѧ, ѡ҆ лю́бѧщихъ и҆ чтꙋ́щихъ ва́съ предста́телїе.

Ра́дꙋйтесѧ, свѣти́льницы бг҃освѣ́тлїи, дꙋ́шы на́шѧ ѡ҆зарѧ́ющїи: ра́дꙋйтесѧ, ѻ҆ц҃ы̀ преми́лостивїи, да́ры сп҃си́тельныѧ ѡ҆би́льнѡ на́мъ низпосыла́ющїи.

Ра́дꙋйтесѧ, ст҃и́телїе ѳео́дѡре и҆ і҆ѡа́нне, преди́внїи чꙋдотво́рцы.

Конда́къ а҃

И҆збра́ннїи ᲂу҆го́дницы гдⷭ҇ни и҆ па́стырїе предо́брїи цр҃кве хрⷭ҇то́вы, гра́да сꙋ́ждалѧ застꙋ́пницы и҆ те́плїи ѡ҆ дꙋша́хъ на́шихъ мл҃твенницы ѳео́дѡре и҆ і҆ѡа́нне, ѻ҆ц҃ы̀ бг҃оно́снїи, пѣ́нїе похва́льное ва́мъ ѿ ᲂу҆се́рдїѧ приносѧ́ще, мо́лимъ вы̀ и҆ про́симъ: ꙗ҆́кѡ и҆мꙋ́щїи дерзнове́нїе ко прест҃ѣ́й трⷪ҇цѣ, предста́тельствомъ ва́шимъ ѿ всѧ́кихъ бѣ́дъ на́съ свободи́те, и҆ наслѣ́дники црⷭ҇твїѧ нбⷭ҇нагѡ на́съ содѣ́лайте, да благода́рственнѡ ва́мъ вопїе́мъ:

Ра́дꙋйтесѧ, ст҃и́телїе ѳео́дѡре и҆ і҆ѡа́нне, преди́внїи чꙋдотво́рцы.

Моли́твы

Ѽ вели́цыи ᲂу҆гѡ́дницы хрⷭ҇то́ви и҆ чꙋдотво́рцы, ст҃и́телїе ѳео́дѡре и҆ і҆ѡа́нне! сѐ мы̀ недосто́йнїи и҆ грѣ́шнїи скорбьмѝ мно́гими ᲂу҆гнета́емїи, къ ва́мъ ᲂу҆се́рднѡ прибѣга́емъ, и҆ съ ᲂу҆пова́нїемъ крѣ́пкимъ мо́лимсѧ: ѻ҆ц҃ы̀ бг҃оми́лостивїи и҆ бл҃гопослꙋ́шливїи, ми́лостивнѡ ᲂу҆слы́шите ны́нѣ гла́съ на́шъ моле́бный, и҆ потщи́тесѧ на по́мощь на́шꙋ, и҆ ꙗ҆́кѡ при жи́зни ва́шей всѣ̑мъ скорбѧ́щымъ и҆ ѡ҆ѕло́блєннымъ помо́щницы и҆ ᲂу҆те́шителїе бы́сте, та́кѡ и҆ ны́нѣ любо́вь ва́шꙋ къ на́мъ ꙗ҆ви́те, бл҃года́тнымъ дѣ́йствомъ благопрїѧ́тныхъ мл҃твъ ва́шихъ, претворѧ́юще ско́рбь на́шꙋ въ ра́дость, печа́ль же на ᲂу҆тѣше́нїе: всѧ̑ бо мо́жете ѡ҆ ᲂу҆крѣплѧ́ющемъ ва́съ хрⷭ҇тѣ̀, є҆гѡ́же вѣ́рнїи слꙋжи́тели бы́сте: ѿ негѡ́же прїѧ́вше всѧ̑ ѡ҆бѣтова̑ннаѧ бл҃га̑ѧ, низпосли́те и҆ на́мъ вели́кꙋю и҆ бога́тꙋю млⷭ҇ть гдⷭ҇ню, да воспое́мъ и҆ просла́вимъ ди́внагѡ во ст҃ы́хъ свои́хъ бг҃а, ѻ҆ц҃а̀ и҆ сн҃а и҆ ст҃а́гѡ дх҃а, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.