Канон преподобному Кириллу, игумену Белоезерскому

Прекра́сная лоза́ виногра́да Христо́ва бы́л еси́, прему́дре Кири́лле, и гро́зд пресла́дкий яви́лся еси́, боже́ственную сла́дость ве́рным источа́еши, блаже́нне, ку́пно же и ра́дование пою́щим тя́.

О́тче Кири́лле, не терпя́, вра́г в нача́ле твоего́ жития́ бу́рю воздви́г, дре́вом напра́сно хотя́ умертви́ти тебе́, а́ще не бы́ боже́ственный гла́с возгласи́л тя́, богому́дре.

Христа́, на́с ра́ди смири́вшагося, подража́в и кре́ст тво́й взе́м, преподо́бне, Того́ стопа́м после́довал еси́, вся́ко мирско́е пристра́стие от тебе́ оттря́сл еси́, пребога́те.

А́ще и в ми́ре су́щая, о́тче, преоби́дел еси́, но та́мо преми́рная и нетле́нная стяжа́л еси́, иде́же гла́с пра́зднующих и ра́йское наслажде́ние.

Льсти́вый вра́г хотя́ тебе́ па́кость сотвори́ти, преподо́бне, лука́выя челове́ки на тя́ вооружа́ет, тебе́ же прирази́вся, постыде́ся, Христу́ бо тя́ соблюда́ющу.

Уже́ пресла́вное твое́ житие́ всю́ду, преподо́бне, прославля́ется, и чудеса́ твоя́ в конце́х пропове́даются, те́мже, в па́мять твою́ соше́дшеся, почита́ем тя́.

О́тче преподо́бне, сна́ твои́ма очи́ма не да́л еси́, ни ве́ждома дрема́ния, до́ндеже сподо́бился еси́ ви́дети пра́ведных селе́ния, я́же угото́ва Бо́г лю́бящим Его́.

Уже́ не ктому́ врази́, ниже́ челове́цы лука́вии, мо́гут к тебе́ прибли́житися, Кири́лле преподо́бне: ви́деша бо благода́ть Бо́жию, тебе́ всегда́ соблюда́ющую.

Изря́дно твое́ житие́ в после́дния ро́ды и пресла́вно яви́ся, чудеса́ же твоя́ всю́ду ве́рным излия́шася. Те́мже тя́ вси́, о́тче, ублажа́ем.

Ра́йския добро́ты жела́я, преподо́бне Кири́лле, и тоя́ ра́ди в слеза́х и воздыха́ниих, бде́ниих же и моли́твах твою́ жи́знь препроводи́л еси́ и отту́ду насле́дил еси́ жела́емое тебе́ блаже́нство.

Пресве́тлый тво́й пра́здник, о́тче, благоче́стно пра́зднующим подава́й свы́ше спасе́ние и избавле́ние, да тя́ вси́, блаже́нне Кири́лле, непреста́нно воспева́ем.

Влады́ку у́м поста́вил еси́ над страстьми́ теле́сными, блаже́нне, те́мже и Пресвята́го Ду́ха селе́ние, богоно́се, бы́л еси́. Его́же моли́ и на́с свободи́ти от страсте́й, да тя́ почита́ем.

Я́ко победи́в ве́ка сего́ кня́зя тмы́, возше́л еси́ к небе́сным, побе́ды вене́ц нося́ от вседержи́тельныя руки́ Бо́га на́шего, моли́ от бе́д спасти́ся тебе́ почита́ющим.

Плотско́е мудрова́ние, е́же на земли́, о́тче, умертви́л еси́ и на небесе́х житие́ стяжа́л еси́, иде́же святы́х ду́си ра́дуются, пою́ще с тобо́ю Влады́ку твоего́.

Очи́стив от страсте́й, преподо́бне о́тче, у́м тво́й и Вседержи́телю с преподо́бных ли́ки и пра́ведных предстоя́, всегда́ вопие́ши: благослове́н Бо́г оте́ц на́ших.

Вра́чь преизря́дный ми́ру яви́лся еси́, блаже́нне, исцеля́я все́х, ве́рою притека́ющих ко хра́му твоему́ свято́му и Христу́ от души́ вопию́щих непреста́нно: благослове́н Бо́г оте́ц на́ших.

Посто́м и воздержа́нием лице́ твое́ украси́л еси́, преподо́бне, светле́йши наипа́че яви́лся еси́ многоразли́чными бра́шны пита́ющихся. Те́мже и Христу́ вопие́ши: благослове́н Бо́г оте́ц на́ших.

Гро́б, иде́же положено́ бы́сть честно́е те́ло твое́, преподо́бне, освяти́ все́х, к нему́ притека́ющих, исто́чник исцеле́ния источа́я от души́ Христу́ вопию́щим и превознося́щим Его́ во ве́ки.

Во вре́мя гла́да, раздробля́я, преподо́бне, ни́щим хле́б тво́й, те́х а́лчбу уста́вил еси́, и мене́, та́ющаго гла́дом, боже́ственных дея́ний напита́й: да возмогу́ и а́з со все́ми пе́ти Го́спода во вся́ ве́ки.

И́же с тобо́ю ученицы́ твои́, уче́нию твоему́ повину́ющеся, преподо́бне, земна́я оста́вльше, во сле́д тебе́ к небе́сным преидо́ша, и с тобо́ю пою́т Христу́, и превозно́сят Его́ во ве́ки.

Жития́ сего́ непостоя́нную пучи́ну немяте́жно преше́л еси́, преподо́бне, ко́рмчию Ма́терь Бо́жию име́я, на сие́ наставля́ющую тя́. Те́мже и ко приста́нищем приста́л еси́ а́нгельскаго пребыва́ния.

Я́ко зре́лая и чисте́йшая пшени́ца, кроме́ все́х зло́бных пле́вел, в небе́сных жи́тницах соблю́лся еси́, преподо́бне, хле́б сла́дкий жела́я принести́ся небе́сному Царю́, Его́же ра́ди вся́ в ми́ре преоби́дел еси́.

Вели́ким отце́м, дре́вле в посте́х и по́двизех просия́вшим, подо́бяся, о́тче, вся́ дни́ жи́зни твоея́ в слеза́х и труде́х препроводи́л еси́, до́ндеже дости́гл еси́ блаже́нную кончи́ну, ю́же и они́ насле́доваша.

Прекра́снаѧ лоза̀ вїногра́да хрⷭ҇то́ва бы́лъ є҆сѝ, премꙋ́дре кѷрі́лле, и҆ гро́здъ пресла́дкїй ꙗ҆ви́лсѧ є҆сѝ, бж҃е́ственнꙋю сла́дость вѣ̑рнымъ и҆сточа́еши, блаже́нне, кꙋ́пнѡ же и҆ ра́дованїе пою́щымъ тѧ̀.

Ѻ҆́тче кѷрі́лле, не терпѧ̀ вра́гъ, въ нача́лѣ твоегѡ̀ житїѧ̀ бꙋ́рю воздви́гъ, дре́вомъ напра́снѡ хотѧ̀ ᲂу҆мертви́ти тебѐ, а҆́ще не бы̀ бж҃е́ственный гла́съ возгласи́лъ тѧ̀, бг҃омꙋ́дре.

Хрⷭ҇та̀ на́съ ра́ди смири́вшагосѧ подража́въ, и҆ крⷭ҇тъ тво́й взе́мъ, прпⷣбне, тогѡ̀ стопа́мъ послѣ́довалъ є҆сѝ, всѧ́ко мїрско́е пристра́стїе ѿ тебє̀ ѿтрѧ́слъ є҆сѝ, пребога́те.

А҆́ще и҆ въ мі́рѣ сꙋ̑щаѧ, ѻ҆́тче, преѡби́дѣлъ є҆сѝ, но та́мѡ премі́рнаѧ и҆ нетлѣ̑ннаѧ стѧжа́лъ є҆сѝ, и҆дѣ́же гла́съ пра́зднꙋющихъ и҆ ра́йское наслажде́нїе.

Льсти́вый вра́гъ хотѧ̀ тебѣ̀ па́кость сотвори́ти, прпⷣбне, лꙋка̑выѧ человѣ́ки на тѧ̀ воѡрꙋжа́етъ: тебѣ́ же прирази́всѧ постыдѣ́сѧ, хрⷭ҇тꙋ́ бо тѧ̀ соблюда́ющꙋ.

Оу҆жѐ пресла́вное твоѐ житїѐ всю́дꙋ, прпⷣбне, прославлѧ́етсѧ, и҆ чꙋдеса̀ твоѧ̑ въ концѣ́хъ проповѣ́даютсѧ: тѣ́мже въ па́мѧть твою̀ соше́дшесѧ, почита́емъ тѧ̀.

Ѻ҆́тче прпⷣбне, сна̀ твои́ма ѻ҆чи́ма не да́лъ є҆сѝ, ни вѣ́ждома дрема́нїѧ, до́ндеже сподо́билсѧ є҆сѝ ви́дѣти пра́ведныхъ селє́нїѧ, ꙗ҆̀же ᲂу҆гото́ва бг҃ъ лю́бѧщымъ є҆го̀.

Оу҆жѐ не ктомꙋ̀ вразѝ, нижѐ человѣ́цы лꙋка́вїи мо́гꙋтъ къ тебѣ̀ прибли́житисѧ, кѷрі́лле прпⷣбне: ви́дѣша бо благода́ть бж҃їю, тебѐ всегда̀ соблюда́ющꙋю.

И҆зрѧ́дно твоѐ житїѐ въ послѣ̑днїѧ ро́ды, и҆ пресла́вно ꙗ҆ви́сѧ, чꙋдеса́ же твоѧ̑ всю́дꙋ вѣ̑рнымъ и҆злїѧ́шасѧ. тѣ́мже тѧ̀ всѝ, ѻ҆́тче, ᲂу҆блажа́емъ.

Ра́йскїѧ добро́ты жела́ѧ, прпⷣбне кѷрі́лле, и҆ тоѧ̀ ра́ди въ слеза́хъ и҆ воздыха́нїихъ, бдѣ́нїихъ же и҆ моли́твахъ твою̀ жи́знь препроводи́лъ є҆сѝ, и҆ ѿтꙋ́дꙋ наслѣ́дилъ є҆сѝ жела́емое тебѣ̀ блаже́нство.

Пресвѣ́тлый тво́й пра́здникъ, ѻ҆́тче, благоче́стнѡ пра́зднꙋющымъ, подава́й свы́ше спасе́нїе и҆ и҆збавле́нїе, да тѧ̀ всѝ, блаже́нне кѷрі́лле, непреста́ннѡ воспѣва́емъ.

Влады́кꙋ ᲂу҆́мъ поста́вилъ є҆сѝ надъ страстьмѝ тѣле́сными, бл҃же́нне: тѣ́мже и҆ прест҃а́гѡ дх҃а селе́нїе, бг҃оно́се, бы́лъ є҆сѝ. є҆го́же молѝ, и҆ на́съ свободи́ти ѿ страсте́й, да тѧ̀ почита́емъ.

Ꙗ҆́кѡ побѣди́въ вѣ́ка сегѡ̀ кнѧ́зѧ тмы̀, возше́лъ є҆сѝ къ нбⷭ҇нымъ, побѣ́ды вѣне́цъ носѧ̀ ѿ вседержи́тельныѧ рꙋкѝ бг҃а на́шегѡ: молѝ, ѿ бѣ́дъ спасти́сѧ тебѐ почита́ющымъ.

Плотско́е мꙋдрова́нїе, є҆́же на землѝ, ѻ҆́тче, ᲂу҆мертви́лъ є҆сѝ, и҆ на нб҃сѣ́хъ житїѐ стѧжа́лъ є҆сѝ, и҆дѣ́же ст҃ы́хъ дꙋ́си ра́дꙋютсѧ, пою́ще съ тобо́ю влⷣкꙋ твоего̀.

Ѡ҆чи́стивъ ѿ страсте́й, прпⷣбне ѻ҆́тче, ᲂу҆́мъ тво́й, и҆ вседержи́телю съ прпⷣбныхъ ли̑ки и҆ пра́ведныхъ предстоѧ̀, всегда̀ вопїе́ши: бл҃гослове́нъ бг҃ъ ѻ҆тє́цъ на́шихъ.

Вра́чь преизрѧ́дный мі́рꙋ ꙗ҆ви́лсѧ є҆сѝ, бл҃же́нне, и҆сцѣлѧ́ѧ всѣ́хъ вѣ́рою притека́ющихъ ко хра́мꙋ твоемꙋ̀ ст҃о́мꙋ, и҆ хрⷭ҇тꙋ̀ ѿ дꙋшѝ вопїю́щихъ непреста́ннѡ: бл҃гослове́нъ бг҃ъ ѻ҆тє́цъ на́шихъ.

Посто́мъ и҆ воздержа́нїемъ лицѐ твоѐ ᲂу҆краси́лъ є҆сѝ, прпⷣбне, свѣтлѣ́йши наипа́че ꙗ҆ви́лсѧ є҆сѝ многоразли́чными бра́шны пита́ющихсѧ. Тѣ́мже и҆ хрⷭ҇тꙋ̀ вопїе́ши: бл҃гослове́нъ бг҃ъ ѻ҆тє́цъ на́шихъ.

Гро́бъ, и҆дѣ́же положено̀ бы́сть чⷭ҇тно́е тѣ́ло твоѐ, прпⷣбне, ѡ҆ст҃ѝ всѣ́хъ къ немꙋ̀ притека́ющихъ, и҆сто́чникъ и҆сцѣле́нїѧ и҆сточа́ѧ ѿ дꙋшѝ хрⷭ҇тꙋ̀ вопїю́щымъ, и҆ превозносѧ́щымъ є҆го̀ во вѣ́ки.

Во вре́мѧ гла́да, раздроблѧ́ѧ, прпⷣбнѣ, ни́щымъ хлѣ́бъ тво́й, тѣ́хъ а҆́лчбꙋ ᲂу҆ста́вилъ є҆сѝ. И҆ менѐ, та́ющаго гла́домъ, бжⷭ҇твенныхъ дѣѧ́нїй напита́й: да возмогꙋ̀ и҆ а҆́зъ со всѣ́ми пѣ́ти гдⷭ҇а во всѧ̑ вѣ́ки.

И҆́же съ тобо́ю ᲂу҆ченицы̀ твоѝ, ᲂу҆че́нїю твоемꙋ̀ повинꙋ́ющесѧ, прпⷣбнѣ, земна̑ѧ ѡ҆ста́вльше, во слѣ́дъ тебє̀ къ нбⷭ҇нымъ преидо́ша, и҆ съ тобо́ю пою́тъ хрⷭ҇тꙋ̀ и҆ превозно́сѧтъ є҆го̀ во вѣ́ки.

Житїѧ̀ сегѡ̀ непостоѧ́ннꙋю пꙋчи́нꙋ немѧте́жнѡ преше́лъ є҆сѝ, прпⷣбне, ко́рмчїю мт҃рь бж҃їю и҆мѣ́ѧ, на сїѐ наставлѧ́ющꙋю тѧ̀. тѣ́мже и҆ ко приста́нищємъ приста́лъ є҆сѝ а҆́гг҃льскагѡ пребыва́нїѧ.

Ꙗ҆́кѡ зрѣ́лаѧ и҆ чистѣ́йшаѧ пшени́ца, кромѣ̀ всѣ́хъ ѕло́бныхъ пле́велъ, въ нбⷭ҇ныхъ жи́тницахъ соблю́лсѧ є҆сѝ, прпⷣбне, хлѣ́бъ сла́дкїй жела́ѧ принести́сѧ нбⷭ҇номꙋ цр҃ю̀: є҆гѡ́же ра́ди всѧ̑ въ мі́рѣ преѡби́дѣлъ є҆сѝ.

Вели̑кимъ ѻ҆тцє́мъ, дре́вле въ постѣ́хъ и҆ по́двизѣхъ просїѧ́вшымъ, подо́бѧсѧ, ѻ҆́тче, всѧ̑ дни̑ жи́зни твоеѧ̀ во слеза́хъ и҆ трꙋдѣ́хъ препроводи́лъ є҆сѝ, до́ндеже дости́глъ є҆сѝ блаже́ннꙋю кончи́нꙋ, ю҆́же и҆ ѻ҆нѝ наслѣ́доваша.