Канон преподобному Кириллу, игумену Белоезерскому (второй)

Я́ко вели́ко вои́стинну дерзнове́ние стяжа́в, преподо́бне, к Бо́гу, сбытию́ зри́тель сподо́бился еси́ бы́ти и непло́дная ложесна́ многопло́дна моли́твами твои́ми показа́л еси́.

На воде́ поко́я и на зла́це воздержа́ния, о́тче, учени́к твои́х стада́ му́дре упа́сл еси́ и, ны́не с на́ми неви́димо водворя́яся, моли́ о чту́щих па́мять твою́.

У́м тво́й к Бо́гу любо́вию впери́в, тле́нными нетле́нная искупи́л еси́. Те́мже вся́ка душа́, спаса́ема тобо́ю, тя́ прославля́ет.

Волна́м, преподо́бне, и́менем Госпо́дним запрети́в и е́зеро укроти́в, лю́ди от потопле́ния спа́сл еси́ моли́твами твои́ми, Кири́лле блаже́нне.

Жела́нием, е́же к Бо́гу, и Того́ любо́вию па́че огня́ распала́емь, о́тче, целому́дренно в преподо́бии и пра́вде пожи́л еси́, преподо́бне Кири́лле.

Те́ло твое́ посто́м и моли́твами, о́тче, удручи́л еси́ и сего́ ра́ди наслажда́ешися ве́чнаго блаже́нства, иде́же святы́х собо́ри и преподо́бных ли́цы веселя́тся.

Бо́дренными моли́твами, о́тче, и сле́зными пото́ки Це́рковь ве́рных напои́л еси́, блаже́нне Кири́лле.

Е́же на земли́ вре́менное житие́ твое́ в безмо́лвии мно́зе пожи́л еси́, Христу́ поя́: сла́ва си́ле Твое́й, Го́споди.

От млада́го во́зраста в воздержа́нии, о́тче, пре́был еси́, пло́д мно́г доброде́тели Бо́гу, преподо́бне, прине́сл еси́ и сего́ ра́ди от Него́ просла́вился еси́.

Пото́ки сле́зными, о́тче, страсте́й пучи́ну изсуши́л еси́, и в зе́млю обетова́ния преше́л еси́, и та́мо ра́йское житие́ прия́л еси́, е́же угото́ва Бо́г лю́бящим Его́.

Христа́, тобо́ю слепы́м да́рующая здра́вие, о́тче, моли́, и мне́ о́чи душе́вныя просвети́ти, до́ндеже не обря́щет мя́ негото́ва но́щь глубо́кая и тма́ отча́яния, молю́ся.

В пусты́ни безмо́лвия водвори́лся еси́, преподо́бне, и отту́ду к небе́сному гра́ду преше́л еси́, иде́же Бо́гу угоди́вших жили́ща, с ни́миже о на́с, блаже́нне, моли́ся.

Чи́сто житие́ твое́ от ю́ности име́л еси́, блаже́нне, и того́ ра́ди Пречи́стыя Бо́жия Ма́тере изря́дный служи́тель бы́л еси́, и прече́стен хра́м То́й воздви́гл еси́, в не́мже Госпо́дь сла́вится.

От страсте́й тиме́ния чи́ста тя́ обре́т, всели́ся в тя́ Ду́х Пресвяты́й, те́м и чуде́с дарова́ния тебе́ да́рует еди́н во святы́х прославля́емый Бо́г на́ш.

От мирска́го треволне́ния избе́г, преподо́бне, в ти́хое приста́нище дости́гл еси́ небе́снаго пребыва́ния, вопия́: оте́ц на́ших Бо́же, благослове́н еси́.

В пусты́ню, я́коже дре́вний Анто́ний, всели́лся еси́ и в не́й вели́каго Ефре́ма слеза́ми и посто́м подража́л еси́, Христу́ поя́: благослове́н еси́, Го́споди Бо́же оте́ц на́ших.

Вся́кими, о́тче, о́бразы и́же с тобо́ю ученики́ направля́л еси́ по стезя́м пра́вым путе́й твои́х ходи́ти и с тобо́ю Христу́ пе́ти: оте́ц на́ших Бо́же, благослове́н еси́.

Бу́дущаго ра́ди жития́ на небесе́х на земли́ ми́ру умертви́лся еси́, о́тче. Сего́ ра́ди жи́в Бо́гу предстоя́, вопие́ши: Тя́ превозно́сим, Го́спода, во ве́ки.

Све́том Тро́ическим, о́тче, просвеща́емь, твою́ жи́знь благоче́стно сконча́л еси́ и по́стных собо́ры приве́л еси́ Христу́ вопи́ти: Тя́ превозно́сим, Го́спода, во ве́ки.

С небе́сными во́инствы всегда́, преподо́бне, Тро́ицу несозда́нную, неразде́льное Божество́ славосло́виши, блаже́нне, и превозно́сиши во ве́ки.

Потреби́ стра́стная двиза́ния ума́ моего́, Христе́, и ле́ность уны́ния отжени́, в пра́вый пу́ть Тво́й ходи́ти наста́ви моли́твами уго́дника Твоего́ Кири́лла, да я́ко Благоде́теля велича́ю Тя́.

Певце́м, тебе́ пою́щим, о́тче, и во хвале́нии сла́вящим, пода́ждь свы́ше спасе́ние и избавле́ние, да ктому́ тебе́ мно́жае в пе́снех велича́ют.

Руко́ю мое́ю недосто́йною приноси́мое тебе́ с трудо́м от усе́рдия хвале́ние приими́, богоблаже́нне Кири́лле, и хода́тай к Бо́гу бу́ди ми́, молю́ся, изба́вити мя́ та́мошняго муче́ния, да непреста́нно в пе́снех велича́ю тя́.

Ꙗ҆́кѡ вели́ко вои́стиннꙋ дерзнове́нїе стѧжа́въ, прпⷣбне, къ бг҃ꙋ, сбытїю̀ зри́тель сподо́билсѧ є҆сѝ бы́ти: и҆ неплѡ́днаѧ ложесна̀ многоплѡ́дна моли́твами твои́ми показа́лъ є҆сѝ.

На водѣ̀ поко́ѧ, и҆ на ѕла́цѣ воздержа́нїѧ, ѻ҆́тче, ᲂу҆чєни́къ твои́хъ стада̀ мꙋ́дрѣ ᲂу҆па́слъ є҆сѝ: и҆ ны́нѣ съ на́ми неви́димѡ водворѧ́ѧсѧ, молѝ ѡ҆ чтꙋ́щихъ па́мѧть твою̀.

Оу҆́мъ тво́й къ бг҃ꙋ любо́вїю впери́въ, тлѣ́нными нетлѣ̑ннаѧ и҆скꙋпи́лъ є҆сѝ. тѣ́мже всѧ́ка дꙋша̀ спаса́ема тобо́ю, тѧ̀ прославлѧ́етъ.

Волна́мъ, прпⷣбне, и҆́менемъ гдⷭ҇нимъ запрети́въ, и҆ є҆́зеро ᲂу҆кроти́въ, лю́ди ѿ потопле́нїѧ спа́слъ є҆сѝ моли́твами твои́ми, кѷрі́лле блаже́нне.

Жела́нїемъ є҆́же къ бг҃ꙋ, и҆ тогѡ̀ любо́вїю па́че ѻ҆гнѧ̀ распала́емь, ѻ҆́тче, цѣломꙋ́дреннѡ въ прпⷣбїи и҆ пра́вдѣ пожи́лъ є҆сѝ, прпⷣбне кѷрі́лле.

Тѣ́ло твоѐ посто́мъ и҆ моли́твами, ѻ҆́тче, ᲂу҆дрꙋчи́лъ є҆сѝ: и҆ сегѡ̀ ра́ди наслажда́ешисѧ вѣ́чнагѡ блаже́нства, и҆дѣ́же ст҃ы́хъ собо́ри, и҆ пра́ведныхъ ли́цы веселѧ́тсѧ.

Бо́дренными моли́твами, ѻ҆́тче, и҆ сле́зными потѡ́ки, цр҃ковь вѣ́рныхъ напои́лъ є҆сѝ, блаже́нне кѷрі́лле.

Є҆́же на землѝ вре́менное житїѐ твоѐ, въ безмо́лвїи мно́зѣ пожи́лъ є҆сѝ, хрⷭ҇тꙋ̀ поѧ̀: сла́ва си́лѣ твое́й, гдⷭ҇и.

Ѿ млада́гѡ во́зраста въ воздержа́нїи, ѻ҆́тче, пре́былъ є҆сѝ, пло́дъ мно́гъ добродѣ́тели бг҃ꙋ, прпⷣбне, прине́слъ є҆сѝ, и҆ сегѡ̀ ра́ди ѿ негѡ̀ просла́вилсѧ є҆сѝ.

Потѡ́ки сле́зными, ѻ҆́тче, страсте́й пꙋчи́нꙋ и҆зсꙋши́лъ є҆сѝ, и҆ въ зе́млю ѡ҆бѣтова́нїѧ преше́лъ є҆сѝ, и҆ та́мѡ ра́йское житїѐ прїѧ́лъ є҆сѝ, є҆́же ᲂу҆гото́ва бг҃ъ лю́бѧщымъ є҆го̀.

Хрⷭ҇та̀ тобо́ю слѣпы̑мъ да́рꙋющаѧ здра́вїе, ѻ҆́тче, молѝ, и҆ мнѣ̀ ѻ҆́чи дꙋшє́вныѧ просвѣти́ти, до́ндеже не ѡ҆брѧ́щетъ мѧ̀ негото́ва но́щь глꙋбо́каѧ, и҆ тма̀ ѿча́ѧнїѧ, молю́сѧ.

Въ пꙋсты́ни безмо́лвїѧ водвори́лсѧ є҆сѝ, прпⷣбне, и҆ ѿтꙋ́дꙋ къ небе́сномꙋ гра́дꙋ преше́лъ є҆сѝ, и҆дѣ́же бг҃ꙋ ᲂу҆годи́вшихъ жили̑ща: съ ни́миже ѡ҆ на́съ, блаже́нне, моли́сѧ.

Чи́сто житїѐ твоѐ ѿ ю҆́ности и҆мѣ́лъ є҆сѝ, блаже́нне: и҆ тогѡ̀ ра́ди пречⷭ҇тыѧ бж҃їѧ мт҃ре и҆зрѧ́дный слꙋжи́тель бы́лъ є҆сѝ, и҆ прече́стенъ хра́мъ то́й воздви́глъ є҆сѝ, въ не́мже гдⷭ҇ь сла́витсѧ.

Ѿ страсте́й тимѣ́нїѧ чи́ста тѧ̀ ѡ҆брѣ́тъ, всели́сѧ въ тѧ̀ дх҃ъ прест҃ы́й: тѣ́мъ и҆ чꙋде́съ дарова̑нїѧ тебѣ̀ да́рꙋетъ є҆ди́нъ во ст҃ы́хъ прославлѧ́емый бг҃ъ на́шъ.

Ѿ мїрска́гѡ треволне́нїѧ и҆збѣ́гъ, прпⷣбне, въ ти́хое приста́нище дости́глъ є҆сѝ нбⷭ҇нагѡ пребыва́нїѧ, вопїѧ̀: ѻ҆тє́цъ на́шихъ бж҃е, бл҃гослове́нъ є҆сѝ.

Въ пꙋсты́ню, ꙗ҆́коже дре́внїй а҆нтѡ́нїй, всели́лсѧ є҆сѝ, и҆ въ не́й вели́каго є҆фре́ма слеза́ми и҆ посто́мъ подража́лъ є҆сѝ, хрⷭ҇тꙋ̀ поѧ̀: бл҃гослове́нъ є҆сѝ, гдⷭ҇и, бж҃е ѻ҆тє́цъ на́шихъ.

Всѧ́кими, ѻ҆́тче, ѻ҆́бразы, и҆̀же съ тобо́ю ᲂу҆ченикѝ направлѧ́лъ є҆сѝ, по стезѧ́мъ пра̑вымъ пꙋте́й твои́хъ ходи́ти, и҆ съ тобо́ю хрⷭ҇тꙋ̀ пѣ́ти: ѻ҆тє́цъ на́шихъ бж҃е, бл҃гослове́нъ є҆сѝ.

Бꙋ́дꙋщагѡ ра́ди житїѧ̀ на нб҃сѣ́хъ, на землѝ мі́рꙋ ᲂу҆мертви́лсѧ є҆сѝ, ѻ҆́тче. сегѡ̀ ра́ди жи́въ бг҃ꙋ предстоѧ̀ вопїе́ши: тѧ̀ превозно́симъ гдⷭ҇а во вѣ́ки.

Свѣ́томъ трⷪ҇ческимъ, ѻ҆́тче, просвѣща́емь, твою̀ жи́знь благоче́стнѡ сконча́лъ є҆сѝ, и҆ по́стныхъ собо́ры приве́лъ є҆сѝ хрⷭ҇тꙋ̀ вопи́ти: тѧ̀ превозно́симъ гдⷭ҇а во вѣ́ки.

Съ небе́сными во́инствы, всегда̀, прпⷣбне, трⷪ҇цꙋ несозда́ннꙋю, нераздѣ́льное бж҃ество̀ славосло́виши, блаже́нне, и҆ превозно́сиши во вѣ́ки.

Потребѝ стра̑стнаѧ двиза̑нїѧ ᲂу҆ма̀ моегѡ̀, хрⷭ҇тѐ, и҆ лѣ́ность ᲂу҆ны́нїѧ ѿженѝ, въ пра́вый пꙋ́ть тво́й ходи́ти наста́ви, моли́твами ᲂу҆го́дника твоегѡ̀ кѷрі́лла: да ꙗ҆́кѡ благодѣ́телѧ велича́ю тѧ̀.

Пѣвцє́мъ тебѐ пою́щымъ, ѻ҆́тче, и҆ во хвале́нїи сла́вѧщымъ, пода́ждь свы́ше спасе́нїе и҆ и҆збавле́нїе, да ктомꙋ̀ тебѐ мно́жае въ пѣ́снехъ велича́ютъ.

Рꙋко́ю мое́ю недосто́йною, приноси́мое тебѣ̀ съ трꙋдо́мъ ѿ ᲂу҆се́рдїѧ хвале́нїе прїимѝ, бг҃облаже́нне кѷрі́лле, и҆ хода́тай къ бг҃ꙋ бꙋ́ди мѝ, молю́сѧ, и҆зба́вити мѧ̀ та́мошнѧгѡ мꙋче́нїѧ: да непреста́ннѡ въ пѣ́снехъ велича́ю тѧ̀.