Канон святому священномученику Тимофею Прусскому

Непобеди́му кре́пость, неизме́нну держа́ву и непретво́рну я́ко име́я, Благи́й, неизрече́нною си́лою Твое́ю утверди́ моего́ язы́ка не́мощь в пе́снех Твои́х и моли́твами Тимофе́я уще́дри.

Кре́постию богоде́льною свяще́ннаго су́щи ко́рене израсти́л еси́ свяще́нный, Тимофе́е, са́д, доброде́телей яви́лся еси́ благоукраше́ние: процве́л бо еси́ страда́ний плоды́ оби́льны и все́х Влады́це прине́сл еси́.

Ума́ чистото́ю и души́ све́тлостию, твои́ми кро́вными омоче́нии испещре́н я́влься, богоно́се Тимофе́е, горе́ ны́не ца́рствуеши со Влады́кою тва́ри и ста́ду твоему́ ве́рою предста́л еси́.

С му́ченики Христо́вы му́ченик я́влься све́тел, сла́вне, во свяще́нницех му́дрых яви́лся еси́ свяще́нником удобре́ние.

Хра́м Христо́в, прему́дрости сокро́вище, дне́сь прииди́те, ве́рнии, воспое́м ста́до пру́сскаго первонача́льника.

С по́ты доброде́тельными кро́вь твою́ растворя́я, чи́сто, прему́дре, пи́во Го́сподеви прине́сл еси́, боже́ственно и красно́, о Тимофе́е!

Небому́дренно житие́ я́ко стяжа́в и возгреме́нии Ду́ха ве́сь облиста́я, зми́я всепа́губнаго попали́л еси́, сла́вне, благода́тию Боже́ственною укрепля́емь.

Виде́нием и дея́нием украша́емь, в леви́тсте о́бразе, ору́жием обою́ду о́стрым зми́я вну́тренняя ссеца́еши, о Тимофе́е, хле́бов свяще́нных покрыва́лом.

Позна́в Христа́, Вели́каго Архиере́я, не чужде́ю кро́вию, но твое́ю, му́чениче, ко Отцу́ приводи́ма, я́ко собесе́дник Ему́, кро́вь твою́ принося́, поже́рл еси́.

Я́коже секи́ра тверда́, я́ко си́льно ору́жие, к полко́м беззако́нных бра́нь соста́вль, побе́дою венча́ся.

Свети́ло дневно́е светоно́сно показу́ется, озари́л еси́ цари́цу, ю́же во мра́це зло́бы скончава́ющу лице́, сла́вне.

Зря́ и́дольских скверне́ний смеше́ние, пре́дал еси́ кро́ви излия́телем, я́ко а́гня, себе́, блаже́нне, и же́ртва Бо́гу прине́слся еси́.

Возвесели́ся вселе́нная дне́сь, ра́дующися о па́мяти твое́й, блаже́нне: просвеща́еши бо свы́ше чуде́с заря́ми ду́ши пою́щих тя́.

Яви́лся еси́ ны́не не на земли́ су́щей трапе́зе служи́тель, но, в небе́сная входя́, пита́ешися на трапе́зе неизрече́нней, в не́йже пода́ждь и на́м твою́ пи́щу и наслажде́ние.

Зако́нно свяще́нный по́двиг творя́, со дерзнове́нием, богому́дре, царя́ безу́мие изобличи́л еси́ и и́дольская разори́л еси́ тре́бища, Тимофе́е.

Достодо́лжно в доброде́телех бога́тное тя́ сокро́вище венча́ет пре́жде страда́ний благода́ть богоде́льная и, чуде́сными дарова́нии просвеща́ющи, све́тла в ми́ре соверши́.

Ору́жна преще́ния и огнено́сна пла́мене, му́чениче, зря́, ве́рою вооружи́в у́м тво́й и ду́шу, и безбоя́зненным ра́зумом Христа́ пропове́дал еси́, твоего́ Соде́теля, и Зижди́теля, и Го́спода.

Си́лою боже́ственныя ве́ры укре́плься, му́дре Тимофе́е, но́в показа́лся еси́ я́коже Дании́л на́м, зми́я низлага́я всегуби́тельнаго, и, на высоте́ предста́в, зове́ши, поя́ при́сно: благослови́те, вся́ дела́ Госпо́дня, Го́спода.

Вну́трь, я́ко ра́б свяще́нный, Го́спода твоего́ ра́дости бы́л еси́: ты́ бо тала́нт, сла́вне, ве́ры боле́зньми твои́ми израсти́л еси́ многосугу́бо, страда́нии и чудесы́, взыва́я: благослови́те, вся́ дела́ Госпо́дня, Го́спода.

Неду́ги отгоня́ челове́ков, пома́зании твои́ми благоуха́еши, прему́дре, ду́ши, си́льным твои́м дарова́нием боле́зней отъе́млеши я́звы и от духо́в лука́вых избавля́еши при́сно вопию́щия: благослови́те, вся́ дела́ Госпо́дня, Го́спода.

Ви́дехом пресла́вная в тебе́, Тимофе́е богоно́се, вои́стинну чудеса́: источа́ет бо моще́й твои́х ра́ка исцеле́ний исто́чники на́м и уставля́ет неду́гов боле́зни. Те́мже, чту́ще тя́, сла́вим.

Ве́сь лику́я вои́стинну, Тимофе́е, со а́нгельскими во́инствы, ра́дуяся с му́ченическими собо́ры и поя́ со свяще́нными чи́ны, моли́ непреста́нно Го́спода спасти́ ве́рою хва́лящия тя́.

Пе́ний и моле́б гла́сы услы́ши, му́чениче Христо́в всече́стне, вонми́ к жела́нию и любви́, и воззри́ во гне́ве Непобеди́мому, и свы́ше покро́в тво́й да́руй все́м, ве́рою хва́лящим тя́.

Непобѣди́мꙋ крѣ́пость, неизмѣ́ннꙋ держа́вꙋ, и҆ непретво́рнꙋ ꙗ҆́кѡ и҆мѣ́ѧ благі́й, неизрече́нною си́лою твое́ю ᲂу҆твердѝ моегѡ̀ ѧ҆зы́ка не́мощь въ пѣ́снехъ твои́хъ, и҆ моли́твами тїмоѳе́а ᲂу҆ще́дри.

Крѣ́постїю бг҃одѣ́льною, свѧще́ннагѡ сꙋ́щи ко́рене, и҆зрасти́лъ є҆сѝ, сщ҃е́нный тїмоѳе́е, са́дъ, добродѣ́телей ꙗ҆ви́лсѧ є҆сѝ благоꙋкраше́нїе: процвѣ́лъ бо є҆сѝ страда́нїй плоды̀ ѻ҆би̑льны, и҆ всѣ́хъ влⷣцѣ прине́слъ є҆сѝ.

Оу҆ма̀ чистото́ю, и҆ дꙋшѝ свѣ́тлостїю, твои́ми кро́вными ѡ҆мочє́нїи и҆спещре́нъ ꙗ҆́вльсѧ, бг҃оно́се тїмоѳе́е, горѣ̀ ны́нѣ ца́рствꙋеши со влⷣкою тва́ри: и҆ ста́дꙋ твоемꙋ̀ вѣ́рою предста́лъ є҆сѝ.

Съ мꙋ́чєники хрⷭ҇тѡ́вы, мꙋ́ченикъ ꙗ҆́вльсѧ свѣ́телъ, сла́вне, во свѧще́нницѣхъ мꙋ́дрыхъ ꙗ҆ви́лсѧ є҆сѝ свѧще́нникѡмъ ᲂу҆добре́нїе.

Хра́мъ хрⷭ҇то́въ, премꙋ́дрости сокро́вище, дне́сь прїиди́те, вѣ́рнїи, воспое́мъ ста́до прꙋ́сскагѡ первонача́льника.

Съ пѡ́ты добродѣ́тельными кро́вь твою̀ растворѧ́ѧ, чи́сто, премꙋ́дре, пи́во гдⷭ҇еви прине́слъ є҆сѝ, бжⷭ҇твенно и҆ красно̀, ѽ тїмоѳе́е!

Небомꙋ́дренно житїѐ ꙗ҆́кѡ стѧжа́въ, и҆ возгремѣ̑нїи дх҃а ве́сь ѡ҆блиста́ѧ, ѕмі́ѧ всепа́гꙋбнаго попали́лъ є҆сѝ, сла́вне, благода́тїю бжⷭ҇твенною ᲂу҆крѣплѧ́емь.

Видѣ́нїемъ и҆ дѣѧ́нїемъ ᲂу҆краша́емь, въ леѵі́тстѣ ѻ҆́бразѣ, ѻ҆рꙋ́жїемъ ѻ҆бою́дꙋ ѻ҆́стрымъ ѕмі́ѧ внꙋ́трєннѧѧ ссѣца́еши, ѽ тїмоѳе́е, хлѣ́бѡвъ сщ҃е́нныхъ покрыва́ломъ.

Позна́въ хрⷭ҇та̀ вели́каго а҆рхїере́а, не чꙋжде́ю кро́вїю, но твое́ю, мꙋ́чениче, ко ѻ҆ц҃ꙋ̀ приводи́ма, ꙗ҆́кѡ собесѣ́дникъ є҆мꙋ̀, кро́вь твою̀ приносѧ̀ поже́рлъ є҆сѝ.

Ꙗ҆́коже сѣки́ра тверда̀, ꙗ҆́кѡ си́льно ѻ҆рꙋ́жїе, къ полкѡ́мъ беззако́нныхъ бра́нь соста́вль, побѣ́дою вѣнча́сѧ.

Свѣти́ло дневно́е свѣтоно́сно показꙋ́етсѧ, ѡ҆зари́лъ є҆сѝ цари́цꙋ, ю҆́же во мра́цѣ ѕло́бы скончава́ющꙋ лицѐ, сла́вне.

Зрѧ̀ і҆́дѡльскихъ скверне́нїй смѣше́нїе, пре́далъ є҆сѝ кро́ви и҆злїѧ́телємъ, ꙗ҆́кѡ а҆́гнѧ себѐ, блаже́нне, и҆ же́ртва бг҃ꙋ прине́слсѧ є҆сѝ.

Возвесели́сѧ вселе́ннаѧ дне́сь, ра́дꙋющисѧ ѡ҆ па́мѧти твое́й, блаже́нне: просвѣща́еши бо свы́ше чꙋде́съ зарѧ́ми дꙋ́шы пою́щихъ тѧ̀.

Ꙗ҆ви́лсѧ є҆сѝ ны́нѣ не на землѝ сꙋ́щей трапе́зѣ слꙋжи́тель, но въ нбⷭ҇наѧ входѧ̀, пита́ешисѧ на трапе́зѣ неизрече́ннѣй, въ не́йже пода́ждь и҆ на́мъ твою̀ пи́щꙋ и҆ наслажде́нїе.

Зако́ннѡ сщ҃е́нный по́двигъ творѧ̀, со дерзнове́нїемъ, бг҃омꙋ́дре, царѧ̀ безꙋ́мїе и҆зѡбличи́лъ є҆сѝ, и҆ і҆́дѡльскаѧ разори́лъ є҆сѝ трє́бища, тїмоѳе́е.

Достодо́лжнѡ въ добродѣ́телехъ бога́тное тѧ̀ сокро́вище, вѣнча́етъ пре́жде страда́нїй, благода́ть бг҃одѣ́льнаѧ, и҆ чꙋде́сными дарова̑нїи просвѣща́ющи, свѣ́тла въ ми́рѣ совершѝ.

Ѻ҆рꙋ̑жна прещє́нїѧ, и҆ ѻ҆гненѡ́сна пла́мене, мꙋ́чениче, зрѧ̀, вѣ́рою воѡрꙋжи́въ ᲂу҆́мъ тво́й и҆ дꙋ́шꙋ, и҆ безбоѧ́зненнымъ ра́зꙋмомъ хрⷭ҇та̀ проповѣ́далъ є҆сѝ, твоего̀ содѣ́телѧ и҆ зижди́телѧ, и҆ гдⷭ҇а.

Си́лою бжⷭ҇твенныѧ вѣ́ры ᲂу҆крѣ́пльсѧ, мꙋ́дре тїмоѳе́е, но́въ показа́лсѧ є҆сѝ ꙗ҆́коже данїи́лъ на́мъ, ѕмі́ѧ низлага́ѧ всегꙋби́тельнаго, и҆ на высотѣ̀ предста́въ зове́ши, поѧ̀ при́снѡ: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Внꙋ́трь, ꙗ҆́кѡ ра́бъ свѧще́нный, гдⷭ҇а твоегѡ̀ ра́дости бы́лъ є҆сѝ: ты́ бо тала́нтъ, сла́вне, вѣ́ры, болѣ́зньми твои́ми и҆зрасти́лъ є҆сѝ многосꙋгꙋ́бѡ, страда̑нїи и҆ чꙋдесы̀, взыва́ѧ: благослови́те, всѧ̑ дѣла̀ гдⷭ҇нѧ, гдⷭ҇а.

Недꙋ́ги ѿгонѧ̀ человѣ́кѡвъ пома̑занїи твои́ми, бл҃гоꙋха́еши, премꙋ́дре, дꙋ́шы, си́льнымъ твои́мъ дарова́нїемъ, болѣ́зней ѿе́млеши ꙗ҆́звы, и҆ ѿ дꙋхѡ́въ лꙋка́выхъ и҆збавлѧ́еши при́снѡ вопїю́щыѧ: благослови́те, всѧ̑ дѣла̀ гдⷭ҇нѧ, гдⷭ҇а.

Ви́дѣхомъ пресла̑внаѧ въ тебѣ̀, тїмоѳе́е бг҃оно́се, вои́стиннꙋ чꙋдеса̀: и҆сточа́етъ бо моще́й твои́хъ ра́ка и҆сцѣле́нїй и҆сто́чники на́мъ, и҆ ᲂу҆ставлѧ́етъ недꙋ́гѡвъ болѣ̑зни: тѣ́мже чтꙋ́ще тѧ̀ сла́вимъ.

Ве́сь ликꙋ́ѧ вои́стиннꙋ, тїмоѳе́е, со а҆́гг҃льскими во́инствы, ра́дꙋѧсѧ съ мꙋ́ченическими собѡ́ры, и҆ поѧ̀ со свѧще́нными чи̑ны, молѝ непреста́ннѡ гдⷭ҇а, спастѝ вѣ́рою хва́лѧщыѧ тѧ̀.

Пѣ́нїй и҆ моле́бъ гла́сы ᲂу҆слы́ши, мꙋ́чениче хрⷭ҇то́въ всече́стне, вонмѝ къ жела́нїю и҆ любвѝ, и҆ воззрѝ во гнѣ́вѣ непобѣди́момꙋ: и҆ свы́ше покро́въ тво́й да́рꙋй, всѣ̑мъ вѣ́рою хва́лѧщымъ тѧ̀.