Православный календарь
Размер шрифта:

Ака́ѳістъ

А҆ка́ѳїстъ ст҃и́телю васі́лїю, є҆пⷭ҇копꙋ рѧза́нскомꙋ, чꙋдотво́рцꙋ.

Свт. Василия, еп. Рязанского (обрет. мощ.) (1690) 23 июня 2026

Конда́къ а҃

И҆збра́нномꙋ ѿ нбⷭ҇нагѡ пастыренача́льника, и҆ ѿ ст҃а́гѡ дх҃а поста́вленномꙋ въ па́стырѧ страны̀ рѧза́нскїѧ и҆ мꙋ́ромскїѧ, просла́вльшемꙋсѧ ст҃ы́мъ житїе́мъ и҆ чꙋдесы̀, похва̑льнаѧ пѣ̑нїѧ прино́симъ тѝ, ст҃и́телю хрⷭ҇то́въ васі́лїе. ты́ же, ꙗ҆́кѡ и҆мѣ́ѧй дерзнове́нїе ко гдⷭ҇ꙋ, ѿ всѧ́кихъ на́съ ѕѡ́лъ и҆ ѡ҆бстоѧ́нїй свобожда́й, да съ ра́достїю и҆ бл҃годаре́нїемъ всегда̀ тебѣ̀ зове́мъ:

Ра́дꙋйсѧ, васі́лїе, первост҃и́телю рѧза́нскїй и҆ преди́вный чꙋдотво́рче.

І҆́косъ а҃

А҆́гг҃лꙋ бж҃їю подо́бенъ бы́лъ є҆сѝ, ст҃и́телю хрⷭ҇то́въ, свѣ́тлостїю ᲂу҆ма̀ твоегѡ̀, чистото́ю се́рдца и҆ неѕло́бїемъ, пожи́въ на землѝ, а҆́ки безпло́тенъ: сегѡ̀ ра́ди просла́ви тѧ̀ всевы́шнїй гдⷭ҇ь нетлѣ́нїемъ честны́хъ моще́й твои́хъ и҆ ди́вными чꙋдесы̀. тѣ́мже съ любо́вїю бл҃гоговѣ́йнѡ зове́мъ тѝ:

Ра́дꙋйсѧ, пре́жде рожде́нїѧ твоегѡ̀ на слꙋже́нїе сп҃се́нїю люде́й свы́ше пред̾избра́нный: ра́дꙋйсѧ, ѿ пеле́нъ младе́нческихъ гдⷭ҇ꙋ бг҃ꙋ посвѧще́нный.

Ра́дꙋйсѧ, ѿ ю҆́ности твоеѧ̀ всѣ́мъ се́рдцемъ гдⷭ҇а возлюби́вый: ра́дꙋйсѧ, всѧ̑ блага̑ѧ и҆ кра̑снаѧ мі́ра сегѡ̀ гдⷭ҇а ра́ди презрѣ́вый.

Ра́дꙋйсѧ, въ повелѣ́нїихъ гдⷭ҇нихъ всегда̀ ᲂу҆се́рднѡ ходи́вый: ра́дꙋйсѧ, всѧ́кими бг҃олюбе́зными добродѣ́тельми дꙋ́шꙋ твою̀ ᲂу҆краси́вый.

Ра́дꙋйсѧ, ᲂу҆́мъ тво́й ве́сь ко гдⷭ҇ꙋ ᲂу҆стреми́вый: ра́дꙋйсѧ, высо́кїй ѡ҆́бразъ и҆́ноческихъ по́двигѡвъ въ житїѝ твое́мъ ꙗ҆ви́вый.

Ра́дꙋйсѧ, васі́лїе, первост҃и́телю рѧза́нскїй и҆ преди́вный чꙋдотво́рче.

Конда́къ в҃

Ви́дѧ бл҃говѣ́рный кнѧ́зь геѡ́ргїй свѣ́тлость ᲂу҆ма̀ твоегѡ̀ и҆ ст҃о́е житїѐ твоѐ, и҆збра́ тѧ, ꙗ҆́кѡ мꙋ́жа мꙋ́дра, пра́ведна и҆ свѧ́та, во є҆пⷭ҇кпа гра́да своегѡ̀ мꙋ́рома, да просвѣти́ши невѣ́дꙋщыѧ бж҃е́ственныѧ и҆́стины, и҆спра́виши беззакѡ́нныѧ, ᲂу҆тѣ́шиши скорбѧ́щыѧ и҆ наꙋчи́ши всѧ̑ досто́йнѡ пѣ́ти бг҃ꙋ: А҆ллилꙋ́їа.

І҆́косъ в҃

Ра́зꙋмъ просвѣще́нъ кни́жнымъ ᲂу҆че́нїемъ и҆ бг҃омы́слїемъ, па́че же бл҃года́тїю бж҃їею ѡ҆заре́нъ и҆мѣ́ѧ, пресла́вне ѻ҆́тче васі́лїе, восхотѣ́лъ є҆сѝ тмꙋ̀ нече́стїѧ и҆ заблꙋжде́нїй въ па́ствѣ твое́й разгна́ти, просвѣти́ти же ю҆̀ свѣ́томъ и҆́стиннагѡ бг҃овѣ́дѣнїѧ и҆ бл҃гоче́стїѧ. сегѡ̀ ра́ди, восхвалѧ́юще тѧ̀, глаго́лемъ:

Ра́дꙋйсѧ, и҆́стинныѧ премꙋ́дрости и҆спо́лненный: ра́дꙋйсѧ, бл҃года́тїю ст҃а́гѡ дх҃а ѡ҆заре́нный.

Ра́дꙋйсѧ, бжⷭ҇твенныѧ и҆́стины ᲂу҆се́рдный проповѣ́дниче: ра́дꙋйсѧ, велѣ́нїй гдⷭ҇нихъ немо́лчный провозвѣ́стниче.

Ра́дꙋйсѧ, пра́выѧ вѣ́ры и҆ добродѣ́телей ре́вностный насади́телю: ра́дꙋйсѧ, сꙋевѣ́рїй и҆ поро́кѡвъ мꙋ́жественный и҆скорени́телю.

Ра́дꙋйсѧ, ꙗ҆́кѡ слове́сное ста́до твоѐ мꙋ́дрѣ ᲂу҆па́слъ є҆сѝ: ра́дꙋйсѧ, ꙗ҆́кѡ премнѡ́гїѧ дꙋ́шы къ вѣ́чномꙋ сп҃се́нїю наста́вилъ є҆сѝ.

Ра́дꙋйсѧ, васі́лїе, первост҃и́телю рѧза́нскїй и҆ преди́вный чꙋдотво́рче.

Конда́къ г҃

Си́лою про́повѣди твоеѧ̀, бг҃омꙋ́дре ст҃и́телю, бл҃года́тїю бж҃їею споспѣшествꙋ́емыѧ, кꙋ́пнѡ же ѡ҆́бразомъ ст҃а́гѡ житїѧ̀ твоегѡ̀, мно́зи, ѡ҆мраче́ннїи тмо́ю неразꙋ́мїѧ и҆ заблꙋжде́нїй, бжⷭ҇твеннꙋю и҆́стинꙋ ᲂу҆вѣ́дѣша, мно́зи нечести́вїи беззакѡ́нїѧ и҆ развращє́нїѧ ѡ҆ста́виша и҆ на стєзѝ сп҃се́нїѧ ѡ҆брати́шасѧ, въ покаѧ́нїи и҆ ᲂу҆миле́нїи се́рдца пою́ще бг҃ꙋ: А҆ллилꙋ́їа.

І҆́косъ г҃

И҆мѣ́ѧ непреста́нное попече́нїе ѡ҆ разоре́ннѣй ѿ ѕлочести́выхъ сꙋпоста̑тъ па́ствѣ мꙋ́ромстѣй, ꙗ҆́кѡ мꙋ́дрый па́стырь и҆ чадолюби́вый ѻ҆те́цъ, во бл҃гоꙋстрое́нїи сеѧ̀ неꙋсы́пнѡ трꙋди́лсѧ є҆сѝ, всѣ̑мъ дꙋхѡ́внымъ ча́дѡмъ твои̑мъ потре́бнꙋю коемꙋ́ждо по́мощь подава́ѧ. тѣ́мже досто́инъ є҆сѝ прославлѧ́тисѧ зва̑нїи си́ми:

Ра́дꙋйсѧ, си́рыхъ и҆ вдови́цъ предста́телю: ра́дꙋйсѧ, не и҆мꙋ́щихъ кро́ва те́плый кро́ве и҆ а҆́лчꙋщихъ пита́телю.

Ра́дꙋйсѧ, скорбѧ́щихъ и҆ ᲂу҆ныва́ющихъ ско́рый ᲂу҆тѣ́шителю: ра́дꙋйсѧ, во враждѣ̀ сꙋ́щихъ примири́телю.

Ра́дꙋйсѧ, и҆́щꙋщихъ сп҃се́нїѧ бл҃гонаде́жный къ нб҃сѝ рꙋководи́телю: ра́дꙋйсѧ, сомнѧ́щихсѧ въ вѣ́рѣ мꙋ́дрый просвѣти́телю.

Ра́дꙋйсѧ, сострада́тельныхъ и҆ ми́лостивыхъ мо́щный споспѣ́шниче: ра́дꙋйсѧ, ни́щихъ дꙋ́хомъ и҆ чи́стыхъ се́рдцемъ бл҃гі́й наста́вниче.

Ра́дꙋйсѧ, васі́лїе, первост҃и́телю рѧза́нскїй и҆ преди́вный чꙋдотво́рче.

Конда́къ д҃

Бꙋ́рею и҆ско́нныѧ ѕло́бы волнꙋ́емь всеѕло́бный дїа́волъ, не терпѧ̀ непоро́чности житїѧ̀ твоегѡ̀ и҆ бл҃гопоспѣ́шнагѡ па́стырскагѡ слꙋже́нїѧ, свѧ́те васі́лїе, воздви́же на тѧ̀ бꙋ́рю мѧте́жа бꙋ́їихъ и҆ неи́стовыхъ жи́телей гра́да мꙋ́рома, и҆̀же, лꙋка́вымъ мечта́нїемъ вра́жїимъ прельсти́вшесѧ, возмнѣ́ша тѧ̀, а҆́ки нецѣломꙋ́дрена и҆ небл҃гоче́стна: тѣ́мже и҆ восхотѣ́ша, во ѡ҆слѣпле́нїи свое́мъ, не то́чїю и҆згна́ти тѧ̀ и҆з̾ гра́да, но и҆ ᲂу҆мертви́ти. ты́ же, а҆рхїере́ю бж҃їй, всѐ ᲂу҆пова́нїе твоѐ на всеси́льнагѡ гдⷭ҇а и҆ пречⷭ҇тꙋю бцⷣꙋ возложи́въ, воспѣва́лъ є҆сѝ а҆́гг҃льскꙋю пѣ́снь: А҆ллилꙋ́їа.

І҆́косъ д҃

Слы́шавше враждова́вшїи на тѧ̀ лю́дїе гра́да мꙋ́рома ѕѣлѡ̀ крѡ́ткїѧ глаго́лы твоѧ̑, ст҃и́телю хрⷭ҇то́въ, и҆́миже проси́лъ є҆сѝ да́ти тебѣ̀ ма́лѡ вре́мене до ᲂу҆́трїѧ до тре́тїѧгѡ часа̀, ᲂу҆кроти́ша ꙗ҆́рость свою̀ и҆ ѿидо́ша въ до́мы своѧ̑: ты́ же, ᲂу҆го́дниче бж҃їй, по всено́щнѣй сле́знѣй мл҃твѣ твое́й къ бг҃ꙋ сп҃си́телю и҆ прест҃ѣ́й бцⷣѣ во хра́мѣ ст҃ы́хъ страстоте́рпцєвъ бори́са и҆ глѣ́ба, прїи́мъ на рꙋ́ки твоѧ̀ честнꙋ́ю і҆кѡ́нꙋ бг҃омт҃ре, ѿше́лъ є҆сѝ къ рѣцѣ̀ ѻ҆цѣ̀, хотѧ́й ѡ҆ста́вити гра́дъ мꙋ́ромъ и҆ по волна́мъ плы́ти. воспомина́юще ᲂу҆̀бо сїѐ ѿше́ствїе твоѐ, возглаша́емъ тѝ сицева̑ѧ:

Ра́дꙋйсѧ, высо́кїй ѡ҆́бразе преди́внагѡ смире́нїѧ: ра́дꙋйсѧ, свѣ́тлое зерца́ло тве́рдыѧ вѣ́ры и҆ непоколеби́мыѧ наде́жды на бг҃а вы́шнѧго.

Ра́дꙋйсѧ, сто́лпе терпѣ́нїѧ, ѕло́бою человѣ́ческою непоколеби́мый: ра́дꙋйсѧ, а҆дама́нте, прило́ги вра́жїими несокрꙋши́мый.

Ра́дꙋйсѧ, а҆́гнче неѕло́биве, кро́тостїю твое́ю гони́тели твоѧ̑ а҆́ки ди̑вїѧ ѕвѣ̑ри ᲂу҆кроти́вый: ра́дꙋйсѧ, смире́нїемъ твои́мъ кѡ́зни дїа́вола пресла́внѡ посрами́вый.

Ра́дꙋйсѧ, бл҃же́нне миротво́рче, мїрска́гѡ волне́нїѧ и҆ мѧте́жа и҆збѣжа́вый: ра́дꙋйсѧ, волна́мъ рѣ̑чнымъ съ вѣ́рою и҆ ᲂу҆пова́нїемъ на гдⷭ҇а себѐ преда́вый.

Ра́дꙋйсѧ, васі́лїе, первост҃и́телю рѧза́нскїй и҆ преди́вный чꙋдотво́рче.

Конда́къ є҃

Бг҃оте́чнѣй ѕвѣздѣ̀ ᲂу҆подо́билсѧ є҆сѝ, пресла́вне васі́лїе, є҆гда̀ по стрꙋѧ́мъ водны̑мъ, проти́вꙋ тече́нїѧ рѣ́чнагѡ, на ма́нтїи твое́й, а҆́ки на ле́гцѣй ладїѝ, со ѡ҆́бразомъ пречⷭ҇тыѧ бг҃омт҃ре, си́лою бж҃їею веде́нъ бы́лъ є҆сѝ и҆з̾ гра́да мꙋ́рома ко гра́дꙋ рѧза́ни, поѧ̀ во ᲂу҆миле́нїи се́рдца чꙋдодѣ́ющемꙋ и҆ бл҃годѣ́ющемꙋ тѝ бг҃ꙋ: А҆ллилꙋ́їа.

І҆́косъ є҃

Ви́дѣвше тѧ̀, ѻ҆́ч҃е васі́лїе, лю́дїе гра́да мꙋ́рома пречꙋ́днѣ си́лою бж҃їею по волна́мъ а҆́ки безпло́тна носи́ма, ᲂу҆разꙋмѣ́ша своѐ козньмѝ вра́жїими прельще́нїе, твою́ же чистотꙋ̀ и҆ непоро́чность. тѣ́мже, въ покаѧ́нїи и҆ сокрꙋше́нїи се́рдца, возопи́ша вслѣ́дъ тебѣ̀: прости́ ны грѣ̑шныѧ рабы̀ твоѧ̑: согрѣши́хомъ пред̾ тобо́ю, ѻ҆́ч҃е ст҃ы́й: влады́ко, не забꙋ́ди на́съ ра̑бъ твои́хъ! мы́ же, дивѧ́щесѧ толи́комꙋ бл҃говоле́нїю къ тебѣ̀ бж҃їю, въ пресла́внѣмъ чꙋдесѝ ꙗ҆вле́нномꙋ, со бл҃гоговѣ́нїемъ вопїе́мъ тѝ:

Ра́дꙋйсѧ, бл҃гоꙋха́нный сосꙋ́де чистоты̀ и҆ цѣломꙋ́дрїѧ: ра́дꙋйсѧ, пресвѣ́тлый до́ме пребжⷭ҇твенныѧ трⷪ҇цы.

Ра́дꙋйсѧ, вѣ́рный слꙋго̀ цр҃ѧ̀ нбⷭ҇нагѡ: ра́дꙋйсѧ, возлю́бленный ра́бе прест҃ы́ѧ бцⷣы.

Ра́дꙋйсѧ, посто́мъ и҆ бдѣ́нїемъ тѣ́ло твоѐ и҆знꙋри́вый: ра́дꙋйсѧ, мл҃твою и҆ бг҃омы́слїемъ ве́тхаго человѣ́ка въ себѣ̀ ᲂу҆мертви́вый.

Ра́дꙋйсѧ, пла́ванїемъ твои́мъ по волна́мъ рѣ̑чнымъ стрꙋи̑ водны̑ѧ ѡ҆ст҃и́вый: ра́дꙋйсѧ, тѣ́мъ пла́ванїемъ жи́тели гра́да мꙋ́рома вразꙋми́вый и҆ къ покаѧ́нїю ѡ҆брати́вый.

Ра́дꙋйсѧ, васі́лїе, первост҃и́телю рѧза́нскїй и҆ преди́вный чꙋдотво́рче.

Конда́къ ѕ҃

Провозвѣ́стникъ ди́внагѡ твоегѡ̀ по вода́мъ ше́ствїѧ ко гра́дꙋ рѧза́ни ꙗ҆ви́сѧ ᲂу҆строе́нїемъ бж҃їимъ бл҃гоговѣ́йный дїа́конъ гра́да тогѡ̀, є҆гда̀, хотѧ́й нача́ти вече́рнее бг҃ослꙋже́нїе, не можа́ше и҆зрещѝ ѡ҆бы́чнагѡ возглаше́нїѧ: бл҃гословѝ, влады́ко! но возопѝ велегла́снѡ: влады́ка грѧде́тъ, срѣта́йте є҆го̀! и҆ а҆́бїе ве́сь ѡ҆свѧще́нный собо́ръ и҆ лю́дїе со кнѧ́земъ и҆зыдо́ша съ честны́ми і҆кѡ́нами во срѣ́тенїе тебѣ̀ ст҃и́телю бж҃їй, и҆ ᲂу҆зрѣ́вше тѧ̀ преди́внѣ волна́ми рѣ́чными носи́ма, въ ра́дованїи се́рдца, бл҃гоче́стнѡ привѣ́тствоваша тѧ̀ грѧдꙋ́ща, чꙋдодѣ́ющемꙋ же бг҃ꙋ вопїѧ́хꙋ. А҆ллилꙋ́їа.

І҆́косъ ѕ҃

Возсїѧ̀ свѣ́тъ бл҃года́ти и҆ млⷭ҇ти бж҃їѧ, прише́дшꙋ тебѣ̀, прехва́льне ѻ҆́ч҃е, въ предѣ́лы землѝ рѧза́нскїѧ, ю҆́же просвѣти́лъ є҆сѝ свѣ́томъ бжⷭ҇твеннагѡ ᲂу҆че́нїѧ и҆ непоро́чнагѡ житїѧ̀ твоегѡ̀. сегѡ̀ ра́ди возглаша́емъ тѝ сицева̑ѧ:

Ра́дꙋйсѧ, вели́кїй и҆збра́нниче а҆рхїере́а вѣ́чнагѡ, гдⷭ҇а і҆и҃са: ра́дꙋйсѧ, чи́стый сосꙋ́де бжⷭ҇твенныѧ бл҃года́ти.

Ра́дꙋйсѧ, бж҃їихъ велѣ́нїй вѣ́рнѣйшїй и҆сполни́телю: ра́дꙋйсѧ, хрⷭ҇то́выхъ за́повѣдей неꙋкло́нный храни́телю.

Ра́дꙋйсѧ, свѣти́льниче, на высотѣ̀ цр҃ко́внѣй поста́вленный: ра́дꙋйсѧ, премꙋ́дрый ᲂу҆пра́вителю кораблѧ̀ дꙋхо́внагѡ.

Ра́дꙋйсѧ, бг҃огла́снаѧ трꙋбо̀ є҆ѵⷢ҇льскагѡ ᲂу҆че́нїѧ: ра́дꙋйсѧ, тве́рдый побо́рниче цр҃кве хрⷭ҇то́вы.

Ра́дꙋйсѧ, васі́лїе, первост҃и́телю рѧза́нскїй и҆ преди́вный чꙋдотво́рче.

Конда́къ з҃

Хотѧ̀ привестѝ па́ствꙋ твою̀ рѧза́нскꙋю ко и҆́стинномꙋ бг҃опозна́нїю и҆ сп҃се́нїю, є҆ще́ же ᲂу҆споко́ити и҆ ᲂу҆крѣпи́ти ю҆̀, пре́жде разоре́нꙋ бы́вшꙋю ѿ безбо́жныхъ и҆ноплеме́нникѡвъ, под̾ѧ́лъ є҆сѝ вели̑кїѧ трꙋды̀ и҆ по́двиги, пребл҃гі́й па́стырю, непреста́ннѡ поꙋча́ѧ, ᲂу҆тѣша́ѧ и҆ назида́ѧ словє́сныѧ ѻ҆́вцы твоѧ̑, споспѣшествꙋ́ющемꙋ же тебѣ̀ и҆ ᲂу҆крѣплѧ́ющемꙋ тѧ̀ во трꙋдѣ́хъ гдⷭ҇ꙋ бг҃ꙋ поѧ̀: А҆ллилꙋ́їа.

І҆́косъ з҃

Но́вое мѣ́сто ст҃и́тельскихъ трꙋдѡ́въ твои́хъ, па́ки разоре́нꙋ бы́вшꙋ и҆ коне́чнѣ ѡ҆пꙋстоше́нꙋ гра́дꙋ рѧза́ни ѿ лю́тыхъ ва̑рваръ и҆ хра́мѡмъ бж҃їимъ въ не́мъ сожжє́ннымъ, ᲂу҆каза̀ тебѣ̀ бл҃гопромысли́тель гдⷭ҇ь гра́дъ пересла́вль рѧза́нскїй, а҆́може чꙋ́днѣ пресели́лсѧ є҆сѝ и҆ бы́лъ є҆сѝ пе́рвый а҆рхїере́й гра́дꙋ семꙋ̀, и҆дѣ́же вельмѝ просла́ви тѧ̀ гдⷭ҇ь бг҃ъ, наꙋча́ѧ на́съ взыва́ти тебѣ̀:

Ра́дꙋйсѧ, высо́каѧ похвало̀ и҆ ᲂу҆краше́нїе пересла́влю рѧза́нскомꙋ: ра́дꙋйсѧ, ст҃и́тельскагѡ престо́ла въ не́мъ бг҃оизбра́нный ѡ҆снова́телю.

Ра́дꙋйсѧ, вели̑кїѧ трꙋды̀ и҆ по́двиги во бл҃гоꙋстрое́нїе но́выѧ па́ствы твоеѧ̀ под̾е́мый: ра́дꙋйсѧ, ѻ҆те́ческое попече́нїе ѡ҆ сп҃се́нїи дꙋхо́вныхъ ча̑дъ твои́хъ всегда̀ и҆мѣ́вый.

Ра́дꙋйсѧ, бл҃года́тныхъ дарѡ́въ неѡскꙋ́дный раздаѧ́телю: ра́дꙋйсѧ, бжⷭ҇твенныхъ та́инъ бл҃гоче́стный строи́телю.

Ра́дꙋйсѧ, а҆пⷭ҇льскихъ преда́нїй ᲂу҆се́рдный ревни́телю: ра́дꙋйсѧ, ᲂу҆ста́вѡвъ правосла́вныѧ цр҃кве вѣ́рный храни́телю.

Ра́дꙋйсѧ, васі́лїе, первост҃и́телю рѧза́нскїй и҆ преди́вный чꙋдотво́рче.

Конда́къ и҃

Стра́ннѡ бѣ̀ и҆ ди́внѡ твоѐ да́льнее ше́ствїе по вода́мъ и҆з̾ гра́да мꙋ́рома во гра́дъ рѧза́нь, па́ки же стра́ннѡ и҆ пресла́внѡ бы́сть твоѐ второ́е пла́ванїе проти́вꙋ стремле́нїѧ водна́гѡ, є҆гда̀ преселѧ́лсѧ є҆сѝ и҆з̾ дре́внѧгѡ гра́да рѧза́ни во гра́дъ пересла́вль рѧза́нскїй по то́йжде рѣцѣ̀ ѻ҆цѣ̀, па́ки носѧ̀ съ собо́ю чꙋ́днꙋю і҆кѡ́нꙋ бг҃омт҃ре, ꙗ҆́кѡ непоколеби́мое ѡ҆гражде́нїе и҆ ᲂу҆твержде́нїе но́вомꙋ гра́дꙋ, бг҃ꙋ же помо́щникꙋ твоемꙋ̀ поѧ̀: А҆ллилꙋ́їа.

І҆́косъ и҃

Всѣ̑мъ бы́ти всѧ̑ восхотѣ́въ по ѡ҆́бразꙋ верхо́внагѡ ѿ а҆пⷭ҇лѡвъ, ꙗ҆влѧ́лъ є҆сѝ, любвеѡби́льне ѻ҆́ч҃е, дꙋхѡ́внымъ ча̑дѡмъ твои̑мъ бл҃гопотре́бнꙋю коемꙋ́ждо по́мощь, бы́въ, ꙗ҆́коже і҆́ѡвъ, ѻ҆́ко слѣпы̑мъ, нога̀ хромы̑мъ, неꙋсы́пнѡ трꙋжда́ѧсѧ въ наꙋче́нїи, ᲂу҆тѣше́нїи и҆ ᲂу҆крѣпле́нїи па́ствы твоеѧ̀. тѣ́мже прославлѧ́юще тѧ̀ зове́мъ:

Ра́дꙋйсѧ, премꙋ́дрый ᲂу҆строи́телю гра́да пересла́влѧ рѧза́нскагѡ: ра́дꙋйсѧ, немо́лчный наста́вниче вѣ́ры и҆ бл҃гоче́стїѧ.

Ра́дꙋйсѧ, крі́не са́да бжⷭ҇твеннагѡ посредѣ̀ те́рнїѧ процвѣты́й: ра́дꙋйсѧ, плодоно́сное дре́во, пита́ющее а҆́лчꙋщихъ жи́зни вѣ́чныѧ.

Ра́дꙋйсѧ, растлѣ́нныхъ ѡ҆бы́чаєвъ и҆скорени́телю, бл҃ги́хъ же нра́вѡвъ насади́телю: ра́дꙋйсѧ, лю́тыхъ болѣ́зней и҆ недꙋ́гѡвъ ско́рый цѣли́телю.

Ра́дꙋйсѧ, а҆рхїере́євъ па́ствы рѧза́нскїѧ во бл҃гоꙋстрое́нїи є҆ѧ̀ при́сный посо́бниче: ра́дꙋйсѧ, бл҃ги́хъ нача́льникѡвъ и҆ градоправи́телей въ не́й незри́мый совѣ́тниче.

Ра́дꙋйсѧ, васі́лїе, первост҃и́телю рѧза́нскїй и҆ преди́вный чꙋдотво́рче.

Конда́къ ѳ҃

Возше́дъ на высотꙋ̀ бг҃оподо́бныѧ ст҃ости, сїѧ́ѧ свѣ́томъ вѣ́ры пред̾ человѣ́ки въ до́брыхъ дѣ́лѣхъ, ѡ҆́бразъ бы́лъ є҆сѝ па́ствѣ твое́й сло́вомъ, житїе́мъ, ᲂу҆че́нїемъ, вѣ́рою и҆ чистото́ю, наꙋча́ѧ всѣ́хъ разꙋ́мнѡ пѣ́ти бг҃ꙋ: А҆ллилꙋ́їа.

І҆́косъ ѳ҃

Вѣті̑и многовѣща́ннїи не мо́гꙋтъ по достоѧ́нїю восхвали́ти тѧ̀, бг҃омꙋ́дре васі́лїе, и҆ воспѣ́ти свѧ́тость житїѧ̀ твоегѡ̀ и҆ моли́твєнныѧ по́двиги, деннонѡ́щныѧ трꙋды̀ и҆ попечє́нїѧ, сп҃се́нїѧ ра́ди пасо́мыхъ под̾ѧ́тыѧ, непра́ведное и҆ лю́тое ѡ҆ѕлобле́нїе ѿ бꙋ́їихъ жи́телей гра́да мꙋ́рома, кро́тость и҆ неѕло́бїе твоѐ, па́че же двꙋкра́тное твоѐ чꙋ́дное по вода́мъ пла́ванїе. мы́ же со ᲂу҆дивле́нїемъ бл҃гоче́стно зове́мъ тѝ сицева̑ѧ:

Ра́дꙋйсѧ, бг҃омꙋ́дрыхъ ст҃и́телей высо́каѧ похвало̀: ра́дꙋйсѧ, прпⷣбныхъ и҆ првⷣныхъ пречестна́ѧ сла́во.

Ра́дꙋйсѧ, мч҃никѡвъ и҆ и҆сповѣ́дникѡвъ соприча́стниче: ра́дꙋйсѧ, а҆пⷭ҇лѡвъ є҆динонра́вниче и҆ сопресто́льниче.

Ра́дꙋйсѧ, па́стырей цр҃кве ѡ҆́бразе достоподража́тельный: ра́дꙋйсѧ, мона́шествꙋющихъ наста́вниче и҆ рꙋководи́телю.

Ра́дꙋйсѧ, ꙗ҆́кѡ тѣ́снымъ и҆ жесто́кимъ пꙋте́мъ всегда̀ ходи́лъ є҆сѝ: ра́дꙋйсѧ, ꙗ҆́кѡ тѣ́мъ вѣ́чныѧ сла́вы дости́глъ є҆сѝ.

Ра́дꙋйсѧ, васі́лїе, первост҃и́телю рѧза́нскїй и҆ преди́вный чꙋдотво́рче.

Конда́къ і҃

Спастѝ хотѧ̀, просвѣти́ти же и҆ ᲂу҆тѣ́шити лю́ди страны̀ рѧза́нскїѧ, всебл҃гі́й гдⷭ҇ь и҆збра́ тѧ, пречꙋ́дне ст҃и́телю, во и҆сполни́телѧ є҆гѡ̀ всебл҃гі́ѧ во́ли и҆ ве́лїѧ млⷭ҇ти, да ᲂу҆крѣпи́ши немощны̑ѧ. ᲂу҆тѣ́шиши печа̑льныѧ, и҆спра́виши порѡ́чныѧ, наꙋча́ѧ всѣ́хъ бл҃гоче́стнѡ пѣ́ти бг҃ꙋ: А҆ллилꙋ́їа.

І҆́косъ і҃

Стѣна̀ и҆ ᲂу҆твержде́нїе, ѻ҆те́цъ и҆ застꙋ́пникъ дре́внїѧ па́ствы рѧза́нскїѧ, прехва́льне васі́лїе, бы́лъ є҆сѝ. бꙋ́ди и҆ на́мъ, нѡ́вымъ ча́дѡмъ твои́мъ, щи́тъ и҆ ѡ҆гражде́нїе ѿ вра̑гъ ви́димыхъ и҆ неви́димыхъ, помо́щникъ въ бѣда́хъ и҆ ско́рбехъ и҆ и҆скꙋше́нїихъ, да съ любо́вїю бл҃года́рственнѡ зове́мъ тѝ:

Ра́дꙋйсѧ, чистоты̀ и҆ цѣломꙋ́дрїѧ тве́рдый ѡ҆храни́телю: ра́дꙋйсѧ, ѡ҆держи́мыхъ стꙋ́дными по́мыслы вѣ́рный помо́щниче.

Ра́дꙋйсѧ, непра́веднѡ ѕлосло́вимыхъ и҆ ѡ҆клеветава́емыхъ наде́жный защи́тниче: ра́дꙋйсѧ, ѕлосло́вѧщихъ и҆ ѡ҆клеветава́ющихъ бли̑жнїѧ своѧ̑ си́льный ѡ҆бличи́телю.

Ра́дꙋйсѧ, пла́вающихъ по вода́мъ и҆ пꙋтеше́ствꙋющихъ бл҃гі́й пꙋтеводи́телю: ра́дꙋйсѧ, ѡ҆бꙋрева́емыхъ волна́ми морски́ми ти́хое приста́нище.

Ра́дꙋйсѧ, ᲂу҆се́рднѡ трꙋжда́ющихсѧ во бл҃ги́хъ дѣ́лѣхъ зва́нїѧ своегѡ̀ при́сный споспѣ́шниче: ра́дꙋйсѧ, те́плѣ молѧ́щихсѧ и҆ съ вѣ́рою под̾ кро́въ тво́й прибѣга́ющихъ ско́рый предста́телю.

Ра́дꙋйсѧ, васі́лїе, первост҃и́телю рѧза́нскїй и҆ преди́вный чꙋдотво́рче.

Конда́къ а҃і

Пѣ́нїе смире́нное и҆ ᲂу҆се́рдное прїимѝ ѿ на́съ, пребл҃же́нне ѻ҆́ч҃е васі́лїе, не ѿри́ни на́съ грѣ́шныхъ и҆ недосто́йныхъ, къ по́мощи твое́й прибѣга́ющихъ, но ᲂу҆слы́ши бл҃госе́рднѡ молє́нїѧ на̑ша, да съ ра́достїю пое́мъ ѡ҆ тебѣ̀ бг҃ꙋ: А҆ллилꙋ́їа.

І҆́косъ а҃і

Свѣтоза́рнаѧ свѣща̀, свѣ́тлѡ горѣ́вшаѧ и҆ свѣти́вшаѧ на трїе́хъ высо́кихъ свѣти́льницѣхъ бж҃їѧ цр҃кве, во трїе́хъ градѣ́хъ страны̀ рѧза́нскїѧ, достосла́вне ѻ҆́ч҃е, бы́лъ є҆сѝ, блиста́ѧ и҆ ѡ҆зарѧ́ѧ всѣ́хъ свѣ́томъ бг҃овѣ́дѣнїѧ и҆ сп҃се́нїѧ. ѡ҆зарѝ и҆ на́съ, свѧ́те, ѡ҆мраче́нныхъ мгло́ю страсте́й и҆ сꙋемꙋ́дрїѧ, да со ᲂу҆миле́нїемъ тебѣ̀ зове́мъ:

Ра́дꙋйсѧ, проповѣ́дникѡвъ бжⷭ҇твенныѧ и҆́стины споспѣ́шниче: ра́дꙋйсѧ, хꙋли́телей правосла́вныѧ вѣ́ры и҆ врагѡ́въ хрⷭ҇то́вы цр҃кве противобо́рниче.

Ра́дꙋйсѧ, напа́ствꙋемыхъ и҆ неви́ннѡ гони́мыхъ защи́то и҆ ᲂу҆тѣше́нїе: ра́дꙋйсѧ, дѣ́вственникѡвъ и҆ по́стникѡвъ тве́рдое ᲂу҆крѣпле́нїе.

Ра́дꙋйсѧ, кро́ткихъ и҆ смире́нныхъ вѣ́рнѣйшїй покрови́телю: ра́дꙋйсѧ, заблꙋ́ждшихъ на пꙋ́ть пра́вый наста́вниче.

Ра́дꙋйсѧ, ꙗ҆́кѡ ᲂу҆хищрє́нїѧ де́мѡнскаѧ разрꙋша́еши и҆ стꙋжа́ємыѧ ѿ бѣсѡ́въ свобожда́еши: ра́дꙋйсѧ, ꙗ҆́кѡ волнє́нїѧ водна̑ѧ и҆ свирѣ̑пыѧ бꙋ́ри ᲂу҆кроща́еши.

Ра́дꙋйсѧ, васі́лїе, первост҃и́телю рѧза́нскїй и҆ преди́вный чꙋдотво́рче.

Конда́къ в҃і

Бл҃года́ть и҆мѣ́ѧ ѿ возлюби́вшагѡ тѧ̀ гдⷭ҇а, свѧ́те васі́лїе, и҆сполнѧ́ти всѧ̑ бл҃га̑ѧ прошє́нїѧ на̑ша, и҆спросѝ бг҃опрїѧ́тными твои́ми мл҃твами всѧ̑ бл҃га̑ѧ и҆ полє́знаѧ дꙋша́мъ и҆ тѣлесє́мъ на́шымъ, па́че же ѡ҆ставле́нїе согрѣше́нїй на́шихъ, да со ᲂу҆миле́нїемъ се́рдца бл҃года́рнѡ пое́мъ бг҃ꙋ: А҆ллилꙋ́їа.

І҆́косъ в҃і

Пою́ще твоѐ равноа́гг҃льное ст҃о́е житїѐ, многотрꙋ́дное и҆ многопло́дное слꙋже́нїе твоѐ цр҃кви бж҃їей, є҆ще́ же вє́лїѧ и҆ ди̑внаѧ чꙋдеса̀, тебє̀ ра́ди ꙗ҆влє́ннаѧ возлюби́вшимъ тѧ̀ гдⷭ҇емъ, восхвалѧ́емъ тѧ̀, ᲂу҆го́дниче хрⷭ҇то́въ васі́лїе. ѻ҆ба́че не могꙋ́ще досто́йнѡ и҆з̾ѡбрази́ти вели́чїе и҆ сла́вꙋ твою̀, со бл҃гоговѣ́нїемъ и҆ ра́достїю зове́мъ тѝ:

Ра́дꙋйсѧ, бг҃омꙋ́дре и҆ бг҃оизбра́нне первопа́стырю гра́да пересла́влѧ рѧза́нскагѡ, па́че всѣ́хъ па́стырей є҆гѡ̀ превознесе́нный: ра́дꙋйсѧ, вѣнце́мъ сла́вы ѿ а҆рхїере́а вѣ́чнагѡ, сн҃а бж҃їѧ, ᲂу҆вѣнча́нный.

Ра́дꙋйсѧ, ꙗ҆́кѡ бꙋ́рное жите́йское мо́ре со сла́вою преплы́лъ є҆сѝ и҆ въ ти́хое нбⷭ҇ное приста́нище дости́глъ є҆сѝ: ра́дꙋйсѧ, ꙗ҆́кѡ тече́нїе слꙋже́нїѧ твоегѡ̀ до́брѣ соверши́лъ є҆сѝ и҆ вѣ́рꙋ твою̀ непоро́чнꙋ соблю́лъ є҆сѝ.

Ра́дꙋйсѧ, ꙗ҆́кѡ со а҆пⷭ҇лы и҆ ст҃и́тели водворѧ́ешисѧ: ра́дꙋйсѧ, ꙗ҆́кѡ съ со́нмомъ мч҃никѡвъ, прпⷣбныхъ и҆ всѣ́хъ првⷣныхъ весели́шисѧ.

Ра́дꙋйсѧ, ꙗ҆́кѡ пред̾ лице́мъ гдⷭ҇а ны́нѣ предстои́ши и҆ съ ли̑ки а҆́гг҃льскими є҆го̀ славосло́виши: ра́дꙋйсѧ, ꙗ҆́кѡ па́ствꙋ рѧза́нскꙋю непреста́ннѡ назира́еши и҆ всѧ̑ бл҃га̑ѧ є҆́й ᲂу҆ цр҃ѧ̀ царе́й хода́тайствꙋеши.

Ра́дꙋйсѧ, васі́лїе, первост҃и́телю рѧза́нскїй и҆ преди́вный чꙋдотво́рче.

Конда́къ г҃і

ѽ пресла́вный ѻ҆́ч҃е на́шъ васі́лїе, ст҃и́телю хрⷭ҇то́въ и҆ чꙋдотво́рче! прїимѝ сїѐ ма́лое моле́нїе на́ше, и҆ дѣ́йственнымъ твои́мъ пред̾ бг҃омъ хода́тайствомъ и҆зба́ви на́съ ѿ ко́зней вра́жїихъ и҆ всѧ́кагѡ ѕла̀, да въ ми́рѣ и҆ покаѧ́нїи про́чее вре́мѧ житїѧ̀ на́шегѡ сконча́емъ и҆ дости́гнемъ бл҃же́ннагѡ ᲂу҆покое́нїѧ въ вѣ́чныхъ ѡ҆би́телехъ, и҆дѣ́же кꙋ́пнѡ съ тобо́ю и҆ всѣ́ми ст҃ы́ми гла́сомъ ра́дованїѧ во вѣ́ки воспое́мъ бг҃ꙋ: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃лꙋ бж҃їю подо́бенъ бы́лъ є҆сѝ, ст҃и́телю хрⷭ҇то́въ, свѣ́тлостїю ᲂу҆ма̀ твоегѡ̀, чистото́ю се́рдца и҆ неѕло́бїемъ, пожи́въ на землѝ, а҆́ки безпло́тенъ: сегѡ̀ ра́ди просла́ви тѧ̀ всевы́шнїй гдⷭ҇ь нетлѣ́нїемъ честны́хъ моще́й твои́хъ и҆ ди́вными чꙋдесы̀. тѣ́мже съ любо́вїю бл҃гоговѣ́йнѡ зове́мъ тѝ:

Ра́дꙋйсѧ, пре́жде рожде́нїѧ твоегѡ̀ на слꙋже́нїе сп҃се́нїю люде́й свы́ше пред̾избра́нный: ра́дꙋйсѧ, ѿ пеле́нъ младе́нческихъ гдⷭ҇ꙋ бг҃ꙋ посвѧще́нный.

Ра́дꙋйсѧ, ѿ ю҆́ности твоеѧ̀ всѣ́мъ се́рдцемъ гдⷭ҇а возлюби́вый: ра́дꙋйсѧ, всѧ̑ блага̑ѧ и҆ кра̑снаѧ мі́ра сегѡ̀ гдⷭ҇а ра́ди презрѣ́вый.

Ра́дꙋйсѧ, въ повелѣ́нїихъ гдⷭ҇нихъ всегда̀ ᲂу҆се́рднѡ ходи́вый: ра́дꙋйсѧ, всѧ́кими бг҃олюбе́зными добродѣ́тельми дꙋ́шꙋ твою̀ ᲂу҆краси́вый.

Ра́дꙋйсѧ, ᲂу҆́мъ тво́й ве́сь ко гдⷭ҇ꙋ ᲂу҆стреми́вый: ра́дꙋйсѧ, высо́кїй ѡ҆́бразъ и҆́ноческихъ по́двигѡвъ въ житїѝ твое́мъ ꙗ҆ви́вый.

Ра́дꙋйсѧ, васі́лїе, первост҃и́телю рѧза́нскїй и҆ преди́вный чꙋдотво́рче.

Конда́къ а҃

И҆збра́нномꙋ ѿ нбⷭ҇нагѡ пастыренача́льника, и҆ ѿ ст҃а́гѡ дх҃а поста́вленномꙋ въ па́стырѧ страны̀ рѧза́нскїѧ и҆ мꙋ́ромскїѧ, просла́вльшемꙋсѧ ст҃ы́мъ житїе́мъ и҆ чꙋдесы̀, похва̑льнаѧ пѣ̑нїѧ прино́симъ тѝ, ст҃и́телю хрⷭ҇то́въ васі́лїе. ты́ же, ꙗ҆́кѡ и҆мѣ́ѧй дерзнове́нїе ко гдⷭ҇ꙋ, ѿ всѧ́кихъ на́съ ѕѡ́лъ и҆ ѡ҆бстоѧ́нїй свобожда́й, да съ ра́достїю и҆ бл҃годаре́нїемъ всегда̀ тебѣ̀ зове́мъ:

Ра́дꙋйсѧ, васі́лїе, первост҃и́телю рѧза́нскїй и҆ преди́вный чꙋдотво́рче.

Моли́твы

Бг҃оизбра́нне первост҃и́телю на́шъ и҆ ᲂу҆го́дниче хрⷭ҇то́въ васі́лїе, ст҃остїю житїѧ̀ твоегѡ̀, чꙋ́днымъ по вода́мъ пла́ванїемъ и҆ нетлѣ́нїемъ моще́й твои́хъ препросла́вленне! предстоѧ̀ прⷭ҇то́лꙋ вседержи́телѧ и҆ и҆мѣ́ѧ ве́лїе къ немꙋ̀ дерзнове́нїе, молѝ є҆го̀, да проба́витъ млⷭ҇ть свою̀ къ на́мъ грѣ̑шнымъ и҆ недостѡ́йнымъ рабѡ́мъ свои̑мъ, и҆ да́рꙋетъ наро́дꙋ здра́вїе, долгоде́нствїе и҆ во все́мъ благо́е поспѣше́нїе, па́стырємъ цр҃кве да пода́стъ дꙋхо́вное трезве́нїе и҆ ре́вность ѡ҆ спасе́нїи пасо́мыхъ: градонача́льникѡмъ и҆ сꙋдїѧ́мъ стра́хъ бж҃їй, правотꙋ̀ и҆ безкоры́стїе: во́инѡмъ терпѣ́нїе, мꙋ́жество и҆ на врагѝ ѡ҆долѣ́нїе: сꙋпрꙋ́гѡмъ взаи́мнꙋю любо́вь, вѣ́рность и҆ є҆диномы́слїе: кꙋ́плю дѣ́ющымъ праводꙋ́шїе, земледѣ́льцємъ трꙋдолю́бїе и҆ тре́звенность, си̑рымъ призрѣ́нїе, болѧ́щымъ и҆сцѣле́нїе, ѡ҆би̑димымъ застꙋпле́нїе, ѡ҆клеветава́ємымъ ѡ҆правда́нїе, и҆ всѣ̑мъ лю́дємъ па́ствы твоеѧ̀ всѧ̑ ко вре́меннѣй и҆ вѣ́чнѣй жи́зни потрє́бнаѧ. па́че же молѝ гдⷭ҇а, мл҃твенниче на́шъ, да прости́тъ на́мъ всѧ́кое согрѣше́нїе во́льное и҆ нево́льное, и҆ ѡ҆чи́ститъ ѿ всѧ́кїѧ скве́рны пло́ти и҆ дꙋ́ха: да и҆зба́витъ ѿ ко́зней и҆ско́ннагѡ врага̀, ненави́стника и҆ человѣкоꙋбі́йцы, и҆ сохрани́тъ ѿ клеветы̀ человѣ́ческїѧ: да ᲂу҆тверди́тъ во и҆́стиннѣй спаси́тельнѣй вѣ́рѣ и҆ нелицемѣ́рнѣмъ бл҃гоче́стїи: да соблюде́тъ ѿ сꙋемꙋ́дрїѧ и҆ дꙋшетлѣ́нныхъ ᲂу҆че́нїй дꙋхѡ́въ ле́стчихъ, дѣ́йствꙋющихъ въ вѣ́цѣ се́мъ въ сынѣ́хъ противле́нїѧ: да ѡ҆храни́тъ сердца̀ на̑ша ѿ прельще́нїѧ кра́сными мі́ра сегѡ̀, и҆ да наꙋчи́тъ ѡ҆греба́тисѧ ѿ плотски́хъ по́хотей и҆ страсте́й, гѡ́рнѧѧ мꙋ́дрствовати, а҆ не земна̑ѧ. молѝ, ѻ҆́ч҃е на́шъ, всест҃а́го и҆ бжⷭ҇твеннаго дх҃а, да возсїѧ́етъ свѣ́тъ бл҃года́ти є҆гѡ̀ бра́тїѧмъ на́шымъ по пло́ти, во тьмѣ̀ лжевѣ́рїѧ сѣдѧ́щымъ, и҆ да позна́ютъ хрⷭ҇та̀, бг҃а и҆́стиннаго, є҆ди́наго сп҃си́телѧ всѣ́хъ человѣ̑къ: да возсїѧ́етъ свѣ́тъ се́й и҆ блꙋжда́ющымъ на распꙋ́тїихъ раско́ла, да вразꙋмѧ́тсѧ и҆ прїи́дꙋтъ во ѡ҆гра́дꙋ правосла́вныѧ цр҃кве, въ не́йже є҆ди́нѣй несомнѣ́ннѡ содѣва́етсѧ вѣ́чное сп҃се́нїе вѣ́рныхъ. ѽ ст҃и́телю хрⷭ҇то́въ, мл҃твенниче на́шъ! молѝ хрⷭ҇та̀ бг҃а и҆ пречтⷭ҇ꙋю мт҃рь є҆гѡ̀, да ᲂу҆праздни́тъ вражды̑ на́шѧ и҆ нестроє́нїѧ, соедини́тъ же всѧ̑ ны̀ бг҃оподо́бною любо́вїю, да въ ми́рѣ и҆ є҆диномы́слїи, жела́нїемъ сп҃се́нїѧ горѧ́ще, гдⷭ҇еви рабо́тающе, дрꙋ́гъ дрꙋ́га тѧгѡты̀ носѧ́ще, до́брымъ по́двигомъ подвиза́емсѧ, и҆ тече́нїе сконча́вше, дости́гнемъ въ ти́хое приста́нище нбⷭ҇нагѡ црⷭ҇твїѧ, и҆ просла́вимъ неизрече́нное чл҃вѣколю́бїе и҆ милосе́рдїе сп҃си́телѧ на́шегѡ, і҆и҃са хрⷭ҇та̀, сн҃а бж҃їѧ, со безнача́льнымъ є҆гѡ̀ ѻ҆ц҃е́мъ и҆ прест҃ы́мъ дх҃омъ, во вѣ́ки вѣкѡ́въ. А҆ми́нь.