Православный календарь
Размер шрифта:

Ака́ѳістъ

Ака́ѳїстъ свѧти́телю І҆ѡа́ннꙋ Тобо́льскому, Сиби́рскому чꙋдотво́рцꙋ

Свт. Иоанна, митр. Тобольского (1715) 23 июня 2026

Конда́къ а҃

Возбра́нный чꙋдотво́рче и҆ премꙋ́дрый па́стырю, свѣти́льниче бж҃їй, ѡ҆сїѧ́вый страны̑ сиби̑рскїѧ, восхвалѧ́емъ тѧ̀ любо́вїю, ст҃е і҆ѡа́нне, ѡ҆ чꙋдесѣ́хъ твои́хъ ра́дꙋющесѧ. Ты́ же предстоѧ́й сꙋ́щемꙋ въ невече́рней сла́вѣ цр҃ю̀ нбⷭ҇номꙋ, молѝ ѿ всѧ́кихъ бѣ́дъ сохрани́тисѧ пою́щымъ тѝ:

Ра́дꙋйсѧ, ст҃и́телю ѻ҆́тче на́шъ і҆ѡа́нне, сиби́рскїй чꙋдотво́рче.

І҆́косъ а҃

А҆́гг҃лы ᲂу҆диви́лъ є҆сѝ пресла́внымъ житїе́мъ твои́мъ, ст҃ы́й ѻ҆́тче, серафі́мски возже́гъ сщ҃е́нный пла́мень вѣ́ры въ зижди́телѧ премꙋ́драго, и҆ возлюби́лъ є҆сѝ ма́лыхъ си́хъ, и҆̀хже бг҃ъ сло́во бра́тїю свою̀ нарица́етъ. Тѣ́мже и҆ мы̀, покланѧ́ющесѧ тѝ, взыва́емъ:

Ра́дꙋйсѧ, тве́рдый ка́меню вѣ́ры правосла́вныѧ: ра́дꙋйсѧ, свѣ́точе любвѐ хрⷭ҇тїа́нскїѧ.

Ра́дꙋйсѧ, пра́вды хрⷭ҇то́вы слꙋжи́телю: ра́дꙋйсѧ, и҆́стины бж҃їѧ носи́телю.

Ра́дꙋйсѧ, просла́вивый ѻ҆ц҃а̀ нбⷭ҇наго до́брыми дѣ́лы твои́ми: ра́дꙋйсѧ, црⷭ҇твꙋѧй во сла́вѣ бж҃їей со всѣ́ми ст҃ы́ми.

Ра́дꙋйсѧ, любо́вїю твое́ю ѡ҆б̾е́млѧй стра́ждꙋщыѧ: ра́дꙋйсѧ, мл҃твою твое́ю сп҃са́ѧй погиба́ющыѧ.

Ра́дꙋйсѧ, ст҃и́телю ѻ҆́тче на́шъ і҆ѡа́нне, сиби́рскїй чꙋдотво́рче.

Конда́къ в҃

Ви́дѧ жите́йское мо́ре, бꙋ́рею напа́стей воздвиза́емое, къ ти́хомꙋ приста́нищꙋ ѻ҆би́тели пече́рскїѧ прите́клъ є҆сѝ, крⷭ҇толю́бче, и҆ ѿре́ксѧ тлѣ́ннагѡ мі́ра, вѣ́чномꙋ бг҃ꙋ воспѣ́лъ є҆сѝ: А҆ллилꙋ́їа.

І҆́косъ в҃

Ра́зꙋмъ чи́стъ ѿ бг҃а тебѣ̀ дарова́сѧ, ѻ҆́тче і҆ѡа́нне, и҆ ты̀, ꙗ҆́кѡ вѣ́рный ра́бъ, дѣ́лавый и҆ трꙋди́выйсѧ, ᲂу҆мно́жилъ є҆сѝ бл҃года́ти тала́нтъ, тѣ́мже призва́ тѧ гдⷭ҇ь въ ра́дость вѣ́чнꙋю. Мы́ же пое́мъ тѝ, бг҃омꙋ́дре:

Ра́дꙋйсѧ, бдѣ́нїемъ чистотꙋ̀ ᲂу҆ма̀ сохрани́вый: ра́дꙋйсѧ, поще́нїемъ стра̑сти плотскі̑ѧ ᲂу҆мертви́вый.

Ра́дꙋйсѧ, ѕмі́ѧ лꙋка́ваго смире́нїемъ побѣди́вый: ра́дꙋйсѧ, бога́тство нетлѣ́нное полꙋчи́вый.

Ра́дꙋйсѧ, се́рдце вели́кое въ терпѣ́нїи стѧжа́вый: ра́дꙋйсѧ, ѻ҆́рле, къ нб҃сѝ ᲂу҆мозрѣ́нїемъ воспари́вый.

Ра́дꙋйсѧ, по пꙋтѝ крⷭ҇тномꙋ ше́ствовавый: ра́дꙋйсѧ, црⷭ҇твїе нбⷭ҇ное наслѣ́довавый.

Ра́дꙋйсѧ, ст҃и́телю ѻ҆́тче на́шъ і҆ѡа́нне, сиби́рскїй чꙋдотво́рче.

Конда́къ г҃

Си́лою крⷭ҇та̀ неꙋстраши́мѡ подвиза́лсѧ є҆сѝ, прпⷣбне і҆ѡа́нне, проти́вꙋ кнѧ́зѧ мі́ра сегѡ̀, во́инствꙋѧ за цр҃ковь и҆ водрꙋжа́ѧ зна́менїе побѣ́ды хрⷭ҇то́вы съ пѣ́снїю: А҆ллилꙋ́їа.

І҆́косъ г҃

И҆мѣ́ѧ неѡскꙋ́дное млⷭ҇рдїе ко всѧ́комꙋ человѣ́кꙋ, ѻ҆́тче і҆ѡа́нне, ꙗ҆ви́лсѧ є҆сѝ скорбѧ́щымъ ᲂу҆тѣше́нїе, заблꙋ́ждшымъ вразꙋмле́нїе, ѡ҆би̑димымъ застꙋпле́нїе, ѡ҆ си́рыхъ и҆ вдови́цахъ неꙋсы́пное попече́нїе и҆ всѣ̑мъ помо́щникъ во сп҃се́нїи. Бл҃годари́мъ ѡ҆ тебѣ̀ бг҃а, ди́внаго во ст҃ы́хъ свои́хъ, и҆ тебѣ̀ прино́симъ пѣ́нїе сїѐ:

Ра́дꙋйсѧ, во́лю твою̀ во́ли бж҃їей соѡбразова́вый: ра́дꙋйсѧ, вѣ́рою бл҃года́ть позна́вый.

Ра́дꙋйсѧ, бл҃года́тїю добродѣ́тєли стѧжа́вый: ра́дꙋйсѧ, всего̀ себѐ ни́щымъ ѿда́вый.

Ра́дꙋйсѧ, въ млⷭ҇ти неизмѣ́нный: ра́дꙋйсѧ, врачꙋ̀ безме́здный.

Ра́дꙋйсѧ, немощны̑мъ ѿ всеѧ̀ дꙋшѝ послꙋжи́вый: ра́дꙋйсѧ, и҆́стиннѡ хрⷭ҇тꙋ̀ ᲂу҆годи́вый.

Ра́дꙋйсѧ, ст҃и́телю ѻ҆́тче на́шъ і҆ѡа́нне, сиби́рскїй чꙋдотво́рче.

Конда́къ д҃

Бꙋ́рю за́висти воздви́же лꙋка́вый въ сердца́хъ рабѡ́въ самолю́бїѧ, да погꙋби́тъ дѣ́ло твоѐ, и҆ наꙋчѝ гѡ́рдыѧ клевета́ти пред̾ цари̑ на тѧ̀, побо́рниче бл҃гоче́стїѧ. Бг҃ъ же и҆зведѐ пра́вдꙋ твою̀, ꙗ҆́кѡ свѣ́тъ, и҆ сп҃се́ тѧ, во смире́нїи пою́ща хрⷭ҇тꙋ̀: А҆ллилꙋ́їа.

І҆́косъ д҃

Слы́ша стена̑нїѧ бѣ́дствꙋющихъ во дни̑ гла́да, призва́лъ є҆сѝ дꙋхѡ́внаѧ ча̑да твоѧ̑ съ тобо́ю хлѣ́бъ насꙋ́щный раздаѧ́ти тре́бꙋющымъ, до́брый и҆ бо́дрый па́стырю, дꙋ́шы человѣ́чєскїѧ млⷭ҇рдїемъ назида́ѧй, и҆ ѿ гла́да и҆ безвре́менныѧ сме́рти лю́ди спаса́ѧй. Тѣ́мже въ че́сть и҆ сла́вꙋ прїимѝ пѣ́нїе сїѐ:

Ра́дꙋйсѧ, хлѣ́бомъ нбⷭ҇нымъ насыще́нный: ра́дꙋйсѧ, питїе́мъ безсме́ртїѧ напое́нный.

Ра́дꙋйсѧ, бг҃а сло́ва ᲂу҆ченичѐ неизмѣ́нный: ра́дꙋйсѧ, дх҃омъ ст҃ы́мъ ѡ҆сѣне́нный.

Ра́дꙋйсѧ, ѻ҆ц҃ꙋ̀ нбⷭ҇номꙋ всыновле́нный: ра́дꙋйсѧ, прест҃ы́ѧ трⷪ҇цы хра́ме ѡ҆дꙋшевле́нный.

Ра́дꙋйсѧ, ѿ бѣ́дъ и҆ скорбе́й и҆збавле́нїе: ра́дꙋйсѧ, лꙋка́выхъ серде́цъ и҆справле́нїе.

Ра́дꙋйсѧ, ст҃и́телю ѻ҆́тче на́шъ і҆ѡа́нне, сиби́рскїй чꙋдотво́рче.

Конда́къ є҃

Бг҃оразꙋ́мїѧ ѕвѣздо̀, возсїѧ́лъ є҆сѝ во тьмѣ̀ невѣ́дѣнїѧ, ѻ҆́тче і҆ѡа́нне, лꙋча́ми є҆ѵⷢ҇льскагѡ ᲂу҆че́нїѧ проника́ѧ въ сердца̀ человѣ́чєскаѧ и҆ подвиза́ѧ всѣ́хъ воспѣва́ти сл҃нцꙋ пра́вды хрⷭ҇тꙋ̀: А҆ллилꙋ́їа.

І҆́косъ є҃

Ви́дѧ мра́къ невѣ́дѣнїѧ, человѣ́ки покрыва́ющїй, бога́тство ᲂу҆че́нїѧ хрⷭ҇то́ва расточи́лъ є҆сѝ ще́дрѡ, и҆ неꙋста́ннѡ трꙋди́лсѧ є҆сѝ, ѻ҆́тче і҆ѡа́нне, си́лꙋ въ мл҃твѣ ѿ и҆сто́чника премꙋ́дрости почерпа́ѧ. Сегѡ̀ ра́ди почита́емъ твою̀ свѣтоно́снꙋю па́мѧть, взыва́юще:

Ра́дꙋйсѧ, ᲂу҆краше́нный сѣди́ною любомꙋ́дрїѧ: ра́дꙋйсѧ, позлаще́нный добродѣ́телїю смиренномꙋ́дрїѧ.

Ра́дꙋйсѧ, бг҃одꙋхнове́нный ᲂу҆чи́телю: ра́дꙋйсѧ, дꙋхо́внагѡ просвѣще́нїѧ покрови́телю.

Ра́дꙋйсѧ, ꙗ҆снотекꙋ́щаѧ стрꙋѧ̀ бг҃овѣ́дѣнїѧ: ра́дꙋйсѧ, и҆́стиннагѡ свѣ́та проповѣ́данїе.

Ра́дꙋйсѧ, ꙗ҆́кѡ ѻ҆́троки ᲂу҆мꙋдрѧ́еши: ра́дꙋйсѧ, ꙗ҆́кѡ младе́нцємъ ра́зꙋмъ ѿкрыва́еши.

Ра́дꙋйсѧ, ст҃и́телю ѻ҆́тче на́шъ і҆ѡа́нне, сиби́рскїй чꙋдотво́рче.

Конда́къ ѕ҃

Проповѣ́дникъ сла́вы бж҃їѧ дѣ́ломъ и҆ сло́вомъ бы́лъ є҆сѝ, ѻ҆́тче і҆ѡа́нне, тѣ́мже и҆збра́ тѧ прее́мника себѣ̀ ст҃и́тель ѳеодо́сїй, съ ни́мже во црⷭ҇твїи нбⷭ҇нѣмъ пое́ши: А҆ллилꙋ́їа.

І҆́косъ ѕ҃

Возсїѧ́лъ є҆сѝ въ домꙋ̀ бж҃їи, свѣти́льниче хрⷭ҇то́въ і҆ѡа́нне, є҆гда̀ и҆збра́ша тѧ̀ вѣ́рнїи во а҆рхїере́а, по бл҃же́ннѣй кончи́нѣ ст҃а́гѡ ѳеодо́сїа. Є҆гѡ́же па́ствꙋ вѣ́рнѡ ᲂу҆па́слъ є҆сѝ, пою́щꙋ тебѣ̀:

Ра́дꙋйсѧ, ꙗ҆́кѡ ѡ҆дѣ́ѧ тѧ̀ премⷣрость безлѣ́тнаѧ: ра́дꙋйсѧ, ꙗ҆́кѡ ᲂу҆краси́ тѧ красота̀ пресвѣ́тлаѧ.

Ра́дꙋйсѧ, въ ри́зꙋ сп҃се́нїѧ ѡ҆блече́нный: ра́дꙋйсѧ, влады́ко смире́нный.

Ра́дꙋйсѧ, вѣнце́мъ сла́вы вѣнча́нный: ра́дꙋйсѧ, а҆рхїпа́стырю и҆збра́нный.

Ра́дꙋйсѧ, ѻ҆́вцы твоѧ̑ сохрани́вый: ра́дꙋйсѧ, по́двигъ любвѐ соверши́вый.

Ра́дꙋйсѧ, ст҃и́телю ѻ҆́тче на́шъ і҆ѡа́нне, сиби́рскїй чꙋдотво́рче.

Конда́къ з҃

Хотѧ̀ полꙋчи́ти нбⷭ҇нꙋю сла́вꙋ, бл҃же́нне і҆ѡа́нне, списа́лъ є҆сѝ кни̑ги мнѡ́гїѧ, въ ни́хже наꙋча́еши вѣ̑рныѧ ᲂу҆пова́ти на бг҃а и҆ въ ско́рби пѣ́ти є҆мꙋ̀: А҆ллилꙋ́їа.

І҆́косъ з҃

Но́вый чꙋдотво́рецъ ст҃и́тель ѳеодо́сїй болѧ́щꙋ тѝ, ѻ҆́тче і҆ѡа́нне, ꙗ҆ви́сѧ и҆ повелѣ̀ тебѣ̀ соверша́ти лїтꙋргі́ю. Ты́ же а҆́бїе воста̀ ѿ ѻ҆дра̀ болѣ́зни здра́въ и҆ вознесѐ бл҃годаре́нїе хрⷭ҇тꙋ̀. Ѡ҆ се́мъ ра́дꙋющесѧ, пое́мъ тѝ:

Ра́дꙋйсѧ, таи́нниче мл҃твенныѧ сла́дости: ра́дꙋйсѧ, храни́телю бл҃года́тныѧ ра́дости.

Ра́дꙋйсѧ, въ ско́рби и҆ болѣ́зни нбⷭ҇наго врача̀ призва́вый: ра́дꙋйсѧ, по вѣ́рѣ твое́й и҆сцѣле́нїе прїѧ́вый.

Ра́дꙋйсѧ, бл҃гоꙋха́нїѧ цвѣ́те, возрасты́й въ безсме́ртїе: ра́дꙋйсѧ, высото́ю житїѧ̀ твоегѡ̀ посрами́вый нече́стїе.

Ра́дꙋйсѧ, ꙗ҆́кѡ призыва́ющымъ тѧ̀ помога́еши: ра́дꙋйсѧ, ꙗ҆́кѡ въ со́нїихъ и҆ видѣ́нїихъ вѣ̑рныѧ посѣща́еши.

Ра́дꙋйсѧ, ст҃и́телю ѻ҆́тче на́шъ і҆ѡа́нне, сиби́рскїй чꙋдотво́рче.

Конда́къ и҃

Стра́нное чꙋ́до ви́димъ въ тебѣ̀, бг҃оно́сне і҆ѡа́нне, ты́ бо въ ста́рости, ꙗ҆́кѡ ю҆́ный, и҆спо́лненъ си́лъ, послꙋжи́ти хрⷭ҇тꙋ̀ въ сиби́рь прише́лъ є҆сѝ, вѣща́нїе же и҆́стины правосла́вїѧ трꙋды̑ твои́ми про́йде до землѝ кита́йскїѧ, и҆ но́вїи лю́дїе бж҃їи наꙋчи́шасѧ пѣ́ти: А҆ллилꙋ́їа.

І҆́косъ и҃

Ве́сь бы́лъ є҆сѝ въ бз҃ѣ, є҆го́же проповѣ́далъ є҆сѝ во странѣ̀ и҆згна́нїѧ, ᲂу҆множа́ѧ ста́до сп҃се́нныхъ, тѣ́мже цр҃ковь велича́етъ тѧ̀, пою́щи:

Ра́дꙋйсѧ, лю́ди ѿ і҆́дѡлъ ко хрⷭ҇тꙋ̀ ѡ҆браща́ѧй: ра́дꙋйсѧ, і҆кѡ́нами бг҃омт҃ре дꙋхо́вныхъ ча̑дъ бл҃гословлѧ́ѧй.

Ра́дꙋйсѧ, ꙗ҆́кѡ хла́днꙋю сиби́рь бл҃года́тнѡ согрѣва́еши: ра́дꙋйсѧ, ꙗ҆́кѡ но́щь скорбе́й ѿгонѧ́еши.

Ра́дꙋйсѧ, ꙗ҆́кѡ всѣ̑мъ состра́ждеши: ра́дꙋйсѧ, ꙗ҆́кѡ пра́виломъ житїѧ̀ твоегѡ̀ всѣ́хъ назида́еши.

Ра́дꙋйсѧ, темни́цъ посѣти́телю: ра́дꙋйсѧ, и҆́стинный хрⷭ҇то́въ слꙋжи́телю.

Ра́дꙋйсѧ, ст҃и́телю ѻ҆́тче на́шъ і҆ѡа́нне, сиби́рскїй чꙋдотво́рче.

Конда́къ ѳ҃

Всѐ твоѐ се́рдце ѿда́лъ є҆сѝ во и҆сполне́нїе є҆ѵⷢ҇льскїѧ пра́вды, тѣ́мже мнѡ́гаѧ дѡ́браѧ дѣла̀ соверши́лъ є҆сѝ, бг҃олюби́вый ѻ҆́тче, въ кра́ткое вре́мѧ слꙋже́нїѧ твоегѡ̀ въ тобо́льскѣ, та́йнѡ бл҃готворѧ̀ и҆ ᲂу҆́зники посѣща́ѧ во и҆́мѧ і҆и҃са хрⷭ҇та̀, є҆мꙋ́же всѣ́хъ призыва́еши возглаша́ти: А҆ллилꙋ́їа.

І҆́косъ ѳ҃

Вѣті́йство человѣ̑къ не мо́жетъ сложи́ти досто́йнꙋю похвалꙋ̀ ст҃ы́ни твое́й, ѻ҆́тче, ꙗ҆́кѡ са́мъ бг҃ъ просла́ви тѧ̀ чꙋ́дною кончи́ною житїѧ̀ твоегѡ̀, ю҆́же прови́дѧ, соверши́лъ є҆сѝ лїтꙋргі́ю, и҆ послꙋжи́въ трапе́зѣ ни́щихъ въ домꙋ̀ твое́мъ, ᲂу҆едини́лсѧ є҆сѝ на мл҃твꙋ и҆ та́кѡ ѿше́лъ є҆сѝ ко гдⷭ҇ꙋ, пред̾ і҆кѡ́ною бг҃омт҃ре приклони́всѧ. Мы́ же во ᲂу҆миле́нїи пое́мъ тѝ:

Ра́дꙋйсѧ, ᲂу҆снꙋ́вый пло́тїю на землѝ: ра́дꙋйсѧ, живы́й дꙋше́ю на нб҃сѝ.

Ра́дꙋйсѧ, со а҆пⷭ҇лы хрⷭ҇тꙋ̀ покланѧ́ѧйсѧ: ра́дꙋйсѧ, съ мч҃нки вѣнча́ѧйсѧ.

Ра́дꙋйсѧ, въ собо́рѣ ст҃ы́хъ ѻ҆тє́цъ сїѧ́ѧй: ра́дꙋйсѧ, въ ли́цѣ прпⷣбныхъ воспѣва́ѧй.

Ра́дꙋйсѧ, і҆кѡ́нꙋ бг҃омт҃ре дарова́вый тобо́льскꙋ во бл҃гослове́нїе: ра́дꙋйсѧ, ꙗ҆́кѡ сїѧ̀ чꙋдотво́рнаѧ і҆кѡ́на є҆́сть на́ше ѡ҆гражде́нїе.

Ра́дꙋйсѧ, ст҃и́телю ѻ҆́тче на́шъ і҆ѡа́нне, сиби́рскїй чꙋдотво́рче.

Конда́къ і҃

Сп҃се́нїе дꙋша́мъ на́шымъ и҆спросѝ, ѻ҆́тче ст҃ы́й і҆ѡа́нне, да возсїѧ́ютъ пра́вда и҆ ми́ръ посредѣ̀ па́ствы твоеѧ̀, и҆ въ цр҃кви вели́цѣй и҆сповѣ́мысѧ бг҃ꙋ: А҆ллилꙋ́їа.

І҆́косъ і҃

Стѣна̀ є҆сѝ бѣ̑днымъ и҆ сиро́тствꙋющымъ, млⷭ҇тиве ст҃и́телю і҆ѡа́нне, ᲂу҆тѣше́нїе на́ше во дни̑ ско́рби, и҆сцѣле́нїе недꙋ́гꙋющымъ, просвѣще́нїе слѣпотствꙋ́ющымъ. Сегѡ̀ ра́ди, припа́дающе ко ст҃ы́нѣ твое́й, зове́мъ тѝ:

Ра́дꙋйсѧ, ꙗ҆́кѡ дѣ́ло земна́гѡ житїѧ̀ твоегѡ̀ продолжа́еши: ра́дꙋйсѧ, ꙗ҆́кѡ на стра́жи сп҃се́нїѧ на́шегѡ пребыва́еши.

Ра́дꙋйсѧ, по́стниче и҆ мл҃твенниче, ѕлы̑ѧ дꙋ́хи и҆згонѧ́ѧй: ра́дꙋйсѧ, дѣ́вственниче, разсла́блєнныѧ ᲂу҆крѣплѧ́ѧй.

Ра́дꙋйсѧ, бж҃їй свѣти́льниче, зрѣ́нїе ᲂу҆ѧснѧ́ѧй: ра́дꙋйсѧ, проповѣ́дниче вѣ́ры, слꙋ́хъ и҆сцѣлѧ́ѧй.

Ра́дꙋйсѧ, ꙗ҆́кѡ мно́зи припа́даютъ къ тебѣ̀ ѡ҆сщ҃а́емїи: ра́дꙋйсѧ, ꙗ҆́кѡ и҆здале́ча мо́лѧтсѧ тебѣ̀ сп҃са́емїи.

Ра́дꙋйсѧ, ст҃и́телю ѻ҆́тче на́шъ і҆ѡа́нне, сиби́рскїй чꙋдотво́рче.

Конда́къ а҃і

Пѣ́нїе сїѐ, ꙗ҆́кѡ да́ръ смире́нный, прїимѝ ѿ на́съ, ѻ҆́тче і҆ѡа́нне, и҆ соверше́нный да́ръ любвѐ на́мъ и҆спросѝ, да ᲂу҆́зримъ сла́вꙋ бж҃їю и҆ въ нб҃сѣ́хъ ᲂу҆слы́шимъ: А҆ллилꙋ́їа.

І҆́косъ а҃і

Свѣтоза́рное со́лнце, возше́дшее во тьмѣ̀ грѣхо́внѣй, зри́шисѧ, ѻ҆́тче прпⷣбне, живы́й бо во вѣ́ки дарова̀ тебѣ̀ вла́сть и҆ по сме́рти и҆згонѧ́ти де́моны и҆ собира́ти вѣ̑рныѧ на мл҃твꙋ, тѣ́мже двѣ̀ стѣ̀ лѣ́тъ притека́хꙋ ко гро́бꙋ твоемꙋ̀ лю́дїе и҆ завѣща́хꙋ ро́дꙋ грѧдꙋ́щемꙋ велича́ти тѧ̀:

Ра́дꙋйсѧ, ꙗ҆́кѡ тꙋ́чы невѣ́рїѧ разгонѧ́еши: ра́дꙋйсѧ, ꙗ҆́кѡ мра̑чныѧ дꙋ́шы вѣ́рою ѡ҆зарѧ́еши.

Ра́дꙋйсѧ, ꙗ҆́кѡ наде́ждꙋ сп҃се́нїѧ ѡ҆живлѧ́еши: ра́дꙋйсѧ, ꙗ҆́кѡ ѿча̑ѧнныѧ сп҃са́еши.

Ра́дꙋйсѧ, ꙗ҆́кѡ па́дшыѧ возставлѧ́еши: ра́дꙋйсѧ, ꙗ҆́кѡ ᲂу҆ны̑лыѧ воздвиза́еши.

Ра́дꙋйсѧ, ꙗ҆́кѡ всѧ́кꙋ сле́зꙋ бѣ́дствꙋющихъ ѿе́млеши: ра́дꙋйсѧ, ꙗ҆́кѡ сле́зы покаѧ́нїѧ и҆сторга́еши.

Ра́дꙋйсѧ, ст҃и́телю ѻ҆́тче на́шъ і҆ѡа́нне, сиби́рскїй чꙋдотво́рче.

Конда́къ в҃і

Бл҃года́ть и҆сцѣле́нїѧ пролїѧ́сѧ ѿ ст҃ы́хъ моще́й твои́хъ, ѻ҆́тче і҆ѡа́нне, и҆ собра́шасѧ ѿ всѣ́хъ концє́въ землѝ рѡссі́йскїѧ ча̑да твоѧ̑ под̾ сѣ́нїю ма́тере цр҃кве́й сиби́рскихъ на мѣ́сто погребе́нїѧ твоегѡ̀, и҆ возопи́ша бг҃ꙋ: А҆ллилꙋ́їа.

І҆́косъ в҃і

Пою́ще млⷭ҇тиваго бг҃а, свѣ́тъ въ дꙋша́хъ и҆ горѧ́щыѧ свѣщы̀ въ рꙋка́хъ и҆мꙋ́ще, срѣто́ша вѣ́рнїи чтⷭ҇ны̑ѧ и҆ многоцѣлє́бныѧ мо́щи твоѧ̑, прпⷣбне і҆ѡа́нне, а҆рхїерє́и же пронесо́ша и҆̀хъ ѡ҆́крестъ софі́йскїѧ цр҃кве. Тогда̀ со слеза́ми ᲂу҆миле́нїѧ ви́дѣша всѝ, ꙗ҆́кѡ нб҃о и҆ землѧ̀ сторжествꙋ́ютъ съ на́ми, тре́петнѡ взыва́юще:

Ра́дꙋйсѧ, а҆́гг҃лѡмъ сожи́телю: ра́дꙋйсѧ, го́рнїѧ цр҃кве слꙋжи́телю.

Ра́дꙋйсѧ, ꙗ҆́кѡ па́ствꙋ твою̀ мл҃твами покрыва́еши: ра́дꙋйсѧ, ꙗ҆́кѡ пред̾ чꙋ́дною і҆кѡ́ною бг҃омт҃ре мощьмѝ почива́еши.

Ра́дꙋйсѧ, ꙗ҆́кѡ первоѻбра́знꙋю лицезри́ши: ра́дꙋйсѧ, ꙗ҆́кѡ прест҃ѣ́й трⷪ҇цѣ предстои́ши.

Ра́дꙋйсѧ, бг҃ови приносѧ́й ѡ҆ на́съ кади́ло ᲂу҆млⷭ҇тивле́нїѧ: ра́дꙋйсѧ, неꙋсы́пный хода́таю на́шегѡ сп҃се́нїѧ.

Ра́дꙋйсѧ, ст҃и́телю ѻ҆́тче на́шъ і҆ѡа́нне, сиби́рскїй чꙋдотво́рче.

Конда́къ г҃і

Ѽ вели́кїй ст҃и́телю і҆ѡа́нне, прїимѝ моле́нїе сїѐ на́ше, и҆ приносѧ̀ є҆го̀ ко прⷭ҇то́лꙋ всевы́шнѧгѡ, и҆спросѝ странѣ̀ на́шей ми́ра и҆ вѣ́ры ᲂу҆твержде́нїѧ, лю́демъ же ѡ҆правда́нїѧ пред̾ ѻ҆чи́ма стра́шнагѡ сꙋдїѝ и҆ наслѣ́дїѧ црⷭ҇твїѧ бж҃їѧ, во є҆́же приноси́ти пѣ́снь хвалы̀: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃лы ᲂу҆диви́лъ є҆сѝ пресла́внымъ житїе́мъ твои́мъ, ст҃ы́й ѻ҆́тче, серафі́мски возже́гъ сщ҃е́нный пла́мень вѣ́ры въ зижди́телѧ премꙋ́драго, и҆ возлюби́лъ є҆сѝ ма́лыхъ си́хъ, и҆̀хже бг҃ъ сло́во бра́тїю свою̀ нарица́етъ. Тѣ́мже и҆ мы̀, покланѧ́ющесѧ тѝ, взыва́емъ:

Ра́дꙋйсѧ, тве́рдый ка́меню вѣ́ры правосла́вныѧ: ра́дꙋйсѧ, свѣ́точе любвѐ хрⷭ҇тїа́нскїѧ.

Ра́дꙋйсѧ, пра́вды хрⷭ҇то́вы слꙋжи́телю: ра́дꙋйсѧ, и҆́стины бж҃їѧ носи́телю.

Ра́дꙋйсѧ, просла́вивый ѻ҆ц҃а̀ нбⷭ҇наго до́брыми дѣ́лы твои́ми: ра́дꙋйсѧ, црⷭ҇твꙋѧй во сла́вѣ бж҃їей со всѣ́ми ст҃ы́ми.

Ра́дꙋйсѧ, любо́вїю твое́ю ѡ҆б̾е́млѧй стра́ждꙋщыѧ: ра́дꙋйсѧ, мл҃твою твое́ю сп҃са́ѧй погиба́ющыѧ.

Ра́дꙋйсѧ, ст҃и́телю ѻ҆́тче на́шъ і҆ѡа́нне, сиби́рскїй чꙋдотво́рче.

Конда́къ а҃

Возбра́нный чꙋдотво́рче и҆ премꙋ́дрый па́стырю, свѣти́льниче бж҃їй, ѡ҆сїѧ́вый страны̑ сиби̑рскїѧ, восхвалѧ́емъ тѧ̀ любо́вїю, ст҃е і҆ѡа́нне, ѡ҆ чꙋдесѣ́хъ твои́хъ ра́дꙋющесѧ. Ты́ же предстоѧ́й сꙋ́щемꙋ въ невече́рней сла́вѣ цр҃ю̀ нбⷭ҇номꙋ, молѝ ѿ всѧ́кихъ бѣ́дъ сохрани́тисѧ пою́щымъ тѝ:

Ра́дꙋйсѧ, ст҃и́телю ѻ҆́тче на́шъ і҆ѡа́нне, сиби́рскїй чꙋдотво́рче.

Моли́твы

Ѽ па́стырю до́брый, ст҃и́телю ѻ҆́тче на́шъ і҆ѡа́нне, првⷣный пꙋ́ть житїѧ̀ твоегѡ̀ приведе́ тѧ къ вѣ́чномꙋ сл҃нцꙋ пра́вды. Ты́ бо все́ю дꙋше́ю взыска́лъ є҆сѝ бг҃а, возлюби́лъ є҆сѝ є҆го̀ па́че сеѧ̀ вре́менныѧ жи́зни. Мы́ же ᲂу҆дали́хомсѧ бж҃їѧ бл҃госты́ни, ходѧ́ще по ѕлѣ́й свое́й во́ли, возлюби́хомъ сꙋ́єтнаѧ наслаждє́нїѧ, вознерадѣ́хомъ ѡ҆ сп҃се́нїи дꙋ́шъ на́шихъ, затвори́хомъ се́рдце длѧ слы́шанїѧ сло́ва бжⷭ҇твеннагѡ и҆ ѿверго́хомсѧ братолю́бїѧ.

Ѽ бл҃гостный ст҃и́телю і҆ѡа́нне! Не попꙋстѝ на́мъ поги́бнꙋти въ ти́нѣ грѣхѡ́въ на́шихъ, но вознесѝ ѡ҆ на́съ моле́нїе ко гдⷭ҇ꙋ, да поми́лꙋетъ на́съ и҆ да́рꙋетъ на́мъ покаѧ́нїе, да не поглоти́тъ на́съ бе́здна лихои́мства, ѕло́бы и҆ лжѝ, да ᲂу҆мо́лкнетъ междоꙋсо́бнаѧ бра́нь, да и҆зба́витсѧ землѧ̀ на́ша гла́да и҆ всѧ́кагѡ гнѣ́ва бж҃їѧ, да воцари́тсѧ ми́ръ средѝ мі́ра земна́гѡ.

Оу҆слы́ши на́съ грѣ́шныхъ, ст҃че бж҃їй, ꙗ҆вѝ на́мъ чꙋ́дное застꙋпле́нїе твоѐ, посѣтѝ на́съ си́рыхъ, ни́щихъ, бѣ́дствꙋющихъ и҆ заблꙋ́ждшихъ ѻ҆ве́цъ твоегѡ̀ ста́да: недꙋ́ги на́шѧ и҆сцѣлѝ, ᲂу҆крѣпѝ си̑лы къ терпѣли́вомꙋ несе́нїю крⷭ҇та̀ жи́зни, внемлѝ стена́нїю стра́ждꙋщихъ, рыда́нїю ѻ҆дино́кихъ, при́зри на сле́зы немощны́хъ и҆ печа́льныхъ. Мы̀ болѣ́знꙋемъ дꙋше́ю и҆ и҆знемога́емъ се́рдцемъ: моли́сѧ, побо́рниче и҆́стины, да возвратѧ́тсѧ ѿпа́дшїи въ ло́но цр҃кве хрⷭ҇то́вы, да сла́витсѧ и҆́мѧ бж҃їе въ на́съ, да ца́рствꙋетъ пра́вда и҆ любы̀ въ землѝ на́шей, и҆ ми́ръ хрⷭ҇та̀ бг҃а на́шегѡ да сподо́бимсѧ прїѧ́ти, ра́дость же ѡ҆ гдⷭ҇ѣ да возсїѧ́етъ въ сердца́хъ на́шихъ, и҆ бл҃гослови́мъ пречтⷭ҇но́е и҆ великолѣ́пое и҆́мѧ є҆диносꙋ́щныѧ и҆ нераздѣ́льныѧ трⷪ҇цы, ѻ҆ц҃а̀, и҆ сн҃а, и҆ ст҃а́гѡ дх҃а, во вѣ́ки вѣкѡ́въ. А҆ми́нь.