Православный календарь
Размер шрифта:

Ака́ѳістъ

А҆ка́ѳїстъ ст҃о́мꙋ а҆пⷭ҇лꙋ варѳоломе́ю.

Св. ап. Варфоломея (Нафанаила) (71) и ап. от 70-и Варнавы, еп. Медиоланского (76) 24 июня 2026

Конда́къ а҃

И҆збра́нномꙋ ѿ люде́й і҆и҃левыхъ во хрⷭ҇то́ва а҆пⷭ҇ла на ᲂу҆ловле́нїе человѣ́кѡвъ, чꙋ́дномꙋ варѳоломе́ю, пѣ̑нїѧ похва̑льнаѧ принесе́мъ, вѣ́рнїи, ꙗ҆́кѡ ѡ҆ста́вльшемꙋ до́мъ сво́й, нищетꙋ̀ хрⷭ҇то́вꙋ возлюби́вшемꙋ и҆ хрⷭ҇то́во ᲂу҆че́нїе па́че ᲂу҆че́нїѧ є҆вре́йскихъ кни́жникѡвъ и҆збра́вшемꙋ. ты́ же, ст҃ы́й а҆пⷭ҇ле, всѣ́хъ на́съ, па́мѧть твою̀ чⷭ҇тнꙋ́ю пра́зднꙋющихъ, не ѡ҆ста́ви свои́мъ предста́тельствомъ и҆ застꙋпле́нїемъ, да бл҃года́рными ᲂу҆стна́ми вопїе́мъ тѝ:

Ра́дꙋйсѧ, ст҃ы́й сла́вный и҆ всехва́льный а҆пⷭ҇ле варѳоломе́е.

І҆́косъ а҃

А҆́гг҃лѡвъ гдⷭ҇ь и҆ сп҃си́тель всегѡ̀ ро́да чл҃вѣ́ча, прови́дѣвъ чистотꙋ̀ дꙋшѝ твоеѧ̀, ст҃ы́й варѳоломе́е, бл҃говолѝ и҆збра́ти тѧ̀ во є҆ди́нагѡ ѿ ѻ҆боюна́десѧте и҆ нарещѝ а҆пⷭ҇ломъ свои́мъ. Мы́ же, дивѧ́щесѧ дꙋхѡ́внымъ дарова́нїємъ твои̑мъ, прославлѧ́емъ тѧ̀ си́це:

Ра́дꙋйсѧ, варѳоломе́е, вели́кїй хрⷭ҇то́въ а҆пⷭ҇ле: ра́дꙋйсѧ, ᲂу҆ч҃ничѐ хрⷭ҇то́въ ᲂу҆се́рднѣйшїй.

Ра́дꙋйсѧ, ꙗ҆́кѡ се́рдце своѐ непоро́чнѡ и҆мѣ́лъ є҆сѝ: ра́дꙋйсѧ, ꙗ҆́кѡ лꙋка̑выѧ наставлє́нїѧ ста́рцєвъ є҆вре́йскихъ ѿве́рглъ є҆сѝ.

Ра́дꙋйсѧ, ꙗ҆́кѡ всѣ́мъ се́рдцемъ свои́мъ хрⷭ҇тꙋ̀ прилѣпи́лсѧ є҆сѝ: ра́дꙋйсѧ, ꙗ҆́кѡ всѧ̑ мїрскі́ѧ бла̑га ни во что́же вмѣни́лъ є҆сѝ.

Ра́дꙋйсѧ, ꙗ҆́кѡ ѻ҆тца̀ и҆ ма́терь, бра́тїю и҆ сєстры̀ своѧ̑ ра́ди гдⷭ҇а ѡ҆ста́вилъ є҆сѝ: ра́дꙋйсѧ, ꙗ҆́кѡ во слѣ́дованїи за хрⷭ҇то́мъ и҆́стинное бл҃же́нство воспрїѧ́лъ є҆сѝ.

Ра́дꙋйсѧ, ᲂу҆че́нїемъ хрⷭ҇то́вымъ плѣни́выйсѧ: ра́дꙋйсѧ, въ пꙋтѝ хрⷭ҇то́вомъ бл҃го црⷭ҇твїѧ нбⷭ҇нагѡ предвкꙋси́вый.

Ра́дꙋйсѧ, бл҃гогла́снѣйшїй проповѣ́дниче хрⷭ҇то́ва ᲂу҆че́нїѧ: ра́дꙋйсѧ, вѣ́рный слꙋго̀ гдⷭ҇а.

Ра́дꙋйсѧ, ст҃ы́й сла́вный и҆ всехва́льный а҆пⷭ҇ле варѳоломе́е.

Конда́къ в҃

Ви́дѧ чꙋ̑днаѧ дѣла̀ гдⷭ҇а своегѡ̀ и҆ ᲂу҆чи́телѧ и҆ слы́ша и҆з̾ ᲂу҆́стъ є҆гѡ̀ и҆сходѧ́щее нбⷭ҇ное ᲂу҆че́нїе, ꙗ҆́снѡ ᲂу҆разꙋмѣ́лъ є҆сѝ, ст҃ы́й варѳоломе́е, со а҆пⷭ҇ломъ петро́мъ и҆ про́чими а҆пⷭ҇лы вкꙋ́пѣ, ꙗ҆́кѡ глаго́лы живота̀ вѣ́чнагѡ ᲂу҆чи́тель ва́шъ и҆́мать, и҆ ꙗ҆́кѡ ѻ҆́нъ є҆́сть вои́стиннꙋ сн҃ъ бг҃а жива́гѡ, є҆мꙋ́же всѧ̀ землѧ̀ є҆ди́ными ᲂу҆сты̀ взыва́ти наꙋча́етсѧ: А҆ллилꙋ́їа.

І҆́косъ в҃

Разꙋ́мномꙋ сл҃нцꙋ пра́вды вседꙋше́внѡ восхотѣ́лъ є҆сѝ, ст҃ы́й а҆пⷭ҇ле варѳоломе́е, порабо́тати и҆ ра́достнѡ прїѧ́лъ є҆сѝ за́повѣдь гдⷭ҇а ѡ҆ про́повѣди ѻ҆вца́мъ поги́бшымъ до́мꙋ і҆и҃лева: сегѡ̀ ра́ди потща́лсѧ є҆сѝ со всѣ́ми а҆пⷭ҇лы по ве́сємъ и҆ градѡ́мъ і҆и҃левымъ ходѧ́ще, болѧ́щыѧ и҆сцѣлѧ́ти, прокажє́нныѧ ѡ҆чища́ти, мє́ртвыѧ воскреша́ти, бѣ́сы и҆згонѧ́ти и҆ всѣ̑мъ проповѣ́дати и҆ вѣща́ти, ꙗ҆́кѡ прибли́зисѧ црⷭ҇твїе нбⷭ҇ное. Воспомина́юще а҆пⷭ҇льскїѧ трꙋды̀ твоѧ̑, сїѧ̀ похва́льнаѧ восписꙋ́емъ тѝ:

Ра́дꙋйсѧ, ᲂу҆се́рдный за́повѣдей хрⷭ҇то́выхъ и҆сполни́телю: ра́дꙋйсѧ, всего̀ себє̀ гдⷭ҇еви послꙋ́шнѡ порабо́тивый: ра́дꙋйсѧ, ꙗ҆́кѡ не стѧжа́лъ є҆сѝ ни зла́та, ни сребра̀, ни мѣ́ди при по́ѧсѣ свое́мъ.

Ра́дꙋйсѧ, ꙗ҆́кѡ ни пи́ры въ пꙋ́ть, ни двою̀ ри́зꙋ, ни жезла̀ съ собо́ю, по за́повѣди хрⷭ҇та̀, не бра́лъ є҆сѝ: ра́дꙋйсѧ, ꙗ҆́кѡ ми́ръ хрⷭ҇то́въ въ до́мы вноси́лъ є҆сѝ.

Ра́дꙋйсѧ, ꙗ҆́кѡ съ до́брыми до́брѣ пребыва́лъ є҆сѝ: ра́дꙋйсѧ, ꙗ҆́кѡ ѿ не прїѧ́вшихъ ми́ра хрⷭ҇то́ва па́ки себѐ ми́ръ прїима́лъ є҆сѝ.

Ра́дꙋйсѧ, ꙗ҆́кѡ ᲂу҆че́нїе гдⷭ҇а своегѡ̀ ᲂу҆се́рднѡ проповѣ́далъ є҆сѝ: ра́дꙋйсѧ, ты́ бо, по сло́вꙋ хрⷭ҇то́вꙋ, ꙗ҆́кѡ ѻ҆вча̀ посредѣ̀ волкѡ́въ съ є҆ѵⷢ҇лїемъ ше́ствовалъ є҆сѝ.

Ра́дꙋйсѧ, ꙗ҆́кѡ болѣ̑зни неисцѣ̑льныѧ цѣли́лъ є҆сѝ: ра́дꙋйсѧ, ꙗ҆́кѡ дꙋхѡ́въ лꙋка́выхъ и҆згонѧ́лъ є҆сѝ.

Ра́дꙋйсѧ, ꙗ҆́кѡ прокажє́нныѧ ѡ҆чища́лъ є҆сѝ и҆ мє́ртвыѧ воскреша́лъ є҆сѝ.

Ра́дꙋйсѧ, ст҃ы́й сла́вный и҆ всехва́льный а҆пⷭ҇ле варѳоломе́е.

Конда́къ г҃

Си́ла дꙋхо́внаѧ бжⷭ҇твеннагѡ ᲂу҆че́нїѧ всесоверше́ннѡ плѣни́ тѧ, сла́вный варѳоломе́е, сегѡ̀ ра́ди никоеѧ́же сла́дости мі́ра сегѡ̀ восхотѣ́лъ є҆сѝ вкꙋша́ти, то́кмо є҆ди́нагѡ и҆́стиннагѡ бл҃га жела́лъ є҆сѝ при́снѡ наслажда́тисѧ, во є҆́же слꙋ́шати словеса̀ ᲂу҆чи́телѧ своегѡ̀, созерца́ти сла́дкїй ли́къ гдⷭ҇а своегѡ̀, зрѣ́ти ди́вное слꙋже́нїе є҆гѡ̀ скорбѧ́щымъ и҆ ѡ҆бременє́ннымъ и҆ во вѣ́ки со всѣ́ми и҆збра́нными є҆гѡ̀ взыва́ти є҆мꙋ̀ а҆́гг҃льскꙋю пѣ́снь: А҆ллилꙋ́їа.

І҆́косъ г҃

И҆мѣ́ѧ бога́тство неизрече́нныѧ бл҃гости, сп҃съ мі́ра и҆ гдⷭ҇ь, вѣ́дый, ꙗ҆́кѡ прїи́де є҆мꙋ̀ ча́съ, да пре́йдетъ ѿ мі́ра сегѡ̀ ко ѻ҆ц҃ꙋ̀, тайново́дствова своѧ̑, сꙋ́щїѧ въ мі́рѣ, ᲂу҆ченикѝ, показꙋ́ѧ и҆́мъ пре́жде крⷭ҇та̀ своегѡ̀ пꙋ́ть добрѣ́йшїй смире́нїѧ, нача́тъ ᲂу҆мыва́ти но́зѣ дрꙋгѡ́мъ свои̑мъ и҆ ѡ҆тира́ти ле́нтїемъ: та́же хлѣ́бъ и҆ вїно̀ бл҃гословѝ гдⷭ҇ь и҆ та́инство причаще́нїѧ въ цр҃кви свое́й на вѣ́ки ᲂу҆твердѝ. сїѧ̀ ви́дѣвъ ст҃ы́й варѳоломе́й съ про́чими а҆пⷭ҇лы, всѣ́мъ се́рдцемъ свои́мъ вожделѣ̀ ᲂу҆чи́телю своемꙋ̀ подража́ти и҆, въ є҆го̀ воспомина́нїе, ст҃о́е та́инство причаще́нїѧ при́снѡ соверша́ти. За таково́е твоегѡ̀ се́рдца бл҃го́е и҆зволе́нїе ᲂу҆бл҃жа́емъ тѧ̀, ст҃ы́й а҆пⷭ҇ле, восхвале́ньми си́ми:

Ра́дꙋйсѧ, до́брый и҆ послꙋ́шный хрⷭ҇то́въ ᲂу҆ч҃нчѐ: ра́дꙋйсѧ, бл҃гоговѣ́йный и҆сполни́телю хрⷭ҇то́выхъ за́повѣдей.

Ра́дꙋйсѧ, ꙗ҆́кѡ сподо́билсѧ є҆сѝ прїѧ́ти ѡ҆мове́нїе но́гъ свои́хъ ѿ гдⷭ҇а твоегѡ̀ и҆ ᲂу҆чи́телѧ: ра́дꙋйсѧ, ꙗ҆́кѡ на та́йной ве́чери тѣ́ла и҆ кро́ви хрⷭ҇то́выхъ прїѻбщи́лсѧ є҆сѝ.

Ра́дꙋйсѧ, хрⷭ҇то́вꙋ тайново́дствꙋ наꙋчи́выйсѧ: ра́дꙋйсѧ, за́повѣдь но́вꙋю ѿ гдⷭ҇а прїѧ́вый, во є҆́же дꙋ́шꙋ свою̀ положи́ти за дрꙋ́ги своѧ̑.

Ра́дꙋйсѧ, смире́нїѧ хрⷭ҇то́ва и҆́стинный слꙋжи́телю: ра́дꙋйсѧ, сло́вомъ хрⷭ҇то́вымъ ѡ҆чище́нный.

Ра́дꙋйсѧ, за гдⷭ҇а и҆ хрⷭ҇та̀ жи́знь свою̀ положи́ти ѡ҆бѣща́вый: ра́дꙋйсѧ, любвѐ хрⷭ҇то́вы проповѣ́дниче.

Ра́дꙋйсѧ, ѡ҆ все́мъ мі́рѣ те́плый къ бг҃ꙋ моли́твенниче: ра́дꙋйсѧ, всѣ́хъ скорбѧ́щихъ и҆ ѡ҆бремене́нныхъ застꙋ́пниче.

Ра́дꙋйсѧ, ст҃ы́й сла́вный и҆ всехва́льный а҆пⷭ҇ле варѳоломе́е.

Конда́къ д҃

Бꙋ́рѧ ве́лїихъ смꙋще́нїй на́йде на тѧ̀, ст҃ы́й а҆пⷭ҇ле, є҆гда̀ ви́дѣлъ є҆сѝ гдⷭ҇а своегѡ̀ и҆ ᲂу҆чи́телѧ ѿ преда́телѧ ле́стїю лобза́ннаго, въ рꙋ́цѣ лю́тыхъ и҆ беззако́нныхъ сꙋде́й пре́даннаго и҆ на сме́рть позо́рнꙋю ѡ҆сꙋжде́ннаго: є҆гда́ же ᲂу҆слы́шалъ є҆сѝ ст҃ы́хъ же́нъ мѷроно́сицъ, ра́достнꙋю вѣ́сть ѡ҆ воскр҃се́нїи прине́сшихъ, и҆ є҆гда̀ свои́ма ѻ҆чи́ма сподо́билсѧ є҆сѝ зрѣ́ти воскрⷭ҇шаго гдⷭ҇а, ꙗ҆́звы своѧ̑ на пречи́стѣмъ тѣ́лѣ свое́мъ показꙋ́ющагѡ, тогда̀ со всѣ́ми а҆пⷭ҇лы, печа́ль свою̀ на ра́дость преложи́въ, воззва́лъ є҆сѝ велегла́снѡ гдⷭ҇ꙋ хрⷭ҇тꙋ̀, и҆з̾ ме́ртвыхъ воскре́сшемꙋ: А҆ллилꙋ́їа.

І҆́косъ д҃

Слы́шалъ є҆сѝ, сла́вный варѳоломе́е, бжⷭ҇твенныѧ глаго́лы гдⷭ҇а, по воскр҃се́нїи свое́мъ ѿве́рзшагѡ а҆пⷭ҇ломъ ᲂу҆́мъ разꙋмѣ́ти писа̑нїѧ, ꙗ҆́кѡ та́кѡ подоба́ше пострада́ти хрⷭ҇тꙋ̀ и҆ воскрⷭ҇нꙋти и҆з̾ ме́ртвыхъ въ тре́тїй де́нь: ви́дѣлъ є҆сѝ гдⷭ҇а своегѡ̀ съ горы̀ є҆леѡ́нскїѧ во сла́вѣ возне́сшагосѧ и҆ съ ра́достїю ве́лїею возврати́лсѧ є҆сѝ во і҆ерⷭ҇ли́мъ, хвалѧ̀ и҆ бл҃гословѧ̀ бг҃а. за таково́е твоѐ ра́достное прославле́нїе гдⷭ҇а, па́ки во сла́вѣ грѧдꙋ́щагѡ сꙋди́ти живы̑мъ и҆ мє́ртвымъ, воспѣва́емъ тѝ, ст҃ы́й а҆пⷭ҇ле, похвалы̑ сицєвы́ѧ:

Ра́дꙋйсѧ, воскре́сшагѡ гдⷭ҇а ви́дѣти сподо́бивыйсѧ: ра́дꙋйсѧ, гвозди̑нымъ ꙗ҆́звамъ на пречⷭ҇тѣмъ тѣ́лѣ є҆гѡ̀ ᲂу҆се́рднѡ поклони́выйсѧ.

Ра́дꙋйсѧ, ꙗ҆́кѡ во хрⷭ҇то́вомъ воскр҃се́нїи ᲂу҆вѣ́рилсѧ є҆сѝ: ра́дꙋйсѧ, ꙗ҆́кѡ ꙗ҆вле́нїемъ є҆гѡ̀ всесла́дкимъ мꙋ́дрости и҆ ра́зꙋма и҆спо́лнилсѧ є҆сѝ.

Ра́дꙋйсѧ, со хрⷭ҇то́мъ, по воскр҃се́нїи є҆гѡ̀, ѻ҆́бщїѧ трапе́зы наслади́выйсѧ: ра́дꙋйсѧ, ѿ негѡ̀ писа́нїѧ прⷪ҇рѡ́ческаѧ разꙋмѣ́ти наꙋчи́выйсѧ.

Ра́дꙋйсѧ, на горѣ̀ є҆леѡ́нстѣй, ꙗ҆́кѡ въ преддве́рїи нбⷭ҇нѣмъ, со ᲂу҆чи́телемъ свои́мъ ѡ҆брѣты́йсѧ: ра́дꙋйсѧ, бл҃гослове́нїе гдⷭ҇не полꙋчи́ти сподо́бивыйсѧ.

Ра́дꙋйсѧ, бжⷭ҇твеннагѡ вознесе́нїѧ свидѣ́телю: ра́дꙋйсѧ, свѣ́тлыхъ нб҃ожи́телей собесѣ́дниче.

Ра́дꙋйсѧ, вели̑кїѧ бл҃года̑тныѧ ра́дости въ де́нь вознесе́нїѧ прича́стниче: ра́дꙋйсѧ, хвалы̀ и҆ прославле́нїѧ гдⷭ҇а свѣ́тлый и҆сто́чниче.

Ра́дꙋйсѧ, ст҃ы́й сла́вный и҆ всехва́льный а҆пⷭ҇ле варѳоломе́е.

Конда́къ є҃

Бг҃оглаго́ливый лꙋка̀ ꙗ҆́вственнѡ все́й вселе́ннѣй повѣствꙋ́етъ, ꙗ҆́кѡ собра́ннымъ во і҆ерⷭ҇ли́мѣ всѣ̑мъ ᲂу҆ченикѡ́мъ хрⷭ҇то́вымъ, внеза́пꙋ бы́сть шꙋ́мъ съ нб҃сѐ, ꙗ҆́кѡ носи́мꙋ дыха́нїю бꙋ́рнꙋ, и҆ и҆спо́лни ве́сь до́мъ, и҆дѣ́же ᲂу҆ч҃ницы̀ є҆гѡ̀ бѧ́хꙋ сѣдѧ́ще, и҆ ꙗ҆ви́шасѧ и҆́мъ раздѣле́ни ꙗ҆зы́цы, ꙗ҆́кѡ ѻ҆́гненнїи, сѣ́де же на є҆ди́номъ ко́емждо и҆̀хъ, и҆ и҆спо́лнишасѧ всѝ дх҃а ст҃а, и҆ нача́ша глаго́лати и҆ны́ми ѧ҆зы̑ки, ꙗ҆́коже дх҃ъ даѧ́ше и҆́мъ провѣщава́ти. Съ про́чими ст҃ы́ми а҆пⷭ҇лы хрⷭ҇то́выми въ сїѡ́нстѣй го́рницѣ и҆ ты̀ бы́лъ є҆сѝ, бл҃же́нне варѳоломе́е, и҆ да́ра ѧ҆зы́ка сподо́билсѧ є҆сѝ полꙋчи́ти, и҆ съ ве́лїею ра́достїю и҆ крѣ́пкимъ дерзнове́нїемъ, дх҃омъ ст҃ы́мъ води́мый, наꙋчи́лсѧ є҆сѝ и҆ны́ми ѧ҆зы́ки въ трⷪ҇цѣ сла́вимомꙋ бг҃ꙋ непреста́ннѡ взыва́ти: А҆ллилꙋ́їа.

І҆́косъ є҃

Оу҆ви́дѣлъ є҆сѝ, ст҃ы́й а҆пⷭ҇ле варѳоломе́е, въ па́вшемъ тѝ жре́бїи проповѣ́дати хрⷭ҇то́во є҆ѵⷢ҇лїе въ сѷрі́и, а҆сі́и и҆ про́чихъ сосѣ́днихъ страна́хъ со а҆пⷭ҇ломъ фїлі́ппомъ вкꙋ́пѣ, повелѣ́нїе сама́гѡ гдⷭ҇а. Сегѡ̀ ра́ди тѧ́гостныхъ пꙋте́й а҆пⷭ҇льскихъ не ᲂу҆боѧ́лсѧ є҆сѝ, страда́нїй за гдⷭ҇а хрⷭ҇та̀ не ᲂу҆страши́лсѧ є҆сѝ и҆, кꙋ́пнѡ съ фїлі́ппомъ, є҆ди́нагѡ гдⷭ҇а въ си́хъ страна́хъ проповѣ́далъ є҆сѝ: тогда̀ и҆ лѷді́йскїѧ и҆ мѷзі́йскїѧ гра́ды и҆ вє́си ѡ҆глаше́ни бы́ша про́повѣдїю а҆пⷭ҇льскою. дивѧ́щисѧ си́мъ бл҃говѣ́стническимъ трꙋдо́мъ твои́мъ, си́це ра́достнѡ тебѣ̀ глаго́лемъ:

Ра́дꙋйсѧ, нелѣ́ностный и҆сполни́телю завѣ́тѡвъ хрⷭ҇то́выхъ: ра́дꙋйсѧ, безбоѧ́зненный проповѣ́дниче хрⷭ҇то́ва є҆ѵⷢ҇лїѧ.

Ра́дꙋйсѧ, ꙗ҆́кѡ со а҆пⷭ҇ломъ фїлі́ппомъ и҆ сестро́ю є҆гѡ̀ марїа́мною по градѡ́мъ и҆ ве́сємъ а҆сі́йскимъ и҆ лѷді́йскимъ съ бл҃говѣ́стїемъ ше́ствовалъ є҆сѝ: ра́дꙋйсѧ, ꙗ҆́кѡ со а҆пⷭ҇ломъ і҆ѡа́нномъ бг҃осло́вомъ бл҃года́тными ᲂу҆тѣше́нїи наслажда́лсѧ є҆сѝ.

Ра́дꙋйсѧ, неꙋста́нный къ бг҃ꙋ моли́твенниче: ра́дꙋйсѧ, да́ра любвѐ къ бг҃ꙋ и҆ лю́демъ ᲂу҆се́рдный прїꙋмно́жителю.

Ра́дꙋйсѧ, покаѧ́нїѧ ᲂу҆чи́телю: ра́дꙋйсѧ, смире́нїѧ наста́вниче.

Ра́дꙋйсѧ, і҆́дѡлѡвъ сокрꙋши́телю: ра́дꙋйсѧ, вели́кихъ та́инъ бж҃їихъ провозвѣ́стниче.

Ра́дꙋйсѧ, ѻ҆́гненными словесы̀ свои́ми слꙋ́хъ ꙗ҆зы́ческихъ люде́й ѡ҆гласи́вый: ра́дꙋйсѧ, ко хрⷭ҇тꙋ̀ дѣтоводи́телю и҆̀хъ приле́жный.

Ра́дꙋйсѧ, ст҃ы́й сла́вный и҆ всехва́льный а҆пⷭ҇ле варѳоломе́е.

Конда́къ ѕ҃

Проповѣ̑дницы ᲂу҆че́нїѧ хрⷭ҇то́ва ᲂу҆се́рднѣйшїи ꙗ҆ви́шасѧ ст҃і́и варѳоломе́й, фїлі́ппъ и҆ бл҃же́ннаѧ марїа́мна, є҆гда̀ со хрⷭ҇то́вымъ є҆ѵⷢ҇лїемъ внидо́ша во гра́дъ фрѷгі́йскїй і҆ерапо́ль, и҆̀же бѣ̀ и҆спо́лненъ ме́рзкихъ і҆́дѡлѡвъ, ѡ҆слѣпле́ннїи же лю́дїе є҆гѡ̀ бѡготвори́ша ѕмїи̑ и҆ є҆хі̑дны. Пе́рвѣе ст҃і́и а҆пⷭ҇ли, со і҆ѡа́нномъ бг҃осло́вомъ вкꙋ́пѣ, ве́лїю є҆хі́днꙋ моли́твою свое́ю побѣди́ша и҆ копїе́мъ ᲂу҆мертви́ша: по́слѣжде же де́нь и҆ но́щь ко сла́вѣ бж҃їей трꙋжда́ющесѧ, наꙋчи́ша мнѡ́гїѧ воспѣва́ти кꙋ́пнѡ съ ни́ми пѣ́снь хвале́бнꙋю гдⷭ҇еви: А҆ллилꙋ́їа.

І҆́косъ ѕ҃

Возсїѧ̀ ѻ҆би́льнѡ свѣ́тъ ᲂу҆че́нїѧ хрⷭ҇то́ва во гра́дѣ і҆ера́полѣ, є҆гда̀ ст҃ы́й варѳоломе́й, съ фїлі́ппомъ и҆ марїа́мною вкꙋ́пѣ, ѿверзо́ша ѻ҆́чи нѣ́коемꙋ стахі́ю, четы́редесѧтъ лѣ́тъ слѣпо́тствꙋющемꙋ, женꙋ̀ а҆нѳѷпа́та і҆ерапо́льскагѡ, ѕмі́емъ ᲂу҆грызе́ннꙋю, ѿ ѻ҆дра̀ сме́ртнагѡ воздвиго́ша, є҆ще́ же и҆ мнѡ́ги недꙋ̑жныѧ и҆сцѣли́ша и҆ бѣсны̑ѧ ᲂу҆врачева́ша. а҆нѳѷпа́тъ же ѕлы́й, ꙗ҆́рости и҆спо́лнисѧ, є҆гда̀ ᲂу҆слы́ша, ꙗ҆́кѡ жена̀ є҆гѡ̀ вѣ́рꙋ хрⷭ҇то́вꙋ прїѧ́тъ, повелѣ̀ ст҃ы́хъ а҆пⷭ҇лѡвъ лю̑тымъ мꙋ́камъ преда́ти. мы́ же, воспомина́ѧ сїѧ̑ сла̑вныѧ страда̑нїѧ и҆ по́двиги во сла́вꙋ хрⷭ҇та̀, восхвалѧ́емъ ст҃а́гѡ а҆пⷭ҇ла варѳоломе́а всеꙋсе́рднѡ:

Ра́дꙋйсѧ, дх҃а ст҃а́гѡ сосꙋ́де вседрагі́й: ра́дꙋйсѧ, ве́лїихъ чꙋде́съ соверши́телю.

Ра́дꙋйсѧ, слѣпы̑мъ зрѣ́нїе дарова́вый: ра́дꙋйсѧ, хромы̑мъ бл҃гоше́ствїе ᲂу҆стро́ивый.

Ра́дꙋйсѧ, ѿ ᲂу҆кꙋше́нїѧ ꙗ҆дови́тыхъ ѕмі́й цѣли́телю: ра́дꙋйсѧ, бѣсѡ́въ прогони́телю.

Ра́дꙋйсѧ, неꙋстраши́мый и҆сповѣ́дниче всесла́дкагѡ и҆́мене хрⷭ҇то́ва: ра́дꙋйсѧ, кꙋ́пнѡ съ фїлі́ппомъ на сме́рть ѡ҆сꙋжде́нный.

Ра́дꙋйсѧ, на стѣнѣ̀ і҆́дѡльскагѡ ка́пища распѧ́тый: ра́дꙋйсѧ, си́лою бж҃їею невреди́мъ сохрани́выйсѧ.

Ра́дꙋйсѧ, чꙋдесы̀ свои́ми мнѡ́ги ко хрⷭ҇тꙋ̀ ѡ҆брати́вый. Ра́дꙋйсѧ, стахі́а во є҆пⷭ҇копа і҆ерапо́льскагѡ поста́вивый.

Ра́дꙋйсѧ, ст҃ы́й сла́вный и҆ всехва́льный а҆пⷭ҇ле варѳоломе́е.

Конда́къ з҃

Хотѧ̀ всѝ концы̀ вселе́нныѧ ᲂу҆че́нїемъ хрⷭ҇то́вымъ ѡ҆гласи́ти, ст҃ы́й варѳоломе́й, ѿ лю́тыхъ гоне́нїй а҆нѳѷпа́та і҆ерапо́льскагѡ и҆зба́вленный, съ про́повѣдїю хрⷭ҇то́вою, дх҃а ст҃а́гѡ повелѣ́нїемъ, прїи́де во і҆нді́йскїѧ страны̑, и҆дѣ́же во сла́вꙋ хрⷭ҇то́вꙋ нема́лѡ вре́мени потрꙋди́сѧ, ше́ствꙋѧ и҆з̾ гра́да во гра́дъ, и҆з̾ ве́си въ ве́сь, бл҃говѣствꙋ́ѧ ми́ръ хрⷭ҇то́въ, и҆сцѣлѧ́ѧ болѣ̑зни неисцѣ̑льныѧ и҆ наꙋча́ѧ лю́ди стра́нъ і҆нді́йскихъ ѡ҆ста́вити і҆́дѡлы безстꙋ̑дныѧ, є҆ди́номꙋ же бг҃ꙋ, бл҃годѣ́ющемꙋ всѣ̑мъ, взыва́ти: А҆ллилꙋ́їа.

І҆́косъ з҃

Ди́вное бл҃гопопече́нїе ѡ҆ лю́дѣхъ стра́нъ і҆нді́йскихъ ꙗ҆ви́лъ є҆сѝ, ст҃ы́й а҆пⷭ҇ле, є҆гда̀ насе́льники стра́нъ си́хъ просвѣти́въ и҆ цр҃ковь та́мѡ ᲂу҆стро́ивъ, є҆ѵⷢ҇лїе ѿ ст҃а́гѡ матѳе́а, съ собо́ю носи́мое, на ѧ҆зы́къ и҆̀хъ преложѝ, и҆ са́мое то̀ є҆ѵⷢ҇лїе, ѿ матѳе́а напи́санное, ᲂу҆ ни́хже ѡ҆ста́ви. Сегѡ̀ ра́ди просвѣще́ннїи тобо́ю лю́дїе стра́нъ і҆нді́йскихъ бл҃года́рнѡ воспѣва́хꙋ тѝ, ст҃ы́й варѳоломе́е, та́кѡ:

Ра́дꙋйсѧ, вели́кїй на́шъ а҆пⷭ҇ле: ра́дꙋйсѧ, во хрⷭ҇тѣ̀ ѻ҆те́цъ на́шъ чадолюби́вый.

Ра́дꙋйсѧ, мꙋ́ками рожде́нїѧ ѡ҆ на́съ болѣ́зновавый: ра́дꙋйсѧ, хрⷭ҇та̀ гдⷭ҇а въ на́съ воѡбрази́вый.

Ра́дꙋйсѧ, і҆́дѡльскꙋю ле́сть ѡ҆бличи́вый: ра́дꙋйсѧ, ко и҆́стинномꙋ свѣ́тꙋ всѧ̑ ны̀ наста́вивый.

Ра́дꙋйсѧ, словеса̀ є҆ѵⷢ҇лїѧ хрⷭ҇то́ва на́мъ ѡ҆ста́вивый: ра́дꙋйсѧ, цр҃кве бж҃їѧ ᲂу҆строи́телю.

Ра́дꙋйсѧ, неꙋста́нный ѡ҆ на́съ пред̾ прⷭ҇то́ломъ бж҃їимъ предстоѧ́телю: ра́дꙋйсѧ, ѡ҆ все́мъ мі́рѣ те́плый пред̾ бг҃омъ хода́таю.

Ра́дꙋйсѧ, крѣ́пкое на́ше ᲂу҆пова́нїе: ра́дꙋйсѧ, ѡ҆ на́шемъ сп҃се́нїи и҆зрѧ́дный попечи́телю.

Ра́дꙋйсѧ, ст҃ы́й сла́вный и҆ всехва́льный а҆пⷭ҇ле варѳоломе́е.

Конда́къ и҃

Стра́ннѡ є҆́сть невѣ́рꙋющымъ слы́шати, ка́кѡ ст҃ы́й а҆пⷭ҇лъ варѳоломе́й, свѣ́томъ и҆́стины хрⷭ҇то́вы ѡ҆сїѧ́вый страны̀ і҆нді́йскїѧ, па́ки но́вꙋю ни́вꙋ, хрⷭ҇то́вымъ ᲂу҆че́нїемъ невоздѣ́ланнꙋю, ѡ҆брѣ́те, и҆ на коне́цъ житїѧ̀ своегѡ̀ въ вели́кꙋю а҆рме́нїю ᲂу҆стреми́сѧ, да просвѣти́тъ и҆ здѣ̀ лю́ди, во тмѣ̀ и҆ сѣ́ни сме́ртнѣй сѣдѧ́щыѧ, и҆ да наꙋчи́тъ и҆̀хъ є҆ди́номꙋ творцꙋ̀ и҆ гдⷭ҇ꙋ бл҃года́рными ᲂу҆сты̑ воспѣва́ти: А҆ллилꙋ́їа.

І҆́косъ и҃

Ве́сь дꙋ́хомъ горѧ̀ ѡ҆ сла́вѣ гдⷭ҇ней, прїи́де ст҃ы́й а҆пⷭ҇лъ варѳоломе́й въ вели́кꙋю а҆рме́нїю и҆ ᲂу҆се́рднѡ воззва̀ въ моли́твѣ свое́й ко гдⷭ҇ꙋ, да посра́млени бꙋ́дꙋтъ бѣ́си, во і҆́дѡлѣхъ страны̀ тоѧ̀ ѻ҆бита́вшыѧ, и҆ да бꙋ́дꙋтъ ниспрове́ргнꙋты бездꙋ́шнїи і҆́дѡли: и҆ не тща̀ бѣ̀ моли́тва ст҃а́гѡ а҆пⷭ҇ла: бѣ́си ᲂу҆молко́ша, і҆́дѡли падо́ша, лю́дїе же сегѡ̀ бѣсо́вскагѡ мꙋчи́тельства и҆ безꙋ́мїѧ и҆зба́вльшесѧ, восхвалѧ́хꙋ ст҃а́гѡ просвѣти́телѧ своегѡ̀ сицевы́ми ра́достными воззва̑нїи:

Ра́дꙋйсѧ, а҆пⷭ҇ле, кра́сными нога́ми свои́ми зе́млю на́шꙋ ѡ҆ст҃и́вый: ра́дꙋйсѧ, ст҃ꙋ́ю и҆́стиннꙋю вѣ́рꙋ всѣ̑мъ на́мъ возвѣсти́вый.

Ра́дꙋйсѧ, бѣсѡ́въ и҆згони́телю: ра́дꙋйсѧ, і҆́дѡлѡвъ сокрꙋши́телю.

Ра́дꙋйсѧ, въ мл҃твѣ и҆ дерзнове́нїи пламенѣ́ющїй: ра́дꙋйсѧ, во ст҃ѣ́мъ слꙋже́нїи гдⷭ҇ꙋ до́брый примѣ́ръ на́мъ показꙋ́ющїй.

Ра́дꙋйсѧ, ди́вный хрⷭ҇то́въ бл҃говѣ́стниче: ра́дꙋйсѧ, пресла́вный чꙋдотво́рче.

Ра́дꙋйсѧ, болѣ̑зни на̑ша врачꙋ́ющїй: ра́дꙋйсѧ, скѡ́рби на̑ша разгонѧ́ющїй.

Ра́дꙋйсѧ, всѣ́хъ на́съ и҆́стиннѡ возлюби́вый: ра́дꙋйсѧ, всѣ̑мъ на́мъ пꙋ́ть ко сп҃се́нїю показа́вый.

Ра́дꙋйсѧ, ст҃ы́й сла́вный и҆ всехва́льный а҆пⷭ҇ле варѳоломе́е.

Конда́къ ѳ҃

Всѝ лю́дїе вели́кїѧ а҆рме́нїи ѕѣлѡ̀ ᲂу҆дивлѧ́хꙋсѧ, зрѧ́ще чꙋдеса̀ и҆ зна́менїѧ тобо́ю, ст҃ы́й а҆пⷭ҇ле, соверша́емаѧ: є҆гда́ же ви́дѣша і҆́дѡлы па́дшыѧ, дꙋ́хи нечи́стыѧ и҆згони́мыѧ, сла́влѧхꙋ бг҃а, ди́внагѡ во ст҃ы́хъ свои́хъ, и҆ воспѣва́хꙋ є҆мꙋ̀ бл҃года́рными ᲂу҆сты̀: А҆ллилꙋ́їа.

І҆́косъ ѳ҃

Вѣті́йствꙋющїй ѧ҆зы́къ чл҃вѣ́ческїй не возмо́жетъ досто́йнѡ восхвали́ти болѣ̑зни и҆ трꙋды̀ твоѧ̑, зна́менїѧ и҆ чꙋдеса̀, ст҃ы́й а҆пⷭ҇ле, въ вели́цѣй а҆рме́нїи бы́вшаѧ: си́ла же зна́менїй си́хъ да́же до царе́ва до́мꙋ дости́же, є҆гда̀ и҆з̾ дще́ре царе́вой моли́твою твое́ю бѣ́съ и҆згна́сѧ. є҆гда́ же ца́рь и҆ всѝ лю́дїе твою̀ во хрⷭ҇тѣ̀ нелицемѣ́рнꙋю нищетꙋ̀ ᲂу҆зрѣ́вше, ѡ҆брати́шасѧ ко хрⷭ҇тꙋ̀, тогда̀ всѧ̀ вели́каѧ а҆рме́нїѧ ѿ царе́ва до́мꙋ и҆ до ѻ҆бита́лища бѣ́дныхъ ѡ҆гласи́сѧ сицевы́ми ра́достными и҆ хвале́бными пѣ̑нїи тебѣ̀, вели́комꙋ а҆пⷭ҇лꙋ и҆ чꙋдотво́рцꙋ:

Ра́дꙋйсѧ, чꙋдотво́рче преди́вный: ра́дꙋйсѧ, всѣ́хъ болѧ́щихъ врачꙋ̀ безме́здный.

Ра́дꙋйсѧ, сла́вꙋ хрⷭ҇то́вꙋ па́че земны́хъ сокро́вищъ возлюби́вый: ра́дꙋйсѧ, ѡ҆ сп҃се́нїи дꙋ́шъ чл҃вѣ́ческихъ прилѣжа́вый.

Ра́дꙋйсѧ, царѧ̀ полїмі́а, цари́цꙋ и҆ дще́рь и҆̀хъ ко хрⷭ҇тꙋ̀ ѡ҆брати́вый: ра́дꙋйсѧ, и҆ царедвѡ́рцы зна̑тныѧ, и҆ ѿ просты́хъ люде́й нема́лѡ ст҃ы́мъ кр҃ще́нїемъ просвѣти́вый.

Ра́дꙋйсѧ, нищетꙋ̀ дꙋхо́внꙋю и҆ тѣле́снꙋю возлюби́вый: ра́дꙋйсѧ, сла́вный безсре́брениче.

Ра́дꙋйсѧ, вели́кїѧ а҆рме́нїи просвѣти́телю: ра́дꙋйсѧ, ѻ҆́тче на́шъ чадолюби́вый.

Ра́дꙋйсѧ, ра́йскїѧ двє́ри на́мъ ѿверза́ющїй: ра́дꙋйсѧ, ѿ пꙋтѝ поги́бельнагѡ на́съ и҆схища́ющїй.

Ра́дꙋйсѧ, ст҃ы́й сла́вный и҆ всехва́льный а҆пⷭ҇ле варѳоломе́е.

Конда́къ і҃

Сп҃се́нїю но́выхъ и҆ но́выхъ люде́й рабо́таѧ, дости́глъ є҆сѝ, ст҃ы́й а҆пⷭ҇ле варѳоломе́е, бл҃же́ннагѡ конца̀ житїѧ̀ своегѡ̀: жрецы́ бо і҆́дѡльстїи въ вели́цѣй а҆рме́нїи ви́дѧще, ꙗ҆́кѡ препита́нїѧ своегѡ̀ лиша́хꙋсѧ, наꙋчи́ша царе́ва бра́та, лю́тагѡ а҆стїа́га, да погꙋби́тъ тѧ̀, ст҃ы́й а҆пⷭ҇ле. Се́й же, неи́стовый, преда́въ тебѣ̀ во гра́дѣ а҆льба́нѣ мно́гимъ мꙋ́камъ, повелѣ̀ на крестѣ̀ стремгла́въ распѧ́ти тѧ̀, да преста́нꙋтъ ᲂу҆ста̀ твоѧ̑ вѣща́ти ᲂу҆че́нїе хрⷭ҇та̀ распѧ́тагѡ: ты́ же, а҆пⷭ҇ле, и҆ на крⷭ҇тѣ̀ ра́достнѡ взыва́лъ є҆сѝ гдⷭ҇еви: А҆ллилꙋ́їа.

І҆́косъ і҃

Цр҃ѧ̀ и҆ гдⷭ҇а не преста́лъ є҆сѝ проповѣ́дати, ст҃ы́й а҆пⷭ҇ле, ᲂу҆сты̀ свои́ми и҆ ви́сѧ стремгла́въ на крⷭ҇тѣ̀: ᲂу҆чи́лъ бо є҆сѝ собра̑нныѧ на позо́ръ се́й лю́ди тве́рдо за вѣ́рꙋ хрⷭ҇то́вꙋ стоѧ́ти, согла́снѡ за́повѣдємъ є҆ѵⷢ҇льскимъ жи́ти и҆ невѣ̑рныѧ ко хрⷭ҇тꙋ̀ привлека́ти. мы́ же, дивѧ́щесѧ ᲂу҆крѣплѧ́ющей тѧ̀ си́лѣ бж҃їей и҆ твоемꙋ̀, ст҃ы́й а҆пⷭ҇ле, мꙋ́жествꙋ, въ похвалꙋ̀ тебѣ̀ си́це глаго́лемъ:

Ра́дꙋйсѧ, сла́вный хрⷭ҇то́въ мч҃ниче: ра́дꙋйсѧ, хрⷭ҇то́ва ᲂу҆че́нїѧ и҆сповѣ́дниче дерзнове́нный.

Ра́дꙋйсѧ, ᲂу҆ста́ми свои́ми да́же до сме́рти и҆́стинꙋ бж҃їю проповѣ́давый: ра́дꙋйсѧ, терпѣ́нїемъ свои́мъ всю̀ вселе́ннꙋю ᲂу҆диви́вый.

Ра́дꙋйсѧ, въ сме́ртный ча́съ тво́й ты́сѧщи люде́й ко хрⷭ҇тꙋ̀ привлекі́й: ра́дꙋйсѧ, ꙗ҆́вный блгⷣтныѧ си́лы хрⷭ҇то́вы свидѣ́телю.

Ра́дꙋйсѧ, позо́ръ крⷭ҇тныѧ сме́рти, ꙗ҆́кѡ побѣ́дный вѣне́цъ, ра́достнѡ поне́сшїй: ра́дꙋйсѧ, въ ча́съ сме́ртныхъ мꙋче́нїй свои́хъ съ гдⷭ҇емъ въ є҆дине́нїи пребы́вый.

Ра́дꙋйсѧ, въ сме́ртномъ часѣ̀ ра́йскїѧ сла́дости на землѝ предвкꙋси́вый: ра́дꙋйсѧ, въ се́й ра́йстѣй сла́дости бжⷭ҇твеннагѡ є҆стества̀ и҆́стинный прича́стниче.

Ра́дꙋйсѧ, терпѣ́нїѧ ᲂу҆се́рдный ᲂу҆чи́телю: ра́дꙋйсѧ, всѧ́кихъ добродѣ́телей вмѣсти́лище.

Ра́дꙋйсѧ, ст҃ы́й сла́вный и҆ всехва́льный а҆пⷭ҇ле варѳоломе́е.

Конда́къ а҃і

Пѣ́нїе всеꙋмиле́нное прино́симъ тебѣ̀, сла́вный а҆пⷭ҇ле хрⷭ҇то́въ варѳоломе́е, сме́ртный тво́й ча́съ на дре́вѣ крⷭ҇тнѣмъ воспомина́юще, диви́мсѧ твоемꙋ̀ сщ҃е́нномꙋ за хрⷭ҇та̀ заколе́нїю, со слеза́ми ᲂу҆бл҃жа́емъ твою̀ кончи́нꙋ, є҆гда̀ мꙋчи́тель лю́тый повелѣ̀ и҆ ко́жꙋ съ твоегѡ̀ чтⷭ҇на́гѡ тѣ́ла содра́ти: ты́ же, ст҃ы́й а҆пⷭ҇ле, не преста́лъ є҆сѝ гдⷭ҇а восхвалѧ́ти до тогѡ̀ бл҃же́ннагѡ часа̀, є҆гда̀ съ ко́жею твое́ю глава̀ твоѧ̀, велѣ́нїемъ мꙋчи́телѧ, ᲂу҆сѣ́чена бы́сть, чи́стаѧ же дꙋша̀ твоѧ̀, ст҃ы́й а҆пⷭ҇ле, восхище́на бы́сть на нб҃са̀ воздава́ти сла́вꙋ гдⷭ҇еви и҆ со свѣ́тлыми нб҃ожи́тели во вѣ́ки взыва́ти є҆мꙋ̀: А҆ллилꙋ́їа.

І҆́косъ а҃і

Свѣ́тъ ве́лїй во и҆сцѣле́нїе не́мощей чл҃вѣ́ческихъ возсїѧ̀ ѿ чⷭ҇тны́хъ моще́й твои́хъ, сла́вный а҆пⷭ҇ле, во гра́дѣ а҆льба́нѣ, є҆гда̀ вѣ́рнїи, взе́мше по кончи́нѣ твое́й со крⷭ҇та̀ чтⷭ҇но́е тѣ́ло твоѐ, во ѻ҆ловѧ́ннѣй ра́цѣ бл҃гоговѣ́йнѡ, вкꙋ́пѣ съ главо́ю и҆ ко́жею, положи́ша. є҆гда́ же невѣ́рнїи бѣсѡ́въ слꙋжи́телїе ᲂу҆зрѣ́ша, ꙗ҆́кѡ мно́зи въ то́й странѣ̀ ѿ невѣ́рныхъ ко хрⷭ҇то́вой цр҃кви прилага́хꙋсѧ, вверго́ша въ мо́рѣ чтⷭ҇ны́ѧ мо́щи твоѧ̑: ті́и же во ѻ҆ловѧ́ннѣй ра́цѣ, а҆́ки въ ле́гцѣй ладїѝ, по вода́мъ понесо́шасѧ, до́ндеже приста́хꙋ ко ѻ҆́стровꙋ лїпа́рꙋ, и҆дѣ́же є҆пⷭ҇копъ а҆гаѳѡ́нъ, по бж҃їю ѿкрове́нїю, съ наро́домъ и҆ кли́ромъ съ ра́достїю сїѧ̀ прїѧ́тъ и҆ во хра́мѣ бл҃гоговѣ́йнѡ поста́ви, воспѣва́ѧ тебѣ̀ си́це:

Ра́дꙋйсѧ, сла́вный а҆пⷭ҇ле хрⷭ҇то́въ: ра́дꙋйсѧ, вѣ́рный самови́дче бг҃а сло́ва и҆ слꙋго̀ є҆гѡ̀.

Ра́дꙋйсѧ, мꙋ́дрый є҆ѵⷢ҇лїѧ хрⷭ҇то́ва проповѣ́дниче: ра́дꙋйсѧ, чꙋде́съ неистощи́мый и҆сто́чниче.

Ра́дꙋйсѧ, ꙗ҆́кѡ мо́щи твоѧ̑ ѿ восто́ка и҆ до за́пада и҆́мѧ гдⷭ҇не восхвали́ша: ра́дꙋйсѧ, ꙗ҆́кѡ ше́ствїемъ моще́й твои́хъ мо́ре ѡ҆ст҃и́сѧ.

Ра́дꙋйсѧ, сѷрі́и и҆ а҆сі́и просвѣти́телю: ра́дꙋйсѧ, і҆ерапо́лѧ фрѷгі́йскагѡ а҆пⷭ҇ле.

Ра́дꙋйсѧ, ꙗ҆́кѡ съ про́повѣдїю хрⷭ҇то́вою да́же до і҆нді́и доше́лъ є҆сѝ: ра́дꙋйсѧ, ꙗ҆́кѡ насе́льникѡвъ брегѡ́въ мо́рѧ хвалы́нскагѡ свѣ́томъ хрⷭ҇то́ва ᲂу҆че́нїѧ просвѣти́лъ є҆сѝ.

Ра́дꙋйсѧ, ꙗ҆́кѡ вели́кꙋю а҆рме́нїю ко хрⷭ҇тꙋ̀ приве́лъ є҆сѝ: ра́дꙋйсѧ, ꙗ҆́кѡ и҆ на́съ прише́ствїемъ моще́й твои́хъ сла́достнѡ ᲂу҆тѣ́шилъ є҆сѝ.

Ра́дꙋйсѧ, ст҃ы́й сла́вный и҆ всехва́льный а҆пⷭ҇ле варѳоломе́е.

Конда́къ в҃і

Бл҃года́ть ѿ гдⷭ҇а досто́йнѡ подража́ти житїю̀ твоемꙋ̀ и҆ прославлѧ́ти болѣ̑зни и҆ трꙋды̀ твоѧ̑, пода́ждь на́мъ, ст҃ы́й а҆пⷭ҇ле, ꙗ҆́коже и҆ногда̀ і҆ѡ́сифꙋ пѣснопи́сцꙋ, є҆гда̀ въ на́вечерїе пра́здника твоегѡ̀ ꙗ҆ви́лсѧ є҆сѝ є҆мꙋ̀ во ѻ҆лтарѝ и҆ ст҃ы́мъ є҆ѵⷢ҇лїемъ бл҃гослови́лъ є҆сѝ є҆го̀, да и҆ мы̀ моли́твами твои́ми, бл҃года́тїю бж҃їею ѡ҆заре́ннїи, кꙋ́пнѡ со все́ю вселе́нною гдⷭ҇еви со ᲂу҆миле́нїемъ взыва́емъ: А҆ллилꙋ́їа.

І҆́косъ в҃і

Пою́ще твоѐ за хрⷭ҇то́мъ послѣ́дованїе, восхвалѧ́емъ ди́внаѧ а҆пⷭ҇льскїѧ трꙋды̀ твоѧ̑, бл҃гоговѣ́йнѡ чти́мъ двꙋкра́тное твоѐ за хрⷭ҇та̀ распѧ́тїе, ᲂу҆бл҃жа́емъ чтⷭ҇ны́ѧ твоеѧ̀ главы̀ ѿсѣче́нїе, сла́вимъ неисчє́тнаѧ чꙋдеса̀ ѿ чтⷭ҇ны́хъ моще́й твои́хъ и҆ въ похвалꙋ̀ велегла́снѡ тебѣ̀ глаго́лемъ:

Ра́дꙋйсѧ, про́повѣдїю твое́ю мно́ги концы̀ вселе́нныѧ ѡ҆гласи́вый: ра́дꙋйсѧ, мнѡ́гїѧ лю́ди ко хрⷭ҇тꙋ̀ приведы́й.

Ра́дꙋйсѧ, мꙋ́дрый є҆ѵⷢ҇лїѧ хрⷭ҇то́ва проповѣ́дниче: ра́дꙋйсѧ, хрⷭ҇то́выхъ за́повѣдей тве́рдый и҆сполни́телю.

Ра́дꙋйсѧ, ꙗ҆́кѡ жи́телїе ѻ҆́строва лїпа́ра и҆ гра́да беневе́нта, и҆дѣ́же мо́щи твоѧ̑ почива́ютъ, ꙗ҆́кѡ своегѡ̀ а҆пⷭ҇ла тѧ̀ почита́ютъ: ра́дꙋйсѧ, ꙗ҆́кѡ по́двигѡмъ твои́мъ всѧ̀ вселе́ннаѧ диви́тсѧ.

Ра́дꙋйсѧ, во хрⷭ҇тѣ̀ ѻ҆те́цъ на́шъ многопопечи́тельный: ра́дꙋйсѧ, а҆пⷭ҇ле, ѡ҆ на́шемъ сп҃се́нїи ѕѣлѡ̀ рачи́тельный.

Ра́дꙋйсѧ, ꙗ҆́кѡ въ де́нь стра́шнагѡ сꙋда̀ хрⷭ҇то́ва возсѧ́деши на є҆ди́нѣмъ ѿ ѻ҆боюна́десѧте престо́лѡвъ, да сꙋ́диши со хрⷭ҇то́мъ всю̀ вселе́ннꙋю: ра́дꙋйсѧ, ꙗ҆́кѡ за пра́ведникѡвъ хода́таемъ пред̾ є҆ди́нымъ сꙋдїе́ю и҆ гдⷭ҇емъ въ то́й ча́съ ꙗ҆ви́шисѧ.

Ра́дꙋйсѧ, сла́вныхъ дѣ́лъ бж҃їихъ возвѣсти́телю: ра́дꙋйсѧ, ѕлы́хъ ко́зней сатани́нскихъ сокрꙋши́телю.

Ра́дꙋйсѧ, ст҃ы́й сла́вный и҆ всехва́льный а҆пⷭ҇ле варѳоломе́е.

Конда́къ г҃і

Ѽ ст҃ы́й сла́вный и҆ всехва́льный а҆пⷭ҇ле варѳоломе́е. Прїимѝ сїѐ ѿ на́съ, недосто́йныхъ, приноси́мое тебѣ̀ хвале́бное пѣ́нїе, и҆ ꙗ҆́коже ты̀ са́мъ всѣ́мъ се́рдцемъ, дꙋше́ю и҆ тѣ́ломъ преда́лъ є҆сѝ себє̀ на слꙋже́нїе гдⷭ҇еви своемꙋ̀ и҆ ᲂу҆чи́телю, та́кѡ и҆ на́съ, моли́твами твои́ми, сподо́би жи́знь свою̀ во сла́вꙋ гдⷭ҇ню ᲂу҆строѧ́ти, всѧ̑ ѿ негѡ̀ посыла́ємаѧ со бл҃годаре́нїемъ прїима́ти, и҆ та́кѡ тебѣ̀ подража́юще, вѣ́чное црⷭ҇твїе наслѣ́довати и҆ гдⷭ҇еви, творцꙋ̀ на́шемꙋ и҆ промысли́телю, съ тобо́ю и҆ всѣ́ми ст҃ы́ми во вѣ́ки воспѣва́ти: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃лѡвъ гдⷭ҇ь и҆ сп҃си́тель всегѡ̀ ро́да чл҃вѣ́ча, прови́дѣвъ чистотꙋ̀ дꙋшѝ твоеѧ̀, ст҃ы́й варѳоломе́е, бл҃говолѝ и҆збра́ти тѧ̀ во є҆ди́нагѡ ѿ ѻ҆боюна́десѧте и҆ нарещѝ а҆пⷭ҇ломъ свои́мъ. Мы́ же, дивѧ́щесѧ дꙋхѡ́внымъ дарова́нїємъ твои̑мъ, прославлѧ́емъ тѧ̀ си́це:

Ра́дꙋйсѧ, варѳоломе́е, вели́кїй хрⷭ҇то́въ а҆пⷭ҇ле: ра́дꙋйсѧ, ᲂу҆ч҃ничѐ хрⷭ҇то́въ ᲂу҆се́рднѣйшїй.

Ра́дꙋйсѧ, ꙗ҆́кѡ се́рдце своѐ непоро́чнѡ и҆мѣ́лъ є҆сѝ: ра́дꙋйсѧ, ꙗ҆́кѡ лꙋка̑выѧ наставлє́нїѧ ста́рцєвъ є҆вре́йскихъ ѿве́рглъ є҆сѝ.

Ра́дꙋйсѧ, ꙗ҆́кѡ всѣ́мъ се́рдцемъ свои́мъ хрⷭ҇тꙋ̀ прилѣпи́лсѧ є҆сѝ: ра́дꙋйсѧ, ꙗ҆́кѡ всѧ̑ мїрскі́ѧ бла̑га ни во что́же вмѣни́лъ є҆сѝ.

Ра́дꙋйсѧ, ꙗ҆́кѡ ѻ҆тца̀ и҆ ма́терь, бра́тїю и҆ сєстры̀ своѧ̑ ра́ди гдⷭ҇а ѡ҆ста́вилъ є҆сѝ: ра́дꙋйсѧ, ꙗ҆́кѡ во слѣ́дованїи за хрⷭ҇то́мъ и҆́стинное бл҃же́нство воспрїѧ́лъ є҆сѝ.

Ра́дꙋйсѧ, ᲂу҆че́нїемъ хрⷭ҇то́вымъ плѣни́выйсѧ: ра́дꙋйсѧ, въ пꙋтѝ хрⷭ҇то́вомъ бл҃го црⷭ҇твїѧ нбⷭ҇нагѡ предвкꙋси́вый.

Ра́дꙋйсѧ, бл҃гогла́снѣйшїй проповѣ́дниче хрⷭ҇то́ва ᲂу҆че́нїѧ: ра́дꙋйсѧ, вѣ́рный слꙋго̀ гдⷭ҇а.

Ра́дꙋйсѧ, ст҃ы́й сла́вный и҆ всехва́льный а҆пⷭ҇ле варѳоломе́е.

Конда́къ а҃

И҆збра́нномꙋ ѿ люде́й і҆и҃левыхъ во хрⷭ҇то́ва а҆пⷭ҇ла на ᲂу҆ловле́нїе человѣ́кѡвъ, чꙋ́дномꙋ варѳоломе́ю, пѣ̑нїѧ похва̑льнаѧ принесе́мъ, вѣ́рнїи, ꙗ҆́кѡ ѡ҆ста́вльшемꙋ до́мъ сво́й, нищетꙋ̀ хрⷭ҇то́вꙋ возлюби́вшемꙋ и҆ хрⷭ҇то́во ᲂу҆че́нїе па́че ᲂу҆че́нїѧ є҆вре́йскихъ кни́жникѡвъ и҆збра́вшемꙋ. ты́ же, ст҃ы́й а҆пⷭ҇ле, всѣ́хъ на́съ, па́мѧть твою̀ чⷭ҇тнꙋ́ю пра́зднꙋющихъ, не ѡ҆ста́ви свои́мъ предста́тельствомъ и҆ застꙋпле́нїемъ, да бл҃года́рными ᲂу҆стна́ми вопїе́мъ тѝ:

Ра́дꙋйсѧ, ст҃ы́й сла́вный и҆ всехва́льный а҆пⷭ҇ле варѳоломе́е.

Моли́твы

Ѽ пресла́вный а҆пⷭ҇ле хрⷭ҇то́въ варѳоломе́е, дꙋ́шꙋ за хрⷭ҇та̀ преда́вшїй и҆ кро́вїю твое́ю па́жить є҆гѡ̀ ᲂу҆добри́вшїй. Оу҆слы́ши ча́дъ твои́хъ моли̑твы и҆ воздыха̑нїѧ, се́рдцемъ сокрꙋше́ннымъ ны́нѣ приноси́мыѧ. сѐ бо беззако́ньми ѡ҆мрачи́хомсѧ, и҆ тогѡ̀ ра́ди бѣда́ми, ꙗ҆́коже тꙋ́чами, ѡ҆бложи́хомсѧ, є҆ле́ѧ же до́брагѡ житїѧ̀ ѡ҆бнища́хомъ ѕѣлѡ̀, и҆ не возмо́жемъ проти́витисѧ волкѡ́мъ хи́щнымъ, и҆́же расхища́ти наслѣ́дїе бж҃їе де́рзостнѡ тща́тсѧ. ѽ си́льный! понесѝ не́мѡщи на̑ша, не ѿлꙋча́йсѧ дꙋ́хомъ ѿ на́съ, да не разлꙋчи́мсѧ въ коне́цъ ѿ любвѐ бж҃їѧ, но крѣ́пкимъ застꙋпле́нїемъ твои́мъ на́съ защитѝ, да поми́лꙋетъ гдⷭ҇ь всѣ́хъ на́съ моли́твъ твои́хъ ра́ди, да и҆стреби́тъ же рꙋкописа́нїе безмѣ́рныхъ грѣхѡ́въ на́шихъ, и҆ да сподо́битъ со всѣ́ми ст҃ы́ми бл҃же́ннагѡ црⷭ҇твїѧ и҆ бра́ка а҆́гнца своегѡ̀, є҆мꙋ́же че́сть и҆ сла́ва, и҆ бл҃годаре́нїе и҆ поклоне́нїе во вѣ́ки вѣкѡ́въ. А҆ми́нь.