Кондак 1
Избра́нней Бо́гом от челове́ческаго ро́да послужи́ти воплоще́нию предве́чнаго Сло́ва, преблагослове́нней Де́ве Богоро́дице, досто́йно воспева́емой от А́нгел на Небеси́, мы́ гре́шнии на земли́ дерза́ем приноси́ти хвале́бное пе́ние; е́же ми́лостиво от на́с прие́мши, всеми́лующая Цари́це Богоро́дице, от вся́ких бе́д на́с спаси́ и ве́чных му́к свободи́, да зове́м Ти́:
Ра́дуйся, христиа́ном Помо́щнице и милосе́рдая о гре́шных Предста́тельнице.
Икос 1
Арха́нгел Гаврии́л с небесе́ по́слан бы́сть от Тебе́, Богоро́дице, к смире́нному послу́шнику Горы́ Афо́нския, в пусты́нней ке́ллии воспева́вшему Ти́ хвале́бныя пе́сни пред свято́ю Твое́ю ико́ною, да научи́т его́ пе́ти пе́снь небе́сную, е́юже славосло́вят Тя́ А́нгели в Сио́не го́рнем. Те́мже и мы́ до́льнии, воспомина́я таково́е Твое́ о лю́дех благопромышле́ние, со благодаре́нием вопие́м Ти́ си́це:
Ра́дуйся, досто́йно восхваля́емая от Арха́нгел и А́нгел; ра́дуйся, ублажа́емая от все́х небе́сных си́л.
Ра́дуйся, Присноблаже́нная и Пренепоро́чная; ра́дуйся, Ма́ти Бо́га на́шего.
Ра́дуйся, честне́йшая Херуви́м; ра́дуйся, сла́внейшая без сравне́ния Серафи́м.
Ра́дуйся, без истле́ния Бо́га Сло́ва ро́ждшая; ра́дуйся, вои́стину су́щая Богоро́дице.
Ра́дуйся, велича́емая на небеси́ и на земли́; ра́дуйся, воспева́емая го́рними и до́льними.
Ра́дуйся, еди́на благослове́нная в жена́х; ра́дуйся, израсти́вшая на́м пло́д живота́.
Ра́дуйся, христиа́ном Помо́щнице и милосе́рдая о гре́шных Предста́тельнице.
Кондак 2
Ви́дев послу́шник пусты́нный ди́внаго прише́льца, в ке́ллию его́ прише́дшаго и пе́снь пресла́дкую Тебе́, Влады́чице, воспе́вшаго, не уразуме́ в не́м А́нгела бы́ти, но зело́ услади́ся пе́нием его́ небе́сным и проси́, да напи́шет ему́ словеса́ пое́мыя пе́сни; егда́ же узре́, я́ко под пе́рстом его́ ка́менная дска́ умягчи́ся, и пи́шемая словеса́ на не́й углуби́шася, я́ко на песце́, позна́ в се́м чуде́сное де́йство и возопи́ к ро́ждшемуся от Тебе́ Бо́гу Сло́ву: Аллилу́иа.
Икос 2
Ра́зумом богоозаре́нным но́вую пе́снь открыва́я, рече́ Арха́нгел послу́шнику, я́ко та́ко воспева́ют Тя́, Богоро́дице, А́нгелов ли́цы в оби́телех го́рних, и повеле́ ему́, да возвести́т челове́ком словеса́ пе́сни небе́сныя и научи́т и́х ангелоподо́бно пе́ти Тебе́:
Ра́дуйся, благода́тная Мари́е; ра́дуйся, я́ко Госпо́дь с Тобо́ю.
Ра́дуйся, благослове́нная в жена́х; ра́дуйся, неискусобра́чная роди́тельнице Бо́га Сло́ва.
Ра́дуйся, непоро́чное селе́ние Ду́ха Свята́го; ра́дуйся, зача́тие несказа́нное яви́вшая.
Ра́дуйся, рождество́ нетле́нное показа́вшая; ра́дуйся, Ма́терию и Де́вою пребы́вшая.
Ра́дуйся, во обою́ непоро́чно и свя́то себе́ сохрани́вшая; ра́дуйся, А́нгелов чистото́ю Твое́ю превозше́дшая.
Ра́дуйся, го́рних умо́в непрестаю́щее удивле́ние; ра́дуйся, челове́ческаго ро́да возвыше́ние.
Ра́дуйся, христиа́ном Помо́щнице и милосе́рдая о гре́шных Предста́тельнице.
Кондак 3
Си́лою Бо́жиею Гаврии́л Арха́нгел тве́рдый ка́мень в мя́гкий во́ск претвори́ и на не́м пе́рстом свои́м написа́ словеса́ пе́сни хвале́бныя Тебе́, Богоро́дице, да вси́ позна́ют вели́кое чу́до и несумне́нно уве́руют, я́ко та́ко вои́стину воспева́ют Тя́ горе́ си́лы небе́сныя, и́мже подража́юще, и мы́ пое́м вели́чия Твоя́, Де́во, и в ра́дости духо́вней вопие́м просла́вльшему Тя́ Бо́гу: Аллилу́иа.
Икос 3
Име́я простоту́ душе́вную и непоро́чное се́рдце, послу́шник смире́нный сподо́бися а́нгельския бесе́ды и лицезре́ния чинонача́льника го́рних си́л, мы́ же, лука́вством и зло́бою потемне́ннии, со тре́петом взира́юще на святу́ю ико́ну Твою́, Влады́чице, мо́лим Ти ся приле́жно, обрати́ ны́ от зло́б на́ших и научи́ на́с во смире́нии и кро́тости ду́ха глаго́лати Тебе́:
Ра́дуйся, Го́ру Афо́нскую освяти́вшая Твои́м благода́тным прису́тствием; ра́дуйся, хо́лмы и де́бри ея́ испо́лнившая сла́вою Твои́х чуде́с.
Ра́дуйся, а́нгельскаго явле́ния сподо́бльшая пустынножи́тельство Афо́нское; ра́дуйся, оби́тели и́ноческия в не́м умно́жившая во спасе́ние ду́ш челове́ческих.
Ра́дуйся, и все́м, в посте́ и моли́тве пребыва́ющим, обеща́вшая Твое́ заступле́ние; ра́дуйся, от треволне́ния мо́ря жите́йскаго спаса́ющая ка́ющихся.
Ра́дуйся, благода́ть Сы́на Твоего́ и Бо́га низводя́щая на места́, Тебе́ посвяща́емыя; ра́дуйся, ра́й мы́сленный показа́вшая хра́мы Бо́жии.
Ра́дуйся, приста́нище небу́рное содева́ющая в о́нех и́щущим спасе́ния; ра́дуйся, все́м потре́бным ко благоче́стию на́с снабдева́ющая.
Ра́дуйся, жи́тельствующим богоуго́дно Пода́тельнице бла́г вре́менных и ве́чных; ра́дуйся, Хода́таице на́м Ца́рствия Небе́снаго.
Ра́дуйся, христиа́ном Помо́щнице и милосе́рдая о гре́шных Предста́тельнице.
Кондак 4
Бу́ря недоуме́ния смути́ ста́рца и́нока, егда́ услы́ша пе́снь но́ву и чу́дну из у́ст своего́ ученика́ и узре́ дску́ ка́менну, я́ко во́ск, начерта́ние прии́мшу; егда́ же уве́да о посеще́нии ди́внаго посети́теля, Гаврии́лом наре́кшагося, уразуме́, я́ко то́й се́й е́сть, и́же дре́вле благовести́ Тебе́, Де́во, безсе́менное зача́тие Бо́га Сло́ва. Те́мже велича́я вели́чия Твоя́, Цари́це го́рних и до́льних, воспева́ше ра́достно А́нгелов и челове́ков Творцу́: Аллилу́иа.
Икос 4
Слы́шавше о посеще́нии Арха́нгелове и́ноцы Горы́ Афо́нския, стека́хуся ви́дети дску́, на не́йже преесте́ственно начерта́на бы́ша пи́сьмена пе́сни небе́сныя, и воспева́ху Тя́ благогове́йно пред свято́ю ико́ною Твое́ю, Влады́чице, пред не́юже воспе́ Тя Арха́нгел. Приими́ у́бо и на́ша приноси́мыя Тебе́ моли́твы с пе́нием таковы́м:
Ра́дуйся, я́ко о Тебе́ ра́дуется а́нгельский собо́р; ра́дуйся, я́ко о Тебе́ торжеству́ет челове́ческий ро́д.
Ра́дуйся, на руку́ Твое́ю носи́вшая Нося́щаго вся́ческая; ра́дуйся, вмести́вшая во чре́ве Твое́м Невмести́маго все́м ми́ром.
Ра́дуйся, Созда́телю Твоему́ пло́ть заимода́вшая; ра́дуйся, Красне́йшаго па́че все́х сыно́в челове́ческих ро́ждшая.
Ра́дуйся, млеко́м пита́вшая Пита́ющаго вся́ческая; ра́дуйся, попече́ние име́вшая о Сы́не Твое́м, Су́щем Промысли́теле всея́ тва́ри.
Ра́дуйся, похвало́ де́вства; ра́дуйся, ма́терей сла́во.
Ра́дуйся, в рождестве́ де́вство сохрани́вшая; ра́дуйся, рождество́ с де́вством сочета́вшая.
Ра́дуйся, христиа́ном Помо́щнице и милосе́рдая о гре́шных Предста́тельнице.
Кондак 5
Богови́дец Моисе́й иногда́ на ка́менных скрижа́лех зако́н Бо́жий, начерта́нный пе́рстом Бо́жиим, получи́, и́ноцы же Горы́ Афо́нския пе́снь небе́сную во сла́ву Богома́тере, на дске́ ка́менней начерта́нную, от Арха́нгела прия́ша и, си́м науче́ннии а́нгельское славосло́вие Тебе́ приноси́ти, воспе́ша та́ко благоволи́вшему о ни́х Бо́гу: Аллилу́иа.
Икос 5
Ви́девше нача́льницы Горы́ Афо́нския чу́до ве́лие в явле́нии Арха́нгелове и пе́сни но́вей, дску́ с начерта́нными от А́нгела письмены́ препроводи́ша к царю́ и патриа́рху Царегра́да, во увере́ние и́стины пресла́внаго сего́ чудесе́; ти́и же ра́достно прия́ша ю́, я́ко зало́г благоволе́ния Бо́жия, во все́й Це́ркви Правосла́вней узако́ниша воспева́ти пе́снь а́нгельскую в похвалу́ Тебе́, Богоро́дице, и взыва́ху Ти́ во умиле́нии си́це:
Ра́дуйся, преукраше́нная ле́потами все́х доброде́телей, Де́во; ра́дуйся, Неве́сто неневе́стная.
Ра́дуйся, возрасти́вшая цве́т неувяда́емый, Христа́; ра́дуйся, раю́ слове́сный, Дре́во жи́зни на́м прозя́бшая.
Ра́дуйся, се́не небе́сная, от зно́я страсте́й на́с сохраня́ющая; ра́дуйся, покро́ве ми́ру, ши́рший о́блака.
Ра́дуйся, дре́во благосенноли́ственное, прохла́ду спаси́тельную ве́рным подаю́щее; ра́дуйся, исто́чниче Воды́ живы́я, от нея́же пия́й ктому́ не умира́ет.
Ра́дуйся, Судии́ пра́веднаго умоле́ние; ра́дуйся, грехо́в на́ших проще́ние.
Ра́дуйся, во сла́ве небе́сней одесну́ю Бо́га пребыва́ющая; ра́дуйся, земноро́дных милосе́рдием Твои́м не оставля́ющая.
Ра́дуйся, христиа́ном Помо́щнице и милосе́рдая о гре́шных Предста́тельнице.
Кондак 6
Пропове́дует Свята́я Це́рковь вели́чие чуде́с Твои́х, Мари́е Богоро́дице, и све́тло красу́ется, воспева́я Ти́ пе́снь а́нгельскую, от Небе́с на зе́млю принесе́нную чинонача́льником го́рних си́л Гаврии́лом; с ни́мже помоли́ся, Госпоже́ Пречи́стая, к Сы́ну Твоему́ и Бо́гу, да незы́блему во благоче́стии сохрани́т Це́рковь Свою́ и посрами́т вся́ воста́ния ерети́ческая и раско́льническая, на́с же, ча́д Ея́, сподо́бит неосужде́нно воспева́ти Ему́: Аллилу́иа.
Икос 6
Возсия́ла еси́ мно́гими луча́ми чуде́с, о ми́лостивая Богома́ти, чрез святу́ю ико́ну Твою́, Влады́чице, и си́ми не то́чию Го́ру Афо́нскую, но и мно́жайшая места́ озари́ла еси́, да научи́мся зва́ти Тебе́:
Ра́дуйся, ра́досте на́ша, услажда́ющая ско́рбныя сердца́, к Тебе́ отве́рстыя; ра́дуйся, блага́я Засту́пнице, на по́мощь к на́м ускоря́ющая.
Ра́дуйся, зало́г спаси́тельный на́м в ико́не Твое́й дарова́вшая; ра́дуйся, Афо́нскую Го́ру и мно́гия стра́ны е́ю просла́вльшая.
Ра́дуйся, Наде́ждо на́ша изве́стная; ра́дуйся, упова́ние на́ше непосты́дное.
Ра́дуйся, скорбе́й на́ших разреше́ние; ра́дуйся, печа́лей на́ших утоле́ние.
Ра́дуйся, ве́ры правосла́вныя утвержде́ние; ра́дуйся, неве́рия и злове́рия посрамле́ние.
Ра́дуйся, любве́ Боже́ственныя явле́ние; ра́дуйся, чуде́с пресла́вных соверше́ние.
Ра́дуйся, христиа́ном Помо́щнице и милосе́рдая о гре́шных Предста́тельнице.
Кондак 7
Хотя́щим жа́ти спасе́ние ми́лостивая Покрови́тельница и Помо́щница явля́ешися, Ма́ти Бо́жия, и при́сно хода́тайствуеши за ни́х к Сы́ну Твоему́ и Бо́гу, а́ще бо кто́ и па́дает в не́кое согреше́ние, не́мощию пло́ти обложе́н, оба́че Тобо́ю возста́ние получа́ет во спасе́ние, я́ко все́м хо́щеши спасти́ся и в ра́зум и́стины приити́ воспева́ющим Христу́ Бо́гу: Аллилу́иа.
Икос 7
Но́во не́бо и но́ва земля́ угото́ваны от Сы́на Твоего́ и Бо́га лю́бящим Его́, Госпоже́ Всеблага́я, к ни́мже стяжа́хом Тя́ Путеводи́тельницу изря́дну. Те́мже мо́лим Тя́, не попусти́ на́с поги́бнути в де́брех грехо́вных, но приведи́ на́с стезе́ю пра́вою в страну́ све́та и ра́дости ве́чныя, да Тебе́ вопие́м хвале́бно:
Ра́дуйся, Сио́на го́рняго пе́рвейшее украше́ние; ра́дуйся, оби́телей до́льних присногото́вое заступле́ние.
Ра́дуйся, земле́ блага́я, Кла́с спаси́тельный ми́ру израсти́вшая; ра́дуйся, ни́во неора́нная, оплодотворе́нная Ду́хом Святы́м.
Ра́дуйся, О́гнь Божества́ во чре́во Твое́ прие́мшая; ра́дуйся, гла́д па́дшаго челове́чества Хле́бом жи́зни утоли́вшая.
Ра́дуйся, Престо́ле Царя́ Сла́вы; ра́дуйся, пала́то преукраше́нная Вседержи́теля.
Ра́дуйся, хра́ме одушевле́нный Триипоста́снаго Бо́га; ра́дуйся, две́ре Госпо́дня, е́юже Сы́н Бо́жий про́йде к на́м.
Ра́дуйся, христиа́ном Помо́щнице и милосе́рдая о гре́шных Предста́тельнице.
Кондак 8
Стра́нное явле́ние Арха́нгела, на Горе́ Афо́нстей иногда́ бы́вшее, смотре́ние бы́сть Боже́ственное, и́мже просла́вися всепе́тое и́мя Твое́, Мари́е Богоро́дице, и вси́ ве́рнии научи́шася ангелоподо́бно воспева́ти Тя́, Херуви́мов честне́йшую и Серафи́мов сла́внейшую Ма́терь Бо́га на́шего, о Не́йже ра́дуется вся́кая тва́рь и ро́д челове́ческий благода́рно взыва́ет ко Го́споду: Аллилу́иа.
Икос 8
Все́ упова́ние на́ше на Тя́ возлага́ем, Ма́ти Бо́жия, и в ско́рбех на́ших к святе́й ико́не Твое́й усе́рдно притека́ем, ча́юще от нея́ утеше́ние благода́тное получи́ти. Помози́ у́бо на́м, Влады́чице, с терпе́нием и благодаре́нием вся́кия ско́рби переноси́ти и вме́сто ро́пота малоду́шнаго благоумиле́нно взыва́ти Тебе́:
Ра́дуйся, все́х скорбя́щих Ра́досте; ра́дуйся, все́х печа́льных Утеше́ние.
Ра́дуйся, тружда́ющихся и обремене́нных сла́дкий поко́е; ра́дуйся, боле́знующих и огорче́нных живи́тельная отра́до.
Ра́дуйся, в ча́с ско́рбных недоуме́ний мы́сль благу́ю на се́рдце полага́ющая; ра́дуйся, во дни́ уны́ния наде́ждою ве́чных бла́г воодушевля́ющая.
Ра́дуйся, искуша́емым ру́ку по́мощи простира́ющая; ра́дуйся, гне́в Бо́жий от гла́в на́ших отводя́щая.
Ра́дуйся, ми́рное устрое́ние обурева́емым напа́стьми подаю́щая; ра́дуйся, во благи́х жела́ния на́ша ди́вно исполня́ющая.
Ра́дуйся, терпели́вых страда́льцев дара́ми благода́тными увенчава́ющая; ра́дуйся, все́х благоподвиза́ющихся блаже́нства ра́йскаго сподобля́ющая.
Ра́дуйся, христиа́ном Помо́щнице и милосе́рдая о гре́шных Предста́тельнице.
Кондак 9
Вси́ А́нгели небе́снии немо́лчными похвала́ми Тя́ ублажа́ют, Цари́це и Влады́чице всея́ тва́ри, мы́ же земни́и и пе́рстнии ку́ю похвалу́ досто́йную принесе́м Ти́, Всепе́тая? Оба́че, наде́ющеся на милосе́рдие Твое́ неисче́тное, любо́вию к Тебе́ понужда́еми, пое́м чудеса́ Твоя́, пропове́дуем благодея́ния Твоя́, славосло́вим и́мя Твое́ и, усе́рдно припа́дая ко святе́й ико́не Твое́й, ра́бски вопие́м изображе́нному на не́й вку́пе с Тобо́ю Богомладе́нцу Христу́: Аллилу́иа.
Икос 9
Вити́й ри́торския глаго́лы не дово́льни к пе́нию чуде́с Твои́х, Богоро́дице, оба́че блага́я су́щи, ве́ру на́шу вме́сто ри́торскаго благослове́сия ми́лостиво приими́, ве́си бо и любо́вь на́шу, е́юже сердца́ на́ша к Тебе́ испо́лнены. Те́мже благоутро́бно услы́ши нехи́тростныя на́ша пе́сни, и́миже дерза́ем благохвали́ти Тя́ си́це:
Ра́дуйся, сопресто́льное Отцу́ Сло́во в ложесна́х Твои́х вмести́вшая; ра́дуйся, Све́т незаходи́мый ро́ждшая.
Ра́дуйся, жи́знь ве́чную ми́ру дарова́вшая рождество́м Твои́м; ра́дуйся, Преве́чнаго, я́ко Младе́нца, на руку́ Твое́ю носи́вшая.
Ра́дуйся, гра́де одушевле́нный Всецаря́; ра́дуйся, ски́ние освяще́нная жива́го Бо́га.
Ра́дуйся, ни́жняя сочета́вшая с вы́шними; ра́дуйся, миротво́рице, Боже́ственнаго ми́ра преиспо́лненная.
Ра́дуйся, до́брых вино́вная; ра́дуйся, злы́х премене́ние.
Ра́дуйся, ору́жие на враги́ всекре́пкое; ра́дуйся, щи́те ве́рных несокруши́мый.
Ра́дуйся, христиа́ном Помо́щнице и милосе́рдая о гре́шных Предста́тельнице.
Кондак 10
Спаси́тельное прибе́жище от суе́т ми́ра преле́стнаго яви́ся жре́бий Тво́й земны́й, свята́я вои́стину Гора́ Афо́нская, Богоро́дице Де́во, озна́менованная мно́гими Твои́ми чудесы́. Но и на вся́ком ме́сте с любо́вию призыва́ющих Тя́ услы́ши и заступи́, Сы́на же Твоего́ умоля́ти не преста́й, Всеблага́я, да неотсту́пна пребыва́ет благода́ть Его́ от ме́ст, иде́же в собра́нии ве́рных пое́тся Ему́ хвале́бная пе́снь: Аллилу́иа.
Икос 10
Стена́ еси́ де́вственником, Преблагослове́нная Де́во, и сто́лп кре́пок от лица́ вра́жия все́м подви́жником благоче́стия: Тебе́ бо даде́ся ве́лия си́ла те́мныя а́дския си́лы побежда́ти и от искуше́ний и́х душепа́губных челове́ки избавля́ти, наипа́че же те́х, и́же целому́дренно и свя́то на земли́ пребыва́ют. Сего́ ра́ди де́вства и целому́дрия рачи́тели согла́сно Тебе́ зову́т:
Ра́дуйся, чистото́ю сия́ющая па́че со́лнца; ра́дуйся, де́вства нача́ло и освяще́ние.
Ра́дуйся, кри́не, облагоуха́вший па́дшее челове́чество; ра́дуйся, во смире́нии Твое́м осене́нная благоволе́нием Всевы́шняго.
Ра́дуйся, ве́рная рабо́ Госпо́дня; ра́дуйся, я́ко Тя́ блажа́т вси́ ро́ди.
Ра́дуйся, я́ко сотвори́ Ти́ вели́чие Си́льный; ра́дуйся, я́ко соца́рствуеши с Сыно́м Твои́м во сла́ве ве́чней.
Ра́дуйся, хода́таице Бо́жия к лю́дем благоволе́ния; ра́дуйся, гре́шных к Бо́гу дерзнове́ние окриля́ющая.
Ра́дуйся, неистощи́мый исто́чниче ми́лостей и щедро́т; ра́дуйся, преиспо́лненная сострада́ния к стра́ждущим.
Ра́дуйся, христиа́ном Помо́щнице и милосе́рдая о гре́шных Предста́тельнице.
Кондак 11
Пе́ние на́ше, а́ще бы́ло бы и тьмочи́сленное, не довле́ло бы к досто́йному прославле́нию ми́лостей Твои́х, Преблагослове́нная Ма́ти Бо́жия, я́же непреста́нно излива́еши ро́ду на́шему; оба́че да не неблагода́рни яви́мся пред Тобо́ю, по си́ле на́шей похва́льная воспису́ем Ти́ с ве́рою и любо́вию и, воспомина́я неисче́тная чудотворе́ния Твоя́, вопие́м верхо́вному Творцу́ чуде́с Бо́гу: Аллилу́иа.
Икос 11
Светопода́тельными луча́ми чуде́с ико́на Твоя́, о Всеми́лостивая Влады́чице, на Святе́й Горе́ Афо́нстей и повсю́ду немерца́емо сия́ет и ве́сь ми́р правосла́вный благода́тно просвеща́ет. Сего́ ра́ди гряду́т к не́й от ле́т дре́вних на поклоне́ние правосла́вных собо́ри, умиле́нно воспева́я пред не́ю благохвале́ния Ти́ такова́я:
Ра́дуйся, Царя́ Христа́ ми́ру яви́вшая; ра́дуйся, на ико́не Твое́й вку́пе с Ни́м изображе́нная.
Ра́дуйся, клеще́ та́инственная, Иса́иею прови́денная; ра́дуйся, купино́ неопали́мая, богови́дцем Моисе́ем предзри́мая.
Ра́дуйся, руно́ ороше́нное Гедео́на; ра́дуйся, ча́ще приосене́нная, Авваку́мом воспе́тая.
Ра́дуйся, две́ре затворе́нная, Иезеки́илю показа́нная; ра́дуйся, горо́ несеко́мая, Дании́лу явле́нная.
Ра́дуйся, многообра́зне от проро́к предвозвеще́нная; ра́дуйся, проро́ческих рече́ний сбытие́ яви́вшая.
Ра́дуйся, христиа́ном Помо́щнице и милосе́рдая о гре́шных Предста́тельнице.
Кондак 12
Благода́ти прича́стная Твоя́ ико́на, Богоро́дице Де́во, я́ко сокро́вище драгоце́нное, Це́ркви Христо́вой от Тебе́ подаде́ся, в не́й бо обеща́лася еси́ с на́ми бы́ти до сконча́ния ве́ка, ре́кши о первонапи́санней Твое́й ико́не: «С не́ю благода́ть Моя́ и си́ла!» Ве́руем, Всепе́тая, я́ко не оскуде́ет глаго́л Тво́й се́й, и я́ко во ико́не Твое́й святе́й на вся́цем ме́сте и зде́ с на́ми пребыва́еши, иде́же ве́рно пое́тся Сы́ну Твоему́ и Бо́гу хвале́бная пе́снь: Аллилу́иа.
Икос 12
Пою́ще чудеса́ Твоя́, Богоро́дице, припа́даем усе́рдно ко святе́й ико́не Твое́й, лобыза́ем ю́ с серде́чною любо́вию и, я́ко при́сно су́щей с на́ми, мо́лим Ти ся: воззри́ на ны́ милосе́рдием Твои́м, Ма́ти Бо́жия и, я́коже Тя́ зри́м ны́не на ико́не изображе́нную, та́ко сподо́би на́с узре́ти Тя́ в ча́с гро́зный сме́ртный, от руки́ диа́воли на́с исхища́ющую и в Ца́рствие Христо́во приводя́щую ны́ держа́вною десни́цею Твое́ю, да Тебе́ благода́рственно взыва́ем:
Ра́дуйся, по Бо́зе пе́рвое на́ше прибе́жище и покро́ве; ра́дуйся, Ма́тернею любо́вию Твое́ю ве́сь ми́р христиа́нский объе́млющая.
Ра́дуйся, во свято́м житии́ ве́рныя утвержда́ющая; ра́дуйся, благу́ю христиа́нскую кончи́ну и́м подаю́щая.
Ра́дуйся, от вла́сти лю́таго мироде́ржца упова́ющия на Тя́ избавля́ющая; ра́дуйся, на мыта́рствах возду́шных заступа́ющая сла́вящих Тя́.
Ра́дуйся, врата́ ра́йская на́м отверза́ющая; ра́дуйся, Ца́рствие Небе́сное лю́бящим Тя́ хода́тайствующая.
Ра́дуйся, во сла́ве небе́сней приседя́щая Сы́ну Твоему́ и Бо́гу; ра́дуйся, во обще́ние Сла́вы Его́ и чту́щия Тя́ вводя́щая.
Ра́дуйся, теле́с на́ших здра́вие; ра́дуйся, ду́ш на́ших спасе́ние.
Ра́дуйся, христиа́ном Помо́щнице и милосе́рдая о гре́шных Предста́тельнице.
Кондак 13
О всепе́тая Ма́ти, ро́ждшая святы́х Святе́йшее Сло́во, от А́нгел воспева́емая на Небеси́ и от челове́к сла́вимая на земли́! Приими́ ми́лостиво сие́ ма́лое моле́ние на́ше и да́руй душе́вное спасе́ние и теле́сное здра́вие все́м, ве́рно чту́щим Тя́ и пою́щим Бо́гу: Аллилу́иа.
Повтор
Этот кондак читается трижды, затем икос 1-й и кондак 1-й.
Икос 1
Арха́нгел Гаврии́л с небесе́ по́слан бы́сть от Тебе́, Богоро́дице, к смире́нному послу́шнику Горы́ Афо́нския, в пусты́нней ке́ллии воспева́вшему Ти́ хвале́бныя пе́сни пред свято́ю Твое́ю ико́ною, да научи́т его́ пе́ти пе́снь небе́сную, е́юже славосло́вят Тя́ А́нгели в Сио́не го́рнем. Те́мже и мы́ до́льнии, воспомина́я таково́е Твое́ о лю́дех благопромышле́ние, со благодаре́нием вопие́м Ти́ си́це:
Ра́дуйся, досто́йно восхваля́емая от Арха́нгел и А́нгел; ра́дуйся, ублажа́емая от все́х небе́сных си́л.
Ра́дуйся, Присноблаже́нная и Пренепоро́чная; ра́дуйся, Ма́ти Бо́га на́шего.
Ра́дуйся, честне́йшая Херуви́м; ра́дуйся, сла́внейшая без сравне́ния Серафи́м.
Ра́дуйся, без истле́ния Бо́га Сло́ва ро́ждшая; ра́дуйся, вои́стину су́щая Богоро́дице.
Ра́дуйся, велича́емая на небеси́ и на земли́; ра́дуйся, воспева́емая го́рними и до́льними.
Ра́дуйся, еди́на благослове́нная в жена́х; ра́дуйся, израсти́вшая на́м пло́д живота́.
Ра́дуйся, христиа́ном Помо́щнице и милосе́рдая о гре́шных Предста́тельнице.
Кондак 1
Избра́нней Бо́гом от челове́ческаго ро́да послужи́ти воплоще́нию предве́чнаго Сло́ва, преблагослове́нней Де́ве Богоро́дице, досто́йно воспева́емой от А́нгел на Небеси́, мы́ гре́шнии на земли́ дерза́ем приноси́ти хвале́бное пе́ние; е́же ми́лостиво от на́с прие́мши, всеми́лующая Цари́це Богоро́дице, от вся́ких бе́д на́с спаси́ и ве́чных му́к свободи́, да зове́м Ти́:
Ра́дуйся, христиа́ном Помо́щнице и милосе́рдая о гре́шных Предста́тельнице.
Молитвы
О пресвята́я и преми́лостивая Влады́чице Богоро́дице! Припа́дая к святе́й ико́не Твое́й, смире́нно мо́лимся Тебе́: вонми́ гла́су моле́ния на́шего, ви́ждь ско́рби, ви́ждь беды́ на́ша и, я́ко любвеоби́льная Ма́ти, потщи́ся на по́мощь на́м безпомо́щным, умоли́ Сы́на Твоего́ и Бо́га на́шего, да не погуби́т на́с за беззако́ния на́ша, но яви́т на́м человеколю́бно Свою́ ми́лость. Испроси́ на́м, Влады́чице, у бла́гости Его́ теле́сное здра́вие и душе́вное спасе́ние, и ми́рное житие́, земли́ плодоно́сие, возду́ха благорастворе́ние, и благослове́ние свы́ше на вся́ блага́я дела́ и начина́ния на́ша, правосла́вному во́инству на́шему на вся́ враги́ побе́ду и одоле́ние. И я́коже дре́вле призре́ла еси́ ми́лостиво на смире́нное славосло́вие послу́шника афо́нскаго, воспева́вшаго Тя́ пред пречи́стою ико́ною Твое́ю, и посла́ла еси́ к нему́ А́нгела научи́ти его́ пе́ти пе́снь небе́сную, е́юже славосло́вят Тя́ А́нгели, та́ко и ны́не приими́ на́ше усе́рдное молитвосло́вие, Тебе́ приноси́мое. О Цари́це всепе́тая! Простри́ ко Го́споду богоно́снеи Твои́ ру́це, и́миже Богомладе́нца Иису́са Христа́ носи́ла еси́, и умоли́ Его́ изба́вити на́с от вся́каго зла́. Яви́, Влады́чице, Твою́ ми́лость к на́м: боля́щия исцели́, скорбя́щия уте́ши, бе́дствующим помози́ и сподо́би на́с благоче́стно житие́ сие́ земно́е соверши́ти, христиа́нскую непосты́дную кончи́ну получи́ти и Небе́сное Ца́рствие насле́дити Ма́терним хода́тайством Твои́м к ро́ждшемуся от Тебе́ Христу́ Бо́гу на́шему, Ему́же со Безнача́льным Его́ Отце́м и Пресвяты́м Ду́хом подоба́ет вся́кая сла́ва, че́сть и поклоне́ние ны́не и при́сно, и во ве́ки веко́в. Ами́нь.
Конда́къ а҃
И҆збра́ннѣй бг҃омъ ѿ чл҃вѣ́ческагѡ ро́да послꙋжи́ти воплоще́нїю предвѣ́чнагѡ сло́ва, пребл҃гослове́ннѣй дв҃ѣ бцⷣѣ, досто́йнѡ воспѣва́емой ѿ а҆́гг҃лъ на нб҃сѝ, мы̀ грѣ́шнїи на землѝ дерза́емъ приноси́ти хвале́бное пѣ́нїе: є҆́же ми́лостивѡ ѿ на́съ прїе́мши, всеми́лꙋющаѧ цр҃и́це бцⷣе, ѿ всѧ́кихъ бѣ́дъ на́съ спасѝ и҆ вѣ́чныхъ мꙋ́къ свободѝ, да зове́мъ тѝ:
Ра́дꙋйсѧ, хрⷭ҇тїа́нѡмъ помо́щнице и҆ милосе́рдаѧ ѡ҆ грѣ́шныхъ предста́тельнице.
І҆́косъ а҃
А҆рха́гг҃лъ гаврїи́лъ съ нб҃сѐ по́сланъ бы́сть ѿ тебє̀, бцⷣе, къ смире́нномꙋ послꙋ́шникꙋ горы̀ а҆ѳѡ́нскїѧ, въ пꙋсты́ннѣй ке́ллїи воспѣва́вшемꙋ тѝ хвалє́бныѧ пѣ̑сни пред̾ ст҃о́ю твое́ю і҆кѡ́ною, да наꙋчи́тъ є҆го̀ пѣ́ти пѣ́снь нбⷭ҇нꙋю, є҆́юже славосло́вѧтъ тѧ̀ а҆́гг҃ли въ сїѡ́нѣ го́рнѣмъ. тѣ́мже и҆ мы̀ до́льнїи, воспомина́ѧ таково́е твоѐ ѡ҆ лю́дехъ бл҃гопромышле́нїе, со бл҃годаре́нїемъ вопїе́мъ тѝ си́це:
Ра́дꙋйсѧ, досто́йнѡ восхвалѧ́емаѧ ѿ а҆рха́гг҃лъ и҆ а҆́гг҃лъ: ра́дꙋйсѧ, ᲂу҆бл҃жа́емаѧ ѿ всѣ́хъ нбⷭ҇ныхъ си́лъ.
Ра́дꙋйсѧ, приснобл҃же́ннаѧ и҆ пренепоро́чнаѧ: ра́дꙋйсѧ, мт҃и бг҃а на́шегѡ.
Ра́дꙋйсѧ, честнѣ́йшаѧ херꙋві̑мъ: ра́дꙋйсѧ, сла́внѣйшаѧ без̾ сравне́нїѧ серафі̑мъ.
Ра́дꙋйсѧ, без̾ и҆стлѣ́нїѧ бг҃а сло́ва ро́ждшаѧ: ра́дꙋйсѧ, вои́стиннꙋ сꙋ́щаѧ бцⷣе.
Ра́дꙋйсѧ, велича́емаѧ на нб҃сѝ и҆ на землѝ: ра́дꙋйсѧ, воспѣва́емаѧ го́рними и҆ до́льними.
Ра́дꙋйсѧ, є҆ди́на бл҃гослове́ннаѧ въ жена́хъ: ра́дꙋйсѧ, и҆зрасти́вшаѧ на́мъ пло́дъ живота̀.
Ра́дꙋйсѧ, хрⷭ҇тїа́нѡмъ помо́щнице и҆ милосе́рдаѧ ѡ҆ грѣ́шныхъ предста́тельнице.
Конда́къ в҃
Ви́дѣвъ послꙋ́шникъ пꙋсты́нный ди́внаго прише́льца, въ ке́ллїю є҆гѡ̀ прише́дшагѡ и҆ пѣ́снь пресла́дкꙋю тебѣ̀, влⷣчце, воспѣ́вшагѡ, не ᲂу҆разꙋмѣ̀ въ не́мъ а҆́гг҃ла бы́ти, но ѕѣлѡ̀ ᲂу҆слади́сѧ пѣ́нїемъ є҆гѡ̀ нбⷭ҇нымъ и҆ просѝ, да напи́шетъ є҆мꙋ̀ словеса̀ пое́мыѧ пѣ́сни: є҆гда̀ же ᲂу҆зрѣ̀, ꙗ҆́кѡ под̾ пе́рстомъ є҆гѡ̀ ка́меннаѧ дска̀ ᲂу҆мѧгчи́сѧ, и҆ пи́шємаѧ словеса̀ на не́й ᲂу҆глꙋби́шасѧ ꙗ҆́кѡ на песцѣ̀, позна̀ въ се́мъ чꙋде́сное дѣ́йство и҆ возопѝ къ ро́ждшемꙋсѧ ѿ тебє̀ бг҃ꙋ сло́вꙋ: А҆ллилꙋ́їа.
І҆́косъ в҃
Ра́зꙋмомъ бг҃оѡзаре́ннымъ но́вꙋю пѣ́снь ѿкрыва́ѧ, речѐ а҆рха́гг҃лъ послꙋ́шникꙋ, ꙗ҆́кѡ та́кѡ воспѣва́ютъ тѧ̀, бцⷣе, а҆́гг҃лѡвъ ли́цы въ ѻ҆би́телехъ го́рнихъ, и҆ повелѣ̀ є҆мꙋ̀, да возвѣсти́тъ чл҃вѣ́кѡмъ словеса̀ пѣ́сни нбⷭ҇ныѧ и҆ наꙋчи́тъ и҆̀хъ а҆гг҃лоподо́бнѡ пѣ́ти тебѣ̀:
Ра́дꙋйсѧ, бл҃года́тнаѧ мр҃і́е: ра́дꙋйсѧ, ꙗ҆́кѡ гдⷭ҇ь съ тобо́ю.
Ра́дꙋйсѧ, бл҃гослове́ннаѧ въ жена́хъ: ра́дꙋйсѧ, неискꙋсобра́чнаѧ роди́тельнице бг҃а сло́ва.
Ра́дꙋйсѧ, непоро́чное селе́нїе дх҃а ст҃а́гѡ: ра́дꙋйсѧ, зача́тїе несказа́нное ꙗ҆ви́вшаѧ.
Ра́дꙋйсѧ, рождество̀ нетлѣ́нное показа́вшаѧ: ра́дꙋйсѧ, мт҃рїю и҆ дв҃ою пребы́вшаѧ.
Ра́дꙋйсѧ, во ѻ҆бою̀ непоро́чнѡ и҆ ст҃о себѐ сохрани́вшаѧ: ра́дꙋйсѧ, а҆́гг҃лѡвъ чистото́ю твое́ю превозше́дшаѧ.
Ра́дꙋйсѧ, го́рнихъ ᲂу҆мѡ́въ непрестаю́щее ᲂу҆дивле́нїе: ра́дꙋйсѧ, чл҃вѣ́ческагѡ ро́да возвыше́нїе.
Ра́дꙋйсѧ, хрⷭ҇тїа́нѡмъ помо́щнице и҆ милосе́рдаѧ ѡ҆ грѣ́шныхъ предста́тельнице.
Конда́къ г҃
Си́лою бж҃їею гаврїи́лъ а҆рха́гг҃лъ тве́рдый ка́мень въ мѧ́гкїй во́скъ претворѝ и҆ на не́мъ пе́рстомъ свои́мъ написа̀ словеса̀ пѣ́сни хвале́бныѧ тебѣ̀, бцⷣе, да всѝ позна́ютъ вели́кое чꙋ́до и҆ несꙋмнѣ́ннѡ ᲂу҆вѣ́рꙋютъ, ꙗ҆́кѡ та́кѡ вои́стиннꙋ воспѣва́ютъ тѧ̀ горѣ̀ си̑лы нбⷭ҇ныѧ, и҆̀мже подража́юще, и҆ мы̀ пое́мъ вели̑чїѧ твоѧ̑, дв҃о, и҆ въ ра́дости дꙋхо́внѣй вопїе́мъ просла́вльшемꙋ тѧ̀ бг҃ꙋ: А҆ллилꙋ́їа.
І҆́косъ г҃
И҆мѣ́ѧ простотꙋ̀ дꙋше́внꙋю и҆ непоро́чное се́рдце, послꙋ́шникъ смире́нный сподо́бисѧ а҆́гг҃льскїѧ бесѣ́ды и҆ лицезрѣ́нїѧ чинонача́льника го́рнихъ си́лъ, мы́ же, лꙋка́вствомъ и҆ ѕло́бою потемне́ннїи, со тре́петомъ взира́юще на ст҃ꙋ́ю і҆кѡ́нꙋ твою̀, влⷣчце, мо́лимъ ти сѧ прилѣ́жнѡ, ѡ҆братѝ ны̀ ѿ ѕло́бъ на́шихъ и҆ наꙋчѝ на́съ во смире́нїи и҆ кро́тости дꙋ́ха глаго́лати тебѣ̀:
Ра́дꙋйсѧ, го́рꙋ а҆ѳѡ́нскꙋю ѡ҆ст҃и́вшаѧ твои́мъ бл҃года́тнымъ присꙋ́тствїемъ: ра́дꙋйсѧ, хо́лмы и҆ дє́бри є҆ѧ̀ и҆спо́лнившаѧ сла́вою твои́хъ чꙋде́съ.
Ра́дꙋйсѧ, а҆́гг҃льскагѡ ꙗ҆вле́нїѧ сподо́бльшаѧ пꙋстынножи́тельство а҆ѳѡ́нское: ра́дꙋйсѧ, ѻ҆би́тєли и҆́ночєскїѧ въ не́мъ ᲂу҆мно́жившаѧ во сп҃се́нїе дꙋ́шъ чл҃вѣ́ческихъ.
Ра́дꙋйсѧ, и҆ всѣ́мъ въ постѣ̀ и҆ моли́твѣ ѡ҆бѣща́вшаѧ твоѐ застꙋпле́нїе: ра́дꙋйсѧ, ѿ треволне́нїѧ мо́рѧ жите́йскагѡ спаса́ющаѧ ка́ющихсѧ.
Ра́дꙋйсѧ, блгⷣть сн҃а твоегѡ̀ и҆ бг҃а низводѧ́щаѧ на мѣста̀, тебѣ̀ посвѧща́ємыѧ: ра́дꙋйсѧ, ра́й мы́сленный показа́вшаѧ хра́мы бж҃їи.
Ра́дꙋйсѧ, приста́нище небꙋ́рное содѣва́ющаѧ въ ѻ҆́нѣхъ и҆́щꙋщымъ сп҃се́нїѧ: ра́дꙋйсѧ, всѣ́мъ потре́бнымъ ко бл҃гоче́стїю на́съ снабдѣва́ющаѧ.
Ра́дꙋйсѧ, жи́тельствꙋющымъ бг҃оꙋго́днѡ пода́тельнице бл҃гъ вре́менныхъ и҆ вѣ́чныхъ: ра́дꙋйсѧ, хода́таице на́мъ црⷭ҇твїѧ нбⷭ҇нагѡ.
Ра́дꙋйсѧ, хрⷭ҇тїа́нѡмъ помо́щнице и҆ милосе́рдаѧ ѡ҆ грѣ́шныхъ предста́тельнице.
Конда́къ д҃
Бꙋ́рѧ недоꙋмѣ́нїѧ смꙋтѝ ста́рца и҆́нока, є҆гда̀ ᲂу҆слы́ша пѣ́снь но́вꙋ и҆ чꙋ́днꙋ и҆з̾ ᲂу҆́стъ своегѡ̀ ᲂу҆ченика̀ и҆ ᲂу҆зрѣ̀ дскꙋ̀ ка́меннꙋ, ꙗ҆́кѡ во́скъ, начерта́нїе прїи́мшꙋ: є҆гда́ же ᲂу҆вѣ́да ѡ҆ посѣще́нїи ди́внагѡ посѣти́телѧ, гаврїи́ломъ наре́кшагѡсѧ, ᲂу҆разꙋмѣ̀, ꙗ҆́кѡ то́й се́й є҆́сть, и҆́же дре́вле бл҃говѣстѝ тебѣ̀, дв҃о, безсѣ́менное зача́тїе бг҃а сло́ва. тѣ́мже велича́ѧ вели̑чїѧ твоѧ̑, цр҃и́це го́рнихъ и҆ до́льнихъ, воспѣва́ше ра́достнѡ а҆́гг҃лѡвъ и҆ чл҃вѣ́кѡвъ творцꙋ̀: А҆ллилꙋ́їа.
І҆́косъ д҃
Слы́шавше ѡ҆ посѣще́нїи а҆рха́гг҃ловѣ и҆́ноцы горы̀ а҆ѳѡ́нскїѧ, стека́хꙋсѧ ви́дѣти дскꙋ̀, на не́йже преесте́ственнѡ начерта́на бы́ша пи́сьмена пѣ́сни нбⷭ҇ныѧ, и҆ воспѣва́хꙋ тѧ̀ бл҃гоговѣ́йнѡ пред̾ ст҃о́ю і҆кѡ́ною твое́ю, влⷣчце, пред̾ не́юже воспѣ́ тѧ а҆рха́гг҃лъ. Прїимѝ ᲂу҆́бѡ и҆ на́шѧ принѡси́мыѧ тебѣ̀ моли́твы съ пѣ́нїемъ таковы́мъ:
Ра́дꙋйсѧ, ꙗ҆́кѡ ѡ҆ тебѣ̀ ра́дꙋетсѧ а҆́гг҃льскїй собо́ръ: ра́дꙋйсѧ, ꙗ҆́кѡ ѡ҆ тебѣ̀ торжествꙋ́етъ чл҃вѣ́ческїй ро́дъ.
Ра́дꙋйсѧ, на рꙋкꙋ̀ твое́ю носи́вшаѧ носѧ́щаго всѧ́ческаѧ: ра́дꙋйсѧ, вмѣсти́вшаѧ во чре́вѣ твое́мъ невмѣсти́магѡ всѣ́мъ мі́ромъ.
Ра́дꙋйсѧ, созда́телю твоемꙋ̀ пло́ть заимода́вшаѧ: ра́дꙋйсѧ, краснѣ́йшагѡ па́че всѣ́хъ сынѡ́въ чл҃вѣ́ческихъ ро́ждшаѧ.
Ра́дꙋйсѧ, млеко́мъ пита́вшаѧ пита́ющагѡ всѧ́ческаѧ: ра́дꙋйсѧ, попече́нїе и҆мѣ́вшаѧ ѡ҆ сн҃ѣ твое́мъ, сꙋ́щемъ промысли́телѣ всеѧ̀ тва́ри.
Ра́дꙋйсѧ, похвало̀ дѣ́вства: ра́дꙋйсѧ, ма́терей сла́во.
Ра́дꙋйсѧ, въ рождествѣ̀ дѣ́вство сохрани́вшаѧ: ра́дꙋйсѧ, рождество̀ съ дѣ́вствомъ сочета́вшаѧ.
Ра́дꙋйсѧ, хрⷭ҇тїа́нѡмъ помо́щнице и҆ милосе́рдаѧ ѡ҆ грѣ́шныхъ предста́тельнице.
Конда́къ є҃
Бг҃ови́децъ мѡѷсе́й и҆ногда̀ на ка́менныхъ скрижа́лехъ зако́нъ бж҃їй, начерта́нный пе́рстомъ бж҃їимъ, полꙋчѝ, и҆́ноцы же горы̀ а҆ѳѡ́нскїѧ пѣ́снь нбⷭ҇нꙋю во сла́вꙋ бг҃ома́тере, на дскѣ̀ ка́меннѣй начерта́ннꙋю, ѿ а҆рха́гг҃ла прїѧ́ша и҆, си́мъ наꙋче́ннїи а҆́гг҃льское славосло́вїе тебѣ̀ приноси́ти, воспѣ́ша та́кѡ бл҃говоли́вшемꙋ ѡ҆ ни́хъ бг҃ꙋ: А҆ллилꙋ́їа.
І҆́косъ є҃
Ви́дѣвше нача́льницы горы̀ а҆ѳѡ́нскїѧ чꙋ́до ве́лїе въ ꙗ҆вле́нїи а҆рха́гг҃ловѣ и҆ пѣ́сни но́вѣй, дскꙋ̀ съ начерта́нными ѿ а҆́гг҃ла письмены̀ препроводи́ша къ царю̀ и҆ патрїа́рхꙋ царѧгра́да, во ᲂу҆вѣре́нїе и҆́стины пресла́внагѡ сегѡ̀ чꙋдесѐ: ті́и же ра́достнѡ прїѧ́ша ю҆̀, ꙗ҆́кѡ зало́гъ бл҃говоле́нїѧ бж҃їѧ во все́й цр҃кви правосла́внѣй, ᲂу҆зако́ниша воспѣва́ти пѣ́снь а҆́гг҃льскꙋю въ похвалꙋ̀ тебѣ̀, бцⷣе, и҆ взыва́хꙋ тѝ во ᲂу҆миле́нїи си́це:
Ра́дꙋйсѧ, преꙋкраше́ннаѧ лѣ́потами всѣ́хъ добродѣ́телей дв҃о: ра́дꙋйсѧ, невѣ́сто неневѣ́стнаѧ.
Ра́дꙋйсѧ, возрасти́вшаѧ цвѣ́тъ неꙋвѧда́емый, хрⷭ҇та̀: ра́дꙋйсѧ, раю̀ слове́сный, дре́во жи́зни на́мъ прозѧ́бшаѧ.
Ра́дꙋйсѧ, сѣ́не нбⷭ҇наѧ, ѿ зно́ѧ страсте́й на́съ сохранѧ́ющаѧ: ра́дꙋйсѧ, покро́ве мі́рꙋ, ши́ршїй ѻ҆́блака.
Ра́дꙋйсѧ, дре́во бл҃госѣнноли́ственное, прохла́дꙋ сп҃си́тельнꙋю вѣ̑рнымъ подаю́щее: ра́дꙋйсѧ, и҆сто́чниче воды̀ живы́ѧ, ѿ неѧ́же пїѧ́й ктомꙋ̀ не ᲂу҆мира́етъ.
Ра́дꙋйсѧ, сꙋдїѝ првⷣнаго ᲂу҆моле́нїе: ра́дꙋйсѧ, грѣхѡ́въ на́шихъ проще́нїе.
Ра́дꙋйсѧ, во сла́вѣ нбⷭ҇нѣй ѡ҆деснꙋ́ю бг҃а пребыва́ющаѧ: ра́дꙋйсѧ, земноро́дныхъ милосе́рдїемъ твои́мъ не ѡ҆ставлѧ́ющаѧ.
Ра́дꙋйсѧ, хрⷭ҇тїа́нѡмъ помо́щнице и҆ милосе́рдаѧ ѡ҆ грѣ́шныхъ предста́тельнице.
Конда́къ ѕ҃
Проповѣ́дꙋетъ ст҃а́ѧ цр҃ковь вели́чїе чꙋде́съ твои́хъ, мр҃і́е бцⷣе, и҆ свѣ́тлѡ красꙋ́етсѧ, воспѣва́ѧ тѝ пѣ́снь а҆́гг҃льскꙋю, ѿ нб҃съ на зе́млю принесе́ннꙋю чинонача́льникомъ го́рнихъ си́лъ гаврїи́ломъ. съ ни́мже помоли́сѧ, гпⷭ҇жѐ пречи́стаѧ, къ сн҃ꙋ твоемꙋ̀ и҆ бг҃ꙋ, да незы́блемꙋ во бл҃гоче́стїи сохрани́тъ цр҃ковь свою̀ и҆ посрами́тъ всѧ̑ воста̑нїѧ є҆реті́чєскаѧ и҆ раско́льническаѧ, на́съ же, ча̑дъ є҆ѧ̀, сподо́битъ неѡсꙋжде́ннѡ воспѣва́ти є҆мꙋ̀: А҆ллилꙋ́їа.
І҆́косъ ѕ҃
Возсїѧ́ла є҆сѝ мно́гими лꙋча́ми чꙋде́съ, ѽ млⷭ҇тиваѧ бг҃ома́ти, чрез̾ ст҃ꙋ́ю і҆кѡ́нꙋ твою̀, влⷣчце, и҆ си́ми не то́чїю го́рꙋ а҆ѳѡ́нскꙋю, но и҆ мно́жайшаѧ мѣста̀ ѡ҆зари́ла є҆сѝ, да наꙋчи́мсѧ зва́ти тебѣ̀:
Ра́дꙋйсѧ, ра́досте на́ша, ᲂу҆слажда́ющаѧ скѡ́рбныѧ сердца̀, къ тебѣ̀ ѿве́рстыѧ: ра́дꙋйсѧ, бл҃га́ѧ застꙋ́пнице, на по́мощь къ на́мъ ᲂу҆скорѧ́ющаѧ.
Ра́дꙋйсѧ, зало́гъ сп҃си́тельный на́мъ въ і҆кѡ́нѣ твое́й дарова́вшаѧ: ра́дꙋйсѧ, а҆ѳѡ́нскꙋю го́рꙋ и҆ мнѡ́гїѧ стра́ны є҆́ю просла́вльшаѧ.
Ра́дꙋйсѧ, наде́ждо на́ша и҆звѣ́стнаѧ: ра́дꙋйсѧ, ᲂу҆пова́нїе на́ше непосты́дное.
Ра́дꙋйсѧ, скорбе́й на́шихъ разрѣше́нїе: ра́дꙋйсѧ, печа́лей на́шихъ ᲂу҆толе́нїе.
Ра́дꙋйсѧ, вѣ́ры правосла́вныѧ ᲂу҆твержде́нїе: ра́дꙋйсѧ, невѣ́рїѧ и҆ ѕловѣ́рїѧ посрамле́нїе.
Ра́дꙋйсѧ, любвѐ бжⷭ҇твенныѧ ꙗ҆вле́нїе: ра́дꙋйсѧ, чꙋде́съ пресла́вныхъ соверше́нїе.
Ра́дꙋйсѧ, хрⷭ҇тїа́нѡмъ помо́щнице и҆ милосе́рдаѧ ѡ҆ грѣ́шныхъ предста́тельнице.
Конда́къ з҃
Хотѧ́щымъ жа́ти сп҃се́нїе ми́лостиваѧ покрови́тельница и҆ помо́щница ꙗ҆влѧ́ешисѧ, мт҃и бж҃їѧ, и҆ при́снѡ хода́тайствꙋеши за ни́хъ къ сн҃ꙋ твоемꙋ̀ и҆ бг҃ꙋ, а҆́ще бо кто̀ и҆ па́даетъ въ нѣ́кое согрѣше́нїе, не́мощїю пло́ти ѡ҆бложе́нъ, ѻ҆ба́че тобо́ю возста́нїе полꙋча́етъ во сп҃се́нїе, ꙗ҆́кѡ всѣ̑мъ хо́щеши сп҃сти́сѧ и҆ въ ра́зꙋмъ и҆́стины прїитѝ воспѣва́ющымъ хрⷭ҇тꙋ̀ бг҃ꙋ: А҆ллилꙋ́їа.
І҆́косъ з҃
Но́во не́бо и҆ но́ва землѧ̀ ᲂу҆гото́ваны ѿ сн҃а твоегѡ̀ и҆ бг҃а лю́бѧщымъ є҆го̀, гпⷭ҇жѐ всебл҃га́ѧ, къ ни́мже стѧжа́хомъ тѧ̀ пꙋтеводи́тельницꙋ и҆зрѧ́днꙋ. Тѣ́мже мо́лимъ тѧ̀, не попꙋстѝ на́съ поги́бнꙋти въ де́брехъ грѣхо́вныхъ, но приведѝ на́съ стезе́ю пра́вою въ странꙋ̀ свѣ́та и҆ ра́дости вѣ́чныѧ, да тебѣ̀ вопїе́мъ хвале́бнѡ:
Ра́дꙋйсѧ, сїѡ́на го́рнѧго пе́рвѣйшее ᲂу҆краше́нїе: ра́дꙋйсѧ, ѻ҆би́телей до́льнихъ присногото́вое застꙋпле́нїе.
Ра́дꙋйсѧ, землѐ бл҃га́ѧ, кла́съ спаси́тельный мі́рꙋ и҆зрасти́вшаѧ: ра́дꙋйсѧ, ни́во неѡра́ннаѧ, ѡ҆плодотворе́ннаѧ дх҃омъ ст҃ы́мъ.
Ра́дꙋйсѧ, ѻ҆́гнь бжⷭ҇тва̀ во чре́во твоѐ прїе́мшаѧ: ра́дꙋйсѧ, гла́дъ па́дшагѡ чл҃вѣ́чества хлѣ́бомъ жи́зни ᲂу҆толи́вшаѧ.
Ра́дꙋйсѧ, престо́ле цр҃ѧ̀ сла́вы: ра́дꙋйсѧ, пала́то преꙋкраше́ннаѧ вседержи́телѧ.
Ра́дꙋйсѧ, хра́ме ѡ҆дꙋшевле́нный трїѷпоста́снагѡ бг҃а: ра́дꙋйсѧ, две́ре гдⷭ҇нѧ, є҆́юже сн҃ъ бж҃їй про́йде къ на́мъ.
Ра́дꙋйсѧ, хрⷭ҇тїа́нѡмъ помо́щнице и҆ милосе́рдаѧ ѡ҆ грѣ́шныхъ предста́тельнице.
Конда́къ и҃
Стра́нное ꙗ҆вле́нїе а҆рха́гг҃ла, на горѣ̀ а҆ѳѡ́нстѣй и҆ногда̀ бы́вшее, смотре́нїе бы́сть бжⷭ҇твенное, и҆́мже просла́висѧ всепѣ́тое и҆́мѧ твоѐ, мр҃і́е бцⷣе, и҆ всѝ вѣ́рнїи наꙋчи́шасѧ а҆гг҃лоподо́бнѡ воспѣва́ти тѧ̀, херꙋві́мѡвъ честнѣ́йшꙋю и҆ серафі́мѡвъ сла́внѣйшꙋю мт҃рь бг҃а на́шегѡ, ѡ҆ не́йже ра́дꙋетсѧ всѧ́каѧ тва́рь, и҆ ро́дъ чл҃вѣ́ческїй бл҃года́рнѡ взыва́етъ ко гдⷭ҇ꙋ: А҆ллилꙋ́їа.
І҆́косъ и҃
Всѐ ᲂу҆пова́нїе на́ше на тѧ̀ возлага́емъ, мт҃и бж҃їѧ, и҆ въ ско́рбехъ на́шихъ къ ст҃ѣ́й і҆кѡ́нѣ твое́й ᲂу҆се́рднѡ притека́емъ, ча́юще ѿ неѧ̀ ᲂу҆тѣше́нїе бл҃года́тное полꙋчи́ти. Помозѝ ᲂу҆́бо на́мъ, влⷣчце, съ терпѣ́нїемъ и҆ бл҃годаре́нїемъ всѧ́кїѧ скѡ́рби переноси́ти и҆ вмѣ́стѡ ро́пота малодꙋ́шнагѡ бл҃гоꙋмиле́ннѡ взыва́ти тебѣ̀:
Ра́дꙋйсѧ, всѣ́хъ скорбѧ́щихъ ра́досте: ра́дꙋйсѧ, всѣ́хъ печа́льныхъ ᲂу҆тѣше́нїе.
Ра́дꙋйсѧ, трꙋжда́ющихсѧ и҆ ѡ҆бремене́нныхъ сла́дкїй поко́е: ра́дꙋйсѧ, болѣ́знꙋющихъ и҆ ѡ҆горче́нныхъ живи́тельнаѧ ѻ҆тра́до.
Ра́дꙋйсѧ, въ ча́съ ско́рбныхъ недоꙋмѣ́нїй мы́сль бл҃гꙋ́ю на се́рдце полага́ющаѧ: ра́дꙋйсѧ, во днѝ ᲂу҆ны́нїѧ наде́ждою вѣ́чныхъ бл҃гъ воѡдꙋшевлѧ́ющаѧ.
Ра́дꙋйсѧ, и҆скꙋша́ємымъ рꙋ́кꙋ по́мощи простира́ющаѧ: ра́дꙋйсѧ, гнѣ́въ бж҃їй ѿ гла́въ на́шихъ ѿводѧ́щаѧ.
Ра́дꙋйсѧ, ми́рное ᲂу҆строе́нїе ѡ҆бꙋрева́ємымъ напа́стьми подаю́щаѧ: ра́дꙋйсѧ, во бл҃ги́хъ жела̑нїѧ на̑ша ди́внѡ и҆сполнѧ́ющаѧ.
Ра́дꙋйсѧ, терпѣли́выхъ страда́льцєвъ дара́ми бл҃года́тными ᲂу҆вѣнчава́ющаѧ: ра́дꙋйсѧ, всѣ́хъ бл҃гоподвиза́ющихсѧ блаже́нства ра́йскагѡ сподоблѧ́ющаѧ.
Ра́дꙋйсѧ, хрⷭ҇тїа́нѡмъ помо́щнице и҆ милосе́рдаѧ ѡ҆ грѣ́шныхъ предста́тельнице.
Конда́къ ѳ҃
Всѝ а҆́гг҃ли нбⷭ҇нїи немо́лчными похвала́ми тѧ̀ ᲂу҆блажа́ютъ, цр҃и́це и҆ влⷣчце всеѧ̀ тва́ри, мы́ же земні́и и҆ пе́рстнїи кꙋ́ю похвалꙋ̀ досто́йнꙋю принесе́мъ тѝ, всепѣ́таѧ; ѻ҆ба́че надѣ́ющесѧ на милосе́рдїе твоѐ неисче́тное, любо́вїю къ тебѣ̀ понꙋжда́еми, пое́мъ чꙋдеса̀ твоѧ̑, проповѣ́дꙋемъ бл҃годѣѧ̑нїѧ твоѧ̑, славосло́вимъ и҆́мѧ твоѐ, и҆ ᲂу҆се́рднѡ припа́даѧ ко ст҃ѣ́й і҆кѡ́нѣ твое́й, ра́бски вопїе́мъ и҆з̾ѡбраже́нномꙋ на не́й вкꙋ́пѣ съ тобо́ю бг҃омладе́нцꙋ хрⷭ҇тꙋ̀: А҆ллилꙋ́їа.
І҆́косъ ѳ҃
Вѣті́й ри́тѡрскїѧ глагѡ́лы не дово́льни къ пѣ́нїю чꙋде́съ твои́хъ, бцⷣе, ѻ҆ба́че бл҃га́ѧ сꙋ́щи, вѣ́рꙋ на́шꙋ, вмѣ́сто ри́тѡрскагѡ бл҃гослове́сїѧ, ми́лостивѡ прїимѝ, вѣ́си бо и҆ любо́вь на́шꙋ, є҆́юже сєрдца̀ на̑ша къ тебѣ̀ и҆спо́лнены. Тѣ́мже бл҃гоꙋтро́бнѡ ᲂу҆слы́ши нехи́тростныѧ на́шѧ пѣ̑сни, и҆́миже дерза́емъ бл҃гохвали́ти тѧ̀ си́це:
Ра́дꙋйсѧ, сопресто́льное ѻ҆ц҃ꙋ̀ сло́во въ ложесна́хъ твои́хъ вмѣсти́вшаѧ: ра́дꙋйсѧ, свѣ́тъ незаходи́мый ро́ждшаѧ.
Ра́дꙋйсѧ, жи́знь вѣ́чнꙋю мі́рꙋ дарова́вшаѧ рождество́мъ твои́мъ: ра́дꙋйсѧ, превѣ́чнаго, ꙗ҆́кѡ младе́нца, на рꙋкꙋ̀ твое́ю носи́вшаѧ.
Ра́дꙋйсѧ, гра́де ѡ҆дꙋшевле́нный всецр҃ѧ̀: ра́дꙋйсѧ, ски́нїе ѡ҆свѧще́ннаѧ жива́гѡ бг҃а.
Ра́дꙋйсѧ, ни̑жнѧѧ сочета́вшаѧ съ вы́шними: ра́дꙋйсѧ, миротво́рице, бжⷭ҇твеннагѡ ми́ра преиспо́лненнаѧ.
Ра́дꙋйсѧ, до́брыхъ вино́внаѧ: ра́дꙋйсѧ, ѕлы́хъ премѣне́нїе.
Ра́дꙋйсѧ, ѻ҆рꙋ́жїе на врагѝ всекрѣ́пкое: ра́дꙋйсѧ, щи́те вѣ́рныхъ несокрꙋши́мый.
Ра́дꙋйсѧ, хрⷭ҇тїа́нѡмъ помо́щнице и҆ милосе́рдаѧ ѡ҆ грѣ́шныхъ предста́тельнице.
Конда́къ і҃
Спаси́тельное прибѣ́жище ѿ сꙋе́тъ мі́ра преле́стнагѡ ꙗ҆ви́сѧ жре́бїй тво́й земны́й, ст҃а́ѧ вои́стиннꙋ гора̀ а҆ѳѡ́нскаѧ, бцⷣе дв҃о, ѡ҆зна́менованнаѧ мно́гими твои́ми чꙋдесы̀. но и҆ на всѧ́комъ мѣ́стѣ съ любо́вїю призыва́ющихъ тѧ̀ ᲂу҆слы́ши и҆ застꙋпѝ. Сн҃а же твоегѡ̀ ᲂу҆молѧ́ти не преста́й, всебл҃га́ѧ, да неѿстꙋ́пна пребыва́етъ блгⷣть є҆гѡ̀ ѿ мѣ́стъ, и҆дѣ́же въ собра́нїи вѣ́рныхъ пое́тсѧ є҆мꙋ̀ хвале́бнаѧ пѣ́снь: А҆ллилꙋ́їа.
І҆́косъ і҃
Стѣна̀ є҆сѝ дѣ́вственникѡмъ, пребл҃гослове́ннаѧ дв҃о, и҆ сто́лпъ крѣ́покъ ѿ лица̀ вра́жїѧ всѣ́мъ подви́жникѡмъ бл҃гоче́стїѧ: тебѣ̀ бо даде́сѧ ве́лїѧ си́ла тє́мныѧ а҆́дскїѧ си̑лы побѣжда́ти и҆ ѿ и҆скꙋше́нїй и҆́хъ дꙋшепа́гꙋбныхъ человѣ́ки и҆збавлѧ́ти, наипа́че же тѣ́хъ, и҆̀же цѣломꙋ́дреннѡ и҆ ст҃ѡ на землѝ пребыва́ютъ. Сегѡ̀ ра́ди дѣ́вства и҆ цѣломꙋ́дрїѧ рачи́тели согла́снѡ тебѣ̀ зовꙋ́тъ:
Ра́дꙋйсѧ, чистото́ю сїѧ́ющаѧ па́че со́лнца: ра́дꙋйсѧ, дѣ́вства нача́ло и҆ ѡ҆свѧще́нїе.
Ра́дꙋйсѧ, крі́не, ѡ҆бл҃гоꙋха́вшїй па́дшее чл҃вѣ́чество: ра́дꙋйсѧ, во смире́нїи твое́мъ ѡ҆сѣне́ннаѧ бл҃говоле́нїемъ всевы́шнѧгѡ.
Ра́дꙋйсѧ, вѣ́рнаѧ рабо̀ гдⷭ҇нѧ: ра́дꙋйсѧ, ꙗ҆́кѡ тѧ̀ блажа́тъ всѝ ро́ди.
Ра́дꙋйсѧ, ꙗ҆́кѡ сотворѝ тѝ вели́чїе си́льный: ра́дꙋйсѧ, ꙗ҆́кѡ соца́рствꙋеши съ сн҃о́мъ твои́мъ во сла́вѣ вѣ́чнѣй.
Ра́дꙋйсѧ, хода́таице бж҃їѧ къ лю́демъ бл҃говоле́нїѧ: ра́дꙋйсѧ, грѣ́шныхъ къ бг҃ꙋ дерзнове́нїе ѡ҆крилѧ́ющаѧ.
Ра́дꙋйсѧ, неистощи́мый и҆сто́чниче ми́лостей и҆ щедро́тъ: ра́дꙋйсѧ, преиспо́лненнаѧ сострада́нїѧ къ стра́ждꙋщымъ.
Ра́дꙋйсѧ, хрⷭ҇тїа́нѡмъ помо́щнице и҆ милосе́рдаѧ ѡ҆ грѣ́шныхъ предста́тельнице.
Конда́къ а҃і
Пѣ́нїе на́ше, а҆́ще бы́ло бы и҆ тьмочи́сленное, не довлѣ́ло бы къ досто́йномꙋ прославле́нїю ми́лостей твои́хъ, пребл҃гослове́ннаѧ мт҃и бж҃їѧ, ꙗ҆̀же непреста́ннѡ и҆злива́еши ро́дꙋ на́шемꙋ: ѻ҆ба́че да не неблагода́рни ꙗ҆ви́мсѧ пред̾ тобо́ю, по си́лѣ на́шей похва́льнаѧ восписꙋ́емъ тѝ съ вѣ́рою и҆ любо́вїю и҆, воспомина́ѧ неисчє́тнаѧ чꙋдотворе́нїѧ твоѧ̑, вопїе́мъ верхо́вномꙋ творцꙋ̀ чꙋде́съ бг҃ꙋ: А҆ллилꙋ́їа.
І҆́косъ а҃і
Свѣтопода́тельными лꙋча́ми чꙋде́съ і҆кѡ́на твоѧ̀, ѽ всеми́лостиваѧ влⷣчце, на ст҃ѣ́й горѣ̀ а҆ѳѡ́нстѣй и҆ повсю́дꙋ немерца́емѡ сїѧ́етъ и҆ ве́сь мі́ръ правосла́вный бл҃года́тнѡ просвѣща́етъ. Сегѡ̀ ра́ди грѧдꙋ́тъ къ не́й ѿ лѣ̑тъ дре́внихъ на поклоне́нїе правосла́вныхъ собо́ри, ᲂу҆миле́ннѡ воспѣва́ѧ пред̾ не́ю бл҃гохвалє́нїѧ тѝ такова̑ѧ:
Ра́дꙋйсѧ, цр҃ѧ̀ хрⷭ҇та̀ мі́рꙋ ꙗ҆ви́вшаѧ: ра́дꙋйсѧ, на і҆кѡ́нѣ твое́й вкꙋ́пѣ съ ни́мъ и҆з̾ѡбраже́ннаѧ.
Ра́дꙋйсѧ, клещѐ та́инственнаѧ, и҆са́їею прови́дѣннаѧ: ра́дꙋйсѧ, кꙋпино̀ неѡпали́маѧ, бг҃ови́дцемъ мѡѷсе́емъ предзри́маѧ.
Ра́дꙋйсѧ, рꙋно̀ ѡ҆роше́нное гедеѡ́на: ра́дꙋйсѧ, ча́ще прїѡсѣне́ннаѧ, а҆ввакꙋ́момъ воспѣ́таѧ.
Ра́дꙋйсѧ, две́ре затворе́ннаѧ, і҆езекі́илю показа́ннаѧ: ра́дꙋйсѧ, горо̀ несѣко́маѧ, данїи́лꙋ ꙗ҆вле́ннаѧ.
Ра́дꙋйсѧ, многоѻбра́знѣ ѿ прⷪ҇рѡ́къ предвозвѣще́ннаѧ: ра́дꙋйсѧ, прⷪ҇ро́ческихъ рече́нїй сбытїѐ ꙗ҆ви́вшаѧ.
Ра́дꙋйсѧ, хрⷭ҇тїа́нѡмъ помо́щнице и҆ милосе́рдаѧ ѡ҆ грѣ́шныхъ предста́тельнице.
Конда́къ в҃і
Бл҃года́ти прича́стнаѧ твоѧ̀ і҆кѡ́на, бцⷣе дв҃о, ꙗ҆́кѡ сокро́вище драгоцѣ́нное, цр҃кви хрⷭ҇то́вой ѿ тебє̀ подаде́сѧ, въ не́й бо ѡ҆бѣща́ласѧ є҆сѝ съ на́ми бы́ти до сконча́нїѧ вѣ́ка, ре́кши ѡ҆ первонапи́саннѣй твое́й і҆кѡ́нѣ: съ не́ю бл҃года́ть моѧ̀ и҆ си́ла! Вѣ́рꙋемъ, всепѣ́таѧ, ꙗ҆́кѡ не ѡ҆скꙋдѣ́етъ глаго́лъ тво́й се́й, и҆ ꙗ҆́кѡ во і҆кѡ́нѣ твое́й ст҃ѣ́й на всѧ́цѣмъ мѣ́стѣ и҆ здѣ̀ съ на́ми пребыва́еши, и҆дѣ́же вѣ́рнѡ пое́тсѧ сн҃ꙋ твоемꙋ̀ и҆ бг҃ꙋ хвале́бнаѧ пѣ́снь: А҆ллилꙋ́їа.
І҆́косъ в҃і
Пою́ще чꙋдеса̀ твоѧ̑, бцⷣе, припа́даемъ ᲂу҆се́рднѡ ко ст҃ѣ́й і҆кѡ́нѣ твое́й, лобыза́емъ ю҆̀ съ серде́чною любо́вїю, и҆ ꙗ҆́кѡ при́снѡ сꙋ́щей съ на́ми, мо́лимъ ти сѧ: воззрѝ на ны̀ милосе́рдїемъ твои́мъ, мт҃и бж҃їѧ, и҆ ꙗ҆́кѡже тѧ̀ зри́мъ ны́нѣ на і҆кѡ́нѣ и҆з̾ѡбраже́ннꙋю, та́кѡ сподо́би на́съ ᲂу҆зрѣ́ти тѧ̀ въ ча́съ гро́зный сме́ртный, ѿ рꙋкѝ дїа́воли на́съ и҆схища́ющꙋю и҆ въ црⷭ҇твїе хрⷭ҇то́во приводѧ́щꙋю ны̀ держа́вною десни́цею твое́ю, да тебѣ̀ бл҃года́рственнѡ взыва́емъ:
Ра́дꙋйсѧ, по бз҃ѣ пе́рвое на́ше прибѣ́жище и҆ покро́ве: ра́дꙋйсѧ, ма́тернею любо́вїю твое́ю ве́сь мі́ръ хрⷭ҇тїа́нскїй ѡ҆б̾е́млющаѧ.
Ра́дꙋйсѧ, во ст҃о́мъ житїѝ вѣ̑рныѧ ᲂу҆твержда́ющаѧ: ра́дꙋйсѧ, бл҃гꙋ́ю хрⷭ҇тїа́нскꙋю кончи́нꙋ и҆̀мъ подаю́щаѧ.
Ра́дꙋйсѧ, ѿ вла́сти лю́тагѡ мїроде́ржца ᲂу҆пова́ющыѧ на тѧ̀ и҆збавлѧ́ющаѧ: ра́дꙋйсѧ, на мыта́рствахъ воздꙋ́шныхъ застꙋпа́ющаѧ сла́вѧщихъ тѧ̀.
Ра́дꙋйсѧ, врата̀ ра́йскаѧ на́мъ ѿверза́ющаѧ: ра́дꙋйсѧ, црⷭ҇твїе нбⷭ҇ное лю́бѧщымъ тѧ̀ хода́тайствꙋющаѧ.
Ра́дꙋйсѧ, во сла́вѣ нбⷭ҇нѣй присѣдѧ́щаѧ сн҃ꙋ твоемꙋ̀ и҆ бг҃ꙋ: ра́дꙋйсѧ, во ѡ҆бще́нїе сла́вы є҆гѡ̀ и҆ чтꙋ́щыѧ тѧ̀ вводѧ́щаѧ.
Ра́дꙋйсѧ, тѣле́съ на́шихъ здра́вїе: ра́дꙋйсѧ, дꙋ́шъ на́шихъ сп҃се́нїе.
Ра́дꙋйсѧ, хрⷭ҇тїа́нѡмъ помо́щнице и҆ милосе́рдаѧ ѡ҆ грѣ́шныхъ предста́тельнице.
Конда́къ г҃і
Ѽ, всепѣ́таѧ мт҃и, ро́ждшаѧ ст҃ы́хъ ст҃ѣ́йшее сло́во, ѿ а҆́гг҃лъ воспѣва́емаѧ на нб҃сѝ и҆ ѿ человѣ̑къ сла́вимаѧ на землѝ! Прїимѝ ми́лостивѡ сїѐ ма́лое моле́нїе на́ше и҆ да́рꙋй дꙋше́вное сп҃се́нїе и҆ тѣле́сное здра́вїе всѣ̑мъ, вѣ́рнѡ чтꙋ́щымъ тѧ̀ и҆ пою́щымъ бг҃ꙋ: А҆ллилꙋ́їа.
Повто́ръ
Сей конда́къ глаго́лется три́жды, та́же і҆́косъ а҃-й и҆ конда́къ а҃-й.
І҆́косъ а҃
А҆рха́гг҃лъ гаврїи́лъ съ нб҃сѐ по́сланъ бы́сть ѿ тебє̀, бцⷣе, къ смире́нномꙋ послꙋ́шникꙋ горы̀ а҆ѳѡ́нскїѧ, въ пꙋсты́ннѣй ке́ллїи воспѣва́вшемꙋ тѝ хвалє́бныѧ пѣ̑сни пред̾ ст҃о́ю твое́ю і҆кѡ́ною, да наꙋчи́тъ є҆го̀ пѣ́ти пѣ́снь нбⷭ҇нꙋю, є҆́юже славосло́вѧтъ тѧ̀ а҆́гг҃ли въ сїѡ́нѣ го́рнѣмъ. тѣ́мже и҆ мы̀ до́льнїи, воспомина́ѧ таково́е твоѐ ѡ҆ лю́дехъ бл҃гопромышле́нїе, со бл҃годаре́нїемъ вопїе́мъ тѝ си́це:
Ра́дꙋйсѧ, досто́йнѡ восхвалѧ́емаѧ ѿ а҆рха́гг҃лъ и҆ а҆́гг҃лъ: ра́дꙋйсѧ, ᲂу҆бл҃жа́емаѧ ѿ всѣ́хъ нбⷭ҇ныхъ си́лъ.
Ра́дꙋйсѧ, приснобл҃же́ннаѧ и҆ пренепоро́чнаѧ: ра́дꙋйсѧ, мт҃и бг҃а на́шегѡ.
Ра́дꙋйсѧ, честнѣ́йшаѧ херꙋві̑мъ: ра́дꙋйсѧ, сла́внѣйшаѧ без̾ сравне́нїѧ серафі̑мъ.
Ра́дꙋйсѧ, без̾ и҆стлѣ́нїѧ бг҃а сло́ва ро́ждшаѧ: ра́дꙋйсѧ, вои́стиннꙋ сꙋ́щаѧ бцⷣе.
Ра́дꙋйсѧ, велича́емаѧ на нб҃сѝ и҆ на землѝ: ра́дꙋйсѧ, воспѣва́емаѧ го́рними и҆ до́льними.
Ра́дꙋйсѧ, є҆ди́на бл҃гослове́ннаѧ въ жена́хъ: ра́дꙋйсѧ, и҆зрасти́вшаѧ на́мъ пло́дъ живота̀.
Ра́дꙋйсѧ, хрⷭ҇тїа́нѡмъ помо́щнице и҆ милосе́рдаѧ ѡ҆ грѣ́шныхъ предста́тельнице.
Конда́къ а҃
И҆збра́ннѣй бг҃омъ ѿ чл҃вѣ́ческагѡ ро́да послꙋжи́ти воплоще́нїю предвѣ́чнагѡ сло́ва, пребл҃гослове́ннѣй дв҃ѣ бцⷣѣ, досто́йнѡ воспѣва́емой ѿ а҆́гг҃лъ на нб҃сѝ, мы̀ грѣ́шнїи на землѝ дерза́емъ приноси́ти хвале́бное пѣ́нїе: є҆́же ми́лостивѡ ѿ на́съ прїе́мши, всеми́лꙋющаѧ цр҃и́це бцⷣе, ѿ всѧ́кихъ бѣ́дъ на́съ спасѝ и҆ вѣ́чныхъ мꙋ́къ свободѝ, да зове́мъ тѝ:
Ра́дꙋйсѧ, хрⷭ҇тїа́нѡмъ помо́щнице и҆ милосе́рдаѧ ѡ҆ грѣ́шныхъ предста́тельнице.
Моли́твы
Ѽ, прест҃а́ѧ и҆ преми́лостиваѧ влⷣчце бцⷣе! Припа́даѧ къ ст҃ѣ́й і҆кѡ́нѣ твое́й, смире́ннѡ мо́лимсѧ тебѣ̀: вонмѝ гла́сꙋ моле́нїѧ на́шегѡ, ви́ждь скѡ́рби, ви́ждь бѣды̑ на́шѧ и҆, ꙗ҆́кѡ любвеѡби́льнаѧ мт҃и, потщи́сѧ на по́мощь на́мъ безпомо́щнымъ, ᲂу҆молѝ сн҃а твоего̀ и҆ бг҃а на́шего, да не погꙋби́тъ на́съ за беззакѡ́нїѧ на̑ша, но ꙗ҆ви́тъ на́мъ чл҃вѣколю́бнѡ свою̀ ми́лость. И҆спросѝ на́мъ, влⷣчце, ᲂу҆ бл҃гости є҆гѡ̀ тѣле́сное здра́вїе и҆ дꙋше́вное спасе́нїе, и҆ ми́рное житїѐ, землѝ плодоно́сїе, воздꙋ́ха бл҃горастворе́нїе, и҆ бл҃гослове́нїе свы́ше на всѧ̑ бл҃га̑ѧ дѣла̀ и҆ начина̑нїѧ на̑ша, правосла́вномꙋ во́инствꙋ на́шемꙋ на всѧ̑ враги̑ побѣ́дꙋ и҆ ѡ҆долѣ́нїе. И҆ ꙗ҆́кѡже дре́вле призрѣ́ла є҆сѝ ми́лостивѡ на смире́нное славосло́вїе послꙋ́шника а҆ѳѡ́нскагѡ, воспѣва́вшагѡ тѧ̀ пред̾ пречи́стою і҆кѡ́ною твое́ю и҆ посла́ла є҆сѝ къ немꙋ̀ а҆́гг҃ла наꙋчи́ти є҆го̀ пѣ́ти пѣ́снь нбⷭ҇нꙋю, є҆́юже славосло́вѧтъ тѧ̀ а҆́гг҃ли, та́кѡ и҆ ны́нѣ прїимѝ на́ше ᲂу҆се́рдное молитвосло́вїе, тебѣ̀ приноси́мое. ѽ, цр҃и́це всепѣ́таѧ! Прострѝ ко гдⷭ҇ꙋ бг҃оно́снѣи твоѝ рꙋ́цѣ, и҆́миже бг҃омладе́нца і҆и҃са хрⷭ҇та̀ носи́ла є҆сѝ, и҆ ᲂу҆молѝ є҆го̀ и҆зба́вити на́съ ѿ всѧ́кагѡ ѕла̀. Ꙗ҆вѝ, влⷣчце, твою̀ ми́лость къ на́мъ: болѧ́щыѧ и҆сцѣлѝ, скорбѧ́щыѧ ᲂу҆тѣ́ши, бѣ́дствꙋющымъ помозѝ и҆ сподо́би на́съ бл҃гоче́стнѡ житїѐ сїѐ земно́е соверши́ти, хрⷭ҇тїа́нскꙋю непосты́днꙋю кончи́нꙋ полꙋчи́ти и҆ нбⷭ҇ное црⷭ҇твїе наслѣ́дити мт҃рнимъ хода́тайствомъ твои́мъ къ ро́ждшемꙋсѧ ѿ тебє̀ хрⷭ҇тꙋ̀ бг҃ꙋ на́шемꙋ, є҆мꙋ́же со безнача́льнымъ є҆гѡ̀ ѻ҆ц҃е́мъ и҆ прест҃ы́мъ дх҃омъ подоба́етъ всѧ́каѧ сла́ва, че́сть и҆ поклоне́нїе ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.