Православный календарь
Размер шрифта:

Ака́ѳістъ

А҆ка́ѳїстъ прпⷣбномꙋ ѻ҆нꙋ́фрїю вели́комꙋ, пꙋстынножи́телю, царе́вичꙋ пе́рскомꙋ.

Прп. Онуфрия Великого (IV) 25 июня 2026

Конда́къ а҃

И҆збра́нный и҆ ди́вный ѻ҆́тче ѻ҆нꙋ́фрїе, сїѧ́ющїй трисїѧ́ннагѡ живота̀ заре́ю, ты̀ мѧ̀, ѡ҆мраче́ннаго грѣхо́вными страстьмѝ, просвѣтѝ, ѿ смертоно́сныѧ ра́ны и҆схитѝ и҆ твои́ми мл҃твами ѿ всѣ́хъ бѣ́дъ и҆зба́ви, да зовꙋ̀ тебѣ̀:

Ра́дꙋйсѧ, ѻ҆́тче ѻ҆нꙋ́фрїе, пресвѣ́тлый свѣти́льниче всеѧ̀ вселе́нныѧ.

І҆́косъ а҃

А҆́гг҃льстїи чи́ни твои̑мъ, ѻ҆́тче, ᲂу҆диви́шасѧ по́двигѡмъ, и҆́миже въ пꙋсты́ни непреста́ннѡ ᲂу҆пражнѧ́лсѧ є҆сѝ: три́ бо и҆ шестьдесѧ́тъ лѣ́тъ пости́лсѧ є҆сѝ, бжⷭ҇твенныѧ же хрⷭ҇то́вы та̑йны ѿ рꙋ́къ а҆́гг҃льскихъ прїима́ти сподо́билсѧ є҆сѝ, и҆ ны́нѣ ᲂу҆̀бо почита́ѧ тѧ̀ є҆диновсе́льника и҆ собесѣ́дника а҆́гг҃лѡвъ, сицєва́ѧ вопїю̀ тѝ, свѧ́те ѻ҆нꙋ́фрїе:

Ра́дꙋйсѧ, а҆́гг҃лѡвъ преди́вное чꙋ́до: ра́дꙋйсѧ, дꙋшетлѣ́нныхъ страсте́й разрꙋши́телю.

Ра́дꙋйсѧ, непроходи́мыѧ пꙋсты́ни просвѣти́телю: ра́дꙋйсѧ, воздержа́нїѧ наказа́телю и҆ ᲂу҆чи́телю.

Ра́дꙋйсѧ, пꙋстынножи́телей ᲂу҆добре́нїе: ра́дꙋйсѧ, мона́хѡвъ бг҃одꙋхнове́нное свѣти́ло.

Ра́дꙋйсѧ, ᲂу҆го́дниче хрⷭ҇то́въ преизѧ́щный: ра́дꙋйсѧ, безмо́лвїѧ рачи́телю теплѣ́йшїй.

Ра́дꙋйсѧ, бѣсо́вскїѧ си́лы крѣ́пкое попра́нїе: ра́дꙋйсѧ, сп҃се́нїѧ и҆́стинный наста́вниче.

Ра́дꙋйсѧ, пода́телю ра́дости вѣ̑рнымъ: ра́дꙋйсѧ, ско́рый помо́щниче къ тебѣ̀ притека́ющымъ.

Ра́дꙋйсѧ, ѻ҆́тче ѻ҆нꙋ́фрїе, пресвѣ́тлый свѣти́льниче всеѧ̀ вселе́нныѧ.

Конда́къ в҃

Ви́дѧще стра́нный и҆ чꙋ́дный житїѧ̀ твоегѡ̀ ѡ҆́бразъ прпⷣбный пафнꙋ́тїй вельмѝ ᲂу҆диви́сѧ: тѣ́мже и҆ а҆́зъ, размышлѧ́ѧ твоѧ̑ па́че мѣ́ры трꙋдолю́бныѧ пꙋсты́нныѧ пѡ́двиги, пою̀ бг҃ꙋ, на сїѧ̑ тебє̀ ᲂу҆крѣпи́вшемꙋ: А҆ллилꙋ́їа.

І҆́косъ в҃

Ра́зꙋмꙋ да́тисѧ мнѣ̀ бжⷭ҇твенномꙋ, помоли́сѧ прпⷣбне ѻ҆нꙋ́фрїе, ты́ бо, бжⷭ҇твеннымъ сїѧ́ющи свѣ́томъ и҆ съ а҆́гг҃лы водворѧ́ющисѧ посо́бствꙋеши па́мѧть твою̀ соверша́ющымъ и҆ ра́достнѡ похва̑льнаѧ тебѣ̀ си́це приносѧ́щымъ:

Ра́дꙋйсѧ, стра́ннѡ добродѣ́тельми просїѧ́вый: ра́дꙋйсѧ, со́лнечнагѡ свѣ́та свѣтлѣ́йшїй.

Ра́дꙋйсѧ, а҆́гг҃ломъ въ пꙋсты́ню проводи́мый: ра́дꙋйсѧ, го́рлице пꙋстыннолю́бнаѧ.

Ра́дꙋйсѧ, рожо̀ багрѧноцвѣтꙋ́щаѧ: ра́дꙋйсѧ, хра́ме всечестны́й и҆ бг҃ꙋ ѡ҆сщ҃е́нный.

Ра́дꙋйсѧ, бж҃їихъ дарова́нїй и҆сполне́нїе: ра́дꙋйсѧ, пречꙋ́дное въ человѣ́цѣхъ ᲂу҆дивле́нїе.

Ра́дꙋйсѧ, бѣсѡ́въ стра́нное и҆ гро́зное ᲂу҆страше́нїе: ра́дꙋйсѧ, предрагі́й а҆дама́нте.

Ра́дꙋйсѧ, трⷪ҇чнаго свѣ́та зри́телю: ра́дꙋйсѧ, те́плый въ мл҃твахъ предста́телю.

Ра́дꙋйсѧ, ѻ҆́тче ѻ҆нꙋ́фрїе, пресвѣ́тлый свѣти́льниче всеѧ̀ вселе́нныѧ.

Конда́къ г҃

Си́ла вы́шнѧгѡ ѿ ложе́снъ ма́тернихъ ѡ҆сѣнѝ тѧ̀, прпⷣбне ѻ҆нꙋ́фрїе, и҆ показа̀ тѧ̀ селе́нїе и҆ жили́ще ст҃а́гѡ дх҃а, є҆го́же и҆ а҆́зъ недосто́йный ᲂу҆се́рднѡ прїѧ́ти жела́юще, пою̀ пѣ́снь бг҃ꙋ: А҆ллилꙋ́їа.

І҆́косъ г҃

И҆мꙋ́ще тѧ̀ вели́ка, ѻ҆́тче, застꙋ́пника и҆ ско́раго въ напа́стѣхъ помо́щника, разли́чными ѡ҆держи́мїи напа́стьми тѧ̀ на по́мощь призыва́емъ, и҆ ве́селѡ въ твое́й свѣ́тлой па́мѧти торжествꙋ́юще, сїѧ̑ тебѣ̀ вопїе́мъ:

Ра́дꙋйсѧ, ско́рый послꙋ́шателю молѧ́щихсѧ тебѣ̀ съ вѣ́рою: ра́дꙋйсѧ, пра́веднагѡ сꙋдїѝ и҆звѣ́стное ᲂу҆моле́нїе.

Ра́дꙋйсѧ, честно́е прест҃а́гѡ дх҃а селе́нїе: ра́дꙋйсѧ, непоро́чный прест҃ы́ѧ трⷪ҇цы слꙋжи́телю.

Ра́дꙋйсѧ, предрагі́й хрⷭ҇та̀ бг҃а би́сере: ра́дꙋйсѧ, неизрече́ннаѧ вели́комꙋ пафнꙋ́тїю ра́досте.

Ра́дꙋйсѧ, тогѡ́жде пафнꙋ́тїа наста́вниче и҆ ᲂу҆чи́телю: ра́дꙋйсѧ, скорбѧ́щихъ ско́рое ᲂу҆тѣше́нїе.

Ра́дꙋйсѧ, ᲂу҆ныва́ющихъ всежела́тельный посѣти́телю: ра́дꙋйсѧ, слѣпы́хъ врачꙋ̀ и҆ хромы́хъ цѣли́телю.

Ра́дꙋйсѧ, болѧ́щихъ здра́вїе и҆ недꙋ́гꙋющихъ врачева́нїе: ра́дꙋйсѧ, вѣ̑рныхъ спасе́нное прибѣ́жище.

Ра́дꙋйсѧ, ѻ҆́тче ѻ҆нꙋ́фрїе, пресвѣ́тлый свѣти́льниче всеѧ̀ вселе́нныѧ.

Конда́къ д҃

Бꙋ́рю страсте́й многомѧте́жнагѡ мі́ра возненави́дѣвши, ѻ҆́тче, всѣ́хъ є҆гѡ̀ ᲂу҆страни́лсѧ є҆сѝ красо́тъ, всели́всѧ же въ пꙋсты́ню, прпⷣбне, крⷭ҇ти́телю въ житїѝ послѣ́довалъ є҆сѝ и҆ прⷪ҇ро́ка и҆лїю̀ подража́лъ є҆сѝ, ны́нѣ же вѣ́чнꙋющꙋю въ нбⷭ҇ныхъ дво́рѣхъ сла́вꙋ полꙋчи́вши, съ нбⷭ҇ными бг҃ꙋ предстои́ши жи́тели и҆ пое́ши кꙋ́пнѡ съ ни́ми: А҆ллилꙋ́їа.

І҆́косъ д҃

Свѣтоно́сное со́лнце и҆ златоза́рное свѣти́ло и҆мꙋ́ще тѧ̀ вѣ́рнїи, свѧ́те ѻ҆нꙋ́фрїе, ᲂу҆ми́льнѡ тѧ̀ мо́лимъ, просвѣтѝ, вразꙋмѝ, наꙋчѝ вопи́ти тебѣ̀ си́це:

Ра́дꙋйсѧ, пꙋсты́ни свѣ́тлое ѡ҆заре́нїе: ра́дꙋйсѧ, златоза́рный мі́ра свѣти́льниче.

Ра́дꙋйсѧ, ѳиве́євъ пречꙋ́днаѧ красото̀: ра́дꙋйсѧ, лївѵ́и прекра́снаѧ добро́то.

Ра́дꙋйсѧ, є҆гѵ́пта пресвѣ́тлое ᲂу҆краше́нїе: ра́дꙋйсѧ, месопота́мїи превели́кїй наста́вниче.

Ра́дꙋйсѧ, і҆ѡа́нна крⷭ҇ти́телѧ и҆́стинный и҆ при́сный подража́телю: ра́дꙋйсѧ, бл҃гово́нный пꙋсты́ни ке́дре.

Ра́дꙋйсѧ, ꙗ҆́кѡ равноа́гг҃льно слꙋ́жиши бг҃ꙋ: ра́дꙋйсѧ, ꙗ҆́кѡ застꙋпа́еши всѣ́хъ, те́плѣ тѧ̀ на по́мощь призыва́ющихъ.

Ра́дꙋйсѧ, ѻ҆́тче ѻ҆нꙋ́фрїе, пресвѣ́тлый свѣти́льниче всеѧ̀ вселе́нныѧ.

Конда́къ є҃

Бг҃оте́чнꙋю зарю̀ ᲂу҆ви́дѣвши тѧ̀, ѻ҆́тче, въ пꙋсты́ни, вели́кїй пафнꙋ́тїй тща́тельнѡ послѣ́дова тебѣ̀, и҆ ꙗ҆́кѡ ᲂу҆чи́тельна свѣти́льника придержа́сѧ тебє̀, и҆ ѡ҆ пꙋсты́нномъ любопы́тно и҆спыта́въ житїѝ: є҆го́же ѿ тебє̀ до́брѣ навы́къ, ᲂу҆ми́льнѡ воспѣва́ѧ бг҃ꙋ пѣ́снь: А҆ллилꙋ́їа.

І҆́косъ є҃

Ви́дѧ твоѐ стра́нное житїѐ, собо́ръ цр҃ко́вный, ѻ҆нꙋ́фрїе прпⷣбне, съ бл҃гоговѣ́нїемъ твою̀ бл҃же́ннꙋю па́мѧть вели́тъ почита́ти. сегѡ̀ ра́ди и҆ а҆́зъ, сп҃се́нїе хотѧ̀ полꙋчи́ти, съ весе́лїемъ почита́ю и҆ си́це тебѣ̀ вопїю̀:

Ра́дꙋйсѧ, пресвѣ́тлаѧ красото̀ цр҃кве хрⷭ҇то́вы: ра́дꙋйсѧ, неꙋсы́пный предста́телю и҆́щꙋщымъ хода́тайства твоегѡ̀.

Ра́дꙋйсѧ, ꙗ҆́кѡ къ гдⷭ҇ꙋ вы́нꙋ вопїе́ши за ны̀: ра́дꙋйсѧ, ꙗ҆́кѡ тобо́ю просвѣти́шасѧ внꙋ́трєннѧѧ пꙋсты́ни.

Ра́дꙋйсѧ, ꙗ҆́кѡ просїѧ́ша дѡ́браѧ дѣла̀ твоѧ̑, а҆́ки со́лнце на землѝ и҆ на нб҃сѝ: ра́дꙋйсѧ, ꙗ҆́кѡ впери́лъ є҆сѝ ᲂу҆́мъ тво́й къ бг҃ꙋ.

Ра́дꙋйсѧ, ꙗ҆́кѡ ѡ҆богати́лсѧ є҆сѝ нището́ю дꙋ́ха: ра́дꙋйсѧ, ѻ҆рлѐ гнѣзда̀ нбⷭ҇нагѡ.

Ра́дꙋйсѧ, пре́лєсти бѣсѡ́вскїѧ, ꙗ҆́кѡ тро́сть, попалѧ́ющїй: ра́дꙋйсѧ, послꙋ́шателю є҆ѵⷢ҇лїа хрⷭ҇то́ва.

Ра́дꙋйсѧ, мꙋдрова́нїе пло́ти крѣ́постїю бжⷭ҇твеннагѡ дх҃а смири́вый: ра́дꙋйсѧ, земны́й а҆́гг҃ле, нбⷭ҇ный человѣ́че.

Ра́дꙋйсѧ, ѻ҆́тче ѻ҆нꙋ́фрїе, пресвѣ́тлый свѣти́льниче всеѧ̀ вселе́нныѧ.

Конда́къ ѕ҃

Про́повѣди є҆ѵⷢ҇льскїѧ творца̀, є҆́же не пещи́сѧ ѡ҆ ри́зѣ и҆лѝ что̀ ꙗ҆́сти, и҆́стинна тѧ̀, ѻ҆нꙋ́фрїе, ᲂу҆зрѣ̀ влⷣка гдⷭ҇ь и҆ а҆́бїе власы̀ бѣ́лыми, ꙗ҆́кѡ ѡ҆де́ждою, ѡ҆дѣ́ѧ тѧ̀ чꙋ́днѡ, и҆ сла́вою свы́ше ѡ҆богати́лъ тѧ̀ є҆́сть въ преставле́нїи твое́мъ: ю҆́же и҆ на́мъ ѿ хрⷭ҇та̀ полꙋчи́ти молѝ, вопїю́щымъ є҆мꙋ̀: А҆ллилꙋ́їа.

І҆́косъ ѕ҃

Возсїѧ́лъ є҆сѝ ѿ є҆гѵ́пта, столпо́мъ бжⷭ҇твеннагѡ свѣ́та наставлѧ́емь, прпⷣбне ѻ҆нꙋ́фрїе, не терпѧ́ще же тѧ̀ бѣсо́встїи полцы̀ въ пꙋсты́ни, бѣжа́ша: ѿ и҆́хже навѣ́тѡвъ и҆ на́съ и҆зба́ви мл҃твами твои́ми, вопїю́щихъ тѝ си́це:

Ра́дꙋйсѧ, пре́лести бѣсо́вскїѧ потреби́телю: ра́дꙋйсѧ, бѣсѡ́въ стра́шный прогони́телю.

Ра́дꙋйсѧ, главꙋ̀ ѕмі́евꙋ ᲂу҆ѧзви́вый мл҃твами твои́ми: ра́дꙋйсѧ, дарова́нїй ст҃а́гѡ дх҃а преиспо́лненный.

Ра́дꙋйсѧ, дꙋ́хи лꙋка́вствїѧ смиренномꙋ́дрїемъ покори́вый: ра́дꙋйсѧ, ꙗ҆́кѡ кре́стъ тво́й на ра́мѣ поне́слъ є҆сѝ.

Ра́дꙋйсѧ, ꙗ҆́кѡ тѣ́мъ а҆мали́ка мы́сленнагѡ си́лꙋ низложи́лъ є҆сѝ: ра́дꙋйсѧ, ꙗ҆́кѡ бре́мѧ ле́гкое хрⷭ҇то́во воспрїѧ́лъ є҆сѝ на ра́мо.

Ра́дꙋйсѧ, ꙗ҆́кѡ ѿ ю҆́ности возлюби́лъ є҆сѝ и҆́го хрⷭ҇то́во: ра́дꙋйсѧ, ꙗ҆́кѡ сп҃се́нъ ѿ вра́жїихъ сѣте́й, бл҃года́рственнѡ бг҃ꙋ вопїе́ши.

Ра́дꙋйсѧ, ꙗ҆́кѡ и҆ вѣ̑рнымъ на врагѝ мо́щнѡ посо́бствꙋеши: ра́дꙋйсѧ, ꙗ҆́кѡ те́плѣ къ тебѣ̀ притека́ющихъ треволне́нїѧ страсте́й и҆змѣнѧ́еши.

Ра́дꙋйсѧ, ѻ҆́тче ѻ҆нꙋ́фрїе, пресвѣ́тлый свѣти́льниче всеѧ̀ вселе́нныѧ.

Конда́къ з҃

И҆зше́дшꙋ пафнꙋ́тїю ѿ ѡ҆би́тели во внꙋ́трєннѧѧ пꙋсты́ни, є҆́же ви́дѣти гдⷭ҇еви рабо́тающыѧ, бж҃їимъ смотре́нїемъ ᲂу҆зрѣ́ тѧ стра́ннымъ ѡ҆́бразомъ и҆ ᲂу҆жасе́сѧ: по глаго́ланїи же твое́мъ къ немꙋ̀, позна́въ тѧ̀ бы́ти человѣ́ка, вѣ́рнѣ и҆ ди́внѣ бг҃ꙋ рабо́тающа, возгласѝ: А҆ллилꙋ́їа.

І҆́косъ з҃

Но́вый вои́стиннꙋ побѣдоно́сецъ на плѡтскі́ѧ стра̑сти ꙗ҆ви́лсѧ є҆сѝ, прпⷣбне, и҆ кто̀ дово́ленъ воспѣ́ти борє́нїѧ твоѧ̑; кто̀ и҆зочте́тъ трꙋды̑, болѣ̑зни и҆ пѡ́двиги, въ ни́хже тече́нїе по́стничества соверши́лъ є҆сѝ; къ си́хъ же похвале́нїю недово́льни сꙋ́ще, любо́вїю па́че почита́емъ тѧ̀ и҆ вѣ́рнѡ тебѣ̀ сицєва́ѧ вопїе́мъ:

Ра́дꙋйсѧ, гла́домъ и҆ жа́ждею пло́ть твою̀ ᲂу҆дрꙋчи́вый: ра́дꙋйсѧ, тьмы̀ предста́телѧ всеконе́чнѡ побѣди́вый.

Ра́дꙋйсѧ, ꙗ҆́кѡ всѧ́ко сладостра́стїе всено́щными бдѣ̑нїи ᲂу҆вѧди́лъ є҆сѝ: ра́дꙋйсѧ, ꙗ҆́кѡ зако́ннѡ въ мл҃твахъ и҆ поще́нїихъ претерпѣва́ѧ, въ безстра́стїе ѡ҆бле́клсѧ є҆сѝ.

Ра́дꙋйсѧ, преди́вное воздержа́нїѧ зерца́ло: ра́дꙋйсѧ, прпⷣбныхъ ли́кꙋ вели́каѧ сла́во.

Ра́дꙋйсѧ, ꙗ҆́кѡ мра́зомъ померза́емѣй пло́ти твое́й, теплото́ю любвѐ хрⷭ҇то́вы согрѣва́шесѧ дꙋ́хъ тво́й: ра́дꙋйсѧ, ꙗ҆́кѡ зно́емъ ѡ҆палѧ́ема тѧ̀ роса̀ бжⷭ҇твенныѧ блгⷣти прохлажда́ше, прпⷣбне.

Ра́дꙋйсѧ, пꙋсты́ни лѣ́пое ᲂу҆краше́нїе: ра́дꙋйсѧ, по́двигѡвъ и҆ соверше́нства ѡ҆́бразе.

Ра́дꙋйсѧ, ꙗ҆́кѡ всѧ́кꙋ добродѣ́тель въ тебѣ̀ и҆з̾ѡбрази́лъ є҆сѝ: ра́дꙋйсѧ, ꙗ҆́кѡ вселюби́мый подвигополо́жникꙋ хрⷭ҇тꙋ̀ ᲂу҆го́дникъ показа́лсѧ є҆сѝ.

Ра́дꙋйсѧ, ѻ҆́тче ѻ҆нꙋ́фрїе, пресвѣ́тлый свѣти́льниче всеѧ̀ вселе́нныѧ.

Конда́къ и҃

Стра́нное твоѐ житїѐ бы́сть, ѻ҆нꙋ́фрїе: взира́ѧ бо на возра́стшаго при пеще́рѣ твое́й фі́нїка, воздержа́нїемъ па́че пита́лсѧ є҆сѝ. сегѡ̀ ра́ди, ᲂу҆лꙋчи́въ вы́шнюю трапе́зꙋ, пое́ши бг҃ꙋ: А҆ллилꙋ́їа.

І҆́косъ и҃

Ве́сь бы́лъ є҆сѝ въ вы́шнихъ и҆ горѣ̀ ѻ҆́комъ твоеѧ̀ дꙋшѝ взира́лъ є҆сѝ непреста́ннѡ въ се́мъ стра́нномъ по́стничествѣ твое́мъ, ны́нѣ же дерзнове́нїе стѧжа́въ къ бг҃ꙋ, прпⷣбне, застꙋпа́еши всѣ́хъ, на по́мощь тѧ̀ призыва́ющихъ и҆ вопїю́щихъ тѝ си́це:

Ра́дꙋйсѧ, пꙋстынножи́телю вели́кїй: ра́дꙋйсѧ, а҆́ки ѕвѣзда̀, въ пꙋсты́нѧхъ просїѧ́вый.

Ра́дꙋйсѧ, подража́вый стопа́мъ хрⷭ҇то́вымъ ѿ младе́нства твоегѡ̀: ра́дꙋйсѧ, а҆́гг҃льскагѡ житїѧ̀ ревни́телю.

Ра́дꙋйсѧ, навѣ́тѡвъ неви́димыхъ вра̑гъ прогони́телю: ра́дꙋйсѧ, воздержа́нїѧ чꙋ́днагѡ показа́телю.

Ра́дꙋйсѧ, соверше́нства преизѧ́щный ᲂу҆чи́телю: ра́дꙋйсѧ, стра́нный и҆ ди́вный къ нб҃сѝ пꙋ́ть показа́вый.

Ра́дꙋйсѧ, ꙗ҆́кѡ равноа́гг҃льнѡ на землѝ пожи́лъ є҆сѝ: ра́дꙋйсѧ, ꙗ҆́кѡ равноа́гг҃льнꙋю сла́вꙋ и҆ че́сть досто́йнѡ полꙋчи́лъ є҆сѝ.

Ра́дꙋйсѧ, ꙗ҆́кѡ въ нбⷭ҇ныхъ дво́рѣхъ ны́нѣ ѡ҆ всѣ́хъ мольбы̀ творцꙋ̀ прино́сиши: ра́дꙋйсѧ, ꙗ҆́кѡ тебѐ хода́таѧ стѧжа́вшымъ вели́кїѧ блгⷣти бж҃їѧ и҆спроша́еши.

Ра́дꙋйсѧ, ѻ҆́тче ѻ҆нꙋ́фрїе, пресвѣ́тлый свѣти́льниче всеѧ̀ вселе́нныѧ.

Конда́къ ѳ҃

Всѧ́кое є҆стество̀ ᲂу҆диви́сѧ тебѐ, ѻ҆нꙋ́фрїе свѧ́те: мі́ра бо кра̑снаѧ ѿ се́рдца возненави́дѣвъ и҆ є҆ди́наго бг҃а ѿ дꙋшѝ возлюби́въ, пꙋсты́ню пости́глъ є҆сѝ. и҆дѣ́же въ є҆ди́нѣхъ то́кмѡ видѣ́нїихъ ᲂу҆пражнѧ́ѧсѧ, ꙗ҆ви́лсѧ є҆сѝ ꙗ҆́кѡ а҆́гг҃лъ, съ пло́тїю живы́й, поѧ̀ бг҃ꙋ: А҆ллилꙋ́їа.

І҆́косъ ѳ҃

Виті́йстїи ꙗ҆зы́цы восхвали́ти тѧ̀ по достоѧ́нїю не мо́гꙋтъ, ѻ҆́тче бг҃омꙋ́дре ѻ҆нꙋ́фрїе: ты́ бо ѿ ᲂу҆тро́бы ма́терни бг҃ꙋ прибли́зивъ тво́й смы́слъ, весьма̀ прилѣжа́лъ є҆сѝ цр҃ю̀ вседержи́телю, плоды̀ досто́йны приносѧ̀ є҆мꙋ̀ ѿ твои́хъ пѡ́двигъ во все́мъ житїѝ, прпⷣбне. а҆́зъ ᲂу҆̀бо ѿ цр҃кве бж҃їѧ сла́вима тѧ̀ ѡ҆ тѣ́хъ ᲂу҆вѣ́дѣвъ, вѣ́рнѡ тебѣ̀ сицєва́ѧ вопїю̀:

Ра́дꙋйсѧ, ѿ младе́нства мона́шескомꙋ ѡ҆бꙋче́нїю вда́нный: ра́дꙋйсѧ, въ ю҆́ности бж҃їимъ наставле́нїемъ въ пꙋсты́нное безхра́мїе введе́нный.

Ра́дꙋйсѧ, ꙗ҆́кѡ хрⷭ҇то́вымъ словесє́мъ послѣ́дꙋѧ, мі́ра, ѻ҆те́чества же и҆ ро́да ѿре́клсѧ є҆сѝ: ра́дꙋйсѧ, ꙗ҆́кѡ кре́стъ тво́й є҆ѵⷢ҇льски на ра́мѣ твое́мъ поне́слъ є҆сѝ.

Ра́дꙋйсѧ, небрегі́й ѡ҆ ри́зѣ, да нетлѣ́нїѧ ри́зꙋ себѣ̀ самомꙋ̀ содѣ́лаеши: ра́дꙋйсѧ, сѣ́ѧвый слеза́ми, да съ ра́достїю рꙋкоѧ́ти твоѧ̀ по́жнеши.

Ра́дꙋйсѧ, ꙗ҆́кѡ неѧде́нїемъ, нꙋ́ждною нището́ю и҆ всегда́шнимъ на моли́твѣ стоѧ́нїемъ пло́ть и҆знꙋри́лъ є҆сѝ: ра́дꙋйсѧ, ꙗ҆́кѡ пꙋтѝ же́стоки за словеса̀ ᲂу҆сте́нъ гдⷭ҇а твоегѡ̀ сохрани́лъ є҆сѝ.

Ра́дꙋйсѧ, пѡ́двиги твои́ми стра̑сти тѣлє́сныѧ до конца̀ ᲂу҆мертви́вый: ра́дꙋйсѧ, равноа́гг҃льнꙋю чистотꙋ̀ сохрани́вый.

Ра́дꙋйсѧ, ꙗ҆́кѡ многолѣ́тнѣ а҆́ки безпло́тенъ пожи́лъ є҆сѝ: ра́дꙋйсѧ, ꙗ҆́кѡ ѿ вѣнцепода́телѧ безпло́тнымъ ликѡ́мъ ны́нѣ счи́слилсѧ є҆сѝ.

Ра́дꙋйсѧ, ѻ҆́тче ѻ҆нꙋ́фрїе, пресвѣ́тлый свѣти́льниче всеѧ̀ вселе́нныѧ.

Конда́къ і҃

Сп҃сти́сѧ хотѧ́ще вѣ́рнїи ѿ напа́стей разли́чныхъ, ѻ҆́тче, предста́телѧ тѧ̀ себѣ̀ и҆ побо́рника поставлѧ́ютъ и҆ не лиша́ютсѧ наде́ждъ свои́хъ: ты́ бо мл҃твами къ бг҃ꙋ твои́ми ѿ бѣ́дъ лю́тыхъ и҆ скорбе́й, ѡ҆держа́щихъ ны̀, и҆ многоразли́чныхъ ѕлы́хъ и҆з̾има́еши, наставлѧ́еши же на сп҃се́нїѧ стезѝ ᲂу҆се́рднѡ къ тебѣ̀ притека́ющыѧ и҆ бг҃ꙋ вѣ́рнѡ вопїю́щыѧ: А҆ллилꙋ́їа.

І҆́косъ і҃

Стѣ́нꙋ тѧ̀, застꙋ́пника и҆ мл҃твенника те́пла ѡ҆брѣ́тъ, прпⷣбне, и҆з̾ глꙋбины̀ се́рдца, ꙗ҆́кѡ бл҃гоꙋха́нное кади́ло, съ воздыха́нїемъ бг҃ꙋ возсыла́ю хвалꙋ̀: тебѣ́ же, при́сномꙋ сꙋ́щꙋ мл҃твенникꙋ, сицєва́ѧ приношꙋ̀ пѣ̑нїѧ:

Ра́дꙋйсѧ, плодѡ́въ добродѣ́тельныхъ бл҃гопроцвѣ́тшаѧ ни́во: ра́дꙋйсѧ, бл҃гоче́стїѧ преизрѧ́дное ᲂу҆добре́нїе.

Ра́дꙋйсѧ, земны́мъ застꙋ́пниче крѣ́пкїй: ра́дꙋйсѧ, послꙋ́шателю притека́ющымъ къ тебѣ̀ те́плый.

Ра́дꙋйсѧ, свѣти́льниче, де́мѡнскїй мра́къ ѿрѣва́ѧй: ра́дꙋйсѧ, дꙋшетлѣ́нныхъ недꙋ́гѡвъ тьмꙋ̀ ѿгонѧ́ѧй.

Ра́дꙋйсѧ, ꙗ҆́кѡ заблꙋжда́ющихъ прпⷣбными нра̑вы на пꙋ́ть пра́вый рꙋково́дствꙋеши: ра́дꙋйсѧ, ꙗ҆́кѡ къ и҆сполне́нїю бж҃їихъ хотѣ́нїй ᲂу҆правлѧ́еши.

Ра́дꙋйсѧ, ꙗ҆́кѡ многоразли̑чнаѧ бл҃годѣѧ̑нїѧ тобо́ю свы́ше подае́ма быва́ютъ: ра́дꙋйсѧ, ꙗ҆́кѡ дꙋхѡ́въ ѕло́бныхъ навѣ̑ты ѿ призыва́ющихъ тѧ̀ бѣ́гаютъ.

Ра́дꙋйсѧ, ꙗ҆́кѡ всѣ́хъ молє́нїѧ дерзнове́ннѡ вы́шнемꙋ прино́сиши: ра́дꙋйсѧ, ꙗ҆́кѡ всѣ́хъ въ нꙋ́ждахъ и҆ печа́лехъ защища́еши.

Ра́дꙋйсѧ, ѻ҆́тче ѻ҆нꙋ́фрїе, пресвѣ́тлый свѣти́льниче всеѧ̀ вселе́нныѧ.

Конда́къ а҃і

Пѣ́нїе а҆́гг҃льское слы́шашесѧ въ бжⷭ҇твеннѣмъ преставле́нїи твое́мъ, ѻ҆́тче, ст҃ѣ́й бо и҆ бг҃оꙋго́днѣйшѣй дꙋшѝ твое́й, въ нбⷭ҇наѧ селє́нїѧ пресла́внѡ восходѧ́щей, си́лы нбⷭ҇ныѧ дивлѧ́хꙋсѧ, пою́ще: А҆ллилꙋ́їа.

І҆́косъ а҃і

Свѣ́тлѡ по преставле́нїи лицѐ твоѐ ви́дѣ, ѻ҆́тче, пафнꙋ́тїй ст҃ы́й ᲂу҆диви́сѧ. раздѣли́въ же на двѣ̀ ча́сти рѧ́сꙋ свою̀, покры̀ мѡ́щи твоѧ̑ и҆ погребе́ тѧ со львы̀ че́стнѡ. сїѧ̀ и҆ а҆́зъ дꙋ́хомъ бл҃гоговѣ́йнѡ почита́ѧ, си́це тѝ вопїю̀:

Ра́дꙋйсѧ, ꙗ҆́кѡ всего̀ тебє̀ бг҃ꙋ ѡ҆ст҃и́лъ є҆сѝ: ра́дꙋйсѧ, ꙗ҆́кѡ до́брѣ бжⷭ҇твенныѧ закѡ́ны соблю́лъ є҆сѝ.

Ра́дꙋйсѧ, и҆зше́ствїе твоѐ ѿ житїѧ̀ прⷪ҇ро́чески предвѣ́дѣвый: ра́дꙋйсѧ, въ те́плѣй къ бг҃ꙋ любвѝ и҆ бл҃гоговѣ́нїи многотрꙋ́дныѧ твоѧ̑ пѡ́двиги ѡ҆ко́нчивый.

Ра́дꙋйсѧ, въ преставле́нїи бл҃гоꙋха́нїемъ чꙋ́днымъ, а҆́ки ра́йскимъ, почте́нный: ра́дꙋйсѧ, мѡ́лнїи тогда̀ и҆ блиста̑нїи ди́внѡ просла́вленный.

Ра́дꙋйсѧ, є҆го́же мѡ́щи а҆́гг҃льстїи ли́цы съ пѣ́нїемъ, кади́лы и҆ свѣща́ми ѡ҆крꙋжи́ша: ра́дꙋйсѧ, є҆мꙋ́же го́рнѧѧ си́лы врата̀ ра́йскїѧ ѿверзо́ша.

Ра́дꙋйсѧ, ꙗ҆́кѡ въ то́мже часѣ̀ сїѧ́нїе ве́лїе, ѡ҆блиста́вшее тѧ̀, зрѧ́шесѧ: ра́дꙋйсѧ, ꙗ҆́кѡ сла́дкїй гла́съ, къ воспрїѧ́тїю вѣ́чныхъ бла̑гъ призыва́ющъ тѧ̀, слы́шашесѧ.

Ра́дꙋйсѧ, ꙗ҆́кѡ ст҃ꙋ́ю твою̀ дꙋ́шꙋ вѣнцеда́вецъ хрⷭ҇то́съ сла́внѡ прїѧ́тъ въ гѡ́рнѧѧ селє́нїѧ: ра́дꙋйсѧ, ꙗ҆́кѡ ны́нѣ вѣ́чнагѡ и҆з̾ѻби́льнѡ наслажда́ешисѧ весе́лїѧ.

Ра́дꙋйсѧ, ѻ҆́тче ѻ҆нꙋ́фрїе, пресвѣ́тлый свѣти́льниче всеѧ̀ вселе́нныѧ.

Конда́къ в҃і

Бл҃года́ть, да́ннꙋю тѝ, и҆ по́двиги твоѧ̀ никто́же ѿ земны́хъ и҆зрещѝ мо́жетъ, ѻ҆́тче ѻ҆нꙋ́фрїе: въ пꙋсты́ни бо нестѧжа́тельнѡ жи́вый, пи́щꙋ и҆мѣ́лъ є҆сѝ хлѣ́бъ а҆́гг҃льскїй, ѿ человѣ̑къ бѣ́гаѧ, съ бг҃омъ и҆ а҆́гг҃лы бесѣ́довалъ є҆сѝ. сегѡ̀ ра́ди въ нбⷭ҇ныхъ черто́зѣхъ ра́дꙋешисѧ и҆ пое́ши пѣ́снь: А҆ллилꙋ́їа.

І҆́косъ в҃і

Пое́мъ до́блествєнныѧ пѡ́двиги твоѧ̑, ᲂу҆бл҃жа́емъ достохва́льнꙋю кончи́нꙋ, почита́емъ и҆ сщ҃е́ннꙋю па́мѧть твою̀, прпⷣбне, къ не́йже и҆ ꙗ҆́кѡ є҆ди́номꙋ тебѐ ѿ два́десѧти четыре́хъ ста́рєцъ, ѡ҆крꙋжа́ющихъ прⷭ҇то́лъ вы́шнѧго, предсѣдѧ́щемꙋ похва̑льнаѧ си́це вопїе́мъ:

Ра́дꙋйсѧ, стра́ннѡ на землѝ пожи́вый: ра́дꙋйсѧ, стра́ннꙋю и҆ кончи́нꙋ наслѣ́дивый.

Ра́дꙋйсѧ, ꙗ҆́кѡ свѣ́тлыми пѡ́двиги твои́ми къ свѣ́тꙋ невече́рнемꙋ вше́лъ є҆сѝ: ра́дꙋйсѧ, ꙗ҆́кѡ премі́рное наслѣ́дїе бога́тнѡ стѧжа́лъ є҆сѝ.

Ра́дꙋйсѧ, ꙗ҆́кѡ съ безпло́тными трист҃ꙋ́ю пѣ́снь бг҃ꙋ немо́лчнѡ вопїе́ши: ра́дꙋйсѧ, неизрече́нныхъ бла́гъ наслѣ́дниче.

Ра́дꙋйсѧ, прпⷣбныхъ и҆ првⷣныхъ собесѣ́дниче: ра́дꙋйсѧ, ꙗ҆́кѡ ны́нѣ разрѣ́шшимсѧ зерца́ломъ трⷪ҇цꙋ ст҃ꙋ́ю зри́ши непосре́дственнѡ.

Ра́дꙋйсѧ, ꙗ҆́кѡ въ па́мѧти твое́й цр҃ковь хрⷭ҇то́вꙋ весели́ши неизрече́ннѡ: ра́дꙋйсѧ, ꙗ҆́кѡ тобо́ю пѡ́стницы и҆ пꙋстынножи́тєли въ по́двигъ ᲂу҆крѣплѧ́ютсѧ.

Ра́дꙋйсѧ, ꙗ҆́кѡ вѣ́рнїи хода́тайствомъ твои́мъ всѣ́хъ бла̑гъ свы́ше сподоблѧ́ютсѧ.

Ра́дꙋйсѧ, ѻ҆́тче ѻ҆нꙋ́фрїе, пресвѣ́тлый свѣти́льниче всеѧ̀ вселе́нныѧ.

Конда́къ г҃і

Ѽ всехва́льный и҆ преди́вный ᲂу҆го́дниче хрⷭ҇то́въ, ѻ҆́тче ѻ҆нꙋ́фрїе, молю́ ти сѧ и҆ вопїю̀ всеꙋсе́рднѡ: прїимѝ сїѐ ма́лое, ѿ менѐ приноси́мое моле́нїе и҆ потщи́сѧ ско́ро ᲂу҆моли́ти ми́лостиваго бг҃а и҆ влⷣкꙋ, да и҆зба́витъ мѧ̀ ѿ всѧ́кихъ бѣ́дъ и҆ бꙋ́дꙋщїѧ и҆́зметъ мꙋ́ки, вопїю́щагѡ: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃льстїи чи́ни твои̑мъ, ѻ҆́тче, ᲂу҆диви́шасѧ по́двигѡмъ, и҆́миже въ пꙋсты́ни непреста́ннѡ ᲂу҆пражнѧ́лсѧ є҆сѝ: три́ бо и҆ шестьдесѧ́тъ лѣ́тъ пости́лсѧ є҆сѝ, бжⷭ҇твенныѧ же хрⷭ҇то́вы та̑йны ѿ рꙋ́къ а҆́гг҃льскихъ прїима́ти сподо́билсѧ є҆сѝ, и҆ ны́нѣ ᲂу҆̀бо почита́ѧ тѧ̀ є҆диновсе́льника и҆ собесѣ́дника а҆́гг҃лѡвъ, сицєва́ѧ вопїю̀ тѝ, свѧ́те ѻ҆нꙋ́фрїе:

Ра́дꙋйсѧ, а҆́гг҃лѡвъ преди́вное чꙋ́до: ра́дꙋйсѧ, дꙋшетлѣ́нныхъ страсте́й разрꙋши́телю.

Ра́дꙋйсѧ, непроходи́мыѧ пꙋсты́ни просвѣти́телю: ра́дꙋйсѧ, воздержа́нїѧ наказа́телю и҆ ᲂу҆чи́телю.

Ра́дꙋйсѧ, пꙋстынножи́телей ᲂу҆добре́нїе: ра́дꙋйсѧ, мона́хѡвъ бг҃одꙋхнове́нное свѣти́ло.

Ра́дꙋйсѧ, ᲂу҆го́дниче хрⷭ҇то́въ преизѧ́щный: ра́дꙋйсѧ, безмо́лвїѧ рачи́телю теплѣ́йшїй.

Ра́дꙋйсѧ, бѣсо́вскїѧ си́лы крѣ́пкое попра́нїе: ра́дꙋйсѧ, сп҃се́нїѧ и҆́стинный наста́вниче.

Ра́дꙋйсѧ, пода́телю ра́дости вѣ̑рнымъ: ра́дꙋйсѧ, ско́рый помо́щниче къ тебѣ̀ притека́ющымъ.

Ра́дꙋйсѧ, ѻ҆́тче ѻ҆нꙋ́фрїе, пресвѣ́тлый свѣти́льниче всеѧ̀ вселе́нныѧ.

Конда́къ а҃

И҆збра́нный и҆ ди́вный ѻ҆́тче ѻ҆нꙋ́фрїе, сїѧ́ющїй трисїѧ́ннагѡ живота̀ заре́ю, ты̀ мѧ̀, ѡ҆мраче́ннаго грѣхо́вными страстьмѝ, просвѣтѝ, ѿ смертоно́сныѧ ра́ны и҆схитѝ и҆ твои́ми мл҃твами ѿ всѣ́хъ бѣ́дъ и҆зба́ви, да зовꙋ̀ тебѣ̀:

Ра́дꙋйсѧ, ѻ҆́тче ѻ҆нꙋ́фрїе, пресвѣ́тлый свѣти́льниче всеѧ̀ вселе́нныѧ.

Моли́твы

Ѽ преизѧ́щный и҆ превели́кїй пꙋстынножи́телю, прпⷣбне ѻ҆́тче ѻ҆нꙋ́фрїе! похвалѧ́ю твоѧ̑ неизречє́ннаѧ чꙋдотворє́нїѧ и҆ житїѐ пресвѣ́тло, є҆́же є҆сѝ препроводи́лъ ѿ ю҆́ности твоеѧ̀, да́же и҆ до ста́рости: никто́же бо и҆счестѝ возмо́же терпѣ́нїѧ и҆ по́двигѡвъ твои́хъ, прече́стне. ᲂу҆диви́сѧ прпⷣбный пафнꙋ́тїй твоемꙋ̀ жесто́комꙋ є҆́же въ пꙋсты́ни житїю̀, вкꙋ́пѣ же и҆ ѕѣлѡ̀ возра́довасѧ, ѡ҆брѣ́тъ тѧ̀ є҆ди́наго толи́кихъ по́двигѡвъ и҆ соверше́нства сꙋ́ща ѡ҆́бразъ. сегѡ̀ ра́ди и҆ по́длиннѡ и҆спыта̀ ѡ҆ трꙋдѣ́хъ твои́хъ свѧты́хъ и҆ ѡ҆ є҆́же коли́кѡ и҆мѣ́лъ є҆сѝ вре́меннагѡ житїѧ̀. тѣ́мже и҆ написа̀, ꙗ҆́кѡ шестьдесѧ́тъ лѣ́тъ и҆ трѝ въ трꙋдолю́бїи пребыва́ѧ, въ наготѣ̀ претерпѣва́ѧ мра́зъ и҆ зно́й, въ глꙋбо́цѣй пꙋсты́нѣ со ѕвѣрьмѝ и҆ пти̑цы ѡ҆бита́ѧ, мл҃твы непреста́ннѡ творѧ̀, пожи́лъ є҆сѝ. сегѡ̀ ра́ди ны́нѣ ра́дость тебѣ̀ приношꙋ̀ ѿ недосто́йныхъ ᲂу҆сте́нъ мои́хъ, прпⷣбне ѻ҆́тче, прпⷣбномꙋ пафнꙋ́тїю ра́досте вели́каѧ (сподо́бисѧ бо при кончи́нѣ съ львы̀ послꙋжи́ти тебѣ̀, погребстѝ тѣ́ло твоѐ и҆ съ тобо́ю на нб҃сѝ жи́ти), и҆лїѝ ѳесві́тѧнинꙋ ревни́телю, і҆ѡа́ннꙋ крⷭ҇ти́телю наслѣ́дниче, дрꙋ́же хрⷭ҇то́въ и҆ снаслѣ́дниче и҆́стинный, є҆гѵ́птꙋ ᲂу҆́мнаѧ красото̀, ѳиве́ѡмъ вели́кое свѣти́ло, лѷві́и кра́снаѧ добро́то, фі́нїѯъ краснопроцвѣта́ющїй, ѻ҆рлѐ высокопа́рный, лета́ющїй въ поднебє́снаѧ, на нб҃сѣ́хъ гражда́нство ѡ҆брѣты́й, и҆дѣ́же и҆ водвори́сѧ ᲂу҆ прⷭ҇то́ла влⷣки сла́вы, съ два́десѧть четы́рми ста́рцы жили́ще ѡ҆брѣты́й, съ ни́ми же и҆ пребыва́еши. и҆ ны́нѣ молю̀ тѧ̀, пречꙋ́дный граждани́не нбⷭ҇ный, ст҃ы́хъ ликѡ́въ а҆́гг҃льскихъ совсе́льниче, ᲂу҆слы́ши мѧ̀, грѣ́шнаго и҆ недосто́йнаго раба̀ твоегѡ̀, въ ча́съ се́й и҆ прїимѝ сїѐ ма́лое моле́нїе моѐ а҆ка́ѳїстово, вели́кїй застꙋ́пниче, ско́рый помо́щниче притека́ющымъ къ тебѣ̀ ᲂу҆се́рднѡ. загла́ди рꙋкописа́нїе дѣ́лъ мои́хъ скве́рныхъ и҆ нечи́стыхъ, ꙗ҆̀же держа́тъ дє́мѡнскїѧ полкѝ. покры́й мѧ̀ твои́мъ застꙋпле́нїемъ, причти́ мѧ ко ᲂу҆гото́ванномꙋ пресвѣ́тломꙋ мѣ́стꙋ мл҃твами твои́ми и҆ сподо́би мѧ̀ вы́шнѧгѡ і҆ерⷭ҇ли́ма, и҆́бо по пребл҃гослове́ннѣй влⷣчцѣ на́шей бцⷣѣ и҆ приснодѣ́вѣ марі́и, тебѣ̀ междꙋ̀ теплѣ́йшими помѡ́щницы, молє́бницы и҆ застꙋ̑пницы мои́ми почита́ю. присѣща́еши бо и҆ дае́ши рꙋ́кꙋ по́мощи припа́дающымъ къ тебѣ̀ въ хра́мѣ твое́мъ и҆ повсю́дꙋ. тѣ́мже и҆ а҆́зъ недосто́йный ны́нѣ тебѣ̀ молю́сѧ и҆ призыва́ю: ᲂу҆молѝ ми́лостиваго бг҃а, да ѿпꙋ́ститъ мѝ всѧ̑ прегрѣшє́нїѧ моѧ̑, вѡ́льнаѧ и҆ невѡ́льнаѧ, сотворє́ннаѧ всѧ̑ ѕла̑ѧ дѣла̀ моѧ̑, и҆ да и҆зба́витъ мѧ̀ твои́мъ предста́тельствомъ ѿ вѣ́чныхъ мꙋ́къ, наꙋчи́тъ мѧ̀ твори́ти дѡ́браѧ дѣла̀, наста́витъ мѧ̀ на пꙋ́ть къ сп҃се́нїю и҆́стинномꙋ и҆ сподо́битъ мѧ̀ кꙋ́пнѡ ра́дости вѣ́чныѧ наслади́тисѧ со всѣ́ми ст҃ы́ми, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Ѽ пречꙋ́дне и҆ преблаже́нне ᲂу҆го́дниче хрⷭ҇то́въ и҆ а҆́вво на́шъ, ѻ҆нꙋ́фрїе вели́кїй! ты̀ ди́внꙋю любо́вь ко гдⷭ҇ꙋ твоемꙋ̀ показа́лъ є҆сѝ, и҆ на ди̑вныѧ пѡ́двиги бл҃года́тїю є҆гѡ̀ ᲂу҆крѣпи́лсѧ є҆сѝ, и҆ сегѡ̀ ра́ди ве́лїѧ дерзнове́нїѧ къ немꙋ̀ сподо́билсѧ є҆сѝ: мно́га бо чꙋдеса̀ и҆ зна́мєнїѧ си́лы бж҃їѧ лю́демъ ѡ҆ тебѣ̀ ꙗ҆ви́шасѧ. воззрѝ ᲂу҆̀бо и҆ ны́нѣ, ѻ҆́тче преди́вный, бл҃госе́рдымъ ѻ҆́комъ любвѐ твоеѧ̀ на ны̀ недостѡ́йныѧ рабы̑, и҆ да́рꙋй всѣ̑мъ по коего́ждо потре́бѣ, по вѣ́рѣ же и҆ ᲂу҆пова́нїю: скорбѧ́щыѧ ѡ҆бра́дꙋй, пла́чꙋщыѧ ᲂу҆тѣ́ши, недꙋ́гꙋющїѧ и҆сцѣлѝ, трꙋжда́ющымсѧ помозѝ, борю́щыѧсѧ со страстьмѝ и҆ прилѡ́ги вра́жїими ᲂу҆крѣпѝ и҆ бл҃гословѝ, и҆знемога́ющыѧ поддержѝ, ѻ҆би́тель твою̀ и҆ всѣ́хъ на́съ ѿ вра̑гъ ви́димыхъ и҆ ѿ всѧ́кагѡ ѕла̀ сохранѝ. возвели́чи вѣ́рꙋ ст҃ꙋ́ю правосла́внꙋю во ѻ҆те́чествїи на́шемъ, ѡ҆братѝ заблꙋ́ждшыѧ, вразꙋмѝ ѿпа́дшыѧ, ᲂу҆твердѝ коле́блющыѧсѧ, ᲂу҆мѧгчѝ ᲂу҆по́рствꙋющыѧ, просвѣтѝ невѣ̑рныѧ, и҆ всѧ̑ приведѝ въ ти́хое приста́нище ѻ҆те́чествїѧ нбⷭ҇наго. ѽ преди́вное сло́во мона́шествꙋющихъ и҆ всѣ́хъ вѣ́рныхъ ᲂу҆тѣше́нїе! сла́вными пѡ́двиги твои́ми и҆ сла́дкимъ лицезрѣ́нїемъ чꙋдотво́рнагѡ ѡ҆́браза твоегѡ̀ и҆ на́съ ѡ҆зарѝ и҆ на всѧ́къ по́двигъ, трꙋ́дъ и҆ терпѣ́нїе ᲂу҆крѣпѝ во сла́вꙋ и҆́мени бж҃їѧ, да сп҃се́ннїи сподо́бимсѧ съ тобо́ю и҆ всѣ́ми ст҃ы́ми вѣ́чнаго и҆ пребл҃гослове́ннагѡ црⷭ҇твїѧ сла́вы ѻ҆ц҃а̀, и҆ сн҃а, и҆ ст҃а́гѡ дх҃а во вѣ́ки вѣкѡ́въ. а҆ми́нь.

Ѽ прпⷣбне ѻ҆́тче ѻ҆нꙋ́фрїе! мо́лимъ тѧ̀: ᲂу҆слы́ши на́съ, грѣ́шныхъ и҆ недосто́йныхъ ра́бъ бж҃їихъ (и҆мена̀), въ ча́съ се́й, и҆ прїимѝ сїѐ ма́лое моле́нїе на́ше: рꙋкописа́нїе дѣ́лъ на́шихъ скве́рныхъ и҆ нечи́стыхъ моли́твою твое́ю и҆згла́ди, твои́мъ застꙋпле́нїемъ при́снѡ на́съ покрыва́й и҆ ко ᲂу҆гото́ванномꙋ вѣ̑рнымъ пресвѣ́тломꙋ черто́гꙋ моли́твами твои́ми приведѝ: ᲂу҆молѝ ᲂу҆̀бо млⷭ҇тиваго бг҃а, да ѿпꙋ́ститъ на́мъ всѧ̑ прегрѣшє́нїѧ на̑ша вѡ́льнаѧ и҆ невѡ́льнаѧ и҆ всѧ̑ ѕла̑ѧ дѣла̀, на́ми сотворе́нныѧ, и҆ да и҆зба́витъ на́съ твои́мъ предста́тельствомъ ѿ вѣ́чныхъ мꙋ́къ и҆ сподо́битъ на́съ ра́дости вѣ́чныѧ наслади́тисѧ, кꙋ́пнѡ со всѣ́ми ст҃ы́ми, во вѣ́ки вѣкѡ́въ. а҆ми́нь.