Кано́н преподо́бному Ону́фрию вели́кому

Зари́ трисве́тлыя осия́емь све́том, мра́ка мя́ исхи́ти смертоно́снаго согреше́ний твои́ми, о́тче, моли́твами, Ону́фрие, я́ко да пою́ па́мять твою́.

Ми́ра отве́ргся, прилепи́лся еси́ Христу́, пло́ть покори́л еси́ по́мыслу и прия́телище яви́лся еси́ Свята́го Ду́ха, о́тче богому́дре Ону́фрие.

Столпо́м боже́ственнаго све́та наставля́емь, Еги́пет оста́вил еси́ стра́стный, и к высоте́ дости́гл еси́ безстра́стия, и Бо́гу бесе́довал еси́.

А́нгельскому после́дуя зре́нию, пусты́ню дости́гл еси́ и, воздержа́нием плотски́я сла́сти увяди́в, а́нгельски пожи́л еси́ в то́й, блаже́нне.

Насажде́но дре́во при исхо́дищих яви́вся воздержа́ния во́д, во бла́го, о́тче, вре́мя благопло́дие доброде́телей я́ко вои́стинну по́дал еси́, Ону́фрие, дея́нием.

Всесве́тлая звезда́ вселе́нней от пусты́ни возсия́в, уясни́л еси́ ве́рных, заря́ми по́двигов, благочести́вых собо́ры, о́тче на́ш Ону́фрие преподо́бне.

Совле́к тле́нную греха́ ри́зу, о́тче, пра́вды, Ону́фрие, во оде́жду обле́клся еси́ и вну́трь черто́га всели́лся еси́.

Моли́твами непреста́нными све́т боже́ственнаго ра́зума собра́л еси́ в се́рдцы твое́м, о́тче на́ш, неразу́мия же отбе́гл еси́ мра́чныя ле́сти, Ону́фрие.

Те́сный ше́ствовав пу́ть и приско́рбный на земли́, богому́дре, к широ́кому дости́гл еси́ и ра́дости испо́лнен небе́сных наслажде́ний, преподо́бне.

А́нгелом единожи́теля Пафну́тий обре́т в пусты́ни тя́, вели́каго равноа́нгельнаго свети́льника, благоче́стно жития́ твоего́ все́м яви́ исправле́ния, му́дре.

Возсия́ тебе́ Госпо́дь, Его́же от души́ вожделе́л еси́, безстра́стия Све́т невече́рний, Ону́фрие, и ми́р в по́вестех непоро́чнаго жития́ твоего́ ве́сь просвети́л еси́, му́дре.

Я́ко благопропове́дуя, Ону́фрие блаже́нне, е́же прилепля́тися Бо́гу на́шему, на Того́ упова́ние от души́ возложи́л еси́ и Того́ хвалу́ име́л еси́ во усте́х при́сно.

Мра́зом померза́емей пло́ти твое́й, теплото́ю Ду́ха гре́яшеся тво́й ду́х; зно́ем же опаля́емь, му́дре, роса́ прохлажда́ше небе́сная тя́ благода́тию.

Ходя́щу ти́ в пусты́ни, от Бо́га предвожда́лся еси́, сла́вне, светозаре́нием, та́мо хотя́щаго све́та прия́ти тя́ ны́не пропису́я и сла́ву, при́сно пребыва́ющую.

В верте́пе роди́выйся и на руку́ ста́рца я́ко Младе́нец прия́ти сподо́блься, младе́нствующа де́лы благи́ми, ста́рца в верте́пе тя́ учиня́ет к лу́чшим.

На горе́ Илию́ препита́вый вра́ном, То́й тебе́ а́нгелом пи́щу посыла́ет, тя́ велича́я, преподо́бне, Того́ возвели́чившаго.

Я́коже фи́никс, при исхо́дищах прозя́б водны́х воздержа́ния, пи́щу име́л еси́ фи́ники, пита́вся пи́щею боле́зней твои́х.

Виде́нии разширя́яся, о́тче, боле́зньми пита́лся еси́ воздержа́ния и ны́не получи́л еси́ го́рнее благопита́ние, Ону́фрие.

Зе́млю до́льную премину́в, небе́сную стяжа́л еси́ жи́знь, и безпло́тных лико́м счи́слился еси́, нося́ пло́ть, Ону́фрие блаже́нне, и зе́млю кро́тких насле́довал еси́, ю́же тебе́ подаде́ Христо́с во ве́ки.

Сле́зныя ка́пли гаси́ло стяжа́л еси́ вои́стинну стра́стным разгоре́нием и любо́вию огня́ боже́ственнаго росе́ совокупи́лся еси́ безстра́стия — Христу́ Бо́гу на́шему, те́мже тя́ чти́м, Ону́фрие богому́дре.

А́нгельскому житию́ поревнова́вша непреста́нными моли́твами, руко́ю а́нгела Свои́м Та́йнам прича́стника, о́тче, Христо́с тя́ показа́, Вели́каго Сове́та вои́стинну А́нгел, Его́же превозно́сим во ве́ки.

Взира́нии непреста́нными, я́же к Бо́гу, о́тче богому́дре, обожа́емь, прича́стием Его́ бы́л еси́ бо́г и, со а́нгелы служа́, Сего́ сла́виши при́сно.

Умертви́в пло́ть, победи́л еси́ врага́, преста́вился еси́ к невече́рней зари́, небе́сных бла́г ты́ насле́дник бы́в, о́тче Ону́фрие.

Любо́вию творя́щих святы́й тво́й пра́здник от вся́каго треволне́ния страсте́й мольба́ми твои́ми избавля́й при́сно, я́ко дерзнове́ние обре́т у Спа́са, Ону́фрие.

Зарѝ трисвѣ́тлыѧ ѡ҆сїѧ́емь свѣ́томъ, мра́ка мѧ̀ и҆схи́ти смертоно́снагѡ согрѣше́нїй, твои́ми, ѻ҆́тче, моли́твами, ѻ҆нꙋ́фрїе, ꙗ҆́кѡ да пою̀ па́мѧть твою̀.

Мі́ра ѿве́ргсѧ, прилѣпи́лсѧ є҆сѝ хрⷭ҇тꙋ̀, пло́ть покори́лъ є҆сѝ по́мыслꙋ, и҆ прїѧ́телище ꙗ҆ви́лсѧ є҆сѝ ст҃а́гѡ дх҃а, ѻ҆́тче бг҃омꙋ́дре ѻ҆нꙋ́фрїе.

Столпо́мъ бжⷭ҇твеннагѡ свѣ́та наставлѧ́емь, є҆гѵ́петъ ѡ҆ста́вилъ є҆сѝ стра́стный, и҆ къ высотѣ̀ дости́глъ є҆сѝ безстра́стїѧ, и҆ бг҃ꙋ бесѣ́довалъ є҆сѝ.

А҆́гг҃льскомꙋ послѣ́дꙋѧ зрѣ́нїю, пꙋсты́ню дости́глъ є҆сѝ: и҆ воздержа́нїемъ плотскі̑ѧ сла̑сти ᲂу҆вѧди́въ, а҆́гг҃льски пожи́лъ є҆сѝ въ то́й, бл҃же́нне.

Насажде́но дре́во при и҆схо́дищихъ ꙗ҆ви́всѧ воздержа́нїѧ во́дъ, во бла́го, ѻ҆́тче, вре́мѧ, бл҃гопло́дїе добродѣ́телей, ꙗ҆́кѡ вои́стиннꙋ по́далъ є҆сѝ, ѻ҆нꙋ́фрїе, дѣѧ́нїемъ.

Всесвѣ́тлаѧ ѕвѣзда̀ вселе́ннѣй ѿ пꙋсты́ни возсїѧ́въ, ᲂу҆ѧсни́лъ є҆сѝ вѣ́рныхъ, зарѧ́ми по́двигѡвъ благочести́выхъ собо́ры, ѻ҆́тче на́шъ ѻ҆нꙋ́фрїе преподо́бне.

Совле́къ тлѣ́ннꙋю грѣха̀ ри́зꙋ, ѻ҆́тче, пра́вды, ѻ҆нꙋ́фрїе, во ѻ҆де́ждꙋ ѡ҆бле́клсѧ є҆сѝ, и҆ внꙋ́трь черто́га всели́лсѧ є҆сѝ.

Моли́твами непреста́нными свѣ́тъ бжⷭ҇твеннагѡ ра́зꙋма собра́лъ є҆сѝ въ се́рдцы твое́мъ, ѻ҆́тче на́шъ: неразꙋ́мїѧ же ѿбѣ́глъ є҆сѝ мра́чныѧ ле́сти, ѻ҆нꙋ́фрїе.

Тѣ́сный ше́ствовавъ пꙋ́ть, и҆ приско́рбный на землѝ, бг҃омꙋ́дре, къ широ́комꙋ дости́глъ є҆сѝ, и҆ ра́дости и҆спо́лненъ нбⷭ҇ныхъ наслажде́нїй, преподо́бне.

А҆́гг҃лѡмъ є҆диножи́телѧ пафнꙋ́тїй, ѡ҆брѣ́тъ въ пꙋсты́ни тѧ̀, вели́каго равноа́гг҃льнаго свѣти́льника, бл҃гоче́стнѡ житїѧ̀ твоегѡ̀ всѣ̑мъ ꙗ҆вѝ и҆справлє́нїѧ, мꙋ́дре.

Возсїѧ̀ тебѣ̀ гдⷭ҇ь, є҆гѡ́же ѿ дꙋшѝ вожделѣ́лъ є҆сѝ, безстра́стїѧ свѣ́тъ невече́рнїй, ѻ҆нꙋ́фрїе: и҆ мі́ръ въ по́вѣстехъ непоро́чнагѡ житїѧ̀ твоегѡ̀ ве́сь просвѣти́лъ є҆сѝ, мꙋ́дре.

Ꙗ҆́кѡ благопроповѣ́дꙋѧ, ѻ҆нꙋ́фрїе блаже́нне, є҆́же прилѣплѧ́тисѧ бг҃ꙋ на́шемꙋ, на того̀ ᲂу҆пова́нїе ѿ дꙋшѝ возложи́лъ є҆сѝ, и҆ тогѡ̀ хвалꙋ̀ и҆мѣ́лъ є҆сѝ во ᲂу҆стѣ́хъ при́снѡ.

Мра́зомъ померза́емѣй пло́ти твое́й теплото́ю дх҃а грѣ́ѧшесѧ тво́й дꙋ́хъ: зно́емъ же ѡ҆палѧ́емь, мꙋ́дре, роса̀ прохлажда́ше небе́снаѧ тѧ̀ благода́тїю.

Ходѧ́щꙋ тѝ въ пꙋсты́ни, ѿ бг҃а предвожда́лсѧ є҆сѝ, сла́вне, свѣтозаре́нїемъ, та́мѡ хотѧ́щаго свѣ́та прїѧ́ти тѧ̀ ны́нѣ прописꙋ́ѧ, и҆ сла́вꙋ при́снѡ пребыва́ющꙋю.

Въ верте́пѣ роди́выйсѧ, и҆ на рꙋкꙋ̀ ста́рца ꙗ҆́кѡ младе́нецъ прїѧ́ти сподо́бльсѧ, младе́нствꙋюща дѣ́лы благи́ми, ста́рца въ верте́пѣ тѧ̀ ᲂу҆чинѧ́етъ къ лꙋ́чшымъ.

На горѣ̀ и҆лїю̀ препита́вый вра́номъ, то́й тебѣ̀ а҆́гг҃ломъ пи́щꙋ посыла́етъ, тѧ̀ велича́ѧ, преподо́бне, того̀ возвели́чившаго.

Ꙗ҆́коже фі́нїѯъ, при и҆схо́дищахъ прозѧ́бъ водны́хъ воздержа́нїѧ, пи́щꙋ и҆мѣ́лъ є҆сѝ фі́нїки, пита́всѧ пи́щею болѣ́зней твои́хъ.

Видѣ̑нїи разширѧ́ѧсѧ, ѻ҆́тче, болѣ́зньми пита́лсѧ є҆сѝ воздержа́нїѧ: и҆ ны́нѣ полꙋчи́лъ є҆сѝ го́рнее благопита́нїе, ѻ҆нꙋ́фрїе.

Зе́млю до́льнꙋю преминꙋ́въ, небе́снꙋю стѧжа́лъ є҆сѝ жи́знь, и҆ безпло́тныхъ ликѡ́мъ счи́слилсѧ є҆сѝ, носѧ̀ пло́ть, ѻ҆нꙋ́фрїе блаже́нне, и҆ зе́млю кро́ткихъ наслѣ́довалъ є҆сѝ, ю҆́же тебѣ̀ подадѐ хрⷭ҇то́съ во вѣ́ки.

Слє́зныѧ ка̑пли гаси́ло стѧжа́лъ є҆сѝ вои́стиннꙋ, стра́стнымъ разгорѣ́нїемъ, и҆ любо́вїю ѻ҆гнѧ̀ бжⷭ҇твеннагѡ росѣ̀ совокꙋпи́лсѧ є҆сѝ безстра́стїѧ, хрⷭ҇тꙋ̀ бг҃ꙋ на́шемꙋ: тѣ́мже тѧ̀ чти́мъ, ѻ҆нꙋ́фрїе бг҃омꙋ́дре.

А҆́гг҃льскомꙋ житїю̀ поревнова́вша, непреста́нными моли́твами, рꙋко́ю а҆́гг҃ла свои̑мъ та́йнамъ прича́стника, ѻ҆́тче, хрⷭ҇то́съ тѧ̀ показа̀, вели́кагѡ совѣ́та вои́стиннꙋ а҆́гг҃лъ, є҆го́же превозно́симъ во вѣ́ки.

Взира̑нїи непреста́нными, ꙗ҆̀же къ бг҃ꙋ, ѻ҆́тче бг҃омꙋ́дре, ѡ҆божа́емь прича́стїемъ є҆гѡ̀, бы́лъ є҆сѝ бг҃ъ: и҆ со а҆́гг҃лы слꙋжѧ̀, сего̀ сла́виши при́снѡ.

Оу҆мертви́въ пло́ть, побѣди́лъ є҆сѝ врага̀: преста́вилсѧ є҆сѝ къ невече́рнѣй зарѝ, небе́сныхъ бла̑гъ ты̀ наслѣ́дникъ бы́въ, ѻ҆́тче ѻ҆нꙋ́фрїе.

Любо́вїю творѧ́щихъ ст҃ы́й тво́й пра́здникъ, ѿ всѧ́кагѡ треволне́нїѧ страсте́й мольба́ми твои́ми и҆збавлѧ́й при́снѡ ꙗ҆́кѡ дерзнове́нїе ѡ҆брѣ́тъ ᲂу҆ сп҃са, ѻ҆нꙋ́фрїе.