Канон святителю Мефодию, патриарху Константинопольскому

В посте́х, преподо́бне, порабоща́я те́ло твое́, ума́стил еси́ ду́шу твою́ восхожде́нии боже́ственными и пи́щу прия́л еси́ вы́шняго Ца́рства неиждива́емую.

Слове́сным мече́м вооружи́вся Ду́ха и, я́коже во броня́, ве́рою оде́явся, и му́жески еретико́в полки́ пресе́кл еси́, всеблаже́нне Мефо́дие о́тче.

Река́ приснотеку́щая Це́ркви бы́ша уста́ твоя́ боже́ственная, ерети́ческая моря́ я́ко вои́стинну, преподо́бне Мефо́дие, изсуша́я и напоя́я ве́рныя.

Тучено́сный бы́сть о́блак язы́к тво́й, Мефо́дие, сердца́ бо благочести́вых напоя́ющь сло́вом, нечести́вых же всегда́ подавля́ющь пле́велы.

Исправля́я ве́ры сло́во, ра́н иску́с прия́л еси́ и в мра́чней, о́тче, темни́це седе́ти осужде́н бы́л еси́. Те́мже к Све́ту невече́рнему преста́вился еси́, веселя́ся.

Му́чеников страда́ния воспе́л еси́, си́х причасти́лся еси́ неотъе́млемыя, о́тче, ра́дости, я́ко сугу́бо пострада́в непреста́нными скорбьми́ и ра́нами, Мефо́дие.

Му́дрости разу́мною ча́шею омочи́в устне́, о́тче, ре́ки на́м источи́л еси́ уче́ний, преподо́бне, благоче́стно творя́щим па́мять твою́.

Ты́ пропове́датель возжеле́нен, сла́док сло́вом, про́ст нра́вы, духо́вными дарова́нии, святи́телю преподо́бне, пребога́т яви́лся еси́, Мефо́дие.

Копие́м мы́сленным Боже́ственнаго Сло́ва е́же в ме́рзости ерети́честей су́щую пострека́в, уста́вил еси́ нече́стия на́глость, Мефо́дие.

Све́том просвеща́емь Трисо́лнечным, сла́вне, мра́чную и те́мную е́реси мглу́ благоче́стно отгна́л еси́ и звезда́ бы́л еси́, ве́рными блиста́я сия́нии.

Изощре́на тро́сть Ду́ха язы́к тво́й, я́ко скоропи́сца кни́жника, Мефо́дие, показа́ся, на скрижа́ли начерта́я серде́ц благода́ти Боже́ственный зако́н нело́жно.

Сле́зныя то́ки всено́щными стоя́нии, я́ко би́серие, нося́, преподо́бне, си́ми грехо́вныя пото́ки изсуши́л еси́ и Боже́ственнаго Ду́ха прия́телище яви́лся еси́ чи́сто.

Пчеле́ трудолю́бней поревнова́в, пи́сменныя собра́л еси́ цве́ты, я́коже в со́те, се́рдцем твои́м сие́ состроя́я и все́м источа́я реку́ уче́ний твои́х.

Слове́с духо́вных напо́лнився, язы́к тво́й, прему́дре, языкобо́лия низложи́ ху́льников, пропове́дающь Христо́во воплоще́ние почита́ти и плотско́е подо́бие.

Пе́рвее у́бо на седа́лищи ста́рец похвали́в Го́спода, на святи́тельсте престо́ле, напосле́док же возне́слся еси́ са́м, упа́с богоуго́дно избра́нныя, о́тче, сия́ лю́ди.

Росо́ю Боже́ственныя любве́ погаси́л еси́ страсте́й, пресла́вне, разжже́нную пе́щь, иску́шся же я́ко зла́то напа́стьми горни́лом, я́ко со́лнце, блистаеши.

Адама́нтское се́рдце в ско́рбех име́л еси́ и в гоне́ниих, Мефо́дие, и ны́не блиста́еши луча́ми небе́сными и огнедохнове́нными усты́, те́мже тя́ восхваля́ем.

Якоже необори́мь сто́лп, неподви́жимь пребы́л еси́ напа́стными прило́ги, пре́лести утвержде́ние низлага́я, святи́телю, си́лою твои́х слове́с, Мефо́дие преблаже́нне.

Ты́ низложи́л еси́ ерети́ческая шата́ния, е́же пои́стинне злочести́вая, и совозне́сл еси́ ве́рных Це́ркве, о́тче, ро́г, Христо́ву наказу́я ико́ну чести́, Мефо́дие. Те́мже тя́ пое́м и любо́вию почита́ем.

Тя́ звезду́ всесве́тлую Со́лнце показа́ Христо́с на тве́рди, прему́дре, церко́вней, и твои́ми сия́нии честны́х уче́ний концы́, о́тче, озари́л еси́ во вся́ ве́ки.

Твое́ сло́во, я́коже гро́м, Мефо́дие, возшуме́ на земли́, мамо́ны соде́йственника и роди́теля пре́лести, я́коже зми́я, связа́в, отсла́л еси́ тме́ ве́чней, я́ко су́ща насле́дника.

Святи́телей красота́, мона́хов удобре́ние, все́х ве́рных о́браз, Це́ркве па́стырь и правосла́вных степе́нь, ты́ еси́, Мефо́дие.

Илиину́ ре́вность стяжа́в, испо́лнил еси́ студа́ беззако́нныя иере́и, воплоще́ния Госпо́дня непокланя́ющихся о́бразу, му́дре Мефо́дие.

Лику́я со Ангелы пред лице́м Изба́вителя и сла́вы Его́ наслажда́яся, моли́твами твои́ми на́с от вся́ких искуше́ний изба́ви, Мефо́дие.