Православный календарь
Размер шрифта:

Ака́ѳістъ

А҆ка́ѳїстъ ст҃о́мꙋ прпⷣбномꙋ меѳо́дїю, и҆гꙋ́менꙋ пѣ́шношскомꙋ, чꙋдотво́рцꙋ.

Прп. Мефодия, игум. Песношского (1392) 27 июня 2026

Конда́къ а҃

И҆збра́нный ᲂу҆ченичѐ вели́кагѡ ᲂу҆чи́телѧ, бг҃оно́снагѡ чꙋдотво́рца се́ргїа, и҆ ди́вный подража́телю житїѧ̀ є҆гѡ̀ ст҃а́гѡ, прпⷣбне ѻ҆́ч҃е меѳо́дїе, пѣ́сньми восхвалѧ́емъ тѧ̀ съ любо́вїю, застꙋ́пника на́шего: ты́ же ꙗ҆́кѡ и҆мѣ́ѧй дерзнове́нїе ко гдⷭ҇ꙋ, моли́сѧ вы́нꙋ ѡ҆ сп҃се́нїи на́съ грѣ́шныхъ, ѿ всѧ́кихъ бѣ́дъ и҆збавлѧ́ѧ зовꙋ́щихъ тѝ:

Ра́дꙋйсѧ, прпⷣбне ѻ҆́тче на́шъ меѳо́дїе.

І҆́косъ а҃

А҆́гг҃лѡмъ любе́знꙋю чистотꙋ̀ ѿ ю҆́ности твоеѧ̀ возлюби́въ, прпⷣбне ѻ҆́тче меѳо́дїе, къ добродѣ́телей подви́жникꙋ, прпⷣбномꙋ се́ргїю, въ ѡ҆би́тель прите́клъ є҆сѝ, и҆ ѿ негѡ̀ во и҆́ночество ѡ҆блече́нный, подража́тель ре́вностный по́двигѡвъ є҆гѡ̀ бы́лъ є҆сѝ. тѣ́мже сла́вимъ тѧ̀ воззва̑нїи си́ми:

Ра́дꙋйсѧ, пꙋсты́ни до́брое прозѧбе́нїе: ра́дꙋйсѧ, ча́до и҆́стиннагѡ послꙋша́нїѧ.

Ра́дꙋйсѧ, є҆ѵⷢ҇лїа хрⷭ҇то́ва вѣ́рный послѣ́дователю: ра́дꙋйсѧ, за́повѣдей і҆и҃совыхъ ре́вностный и҆сполни́телю.

Ра́дꙋйсѧ, бг҃оно́снагѡ се́ргїа при́сный ᲂу҆ченичѐ: ра́дꙋйсѧ, добродѣ́телей є҆гѡ̀ наслѣ́дниче.

Ра́дꙋйсѧ, посто́мъ ᲂу҆мертви́вый въ себѣ̀ дꙋшетлѣ̑нныѧ стра̑сти: ра́дꙋйсѧ, мл҃твами ᲂу҆се́рдными ѿрази́вый всѧ̑ и҆скꙋшє́нїѧ дїа́вѡльскаѧ.

Ра́дꙋйсѧ, возше́дый на высотꙋ̀ соверше́нства дꙋхо́внагѡ: ра́дꙋйсѧ, прини́кїй во глꙋбинꙋ̀ смире́нїѧ ст҃а́гѡ.

Ра́дꙋйсѧ, сле́зъ твои́хъ тече́ньми ᲂу҆плодоноси́вый ни́вꙋ дꙋше́внꙋю: ра́дꙋйсѧ, и҆́же и҆з̾ глꙋбины̀ воздыха́нми прїѡбрѣты́й чистотꙋ̀ серде́чнꙋю.

Ра́дꙋйсѧ, прпⷣбне ѻ҆́тче на́шъ меѳо́дїе.

Конда́къ в҃

Ви́дѣвъ всеви́дѣцъ гдⷭ҇ь, благо́е дꙋшѝ твоеѧ̀ и҆зволе́нїе, ѻ҆́тче меѳо́дїе, є҆́же наединѣ̀ рабо́тати є҆мꙋ̀ въ безмо́лвїи пꙋсты́ннѣмъ, внꙋшѝ прпⷣбномꙋ се́ргїю бл҃гослови́ти тѧ̀ на ѡ҆со́бное пꙋсты́нное пребыва́нїе: ты́ же, бл҃гослове́нїе ст҃а́гѡ съ вѣ́рою прїе́мъ, въ пꙋсты́ню сꙋро́вꙋю, въ мѣста̀ бла̑тнаѧ и҆ непроходи̑маѧ ѿше́лъ є҆сѝ, и҆ та́мѡ посели́лсѧ є҆сѝ, є҆ди́нъ є҆ди́номꙋ бг҃ꙋ рабо́таѧ въ пѣ́нїихъ, бдѣ́нїихъ и҆ поще́нїихъ, немо́лчнѡ вопїѧ̀ є҆мꙋ̀: А҆ллилꙋ́їа.

І҆́косъ в҃

Разꙋмѣ́въ произволе́нїе бж҃їе, прпⷣбный се́ргїй, созда́тисѧ ѡ҆би́тели и҆́ночестѣй въ твое́й пꙋсты́ни, ѻ҆́ч҃е меѳо́дїе, прїи́де къ тебѣ̀ и҆ и҆збра̀ мѣ́сто, ᲂу҆до́бное на соѡрꙋже́нїе ѡ҆би́тели, є҆́же бл҃гослови́въ и҆ ѡ҆ст҃и́въ мл҃твою свое́ю, заповѣ́да тебѣ̀ ᲂу҆стро́ити та́мѡ кїнові́ю пꙋсты́ннꙋю: ты́ же за́повѣдь є҆гѡ̀ и҆спо́лнилъ є҆сѝ, и҆ въ соѡрꙋже́нїи хра́ма бж҃їѧ и҆ ѡ҆би́тели ᲂу҆се́рднѡ потрꙋди́лсѧ є҆сѝ. ѡ҆ се́мъ тѧ̀ хва́лимъ и҆ зове́мъ:

Ра́дꙋйсѧ, безмо́лвїѧ люби́телю, пꙋсты́ню по́двиги твои́ми ѡ҆ст҃и́вый: ра́дꙋйсѧ, жесто́кое пꙋсты́нное житїѐ проходи́вый.

Ра́дꙋйсѧ, ѱалмопѣ̑нїи немо́лчными бг҃а сла́вивый: ра́дꙋйсѧ, мл҃твы непреста̑нныѧ гдⷭ҇еви возноси́вый.

Ра́дꙋйсѧ, по́стниче не и҆знемога́ѧй, бы́лїемъ пꙋсты́ннымъ пита́выйсѧ: ра́дꙋйсѧ, трꙋдолю́бче нелицемѣ́рный, пра́здность возненави́дѣвый.

Ра́дꙋйсѧ, хꙋды̑ѧ и҆ многошвє́нныѧ ри̑зы носи́вый: ра́дꙋйсѧ, колѣнопреклонє́нїѧ мнѡ́гїѧ соверша́вый.

Ра́дꙋйсѧ, въ терпѣ́нїи и҆ смире́нїи преꙋспѣ́вый: ра́дꙋйсѧ, равноа́гг҃ленъ на землѝ бы́вый.

Ра́дꙋйсѧ, ѡ҆би́тель пꙋсты́ннꙋю многотрꙋ́днѡ соѡрꙋди́вый: ра́дꙋйсѧ, въ не́й мнѡ́гїѧ дꙋ́шы человѣ́ческїѧ хрⷭ҇тꙋ̀ ᲂу҆невѣ́стивый.

Ра́дꙋйсѧ, прпⷣбне ѻ҆́ч҃е на́шъ меѳо́дїе.

Конда́къ г҃

Си́лою бж҃їею ᲂу҆крѣплѧ́емый, меѳо́дїе прпⷣбне, трꙋды̀ вели́кїѧ под̾ѧ́лъ є҆сѝ при созида́нїи ѡ҆би́тели твоеѧ̀ пꙋсты́нныѧ, древеса̀ сѣкі́й и҆ зда̑нїѧ ѡ҆би́тели соѡрꙋжа́ѧ рꙋка́ма твои́ма, и҆ при́снѡ молѧ́сѧ ко гдⷭ҇ꙋ, да бл҃гослови́тъ дѣ́ло рꙋ́къ твои́хъ во сла́вꙋ и҆́мени є҆гѡ̀ ст҃а́гѡ, и҆ на сп҃се́нїе бли́жнихъ твои́хъ, и҆̀хже примѣ́ромъ твои́мъ наꙋчи́лъ є҆сѝ, нелѣ́ностнѡ возноси́ти хвале́бнꙋю пѣ́снь прест҃ѣ́й трⷪ҇цѣ: А҆ллилꙋ́їа.

І҆́косъ г҃

И҆мѣ́ѧ по́мыслъ чи́стъ и҆ непоро́чнꙋ дꙋ́шꙋ, ѻ҆́ч҃е меѳо́дїе, сщ҃е́нства бл҃года́ть досто́йнѡ воспрїѧ́лъ є҆сѝ, и҆ во и҆гꙋ́мена ѡ҆би́тели твоеѧ̀ поста́вленный, ре́вностнѡ подвиза́лсѧ є҆сѝ ѡ҆ сп҃се́нїи дꙋше́внѣмъ бг҃омъ врꙋче́ннагѡ тебѣ̀ ста́да слове́сныхъ ѻ҆ве́цъ. сегѡ̀ ра́ди слы́шиши ѿ на́съ бл҃гохвалє́нїѧ такова̑ѧ:

Ра́дꙋйсѧ, непоро́чный ѻ҆лтарѧ̀ гдⷭ҇нѧ слꙋжи́телю: ра́дꙋйсѧ, досто́йный та́инствъ бжⷭ҇твенныхъ соверши́телю.

Ра́дꙋйсѧ, прпⷣбныѧ рꙋ́цѣ твоѝ со дерзнове́нїемъ горѣ̀ воздѣѧ́вый: ра́дꙋйсѧ, мл҃твы бл҃гоꙋмиле́нныѧ ᲂу҆ прⷭ҇то́ла бж҃їѧ приноси́вый.

Ра́дꙋйсѧ, ᲂу҆чи́телю бл҃гоче́стїѧ: ра́дꙋйсѧ, наста́вниче бг҃омꙋ́дрїѧ.

Ра́дꙋйсѧ, дре́во бл҃госѣнноли́ственное, при вода́хъ пꙋсты́нныхъ возра́стшее: ра́дꙋйсѧ, плоды̀ сла̑дкїѧ хрⷭ҇тꙋ̀ принесы́й.

Ра́дꙋйсѧ, сотвори́вый и҆ наꙋчи́вый, и҆ ве́лїй нарече́нный во црⷭ҇твїи нбⷭ҇нѣмъ: ра́дꙋйсѧ, за по́двиги вре́меннагѡ житїѧ̀ ѡ҆брѣты́й поко́й вѣ́чный.

Ра́дꙋйсѧ, сп҃се́нїѧ мно́гихъ дꙋ́шъ человѣ́ческихъ вино́вниче: ра́дꙋйсѧ, а҆гг҃лонра́вный человѣ́че.

Ра́дꙋйсѧ, прпⷣбне ѻ҆́ч҃е на́шъ меѳо́дїе.

Конда́къ д҃

Бꙋ́рю многомѧте́жнꙋю жите́йскагѡ мо́рѧ безбѣ́днѡ преше́дъ є҆сѝ, прпⷣбне, и҆ въ при́стань безстра́стїѧ дости́глъ є҆сѝ, ѡ҆кормлѧ́емь за́повѣдьми хрⷭ҇та̀ бг҃а, ꙗ҆́же бы́ша свѣти́льникъ нога́мъ твои̑мъ, и҆ свѣ́тъ стезѧ́мъ твои̑мъ. тѣ́мже ны́нѣ въ го́рнихъ ѻ҆би́телехъ водворѧ́ешисѧ, и҆ сла́дцѣ пое́ши трїеди́номꙋ бг҃ꙋ: А҆ллилꙋ́їа.

І҆́косъ д҃

Слы́шавше мно́зи ѡ҆ бг҃оꙋго́днѣмъ житїѝ твое́мъ, ѻ҆́ч҃е меѳо́дїе, прихожда́хꙋ къ тебѣ̀, ѻ҆́ви послꙋ́шати поꙋче́нїй твои́хъ дꙋшеполе́зныхъ, ѻ҆́ви же сожи́тельствовати тебѣ̀ въ ѡ҆би́тели твое́й пꙋсты́ннѣй, и҆́хже ты̀ съ ѻ҆те́ческою любо́вїю прїе́млѧ, рꙋково́дствовалъ є҆сѝ стезе́ю пра́вою ко сп҃се́нїю, ꙗ҆́кѡ всѣ̑мъ зва́ти тебѣ̀:

Ра́дꙋйсѧ, пра́вило вѣ́ры и҆́стинныѧ: ра́дꙋйсѧ, ѡ҆́бразе кро́тости дꙋхѡ́вныѧ.

Ра́дꙋйсѧ, человѣ́че бж҃їй, прпⷣбїемъ ᲂу҆краше́нный: ра́дꙋйсѧ, во́ине хрⷭ҇то́въ, полкѝ неви́димыхъ врагѡ́въ побѣди́вый.

Ра́дꙋйсѧ, мі́ра до́льнѧгѡ мꙋ́дрый стра́нниче: ра́дꙋйсѧ, въ добродѣ́телѣхъ бл҃гоискꙋ́сный подви́жниче.

Ра́дꙋйсѧ, вели́кихъ пꙋстынножи́телей вѣ́рный подража́телю: ра́дꙋйсѧ, дре́внихъ бг҃оно́сныхъ ѻ҆тє́цъ ре́вностный послѣ́дователю.

Ра́дꙋйсѧ, прпⷣбнагѡ се́ргїа нра́вы себѣ̀ ᲂу҆сво́ивый: ра́дꙋйсѧ, тогѡ̀ житїю̀ бг҃оꙋго́дномꙋ поревнова́вый.

Ра́дꙋйсѧ, сыно́внюю любо́вь къ немꙋ̀ стѧжа́вый: ра́дꙋйсѧ, и҆ ѿ негѡ̀ ѕѣлѡ̀ возлю́бленный.

Ра́дꙋйсѧ, прпⷣбне ѻ҆́тче на́шъ меѳо́дїе.

Конда́къ є҃

Бг҃оте́чное свѣти́ло бы́въ, всѣ́хъ къ сл҃нцꙋ пра́вды хрⷭ҇тꙋ̀ пꙋтеводи́лъ є҆сѝ, ᲂу҆го́дниче бж҃їй, сло́вомъ и҆ приме́ромъ житїѧ̀ твоегѡ̀ ст҃а́гѡ, є҆́же всѐ посщ҃е́но бы́сть на слꙋже́нїе бг҃ꙋ и҆ бли̑жнимъ твои̑мъ: ни́щыѧ и҆ безкрѡ́вныѧ пита́лъ є҆сѝ въ ѡ҆би́тели твое́й щедролю́бнѡ, и҆ рꙋка̀ твоѧ̀ никогда́же ѡ҆скꙋдѣ̀ на подаѧ́нїе ми́лостыни тоѧ̀ тре́бꙋющымъ. тѣ́мже бл҃же́нство ми́лостивыхъ ᲂу҆наслѣ́довалъ є҆сѝ, прпⷣбне ѻ҆́тче, и҆ со ст҃ы́ми пое́ши вѣ́чнѡ хвале́бнꙋю пѣ́снь сп҃си́телю бг҃ꙋ: А҆ллилꙋ́їа.

І҆́косъ є҃

Ви́димъ тѧ̀, прпⷣбне ѻ҆́тче меѳо́дїе, дости́гшаго въ мꙋ́жа соверше́нна ѡ҆ хрⷭ҇тѣ̀ и҆ преиспо́лненнаго дарова́нїй бжⷭ҇твенныхъ, въ є҆ѵⷢ҇лїи хрⷭ҇то́вомъ ѡ҆бѣтова́нныхъ вѣ̑рнымъ послѣ́дователємъ вопло́щшагѡсѧ бг҃а сло́ва. тѣ́мже чꙋдѧ́щесѧ твои̑мъ по́двигѡмъ, вопїе́мъ тѝ хвале́бнѡ:

Ра́дꙋйсѧ, бл҃же́нный и҆ска́телю бла̑гъ вѣ́чныхъ и҆ нетлѣ́нныхъ: ра́дꙋйсѧ, неꙋсы́пный дѣ́лателю вїногра́да хрⷭ҇то́ва.

Ра́дꙋйсѧ, ѡ҆брѣты́й во глꙋбинꙋ̀ се́рдца твоегѡ̀ би́серъ драгі́й гдⷭ҇а і҆и҃са: ра́дꙋйсѧ, и҆́мѧ є҆гѡ̀ бжⷭ҇твенное вы́нꙋ и҆мѣ́вый во ᲂу҆ста́хъ и҆ въ се́рдце твое́мъ.

Ра́дꙋйсѧ, и҆́скреннѡ возлюби́вый и҆́го хрⷭ҇то́во благо́е и҆ ле́гкое: ра́дꙋйсѧ, терпѣли́вѡ носи́вый крⷭ҇тъ скорбе́й и҆ лише́нїй пꙋсты́нныхъ.

Ра́дꙋйсѧ, а҆лка́вый и҆ жажда́вый на землѝ, ны́нѣ же насыща́ѧйсѧ нетлѣ́нныѧ пи́щи на нб҃сѝ: ра́дꙋйсѧ, нищетꙋ̀ храни́вый, да ѡ҆богати́шисѧ да́ры бжⷭ҇твенными.

Ра́дꙋйсѧ, до́брый настоѧ́телю ѻ҆бщежи́тїѧ и҆́ноческагѡ: ра́дꙋйсѧ, бл҃гоискꙋ́сный врачꙋ̀ болѣ́знꙋющихъ грѣхмѝ.

Ра́дꙋйсѧ, ѻ҆те́чески возлюби́вый всю̀ ѡ҆ хрⷭ҇тѣ̀ бра́тїю твою̀: ра́дꙋйсѧ, ᲂу҆чи́вый бл҃говре́меннѡ и҆ безвре́меннѡ ча̑да твоѧ̑ дꙋхѡ́внаѧ бг҃оꙋгожде́нїю и҆́стинномꙋ.

Ра́дꙋйсѧ, прпⷣбне ѻ҆́тче на́шъ меѳо́дїе.

Конда́къ ѕ҃

Проповѣ́дникъ бы́лъ є҆сѝ є҆ѵⷢ҇льскихъ добродѣ́телей бра́тїи твое́й, прпⷣбне ѻ҆́тче меѳо́дїе, и҆ ча̑да твоѧ̑ дꙋхѡ́внаѧ вѣ́рнѡ рꙋководи́лъ є҆сѝ къ сїѡ́нꙋ, и҆дѣ́же є҆́сть жили́ще всѣ́хъ сп҃се́нныхъ милосе́рдїемъ хрⷭ҇та̀ бг҃а, прише́дшагѡ въ мі́ръ сп҃стѝ па́дшее человѣ́чество, и҆ да́вшагѡ своѧ̑ спаси́тєльныѧ за́пѡвѣди во сп҃се́нїе всѣ̑мъ, и҆́же подо́бнѡ тебѣ̀ возлюби́ша є҆гѡ̀ се́рдцемъ чи́стымъ, и҆ навыко́ша пѣ́ти є҆мꙋ̀: А҆ллилꙋ́їа.

І҆́косъ ѕ҃

Возсїѧ́въ въ пꙋсты́ни твое́й ꙗ҆́кѡ бг҃освѣ́тлое свѣти́ло, ѻ҆́тче меѳо́дїе, свѣ́томъ до́брыхъ дѣ́лъ твои́хъ ѡ҆зари́лъ є҆сѝ дꙋ́шы и҆ сердца̀ человѣ́кѡвъ, и҆ска́вшихъ ѿ тебѣ̀ наста́витисѧ во сп҃се́нїе. мно́зи бо вѣ́дѧхꙋ тѧ̀ равноа́гг҃льна житїе́мъ, и҆ прихожда́хꙋ къ тебѣ̀, да слы́шатъ ѿ тебѣ̀ глаго́лы живота̀ вѣ́чнагѡ. тебѣ̀ ᲂу҆̀бо, ст҃о́мꙋ ᲂу҆чи́телю нбⷭ҇ныѧ и҆́стины, сотвори́вшемꙋ и҆ наꙋчи́вшемꙋ, и҆ мы̀ смире́ннїи зове́мъ хвале́бнѡ:

Ра́дꙋйсѧ, є҆ѵⷢ҇лїа хрⷭ҇то́ва немо́лчный проповѣ́дниче: ра́дꙋйсѧ, а҆пⷭ҇льскихъ преда́нїй ре́вностный храни́телю.

Ра́дꙋйсѧ, правосла́вїѧ ст҃ы́ѧ догма́ты въ дꙋшѝ твое́й до́брѣ ᲂу҆тверди́вый: ра́дꙋйсѧ, вѣ́рою пра́вою и҆ дѣ́лы благи́ми бг҃ꙋ ᲂу҆годи́вый.

Ра́дꙋйсѧ, во слѣ́дъ себѣ̀ ко хрⷭ҇тꙋ̀ приведы́й собо́ръ ᲂу҆ченикѡ́въ твои́хъ: ра́дꙋйсѧ, съ ни́ми, ꙗ҆́кѡ ѻ҆тє́цъ со ча́ды, возше́дый прїѧ́ти мздꙋ̀ нбⷭ҇нꙋю ѿ гдⷭ҇а.

Ра́дꙋйсѧ, не сокры́вый тала́нтъ, тебѣ̀ врꙋче́нный всевы́шнимъ домовлⷣкою: ра́дꙋйсѧ, кꙋ́плю мно́гꙋ и҆́мъ сотвори́вый, сп҃се́нїе дꙋ́шъ человѣ́ческихъ.

Ра́дꙋйсѧ, твои́ми бо ᲂу҆че́нми грѣ́шнїи покаѧ́нїемъ бг҃ꙋ ᲂу҆годи́ша: ра́дꙋйсѧ, твои́ми бо наставле́ньми заблꙋ́ждшїи пра́вый пꙋ́ть сп҃се́нїѧ ѡ҆брѣто́ша.

Ра́дꙋйсѧ, бли̑жнїѧ твоѧ̑ и҆́скреннѡ возлюби́вый: ра́дꙋйсѧ, сп҃се́нїю и҆́хъ дꙋше́вномꙋ ᲂу҆се́рднѡ послꙋжи́вый.

Ра́дꙋйсѧ, прпⷣбне ѻ҆́тче на́шъ меѳо́дїе.

Конда́къ з҃

Хотѣ́нїе є҆ди́но и҆мѣ́лъ є҆сѝ, прпⷣбне ѻ҆́тче, є҆́же бг҃ꙋ бл҃гоꙋгожда́ти, и҆ сп҃се́нїю дꙋше́вномꙋ бли́жнихъ твои́хъ бл҃гоче́стнѡ слꙋжи́ти: тѣ́мже ѡ҆би́тель твоѧ̀ ст҃а́ѧ бы́сть приста́нище бл҃гоꙋти́шное всѧ́комꙋ человѣ́кꙋ, треволне́нїемъ мо́рѧ жите́йскагѡ ᲂу҆томле́нномꙋ. ты́ бо, ꙗ҆́кѡ ко́рмчїй бо́дрый, всѧ̑ ᲂу҆ченикѝ твоѧ̑ наставлѧ́лъ є҆сѝ сло́вомъ и҆ примѣ́ромъ твои́мъ, вдалѝ мі́ра и҆ є҆гѡ̀ сꙋе́тъ, се́рдцемъ и҆ ᲂу҆сты̀ немо́лчнѡ возглаша́ти бг҃ꙋ: А҆ллилꙋ́їа.

І҆́косъ з҃

Но́ваго тѧ̀ а҆нтѡ́нїа вели́каго, наста́вника дꙋшесп҃си́тельнагѡ, позна́вше, прпⷣбне ѻ҆́тче, въ пꙋсты́ннѣй ѡ҆би́тели твое́й, сла́вныѧ во́ды мо́рѧ жите́йскагѡ безбѣ́днѡ преше́дшаго, и҆ въ приста́нище безстра́стїѧ дости́гшагѡ, къ немꙋ́же и҆ ча̑да твоѧ̑ дꙋхѡ́внаѧ бл҃гопрїѧ́тнѡ приводи́лъ є҆сѝ, нелѣ́ностнѡ и҆ ᲂу҆се́рднѡ рабо́тати гдⷭ҇еви въ прпⷣбїи и҆ чистотѣ̀, наꙋчи́хомсѧ зва́ти тебѣ̀:

Ра́дꙋйсѧ, крі́не пꙋсты́ннагѡ прозѧбе́нїѧ: ра́дꙋйсѧ, мѵ́ро хрⷭ҇то́ва бл҃гоꙋха́нїѧ.

Ра́дꙋйсѧ, пꙋсты́ню дꙋхо́внѡ ᲂу҆плодоноси́вый: ра́дꙋйсѧ, селе́нїе и҆́ноческое въ не́й возгради́вый.

Ра́дꙋйсѧ, ча̑да послꙋша́нїѧ и҆ смире́нїѧ въ не́й насели́вый: ра́дꙋйсѧ, ѻ҆тє́цъ чадолюби́вый ᲂу҆ченикѡ́мъ твои̑мъ бы́вый.

Ра́дꙋйсѧ, па́ствꙋ твою̀ слове́снꙋю ᲂу҆пасы́й на па́житехъ живоно́сныхъ є҆ѵⷢ҇лїа хрⷭ҇то́ва: ра́дꙋйсѧ, ѡ҆би́тель твою̀ пꙋсты́ннꙋю созида́вый по преда́нїю ст҃ы́хъ и҆ бг҃оно́сныхъ ѻ҆тє́цъ.

Ра́дꙋйсѧ, прпⷣбнагѡ се́ргїа пра̑вила и҆ ᲂу҆ста̑вы себѣ̀ ᲂу҆сво́ивый: ра́дꙋйсѧ, є҆гѡ̀ бл҃гослове́нїемъ и҆ мл҃твою ѡ҆свѧще́нный.

Ра́дꙋйсѧ, ди́вный ᲂу҆ченичѐ ди́внагѡ ᲂу҆чи́телѧ: ра́дꙋйсѧ, соверше́нный подража́телю соверше́ннагѡ ѡ҆ хрⷭ҇тѣ̀ ѻ҆ц҃а̀ твоегѡ̀ дꙋхо́внагѡ.

Ра́дꙋйсѧ, прпⷣбне ѻ҆́тче на́шъ меѳо́дїе.

Конда́къ и҃

Стра́нника и҆ прише́льца въ мі́рѣ се́мъ помышлѧ́лъ є҆сѝ себѐ бы́ти, меѳо́дїе пребл҃же́нне, тѣ́мже ѡ҆ бога́тствѣ земно́мъ всѧ́кое попече́нїе ѿложи́лъ є҆сѝ, и҆ ѡ҆би́тель твою̀ во ᲂу҆бо́жествѣ ѕѣ́льнѣмъ созида́лъ є҆сѝ, всѧ́кое стѧжа́нїе сꙋ́етное въ не́й возбранѧ́ѧ, ни́щыѧ же и҆ ᲂу҆бѡ́гїѧ ѿ трапе́зы твоеѧ̀ щедролю́бнѡ пита́лъ є҆сѝ, раздѣлѧ́ѧ хлѣ́бъ тво́й съ неимꙋ́щею бра́тїею, въ и҆́хже лицѣ̀ самомꙋ̀ хрⷭ҇тꙋ̀ слꙋжи́лъ є҆сѝ, зовы́й є҆мꙋ̀ ѿ любвѐ те́плыѧ: А҆ллилꙋ́їа.

І҆́косъ и҃

Ве́сь въ бз҃ѣ бы́въ, ѻ҆́тче прпⷣбне, ѡ҆ бз҃ѣ и҆ ᲂу҆гожде́нїи є҆мꙋ̀, при́снѡ бесѣ́довалъ є҆сѝ со ᲂу҆ченикѝ твои́ми, и҆ слє́зы мнѡ́гїѧ и҆злива́лъ є҆сѝ ѿ ѻ҆че́съ твои́хъ при бесѣ́дахъ си́хъ, ᲂу҆молѧ́ѧ ча̑да твоѧ̑ дꙋхѡ́внаѧ, ничто́же предпочита́ти па́че любвѐ хрⷭ҇то́вы. помина́юще ᲂу҆̀бо таковы̑ѧ твоѧ̑ дꙋшесп҃си́тєльныѧ бесѣ́ды, зове́мъ тѝ си́це:

Ра́дꙋйсѧ, ти́хостїю слове́съ твои́хъ грѣ́шники на покаѧ́нїе наста́вивый: ра́дꙋйсѧ, бл҃гоꙋмиле́нною бесѣ́дою твое́ю миролю́бцы ко хрⷭ҇тꙋ̀ ѡ҆брати́вый.

Ра́дꙋйсѧ, наставле́ньми твои́ми бг҃омꙋ́дрыми сластолю́бцы воздержа́нїю наꙋчи́вый: ра́дꙋйсѧ, нищелю́бецъ соверше́нный бы́вый.

Ра́дꙋйсѧ, бл҃же́нство ни́щыхъ дх҃омъ ᲂу҆наслѣ́дивый: ра́дꙋйсѧ, ѡ҆́бразъ соверше́нства ѡ҆ хрⷭ҇тѣ̀ въ себѣ̀ ꙗ҆ви́вый.

Ра́дꙋйсѧ, ни́щыѧ пита́вый и҆ ᲂу҆покоева́вый въ твое́й ѡ҆би́тели: ра́дꙋйсѧ, во дни̑ гла́да всѣ̑мъ приходи́вшымъ къ тебѣ̀ пи́щꙋ подава́вый.

Ра́дꙋйсѧ, послѣ̑днїѧ ᲂу҆крꙋ́хи хлѣ́ба твоегѡ̀ съ неимꙋ́щими раздѣлѧ́ти возжела́вый: ра́дꙋйсѧ, любо́вь твою̀ къ бг҃ꙋ, любо́вїю къ бли̑жнимъ твои̑мъ свидѣ́тельствовавый.

Ра́дꙋйсѧ, бг҃омъ возлю́бленный и҆ бли́жними твои́ми бл҃гословлѧ́емый: ра́дꙋйсѧ, похвала́ми мл҃твенными до дне́сь въ ѡ҆би́тели твое́й почита́емый.

Ра́дꙋйсѧ, прпⷣбне ѻ҆́тче на́шъ меѳо́дїе.

Конда́къ ѳ҃

Всѣ̑мъ приходи́вшымъ въ ѡ҆би́тель твою̀ ст҃ꙋ́ю, мл҃твы и҆ бл҃гослове́нїѧ ра́ди, прпⷣбне ѻ҆́тче, ди́внѡ бы́сть ви́дѣти тѧ̀, въ раздра́ннѣй и҆ многошве́нной ри́зѣ ходи́вшаго, и҆ ѕѣлѡ̀ ни́щетнѡ въ ке́ллїи твое́й пребыва́вшаго, ѻ҆ба́че ты̀ всѣ́хъ ра́вною любо́вїю принима́лъ є҆сѝ, бога́тыхъ и҆ ᲂу҆бо́гихъ, вельмо́жъ и҆ просты́хъ, и҆ коемꙋ́ждо сло́во на по́льзꙋ дꙋше́внꙋю и҆зрека́лъ є҆сѝ, поꙋча́ѧ и҆̀хъ бл҃гоче́стнѡ слꙋжи́ти и҆ бл҃гоꙋгожда́ти бг҃ꙋ, вѣ́рою пра́вою и҆ дѣ́лы благи́ми, и҆ зва́ти є҆мꙋ̀: А҆ллилꙋ́їа.

І҆́косъ ѳ҃

Вѣті́й премꙋ́дрыхъ превзоше́лъ є҆сѝ, прпⷣбне ѻ҆́тче, бл҃года́тнымъ пома́занїемъ слове́съ твои́хъ, и҆́миже грѣ̑шныѧ на покаѧ́нїе приводи́лъ є҆сѝ, ка́ющыѧсѧ ᲂу҆цѣломꙋ́дрилъ є҆сѝ, подвиза́ющыѧсѧ въ добродѣ́тели ᲂу҆крѣпи́лъ є҆сѝ, и҆ всѣ̑мъ пꙋ́ть сп҃си́тельный ко хрⷭ҇тꙋ̀ показа́лъ є҆сѝ, по немꙋ́же са́мъ неꙋкло́ннѡ ше́ствовалъ є҆сѝ до бл҃же́нныѧ твоеѧ̀ кончи́ны, досто́йный вои́стиннꙋ похва́лъ таковы́хъ:

Ра́дꙋйсѧ, написа́вый на скрижа́лехъ се́рдца твоегѡ̀ зако́нъ хрⷭ҇то́въ: ра́дꙋйсѧ, ѿ глꙋбины̑ серде́чныѧ и҆зноси́вый дѡ́браѧ и҆ дꙋшеспаси́тєльнаѧ наставлє́нїѧ человѣ́кѡмъ.

Ра́дꙋйсѧ, ꙗ҆́кѡ бы́ша словеса̀ твоѧ̑ ме́да сладча̑йша жа́ждавшымъ ᲂу҆че́нїѧ дх҃о́внагѡ: ра́дꙋйсѧ, ꙗ҆́кѡ твои́ми наставле́ньми сп҃со́шасѧ мно́зи.

Ра́дꙋйсѧ, главо̀ ст҃а́ѧ, бл҃года́тїю бж҃їею ѡ҆сѣне́ннаѧ: ра́дꙋйсѧ, проповѣ́дниче сладкоглаго́ливый, вѣща́вый словеса̀ жи́зни вѣ́чныѧ.

Ра́дꙋйсѧ, пꙋсты́нный граждани́не, гра́ды и҆ вѣ́си напо́лнивый сла́вою твои́хъ по́двигѡвъ: ра́дꙋйсѧ, ма́слино бж҃їѧ бл҃гослове́нїѧ, є҆ѧ́же плоды̀ напита́шасѧ вѣ́рнїи.

Ра́дꙋйсѧ, приведы́й ко хрⷭ҇тꙋ̀ ᲂу҆ченикѝ твоѧ̑, въ добродѣ́телѣхъ преꙋспѣ́вшыѧ: ра́дꙋйсѧ, ᲂу҆гото́вавый ᲂу҆че́нми твои́ми гдⷭ҇еви подви́жники совершє́нныѧ.

Ра́дꙋйсѧ, воево́до бл҃гоискꙋ́сный полка̀ и҆́ноческагѡ: ра́дꙋйсѧ, рꙋководи́телю предо́брый пꙋстынножи́телей.

Ра́дꙋйсѧ, прпⷣбне ѻ҆́тче на́шъ меѳо́дїе.

Конда́къ і҃

Сп҃се́нїѧ наде́ждꙋ стѧжа́лъ є҆сѝ при и҆схо́дѣ твое́мъ, прпⷣбне ѻ҆́тче меѳо́дїе, и҆ ꙗ҆́кѡ пшени́ца зрѣ́лаѧ, во вре́мѧ пожа́таѧ, кончи́ною благо́ю пресели́лсѧ є҆сѝ ѿ землѝ въ ѡ҆би́тєли гѡ́рнїѧ, прїѧ́ти мздꙋ̀ ѿ рꙋкѝ пра́веднагѡ мздовоздаѧ́телѧ хрⷭ҇та̀, и҆́же вчинѝ дꙋ́шꙋ твою̀ со дꙋ́си ст҃ы́хъ, немо́лчнѡ возглаша́ющихъ пред̾ прⷭ҇то́ломъ сла́вы є҆гѡ̀, побѣ́днꙋю пѣ́снь: А҆ллилꙋ́їа.

І҆́косъ і҃

Цр҃ѧ̀ нбⷭ҇нагѡ хрⷭ҇та̀ вѣ́рный ра́бъ и҆ послѣ́дователь бы́лъ є҆сѝ, ѻ҆́тче меѳо́дїе, тѣ́мже по нело́жномꙋ є҆гѡ̀ глаго́лꙋ: и҆дѣ́же є҆́смь а҆́зъ, тꙋ̀ и҆ слꙋга̀ мо́й бꙋ́детъ, мы̀ чтꙋ́щїи тѧ̀, вѣ́рꙋемъ несомнѣ́ннѡ, ꙗ҆́кѡ ты̀ со хрⷭ҇то́мъ въ ѡ҆би́телехъ бл҃же́нства вѣ́чнагѡ водворѧ́ешисѧ, и҆ ра́дости нетлѣ́нныѧ наслажда́ешисѧ, ꙗ҆́кѡ и҆́стинный тогѡ̀ ᲂу҆го́дникъ, ѿ на́съ же слы́шиши бл҃гохвалє́нїѧ сїѧ̑:

Ра́дꙋйсѧ, ра́достнѡ преда́вый дꙋ́шꙋ твою̀ въ рꙋ́цѣ бж҃їи: ра́дꙋйсѧ, ст҃ꙋ́ю кончи́нꙋ полꙋчи́вый въ возме́здїе твои̑мъ по́двигѡмъ.

Ра́дꙋйсѧ, пресели́выйсѧ ѿ землѝ къ ѡ҆би́телємъ нбⷭ҇нымъ: ра́дꙋйсѧ, та́мѡ со ст҃ы́ми наслажда́ѧйсѧ бл҃же́нства вѣ́чнагѡ.

Ра́дꙋйсѧ, со а҆́гг҃льскими во́и воспѣва́ѧй творца̀ а҆́гг҃лѡвъ и҆ человѣ́кѡвъ: ра́дꙋйсѧ, ѿкрове́ннымъ лице́мъ созерца́ѧй сла́вꙋ трисїѧ́ннагѡ бж҃ества̀.

Ра́дꙋйсѧ, тѣ́ломъ сме́ртнымъ въ ѡ҆би́тели твое́й погребе́нный: ра́дꙋйсѧ, дꙋше́ю безсме́ртною къ сїѡ́нꙋ го́рнемꙋ воспари́вый.

Ра́дꙋйсѧ, пла́чь неꙋтѣ́шенъ ᲂу҆ченикѡ́мъ твои̑мъ кончи́ною твое́ю сотвори́вый: ра́дꙋйсѧ, слеза́ми те́плыми ѿ ни́хъ почте́нный.

Ра́дꙋйсѧ, во гро́бѣ смире́ннѣмъ ѿ ни́хъ съ любо́вїю положе́нный: ра́дꙋйсѧ, чꙋдесы̀ мно́гими просла́вленный.

Ра́дꙋйсѧ, прпⷣбне ѻ҆́тче на́шъ меѳо́дїе.

Конда́къ а҃і

Пѣ́нїе прест҃ѣ́й трⷪ҇це горѣ̀ прино́сиши, прпⷣбне ѻ҆́тче на́шъ меѳо́дїе, и҆ ѡ҆ ѡ҆би́тели твое́й ст҃ѣ́й, и҆ подвиза́ющихсѧ въ не́й, при́снѡ хода́тайствꙋеши, просѧ̀ ми́ра свы́ше, и҆ бл҃гопоспеше́нїѧ во все́мъ благо́мъ ча́дѡмъ твои̑мъ дꙋхѡ́внымъ, ѿ ни́хже почита́ешисѧ достодо́лжными похвалы̑, съ пѣ́нїемъ трїеди́номꙋ бг҃ꙋ: А҆ллилꙋ́їа.

І҆́косъ а҃і

Свѣти́льника тѧ̀ до́брыхъ дѣ́лъ, прпⷣбне ѻ҆́тче, и҆сповѣ́дꙋемъ бы́ти, и҆ прославлѧ́емъ просла́вльшаго тѧ̀ гдⷭ҇а, и҆́же чꙋдесы̀ мно́гими гро́бъ тво́й ѡ҆зна́менова: стрꙋѝ бо и҆сцѣле́нїй бл҃года́тныхъ и҆сточа́еши ѿ негѡ̀ недꙋ́жнымъ, и҆ подвиза́еши вѣ̑рныѧ вопи́ти тебѣ̀:

Ра́дꙋйсѧ, земны́й а҆́гг҃ле и҆ нбⷭ҇ный человѣ́че: ра́дꙋйсѧ, безме́зднагѡ врачева́нїѧ и҆сто́чниче.

Ра́дꙋйсѧ, сокро́вищница дарѡ́въ бж҃їѧ блгⷣти: ра́дꙋйсѧ, ми́ра многоцѣле́бнагѡ преиспо́лненный фїа́ле.

Ра́дꙋйсѧ, ѿ го́рнихъ высо́тъ къ земнорѡ́днымъ ми́лостивѡ приника́ѧй: ра́дꙋйсѧ, ѿ ра́ки твоеѧ̀ ст҃ы́ѧ и҆сцѣле́нїѧ ѡ҆би́льнѡ подава́ѧй.

Ра́дꙋйсѧ, скорбѧ́щихъ ᲂу҆тѣ́шителю: ра́дꙋйсѧ, болѧ́щихъ цѣли́телю.

Ра́дꙋйсѧ, ᲂу҆ныва́ющихъ ѡ҆бодри́телю: ра́дꙋйсѧ, бѣ́дствꙋющихъ и҆зба́вителю.

Ра́дꙋйсѧ, въ со́нїихъ и҆ видѣ́нїихъ вѣ̑рныѧ посѣща́ѧй: ра́дꙋйсѧ, ѡ҆би́тель твою̀ ст҃ꙋ́ю ѿ всѧ́кихъ бѣ́дъ соблюда́ѧй.

Ра́дꙋйсѧ, прпⷣбне ѻ҆́тче на́шъ меѳо́дїе.

Конда́къ в҃і

Блгⷣть гдⷭ҇ню и҆спросѝ на́мъ, прпⷣбне ѻ҆́тче меѳо́дїе, почита́ющымъ съ любо́вїю ст҃ꙋ́ю па́мѧть твою̀, и҆ ᲂу҆се́рднѡ притека́ющымъ къ честнѣ́й ра́цѣ моще́й твои́хъ, ѿ неѧ́же чꙋдє́снаѧ и҆сцѣлє́нїѧ подае́ши недꙋ́жнымъ. тѣ́мже тебѣ̀, чꙋдотворе́нїѧ да́ромъ ѿ гдⷭ҇а просла́вленномꙋ, прилѣ́жнѡ мо́лимсѧ: и҆сцѣлѝ на́шѧ недꙋ̑ги дꙋшє́вныѧ и҆ тѣлє́сныѧ, и҆ помозѝ на́мъ предста́тельствомъ твои́мъ сп҃се́нїе вѣ́чное полꙋчи́ти, да вкꙋ́пѣ съ тобо́ю воспое́мъ ди́вномꙋ во ст҃ы́хъ свои́хъ бг҃ꙋ: А҆ллилꙋ́їа.

І҆́косъ в҃і

Пою́ще по́двиги твоѧ̑, прпⷣбне ѻ҆́тче, ᲂу҆бл҃жа́емъ равноа́гг҃льное житїѐ твоѐ, диви́мсѧ мнѡ́гимъ чꙋдотворе́нїємъ твои̑мъ, моли́твеннѡ почита́емъ ст҃ꙋ́ю па́мѧть твою̀, и҆ припа́дающе къ ра́цѣ моще́й твои́хъ, ᲂу҆ми́льнѡ глаго́лемъ:

Ра́дꙋйсѧ, прест҃ы́ѧ трⷪ҇цы вѣ́рный слꙋжи́телю: ра́дꙋйсѧ, прест҃ы́ѧ бцⷣы досто́йный предстоѧ́телю.

Ра́дꙋйсѧ, а҆́гг҃льскихъ ликѡ́въ собесѣ́дниче: ра́дꙋйсѧ, всѣ́хъ ст҃ы́хъ сожи́телю.

Ра́дꙋйсѧ, пꙋстынножи́телей сла́во и҆ похвало̀: ра́дꙋйсѧ, рѡссі́йскагѡ ца́рства дꙋхо́вное ᲂу҆краше́нїе.

Ра́дꙋйсѧ, ст҃ы́ѧ ѡ҆би́тели твоеѧ̀ при́сное ѡ҆хране́нїе: ра́дꙋйсѧ, подвиза́ющихсѧ въ не́й бл҃гонаде́жное застꙋпле́нїе.

Ра́дꙋйсѧ, приходѧ́щихъ въ ню̀ на поклоне́нїе благі́й предста́телю: ра́дꙋйсѧ, почита́ющихъ ст҃ꙋ́ю па́мѧть твою̀ нбⷭ҇ный покрови́телю.

Ра́дꙋйсѧ, дꙋше́вныхъ недꙋ́гѡвъ бл҃госе́рдный цѣле́бниче: ра́дꙋйсѧ, тѣле́сныхъ болѣ́зней преди́вный врачꙋ̀.

Ра́дꙋйсѧ, прпⷣбне ѻ҆́тче на́шъ меѳо́дїе.

Конда́къ г҃і

Ѽ прпⷣбне и҆ бг҃оно́сне ѻ҆́тче меѳо́дїе! ты̀ горѣ̀ на нб҃сѝ, мы̀ до́лꙋ на землѝ, ᲂу҆далє́нныѧ ѿ тебє̀ не толи́кѡ мѣ́стомъ, коли́кѡ грѣхо́вною нечистото́ю на́шею, ѻ҆ба́че дерза́емъ приноси́ти тебѣ̀ сїѐ ма́лое похва́льное пѣ́нїе, є҆́же ми́лостивнѡ прїе́мъ, молѝ гдⷭ҇а и҆ влⷣкꙋ на́шего, и҆зба́вити на́съ поги́бели вѣ́чныѧ, и҆ сподо́бити бл҃же́нства ст҃ы́хъ, вопїю́щихъ є҆мꙋ̀ вѣ́чнѡ хвале́бнꙋю пѣ́снь: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃лѡмъ любе́знꙋю чистотꙋ̀ ѿ ю҆́ности твоеѧ̀ возлюби́въ, прпⷣбне ѻ҆́тче меѳо́дїе, къ добродѣ́телей подви́жникꙋ, прпⷣбномꙋ се́ргїю, въ ѡ҆би́тель прите́клъ є҆сѝ, и҆ ѿ негѡ̀ во и҆́ночество ѡ҆блече́нный, подража́тель ре́вностный по́двигѡвъ є҆гѡ̀ бы́лъ є҆сѝ. тѣ́мже сла́вимъ тѧ̀ воззва̑нїи си́ми:

Ра́дꙋйсѧ, пꙋсты́ни до́брое прозѧбе́нїе: ра́дꙋйсѧ, ча́до и҆́стиннагѡ послꙋша́нїѧ.

Ра́дꙋйсѧ, є҆ѵⷢ҇лїа хрⷭ҇то́ва вѣ́рный послѣ́дователю: ра́дꙋйсѧ, за́повѣдей і҆и҃совыхъ ре́вностный и҆сполни́телю.

Ра́дꙋйсѧ, бг҃оно́снагѡ се́ргїа при́сный ᲂу҆ченичѐ: ра́дꙋйсѧ, добродѣ́телей є҆гѡ̀ наслѣ́дниче.

Ра́дꙋйсѧ, посто́мъ ᲂу҆мертви́вый въ себѣ̀ дꙋшетлѣ̑нныѧ стра̑сти: ра́дꙋйсѧ, мл҃твами ᲂу҆се́рдными ѿрази́вый всѧ̑ и҆скꙋшє́нїѧ дїа́вѡльскаѧ.

Ра́дꙋйсѧ, возше́дый на высотꙋ̀ соверше́нства дꙋхо́внагѡ: ра́дꙋйсѧ, прини́кїй во глꙋбинꙋ̀ смире́нїѧ ст҃а́гѡ.

Ра́дꙋйсѧ, сле́зъ твои́хъ тече́ньми ᲂу҆плодоноси́вый ни́вꙋ дꙋше́внꙋю: ра́дꙋйсѧ, и҆́же и҆з̾ глꙋбины̀ воздыха́нми прїѡбрѣты́й чистотꙋ̀ серде́чнꙋю.

Ра́дꙋйсѧ, прпⷣбне ѻ҆́тче на́шъ меѳо́дїе.

Конда́къ а҃

И҆збра́нный ᲂу҆ченичѐ вели́кагѡ ᲂу҆чи́телѧ, бг҃оно́снагѡ чꙋдотво́рца се́ргїа, и҆ ди́вный подража́телю житїѧ̀ є҆гѡ̀ ст҃а́гѡ, прпⷣбне ѻ҆́ч҃е меѳо́дїе, пѣ́сньми восхвалѧ́емъ тѧ̀ съ любо́вїю, застꙋ́пника на́шего: ты́ же ꙗ҆́кѡ и҆мѣ́ѧй дерзнове́нїе ко гдⷭ҇ꙋ, моли́сѧ вы́нꙋ ѡ҆ сп҃се́нїи на́съ грѣ́шныхъ, ѿ всѧ́кихъ бѣ́дъ и҆збавлѧ́ѧ зовꙋ́щихъ тѝ:

Ра́дꙋйсѧ, прпⷣбне ѻ҆́тче на́шъ меѳо́дїе.