Канон святому священномученику Гермогену Тобольскому

Перворожде́нна от Отца́ Христа́ возлюби́л еси́, по́двигом Его́ жи́знь свою́ освяща́я, ду́ши на́ша просвети́, я́ко да воспева́ем тя́.

О розго́ плодоно́сная земли́ Херсо́нския, в Сиби́рь отдале́нную прише́л еси́, тепло́ любве́ Боже́ственныя прине́сши лю́дем правосла́вным, и ны́не моли́ Христа́ Бо́га спасти́ся душа́м на́шим.

До́брое зерно́ ве́ры Правосла́вныя от пле́вел очища́я и горя́ любо́вию ко Го́споду, уче́ньми богосло́вскими ю́ныя сердца́ просвети́л еси́, бли́жним ра́дость присносу́щную да́руя.

Избра́нный досто́йно на служе́ние архиере́йское во гра́де Сара́тове, иде́же по́двигом до́брым подвиза́яся, любо́вь наро́дную стяжа́л еси́.

Горе́ име́я о́чи серде́чныя, и́ноков оте́чески наставля́л еси́ ревнова́ти о чистоте́ мона́шескаго жития́, о́тче блаже́нне, и путе́м кре́стным ше́ствовати науча́я.

Па́стырь благогове́йный яви́лся еси́, слу́жбы церко́вныя со слеза́ми покая́ния и умиле́ния соверша́я, те́мже у престо́ла Всевы́шняго ны́не предстои́ши.

Святи́телю ди́вный, досто́ин па́стырь Христо́ва ста́да яви́лся еси́, о́вцы своя́ от расхище́ния спаса́я, моли́ся о душа́х на́ших.

Во дни́ сму́ты па́стве свое́й о́браз ве́рно по́дал еси́, презира́я зло́бу безбо́жных супоста́тов, от ни́хже за и́мя Христо́во ско́рби мно́гия претерпе́л еси́, моли́ся, святи́телю, о чту́щих па́мять твою́.

Я́коже са́д благоцвету́щ, сла́вный гра́д Тобо́льск возлюби́л еси́, святи́телю, во времена́ нестрое́ний па́ству свою́ ве́рно упа́сл еси́, и ны́не моли́твами твои́ми правосла́вныя лю́ди сохраня́еши невреди́мы, Гермоге́не пресла́вне.

Име́яй любо́вь к ча́дам свои́м духо́вным, нощны́я моли́твы ко Христу́ возноси́л еси́, святи́телю, да сохрани́т лю́ди Своя́ в и́стинней ве́ре.

Томле́ние души́ претерпева́я и предви́дя у́зы своя́ от неве́рных челове́к, Гефсима́нским моле́нием моли́лся еси́, живо́т сво́й Бо́гу предая́, и ны́не о на́с Христу́ моли́ся, му́жество душа́м на́шим дарова́ти.

Егда́ прии́де вре́мя испыта́ния и крова́выя сму́ты, я́ко адама́нт ве́ры Правосла́вныя яви́лся еси́, о́тче Гермоге́не, и ны́не, я́ко ка́мень драги́й, сия́еши на Небеси́, во Ца́рствии Христа́, Бо́га на́шего.

Я́т бы́сть и в темни́цу от беззако́нных вве́ржен, слу́жбу Бо́жию та́мо не оста́вил еси́, па́ству свою́ в моли́твах помина́я, и Бо́га моля́ о сохране́нии ста́да церко́внаго.

Име́яй ве́лие терпе́ние и смире́ние, освети́л и облагоуха́л еси́ мра́к темни́цы своея́, по́лчища бесо́вския моли́твою сокруша́я, испове́дниче Христо́в, Гермоге́не пресла́вне.

Егда́ беззако́нныя лю́дие кончи́ну угото́ваша ти́, честны́й о́тче, убоя́вшеся испове́дничества твоего́, Госпо́дь незри́мо укрепля́ше тя́ благода́тию Свое́ю, е́юже ны́не прославля́ешися.

Несомне́нную наде́жду иму́щи на Го́спода, ве́рныя ча́да твоя́ потща́шася об освобожде́нии твое́м, о́тче Гермоге́не, и та́ко но́выя священному́ченицы Ефре́м, Пе́тр и Михаи́л яви́лися су́ть.

И́стинно темни́цу свою́ учи́лищем духо́вным наре́кл еси́, и кончи́не пра́ведней предугото́вился еси́, моли́тв прося́ у ми́ра всего́ о душе́ свое́й. Моли́ся ны́не о душа́х на́ших.

А́ще во тьме́ нощне́й и глубине́ во́д кончи́ну му́ченическую прия́л еси́, Гермоге́не пресла́вне, но ны́не па́че со́лнца сия́еши пред престо́лом сла́вы Го́спода на́шего, моля́ся о все́х на́с.

Подо́бно дре́вним страстоте́рпцем Бо́гу угоди́л еси́, вене́ц сла́вный стяжа́в кончи́ною свое́ю, святи́телю, сего́ ра́ди дерзнове́ние стяжа́в ко Го́споду, моли́ся кре́пость в страда́ниих и ве́лие долготерпе́ние на́м дарова́ти.

Ре́чная глубина́ те́ло твое́ свято́е не удержа́ла е́сть, и я́ко сосу́д благово́нный, изнесла́ е́сть, благослове́ние моли́твами твои́ми да́руя и проше́ния исполня́я все́м с ве́рою притека́ющим к тебе́.

Со благогове́нием покланя́емся Го́споду, чуде́сно яви́вшему честно́е те́ло твое́, о́тче, ве́рным ча́дом твои́м: Ему́же ны́не, благода́рственныя моли́твы прино́сим.

Любо́вию чту́щих тя́ не оста́ви, святи́телю Гермоге́не, хода́тайствуя о на́с пред Бо́гом, да земно́е по́прище досто́йно соверши́ти возмо́жем.

Архипа́стырское служе́ние до́бре соверши́л еси́, я́ко а́гнец слове́сный от А́гнца Бо́жия да́р му́ченичества восприя́л еси́, и ны́не предстоя́ престо́лу Всевы́шняго, моли́ся о на́с ко Го́споду спасти́ся душа́м на́шим.

Перворожде́нна ѿ ѻ҆ц҃а̀ хрⷭ҇та̀ возлюби́лъ є҆сѝ, по́двигомъ є҆гѡ̀ жи́знь свою̀ ѡ҆сщ҃а́ѧ, дꙋ́шы на́шѧ просвѣтѝ, ꙗ҆́кѡ да воспѣва́емъ тѧ̀.

Ѽ розго̀ плодоно́снаѧ землѝ херсѡ́нскїѧ, въ сиби́рь ѿдале́ннꙋю прише́лъ є҆сѝ, тепло̀ любвѐ бжⷭ҇твенныѧ прине́сши лю́демъ правосла́внымъ, и҆ ны́нѣ молѝ хрⷭ҇та̀ бг҃а спⷭ҇ти́сѧ дꙋша́мъ на́шымъ.

До́брое зерно̀ вѣ́ры правосла́вныѧ ѿ пле́велъ ѡ҆чища́ѧ и҆ горѧ̀ любо́вїю ко гдⷭ҇ꙋ, ᲂу҆че́ньми бг҃осло́вскими ю҆́ныѧ сердца̀ просвѣти́лъ є҆сѝ, бли́жнимъ ра́дость присносꙋ́щнꙋю да́рꙋѧ.

И҆збра́нный досто́йно на слꙋже́нїе а҆рхїере́йское во гра́де сара́тове, и҆дѣ́же по́двигомъ до́брымъ подвиза́ѧсѧ, любо́вь наро́днꙋю стѧжа́лъ є҆сѝ.

Горѣ̀ и҆мѣ́ѧ ѻ҆́чи сердє́чныѧ, и҆́нокѡвъ ѻ҆те́чески наставлѧ́лъ є҆сѝ ревнова́ти ѡ҆ чистотѣ̀ мона́шескагѡ житїѧ̀, ѻ҆́тче бл҃же́ннѣ, и҆ пꙋте́мъ крⷭ҇тнымъ ше́ствовати наꙋча́ѧ.

Па́стырь бл҃гоговѣ́йный ꙗ҆ви́лсѧ є҆сѝ, слꙋ́жбы цр҃кѡ́вныѧ со слеза́ми покаѧ́нїѧ и҆ ᲂу҆миле́нїѧ соверша́ѧ, тѣ́мже ᲂу҆ прⷭ҇то́ла всевы́шнѧгѡ ны́нѣ предстои́ши.

Ст҃и́телю ди́вный, досто́инъ па́стырь хрⷭ҇то́ва ста́да ꙗ҆ви́лсѧ є҆сѝ, ѻ҆́вцы своѧ̑ ѿ расхище́нїѧ сп҃са́ѧ, моли́сѧ ѡ҆ дꙋша́хъ на́шихъ.

Во дни̑ смꙋ́ты па́ствѣ свое́й ѻ҆́бразъ вѣ́рнѡ по́далъ є҆сѝ, презира́ѧ ѕло́бꙋ безбо́жныхъ сꙋпоста́тѡвъ, ѿ ни́хже за и҆́мѧ хрⷭ҇то́во ско́рби мнѡ́гїѧ претерпѣ́лъ є҆сѝ, моли́сѧ, ст҃и́телю, ѡ҆ чтꙋ́щихъ па́мѧть твою̀.

Ꙗ҆́коже са́дъ бл҃гоцвѣтꙋ́щъ, сла́вный гра́дъ тобо́льскъ возлюби́лъ є҆сѝ, ст҃и́телю, во времена̀ нестрое́нїй па́ствꙋ свою̀ вѣ́рнѡ ᲂу҆па́слъ є҆сѝ, и҆ ны́нѣ мл҃твами твои́ми правосла́вныѧ лю́ди сохранѧ́еши невреди́мы, гермоге́не пресла́вне.

И҆мѣ́ѧй любо́вь къ ча́дамъ свои́мъ дꙋхо́внымъ, нѡщны́ѧ мл҃твы ко хрⷭ҇тꙋ̀ возноси́лъ є҆сѝ, ст҃и́телю, да сохрани́тъ лю́ди своѧ̑ въ и҆́стиннѣй вѣ́рѣ.

Томле́нїе дꙋшѝ претерпѣва́ѧ и҆ предви́дѧ ᲂу҆́зы своѧ̀ ѿ невѣ́рныхъ человѣ́къ, геѳсїма́нскимъ моле́нїемъ моли́лсѧ є҆сѝ, живо́тъ сво́й бг҃ꙋ предаѧ̀, и҆ ны́нѣ ѡ҆ на́съ хрⷭ҇тꙋ̀ моли́сѧ, мꙋ́жество дꙋша́мъ на́шымъ дарова́ти.

Є҆гда̀ прїи́де вре́мѧ и҆спыта́нїѧ и҆ крова̑выѧ смꙋ́ты, ꙗ҆́кѡ а҆дама́нтъ вѣ́ры правосла́вныѧ ꙗ҆ви́лсѧ є҆сѝ, ѻ҆́тче гермоге́не, и҆ ны́нѣ, ꙗ҆́кѡ ка́мень драгі́й, сїѧ́еши на нб҃сѝ, во црⷭ҇твїи хрⷭ҇та̀, бг҃а на́шего.

Ꙗ҆́тъ бы́сть и҆ въ темни́цꙋ ѿ беззако́нныхъ вве́рженъ, слꙋ́жбꙋ бж҃їю та́мо не ѡ҆ста́вилъ є҆сѝ, па́ствꙋ свою̀ въ мл҃твахъ помина́ѧ, и҆ бг҃а молѧ̀ ѡ҆ сохране́нїи ста́да цр҃ко́внагѡ.

И҆мѣ́ѧй ве́лїе терпѣ́нїе и҆ смире́нїе, ѡ҆свѣти́лъ и҆ ѡ҆бл҃гоꙋха́лъ є҆сѝ мра́къ темни́цы своеѧ̀, пѡ́лчища бѣсо́вскїѧ мл҃твою сокрꙋша́ѧ, и҆сповѣ́дниче хрⷭ҇то́въ, гермоге́не пресла́вне.

Є҆гда̀ беззакѡ́нныѧ лю́дїе кончи́нꙋ ᲂу҆гото́ваша тѝ, честны́й ѻ҆́тче, ᲂу҆боѧ́вшесѧ и҆сповѣ́дничества твоегѡ̀, гдⷭ҇ь незри́мѡ ᲂу҆крѣплѧ́ше тѧ̀ бл҃года́тїю свое́ю, є҆́юже ны́нѣ прославлѧ́ешисѧ.

Несомнѣ́ннꙋю наде́ждꙋ и҆мꙋ́щи на гдⷭ҇а, вѣ̑рныѧ ча́да твоѧ̑ потща́шасѧ ѡ҆б̾ ѡ҆свобожде́нїи твое́мъ, ѻ҆́тче гермоге́не, и҆ та́кѡ но́выѧ сщ҃енномч҃нцы є҆фре́мъ, пе́тръ и҆ мїхаи́лъ ꙗ҆ви́лисѧ сꙋ́ть.

И҆́стиннѡ темни́цꙋ свою̀ ᲂу҆чи́лищемъ дꙋхо́внымъ наре́клъ є҆сѝ, и҆ кончи́нѣ пра́веднѣй предꙋгото́вилсѧ є҆сѝ, мл҃твъ просѧ̀ ᲂу҆ мі́ра всегѡ̀ ѡ҆ дꙋшѐ свое́й. моли́сѧ ны́нѣ ѡ҆ дꙋша́хъ на́шихъ.

А҆́ще во тьмѣ̀ нощнѣ́й и҆ глꙋбинѣ̀ во́дъ кончи́нꙋ мꙋ́ченическꙋю прїѧ́лъ є҆сѝ, гермоге́не пресла́вне, но ны́нѣ па́че со́лнца сїѧ́еши пред̾ прⷭ҇то́ломъ сла́вы гдⷭ҇а на́шего, молѧ́сѧ ѡ҆ всѣ́хъ на́съ.

Подо́бнѡ дрє́внимъ стрⷭ҇тоте́рпцємъ бо́гꙋ ᲂу҆годи́лъ є҆сѝ, вѣне́цъ сла́вный стѧжа́въ кончи́ною свое́ю, ст҃и́телю, сегѡ̀ ра́ди дерзнове́нїе стѧжа́въ ко гдⷭ҇ꙋ, моли́сѧ крѣ́пость въ страда́нїихъ и҆ ве́лїе долготерпѣ́нїе на́мъ дарова́ти.

Рѣ̑чнаѧ глꙋбина̀ тѣ́ло твоѐ ст҃о́е не ᲂу҆держа́ла є҆́сть, и҆ ꙗ҆́кѡ сосꙋ́дъ бл҃гово́нный, и҆знесла̀ є҆́сть, бл҃гослове́нїе мл҃твами твои́ми да́рꙋѧ и҆ прошє́нїѧ и҆сполнѧ́ѧ всѣ̑мъ съ вѣ́рою притека́ющымъ къ тебѣ̀.

Со бл҃гоговѣ́нїемъ покланѧ́емсѧ гдⷭ҇ꙋ, чꙋде́снѡ ꙗ҆ви́вшемꙋ честно́е тѣ́ло твоѐ, ѻ҆́тче, вѣ̑рнымъ ча́дѡмъ твои́мъ: є҆мꙋ́же ны́нѣ, бл҃года́рствєнныѧ мл҃твы прино́симъ.

Любо́вїю чтꙋ́щихъ тѧ̀ не ѡ҆ста́ви, ст҃и́телю гермоге́не, хода́тайствꙋѧ ѡ҆ на́съ пред̾ бг҃омъ, да земно́е по́прище досто́йно соверши́ти возмо́жемъ.

А҆рхїпа́стырское слꙋже́нїе до́брѣ соверши́лъ є҆сѝ, ꙗ҆́кѡ а҆́гнецъ слове́сный ѿ а҆́гнца бж҃їѧ да́ръ мч҃ничества воспрїѧ́лъ є҆сѝ, и҆ ны́нѣ предстоѧ̀ прⷭ҇то́лꙋ всевы́шнѧгѡ, моли́сѧ ѡ҆ на́съ ко гдⷭ҇ꙋ сп҃сти́сѧ дꙋша́мъ на́шымъ.