Кондак 1
Взбра́нной Воево́де, Боголюби́вей Цари́це, превы́сшей вся́каго созда́ния, Де́ве и Ма́тери Христа́ Бо́га, похва́льная воспису́ем Ти́ раби́ Твои́, Богоро́дице! Ты́ же, я́ко Боголюби́вая и Всеми́лостивая Ма́ти, благоизво́лившая яви́ти пресве́тлый Сво́й ли́к благове́рному на́шему кня́зю Андре́ю, от бе́д и скорбе́й сохрани́ ны́ и хра́м се́й, да зове́м Ти́:
Ра́дуйся, Боголюби́вая Цари́це Богоро́дице, Наде́ждо и Прибе́жище на́ше.
Икос 1
А́нгелов превы́шшую вся́ Небе́сныя Си́лы велича́ют Тя́, Богоро́дицу Цари́цу, мы́ же гре́шнии на земли́, чу́дному Бо́жию о Тебе́ смотре́нию дивя́щеся, все́ю душе́ю, се́рдцем и устна́ми дерза́ем глаго́лати:
Ра́дуйся, Благослове́нная в жена́х Де́во Благода́тная; ра́дуйся, Всевы́шняго Ма́ти, Ду́ха Свята́го пребыва́ние.
Ра́дуйся, Цари́це Небесе́ и земли́ и все́х Небе́сных Си́л вы́сшая; ра́дуйся, А́нгелы чти́мая, от Серафи́м воспева́емая.
Ра́дуйся, благословля́емая на Небеси́ и сла́вимая на земли́; ра́дуйся, вои́стину Присноблаже́нная и Пренепоро́чная.
Ра́дуйся, Боголюби́вая Цари́це Богоро́дице, Наде́ждо и Прибе́жище на́ше.
Кондак 2
Ви́дящи Премилосе́рдая Ма́терь Бо́жия земно́е ско́рбное житие́ на́ше, не́мощи и боле́зни, благоизво́ли яви́ти чу́до, избра́в сосу́д благода́ти и ми́лостей Свои́х к на́м, благочести́ваго кня́зя Андре́я. Оба́че и мы́ с ра́достию несказа́нною припа́даем к Тебе́, Влады́чице, и из глубины́ души́ благодари́м Тя́, на́шу ди́вную Засту́пницу, воспева́юще Бо́гу: Аллилу́иа.
Икос 2
Разуме́ти хотя́ чу́до, явле́нное ми́лостию Твое́ю, Пресвята́я Богоро́дице, егда́ ко́ни, ве́зшии святы́й о́браз, ста́ша, и лю́дие к ше́ствию подви́гнути и́х не возмого́ша, благове́рный кня́зь Андре́й нача́т со слеза́ми моли́тися к Тебе́, Влады́чице, да пока́жеши, Пречи́стая, во́лю святу́ю Свою́; Ты́ же в виде́нии благоволи́ла еси́ откры́ти преблаги́й сове́т Тво́й. Те́мже и мы́, чу́до сие́ воспомина́юще, прекло́ньше коле́на, взыва́ем си́це:
Ра́дуйся, просла́вившая ме́сто оби́тели Твоея́ ди́вным чудоде́йствием и в се́м ми́лость преизоби́льную на́м показа́вшая; ра́дуйся, страну́ Влади́мирскую све́том Свои́м озари́вшая и лучи́ све́та на все́х на́с простира́ющая.
Ра́дуйся, Всеблага́я на́ша Наста́внице, любо́вию на́с привлека́ющая; ра́дуйся, Охрани́тельнице на́ша от бе́д и боле́зней.
Ра́дуйся, у Го́спода спасе́ния на́шего Хода́таице, Цари́це на́ша Небе́сная; ра́дуйся, за вся́ благодея́ния Твоя́ благодаре́нию на́с науча́ющая.
Ра́дуйся, Боголюби́вая Цари́це Богоро́дице, Наде́ждо и Прибе́жище на́ше.
Кондак 3
Си́ла Вы́шняго осеня́ет все́х, с ве́рою и благогове́нием притека́ющих к Тебе́, Пречи́стая Госпоже́ Богоро́дице, и упова́ющих на Твою́ ми́лость, поне́же вся́кое благо́е проше́ние прие́млеши те́пле. Благове́рный кня́зь моля́ше Тя́, Влады́чице, яви́ти во́лю Твою́, преиспо́лнився тре́пета пред та́инством Твоего́ произволе́ния. Та́кожде и мы́ к Тебе́, Пречи́стая, прибега́ем, умиле́нно вопию́ще: Всеми́лостивая Покрови́тельнице на́ша, научи́ и на́с прославля́ти всечестно́е и всехва́льное и́мя Твое́ и досто́йно воспева́ти Бо́гу: Аллилу́иа.
Икос 3
Име́яй на пути́, я́ко Боготе́чную звезду́, честны́й о́браз Тво́й, Влады́чице, благове́рный кня́зь в приле́жней моли́тве свое́й пред чудотво́рною Твое́ю ико́ною сподо́бися я́ве узре́ти Тя́, Цари́цу Небе́сную, те́плое хода́тайство Твое́ Бо́гу принося́щую о ме́сте явле́ния Твоего́ и о все́м ми́ре. О Бо́жия Ма́ти, Пречи́стая Богоро́дице! Со умиле́нием припа́даем к Тебе́ и, бога́тыя Твоея́ ми́лости ожида́юще, уми́льно вопие́м Ти́:
Ра́дуйся, Ра́досте на́ша и кре́пкая Засту́пнице; ра́дуйся, Покро́ве на́ш и на́ше Утеше́ние.
Ра́дуйся, Охрани́тельнице на́ша и на́ше Упова́ние; ра́дуйся, Отра́до на́ша и ди́вное о на́с попече́ние.
Ра́дуйся, Похвало́ на́ша, чудесы́ на́с удивля́ющая; ра́дуйся, Прибе́жище на́ше и зало́г ве́чнаго спасе́ния.
Ра́дуйся, Боголюби́вая Цари́це Богоро́дице, Наде́ждо и Прибе́жище на́ше.
Кондак 4
Недоумева́ет у́м на́ш, ка́ко досто́йно е́сть восхвали́ти Тя́ и ди́вное явле́ние Твое́, Пресвята́я Влады́чице: я́ко со́лнце лучи́ испуща́ющи, предста́ла еси́ моля́щемуся кня́зю и та́ко рекла́ еси́: «Не хощу́, да о́браз Мо́й несе́ши в Росто́в, но во Влади́мире поста́ви Его́; на се́м ме́сте во и́мя Моего́ Рождества́ це́рковь воздви́гни и обита́лище и́ноком соста́ви», и, возде́вши Свои́ Боже́ственнеи ру́це ко Влады́чнему о́бразу, скры́ся от духо́вных оче́с его́. Преклоня́ем и мы́ коле́на пред Тобо́ю, Боголюби́вая Ма́ти, и Твоя́ чу́дная явле́ния и веле́ния разуме́юще из глубины́ души́ воспева́ем Бо́гу: Аллилу́иа.
Икос 4
Слы́ша Госпо́дь моле́ния Твоя́, Богоизбра́нная Цари́це Небе́сная, обеща́ вы́ну испо́лнити, я́ко Преблаги́я Ма́тере, проше́ния Твоя́. Ты́ же, о Влады́чице, тогда́ рекла́ еси́ ко Го́споду усты́ Свои́ми: «Влады́ко Многоми́лостиве, Го́споди, Иису́се Христе́, Сы́не и Бо́же Мо́й, молю́ Тя́, да пребу́дет Боже́ственная благода́ть на лю́дех Твои́х, и светоза́рный лу́ч сла́вы Твоея́ да нисхо́дит всегда́ на ме́сто сие́, Мно́ю избра́нное». И́стинно испове́дуем, о Пречи́стая, я́ко ско́ро помога́еши с ве́рою к Тебе́ прибега́ющим, и, со умиле́нием воспева́юще Тебе́, зове́м си́це:
Ра́дуйся, Моли́твеннице на́ша пред Го́сподем и Сы́ном Твои́м; ра́дуйся, Засту́пнице всего́ ро́да челове́ческаго и Защи́тнице наро́да правосла́внаго.
Ра́дуйся, Ма́тернюю любо́вь Твою́ всегда́ на́м явля́ющая и вся́ блага́я на́м да́рующая; ра́дуйся, ра́дости на́м, благода́ти же и сла́вы ве́чная Хода́таице, ди́вная на́ша Уте́шительнице.
Ра́дуйся, бытие́ оби́тели и ниспосла́ние на ню́ благода́ти предвозвести́вшая; ра́дуйся, в па́мять Твоего́ явле́ния хра́м во сла́ву Рождества́ Твоего́ устро́ити указа́вшая и та́мо Це́ркви Христо́вой ди́вное украше́ние яви́вшая.
Ра́дуйся, Боголюби́вая Цари́це Богоро́дице, Наде́ждо и Прибе́жище на́ше.
Кондак 5
Я́ко лучеза́рную звезду́, в преде́лах Влади́мирских явле́нную, узре́ кня́зь Андре́й Пресве́тлый о́браз Тво́й, Влады́чице, и в явле́нии се́м уразуме́в зна́мение ве́лия попече́ния Бо́жия о ме́сте явле́ния Твоего́, даде́ ему́ и́мя Боголюби́вое. О Цари́це и Влады́чице! Освети́ и на́с све́том Твои́м Небе́сным, сохраня́ющи на́с под кро́вом Твои́м благи́м, услы́ши всеумиле́нныя моли́твы восхваля́ющих Тя́ и воспева́ющих Бо́гу: Аллилу́иа.
Икос 5
Виде́ние чу́дное Богома́тере и святы́я словеса́ Ея́ прие́мля с ра́достным тре́петом, благове́рный кня́зь умиле́нно со слеза́ми паде́ на зе́млю и сла́достно возблагодари́ Всевы́шняго, я́ко сподо́бися узре́ти Тя́, Пресвяту́ю Богоро́дицу. Посе́м ускори́ це́рковь заложи́ти, иде́же ны́не Боголюби́вая оби́тель, и́менем Твои́м красу́ющися, мо́лится за ве́сь ми́р пред пречи́стым Твои́м о́бразом. Созерца́юще в таково́м сбы́тии зна́мение благода́ти, дерза́ем воспева́ти си́це:
Ра́дуйся, Ми́лостивая, я́ко устро́ила еси́ ти́хое приста́нище и́щущим спасе́ния; ра́дуйся, Пресве́тлая, я́ко све́т подава́еши все́м хотя́щим жи́ти в преподо́бии и те́м показу́еши пра́выя стези́ к Ца́рствию Небе́сному.
Ра́дуйся, те́плая Хода́таице о живу́щих в оби́телех Твои́х, ми́лость Свою́ вы́ну и́м обеща́вшая; ра́дуйся, я́ко в труде́х и́ноческих и́м всегда́ помога́еши и к трудолю́бию подвиза́еши.
Ра́дуйся, я́ко в ке́ллиях мона́шеских на моли́тву вразумля́еши и к доброде́тельному житию́ ре́вностно возбужда́еши; ра́дуйся, Храни́тельнице ди́вная оби́телей святы́х, я́ко Твое́ю благода́тною си́лою о́ныя зи́ждятся и преспева́ют в благоче́стии.
Ра́дуйся, Боголюби́вая Цари́це Богоро́дице, Наде́ждо и Прибе́жище на́ше.
Кондак 6
Пропове́дует вся́ земля́ Росси́йская бога́тыя ми́лости Твоя́, Влады́чице, и ди́вное благода́тное кня́зя Андре́я вразумле́ние. Сему́ после́дуя, благове́рный кня́зь повеле́ о́браз написа́ти те́м подо́бием, я́коже ему́ яви́ся Пречи́стая, и, обре́т святу́ю ико́ну, поклони́ся, ра́достно со слеза́ми благодаря́ Бо́га и ско́рую на́шу Помо́щницу, взыва́я: Аллилу́иа.
Икос 6
Возсия́ благода́ть неизрече́нная от цельбоно́сныя ико́ны Твоея́, Пресвята́я и Боголюби́вая Ма́ти. Слы́шим и ви́дим вели́чие чуде́с, от нея́ быва́емое, со удивле́нием взира́ем на сию́ ико́ну, я́ко на Пресве́тлое лице́ Само́й Пречи́стой Де́вы. О Госпоже́, Цари́це и Влады́чице! Ты́ вы́ну воздвиза́еши ру́це Твои́ на моле́ние за на́с пред Сы́ном Твои́м, не пре́зри и вопию́щих Ти́ похва́льная сия́:
Ра́дуйся, во утеше́ние на́м дарова́вшая о́браз Тво́й чудотво́рный; ра́дуйся, но́вую ми́лость и но́вую благода́ть си́м в Це́ркви явля́ющая и те́м пу́ть спасе́ния показу́ющая.
Ра́дуйся, Покрови́тельнице на́ша, от бе́д на́с спаса́ющая и в ско́рбех бы́строе облегче́ние на́м посыла́ющая; ра́дуйся, сострада́тельнейшая к боле́знем на́шим, ско́рую по́мощь на́м подаю́щая.
Ра́дуйся, Боголюби́вая Цари́це Богоро́дице, Наде́ждо и Прибе́жище на́ше.
Кондак 7
Хотя́ благове́рный кня́зь досто́йно почти́ти пресвяту́ю во́лю Твою́, Влады́чице, собра́ архиере́и, свяще́нники и люде́й мно́жество, да ублажа́т Тя́ хвале́бно собо́ром. О чу́днаго торжества́! О прему́дрости суде́б Твои́х, Влады́чице! Пресла́вно прено́сится чудотво́рная Твоя́ ико́на в ди́вный хра́м всечестна́го Рождества́ Твоего́. Чудоде́йствием прославля́ется це́рковь Твоя́, о Госпоже́ Богоро́дице, и вси́ предстоя́щии, ра́дости и умиле́ния испо́лненнии, прекло́ньше коле́на, целу́ют Тво́й пречи́стый о́браз и взыва́ют: О, Ма́ти Боголюби́вая, осени́ всеси́льною Твое́ю десни́цею и на́с, воспева́ющих Бо́гу: Аллилу́иа.
Икос 7
Ди́вна дела́ Твоя́, Влады́чице! Вси́ лю́дие, здра́вии и боля́щии, бога́тии и ни́щии, вси́ прибега́ем к Тебе́, сострада́тельнейшей Ма́тери на́шей. Не отри́ни на́с от лица́ Твоего́, бу́ди ми́лостива к на́м, недосто́йным рабо́м Твои́м, во все́х путе́х жи́зни на́шея, защити́ и поми́луй от всея́ души́ любо́вию вопию́щих Тебе́ такова́я:
Ра́дуйся, ненаде́ющихся наде́яние и печа́льных утеше́ние; ра́дуйся, о скорбя́щих попече́ние и бе́дствующим по́моще.
Ра́дуйся, а́лчущих Корми́тельнице и ни́щих одея́ние; ра́дуйся, убо́гих Засту́пнице и боля́щих исцеле́ние.
Ра́дуйся, ста́рцев Покрови́тельнице и ю́ных Воспита́тельнице; ра́дуйся, вражду́ющих примире́ние и оби́димых Защи́тнице.
Ра́дуйся, Боголюби́вая Цари́це Богоро́дице, Наде́ждо и Прибе́жище на́ше.
Кондак 8
Ди́вное чу́до пренесе́ния пресла́вныя ико́ны Твоея́, Влады́чице, торже́ственно вси́ честву́ем и на вся́кое ле́то в се́й све́тлый пра́здник благода́рне воспомина́ем вся́ неизче́тная благодея́ния чуде́с, Тобо́ю, Пречи́стая, от ико́ны ди́вно источа́емых; и тя́, уго́дниче Бо́жий Лео́нтие, в по́мощь призыва́ем, чту́ще с любо́вию честну́ю па́мять твою́, да моли́твами твои́ми сподо́бимся у Пречи́стыя обрести́ благода́ть, еще́ же непреста́нно воспева́ти Го́споду: Аллилу́иа.
Икос 8
Все́ вели́чие чуде́с Твои́х, Пречи́стая, не́сть исчи́слити возмо́жно, егда́ безбо́жный ца́рь Баты́й, разоря́я гра́ды и ве́си и хра́мы сожига́я, со мно́гою ра́тию прибли́зися и ко святе́й оби́тели Твое́й, Пречи́стая, вни́де в це́рковь и, обре́т чудотво́рную ико́ну, де́рзостно положи́ ру́ку на драга́я ри́зы, хра́м со все́м бога́тством огню́ предаде́, то́чию еди́н о́браз Тво́й, Влады́чице, це́л обре́теся и ничи́мже поврежде́н бы́сть. О ве́лие чу́до! О, ко́ль ди́вны зна́мения благода́ти явля́еши на́м, Пречи́стая! Кто́ не ублажи́т Тя́? Кто́ не воспое́т Твоя́ сла́вная чудеса́? И мы́, гре́шнии, со умиле́нием взира́юще на святу́ю ико́ну Твою́, то́ль чуде́сно от поги́бельнаго пла́мене сохра́ншуюся, со слеза́ми взыва́ем си́це:
Ра́дуйся, я́ко купина́, огне́м горе́вшая и неопа́льна пребы́вшая; ра́дуйся, я́ко благода́ть Тебе́ даде́ся си́лу о́гненную угаша́ти.
Ра́дуйся, в годи́ну напа́стей и испыта́ний оста́вльшая на́м святу́ю ико́ну Свою́ во утеше́ние; ра́дуйся, я́ко благосты́нею Свое́ю угаша́еши в на́с о́гнь нече́стия пла́менем огня́ Боже́ственнаго.
Ра́дуйся, просла́вившая чудесы́ ико́ну Твою́; ра́дуйся, я́ко моли́твою и лобыза́нием ико́ны Твоея́ вси́ мы́ прие́млем благода́тное утеше́ние.
Ра́дуйся, Боголюби́вая Цари́це Богоро́дице, Наде́ждо и Прибе́жище на́ше.
Кондак 9
Все́ упова́ние возлага́ем на Твою́ бла́гость, Пресвята́я Влады́чице! Милосе́рдию Твоему́ не́сть конца́, вели́чие же Твое́ кто́ испове́сть? Предстоя́щи с мольбо́ю у Престо́ла Всевы́шняго, ко́ль мно́гое мно́жество чуде́с явля́ла еси́ на́м, Пречи́стая, ко́ль ди́вно спасла́ еси́ сла́вный гра́д Москву́ от гро́знаго врага́ Тамерла́на, ко́ль чу́дно объя́т его́ вели́кий стра́х прише́ствием Твои́м в ма́терь ру́сских градо́в и пону́ди а́бие отступи́ти со все́м во́инством. Не умолчи́м никогда́, Засту́пнице на́ша Пресла́вная, о все́х Твои́х благодея́ниих, да не бу́дет под спу́дом све́т чуде́с Твои́х. И ны́не, предстоя́ще пред Пречи́стым Твои́м о́бразом и моля́щеся умиле́нною душе́ю и сокруше́нным се́рдцем, взыва́ем Бо́гу: Аллилу́иа.
Икос 9
Вети́я многовеща́нныя не довле́ют по достоя́нию воспе́ти хвалу́ и благодаре́ние Пречи́стей, ка́ко ца́рственный гра́д сохрани́ от тата́рских по́лчищ. Егда́ вся́ ра́ть вра́жия отступа́ше от преде́л Моско́вских, ца́рь Иоа́нн со ско́рбию и слеза́ми отпусти́ чудотво́рный о́браз Тво́й, Боголюби́вая Влады́чице, в избра́нную оби́тель Твою́, иде́же со умиле́нием и ра́достию неизрече́нною срето́ша его́ лю́дие, и от ма́ла до вели́ка, вси́, прекло́ньше коле́на, ублажа́ху Тя́, Пречи́стая. И мы́, сея́ ра́дости мы́сленне причаща́ющеся, Цари́це Небе́сней вопие́м благода́рне:
Ра́дуйся, премилосе́рдая Уте́шительнице на́ша, святу́ю ико́ну да́ти на́м изво́лившая; ра́дуйся, от наше́ствия враго́в иноплеме́нных на́с ди́вно спа́сшая.
Ра́дуйся, царе́й на́ших несокруши́мый щи́те; ра́дуйся, оте́чества на́шего благонаде́жное утвержде́ние.
Ра́дуйся, во́инства кре́пкая защи́то, от меча́ вра́жия сохраня́ющая; ра́дуйся, от разоре́ния, пле́на и лю́тыя сме́рти свято́ю десни́цею Твое́ю все́х упова́ющих на Тя́ избавля́ющая.
Ра́дуйся, Боголюби́вая Цари́це Богоро́дице, Наде́ждо и Прибе́жище на́ше.
Кондак 10
Спасти́ хотя́ свою́ ду́шу, благочести́вый ца́рь Фео́дор, любо́вию боже́ственною разжига́емь, до́бре подвиза́ся, пребыва́я в посте́ и моли́тве, и, вельми́ любя́ше Боголюби́вую оби́тель, ча́сто ю́ посеща́ше. Еди́ножды же с те́плою моли́твою пред чудотво́рною Твое́ю ико́ною, Боголюби́вая Ма́ти, от усе́рдия своего́ в да́р Тебе́ принесе́ носи́мый на пе́рсех свои́х честны́й кре́ст, ка́меньми драги́ми украше́нный. Взира́юще на сие́ ди́вное украше́ние ико́ны Твоея́, о Пречи́стая, ра́дуемся вси́ духо́вно о се́м, ка́ко Тя́, Цари́цу и Влады́чицу, сла́вят и чту́т вси́ ве́рнии, и моля́щеся вопие́м Бо́гу: Аллилу́иа.
Икос 10
Стена́, огражда́ющая ны́ от вся́ких боле́зней, быва́еши Пресвята́я Богоро́дице, егда́ со умиле́нною моли́твою призыва́ем в по́мощь на́шу Твое́ Ма́тернее милосе́рдие. А́ще бо Ты́ не бы́ предстоя́ла, Боголюби́вая Ма́ти, моля́щи о на́с, кто́ бы на́с изба́вил от смертоно́сных ра́н и я́зв всегуби́тельных! Со умиле́нием созерца́ем, ка́ко на пути́ благода́тнаго ше́ствия Твоего́ вси́ боля́щии чуде́сно исцеля́хуся и стру́пи на телесе́х во мгнове́ние о́ка врачева́хуся. Те́мже и мы́, припа́дающе к цельбоно́сней ико́не Твое́й, мо́лим Тя́, Влады́чице: не оста́ви ны́ ми́лостию Твое́ю пребога́тою, изба́ви ны́ от вся́ких боле́зней, наипа́че же от смертоно́сныя я́звы и па́губы. О Пресвята́я Богоро́дице! Благоспе́шно спаси́ на́с и поми́луй с ве́рою и любо́вию вопию́щих Ти́ из глубины́ души́:
Ра́дуйся, страны́ на́шея правосла́вныя ди́вная Покрови́тельнице, мно́гажды от бе́д и напа́стей ю́ избавля́вшая; ра́дуйся, страда́льцев благода́тным утеше́нием венча́ющая и разсла́бленным ско́рое возставле́ние даю́щая.
Ра́дуйся, слепы́м прозре́ние и хромы́м от неду́га и́х ди́вное избавле́ние дарова́вшая; ра́дуйся, пораже́нных разли́чными неду́гами и боле́зньми чуде́сно исцеля́ющая.
Ра́дуйся, скорбя́щих роди́телей в лише́нии ча́д и́х утеша́ющая благода́тною Твое́ю по́мощию; ра́дуйся, Цели́тельнице на́ша в страда́ниих теле́сных и блага́я Уте́шительнице в печа́лех на́ших душе́вных.
Ра́дуйся, Боголюби́вая Цари́це Богоро́дице, Наде́ждо и Прибе́жище на́ше.
Кондак 11
Пе́ние благода́рственное всеумиле́нно прино́сит Тебе́, Боголюби́вая Ма́ти, вся́ страна́ Росси́йская за чу́дное избавле́ние от смертоно́сныя я́звы, то́ль ги́бельно ю́ порази́вшия. Све́тлии дни́ ди́вных исцеле́ний начерта́ны на сердца́х ве́рующих, и моле́ния те́плыя возно́сятся на вся́кое ле́то в па́мять сего́ ра́достнаго торжества́, егда́ свята́я ико́на Твоя́, Влады́чице, с пе́нии духо́вными прино́сится в сла́вный гра́д Влади́мир. Красу́йся и лику́й, благослове́нный гра́де! Торжеству́йте, правове́рнии, зря́ще несо́мую ико́ну Влады́чицы, источа́ющую неизче́тныя исцеле́ния все́м притека́ющым к не́й с ве́рою и любо́вию! Преклоня́ем и мы́ коле́на пред Тобо́ю, Пресвята́я Богоро́дице, велича́ем Тя́ и мо́лим: приими́ ми́лостивно и от на́с же́ртву хвалы́ и прославле́ния, приноси́мую Тебе́ от недосто́йных ра́б Твои́х, вопию́щих Бо́гу: Аллилу́иа.
Икос 11
Светоза́рную ико́ну Твою́, Боголюби́вая Ма́ти, с благогове́нием зри́м в Боже́ственных хра́мех Твои́х, ра́дующеся. Кто́ не прибега́ше к Тебе́, Влады́чице? Кто́ не покланя́шеся, кто́ не лобыза́ше Твоя́ пречи́стыя стопы́? Кто́ не умоля́ше Тя́, Засту́пницу на́шу? О Пресвята́я Де́во, приими́ ве́ру и усе́рдие на́ше, напра́ви пу́ть на́ш на стези́ и́стины, умоли́ Го́спода и Сы́на Твоего́, да спасе́т на́с, и́миже ве́сть судьба́ми, да не поги́бнем в нераска́янии о на́ших грехопаде́ниих, и услы́ши моле́ния к Тебе́ взыва́ющих:
Ра́дуйся, Благода́тная, все́ми доброде́тельми преукраше́нная, Свое́ю благода́тию на́с не оставля́ющая; ра́дуйся, Храни́тельнице на́ша, в ча́с сме́ртный тьму́ вра́жию отгоня́ющая и по сме́рти на́с упокоева́ющая.
Ра́дуйся, Ми́лостивая, ми́лость Свою́ на́м явля́ющая в де́нь испыта́ния, в о́ньже откры́ются дела́ на́ша, до́брая же и зла́я; ра́дуйся, Милосе́рдая, заступле́ние на́м посыла́ющая и те́м в бу́дущем ве́чныя ра́дости сподобля́ющая.
Ра́дуйся, Боголюби́вая Цари́це Богоро́дице, Наде́ждо и Прибе́жище на́ше.
Кондак 12
Благода́тию Боже́ственною осеня́ема, свята́го Иоа́нна Предте́чу с ли́ки Арха́нгел зри́м стоя́щия о́крест Пречи́стыя Ма́тере Боголюби́выя, вку́пе же ублажа́ем и тя́, уго́дниче Бо́жий. Помози́ на́м, немощны́м, име́ти ве́ру непоколеби́му, у́м чи́ст, си́лы и произволе́ние освяща́ти ду́ши на́ша посто́м и моли́твою и вы́ну полага́ти хране́ние усто́м на́шим, да моли́твами Влады́чицы и твои́ми сподо́бимся досто́йно воспе́ти Бо́гу на́шему: Аллилу́иа.
Икос 12
Пою́ще неисче́тная зна́мения и чудеса́ Твоя́, Пресвята́я Богоро́дице, умиле́нно припа́даем к пречи́стому о́бразу Твоему́, Боголюби́вая Ма́ти, лобыза́юще его́ со стра́хом и тре́петом, хва́лим Тя́ я́ко неисчерпа́емый исто́чник благода́ти, и мо́лим: бу́ди Хода́таица о на́с, воздви́гни ру́це к Сы́ну Твоему́, да вы́ну в жи́зни се́й и в бу́дущей милосе́рдие Его́ неотсту́пно бу́дет от на́с, взыва́ющих Тебе́:
Ра́дуйся, Присноблаже́нная, па́че земноро́дных ве́дущая блаже́нство пребыва́ти с Бо́гом; ра́дуйся, и на́с прича́стники сего́ блаже́нства соде́лывающая.
Ра́дуйся, Пренепоро́чная Де́во, всеце́ло стяжа́вшая чистоту́, смире́ние и непоро́чность; ра́дуйся, да́рующая на́м блага́я сия́, да бу́дем уго́дны Тебе́ и Бо́гу.
Ра́дуйся, Всеми́лостивая Цари́це, простира́ющая на на́с, гре́шных, ми́лость Свою́ во вся́кое вре́мя живота́ на́шего; ра́дуйся, чадолюби́вая Ма́ти, да́рующая на́м Свое́ Ма́тернее заступле́ние в ча́с сме́рти.
Ра́дуйся, Боголюби́вая Цари́це Богоро́дице, Наде́ждо и Прибе́жище на́ше.
Кондак 13
О Ма́ти Боголюби́вая, Цари́це Небе́сная, Всемо́щная на́ша Предста́тельнице! Ма́лыя сия́ услы́шавши смире́нныя мольбы́ на́ша, при́зри на ны́ ми́лостивым Твои́м о́ком; бу́ди на́м ско́рая Засту́пница в де́нь кончи́ны на́шея и в ча́с сме́ртный яви́ся на́м Сама́, Пречи́стая, простира́ющи ру́ку по́мощи, отгоня́ющи духо́в зло́бы, и́щущих поглоти́ти ду́шу на́шу при разлуче́нии от те́ла, и сподо́би на́с в бу́дущей жи́зни в весе́лии и ра́довании возвели́чити и просла́вити Тя́, я́ко Преблагу́ю Покрови́тельницу на́шу, да спасе́ннии Тобо́ю, в безконе́чнем ве́це вопие́м Бо́гу: Аллилу́иа.
Повтор
Этот кондак читается трижды, затем икос 1-й и кондак 1-й.
Икос 1
А́нгелов превы́шшую вся́ Небе́сныя Си́лы велича́ют Тя́, Богоро́дицу Цари́цу, мы́ же гре́шнии на земли́, чу́дному Бо́жию о Тебе́ смотре́нию дивя́щеся, все́ю душе́ю, се́рдцем и устна́ми дерза́ем глаго́лати:
Ра́дуйся, Благослове́нная в жена́х Де́во Благода́тная; ра́дуйся, Всевы́шняго Ма́ти, Ду́ха Свята́го пребыва́ние.
Ра́дуйся, Цари́це Небесе́ и земли́ и все́х Небе́сных Си́л вы́сшая; ра́дуйся, А́нгелы чти́мая, от Серафи́м воспева́емая.
Ра́дуйся, благословля́емая на Небеси́ и сла́вимая на земли́; ра́дуйся, вои́стину Присноблаже́нная и Пренепоро́чная.
Ра́дуйся, Боголюби́вая Цари́це Богоро́дице, Наде́ждо и Прибе́жище на́ше.
Кондак 1
Взбра́нной Воево́де, Боголюби́вей Цари́це, превы́сшей вся́каго созда́ния, Де́ве и Ма́тери Христа́ Бо́га, похва́льная воспису́ем Ти́ раби́ Твои́, Богоро́дице! Ты́ же, я́ко Боголюби́вая и Всеми́лостивая Ма́ти, благоизво́лившая яви́ти пресве́тлый Сво́й ли́к благове́рному на́шему кня́зю Андре́ю, от бе́д и скорбе́й сохрани́ ны́ и хра́м се́й, да зове́м Ти́:
Ра́дуйся, Боголюби́вая Цари́це Богоро́дице, Наде́ждо и Прибе́жище на́ше.
Молитвы
О Пречи́стая Госпоже́ Богоро́дице, Ма́ти Боголюби́вая, наде́ждо на́шего спасе́ния! Воззри́ ми́лостивно на предстоя́щия с ве́рою и любо́вию и покланя́ющияся пречи́стому о́бразу Твоему́, приими́ на́ше хвале́бное пе́ние сие́ и проле́й те́плую Твою́ моли́тву о на́с, гре́шных, ко Го́споду, да, презре́в вся́ на́ша согреше́ния, спасе́т и поми́лует на́с. О Преди́вная Влады́чице! покажи́ на на́с чу́дныя ми́лости Твоя́: изба́ви на́с от вся́кия ско́рби, наста́ви на пу́ть вся́кия доброде́тели и благосты́ни, спаси́ от искуше́ний, бе́д и боле́зней, изми́ от на́с оклевета́ния и ссо́ры, сохрани́ от молниено́снаго гро́ма, от запале́ния о́гненнаго, от гла́да, тру́са, пото́па и смертоно́сныя я́звы, пода́й на́м Свою́ ми́лостивую по́мощь на пути́, в мо́ри и на су́ше, да не поги́бнем лю́те. О Всеми́лостивая Боголюби́вая Ма́ти, с тве́рдым упова́нием возсыла́ем к Тебе́ на́шу убо́гую моли́тву! Не отри́ни на́ших сле́з и воздыха́ний, не забу́ди на́с во вся́ дни́ живота́ на́шего, но всегда́ пребыва́й с на́ми и Твои́м заступле́нием и хода́тайством у Го́спода пода́ждь на́м отра́ду, утеше́ние, защи́ту и по́мощь, да вы́ну сла́вим и велича́ем преблагослове́нное и всепе́тое и́мя Твое́. Ами́нь.
О Чу́дная и Вы́сшая все́х тва́рей Цари́це Богоро́дице, Небе́снаго Царя́ Христа́ Бо́га на́шего Ма́ти! Услы́ши на́с, гре́шных и недосто́йных ра́б Твои́х, в ча́с се́й моля́щихся и припа́дающих к Тебе́ с воздыха́нием и слеза́ми и уми́льно глаго́лющих: изведи́ на́с от ро́ва страсте́й, Влады́чице; изба́ви на́с от вся́кия ско́рби и печа́ли; огради́ от вся́кия напа́сти и злы́х клеве́т, от непра́веднаго и лю́таго наве́та вра́жия. Мо́жеши бо, о Благода́тная Ма́терь на́ша, не то́чию от вся́каго зла́ сохрани́ти лю́ди Твоя́, но и вся́ким благодея́нием снабди́ти и спасти́; ра́зве Тебе́ ины́я Предста́тельницы в беда́х и обстоя́ниих и те́плыя Хода́таицы о на́с, гре́шных, не и́мамы к Сы́ну Твоему́, Христу́ Бо́гу на́шему, Его́же умоли́, Влады́чице, да, спасе́ннии Тобо́ю, сла́вим и в бу́дущем ве́це Всесвято́е И́мя Сы́на Твоего́ и Бо́га на́шего, ку́пно со Отце́м и Святы́м Ду́хом, ны́не и в безконе́чныя ве́ки. Ами́нь.
Конда́къ а҃
Взбра́нной воево́дѣ, бг҃олюби́вѣй цр҃и́цѣ, превы́сшей всѧ́кагѡ созда́нїѧ, дѣ́вѣ и҆ ма́тєри хрⷭ҇та̀ бг҃а, похва̑льнаѧ восписꙋ́емъ тѝ рабѝ твоѝ, бг҃оро́дице! Ты́ же, ꙗ҆́кѡ бг҃олюби́ваѧ и҆ всеми́лостиваѧ мт҃и, бл҃гоизво́лившаѧ ꙗ҆ви́ти пресвѣ́тлый сво́й ли́къ благовѣ́рномꙋ на́шемꙋ кн҃зю а҆ндре́ю, ѿ бѣ́дъ и҆ скорбе́й сохранѝ ны̀ и҆ хра́мъ сѣ́й, да зове́мъ тѝ:
Ра́дꙋйсѧ, бг҃олюби́ваѧ цр҃и́це бцⷣе, наде́ждо и҆ прибѣ́жище на́ше.
І҆́косъ а҃
А҆́гг҃лѡвъ превы́шшꙋю всѧ̑ небє́сныѧ си̑лы велича́ютъ тѧ̀, бцⷣꙋ цр҃и́цꙋ, мы́ же грѣ́шнїи на землѝ, чꙋ́дномꙋ бж҃їю ѡ҆ тебѣ̀ смотре́нїю дивѧ́щесѧ, все́ю дꙋше́ю, се́рдцемъ и҆ ᲂу҆стна́ми дерза́емъ глаго́лати:
Ра́дꙋйсѧ, бл҃гослове́ннаѧ въ жена́хъ дѣ́во бл҃года́тнаѧ: ра́дꙋйсѧ, всевы́шнѧгѡ ма́ти, дх҃а ст҃а́гѡ пребыва́нїе.
Ра́дꙋйсѧ, цр҃и́цѣ нб҃сѐ и҆ землѝ и҆ всѣ́хъ нбⷭ҇ныхъ си́лъ вы́сшаѧ: ра́дꙋйсѧ, а҆́гг҃лы чти́маѧ, ѿ серафі̑мъ воспѣва́емаѧ.
Ра́дꙋйсѧ, бл҃гословлѧ́емаѧ на нб҃сѝ и҆ сла́вимаѧ на землѝ: ра́дꙋйсѧ, вои́стиннꙋ присноблаже́ннаѧ и҆ пренепоро́чнаѧ.
Ра́дꙋйсѧ, бг҃олюби́ваѧ цр҃и́це бцⷣе, наде́ждо и҆ прибѣ́жище на́ше.
Конда́къ в҃
Ви́дѧщи премилосе́рдаѧ мт҃рь бж҃їѧ земно́е ско́рбное житїѐ на́ше, не́мощи и҆ болѣ̑зни, благоизво́ли ꙗ҆ви́ти чꙋ́до, и҆збра́въ сосꙋ́дъ благода́ти и҆ ми́лостей свои́хъ къ на́мъ, бл҃гочести́вагѡ кн҃зѧ а҆ндре́а. ѻ҆ба́че и҆ мы̀ съ ра́достїю несказа́нною припа́даемъ къ тебѣ̀, влⷣчцѣ, и҆ и҆з̾ глꙋбины̀ дꙋшѝ благодари́мъ тѧ̀, на́шꙋ ди́внꙋю застꙋ́пницꙋ, воспѣва́юще бг҃ꙋ: А҆ллилꙋ́їа.
І҆́косъ в҃
Разꙋмѣ́ти хотѧ̀ чꙋ́до, ꙗ҆вле́нное ми́лостїю твое́ю, прест҃а́ѧ бцⷣе, є҆гда̀ ко́ни, ве́зшїи ст҃ы́й ѻ҆́бразъ, ста́ша, и҆ лю́дїе къ ше́ствїю подви́гнꙋти и҆̀хъ не возмого́ша, бл҃говѣ́рный кн҃зь а҆ндре́й нача́тъ со слеза́ми моли́тисѧ къ тебѣ̀, влⷣчце, да пока́жеши, пречⷭ҇таѧ, во́лю ст҃ꙋ́ю свою̀: ты́ же въ видѣ́нїи благоволи́ла є҆сѝ ѿкры́ти преблагі́й совѣ́тъ тво́й. Тѣ́мже и҆ мы̀, чꙋ́до сїѐ воспомина́юще, прекло́ньше колѣ̑на, взыва́емъ си́це:
Ра́дꙋйсѧ, просла́вившаѧ мѣ́сто ѡ҆би́тели твоеѧ̀ ди́внымъ чꙋдодѣ́йствїемъ и҆ въ се́мъ преиз̾ѻби́льнꙋю ми́лость на́мъ показа́вшаѧ: ра́дꙋйсѧ, странꙋ̀ влади́мїрскꙋю свѣ́томъ свои́мъ ѡ҆зари́вшаѧ и҆ лꙋчѝ свѣ́та на всѣ́хъ на́съ простира́ющаѧ.
Ра́дꙋйсѧ, всебл҃га́ѧ на́ша наста́вницѣ, любо́вїю на́съ привлека́ющаѧ: ра́дꙋйсѧ, ѡ҆храни́тельнице на́ша ѿ бѣ́дъ и҆ болѣ́зней.
Ра́дꙋйсѧ, ᲂу҆ гдⷭ҇а спасе́нїѧ на́шегѡ хода́таице, цари́це на́ша нбⷭ҇наѧ: ра́дꙋйсѧ, за всѧ̑ благодѣѧ̑нїѧ твоѧ̑ благодаре́нїю на́съ наꙋча́ющаѧ.
Ра́дꙋйсѧ, бг҃олюби́ваѧ цр҃и́це бцⷣе, наде́ждо и҆ прибѣ́жище на́ше.
Конда́къ г҃
Си́ла вы́шнѧго ѡ҆сѣнѧ́етъ всѣ́хъ, съ вѣ́рою и҆ бл҃гоговѣ́нїемъ притека́ющихъ къ тебѣ̀, пречⷭ҇таѧ гпⷭ҇жѐ бцⷣе, и҆ ᲂу҆пова́ющихъ на твою̀ ми́лость, поне́же всѧ́кое благо́е проше́нїе прїе́млеши те́плѣ. Бл҃говѣ́рный кн҃зь молѧ́ше тѧ̀, влⷣчце, ꙗ҆ви́ти во́лю твою̀, преиспо́лнивсѧ тре́пета пред̾ та́инствомъ твоегѡ̀ произволе́нїѧ. та́кожде и҆ мы̀ къ тебѣ̀, пречⷭ҇таѧ, прибѣга́емъ, ᲂу҆миле́ннѡ вопїю́ще: всеми́лостиваѧ покрови́тельнице на́ша, наꙋчѝ и҆ на́съ прославлѧ́ти всечⷭ҇тно́е и҆ всехва́льное и҆́мѧ твоѐ и҆ досто́йнѡ воспѣва́ти бг҃ꙋ: А҆ллилꙋ́їа.
І҆́косъ г҃
И҆мѣ́ѧй на пꙋтѝ, ꙗ҆́кѡ бг҃оте́чнꙋю ѕвѣздꙋ̀, честны́й ѻ҆́бразъ тво́й, влⷣчце, бл҃говѣ́рный кн҃зь въ прилѣ́жнѣй моли́твѣ свое́й пред̾ чꙋдотво́рною твое́ю і҆кѡ́ною сподо́бисѧ ꙗ҆́вѣ ᲂу҆зрѣ́ти тѧ̀, цр҃и́цꙋ нбⷭ҇нꙋю, те́плое хода́тайство твоѐ бг҃ꙋ приносѧ́щꙋю ѡ҆ мѣ́стѣ ꙗ҆вле́нїѧ твоегѡ̀ и҆ ѡ҆ всѣ̑мъ мі́рѣ. Ѽ бж҃їѧ мт҃и, пречи́стаѧ бг҃оро́дице! со ᲂу҆миле́нїемъ припа́даемъ къ тебѣ̀ и҆, бога̑тыѧ твоеѧ̀ ми́лѡсти ѡ҆жида́юще, ᲂу҆ми́льнѡ вопїе́мъ тѝ:
Ра́дꙋйсѧ, ра́досте на́ша и҆ крѣ́пкаѧ застꙋ́пнице: ра́дꙋйсѧ, покро́ве на́шъ и҆ на́ше ᲂу҆тѣше́нїе.
Ра́дꙋйсѧ, ѡ҆храни́тельнице на́ша и҆ на́ше ᲂу҆пова́нїе: ра́дꙋйсѧ, ѿра́до на́ша и҆ ди́вное ѡ҆ на́съ попече́нїе.
Ра́дꙋйсѧ, похвало̀ на́ша, чꙋдесы̀ на́съ ᲂу҆дивлѧ́ющаѧ: Ра́дꙋйсѧ, прибѣ́жище на́ше и҆ зало́гъ вѣ́чнагѡ спасе́нїѧ.
Ра́дꙋйсѧ, бг҃олюби́ваѧ цр҃и́це бцⷣе, наде́ждо и҆ прибѣ́жище на́ше.
Конда́къ д҃
Недоꙋмѣва́етъ ᲂу҆́мъ на́шъ, ка́кѡ досто́йнѡ є҆́сть восхвали́ти тѧ̀ и҆ ди́вное ꙗ҆вле́нїе твоѐ, прест҃а́ѧ влⷣчцѣ: ꙗ҆́кѡ сл҃нце лꙋчи̑ и҆спꙋща́ющи, предста́ла є҆сѝ молѧ́щемꙋсѧ кн҃зю и҆ та́кѡ рекла̀ є҆сѝ: не хощꙋ̀, да ѻ҆́бразъ мо́й несе́ши въ росто́въ, но во влади́мїрѣ поста́ви є҆го̀: на се́мъ мѣ́стѣ во и҆́мѧ моегѡ̀ ржⷭ҇тва̀ цр҃ковь воздви́гни и҆ ѡ҆бита́лище и҆́нокѡмъ соста́ви, и҆, воздѣ́вши своѝ бжⷭ҇твеннеи рꙋ́цѣ ко влⷣчнемꙋ ѻ҆́бразꙋ, скры́сѧ ѿ дꙋхо́вныхъ ѻ҆че́съ є҆гѡ̀. Преклонѧ́емъ и҆ мы̀ колѣ̑на пред̾ тобо́ю, бг҃олюби́ваѧ мт҃и, и҆ твоѧ̑ чꙋ̑днаѧ ꙗ҆влє́нїѧ и҆ велѣ̑нїѧ разꙋмѣ́юще, и҆з̾ глꙋбины̀ дꙋшѝ воспѣва́емъ бг҃ꙋ: а҆ллилꙋ́їа.
І҆́косъ д҃
Слы́ша гдⷭ҇ь молє́нїѧ твоѧ̑, бг҃оизбра́ннаѧ цр҃и́це нбⷭ҇наѧ, ѡ҆бѣща̀ вы́нꙋ и҆спо́лнити, ꙗ҆́кѡ пребл҃гі́ѧ мт҃ре, прошє́нїѧ твоѧ̑. Ты́ же, ѽ влⷣчце, тогда̀ рекла̀ є҆сѝ ко гдⷭ҇ꙋ ᲂу҆сты̀ свои́ми: влⷣко многоми́лостиве, гдⷭ҇и, і҆и҃се хрⷭ҇тѐ, сн҃ѣ и҆ бж҃е мо́й, молю̀ тѧ̀, да пребꙋ́детъ бжⷭ҇твеннаѧ блгⷣть на лю́дѣхъ твои́хъ, и҆ свѣтоза́рный лꙋ́чь сла́вы твоеѧ̀ да нисхо́дитъ всегда̀ на мѣ́сто сїѐ, мно́ю и҆збра́нное. И҆́стиннѡ и҆сповѣ́дꙋемъ, ѽ пречⷭ҇таѧ, ꙗ҆́кѡ ско́ро помога́еши съ вѣ́рою къ тебѣ̀ прибѣга́ющымъ, и҆, со ᲂу҆миле́нїемъ воспѣва́юще тебѣ̀, зове́мъ си́це:
Ра́дꙋйсѧ, моли́твеннице на́ша пред̾ гдⷭ҇емъ и҆ сн҃омъ твои́мъ: ра́дꙋйсѧ, застꙋ́пнице всегѡ̀ ро́да человѣ́ческагѡ и҆ защи́тнице наро́да правосла́внагѡ.
Ра́дꙋйсѧ, ма́тернюю любо́вь твою̀ всегда̀ на́мъ ꙗ҆влѧ́ющаѧ и҆ всѧ̑ блага̑ѧ на́мъ да́рꙋющаѧ: ра́дꙋйсѧ, ра́дости на́мъ, блгⷣти же и҆ сла́вы вѣ́чнаѧ хода́таице, ди́внаѧ на́ша ᲂу҆тѣ́шительнице.
Ра́дꙋйсѧ, бытїѐ ѡ҆би́тели и҆ ниспосла́нїе на ню̀ бл҃года́ти предвозвѣсти́вшаѧ: ра́дꙋйсѧ, въ па́мѧть твоегѡ̀ ꙗ҆вле́нїѧ хра́мъ во сла́вꙋ ржⷭ҇тва̀ твоегѡ̀ ᲂу҆стро́ити ᲂу҆каза́вшаѧ и҆ та́мѡ цр҃кви хрⷭ҇то́вой ди́вное ᲂу҆краше́нїе ꙗ҆ви́вшаѧ.
Ра́дꙋйсѧ, бг҃олюби́ваѧ цр҃и́це бцⷣе, наде́ждо и҆ прибѣ́жище на́ше.
Конда́къ є҃
Ꙗ҆́кѡ лꙋчеза́рнꙋю ѕвѣздꙋ̀, въ предѣ́лахъ влади́мїрскихъ ꙗ҆вле́ннꙋю, ᲂу҆зрѣ̀ кн҃зь а҆ндре́й пресвѣ́тлый ѻ҆́бразъ тво́й, влⷣчце, и҆ въ ꙗ҆вле́нїи се́мъ ᲂу҆разꙋмѣ́въ зна́менїе ве́лїѧ попече́нїѧ бж҃їѧ ѡ҆ мѣ́стѣ ꙗ҆вле́нїѧ твоегѡ̀, дадѐ є҆мꙋ̀ и҆́мѧ бг҃олюби́вое. ѽ цр҃и́це и҆ влⷣчце! ѡ҆свѣтѝ и҆ на́съ свѣ́томъ твои́мъ нбⷭ҇нымъ, сохранѧ́ющи на́съ под̾ кро́вомъ твои́мъ бл҃ги́мъ, ᲂу҆слы́ши всеꙋмилє́нныѧ моли̑твы восхвалѧ́ющихъ тѧ̀ и҆ воспѣва́ющихъ бг҃ꙋ: а҆ллилꙋ́їа.
І҆́косъ є҃
Видѣ́нїе чꙋ́дное бг҃ома́тере и҆ ст҃ы́ѧ словеса̀ є҆ѧ̀ прїе́млѧ съ ра́достнымъ тре́петомъ, бл҃говѣ́рный кн҃зь ᲂу҆миле́ннѡ со слеза́ми падѐ на зе́млю и҆ сла́достнѡ возблагодарѝ всевы́шнѧго, ꙗ҆́кѡ сподо́бисѧ ᲂу҆зрѣ́ти тѧ̀, прест҃ꙋ́ю бцⷣꙋ. посе́мъ ᲂу҆скорѝ цр҃ковь заложи́ти, и҆дѣ́же ны́нѣ бг҃олюби́ваѧ ѡ҆би́тель, и҆́менемъ твои́мъ красꙋ́ющисѧ, мо́литсѧ за ве́сь мі́ръ пред̾ пречⷭ҇тымъ твои́мъ ѻ҆́бразомъ. Созерца́юще въ таково́мъ сбы́тїи зна́менїе бл҃года́ти, дерза́емъ воспѣва́ти си́це:
Ра́дꙋйсѧ, ми́лостиваѧ, ꙗ҆́кѡ ᲂу҆стро́ила є҆сѝ ти́хое приста́нище и҆́щꙋщымъ спасе́нїѧ: ра́дꙋйсѧ, пресвѣ́тлаѧ, ꙗ҆́кѡ свѣ́тъ подава́еши всѣ̑мъ хотѧ́щымъ жи́ти въ преподо́бїи и҆ тѣ́мъ показꙋ́еши пра̑выѧ стезѝ къ црⷭ҇твїю нбⷭ҇номꙋ.
Ра́дꙋйсѧ, те́плаѧ хода́таице ѡ҆ живꙋ́щихъ въ ѡ҆би́телехъ твои́хъ, ми́лость свою̀ вы́нꙋ и҆̀мъ ѡ҆бѣща́вшаѧ: ра́дꙋйсѧ, ꙗ҆́кѡ въ трꙋдѣ́хъ и҆́ноческихъ и҆̀мъ всегда̀ помога́еши и҆ къ трꙋдолю́бїю подвиза́еши.
Ра́дꙋйсѧ, ꙗ҆́кѡ въ ке́ллїѧхъ мона́шескихъ на моли́твꙋ вразꙋмлѧ́еши и҆ къ добродѣ́тельномꙋ житїю̀ ре́вностнѡ возбꙋжда́еши: ра́дꙋйсѧ, храни́тельнице ди́внаѧ ѡ҆би́телей ст҃ы́хъ, ꙗ҆́кѡ твое́ю бл҃года́тною си́лою ѻ҆́ныѧ зи́ждѧтсѧ и҆ преспѣва́ютъ въ бл҃гоче́стїи.
Ра́дꙋйсѧ, бг҃олюби́ваѧ цр҃и́це бцⷣе, наде́ждо и҆ прибѣ́жище на́ше.
Конда́къ ѕ҃
Проповѣ́дꙋетъ всѧ̀ землѧ̀ рѡссі́йскаѧ бога̑тыѧ ми́лѡсти твоѧ̑, влⷣчце, и҆ ди́вное бл҃года́тное кн҃зѧ а҆ндре́а вразꙋмле́нїе: семꙋ̀ послѣ́дꙋѧ, бл҃говѣ́рный кн҃зь повелѣ̀ ѻ҆́бразъ написа́ти тѣ́мъ подо́бїемъ, ꙗ҆́кѡже є҆мꙋ̀ ꙗ҆ви́сѧ пречⷭ҇таѧ, и҆, ѡ҆брѣ́тъ ст҃ꙋ́ю і҆кѡ́нꙋ, поклони́сѧ, ра́достнѡ со слеза́ми благодарѧ̀ бг҃а и҆ ско́рꙋю на́шꙋ помо́щницꙋ, взыва́ѧ: а҆ллилꙋ́їа.
І҆́косъ ѕ҃
Возсїѧ̀ блгⷣть неизрече́ннаѧ ѿ цѣльбоно́сныѧ і҆кѡ́ны твоеѧ̀, прест҃а́ѧ и҆ бг҃олюби́ваѧ мт҃и. Слы́шимъ и҆ ви́димъ вели́чїе чꙋде́съ, ѿ неѧ̀ быва́емое, со ᲂу҆дивле́нїемъ взира́емъ на сїю̀ і҆кѡ́нꙋ, ꙗ҆́кѡ на пресвѣ́тлое лицѐ само́й пречⷭ҇той дв҃ы. ѽ гпⷭ҇жѐ, цр҃и́це и҆ влⷣчце! ты̀ вы́нꙋ воздвиза́еши рꙋ́цѣ твоѝ на моле́нїе за на́съ пред̾ сн҃омъ твои́мъ, не пре́зри и҆ вопїю́щихъ тѝ похва̑льнаѧ сїѧ̑:
Ра́дꙋйсѧ, во ᲂу҆тѣше́нїе на́мъ дарова́вшаѧ ѻ҆́бразъ тво́й чꙋдотво́рный: ра́дꙋйсѧ, но́вꙋю ми́лость и҆ но́вꙋю бл҃года́ть си́мъ въ цр҃кви ꙗ҆влѧ́ющаѧ и҆ тѣ́мъ пꙋ́ть спасе́нїѧ показꙋ́ющаѧ.
Ра́дꙋйсѧ, покрови́тельнице на́ша, ѿ бѣ́дъ на́съ спаса́ющаѧ и҆ въ ско́рбехъ бы́строе ѡ҆блегче́нїе на́мъ посыла́ющаѧ: ра́дꙋйсѧ, сострада́тельнѣйшаѧ къ болѣ́знємъ на́шимъ, ско́рꙋю по́мощь на́мъ подаю́щаѧ.
Ра́дꙋйсѧ, бг҃олюби́ваѧ цр҃и́це бцⷣе, наде́ждо и҆ прибѣ́жище на́ше.
Конда́къ з҃
Хотѧ̀ благовѣ́рный кн҃зь досто́йнѡ почти́ти прест҃ꙋ́ю во́лю твою̀, влⷣчце, собра̀ а҆рхїерє́и, сщ҃е́нники и҆ люде́й мно́жество, да ᲂу҆блажа́тъ тѧ̀ хвале́бнѡ собо́ромъ. ѽ чꙋ́днагѡ торжества̀! ѽ премꙋ́дрости сꙋде́бъ твои́хъ, влⷣчце! пресла́внѡ прено́ситсѧ чꙋдотво́рнаѧ твоѧ̀ і҆кѡ́на въ ди́вный хра́мъ всечестна́гѡ ржⷭ҇тва̀ твоегѡ̀. чꙋдодѣ́йствїемъ прославлѧ́етсѧ цр҃ковь твоѧ̀, ѽ госпожѐ бцⷣе, и҆ всѝ предстоѧ́щїи, ра́дости и҆ ᲂу҆миле́нїѧ и҆спо́лненнїи, прекло́ньше колѣ̑на, цѣлꙋ́ютъ тво́й пречи́стый ѻ҆́бразъ и҆ взыва́ютъ: ѽ, мт҃и бг҃олюби́ваѧ, ѡ҆сѣнѝ всеси́льною твое́ю десни́цею и҆ на́съ, воспѣва́ющихъ бг҃ꙋ: А҆ллилꙋ́їа.
І҆́косъ з҃
Ди̑вна дѣла̀ твоѧ̑, влⷣчце! всѝ лю́дїе, здра́вїи и҆ болѧ́щїи, бога́тїи и҆ ни́щїи, всѝ прибѣга́емъ къ тебѣ̀, сострада́тельнѣйшей мт҃ри на́шей: не ѿри́ни на́съ ѿ лица̀ твоегѡ̀, бꙋ́ди млⷭ҇тива къ на́мъ, недосто́йнымъ рабѡ́мъ твои̑мъ, во всѣ́хъ пꙋте́хъ жи́зни на́шеѧ, защитѝ и҆ поми́лꙋй ѿ всеѧ̀ дꙋшѝ любо́вїю вопїю́щихъ тебѣ̀ такова̑ѧ:
Ра́дꙋйсѧ, ненадѣ́ющихсѧ надѣ́ѧнїе и҆ печа́льныхъ ᲂу҆тѣше́нїе: ра́дꙋйсѧ, ѡ҆ скорбѧ́щихъ попече́нїе и҆ бѣ́дствꙋющымъ по́моще.
Ра́дꙋйсѧ, а҆́лчꙋщихъ корми́тельнице и҆ ни́щихъ ѡ҆дѣѧ́нїе: ра́дꙋйсѧ, ᲂу҆бо́гихъ застꙋ́пнице и҆ болѧ́щихъ и҆сцѣле́нїе.
Ра́дꙋйсѧ, ста́рцєвъ покрови́тельнице и҆ ю҆́ныхъ воспита́тельнице: ра́дꙋйсѧ, враждꙋ́ющихъ примире́нїе и҆ ѡ҆би́димыхъ защи́тнице.
Ра́дꙋйсѧ, бг҃олюби́ваѧ цр҃и́це бцⷣе, наде́ждо и҆ прибѣ́жище на́ше.
Конда́къ и҃
Ди́вное чꙋ́до пренесе́нїѧ пресла́вныѧ і҆кѡ́ны твоеѧ̀, влⷣчце, торже́ственнѡ всѝ чествꙋ́емъ и҆ на всѧ́кое лѣ́то въ се́й свѣ́тлый пра́здникъ благода́рнѣ воспомина́емъ всѧ̑ неизчє́тнаѧ благодѣѧ̑нїѧ чꙋдє́съ, тобо́ю, пречⷭ҇таѧ, ѿ і҆кѡ́ны ди́внѡ и҆сточа́ємыхъ: и҆ тѧ̀, ᲂу҆го́дниче бж҃їй лео́нтїе, въ по́мощь призыва́емъ, чтꙋ́ще съ любо́вїю честнꙋ́ю па́мѧть твою̀, да моли́твами твои́ми сподо́бимсѧ ᲂу҆ пречⷭ҇тыѧ ѡ҆брѣстѝ блгⷣть, є҆ще́ же непреста́ннѡ воспѣва́ти гдⷭ҇ꙋ: А҆ллилꙋ́їа.
І҆́косъ и҃
Всѐ вели́чїе чꙋдє́съ твои́хъ, пречⷭ҇таѧ, нѣ́сть и҆счи́слити возмо́жнѡ, є҆гда̀ безбо́жный ца́рь баты́й, разорѧ́ѧ гра́ды и҆ вє́си и҆ хра́мы сожига́ѧ, со мно́гою ра́тїю прибли́зисѧ и҆ ко ст҃ѣ́й ѡ҆би́тели твое́й, пречⷭ҇таѧ, вни́де въ цр҃ковь и҆, ѡ҆брѣ́тъ чꙋдотво́рнꙋю і҆кѡ́нꙋ, де́рзостнѡ положѝ рꙋ́кꙋ на драга́ѧ ри̑зы, хра́мъ со всѣ́мъ бога́тствомъ ѻ҆гню̀ предадѐ, то́чїю є҆ди́нъ ѻ҆́бразъ тво́й, влⷣчце, цѣ́лъ ѡ҆брѣ́тесѧ и҆ ничи́мже поврежде́нъ бы́сть. ѽ ве́лїе чꙋ́до! ѽ, ко́ль ди̑вны зна́мєнїѧ блгⷣти ꙗ҆влѧ́еши на́мъ, пречⷭ҇таѧ! Кто̀ не ᲂу҆блажи́тъ тѧ̀; Кто̀ не воспое́тъ твоѧ̑ сла̑внаѧ чꙋдєса̀; И҆ мы̀, грѣ́шнїи, со ᲂу҆миле́нїемъ взира́юще на ст҃ꙋ́ю і҆кѡ́нꙋ твою̀, то́ль чꙋде́снѡ ѿ поги́бельнагѡ пла́мене сохра́ншꙋюсѧ, со слеза́ми взыва́емъ си́це:
Ра́дꙋйсѧ, ꙗ҆́кѡ кꙋпина̀, ѻ҆гне́мъ горѣ́вшаѧ и҆ неѡпа́льна пребы́вшаѧ: ра́дꙋйсѧ, ꙗ҆́кѡ блгⷣть тебѣ̀ даде́сѧ си́лꙋ ѻ҆́гненнꙋю ᲂу҆гаша́ти.
Ра́дꙋйсѧ, въ годи́нꙋ напа́стей и҆ и҆спыта́нїй ѡ҆ста́вльшаѧ на́мъ ст҃ꙋ́ю і҆кѡ́нꙋ свою̀ во ᲂу҆тѣше́нїе: ра́дꙋйсѧ, ꙗ҆́кѡ благосты́нею свое́ю ᲂу҆гаша́еши въ на́съ ѻ҆́гнь нече́стїѧ пла́менемъ ѻ҆гнѧ̀ бжⷭ҇твеннагѡ.
Ра́дꙋйсѧ, просла́вившаѧ чꙋдесы̑ і҆кѡ́нꙋ твою̀: Ра́дꙋйсѧ, ꙗ҆́кѡ моли́твою и҆ лобыза́нїемъ і҆кѡ́ны твоеѧ̀ всѝ мы̀ прїе́млемъ благода́тное ᲂу҆тѣше́нїе.
Ра́дꙋйсѧ, бг҃олюби́ваѧ цр҃и́це бцⷣе, наде́ждо и҆ прибѣ́жище на́ше.
Конда́къ ѳ҃
Всѐ ᲂу҆пова́нїе возлага́емъ на твою̀ бла́гость, прест҃а́ѧ влⷣчце! Милосе́рдїю твоемꙋ̀ нѣ́сть конца̀, вели́чїе же твоѐ кто̀ и҆сповѣ́сть: Предстоѧ́щи съ мольбо́ю ᲂу҆ прⷭ҇то́ла всевы́шнѧгѡ, ко́ль мно́гое мно́жество чꙋдє́съ ꙗ҆влѧ́ла є҆сѝ на́мъ, пречⷭ҇таѧ, ко́ль ди́внѡ спасла̀ є҆сѝ сла́вный гра́дъ москвꙋ̀ ѿ гро́знагѡ врага̀ тамерла́на: ко́ль чꙋ́днѡ ѡ҆б̾ѧ́тъ є҆гѡ̀ вели́кїй стра́хъ прише́ствїемъ твои́мъ въ ма́терь рꙋ́сскихъ градѡ́въ и҆ понꙋ́ди а҆́бїе ѿстꙋпи́ти со всѣ́мъ во́инствомъ. Не ᲂу҆молчи́мъ никогда̀, застꙋ́пнице на́ша пресла́внаѧ, ѡ҆ всѣ́хъ твои́хъ благодѣѧ́нїихъ, да не бꙋ́детъ под̾ спꙋ́домъ свѣ́тъ чꙋдє́съ твои́хъ. И҆ ны́нѣ, предстоѧ́ще пред̾ пречи́стымъ твои́мъ ѻ҆́бразомъ и҆ молѧ́щесѧ ᲂу҆миле́нною дꙋше́ю и҆ сокрꙋше́ннымъ се́рдцемъ, взыва́емъ бг҃ꙋ: А҆ллилꙋ́їа.
І҆́косъ ѳ҃
Вѣті̑ѧ многовѣща̑нныѧ не довлѣ́ютъ по достоѧ́нїю воспѣ́ти хвалꙋ̀ и҆ благодаре́нїе пречⷭ҇тѣй, ка́кѡ ца́рственный гра́дъ сохранѝ ѿ тата́рскихъ по́лчищъ. Є҆гда̀ всѧ̀ ра́ть вра̑жїѧ ѿстꙋпа́ше ѿ предѣ̑лъ моско́вскихъ, ца́рь і҆ѡа́ннъ со ско́рбїю и҆ слеза́ми ѿпꙋстѝ чꙋдотво́рный ѻ҆́бразъ тво́й, бг҃олюби́ваѧ влⷣчце, въ и҆збра́ннꙋю ѡ҆би́тель твою̀, и҆дѣ́же со ᲂу҆миле́нїемъ и҆ ра́достїю неизрече́нною срѣто́ша є҆го̀ лю́дїе, и҆ ѿ ма́ла до вели́ка, всѝ, прекло́ньше колѣ̑на, ᲂу҆блажа́хꙋ тѧ̀, пречⷭ҇таѧ. И҆ мы̀, сеѧ̀ ра́дости мы́сленнѣ причаща́ющесѧ, цр҃и́цѣ нбⷭ҇нѣй вопїе́мъ благода́рнѣ:
Ра́дꙋйсѧ, премилосе́рдаѧ ᲂу҆тѣ́шительнице на́ша, свѧтꙋ́ю і҆кѡ́нꙋ да́ти на́мъ и҆зво́лившаѧ: ра́дꙋйсѧ, ѿ наше́ствїѧ врагѡ́въ и҆ноплеме́нныхъ на́съ ди́внѡ спа́сшаѧ.
Ра́дꙋйсѧ, царе́й на́шихъ несокрꙋши́мый щи́те: ра́дꙋйсѧ, ѻ҆те́чества на́шего благонаде́жное ᲂу҆твержде́нїе.
Ра́дꙋйсѧ, во́инства крѣ́пкаѧ защи́то, ѿ меча̀ вра̑жїѧ сохранѧ́ющаѧ: ра́дꙋйсѧ, ѿ разоре́нїѧ, плѣ́на и҆ лю́тыѧ сме́рти ст҃о́ю десни́цею твое́ю всѣ́хъ ᲂу҆пова́ющихъ на тѧ̀ и҆збавлѧ́ющаѧ.
Ра́дꙋйсѧ, бг҃олюби́ваѧ цр҃и́це бцⷣе, наде́ждо и҆ прибѣ́жище на́ше.
Конда́къ і҃
Спастѝ хотѧ̀ свою̀ дꙋ́шꙋ, бл҃гочести́вый ца́рь ѳео́дѡръ, любо́вїю бжⷭ҇твенною разжига́емь, до́брѣ подвиза́сѧ, пребыва́ѧ въ постѣ̀ и҆ моли́твѣ, и҆ вельмѝ любѧ́ше бг҃олюби́вꙋю ѡ҆би́тель, ча́сто ю҆̀ посѣща́ше. Є҆ди́ножды же съ те́плою моли́твою пред̾ чꙋдотво́рною твое́ю і҆кѡ́ною, бг҃олюби́ваѧ мт҃и, ѿ ᲂу҆се́рдїѧ своегѡ̀ въ да́ръ тебѣ̀ принесѐ носи́мый на пе́рсѣхъ свои́хъ честны́й кре́стъ, ка́меньми драги́ми ᲂу҆краше́нный. Взира́юще на сїѐ ди́вное ᲂу҆краше́нїе і҆кѡ́ны твоеѧ̀, ѽ пречⷭ҇таѧ, ра́дꙋемсѧ всѝ дꙋхо́внѡ ѡ҆ се́мъ, ка́кѡ тѧ̀, цр҃и́цꙋ и҆ влⷣчцꙋ, сла́вѧтъ и҆ чтꙋ́тъ всѝ вѣ́рнїи, и҆ молѧ́щесѧ вопїе́мъ бг҃ꙋ: а҆ллилꙋ́їа.
І҆́косъ і҃
Стѣна̀, ѡ҆гражда́ющаѧ ны̀ ѿ всѧ́кихъ болѣ́зней, быва́еши прест҃а́ѧ бцⷣе, є҆гда̀ со ᲂу҆миле́нною моли́твою призыва́емъ въ по́мощь на́шꙋ твоѐ ма́тернее милосе́рдїе. А҆́ще бо ты̀ не бы̀ предстоѧ́ла, бг҃олюби́ваѧ мт҃и, молѧ́щи ѡ҆ на́съ, кто̀ бы на́съ и҆зба́вилъ ѿ смертоно́сныхъ ра́нъ и҆ ꙗ҆́звъ всегꙋби́тельныхъ! Со ᲂу҆миле́нїемъ созерца́емъ, ка́кѡ на пꙋтѝ благода́тнагѡ ше́ствїѧ твоегѡ̀ всѝ болѧ́щїи чꙋде́снѡ и҆сцѣлѧ́хꙋсѧ и҆ стрꙋ́пи на тѣлесѣ́хъ во мгнове́нїе ѻ҆́ка врачева́хꙋсѧ. Тѣ́мже и҆ мы̀, припа́дающе къ цѣльбоно́снѣй і҆кѡ́нѣ твое́й, мо́лимъ тѧ̀, влⷣчце: не ѡ҆ста́ви ны̀ ми́лостїю твое́ю пребога́тою, и҆зба́ви ны̀ ѿ всѧ́кихъ болѣ́зней, наипа́че же ѿ смертоно́сныѧ ꙗ҆́звы и҆ па́гꙋбы. Ѽ прест҃а́ѧ бцⷣе! благоспѣ́шнѡ спасѝ на́съ и҆ поми́лꙋй съ вѣ́рою и҆ любо́вїю вопїю́щихъ тѝ и҆з̾ глꙋбины̀ дꙋшѝ:
Ра́дꙋйсѧ, страны̀ на́шеѧ правосла́вныѧ ди́внаѧ покрови́тельнице, мно́гажды ѿ бѣ́дъ и҆ напа́стей ю҆̀ и҆збавлѧ́вшаѧ: ра́дꙋйсѧ, страда́льцєвъ благода́тнымъ ᲂу҆тѣше́нїемъ вѣнча́ющаѧ и҆ разсла́блєннымъ ско́рое возставле́нїе даю́щаѧ.
Ра́дꙋйсѧ, слѣпы̑мъ прозрѣ́нїе и҆ хрѡмы́мъ ѿ недꙋ́га и҆́хъ ди́вное и҆збавле́нїе дарова́вшаѧ: ра́дꙋйсѧ, пораже́нныхъ разли́чными недꙋ́гами и҆ болѣ́зньми чꙋде́снѡ и҆сцѣлѧ́ющаѧ.
Ра́дꙋйсѧ, скорбѧ́щихъ роди́телей въ лише́нїи ча́дъ и҆́хъ ᲂу҆тѣша́ющаѧ благода́тною твое́ю по́мощїю: ра́дꙋйсѧ, цѣли́тельнице на́ша въ страда́нїихъ тѣле́сныхъ и҆ блага́ѧ ᲂу҆тѣ́шительнице въ печа́лѣхъ на́шихъ дꙋше́вныхъ.
Ра́дꙋйсѧ, бг҃олюби́ваѧ цр҃и́це бцⷣе, наде́ждо и҆ прибѣ́жище на́ше.
Конда́къ а҃і
Пѣ́нїе благода́рственное всеꙋмиле́ннѡ прино́ситъ тебѣ̀, бг҃олюби́ваѧ мт҃и, всѧ̀ страна̀ рѡссі́йскаѧ за чꙋ́дное и҆збавле́нїе ѿ смертоно́сныѧ ꙗ҆́звы, то́ль ги́бельнѡ ю҆̀ порази́вшїѧ. Свѣ́тлїи днѝ ди́вныхъ и҆сцѣле́нїй начерта́ны на сердца́хъ вѣ́рꙋющихъ, и҆ молє́нїѧ тє́плыѧ возно́сѧтсѧ на всѧ́кое лѣ́то въ па́мѧть сего̀ ра́достнагѡ торжества̀, є҆гда̀ ст҃а́ѧ і҆кѡ́на твоѧ̀, влⷣчце, съ пѣ́нїи дꙋхо́вными прино́ситсѧ въ сла́вный гра́дъ влади́мїръ. Красꙋ́йсѧ и҆ ликꙋ́й, благослове́нный гра́дѣ! торжествꙋ́йте, правовѣ́рнїи, зрѧ́ще несо́мꙋю і҆кѡ́нꙋ влады́чицы, и҆сточа́ющꙋю неизче́тныѧ и҆сцѣлє́нїѧ всѣ̑мъ притека́ющымъ къ не́й съ вѣ́рою и҆ любо́вїю! Преклонѧ́емъ и҆ мы̀ колѣ̑на пред̾ тобо́ю, прест҃а́ѧ бцⷣе, велича́емъ тѧ̀ и҆ мо́лимъ: прїимѝ ми́лостивнѡ и҆ ѿ на́съ же́ртвꙋ хвалы̀ и҆ прославлє́нїѧ, приноси́мꙋю тебѣ̀ ѿ недосто́йныхъ ра̑бъ твои́хъ, вопїю́щихъ бг҃ꙋ: А҆ллилꙋ́їа.
І҆́косъ а҃і
Свѣтоза́рнꙋю і҆кѡ́нꙋ твою̀, бг҃олюби́ваѧ мт҃и, съ благоговѣ́нїемъ зри́мъ въ бжⷭ҇твенныхъ хра́мѣхъ твои́хъ, ра́дꙋющесѧ. Кто̀ не прибѣга́ше къ тебѣ̀, влⷣчце! Кто̀ не покланѧ́шесѧ, кто̀ не лобыза́ше твоѧ̑ пречⷭ҇тыѧ стѡпы̀! Кто̀ не ᲂу҆молѧ́ше тѧ̀, застꙋ́пницꙋ на́шꙋ! ѽ пресвѧта́ѧ дѣ́во, прїимѝ вѣ́рꙋ и҆ ᲂу҆се́рдїе на́ше, напра́ви пꙋ́ть на́шъ на стезѝ и҆́стины, ᲂу҆молѝ гдⷭ҇а и҆ сн҃а твоегѡ̀, да спасе́тъ на́съ, и҆́миже вѣ́сть сꙋдьба́ми, да не поги́бнемъ въ нераска́ѧнїи ѡ҆ на́шихъ грѣхопадє́нїихъ, и҆ ᲂу҆слы́ши молє́нїѧ къ тебѣ̀ взыва́ющихъ:
Ра́дꙋйсѧ, бл҃года́тнаѧ, всѣ́ми добродѣ́тельми преꙋкраше́ннаѧ, свое́ю бл҃года́тїю на́съ не ѡ҆ставлѧ́ющаѧ: ра́дꙋйсѧ, храни́тельнице на́ша, въ ча́съ сме́ртный тмꙋ̀ вра́жїю ѿгонѧ́ющаѧ и҆ по сме́рти на́съ ᲂу҆покоева́ющаѧ.
Ра́дꙋйсѧ, ми́лостиваѧ, ми́лость свою̀ на́мъ ꙗ҆влѧ́ющаѧ въ де́нь и҆спыта́нїѧ, въ ѻ҆́ньже ѿкры́ютсѧ дѣла̀ на̑ша, дѡ́браѧ же и҆ ѕла̑ѧ: ра́дꙋйсѧ, милосе́рдаѧ, застꙋпле́нїе на́мъ посыла́ющаѧ и҆ тѣ́мъ въ бꙋ́дꙋщемъ вѣ̑чныѧ ра́дѡсти сподоблѧ́ющаѧ.
Ра́дꙋйсѧ, бг҃олюби́ваѧ цр҃и́це бцⷣе, наде́ждо и҆ прибѣ́жище на́ше.
Конда́къ в҃і
Благода́тїю бжⷭ҇твенною ѡ҆сѣнѧ́ема, ст҃а́гѡ і҆ѡа́нна предте́чꙋ съ ли́ки а҆рха́гг҃лъ зри́мъ стоѧ́щїѧ ѡ҆́крестъ пречⷭ҇тыѧ мт҃ре бг҃олюби́выѧ, вкꙋ́пѣ же ᲂу҆блажа́емъ и҆ тѧ̀, ᲂу҆го́дниче бж҃їй, помозѝ на́мъ, немѡщны́мъ, и҆мѣ́ти вѣ́рꙋ непоколеби́мꙋ, ᲂу҆́мъ чи́стъ, си̑лы и҆ произволе́нїе ѡ҆свѧща́ти дꙋ́ши на̑ша посто́мъ и҆ моли́твою, и҆ вы́нꙋ полага́ти хране́нїе ᲂу҆стѡ́мъ на́шимъ, да моли́твами влⷣчцы и҆ твои́ми сподо́бимсѧ досто́йнѡ воспѣ́ти бг҃ꙋ на́шемꙋ: а҆ллилꙋ́їа.
І҆́косъ в҃і
Пою́ще неисчє́тнаѧ зна́мєнїѧ и҆ чꙋдеса̀ твоѧ̑, прест҃а́ѧ бцⷣе, ᲂу҆миле́ннѡ припа́даемъ къ пречи́стомꙋ ѻ҆́бразꙋ твоемꙋ̀, бг҃олюби́ваѧ мт҃и, лобыза́юще є҆го̀ со стра́хомъ и҆ тре́петомъ, хва́лимъ тѧ̀ ꙗ҆́кѡ неисчерпа́емый и҆сто́чникъ бл҃года́ти, и҆ мо́лимъ: бꙋ́ди хода́таица ѡ҆ на́съ, воздви́гни рꙋ́цѣ къ сн҃ꙋ твоемꙋ̀, да вы́нꙋ въ жи́зни сѣ́й и҆ въ бꙋ́дꙋщей милосе́рдїе є҆гѡ̀ неѿстꙋ́пнѡ бꙋ́детъ ѿ на́съ, взыва́ющихъ тебѣ̀:
Ра́дꙋйсѧ, присноблаже́ннаѧ, па́че земноро́дныхъ вѣ́дꙋщаѧ бл҃же́нство пребыва́ти съ бг҃омъ: ра́дꙋйсѧ, и҆ на́съ прича́стники сегѡ̀ бл҃же́нства содѣ́лывающаѧ.
Ра́дꙋйсѧ, пренепоро́чнаѧ дв҃о, всецѣ́лѡ стѧжа́вшаѧ чистотꙋ̀, смире́нїе и҆ непоро́чность: ра́дꙋйсѧ, да́рꙋющаѧ на́мъ блага̑ѧ сїѧ̑, да бꙋ́демъ ᲂу҆гѡ́дны тебѣ̀ и҆ бг҃ꙋ.
Ра́дꙋйсѧ, всеми́лостиваѧ цр҃и́це, простира́ющаѧ на на́съ, грѣ́шныхъ, ми́лость свою̀ во всѧ́кое вре́мѧ живота̀ на́шегѡ: ра́дꙋйсѧ, чадолюби́ваѧ мт҃и, да́рꙋющаѧ на́мъ своѐ ма́тернее застꙋпле́нїе въ ча́съ сме́рти.
Ра́дꙋйсѧ, бг҃олюби́ваѧ цр҃и́це бцⷣе, наде́ждо и҆ прибѣ́жище на́ше.
Конда́къ г҃і
Ѽ мт҃и бг҃олюби́ваѧ, цр҃и́це нбⷭ҇наѧ, всемо́щнаѧ на́ша предста́тельнице, ма́лыѧ сїѧ̑ ᲂу҆слы́шавши смирє́нныѧ мольбы̑ на̑ша, при́зри на ны̀ ми́лостивымъ твои́мъ ѻ҆́комъ: бꙋ́ди на́мъ ско́раѧ застꙋ́пница въ де́нь кончи́ны на́шеѧ и҆ въ ча́съ сме́ртный ꙗ҆ви́сѧ на́мъ сама̀, пречⷭ҇таѧ, простира́ющи рꙋ́кꙋ по́мощи, ѿгонѧ́ющи дꙋхѡ́въ ѕло́бы, и҆́щꙋщихъ поглоти́ти дꙋ́шꙋ на́шꙋ при разлꙋче́нїи ѿ тѣ́ла, и҆ сподо́би на́съ въ бꙋ́дꙋщей жи́зни въ весе́лїи и҆ ра́дованїи возвели́чити и҆ просла́вити тѧ̀, ꙗ҆́кѡ пребл҃гꙋ́ю покрови́тельницꙋ на́шꙋ, да спасе́ннїи тобо́ю, въ безконе́чнѣмъ вѣ́цѣ вопїе́мъ бг҃ꙋ: а҆ллилꙋ́їа.
Повто́ръ
Сей конда́къ глаго́лется три́жды, та́же і҆́косъ а҃-й и҆ конда́къ а҃-й.
І҆́косъ а҃
А҆́гг҃лѡвъ превы́шшꙋю всѧ̑ небє́сныѧ си̑лы велича́ютъ тѧ̀, бцⷣꙋ цр҃и́цꙋ, мы́ же грѣ́шнїи на землѝ, чꙋ́дномꙋ бж҃їю ѡ҆ тебѣ̀ смотре́нїю дивѧ́щесѧ, все́ю дꙋше́ю, се́рдцемъ и҆ ᲂу҆стна́ми дерза́емъ глаго́лати:
Ра́дꙋйсѧ, бл҃гослове́ннаѧ въ жена́хъ дѣ́во бл҃года́тнаѧ: ра́дꙋйсѧ, всевы́шнѧгѡ ма́ти, дх҃а ст҃а́гѡ пребыва́нїе.
Ра́дꙋйсѧ, цр҃и́цѣ нб҃сѐ и҆ землѝ и҆ всѣ́хъ нбⷭ҇ныхъ си́лъ вы́сшаѧ: ра́дꙋйсѧ, а҆́гг҃лы чти́маѧ, ѿ серафі̑мъ воспѣва́емаѧ.
Ра́дꙋйсѧ, бл҃гословлѧ́емаѧ на нб҃сѝ и҆ сла́вимаѧ на землѝ: ра́дꙋйсѧ, вои́стиннꙋ присноблаже́ннаѧ и҆ пренепоро́чнаѧ.
Ра́дꙋйсѧ, бг҃олюби́ваѧ цр҃и́це бцⷣе, наде́ждо и҆ прибѣ́жище на́ше.
Конда́къ а҃
Взбра́нной воево́дѣ, бг҃олюби́вѣй цр҃и́цѣ, превы́сшей всѧ́кагѡ созда́нїѧ, дѣ́вѣ и҆ ма́тєри хрⷭ҇та̀ бг҃а, похва̑льнаѧ восписꙋ́емъ тѝ рабѝ твоѝ, бг҃оро́дице! Ты́ же, ꙗ҆́кѡ бг҃олюби́ваѧ и҆ всеми́лостиваѧ мт҃и, бл҃гоизво́лившаѧ ꙗ҆ви́ти пресвѣ́тлый сво́й ли́къ благовѣ́рномꙋ на́шемꙋ кн҃зю а҆ндре́ю, ѿ бѣ́дъ и҆ скорбе́й сохранѝ ны̀ и҆ хра́мъ сѣ́й, да зове́мъ тѝ:
Ра́дꙋйсѧ, бг҃олюби́ваѧ цр҃и́це бцⷣе, наде́ждо и҆ прибѣ́жище на́ше.
Моли́твы
Ѽ пречⷭ҇таѧ госпожѐ бцⷣе, мт҃и бг҃олюби́ваѧ, наде́ждо на́шего спасе́нїѧ! воззрѝ ми́лостивнѡ на предстоѧ́щыѧ съ вѣ́рою и҆ любо́вїю и҆ покланѧ́ющыѧсѧ пречи́стомꙋ ѻ҆́бразꙋ твоемꙋ̀, прїимѝ на́ше хвале́бное пѣ́нїе сїѐ и҆ проле́й те́плꙋю твою̀ моли́твꙋ ѡ҆ на́съ, грѣ́шныхъ, ко гдⷭ҇ꙋ, да, презрѣ́въ всѧ̑ на̑ша согрѣшє́нїѧ, спасе́тъ и҆ поми́лꙋетъ на́съ. Ѽ преди́внаѧ влⷣчце! покажѝ на на́съ чꙋ́дныѧ ми́лѡсти твоѧ̑: и҆зба́ви на́съ ѿ всѧ́кїѧ ско́рби, наста́ви на пꙋ́ть всѧ́кїѧ добродѣ́тели и҆ благосты́ни, спасѝ ѿ и҆скꙋше́нїй, бѣ́дъ и҆ болѣ́зней, и҆змѝ ѿ на́съ ѡ҆клевета́нїѧ и҆ ссѡ́ры, сохранѝ ѿ молнїено́снагѡ гро́ма, ѿ запале́нїѧ ѻ҆́гненнагѡ, ѿ гла́да, трꙋ́са, пото́па и҆ смертоно́сныѧ ꙗ҆́звы, пода́й на́мъ свою̀ млⷭ҇тивꙋю по́мощь на пꙋтѝ, въ мо́ри и҆ на сꙋ́шѣ, да не поги́бнемъ лю́тѣ. Ѽ всеми́лостиваѧ бг҃олюби́ваѧ мт҃и, съ тве́рдымъ ᲂу҆пова́нїемъ возсыла́емъ къ тебѣ̀ на́шꙋ ᲂу҆бо́гꙋю мл҃твꙋ! Не ѿри́ни на́шихъ сле́зъ и҆ воздыха́нїй, не забꙋ́ди на́съ во всѧ̑ дни̑ живота̀ на́шего, но всегда̀ пребыва́й съ на́ми и҆ твои́мъ застꙋпле́нїемъ и҆ хода́тайствомъ ᲂу҆ гдⷭ҇а пода́ждь на́мъ ѿра́дꙋ, ᲂу҆тѣше́нїе, защи́тꙋ и҆ по́мощь, да вы́нꙋ сла́вимъ и҆ велича́емъ пребл҃гослове́нное и҆ всепѣ́тое и҆́мѧ твоѐ. А҆ми́нь.
Ѽ чꙋ́днаѧ и҆ вы́сшаѧ всѣ́хъ тва́рей цр҃и́це бцⷣе, нбⷭ҇нагѡ цр҃ѧ̀ хрⷭ҇та̀ бг҃а на́шегѡ мт҃и! ᲂу҆слы́ши на́съ, грѣ́шныхъ и҆ недосто́йныхъ ра̑бъ твои́хъ, въ ча́съ се́й молѧ́щихсѧ и҆ припа́дающихъ къ тебѣ̀ съ воздыха́нїемъ и҆ слеза́ми и҆ ᲂу҆ми́льнѡ глаго́лющихъ: и҆зведѝ на́съ ѿ ро́ва страсте́й, влⷣчце: и҆зба́ви на́съ ѿ всѧ́кїѧ ско́рби и҆ печа́ли: ѡ҆градѝ ѿ всѧ́кїѧ напа́сти и҆ ѕлы́хъ клеве́тъ, ѿ непра́веднагѡ и҆ лю́таго навѣ́та вра́жїѧ. Мо́жеши бо, ѽ бл҃года́тнаѧ мт҃рь на́ша, не то́чїю ѿ всѧ́кагѡ ѕла̀ сохрани́ти лю́ди твоѧ̑, но и҆ всѧ́кимъ бл҃годѣѧ́нїемъ снабди́ти и҆ спастѝ: ра́звѣ тебѣ̀ и҆ны́ѧ предста́тельницы въ бѣда́хъ и҆ ѡ҆бстоѧ́нїихъ и҆ те́плыѧ хода́таицы ѡ҆ на́съ, грѣ́шныхъ, не и҆́мамы къ сн҃ꙋ твоемꙋ̀, хрⷭ҇тꙋ̀ бг҃ꙋ на́шемꙋ, є҆го́же ᲂу҆молѝ, влады́чицѣ, да, спасе́ннїи тобо́ю, сла́вимъ и҆ въ бꙋ́дꙋщемъ вѣ́цѣ всест҃о́е и҆́мѧ сн҃а твоегѡ̀ и҆ бг҃а на́шего, кꙋ́пнѡ со ѻ҆ц҃е́мъ и҆ ст҃ы́мъ дх҃омъ, ны́нѣ и҆ въ безконє́чныѧ вѣ́ки. А҆ми́нь.