Православный календарь
Размер шрифта:

Канѡ́нъ

Канѡ́нъ прест҃ѣ́й бцⷣѣ въ че́сть чꙋдотво́рныѧ є҆ѧ̀ і҆кѡ́ны и҆менꙋ́емыѧ бг҃олюби́выѧ.

Боголюбской иконы Божией Матери, в Боголюбове, Владимирской обл (1155) 1 июля 2026
Глас 4

Пѣ́снь а҃

І҆рмо́съ

Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ чꙋдеса̀.

Тропа́рь

Бл҃гоговѣ́ютъ пред̾ тобо́ю, бцⷣе, а҆́гг҃лѡвъ нача̑льницы, и҆ ст҃ы́хъ чи́ни че́стнѡ слꙋ́жатъ тѝ, пра́веднїи красꙋ́ютсѧ, кн҃зь же а҆ндре́й мо́литсѧ, и҆ гра́дъ влади́мїръ похвалѧ́етсѧ свѣ́тлѡ. мы́ же грѣ́шнїи, припа́даѧ къ твое́й ст҃о́й і҆кѡ́нѣ, бг҃олюби́ваѧ, млⷭ҇ти про́симъ: ѡ҆зарѝ на́ша сердца̀, прест҃а́ѧ дв҃о бцⷣе.

Тропа́рь

Кн҃зь а҆ндре́й вопїѧ́ше со слеза́ми: прест҃а́ѧ цр҃и́це бцⷣе, ᲂу҆пова́нїе хрⷭ҇тїа́нѡмъ, ᲂу҆молѝ сн҃а своего̀, хрⷭ҇та̀ бг҃а на́шего ѡ҆ держа́вѣ твое́й: ты́ бо и҆зво́лила є҆сѝ въ предѣ́лѣхъ страны̀ влади́мїрскїѧ, ѻ҆би́тели свое́й сла́внѡ созда́тисѧ во и҆́мѧ твоѐ, бг҃олюби́ваѧ.

Тропа́рь

Прїиди́те, хрⷭ҇тоимени́тїи лю́дїе, ᲂу҆мы̀ та́йнѡ ѡ҆чи́стившесѧ, притеце́мъ въ хра́мъ мт҃ре хрⷭ҇та̀ бг҃а на́шегѡ, бг҃олюби́мое мѣ́сто страны̀ влади́мїрскїѧ, ꙗ҆́кѡ бг҃опрїѧ́тное селе́нїе, ви́дѧще: въ не́мъ бо ꙗ҆влѧ́етъ на́мъ свою̀ ми́лость влⷣчца.

Тропа́рь

Под̾ кро́въ тво́й, бцⷣе дв҃о, прибѣга́емъ всѝ ро́ди чл҃вѣ́честїи, просвѣтѝ, бг҃олюби́ваѧ, мѣ́сто ст҃о́е торжества̀ твоегѡ̀: и҆ мы̀, грѣ́шнїи рабѝ твоѝ, молѧ́щесѧ пречⷭ҇тѣй твое́й і҆кѡ́нѣ, про́симъ ѿ тебѐ прїѧ́ти вєли́кїѧ ми́лѡсти.

Пѣ́снь г҃

І҆рмо́съ

Твоѧ̑ пѣсносло́вцы бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ, дх҃о́внѡ ᲂу҆твердѝ: въ бж҃е́ственнѣй твое́й сла́вѣ вѣнцє́въ сла́вы сподо́би.

Тропа́рь

Застꙋ́пница и҆ покро́въ гра́дꙋ влади́мїрꙋ, и҆ всѧ́комꙋ гра́дꙋ и҆ странѣ̀, бꙋ́ди на́мъ помо́щница и҆ прибѣ́жище, бг҃олюби́ваѧ, всѣ́хъ на́съ застꙋпѝ, гпⷭ҇жѐ цр҃и́це и҆ бцⷣе, и҆ во всѧ́кихъ ѕлы́хъ мѣ́стѣхъ вѣ̑рныѧ сохранѝ.

Тропа́рь

Прїимѝ хвалꙋ̀ ѿ ᲂу҆́стъ на́шихъ недосто́йныхъ, ѽ прест҃а́ѧ бцⷣе дв҃о бг҃олюби́ваѧ, наде́ждо на́ша и҆ похвало̀, покланѧ́емсѧ твоемꙋ̀ пресла́вномꙋ ѻ҆́бразꙋ: мольбꙋ̀ прїимѝ ѡ҆ рабѣ́хъ твои́хъ.

Тропа́рь

Пречⷭ҇тѣи рꙋ́цѣ твоѝ, цр҃и́це и҆ бцⷣе, ми́лостивнѡ воздви́гни къ сн҃ꙋ твоемꙋ̀ и҆ бг҃ꙋ на́шемꙋ, просѧ́щи ѿпꙋще́нїѧ согрѣше́нїй на́шихъ, и҆ житїѐ на́ше и҆спра́ви, и҆ всѧ́кїѧ бл҃года́ти и҆спо́лни на́съ и҆ млⷭ҇ти сподо́би.

Тропа́рь

Прест҃а́ѧ дв҃о, мт҃и бг҃олюби́ваѧ, сохранѝ рабы̑ твоѧ̑ ѿ всѧ́кїѧ сопроти́вныѧ си́лы, и҆ и҆зба́ви ѿ всѧ́кїѧ напа́сти, и҆ ра́дость мі́рꙋ сотворѝ дꙋше́внꙋю и҆ тѣле́снꙋю, и҆ пре́зри на́мъ всѧ̑ согрѣшє́нїѧ.

Пѣ́снь д҃

І҆рмо́съ

Сѣдѧ́й въ сла́вѣ, на прⷭ҇то́лѣ бж҃ества̀, во ѻ҆́блацѣ ле́гцѣ прїи́де і҆и҃съ пребж҃е́ственный, нетлѣ́нною дла́нїю, и҆ спасѐ зовꙋ́щыѧ: сла́ва хрⷭ҇тѐ, си́лѣ твое́й.

Тропа́рь

Є҆ѵⷢ҇лїа хрⷭ҇то́ва бг҃огла́сный списа́тель лꙋка̀ написа̀ ѻ҆́бразъ тво́й чꙋ́дный, всенепоро́чнаѧ влⷣчце, и҆ млⷣнца тѝ превѣ́чнаго на рꙋкꙋ̀ и҆з̾ѻбразѝ: ст҃ы́й же кн҃зь а҆ндре́й въ нощно́мъ видѣ́нїи ᲂу҆зрѣ́вши тѧ̀ молѧ́щꙋюсѧ за ны̀, дадѐ на́мъ ѻ҆́бразъ твоегѡ̀ моле́нїѧ, къ немꙋ́же притека́ющыѧ бѣ́дъ и҆ напа́стей и҆збавлѧ́еши.

Тропа́рь

Ѽ прест҃а́ѧ дв҃о бцⷣе, ты̀ и҆зво́лила є҆сѝ и҆зы́ти и҆з̾ гре́ческїѧ страны̀ въ чꙋдотво́рнѣмъ ѻ҆́бразѣ твое́мъ, и҆ доитѝ до ст҃а́гѡ мѣ́ста, и҆дѣ́же и҆ ꙗ҆ви́ласѧ є҆сѝ кн҃зю а҆ндре́ю: ѻ҆́нъ же молѧ́сѧ тебѣ̀, со слеза́ми вопїѧ́ше: прест҃а́ѧ дв҃о бцⷣе, и҆зба́ви на́съ ѿ всѧ́кихъ бѣ́дъ и҆ скорбе́й.

Тропа́рь

На тѧ̀ ᲂу҆пова́нїе возложи́хомъ, бг҃олюби́ваѧ мт҃и дв҃о, предста́тельницꙋ тѧ̀ живота̀ тве́рдꙋ и҆ непоколеби́мꙋ стѧжа́хомъ, молѝ ѡ҆ на́съ рабѣ́хъ твои́хъ всеще́драго бг҃а.

Тропа́рь

Ты̀ є҆сѝ похвала̀ и҆ вѣне́цъ ст҃ы̑мъ всѣ̑мъ, всѝ на тѧ̀ по бз҃ѣ наде́ждꙋ возложи́хомъ, и҆ тебѣ̀ мо́лимсѧ, бг҃олюби́ваѧ цр҃и́це, бж҃їѧ мт҃и, помо́щнице грѣ̑шнымъ и҆ спасе́нїе рабѡ́мъ твои́мъ.

Пѣ́снь є҃

І҆рмо́съ

Оу҆жасо́шасѧ всѧ́чєскаѧ ѡ҆ бж҃е́ственнѣй сла́вѣ твое́й: ты́ бо неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ надъ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ.

Тропа́рь

Всѧ́кое мѣ́сто, прест҃а́ѧ дв҃о бцⷣе, свое́ю ми́лостїю просвѣща́еши, гра́дꙋ же влади́мїрꙋ и҆ мѣ́стꙋ бг҃олюби́момꙋ, вели́каѧ похвала̀ и҆ ᲂу҆твержде́нїе, въ бѣда́хъ сꙋ́щымъ ско́раѧ помо́щница.

Тропа́рь

Проповѣ́дꙋетъ пресла́внѡ вєли́чїѧ твоѧ̑ ла́ѵра, ꙗ҆́же во твоѐ и҆́мѧ нача́ло прїѧ̀, мт҃и бж҃їѧ бг҃олюби́ваѧ: хва́лѧтъ молє́бницы, и҆ велича́ютъ чꙋдотво́рный ѻ҆́бразъ твоегѡ̀ моле́нїѧ ѡ҆ на́съ и҆ гл҃го́лютъ: ᲂу҆твердѝ гдⷭ҇и ѻ҆би́тель сїю̀.

Тропа́рь

Приспѣ̀ дне́сь па́мѧть твоѧ̀, кнѧ́же а҆ндре́е, ра́дꙋетсѧ пресла́вный гра́дъ влади́мїръ, и҆ бг҃олюби́мое мѣ́сто красꙋ́етсѧ зовꙋ́ще: прест҃а́ѧ дв҃о бцⷣе, спасѝ на́съ и҆ и҆зба́ви ѿ всѧ́кїѧ нꙋ́жды и҆ печа́ли.

Тропа́рь

Мр҃і́е, злата́ѧ кади́льнице, стра̑сти па̑гꙋбныѧ ѿженѝ ѿ на́съ, и҆ ᲂу҆твердѝ на́съ непоколеби́мыхъ, прест҃а́ѧ дв҃о бг҃олюби́ваѧ, не и҆́мамы бо и҆ны́ѧ по́мощи ра́звѣ тебѐ, влⷣчце.

Пѣ́снь ѕ҃

І҆рмо́съ

Бж҃е́ственное сїѐ и҆ всечестно́е соверша́юще пра́зднество, бг҃омꙋ́дрїи, бг҃ома́тере, прїиди́те рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.

Тропа́рь

Прише́ствїемъ честна́гѡ ѻ҆́браза твоегѡ̀, цр҃и́це бцⷣе, ѡ҆свѧти́ла є҆сѝ мѣ́сто бг҃олюби́мое, на не́мже ѻ҆би́тель свою̀ ѿ дре́внихъ лѣ́тъ сохранѧ́еши, и҆дѣ́же и҆ на́съ сподо́би тебѐ пѣ́ти чи́стыми се́рдцы.

Тропа́рь

Не ᲂу҆жаса́йсѧ кн҃же а҆ндре́е, и҆ не диви́сѧ, ви́дѣвъ ѻ҆́бразъ пречⷭ҇тыѧ бцⷣы, ѿ гре́ческїѧ страны̀ и҆зше́дшїй, доити́ же гра́да росто́ва не и҆зво́лившїй: се́ бо до́йде до мѣ́ста ст҃а́гѡ, свы́ше пронарече́ннагѡ, и҆ подви́же вопи́ти тебѐ къ пребл҃гослове́ннѣй: ѽ всеми́лостиваѧ! молѝ ѡ҆ на́съ сн҃а своего̀, хрⷭ҇та̀ бг҃а на́шего.

Тропа́рь

Воздви́гнемъ рꙋ́цѣ своѝ горѣ̀, и҆ вознесе́мъ хвалє́нїѧ гдⷭ҇ви: се́ бо вои́стиннꙋ прїи́де пречⷭ҇таѧ дв҃а и҆ бцⷣа бг҃олюби́ваѧ, всѧ̀ ѡ҆зарѧ́ѧ вѣ̑рныѧ бж҃е́ственною свое́ю і҆кѡ́ною.

Тропа́рь

Хра́мъ живы́й и҆ ѡ҆сщ҃е́нный сꙋ́щи, пренепоро́чнаѧ, пребезнача́льное сло́во пло́тїю родила̀ є҆сѝ, безслове́сїѧ мі́ръ и҆зба́вльшее: и҆зба́ви и҆ на́съ ѿ напа́стей твои́ми моли́твами, бг҃олюби́ваѧ.

Пѣ́снь з҃

І҆рмо́съ

Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆тцє́въ гдⷭ҇ь и҆ бг҃ъ бл҃гослове́нъ є҆сѝ.

Тропа́рь

Бг҃олюби́вомꙋ житїю̀ первонача́льникъ и҆ наста́вникъ кн҃же а҆ндре́е бы́лъ є҆сѝ, и҆ моле́бнѡ подвиза́лсѧ є҆сѝ пред̾ пречꙋ́днымъ ѻ҆́бразомъ бж҃їѧ мт҃ре: свѣтлѣ́йши бо сл҃нца возсїѧ̀ пречⷭ҇тна́ѧ і҆кѡ́на прест҃ы́ѧ бцⷣы, є҆́йже моли́сѧ спасти́сѧ на́мъ.

Тропа́рь

Херꙋві̑мъ и҆ серафі̑мъ превы́шши ꙗ҆ви́ласѧ є҆сѝ бцⷣе: ты́ бо є҆ди́на прїѧ́ла є҆сѝ невмѣсти́маго бг҃а во ᲂу҆тро́бѣ свое́й, и҆ бл҃говоли́ла доитѝ ѻ҆́бразꙋ твоемꙋ̀ бг҃олюби́магѡ мѣ́ста. мы́ же рабѝ твоѝ всѝ вѣ́рнїи пѣ́сньми тѧ̀ ᲂу҆блажа́емъ.

Тропа́рь

Прест҃а́ѧ гпⷭ҇жѐ дв҃о бцⷣе, мт҃и хрⷭ҇та̀ бг҃а на́шегѡ, всѧ́кѡ мо́жеши на́мъ бы́ти помо́щница: посѣти́вшаѧ чꙋ́днымъ ѻ҆́бразомъ твои́мъ бг҃олюби́мое мѣ́сто сїѐ, бг҃олюби́ваѧ влⷣчце, посѣтѝ и҆ на́съ, и҆ не ѡ҆ста́ви, ꙗ҆́коже сама̀ вѣ́си, съ вѣ́рою приходѧ́щихъ къ тебѣ̀.

Тропа́рь

Пристꙋпѝ къ чꙋ́дномꙋ ѻ҆́бразꙋ бг҃олюби́выѧ бг҃ома́тере вели́кїй кн҃зь а҆ндре́й, и҆ просте́ръ рꙋ́цѣ своѝ взе́мъ ꙗ҆́кѡ безцѣ́нное сокро́вище, и҆ возвѣстѝ ѻ҆ц҃ꙋ̀ своемꙋ̀, ка́кѡ чꙋде́снѡ и҆з̾ вышегра́да посѣтѝ мѣ́сто бг҃олюби́мое.

Пѣ́снь и҃

І҆рмо́съ

Ѻ҆́троки бл҃гочєсти́выѧ въ пещѝ рождество̀ бг҃оро́дичо сп҃сло̀ є҆́сть: тогда̀ ᲂу҆́бѡ ѻ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.

Тропа́рь

Прїимѝ моле́нїе на́ше, пречⷭ҇таѧ бцⷣе, сохранѝ и҆ застꙋпѝ ѿ всѧ́кагѡ ѕла̀, и҆ не ѿри́ни на́съ ѿ своегѡ̀ чⷭ҇тна́гѡ ѻ҆́браза: тѧ́ бо и҆́мамы моли́твенницꙋ те́плꙋ и҆ стѣ́нꙋ тве́рдꙋ и҆ покро́въ нерꙋши́мый, и҆ землѝ на́шей вели́кꙋю похвалꙋ̀ и҆ ᲂу҆твержде́нїе.

Тропа́рь

Ра́дꙋемсѧ дꙋше́ю и҆ весели́мсѧ се́рдцемъ, взира́юще на ѻ҆́бразъ тво́й, прест҃а́ѧ бцⷣе бг҃олюби́ваѧ, и҆мꙋ́ще тѧ̀ держа́вꙋ непобѣди́мꙋю и҆ ᲂу҆твержде́нїе непоколеби́мое, наде́ждꙋ и҆ ᲂу҆пова́нїе, и҆ дꙋша́мъ на́шымъ спасе́нїе.

Тропа́рь

Помо́щница є҆сѝ въ ско́рбехъ и҆ въ напа́стехъ и҆ бѣда́хъ, и҆ въ темни́цахъ и҆збавле́нїе, на бра́ни и҆ въ ра́техъ застꙋпле́нїе, бг҃оѻтрокови́це чⷭ҇таѧ, и҆ и҆збавле́нїе всѣ̑мъ вѣ̑рнымъ человѣ́кѡмъ и҆ похвала̀, и҆ гра́дꙋ на́шемꙋ вели́кое ᲂу҆твержде́нїе.

Пѣ́снь ѳ҃

І҆рмо́съ

Всѧ́къ земноро́дный да взыгра́етсѧ дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее сщ҃е́нное торжество̀ бг҃ома́тере, и҆ да вопїе́тъ, ра́дꙋйсѧ всеблаже́ннаѧ бцⷣе, чⷭ҇таѧ приснодв҃о.

Тропа́рь

Сѐ тебѣ̀, прест҃а́ѧ цр҃и́це бг҃олюби́ваѧ, посыла́етсѧ съ нб҃сѐ а҆рха́гг҃лъ гаврїи́лъ, цр҃ѧ̀ всѣ́хъ и҆ бг҃а провозвѣсти́ти прише́ствїе, и҆ возгласи́ти тебѣ̀: ра́дꙋйсѧ бл҃года́тнаѧ, гдⷭ҇ь съ тобо́ю.

Тропа́рь

Ра́дꙋйсѧ, мт҃и дв҃о, ра́дꙋйсѧ пречⷭ҇таѧ, прїѧ́телище бж҃їе, ра́дꙋйсѧ свѣ́щниче свѣ́та, а҆да́мово воззва́нїе и҆ є҆́ѵино и҆збавле́нїе, горо̀ ст҃а́ѧ и҆ пресла́внаѧ, и҆ сщ҃е́нный черто́же.

Тропа́рь

Ты̀ є҆сѝ похвала̀ хрⷭ҇тїа́нѡмъ влⷣчце, ты̀ ѻ҆рꙋ́жїе на врагѝ и҆ стѣна̀, къ тебѣ̀ прибѣга́емъ, тѧ̀ и҆ ны́нѣ на по́мощь призыва́емъ: гпⷭ҇жѐ цр҃и́це бцⷣе, сп҃сѝ и҆ сохранѝ правовѣ̑рныѧ лю́ди твоѧ̑, бг҃олюби́ваѧ.

Тропа́рь

Ѽ всеми́лостиваѧ хрⷭ҇тїа́нѡмъ помо́щнице не мо́жетъ тѧ̀ воспѣ́ти досто́йнѡ ᲂу҆́мъ чл҃вѣ́ческїй и҆ а҆́гг҃льскїй, ꙗ҆́кѡ всеѧ̀ тва́ри чⷭ҇тнѣ́йшꙋю, нбⷭ҇ныхъ и҆ земны́хъ си́лъ сла́внѣйшꙋю: всѣ́хъ бо творца̀ родила̀ є҆сѝ и҆ бг҃а: но, ѽ влⷣчце! прїимѝ ми́лостивнѡ на́ше моле́нїе, всегда́ бо на тѧ̀ надѣ́емсѧ.