Православный календарь
Размер шрифта:

Ака́ѳістъ

А҆ка́ѳїстъ прест҃ѣ́й бцⷣѣ пред̾ і҆кѡ́ною є҆ѧ̀ пю́хтицкаѧ.

Сретение Пюхтицкой иконы Божией Матери, именуемой «У источника» (1946) 1 июля 2026

Конда́къ а҃

И҆збра́ннꙋю ѿ всѣ́хъ родѡ́въ бж҃їю мт҃рь и҆ цр҃и́цꙋ нбⷭ҇нꙋю, непреста́ннѡ ᲂу҆ прⷭ҇то́ла сы́на твоегѡ̀ молѧ́щꙋюсѧ ѡ҆ на́съ, съ любо́вїю благода́рнѡ восхва́лимъ. восхотѣ́въ во всѣ́хъ концѣ́хъ землѝ ви́дѣти прославле́нїе вели́чїѧ бж҃їѧ, возблаговоли́ла є҆сѝ, преблагослове́ннаѧ, воздви́гнꙋти сп҃си̑тельныѧ ѡ҆би́тєли своѧ̑. та́кѡ и҆ воззрѣ́въ на страда̑нїѧ правосла́вныхъ страны̀ прибалті́йскїѧ, посѣти́ла є҆сѝ кра́й се́й свое́ю бл҃года́тїю: да ᲂу҆те́шенныѧ тобо́ю зове́мъ тѝ си́це:

Ра́дꙋйсѧ, любвеѻби́льнаѧ, сле́зы серде́цъ на́шихъ ми́лостивнѡ ѡ҆сꙋша́ющаѧ.

І҆́косъ а҃

А҆́гг҃ли на нб҃сѝ и҆ па́стыри є҆стла́ндскїѧ ве́си ѕѣлѡ̀ ᲂу҆диви́шасѧ, є҆гда̀ ᲂу҆зрѣ́ша мт҃рь бж҃їю на горѣ̀ стоѧ́щꙋю и҆ рꙋ́цѣ до́лꙋ простира́ющꙋю, ᲂу҆казꙋ́юще на мѣ́сто сїѐ свѧто́е, промысли́тельнѣ и҆мѣ́ющее просла́витисѧ. тѣ́мъ же и҆ мы̀, ѡ҆бра́дованнїи вели́цею твое́ю къ на́мъ ми́лостїю, вопїе́мъ тѝ:

Ра́дꙋйсѧ, жре́бїемъ свои́мъ го́рꙋ а҆ѳѡ́нскꙋю наименова́вшаѧ: ра́дꙋйсѧ, мно́гими чꙋдесы̀ і҆кѡ́ны твоѧ̑ ѡ҆знаменова́вшаѧ.

Ра́дꙋйсѧ, чꙋдотво́рною і҆кѡ́ною честна́гѡ ᲂу҆спе́нїѧ твоегѡ̀ кі́ево-пече́рскꙋю ла́ѵрꙋ просла́вившаѧ: ра́дꙋйсѧ, зна́менїемъ своеѧ̀ бжⷭ҇твенныѧ стопы̀ поча́евскꙋю ла́ѵрꙋ ѡ҆свѧти́вшаѧ.

Ра́дꙋйсѧ, бг҃оро́дицкꙋю го́рꙋ въ пю́хтицахъ сїѡ́номъ прибалті́йскагѡ кра́ѧ содѣ́лавшаѧ: ра́дꙋйсѧ, ᲂу҆спе́нскꙋю ѡ҆би́тель здѣ̀ ѡ҆снова́вшаѧ и҆ вели́каго па́стырѧ свѧта́го пра́веднаго і҆ѡа́нна кроншта́дтскаго є҆́й дарова́вшаѧ.

Ра́дꙋйсѧ, любвеѻби́льнаѧ, сле́зы серде́цъ на́шихъ ми́лостивнѡ ѡ҆сꙋша́ющаѧ.

Конда́къ в҃

Ви́дѧще правосла́вныхъ тве́рдое вѣ́ры и҆сповѣ́данїе и҆ же́ртвенное и҆́хъ, да́же до кро́ви, є҆́рєси лю́теровой противостоѧ́нїе, нечести́вїи тевто́ны въ є҆стла́ндстѣй сторонѣ̀ правосла́вїе же́стокѡ ᲂу҆гнета́ша, свѧті́и хра́мы сожига́ша и҆ разорѧ́ша: и҆ всꙋ́е преща́ша вѣ̑рнымъ пра́во сла́вити хрⷭ҇та̀ бг҃а на́шего и҆ воспѣва́ти є҆мꙋ̀: А҆ллилꙋ́їа.

І҆́косъ в҃

Разꙋмѣ́въ промышле́нїе бж҃їе въ ди́внѣмъ ꙗ҆вле́нїи твое́мъ на горѣ̀ є҆стла́ндскимъ па́стырємъ, лю́дїе го́рꙋ тꙋ̀ свѧто́ю, пю́хтицкою, прозва́ша и҆ милосе́рдїе твоѐ кꙋ́пнѡ воспѣ́ша:

Ра́дꙋйсѧ, ми́лостивымъ твои́мъ ѻ҆́комъ на ᲂу҆гнете́нїе вѣ́рныхъ рабѡ́въ твои́хъ призрѣ́вшаѧ: ра́дꙋйсѧ, ско́рби и҆́хъ ско́ро ѿмсти́вшаѧ.

Ра́дꙋйсѧ, прест҃а́ѧ ма́ти бж҃їѧ, под̾ благі́й покро́въ всѣ́хъ собира́ющаѧ: ра́дꙋйсѧ, без̾ ст҃ы́ѧ по́мощи своеѧ̀ никого̀ не ѡ҆ставлѧ́ющаѧ.

Ра́дꙋйсѧ, мнѡ́гаѧ лѣ̑та ѿра́дою и҆ ᲂу҆тѣше́нїемъ пю́хтицкагѡ кра́ѧ и҆ ѻ҆кре́стныхъ ве́сей пребыва́ющаѧ: ра́дꙋйсѧ, наде́ждꙋ сп҃се́нїѧ всѣ̑мъ подаю́щаѧ. Ра́дꙋйсѧ, любвеѻби́льнаѧ, сле́зы серде́цъ на́шихъ ми́лостивнѡ ѡ҆сꙋша́ющаѧ.

Конда́къ г҃

Госпожꙋ̀ пречꙋ́днꙋю ᲂу҆зрѣ́вши, лазꙋ́рнымъ свѣ́томъ ѡ҆заре́ннꙋю, ᲂу҆стреми́сѧ къ не́й є҆стла́ндскїй па́стырь. но и҆счезнове́нїемъ видѣ́нїѧ и҆ па́ки є҆го̀ поѧвле́нїемъ ᲂу҆мꙋдре́нъ бы́въ въ є҆гѡ̀ бжⷭ҇твенности, возопѝ со стра́хомъ: А҆ллилꙋ́їа.

І҆́косъ г҃

Ди́вное видѣ́нїе дрꙋгѡ́мъ и҆ сро́дникѡмъ стремѧ́сѧ показа́ти, призва̀ и҆́хъ па́стырь, вкꙋ́пѣ съ ни́мъ, воззрѣ́ти на госпожꙋ̀ пречꙋ́днꙋю, на верхꙋ̀ горы̀ стоѧ́щꙋю. ви́дѣвше же є҆ѧ̀ и҆счезнове́нїе по и҆́хъ приближе́нїи и҆ свѣтоза́рное є҆ѧ̀ сїѧ́нїе по и҆́хъ ᲂу҆дале́нїи, со стра́хомъ бж҃їимъ воспѣ́ша си́це:

Ра́дꙋйсѧ, гѡ́рдымъ проти̑вѧщаѧсѧ: ра́дꙋйсѧ, смире́ннымъ блгⷣть подаю́щаѧ.

Ра́дꙋйсѧ, дѣ́тскꙋю вѣ́рꙋ лжеиме́нномꙋ ра́зꙋмꙋ предпочита́ющаѧ: ра́дꙋйсѧ, въ чꙋдесѣ́хъ и҆ видѣ́нїѧхъ свои́хъ то́кмѡ чи̑стымъ дꙋша́мъ ѿкрыва́ющаѧсѧ.

Ра́дꙋйсѧ, вѣ́ро, наде́ждо, любы̀ и҆ мꙋ́дросте хрⷭ҇тїа́нскїѧ: ра́дꙋйсѧ покро́ве, не кры́ющїйсѧ ѿ притека́нїѧ взыскꙋ́ющихъ тѧ̀.

Ра́дꙋйсѧ, любвеѻби́льнаѧ, сле́зы серде́цъ на́шихъ ми́лостивнѡ ѡ҆сꙋша́ющаѧ.

Конда́къ д҃

Бꙋ́рю внꙋ́трь и҆мѣ́ѧ помышле́нїй сꙋмни́тельныхъ, селѧ́не ве́си се́й на ве́рхъ горы̀ теко́ша и҆, доше́дше до мѣ́ста стоѧ́нїѧ чꙋ́дной госпожѝ лазо́ревой, въ расще́лине дꙋ́ба і҆кѡ́нꙋ ᲂу҆спе́нїѧ бж҃їей мт҃ри ѡ҆брѣто́ша и҆ го́рꙋ сїю̀ бг҃оро́дицкою прозва́ша. съ то́й поры̀ ᲂу҆ дꙋ́ба, ꙗ҆вле́нїемъ ст҃ы́ѧ і҆кѡ́ны твоеѧ̀ просла́вленнагѡ, часо́вню длѧ хране́нїѧ є҆ѧ̀ лю́дїе правосла̑вныѧ воздвиго́ша и҆ кре́стными хода́ми ю҆̀ почита́ша, кꙋ́пнѡ тѧ̀, пречⷭ҇таѧ, сла́вѧще и҆ воспѣва́юще бг҃ꙋ: А҆ллилꙋ́їа.

І҆́косъ д҃

Слы́шавше ѡ҆ чꙋ́де ꙗ҆вле́нїѧ мт҃ри бж҃їей на бг҃оро́дицкой горѣ̀ въ є҆стла́ндїи, стека́шасѧ лю́дїе со всѣ́хъ сторо́нъ землѝ рꙋ́сскїѧ, ра́довахꙋсѧ ви́дѣвше но́вое ꙗ҆вле́нїе милосе́рдїѧ твоегѡ̀, ѽ бг҃ома́ти. сегѡ̀ ра́ди бл҃года́рственнѡ вопїе́мъ тѝ си́це:

Ра́дꙋйсѧ, преди́внаѧ госпожѐ, на сп҃се́нїе правосла́вныхъ є҆стла́ндскагѡ кра́ѧ ꙗ҆ви́вшаѧсѧ: ра́дꙋйсѧ, ми́лость свою̀ лю́демъ твои̑мъ ниспосла́вшаѧ.

Ра́дꙋйсѧ, і҆кѡ́нꙋ ст҃ꙋ́ю свою̀ вѣ́рнымъ на поклоне́нїе дарова́вшаѧ: ра́дꙋйсѧ, зна́менїемъ мно́гихъ чꙋдотворе́нїй ю҆̀ просла́вившаѧ.

Ра́дꙋйсѧ, мѣ́стомъ бл҃гочести́выхъ размышле́нїй дꙋ́бъ, ѡ҆свѧще́нный твои́мъ ꙗ҆вле́нїемъ, содѣ́лавшаѧ: ра́дꙋйсѧ, приста́нищемъ ско́рагѡ слы́шанїѧ та́йныхъ и҆ сокрꙋше́нныхъ моли́твъ часо́вню, храни́вшꙋю ст҃ꙋ́ю і҆кѡ́нꙋ твою̀, ѡ҆щꙋти́мѡ ꙗ҆ви́вшаѧ.

Ра́дꙋйсѧ, любвеѻби́льнаѧ, сле́зы серде́цъ на́шихъ ми́лостивнѡ ѡ҆сꙋша́ющаѧ.

Конда́къ є҃

Хотѧ́щꙋ правосла̑внымъ лю́демъ є҆стла́ндскїѧ стороны̀ да́ти ѡ҆би́лїе ви́димыѧ бл҃года́ти, чрез̾ цѣльбоно́снꙋю во́дꙋ свѧта́гѡ и҆сто́чника подава́емой, пред̾ ѻ҆чесы̑ па́стырей на горѣ̀ стоѧ́ща, просте́ртыми дла́ньми рꙋ́къ твои́хъ на и҆сто́чникъ се́й ᲂу҆каза́ла є҆сѝ. тѣ́мъ же благода́рни сꙋ́щѣ за таковꙋ́ю ми́лость, ѿ тебє̀ на́мъ ꙗ҆вле́ннꙋю, воспѣва́емъ бг҃ꙋ: А҆ллилꙋ́їа.

І҆́косъ є҃

Всѧ̑ и҆спо́лнисѧ ра́дости сла́вномꙋ и҆сто́чникꙋ, при горѣ̀ пю́хтицкой лю́демъ дарова́нномꙋ, въ кꙋпѣ́ли є҆гѡ̀ съ вѣ́рою ѡ҆мыва́ющымсѧ, бл҃года́ть и҆ цѣльбꙋ̀ ще́дрѡ подаю́щемꙋ. сегѡ̀ ра́ди, со бл҃годаре́нїемъ вопїе́мъ тѝ, ра́дости на́шей, и҆з̾ бе́здны грѣха̀ на́съ воскрылѧ́ющей:

Ра́дꙋйсѧ, ми́лостивѡ прїе́млющаѧ дꙋ́ши, къ бг҃ꙋ взыва́ющыѧ: ра́дꙋйсѧ, по́мощь смире́ннымъ неви́димѡ подаю́щаѧ.

Ра́дꙋйсѧ, и҆сцѣле́нїе не то́кмѡ тѣле́сныхъ, но и҆ дꙋше́вныхъ ꙗ҆́звъ ѿ ст҃а́гѡ и҆сто́чника и҆злива́ющаѧ: ра́дꙋйсѧ, бл҃года́ть свою̀ во ст҃ѣ́й водѣ̀, по все́й рѡссі́йстѣй землѝ богомо́льцами разноси́мой, подаю́щаѧ.

Ра́дꙋйсѧ, вѣ́рꙋ чи́стыхъ серде́цъ ᲂу҆ свѧта́гѡ и҆сто́чника ᲂу҆крѣплѧ́ющаѧ: ра́дꙋйсѧ, дꙋ́ши жа́ждꙋщихъ къ бг҃ꙋ крѣ́пкомꙋ, живо́мꙋ ѿ конє́цъ землѝ незри́мѡ въ ѡ҆би́тель свою̀ собира́ющаѧ.

Ра́дꙋйсѧ, любвеѻби́льнаѧ, сле́зы серде́цъ на́шихъ ми́лостивнѡ ѡ҆сꙋша́ющаѧ.

Конда́къ ѕ҃

Бг҃оте́чнꙋю ѕвѣздꙋ̀, і҆кѡ́нꙋ твою̀ чꙋдотво́рнꙋю, тевто́ны зрѧ́хꙋ правосла́вными почита́емꙋ, восхотѣ́ша є҆́ресь лю́теровꙋ здѣ̀ насади́ти и҆ свѧто́е мѣ́сто разори́ти. лю́дїе же правосла́внїи къ тебѣ̀, ма́ти милосе́рднаѧ, возопи́ша и҆ принѧ́ти го́рꙋ сїю̀ под̾ покро́въ сво́й проси́ша, воспѣ́въ бг҃ꙋ: А҆ллилꙋ́їа.

І҆́косъ ѕ҃

Ви́дѧ правосла́вїе въ є҆стла́ндїи попира́емо, а҆ наро́дъ тевто́нами ᲂу҆гнѣта́емь, ца́рь рѡссі́йскїй, вели́кїй пе́тръ, съ пѡлкѝ свои́ми ᲂу҆стреми́лсѧ є҆сѝ на кра́й прибалті́йскїй и҆ покорѝ и҆̀. та́кѡ ᲂу҆слы́шана бы́ша мл҃тва къ цр҃и́цѣ нбⷭ҇нѣй ѡ҆ застꙋпле́нїи правосла́вїѧ въ странѣ̀ се́й. сегѡ̀ ра́ди вѣ́рнїи возопи́ша тѝ си́це:

Ра́дꙋйсѧ, вѣ́ры правосла́вныѧ непобѣди́маѧ побо́рнице: ра́дꙋйсѧ, и҆сповѣ́дникѡвъ вѣ́ры незри́маѧ ᲂу҆крѣпи́тельнице.

Ра́дꙋйсѧ, ᲂу҆меньше́нїемъ гоне́нїй число̀ правосла́вныхъ хра́мѡвъ ѕѣлѡ̀ ᲂу҆мно́жившаѧ: ра́дꙋйсѧ, ᲂу҆величе́нїемъ чꙋдотворе́нїй число̀ коле́блющихсѧ въ правосла́вїи ѕѣлѡ̀ ᲂу҆ме́ньшившаѧ.

Ра́дꙋйсѧ, ꙗ҆́кѡ і҆кѡ́на твоѧ̀ новоѧвле́ннаѧ ᲂу҆се́рдїемъ бг҃омо́льцєвъ злато́ю ри́зою ᲂу҆краси́сѧ: ра́дꙋйсѧ, ꙗ҆́кѡ по́длѣ дре́внѣй часо́вни но́ваѧ въ хра́мъ ѡ҆браще́на бы́сть.

Ра́дꙋйсѧ, любвеѻби́льнаѧ, сле́зы серде́цъ на́шихъ ми́лостивнѡ ѡ҆сꙋша́ющаѧ.

Конда́къ з҃

Восхотѣ́въ сп҃се́нїѧ вѣ́рныхъ дще́рей под̾ покро́вомъ твои́мъ, бцⷣе, заложѝ ѡ҆би́тель здѣ̀ свѧты́й пра́вѣдникъ кроншта́дтскїй и҆ предрѣчѐ стоѧ́ти є҆́й до сконча́нїѧ вѣ́ка бл҃гоꙋкраше́нною и҆ долголѣ́тнею. тѣ́мже со благодаре́нїемъ пое́мъ бг҃ꙋ: А҆ллилꙋ́їа.

І҆́косъ з҃

Въ трꙋдѣ́хъ и҆ моли́твѣ на горѣ̀ бг҃оро́дицкой монасты́рь возрасте́сѧ и҆ любо́вь наро́днꙋю дале́кѡ за предѣ́лы є҆стла́ндскагѡ кра́ѧ сниска̀. та́кѡ и҆ на се́й ѡ҆би́тели сбыва́етсѧ прⷪ҇ро́чество и҆са́їино ѡ҆ горѣ̀ сїѡ́нстѣй рече́нное: Бꙋ́детъ въ послѣ̑днїѧ дни̑ ꙗ҆вле́на гора̀ гдⷭ҇нѧ и҆ до́мъ бж҃їй на версѣ̀ го́ръ, и҆ возвы́ситсѧ превы́ше холмѡ́въ, и҆ прїи́дꙋтъ къ не́й всѝ ꙗ҆зы́цы. и҆ по́йдꙋтъ ꙗ҆зы́цы мнѡ́зи, и҆ рекꙋ́тъ: прїиди́те, и҆ взы́демъ на го́рꙋ гдⷭ҇ню, и҆ въ до́мъ бг҃а і҆а́кѡвлѧ, и҆ возвѣсти́тъ на́мъ пꙋ́ть сво́й, и҆ по́йдемъ по немꙋ̀. посемꙋ̀ ра́достнѡ зове́мъ тѝ:

Ра́дꙋйсѧ, бл҃года́тнаѧ, промышле́нїемъ бж҃їимъ ѡ҆би́тель пю́хтицкꙋю созда́вшаѧ: ра́дꙋйсѧ, тѣ́мъ прⷪ҇ро́чествꙋ и҆са́їинꙋ и҆спо́лнитисѧ посо́бившаѧ.

Ра́дꙋйсѧ, въ на́ши дни̑ высо́кое хрⷭ҇тїа́нское подви́жничество въ житїѧ́хъ блаже́нныхъ ста́рицъ лю́демъ показа́вшаѧ: ра́дꙋйсѧ, примѣ́рꙋ и҆́хъ слѣ́довати всѣ́хъ люде́й призва́вшаѧ.

Ра́дꙋйсѧ, си́лꙋ прозорли́вагѡ благослове́нїѧ приснопа́мѧтнагѡ ба́тюшки і҆ѡа́нна въ и҆з̾ѻби́лїи ми́лостей бж҃їихъ, на ѡ҆би́тель и҆злива́емыхъ, ꙗ҆́внѡ показꙋ́ющаѧ: ра́дꙋйсѧ, благода́ть дꙋхо́внꙋю съ вѣ́рою припа́дающымъ къ чꙋдотво́рномꙋ ѡ҆́бразꙋ твоемꙋ̀ ще́дрѡ подаю́щаѧ.

Ра́дꙋйсѧ, любвеѻби́льнаѧ, сле́зы серде́цъ на́шихъ ми́лостивнѡ ѡ҆сꙋша́ющаѧ.

Конда́къ и҃

Бл҃года́рныѧ па́стырю возлю́бленномꙋ своемꙋ̀ сєстры̀ пю́хтицкїѧ свѣтоза́рный ѡ҆́бразъ ꙗ҆вле́нїѧ твоегѡ̀, ѽ пречи́стаѧ, написа́ша и҆ родно́мꙋ ба́тюшкѣ дарова́ша. і҆кѡ́на сїѧ̀ а҆́ки фі́нїѯъ красото́ю процвѣтѐ и҆ съ првⷣникомъ ди́внымъ до сме́рти пребыла̀ є҆сѝ. ѻ҆́нъ же до кончи́ны своеѧ̀ къ тебѣ̀, влⷣчцѣ нбⷭ҇нѣй, гѡрѧ́чыѧ мл҃твы ѡ҆б̾ ѡ҆би́тели ᲂу҆спе́нстѣй возноси́лъ є҆сѝ. не преста́немъ сла́вити сн҃а твоего̀, милосе́рднаѧ, ра́дость сїю̀ на́мъ ниспосла́вшаго, ᲂу҆миле́ннѡ поѧ̀: А҆ллилꙋ́їа.

І҆́косъ и҃

Пла́меннѣ возгорѣ́въ любо́вїю къ тебѣ̀, пречⷭ҇тѣй бж҃їей мт҃ри, па́стырь кроншта́дтскїй сподо́бисѧ зрѣ́ти тѧ̀, цр҃и́цꙋ нбⷭ҇нꙋю, со і҆кѡ́ны своеѧ̀ соше́дшꙋю и҆ сладча́йшимъ гла́сомъ є҆мꙋ̀ ре́кшꙋю: милѣ́йшаѧ є҆стѐ, ча́да ѻ҆ц҃а̀ нбⷭ҇нагѡ. на пречⷭ҇тый ли́къ тво́й, бцⷣе, мл҃твенникъ землѝ рѡссі́йскїѧ со тре́петомъ взира̀ и҆ ви́дѣ ѻ҆́чи дѡ́брыѧ, смире́нныѧ, голꙋбы́ѧ, голꙋби́ныѧ, взыва̀ дꙋше́ю ᲂу҆миле́ннѡ:

Ра́дꙋйсѧ, ѕвѣздо̀ пресвѣ́тлаѧ, влⷣчце, всѧ̀ въ сїѧ́нїи свѣ́та-бг҃а пребыва́ющаѧ: ра́дꙋйсѧ, ст҃ость вѣ́чнаѧ, чистотꙋ̀ бжⷭ҇твеннꙋю ѿ нб҃съ прїи́мшаѧ.

Ра́дꙋйсѧ, пребл҃гоꙋкраше́нный хра́ме бж҃їй, и҆збра́ннаѧ невѣ́сто дх҃а ст҃а́гѡ: ра́дꙋйсѧ, ма́ти живота̀, въ ско́рбехъ и҆ ра́достехъ ти́хое на́ше приста́нище.

Ра́дꙋйсѧ, всеблага́ѧ помо́щнице, сердца̀ человѣ́чєскїѧ смирѧ́ющаѧ: ра́дꙋйсѧ, застꙋ́пнице, дꙋхѡ́въ ѕло́бы поднебе́сныхъ прогонѧ́ющаѧ.

Ра́дꙋйсѧ, любвеѻби́льнаѧ, сле́зы серде́цъ на́шихъ ми́лостивнѡ ѡ҆сꙋша́ющаѧ.

Конда́къ ѳ҃

Ди́вное чꙋ́до соверши́сѧ, є҆гда̀ і҆кѡ́на твоѧ̀, влⷣчце, ст҃о́мꙋ првⷣникꙋ дарова́ннаѧ, про́мысломъ бж҃їимъ во ѡ҆би́тель вно́вь возврати́сѧ и҆ лꙋча́ми свѣ́та невече́рнѧгѡ собо́ръ ᲂу҆спе́нскїй ѡ҆зарѝ. та́кѡ въ нѣ́когда ѿкры́вшемсѧ въ видѣ́нїи па́стырю кроншта́дтскомꙋ собо́рнѣмъ хра́мѣ бг҃освѣ́тлою свѣще́ю возсїѧ̀ пю́хтицкаѧ і҆кѡ́на твоѧ̀, приснодв҃о непоро́чнаѧ. тѣ́мъ же, дивѧ́шесѧ таково́мꙋ твоемꙋ̀ ѡ҆ се́й і҆кѡ́нѣ промышле́нїю, ꙗ҆́внѡ показꙋ́ющемꙋ твоѐ къ не́й благоволе́нїе, ᲂу҆миле́ннѡ пое́мъ бг҃ꙋ: А҆ллилꙋ́їа.

І҆́косъ ѳ҃

Виті́йство лжеиме́ннагѡ ра́зꙋма недоꙋмѣва́етъ прославлѧ́ти неисчє́тнаѧ чꙋдеса̀ твоѧ̑, во свѧты́хъ твои́хъ і҆кѡ́нахъ лю́демъ правосла̑внымъ ꙗ҆влѧ́ємаѧ. чи́стїи же се́рдцемъ и҆ прѡсты́ѧ дꙋ́ши ви́дѧтъ въ ни́хъ то̀, что̀ ᲂу҆мо́мъ гѡ́рдыѧ, ви́дѧ, не ви́дѧтъ, и҆ слы́ша, не слы́шатъ. сла́вѧще твоѐ ко кро́ткимъ и҆ смире́ннымъ бжⷭ҇твенное бл҃говоле́нїе, вопїе́мъ тѝ:

Ра́дꙋйсѧ, въ де́нь свѧты́ѧ па́схи вѣ́стїю ѡ҆ но́вомъ ѡ҆брѣ́тенїи і҆кѡ́ны твоеѧ̀ насе́льницъ ѡ҆би́тели пю́хтицкїѧ ѡ҆бра́довавшаѧ: ра́дꙋйсѧ, ми́лѡсти своѧ̑ чрез̾ твоѐ предста́тельство сестра́мъ ниспосыла́ющаѧ.

Ра́дꙋйсѧ, та̑йнаѧ жела̑нїѧ и҆́щꙋщихъ дꙋхо́внагѡ моли́твеннагѡ ѻ҆бще́нїѧ съ тобо́ю и҆сполнѧ́ющаѧ: ра́дꙋйсѧ, пꙋтѝ и҆́хъ ко ѡ҆би́тели твое́й чꙋде́снѡ направлѧ́ющаѧ.

Ра́дꙋйсѧ, сокровє́ннаѧ благоговѣ̑йнаѧ помышлє́нїѧ чтꙋ́щихъ тѧ̀ вѣ́дꙋщаѧ: ра́дꙋйсѧ, намѣ́ренїѧ безраздѣ́льно слꙋжи́ти тѝ во ѡ҆би́тели твое́й къ и҆сполне́нїю вта́йнѣ приводѧ́щаѧ.

Ра́дꙋйсѧ, любвеѻби́льнаѧ, сле́зы серде́цъ на́шихъ ми́лостивнѡ ѡ҆сꙋша́ющаѧ.

Конда́къ і҃

Спастѝ хотѧ̀ возлюби́вшихъ чистотꙋ̀ тѣле́снꙋю, а҆ па́че и҆ дꙋше́внꙋю, создала̀ є҆сѝ мт҃рь бж҃їѧ ѡ҆би́тєли мона́шествꙋющихъ, ꙗ҆́кѡ ѕвѣ̑зды небє́сныѧ, сїѧ́ющыѧ въ мі́рѣ се́мъ, прелюбодѣ́йнѣмъ и҆ грѣ́шнѣмъ: и҆, ꙗ҆́кѡ крі́ны се́льныѧ, дѣ́вственною чистото́ю ᲂу҆кра́шенныѧ, съ по́лѧ неѡб̾ѧ́тнаго земно́й ю҆до́ли пла́ча и҆ ско́рби ре́вностныхъ слꙋжи́тельницъ себѣ̀ и҆збра́ла є҆сѝ и҆ во ст҃ы́хъ ѡ҆би́телехъ свои́хъ ᲂу҆пасла̀ є҆сѝ. сегѡ̀ ра́ди ᲂу҆блажа́емъ тѧ̀, неꙋвѧда́емый цвѣ́те чистоты̀, и҆ воспѣва́емъ со стра́хомъ бг҃ꙋ: А҆ллилꙋ́їа.

І҆́косъ і҃

Стѣна̀ є҆сѝ дѣ́вствєннымъ ликѡ́мъ и҆ и҆́ноческимъ собо́рѡмъ, бцⷣе дв҃о. сегѡ̀ ра́ди ты̀ вѣ́си, кого̀ и҆збра́ти въ число̀ безразде́льнѡ сла́вѧщихъ и҆́мѧ твоѐ, па́че же, кого̀ почти́ти и҆гꙋ́менскимъ жезло́мъ. Дивѧ́сѧ промышле́нїю твоемꙋ̀ ѡ҆б̾ и҆збра́нныхъ твои́хъ, въ де́нь прибы́тїѧ вно́вь ѡ҆брѣ́тенныѧ і҆кѡ́ны во ѡ҆би́тель пю́хтицкꙋю, и҆звѣсти́вшемꙋ и҆гꙋ́менїю а҆леѯі́ю ѡ҆ и҆сполне́нїи є҆ѧ̀ многолѣ́тнїѧ про́сьбы ѡ҆ снѧ́тїи съ неѧ̀ по не́мощи настоѧ́тельскагѡ послꙋша́нїѧ, вопїе́мъ тѝ:

Ра́дꙋйсѧ, въ де́нь пра́зднованїѧ бг҃олю́бскїѧ і҆кѡ́ны твоеѧ̀, на го́рꙋ свѧтꙋ́ю во ѡ҆́бразѣ і҆кѡ́ны пю́хтицкїѧ прибы́вшаѧ: ра́дꙋйсѧ, тѣ́мъ сле́зы престарѣ́лыѧ и҆гꙋ́менїи ѡ҆сꙋши́вшаѧ.

Ра́дꙋйсѧ, никого̀ и҆з̾ земноро́дныхъ въ ты́ѧ дни̑ во ѡ҆би́тели пю́хтицкїѧ во и҆гꙋ́менїи не поста́вившаѧ: ра́дꙋйсѧ, же́злъ и҆гꙋ́менский во ѡ҆би́тели неви́димѡ прїи́мшаѧ.

Ра́дꙋйсѧ, ᲂу҆тѣше́нїе на́ше и҆ наде́ждо сп҃се́нїѧ: ра́дꙋйсѧ, ра́досте на́ша несказа́ннаѧ.

Ра́дꙋйсѧ, любвеѻби́льнаѧ, сле́зы серде́цъ на́шихъ ми́лостивнѡ ѡ҆сꙋша́ющаѧ.

Конда́къ а҃і

Пѣ́нїе хвале́бное вы́нꙋ возно́ситъ тѝ ли́къ и҆́ноческїй, восхвалѧ́ѧ но́вое чꙋде́сное ꙗ҆вле́нїе і҆кѡ́ны твоеѧ̀ вдовѣ̀ свѧще́нника, мона́хинѣ є҆ѵфросѵ́нїи, въ со́нномъ видѣ́нїи ѻ҆́бразъ тво́й ᲂу҆зрѣ́вшей, дото́лѣ є҆́й невѣ́домый. слы́шавъ же бжⷭ҇твенный гла́съ, глаго́лющїй: Тебѣ̀ помогꙋ̀ сїю̀ і҆кѡ́нꙋ найтѝ. и҆щѝ ю҆̀ на горѣ̀. до́лгѡ и҆ска́ла ю҆̀ и҆ ѡ҆брѣ́те во ѡ҆би́тели пю́хтицкой, и҆, ра́достнѡ призна́въ ви́дѣнный во снѣ̀ тво́й свѣтоза́рный ли́къ, пречⷭ҇таѧ, благода́рнѡ возопѝ: А҆ллилꙋ́їа.

І҆́косъ а҃і

Свѣтопода́тельнꙋю свѣщꙋ̀ сꙋ́щымъ во тмѣ̀ грѣха̀ и҆ ю҆до́ли пла́ча ꙗ҆ви́вшꙋюсѧ, зри́мъ ст҃ꙋ́ю дв҃ꙋ, надъ горо́ю бг҃оро́дицкою стоѧ́щꙋю и҆ рꙋ́цѣ своѧ̑ до́лꙋ простира́ющꙋю, жела́ѧ возвѣстѝ всѣ́хъ трꙋжда́ющихсѧ и҆ ѡ҆бремене́нныхъ и҆з̾ мра́ка бг҃оѿстꙋ́пническагѡ живота̀ сегѡ̀ къ свѣ́тꙋ бг҃опозна́нїѧ. ᲂу҆пова́ѧ на твоѐ всемо́щное предста́тельство ᲂу҆ прⷭ҇то́ла сн҃а твоегѡ̀, хрⷭ҇та̀ бг҃а на́шегѡ, и҆ на твоѐ нелицепрїѧ́тное попече́нїе ѡ҆ дꙋшѣ̀ хрⷭ҇тїа́нстѣй, ко гдⷭ҇ꙋ стремѧ́щейсѧ, вопїе́мъ тѝ си́це:

Ра́дꙋйсѧ, и҆́щꙋщихъ сп҃се́нїѧ и҆ ᲂу҆едине́ннагѡ сопребыва́нїѧ съ гдⷭ҇омъ зрѧ́щаѧ: ра́дꙋйсѧ, гла́дъ дꙋхо́вный а҆́лчꙋщихъ и҆ жа́ждꙋющихъ пра́вды ще́дрѡ ᲂу҆толѧ́ющаѧ.

Ра́дꙋйсѧ, роди́телей, ѡ҆скорблѧ́емыхъ ча́дами, ѿстꙋпи́вшими ѿ гдⷭ҇а, є҆ди́нственное ᲂу҆тѣше́нїе: ра́дꙋйсѧ, ча̑дъ, гони́мыхъ роди́телѧми, бг҃а забы́вшихъ, неѡбори́мое ᲂу҆крѣпле́нїе.

Ра́дꙋйсѧ, пла́чꙋщихъ по ᲂу҆со́пшымъ хрⷭ҇тїа́нское ᲂу҆пова́нїе: ра́дꙋйсѧ, ча́ющихъ жи́зни вѣ́чныѧ со хрⷭ҇то́мъ, непосты́дное въ не́й ᲂу҆вѣре́нїе.

Ра́дꙋйсѧ, любвеѻби́льнаѧ, сле́зы серде́цъ на́шихъ ми́лостивнѡ ѡ҆сꙋша́ющаѧ.

Конда́къ в҃і

Блгⷣть бж҃їѧ пребыва́етъ въ чꙋдесѣ́хъ пресла́вныхъ ѿ ст҃ы́хъ і҆кѡ́нъ твои́хъ по все́й землѝ рѡссі́йстѣй ꙗ҆вле́нныхъ, пречи́стаѧ и҆ пребл҃гослове́ннаѧ бцⷣе дв҃о. ви́дѧ бл҃года́ть сїю̀, ꙗ҆́внѡ дѣ́йствꙋющꙋю во ѡ҆́бразѣхъ твои́хъ, пю́хтицкой ѡ҆би́тели чꙋде́снѡ дарова́нныхъ, и҆ зрѧ̀ въ се́мъ ѻ҆со́бое промышле́нїе твоѐ ѡ҆ сїѡ́нѣ прибалті́йскагѡ кра́ѧ, бл҃года́рнѡ пое́мъ промысли́телю бг҃ꙋ: А҆ллилꙋ́їа.

І҆́косъ в҃і

Пою́ще всѧ̑ ди́внаѧ чꙋдеса̀ твоѧ̑ ѿ ст҃ы́хъ і҆кѡ́нъ твои́хъ, ѡ҆ ма́ти хрⷭ҇та̀ бг҃а на́шегѡ, про́симъ и҆ мо́лимъ тѧ̀: не ѿими ѿ на́съ ми́лѡсти твоѧ̑ безмѣ̑рныѧ за ѿстꙋпле́нїѧ, бг҃охꙋле́нїѧ, ѿрече́нїе ѿ вѣ́ры правосла́вныѧ и҆ и҆ны́ѧ грѣхѝ во ѡ҆скорбле́нїе и҆́мени бж҃їѧ на́ми соверше́нныѧ, но сподо́би на́съ до конца̀ живота̀ на́шегѡ во грѣсѣ́хъ содѣ́ѧнныхъ раска́ѧтисѧ и҆ прославлѧ́ти тѧ̀, невмѣсти́магѡ вмѣсти́вшꙋю, воспѣва́ѧ тебѣ̀ си́це:

Ра́дꙋйсѧ, цвѣ́те дѣ́вства, же́злъ и҆гꙋ́менскїй во ст҃ы́хъ ѻ҆би́телехъ твои́хъ незри́мѡ держа́щаѧ: ра́дꙋйсѧ, бцⷣе ѻ҆диги́трїе, хрⷭ҇тїа́нъ ᲂу҆пова́нїе.

Ра́дꙋйсѧ, блага́ѧ скоропослꙋ́шнице, всѧ̑ прошє́нїѧ на̑ша во бла́го и҆сполнѧ́ющаѧ: ра́дꙋйсѧ, ра́досте на́ша, скѡ́рби и҆ печа̑ли въ ра́дость претворѧ́ющаѧ.

Ра́дꙋйсѧ, бл҃года́тнаѧ, лꙋча́ми вели́кїѧ своеѧ̀ ми́лости всѣ́хъ ѡ҆свѣща́ющаѧ: ра́дꙋйсѧ, ѡ҆бра́дованнаѧ, во ᲂу҆спе́нїи твое́мъ на́съ не ѡ҆ставлѧ́ющаѧ.

Ра́дꙋйсѧ, любвеѻби́льнаѧ, сле́зы серде́цъ на́шихъ ми́лостивнѡ ѡ҆сꙋша́ющаѧ.

Конда́къ г҃і

Ѽ всепѣ́таѧ ма́ти, любвеѻби́льнаѧ застꙋ́пнице правосла́вныхъ люде́й твои́хъ, стра́ждꙋщихъ въ безꙋ́мнемъ мі́рѣ се́мъ. при́зри на скѡ́рби и҆ нꙋ̑жды на́шѧ, ᲂу҆слы́ши молє́нїѧ на̑ша, во смире́нїи и҆з̾ глꙋбины̀ ᲂу҆ста́лыхъ серде́цъ тебѣ̀ возноси̑мыѧ. ѡ҆чи́сти грѣхѝ на́шѧ и҆ сподо́би на́съ до конца̀ дне́й на́шихъ нелицемѣ́рнѡ взыва́ти воплоти́вшемꙋсѧ ѿ тебє̀ сп҃си́телю на́шемꙋ: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃ли на нб҃сѝ и҆ па́стыри є҆стла́ндскїѧ ве́си ѕѣлѡ̀ ᲂу҆диви́шасѧ, є҆гда̀ ᲂу҆зрѣ́ша мт҃рь бж҃їю на горѣ̀ стоѧ́щꙋю и҆ рꙋ́цѣ до́лꙋ простира́ющꙋю, ᲂу҆казꙋ́юще на мѣ́сто сїѐ свѧто́е, промысли́тельнѣ и҆мѣ́ющее просла́витисѧ. тѣ́мъ же и҆ мы̀, ѡ҆бра́дованнїи вели́цею твое́ю къ на́мъ ми́лостїю, вопїе́мъ тѝ:

Ра́дꙋйсѧ, жре́бїемъ свои́мъ го́рꙋ а҆ѳѡ́нскꙋю наименова́вшаѧ: ра́дꙋйсѧ, мно́гими чꙋдесы̀ і҆кѡ́ны твоѧ̑ ѡ҆знаменова́вшаѧ.

Ра́дꙋйсѧ, чꙋдотво́рною і҆кѡ́ною честна́гѡ ᲂу҆спе́нїѧ твоегѡ̀ кі́ево-пече́рскꙋю ла́ѵрꙋ просла́вившаѧ: ра́дꙋйсѧ, зна́менїемъ своеѧ̀ бжⷭ҇твенныѧ стопы̀ поча́евскꙋю ла́ѵрꙋ ѡ҆свѧти́вшаѧ.

Ра́дꙋйсѧ, бг҃оро́дицкꙋю го́рꙋ въ пю́хтицахъ сїѡ́номъ прибалті́йскагѡ кра́ѧ содѣ́лавшаѧ: ра́дꙋйсѧ, ᲂу҆спе́нскꙋю ѡ҆би́тель здѣ̀ ѡ҆снова́вшаѧ и҆ вели́каго па́стырѧ свѧта́го пра́веднаго і҆ѡа́нна кроншта́дтскаго є҆́й дарова́вшаѧ.

Ра́дꙋйсѧ, любвеѻби́льнаѧ, сле́зы серде́цъ на́шихъ ми́лостивнѡ ѡ҆сꙋша́ющаѧ.

Конда́къ а҃

И҆збра́ннꙋю ѿ всѣ́хъ родѡ́въ бж҃їю мт҃рь и҆ цр҃и́цꙋ нбⷭ҇нꙋю, непреста́ннѡ ᲂу҆ прⷭ҇то́ла сы́на твоегѡ̀ молѧ́щꙋюсѧ ѡ҆ на́съ, съ любо́вїю благода́рнѡ восхва́лимъ. восхотѣ́въ во всѣ́хъ концѣ́хъ землѝ ви́дѣти прославле́нїе вели́чїѧ бж҃їѧ, возблаговоли́ла є҆сѝ, преблагослове́ннаѧ, воздви́гнꙋти сп҃си̑тельныѧ ѡ҆би́тєли своѧ̑. та́кѡ и҆ воззрѣ́въ на страда̑нїѧ правосла́вныхъ страны̀ прибалті́йскїѧ, посѣти́ла є҆сѝ кра́й се́й свое́ю бл҃года́тїю: да ᲂу҆те́шенныѧ тобо́ю зове́мъ тѝ си́це:

Ра́дꙋйсѧ, любвеѻби́льнаѧ, сле́зы серде́цъ на́шихъ ми́лостивнѡ ѡ҆сꙋша́ющаѧ.

Моли́твы

Ѽ прест҃а́ѧ и҆ пребл҃гослове́ннаѧ ма́ти сладча́йшагѡ гдⷭ҇а на́шегѡ і҆и҃са хрⷭ҇та̀! припа́даемъ и҆ покланѧ́емсѧ тебѣ̀ пред̾ свѣтоза́рнымъ ѡ҆́бразомъ твои́мъ и҆ смире́ннѡ мо́лимъ: простѝ, всеми́лостиваѧ, всѧ̑ заблꙋждє́нїѧ на̑ша и҆ всѧ̑ ѡ҆скорблє́нїѧ, въ вѣ́дѣнїи и҆лѝ въ невѣ́дѣнїи сы́нꙋ твоемꙋ̀ и҆ сп҃си́телю на́шемꙋ ѿ ю҆́ности ѡ҆би́льнѡ нанесє́нныѧ неисполне́нїем за́повѣдей є҆гѡ̀ ст҃ы́хъ, небреже́нїемъ къ свѧты́нѣ, нерадѣ́нїемъ въ моли́твѣ и҆ нетерпѣ́нїемъ въ несе́нїи крⷭ҇та̀ на́шегѡ. при́зри на жа́ждꙋ сп҃се́нїѧ и҆ поси̑льныѧ трꙋды̀ и҆ пребꙋ́ди съ многогрѣ́шнымъ, но ѡ҆ста́вшимсѧ вѣ́рнымъ сы́нꙋ твоемꙋ̀ ма́лымъ є҆гѡ̀ стадѡ́мъ по нело́жномꙋ сло́вꙋ є҆гѡ̀, во свѧтѣ́мъ є҆ѵⷢ҇лїи рече́нномꙋ: не бо́йсѧ, ма́лое ста́до: ꙗ҆́кѡ бл҃гоизво́ли ѻ҆ц҃ъ ва́шъ да́ти ва́мъ црⷭ҇тво. Ѽ животворѧ́щїй и҆сто́чниче на́шего ᲂу҆тѣше́нїѧ, къ тебѣ̀ возно́симъ смире́нное сїѐ моле́нїе и҆ про́симъ мт҃рнѧгѡ твоегѡ̀ ѡ҆ на́съ застꙋпле́нїѧ пред̾ престо́ломъ ѻ҆ц҃а̀ на́шегѡ нбⷭ҇нагѡ. не лишѝ на́съ црⷭ҇тва сегѡ̀ бл҃года́тнагѡ за премнѡ́гїѧ грѣхѝ на́шѧ, и҆́бо вѣ́мы, ꙗ҆́кѡ ничто̀ внѣ́шнее и҆ самолюби́вое, го́рдое и҆ тщесла́вное, ни сла́вныѧ достижє́нїѧ мїрскі̑ѧ, ни добродѣ̑тели, съ та́йнымъ самолюбова́нїемъ соверша́емыѧ, ни степє́ни, ни чи̑ны, ни са́мое и҆́ноческое зва́нїе не возмо́гꙋтъ возвѣстѝ на́съ въ црⷭ҇твїе нбⷭ҇ное, то́кмѡ се́рдце чи́стое и҆ дꙋ́хъ сокрꙋше́нный и҆ смире́нный, за мнѡ́гїѧ моли́твєнныѧ трꙋды̀ дх҃омъ ст҃ы́мъ да́рꙋемыѧ. помозѝ на́мъ ѡ҆ста́вшыѧсѧ дни̑ жи́зни на́шеѧ въ дꙋ́хѣ и҆ и҆́стине покланѧ́тисѧ сы́нꙋ твоемꙋ̀, милосе́рднаѧ бцⷣе, и҆, стѧжа́въ нелицемѣ́рнꙋю любо́вь къ бг҃ꙋ и҆ бли́жнемꙋ, и҆спо́лнити сїю̀ пе́рвѣйшꙋю за́повѣдь гдⷭ҇ню, є҆ди́нственнѡ приводѧ́щꙋю въ црⷭ҇тво нбⷭ҇ное. Не взира́ѧ на недосто́инство на́ше, сподо́би на́съ содѣ́латисѧ ча́дами бж҃їими по благода́ти и҆ наслѣ́довати жи́знь вѣ́чнꙋю со всѣ́ми, въ покаѧ́нїи бг҃ꙋ ᲂу҆годи́вшими, и҆ введѝ на́съ, мт҃и бж҃їѧ, ꙗ҆́звами сн҃а твоегѡ̀ і҆и҃са прети́хагѡ въ нбⷭ҇ный черто́гъ є҆гѡ̀, дабы̀ вѣ́чнѡ сла́вити и҆ воспѣва́ти пречестно́е и҆ великолѣ́пое и҆́мѧ всест҃ы́ѧ трⷪ҇цы ѻ҆ц҃а̀ и҆ сн҃а и҆ ст҃а́гѡ дх҃а ны́нѣ и҆ при́снѡ и҆ во вѣ́ки вѣкѡ́въ. А҆ми́нь.