Кано́н свято́му апо́столу Иу́де, бра́ту Госпо́дню

Таи́нниче Небе́сных, Иу́до всему́дре,/ учениче́ Спа́сов и о́бщниче и́стинныя жи́зни,/ язы́к мой подви́гни и сло́во упра́ви на пе́ние твое́, всеблаже́нне.

Влеки́й Спа́сов яре́м, апо́столе,/ и бразду́ секи́й, и обновля́я благода́тию, се́мя се́ял еси́/ и мног плод прине́сл еси́ призва́вшему, пресла́вне.

Сло́ва вопло́щшагося обре́т Учи́теля/ и Сего́, Богови́дче, луча́ми просвеща́емь,/ был еси́ свет вторы́й,/ пе́рваго сия́ньми сообразу́яся, досточу́дне.

Взя́тся учени́к Христо́вых благоле́пие превы́ше вся́каго вели́чества:/ си́и бо бы́ша Ему́ дру́зи же и сво́йственнии, и сро́дницы,/ и сосне́дницы, и та́ин сказа́тели.

Иу́до, бра́тия твоя́ тя похваля́ют, бра́та я́вльшася/ и непщу́ема я́вльшагося пло́тию Сло́ва Преве́чнаго, от Присносу́щнаго возсия́вшаго,/ от нерожде́на Роди́теля.

Умертви́в на земли́ твоя́ у́ды, пожи́л еси́ с жи́знию всех Христа́, пребога́те,/ и живоно́сныя жи́зни всей вселе́нней провозве́стник ты был еси́,/ глаго́лы живо́тныя пропове́дая.

Вели́кий Спа́сов апо́стол явле́ния Ду́ха сподо́блен/ и возлю́блен бы́сть, зре́ния Его́ зарю́ и добро́ту ви́дев.

Благода́ти сый испо́лнен и даро́в, от Бо́га пода́нных, апо́столе,/ на спаси́тельное приста́нище тя песносло́вящия наставля́й.

Си́лою непобеди́мою Ду́ха Пресвята́го огражда́емь, служи́телю неизрече́нных,/ лука́вствия отгоня́еши ду́хи сло́вом благода́ти.

Зако́на оста́вль се́ни, и́стины о́браз све́тло пропове́дал еси́,/ са́мую и́стину стяжа́в наста́вника.

Сло́ва повеле́ние исполня́я, апо́столе, язы́ки вся, уче́нии твои́ми науча́я, обте́кл еси́,/ и сих крестя́ Тро́ическим призыва́нием.

До́ждь небе́сный, я́ко роса́ свы́ше, Боже́ственное веща́ние твое́, Богопропове́дниче,/ мглу разори́ многобо́жия еди́наго Бо́га пропове́данием.

Виде́ния уче́нием, жития́ дея́ньми све́тло, Христо́в апо́столе, сия́я,/ су́щия во глубине́ неве́дения просвети́л еси́.

Посыла́еши всем челове́ком све́тлое и уче́ния Ду́ха испо́лнено посла́ние,/ священноявле́нне пречу́дне.

Богови́дец веща́ет Небе́сная,/ я́коже слове́сную не́кую Бо́жию сла́ву пове́дая/ нас ра́ди пло́тию Я́вльшагося и чудесы́.

Богови́дна ссу́щием Божества́ бы́вша,/ вси Иу́ду воспое́м, согла́сно пою́ще:/ Бо́же, благослове́н еси́.

Духодви́жимый и Богодухнове́нный язы́к твой мир обрати́ Христо́вым пропове́данием,/ Ему́же вси пое́м:/ Бо́же, благослове́н еси́.

Дае́т тебе́ Небе́сное насле́дие Госпо́дь и престо́л пресве́тел,/ на не́мже почива́я, боже́ственне пое́ши:/ Бо́же, благослове́н еси́.

Бога́тство язы́к и царе́й по́честь,/ благозва́ние восприя́л еси́, вопия́, апо́столе:/ вся дела́ Госпо́дня, Го́спода по́йте и превозноси́те во вся ве́ки.

Всю зарю́ Уте́шителеву, блаже́нне, прия́л еси́ соше́дшую, зовы́й, сла́вне:/ вся дела́ Госпо́дня, Го́спода по́йте и превозноси́те во вся ве́ки.

Ве́щи тле́нныя возненави́дев, Небе́сных сла́ву производи́л еси́,/ пребыва́ющую ве́дый, апо́столе, те́мже вопия́л еси́:/ вся дела́ Госпо́дня, Го́спода по́йте и превозноси́те во вся ве́ки.

Облиста́вся, сла́вне, светоли́тий Ду́ха заре́ю,/ чуде́с блиста́ния па́че естества́ всем испуща́еши, я́ко учени́к Емману́илев,/ Его́же велича́юще, тя, Богови́дче, ублажа́ем.

Со А́нгельскими чи́нми предстоя́ще, богови́днии самови́дцы/ и зри́тели Единоро́днаго, пло́тию обнища́вшаго нас ра́ди,/ Сего́ приле́жно ны́не моли́те спасти́ ду́ши на́ша.