<p>Кано́н преподо́бному Варлаа́му Ва́жскому (Шенку́рскому)</p>

Творя́й пресла́вная, Христе́, и ди́вная, очи́стив мно́гая моя́ согреше́ния, осия́й в души́ мое́й све́т ра́зума моли́твами уго́дника Твоего́ Варлаа́ма, да в па́мять его́ принесу́ духо́вную пе́снь.

Твои́х даро́в исправле́нии ве́сь ми́р обогати́ся, от присносу́щнаго исто́чника моще́й твои́х прие́млюще духо́вная от неду́г исцеле́ния, те́мже ра́достною душе́ю, блаже́нне, тя́ почита́ем.

Твоя́ моли́твы взыдо́ша, о́тче, на Не́бо, две́ри ра́йския отверзо́ша ти́, Престо́лу Госпо́дню предста́виша тя́, иде́же с ли́ки святы́х А́нгел сла́виши Тро́ицу Несозда́нную.

Да вкорени́тся в тя́ зача́ло прему́дрости – стра́х Госпо́день, хра́мы Бо́жия премно́ги созида́л еси́, к ни́щим ми́лование неща́дно име́л еси́ и сего́ ра́ди в нерукотворе́нных хра́мех при́сно ра́дуешися.

Непрело́жно рабо́тати Бо́гови возжела́л еси́, всю́ свою́ плотску́ю во́лю до конца́ умертви́л еси́ и, я́ко А́нгел бы́в, а́нгельскую жи́знь, блаже́нне, насле́дова.

Не восхоте́, блаже́нне, земны́я сла́вы, но со Христо́м бы́ти изво́лив, до́м и сро́дник свои́х оста́вил еси́, те́м ны́не со А́нгелы на Небесе́х ликовству́еши.

Огне́м любве́ Бо́жия распали́вся, о́тче, я́ко до́бр купе́ц, вся́ своя́ оста́вив, в чужи́х страна́х прише́льствова, взыску́я Бо́га, Его́же обре́т, искупи́л еси́ Ца́рство Небе́сное.

Проразуме́в бу́дущая, я́ко настоя́щая, не пощаде́ пло́ти своея́ во умерщвле́ние по́мысла, но, вра́г бы́в телеси́ своему́, вмести́лище бы́сть Свято́му Ду́ху.

Воздержа́нием кра́йним пло́ть умертви́в, ду́шу свою́ оживи́л еси́. Те́м я́ко к жи́зни рачи́тель прия́т Небе́сное Ца́рство.

Провозсия́вшему на Кресте́ на́с ра́ди во́лею, блаже́нне, я́ко после́дова, со страстьми́ и похотьми́ распе́н себе́ ми́рови, те́м, я́ко вне́ ми́ра бы́в, све́т ми́ру бы́л еси́.

Я́ко Богопросвеще́нный рачи́тель святы́х, во и́мя Госпо́дня ученика́ прече́стен до́м воздви́гл еси́, в не́мже тобо́ю Бо́г при́сно сла́вим е́сть.

Невестоводи́тель благоприя́тен бы́сть, о́тче: и́ноков ду́ши, я́ко неве́сты чи́сты, Бо́гови приведе́, с ни́миже о на́с моли́ся непреста́нно.

В бе́здну щедро́т Бо́жиих пове́рг себе́, Богому́дре, жите́йских мо́лв пучи́ну препла́вая, духо́вными ве́тры обурева́ем, на о́н пу́ть бу́дущаго ве́ка, блаже́нне, всели́лся еси́.

Боже́ственною укрепля́емь си́лою, вся́ кова́рства лука́ваго победи́л еси́, те́м, я́ко окрила́тев умо́м, ду́хом на Не́бо возлете́л еси́, чу́дне.

Благонра́вие твое́ душе́вное и незло́бивое мудрова́ние и́ноков ду́ши к Бо́гу приведе́, и́хже, я́ко оте́ц чадолюби́вый, посеща́ти не оста́ви.

Тебе́, Го́сподеви моли́тву творя́щу и Пречи́стую Его́ Ма́терь со слеза́ми моля́щу, гла́с А́нгельский с Небе́с слы́шан бы́сть, показу́ющ ти́, блаже́нне, Бо́жие на ме́сте се́м благоволе́ние.

В поще́ниих непрекло́нное, во искуше́ниих неосла́бное, в терпе́ниих неотсту́пное име́л еси́ стяжа́ние, те́м нетле́нными венцы́ от Бо́га венча́лся еси́.

Непреста́нно моли́, Варлаа́ме о́тче на́ш, о ста́де свое́м, его́же трудолю́бно собра́л еси́, и спаси́ и́же тя́ на моли́тву призыва́ющих и плоды́ принося́щих любо́вию.

В пещи́ искуше́ния, я́ко зла́то, искуси́вся, о́тче, чистоте́ храни́тель бы́сть, с не́ю же Бо́га узре́в, со А́нгелы ликовству́еши.

Со́весть твоя́, о́тче, зерца́ло бы́сть бу́дущих, те́м, земны́х возгнуша́вся, на Небе́сная потща́лся еси́, и́хже получи́в, помина́й пою́щих тя́.

Ни́щих ми́лованием и странноприя́тием неоску́дным Авраа́му в ло́но дости́гл еси́, от Боже́ственных же сокро́вищ исто́чник чуде́с, о́тче, излива́еши.

У́м сво́й поста́вил еси́ влады́ку, облада́юща по́мыслы, те́м, я́ко царя́ страсте́м, Христо́с венча́л тя́ е́сть нетле́нным дарова́нием, пресели́вшуся от земны́х на Небе́сная.

Блаже́нство нетле́нно прия́т, я́ко а́нгельское поживе́ житие́, о земны́х небре́г, к Го́рним преста́вися, Варлаа́ме, предста́тель к Бо́гу бу́ди о на́с, тя́ блажа́щих.

И́же твою́ па́мять усе́рдно творя́щим, настоя́щих бе́д, о́тче, изба́ви и бу́дущих изми́ му́к, да тя́, я́ко те́пла засту́пника, ублажа́ем при́сно.