Кано́нъ ст҃и́телю і҆ѡа́ннꙋ, а҆рхїепⷭ҇кпꙋ шанха́йскомꙋ и҆ санъ-франци́сскомꙋ, чꙋдотво́рцꙋ

Бла́го е́сть воспева́ти уго́дники Бо́жия, в и́хже ли́це на́м ра́достне све́тит святы́й Иоа́нн, утеша́я, врачу́я его́ призыва́ющия, и науча́я на́с о́бразом многотру́днаго жития́ своего́ ревнова́ти о по́мощи су́щим в беда́х.

О жела́ние се́рдца боголюби́ваго! Возжела́л еси́ еще́ в во́зрасте де́тищном и́стины бы́ти побо́рник. Та́ко бо плени́ша тя́ по́вести о непощади́вших жи́зни своя́ за пра́вду Бо́жию ди́вных святы́х.

Привре́менно недоуме́нен бы́л еси́, е́же каковы́й пу́ть, во́инский или́ гражда́нский, себе́ избра́ти. Но зре́яше в души́ твое́й крепча́йша мы́сль: всего́ себе́ преда́ти на служе́ние святе́й Це́ркви Христо́вой.

С весе́лием соверша́ем па́мять твою́, архипа́стырю на́ш и наста́вниче, покланя́емся честны́м и нетле́нным моще́м твои́м, прося́ще моли́тв твои́х.

Восприя́л еси́ о́браз а́нгельский, и обо́лкся во вся́ ору́жия Бо́жия, ополчи́лся еси́ проти́ву духо́в зло́бы поднебе́сных, побежда́я и́х.

Не да́л еси́ сна́ дово́льна очесе́м твои́м, не возле́гл еси́ на о́др во е́же почи́ти, уподо́бився отце́м дре́вним, о подви́жниче.

Мно́жества архипа́стырей наста́вник, Це́ркве Ру́сския небе́сный предста́тель, са́м сы́й ревни́тель мона́шескаго жития́, тя́, свя́те Иоа́нне, чу́до на́ших дне́й именова́хом и в по́двизех крепкостоя́тельна.

А́ще хо́щете, лю́дие, свята́го жи́ва ви́дети, во гра́д Би́толь поспеша́йте, зри́те та́мо отца́ Иоа́нна! Та́ко се́рбский имени́тый архипа́стырь изрече́, нра́ву же и де́лом Иоа́нновым дивя́щийся.

Ю́ноши карпатору́сстии, се́рбскаго учи́лища пито́мцы, о тебе́ с вели́ким умиле́нием повествова́ху, о твое́м к себе́ непощаде́нии и к ни́м любве́, е́же ка́ко осеня́л еси́ и́х кре́стным зна́мением, ходя́ между́ спя́щими, поко́й и́х соблюда́я.

Подража́тель и́стинный Христо́в бы́л еси́, святи́телю, те́мже ду́шу полага́яй за па́ству твою́, предста́л еси́ Пастыренача́льнику непосты́дно.

Исцеле́ний да́р даде́ся ти́ еще́ во пресви́терстве, его́же преумно́жил еси́ во дни́ святи́тельства, и ны́не усоверша́еши в ино́м и ве́чном житии́.

Преподо́бному Нау́му бы́л еси́ соде́йственник во исцеле́ниих, со ико́ною его́ свято́ю посеща́я до́мы стра́ждущих.

Прииди́те, восхва́лим Богоро́дице хра́м воздви́гшаго, самого́ же все́м скорбя́щим ра́дость и хра́м Ду́ха Свята́го бы́вшаго.

Поспеша́л еси́ и в до́мы стра́ждущих, и в пала́ты больни́чныя к неду́гующим, о ни́хже откры́ ти́ Госпо́дь, я́ко Пречи́стых Та́ин Его́ препода́телю.

Боля́щим младе́нцем яви́лся еси́ здра́вия хода́тай, святы́й Иоа́нне, ско́рбь роди́тельских ду́ш пременя́я на ра́дость, и все́м во́зрастом ты́ показа́лся еси́ вожделе́нный помо́щник.

Сы́на све́та и дне́ благода́ть вои́стину тя́ соде́ла: на вся́к бо де́нь Святы́ми Та́йнами укрепля́емь и обожа́емь, утверди́л еси́ в Го́споде се́рдце твое́.

Ми́лостивым предста́тельством твои́м ве́рныя и неве́рныя спаса́хуся и да́ры благода́тныя приима́ху, ты́ же, да́руя незави́стно исцеле́ния, во тьме́ пре́лести не оставля́еши пребыва́ти заблу́ждшия, но еди́наго Царя́ Сла́вы учи́ши правосла́вно воспева́ти во вся́ ве́ки.

По́мощь и утеше́ние изгна́нным лю́дем Свои́м ди́вно сотвори́ Госпо́дь, дарова́в на́м тя́ засту́пника, святи́телю Иоа́нне, но и ны́не покры́й на́с от вра́г на́ших неви́димых и из руки́ все́х, ненави́дящих на́с.

Се́рдце твое́ распространи́ся ко все́м любо́вию моля́щим ти́ ся́, Иоа́нне святи́телю, помина́ющим по́двиг всего́ многотру́днаго жития́ твоего́, безболе́зненное же и ле́гкое преставле́ние твое́, Одиги́трии Пречи́стыя ве́рный служи́телю.

Ничто́же возмо́же препя́ти ти́, посеща́ющу в больни́це ча́д твои́х, па́стырю до́брый, ни до́ждь, ни бу́ря, ни тьма́ нощна́я, иногда́ никому́же зову́щу, ду́хом предви́дя ну́жду и́х, Го́споду поспе́шствующу и указу́ющу, да вси́ просла́вят Бо́га оте́ц на́ших.

Егда́ ца́рства правосла́вная на земли́ падо́ша и забве́нию пре́дана бы́ша, не преста́л еси́ побе́ды проси́ти царе́м благове́рным в дре́вних пе́снех неизме́нно, я́ко те́х держа́ва благослове́нна е́сть от Бо́га оте́ц на́ших.

Поспеша́я ко стра́ждущим, при́сно ду́шу твою́ за о́вцы твоя́ полага́л еси́, те́мже и чудотворе́ний да́р тебе́ даде́ся, моли́твами бо твои́ми немощству́ющии препоя́сашася си́лою, и ни́щии доброде́телию от гно́ища страсте́й воздвиго́шася.

Заре́ю све́тлою лю́дем па́ствы твоея́ просия́л еси́, о́тче Иоа́нне, внегда́ смути́тися душа́м и́х в годи́ну Бо́жия гне́ва, но помяну́л е́сть Госпо́дь ми́лость Свою́ и смире́нныя уте́ши тобо́ю.

К Ца́рству Бо́жию пути́ на́ша напра́ви, послужи́вый ему́ преподо́бием и пра́вдою вся́ дни́ живота́ твоего́, наста́ви ра́зум люде́й твои́х ко спасе́нию и просвети́ во тьме́ и се́ни сме́ртней седя́щия, о́тче блаже́нне Иоа́нне, да ра́достно пою́ще, соверша́ем па́мять твою́.

Бла́го є҆́сть воспѣва́ти ᲂу҆гѡ́дники бж҃їѧ, въ и҆́хже ли́цѣ на́мъ ра́достнѣ свѣ́титъ ст҃ы́й і҆ѡа́ннъ, ᲂу҆тѣша́ѧ, врачꙋ́ѧ є҆го̀ призыва́ющыѧ, и҆ наꙋча́ѧ на́съ ѻ҆́бразомъ многотрꙋ́днагѡ житїѧ̀ своегѡ̀ ревнова́ти ѡ҆ по́мощи сꙋ́щимъ въ бѣда́хъ.

ѽ жела́нїе се́рдца бг҃олюби́вагѡ! Возжела́лъ є҆сѝ є҆щѐ въ во́зрастѣ дѣ́тищномъ и҆́стины бы́ти побо́рникъ. Та́кѡ бо плѣни́ша тѧ̀ пѡ́вѣсти ѡ҆ непощади́вшихъ жи̑зни своѧ̑ за пра́вдꙋ бж҃їю ди́вныхъ ст҃ы́хъ.

Привре́менно недоꙋмѣ́ненъ бы́лъ є҆сѝ, є҆́же каковы́й пꙋ́ть, во́инскїй и҆лѝ гражда́нскїй, себѣ̀ и҆збра́ти. Но зрѣ́ѧше въ дꙋшѝ твое́й крѣпча́йша мы́сль: всего̀ себѐ преда́ти на слꙋже́нїе ст҃ѣ́й цр҃кви хрⷭ҇то́вой.

Съ весе́лїемъ соверша́емъ па́мѧть твою̀, а҆рхїпа́стырю на́шъ и҆ наста́вниче, покланѧ́емсѧ чⷭ҇тны̑мъ и҆ нетлѣ̑ннымъ моще́мъ твои̑мъ, просѧ́ще мл҃твъ твои́хъ.

Воспрїѧ́лъ є҆сѝ ѻ҆́бразъ а҆́гг҃льскїй, и҆ ѡ҆бо́лксѧ во всѧ̑ ѻ҆рꙋ̑жїѧ бж҃їѧ, ѡ҆полчи́лсѧ є҆сѝ проти́вꙋ дꙋхѡ́въ ѕло́бы поднебе́сныхъ, побѣжда́ѧ и҆̀хъ.

Не да́лъ є҆сѝ сна̀ дово́льна ѻ҆чесє́мъ твои́мъ, не возле́глъ є҆сѝ на ѻ҆́дръ во є҆́же почи́ти, ᲂу҆подо́бивсѧ ѻ҆тцє́мъ дрє́внимъ, ѽ подви́жниче.

Мно́жества а҆рхїпа́стырей наста́вникъ, цр҃кве рꙋ́сскїѧ нбⷭ҇ный предста́тель, са́мъ сы́й ревни́тель мона́шескагѡ житїѧ̀, тѧ̀, ст҃ѣ і҆ѡа́ннѣ, чꙋ́до на́шихъ дне́й и҆менова́хомъ и҆ въ по́двизѣхъ крѣпкостоѧ́тельна.

А҆́ще хо́щете, лю́дїе, ст҃а́го жи́ва ви́дѣти, во гра́дъ би́толь поспѣша́йте, зри́те та́мѡ ѻ҆тца̀ і҆ѡа́нна! Та́кѡ се́рбскїй и҆мени́тый а҆рхїпа́стырь и҆зречѐ, нра́вꙋ же и҆ дѣ́ломъ і҆ѡа́нновымъ дивѧ́щїйсѧ.

Ю҆́нѡши карпаторꙋ́сстїи, се́рбскагѡ ᲂу҆чи́лища пито́мцы, ѡ҆ тебѣ̀ съ вели́кимъ ᲂу҆миле́нїемъ повествова́хꙋ, ѡ҆ твое́мъ къ себѣ̀ непощадѣ́нїи и҆ къ ни́мъ любвѐ, є҆́же ка́кѡ ѡ҆сѣнѧ́лъ є҆сѝ и҆̀хъ крⷭ҇тнымъ зна́менїемъ, ходѧ̀ междꙋ̀ спѧ́щими, поко́й и҆́хъ соблюда́ѧ.

Подража́тель и҆́стинный хрⷭ҇то́въ бы́лъ є҆сѝ, ст҃и́телю, тѣ́мже дꙋ́шꙋ полага́ѧй за па́ствꙋ твою̀, предста́лъ є҆сѝ пастыренача́льникꙋ непосты́днѡ.

И҆сцѣле́нїй да́ръ даде́сѧ тѝ є҆щѐ во пресвѵ́терствѣ, є҆го́же преꙋмно́жилъ є҆сѝ во дни̑ ст҃и́тельства, и҆ ны́нѣ ᲂу҆соверша́еши въ и҆но́мъ и҆ вѣ́чномъ житїѝ.

Прпⷣбномꙋ наꙋ́мꙋ бы́лъ є҆сѝ содѣ́йственникъ во и҆сцѣле́нїихъ, со і҆кѡ́ною є҆гѡ̀ ст҃о́ю посѣща́ѧ до́мы стра́ждꙋщихъ.

Прїиди́те, восхва́лимъ бцⷣѣ хра́мъ воздви́гшаго, самого̀ же всѣ̑мъ скорбѧ́щымъ ра́дость и҆ хра́мъ дх҃а ст҃а́гѡ бы́вшаго.

Поспѣша́лъ є҆сѝ и҆ въ до́мы стра́ждꙋщихъ, и҆ въ пала̑ты больни̑чныѧ къ недꙋ́гꙋющымъ, ѡ҆ ни́хже ѿкры̀ тѝ гдⷭ҇ь, ꙗ҆́кѡ пречⷭ҇тыхъ та̑инъ є҆гѡ̀ препода́телю.

Болѧ́щимъ младе́нцємъ ꙗ҆ви́лсѧ є҆сѝ здра́вїѧ хода́тай, ст҃ы́й і҆ѡа́ннѣ, ско́рбь роди́тельскихъ дꙋ́шъ премѣнѧ́ѧ на ра́дость, и҆ всѣ̑мъ во́зрастомъ ты̀ показа́лсѧ є҆сѝ вожделѣ́нный помо́щникъ.

Сы́на свѣ́та и҆ днѐ бл҃года́ть вои́стинꙋ тѧ̀ содѣ́ла: на всѧ́къ бо де́нь ст҃ы́ми та́йнами ᲂу҆крѣплѧ́емь и҆ ѡ҆божа́емь, ᲂу҆тверди́лъ є҆сѝ въ гдⷭ҇ѣ се́рдце твоѐ.

Млⷭ҇тивымъ предста́тельствомъ твои́мъ вѣ̑рныѧ и҆ невѣ̑рныѧ сп҃са́хꙋсѧ и҆ да́ры бл҃года̑тныѧ прїима́хꙋ, ты̀ же, да́рꙋѧ незави́стнѡ и҆сцѣлє́нїѧ, во тьмѣ̀ пре́лести не ѡ҆ставлѧ́еши пребыва́ти заблꙋ́ждшыѧ, но є҆ди́наго царѧ̀ сла́вы ᲂу҆чи́ши правосла́вно воспѣва́ти во всѧ̑ вѣ́ки.

По́мощь и҆ ᲂу҆тѣше́нїе и҆згна́ннымъ лю́демъ свои̑мъ ди́вно сотворѝ гдⷭ҇ь, дарова́въ на́мъ тѧ̀ застꙋ́пника, ст҃и́телю і҆ѡа́ннѣ, но и҆ ны́нѣ покры́й на́съ ѿ вра̑гъ на́шихъ неви́димыхъ и҆ и҆з̾ рꙋкѝ всѣ́хъ, ненави́дѧщихъ на́съ.

Се́рдце твоѐ распространи́сѧ ко всѣ́мъ любо́вїю молѧ́щымъ тѝ сѧ̀, і҆ѡа́нне ст҃и́телю, помина́ющымъ по́двигъ всегѡ̀ многотрꙋ́днагѡ житїѧ̀ твоегѡ̀, безболѣ́зненное же и҆ ле́гкое преставле́нїе твоѐ, ѻ҆диги́трїи пречⷭ҇тыѧ вѣ́рный слꙋжи́телю.

Ничто́же возмо́же препѧ́ти тѝ, посѣща́ющꙋ въ больни́цѣ ча́дъ твои́хъ, па́стырю до́брый, ни до́ждь, ни бꙋ́рѧ, ни тьма̀ нощна́ѧ, и҆ногда̀ никомꙋ́же зовꙋ́щꙋ, дꙋ́хомъ предви́дѧ нꙋ́ждꙋ и҆́хъ, гдⷭ҇ꙋ поспѣ́шствꙋющꙋ и҆ ᲂу҆казꙋ́ющꙋ, да всѝ просла́вѧтъ бг҃а ѻ҆тє́цъ на́шихъ.

Є҆гда̀ ца̑рства правосла́внаѧ на землѝ падо́ша и҆ забве́нїю пре́дана бы́ша, не преста́лъ є҆сѝ побѣ́ды проси́ти царє́мъ бл҃говѣ̑рнымъ въ дре́внихъ пѣ́снехъ неизмѣ́ннѡ, ꙗ҆́кѡ тѣ́хъ держа́ва бл҃гослове́нна є҆́сть ѿ бг҃а ѻ҆тє́цъ на́шихъ.

Поспѣша́ѧ ко стра́ждꙋщымъ, при́снѡ дꙋ́шꙋ твою̀ за ѻ҆́вцы твоѧ̑ полага́лъ є҆сѝ, тѣ́мже и҆ чꙋдотворе́нїй да́ръ тебѣ̀ даде́сѧ, мл҃твами бо твои́ми немощствꙋ́ющїи препоѧ́сашасѧ си́лою, и҆ ни́щїи добродѣ́телїю ѿ гно́ища страсте́й воздвиго́шасѧ.

Заре́ю свѣ́тлою лю́демъ па́ствы твоеѧ̀ просїѧ́лъ є҆сѝ, ѻ҆́тче і҆ѡа́нне, внегда̀ смꙋти́тисѧ дꙋша́мъ и҆́хъ въ годи́нꙋ бж҃їѧ гнѣ́ва, но помѧнꙋ́лъ є҆́сть гдⷭ҇ь млⷭ҇ть свою̀ и҆ смирє́нныѧ ᲂу҆тѣ́ши тобо́ю.

Къ црⷭ҇твꙋ бж҃їю пꙋти̑ на́шѧ напра́ви, послꙋжи́вый є҆мꙋ̀ преподо́бїемъ и҆ пра́вдою всѧ̑ дни̑ живота̀ твоегѡ̀, наста́ви ра́зꙋмъ люде́й твои́хъ ко спⷭ҇нїю и҆ просвѣтѝ во тьмѣ̀ и҆ сѣ́ни сме́ртнѣй сѣдѧ́щыѧ, ѻ҆́тче бл҃же́нне і҆ѡа́ннѣ, да ра́достно пою́ще, соверша́емъ па́мѧть твою̀.