Канон преподобному равноапостольному Науму Охридскому, первый

Пото́ков полноту́ покажи́ мя́ Свята́го Ду́ха, Нау́ме, моли́твами твои́ми, я́ко река́ Бо́жия, да провеща́ю твоя́ дела́ пе́сньми и пе́ньми.

После́дователь бы́л еси́ верхо́вных учи́телей Бо́лгарския земли́ от ю́ности, прича́стник же споспе́шников и́х и сподви́жник.

Жи́знь твоя́ равноа́нгельна и жи́тельство па́че челове́к, страда́ния же и по́двизи твои́ вои́стину му́ченически, его́же ра́ди тя́ воспева́ем.

Возне́сся превы́ше боже́ственных ке́дров соверше́нством, Нау́ме, ди́вных исто́чниче, чудесы́ я́ве покры́л еси́ преде́лы Бо́лгарския и концы́ земны́я.

Ле́гкое и́го Госпо́дне поне́с, преподо́бне, гоне́ния и темни́цы, ско́рби же и ра́ны на возвраще́ние ве́ры до́блественно претерпе́л еси́.

Преде́лы естества́ преступи́в и к боговиде́нию приступи́в, просвети́лся еси́ мы́слию и прия́л еси́ Ду́ха незави́стныя благода́ти.

Люде́й бо́лгарских просвети́л еси́, во тме́ предлежа́щих нече́стия, о́тче, и хра́м соде́лал еси́ Ду́ха боже́ственными твои́ми уче́ньми.

Се́ твоему́ пропове́данию вня́ша язы́цы каменосерде́чнии и позна́ша Бо́га, я́коже испо́лнитися всему́ ра́зума Бо́жия, я́коже пи́шет Иса́ия. Те́мже твою́ па́мять сла́вим.

Му́дрости Прему́драго по́лн яви́вся, бо́лгарских гру́бых люде́й научи́л еси́ почита́ти Тро́ицу Ли́цы, Еди́наго же Бо́га естество́м, неизме́нно и несли́тно объедине́ннаго, — сла́ва Тому́ — взыва́ющих.

Мо́ре безбо́жия возмути́л еси́ по проро́ку, я́коже ко́нь богоизбра́нный, му́дре Нау́ме, и челове́ков во глубине́ неве́рия пла́вающих, я́коже ры́бы, извле́кл еси́, — сла́ва Го́споду, — вопию́щих.

Но́вый апо́стол бы́л еси́, о́тче, седми́десяти уподо́бленный, после́дуя Мефо́дию, я́коже Па́влу, про́поведи возвеща́ющему та́инство.

Приобре́тение благода́ти вои́стину яви́лся еси́ по избра́нию, му́дре, я́коже дре́вле проро́к богодухнове́нный, пе́рвый Нау́м, его́же и и́мя до́бре насле́довал еси́.

Возлюби́л еси́ Христа́ па́че си́лы от се́рдца твоего́, от мы́сли же и души́ твоея́, преподо́бне. Те́мже па́че ны́не Ему́ возлюби́лся еси́ и сла́вы сподо́бился еси́.

Учени́к четвери́цу испо́лнил еси́ пропове́дник Христо́вых и му́дрых тайново́дцев бо́лгарскаго ро́да, Кири́лла же и Мефо́дия.

Прогна́ни бы́сте дале́че, таи́нницы и тайново́дцы, претерпе́сте темни́цы и ра́нени бы́сте, произше́ствия ра́ди Ду́ха Свята́го бе́дствующе.

Спеши́ши пути́ да́льныя с Кири́ллом и Мефо́дием от се́вера да́же до Ри́ма, трудо́м и́х обща́яся, болга́р же по́слежде просвети́л еси́.

Де́йствуяй чудесы́ Бо́г спасе́ тя́ чуде́сне от ва́рварския темни́цы со стаи́нники, внеза́пу разре́шшимся у́зам ру́к и но́г.

Внуше́ньми боже́ственных уче́ний бы́л еси́ учи́тель люде́й, ко злу́ подви́жных, измене́ньми же боже́ственными си́х обде́лал еси́ вме́сто звере́й в богонауче́нная овча́та кро́ткаго Христа́.

Колесни́ца Госпо́дня яви́лся еси́, Нау́ме преподо́бне, и́мя Христо́во нося́ по Писа́нию пред лице́м мно́гих язы́к и царе́й, прославля́я же дея́ньми и от Него́ сла́вно прославля́емь.

Нау́ма, богодухнове́нный орга́н Ду́ха, воспои́м в словесе́х свяще́нных, ве́рнии, вопию́ще ко Го́споду: его́ моли́твами спаси́ восхваля́ющих держа́ву Твою́.

Обте́кл еси́ вся́ страны́ Бо́лгарския с Кли́ментом, твои́м совоспита́нником, всему́дре, Охрид и окре́стная вся́, лю́ди путеводя́ ко стези́ пра́вей твои́ми уче́ньми.

Кре́ст тво́й на ра́мо взе́м, Нау́ме му́дре, Христу́ после́довал еси́, еди́ному Царю́, от Него́же и побе́ды вене́ц прия́л еси́, я́ко подвиза́выйся зако́нно, богоблаже́нне.

Достодо́лжно чти́т Болга́рия твою́ па́мять, ты́ бо тоя́ еси́ светово́ждь с боже́ственным Гора́здом, Кли́ментом чудотво́рцем, Ангела́рием же, всему́дрыми священнотаи́нники, ю́же моли́твами ва́шими соблюда́йте при́сно.

Ри́м ви́де тече́ние ва́ше равноапо́стольное, боже́ственне Мефо́дие и Кири́лле богоблаже́нне, и Бо́жиих я́же на ва́с устраши́ся пресла́вных. Те́мже и Нау́ма, ва́шего сказа́теля, восхваля́ем ле́тными пе́сньми.

Ликостоя́ния отце́в и апо́столов, иера́рхов, проро́ков, преподо́бных и му́чеников богоно́сных восприя́ша тя́ ны́не со сподви́жники твои́ми, житие́ бо подража́л еси́ все́х, с ни́миже на́с помяни́.

Свяще́ннейший зна́юще тя́ киво́т, заве́та Бо́жия словеса́ нося́й, спаса́ющая бо́лгар мно́жества в зе́млю обетова́ния ве́чнующую, почита́ем моще́й твои́х ра́ку, к боже́ственней возводи́ми жи́зни.