Православный календарь
Размер шрифта:

Ака́ѳістъ

А҆ка́ѳїстъ ст҃и́телю гꙋ́рїю, а҆рхїепⷭ҇копꙋ каза́нскомꙋ и҆ свїѧ́жскомꙋ чꙋдотво́рцꙋ.

Свт. Гурия, архиеп. Казанского (перен. мощ.) (1630) 3 июля 2026

Конда́къ а҃

Возбра́нный ст҃и́телю и҆ чꙋдотво́рче гꙋ́рїе, прїимѝ ѿ на́съ недосто́йныхъ подоба́ющꙋю тѝ похвалꙋ̀, ꙗ҆́кѡ первост҃и́телю, ᲂу҆чи́телю и҆ покрови́телю гра́да каза́ни. и҆, ꙗ҆́кѡ и҆мѣ́ѧй дерзнове́нїе ко гдⷭ҇ꙋ, ѿ всѧ́кихъ на́съ бѣ́дъ и҆ скорбе́й и҆збавлѧ́й, да съ ра́достїю зове́мъ тѝ:

Ра́дꙋйсѧ, гꙋ́рїе, каза́нскїй и҆ свїѧ́жскїй чꙋдотво́рче.

І҆́косъ а҃

А҆́гг҃лѡвъ творе́цъ и҆ всеѧ̀ тва́ри содѣ́тель пред̾избра̀, ѡ҆ст҃ѝ и҆ поста́ви тѧ̀, ст҃и́телю, просвѣти́телѧ, ᲂу҆чи́телѧ и҆ покрови́телѧ гра́дꙋ каза́ни. на́съ же наꙋчѝ вопи́ти тебѣ̀ си́це:

Ра́дꙋйсѧ, предѡпредѣле́нный въ предвѣ́чнѣмъ совѣ́тѣ бж҃їемъ къ просвѣще́нїю невѣ́рныхъ: ра́дꙋйсѧ, пред̾ѡчище́нный длѧ сегѡ̀ слꙋже́нїѧ сосꙋ́де блгⷣти бж҃їѧ.

Ра́дꙋйсѧ, зла́то, и҆скꙋше́нное въ горни́лѣ долговре́менныхъ страда́нїй: ра́дꙋйсѧ, съ ю҆́ности мі́ромъ ѿве́рженный и҆ мі́ра ѿвергі́йсѧ.

Ра́дꙋйсѧ, въ темни́цꙋ неви́ннѡ, ꙗ҆́кѡ і҆ѡ́сифъ, заключе́нный: ра́дꙋйсѧ, въ то́й темни́цѣ нбⷭ҇нѣй премꙋ́дрости наꙋчи́выйсѧ.

Ра́дꙋйсѧ, въ темни́цѣ то́йже свѣ́тъ, дарова́вшїй тебѣ̀ свобо́дꙋ, ᲂу҆зрѣ́вый: ра́дꙋйсѧ, и҆з̾ неѧ̀ чꙋ́днымъ ѡ҆́бразомъ и҆зведе́нный.

Ра́дꙋйсѧ, по полꙋче́нїи свобо́ды всего̀ себѐ бг҃ꙋ порабо́тивый: ра́дꙋйсѧ, чистоты̀ и҆ дѣ́вства храни́телю.

Ра́дꙋйсѧ, поста̀ и҆ мл҃твы ре́вностный блюсти́телю: ра́дꙋйсѧ, до́бльственный хрⷭ҇та̀ послѣ́дователю.

Ра́дꙋйсѧ, гꙋ́рїе, каза́нскїй и҆ свїѧ́жскїй чꙋдотво́рче.

Конда́къ в҃

Ви́дѧ себѐ неви́ннѡ ѡ҆клевета́на, ѡ҆сꙋжде́нна и҆ мра́чной темни́цы пи́щею безслове́сныхъ пита́ема, глаго́лалъ є҆сѝ, ст҃и́телю, са́мъ себѣ̀: а҆́ще не бы̀ гдⷭ҇ь бг҃ъ попꙋсти́лъ семꙋ̀ бы́ти со мно́ю, не бы̀ пости́гла мѧ̀ напа́сть сїѧ̀: тѣ́мже пою̀ є҆мꙋ̀: А҆ллилꙋ́їа.

І҆́косъ в҃

Ра́зꙋмъ бжⷭ҇твенный и҆мѣ́ѧ, ст҃и́телю, ты̀ въ та́йнꙋ сꙋде́бъ бж҃їихъ ѡ҆ тебѣ̀ ᲂу҆глꙋби́лсѧ є҆сѝ и҆ въ неви́нномъ заточе́нїи твое́мъ бл҃гость и҆́хъ прови́дѣлъ є҆сѝ. тѣ́мже прїимѝ ѿ на́съ сицева̑ѧ:

Ра́дꙋйсѧ, въ бѣда́хъ и҆ тѣснота́хъ твои́хъ бл҃гость бж҃їю ви́дѣвый: ра́дꙋйсѧ, во всѣ́хъ ѕлы́хъ свои́хъ бг҃а бл҃гослови́вый.

Ра́дꙋйсѧ, за притѣсни́телей свои́хъ є҆мꙋ̀ моли́выйсѧ: ра́дꙋйсѧ, проще́нїе и҆̀мъ ᲂу҆ гдⷭ҇а и҆спроси́вый.

Ра́дꙋйсѧ, те́плою мл҃твою къ бг҃ꙋ себѐ ᲂу҆споко́ивый: ра́дꙋйсѧ, є҆́ю дово́льство и҆ ᲂу҆тѣше́нїе въ тѣснотѣ̀ твое́й себѣ̀ ѡ҆брѣты́й.

Ра́дꙋйсѧ, свобо́ды чꙋ́днымъ ѡ҆́бразомъ сподо́бивыйсѧ: ра́дꙋйсѧ, ди́вный въ се́мъ а҆пⷭ҇лꙋ петрꙋ̀ наслѣ́дниче.

Ра́дꙋйсѧ, терпѣли́вый ᲂу҆ченичѐ хрⷭ҇та̀ сп҃си́телѧ: ра́дꙋйсѧ, взе́мшїй є҆гѡ̀ бл҃го́е и҆́го на себѐ.

Ра́дꙋйсѧ, поне́сшїй є҆гѡ̀ ле́гкое бре́мѧ: ра́дꙋйсѧ, мона́хѡвъ ᲂу҆краше́нїе.

Ра́дꙋйсѧ, гꙋ́рїе, каза́нскїй и҆ свїѧ́жскїй чꙋдотво́рче.

Конда́къ г҃

Си́ла вы́шнѧгѡ ѡ҆сѣнѝ тѧ̀, ст҃и́телю, є҆гда̀ съ постриже́нїемъ власѡ́въ всегѡ̀ себє̀ всецѣ́лѡ є҆мꙋ̀ посвѧти́лъ є҆сѝ. тѣ́мже въ чистотѣ̀, постѣ̀ и҆ мл҃твѣ непреста́ннѡ воспѣва́лъ є҆сѝ бг҃ꙋ: А҆ллилꙋ́їа.

І҆́косъ г҃

И҆мѣ́ѧ и҆́стинное вѣ́дѣнїе ѡ҆ ко́знѣхъ мі́ра, пло́ти и҆ дїа́вола, ты̀, ст҃и́телю, крѣ́пкѡ проти́вꙋ тѣ́хъ воѡрꙋжи́лсѧ є҆сѝ бдѣ́нїемъ, посто́мъ и҆ мл҃твою. тѣ́мже вопїе́мъ тѝ:

Ра́дꙋйсѧ, неꙋсы́пный хрⷭ҇то́въ во́ине: ра́дꙋйсѧ, при́снѡ блюды́й дꙋ́шꙋ твою̀ ѿ скве́рнъ пло́ти и҆ мі́ра, и҆ ко́зней дїа́вола.

Ра́дꙋйсѧ, ѡ҆па́сность ѿ ни́хъ бл҃говре́меннѣ предви́дѣвый: ра́дꙋйсѧ, посто́мъ пло́ть твою̀ и҆знꙋри́вый.

Ра́дꙋйсѧ, всецѣ́лѡ дꙋ́хꙋ твоемꙋ̀ пло́ть порабо́тивый: ра́дꙋйсѧ, со страстьмѝ и҆ похотьмѝ пло́ть распѧ́вый.

Ра́дꙋйсѧ, мл҃твою дꙋ́хъ тво́й ѡ҆крили́вый: ра́дꙋйсѧ, на крилѣ́хъ мл҃твы всегда̀ въ гѡ́рнѧѧ пари́вый.

Ра́дꙋйсѧ, и҆ на зе́млю блгⷣть бж҃їю мл҃твами твои́ми привлека́вый: ра́дꙋйсѧ, ᲂу҆се́рдный ѡ҆ всѣ́хъ мл҃твенниче.

Ра́дꙋйсѧ, земны́й а҆́гг҃ле и҆ нбⷭ҇ный человѣ́че: ра́дꙋйсѧ, мона́хѡвъ мꙋ́дрый и҆ кро́ткїй наста́вниче.

Ра́дꙋйсѧ, гꙋ́рїе, каза́нскїй и҆ свїѧ́жскїй чꙋдотво́рче.

Конда́къ д҃

Бꙋ́рю внꙋ́трь и҆мѣ́лъ є҆сѝ помышле́нїй сꙋмни́тельныхъ, є҆гда̀ во и҆гꙋ́мена поста́вленъ бы́лъ є҆сѝ і҆ѡ́сифовой ѡ҆би́тели, во смире́нїи помышлѧ́ѧ ѡ҆ трꙋ́дности сегѡ̀ слꙋже́нїѧ и҆ сла́бости си́лъ твои́хъ. тѣ́мже и҆ слꙋже́нїе и҆гꙋ́мена съ себє̀ сложи́лъ є҆сѝ, и҆ въ поко́е дꙋ́ха бг҃ꙋ пѣ́лъ є҆сѝ: А҆ллилꙋ́їа.

І҆́косъ д҃

Слы́ша держа́вный ца́рь і҆ѡа́ннъ ѡ҆ твои́хъ ст҃ы́хъ по́двигахъ въ постѣ̀ и҆ моли́твѣ, повелѣ̀ тѧ̀ па́ки поста́вити во и҆гꙋ́мена селижа́ровой ѡ҆би́тели. ты̀ же, прїе́мый во́лю царе́вꙋ за во́лю бж҃їю, па́ки взѧ́лъ є҆сѝ врꙋче́нный тебѣ̀ же́злъ правле́нїѧ и҆ трꙋды̀ ко трꙋдѡ́мъ прилага́лъ є҆сѝ. тѣ́мже прїимѝ ѿ на́съ сицева̑ѧ:

Ра́дꙋйсѧ, свѣти́льниче, не таи́мый под̾ спꙋ́домъ: ра́дꙋйсѧ, свѣ́те, во тьмѣ̀ сїѧ́ѧй.

Ра́дꙋйсѧ, во́лю бж҃їю въ во́лѣ царе́вой ᲂу҆смотрѣ́вый: ра́дꙋйсѧ, всецѣ́лѡ себѐ ѻ҆́ной преда́вый.

Ра́дꙋйсѧ, и҆сполни́телю во́ли бж҃їей ᲂу҆се́рдный: ра́дꙋйсѧ, чи́на цр҃ко́внагѡ стро́гїй блюсти́телю.

Ра́дꙋйсѧ, бл҃гочи́нїѧ монасты́рскагѡ вѣ́рный храни́телю: ра́дꙋйсѧ, побо́рниче правосла́вныѧ вѣ́ры.

Ра́дꙋйсѧ, ᲂу҆се́рдный храни́телю ѻ҆те́ческихъ преда́нїй: ра́дꙋйсѧ, сосꙋ́де блгⷣти бж҃їѧ.

Ра́дꙋйсѧ, живы́й сви́тче зако́на бж҃їѧ: ра́дꙋйсѧ, а҆пⷭ҇ле каза́нскїѧ ѡ҆́бласти.

Ра́дꙋйсѧ, гꙋ́рїе, каза́нскїй и҆ свїѧ́жскїй чꙋдотво́рче.

Конда́къ є҃

Бг҃оте́чномꙋ со́лнцꙋ ᲂу҆подо́би тѧ̀, ст҃и́телю, гдⷭ҇ь бг҃ъ, въ ди́вномъ твое́мъ и҆збра́нїи на ст҃и́тельскїй престо́лъ, є҆гда̀ тебѣ̀ жре́бїемъ ᲂу҆ка́за бы́ти первост҃и́телемъ каза́нскїѧ цр҃кве. мы́ же пое́мъ бг҃ꙋ, ᲂу҆диви́вшемꙋ на тебѣ̀ блгⷣть и҆ млⷭ҇ть свою̀: А҆ллилꙋ́їа.

І҆́косъ є҃

Ви́дѣвше держа́вный ца́рь і҆ѡа́ннъ и҆ всѝ правосла́внїи лю́дїе чꙋ́дное бж҃їе и҆збра́нїе тѧ̀ по жре́бїю въ первост҃и́телѧ каза́нскїѧ цр҃кве, ра́довахꙋсѧ. мы̀ же со бл҃гоговѣ́нїемъ воспѣва́емъ тѝ си́це:

Ра́дꙋйсѧ, люби́миче бж҃їй, ᲂу҆ка́занный жре́бїемъ: ра́дꙋйсѧ, слꙋжи́телю гдⷭ҇ень, пред̾ѡпредѣле́нный длѧ воздѣ́ланїѧ но́выѧ ни́вы.

Ра́дꙋйсѧ, па́стырю слове́снаго ста́да хрⷭ҇то́ва, блꙋжда́вшагѡ по верте́пѡмъ невѣ́рїѧ и҆ нече́стїѧ: ра́дꙋйсѧ, потае́нный свѣти́льниче, ди́внѡ поста́вленный на высотꙋ̀ цр҃кве бж҃їѧ.

Ра́дꙋйсѧ, проповѣ́дниче є҆ѵⷢ҇лїѧ хрⷭ҇то́ва въ странѣ̀ нече́стїѧ магомета́нскагѡ: ра́дꙋйсѧ, принесы́й свѣ́тъ хрⷭ҇то́въ въ странꙋ̀ тьмы̀ и҆ заблꙋжде́нїй.

Ра́дꙋйсѧ, крѣ́пкаѧ наде́ждо цр҃кве правосла́вныѧ: ра́дꙋйсѧ, и҆сполни́телю бл҃ги́хъ жела́нїй царѧ̀ держа́внагѡ.

Ра́дꙋйсѧ, ѡ҆бра́довавый є҆гѡ̀ твои́мъ ре́вностнымъ слꙋже́нїемъ: ра́дꙋйсѧ, ра́досте и҆ ᲂу҆тѣше́нїе всѣ́хъ градѡ́въ, и҆̀же сподо́бишасѧ тѧ̀ ви́дѣти и҆ ѿ тебє̀ бл҃гослови́тисѧ.

Ра́дꙋйсѧ, сосꙋ́де блгⷣти, просвѣща́ющей вѣ́рныхъ: ра́дꙋйсѧ, первост҃и́телю каза́нскїѧ ѡ҆́бласти.

Ра́дꙋйсѧ, гꙋ́рїе, каза́нскїй и҆ свїѧ́жскїй чꙋдотво́рче.

Конда́къ ѕ҃

Проповѣ́дникомъ бг҃оно́снымъ и҆збра́нъ бы́лъ є҆сѝ длѧ каза́нскїѧ ѻ҆́бласти, ст҃и́телю: тѣ́мже ст҃олѣ́пнѡ ше́ствовалъ є҆сѝ и҆з̾ ца́рствꙋющагѡ гра́да москвы̀ въ новопросвѣще́нный гра́дъ каза́нь, ѡ҆свѧща́ѧ ше́ствїемъ и҆ бл҃гослове́нїемъ твои́мъ гра́ды и҆ вѣ́си на пꙋтѝ и҆ непреста́ннѡ воспѣва́ѧ бг҃ꙋ: А҆ллилꙋ́їа.

І҆́косъ ѕ҃

Возсїѧ́вый въ бг҃оспаса́емомъ гра́дѣ каза́ни свѣ́тъ и҆́стины хрⷭ҇то́съ бг҃ъ на́шъ, и҆ прогна́вый тьмꙋ̀ магомета́нскагѡ и҆ ꙗ҆зы́ческагѡ нече́стїѧ, и҆збра̀ тѧ̀, ст҃и́телю, въ пе́рвагѡ здѣ̀ слꙋжи́телѧ и҆ и҆спо́лнителѧ ст҃о́й во́ли є҆гѡ̀. тѣ́мже ѡ҆ст҃ѝ тѧ̀ и҆ просла́ви, на́съ же наꙋчѝ вопи́ти тебѣ̀ си́це:

Ра́дꙋйсѧ, свѣ́та и҆́стины распространи́телю: ра́дꙋйсѧ, дїа́вольскїѧ тьмы̀ прогна́телю.

Ра́дꙋйсѧ, пе́рвый сѣ́ѧтелю на но́вой ни́вѣ бж҃їей: ра́дꙋйсѧ, мꙋ́дрый возрасти́телю на не́й стори́чныхъ кла́сѡвъ.

Ра́дꙋйсѧ, неꙋтоми́мый є҆ѧ̀ напои́телю: ра́дꙋйсѧ, дрꙋ́же царѧ̀ земна́гѡ, и҆сполнѧ́ющагѡ во́лю цр҃ѧ̀ нбⷭ҇нагѡ.

Ра́дꙋйсѧ, вѣ́рный слꙋжи́телю цр҃ѧ̀ нбⷭ҇нагѡ: ра́дꙋйсѧ, а҆пⷭ҇ле каза́нскїѧ цр҃кве.

Ра́дꙋйсѧ, привлека́ѧй къ вѣ́рѣ невѣ́рꙋющихъ чи́стою хрⷭ҇то́вою любо́вїю: ра́дꙋйсѧ, дрꙋ́же хрⷭ҇то́въ, приводѧ́й лю́ди къ бл҃гоговѣ́нїю пред̾ бг҃омъ.

Ра́дꙋйсѧ, притѣснѧ́емыхъ вдо́въ и҆ сиро́тъ защи́тниче: ра́дꙋйсѧ, всѣ́хъ притека́ющихъ къ тебѣ̀ застꙋ́пниче.

Ра́дꙋйсѧ, гꙋ́рїе, каза́нскїй и҆ свїѧ́жскїй чꙋдотво́рче.

Конда́къ з҃

Хотѧ́й ᲂу҆стро́ити та́йнꙋ спасе́нїѧ каза́нскихъ тата́ръ и҆ ꙗ҆зы́чникѡвъ, хрⷭ҇то́съ бг҃ъ на́шъ и҆збра̀ тѧ̀, ст҃и́телю, въ а҆пⷭ҇ла и҆ просвѣти́телѧ страны̀ сеѧ̀. ты̀ же, ᲂу҆разꙋмѣ́въ та́йнꙋ сп҃се́нїѧ, вопїѧ́лъ є҆сѝ бг҃ꙋ: А҆ллилꙋ́їа.

І҆́косъ з҃

Но́вое чꙋ́до показа̀ гдⷭ҇ь и҆ сп҃съ на́шъ, і҆и҃съ хрⷭ҇то́съ, и҆збра́вый тѧ̀ въ первост҃и́телѧ каза́нскїѧ цр҃кве, є҆гда̀ тѧ̀ є҆ди́наго и҆з̾ четы́рехъ жре́бїемъ ᲂу҆ка́за все́й свое́й правосла́вной цр҃кви. мы́ же, дивѧ́щесѧ, вопїе́мъ тѝ си́це:

Ра́дꙋйсѧ, ѿ вѣ́чности пред̾ѡпредѣле́нный просвѣти́телю каза́нскїѧ ѡ҆́бласти: ра́дꙋйсѧ, сокрове́нный до вре́мене сосꙋ́де блгⷣти бж҃їѧ.

Ра́дꙋйсѧ, и҆збра́нїемъ твои́мъ всю̀ цр҃ковь ᲂу҆диви́вый и҆ ѡ҆бра́довавый: ра́дꙋйсѧ, тѣ́мже и҆збра́нїемъ въ пре́данности бг҃ꙋ ᲂу҆крѣпи́выйсѧ.

Ра́дꙋйсѧ, ди́вное твоѐ и҆збра́нїе слꙋже́нїемъ твои́мъ ѡ҆правда́вый: ра́дꙋйсѧ, съ бл҃гослове́нїѧ бж҃їѧ грѧды́й въ каза́нь во и҆́мѧ гдⷭ҇не.

Ра́дꙋйсѧ, въ пꙋтѝ твое́мъ непреста́ннѡ воспѣва́ѧй и҆ бл҃гословлѧ́ѧй: ра́дꙋйсѧ, ве́сь пꙋ́ть тво́й мл҃твами ѡ҆ст҃и́вый.

Ра́дꙋйсѧ, безбѣ́днѡ на па́ствꙋ твою̀ прише́дый: ра́дꙋйсѧ, бл҃года́тный ѡ҆бнови́телю и҆ ѡ҆ст҃и́телю гра́да каза́ни.

Ра́дꙋйсѧ, бл҃голѣ́пнагѡ хра́ма прест҃ы́ѧ бцⷣы созда́телю: ра́дꙋйсѧ, ѡ҆бра́довавый правосла́вныхъ каза́нскихъ жи́телей твои́мъ прише́ствїемъ.

Ра́дꙋйсѧ, гꙋ́рїе, каза́нскїй и҆ свїѧ́жскїй чꙋдотво́рче.

Конда́къ и҃

Стра́нное и҆збра́нїе твоѐ, ст҃и́телю, помышлѧ́юще и҆ бг҃олѣ́пное ше́ствїе твоѐ на но́вꙋю па́ствꙋ твою̀ зна́юще, съ бл҃гоговѣ́нїемъ возводи́мъ ᲂу҆мы̀ и҆ сердца̀ своѧ̑ къ бг҃ꙋ, та́кѡ ᲂу҆стро́ившемꙋ ди́вное твоѐ прославле́нїе, поѧ̀ є҆мꙋ̀: А҆ллилꙋ́їа.

І҆́косъ и҃

Ве́сь ᲂу҆́мъ тво́й, ст҃и́телю, впери́лъ є҆сѝ къ бо́гꙋ и҆ всегѡ̀ себѐ пре́далъ є҆сѝ ст҃ѣ́й во́лѣ є҆гѡ̀, є҆гда̀ встꙋпи́лъ є҆сѝ на престо́лъ каза́нскїѧ па́ствы твоеѧ̀, ю҆́же и҆ не престаѧ̀ поꙋча́лъ є҆сѝ сло́вомъ и҆ дѣ́ломъ. тѣ́мже прїимѝ ѿ на́съ похвалы̑ сїѧ̑:

Ра́дꙋйсѧ, до́брый па́стырю, всегда̀ гото́вый положи́ти дꙋ́шꙋ свою̀ за ѻ҆́вцы па̑жити твоеѧ̀: ра́дꙋйсѧ, мꙋ́дрый храни́телю ста́да твоегѡ̀ ѿ волкѡ́въ, хотѧ́щихъ гꙋби́ти є҆̀.

Ра́дꙋйсѧ, неꙋтоми́мый дѣ́лателю въ вертогра́дѣ хрⷭ҇то́вомъ: ра́дꙋйсѧ, наста́вниче па́стырей и҆ ᲂу҆чи́телей твоеѧ̀ па́ствы.

Ра́дꙋйсѧ, разꙋ́мный вождю̀ въ житїѝ по за́повѣдемъ бж҃їимъ и҆ преда́нїємъ а҆пⷭ҇льскимъ: ра́дꙋйсѧ, ѻ҆́ч҃е, просвѣти́телю и҆ попечи́телю всѣ́хъ новокреще́нныхъ.

Ра́дꙋйсѧ, кро́ткїй и҆ добросерде́чный ᲂу҆бѣди́телю въ и҆́стинѣ и҆ бжⷭ҇твенности хрⷭ҇тїа́нскїѧ вѣ́ры невѣ́рꙋющихъ: ра́дꙋйсѧ, бг҃омꙋ́дрый вразꙋми́телю люде́й мы́слѧщихъ.

Ра́дꙋйсѧ, мꙋ́дрый рꙋководи́телю твои́хъ сотрꙋ́дникѡвъ: ра́дꙋйсѧ, бл҃гопопечи́тельный ѻ҆́ч҃е всѣ́хъ сиро́тствꙋющихъ.

Ра́дꙋйсѧ, притѣснѧ́емыхъ застꙋ́пниче: ра́дꙋйсѧ, хода́таю за невѣ́рныхъ, позна́вшихъ и҆́стинꙋ.

Ра́дꙋйсѧ, гꙋ́рїе, каза́нскїй и҆ свїѧ́жскїй чꙋдотво́рче.

Конда́къ ѳ҃

Всѧ́кое є҆стество̀ а҆́гг҃льское ᲂу҆диви́сѧ многотрꙋ́днымъ твои́мъ па̑стырскимъ по́двигѡмъ, показꙋ́емымъ во бдѣ́нїи, постѣ̀, мл҃твѣ, и҆ въ неꙋсы́пномъ попече́нїи ѡ҆ ста́дѣ твое́мъ. ты̀ бо, ст҃и́телю, де́ннѡ и҆ но́щнѡ бесѣ́дꙋѧ съ бг҃омъ мл҃твою, сло́вомъ и҆ дѣ́ломъ непреста́ннѡ воспѣва́лъ є҆мꙋ̀: А҆ллилꙋ́їа.

І҆́косъ ѳ҃

Виті́и многовѣща́нныѧ, ꙗ҆́кѡ ры̑бы безгла̑сныѧ ви́димъ ѡ҆ тебѣ̀, ст҃и́телю: недоꙋмѣва́ютъ бо глаго́лати, є҆́же ка́кѡ и҆ ѿше́льникѡмъ денноно́щною мл҃твою примѣ́ръ подава́еши, и҆ па́ствꙋ твою̀ примѣ́рнѡ ᲂу҆правлѧ́еши. мы́ же, дивѧ́щесѧ, бл҃гоговѣ́йнѡ вопїе́мъ тѝ:

Ра́дꙋйсѧ, па́стырю, подава́ѧй примѣ́ръ мона́шествꙋющымъ: ра́дꙋйсѧ, собесѣ́дниче съ бг҃омъ, наꙋча́ѧй всѣ́хъ послѣ́дованїю твоемꙋ̀ примѣ́рꙋ.

Ра́дꙋйсѧ, тлетво́рнагѡ сна̀ прогони́телю: ра́дꙋйсѧ, постꙋ̀ и҆ бдѣ́нїю ᲂу҆чи́телю.

Ра́дꙋйсѧ, лѣни́выхъ возбꙋди́телю: ра́дꙋйсѧ, примѣ́рный бж҃їй подви́жниче.

Ра́дꙋйсѧ, мꙋ́дрѡ привлека́вый невѣ́рныхъ къ принѧ́тїю правосла́вныѧ вѣ́ры: ра́дꙋйсѧ, неꙋтоми́мый проповѣ́дниче сло́ва бж҃їѧ.

Ра́дꙋйсѧ, сло́во сїѐ здра́вѡ, немѧте́жнѡ и҆ ᲂу҆чи́тельно преподава́вый: ра́дꙋйсѧ, бл҃горазꙋ́мный вразꙋми́телю магомета́нъ въ и҆́стинѣ хрⷭ҇тїа́нскїѧ вѣ́ры.

Ра́дꙋйсѧ, ди́вный ᲂу҆каза́телю всѣ̑мъ невѣ́рꙋющымъ на вели́чїе и҆ сла́вꙋ і҆и҃са хрⷭ҇та̀: ра́дꙋйсѧ, мꙋ́дрѡ привлека́ѧй къ немꙋ̀ всѣ́хъ и҆ всѧ̑.

Ра́дꙋйсѧ, гꙋ́рїе, каза́нскїй и҆ свїѧ́жскїй чꙋдотво́рче.

Конда́къ і҃

Сп҃стѝ хотѧ̀ магомета́нъ и҆ ꙗ҆зы́чникѡвъ, въ но́вѣй па́ствѣ твое́й находѧ́щихсѧ, ты̀, ꙗ҆́кѡ до́брый па́стырь, всю̀ мꙋ́дрость твою̀ къ семꙋ̀ ᲂу҆потреби́лъ є҆сѝ и҆ непреста́ннѡ бг҃а въ по́мощь призыва́лъ є҆сѝ, воспѣва́ѧ є҆мꙋ̀: А҆ллилꙋ́їа.

І҆́косъ і҃

Стѣна̀ є҆сѝ вѣ́рꙋющымъ и҆ къ тебѣ̀ прибѣга́ющымъ, и҆́бо нб҃сѐ и҆ землѝ творе́цъ ᲂу҆стро́и тѧ̀, ст҃и́телю, вѣ́ры ᲂу҆крѣпи́телѧ, невѣ́рїѧ же ѡ҆бличи́телѧ, на́съ же наꙋчѝ взыва́ти тебѣ̀ си́це:

Ра́дꙋйсѧ, сто́лпе правосла́внѡ вѣ́рꙋющихъ: ра́дꙋйсѧ, ѿверза́ющїй и҆́мъ две́рь сп҃се́нїѧ.

Ра́дꙋйсѧ, наста́вниче мꙋ́дрости ѡ҆ хрⷭ҇тѣ̀ сп҃си́телѣ: ра́дꙋйсѧ, препода́телю бжⷭ҇твенныѧ благода́ти.

Ра́дꙋйсѧ, ѡ҆бнови́телю растлѣ́ннагѡ человѣ́чества въ невѣ́рꙋющихъ: ра́дꙋйсѧ, наста́вителю ма́лѡ смы́слѧщихъ и҆ не смы́слѧщихъ.

Ра́дꙋйсѧ, бѣсѡ́вскїѧ кѡ́зни проразꙋмѣва́ѧй: ра́дꙋйсѧ, си́лꙋ хрⷭ҇то́вꙋ проповѣ́дꙋѧй.

Ра́дꙋйсѧ, дѣ́вство и҆ чистотꙋ̀ хранѧ́й и҆ проповѣ́дꙋѧй: ра́дꙋйсѧ, дрꙋ́же жениха̀, ра́дꙋющїйсѧ ѡ҆ сочета́нїи съ ни́мъ чи́стыхъ и҆ неѕло́бивыхъ дꙋ́шъ.

Ра́дꙋйсѧ, а҆рхїтрїклі́не бра́ка, соедини́вшагѡ безчи́сленное мно́жество дꙋ́шъ съ нбⷭ҇нымъ женихо́мъ: ра́дꙋйсѧ, ревнꙋ́ѧй бж҃їею ре́вностїю ѡ҆ вѣ́рности хрⷭ҇тꙋ̀ дꙋ́шъ хрⷭ҇тїа́нскихъ.

Ра́дꙋйсѧ, гꙋ́рїе, каза́нскїй и҆ свїѧжскїй чꙋдотво́рче.

Конда́къ а҃і

Пѣ́нїе всѧ́кое побѣжда́етсѧ, спростре́тисѧ тща́щеесѧ ко мно́жествꙋ мно́гихъ твои́хъ добродѣ́телей, ст҃и́телю. никі́ѧ бо пѣ̑сни мо́гꙋтъ бы́ти равночи́слєнны и҆̀мъ. тѣ́мже, бл҃гогове́ѧ пред̾ тобо́ю, пое́мъ бг҃ꙋ: А҆ллилꙋ́їа.

І҆́косъ а҃і

Свѣтопрїе́мнаго свѣти́льника сꙋ́щымъ во тьмѣ̀ неразꙋ́мїѧ ви́димъ въ тебѣ̀, ст҃и́телю, невеще́ственный бо вжига́ющи ѻ҆́гнь, разгонѧ́еши тьмꙋ̀ невѣ́рїѧ и҆ на всѣ́хъ ѡ҆би́льнѡ пролива́еши свѣ́тъ хрⷭ҇то́въ, просвѣща́ѧй всѧ́кагѡ человѣ́ка, грѧдꙋ́щагѡ въ мі́ръ. тѣ́мже по до́лгꙋ взыва́емъ тѝ си́це:

Ра́дꙋйсѧ, свѣти́льниче, возжже́нный ѻ҆гне́мъ съ прⷭ҇то́ла бж҃їѧ: ра́дꙋйсѧ, прича́стниче сла́вы гдⷭ҇ней.

Ра́дꙋйсѧ, прославлѧ́ѧй просла́вльшаго тѧ̀: ра́дꙋйсѧ, проносѧ́й сла́вꙋ є҆гѡ̀ по безсла́вной ѡ҆́бласти нече́стїѧ.

Ра́дꙋйсѧ, ѡ҆зарѧ́ѧй ᲂу҆мы̀ и҆ сердца̀ люде́й, сѣдѧ́щихъ во тьмѣ̀ и҆ сѣ́ни сме́ртнѣй: ра́дꙋйсѧ, и҆сто́чниче, ѡ҆би́льнѡ и҆злива́ѧй во́дꙋ блгⷣти бж҃їей.

Ра́дꙋйсѧ, напаѧ́ѧй є҆́ю ᲂу҆мы̀ и҆ сердца̀ жа́ждꙋщихъ сп҃се́нїѧ: ра́дꙋйсѧ, ᲂу҆каза́телю нбⷭ҇нагѡ раѧ̀ невѣ́дꙋщымъ є҆гѡ̀.

Ра́дꙋйсѧ, вѣ́рный рꙋководи́телю всѣ́хъ послѣ́дꙋющихъ тебѣ̀: ра́дꙋйсѧ, ѿверза́ѧй двє́ри црⷭ҇твїѧ бж҃їѧ ше́ствꙋющымъ по тебѣ̀.

Ра́дꙋйсѧ, представлѧ́ѧй и҆́хъ прⷭ҇то́лꙋ бж҃їю: ра́дꙋйсѧ, сопричислѧ́ѧй и҆́хъ къ со́нмꙋ ст҃ы́хъ бж҃їихъ.

Ра́дꙋйсѧ, гꙋ́рїе, каза́нскїй и҆ свїѧ́жскїй чꙋдотво́рче.

Конда́къ в҃і

Блгⷣть, да́ннꙋю тѝ ѿ бг҃а, ѡ҆би́льнѡ и҆злива́еши на всѣ́хъ, притека́ющихъ съ вѣ́рою къ ра́цѣ ст҃ы́хъ моще́й твои́хъ, ст҃и́телю. тѣ́мже мы̀, дивѧ́щесѧ мно́жествꙋ чꙋде́съ, тобо́ю соверша́емыхъ, пое́мъ бг҃ꙋ, прославлѧ́ющемꙋ тѧ̀: А҆ллилꙋ́їа.

І҆́косъ в҃і

Пою́ще хвале́бнꙋю пѣ́снь тебѣ̀, ст҃и́телю, просла́вленный бг҃омъ на нб҃сѝ и҆ на землѝ, воспѣва́емъ тѝ си́це:

Ра́дꙋйсѧ, во свѣ́тѣ предстоѧ́й прⷭ҇то́лꙋ вы́шнѧгѡ: ра́дꙋйсѧ, всегда̀ воспѣва́ѧй сла́вꙋ бж҃їю.

Ра́дꙋйсѧ, непреста́ннѡ зрѧ́й бг҃а лице́мъ къ лицꙋ̀: ра́дꙋйсѧ, приника́ѧй въ та́йнꙋ прест҃ы́ѧ трⷪ҇цы.

Ра́дꙋйсѧ, ᲂу҆се́рдный є҆ѧ̀ покло́нниче: ра́дꙋйсѧ, послѣ́дователю а҆́гнцꙋ бж҃їю, взе́мшемꙋ грѣхѝ мі́ра.

Ра́дꙋйсѧ, предводи́телю всѣ́хъ сп҃се́нныхъ и҆ сп҃са́емыхъ тобо́ю: ра́дꙋйсѧ, и҆ на́съ грѣ́шныхъ въ мі́рѣ се́мъ не ѡ҆ставлѧ́ѧй.

Ра́дꙋйсѧ, не тѣ́снѡ въ любвѝ твое́й всѣ́хъ вмѣща́ѧй: ра́дꙋйсѧ, любвеѻби́льный ѡ҆ всѣ́хъ на́съ мл҃твенниче.

Ра́дꙋйсѧ, па́ствы твоеѧ̀ покрови́телю: ра́дꙋйсѧ, гра́дꙋ каза́ни похвало̀ и҆ ᲂу҆краше́нїе.

Ра́дꙋйсѧ, гꙋ́рїе, каза́нскїй и҆ свїѧ́жскїй чꙋдотво́рче.

Конда́къ г҃і

Ѽ всебл҃же́нный и҆ ст҃ы́й ст҃и́телю ѻ҆́ч҃е гꙋ́рїе, при́сный на́шъ наста́вниче, хода́таю и҆ покрови́телю, молѝ ѡ҆ на́съ хрⷭ҇та̀ бг҃а, да и҆зба́витъ па́ствꙋ твою̀ и҆ всѧ̑ гра́ды и҆ вє́си хрⷭ҇тїа̑нскїѧ ѿ вра̑гъ ви́димыхъ и҆ неви́димыхъ, ѿ наше́ствїѧ и҆ноплемє́нникъ, ѿ недꙋ́га и҆ гла́да, ѿ всѧ́кїѧ ско́рби и҆ смертоно́сныѧ ра́ны, и҆ грѧдꙋ́щїѧ мꙋ́ки, вопїю́щихъ є҆мꙋ̀: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃лѡвъ творе́цъ и҆ всеѧ̀ тва́ри содѣ́тель пред̾избра̀, ѡ҆ст҃ѝ и҆ поста́ви тѧ̀, ст҃и́телю, просвѣти́телѧ, ᲂу҆чи́телѧ и҆ покрови́телѧ гра́дꙋ каза́ни. на́съ же наꙋчѝ вопи́ти тебѣ̀ си́це:

Ра́дꙋйсѧ, предѡпредѣле́нный въ предвѣ́чнѣмъ совѣ́тѣ бж҃їемъ къ просвѣще́нїю невѣ́рныхъ: ра́дꙋйсѧ, пред̾ѡчище́нный длѧ сегѡ̀ слꙋже́нїѧ сосꙋ́де блгⷣти бж҃їѧ.

Ра́дꙋйсѧ, зла́то, и҆скꙋше́нное въ горни́лѣ долговре́менныхъ страда́нїй: ра́дꙋйсѧ, съ ю҆́ности мі́ромъ ѿве́рженный и҆ мі́ра ѿвергі́йсѧ.

Ра́дꙋйсѧ, въ темни́цꙋ неви́ннѡ, ꙗ҆́кѡ і҆ѡ́сифъ, заключе́нный: ра́дꙋйсѧ, въ то́й темни́цѣ нбⷭ҇нѣй премꙋ́дрости наꙋчи́выйсѧ.

Ра́дꙋйсѧ, въ темни́цѣ то́йже свѣ́тъ, дарова́вшїй тебѣ̀ свобо́дꙋ, ᲂу҆зрѣ́вый: ра́дꙋйсѧ, и҆з̾ неѧ̀ чꙋ́днымъ ѡ҆́бразомъ и҆зведе́нный.

Ра́дꙋйсѧ, по полꙋче́нїи свобо́ды всего̀ себѐ бг҃ꙋ порабо́тивый: ра́дꙋйсѧ, чистоты̀ и҆ дѣ́вства храни́телю.

Ра́дꙋйсѧ, поста̀ и҆ мл҃твы ре́вностный блюсти́телю: ра́дꙋйсѧ, до́бльственный хрⷭ҇та̀ послѣ́дователю.

Ра́дꙋйсѧ, гꙋ́рїе, каза́нскїй и҆ свїѧ́жскїй чꙋдотво́рче.

Конда́къ а҃

Возбра́нный ст҃и́телю и҆ чꙋдотво́рче гꙋ́рїе, прїимѝ ѿ на́съ недосто́йныхъ подоба́ющꙋю тѝ похвалꙋ̀, ꙗ҆́кѡ первост҃и́телю, ᲂу҆чи́телю и҆ покрови́телю гра́да каза́ни. и҆, ꙗ҆́кѡ и҆мѣ́ѧй дерзнове́нїе ко гдⷭ҇ꙋ, ѿ всѧ́кихъ на́съ бѣ́дъ и҆ скорбе́й и҆збавлѧ́й, да съ ра́достїю зове́мъ тѝ:

Ра́дꙋйсѧ, гꙋ́рїе, каза́нскїй и҆ свїѧ́жскїй чꙋдотво́рче.

Моли́твы

Ст҃и́телю ѻ҆́ч҃е гꙋ́рїе, предстоѧ̀ сщ҃е́ннѣй ра́цѣ многоцѣле́бныхъ моще́й твои́хъ, мо́лимъ тѧ̀ ᲂу҆се́рднѡ бы́ти всегда̀ и҆ вездѣ̀ на́шимъ хода́таемъ, застꙋ́пникомъ и҆ покрови́телемъ. и҆схода́тайствꙋй па́ствѣ твое́й ми́ръ, тишинꙋ̀, бл҃годе́нствїе, здра́вїе и҆ сп҃се́нїе. бꙋ́ди постоѧ́ннымъ на́шимъ застꙋ́пникомъ ѿ всѣ́хъ врагѡ́въ, ви́димыхъ и҆ неви́димыхъ: покрыва́й на́съ ѿ нахожде́нїѧ всѣ́хъ бѣ́дъ, напа́стей и҆ скорбе́й, па́че же ѿ и҆скꙋше́нїй врага̀ те́мнагѡ. Предстоѧ́щымъ же здѣ̀ и҆ молѧ́щымсѧ и҆спросѝ ᲂу҆ гдⷭ҇а бг҃а всѧ̑, ꙗ҆̀же ко сп҃се́нїю своемꙋ̀ ѻ҆нѝ про́сѧтъ ᲂу҆ негѡ̀ въ свои́хъ нꙋ́ждахъ и҆ ско́рбехъ, да всѝ мы̀ съ тобо́ю прославлѧ́емъ всест҃о́е и҆́мѧ ѻ҆ц҃а̀ и҆ сн҃а и҆ ст҃а́гѡ дх҃а, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.