Песнь 1
Ирмос
Посе́ченный несеко́маго пресече́, и ви́де со́лнце зе́млю, ю́же не ви́де, лю́таго врага́ вода́ потопи́, и непроходи́мое про́йде Изра́иль. Пе́снь же воспева́шеся: Го́сподеви пои́м, сла́вно бо просла́вися.
Тропарь
Пречестна́я твоя́ па́мять просия́, и ра́ка твоя́ мно́гая исцеле́ния прояви́, Богому́дре Арте́мие, приходя́щим к тебе́, пе́снь же воспева́шеся: Го́сподеви пои́м, сла́вно бо просла́вися.
Тропарь
Посече́ся вра́г от Влады́ки все́х, И́же прия́т ду́шу твою́ в пречи́стыя ру́це; ты́ же благода́ть прия́л еси́, блаже́нне, неду́жныя исцеля́ти. Сего́ ра́ди пе́снь воспева́ем: Го́сподеви пои́м, сла́вно бо просла́вися.
Тропарь
Преди́вный Госпо́дь, ви́дя врага́ и устраша́я того́ преще́нием гро́зным, и мо́лниею паля́, и водо́ю потопля́я, ду́шу твою́ прия́л е́сть, Арте́мие, те́ло же твое́ в чудесе́х просия́, и́миже исцеля́емии вопию́т: Го́сподеви пои́м, сла́вно бо просла́вися.
Богородичен
Пречи́стая Де́во, ро́ждшая Преве́чнаго Бо́га, Того́ моли́, да изба́вит ны́ от напа́стей, и бе́д лю́тых, и от лука́ваго врага́, мо́лим Тя́, вопию́ще: пои́м Го́сподеви, сла́вно бо просла́вися.
Песнь 3
Ирмос
Стра́х Тво́й, Го́споди, всади́ в сердца́ ра́б Твои́х, и бу́ди на́м утвержде́ние, Тя́ во и́стине призыва́ющим.
Тропарь
Стра́х Тво́й, Го́споди, возгреме́, и страстоте́рпец Тво́й ду́х испусти́ и прия́т Ца́рствие Небе́сное, ны́не же мо́лится о все́х, призыва́ющих Тя́.
Тропарь
Престо́лу Влады́чню предстоя́, Богому́дре Арте́мие, не преста́й моля́ся о и́же ве́рою приходя́щих к тебе́ и тя́ призыва́ющих.
Тропарь
Исцеле́ния струи́ источа́еши ко гро́бу твоему́ приходя́щим, Арте́мие, вои́стинну тя́ призыва́ющим.
Богородичен
Мари́е, Ма́ти Христа́ Бо́га, поми́луй моля́щихся Тебе́, несумне́нною ве́рою вои́стинну Тя́ призыва́ющих.
Песнь 4
Ирмос
Услы́шах, Го́споди, слу́х Тво́й и убоя́хся, я́ко неизрече́нным Сове́том, Бо́г сы́й Присносу́щный, от Де́вы прише́л еси́, вопло́щся. Сла́ва снизхожде́нию Твоему́, Христе́, сла́ва си́ле Твое́й.
Тропарь
Услы́ша, Го́споди, слу́х Твоего́ смотре́ния, и убоя́ся пра́ведный Арте́мий, егда́ неизрече́нным све́том мо́лния возсия́ из тучено́снаго о́блака, и вопия́ше: сла́ва снизхожде́нию Твоему́, Христе́, сла́ва си́ле Твое́й.
Тропарь
Услы́шим и мы́ слу́х чудоде́йствия твоего́, пра́ведниче Бо́жий Арте́мие, и притеце́м к гро́бу твоему́, с ве́рою вопию́ще Го́сподеви: сла́ва снизхожде́нию Твоему́, Христе́, сла́ва си́ле Твое́й.
Тропарь
Услы́ши на́с, гре́шных, призыва́ющих тя́ в ско́рбех и в неду́зех, и да́руй исцеле́ние, свя́те Арте́мие, покланя́ющимся о́бразу твоему́ и вопию́щим Влады́це все́х: сла́ва снизхожде́нию Твоему́, Христе́, сла́ва си́ле Твое́й.
Богородичен
Услы́ши ны́, Пречи́стая Богоро́дице Де́во, моля́щияся Тебе́, и изба́ви на́с от вра́г ви́димых и неви́димых, я́ко да вопие́м Го́сподеви: сла́ва снизхожде́нию Твоему́, Христе́, сла́ва си́ле Твое́й.
Песнь 5
Ирмос
Страсте́й мя́ мглы́, я́ко от глубо́кия но́щи избавля́яй, у́треневати сподо́би ду́х мо́й, молю́ся, во све́те дне́ повеле́ний Твои́х, Христе́.
Тропарь
Стра́шныя мглы́ и те́мнаго о́блака устраши́ся Богому́дрый Арте́мий и преста́вися в ве́чный живо́т, во све́те дне́ повеле́ний Твои́х, Христе́.
Тропарь
Стра́шныя мглы́ изба́ви на́с и одержа́щия боле́зни исцели́, прему́дре Арте́мие, предстоя́й во све́те дне́ повеле́ний Христо́вых.
Тропарь
Страстьми́ мно́гими одержи́м е́сть и стремле́нием грехо́вным погруже́н; изба́ви мя́, Го́споди, от прегреше́ний моле́нием уго́дника Твоего́ Арте́мия.
Богородичен
Стра́шными Херуви́мы сла́вима еси́, Пречи́стая Де́во, изба́ви на́с от напа́сти и возведи́ во све́т дне́ повеле́ний Сы́на Твоего́.
Песнь 6
Ирмос
Бе́здна грехо́в и прегреше́ний бу́ря мя́ смуща́ет и во глубину́ ну́жднаго ре́ет мя́ отча́яния, но Твою́ кре́пкую ру́ку мне́ простри́, я́ко Петро́ви, о Упра́вителю, и спаси́.
Тропарь
Две́ри Небе́сныя отверзо́шася тебе́, и ра́йския пи́щи наслади́лся еси́, водвори́вся в жи́зни ве́чней, и со святы́ми пребыва́еши, Арте́мие; моли́ся у́бо о на́с Бо́гу и от тли́ ны́ возведи́.
Тропарь
Со А́нгелы ликовству́еши, у Престо́ла Влады́чня предстоя́ и благода́ть име́я исцеля́ти неду́ги любо́вию приступа́ющих к тебе́, прему́дре Арте́мие.
Тропарь
Име́я к Бо́гу Боже́ственное дерзнове́ние, преблаже́нне Арте́мие, ве́рою чи́стою хва́лящих тя́ помина́й, от бу́рей и от напа́стей спаса́й и от тли́ возведи́.
Богородичен
Дании́л Тя́ го́ру мы́сленную прови́де, от нея́же Ка́мень отсече́ся, Пренепоро́чная, и сни́де от Небеси́ роса́ во чре́во Твое́, Богоразу́мием напои́в зе́млю: Ты́ бо израсти́ла еси́ Изба́вителя все́х Творца́.
Песнь 7
Ирмос
А́нгелом о́троки из огня́ спасы́й и гремя́щую пе́щь преложи́вый на ро́су, благослове́н еси́, Бо́же оте́ц на́ших.
Тропарь
А́нгели слу́жат Вседержи́телю Бо́гу быва́ющим мо́лниям и о́блаком гро́мным; ты́ же, свя́те Арте́мие, коне́ц жития́ от сего́ прие́мля, взыва́л еси́: благослове́н Госпо́дь, Бо́г оте́ц на́ших.
Тропарь
Пресели́вся в жи́знь Небе́сную, предстои́ши Го́сподеви, пребога́те Арте́мие, вопия́: благослове́н Госпо́дь, Бо́г оте́ц на́ших.
Тропарь
Чудоде́йствия да́р прии́м от Бо́га неду́ги исцеля́ти, прему́дре Арте́мие, воспева́л еси́ Го́сподеви: благослове́н Бо́г оте́ц на́ших.
Богородичен
Пресвята́я Де́во, Христа́ ро́ждши, непреста́нно моли́ о рабе́х Свои́х, да вопие́м Го́сподеви: благослове́н еси́, Го́споди, Бо́же оте́ц на́ших.
Песнь 8
Ирмос
Покрыва́яй вода́ми превы́спренняя Своя́, полага́яй мо́рю преде́л песо́к и содержа́й вся́, Тя́ пое́т со́лнце, Тя́ сла́вит луна́, Тебе́ прино́сит пе́снь вся́ тва́рь, я́ко Соде́телю все́х во ве́ки.
Тропарь
Покрыва́яй во́дными о́блаки небеса́ и пролива́яй во́ды на зе́млю, прия́т ду́шу пра́веднаго Арте́мия, возвеселя́я ю́ чудоде́йствы; Ему́же вопие́м, я́ко Соде́телю все́х во ве́ки.
Тропарь
Пречестны́я мо́щи твоя́ источа́ют чудеса́, блаже́нне Арте́мие, мы́ же, здра́вие прие́млюще, прино́сим хвалу́ Го́сподеви, я́ко Соде́телю все́х во ве́ки.
Тропарь
Пребоже́ственное селе́ние име́яй, чудотворе́ния благода́ть прия́л еси́ от Вседержи́телевы руки́, и притека́ющии к тебе́ ве́рою мо́щи твоя́ лобыза́ют, пресла́вне Арте́мие, и моли́твенно вопию́т Бо́гу, я́ко Соде́телю вся́ческих во ве́ки.
Богородичен
Еди́наго от Тро́ицы родила́ еси́, Препе́тая Де́во, Преве́чнаго Бо́га, Его́же моли́ о воспева́ющих Ти́, да изведе́т ны́ от обдержа́щих напа́стей и бе́д, я́ко да вопие́м Творцу́ и Соде́телю все́х во ве́ки.
Песнь 9
Ирмос
Устраши́ся вся́к слу́х неизрече́нна Бо́жия снизхожде́ния, я́ко Вы́шний во́лею сни́де да́же и до пло́ти, от деви́ческаго чре́ва бы́в Челове́к. Те́мже Пречи́стую Богоро́дицу, ве́рнии, велича́ем.
Тропарь
Устраши́ся слу́х пра́веднаго о́трока Арте́мия, от гла́са гро́ма Твоего́, Го́споди, и преставле́ние прия́т пречу́дный Арте́мий по Боже́ственней Твое́й во́ли, Влады́ко, те́мже Тя́ велича́ем.
Тропарь
Вопие́м ти́, Богому́дре Арте́мие, страстоте́рпче: не оста́ви на́с, си́рых, но да́руй на́м душе́вное спасе́ние, и теле́сное здра́вие, и по́мощь неосла́бну, да тя́ ве́рою велича́ем.
Тропарь
Притеце́м, лю́дие, к пречестно́му о́бразу Арте́мия и, припа́дающе, возопии́м ему́: бу́ди на́м стена́ неруши́ма от супоста́т на́ших и изба́ви от враго́в ви́димых и неви́димых, да тя́, ве́рнии, велича́ем.
Богородичен
Гора́ неруши́мая и две́рь Небе́сная, ковче́же златы́й, Влады́чице Де́во, покры́й на́с кро́вом крилу́ Твое́ю и соблюди́ ны́ от все́х зо́л, да Тя́, Пречи́стую Богоро́дицу, ве́рнии, велича́ем.