Песнь 1
Ирмос
Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ песнь Бо́гови воспева́юща.
Святи́телю о́тче Ма́рко, моли́ Бо́га о на́с.
Тропарь
Добро́ты ра́ди доброде́телей сия́ния Вы́шняго прия́телище быв,/ па́ству Христо́ву, Ма́рко, просвети́л еси́,/ Сего́ ра́ди к Све́ту невече́рнему преста́влься,/ воспева́ющим Боже́ственную па́мять твою́ вдохни́ сло́ву озаря́ющую благода́ть, сла́вне.
Святи́телю о́тче Ма́рко, моли́ Бо́га о на́с.
Тропарь
Тща́щемуся ми досто́йно дости́гнути похва́л твои́х, блаже́нне,/ глубоча́йший зри́тся бы́ти исто́чник слове́с Боже́ственных твои́х исправле́ний,/ но, о́тче, моли́твами твои́ми любви́ ра́вную благода́ть и си́лу ми даждь.
Тропарь
Благода́тей Боже́ственных всесвяты́й храм,/ от него́же благово́ния та́инственная всем, благоче́стно живу́щим,/ раскры́шася во сла́ву и хвалу́ Несозда́нныя Тро́ицы,/ Еди́наго естество́м Бо́га на́шего,/ да восхва́лится Марк всечестны́й.
Богородичен
Дре́вле проро́ков свяще́нныя прови́деша взо́ры, Чи́стая, Тя у́мную го́ру,/ купину́ неопали́мую и врата́ непроходи́мая,/ ста́мну и манноприе́мницу,/ мы же ве́рою возвеща́ем Тя Богоро́дицу вои́стинну, Богоневе́сто.
Песнь 3
Ирмос
Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.
Святи́телю о́тче Ма́рко, моли́ Бо́га о на́с.
Тропарь
Зерца́ло сия́ний Всетво́рческаго Ду́ха, блаже́нне, показа́лся еси́,/ просвеща́я ве́рных исполне́ния незаблу́дными твои́ми уче́нии/ и уверя́я воспева́ти Тро́ицу Несозда́нную.
Святи́телю о́тче Ма́рко, моли́ Бо́га о на́с.
Тропарь
Ри́торствуя посреде́ собо́рнаго ря́да,/ утверди́л еси́ бытие́ Ду́ха Свята́го, от Оте́ческия Ипоста́си происходя́щее,/ и ве́рных составле́ния, Ма́рко, возвесели́л еси́.
Тропарь
Весели́чная труба́, мусики́йский орга́н,/ духодви́жимый язы́к и сладкозву́чный,/ испо́лненный благода́ти исто́чник и́стинныя прему́дрости,/ да похва́лится днесь Марк всечестны́й.
Богородичен
Неизъясни́мое чу́до, е́же на Тебе́, Всечи́стая,/ я́ко всех Бо́га неизрече́нно родила́ еси́/ и по рождестве́ Де́ва су́щи яви́лася еси́,/ сего́ ра́ди Богоро́дицу Тя и́стинную почита́ем.
Песнь 4
Ирмос
Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.
Святи́телю о́тче Ма́рко, моли́ Бо́га о на́с.
Тропарь
В твои́х, всеблаже́нне, устна́х благода́ть излия́ся/ и просвети́ Це́ркве твердь сла́достию разсужде́ний Боже́ственных.
Святи́телю о́тче Ма́рко, моли́ Бо́га о на́с.
Тропарь
Свяще́ннейший храм Свята́го Ду́ха был еси́,/ Боже́ственное благоуха́ние Богосло́вия в сем испуска́я, свяще́ннейший.
Тропарь
Све́тлая твоя́ возсия́ па́мять/ и просвети́ мы́сли любо́вию восхваля́ющих твоего́ Богосло́вия соверше́нство.
Богородичен
Во́инство невеще́ственных умо́в превзошла́ еси́, Чи́стая,/ ро́ждши вся Осуществова́вшаго и нас от пре́лести Изба́вившаго.
Песнь 5
Ирмос
Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся.
Святи́телю о́тче Ма́рко, моли́ Бо́га о на́с.
Тропарь
Посреде́ Це́ркве песнь Богодухнове́нную сла́дко воспе́л еси́,/ Отца́ то́чию Божества́ уча́ Вино́вника бы́ти,/ Роди́теля у́бо Сы́на и Изводи́теля Свята́го, всесла́вне, Ду́ха.
Тропарь
Словесе́м оте́ц и Боже́ственным разсужде́нием, блаже́нне, после́дуя,/ Сы́на и Ду́ха, Отцу́ равноче́стна бы́ти, возгласи́л еси́,/ я́ко бытие́ и́ма от Отца́, я́ко от Вины́,/ от Него́же вку́пе и происхо́дят Обоя́.
Богородичен
Ра́дуйся, ле́ствице Иа́ковля, е́юже сни́де Бог/ и привлече́ сме́ртное естество́ в Небе́сную сла́ву, Богоневе́сто,/ ра́дуйся, А́нгелов ра́досте, ве́рных же всех упова́ние и тве́рдое прибе́жище.
Песнь 6
Ирмос
Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х,/ и услы́ши мя,/ Бо́же спасе́ния моего́.
Святи́телю о́тче Ма́рко, моли́ Бо́га о на́с.
Тропарь
Пропове́дателей Христо́вых ве́ру насле́довав неума́ленную,/ невре́дну соблю́л еси́, сла́вне, пред власти́тели,/ ничто́же страша́ся итали́йских ко́зней.
Святи́телю о́тче Ма́рко, моли́ Бо́га о на́с.
Тропарь
Удали́в себе́ скве́рнаго смеше́ния, всеблаже́нне,/ к духо́вному и ра́достному отше́л еси́ стоя́нию,/ иде́же Трисо́лнечный зри́ши Свет, нам благода́ть прося́.
Тропарь
Догма́тов благочести́вых смысл нам изъясни́л еси́/ и мня́щих то́ежде бы́ти Существо́ и де́йство до́блестно отгна́л еси́,/ я́ко Су́щаго прису́щее есть, блаже́нне, разли́чие.
Богородичен
Сотвори́ Тебе́ вели́чия Си́льный, Всечи́стая,/ посреде́ те́рний крин обре́т Тя,/ и́мже испо́лни всю тварь благоуха́нии Божества́.
Песнь 7
Ирмос
Бо́жия снизхожде́ния/ огнь устыде́ся в Вавило́не иногда́,/ сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.
Святи́телю о́тче Ма́рко, моли́ Бо́га о на́с.
Тропарь
Возше́л еси́, ра́дуяся, к Трисо́лнечному Све́ту/ и прича́стием Того́ наслажда́ешися,/ я́ко правосла́вно на земли́, уча́, явля́л еси́ всем:/ благослове́н Бог оте́ц на́ших.
Святи́телю о́тче Ма́рко, моли́ Бо́га о на́с.
Тропарь
От еди́ныя Ипоста́си Оте́ческия безвре́менно возсия́ша Сын и Дух,/ Ов у́бо рожде́нием, Сей же исхожде́нием,-/ догма́тствовал еси́ и ве́рныя пе́ти утверди́л еси́:/ благослове́н Бог оте́ц на́ших.
Тропарь
Возвести́л еси́ всем Уте́шителя Боже́ственное исхожде́ние,/ су́щее то́кмо от Отца́, я́ко от Вины́, му́дре,/ и постыди́л еси́ богоку́пцев гнила́я мне́ния, не ве́дущих вопи́ти:/ благослове́н Бог оте́ц на́ших.
Богородичен
Свободи́ся Плодо́м Твои́м, Богороди́тельнице, естество́ сме́ртное от дре́вния кля́твы/ и благослове́ния удосто́ися свята́го,/ сего́ ра́ди сла́вит и воспева́ет, зову́ще:/ благослове́н Бог оте́ц на́ших.
Песнь 8
Ирмос
Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны сия́ ви́дев,/ Творцу́ и Изба́вителю вопия́ше:/ о́троцы, благослови́те,/ священницы, воспо́йте,/ лю́дие, превозноси́те во вся ве́ки.
Святи́телю о́тче Ма́рко, моли́ Бо́га о на́с.
Тропарь
От главы́ до стоп озаря́емь, Богоно́сче блаже́нне,/ святи́тельства честно́е и свято́е Ева́нгелие чи́сто священноде́йствовал еси́/ и, ве́рныя уча́ ему́, уверя́л еси́ пе́ти:/ де́ти, благослови́те, свяще́нницы, воспо́йте,/ лю́дие, превозноси́те во вся ве́ки.
Святи́телю о́тче Ма́рко, моли́ Бо́га о на́с.
Тропарь
Я́ко со́лнце от восто́ка, возсия́л еси́, преподо́бне,/ и Богосло́вия блиста́нии осия́л, и просвети́л еси́ вселе́нную,/ и ве́рныя научи́л еси́ Тро́ице воспева́ти со стра́хом:/ де́ти, благослови́те, свяще́нницы, воспо́йте,/ лю́дие, превозноси́те во вся ве́ки.
Тропарь
Не Друг от Дру́га име́ют бытие́,/ Я́же от Еди́ныя Вины́ происхо́дят, сла́вне, всем возвеща́л еси́,/ я́ко Сын и Дух я́ве Обоя́ от Отца́, не Друг от Дру́га вся́ко,/ я́коже о́трасли от ко́рене еди́наго неувяда́емаго;/ сего́ ра́ди убо па́мять твою́ честву́ем во ве́ки.
Богородичен
Всесве́тлая Пала́то всех Влады́чествующаго,/ омраче́нную страстьми́ ду́шу мою́ испра́ви к доброде́тельным стезя́м, Чи́стая,/ да, спасе́н быв ми́лостию Твое́ю, пою́:/ де́ти, благослови́те, свяще́нницы, воспо́йте,/ лю́дие, превозноси́те во вся ве́ки.
Песнь 9
Ирмос
Вои́стинну Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.
Святи́телю о́тче Ма́рко, моли́ Бо́га о на́с.
Тропарь
Благода́ть слове́с и Богосло́вия твоего́ Це́рковь Христо́ву возвесели́,/ е́йже сохрани́тися в ми́ре не преста́й моли́тися всегда́.
Святи́телю о́тче Ма́рко, моли́ Бо́га о на́с.
Тропарь
До́бре ны́не наслажда́ешися жела́ннаго, всеблаже́нне,/ кра́йняго и Боже́ственнаго просвеще́ния,/ его́же уча́стники моли́твами твои́ми и нас сотвори́.
Тропарь
Ре́вность Правосла́вия, воспыла́в в твое́й чи́стей души́,/ испепели́ еретико́в языкобо́лия, Ма́рко блаже́нне.
Богородичен
Я́ко вы́сшая умо́в и Бо́гу бли́жняя, Деви́це Чи́стая,/ ум мой просвети́,/ из глубины́ многови́дных нужд изыма́ющи мя.