Православный календарь
Размер шрифта:

Ака́ѳістъ

А҆ка́ѳїстъ ст҃о́мꙋ бл҃говѣ́рномꙋ кн҃зю мїхаи́лꙋ ꙗ҆росла́вичꙋ, тферско́мꙋ чꙋдотво́рцꙋ.

Св. благов. кн. и страстот. Михаила Тверского (1318) 7 июля 2026

Конда́къ а҃

И҆збра́нный бг҃омъ и҆з̾ земны́хъ кнѧзе́й въ нбⷭ҇ное пресвѣ́тлое мꙋ́ченическое во́инство, ѿ земны́ѧ сеѧ̀ ю҆до́ли въ црⷭ҇тво нбⷭ҇ное пресели́лсѧ є҆сѝ: положи́лъ бо є҆сѝ дꙋ́шꙋ твою̀ за лю́ди твоѧ̑. тѣ́мже, ꙗ҆́кѡ и҆мѣ́ѧй дерзнове́нїе ко гдⷭ҇ꙋ, молѝ за держа́вꙋ рѡссі́йскꙋю, за гра́дъ тво́й и҆ лю́ди, тебѣ̀ зовꙋ́щыѧ:

Ра́дꙋйсѧ, бл҃говѣ́рный кнѧ́же мїхаи́ле, тферскі́й пресла́вный чꙋдотво́рче.

І҆́косъ а҃

А҆́гг҃лѡвъ и҆ всеѧ̀ тва́ри созда́тель, а҆гг҃лонра́вна тѧ̀ прови́дѣвъ и҆ вои́телѧ за хрⷭ҇та̀ непобѣди́ма, а҆рхїстрати́гꙋ нбⷭ҇ныхъ во́инствъ тезоиме́ннѣ тебѣ̀ нарещи́сѧ благоꙋстро́и. тѣ́мже сла́вѧще бж҃їе ѡ҆ тебѣ̀ промышле́нїе, ꙗ҆́кѡ и҆збра́ннꙋ сосꙋ́дꙋ хрⷭ҇то́вы блгⷣти, вопїе́мъ тѝ:

Ра́дꙋйсѧ, равноапⷭ҇льнагѡ влади́мїра бл҃гослове́ннаѧ ѻ҆́трасле: ра́дꙋйсѧ, бл҃говѣ́рныхъ и҆ бл҃гочести́выхъ ꙗ҆росла́ва и҆ ѯе́нїи ча́до.

Ра́дꙋйсѧ, ꙗ҆́кѡ во ᲂу҆тро́бѣ ма́тере ѡ҆сироте́въ, всѣ́хъ бг҃а во ѻ҆тца̀ мѣ́сто ѡ҆брѣ́лъ є҆сѝ: ра́дꙋйсѧ, ꙗ҆́кѡ под̾ кро́вомъ кри́лъ є҆гѡ̀ премꙋ́дростїю и҆ во́зрастомъ преспѣва́лъ є҆сѝ.

Ра́дꙋйсѧ, ꙗ҆́кѡ ѻ҆троча̀ доброꙋ́мнѡ и҆ бл҃гонра́внѡ бы́лъ є҆сѝ: ра́дꙋйсѧ, ꙗ҆́кѡ ѿ ю҆́ности твоеѧ̀ па́че всѧ́кагѡ сокро́вища хрⷭ҇та̀ возлюби́лъ є҆сѝ.

Ра́дꙋйсѧ, ꙗ҆́кѡ ѿ бг҃а и҆ человѣ̑къ досто́йнѣ возлю́бленъ бы́лъ є҆сѝ.

Ра́дꙋйсѧ, бл҃говѣ́рный кнѧ́же мїхаи́ле, тферскі́й пресла́вный чꙋдотво́рче.

Конда́къ в҃

Ви́дѣвши тѧ̀ бл҃говѣ́рнаѧ ма́терь твоѧ̀ ѯе́нїа, ꙗ҆́кѡ а҆́нна самꙋи́ла, преспѣва́юща во́зрастомъ и҆ премꙋ́дростїю, стра́хомъ бж҃їимъ и҆ всѣ́ми добродѣ́тельми ᲂу҆краша́ема, ра́довашесѧ ѡ҆ тебѣ̀, благода́рнѡ поѧ̀ премꙋ́дрости наста́вникꙋ и҆ смы́сла пода́телю бг҃ꙋ: А҆ллилꙋ́їа.

І҆́косъ в҃

Ра́зꙋмъ бг҃омꙋ́дрый и҆мѣ́ѧ, ꙗ҆́кѡ соломѡ́нъ, всѣ́мъ се́рдцемъ возлюби́лъ є҆сѝ, блаже́нне, премⷣрость бж҃їю, ю҆́же и҆ поиска́лъ є҆сѝ прилѣ́жнѡ ѿ ю҆́ности твоеѧ̀: тѣ́мже ѿ бг҃а дарова́нїе прїе́мъ, храмозда́нїемъ царю̀ премꙋ́дромꙋ поревнова́лъ є҆сѝ. сегѡ̀ ра́ди сла́вѧще, зове́мъ тѝ:

Ра́дꙋйсѧ, ꙗ҆́кѡ хра́мъ прекра́сенъ преѡбраже́нїѧ гдⷭ҇нѧ воздви́глъ є҆сѝ: ра́дꙋйсѧ, ꙗ҆́кѡ ѿ и҆мѣ́нїй твои́хъ ще́дрѡ ѻ҆́ный ᲂу҆краси́лъ є҆сѝ.

Ра́дꙋйсѧ, ꙗ҆́кѡ всѣ́мъ се́рдцемъ бл҃голѣ́пїе до́мꙋ бж҃їѧ возлюби́лъ є҆сѝ: ра́дꙋйсѧ, ꙗ҆́кѡ пребыва́ти въ не́мъ па́че всѣ́хъ ᲂу҆тѣ́хъ мїрски́хъ и҆зво́лилъ є҆сѝ.

Ра́дꙋйсѧ, ꙗ҆́кѡ и҆ са́мъ хра́мъ бж҃їй живы́й, дх҃о́вный бы́лъ є҆сѝ: ра́дꙋйсѧ, мл҃твы бо твоѧ̑, ꙗ҆́кѡ кади́ло бл҃гово́нное, бг҃ꙋ прине́слъ є҆сѝ.

Ра́дꙋйсѧ, занѐ ᲂу҆се́рдїе моли́твъ и҆ дѣ́лъ твои́хъ, ꙗ҆́кѡ всесожже́нїе тꙋ́чное и҆ же́ртвꙋ непоро́чнꙋю, прїѧ́тъ гдⷭ҇ь: ра́дꙋйсѧ, ꙗ҆́кѡ и҆ ны́нѣ па́че зла́та многоцѣ́ннагѡ ст҃ы́ѧ мо́щи твоѧ̑ ᲂу҆краша́ютъ цр҃ковь сїю̀.

Ра́дꙋйсѧ, бл҃говѣ́рный кнѧ́же мїхаи́ле, тферскі́й пресла́вный чꙋдотво́рче.

Конда́къ г҃

Си́ла вы́шнѧгѡ ѡ҆сѣнѝ тѧ̀, и҆ дх҃ъ бж҃їй ноша́шесѧ над̾ тобо́ю, ꙗ҆́кѡже надъ даві́домъ, є҆гда̀ возведѐ тѧ̀ гдⷭ҇ь на прароди́тельный престо́лъ вели́кимъ кнѧзє́мъ сла́внагѡ гра́да влади́мїра. тѣ́мже сщ҃еннонача́льницы и҆ кнѧ́зи, и҆ всѝ лю́дїе согла́снѡ ра́довахꙋсѧ, бл҃годарѧ́ще бг҃а, возносѧ́щаго смирє́нныѧ своѧ̑, и҆ пою́ще є҆мꙋ̀: А҆ллилꙋ́їа.

І҆́косъ г҃

И҆мѣ́ѧ дꙋ́шꙋ бг҃олюби́вꙋ и҆ се́рдце ми́лостивѡ, є҆гда̀ вла́сть прїѧ́лъ є҆сѝ великокнѧ́жꙋю, не и҆змѣни́лъ є҆сѝ нра́ва твоегѡ̀ смиренномꙋ́драгѡ и҆ любвеѡби́льнагѡ: потща́лсѧ бо є҆сѝ всѧ́кꙋ сле́зꙋ ѿ̾ѧ́ти ѿ лица̀ стра́ждꙋщихъ и҆ бы́лъ є҆сѝ всѣ̑мъ въ нꙋ́ждахъ помо́щникъ. тѣ́мже не ѡ҆ста́ви и҆ на́съ, надѣ́ющихсѧ на тѧ̀ и҆ вопїю́щихъ такова̑ѧ:

Ра́дꙋйсѧ, ст҃и́телей и҆ сщ҃е́нникѡвъ люби́телю и҆ бг҃омꙋ́дрыхъ и҆́нокѡвъ собесѣ́дниче: ра́дꙋйсѧ, вдѡ́въ и҆ сирѡ́тъ пита́телю и҆ ѡ҆би́димыхъ застꙋ́пниче.

Ра́дꙋйсѧ, ѻ҆трокѡ́мъ и҆ ю҆́ношамъ чи̑стымъ житїе́мъ твои́мъ бл҃гоче́стїѧ и҆ цѣломꙋ́дрїѧ ᲂу҆чи́телю: ра́дꙋйсѧ, ста́рцєвъ и҆ ᲂу҆бо́гихъ приста́нище, и҆ недꙋ́гꙋющихъ и҆ стра́ждꙋщихъ ᲂу҆покои́телю.

Ра́дꙋйсѧ, добродѣ́тельми па́че, не́же порфѵ́рою и҆ вѵ́ссомъ, ᲂу҆кра́шенный: ра́дꙋйсѧ, бл҃гоче́стїемъ па́че многоцѣ́нныѧ дїади́мы ᲂу҆вѣнча́нный.

Ра́дꙋйсѧ, бл҃говѣ́рный кнѧ́же мїхаи́ле, тферскі́й пресла́вный чꙋдотво́рче.

Конда́къ д҃

Бꙋ́рею властолю́бїѧ ѡ҆бꙋрева́емь, кнѧ́зь геѡ́ргїй ласка́нїємъ и҆ да̑ры и҆спросѝ себѣ̀ ᲂу҆ ха́на великокнѧже́нїе влади́мїрское: ты́ же, смиренномꙋ́дрѡ, ѿда́въ томꙋ̀ зако́нное твоѐ владѣ́нїе, во ѻ҆те́ческїй гра́дъ тфе́рь ѿше́лъ є҆сѝ. не хотѧ̀ бо проли́тїѧ кро́ве хрⷭ҇тїа́нскїѧ, дѣ́ло твоѐ бг҃ꙋ, сꙋдѧ́щемꙋ пра́веднѡ, пре́далъ є҆сѝ, воспѣва́ѧ є҆мꙋ̀: А҆ллилꙋ́їа.

І҆́косъ д҃

Слы́шавъ, ꙗ҆́кѡ сро́дникъ тво́й, неꙋдовли́всѧ ѿѧ́тїемъ ᲂу҆ тебѣ̀ великокнѧже́нїѧ, въ предѣ́лы тферскі́ѧ со мно́гою ра́тїю тата́рскою вни́де, разорѧ́ѧ ѡ҆би́тєли и҆ хра́мы, вє́си ѻ҆гне́мъ и҆ мече́мъ и҆стреблѧ́ѧ, и҆ бг҃омъ врꙋче́нное тѝ ста́до распꙋжа́ѧ и҆ расхища́ѧ, ꙗ҆́кѡ а҆враа́мъ, домоча́дцы твоѧ̑ собра́лъ є҆сѝ, и҆ совѣща́всѧ съ ни́ми, дꙋ́шꙋ твою̀ за свѧты́ню гдⷭ҇ню и҆ за лю́ди твоѧ̑ положи́ти восхотѣ́лъ є҆сѝ. сегѡ̀ ра́ди и҆ ны́нѣ мы̀ бл҃года́рнѡ тебѣ̀ вопїе́мъ:

Ра́дꙋйсѧ, кн҃же по се́рдцꙋ бж҃їю, ско́рбь твою̀ бг҃ꙋ повѣ́давый: ра́дꙋйсѧ, воево́до бл҃говѣ́рный и҆ смиренномꙋ́дрый, печа́ль твою̀ на бг҃а возве́рзый.

Ра́дꙋйсѧ, за́повѣдь хрⷭ҇то́вꙋ, є҆́же возлюби́ти бли́жнѧго, ꙗ҆́кѡ себѐ, дѣ́лы ѡ҆правда́вый: ра́дꙋйсѧ, мѡѷсе́ю и҆ па́ѵлꙋ въ ре́вности ѡ҆ бла́гѣ и҆ сп҃се́нїи люде́й твои́хъ поревнова́вый.

Ра́дꙋйсѧ, во бра́ни не сла́вы земны́ѧ, но ѡ҆гражде́нїѧ ст҃ы́ни гдⷭ҇ней порꙋга́емыѧ и҆ска́вый: ра́дꙋйсѧ, бꙋ́йство тата́рское си́лою бж҃їею ᲂу҆кроти́вый.

Ра́дꙋйсѧ, лю́ди твоѧ̑ ѿ разоре́нїѧ, плѣ́на и҆ лю́тыѧ сме́рти по́мощїю вы́шнѧгѡ ѡ҆гради́вый:

Ра́дꙋйсѧ, бл҃говѣ́рный кнѧ́же мїхаи́ле, тферскі́й пресла́вный чꙋдотво́рче.

Конда́къ є҃

Бг҃оте́чнаѧ ѕвѣзда̀ во́ємъ твои̑мъ ꙗ҆ви́лсѧ є҆сѝ, бл҃говѣ́рный мїхаи́ле, пред̾идѧ́ бо пред̾ полкѝ твои́ми, десни́цею твое́ю, бг҃омъ ᲂу҆крѣплѧ́емою, разрꙋши́лъ є҆сѝ врага̀ и҆ ме́стника. тѣ́мже, побѣди́въ сопроти́вныхъ бг҃ꙋ, чꙋдодѣ́йствꙋющемꙋ мы́шцею высо́кою, сокрꙋши́вшемꙋ бра̑ни и҆ спа́сшемꙋ лю́ди своѧ̑, воспѣ́лъ є҆сѝ: А҆ллилꙋ́їа.

І҆́косъ є҃

Ви́дѣвше жи́телїе гра́да тфе́ри и҆ всеѧ̀ тферскі́ѧ ѻ҆́бласти бг҃омъ да́ннꙋю тѝ побѣ́дꙋ пресла́внꙋю: ꙗ҆́кѡ царе́внꙋ конча́кꙋ и҆ ѕлоко́зненнаго воево́дꙋ кавгады́ѧ плѣни́лъ є҆сѝ, сла́вꙋ и҆ бл҃годаре́нїе бг҃ꙋ приноша́хꙋ и҆ тебѣ̀, застꙋ́пника своегѡ̀, похвала́ми вѣнча́ша. тѣ́мже и҆ мы̀ дне́сь, побѣ̑дныѧ пѡ́чести тебѣ̀ восписꙋ́юще, вопїе́мъ:

Ра́дꙋйсѧ, а҆рхїстрати́гꙋ си́лъ нбⷭ҇ныхъ тезоимени́те и҆ подража́телю, вра̑жїѧ си̑лы сокрꙋши́вый: ра́дꙋйсѧ, вождю̀ бг҃охрани́мый, тата̑рскїѧ пѡ́лчища, ꙗ҆́кѡ ханане́и, разсѣ́ѧвый.

Ра́дꙋйсѧ, а҆враа́ме но́вый, бл҃гослове́нный бг҃омъ вы́шнимъ, и҆́же покорѝ врагѝ твоѧ̑ под̾ но́ги твоѧ̑: ра́дꙋйсѧ, даві́де рѡссі́йскїй, ѻ҆рꙋ́жїемъ бл҃говоле́нїѧ бж҃їѧ вѣнча́нный на землѝ.

Ра́дꙋйсѧ, кн҃же бл҃говѣ́рный и҆ бл҃гочести́вый, сла́вою и҆ че́стїю превознесе́нный на нб҃сѝ: ра́дꙋйсѧ, ꙗ҆́кѡ дадѐ тебѣ̀ гдⷭ҇ь бл҃гослове́нїе во вѣ́къ вѣ́ка и҆ возвеселѝ тѧ̀ ра́достїю неизрече́нною пред̾ лице́мъ свои́мъ.

Ра́дꙋйсѧ, бл҃говѣ́рный кнѧ́же мїхаи́ле, тферскі́й пресла́вный чꙋдотво́рче.

Конда́къ ѕ҃

Проповѣ́дникъ правосла́вныѧ вѣ́ры ꙗ҆ви́лсѧ є҆сѝ, бл҃говѣ́рный кн҃же, пред̾ сы́ны а҆га́рѧнскими: хрⷭ҇та̀ бо, сн҃а бж҃їѧ, є҆ди́но сп҃се́нїе и҆ ᲂу҆тѣше́нїе человѣ́кѡвъ бы́ти проповѣ́дꙋѧ словесы̀ бг҃омꙋ́дрыми и҆ терпе́нїемъ твои́мъ до́блимъ, невѣ́дꙋщихъ наꙋча́лъ є҆сѝ пѣ́ти є҆мꙋ̀: А҆ллилꙋ́їа.

І҆́косъ ѕ҃

Возсїѧ́лъ є҆сѝ во свѣ́тлостехъ ст҃ы́хъ, ꙗ҆́кѡ со́лнце, вѣнце́мъ сла́вы ᲂу҆вѧзе́нъ на нб҃сѝ и҆ нетлѣ́нїемъ тѣлесѐ просла́вленъ на землѝ: вѣ́ры бо ра́ди хрⷭ҇то́вы пострада́въ, црⷭ҇твїѧ благолѣ́пїе и҆ вѣне́цъ добро́ты ѿ рꙋкѝ гдⷭ҇ни прїѧ́лъ є҆сѝ. тѣ́мже, предстоѧ̀ прⷭ҇то́лꙋ сла́вы, помина́й на́съ, похвалѧ́ющихъ тѧ̀ и҆ глаго́лющихъ:

Ра́дꙋйсѧ, страстоте́рпче хрⷭ҇то́въ, во все́мъ житїѝ твое́мъ вѣ́рный бж҃їй слꙋжи́телю: ра́дꙋйсѧ, бг҃а вы́нꙋ сла́вивый на землѝ, и҆ ны́нѣ а҆́гг҃лѡмъ и҆ а҆рха́гг҃лѡмъ сожи́телю.

Ра́дꙋйсѧ, за трꙋ́дъ любвѐ и҆ по́двиги бл҃гоче́стїѧ съ прпⷣбными и҆ првⷣными просла́вленный: ра́дꙋйсѧ, за страда̑нїѧ твоѧ̑ и҆ терпѣ́нїе крѣ́пкое, мч҃никѡмъ сопричте́нный.

Ра́дꙋйсѧ, и҆сповѣ́дниче хрⷭ҇то́въ тве́рдый и҆ неꙋстраши́мый: ра́дꙋйсѧ, помо́щниче всѣ̑мъ пречꙋ́дный и҆ храни́телю ѿ бг҃а на́мъ да́нный.

Ра́дꙋйсѧ, мл҃твенниче ѡ҆ чтꙋ́щихъ тѧ̀ те́плый и҆ бг҃оꙋго́дный.

Ра́дꙋйсѧ, бл҃говѣ́рный кнѧ́же мїхаи́ле, тферскі́й пресла́вный чꙋдотво́рче.

Конда́къ з҃

Хотѧ́й дни̑ ви́дѣти бла̑ги, не мще́нїемъ, но любо́вїю возда́лъ є҆сѝ врагѡ́мъ твои̑мъ: кавгады́ѧ бо и҆ и҆ны̑ѧ плѣ́нники съ дармѝ въ зе́млю и҆́хъ ѿпꙋсти́лъ є҆сѝ и҆, ми́ръ кнѧ́зю геѡ́ргїю дарова́въ, не гꙋби́ти хрⷭ҇тїа́ны, па́че же защища́ти ѿ пога́ныхъ ᲂу҆вѣща́лъ є҆сѝ. помозѝ ᲂу҆́бѡ и҆ на́мъ, свѧ́те, стезѧ́мъ ми́ра и҆ любвѐ твоеѧ̀ послѣ́довати, да бл҃гопрїѧ́тнѡ бг҃ꙋ ми́ра пое́мъ: А҆ллилꙋ́їа.

І҆́косъ з҃

Но́вагѡ тѧ̀ і҆ѡ́сифа неѕло́биваго и҆ даві́да кро́ткаго разꙋмѣва́емъ, бг҃омꙋ́дре мїхаи́ле: ѻ҆́въ бо бра́тїѧмъ свои́мъ, се́й же саꙋ́лꙋ мсти́ти за ѡ҆ѕлоблє́нїѧ и҆́хъ не хотѧ́хꙋ. и҆ ты̀ ᲂу҆́бѡ, и҆мѣ́ѧ во вла́сти твое́й и҆́щꙋщыѧ погꙋби́ти тѧ̀, не ꙗ҆́кѡ плѣ̑нныѧ, но ꙗ҆́кѡ посѣти́тели и҆мѣ́лъ є҆сѝ и҆̀хъ, бл҃готворѧ̀ врагѡ́мъ твои̑мъ. сегѡ̀ ра́ди, похвалѧ́юще тѧ̀, вопїе́мъ:

Ра́дꙋйсѧ, рѡссі́йскїй і҆ѡ́сифе, ѿ бра́тїи твоеѧ̀ и҆зма́ильтѧнѡмъ на плѣне́нїе и҆ сме́рть ѡ҆брече́нный: ра́дꙋйсѧ, тѣ́хъ ѕло́бꙋ не мече́мъ то́кмѡ, но любо́вїю ᲂу҆кроти́ти поиска́вый.

Ра́дꙋйсѧ, сѣ́ѧтелѧ вражды̀ и҆ мще́нїѧ дїа́вола, ꙗ҆́кѡ даві́дъ голїа́ѳа, кро́тостїю и҆ ми́лостїю ко врагѡ́мъ побѣди́вый: ра́дꙋйсѧ, врагѝ твоѧ̑ плѣнє́нныѧ сло́вомъ ᲂу҆тѣ́шивый и҆ пи́щею ᲂу҆довли́вый.

Ра́дꙋйсѧ, лю́ди твоѧ̑, бра́нїю расточє́нныѧ, любо́вїю собра́вый: ра́дꙋйсѧ, разорє́нныѧ и҆ бѣ́дствꙋющыѧ ᲂу҆тѣ́шивый и҆ бл҃гопотрє́бнымъ снабди́вый.

Ра́дꙋйсѧ, бл҃говѣ́рный кнѧ́же мїхаи́ле, тферскі́й пресла́вный чꙋдотво́рче.

Конда́къ и҃

Стра̑нна нѣ̑каѧ, но прелюбє́зна бг҃ꙋ и҆ человѣ́кѡмъ ви́димъ ѡ҆ тебѣ̀, свѧ́те мїхаи́ле. вѣ́дый бо ѡ҆клевета̑нїѧ врагѡ́въ твои́хъ и҆ непра́вдꙋ сꙋде́й твои́хъ, не ᲂу҆боѧ́лсѧ є҆сѝ гнѣ́ва ха́нскагѡ: но да сохрани́ши въ ми́рѣ ѻ҆те́чество твоѐ, дꙋ́шꙋ твою̀ положи́ти за лю́ди твоѧ̑ возжелѣ́лъ є҆сѝ, взира́ѧ на нача́льника вѣ́ры и҆ соверши́телѧ і҆и҃са, є҆мꙋ́же и҆ вопїѧ́лъ є҆сѝ: А҆ллилꙋ́їа.

І҆́косъ и҃

Всегѡ̀ себѐ бг҃ꙋ преда́въ, ꙗ҆́кѡ а҆́гнєцъ неѕло́бивый на заколе́нїе те́клъ є҆сѝ, бл҃же́нне: не восхотѣ́лъ бо є҆сѝ подо́битисѧ нае́мникꙋ, и҆́же ѡ҆ставлѧ́етъ ѻ҆́вцы, ви́дѧ во́лка грѧдꙋ́ща, и҆ бѣ́гаетъ, но ꙗ҆́кѡ па́стырь до́брый, бѣжа́ти совѣ́тꙋющымъ ѿвѣща́лъ є҆сѝ: а҆́ще и҆ сохрани́тъ бѣ́гство живо́тъ мо́й, но погꙋби́тъ лю́ди моѧ̑ непови̑нныѧ. тѣ́мже сла́вѧще бл҃гопрїѧ́тное твоѐ ѡ҆ лю́дехъ попече́нїе, вопїе́мъ тѝ:

Ра́дꙋйсѧ, па́стырю до́брый, пастыренача́льникꙋ хрⷭ҇тꙋ̀ подража́вый: ра́дꙋйсѧ, лю́ди своѧ̑ па́че при́сныхъ твои́хъ и҆ па́че себє̀ сама́гѡ возлюби́вый.

Ра́дꙋйсѧ, всѧ̑ претерпѣ́ти, то́кмѡ да лю́ди твоѧ̑ ѿ разоре́нїѧ и҆ напра́сныѧ сме́рти и҆зба́вити и҆зво́ливый: ра́дꙋйсѧ, ѿ ᲂу҆бива́ющихъ тѣ́лѡ и҆ немогꙋ́щихъ ли́шше что̀ сотвори́ти не ᲂу҆боѧ́выйсѧ.

Ра́дꙋйсѧ, тлѣ́ннꙋю сла́вꙋ земнꙋ́ю ни во что́же вмѣни́вый: ра́дꙋйсѧ, всѧ̑ лє́стныѧ совѣ́ты ѕлочести́вагѡ кавгады́ѧ презрѣ́вый.

Ра́дꙋйсѧ, сохране́нїе вѣ́ры хрⷭ҇то́вы всѣ̑мъ кра̑снымъ и҆ сла̑внымъ мі́ра сегѡ̀, тебѣ̀ ѡ҆беща̑ннымъ, предпочты́й: ра́дꙋйсѧ, є҆́же пострада́ти и҆ ᲂу҆мре́ти за хрⷭ҇та̀, да съ ни́мъ вѣ́чнѡ ца́рствꙋеши, пред̾избра́вый.

Ра́дꙋйсѧ, бл҃говѣ́рный кнѧ́же мїхаи́ле, тферскі́й пресла́вный чꙋдотво́рче.

Конда́къ ѳ҃

Всѐ є҆стество̀ человѣ́ческое кро́тостїю и҆ смире́нїемъ ᲂу҆диви́лъ є҆сѝ, бл҃говѣ́рный кн҃же: ѕлѡ́бныѧ бо клеветы̑ врагѡ́въ твои́хъ кро́ткими словесы̀ ѿвраща́ѧ, непра́вдꙋ сꙋде́й ни є҆ди́нымъ же сло́вомъ ѡ҆бличи́лъ є҆сѝ, но ꙗ҆́кѡ и҆́стинный ра́бъ хрⷭ҇та̀ бг҃а, послѣ́довалъ є҆сѝ влⷣцѣ твоемꙋ̀, и҆́же ᲂу҆корѧ́емь проти́вꙋ не ᲂу҆корѧ́ше, стражда̀ не преща́ше, є҆мꙋ́же, сꙋдїѝ всѣ́хъ и҆ мздовоздаѧ́телю, и҆ вопїѧ́лъ є҆сѝ: А҆ллилꙋ́їа.

І҆́косъ ѳ҃

Вѣті́и многовѣща̑нныѧ не возмо́гꙋтъ и҆зрещѝ вели́кагѡ страда́нїѧ твоегѡ̀, страстоте́рпче: ѿсла́вше бо вразѝ твоѝ дрꙋ́ги твоѧ̑ и҆ при̑сныѧ, кла́дꙋ ве́лїю на вы́ю твою̀ возложи́ша, и҆ недово́льни сꙋ́щѣ, ꙗ҆́кѡ тѧгото́ю кла́ды, гла́домъ, жа́ждею и҆ хожде́нїемъ мно́гимъ за ха́номъ дне́мъ до и҆стоща́нїѧ тѧ̀ и҆знꙋрѧ́хꙋ, но́щїю рꙋ́цѣ и҆ но́зѣ твоѝ въ кла́дꙋ забива́хꙋ, да нико́еѧ же ѡ҆сла́бы и҆мѣ́еши чле́нѡмъ твои̑мъ. тѣ́мже, помина́юще по́двиги твоѧ̑, вопїе́мъ тѝ:

Ра́дꙋйсѧ, за вѣ́рꙋ и҆ ѻ҆те́чество твоѐ безче́стїе претерпѣ́вый: ра́дꙋйсѧ, бо́съ и҆ гла́денъ, свѧ́занъ и҆ порꙋга́емь всѣ́ми, ꙗ҆́кѡ плѣ́нникъ, за ха́номъ влеко́мый.

Ра́дꙋйсѧ, ѱалмопѣ́нїй ра́ди всено́щныхъ ѻ҆чесє́мъ твои̑мъ сна̀ и҆ вѣ́ждома дрема́нїѧ не да́вый: ра́дꙋйсѧ, въ ско́рби твое́й и҆ ѕлострада́нїихъ пла́чꙋщыѧ болѧ́ры и҆ дрꙋ́ги твоѧ̑ ᲂу҆тѣ́шивый.

Ра́дꙋйсѧ, твоѐ ᲂу҆тѣше́нїе въ є҆ди́номъ гдⷭ҇ѣ и҆ моле́нїихъ є҆мꙋ̀ положи́вый: ра́дꙋйсѧ, за грѧдꙋ̑щаѧ страда̑нїѧ и҆ лю́тꙋю сме́рть, и҆̀хже прови́дѣлъ є҆сѝ, бг҃а бл҃годари́вый.

Ра́дꙋйсѧ, бл҃говѣ́рный кнѧ́же мїхаи́ле, тферскі́й пресла́вный чꙋдотво́рче.

Конда́къ і҃

Спастѝ хотѧ̀ дꙋ́шꙋ твою̀, ꙗ҆́кѡ хрⷭ҇тїа́нинъ и҆́стинный къ сме́рти себѐ прїꙋгото́вилъ є҆сѝ. вѣ́дый бо, ꙗ҆́кѡ бли́з̾ є҆́сть сме́рть, при две́рехъ, покаѧ́нїемъ те́плымъ и҆ сле́знымъ пред̾ ѻ҆ц҃е́мъ дх҃о́внымъ дꙋ́шꙋ ѡ҆чи́стилъ є҆сѝ и҆, прїѻбще́нїемъ тѣ́ла и҆ кро́ве хрⷭ҇то́вы соедини́всѧ хрⷭ҇тꙋ̀, воспѣва́лъ є҆сѝ є҆мꙋ̀, всѣ̑мъ да́рꙋющемꙋ живо́тъ вѣ́чный: А҆ллилꙋ́їа.

І҆́косъ і҃

Царѧ̀ нечести́вагѡ повелѣ́нїе и҆спроси́вше, вразѝ твоѝ посла́ша во́ины ᲂу҆би́ти тѧ̀, и҆ ꙗ҆́кѡ во́лцы хи́щницы, ꙗ҆́кѡ ті́гри, жа́ждꙋщїи кро́ве, нападо́ша ѕлі́и на тѧ̀, а҆́гнца неѕло́биваго, и҆ кла́дою терза́хꙋ вы́ю твою̀, и҆ главо́ю тѧ̀ ѡ҆ вѣ́жꙋ ᲂу҆да́риша, и҆ на зе́млю пове́ргше, пѧстьми́ тѧ бїѧ́хꙋ неща́днѡ, до́ндеже лютѣ́йшїй всѣ́хъ рѡма́нецъ ноже́мъ ᲂу҆да́ри въ ре́бра твоѧ̑ и҆ и҆сто́рже любвеѻби́льное се́рдце твоѐ. тѣ́мже тебѣ̀, ꙗ҆́кѡ а҆́гнца, за хрⷭ҇та̀ закла́ннаго, похвалѧ́юще, вопїе́мъ:

Ра́дꙋйсѧ, ꙗ҆́кѡ а҆́велю, за́вистїю бра́тнею погꙋбле́нномꙋ, ᲂу҆подо́билсѧ є҆сѝ: ра́дꙋйсѧ, ꙗ҆́кѡ вѣне́цъ тво́й кнѧ́жескїй кро́вными ка́плѧми, ꙗ҆́кѡ ка́менїемъ чꙋ́днымъ, ᲂу҆краси́лъ є҆сѝ.

Ра́дꙋйсѧ, ꙗ҆́кѡ рꙋ́бище твоѐ, въ не́мже ᲂу҆бїе́нъ бы́лъ є҆сѝ, краснѣ́йше багрѧни́цы ца́рскїѧ златотка́нныѧ содѣ́лалъ є҆сѝ: ра́дꙋйсѧ, ꙗ҆́кѡ се́рдце твоѐ чи́стѡ и҆ смире́ннѡ въ же́ртвꙋ хрⷭ҇тꙋ̀, за ны̀ пострада́вшемꙋ, прине́слъ є҆сѝ.

Ра́дꙋйсѧ, ꙗ҆́кѡ мч҃никѡмъ подража́вый, ли́кꙋ и҆́хъ сопричте́нъ є҆сѝ: ра́дꙋйсѧ, за хрⷭ҇та̀ сме́рть прїе́мый, со хрⷭ҇то́мъ вѣ́чнѡ жи́ти сподо́билсѧ є҆сѝ.

Ра́дꙋйсѧ, бл҃говѣ́рный кнѧ́же мїхаи́ле, тферскі́й пресла́вный чꙋдотво́рче.

Конда́къ а҃і

Пѣ́нїе бл҃года́рственное гдⷭ҇ꙋ прино́симъ ѡ҆ тебѣ̀ чтꙋ́щїи тѧ̀, ст҃ы́й бл҃говѣ́рный кн҃же мїхаи́ле, ꙗ҆́кѡ дарова̀ гдⷭ҇ь нетлѣ́нное тѣ́ло твоѐ тферско́й ѡ҆́бласти во ᲂу҆тѣше́нїе и҆ ѡ҆гражде́нїе, гра́дꙋ тфе́ри въ сла́вꙋ и҆ защище́нїе, скорбѧ́щымъ во ᲂу҆тѣше́нїе, бѣ́дствꙋющымъ во ѿра́дꙋ и҆ по́мощь, болѧ́щымъ во и҆сто́чникъ и҆сцѣле́нїй, и҆ всѣ̑мъ, вѣ́рою притека́ющымъ къ тебѣ̀, во сп҃се́нїе. тѣ́мже бг҃ꙋ, ди́вномꙋ во ст҃ы́хъ, вопїе́мъ: А҆ллилꙋ́їа.

І҆́косъ а҃і

Свѣ́та невече́рнѧгѡ прича́стника ꙗ҆вѝ тѧ̀ гдⷭ҇ь а҆́бїе по преставле́нїи твое́мъ, бл҃же́нне: ѡ҆́блаки бо свѣ́тлыми тѣ́ло твоѐ, лежа́щее на землѝ, ѡ҆гради́въ ѿ ѕвѣре́й ди́вїихъ, столпо́мъ ѻ҆́гненнымъ показа̀ тѧ̀ всѣ̑мъ столпа̀ бы́вша вѣ́ры и҆ пра́вды, и҆ тѣ́ло твоѐ нетлѣ́ннѡ сохрани́въ, чꙋдесы̀ просла́ви тѧ̀. тѣ́мже вопїе́мъ тѝ:

Ра́дꙋйсѧ, сто́лпе вѣ́ры, къ землѝ ѡ҆бѣтова́нїѧ пꙋ́ть на́мъ показꙋ́ѧй: ра́дꙋйсѧ, ѡ҆́блаче дх҃о́вный, ѿ бѣ́дъ и҆ напа́стей лю́ди твоѧ̑ покрыва́ѧй.

Ра́дꙋйсѧ, сосꙋ́де бл҃года́ти, со́нмы вѣ́рныхъ на поклоне́нїе моще́мъ твои̑мъ привлека́ѧй: ра́дꙋйсѧ, и҆сто́чниче неѡскꙋ́дный, всѣ̑мъ приходѧ́щымъ съ вѣ́рою и҆сцѣле́нїѧ подава́ѧй.

Ра́дꙋйсѧ, воево́до непобѣди́мый, ꙗ҆́кѡже въ животѣ̀, и҆ по сме́рти врагѝ на́шѧ ѿ на́съ прогонѧ́ѧй: ра́дꙋйсѧ, сла́во и҆ ᲂу҆пова́нїе гра́да тфе́ри, въ мл҃твахъ твои́хъ вы́нꙋ на́съ помина́ѧй.

Ра́дꙋйсѧ, бл҃говѣ́рный кнѧ́же мїхаи́ле, тферскі́й пресла́вный чꙋдотво́рче.

Конда́къ в҃і

Блгⷣть, да́ннꙋю тѝ ѿ бг҃а, вѣ́дꙋще, лю́дїе гра́да твоегѡ̀, и҆ помина́юще, ꙗ҆́кѡ возлюби́лъ є҆сѝ и҆̀хъ въ животѣ̀ твое́мъ да́же до сме́рти, вы́нꙋ къ тебѣ̀, ꙗ҆́кѡ ско́ромꙋ и҆ крѣ́пкомꙋ помо́щникꙋ во ѡ҆бстоѧ́нїихъ и҆ ско́рбехъ, находѧ́щихъ на гра́дъ, притека́хꙋ. и҆ не посрами́лъ є҆сѝ ᲂу҆пова́нїѧ и҆́хъ, ско́ро ѿ бѣ́дъ и҆збавлѧ́ѧ мл҃твами твои́ми. тѣ́мже бг҃ꙋ, сп҃са́вшемꙋ и҆ сп҃са́ющемꙋ тебѣ̀ ра́ди на́съ недосто́йныхъ, вопїе́мъ: А҆ллилꙋ́їа.

І҆́косъ в҃і

Пою́ще страда̑нїѧ твоѧ̑, ᲂу҆бл҃жа́емъ ст҃ꙋ́ю па́мѧть твою̀, съ вѣ́рою и҆ любо́вїю притека́емъ къ ра́цѣ моще́й твои́хъ, и҆ ꙗ҆́кѡ предстоѧ́ща съ ли́ки а҆́гг҃лъ и҆ со всѣ́ми ст҃ы́ми животворѧ́щей трⷪ҇цѣ, смире́ннѡ мо́лимъ тѧ̀: не забꙋ́ди, кн҃же бл҃говѣ́рный, лю́ди твоѧ̑, спаса́й гра́дъ тво́й и҆ вє́си твоѧ̑, ꙗ҆́кѡже и҆ пре́жде, да́рꙋй всѣ̑мъ, притека́ющымъ къ тебѣ̀, ꙗ҆́же къ житїю̀ вре́менномꙋ, па́че же къ жи́зни вѣ́чнѣй бл҃гопотрє́бнаѧ. ми́лостивъ бꙋ́ди на́мъ, восхвалѧ́ющымъ тѧ̀ недосто́йными ᲂу҆сты̀ и҆ пою́щымъ:

Ра́дꙋйсѧ, го́рнѧгѡ гра́да дости́гнꙋвый и҆ гра́дъ сво́й земны́й любо́вїю назира́ѧй: ра́дꙋйсѧ, мно́гажды гра́дъ тфе́рь ѿ смертоно́сныѧ ꙗ҆́звы ди́внѡ сп҃са́вый.

Ра́дꙋйсѧ, со а҆́гг҃лы сликовствꙋ́ѧй и҆ лю́ди твоѧ̑ въ ско́рбехъ и҆́хъ не забыва́ѧй: ра́дꙋйсѧ, съ пра́ведными бг҃ꙋ сла́вы предстоѧ́й и҆ на́съ грѣ́шныхъ, молѧ́щихсѧ тѝ, не презира́ѧй.

Ра́дꙋйсѧ, бл҃гами вѣ́чными и҆ неизрече́нными наслажда́ѧйсѧ и҆ ле́птꙋ вдови́цы, тебѣ̀ здѣ̀ приноси́мꙋю, любе́знѡ прїе́млѧй: ра́дꙋйсѧ, на землѝ и҆ на нб҃сѝ ѿ бг҃а просла́вленный и҆ на̑ша недостѡ́йнаѧ хвалє́нїѧ не ѿверга́ѧй.

Ра́дꙋйсѧ, бл҃говѣ́рный кнѧ́же мїхаи́ле, тферскі́й пресла́вный чꙋдотво́рче.

Конда́къ г҃і

Ѽ преди́вный во страда́льцѣхъ, ст҃ы́й бл҃говѣ́рный вели́кїй кн҃же мїхаи́ле! при́зри ми́лостивнѡ на смире́нныѧ рабы̀ твоѧ̑ и҆ ᲂу҆молѝ гдⷭ҇а бг҃а, да сохрани́тъ гра́дъ тво́й и҆ лю́ди твоѧ̑, и҆ всѧ̑ гра́ды и҆ вѣ́си хрⷭ҇тїа̑нскїѧ ѿ гла́да, гꙋби́тельства, трꙋ́са, пото́па, ѻ҆гнѧ̀ и҆ всѧ́кагѡ ѕла̀, и҆ да́рꙋетъ всѣ̑мъ на́мъ во́льныхъ и҆ нево́льныхъ грѣхѡ́въ ѡ҆ставле́нїе, да просла́вльшемꙋ тебѣ̀ бг҃ꙋ пое́мъ: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃лѡвъ и҆ всеѧ̀ тва́ри созда́тель, а҆гг҃лонра́вна тѧ̀ прови́дѣвъ и҆ вои́телѧ за хрⷭ҇та̀ непобѣди́ма, а҆рхїстрати́гꙋ нбⷭ҇ныхъ во́инствъ тезоиме́ннѣ тебѣ̀ нарещи́сѧ благоꙋстро́и. тѣ́мже сла́вѧще бж҃їе ѡ҆ тебѣ̀ промышле́нїе, ꙗ҆́кѡ и҆збра́ннꙋ сосꙋ́дꙋ хрⷭ҇то́вы блгⷣти, вопїе́мъ тѝ:

Ра́дꙋйсѧ, равноапⷭ҇льнагѡ влади́мїра бл҃гослове́ннаѧ ѻ҆́трасле: ра́дꙋйсѧ, бл҃говѣ́рныхъ и҆ бл҃гочести́выхъ ꙗ҆росла́ва и҆ ѯе́нїи ча́до.

Ра́дꙋйсѧ, ꙗ҆́кѡ во ᲂу҆тро́бѣ ма́тере ѡ҆сироте́въ, всѣ́хъ бг҃а во ѻ҆тца̀ мѣ́сто ѡ҆брѣ́лъ є҆сѝ: ра́дꙋйсѧ, ꙗ҆́кѡ под̾ кро́вомъ кри́лъ є҆гѡ̀ премꙋ́дростїю и҆ во́зрастомъ преспѣва́лъ є҆сѝ.

Ра́дꙋйсѧ, ꙗ҆́кѡ ѻ҆троча̀ доброꙋ́мнѡ и҆ бл҃гонра́внѡ бы́лъ є҆сѝ: ра́дꙋйсѧ, ꙗ҆́кѡ ѿ ю҆́ности твоеѧ̀ па́че всѧ́кагѡ сокро́вища хрⷭ҇та̀ возлюби́лъ є҆сѝ.

Ра́дꙋйсѧ, ꙗ҆́кѡ ѿ бг҃а и҆ человѣ̑къ досто́йнѣ возлю́бленъ бы́лъ є҆сѝ.

Ра́дꙋйсѧ, бл҃говѣ́рный кнѧ́же мїхаи́ле, тферскі́й пресла́вный чꙋдотво́рче.

Конда́къ а҃

И҆збра́нный бг҃омъ и҆з̾ земны́хъ кнѧзе́й въ нбⷭ҇ное пресвѣ́тлое мꙋ́ченическое во́инство, ѿ земны́ѧ сеѧ̀ ю҆до́ли въ црⷭ҇тво нбⷭ҇ное пресели́лсѧ є҆сѝ: положи́лъ бо є҆сѝ дꙋ́шꙋ твою̀ за лю́ди твоѧ̑. тѣ́мже, ꙗ҆́кѡ и҆мѣ́ѧй дерзнове́нїе ко гдⷭ҇ꙋ, молѝ за держа́вꙋ рѡссі́йскꙋю, за гра́дъ тво́й и҆ лю́ди, тебѣ̀ зовꙋ́щыѧ:

Ра́дꙋйсѧ, бл҃говѣ́рный кнѧ́же мїхаи́ле, тферскі́й пресла́вный чꙋдотво́рче.

Моли́твы

Ди́вный во страда́льцѣхъ ст҃ы́й бл҃говѣ́рный вели́кїй кн҃же мїхаи́ле! ве́лїѧ по́двиги и҆ трꙋды̀ твоѧ̑, ꙗ҆́же за правовѣ́рїе, за цр҃ковь бж҃їю и҆ за ѻ҆те́чество твоѐ гра́дъ тфе́рь положи́лъ є҆сѝ. ты̀, возжела́въ вы́шнихъ, ѡ҆ста́вилъ є҆сѝ тлѣ́ннꙋю сла́вꙋ земнꙋ́ю, и҆ ревнꙋ́ѧ подви́жникѡмъ хрⷭ҇то́вымъ, до́блественнѡ противꙋста́лъ є҆сѝ ꙗ҆́рѡсти царѧ̀ нечести́вагѡ и҆ преще́нїю ѕломы́шленнагѡ є҆гѡ̀ воево́ды. ты̀, прїе́мъ непра́ведное ѡ҆сꙋжде́нїе и҆ заколе́нїе, воспрїѧ́лъ є҆сѝ нбⷭ҇ное црⷭ҇твїе, и҆ кро́вными ка́плѧми, ꙗ҆́кѡ пречꙋ́днымъ ка́менемъ, ᲂу҆краси́въ на главѣ̀ свое́й вѣне́цъ, предстои́ши ны́нѣ на нб҃сѣ́хъ прⷭ҇то́лꙋ всѣ́хъ влⷣки съ ли́ки а҆́гг҃лъ и҆ со всѣ́ми ст҃ы́ми є҆гѡ̀. сегѡ̀ ра́ди, притека́юще къ ра́цѣ моще́й твои́хъ, лобыза́емъ ѻ҆́ныѧ серде́чными ᲂу҆стна́ми и҆ ᲂу҆ми́льнѡ къ тебѣ̀ взыва́емъ: ѽ тезоимени́те нбⷭ҇номꙋ воево́дѣ вы́шнихъ си́лъ, вели́кїй кн҃же мїхаи́ле! моли́сѧ непреста́ннѡ хрⷭ҇тꙋ̀ бг҃ꙋ за гра́дъ тво́й, за лю́ди и҆ за всѧ̑ правосла̑вныѧ хрⷭ҇тїа̑ны. бꙋ́ди спобо́рникъ крѣ́покъ на врагѡ́въ правосла́вїѧ цр҃кви хрⷭ҇то́вой. бꙋ́ди и҆ на́мъ помо́щникъ ᲂу҆лꙋчи́ти всѧ̑, къ по́льзѣ на́шей и҆ ко сп҃се́нїю бл҃гопотрє́бнаѧ, ѡ҆хранѧ́й на́съ ѿ и҆скꙋше́нїй и҆ напа́стей, приходѧ́щихъ во вре́меннѣй жи́зни, и҆ не лишѝ на́съ хода́тайства твоегѡ̀ ко хрⷭ҇тꙋ̀ бг҃ꙋ, во є҆́же полꙋчи́ти на́мъ прегрѣше́нїй проще́нїе и҆ сподо́битисѧ нбⷭ҇нагѡ селе́нїѧ со и҆збра́нными є҆гѡ̀, ꙗ҆́кѡ да и҆ въ се́мъ сла́витсѧ пречестно́е и҆ великолѣ́пое и҆́мѧ є҆гѡ̀ во вѣ́ки. А҆ми́нь.