Православный календарь
Размер шрифта:

Ака́ѳістъ

А҆ка́ѳїстъ ст҃и́телю дїонѵ́сїю, а҆рхїепⷭ҇кпꙋ сꙋ́здальскомꙋ.

Свт. Дионисия, архиеп. Суздальского (1385) 9 июля 2026

Конда́къ а҃

Возбра́нный чꙋдотво́рче и҆ преди́вный і҆ера́рше, вели́кїй ᲂу҆го́дниче хрⷭ҇то́въ, ст҃и́телю ѻ҆́тче дїонѵ́сїе, гра́дꙋ и҆ странѣ̀ на́шей и҆сточа́ѧй щедрѡ́ты и҆ млⷭ҇ти, восхвалѧ́емъ тѧ̀ съ любо́вїю, ча̑да твоѧ̑, ты́ же, ꙗ҆́кѡ и҆мѣ́ѧ дерзнове́нїе ко гдⷭ҇ꙋ, ѿ всѧ́кихъ на́съ бѣ́дъ свободѝ, да зове́мъ тѝ:

Ра́дꙋйсѧ, ст҃и́телю ѻ҆́тче дїонѵ́сїе, землѝ рꙋ́сскїѧ пресвѣ́тлое ᲂу҆краше́нїе.

І҆́косъ а҃

А҆́гг҃лѡвъ творе́цъ и҆ всеѧ̀ тва́ри созда́тель ꙗ҆ви́ тѧ цр҃кви свое́й ст҃и́телѧ и҆ ᲂу҆чи́телѧ и҆ застꙋ́пника рꙋсѝ ст҃ы́ѧ, и҆мꙋ́щаго къ немꙋ̀ дерзнове́нїе моли́тисѧ ѡ҆ и҆збавле́нїи на́съ ѿ всѧ́кихъ ѕѡ́лъ, бѣ́дъ и҆ скорбе́й. Мы́ же вѣ́рнїи наꙋчи́шасѧ пѣ́ти тебѣ̀ си́це:

Ра́дꙋйсѧ, сыно́внею любо́вїю ко гдⷭ҇ꙋ се́рдце и҆спо́лнивый: ра́дꙋйсѧ, соверше́ннꙋ любо́вь ко хрⷭ҇тꙋ̀ показа́вый.

Ра́дꙋйсѧ, тала́нтъ, ѿ бг҃а тѝ да́нный, въ землѝ не сокры́вый: ра́дꙋйсѧ, на сп҃се́нїе дꙋ́шъ людски́хъ є҆го̀ ᲂу҆потреби́вый.

Ра́дꙋйсѧ, дꙋхо́вныма ѻ҆чи́ма вы́нꙋ гдⷭ҇а созерца́вый: ра́дꙋйсѧ, крⷭ҇тъ на ра́мена взе́мый и҆ хрⷭ҇тꙋ̀ послѣ́довавый.

Ра́дꙋйсѧ, мздꙋ̀ на нб҃сѣ́хъ ѿ бг҃а воспрїѧ́вый: ра́дꙋйсѧ, мл҃твы и҆ пѣ̑нїѧ къ тебѣ̀ взыва́ющихъ не презира́ѧй.

Ра́дꙋйсѧ, ст҃и́телю ѻ҆́тче дїонѵ́сїе, землѝ рꙋ́сскїѧ пресвѣ́тлое ᲂу҆краше́нїе.

Конда́къ в҃

Ви́дѧще, ꙗ҆́кѡ дарова́на тебѣ̀ бы́сть ѿ гдⷭ҇а, прпⷣбне ѻ҆́тче на́шъ дїонѵ́сїе, бл҃года́ть подава́ти ско́рое вспоможе́нїе и҆ ᲂу҆тѣше́нїе всѣ̑мъ, съ вѣ́рою къ тебѣ̀ приходѧ́щымъ, и҆ и҆мꙋ́ще тѧ̀ такова́го млⷭ҇тиваго и҆ ско́раго помо́щника, прославлѧ́емъ всеси́льнаго бг҃а, пою́ще є҆мꙋ̀: А҆ллилꙋ́їа.

І҆́косъ в҃

Ра́зꙋмъ бг҃омꙋ́дрый стѧжа́въ и҆ помышлѧ́ѧ ѡ҆ нбⷭ҇нѣмъ, прпⷣбне ѻ҆́тче дїонѵ́сїе, ᲂу҆смотрѣ́лъ є҆сѝ сꙋетꙋ̀ мі́ра сегѡ̀, и҆ житїѧ̀ по́стническагѡ взыска́въ, потща́лсѧ є҆сѝ тѣ́снымъ и҆ приско́рбнымъ пꙋте́мъ тече́нїе жи́зни сеѧ̀ соверши́ти. Мы́ же любо́вїю побѣжда́еми, вопїе́мъ тебѣ̀ си́це:

Ра́дꙋйсѧ, вїногра́да хрⷭ҇то́ва неꙋвѧда́емаѧ розго̀: ра́дꙋйсѧ, цвѣтѡ́въ смире́нїѧ прекра́сное село̀.

Ра́дꙋйсѧ, мона́шествꙋющихъ преди́внаѧ похвало̀: ра́дꙋйсѧ, по́стникѡвъ пꙋтеводи́тельнаѧ ѕвѣздо̀.

Ра́дꙋйсѧ, и҆́нокѡвъ пресвѣ́тлаѧ красото̀: ра́дꙋйсѧ, ст҃и́телей пресла́внаѧ высото̀.

Ра́дꙋйсѧ, є҆ле́а премꙋ́дрости неꙋгаси́маѧ лампа́до: ра́дꙋйсѧ, вѣ́ры бл҃гочести́выѧ пра́вило.

Ра́дꙋйсѧ, ст҃и́телю ѻ҆́тче дїонѵ́сїе, землѝ рꙋ́сскїѧ пресвѣ́тлое ᲂу҆краше́нїе.

Конда́къ г҃

Смире́нїемъ, и҆ посто́мъ, и҆ непреста́нною мл҃твою на стра̑сти плотскі̑ѧ крѣ́пкѡ ѡ҆полчи́всѧ, ст҃и́телю дїонѵ́сїе, пло́ть твою̀ дꙋ́хови порабо́тилъ є҆сѝ, сегѡ̀ ра́ди ны́нѣ предстои́ши съ ли̑ки а҆́гг҃лъ прⷭ҇то́лꙋ прест҃ы́ѧ трⷪ҇цы, вы́нꙋ поѧ̀: А҆ллилꙋ́їа.

І҆́косъ г҃

Въ пꙋсты́ни, въ ню́же всели́лсѧ є҆сѝ, прпⷣбне ѻ҆́тче дїонѵ́сїе, ѻ҆би́тель ᲂу҆стро́исѧ бж҃їимъ произволе́нїемъ, въ не́йже въ преподо́бїи и҆ пра́вдѣ де́ннѡ и҆ но́щнѡ бг҃ꙋ рабо́талъ є҆сѝ. Мы́ же прославлѧ́юще гдⷭ҇а бг҃а, вопїе́мъ тѝ:

Ра́дꙋйсѧ, на бре́зѣхъ во́лги ѻ҆би́тель чꙋ́днꙋю ѡ҆снова́вый: ра́дꙋйсѧ, мно́жество и҆́нокѡвъ въ не́й собра́вый.

Ра́дꙋйсѧ, прпⷣбныхъ є҆ѵѳѵ́мїа и҆ мака́рїа дꙋхо́внѡ возрасти́вый: ра́дꙋйсѧ, ѻ҆́бразъ мона́шескагѡ житїѧ̀ и҆̀мъ показа́вый.

Ра́дꙋйсѧ, двана́десѧть и҆́нокѡвъ на про́повѣдь є҆ѵⷢ҇лїа посла́вый: ра́дꙋйсѧ, во страны̑ и҆ гра́ды вє́рхнїѧ и҆̀хъ напра́вивый.

Ра́дꙋйсѧ, кнѧги́ню васїлі́ссꙋ во а҆́гг҃льскїй ѻ҆́бразъ ѡ҆блекі́й: ра́дꙋйсѧ, ᲂу҆ста́вꙋ и҆́ноческагѡ ѻ҆бщежи́тїѧ ю҆̀ наста́вивый.

Ра́дꙋйсѧ, ст҃и́телю ѻ҆́тче дїонѵ́сїе, землѝ рꙋ́сскїѧ пресвѣ́тлое ᲂу҆краше́нїе.

Конда́къ д҃

Бг҃оте́чнаѧ ѕвѣзда̀ все́й странѣ̀ ꙗ҆ви́лсѧ є҆сѝ, прпⷣбне ѻ҆́тче дїонѵ́сїе, всѣ̑мъ бы́въ ѻ҆́бразъ сло́вомъ, житїе́мъ и҆ любо́вїю, дꙋ́хомъ, вѣ́рою и҆ чистото́ю, тѣ́мже и҆ мы̀, ви́дѧще добродѣ́тєли твоѧ̑, воспѣва́емъ бг҃ꙋ: А҆ллилꙋ́їа.

І҆́косъ д҃

Возсїѧ́вши въ тебѣ̀ ѻ҆би́льнѡ бл҃года́ть бж҃їѧ, ст҃и́телю ѻ҆́тче дїонѵ́сїе, ꙗ҆ви́ тѧ свѣти́льника землѝ рꙋ́сской: пребыва́ѧ и҆гꙋ́меномъ ѻ҆би́тели пече́рскїѧ, ѡ҆ слове́сныхъ ѻ҆вца́хъ, тебѣ̀ бг҃омъ врꙋче́нныхъ, де́ннѡ и҆ но́щнѡ и҆мѣ́лъ є҆сѝ попече́нїе. Мы́ же взира́юще на прпⷣбничєскїѧ трꙋды̀ твоѧ̑, вопїе́мъ тѝ:

Ра́дꙋйсѧ, дре́внихъ ѻ҆тцє́въ нелѣ́ностный подража́телю: ра́дꙋйсѧ, печа́льми ѡ҆бꙋрева́емыхъ смире́нный ᲂу҆тѣ́шителю.

Ра́дꙋйсѧ, скорбѧ́щихъ ско́рый ᲂу҆слы́шателю: ра́дꙋйсѧ, ра́нъ серде́чныхъ млⷭ҇тивый цѣли́телю.

Ра́дꙋйсѧ, бл҃гочи́нїѧ монасты́рскагѡ премꙋ́дрый ᲂу҆строи́телю: ра́дꙋйсѧ, бра́тїи сострада́тельный и҆ терпѣли́вый ᲂу҆чи́телю.

Ра́дꙋйсѧ, стропо́тныхъ и҆ неради́выхъ стро́гїй ѡ҆бличи́телю: ра́дꙋйсѧ, ѡ҆ ка́ющихсѧ пред̾ бг҃омъ до́брый предста́телю.

Ра́дꙋйсѧ, ст҃и́телю ѻ҆́тче дїонѵ́сїе, землѝ рꙋ́сскїѧ пресвѣ́тлое ᲂу҆краше́нїе.

Конда́къ є҃

Ви́дѧ тѧ̀ вои́стиннꙋ, ѻ҆́тче дїонѵ́сїе, подви́жника крѣ́пкаго и҆ мл҃твенника неꙋсы́пнаго, ст҃и́тель а҆леѯі́й возведе́ тѧ въ са́нъ є҆пⷭ҇кпскїй, гра́дꙋ сꙋ́здалю и҆ новꙋ́градꙋ ни́жнемꙋ а҆рхїпа́стырѧ поста́ви, мы́ же мы́сленнѡ взира́юще на досточꙋ̑дныѧ твоѧ̑ по́двиги и҆ трꙋды̀, и҆збра́вшемꙋ тѧ̀ бг҃ꙋ вопїе́мъ: А҆ллилꙋ́їа.

І҆́косъ є҃

Ви́дѧ чл҃вѣколю́бецъ гдⷭ҇ь твоѐ добродѣ́тельное житїѐ, и҆зведе́ тѧ и҆з̾ ѻ҆би́тели пꙋсты́нныѧ на ка́ѳедрꙋ ст҃и́тельскꙋю, ꙗ҆́кѡ на свѣ́щникъ, да не сокры́тъ бꙋ́детъ свѣти́льникъ под̾ спꙋ́домъ и҆ да просла́вѧтъ ѻ҆ц҃а̀ нбⷭ҇наго всѝ человѣ́цы. Мы́ же чтꙋ́ще трꙋды̀ твоѧ̑, ᲂу҆миле́ннѡ вопїе́мъ тѝ:

Ра́дꙋйсѧ, и҆́стины хрⷭ҇то́вы ре́вностный и҆сповѣ́дниче: ра́дꙋйсѧ, ѿ є҆́реси стриго́льникѡвъ мꙋ́жественный защи́тниче.

Ра́дꙋйсѧ, и҆́ноческагѡ ѻ҆бщежи́тїѧ наста́вниче: ра́дꙋйсѧ, пасо́мыхъ ѻ҆ве́цъ мꙋ́дрый нача́льниче.

Ра́дꙋйсѧ, сло́ва бж҃їѧ ᲂу҆се́рдный проповѣ́дниче: ра́дꙋйсѧ, пра́вилъ цр҃ко́вныхъ непреѡдоли́мый побо́рниче.

Ра́дꙋйсѧ, прпⷣбномꙋ се́ргїю спо́стниче и҆ собесѣ́дниче: ра́дꙋйсѧ, взыва́ющихъ пред̾ бг҃омъ наде́жный застꙋ́пниче.

Ра́дꙋйсѧ, ст҃и́телю ѻ҆́тче дїонѵ́сїе, землѝ рꙋ́сскїѧ пресвѣ́тлое ᲂу҆краше́нїе.

Конда́къ ѕ҃

И҆лїино́ю ре́вностїю распала́ѧсѧ, непра́вѡ ходѧ́щымъ противоста́лъ є҆сѝ, ника́коже соизволѧ́ѧ недосто́йнаго на престо́лъ митрополі́чїй поста́вити и҆ нече́стнѡ да́ти во́лка въ па́стырѧ ѻ҆вца́мъ, бл҃гоче́стнѡ хрⷭ҇та̀ сла́вѧщымъ, пою́щымъ є҆мꙋ̀: А҆ллилꙋ́їа.

І҆́косъ ѕ҃

Во гра́дъ первопресто́льный на собо́ръ при́званъ бы́лъ є҆сѝ и҆ та́мѡ є҆ди́нъ средѝ є҆пⷭ҇кпѡвъ кнѧ́жескомꙋ повелѣ́нїю противоста́лъ є҆сѝ, че́сть митропо́лїи кі́евскїѧ ѡ҆берега́ѧ, проти́вꙋ ста́вленика кнѧ́зѧ возстава́ѧ и҆ на ка́ѳедрꙋ первост҃и́тельскꙋю взы́ти є҆мꙋ̀ возбранѧ́ѧ. Мы́ же ви́дѧще ре́вность твою̀, взыва́емъ тѝ:

Ра́дꙋйсѧ, ꙗ҆́кѡ дрє́внимъ канѡ́нѡмъ ре́вностный и҆сполни́тель бы́лъ є҆сѝ: ра́дꙋйсѧ, ꙗ҆́кѡ самостоѧ́нїе митропо́лїи ре́вностнѡ ѡ҆берега́лъ є҆сѝ.

Ра́дꙋйсѧ, ꙗ҆́кѡ мꙋ́дростїю слове́съ твои́хъ кнѧ́зѧ ѡ҆бличи́лъ є҆сѝ: ра́дꙋйсѧ, ꙗ҆́кѡ мꙋдрова́нїе человѣ́ческое въ цр҃ковь не допꙋсти́лъ є҆сѝ.

Ра́дꙋйсѧ, ꙗ҆́кѡ ѿ гнѣ́ва кнѧ́зева не ᲂу҆страше́нъ пребы́лъ є҆сѝ: ра́дꙋйсѧ, ꙗ҆́кѡ є҆ди́нъ томꙋ̀ безстра́шнѡ противоста́лъ є҆сѝ.

Ра́дꙋйсѧ, ꙗ҆́кѡ ре́вность въ послꙋша́нїи цр҃кви показа́лъ є҆сѝ: ра́дꙋйсѧ, ꙗ҆́кѡ хꙋда́гѡ намѣ́ренїѧ дїа́волѧ посрами́тель бы́лъ є҆сѝ.

Ра́дꙋйсѧ, ст҃и́телю ѻ҆́тче дїонѵ́сїе, землѝ рꙋ́сскїѧ пресвѣ́тлое ᲂу҆краше́нїе.

Конда́къ з҃

Дне́сь восхва́лимъ всѝ вели́каго ст҃и́телѧ дїонѵ́сїа, и҆ почти́мъ застꙋ́пника и҆ ᲂу҆твержде́нїе землѝ рꙋ́сскїѧ, кра́ѧ сꙋ́здальскагѡ храни́телѧ, пско́ва и҆ нова́града ѿ лжеꙋче́нїѧ ѡ҆гради́телѧ, є҆́реси стриго́льникѡвъ ре́вностнаго и҆скорени́телѧ, и҆ та́кѡ возопїи́мъ бг҃ꙋ: А҆ллилꙋ́їа.

І҆́косъ з҃

Слы́ша премно́гꙋю твою̀ добродѣ́тель, ви́дѧ тѧ̀ и҆скꙋ́сна толкова́телѧ сщ҃е́ннагѡ писа́нїѧ, и҆ преда́нїѧ прилѣ́жна храни́телѧ, посла́ тѧ патрїа́рхъ ні́лъ бы́ти є҆́реси стриго́льникѡвъ и҆скорени́телѧ, мы́ же дивѧ́щесѧ ꙗ҆вле́ннѣй въ тебѣ̀ си́лѣ бж҃їей, бл҃года́рнѣ вопїе́мъ:

Ра́дꙋйсѧ, пско́ва и҆ нова́града ѿ лжеꙋче́нїѧ защи́тителю: ра́дꙋйсѧ, є҆́реси стриго́льникѡвъ неꙋстраши́мый и҆скорени́телю.

Ра́дꙋйсѧ, ѡ҆ непреста́нныхъ трꙋдѣ́хъ ст҃и́тельскихъ рачи́телю: ра́дꙋйсѧ, па́ствы хрⷭ҇то́вы до́брый ѿ є҆́реси храни́телю.

Ра́дꙋйсѧ, нелицепрїе́мный и҆́стины ревни́телю: ра́дꙋйсѧ, въ по́двизѣ ᲂу҆чи́тельства неꙋтоми́мый слꙋжи́телю.

Ра́дꙋйсѧ, бг҃охꙋ́льныхъ и҆ нечести́выхъ ᲂу҆́стъ загради́телю: ра́дꙋйсѧ, въ лжеиме́нномъ мꙋдрова́нїи ка́ющихсѧ ᲂу҆чи́телю.

Ра́дꙋйсѧ, ст҃и́телю ѻ҆́тче дїонѵ́сїе, землѝ рꙋ́сскїѧ пресвѣ́тлое ᲂу҆краше́нїе.

Конда́къ и҃

Ви́дѧ гдⷭ҇ь твоѐ добродѣ́тельное житїѐ, любо́вь къ писа́нїю и҆ сщ҃е́нномꙋ преда́нїю, а҆пⷭ҇льскꙋю ре́вность ѡ҆ хрⷭ҇тѣ̀, мл҃твы мнѡ́гїѧ, по́стъ нелицемѣ́рный и҆ ми́лостыню всеще́дрꙋю, любо́вь къ бли̑жнимъ всесоверше́ннꙋю, возвы́си тѧ̀, ꙗ҆́кѡ ке́дръ лїва́нскїй. Мы́ же сла́вꙋ твою̀ зрѧ́ще, пое́мъ бг҃ꙋ: А҆ллилꙋ́їа.

І҆́косъ и҃

Ви́дѧ тѧ̀ патрїа́рхъ гра́да кѡнстанті́нѧ ко сщ҃е́нномꙋ писа́нїю прилѣ́жна, трꙋдѡ́въ поста̀, мл҃твы и҆ ми́лостыни и҆сполни́телѧ, возложѝ креща̑тыѧ ри̑зы на тѧ̀ и҆ возведѐ въ са́нъ а҆рхїепⷭ҇кпскїй. Мы́ же дивѧ́щесѧ житїю̀ твоемꙋ̀, ᲂу҆миле́ннѡ вопїе́мъ тѝ:

Ра́дꙋйсѧ, на скрижа́лехъ се́рдца своегѡ̀ зако́нъ бж҃їй начерта́вый: ра́дꙋйсѧ, те́плыми слеза́ми житїѐ своѐ ᲂу҆краси́вый.

Ра́дꙋйсѧ, ми́лостынѧми бг҃ꙋ ᲂу҆годи́вый: ра́дꙋйсѧ, по́стъ нелицемѣ́рный стѧжа́вый.

Ра́дꙋйсѧ, мл҃твы непреста́нныѧ ѿ бг҃а ᲂу҆досто́ивыйсѧ: ра́дꙋйсѧ, въ писа́нїи сщ҃е́ннѣмъ и҆скꙋ́сенъ позна́выйсѧ.

Ра́дꙋйсѧ, свои́мъ бдѣ́нїемъ а҆́гг҃лѡмъ ᲂу҆подо́бивыйсѧ: ра́дꙋйсѧ, бла̑гъ мно́гихъ ѿ бг҃а сподо́бивыйсѧ.

Ра́дꙋйсѧ, ст҃и́телю ѻ҆́тче дїонѵ́сїе, землѝ рꙋ́сскїѧ пресвѣ́тлое ᲂу҆краше́нїе.

Конда́къ ѳ҃

Проповѣ́дникъ хрⷭ҇то́ва ᲂу҆че́нїѧ не сло́вомъ то́чїю, но и҆ дѣ́ломъ ꙗ҆ви́лсѧ є҆сѝ, ст҃и́телю ѻ҆́тче дїонѵ́сїе, ꙗ҆́кѡ па́стырь до́брый дꙋ́шꙋ твою̀ полага́ѧ за ѻ҆́вцы хрⷭ҇тѡ́вы и҆ всѣ́хъ съ любо́вїю наставлѧ́ѧ ко сп҃се́нїю, всѣ̑мъ ѻ҆́бразъ житїѧ̀ по бз҃ѣ подава́ѧ и҆ поꙋча́ѧ взыва́ти при́снѡ бг҃ꙋ: А҆ллилꙋ́їа.

І҆́косъ ѳ҃

Є҆гда̀ па́стырски подвиза́лсѧ є҆сѝ, ст҃и́телю дїонѵ́сїе, ѡ҆ просвѣще́нїи вѣ́рою хрⷭ҇то́вою люде́й сꙋ́здальскихъ и҆ нижегоро́дскихъ, бл҃года́ть гдⷭ҇нѧ и҆злїѧ́сѧ во мно́гихъ дѣ́лѣхъ твои́хъ, приводѧ́щи ѻ҆́вцы заблꙋ́ждшыѧ къ позна́нїю хрⷭ҇то́вꙋ. Мы́ же помина́юще трꙋды̀ и҆ по́двиги твоѧ̑, зове́мъ тѝ:

Ра́дꙋйсѧ, по́вѣсти временны́хъ лѣ́тъ списа́нїю бл҃говоли́вый: ра́дꙋйсѧ, на писа́нїе лѣ́тописи и҆́нока лаѵре́нтїа бл҃гослови́вый.

Ра́дꙋйсѧ, і҆кѡ̑ны бж҃їѧ мт҃ре ѻ҆диги́трїи списа́ти наказа́вый: ра́дꙋйсѧ, сїѧ̑ въ сꙋ́здаль и҆ ни́жнїй но́вградъ доста́вити повелѣ́вый.

Ра́дꙋйсѧ, кївѡ́тъ со страстьмѝ хрⷭ҇то́выми ѿ царѧгра́да принестѝ и҆зво́ливый: ра́дꙋйсѧ, си́мъ зе́млю нижегоро́дскꙋю дꙋхо́внѡ ᲂу҆краси́вый.

Ра́дꙋйсѧ, малахі́ю фїло́софа длѧ просвѣще́нїѧ на рꙋ́сь напра́вивый: ра́дꙋйсѧ, тьмꙋ̀ сꙋемꙋ́дрїѧ стриго́льническагѡ и҆з̾ѡбличи́вый.

Ра́дꙋйсѧ, ст҃и́телю ѻ҆́тче дїонѵ́сїе, землѝ рꙋ́сскїѧ пресвѣ́тлое ᲂу҆краше́нїе.

Конда́къ і҃

Правосла̑вныѧ канѡ́ны ᲂу҆твержда́ѧ, прибы́лъ є҆сѝ въ царьгра́дъ со ст҃ы́мъ ѳео́дѡромъ, и҆ та́мѡ всѣ́хъ свои́ми добродѣ́тельми ᲂу҆диви́лъ є҆сѝ, тѣ́мже патрїа́рхъ ні́лъ тѧ̀ на митропо́лїю рꙋ́сскꙋю поста́ви. Мы́ же ѡ҆ тебѣ̀ бг҃а прославлѧ́юще, пое́мъ: А҆ллилꙋ́їа.

І҆́косъ і҃

Ѿ кѡнстанті́нѧ гра́да и҆зше́дъ, вели́кагѡ кі́ева вско́рѣ дости́глъ є҆сѝ, и҆ ѿ кнѧ́зѧ та́мѡ заточе́нїе смире́ннѡ прїе́мъ, въ темни́цѣ ст҃ꙋ́ю дꙋ́шꙋ свою̀ че́стнѡ гдⷭ҇еви пре́далъ є҆сѝ. Мы́ же на терпѣ́нїе твоѐ взира́юще и҆ тѣ́мъ просвѣща́еми, дерза́емъ глаго́лати си́це:

Ра́дꙋйсѧ, ꙗ҆́кѡ тѧ̀ патрїа́рхъ ні́лъ митрополі́томъ на рꙋ́сь поста́ви: ра́дꙋйсѧ, ꙗ҆́кѡ са́на первост҃и́тельскагѡ ᲂу҆досто́илсѧ є҆сѝ.

Ра́дꙋйсѧ, ꙗ҆́кѡ ѿ кнѧ́зѧ заточе́нїе претерпѣ́лъ є҆сѝ: ра́дꙋйсѧ, ꙗ҆́кѡ всѧ̑ скѡ́рби бл҃годꙋ́шнѡ прїѧ́лъ є҆сѝ.

Ра́дꙋйсѧ, ꙗ҆́кѡ ми́рнѡ и҆ ра́достнѡ ча́съ сме́ртный срѣ́тилъ є҆сѝ: ра́дꙋйсѧ, ꙗ҆́кѡ дꙋ́шꙋ твою̀ во смире́нїи пре́далъ є҆сѝ.

Ра́дꙋйсѧ, ꙗ҆́кѡ въ пече́рахъ кі́евскихъ погребе́нъ бы́лъ є҆сѝ: ра́дꙋйсѧ, ꙗ҆́кѡ и҆ по сме́рти твое́й на́съ не ѡ҆ста́вилъ є҆сѝ.

Ра́дꙋйсѧ, ст҃и́телю ѻ҆́тче дїонѵ́сїе, землѝ рꙋ́сскїѧ пресвѣ́тлое ᲂу҆краше́нїе.

Конда́къ а҃і

Бл҃года́ть ѿ бг҃а стѧжа́вшаго, ди́внаго во ст҃ы́хъ дїонѵ́сїа почти́мъ се́рдцемъ и҆ ᲂу҆сты̀, глаго́люще: кто̀ и҆счи́слитъ твоѧ̑ трꙋды̀, мл҃твы и҆ посты̀, ѽ ст҃и́телю: потщи́мсѧ ᲂу҆̀бо є҆мꙋ̀ всеꙋсе́рднѡ подража́ти и҆ бл҃гопрїѧ́тнѡ бг҃ꙋ вопи́ти: А҆ллилꙋ́їа.

І҆́косъ а҃і

Свѣтопода́тельными лꙋча́ми блиста́етъ житїѐ твоѐ, ст҃и́телю ѻ҆́тче дїонѵ́сїе, ты́ бо є҆ѵⷢ҇льскїѧ за́пѡвѣди и҆сполнѧ́ѧ, крⷭ҇тъ на ра́мѣхъ свои́хъ во слѣ́дъ хрⷭ҇тꙋ̀ безро́потнѡ поне́слъ є҆сѝ, тѣ́мже глаго́лемъ тѝ:

Ра́дꙋйсѧ, прест҃ы́ѧ трⷪ҇цы вѣ́рный слꙋжи́телю: ра́дꙋйсѧ, мт҃ре бж҃їѧ ᲂу҆се́рдный почита́телю.

Ра́дꙋйсѧ, а҆́гг҃лѡвъ бж҃їихъ сослꙋжи́телю: ра́дꙋйсѧ, прⷪ҇ро́кѡвъ ст҃ы́хъ соревни́телю.

Ра́дꙋйсѧ, а҆пⷭ҇лѡвъ гдⷭ҇нихъ подража́телю: ра́дꙋйсѧ, мч҃нкѡвъ хрⷭ҇то́выхъ сострада́телю.

Ра́дꙋйсѧ, ст҃и́телей ре́вностныхъ равностоѧ́телю: ра́дꙋйсѧ, прпⷣбныхъ ѻ҆тцє́въ сопредста́телю.

Ра́дꙋйсѧ, ст҃и́телю ѻ҆́тче дїонѵ́сїе, землѝ рꙋ́сскїѧ пресвѣ́тлое ᲂу҆краше́нїе.

Конда́къ в҃і

Бл҃года́ть, да́ннꙋю тѝ ѿ бг҃а, вѣ́дꙋще, притека́емъ къ твоемꙋ̀ застꙋпле́нїю, ст҃и́телю ѻ҆́тче дїонѵ́сїе, ᲂу҆се́рднѡ молѧ́ще тѧ̀: не ѡ҆ста́ви на́съ, ча̑дъ твои́хъ, въ ст҃ы́хъ твои́хъ мл҃твахъ, да и҆ мы̀ по сконча́нїи на́шегѡ земна́гѡ жи́тельства съ тобо́ю воспое́мъ бг҃ꙋ: А҆ллилꙋ́їа.

І҆́косъ в҃і

Свѣтопрїе́мный свѣти́льникъ и҆́стиннагѡ свѣ́та сꙋ́щымъ на землѝ ꙗ҆влѧ́ешисѧ, ст҃и́телю дїонѵ́сїе, просвѣща́еши бо вѣ́рныхъ сердца̀ и҆ къ ра́зꙋмꙋ бжⷭ҇твенномꙋ всѧ̑ наставлѧ́еши, тѣ́мже ра́достнѡ взыва́емъ тебѣ̀:

Ра́дꙋйсѧ, свѣщѐ свѣтоза́рнаѧ, цр҃ковь ѡ҆зарѧ́ющаѧ: ра́дꙋйсѧ, ѕвѣздо̀, зе́млю рꙋ́сскꙋю просвѣща́ющаѧ.

Ра́дꙋйсѧ, зарѐ, мра́къ страсте́й и҆ грѣхѡ́въ разгонѧ́ющаѧ: ра́дꙋйсѧ, мо́лнїе, є҆реті́чествꙋющихъ ᲂу҆страша́ющаѧ.

Ра́дꙋйсѧ, лꙋчѐ, въ и҆́ночествѣ подвиза́ющихсѧ ᲂу҆крѣплѧ́ющаѧ: ра́дꙋйсѧ, свѣ́те, въ по́двизѣхъ бл҃гоче́стїѧ наставлѧ́ющїй.

Ра́дꙋйсѧ, свѣти́льниче, нижегоро́дскїй ᲂу҆дѣ́лъ просвѣтлѧ́ющїй: ра́дꙋйсѧ, свѣти́ло, сꙋ́здальскїй кра́й ѡ҆свѣща́ющее.

Ра́дꙋйсѧ, ст҃и́телю ѻ҆́тче дїонѵ́сїе, землѝ рꙋ́сскїѧ пресвѣ́тлое ᲂу҆краше́нїе.

Конда́къ г҃і

Ѽ преди́вный и҆ пресла́вный ст҃и́телю ѻ҆́тче дїонѵ́сїе, прїимѝ ѿ на́съ недосто́йныхъ хвале́бное пѣ́нїе сїѐ, проле́й ѡ҆ на́съ твоѧ̑ тє́плыѧ мл҃твы и҆ ᲂу҆молѝ чл҃вѣколю́бца гдⷭ҇а, да не погꙋби́тъ на́съ со беззако́ньми на́шими, но ѡ҆брати́тъ къ покаѧ́нїю и҆ и҆справле́нїю, да про́чее вре́мѧ житїѧ̀ на́шегѡ земна́гѡ не въ рабо́тѣ грѣхꙋ̀ и҆ страсте́мъ, но въ дѣ́ланїи за́повѣдей є҆гѡ̀ ст҃ы́хъ бл҃гоче́стнѡ провожда́емъ, вопїю́ще бг҃ꙋ: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃лѡвъ творе́цъ и҆ всеѧ̀ тва́ри созда́тель ꙗ҆ви́ тѧ цр҃кви свое́й ст҃и́телѧ и҆ ᲂу҆чи́телѧ и҆ застꙋ́пника рꙋсѝ ст҃ы́ѧ, и҆мꙋ́щаго къ немꙋ̀ дерзнове́нїе моли́тисѧ ѡ҆ и҆збавле́нїи на́съ ѿ всѧ́кихъ ѕѡ́лъ, бѣ́дъ и҆ скорбе́й. Мы́ же вѣ́рнїи наꙋчи́шасѧ пѣ́ти тебѣ̀ си́це:

Ра́дꙋйсѧ, сыно́внею любо́вїю ко гдⷭ҇ꙋ се́рдце и҆спо́лнивый: ра́дꙋйсѧ, соверше́ннꙋ любо́вь ко хрⷭ҇тꙋ̀ показа́вый.

Ра́дꙋйсѧ, тала́нтъ, ѿ бг҃а тѝ да́нный, въ землѝ не сокры́вый: ра́дꙋйсѧ, на сп҃се́нїе дꙋ́шъ людски́хъ є҆го̀ ᲂу҆потреби́вый.

Ра́дꙋйсѧ, дꙋхо́вныма ѻ҆чи́ма вы́нꙋ гдⷭ҇а созерца́вый: ра́дꙋйсѧ, крⷭ҇тъ на ра́мена взе́мый и҆ хрⷭ҇тꙋ̀ послѣ́довавый.

Ра́дꙋйсѧ, мздꙋ̀ на нб҃сѣ́хъ ѿ бг҃а воспрїѧ́вый: ра́дꙋйсѧ, мл҃твы и҆ пѣ̑нїѧ къ тебѣ̀ взыва́ющихъ не презира́ѧй.

Ра́дꙋйсѧ, ст҃и́телю ѻ҆́тче дїонѵ́сїе, землѝ рꙋ́сскїѧ пресвѣ́тлое ᲂу҆краше́нїе.

Конда́къ а҃

Возбра́нный чꙋдотво́рче и҆ преди́вный і҆ера́рше, вели́кїй ᲂу҆го́дниче хрⷭ҇то́въ, ст҃и́телю ѻ҆́тче дїонѵ́сїе, гра́дꙋ и҆ странѣ̀ на́шей и҆сточа́ѧй щедрѡ́ты и҆ млⷭ҇ти, восхвалѧ́емъ тѧ̀ съ любо́вїю, ча̑да твоѧ̑, ты́ же, ꙗ҆́кѡ и҆мѣ́ѧ дерзнове́нїе ко гдⷭ҇ꙋ, ѿ всѧ́кихъ на́съ бѣ́дъ свободѝ, да зове́мъ тѝ:

Ра́дꙋйсѧ, ст҃и́телю ѻ҆́тче дїонѵ́сїе, землѝ рꙋ́сскїѧ пресвѣ́тлое ᲂу҆краше́нїе.

Моли́твы

Ѽ ст҃и́телю ѻ҆́тче дїонѵ́сїе, ты̀ вѣ́си не́мощь є҆стества̀ на́шегѡ и҆ ско́рбь време́нъ настоѧ́щихъ, не пре́зри и҆ не посрамѝ ᲂу҆пова́нїѧ на́шегѡ, но бꙋ́ди ѡ҆ на́съ предста́тель немо́лчный къ бг҃ꙋ, да сохрани́тъ на́съ ѿ мїрски́хъ и҆скꙋше́нїй, ѿ дїа́вольскихъ сѣте́й и҆ ѿ плотски́хъ похоте́й, да да́рꙋетъ на́мъ въ дꙋхо́вныхъ бра́нехъ терпѣ́нїе неѡсла́бное. Въ ча́съ же сме́ртный ꙗ҆ви́сѧ на́мъ, ѻ҆́тче, застꙋ́пникъ неѡбори́мый, ᲂу҆скорѝ тогда̀ на мл҃твꙋ ѡ҆ на́съ безпомо́щныхъ, и҆ помозѝ на́мъ ми́рнꙋю и҆ бл҃гꙋ́ю кончи́нꙋ ᲂу҆лꙋчи́ти, грѡ́знаѧ мыта̑рства воздꙋ̑шнаѧ без̾ препѧ́тїѧ минꙋ́ти, и҆ въ нбⷭ҇ный го́рнїй і҆ерⷭ҇ли́мъ вни́ти. Ѽ всебл҃же́нне ѻ҆́тче на́шъ дїонѵ́сїе, сподо́би ны̀ послѣ́довати, по си́лѣ на́шей, ст҃о́мꙋ твоемꙋ̀ житїю̀, ꙗ҆́кѡ да всемлⷭ҇тивымъ предста́тельствомъ пребл҃гослове́нныѧ влⷣчцы на́шеѧ бцⷣы и҆ приснодв҃ы мр҃і́и и҆ твои́ми ст҃ы́ми мл҃твами сподо́битъ на́съ пребл҃гі́й хрⷭ҇то́съ бг҃ъ на́шъ наслѣ́дники бы́ти црⷭ҇твїѧ своегѡ̀ нбⷭ҇нагѡ, сла́вѧщыѧ и҆ велича́ющыѧ є҆го̀ кꙋ́пнѡ со безнача́льнымъ є҆гѡ̀ ѻ҆ц҃е́мъ, и҆ прест҃ы́мъ, и҆ бл҃ги́мъ, и҆ животворѧ́щимъ є҆гѡ̀ дх҃омъ, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.