Православный календарь
Размер шрифта:

Ака́ѳістъ

А҆ка́ѳїстъ ст҃ы́мъ прпⷣбнымъ се́ргїю и҆ ге́рманꙋ, валаа̑мскимъ чꙋдотво́рцємъ.

Прпп. Сергия и Германа первых игуменов Валаамских (ок.1353) 11 июля 2026

Конда́къ а҃

Возбра̑ннымъ на́шегѡ сп҃се́нїѧ побо́рникѡмъ и҆ тє́плымъ къ бг҃ꙋ мл҃твенникѡмъ похва́льное ва́мъ, прпⷣбнїи, прино́симъ пѣ́нїе. вы́ же, ꙗ҆́кѡ и҆мꙋ́щїи дерзнове́нїе ко гдⷭ҇ꙋ, ѿ всѧ́кихъ на́съ бѣ́дъ свободи́те, зовꙋ́щихъ:

Ра́дꙋйтесѧ, се́ргїе и҆ ге́рмане, ѻ҆ц҃ы̀ пребл҃же́ннїи.

І҆́косъ а҃

А҆́гг҃льски на землѝ пожи́вше, со а҆́гг҃лы ны́нѣ на нб҃сѝ водворѧ́етесѧ, ѻ҆ц҃ы̀ прпⷣбнїи, свѣ́тѡмъ трисо́лнечнымъ ѡ҆сїѧва́еми и҆ бжⷭ҇твенныѧ добро́ты лицезрѣ́нїѧ наслажда́ющесѧ. тѣ́мже и҆ на́съ, ча́дъ ва́шихъ, па́мѧть ва́шꙋ любо́вїю пра́зднꙋющихъ и҆ съ вѣ́рою под̾ ѻ҆́тчїй кро́въ ва́шъ прибѣга́ющихъ, ᲂу҆ прⷭ҇то́ла цр҃ѧ̀ сла́вы хрⷭ҇та̀ не забꙋ́дите, вопїю́щихъ ва́мъ такѡва́ѧ:

Ра́дꙋйтесѧ, въ ра́дость гдⷭ҇а своегѡ̀ вше́дшїи: ра́дꙋйтесѧ, вѣнцы̀ нетлѣ́нныѧ ѿ негѡ̀ прїе́мшїи.

Ра́дꙋйтесѧ, нбⷭ҇нагѡ сїѡ́на прекра́снагѡ гра́ждане: ра́дꙋйтесѧ, вѣ́чнагѡ црⷭ҇твїѧ хрⷭ҇то́ва наслѣ́дницы.

Ра́дꙋйтесѧ, въ жи́зни земнѣ́й є҆ди́наго хрⷭ҇та̀ всѣ́мъ се́рдцемъ возлюби́вшїи и҆ того̀ є҆ди́наго взыска́вшїи: ра́дꙋйтесѧ, любвѐ ра́ди є҆гѡ̀ всѧ̑ преѡби́девшїи и҆ мі́ра кра̑снаѧ презрѣ́вшїи.

Ра́дꙋйтесѧ, непреста́ннымъ бжⷭ҇твеннымъ раче́нїемъ превы́ше ви́димыхъ воспари́вшїи: ра́дꙋйтесѧ, дѣѧ́нїемъ видѣ́нїе стѧжа́вшїи.

Ра́дꙋйтесѧ, ᲂу҆́ми зрѧ́щїи бг҃а: ра́дꙋйтесѧ, неꙋсы́пныѧ мл҃твы и҆сто́чницы.

Ра́дꙋйтесѧ, валаа́мꙋ и҆зрѧ́днаѧ похвало̀: ра́дꙋйтесѧ, мі́рꙋ свѣти́льницы.

Ра́дꙋйтесѧ, се́ргїе и҆ ге́рмане, ѻ҆ц҃ы̀ пребл҃же́ннїи.

Конда́къ в҃

Ви́дѧще прпⷣбнїи земны́ѧ добро́ты непостоѧ́нное и҆ сла́вы житїѧ̀ сегѡ̀ сꙋетꙋ̀, ѻ҆те́чество своѐ и҆ сро́дники и҆ дрꙋ́ги ѡ҆ста́виша, и҆ ѿ полꙋ́денныѧ страны̀ къ чꙋжде́мꙋ и҆ хла́дномꙋ сѣ́верꙋ ᲂу҆стреми́шасѧ. Хрⷭ҇то́ви бо тща́хꙋсѧ невозбра́ннѡ послꙋжи́ти, пою́ще є҆мꙋ̀: А҆ллилꙋ́їа.

І҆́косъ в҃

Ра́зꙋма дꙋхо́внагѡ и҆ землѝ безстра́стїѧ ѡ҆бетова́нныѧ взыскꙋ́юще, а҆враа́млю произволе́нїю подража́сте, прпⷣбнїи, зе́млю ѻ҆те́чества своегѡ̀ ѡ҆ста́вльше и҆ въ пꙋсты́ни се́й бы́вше прише́льцы. тѣ́мже да́же и҆ додне́сь ст҃а́ѧ ѡ҆би́тель валаа́мскаѧ, на па́жити ва́шей вселѧ́щисѧ, неꙋста́ннѡ вопїе́тъ ва́мъ се́рдцемъ и҆ ᲂу҆сты̀:

Ра́дꙋйтесѧ, сѣ́мѧ ст҃о́е, землѝ сеѧ̀ стоѧ́нїе: ра́дꙋйтесѧ, люде́й, ѡ҆́крестъ живꙋ́щихъ, хрⷭ҇то́ви присвое́нїе.

Ра́дꙋйтесѧ, безпло́днꙋю пꙋсты́ню сїю̀ сле́зъ свои́хъ тече́ньми вспои́вшїи: ра́дꙋйтесѧ, хла́днꙋю странꙋ̀ сїю̀ мл҃твъ теплото́ю согре́ѧвшїи.

Ра́дꙋйтесѧ, сла̑вїи доброгла́снїи, ра́йскꙋю ве́снꙋ ѿ полꙋ́днѧ на́мъ прине́сшїи: ра́дꙋйтесѧ, гре́ческагѡ ке́дра ѻ҆́трасли и҆збра́нныѧ, и҆́ночества са́дъ въ горѣ̀ се́й прора́стшыѧ.

Ра́дꙋйтесѧ, ꙗ҆́кѡ хрⷭ҇та̀ стѧжа́сте въ се́рдцы свое́мъ: ра́дꙋйтесѧ, ꙗ҆́кѡ трⷪ҇цы ꙗ҆ви́стесѧ чи́стое жили́ще.

Ра́дꙋйтесѧ, привре́менными вѣ́чнаѧ кꙋпи́вшїи: ра́дꙋйтесѧ, тлѣ́нными нетлѣ̑ннаѧ наслѣ́довавшїи.

Ра́дꙋйтесѧ, бога́тства неиждива́емагѡ блазі́и рачи́тели: ра́дꙋйтесѧ, би́сера до́брагѡ вели́цыи кꙋпцы̀.

Ра́дꙋйтесѧ, се́ргїе и҆ ге́рмане, ѻ҆ц҃ы̀ пребл҃же́ннїи.

Конда́къ г҃

Си́лѣ ѿ вы́шнѧгѡ предложе́нїю ва́шемꙋ прило́жшейсѧ, не всꙋ́е трꙋжда́стесѧ, прпⷣбнїи: то́й бо бѣ̀ ва́мъ стѣна̀ крѣ́пка ѿ лица̀ вра́жїѧ, ка́мень терпѣ́нїѧ и҆ мꙋ́жества сподви́жникъ. дх҃омъ же є҆гѡ̀ ᲂу҆слажда́еми и҆ ѿ си́лы въ си́лꙋ восходѧ́ще, сподо́бистесѧ и҆ ча́сти и҆збра́нныхъ є҆гѡ̀, съ ни́миже зове́те: А҆ллилꙋ́їа.

І҆́косъ г҃

И҆мꙋ́ще ᲂу҆́мъ бг҃опрїѧ́тенъ и҆ а҆гг҃лови́дное своѐ ѡ҆бѣща́нїе непоколеби́мо на краесѣко́момъ ка́мени вѣ́ры во хрⷭ҇та̀, не разслабѣ́ша въ по́двизѣхъ свои́хъ прпⷣбнїи, ни возврати́шасѧ вспѧ́ть къ па́мѧти пре́жнѧгѡ житїѧ̀ мїрска́гѡ, но под̾ѧ́тый на сѧ̀ кре́стъ да́же до сме́рти понесо́ша и҆ всѧ̑ хрⷭ҇та̀ ра́ди сла́дцѣ претерпѣ́ша. сегѡ̀ ра́ди и҆ бг҃ъ ѧ҆̀ ѡ҆бл҃годатѝ и҆ а҆́гг҃льски зрѣ́ти є҆гѡ̀ чи́стымъ се́рдцемъ сподо́би, да и҆ мы̀, житїю̀ и҆́хъ подража́юще, ᲂу҆се́рднѡ зове́мъ къ ни́мъ:

Ра́дꙋйтесѧ, гла́са є҆ѵⷢ҇льскагѡ и҆́стиннїи послꙋ́шницы: ра́дꙋйтесѧ, зако́на хрⷭ҇то́ва ᲂу҆се́рднїи творцы̀.

Ра́дꙋйтесѧ, гдⷭ҇ꙋ своемꙋ̀ до сме́рти послꙋжи́вшїи: ра́дꙋйтесѧ, ꙗ҆́звы є҆гѡ̀ вы́нꙋ на тѣ́лѣ свое́мъ носи́вшїи.

Ра́дꙋйтесѧ, ꙗ҆́кѡ црⷭ҇твїѧ ра́ди нбⷭ҇нагѡ ни въ чесо́мъ же сами́хъ себѐ пощади́ли є҆стѐ: ра́дꙋйтесѧ, ꙗ҆́кѡ а҆́гг҃льскимъ ѡ҆́бразомъ ѡ҆бле́кшесѧ, до конца̀ бра́нь свою̀ соверши́ли є҆стѐ.

Ра́дꙋйтесѧ, хрⷭ҇то́ви ѡ҆рꙋ́жницы вѣ́рнїи: ра́дꙋйтесѧ, врага̀ неꙋста́ннїи запина́тели.

Ра́дꙋйтесѧ, пꙋсты́ни сла́дкое прозѧбе́нїе: ра́дꙋйтесѧ, воздержа́нїѧ неꙋвѧда́емый цвѣ́те.

Ра́дꙋйтесѧ, блгⷣти сосꙋ́ди и҆збра́ннїи: ра́дꙋйтесѧ, вѣ́ры подви́жницы.

Ра́дꙋйтесѧ, се́ргїе и҆ ге́рмане, ѻ҆ц҃ы̀ пребл҃же́ннїи.

Конда́къ д҃

Бꙋ́рю проти́вныхъ вѣ́трѡвъ а҆́ще и҆ воздви́же на прпⷣбныѧ дїа́волъ, ѻ҆ба́че потопи́ти и҆́хъ не возмо́же, нижѐ гра́да дꙋше́внагѡ и҆́хъ разори́ти. ті́и бо щито́мъ вѣ́ры ѡ҆гра́ждшесѧ и҆ ме́чь мл҃твы враща́юще, всѧ̑ стрѣ́лы лꙋка́вагѡ нетрꙋ́днѡ ᲂу҆гаша́хꙋ, хрⷭ҇тꙋ̀ пою́ще: А҆ллилꙋ́їа.

І҆́косъ д҃

Слы́шана бы́сть, прпⷣбнїи, дꙋхо́вныхъ подвигѡ́въ ва́шихъ молва̀ и҆ мл҃твы непреста́нное горѣ́нїе и҆ житїѧ̀ во́льное ѡ҆ѕлобле́нїе: не мо́жетъ бо гра́дъ ᲂу҆кры́тисѧ, вверхꙋ̀ горы̀ стоѧ́й. сего̀ ра́ди, ꙗ҆́кѡ є҆лє́ни на и҆стѡ́чники водны̑ѧ, всѝ а҆́лчꙋщїи покаѧ́нїѧ и҆ жа́ждꙋщїи пра́вды, ѡ҆ гдⷭ҇ѣ ревнꙋ́юще, къ ва́мъ притеко́ша, и҆ сѐ ѡ҆би́тель ст҃а́ѧ созда́сѧ и҆ пꙋсты́нѧ валаа́мскаѧ а҆́ки гра́дъ бл҃гоцвѣтꙋ́щь показа́сѧ. тѣ́мже ѡ҆ мно́жествѣ сп҃са́емыхъ веселѧ́щесѧ, воспѣва́емъ ва́мъ си́це:

Ра́дꙋйтесѧ, ѡ҆би́тели ва́шеѧ первонача́льницы: ра́дꙋйтесѧ, вели́кагѡ и҆́нокѡвъ со́нма ѻ҆ц҃ы̀.

Ра́дꙋйтесѧ, покаѧ́нїѧ ѿ жи́зни своеѧ̀ проповѣ́дницы: ра́дꙋйтесѧ, люботрꙋ́днаго житїѧ̀ законополо́жницы.

Ра́дꙋйтесѧ, ꙗ҆́кѡ на па̑жити сп҃си́тєльныѧ мнѡ́ги ѻ҆́вцы и҆зведо́стѣ: ра́дꙋйтесѧ, ꙗ҆́кѡ хрⷭ҇та̀ ѡ҆ мно́жествѣ ка́ющихсѧ возра́довасте.

Ра́дꙋйтесѧ, дꙋ́хъ пра́вый сп҃се́нїѧ въ лю́дехъ ѡ҆бнови́вшїи: ра́дꙋйтесѧ, ре́вность ѡ҆ бз҃ѣ въ сердца́хъ ᲂу҆ны́лыхъ возже́гшїи.

Ра́дꙋйтесѧ, дꙋ́шъ хрⷭ҇тїа́нскихъ возста́нїе: ра́дꙋйтесѧ, спѧ́щихъ ѕлѣ̀ пробꙋжде́нїе.

Ра́дꙋйтесѧ, къ нбⷭ҇номꙋ црⷭ҇твїю ко́рмчїи: ра́дꙋйтесѧ, пѣ́стꙋни во хрⷭ҇та̀.

Ра́дꙋйтесѧ, се́ргїе и҆ ге́рмане, ѻ҆ц҃ы̀ пребл҃же́ннїи.

Конда́къ є҃

Бг҃оте́чныѧ ꙗ҆́кѡ ѕвѣзды̑, на сѣ́верѣ не́ба возшлѝ є҆стѐ, прпⷣбнїи, и҆ свѣ́тѡмъ вѣ́ры и҆ пѡ́двигъ ва́шихъ странꙋ̀ каре́льскꙋю просвѣти́ли є҆стѐ, ᲂу҆ча́ще приходѧ́щыѧ къ ва́мъ лю́ди сꙋевѣ́рїѧ и҆ бѣсѡ́вскїѧ ѻ҆бы́чаи ѿложи́ти и҆ є҆ди́наго то́чїю бг҃а боѧ́тисѧ и҆ є҆мꙋ̀ є҆ди́номꙋ слꙋжи́ти, пою́ще є҆мꙋ̀: А҆ллилꙋ́їа.

І҆́косъ є҃

Ви́дѣвше ѡ҆́крестъ себє̀ ча̑да своѧ̑, носѧ̑щаѧ вѣ̑тви бл҃годѣѧ́нїѧ, возвесели́шасѧ прпⷣбнїи и҆, ꙗ҆́кѡ вѣне́цъ житїѧ̀, бл҃же́ннꙋю кончи́нꙋ ᲂу҆лꙋчи́вше, ра́дꙋющесѧ къ нб҃сѝ преидо́ша, ѻ҆ба́че сою́за любвѐ не расторго́ша, нижѐ ча̑да своѧ̑ ѡ҆ста́виша си́ра: не ѡ҆скꙋдѣ́ша бо и҆ по сме́рти за нѧ̀ хрⷭ҇тꙋ̀ вы́нꙋ молѧ́щесѧ и҆ во и҆скꙋше́нїихъ и҆ бѣда́хъ ѧ҆̀ назира́юще и҆ сп҃са́юще. сего̀ ра́ди слы́шахꙋ ѿ ни́хъ такѡва́ѧ:

Ра́дꙋйтесѧ, въ нꙋ́ждахъ на́шихъ помо́щницы: ра́дꙋйтесѧ, въ ско́рбехъ ᲂу҆тѣ́шители.

Ра́дꙋйтесѧ, ꙗ҆́звъ грѣхо́вныхъ цѣли́тели: ра́дꙋйтесѧ, бѣсо́вскихъ наважде́нїй ѿгна́тели.

Ра́дꙋйтесѧ, вы́ бо колѣ̑на, ᲂу҆ны́нїемъ разсла́блєннаѧ, ско́ро ᲂу҆крѣплѧ́ете: ра́дꙋйтесѧ, вы́ бо ᲂу҆гаса́ющыѧ свѣти́льники на́шѧ є҆ле́емъ мл҃твъ ва́шихъ и҆сполнѧ́ете.

Ра́дꙋйтесѧ, страстьмѝ порабоще́нныхъ ско́рїи свободи́тели: ра́дꙋйтесѧ, подви́жникѡвъ ко сп҃се́нїю неле́стнїи вождѝ.

Ра́дꙋйтесѧ, цѣломꙋ́дрїѧ на́шегѡ блюсти́тели: ра́дꙋйтесѧ, нестѧжа́нїѧ и҆звѣ́стное пра́вило.

Ра́дꙋйтесѧ, крѣ́пкое на́ше ѡ҆гражде́нїе: ра́дꙋйтесѧ, непосты́дное на́ше ᲂу҆пова́нїе.

Ра́дꙋйтесѧ, се́ргїе и҆ ге́рмане, ѻ҆ц҃ы̀ пребл҃же́ннїи.

Конда́къ ѕ҃

Проповѣ́дницы сла́вы бж҃їѧ и҆ по сме́рти ꙗ҆ви́стесѧ, прпⷣбнїи, ѿ ра́ки честны́хъ моще́й ва́шихъ неѡскꙋ́дныѧ стрꙋѝ и҆сцѣле́нїй и҆сточа́юще и҆ всѣ̑мъ тре́бꙋющымъ разли̑чнаѧ дарова̑нїѧ подаю́ще, ꙗ҆́же ви́дѣвше ча̑да ва̑ша бл҃года́рнѡ воспѣ́ша просла́вльшемꙋ ва́съ бг҃ꙋ: А҆ллилꙋ́їа.

І҆́косъ ѕ҃

Возсїѧ́вше па́ки и҆ па́ки сла́ва ва́ша, прпⷣбнїи, и҆ ѡ҆би́тель ва́ша возраста́ше и҆ мно́жашесѧ, а҆́ще и҆ мно́гащи нечести́вїи воева́хꙋ ю҆̀, хра́мы є҆ѧ̀ разорѧ́юще и҆ и҆́ноки и҆збива́юще и҆ и҆згонѧ́юще: ѿ жи́ва бо сꙋ́ща, а҆́ще и҆ посѣ́чена, ко́рене па́ки и҆ па́ки лѣ́торасль восхожда́ше и҆ мнѡ́ги добродѣ́телей подви́жники под̾ сѣ́нь свою̀ собира́ше, да ѕлостра́ждꙋще за хрⷭ҇та̀, въ терпѣ́нїи стѧжава́ютъ дꙋ́шы своѧ̑, ва́мъ же, ꙗ҆́кѡ первонача́льникомъ свои́мъ, воспѣва́ютъ си́це:

Ра́дꙋйтесѧ, свѣти̑ла вѣ́ры, при́снѡ возсїѧва̑ющаѧ: ра́дꙋйтесѧ, и҆сто́чницы мл҃твы, николи́же ѡ҆скꙋдѣ́вшїи.

Ра́дꙋйтесѧ, хлѣ́бе сла́дкїй и҆́щꙋщымъ покаѧ́нїѧ: ра́дꙋйтесѧ, питїѐ безсме́ртное подви́жникѡмъ поще́нїѧ.

Ра́дꙋйтесѧ, вы́ бо бы́сте бл҃года́тное всѣ̑мъ смире́ннымъ прибѣ́жище: ра́дꙋйтесѧ, вы́ бо показа́стесѧ недви́жное послꙋ̑шнымъ ᲂу҆твержде́нїе.

Ра́дꙋйтесѧ, и҆згна̑ннымъ пра́вды ра́ди гото́вїи спꙋ́тницы: ра́дꙋйтесѧ, ѡ҆би́димыхъ за хрⷭ҇та̀ соприча́стницы.

Ра́дꙋйтесѧ, ни́щихъ дꙋ́хомъ сожи́тели: ра́дꙋйтесѧ, кро́ткихъ се́рдцемъ собесѣ́дницы.

Ра́дꙋйтесѧ, ѕлострада́нїѧ живі́и ѡ҆́брази: ра́дꙋйтесѧ, терпѣ́нїѧ незави́стнїи да́тели.

Ра́дꙋйтесѧ, се́ргїе и҆ ге́рмане, ѻ҆ц҃ы̀ пребл҃же́ннїи.

Конда́къ з҃

Хотѧ́ще нечести́вїи свѣ̑и въ коне́цъ вѣ́рꙋ правосла́внꙋю и҆стреби́ти, ѡ҆би́тель валаа́мскꙋю до ѡ҆снѡва́нїѧ и҆стощи́ша, ѻ҆ба́че свѣти́льника ва́шегѡ ᲂу҆гаси́ти не возмого́ша: и҆́нꙋдѣ бо преста́вленный, па́че возсїѧ̀ на свѣ́щницѣ высо́цѣ, да и҆ та́мѡ весели́тъ ча̑да церкѡ́внаѧ и҆ пѣ́ти бг҃ꙋ подвиза́етъ: А҆ллилꙋ́їа.

І҆́косъ з҃

Но́вый і҆и҃ль ꙗ҆ви́шасѧ дꙋхѡ́внаѧ ча̑да ва̑ша, ꙗ҆́же, многоцѣле́бнꙋю ра́кꙋ моще́й ва́шихъ на ра́мена воспрїи́мше, ѿ гꙋби́тельства и҆збѣго́ша: ревнова́хꙋ бо ст҃ы́ни не бы́ти порꙋ́ганнѣй ѿ пога́ныхъ. тѣ́мже и҆ въ но́вградъ притеко́ша, и҆дѣ́же все́льшесѧ и҆ моще́мъ ва́съ, ѻ҆тцє́въ свои́хъ, присѣдѧ́ще, не преста́ша за́повѣди ва́шѧ храни́ти и҆ воспѣва́ти ва́мъ си́це:

Ра́дꙋйтесѧ, сокро́вище на́ше некра́домое: ра́дꙋйтесѧ, свѣти́льницы на́ши неꙋгаси́мїи.

Ра́дꙋйтесѧ, вождѝ, николи́же на́съ ѡ҆ставлѧ́ющїи: ра́дꙋйтесѧ, наста́вницы, вы́нꙋ съ на́ми сꙋ́щїи.

Ра́дꙋйтесѧ, столпѝ свѣ́та, пꙋ́ть къ нб҃сѝ на́мъ ᲂу҆казꙋ́ющїи: ра́дꙋйтесѧ, ѻ҆́блацы бл҃года́ти, ѿ ле́сти на́съ покрыва́ющїи.

Ра́дꙋйтесѧ, а҆мали́ка всегꙋби́телѧ побѣ́днїи бори́тели: ра́дꙋйтесѧ, фараѡ́на мы́сленнагѡ пра́вїи ѡ҆бличи́тели.

Ра́дꙋйтесѧ, сла́ное мо́ре сꙋеты̀ до́брѣ преше́дшїи: ра́дꙋйтесѧ, въ пꙋсты́ню страсте́й мꙋ́жественнѡ все́льшїисѧ.

Ра́дꙋйтесѧ, нбⷭ҇ныѧ ма́нны прича́стницы: ра́дꙋйтесѧ, на́съ грѣ́шныхъ пред̾ бг҃омъ спорꙋ́чницы.

Ра́дꙋйтесѧ, се́ргїе и҆ ге́рмане, ѻ҆ц҃ы̀ пребл҃же́ннїи.

Конда́къ и҃

Страннопрїе́мый ра́кꙋ моще́й ва́шихъ бж҃е́ственнѣ возвесели́сѧ вели́кїй но́вградъ, собо́рꙋ ст҃ы́хъ свои́хъ двѣ̀ ѕвѣздѣ̑ приложи́вый, ди́внымъ свѣ́тѡмъ чꙋде́съ сїѧ́ющыѧ и҆ бл҃года́ть и҆сцѣле́нїй неѡскꙋ́днѡ всѣ̑мъ подаю́щыѧ. сего̀ ра́ди возопѝ: А҆ллилꙋ́їа.

І҆́косъ и҃

Всецѣ́лою мы́слїю ᲂу҆ гдⷭ҇а водворѧ́ющесѧ и҆ зрѣ́нїемъ нетлѣ́нныѧ сла́вы є҆гѡ̀ наслажда́еми, не небреглѝ є҆стѐ, прпⷣбнїи, ѡ҆ разоре́нїи ст҃ы́ѧ ѡ҆би́тели ва́шеѧ, нижѐ потерпе́сте, да ᲂу҆га́снетъ свѣти́льникъ, возжже́нный на валаа́мѣ: но неемі́иною печа́лїю поболѣ́сте и҆ мл҃твою помоли́стесѧ, да порꙋ́ганъ бꙋ́детъ дїа́волъ, ѕлѣ̀ совеща́вый на странꙋ̀ сїю̀. тѣ́мже мл҃твою ва́шею воста̀ ѿ пе́пла ѡ҆би́тель ст҃а́ѧ сїѧ̀ и҆ ликꙋ́ющи честны̑ѧ мо́щи ва́шѧ ѿ нова́града грѧдꙋ́щыѧ срѣта́етъ, ва́мъ же вопїе́тъ сицєва́ѧ:

Ра́дꙋйтесѧ, ра́дости нбⷭ҇ныѧ вѣ́стницы: ра́дꙋйтесѧ, млⷭ҇ти бж҃їѧ послѝ.

Ра́дꙋйтесѧ, сла́во на́ша, па́ки воста́вшаѧ: ра́дꙋйтесѧ, вѣ́нче на́шъ, на́мъ па́ки возда́нный.

Ра́дꙋйтесѧ, ꙗ҆́кѡ прише́ствїемъ ва́шымъ вѣ́ра пра́ваѧ па́ки здѣ̀ ᲂу҆тверди́сѧ: ра́дꙋйтесѧ, ꙗ҆́кѡ свѣти́льникъ вѣ́чныѧ жи́зни па́ки во ѡ҆би́тели ва́шей возсїѧ̀.

Ра́дꙋйтесѧ, ѕла́гѡ на странꙋ̀ сїю̀ совѣ́та дїа́волѧ разрꙋше́нїе: ра́дꙋйтесѧ, наро́да ѡ҆кре́стнагѡ ѿ ро́ва є҆́реси и҆збавле́нїе.

Ра́дꙋйтесѧ, це́ркве правосла́вныѧ но́вое торжество̀: ра́дꙋйтесѧ, вра́тъ а҆́довыхъ вѧ́щшее посрамле́нїе.

Ра́дꙋйтесѧ, а҆́гг҃лѡвъ го́рнихъ высо́каѧ пѣ́снь: ра́дꙋйтесѧ, земны́хъ человѣ́къ ликова́нїе.

Ра́дꙋйтесѧ, се́ргїе и҆ ге́рмане, ѻ҆ц҃ы̀ пребл҃же́ннїи.

Конда́къ ѳ҃

Всѧ̑ стро́ѧй ѡ҆ сп҃се́нїи человѣ́честѣмъ, вда́лъ є҆сѝ, хрⷭ҇тѐ, стра́жа до́мꙋ твоегѡ̀ во странѣ̀ се́й ст҃ꙋ́ю ѡ҆би́тель на́шꙋ. не попꙋстѝ ᲂу҆́бѡ ю҆̀ ᲂу҆ны́нїемъ воздрема́ти, ни кꙋ́плѧми жите́йскими ѡ҆тѧготи́тисѧ, нижѐ пꙋ́ть добрѣ́йшїй креста̀ твоегѡ̀ ѡ҆ста́вити, но кꙋ́пнѡ съ прпⷣбными твои́ми да вы́нꙋ пое́тъ тѝ: А҆ллилꙋ́їа.

І҆́косъ ѳ҃

Вѣті́ѧмъ многовѣща̑ннымъ вѣ́ка сегѡ̀ ю҆ро́дство є҆́сть є҆́же мі́ръ возненави́дѣти и҆ пло́ть свою̀ ᲂу҆мертви́ти: недоꙋмѣ́ютъ бо дꙋхѡ́внаѧ дꙋхо́вными востѧзова́ти, нижѐ жи́зни сокрове́нныѧ во хрⷭ҇тѣ̀ пости́гнꙋти, ꙗ҆́же ᲂу҆таѝ бг҃ъ ѿ премꙋ́дрыхъ и҆ разꙋ́мныхъ и҆ ѿкры̀ младе́нцемъ. тѣ́мже, прпⷣбнїи, ꙗ҆́кѡ црⷭ҇твїѧ нбⷭ҇нагѡ наслѣ́дницы и҆ благода́тныѧ ра́дости ѡ҆́бщницы, мл҃твою ва́шею вы́нꙋ наста́вите на́съ, да тще́тныѧ пре́лести житїѧ̀ сегѡ̀ и҆збы́вше, невозвра́тнымъ по́мысломъ по́прищѣ на́ше тече́мъ, пою́ще ва́мъ такѡва́ѧ:

Ра́дꙋйтесѧ, дꙋхо́внаго любомꙋ́дрїѧ пода́тели: ра́дꙋйтесѧ, безстра́стїѧ сосꙋ́ди.

Ра́дꙋйтесѧ, чистоты̀ серде́чныѧ сокрѡ́вища: ра́дꙋйтесѧ, смире́нїѧ зерца́ло.

Ра́дꙋйтесѧ, вы́ бо мꙋ́дрыхъ мі́ра сегѡ̀ ꙗ҆ви́стесѧ посрамле́нїе: ра́дꙋйтесѧ, вы́ бо ю҆ро́дивыхъ ѡ҆ хрⷭ҇тѣ̀ бы́сте похвала̀.

Ра́дꙋйтесѧ, ꙗ҆́кѡ ва́ми врага̀ низлага́емъ хотѣ́нїѧ: ра́дꙋйтесѧ, ꙗ҆́кѡ ва́ми сꙋеты̀ ѿрѣва́емъ прило́ги.

Ра́дꙋйтесѧ, во бранѣ́хъ дꙋхо́вныхъ на́мъ посо́бницы: ра́дꙋйтесѧ, во и҆скꙋше́нїихъ всемо́щнїи застꙋ́пницы.

Ра́дꙋйтесѧ, ѡ҆бꙋрева́емыхъ приста́нище: ра́дꙋйтесѧ, немощны́хъ и҆сцѣле́нїе.

Ра́дꙋйтесѧ, се́ргїе и҆ ге́рмане, ѻ҆ц҃ы̀ пребл҃же́ннїи.

Конда́къ і҃

Спаси́тельный пꙋ́ть поста̀ возлюби́вшїи и҆ ꙗ҆ре́мъ хрⷭ҇то́въ на сѧ̀ во́лею взе́мшїи, прїиди́те всѝ къ семꙋ̀ ти́хомꙋ ѿ бꙋ́ри грѣхо́вныѧ приста́нищꙋ, въ покаѧ́нїи припаде́мъ къ неѡсла̑бнымъ мл҃твенникѡмъ на́шымъ и҆ ѻ҆ц҃є́мъ, ꙗ҆́кѡ мл҃твою и҆́хъ при́снѡ воздвиза́еми, ѡ҆брѧ́щемъ сла́вꙋ и҆ воспое́мъ: А҆ллилꙋ́їа.

І҆́косъ і҃

Стѣна̀ є҆стѐ ѡ҆би́тели ва́шей и҆ всѣ̑мъ съ вѣ́рою къ ва́мъ притека́ющымъ, прпⷣбнїи: ва́шимъ бо бо́дреннымъ застꙋпле́нїемъ собла́зны мі́ра ѿгонѧ́ютсѧ и҆ страсте́й взыгра̑нїѧ ᲂу҆гаша́ютсѧ. тѣ́мже мо́лимъ ва́съ: не ѿри́ните на́съ въ не́мощехъ на́шихъ, во и҆скꙋше́нїихъ и҆ ско́рбехъ. внегда̀ ѡ҆скꙋдѣва́ти дꙋхо́внѣй крѣ́пости на́шей, не ѡ҆ста́вите на́съ, но бꙋ́дите на́мъ при́сное защище́нїе, покро́въ же и҆ ѿра́да, да воспое́мъ ва́мъ бл҃годарѧ́ще:

Ра́дꙋйтесѧ, пꙋсты́нныхъ ти́хое ᲂу҆тѣше́нїе: ра́дꙋйтесѧ, ᲂу҆едине́нныхъ та́йное ра́дованїе.

Ра́дꙋйтесѧ, въ мл҃твѣ пребыва́ющихъ незри́мїи сомоли́твенницы: ра́дꙋйтесѧ, во бл҃гоговѣ́нїи сꙋ́щихъ бл҃года́тнїи сподви́жницы.

Ра́дꙋйтесѧ, наста́вницы на́ши, и҆́миже къ соверше́нствꙋ призыва́емсѧ: ра́дꙋйтесѧ, ѻ҆ц҃ы̀ на́ши, и҆́миже по́стничества жела́ннагѡ конца̀ доспѣ́ти ᲂу҆пова́емъ.

Ра́дꙋйтесѧ, крѣ́посте на́ша, є҆́юже стѣ́нꙋ грѣха̀ на́шегѡ пре́йдемъ: ра́дꙋйтесѧ, ᲂу҆твержде́нїе на́ше, и҆́мже тѧготꙋ̀ ѕло́бы на́шеѧ ѿлага́емъ.

Ра́дꙋйтесѧ, грѣхмѝ ѡ҆бремене́нныхъ любвеѡби́льнїи воспрїе́мницы: ра́дꙋйтесѧ, ка́ющихсѧ те́плѣ блазі́и хода́таи.

Ра́дꙋйтесѧ, ю҆́нѡши къ цѣломꙋ́дрїю возводѧ́щїи: ра́дꙋйтесѧ, ста́рцємъ терпѣ́нїе подаю́щїи.

Ра́дꙋйтесѧ, се́ргїе и҆ ге́рмане, ѻ҆ц҃ы̀ пребл҃же́ннїи.

Конда́къ а҃і

Пѣ́нїю немо́лчномꙋ безпло́тныхъ подража́юще и҆ на жесто́кое житїѐ ѻ҆тцє́въ на́шихъ взира́юще, не ѡ҆блѣни́мсѧ, ѽ бра́тїе: возлю́бимъ въ моли́твахъ всено́щное бдѣ́нїе, не ᲂу҆страши́мсѧ тлѣ́нныѧ пло́ти ᲂу҆тѣсне́нїѧ, да прпⷣбнымъ на́шымъ соприча́стницы бꙋ́демъ и҆ со а҆́гг҃лы воспое́мъ: А҆ллилꙋ́їа.

І҆́косъ а҃і

Свѣтѡза̑рныѧ свѣти́льники, свѣ́томъ и҆́стиннагѡ бл҃гоче́стїѧ сѣ́вернꙋю странꙋ̀ сїю̀ просвѣща́ющыѧ, зри́мъ вы̀, прпⷣбнїи: въ земнѣ́мъ бо житїѝ ва́шемъ мнѡ́ги ѿ ле́сти бѣсѡ́вскїѧ ко хрⷭ҇тꙋ̀ приведо́сте, и҆ по сме́рти то́ки бл҃года́тныхъ дарова́нїй и҆злива́юще и҆ ѡ҆би́тель свою̀ во бл҃гоговѣ́нїи и҆ трꙋдолю́бїи содержа́ще, правосла́внꙋю вѣ́рꙋ здѣ̀ ᲂу҆твержда́ете, и҆ всѧ̑ ѻ҆крє́стныѧ лю́ди дꙋхо́внымъ хлѣ́бомъ пита́ете, и҆ ѿ лю́торова па́гꙋбнагѡ нече́стїѧ и҆ тмы̀ невѣ́дѣнїѧ и҆збавлѧ́ете. сего̀ ра́ди прїими́те ѿ на́съ сицєва́ѧ:

Ра́дꙋйтесѧ, и҆́стины неле́стнїи свидѣ́телїе: ра́дꙋйтесѧ, мра́чныхъ сꙋевѣ́рїй ѿгна́тели.

Ра́дꙋйтесѧ, си́лы бж҃їѧ ди́вное ꙗ҆вле́нїе: ра́дꙋйтесѧ, блгⷣти хрⷭ҇то́вы чꙋ́дное зна́менїе.

Ра́дꙋйтесѧ, ва́ми бо црⷭ҇твїе бж҃їе въ сердца̀ мно́гихъ прїи́де: ра́дꙋйтесѧ, ва́ми бо денни́ца и҆́стиннагѡ свѣ́та во ѡ҆мраче́нныхъ грѣхо́мъ возсїѧ̀.

Ра́дꙋйтесѧ, вра́чеве ст҃і́и, сꙋмнѧ́щихсѧ дꙋ́шы бл҃года́тнѡ и҆сцѣлѧ́ющїи: ра́дꙋйтесѧ, па́стырїе до́брїи, ѻ҆́вцы своѧ̑ ѿ че́люстей ѕвѣри́ныхъ и҆з̾има́ющїи.

Ра́дꙋйтесѧ, правосла̑внымъ хрⷭ҇то́во бл҃гоꙋха́нїе: ра́дꙋйтесѧ, є҆реті́чествꙋющымъ сме́ртнаѧ вонѧ̀.

Ра́дꙋйтесѧ, каре́лїи сла́внїи а҆пⷭ҇ли: ра́дꙋйтесѧ, рѡссі́йскїѧ землѝ ᲂу҆краше́нїе.

Ра́дꙋйтесѧ, се́ргїе и҆ ге́рмане, ѻ҆ц҃ы̀ пребл҃же́ннїи.

Конда́къ в҃і

Бл҃года́тїю твое́ю бжⷭ҇твенною раздра́въ грѣ̑хъ на́шихъ рꙋкописа́нїе, бл҃года́ть твоегѡ̀ сыноположе́нїѧ ѡ҆бновѝ въ на́съ, сло́ве бж҃їй, и҆ да́ждь на́мъ про́чее въ покаѧ́нїи бл҃гоꙋгоди́ти тебѣ̀, да съ прпⷣбными твои́ми воспое́мъ тебѣ̀: А҆ллилꙋ́їа.

І҆́косъ в҃і

Пою́ще пресла́внꙋю па́мѧть ва́шꙋ, є҆ли́кѡ по си́лѣ на́шей, восхвалѧ́емъ ва́съ, прпⷣбнїи: вы́ бо, же́ртвꙋ чи́стꙋ себѐ хрⷭ҇то́ви прине́сше, всѣ̑мъ всѧ̑ бы́сте и҆ всѣ̑мъ просѧ́щымъ тꙋ́не всѧ̑ потрє́бнаѧ подае́те, да всѝ, бл҃годаре́нїю поꙋчи́вшесѧ, въ покаѧ́нїе и҆ и҆справле́нїе прїи́демъ, ва́съ же воспое́мъ си́це:

Ра́дꙋйтесѧ, смире́нныхъ мольба́мъ внима́тели: ра́дꙋйтесѧ, ᲂу҆бо́гихъ воздыха́нїѧ послꙋ́шатели.

Ра́дꙋйтесѧ, вдо́въ и҆ сиро́тъ наказа́тели и҆ корми́тели: ра́дꙋйтесѧ, ѡ҆би́димыхъ ѿра́до и҆ ᲂу҆тѣше́нїе.

Ра́дꙋйтесѧ, въ нꙋ́ждахъ и҆ ѡ҆бстоѧ́нїихъ сꙋ́щихъ ско́рое и҆ и҆звѣ́стное и҆збавле́нїе: ра́дꙋйтесѧ, всѣ́хъ къ ра́цѣ моще́й ва́шихъ съ вѣ́рою притека́ющихъ незави́стное и҆сцѣле́нїе и҆ сп҃се́нїе.

Ра́дꙋйтесѧ, предста́тели на́ши, ᲂу҆миле́нныѧ слє́зы на́шѧ прїе́млющїи: ра́дꙋйтесѧ, мл҃твенницы на́ши, во благи́хъ проше́нїѧ вѣ́рныхъ и҆сполнѧ́ющїи.

Ра́дꙋйтесѧ, мона́шествꙋющихъ всегда̀ гото́вое прибѣ́жище: ра́дꙋйтесѧ, мїрски́хъ человѣ̑къ ᲂу҆пова́нїе.

Ра́дꙋйтесѧ, госꙋда́рства на́шегѡ крѣ́посте: ра́дꙋйтесѧ, цр҃кве правосла́вныѧ ᲂу҆добре́нїе.

Ра́дꙋйтесѧ, се́ргїе и҆ ге́рмане, ѻ҆ц҃ы̀ пребл҃же́ннїи.

Конда́къ г҃і

Ѽ всепѣ́тїи и҆ пресла́внїи чꙋдотво́рцы на́ши и҆ мл҃твенницы, се́ргїе и҆ ге́рмане прпⷣбнїи! ны́нѣшнее смире́нное приноше́нїе ѿ недосто́йныхъ ча́дъ ва́шихъ прїе́мше, ѿ всѧ́кихъ напа́стей, скорбе́й и҆ болѣ́зней, навѣ́тѡвъ вра́жїихъ и҆ ѡ҆бстоѧ́нїй и҆зба́вите на́съ, и҆ въ стра́шный ча́съ сме́ртный бꙋ́дите на́мъ крѣ́пцыи предста́тели, ꙗ҆́кѡ да вѣ́чныѧ сме́рти и҆зба́вльшесѧ, воспое́мъ просла́вльшемꙋ ва́съ бг҃ꙋ: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃льски на землѝ пожи́вше, со а҆́гг҃лы ны́нѣ на нб҃сѝ водворѧ́етесѧ, ѻ҆ц҃ы̀ прпⷣбнїи, свѣ́тѡмъ трисо́лнечнымъ ѡ҆сїѧва́еми и҆ бжⷭ҇твенныѧ добро́ты лицезрѣ́нїѧ наслажда́ющесѧ. тѣ́мже и҆ на́съ, ча́дъ ва́шихъ, па́мѧть ва́шꙋ любо́вїю пра́зднꙋющихъ и҆ съ вѣ́рою под̾ ѻ҆́тчїй кро́въ ва́шъ прибѣга́ющихъ, ᲂу҆ прⷭ҇то́ла цр҃ѧ̀ сла́вы хрⷭ҇та̀ не забꙋ́дите, вопїю́щихъ ва́мъ такѡва́ѧ:

Ра́дꙋйтесѧ, въ ра́дость гдⷭ҇а своегѡ̀ вше́дшїи: ра́дꙋйтесѧ, вѣнцы̀ нетлѣ́нныѧ ѿ негѡ̀ прїе́мшїи.

Ра́дꙋйтесѧ, нбⷭ҇нагѡ сїѡ́на прекра́снагѡ гра́ждане: ра́дꙋйтесѧ, вѣ́чнагѡ црⷭ҇твїѧ хрⷭ҇то́ва наслѣ́дницы.

Ра́дꙋйтесѧ, въ жи́зни земнѣ́й є҆ди́наго хрⷭ҇та̀ всѣ́мъ се́рдцемъ возлюби́вшїи и҆ того̀ є҆ди́наго взыска́вшїи: ра́дꙋйтесѧ, любвѐ ра́ди є҆гѡ̀ всѧ̑ преѡби́девшїи и҆ мі́ра кра̑снаѧ презрѣ́вшїи.

Ра́дꙋйтесѧ, непреста́ннымъ бжⷭ҇твеннымъ раче́нїемъ превы́ше ви́димыхъ воспари́вшїи: ра́дꙋйтесѧ, дѣѧ́нїемъ видѣ́нїе стѧжа́вшїи.

Ра́дꙋйтесѧ, ᲂу҆́ми зрѧ́щїи бг҃а: ра́дꙋйтесѧ, неꙋсы́пныѧ мл҃твы и҆сто́чницы.

Ра́дꙋйтесѧ, валаа́мꙋ и҆зрѧ́днаѧ похвало̀: ра́дꙋйтесѧ, мі́рꙋ свѣти́льницы.

Ра́дꙋйтесѧ, се́ргїе и҆ ге́рмане, ѻ҆ц҃ы̀ пребл҃же́ннїи.

Конда́къ а҃

Возбра̑ннымъ на́шегѡ сп҃се́нїѧ побо́рникѡмъ и҆ тє́плымъ къ бг҃ꙋ мл҃твенникѡмъ похва́льное ва́мъ, прпⷣбнїи, прино́симъ пѣ́нїе. вы́ же, ꙗ҆́кѡ и҆мꙋ́щїи дерзнове́нїе ко гдⷭ҇ꙋ, ѿ всѧ́кихъ на́съ бѣ́дъ свободи́те, зовꙋ́щихъ:

Ра́дꙋйтесѧ, се́ргїе и҆ ге́рмане, ѻ҆ц҃ы̀ пребл҃же́ннїи.

Моли́твы

Ѽ вели́цыи ѻ҆ц҃ы̀ на́ши хрⷭ҇то́ви ᲂу҆го́дницы, и҆ те́плїи предста́тели ко сп҃сꙋ ѡ҆ дꙋша́хъ на́шихъ, се́ргїе и҆ ге́рмане: вы́ бо въ недꙋ́зѣхъ цѣли́тели ꙗ҆ви́стесѧ, по мо́рю пла́вающымъ ко́рмчїи, и҆ ᲂу҆топа́ющымъ бл҃гонаде́жное и҆збавле́нїе, и҆ ѿ всѧ́кагѡ смертоно́снагѡ наше́ствїѧ храни́тели, па́че же ѿ дꙋхѡ́въ нечи́стыхъ свобожде́нїе и҆ всѧ́кихъ навѣ́тѡвъ проти́вꙋ на́съ содержи́мыхъ ѡ҆чище́нїе и҆ по́мощь. Моли́тесѧ ᲂу҆́бѡ ко влⷣцѣ хрⷭ҇тꙋ̀ ѡ҆ на́съ грѣ́шныхъ: ꙗ҆́кѡ да ва́шими мл҃твами сподо́бимсѧ въ де́нь сꙋ́дный десна́гѡ предстоѧ́нїѧ, и҆ наслажде́нїѧ во црⷭ҇твїи бж҃їи во вѣ́ки вѣкѡ́въ. А҆ми́нь.

Ѽ прпⷣбнїи и҆ бг҃оно́снїи ѻ҆ц҃ы̀ на́ши се́ргїе и҆ ге́рмане! съ вѣ́рою и҆ любо́вїю припа́дающе къ ст҃ѣ́й і҆кѡ́нѣ ва́шей, ᲂу҆миле́ннѡ мо́лимъ ва́съ: не забꙋ́дите на́съ, недосто́йныхъ и҆ грѣ́шныхъ (и҆́мⷬ҇къ), но предста́тельствомъ ва́шимъ ѡ҆гради́те на́съ ѿ ѕлы́хъ ко́зней вра́жїихъ, ᲂу҆толи́те возста́нїе страсте́й, ᲂу҆крѣпи́те не́мощь на́шꙋ въ дꙋхо́вныхъ бра́нехъ и҆ по́двизѣхъ, предлежа́щихъ на́мъ, ѿжени́те всѧ́кое ᲂу҆ны́нїе и҆ печа́ль грѣхо́внꙋю ѿ серде́цъ на́шыхъ, и҆ нб҃сное ᲂу҆тѣше́нїе низпосли́те на́мъ во трꙋдѣ́хъ и҆ ско́рбехъ на́шихъ. въ стра́шный же ча́съ сме́ртный предста́ните всѣ̑мъ на́мъ, ꙗ҆́кѡ же блазі́и хода́таи и҆ те́мныхъ зра́кѡвъ де́мѡнскихъ прогони́телїе: да въ ми́рѣ и҆ покаѧ́нїи сконча́вше земно́е по́прищѣ на́ше, дости́гнемъ и҆ вѣ́чныхъ бла́гъ наслажде́нїѧ, и҆ кꙋ́пнѡ съ ва́ми да воспое́мъ и҆ просла́вимъ всест҃о́е и҆́мѧ ѻ҆ц҃а̀, и҆ сн҃а и҆ ст҃а́гѡ дх҃а, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.