Кано́нъ ст҃ы̑мъ прпⷣбнымъ се́ргїю и҆ ге́рманꙋ валаа̑мскимъ

Со́лнце Пра́вды — Христе́, возсия́й ми́ дне́сь све́том ра́зума Твоего́, да свети́льники на́ша, Се́ргия и Ге́рмана, се́рдцем и устна́ми воспою́ во сла́ву Твою́, Влады́ко.

Реко́ша в себе́ святи́и: бежи́м простра́ннаго пути́, зане́ в па́губу веде́т, бежи́м грехо́вных страсте́й, до а́да бо низво́дят, те́сный же пу́ть возлю́бим, да насле́дим жи́знь ве́чную.

Я́коже дожде́м, слеза́ми зе́млю се́рдца ва́шего напая́юще, и, я́ко со́лнцем, теплото́ю моли́твы согрева́юще, доброде́телей плоды́, Се́ргие и Ге́рмане, виногра́да Де́лателю принесо́сте.

Преслу́шав за́поведь, пра́отец сла́дости ра́йския лише́н бы́сть, послуша́нием же святи́и ве́чную жи́знь насле́довавше, Богозре́нием наслажда́ются.

Та́йное де́лание ва́ше, безмо́лвия люби́телие, ви́дя Оте́ц Небе́сный, я́ко сы́ны Своя́ уще́дри, благода́тию обогати́ и на Небесе́х просла́ви.

Чистоты́ рачи́тели, земны́я А́нгелы, избра́нныя сосу́ды Свята́го Ду́ха, чи́стое зерца́ло целому́дрия, Се́ргия и Ге́рмана чистото́ю се́рдца почти́м.

Я́ко ло́зы виногра́да Христо́ва су́ще, Се́ргие и Ге́рмане, грозда́ми доброде́телей процве́тшии, вино́м Боже́ственнаго весе́лия испо́лните сердца́ на́ша.

Мо́лим ва́с, я́ко в ра́дости су́щия пра́ведных, всеблаже́ннии, вся́ку печа́ль и го́ресть от ду́ш на́ших отгна́ти, я́ко да, ра́дующеся, сла́вим ва́с.

Те́мная страсте́й бу́ря воста́ на мя́ и све́т благода́ти сокрыва́ется от оче́с мои́х. Но, о свиде́тельницы мы́сленнии! моему́ омраче́нию ускори́те в по́мощь.

Кра́йним безмо́лвием, моли́твою же, и посто́м, и бде́нием ду́ши своя́ очи́стивше, пустыннолю́бцы Трисия́ннаго Све́та прия́телище соде́лашася.

Не я́коже тро́сти, ве́тром коле́блемыя, но я́ко тве́рдии столпи́, Се́ргий и Ге́рман, на краеуго́льном ка́мени, Христе́, ве́рою утверди́вшеся, доброде́тельми просия́ша.

Иоа́ннову житию́ в пусты́ни Иорда́нове и Илиину́ безмо́лвию на горе́ ревну́юще, преподо́бнии, страсте́й и́га дея́нием свобо́ждшеся, Богозре́нием просвети́шася.

Я́ко же́ртву непоро́чну и всесожже́ние ту́чно, принесо́ша себе́ святи́и Бо́гу, и, па́че вся́каго всепло́дия же́ртвы и приноше́ния, благоуго́дни Ему́ яви́шася.

У́мныма очи́ма зря́ще пред собо́ю Го́спода, Богоблаже́ннии, непоро́чно ше́ствовали есте́ по стезя́м за́поведей Его́, утвержде́ни иму́ще но́зе благода́тию Свята́го Ду́ха.

Не име́ поко́я боголюби́вый ду́х ва́ш, Се́ргие и Ге́рмане, до́ндеже не обрето́сте себе́ ме́сто безмо́лвия. В то́м бо ве́рою и любо́вию с Бо́гом соедини́вшеся, ве́чный поко́й насле́довасте.

Огню́ су́щу в ва́с, Се́ргие и Ге́рмане, Боже́ственныя любве́, пла́мень по́хоти и о́гнь я́рости претвори́ся в ро́су. Те́м, ра́дующеся, в безмо́лвии воспева́сте: благослове́н еси́, Го́споди, Бо́же оте́ц на́ших.

Пло́ти свое́й, я́коже злато́му и́долу о́троцы, преподо́бнии не послужи́ша, но, апо́стольски распина́юще ю́ со страстьми́ и похотьми́, покори́ша ду́ху и, хра́мы честни́ сотво́ршеся Свято́му Ду́ху, взыва́ху: благослове́н еси́, Го́споди, Бо́же оте́ц на́ших.

Я́ко чистоты́ храни́тели, чисте́йшему Божеству́ вмести́лище соде́лашася, любому́дрии, и, во пло́ти су́ще, тайноде́йствием Уте́шителя к преми́рных зре́нию восхища́хуся, пою́ще: благослове́н еси́, Го́споди, Бо́же оте́ц на́ших.

Бо́дренным ума́ трезве́нием и те́плым ко Христу́ моле́нием, диа́вола, я́ко льва́ рыка́ющаго и и́щущаго кого́ поглоти́ти, преподо́бнии посрами́ша, стра́стныя того́ прило́ги отсе́кше. Те́м со о́троки поя́ху: вся́ дела́, благослови́те, по́йте Го́спода.

Вся́ ору́жия Бо́жия Се́ргий и Ге́рман восприи́мше на гора́х Валаа́ма, я́коже Моисе́й и Ааро́н, воздея́нием ума́ и ру́к на высоту́, сопроти́вных си́лу, ве́рным спобо́рствующе, осла́биша, пою́ще пе́снь: вся́ дела́, благослови́те, по́йте Го́спода.

Безнача́льная, Вседержи́тельная, Единосу́щная Свята́я Тро́ице, моли́твами преподо́бных Твои́х от тре́х мы́сленных враго́в боре́ний ду́ши на́ша изба́ви, поми́луй и спаси́ все́х, благоче́стно Тя́ испове́дающих.

На тве́рдом ве́ры ка́мени благода́тию утвержде́ни су́ще, в безмо́лвии подвиза́ющеся, тече́ние по́стничества до́бре сконча́вше и мздовоздая́ние от Христа́ прии́мше, Тому́ ны́не моли́теся, всеблаже́ннии, в ве́ре и доброде́тели ве́рных Свои́х утверди́ти.

Я́ко победи́тели мы́сленных враго́в, Се́ргие и Ге́рмане, предстоя́ще ны́не Престо́лу Небе́сных си́л Царя́, моли́те бла́гость Его́ правосла́вным на сопоста́ты побе́ду и одоле́ние дарова́ти.

В Небе́сных су́ще оби́телех, преподо́бнии, Влады́ку все́х моли́те страну́ на́шу и вся́ гра́ды и страны́ христиа́нския в ми́ре сохрани́ти и вся́ ны́ спасти́, благоче́стно ва́с почита́ющия.

Со́лнце пра́вды хрⷭ҇тѐ, возсїѧ́й мѝ дне́сь свѣ́томъ ра́зꙋма твоегѡ̀, да свѣти́льники на́ша се́ргїа и҆ ге́рмана, се́рдцемъ и҆ ᲂу҆стна́ми воспою̀ во сла́вꙋ твою̀, влⷣко.

Реко́ша въ себѣ̀ ст҃і́и: бѣжи́мъ простра́ннагѡ пꙋтѝ занѐ, въ па́гꙋбꙋ веде́тъ, бѣжи́мъ грѣхо́вныхъ страсте́й: до а҆́да бо низво́дѧтъ. тѣ́сный же пꙋ́ть возлю́бимъ, да наслѣ́димъ жи́знь вѣ́чнꙋю.

Ꙗ҆́коже дожде́мъ слеза́ми, зе́млю се́рдца ва́шегѡ напаѧ́юще, и҆ ꙗ҆́кѡ со́лнцемъ теплото́ю мл҃твы согрѣва́юще, добродѣ́телей плоды̀, се́ргїе и҆ ге́рмане, вїногра́да дѣ́лателю принесо́сте.

Преслꙋ́шавъ за́повѣдь, пра́ѻц҃ъ сла́дости ра́йскїѧ лише́нъ бы́сть: послꙋша́нїемъ же ст҃і́и вѣ́чнꙋю жи́знь наслѣ́довавше, бг҃озрѣ́нїемъ наслажда́ютсѧ.

Та́йное дѣ́ланїе ва́ше, безмо́лвїѧ люби́телїе, ви́дѧ ѻ҆ц҃ъ нбⷭ҇ный, ꙗ҆́кѡ сы́ны своѧ̑ ᲂу҆ще́дри, бл҃года́тїю ѡ҆богатѝ, и҆ на нб҃сѣ́хъ просла́ви.

Чⷭ҇тоты̀ рачи́тели, земны́ѧ а҆́гг҃лы, и҆збра́нныѧ сосꙋ́ды ст҃а́гѡ дх҃а, чⷭ҇тое зерца́ло цѣломꙋ́дрїѧ, се́ргїа и҆ ге́рмана, чⷭ҇тото́ю се́рдца почти́мъ.

Ꙗ҆́кѡ ло́зы вїногра́да хрⷭ҇то́ва сꙋ́ще се́ргїе и҆ ге́рмане, грозда́ми добродѣ́телей процвѣ́тшїи, вїно́мъ бж҃е́ственнагѡ весе́лїѧ и҆спо́лните сердца̀ на̑ша.

ⷨМо́лимъ ва́съ, ꙗ҆́кѡ въ ра́дости сꙋ́щїѧ пра́ведныхъ всебл҃же́ннїи, всѧ́кꙋ печа́ль и҆ го́ресть ѿ дꙋ́шъ на́шихъ ѿгна́ти: ꙗ҆́кѡ да ра́дꙋющесѧ сла́вимъ ва́съ.

Те́мнаѧ страсте́й бꙋ́рѧ воста̀ на мѧ̀ и҆ свѣ́тъ бл҃года́ти сокрыва́етсѧ ѿ ѻ҆че́съ мои́хъ: но, ѽ свидѣ́тєльницы мы́сленнїи! моемꙋ̀ ѡ҆мраче́нїю ᲂу҆скори́те въ по́мощь.

Кра́йнимъ безмо́лвїемъ, мл҃твою же и҆ посто́мъ, и҆ бдѣ́нїемъ дꙋ́шы своѧ̑ ѡ҆чи́стивше, пꙋстыннолю́бцы трисїѧ́ннагѡ свѣ́та прїѧ́телище содѣ́лашасѧ.

Не ꙗ҆́коже тро́сти вѣ́тромъ коле́блємыѧ, но ꙗ҆́кѡ тве́рдїи столпѝ, се́ргїй и҆ ге́рманъ на краеꙋго́льномъ ка́мени, хрⷭ҇тѣ̀, вѣ́рою ᲂу҆тверди́вшесѧ, добродѣ́тельми просїѧ́ша.

І҆ѡа́нновꙋ житїю̀ въ пꙋсты́ни і҆ѻрда́новѣ, и҆ и҆лїинꙋ̀ безмо́лвїю на горѣ̀ ревнꙋ́юще, прпⷣбнїи, страсте́й и҆́га дѣѧ́нїемъ свобо́ждшесѧ, бг҃озрѣ́нїемъ просвѣти́шасѧ.

Ꙗ҆́кѡ же́ртвꙋ непоро́чнꙋ и҆ всесожже́нїе тꙋ́чно, принесо́ша себѐ ст҃і́и бг҃ꙋ, и҆ па́че всѧ́кагѡ всепло́дїѧ же́ртвы, и҆ приноше́нїѧ, бл҃гоꙋго́дни є҆мꙋ̀ ꙗ҆ви́шасѧ.

Оу҆́мныма ѻ҆чи́ма зрѧ́ще пред̾ собо́ю гдⷭ҇а бг҃облаже́ннїи, непоро́чнѡ ше́ствовали є҆стѐ по стезѧ́мъ за́повѣдей є҆гѡ̀, ᲂу҆твержде́ни и҆мꙋ́ще но́зѣ бл҃года́тїю ст҃а́гѡ дх҃а.

Не и҆мѣ̀ поко́ѧ бг҃олюби́вый дх҃ъ ва́шъ, се́ргїе и҆ ге́рмане, до́ндеже не ѡ҆брѣто́сте себѣ̀ мѣ́сто безмо́лвїѧ: въ то́мъ бо вѣ́рою и҆ любо́вїю съ бг҃омъ соедини́вшесѧ, вѣ́чный поко́й наслѣ́довасте.

Ѻ҆гню̀ сꙋ́щꙋ въ ва́съ, се́ргїе и҆ ге́рмане, бжⷭ҇твенныѧ любвѐ, пла́мень по́хоти и҆ ѻ҆́гнь ꙗ҆́рости претвори́сѧ въ ро́сꙋ: тѣ́мъ ра́дꙋющесѧ въ безмо́лвїи воспѣва́сте: бл҃гослове́нъ є҆сѝ гдⷭ҇и бж҃е ѻ҆ц҃ъ на́шихъ.

Пло́ти свое́й, ꙗ҆́коже злато́мꙋ і҆́дѡлꙋ ѻ҆́троцы прпⷣбнїи, не послꙋжи́ша: но а҆по́стольски распина́юще ю҆̀ со страстьмѝ и҆ похотьмѝ покори́ша дꙋ́хꙋ, и҆ хра́мы честни́ сотво́ршесѧ ст҃о́мꙋ дх҃ꙋ, взыва́хꙋ: бл҃гослове́нъ є҆сѝ гдⷭ҇и бж҃е ѻ҆ц҃ъ на́шихъ.

Ꙗ҆́кѡ чⷭ҇тоты̀ храни́тели, чⷭ҇тѣ́йшемꙋ бж҃ествꙋ̀ вмѣсти́лище содѣ́лашасѧ, любомꙋ́дрїи, и҆ во пло́ти сꙋ́ще, тайнодѣ́йствїемъ ᲂу҆тѣ́шителѧ, къ премі́рныхъ зрѣ́нїю восхища́хꙋсѧ пою́ще: бл҃гослове́нъ є҆сѝ гдⷭ҇и бж҃е ѻ҆ц҃ъ на́шихъ.

Бо́дреннымъ ᲂу҆ма̀ трезве́нїемъ, и҆ те́плымъ ко хрⷭ҇тꙋ̀ моле́нїемъ, дїа́вола, ꙗ҆́кѡ льва̀ рыка́ющаго и҆ и҆́щꙋщаго кого̀ поглоти́ти, прпⷣбнїи посрами́ша, стра̑стныѧ тогѡ̀ прило́ги ѿсѣ́кше. тѣ́мъ со ѻ҆́троки поѧ́хꙋ: всѧ̑ дѣла̀ бл҃гослови́те, по́йте гдⷭ҇а.

Всѧ̑ ѻ҆рꙋ̑жїѧ бж҃їѧ се́ргїй и҆ ге́рманъ, воспрїи́мше на гора́хъ валаа́ма, ꙗ҆́коже мѡѷсе́й и҆ а҆арѡ́нъ воздѣѧ́нїемъ ᲂу҆ма̀ и҆ рꙋ́къ на высотꙋ̀, сопроти́вныхъ си́лꙋ, вѣ̑рнымъ спобо́рствꙋюще, ѡ҆сла́биша, пою́ще пѣ́снь: всѧ̑ дѣла̀ бл҃гослови́те, по́йте гдⷭ҇а.

Безнача́льнаѧ, вседержи́тельнаѧ, є҆диносꙋ́щнаѧ ст҃а́ѧ трⷪ҇це, мл҃твами преподо́бныхъ твои́хъ, ѿ тре́хъ мы́сленныхъ врагѡ́въ боре́нїй, дꙋ́шы на́шѧ и҆зба́ви, поми́лꙋй и҆ спасѝ всѣ́хъ бл҃гоче́стнѡ тѧ̀ и҆сповѣ́дающихъ.

На тве́рдомъ вѣ́ры ка́мени бл҃года́тїю ᲂу҆твержде́ни сꙋ́ще, въ безмо́лвїи подвиза́ющесѧ, тече́нїе по́стничества до́брѣ сконча́вше, и҆ мздовоздаѧ́нїе ѿ хрⷭ҇та̀ прїи́мше, томꙋ̀ ны́нѣ моли́тесѧ, всебл҃же́ннїи, въ вѣ́рѣ и҆ добродѣ́тели вѣ́рныхъ свои́хъ ᲂу҆тверди́ти.

Ꙗ҆́кѡ побѣди́тели мы́сленныхъ врагѡ́въ, се́ргїе и҆ ге́рмане, предстоѧ́ще ны́нѣ прⷭ҇то́лꙋ нбⷭ҇ныхъ си́лъ цр҃ѧ̀, моли́те бл҃гость є҆гѡ̀ правосла́внымъ на сопоста́ты побѣ́дꙋ и҆ ѡ҆долѣ́нїе дарова́ти.

Въ небе́сныхъ сꙋ́ще ѻ҆би́телехъ прпⷣбнїи, влⷣкꙋ всѣ́хъ моли́те, странꙋ̑ на́шꙋ, и҆ всѧ̑ гра́ды и҆ страны̑ хрⷭ҇тїа́нскїѧ въ ми́рѣ сохрани́ти, и҆ всѧ̑ ны̀ спастѝ, бл҃гоче́стнѡ ва́съ почита́ющиѧ.