Православный календарь
Размер шрифта:

Ака́ѳістъ

А҆ка́ѳїстъ первоверхѡ́внымъ а҆пⷭ҇лѡмъ петрꙋ̀ и҆ па́ѵлꙋ.

Славных и всехвальных первоверховных апостолов Петра и Павла (67) 12 июля 2026

Конда́къ а҃

И҆збра́ннїи проповѣ̑дницы а҆́гнца непоро́чнаго, за ны̀ закла́ннаго, хрⷭ҇та̀ бг҃а, пресла́внїи а҆пⷭ҇ли пе́тре и҆ па́ѵле! Ꙗ҆́кѡ бг҃овѣ́дѣнїемъ концы̀ мі́ра ѡ҆зари́вшїи и҆ ѻ҆би́льнѣ стрꙋѧ́ми бл҃года́ти напои́вшїи, и҆ ны́нѣ съ любо́вїю при́зрите на чтꙋ́щыѧ ᲂу҆се́рднѡ па́мѧть ва́шꙋ. И҆спо́лните на́съ дꙋ́ха премꙋ́дрости, сердца̀ на́шѧ вѣ́рою ᲂу҆тверди́те, да непреста́ннѡ бл҃года́рствєннаѧ ва́мъ пое́мъ, со ᲂу҆миле́нїемъ зовꙋ́ще:

Ра́дꙋйтесѧ, ст҃і́и первоверхо́внїи а҆пⷭ҇ли пе́тре и҆ па́ѵле.

І҆́косъ а҃

А҆́гг҃ли бл҃говѣ̑стницы ꙗ҆ви́стесѧ на землѝ, а҆пⷭ҇толи пе́тре и҆ па́ѵле бл҃же́ннїи, занѐ ѿ самаго̀ вино́вника спⷭ҇нїѧ на́шегѡ на дѣ́ланїе ва́ше призва́ни бы́вше, широтꙋ̀ всеѧ̀ землѝ ѡ҆бтеко́сте, і҆ꙋде́ѡмъ и҆ є҆́ллинѡмъ хрⷭ҇та̀ распѧ́таго, бж҃їю си́лꙋ и҆ бж҃їю премꙋ́дрость проповѣ́дающе. Тѣ́мже и҆ мы̀, свѣ́томъ ᲂу҆че́нїй ва́шихъ ѡ҆зарѧ́еми, се́рдцемъ и҆ ᲂу҆сты̑ взыва́емъ къ ва́мъ сицева̑ѧ:

Ра́дꙋйтесѧ, ѕвѣ́зды свѣтоза́рныѧ, ѿ восто́ка возсїѧ́вшїѧ и҆ всѣ́мъ лю́демъ пꙋ́ть ко хрⷭ҇тꙋ̀ показа́вшыѧ: ра́дꙋйтесѧ, цр҃кве хрⷭ҇то́вы ᲂу҆твержде́нїе и҆ столпѝ непоколеби́мїи.

Ра́дꙋйтесѧ, вла́сть вѧза́ти и҆ рѣши́ти грѣхѝ на́шѧ ѿ хрⷭ҇та̀ прїи́мшїи: ра́дꙋйтесѧ, во ст҃ы́хъ писа́нїихъ ва́шихъ къ вѣ́рѣ и҆ ᲂу҆пова́нїю на бг҃а всѧ̑ ны̀ призыва́ющїи.

Ра́дꙋйтесѧ, въ житїѝ ва́шемъ ѡ҆́бразы ѡ҆браще́нїѧ согрѣша́ющымъ ꙗ҆ви́вшїи: ра́дꙋйтесѧ, высотꙋ̀ любвѐ и҆́стинныѧ сло́вомъ и҆ дѣ́ломъ на́мъ показа́вшїи.

Ра́дꙋйтесѧ, ст҃і́и первоверхо́внїи а҆пⷭ҇ли пе́тре и҆ па́ѵле.

Конда́къ в҃

Ви́дѧ тѧ̀, а҆пⷭ҇толе пе́тре, на мо́ре галиле́йстемъ вкꙋ́пе со а҆ндре́емъ, бра́томъ твои́мъ, вмета́юща мре́жи, гдⷭ҇ь речѐ ва́мъ: грѧди́та по мнѣ̀, и҆ сотворю̀ вы̀ ловца̀ чл҃вѣ́комъ. И҆ а҆́бїе, ѡ҆ста́вльше мре́жи, по не́мъ и҆до́сте. Тѣ́мже, красото̀ цр҃кви вселе́нскїѧ, сотворѝ и҆ на́съ предста́тельствомъ твои́мъ ско́ры бы́ти на дѣ́ланїе за́повѣдей бж҃їихъ, кѡ́сны же ко грѣхꙋ̀, да, ѕло́бою младе́нствꙋюще, дости́гнемъ всѝ въ мѣ́рꙋ во́зраста мꙋ́жа соверше́нна, пою́ще бг҃ови: А҆ллилꙋ́їа.

І҆́косъ в҃

Ра́зꙋмъ бжⷭ҇твенный ѡ҆свѣти́ тѧ, па́ѵле, и҆збра́нный сосꙋ́де бж҃їй, є҆гда̀, ревнꙋ́ѧ ѡ҆ ѻ҆те́ческихъ преда́нїихъ, ше́ствовалъ є҆сѝ въ дама́скъ гони́ти цр҃ковь хрⷭ҇то́вꙋ. Тогда́ бо внеза́пꙋ сїѧ́нїе сла́вы гдⷭ҇ни ѡ҆блиста̀ тебѐ и҆ гла́съ бы́сть съ нб҃сѐ: са́ѵле, са́ѵле, что̀ мѧ̀ го́ниши; Ты́ же, а҆́ще зрѣ́нїемъ плотски́мъ ѡ҆мрачи́лсѧ є҆сѝ. Но дꙋ́хомъ ᲂу҆зрѣ́лъ є҆сѝ си́лꙋ и҆ сла́вꙋ хрⷭ҇та̀ ра́спѧта, тмꙋ̀ просвѣща́юща и҆ любо́вїю цр҃ковь свою̀ созида́юща, и҆ того̀ ра́ди плени́лсѧ є҆сѝ дꙋ́хомъ, покаѧ́нїе и҆ послꙋша́нїе несѧ̀ и҆ гл҃го́лѧ: гдⷭ҇и, что̀ сотворю̀; Посе́мъ воспрїи́мъ жре́бїй а҆пⷭ҇льства ѿ рꙋкѝ гдⷭ҇ни и҆ креще́нїе водо́ю и҆ дх҃омъ ѿ а҆на́нїи блаже́ннѣйшаго, ꙗ҆ви́лсѧ є҆сѝ преди́вно сосꙋ́дъ и҆збра́нный бл҃года́ти и҆ свидѣ́тель немо́лчный сп҃си́телѧ на́шего, ѿ него́же и҆ мы̀, просвѣща́емїи, пѣ́ти тебѣ̀ навыко́хомъ сицева́ѧ:

Ра́дꙋйсѧ, свѣ́тлосте цр҃ко́внаѧ, ѿ свѣ́та неизрече́ннаго на пꙋтѝ пречꙋ́дно во ѿкрове́нїе ꙗ҆зы́кѡвъ возжже́ннаѧ: ра́дꙋйсѧ, зна́мєнїѧ си́лы бж҃їѧ въ житїѝ твое́мъ чꙋ́дно ꙗ҆ви́вый и҆ те́мъ ᲂу҆ста̀ непокори́вымъ навѣ́ки загради́вый.

Ра́дꙋйсѧ, сосꙋ́де и҆збра́нный, ме́ньша ѿ а҆пⷭ҇лъ и҆ пе́рваго ѿ грѣ́шникъ себѐ сокрꙋше́нно нарекі́й: ра́дꙋйсѧ, ꙗ҆́коже херꙋві́мъ тайнозри́тель, да́же до тре́тїѧго нб҃сѐ вѣ́рою и҆ любо́вїю вознесе́нный.

Ра́дꙋйсѧ, ꙗ҆́коже серафі́мъ пла́менный, ре́вностїю по бз҃ѣ непреста́нно снѣда́емый и҆ и҆стаева́емый: ра́дꙋйтесѧ, па́ѵлѣ и҆ пе́тре, бл҃говѣ́стїѧ трꙋбы̀ громогла́сныѧ, ѡ҆снѡва́нїѧ ве́тхаго ми́ра, ꙗ҆́коже і҆ерїхѡ́нъ вторы́й сокрꙋши́вшїѧ.

Ра́дꙋйтесѧ, ст҃і́и первоверхо́внїи а҆пⷭ҇ли пе́тре и҆ па́ѵле.

Конда́къ г҃

Си́ла вы́шнѧго, въ не́мощехъ познава́емаѧ, и҆злїѧ̀ на тѧ̀, па́ѵле, а҆дама́нте вѣ́ры, бл҃года́ть на бл҃года́ть, занѐ нело́жно и҆сповѣ́далъ є҆сѝ: всѧ̑ могꙋ̀ ѡ҆ ᲂу҆крѣплѧ́ющемъ мѧ̀ і҆и҃се. И҆ вои́стиннꙋ проповѣ́далъ є҆сѝ є҆ѵⷢ҇лїе во ꙗ҆вле́нїи дх҃а и҆ си́лы, творѧ̀ вели̑каѧ и҆ неизречє́ннаѧ, сла̑внаѧ же и҆ ᲂу҆жа̑снаѧ, ꙗ҆́кѡ невѣ́дꙋщїи бг҃а бг҃овѣ́дѣнїю наꙋча́хꙋсѧ, сердца̀ ѡ҆жесточє́ннаѧ є҆ле́омъ млⷭ҇рдїѧ напаѧ́хꙋсѧ и҆ всѧ̑ ѻ҆́вцы расточє́нныѧ во ѡ҆гра́дꙋ па́стырѧ є҆ди́наго ѿвсю́дꙋ стека́хꙋсѧ, є҆мꙋ́же и҆ пѣ́ти согла́сно наꙋчи́шасѧ: А҆ллилꙋ́їа.

І҆́косъ г҃

И҆мѣ́ѧ дерзнове́ннꙋю любо́вь ко гдⷭ҇ꙋ, ше́ствовалъ є҆сѝ, пе́тре, по вода́мъ воздвиза́емымъ, ꙗ҆́кѡ по сꙋ́хꙋ. Но а҆́ще и҆ потопле́нїемъ бы́лъ є҆сѝ ᲂу҆страша́емь и҆ сомнѣ́нїемъ ѡ҆бꙋрева́емь, не потопи́лсѧ є҆сѝ въ пꙋчи́нѣ, поне́же просте́рлъ є҆сѝ рꙋ́цѣ и҆ ѻ҆́чи ко сп҃сꙋ вопїѧ̀ є҆мꙋ̀ и҆зъ глꙋбины̀ серде́чныѧ: гдⷭ҇и, спасѝ мѧ̀. И҆ въ то́й ча́съ рꙋ́кꙋ по́мощи воспрїѧ́лъ є҆сѝ ѿ хрⷭ҇та̀, и҆зба́вителѧ на́шегѡ. Та́кѡ и҆ мы̀ въ се́й ю҆до́ли земно́й, бѣда́ми ᲂу҆страша́еми и҆ волна́ми страсте́й потоплѧ́еми, взира́юще на тече́нїе твоѐ, къ ти́хомꙋ приста́нищꙋ до́брѣ на́съ наставлѧ́ющее, бл҃года́рственнѡ воспѣва́емъ тѝ си́це:

Ра́дꙋйсѧ, ка́меню вѣ́ры многоцѣ́нный, ѿ ка́мене краеꙋго́льна и҆збра́нный и҆ ᲂу҆твержде́нный: ра́дꙋйсѧ, хра́ме дх҃а ст҃а́гѡ, многоразли́чными дарова́ньми ѿ того̀ преизрѧ́днѡ ᲂу҆краше́нный.

Ра́дꙋйсѧ, ры́барю препро́стый, премꙋ́дрости бж҃їѧ и҆спо́лненный, є҆́йже ѿ человѣ́къ никто́же проти́витисѧ мо́жетъ: ра́дꙋйсѧ, самови́дче вели́чїѧ бж҃їѧ, па́че царе́й и҆ сла́вныхъ землѝ ѿ на всѧ̑ вѣ́ки просла́вленный.

Ра́дꙋйсѧ, ха́ртїе ѡ҆дꙋхотворе́ннаѧ, въ ню́же ѻ҆́гненными письмены̀ сло́во бж҃їе вписа́сѧ: ра́дꙋйсѧ, съ па́ѵломъ а҆пⷭ҇ломъ свѣти́ло равноче́стное и҆ незаходи́мое.

Ра́дꙋйтесѧ, ст҃і́и первоверхо́внїи а҆пⷭ҇ли пе́тре и҆ па́ѵле.

Конда́къ д҃

Бꙋ́рю лю́тыхъ и҆скꙋше́нїй воздви́же дре́вле человѣкоꙋбі́йца, и҆сконѝ и҆скі́й цр҃ковь бж҃їю потреби́ти и҆ ᲂу҆ченикѝ сп҃совы, ꙗ҆́коже пшени́цꙋ разсѣ́ѧти: но гдⷭ҇ь моли́сѧ ѡ҆ тебѣ̀, пе́тре, да не ѡ҆скꙋдѣ́етъ вѣ́ра твоѧ̀. И҆ та́кѡ, ѿ сп҃са просвѣща́емь и҆ ѿ него̀ въ не́мощи ᲂу҆крѣплѧ́емь, вои́стиннꙋ сокрꙋши́лъ є҆сѝ чє́люсти вра́жїѧ и҆ ѡ҆бра́щсѧ ᲂу҆тверди́лъ є҆сѝ бра́тїю твою̀, поѧ̀ бг҃ꙋ: А҆ллилꙋ́їа.

І҆́косъ д҃

Слы́шаще, па́ѵле премꙋ́дре, ѡ҆ ди́внѣмъ и҆збра́нїи твое́мъ, во є҆́же возвѣсти́ти и҆́мѧ гдⷭ҇а і҆и҃са наро́дѡмъ и҆ царє́мъ и҆ сынѡ́мъ і҆и҃левымъ, и҆ ви́дѧще тѧ̀ въ сло́ве, въ житїѝ, въ любвѝ, въ дс҃ѣ, въ вѣ́рѣ, въ чⷭ҇тотѣ̀, ꙗ҆́коже свѣ́та ꙗ҆зы́комъ во спасе́нїе и҆́хъ поста́влена, невѣ́рнїи вѣ́рою просвѣща́хꙋсѧ, вѣ́рнїи же, ликовствꙋ́юще, гдⷭ҇а прославлѧ́хꙋ. Тѣ́мже и҆ мы̀, сора́доватисѧ за́повѣдь прїе́мше, прино́симъ тѝ гла́сомъ ра́дѡванїѧ такѡва́ѧ:

Ра́дꙋйсѧ, вѣ́рный слꙋжи́телю хрⷭ҇то́въ, всѧ̑ сла́внаѧ мі́ра ꙗ҆́коже со́ръ и҆ пра́хъ вмѣни́вый и҆ всѣ́мъ себє̀ порабо́тивый хрⷭ҇та̀ ра́ди и҆ є҆ѵⷢ҇лїа: Ра́дꙋйсѧ, до́брый во́ине хрⷭ҇то́въ, во всѧ̑ ѻ҆рꙋ́жїѧ бж҃їѧ ѡ҆блече́нный и҆ всѧ̑ ꙗ҆зы̑ки въ послꙋша́нїе хрⷭ҇то́во покори́вый.

Ра́дꙋйсѧ, же́ртво прїѧ́тнѣйшаѧ, хрⷭ҇тꙋ̀ сораспе́ншаѧсѧ, хрⷭ҇та̀ ра́ди по днѝ ᲂу҆мира́ти прїѡбы́кшаѧ: ра́дꙋйсѧ, сѣ́ѧтелю слеза́ми мно́гими, ᲂу҆́зниче и҆ и҆сповѣ́дниче пресла́вный, ꙗ҆́звы гдⷭ҇а і҆и҃са хрⷭ҇та̀ на тѣ́лѣ твое́мъ ра́достнѡ носи́вый.

Ра́дꙋйсѧ, сла́во и҆ похвало̀ цр҃кве вселе́нскїѧ, позо́рище мі́рови бы́вый, гла́дъ, жа́ждꙋ, наготꙋ̀, бїе́нїе и҆ порꙋга́нїе за хрⷭ҇та̀ многоча́стнѣ претерпѣ́вый: Ра́дꙋйтесѧ, па́ѵле и҆ пе́тре, а҆пⷭ҇лѡвъ ᲂу҆краше́нїе, мі́рꙋ бл҃говѣ́стницы, цр҃кве ᲂу҆твержде́нїе.

Ра́дꙋйтесѧ, ст҃і́и первоверхо́внїи а҆пⷭ҇ли пе́тре и҆ па́ѵле.

Конда́къ є҃

Бг҃оте́чнаѧ ѕвѣзда̀ ꙗ҆ви́лсѧ є҆сѝ, па́ѵле, є҆гда̀ тече́нїе твоѐ, пресвѣ́тло наче́нъ ѿ дама́ска, да́же до ри́ма просте́рлъ є҆сѝ и҆ ꙗ҆́коже пре́жде ѕвѣзда̀ ѿ востѡ́къ наꙋчѝ вѡлхвы̀ кла́нѧтисѧ со́лнцꙋ пра́вды, си́це и҆ ты̀, бг҃омꙋ́дре, пꙋ́ть ко хрⷭ҇тꙋ̀ показа́лъ є҆сѝ всѣ́мъ, хотѧ́щымъ дости́гнꙋти спⷭ҇нїѧ, взыва́ѧ со дерзнове́нїемъ мно́гимъ: подража́тели мнѣ̀ быва́йте, ꙗ҆́коже и҆ а҆́зъ хрⷭ҇тꙋ̀. Є҆мꙋ́же и҆ пѣ́ти наꙋчи́лъ є҆сѝ на́съ є҆ди́нѣми ᲂу҆сты̑: А҆ллилꙋ́їа.

І҆́косъ є҃

Ви́дѣвъ на горѣ̀ ѳавѡ́рстѣй сла́вꙋ є҆диноро́днаго ѿ ѻ҆ц҃а̀, ѡ҆дѣ́ѧна свѣ́томъ, ꙗ҆́кѡ ри́зою, хотѧ́ща же за ны̀ ѡ҆блещи́сѧ въ ри́зꙋ порꙋга́нїѧ, глаго́лалъ є҆сѝ, пе́тре, і҆и҃сови, прови́дѧ сла́вꙋ несказа́ннꙋю и҆скꙋпле́нныхъ кро́вїю а҆́гнца непоро́чна хрⷭ҇та̀: гдⷭ҇и, добро̀ є҆́сть на́мъ здѣ̀ бы́ти. Сегѡ̀ ра́ди и҆ мы̀, ро́ди да́льнїи, лише́ни чистоты̀ свѣтоза́рныѧ, а҆́ще и҆ недосто́йни сꙋ́ще, ѻ҆ба́че твои́мъ а҆́гг҃льскимъ гла́сомъ призва́ннїи къ наслѣ́дїю нетлѣ́ннꙋ, чи́стꙋ, неꙋвѧда́емꙋ, соблюда́емꙋ на нбⷭ҇ѣ́хъ, ꙗ҆́коже ѻ҆́бщницы хотѧ́щей ѿкры́тисѧ сла́вѣ, воспѣва́емъ тѝ си́це:

Ра́дꙋйсѧ, бл҃же́нне, ѿ присносꙋ́щныѧ и҆́стины досто́йно бл҃же́нъ нарече́нный: ра́дꙋйсѧ, би́сере предо́брый, ѿ гдⷭ҇а при є҆́зерѣ ѡ҆брѣ́тенный и҆ свѣ́томъ ѿ свѣ́та ѡ҆сїѧ́нный.

Ра́дꙋйсѧ, ѿ самаго̀ и҆скꙋпи́телѧ ро́да чл҃вѣ́ча на про́повѣдь є҆ѵⷢ҇лїа по́сланный: ра́дꙋйсѧ, вои́стиннꙋ лове́цъ чл҃вѣ́кѡвъ ꙗ҆ви́выйсѧ, ты́ бо, ꙗ҆́коже и҆ пре́жде, бл҃года́тїю влече́ши дꙋ́шы ѡ҆мрачє́нныѧ въ чꙋ́дный свѣ́тъ хрⷭ҇та̀ бг҃а.

Ра́дꙋйсѧ, и҆сто́чниче животво́рный, ѿ и҆сто́чника жи́зни вѣ́чныѧ и҆стекі́й и҆ ѿ бога́тства дарѡ́въ дх҃а ст҃а́го жа́ждꙋщыѧ дꙋ́шы напоѧ́ѧй: ра́дꙋйтесѧ, пе́тре и҆ па́ѵле, ꙗ҆́коже серафі́ми шестокрила́тїи, ᲂу҆ прⷭ҇то́ла цр҃ѧ̀ сла́вы парѧ́щїи и҆ ко свѣ́тꙋ та́инъ бж҃їихъ приница́ющїи.

Ра́дꙋйтесѧ, ст҃і́и первоверхо́внїи а҆пⷭ҇ли пе́тре и҆ па́ѵле.

Конда́къ ѕ҃

Проповѣ́дникъ немо́лченъ и҆ по сме́рти твое́й, пе́тре бг҃оно́сне, ꙗ҆ви́лсѧ є҆сѝ, занѐ съ нб҃а мы́сленнаго, ꙗ҆́коже гро́мъ та́инственный, ѡ҆ зва́нїи хрⷭ҇тїа́нстѣмъ многоразли́чнѡ напомина́еши. Мы́ же, вѣ́дѧще любо́вь твою̀ николи́же ѿпа́дающꙋ и҆ мл҃твꙋ ѡ҆ на́съ непреста́ннѡ ᲂу҆ прⷭ҇то́ла бж҃їѧ дѣ́емꙋ, пое́мъ се́рдцемъ ᲂу҆миле́ннымъ: А҆ллилꙋ́їа.

І҆́косъ ѕ҃

Возсїѧ́лъ є҆сѝ, па́ѵле великоимени́те, зна́меньми и҆ чꙋдесы̀ вско́рѣ, ѿне́лѣже дх҃ъ ст҃ы́й во а҆нтїохі́и повелѣ́ ти нача́ти превели́кое слꙋже́нїе а҆пⷭ҇ла ꙗ҆зы́кѡвъ: та́же, дости́гъ кѵ́пра, є҆ли́мы волхва̀ зрѣ́нїе ѡ҆мрачи́лъ є҆сѝ и҆ се́ргїа проко́нсꙋла свѣ́томъ и҆́стины ѡ҆зари́лъ є҆сѝ. Сподо́би и҆ на́съ, свѣ́та сего̀ прича́щшихсѧ, просла́вити ди́внаѧ дѣла̀ твоѧ̑ въ пѣ́снехъ и҆ пѣ́нїихъ дꙋхо́вныхъ и҆ воспѣва́ти тебѣ̀ такѡва́ѧ:

Ра́дꙋйсѧ, свѣ́те серде́цъ кро́ткихъ и҆ разꙋ́мныхъ, ꙗ҆́же, ꙗ҆́кѡ дои́лица, грѣ́еши и҆ пѣ́стꙋнствꙋеши писа́ньми твои́ми бг҃одꙋхнове́нными: ра́дꙋйсѧ, же́зле наказа́нїѧ, сосꙋ́ды лжѝ и҆ льстѝ до конца̀ сокрꙋша́ѧй, сердца́ же сокрꙋшє́ннаѧ на недви́жимѣмъ ка́мени вѣ́ры воздвиза́ѧй.

Ра́дꙋйсѧ, хрⷭ҇то́во є҆ѵⷢ҇лїе въ себѣ̀ воплоти́вый и҆ сего̀ ра́ди превы́ше ви́димыхъ вознесе́нный и҆ просла́вленный: ра́дꙋйсѧ, ᲂу҆ста̀ медотѡ́чнаѧ, ра́дость мно́гꙋю а҆пⷭ҇лѡмъ и҆ вѣ̑рнымъ возвѣсти́вшаѧ, ꙗ҆́кѡ ѿве́рзе тобо́ю гдⷭ҇ь две́рь спасе́нїѧ всѣ̑мъ ꙗ҆зы́кѡмъ.

Ра́дꙋйсѧ, ревни́телю по бз҃ѣ, но́вый и҆лїѐ, не на чꙋжде́мъ ѡ҆снова́нїи созида́ѧй и҆ ре́вностїю твое́ю страны̑ да́льнїѧ ѡ҆бтека́ѧй: ра́дꙋйтесѧ, па́ѵле и҆ пе́тре, ве́сь мі́ръ междꙋ̀ ва́ми раздѣли́вшїи, во є҆́же ѻ҆́вомꙋ бы́ти а҆пⷭ҇лꙋ ꙗ҆зы́кѡвъ, дрꙋго́мꙋ же проповѣ́дати наро́дꙋ и҆збра́нномꙋ.

Ра́дꙋйтесѧ, ст҃і́и первоверхо́внїи а҆пⷭ҇ли пе́тре и҆ па́ѵле.

Конда́къ з҃

Хотѧ̀ и҆́стинꙋ ᲂу҆тверди́ти и҆ ми́ръ цр҃кви ѡ҆гради́ти, прише́лъ є҆сѝ, па́ѵле, побо́рниче пра́вды, во ст҃ы́й гра́дъ, въ не́мже на собра́нїи ст҃ы́хъ а҆пⷭ҇лъ и҆ вѣ́рныхъ свидѣ́тельствовалъ є҆сѝ вкꙋ́пѣ съ петро́мъ и҆ варна́вою, ꙗ҆́кѡ дх҃ъ ст҃ы́й ды́шетъ, и҆дѣ́же хо́щетъ, да́рꙋѧ бл҃года́ть свою̀ незави́стно і҆ꙋде́ѡмъ и҆ є҆́ллинѡмъ и҆ вѣ́рою всѧ̑ спаса́ѧ, а҆ не мє́ртвенными дѣ́лы ве́тхаго зако́на. И҆ та́кѡ вои́стиннꙋ всѝ вѣ́рнїи, свобо́дꙋ и҆ ми́ръ полꙋчи́вше, сою́зомъ любвѐ свѧзꙋ́еми, бл҃года́рственнѡ воспѣва́ютъ бг҃ови: А҆ллилꙋ́їа.

І҆́косъ з҃

Но́ваго а҆рха́гг҃ла, провозвѣ́стника та́йны, ѿ вѣ́ка сокрове́нныѧ, и҆збра̀ тѧ̀, а҆пⷭ҇ле пе́тре, гдⷭ҇ь, є҆гда̀ вопросѝ ᲂу҆чн҃ки̑ своѧ̑: вы́ же кого̀ мѧ̀ глаго́лете бы́ти; Ты́ же, ѿ ѻ҆ц҃а̀ нбⷭ҇наго просвѣща́емъ, возвѣсти́лъ є҆сѝ несомнѣ́нное ѡ҆снова́нїе вѣ́ры, гл҃го́лѧ ко сп҃сꙋ: ты̀ є҆сѝ хрⷭ҇то́съ, сн҃ъ бг҃а жива́го. Того̀ ра́ди и҆ мы̀, чтꙋ́ще тѧ̀, ꙗ҆́кѡ наде́ждꙋ спⷭ҇нїѧ неприкрове́нно и҆сповѣ́давша, взыва́емъ тѝ такова́ѧ:

Ра́дꙋйсѧ, сїна́ю но́вый, скрижа́ль спасе́нїѧ лю́демъ ꙗ҆́сно показа́вый и҆ свобо́дꙋ во хрⷭ҇тѐ возвѣсти́вый: ра́дꙋйсѧ, первоположе́нный ѿ а҆рхїте́ктона нбⷭ҇наго ка́меню вѣ́ры и҆ и҆сповѣ́данїѧ, на не́мже цр҃ковь хрⷭ҇то́ва неѡбори́мо ѡ҆снова́сѧ.

Ра́дꙋйсѧ, первопоста́вленный врата́рю вхо́да ра́йскаго, є҆мꙋ́же пе́рвѣе ѡ҆бѣща́сѧ гдⷭ҇ь да́ти ключѝ црⷭ҇твїѧ нбⷭ҇наго: ра́дꙋйсѧ сꙋдїѐ првⷣный, и҆мы́й сꙋди́ти съ про́чими а҆пⷭ҇лы ѻ҆бѣмана́десѧте колѣ́нома і҆и҃левома.

Ра́дꙋйсѧ, ꙗ҆́кѡ ѻ҆чеса̀ и҆ ᲂу҆шеса̀ твоѧ̀ бл҃же́ннаѧ хрⷭ҇та̀ сп҃са на́шего, є҆го́же лицезрѣ́ти прⷪ҇ро́цы пла́меннѣ жела́хꙋ во пло́ти сꙋ́ща на землѝ ви́дѣша и҆ слы́шаша: Ра́дꙋйтесѧ, пе́тре и҆ па́ѵле, и҆мꙋ́щїи но́ги бл҃говѣствова́нїѧ краснѣ́йшїѧ и҆ сердца̀ ѡ҆сщ҃е́ннаѧ, вы́ бо є҆ѵⷢ҇лїю послꙋжи́сте и҆ є҆ѵⷢ҇льски пожи́сте.

Ра́дꙋйтесѧ, ст҃і́и первоверхо́внїи а҆пⷭ҇ли пе́тре и҆ па́ѵле.

Конда́къ и҃

Стра́нное чꙋ́до и҆ неꙋдо́бь разꙋмѣва́емое ꙗ҆ви́лсѧ є҆сѝ пе́тре, мꙋ́дрствꙋющымъ земна́ѧ, ꙗ҆́кѡ незна̑тна мі́ра и҆ ᲂу҆ничиже́на и҆збра̀ тѧ̀ гдⷭ҇ь, и҆ посрами́лъ є҆сѝ мꙋ́дрыѧ, ѡ҆долѣ́лъ є҆сѝ ца́рства, приве́лъ є҆сѝ со́нмы ѡ҆мраче́нныхъ ко свѣ́тꙋ и҆́стины, и҆ доны́нѣ, ꙗ҆́коже сто́лпъ ѻ҆́гненный, ѡ҆зарѧ́еши всѧ̑ земнорѡ́дныѧ, ᲂу҆казꙋ́ѧ несомнѣ́нный пꙋ́ть во бл҃же́нное ѻ҆те́чество. Сего̀ ра́ди, бога́тствꙋ бл҃года́ти въ тебѐ дивѧ́щесѧ, пое́мъ бг҃ꙋ: А҆ллилꙋ́їа.

І҆́косъ и҃

Всѣ́мъ бы́лъ є҆сѝ всѧ̑, па́ѵле, любо́вїю всѣ́хъ ѡ҆б̾е́млѧ, сло́вомъ спⷭ҇нїѧ да́льнихъ и҆ бли́жнихъ достиза́ѧ, вѣ́рою всѧ̑ превозмога́ѧ: занѐ и҆ въ фїлі́ппѣхъ, ми́ръ бл҃говѣствꙋ́ѧ, а҆́ще и҆ па́лицами бїе́нъ бы́лъ є҆сѝ лю́тѣ и҆ въ темни́цꙋ во ѡ҆ко́вахъ вве́рженъ, но воспѣ́лъ є҆сѝ та́мѡ вкꙋ́пѣ съ си́лою пѣ́снь чꙋ́днꙋю хвалы̀ и҆ бл҃годаре́нїѧ бг҃ꙋ, и҆́же и҆ возгремѣ̀ рабѡ́мъ свои̑мъ трꙋ́сомъ ве́лїимъ, ꙗ҆́кѡ и҆ ѡ҆снѡва́нїѧ темни̑чнаѧ поколеба́шасѧ и҆ две́ри ѿверзо́шасѧ. Мы́ же, ви́дѧще тѧ̀, премꙋ́дре, тмꙋ̀ ᲂу҆зи́лища свѣ́томъ бг҃овѣ́дѣнїѧ ѡ҆зарѧ́юща и҆ свобо́дꙋ ѡ҆ хрⷭ҇тѣ̀ ᲂу҆́зникѡмъ подаю́ща, воспѣва́емъ тѝ сицева̑ѧ:

Ра́дꙋйсѧ, ᲂу҆́зниче хрⷭ҇то́въ, темни́цꙋ во хра́мъ претвори́вый и҆ ᲂу҆́зами твои́ми де́мѡнѡвъ цѣ̑пи лю́дємъ разрѣши́вый: ра́дꙋйсѧ, си́льне, не́мощи немощны́хъ понесы́й, не себѣ̀, но бли́жнимъ ᲂу҆гожда́ти и҆скі́й.

Ра́дꙋйсѧ, пречꙋ́дне, ᲂу҆́зами и҆ скорбьмѝ хвали́выйсѧ, ра́доватисѧ съ ра́дꙋющимисѧ и҆ пла́кати съ пла́чꙋщими наꙋчи́вый: Ра́дꙋйсѧ, ᲂу҆ме́рый грѣхꙋ̀, но прⷭ҇нѡ живы́й бг҃ови, тебѣ́ бо жи́знь хрⷭ҇то́съ и҆ сме́рть прїѡбрѣ́тенїе.

Ра́дꙋйсѧ, ѻ҆́бразе неꙋсы́пнагѡ дѣ́ланїѧ, за̑днѧѧ забыва́ѧй, въ прє́днѧѧ простира́ѧйсѧ и҆ всѣ́мъ помышле́нїемъ къ по́чести вы́шнѧгѡ зва́нїѧ текі́й: ра́дꙋйтесѧ, па́ѵле и҆ пе́тре, да́же до сме́рти мч҃нически гдⷭ҇ꙋ послꙋжи́вшїи и҆ се́ю, ꙗ҆́кѡ вѣнце́мъ, по́двигъ ва́шъ вѣнча́вшїи.

Ра́дꙋйтесѧ, ст҃і́и первоверхо́внїи а҆пⷭ҇ли пе́тре и҆ па́ѵле.

Конда́къ ѳ҃

Всѧ̑ ко хрⷭ҇тꙋ̀ приводѧ̀, возвѣсти́лъ є҆сѝ, па́ѵле, во а҆ѳи́нѣхъ мнѧ́щимсѧ мꙋ́дрымъ бы́ти премꙋ́дрость, свы́ше сходѧ́щꙋю, да, вѣ́дѧще сꙋ́єтнаѧ, ѿсе́лѣ ᲂу҆вѣ́дѧтъ бг҃а, неви́димаго и҆́мъ, и҆ ѡ҆сѧ́жꙋтъ є҆го̀, ѡ҆ не́мъ бо живе́мъ и҆ дви́жемсѧ и҆ є҆смы̀. Тѣ́мже и҆ мы̀, бл҃года́тїю неизрече́нною ра́зꙋмъ и҆́стины воспрїе́мше и҆ се́рдцемъ нело́жнѡ, ꙗ҆́кѡ бл҃гъ гдⷭ҇ь, пости́гше, пое́мъ є҆мꙋ̀ вѣ́рою тве́рдою, ꙗ҆́коже пе́рстомъ ѿ ѳѡмы̀, ѡ҆сѧзꙋ́емꙋ: А҆ллилꙋ́їа.

І҆́косъ ѳ҃

Вѣті́йствовати не можа́ше ꙗ҆зы́къ человѣ́чь, є҆гда̀ гдⷭ҇ь си́лъ нѡ́зѣ рабѡ́мъ свои̑мъ ᲂу҆мыва́ше и҆ ле́нтїемъ ѡ҆тира́ше. Ты́ же, пе́тре, стра́хомъ побѣжда́емь, а҆́ще возгласи́лъ є҆сѝ: не ᲂу҆мы́еши нѡгꙋ̀ моє́ю во вѣ́ки. но а҆́бїе ве́сь въ послꙋша́нїе преложи́лсѧ є҆сѝ, є҆гда̀ ᲂу҆слы́шалъ є҆сѝ гл҃го́лъ, рѣче́нный ѿ гдⷭ҇а: а҆́ще не ᲂу҆мы́ю тебє̀, не и҆́маши ча́сти со мно́ю. и҆ та́кѡ всѣ́мъ се́рдцемъ возопи́лъ є҆сѝ: гдⷭ҇и, не нѡ́зѣ моѝ то́кмо. Но и҆ рꙋ́цѣ, и҆ главꙋ̀. Мы́ же, вѣ́дѧще тѧ̀ въ си́хъ, ꙗ҆́коже зла́то во ѻ҆гнѝ и҆скꙋше́нїѧ, ѡ҆чища́ема и҆ познава́юще ѿ смире́нїѧ къ послꙋша́нїю восхожде́нїе твоѐ, та́инствꙋ бж҃їѧ промышле́нїѧ покланѧ́ющесѧ, воспѣва́емъ тѝ се́рдцемъ смире́ннымъ такова́ѧ:

Ра́дꙋйсѧ, пе́тре, ѻ҆чеса̀ ѻ҆́рлѧ, и҆́миже зрѣ́лъ є҆сѝ со́лнце пра́вды хрⷭ҇та̀ бг҃а, і҆ꙋ́дѣ нѡ́зѣ ᲂу҆мы́вшаго и҆ ѿ него̀ лобза́нїемъ лꙋка́вымъ пре́даннаго: ра́дꙋйсѧ, навѣ́ки ᲂу҆невѣ́стивыйсѧ хрⷭ҇тꙋ̀, ты́ бо, а҆́гнцꙋ непоро́чнꙋ ꙗ҆́коже а҆́гнецъ, послѣ́дꙋѧ, до закла́нїѧ твоегѡ̀ вѣ́рность соблю́лъ є҆сѝ.

Ра́дꙋйсѧ, ᲂу҆глю̀ неꙋгаси́мый, ѿ же́ртвенника нбⷭ҇нагѡ ѻ҆гне́мъ любвѐ бжⷭ҇твенныѧ непреста́ннѡ ѡ҆б̾ѧ́тый: ра́дꙋйсѧ, свѣти́льниче горѧ́й и҆ свѣтѧ́й, рѡ́ды родѡ́въ свѣ́томъ пра́вды ѡ҆зарѧ́ѧй.

Ра́дꙋйсѧ, гро́зде многоѻби́льный вїногра́да хрⷭ҇то́ва, на ра́дость мі́ра многопеча́льнагѡ возраще́нный: ра́дꙋйтесѧ, пе́тре и҆ па́ѵле, хрⷭ҇та̀ бг҃а въ себѣ̀ вѣ́рно воѻбрази́вшїи.

Ра́дꙋйтесѧ, ст҃і́и первоверхо́внїи а҆пⷭ҇ли пе́тре и҆ па́ѵле.

Конда́къ і҃

Сп҃се́нїѧ во хрⷭ҇тѐ неизслѣ́димꙋю пꙋчи́нꙋ и҆ покаѧ́нїѧ мно́гꙋю си́лꙋ ꙗ҆ви́лъ є҆сѝ въ себѐ, пе́тре, є҆гда̀ трикра́ты по предрече́нномꙋ ѿве́рглсѧ є҆сѝ гдⷭ҇а: не вѣ́мъ чл҃вѣ́ка сего̀! є҆гда̀ клѧ́лсѧ и҆ роти́лсѧ є҆сѝ во дворѣ̀ а҆рхїере́а, но а҆́бїе, воспомѧнꙋ́въ гл҃го́лъ і҆и҃совъ, внѣ̀ те́клъ є҆сѝ, пла́касѧ го́рько. Мы́ же, ᲂу҆ми́льнѣ взира́юще на пресвѣ́тлый се́й ѻ҆́бразъ сокрꙋше́нїѧ, въ наꙋче́нїе и҆ ѡ҆бличе́нїе жестоковы́йныхъ серде́цъ на́шихъ дарова́нный, пое́мъ гдⷭ҇ꙋ, па́ки ди́вно возвели́чившемꙋ тѧ̀: А҆ллилꙋ́їа.

І҆́косъ і҃

Стѣна̀ и҆ ѻ҆рꙋ́жїе непобѣди́мое бы́лъ є҆сѝ, па́вле, проти́вꙋ мїродержи́телей тмы̀ вѣ́ка сегѡ̀, ꙗ҆́кѡ и҆ ца́рство и҆́хъ въ корі́нѳѣ, є҆фе́сѣ и҆ и҆нѣ́хъ гра́дѣхъ вселе́нныѧ сокрꙋши́лъ є҆сѝ, тмꙋ̀ многобо́жїѧ разгонѧ́ѧ и҆ ра́зꙋмъ и҆́стины ᲂу҆твержда́ѧ. ты́ бо нело́жно показа́лсѧ є҆сѝ бж҃їй слꙋга̀ въ терпѣ́нїи мно́зѣ, въ ско́рбехъ, бѣда́хъ, въ тѣснота́хъ, въ ра́нахъ, темни́цахъ, въ нестрое́нїихъ, трꙋдѣ́хъ, во бдѣ́нїихъ, въ поще́нїихъ, ꙗ҆́кѡ ᲂу҆́мъ на́шъ недоꙋмѣ́етъ и҆зрещѝ бога́тство добро́ты твоеѧ̀, денноно́щныѧ по́двиги со слеза́ми мно́гими. Того̀ ра́ди, зрѧ́ще мо́ре любвѐ твоеѧ̀, дерза́юще мо́лимъ: ᲂу҆слы́ши на́съ, ᲂу҆бо́гихъ, грѣ́шными ᲂу҆сты̑ гл҃го́лющихъ сицева̑ѧ:

Ра́дꙋйсѧ, ᲂу҆ме́рый грѣхꙋ̀ бл҃говѣ́стниче непобѣди́мый, ꙗ҆́кѡ въ себѣ̀ пе́рвѣе вѣ́тхаго человѣ́ка побѣди́въ, хрⷭ҇тꙋ̀ сораспѧ́лсѧ є҆сѝ: ра́дꙋйсѧ, ᲂу҆ч҃телю многопло́дный и҆ волкѡ́въ хи́щныхъ ѻ҆бличи́телю, ꙗ҆́кѡ тобо́ю ѻ҆́бразъ вѣ́рнымъ показа́лъ є҆сѝ, при́снѡ бо́дрствꙋѧ и҆ наꙋча́ѧ всѧ̑ сꙋгꙋ́бо: сло́вомъ и҆ житїе́мъ по сло́вꙋ.

Ра́дꙋйсѧ, всѣ́хъ ѡ҆богати́телю, ꙗ҆́кѡ, пре́жде са́мъ ѡ҆бнища́въ и҆ ничто́же и҆мы́й, всѧ̑ содержа́лъ є҆сѝ: ра́дꙋйсѧ, ѡ҆ хрⷭ҇тїа́нѣхъ пла́менный ревни́телю, ѡ҆брꙋчи́вый ѧ҆̀ хрⷭ҇тꙋ̀, ꙗ҆́кѡ дѣ́вꙋ чⷭ҇тꙋ, непоро́чнꙋю невѣ́стꙋ.

Ра́дꙋйсѧ, ᲂу҆тро́бо многоболѣ́зненнаѧ бы́вый ѡ҆ ча́дѣхъ твои́хъ въ мꙋ́кахъ рожде́нїѧ, до́ндеже воѡбрази́тсѧ въ ни́хъ хрⷭ҇то́съ: ра́дꙋйтесѧ, па́ѵле и҆ пе́тре, въ дс҃ѣ є҆ди́нице согла́снаѧ во є҆ди́номъ гра́де вѣ́рность хрⷭ҇тꙋ̀ кро́вїю запечатлѣ́вшїи

Ра́дꙋйтесѧ, ст҃і́и первоверхо́внїи а҆пⷭ҇ли пе́тре и҆ па́ѵле.

Конда́къ а҃і

Пѣ́ти и҆ ᲂу҆блажа́ти ᲂу҆́зы и҆ страда́нїѧ твоѧ̀, па́ѵле многострада́льне, досто́йно є҆́сть, ꙗ҆́кѡ не то́кмо въ терпѣ́нїи мно́зѣ, но и҆ съ ра́достїю предрече́нныѧ тѝ ѿ а҆га́ва прⷪ҇ро́ка ᲂу҆́зы воспрїѧ́лъ є҆сѝ, и҆ цр҃кви кесарі́йстѣй свидѣ́тельствовалъ є҆сѝ си́це: не то́чїю свѧ́занъ бы́ти хощꙋ̀, но и҆ ᲂу҆мре́ти гото́въ є҆́смь за и҆́мѧ гдⷭ҇а і҆и҃са. Є҆мꙋ́же и҆ мы̀, ди́вномꙋ во ст҃ы́хъ свои́хъ, пое́мъ пѣ́снь: А҆ллилꙋ́їа.

І҆́косъ а҃і

Свѣ́томъ ра́дости неизрече́нныѧ и҆ бжⷭ҇твенныѧ любвѐ ѡ҆сїѧ́нъ бы́лъ є҆сѝ, пе́тре, є҆гда̀ гдⷭ҇ь по воскрⷭ҇нїи пе́рвѣе про́чихъ а҆пⷭ҇лъ ꙗ҆ви́сѧ тебѣ̀, скорбе́вшемꙋ по си́хъ же па́ки ꙗ҆́вльсѧ, влⷣка жи́зни вопросѝ тѧ̀ трикра́ты: сі́мѡне і҆ѡ́нинъ, лю́биши ли мѧ̀; Ты́ же, ѻ҆гне́мъ бжⷭ҇твенныѧ любвѐ ѡ҆палѧ́емь, ѿвѣща́лъ є҆сѝ те́плѣ: гдⷭ҇и, ты̀ вѣ́си, ꙗ҆́кѡ люблю́ тѧ. Того̀ ра́ди и҆ мы̀, ѡ҆бнища́вшїи дꙋ́хомъ, помѧнꙋ́вше преизоби́льныѧ тѡ́ки сле́зъ и҆ любвѐ твоеѧ̀, и҆́хже ра́ди воззва̀ тѧ̀ гдⷭ҇ь на пре́жнюю сте́пень а҆пⷭ҇льства, бл҃гоговѣ́йнѡ взыва́емъ тѝ сицева̑ѧ:

Ра́дꙋйсѧ, ᲂу҆чи́телю покаѧ́нїѧ, слеза́ми го́рькими высотꙋ̀ смире́нїѧ стѧжа́вый и҆ воскрⷭ҇шимъ ѿ гро́ба къ ра́дости неизглаго́ланнѣй на вѣ́ки прїѡбще́нный: Ра́дꙋйсѧ, премꙋ́дрости глꙋбино̀, смиренномꙋ́дрїѧ высото̀, пла́меню любвѐ, ѻ҆́бразъ житїѧ̀ всѣ́мъ вѣ́рнымъ себѐ ꙗ҆ви́вый.

Ра́дꙋйсѧ, дрꙋ́же гдⷭ҇а і҆и҃са, и҆́го бл҃говѣ́стїѧ ре́вностнѡ понесы́й, над̾ наслѣ́дїемъ бж҃їимъ госпо́дствовати не восхотѣ́вый, но послꙋша́нїю властє́мъ наꙋчи́вый: ра́дꙋйсѧ, а҆пⷭ҇ле хрⷭ҇то́въ, мꙋ́дрость ѕмїи́нꙋ и҆ чистотꙋ̀ голꙋби́нꙋ въ себѣ̀ сочета́вый и҆ ѻ҆́бразомъ сме́рти твоеѧ̀ на крⷭ҇тѣ̀ кра́йнее смиренномꙋ́дрїе показа́вый.

Ра́дꙋйсѧ, ра́бе гдⷭ҇а вѣ́рный, ᲂу҆мно́живый да́нный тебѣ̀ тала́нтъ и҆ въ ра́дость гдⷭ҇а вше́дый: ра́дꙋйтесѧ, пе́тре и҆ па́ѵле, сердца̀ не тѣ̑снаѧ, ве́сь мі́ръ любо́вїю вмѣсти́вшаѧ и҆ концы̀ вселе́нныѧ просвѣти́вшаѧ.

Ра́дꙋйтесѧ, ст҃і́и первоверхо́внїи а҆пⷭ҇ли пе́тре и҆ па́ѵлѣ.

Конда́къ в҃і

Бл҃года́ть дх҃а ᲂу҆тѣ́шителѧ, и҆злїѧ́вшаѧсѧ на главы̑ вѣ̑рныхъ во ѻ҆́бразе ꙗ҆зы́кѡвъ ѻ҆́гненныхъ, ско́рѡ и҆злїѧ́сѧ и҆з̾ ᲂу҆́стъ твои́хъ, пе́тре, глаго́ломъ ѻ҆́гненнымъ, во є҆́же бл҃говѣсти́ти съ си́лою мно́гою хрⷭ҇та̀ ра́спѧта не то́чїю поги́бшымъ ѻ҆вца́мъ до́мꙋ і҆и҃лева, но и҆ ꙗ҆зы́честѣй неплодѧ́щей це́ркви, да плодоно́ситъ и҆ сїѧ̀ бг҃ови нетлѣ́нный крі́нъ чистоты̀ и҆ покаѧ́нїѧ. И҆спросѝ и҆ на́мъ, а҆пⷭ҇ле достобл҃же́нне, млⷭ҇ть гдⷭ҇а, творѧ́щаго тобо́ю вели̑каѧ и҆ чꙋ̑днаѧ, рꙋко́ю твое́ю мє́ртвыѧ воскреша́юща и҆ сме́ртїю твое́ю на крⷭ҇тѣ̀ ме́ртвеннꙋю любо́вь на́шꙋ воспламенѧ́юща, да непреста́ннѡ пое́мъ є҆мꙋ̀: А҆ллилꙋ́їа.

І҆́косъ в҃і

Пою́ще пресвѣ́тлꙋю па́мѧть твою̀, па́ѵле, досто́йно ᲂу҆бл҃жа́емъ неизрече́нныѧ пѡ́двиги, болѣ̑зни и҆ трꙋды̑, ꙗ҆́же во бдѣ́нїихъ, во а҆́лчбѣ и҆ жа́ждѣ, въ поще́нїихъ, въ зимѣ̀ и҆ наготѣ̀ поне́слъ є҆сѝ. Кто́ бо и҆зочте́тъ ра̑ны, скѡ́рби и҆ бѣды̑ твоѧ̑ во гра́дѣхъ, въ пꙋсты́ни, въ мо́ри, бѣды̑ ѿ разбѡ́йникъ, бѣды̑ ѿ срѡ́дникъ, бѣды̑ ѿ ꙗ҆зы̑къ и҆ лжебра́тїи; кто̀ подо́бенъ тебѐ; па́че всѣ́хъ а҆пⷭ҇лъ потрꙋди́лсѧ є҆сѝ. Тѣ́мже мо́лимъ: не возгнꙋша́йсѧ на́съ, грѣ́шныхъ, молѧ́щихсѧ тебѣ̀, но ꙗ҆́коже всѣ́мъ бы́лъ є҆сѝ всѧ̑, и҆ ны́нѣ ᲂу҆слы́ши немощны́мъ гла́сомъ приноси́маѧ тѝ сицева̑ѧ:

Ра́дꙋйсѧ, ᲂу҆́зниче хрⷭ҇то́въ, и҆з̾ темни́цы свѣ́тъ распространи́вый, сло́вомъ и҆ посла́нїемъ во ᲂу҆́захъ мно́го потрꙋди́выйсѧ, занѐ вои́стиннꙋ сло́во бж҃їе не вѧ́жетсѧ: ра́дꙋйсѧ, неизслѣ́димаѧ пꙋчи́но любвѐ, по бра́тїи твое́й ѿлꙋче́нъ бы́ти ѿ хрⷭ҇та̀ преи́скреннѣ восхотѣ́вый.

Ра́дꙋйсѧ, подви́жниче преди́вный, по́двигѡмъ до́брымъ подвиза́выйсѧ, тече́нїе соверши́вый и҆ кро́вїю твое́ю цр҃ковь ᲂу҆краси́вый: ра́дꙋйсѧ, и҆сточа́ѧй мо́ре чꙋде́съ, ꙗ҆́кѡ главотѧ́жи и҆ ᲂу҆брꙋ́сцы твоѝ недꙋ́ги и҆сцелѧ́хꙋ и҆ де́моны прогонѧ́хꙋ.

Ра́дꙋйсѧ, любвѐ бж҃їѧ неразлꙋ́чный прича́стниче, го́рнѧѧ мꙋ́дрствꙋѧй, а҆ не земна́ѧ, занѐ ѿ пло́ти разрѣши́тисѧ и҆ со хрⷭ҇то́мъ бы́ти возжела́лъ є҆сѝ: ра́дꙋйтесѧ, па́ѵле и҆ пе́тре, вѣ́ры хрⷭ҇тїа́нскїѧ насади́телїе, бл҃гоче́стїѧ вода́ми напои́телїе и҆ ко приста́нищꙋ вѣ́чномꙋ вѣ́рнїи води́телїе.

Ра́дꙋйтесѧ, ст҃і́и первоверхо́внїи а҆пⷭ҇ли пе́тре и҆ па́ѵле.

Конда́къ г҃і

Ѽ всехва́льнїи бл҃говѣ́стницы пе́тре и҆ па́ѵле! Внемли́те воздыха́нїємъ сердє́цъ на́шихъ, молѧ́щїесѧ за ны̀, мно́гѡ бо мо́жетъ мл҃тва првⷣныхъ пред̾ бг҃омъ: потщи́тесѧ и҆ ны́нѣ воспомина́ти на́мъ ѡ҆ нбⷭ҇нѣмъ зва́нїи и҆ хрⷭ҇тїа́нстѣй кончи́нѣ жи́зни на́шеѧ, привлецы́те на́съ ко сла́дости є҆ѵⷢ҇льскїѧ и҆́стины, свѧжи́те ᲂу҆́зами любвѐ хрⷭ҇то́вы, да мы̀ всѝ, ѿве́ргшесѧ нече́стїѧ и҆ мїрски́хъ по́хотей, вни́демъ въ ра́дость гдⷭ҇а на́шего, пою́ще є҆мꙋ̀ со а҆́гг҃лы и҆ съ ли́ки ст҃ы́хъ: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃ли бл҃говѣ̑стницы ꙗ҆ви́стесѧ на землѝ, а҆пⷭ҇толи пе́тре и҆ па́ѵле бл҃же́ннїи, занѐ ѿ самаго̀ вино́вника спⷭ҇нїѧ на́шегѡ на дѣ́ланїе ва́ше призва́ни бы́вше, широтꙋ̀ всеѧ̀ землѝ ѡ҆бтеко́сте, і҆ꙋде́ѡмъ и҆ є҆́ллинѡмъ хрⷭ҇та̀ распѧ́таго, бж҃їю си́лꙋ и҆ бж҃їю премꙋ́дрость проповѣ́дающе. Тѣ́мже и҆ мы̀, свѣ́томъ ᲂу҆че́нїй ва́шихъ ѡ҆зарѧ́еми, се́рдцемъ и҆ ᲂу҆сты̑ взыва́емъ къ ва́мъ сицева̑ѧ:

Ра́дꙋйтесѧ, ѕвѣ́зды свѣтоза́рныѧ, ѿ восто́ка возсїѧ́вшїѧ и҆ всѣ́мъ лю́демъ пꙋ́ть ко хрⷭ҇тꙋ̀ показа́вшыѧ: ра́дꙋйтесѧ, цр҃кве хрⷭ҇то́вы ᲂу҆твержде́нїе и҆ столпѝ непоколеби́мїи.

Ра́дꙋйтесѧ, вла́сть вѧза́ти и҆ рѣши́ти грѣхѝ на́шѧ ѿ хрⷭ҇та̀ прїи́мшїи: ра́дꙋйтесѧ, во ст҃ы́хъ писа́нїихъ ва́шихъ къ вѣ́рѣ и҆ ᲂу҆пова́нїю на бг҃а всѧ̑ ны̀ призыва́ющїи.

Ра́дꙋйтесѧ, въ житїѝ ва́шемъ ѡ҆́бразы ѡ҆браще́нїѧ согрѣша́ющымъ ꙗ҆ви́вшїи: ра́дꙋйтесѧ, высотꙋ̀ любвѐ и҆́стинныѧ сло́вомъ и҆ дѣ́ломъ на́мъ показа́вшїи.

Ра́дꙋйтесѧ, ст҃і́и первоверхо́внїи а҆пⷭ҇ли пе́тре и҆ па́ѵле.

Конда́къ а҃

И҆збра́ннїи проповѣ̑дницы а҆́гнца непоро́чнаго, за ны̀ закла́ннаго, хрⷭ҇та̀ бг҃а, пресла́внїи а҆пⷭ҇ли пе́тре и҆ па́ѵле! Ꙗ҆́кѡ бг҃овѣ́дѣнїемъ концы̀ мі́ра ѡ҆зари́вшїи и҆ ѻ҆би́льнѣ стрꙋѧ́ми бл҃года́ти напои́вшїи, и҆ ны́нѣ съ любо́вїю при́зрите на чтꙋ́щыѧ ᲂу҆се́рднѡ па́мѧть ва́шꙋ. И҆спо́лните на́съ дꙋ́ха премꙋ́дрости, сердца̀ на́шѧ вѣ́рою ᲂу҆тверди́те, да непреста́ннѡ бл҃года́рствєннаѧ ва́мъ пое́мъ, со ᲂу҆миле́нїемъ зовꙋ́ще:

Ра́дꙋйтесѧ, ст҃і́и первоверхо́внїи а҆пⷭ҇ли пе́тре и҆ па́ѵле.

Моли́твы

Ѽ пресла́внїи а҆пⷭ҇ли пе́тре и҆ па́ѵле, дꙋ́ши за хрⷭ҇та̀ преда́вшїи и҆ кро́вїю ва́шею па́жить є҆гѡ̀ ᲂу҆добри́вшїи: Оу҆слы́шите ча́дъ ва́шихъ мл҃твы и҆ воздыха́нїѧ, се́рдцемъ сокрꙋше́ннымъ ны́нѣ приноси́мыѧ. Се́ бо беззако́ньми ѡ҆мрачи́хомсѧ и҆ тогѡ̀ ра́ди бѣда́ми, ꙗ҆́коже тꙋ́чами, ѡ҆бложи́хомсѧ, є҆ле́а же до́брагѡ житїѧ̀ ѡ҆бнища́хомъ ѕѣлѡ̀. Ѽ си́льнїи! Понеси́те не́мѡщи на́шѧ, не ѿлꙋча́йтесѧ дх҃омъ ѿ на́съ, да не разлꙋчи́мсѧ вконе́цъ ѿ любвѐ бж҃їѧ, но крѣ́пкимъ застꙋпле́нїемъ ва́шимъ на́съ защити́те, да поми́лꙋетъ гдⷭ҇ь всѣ́хъ на́съ, мл҃твъ ва́шихъ ра́ди, да и҆стреби́тъ же рꙋкописа́нїе безмѣ́рныхъ грѣхѡ́въ на́шихъ и҆ да сподо́битъ со всѣ́ми ст҃ы́ми бл҃же́ннаго црⷭ҇твїѧ и҆ бра́ка а҆́гнца своегѡ̀, є҆мꙋ́же че́сть и҆ сла́ва, и҆ бл҃годаре́нїе и҆ поклоне́нїе, во вѣ́ки вѣкѡ́въ. А҆ми́нь.