Песнь 1
Ирмос
Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.
Тропарь
Ве́сь ты́ Творцу́ возложи́ себе́, вседуше́вное жела́ние излия́в Тому́, сего́ ра́ди духо́вную благода́ть восприя́л еси́, све́том благода́ти озаря́яся, блаже́нне Пе́тре пресла́вне, ве́рою твою́ па́мять соверша́ющия просвети́ и от тьмы́ грехо́вныя моли́твами твои́ми изба́ви.
Тропарь
Измла́да Христа́ возлюби́л еси́, блаже́нне Пе́тре пресла́вне, всече́стне чудотво́рче, и Пречи́стую Его́ Богома́терь. Те́м просвеща́еши чудесы́, я́ко мо́лния, всю́ вселе́нную.
Тропарь
Ны́не, преблаже́нне Пе́тре, душа́ твоя́ почива́ет на Небесе́х, со Христо́м во Ца́рствии Небе́снем, зде́ же честны́я твоя́ мо́щи подаю́т исцеле́ния приходя́щим с ве́рою.
Богородичен
Ра́дуйся, Пресвята́я Богоро́дице, А́нгельское удивле́ние, проро́ческое пропове́дание, апо́стольская немо́лчная уста́, моли́ся Сы́ну Твоему́ и Бо́гу на́шему, да сохрани́т ме́сто сие́ и все́х на́с блаже́ннаго моле́нием.
Песнь 3
Ирмос
Твоя́ песносло́вцы, Богоро́дице, Живы́й и Незави́стный Исто́чниче, ли́к себе́ совоку́пльшия, духо́вно утверди́, в Боже́ственней Твое́й сла́ве венце́в сла́вы сподо́би.
Тропарь
Я́ко светоза́рное сия́ние яви́ся ты́ Триипоста́снаго Божества́, Пе́тре блаже́нне, омраче́нных ду́ши просвеща́еши моли́твами твои́ми.
Тропарь
Из мла́да во́зраста восприя́л еси́ во Орде́ Христо́во повеле́ние, и ве́ру, и утвержде́ние, прише́л еси́ во гра́д Росто́в и сия́еши, я́ко сия́ние Триипоста́снаго Божества́, преблаже́нне.
Тропарь
Креста́ Госпо́дня си́лою укрепля́емь, блаже́нне Пе́тре, преще́нием ве́рныя твоея́ моли́твы, стремле́ния бесо́вская на земли́ победи́ Бо́жиею си́лою.
Богородичен
Ра́дуйся, Влады́чице Де́во, це́рквам еси́ красота́, правосла́вным еси́ похвала́, непреста́нно моли́ся Сы́ну Своему́ и Бо́гу сохрани́ти гра́д се́й и лю́ди, моли́твами всеблаже́ннаго Петра́.
Песнь 4
Ирмос
Седя́й в сла́ве на Престо́ле Божества́ во о́блаце ле́гце, прии́де Иису́с Пребоже́ственный Нетле́нною Дла́нию и спасе́ зову́щия: сла́ва, Христе́, си́ле Твое́й.
Тропарь
И́же на земли́ степе́нь ца́рственный име́л еси́, всеблаже́нне Пе́тре, свои́ми моли́твами ми́рное Ца́рство восприя́л еси́ и ны́не на Небесе́х со Христо́м ца́рствуеши.
Тропарь
Исцеле́ния содева́ет, блаже́нне, Боже́ственный гро́б тво́й, Пе́тре, отгоня́еши бо неду́ги и ду́хи лука́выя от челове́к и укрепля́еши мудрова́ния и́х, е́же восхваля́ти труды́ твоя́, всече́стне.
Тропарь
Со враго́м дре́вле бо́ршися воздержа́нием, ны́не кре́пкую получи́л еси́ побе́ду, блаже́нне Пе́тре, пресла́вне чудотво́рче, му́ченически претерпе́в труды́ и низложи́в бесо́вския ополче́ния.
Богородичен
Христа́ на́м родила́ еси́, Пречи́стая Богоро́дице Влады́чице, Богора́дованная Де́во, спаси́ гра́д и лю́ди, к Тебе́ прибега́ющия, Богоро́дице Пренепоро́чная.
Песнь 5
Ирмос
Ужасо́шася вся́ческая о Боже́ственней сла́ве Твое́й: Ты́ бо, Неискусобра́чная Де́во, име́ла еси́ во утро́бе над все́ми Бо́га и родила́ еси́ Безле́тнаго Сы́на, все́м воспева́ющим Тя́ ми́р подава́ющая.
Тропарь
Зако́нно моли́твами и посто́м всегда́ подвиза́лся еси́, блаже́нне Пе́тре, безме́рно покори́л еси́ плотски́й ра́зум, смири́в кре́постию Боже́ственнаго Ду́ха.
Тропарь
От ю́ности возжела́л еси́ о́браза мона́шескаго и от Христа́ восприя́л еси́ вене́ц златы́й и ри́зу нетле́нную, ны́не, всеблаже́нне Пе́тре, со А́нгелы ра́дуется ду́х тво́й.
Тропарь
Гро́б честна́го телесе́ показа́ся ве́рным лю́дем ду́ш и теле́с на исцеле́ние, и отгна́ние страсте́й от твои́х моще́й вси́ почерпа́ем.
Богородичен
Всесве́тлым укра́шена еси́ све́том, Богора́дованная Ма́ти: Ты́ бо породи́ все́х честне́йша Христа́ Бо́га на́шего, Его́же моли́, да изба́вит ны́ от все́х напа́стей.
Песнь 6
Ирмос
Боже́ственное сие́ и всечестно́е соверша́юще пра́зднество, Богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.
Тропарь
Удиви́ся чудесе́м твои́м ве́сь ми́р, преблаже́нне Пе́тре, восприя́л бо еси́ от Христа́ вене́ц Небе́сный, его́же сподо́би и на́с причасти́тися твои́ми моли́твами, всече́стне.
Тропарь
Лу́к си́льных сокруши́л еси́, бра́нь вся́ку неприя́зненну потреби́л еси́, всеблаже́нне Пе́тре, веща́ние пусти́л еси́ во всю́ вселе́нную.
Тропарь
Всеблаже́нне Пе́тре, уго́дниче Бо́жий, на Небесе́х предстоя́ Престо́лу Бо́жию, мо́лишися о на́с, зде́ же честны́я мо́щи боля́щих исцеля́ют и от гре́х изыма́ют.
Богородичен
Изсуши́ла еси́ сады́ безбо́жия, Пренепоро́чная Де́во, Свои́м Прозябе́нием, прозя́бшую во мне́ зло́бу искорени́, Богоневе́сто.
Песнь 7
Ирмос
Не послужи́ша тва́ри Богому́дрии па́че Созда́вшаго, но, о́гненное преще́ние му́жески попра́вше, ра́довахуся, пою́ще: Препе́тый отце́в Госпо́дь и Бо́г, благослове́н еси́.
Тропарь
Блаже́нно твое́ житие́ и кончи́на, всече́стне, безсме́ртна, блаже́нне Пе́тре, сего́ ра́ди тя́ Христо́с свы́ше украси́ венце́м, и просвеща́еши ве́сь ми́р чудесы́, преподо́бне.
Тропарь
Яви́лся еси́ ны́не гра́ду Росто́ву, Пе́тре Богоблаже́нне, сто́лп непоколеби́мый, и стена́ неруши́мая, и вели́кое прибе́жище, от Тебе́ прие́млюще исцеле́ний благода́ть, пое́м: Бо́же, благослове́н еси́.
Тропарь
Хотя́ от мирски́х сла́достей отлучи́тися, стра́нен челове́ком яви́лся еси́: пло́ть бо нося́, бу́дущая и нетле́нная стяжа́в, святы́й, соверши́в тече́ние Богоно́сных оте́ц, я́влься о́бщник Небе́сному Ца́рствию.
Богородичен
Без се́мени зачала́ еси́ Творца́ все́х, Христа́ Бо́га, и неизрече́нно родила́ еси́, Его́же моли́, дерзнове́ние иму́щи к Нему́, да и на́с спасе́т, вопию́щих: Бо́же, благослове́н еси́.
Песнь 8
Ирмос
О́троки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.
Тропарь
Лику́ют на Небесе́х чи́нове А́нгельстии, всеблаже́нне Пе́тре, ве́рных же собо́ри, на земли́ твою́ па́мять похваля́юще, пою́т: Го́спода по́йте, дела́, и превозноси́те Его́ во ве́ки.
Тропарь
Чудесы́, свя́те, твои́ми душе́вныя боле́зни исцели́, твои́ми моли́твами, Пе́тре пресла́вне, прося́щим отпуще́ние безчи́сленных зо́л испроси́, со Безпло́тными си́лами Христу́ предстоя́, с ни́ми же пое́м непреста́нно: Го́спода воспева́йте, дела́, и превозноси́те Его́ во ве́ки.
Богородичен
Из пречи́стаго чре́ва, Богома́ти, Небе́снаго дождя́ ка́пля на́м ука́ну, на отмове́ние скве́рнам, на здра́вие телеси́, на прогна́ние лука́ваго, те́мже Тя́ блажи́м, Чи́стая, во ве́ки.
Песнь 9
Ирмос
Вся́к земноро́дный да взыгра́ется, Ду́хом просвеща́емь, да торжеству́ет же Безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.
Тропарь
Удиви́ся во все́м ми́ре, Пе́тре, твоя́ па́мять: чудесы́ сия́еши, я́ко со́лнце, злы́я боле́зни исцеля́я все́м, те́мже моя́ стра́сти разжени́, молю́ ти ся, прося́ мне́ отпуще́ния грехо́в, чудотво́рче Христо́в.
Тропарь
Да вхо́дят ны́не во святы́й хра́м се́й в па́мяти твое́й, блаже́нне Пе́тре, свяще́нницы и мона́си, бога́тии и убо́зии, припа́дающе, про́сят от Тебе́ почерпа́ти исцеле́ния, здра́вие и спасе́ние, те́м тя́ вси́ велича́ем.
Тропарь
Ны́не помоли́ся ко Го́споду, всечу́дне Пе́тре блаже́нне, о и́же твоя́ честны́я мо́щи почита́ющих, всегда́ приходя́щих с ве́рою: слепы́м – прозре́ние, хромы́м – хожде́ние, боля́щим все́м здра́вие да́руй, да тя́ вси́ велича́ем.
Богородичен
Арха́нгели и А́нгели, проро́цы и апо́столи и ве́сь ли́к преподо́бных оте́ц и священному́ченик, с преблаже́нным Петро́м ко Христу́ приле́жно с Пречи́стою Его́ Ма́терию за ве́сь ми́р моли́теся, да изба́вит на́с от все́х бе́д, Его́же вси́ велича́ем.