Православный календарь
Размер шрифта:

Ака́ѳістъ

А҆ка́ѳїстъ прест҃ѣ́й бцⷣѣ пред̾ і҆кѡ́ною ка́сперовскаѧ.

Касперовской иконы Божией Матери (1853-1855) 12 июля 2026

Конда́къ а҃

И҆збра́нной ѿ всѣ́хъ родѡ́въ и҆ ди́вной застꙋ́пницѣ всегѡ̀ ро́да хрⷭ҇тїа́нскагѡ прест҃ѣ́й бцⷣѣ дв҃ѣ мр҃і́и, похвалы̑ прино́симъ мы̀ недосто́йнїи, чꙋ́дномꙋ и҆ ст҃о́мꙋ є҆ѧ̀ ѻ҆́бразꙋ ка́сперовскомꙋ, принесе́нномꙋ въ зе́млю на́шꙋ и҆з̾ се́рбїи правосла́вной на ᲂу҆крѣпле́нїе вѣ́ры хрⷭ҇то́вой и҆ на́шегѡ сп҃се́нїѧ съ любо́вїю прибѣга́ющихъ къ не́й и҆ пою́щихъ:

Ра́дꙋйсѧ, бг҃ома́ти пречⷭ҇таѧ, гра́да ѻ҆де́ссы и҆ всеѧ̀ землѝ черномо́рскїѧ покро́ве и҆ застꙋпле́нїе.

І҆́косъ а҃

А҆́гг҃лѡвъ превы́сшаѧ ꙗ҆ви́ласѧ є҆сѝ. Цр҃и́це прест҃а́ѧ, ꙗ҆вле́нїемъ і҆кѡ́ны твоеѧ̀ ст҃ы́ѧ и҆спо́лнила є҆сѝ ра́достїю хрⷭ҇тїа́не правосла́вныѧ, къ тебѣ̀ съ вѣ́рою и҆ любо́вїю прибѣга́ющыѧ. Ты́ бо, дв҃а пречⷭ҇таѧ, ꙗ҆ви́ла є҆сѝ гра́дꙋ ѻ҆де́ссы и҆ всегѡ̀ черномо́рїѧ живꙋ́щїи, ди́вныѧ застꙋпле́нїѧ, ѡ҆зарѧ́юще стрꙋѧ́ми чꙋде́съ твои́хъ всѧ̑ вѣ́рныѧ, въ ра́дости вопїю́щаѧ тѝ:

Ра́дꙋйсѧ, вѣ́рнаѧ застꙋ́пница на́ша пред̾ ѻ҆́бразомъ твои́мъ молѧ́щихсѧ: ра́дꙋйсѧ, безчи́сленныѧ щедрѡ́ты твоѧ̀, ѿ гдⷭ҇а на́мъ и҆спра́шивающаѧ.

Ра́дꙋйсѧ, ꙗ҆́кѡ глаго́лъ бж҃їй въ тебѣ̀ николи́же и҆знемо́жетъ: ра́дꙋйсѧ, ꙗ҆́кѡ ѿ тебє̀ никто́же то́щь и҆лѝ неꙋслы́шанъ ѿхо́дитъ.

Ра́дꙋйсѧ, ꙗ҆́кѡ пред̾ ѻ҆́бразомъ твои́мъ мно́гїѧ полꙋча́ше бл҃гослове́нїѧ: ра́дꙋйсѧ, ꙗ҆́кѡ пред̾ ни́мъ же ѻ҆́ными и҆сполнѧ́шесѧ проси́маѧ жела́нїѧ.

Ра́дꙋйсѧ, бг҃ома́ти пречⷭ҇таѧ, гра́да ѻ҆де́ссы и҆ всеѧ̀ землѝ черномо́рскїѧ покро́ве и҆ застꙋпле́нїе.

Конда́къ в҃

Ви́дѧ тѧ̀, застꙋ́пницꙋ ᲂу҆се́рднꙋю ро́да хрⷭ҇тїа́нскагѡ на і҆кѡ́нѣ твое́й ка́сперовской и҆зѡбраже́ннꙋю и҆ мно́ги чꙋдесы̀ ѿ неѧ̀ соверша́емїи, всѧ́къ де́нь вѣ́рнїи въ моли́твахъ свои́хъ къ тебѣ̀ прибѣга́ютъ, просѧ̀ по́мощи и҆ застꙋпле́нїѧ. Ты́ же, мт҃и млⷭ҇рдаѧ бꙋ́ди всѣ́мъ скорбѧ́щимъ ра́достїю и҆ ѻ҆би́димыхъ застꙋ́пницею, во хвалꙋ̀ твою̀ бг҃ови пою́щымъ: А҆ллилꙋ́їа.

І҆́косъ в҃

Ра́зꙋмъ чл҃вѣ́ческїй не возмо́жетъ вмѣсти́ти ди́вныѧ чꙋдеса̀ твоѧ̀, дв҃а прест҃а́ѧ. Ка́кѡ не мо́жетъ гра́дъ ᲂу҆кры́тисѧ верхꙋ̀ горы̀ стоѧ̀, нижѐ вжига́ютъ свѣти́льника и҆ подставлѧ́ютъ є҆го̀ под̾ спꙋ́домъ, но на свѣ́щницѣ, и҆ свѣ́титъ всѣ́мъ, и҆̀же въ хра́минѣ сꙋ́ть, та́кѡ и҆ ѻ҆́бразъ тво́й ка́сперовскїй ст҃ы́й. Ꙗ҆́кѡ свѣти́ло бжⷭ҇твенное се́й бо ѻ҆́бразъ и҆злива́етъ блгⷣть прибѣга́ющихъ къ немꙋ̀ и҆ пою́щымъ тѝ, бцⷣѣ си́це:

Ра́дꙋйсѧ, предста́тельнице ты̀ на́ша крѣ́пкаѧ и҆ непостижи́маѧ: ра́дꙋйсѧ, и҆спо́лненное жела́нїе ты̀ на́ше всебл҃го́е.

Ра́дꙋйсѧ, ты̀ вѣ́ры бл҃гочести́выѧ недви́жимое сохране́нїе: ра́дꙋйсѧ, свѣти́льниче превы́сшїй на свѣ́щницѣ поста́вленный.

Ра́дꙋйсѧ, бл҃гочести́выѧ ѿ бѣ́дъ и҆ скорбе́й ты̀ чꙋ́днѡ сохранѧ́ющаѧ: ра́дꙋйсѧ, ѡ҆ѕло́бленные дꙋ́ши ты̀ ѿ поги́бели ѿвраща́ющаѧ.

Ра́дꙋйсѧ, бг҃ома́ти пречⷭ҇таѧ, гра́да ѻ҆де́ссы и҆ всеѧ̀ землѝ черномо́рскїѧ покро́ве и҆ застꙋпле́нїе.

Конда́къ г҃

Си́ла всевы́шнѧгѡ призва̀ мно́ги лю́ди правосла́вныѧ въ ве́сь ка́сперовкꙋ на ѡ҆брѣ́тенїе і҆кѡ́ны твоеѧ̀ пречꙋ́дныѧ. Ты́ бо, цр҃и́це нбⷭ҇наѧ, бл҃говоли́ла є҆сѝ просла́вити ѻ҆́бразъ се́й ст҃о́й, зна́менїѧ и҆ чꙋдесы̀ велича́ѧ. Лю́дїе же че́сть и҆ сла́вꙋ ѻ҆́бразꙋ твоемꙋ̀ возсыла́хꙋ, въ пѣ́нїи дꙋхо́вныхъ гдⷭ҇ꙋ взыва́хꙋ: А҆ллилꙋ́їа.

І҆́косъ г҃

И҆мѣ́ѧ ѿ ю҆́ности крѣ́пкꙋю вѣ́рꙋ правосла́внꙋю нѣ́кто се́рбъ бл҃горо́дный принесѐ и҆з̾ трансїльва́нїи родово́й ѻ҆́бразъ се́й прест҃ы́ѧ бцⷣы въ зе́млю на́шꙋ. И҆ ꙗ҆́кѡ ст҃ы́нѧ ве́лїѧ, сїѧ̀ і҆кѡ́на бы́сть бл҃гослове́нїемъ и҆з̾ ро́да въ ро́дъ въ ве́си ка́сперовкѣ. Пред̾ не́ю же молѧ́щїесѧ и҆злива́ше ско́рби своѧ̀ и҆ воздыха́нїѧ моли́твенныѧ, полꙋча́ше проси́маѧ, съ вѣ́рою поѧ̀ бцⷣѣ:

Ра́дꙋйсѧ, премилосе́рдаѧ на́ша ᲂу҆тѣ́шительница: ра́дꙋйсѧ, вѣрнѣ́йшее на́ше сп҃се́нїе.

Ра́дꙋйсѧ, семе́йствъ хрⷭ҇тїа́нскихъ въ бл҃гоче́стїи сохране́нїе: ра́дꙋйсѧ, въ вѣ́рѣ хрⷭ҇то́вой живꙋ́щїѧ ᲂу҆крѣплѧ́ющаѧ.

Ра́дꙋйсѧ, бл҃гослове́нїе домѡ́въ и҆ сꙋпрꙋ́жествъ бл҃гочести́выхъ: ра́дꙋйсѧ, бл҃гочести́выхъ хрⷭ҇тїа́нъ защи́та и҆ похвало̀.

Ра́дꙋйсѧ, бг҃ома́ти пречⷭ҇таѧ, гра́да ѻ҆де́ссы и҆ всеѧ̀ землѝ черномо́рскїѧ покро́ве и҆ застꙋпле́нїе.

Конда́къ д҃

Бꙋ́рѧ по́мыслѡвъ смꙋща́ше сꙋпрꙋ́ги ка́сперовы, ка́кѡ чꙋ́дное ѡ҆бновле́нїе ст҃ы́ѧ і҆кѡ́ны твоеѧ̀, влⷣчце, ꙗ҆ви́сѧ въ нощѝ глꙋбо́кїѧ и҆ без̾ свидѣ́телей є҆ѧ̀. Хотѧ́ше скры́ти чꙋ́до сїѐ, и҆ по взаи́мномꙋ согла́сїю сказа́ти непра́вдꙋ, сꙋпрꙋ́ги не можа́ше. Во́лѧ бо бжⷭ҇твеннаѧ сꙋдѝ и҆на́че, да не сокры́то бы́сть преве́лїе чꙋ́до сїѐ, но ꙗ҆вле́но всѣ́мъ вѣ́рнымъ, въ ра́дости пою́щымъ бг҃ꙋ: А҆ллилꙋ́їа.

І҆́косъ д҃

Слы́шаше ѡ҆ ди́вномъ чꙋдесѐ ѡ҆бновле́нїѧ і҆кѡ́ны твоеѧ̀, влⷣчце, мно́гїѧ вѣ́рныѧ со всеѧ̀ землѝ черномо́рїѧ стека́хꙋсѧ на поклоне́нїе сїѧ̀ ст҃ы́ни вели́кїѧ, хвалы̑ и҆ почита̑нїѧ тебѣ̀, пречⷭ҇таѧ бг҃ома́ти, воздава́ѧ съ вѣ́рою и҆ любо́вїю пою́щїѧ:

Ра́дꙋйсѧ, ꙗ҆вле́нїемъ ст҃ы́ѧ і҆кѡ́ны твоеѧ̀, мно́гїѧ лю́ди правосла́вныѧ ѡ҆бра́довавшаѧ: ра́дꙋйсѧ, возноси́мыѧ къ тебѣ̀ моли́твы ѿ серде́цъ вѣ́рныхъ прїе́млющаѧ.

Ра́дꙋйсѧ, и҆́стинныѧ вѣ́ры правосла́вныѧ ᲂу҆твержде́нїе: ра́дꙋйсѧ, мно́гїѧ невѣ́рныѧ ѻ҆́бразомъ си́мъ, къ вѣ́рѣ приведе́нїе.

Ра́дꙋйсѧ, сокро́вище бжⷭ҇твенное і҆кѡ́ною твое́ю на́мъ препода́вшаѧ: ра́дꙋйсѧ, дꙋ́ши на́ша на пꙋ́ть и҆́стинный наставлѧ́ющаѧ.

Ра́дꙋйсѧ, бг҃ома́ти пречⷭ҇таѧ, гра́да ѻ҆де́ссы и҆ всеѧ̀ землѝ черномо́рскїѧ покро́ве и҆ застꙋпле́нїе.

Конда́къ є҃

Бг҃освѣ́тлаѧ ѕвѣзда̀ ꙗ҆ви́сѧ твоѧ̀ ка́сперовскаѧ, прест҃а́ѧ дв҃о, є҆гда̀ принесе́на была̀ є҆сѝ въ це́рковь бж҃їю. Ѿсе́лѣ тво́й блгⷣтный покро́въ си́мъ ѻ҆́бразомъ распространи́сѧ на всѧ̑ вє́си и҆ гра́ды черномо́рїѧ всѝ бо вѣ́рнїи приходѧ́щїи къ і҆кѡ́нѣ твое́й, и҆ съ вѣ́рою молѧ́щїисѧ полꙋча́ше и҆сцѣле́нїѧ и҆ блгⷣтныѧ по́мощи, воспѣва́ѧ бг҃ꙋ: А҆ллилꙋ́їа.

І҆́косъ є҃

Ви́дѣша ве́лїѧ чꙋдеса̀ во хра́мѣ ст҃ѣ́мъ ѿ і҆кѡ́ны ст҃ы́е быва́емыѧ, дв҃а пречⷭ҇таѧ, безчи́сленныѧ наро́ды стека́хꙋсѧ на торжества̀ и҆ прославле́нїѧ є҆ѧ̀. Крⷭ҇тныѧ хо́ды соверша́шесѧ въ че́сть новоѧвле́нныѧ і҆кѡ́ны твоеѧ̀, ѡ҆бносѧ̀ є҆гѡ̀ и҆ ѡ҆ сп҃се́нїи и҆ застꙋпле́нїи взыва́ѧ тебѣ̀ со ᲂу҆миле́нїемъ:

Ра́дꙋйсѧ, застꙋ́пнице, цр҃и́це нбⷭ҇наѧ, странѣ̀ на́шей ѿра́до и҆ ᲂу҆тѣше́нїе: ра́дꙋйсѧ, пребл҃гослове́ннаѧ дв҃а, покро́въ сво́й над̾ на́ми простира́ющаѧ.

Ра́дꙋйсѧ, ꙗ҆́кѡ ѿ на́съ, недосто́йныхъ бл҃гоизво́лила принима́ти моле́нїѧ: ра́дꙋйсѧ, ꙗ҆́кѡ и҆ сама̀ возжела́ла приноси́ти моле́нїе на́ша ко прⷭ҇то́лꙋ бг҃а вы́шнѧгѡ.

Ра́дꙋйсѧ, ꙗ҆́кѡ ѡ҆брѣ́тенїемъ і҆кѡ́ны твоеѧ̀, ꙗ҆ви́сѧ чꙋ́домъ ве́лїѧ ми́лости бж҃їѧ странѣ̀ на́шей: ра́дꙋйсѧ, ꙗ҆́кѡ ѻ҆́бразомъ си́мъ низложи́сѧ горды́нѧ и҆ шата́нїе ꙗ҆зы́ческое.

Ра́дꙋйсѧ, бг҃ома́ти пречⷭ҇таѧ, гра́да ѻ҆де́ссы и҆ всеѧ̀ землѝ черномо́рскїѧ покро́ве и҆ застꙋпле́нїе.

Конда́къ ѕ҃

Возсїѧ̀ пречꙋ́дною сла́вою і҆кѡ́на ст҃а́ѧ ка́сперовскаѧ, є҆гда̀ ст҃ѣ́йшїй сѷно́дъ цр҃кви вои́стиннꙋ призна̀ и҆ засвидѣ́тельствова, ꙗ҆́кѡ і҆кѡ́на сїѧ̀ бы́сть вели́каѧ ст҃ы́нѧ всеѧ̀ землѝ черномо́рскїѧ. И҆ ѿны́нѣ всеси́льное застꙋ́пничество ст҃ы́ѧ і҆кѡ́ны ка́сперовскїѧ ꙗ҆ви́сѧ бл҃гостнымъ покро́вомъ мт҃ри бж҃їей распросте́ртыми над̾ на́шею земле́ю. Слы́ша сїѧ̀ бл҃гостныѧ вѣща́нїѧ вѣ́рныѧ воспѣва́хꙋ бг҃ꙋ: А҆ллилꙋ́їа.

І҆́косъ ѕ҃

Проповѣ́даютъ гра́ды и҆ ве́си землѝ черномо́рскїѧ и҆́стинꙋ ст҃ы́е і҆кѡ́ны твоеѧ̀ ка́сперовскїѧ, бг҃ома́ти пречⷭ҇та, ꙗ҆́кѡ бл҃гоизво́лила є҆сѝ просла́вити ѻ҆́бразъ тво́й ст҃ы́й многочи́сленными зна́менїѧми и҆ чꙋдесы̀. Мно́гїѧ бо гра́ды и҆ вє́си восхотѣ́ша ви́дѣти ѻ҆́бразъ тво́й ст҃ы́й, просѧ́ще доста́вити длѧ моли́твъ и҆ поклоне́нїѧ є҆мꙋ̀, и҆ въ ра́достехъ встрѣча́ѧ сїю̀ ве́лїю ст҃ы́ню, воспѣва́ша тебѣ̀ пребл҃гослове́ннѣй та́кѡ:

Ра́дꙋйсѧ, ра́досте на́ша, печа̑ли на́ша въ ра́дость претворѧ́ющаѧ: ра́дꙋйсѧ, всебл҃га́ѧ застꙋ́пница ѿ всѧ́кихъ бѣ́дъ и҆ и҆скꙋше́нїй и҆збавлѧ́ющаѧ.

Ра́дꙋйсѧ, всемлⷭ҇тиваѧ влⷣчце, млⷭ҇тїю твое́ю на́съ не ѡ҆ставлѧ́ющаѧ: ра́дꙋйсѧ, взбра́ннаѧ воево́до, врагѡ́въ ви́димыхъ и҆ неви́димыхъ побѣжда́ющаѧ.

Ра́дꙋйсѧ, врата́рнице бл҃га́ѧ, во врата̀ раѧ̀ пꙋ́ть вѣ́рнымъ ᲂу҆казꙋ́ющаѧ: ра́дꙋйсѧ, скоропослꙋ́шнице бжⷭ҇твеннаѧ, моли́твы на́ша прїе́млющаѧ.

Ра́дꙋйсѧ, бг҃ома́ти пречⷭ҇таѧ, гра́да ѻ҆де́ссы и҆ всеѧ̀ землѝ черномо́рскїѧ покро́ве и҆ застꙋпле́нїе.

Конда́къ з҃

Хотѧ́ще воззрѣ́ти на ст҃ꙋ́ю і҆кѡ́нꙋ твою̀, прест҃а́ѧ дв҃о, и҆ съ вѣ́рою ᲂу҆се́рднѡ помоли́тесѧ, многоты́сѧщныѧ стече́нїѧ молѧ́щихсѧ встреча́хꙋ сїю̀ і҆кѡ́нꙋ ка́сперовскꙋю, колѣнопреклоне́нїѧ соверша́юще по пꙋтѝ ше́ствїѧ крⷭ҇тныхъ хо́дѡвъ вели́кїѧ ст҃ы́ни, немо́лчнѡ воспѣва́ѧ: А҆ллилꙋ́їа.

І҆́косъ з҃

Ди́вныѧ зна́менїѧ милосе́рдїѧ соверша́шесѧ си́лою блгⷣти бжⷭ҇твенныѧ чꙋдотво́рныѧ і҆кѡ́ны твоеѧ̀, дв҃а пречⷭ҇тыѧ: болѧ́щыѧ и҆сцѣлѧ́хꙋсѧ, разсла́блєнныѧ ᲂу҆крѣплѧ́шесѧ, бѣсны̑ѧ ѿ дꙋхѡ́въ нечи́стыхъ свобожда́шесѧ, слѣпы̑ѧ ви́дѧхꙋ пречⷭ҇тый ѻ҆́бразъ. Всѝ ᲂу҆́бѡ є҆ди́ными ᲂу҆сты̀ и҆ се́рдцемъ взыва́хꙋ: прест҃а́ѧ бцⷣе, помога́й на́мъ, и҆ сп҃са́й всѧ̑, и҆́мѧ твоѐ въ ра́дости велича́юще:

Ра́дꙋйсѧ, предста́тельнице ты̀ на́ша къ бг҃ꙋ непосты́днаѧ: ра́дꙋйсѧ, ты̀ съ сн҃омъ твои́мъ и҆ бг҃омъ на́шимъ вѣ́чнѡ црⷭ҇твꙋющаѧ.

Ра́дꙋйсѧ, сп҃се́нїе ты̀ чл҃вѣ́ческое во бл҃го ᲂу҆строѧ́ющаѧ: ра́дꙋйсѧ, болѧ́щихъ и҆ стра́ждꙋщихъ ты̀ пе́рваѧ цѣли́тельнице.

Ра́дꙋйсѧ, ꙗ҆́кѡ тобо́ю грѣ́шнїи ѿ поги́бели сп҃са́ютсѧ: ра́дꙋйсѧ, ꙗ҆́кѡ тобо́ю ѿ страсте́й нече́стїѧ мы̀ и҆збавлѧ́емсѧ.

Ра́дꙋйсѧ, бг҃ома́ти пречⷭ҇таѧ, гра́да ѻ҆де́ссы и҆ всеѧ̀ землѝ черномо́рскїѧ покро́ве и҆ застꙋпле́нїе.

Конда́къ и҃

Всѣ́мъ живꙋ́щимъ гра́да ѻ҆де́ссы бы́сть ве́лїѧ ра́дость, є҆гда̀ чтⷭ҇на́ѧ і҆кѡ́на ка́сперовскаѧ принесе́на была̀ правосла́вными длѧ моли́твеннагѡ застꙋпле́нїѧ ѿ вра́жїихъ нападе́нїй, и҆ ꙗ҆́кѡ ви́димый зна́къ нб҃снагѡ покрови́тельства гра́да сегѡ̀. Се́й бо ѻ҆́бразъ тво́й ст҃ы́й, дв҃а пречⷭ҇таѧ, ꙗ҆ви́сѧ вѣ́рнымъ непреѡбори́мымъ ѡ҆пло́томъ проти́вꙋ и҆нозе́мныхъ си́лъ вра́жїихъ и҆ наде́жнѣйшимъ зало́гомъ сп҃се́нїѧ на́шегѡ, прославлѧ́ющихъ бг҃а вы́шнѧгѡ и҆ пою́щихъ: А҆ллилꙋ́їа.

І҆́косъ и҃

Всѧ̑ немощна̑ѧ мі́ра и҆збра̀ бг҃ъ, да посрами́тъ крѣ́пкаѧ хꙋдорѡ́днаѧ мі́ра и҆ ᲂу҆ничто́женнаѧ, и҆збра̀ и҆ не сꙋ́щаѧ, да сꙋ́щаѧ ᲂу҆праздни́тъ. Та́кѡ ѻ҆́бразомъ твои́мъ ст҃ы́мъ, прест҃а́ѧ бцⷣе, бл҃гослове́нїе и҆ защище́нїе снизошло̀ на люде́й кро́ткихъ и҆ смире́нныхъ, молчали́выхъ, трепе́щꙋщихъ пред̾ сло́вомъ бж҃їимъ. Всѧ̑ прибѣга́ющаѧ къ тебѣ̀ сп҃стѝ, да́рꙋѧ ча́дамъ послꙋша́нїе, ѡ҆би́димымъ терпѣ́нїе, скорбѧ́щимъ бл҃годꙋ́шїе, и҆ всѝ чтꙋ́щыѧ тѧ̀, пред̾ ѻ҆́бразомъ молѧ́щихсѧ, прїе́млютъ и҆сцѣле́нїѧ воспѣва́ѧ тѝ:

Ра́дꙋйсѧ, гра́дꙋ ѻ҆де́ссы въ моли́твахъ пред̾ ѻ҆́бразомъ ст҃ы́мъ ѡ҆бодре́нїе и҆ ᲂу҆тѣше́нїе ꙗ҆ви́вшаѧ: ра́дꙋйсѧ, ꙗ҆́кѡ гра́дъ се́й и҆ ѿ вра́жескихъ плѣне́нїй и҆збавлѧ́ющаѧ.

Ра́дꙋйсѧ, всѧ̑ живꙋ̑щїѧ въ не́мъ къ наро́дномꙋ покаѧ́нїю и҆ моли́твѣ призва́вшаѧ: ра́дꙋйсѧ, свою̀ млⷭ҇ть и҆ поща́дꙋ гра́дꙋ і҆кѡ́ною ка́сперовскою ꙗ҆ви́вшаѧ.

Ра́дꙋйсѧ, вра́жескїй фло́тъ ѿ разоре́нїѧ гра́да ѻ҆де́ссы ѿгна́вшаѧ: ра́дꙋйсѧ, всѧ̑ живꙋ̑щаѧ гра́да ѻ҆де́ссы вѣ́рою во сп҃се́нїе ᲂу҆крѣпи́вшаѧ.

Ра́дꙋйсѧ, бг҃ома́ти пречⷭ҇таѧ, гра́да ѻ҆де́ссы и҆ всеѧ̀ землѝ черномо́рскїѧ покро́ве и҆ застꙋпле́нїе.

Конда́къ ѳ҃

Всѧ́кое є҆стество̀ нбⷭ҇ныхъ и҆ земны́хъ похва́льное пѣ́нїе прино́ситъ тѝ, цр҃и́це нбⷭ҇наѧ, ꙗ҆́кѡ тво́й ѻ҆́бразъ ст҃ы́й ꙗ҆ви́сѧ покро́вомъ нбⷭ҇нагѡ застꙋпле́нїѧ и҆ защи́ты гра́да ѻ҆де́ссы въ трꙋ́дныѧ годи́ны бѣ́дствїй и҆ нападе́нїй вра́жїихъ, сохранѧ́ѧ живꙋ́щїѧ въ не́мъ и҆ вопїю́щихъ бг҃ꙋ: А҆ллилꙋ́їа.

І҆́косъ ѳ҃

Вѣті́и чл҃вѣ́честїи не возмо́гꙋтъ и҆счестѝ щедрѡ́ты твоѧ̀, дв҃о пречⷭ҇таѧ, нижѐ и҆з̾ѧсни́ти бжⷭ҇твеннꙋю си́лꙋ и҆сходѧ́щꙋю ѿ ст҃ы́ѧ і҆кѡ́ны ка́сперовскїѧ. Вси́ бо прибѣга́ющїи къ не́й и҆ съ вѣ́рою молѧ́щїесѧ тебѣ̀, бцⷣе, полꙋча́ше жела́емаѧ и҆ ра́дости воспѣва́ющи тѝ:

Ра́дꙋйсѧ, храни́тельнице ты̀ на́ше и҆ ᲂу҆твержде́нїе: ра́дꙋйсѧ, лꙋча́ми чꙋде́съ твои́хъ всѣ́хъ вѣ́рныхъ просвѣща́ющаѧ.

Ра́дꙋйсѧ, ти́хое и҆ до́брое ты̀ на́ше приста́нище: ра́дꙋйсѧ, ты̀ ра́досте градѡ́въ и҆ всеѧ̀ землѝ черномо́рїѧ.

Ра́дꙋйсѧ, ты̀ цр҃кви правосла́вныѧ похвало̀ и҆ сла́ва: ра́дꙋйсѧ, ты̀ ѕлы́ѧ начина́нїѧ разрꙋша́ющаѧ и҆ ко́зни вра́жїи расторга́ющаѧ.

Ра́дꙋйсѧ, бг҃ома́ти пречⷭ҇таѧ, гра́да ѻ҆де́ссы и҆ всеѧ̀ землѝ черномо́рскїѧ покро́ве и҆ застꙋпле́нїе.

Конда́къ і҃

Сп҃стѝ хотѧ́ше на́съ грѣ́шныхъ, бл҃говоли́ла є҆сѝ бцⷣе, ꙗ҆ви́те і҆кѡ́нꙋ твою̀ ка́сперовскꙋю на покро́въ и҆ сп҃се́нїе не то́кмо гра́да ѻ҆де́ссы, но всеѧ̀ землѝ черномо́рскїѧ. Мно́ги ми́лости и҆ щедрѡ́ты твоѧ̀, ѻ҆́бразомъ си́мъ ты̀ дарова́ла є҆сѝ вѣ́рнымъ. Со бл҃гоговѣ́нїемъ и҆ вѣ́рою притека́ющїй къ тебѣ̀ вопїю́тъ: бꙋ́ди застꙋ́пницею на́шей ᲂу҆се́рднѣй ᲂу҆ прⷭ҇то́ла бг҃а вседержи́телѧ, и҆ да сподо́битъ на́съ гдⷭ҇ь десна́гѡ стоѧ́нїѧ и҆ пѣ́ти є҆мꙋ̀ со всѣ́ми ст҃ы́ми: А҆ллилꙋ́їа.

І҆́косъ і҃

Стѣна̀ є҆сѝ неѡбори́маѧ, стра́жа неꙋсы́пна ѿ всѧ́кихъ напа́стей и҆ бѣ́дъ всѣ́мъ къ тебѣ̀ прибѣга́ющимъ. Тво́й бо ѻ҆́бразъ ст҃ы́й ꙗ҆ви́сѧ неизсѧка́емымъ и҆сто́чникомъ блгⷣти, и҆сточа́ющїй и҆сцѣле́нїѧ всѣ́мъ, съ вѣ́рою къ немꙋ̀ моли́твеннѡ ѡ҆браща́ющимсѧ. Тѣ́мже и҆ мы̀, къ тебѣ̀ припа́дающи въ ско́рбѣхъ и҆ болѣ́знехъ ᲂу҆ми́льнѡ глаго́лемъ тѝ:

Ра́дꙋйсѧ, є҆ди́на на́ша мт҃и милосе́рдїѧ, ᲂу҆милосе́рдисѧ над̾ на́ми грѣ́шными: ра́дꙋйсѧ, ꙗ҆́кѡ ты̀ покро́ве на́шъ бл҃года́тный, покры́й на́съ ѿ всѧ́кагѡ ѕла̀.

Ра́дꙋйсѧ, ꙗ҆́кѡ тобо́ю всѧ̑ болѣ́зни на́ша дꙋше́вныѧ и҆ тѣле́сныѧ и҆сцѣлѧ́ютсѧ: ра́дꙋйсѧ, ꙗ҆́кѡ твое́ю по́мощїю всѧ̑ на́ша стра́сти и҆ недꙋ́ги и҆стреблѧ́ютсѧ.

Ра́дꙋйсѧ, ꙗ҆́кѡ вѣ́рꙋ, наде́ждꙋ и҆ любо́вь къ бг҃ꙋ ᲂу҆крѣплѧ́ти ты̀ на́мъ помога́еши: ра́дꙋйсѧ, ꙗ҆́кѡ и҆ во всѧ́кихъ ѡ҆бстоѧ́нїихъ на стезю̀ сп҃се́нїѧ ты̀ направлѧ́ющаѧ.

Ра́дꙋйсѧ, невѣ́сто неневѣ́стнаѧ.

Ра́дꙋйсѧ, бг҃ома́ти пречⷭ҇таѧ, гра́да ѻ҆де́ссы и҆ всеѧ̀ землѝ черномо́рскїѧ покро́ве и҆ застꙋпле́нїе.

Конда́къ а҃і

Пѣ́нїе на́ше недосто́йное со ᲂу҆миле́нїемъ тебѣ̀ приносѧ́щее прїимѝ. Дв҃а пречⷭ҇таѧ, и҆ те́плой моли́твѣ на́шей вне́млюще, ᲂу҆слы́ши всѣ́хъ къ тебѣ̀ прибѣга́ющихъ. Ты́ бо є҆сѝ вои́стиннꙋ на́ша застꙋ́пнице, гро́зныѧ бѣды̑ ѿ на́съ ѿвраща́ющаѧ, стра́сти и҆ ра́спри всѧ̑ ᲂу҆тѣша́ющаѧ, и҆ под̾ твою̀ ми́лость вси́ мы прибѣга́емъ пою́щїѧ бг҃ꙋ: А҆ллилꙋ́їа.

І҆́косъ а҃і

Свѣтопрїе́мнꙋю свѣщꙋ̀ свѣ́та невече́рнѧгѡ зри́мъ і҆кѡ́нꙋ твою̀ ст҃ꙋ́ю. Ѻ҆́бразъ є҆ѧ̀ ка́сперовскїй немерца́емѡ сїѧ́етъ во хра́мѣ ст҃ѣ́мъ гра́да ѻ҆де́ссы, ѡ҆зарѧ́ѧ блгⷣтїю бжⷭ҇твенною всѣ́хъ прибѣга́ющихъ под̾ покрови́тельство є҆ди́ной застꙋ́пницѣ всегѡ̀ ро́да хрⷭ҇тїа́нскагѡ. Се́й бо ѻ҆́бразъ ст҃ы́й си́лою бж҃їю вра́жїѧ дѣ́йствїѧ ѿгонѧ́етъ, всѧ̑ недꙋ́ги на́ша и҆сцѣлѧ́етъ и҆ бл҃гослове́нїе да́рꙋетъ вопїю́щихъ бцⷣе:

Ра́дꙋйсѧ, ꙗ҆́кѡ ты̀ є҆сѝ застꙋ́пница ѻ҆би́димыхъ и҆ по́моще стра́ждꙋщихъ: ра́дꙋйсѧ, ꙗ҆́кѡ ты̀ є҆сѝ по милосе́рдїю своемꙋ̀ ᲂу҆де́рживала десни́цꙋ гдⷭ҇а, просте́ртꙋю длѧ наказа́нїѧ грѣ́шныхъ.

Ра́дꙋйсѧ, ꙗ҆́кѡ ты̀ млⷭ҇рдїемъ свои́мъ ѿвраща́ла бѣ́дствїѧ ѿ на́шегѡ ѻ҆те́чества и҆ ᲂу҆тѣша́ла ра́спри и҆ во́йны: ра́дꙋйсѧ, ꙗ҆́кѡ тобо́ю ѡ҆стана́вливалисѧ ѡ҆пꙋстоши́тельныѧ прока́зы и҆ ᲂу҆толѧ́лсѧ гла́дъ.

Ра́дꙋйсѧ, ꙗ҆́кѡ пома́занїемъ є҆ле́йнымъ ѿ лампа́ды і҆кѡ́ны твоеѧ̀ возврати́сѧ разсꙋ́докъ мно́гимъ, ѡ҆держи́мымъ си́лою бѣсо́вскою: ра́дꙋйсѧ, ꙗ҆́кѡ мно́ги полꙋча́ша здра́вїе на моле́бнахъ ᲂу҆ ст҃ы́ѧ і҆кѡ́ны твоеѧ̀.

Ра́дꙋйсѧ, бг҃ома́ти пречⷭ҇таѧ, гра́да ѻ҆де́ссы и҆ всеѧ̀ землѝ черномо́рскїѧ покро́ве и҆ застꙋпле́нїе.

Конда́къ в҃і

Блгⷣть бжⷭ҇твеннаѧ ѻ҆би́льнѡ ꙗ҆ви́сѧ чрез̾ і҆кѡ́нꙋ ст҃ꙋ́ю твою̀, бг҃облаже́ннаѧ дв҃а. Тво́й бо ѻ҆́бразъ ка́сперовскїй вѣ́рнымъ дарова́лсѧ во сщ҃е́нїе и҆ сп҃се́нїе дꙋ́шъ на́шихъ, во ѡ҆гражде́нїе ѿ напа́дкѡвъ ѿ вра́гъ ви́димыхъ и҆ неви́димыхъ, и҆ въ зна́менїе велича́йшагѡ застꙋпле́нїѧ всеѧ̀ на́шей ѻ҆тчи́зны. Тѣ́мже съ вѣ́рою прино́симъ є҆мꙋ̀ поклоне́нїе и҆ моли́твеннѡ бг҃ꙋ пое́мъ: А҆ллилꙋ́їа.

І҆́косъ в҃і

Пою́ще и҆ прославлѧ́ѧ чꙋдеса̀ твоѧ̀, дв҃а прест҃а́ѧ ѿ ст҃ы́ѧ і҆кѡ́ны твоѧ̀ соверша́емыѧ, всѝ со стра́хомъ и҆ тре́петомъ тебѣ̀ припа́даемъ, и҆ мо́лимъ тѧ̀, влⷣчцꙋ мі́рꙋ. Бꙋ́ди всѣ́мъ на́мъ щито́мъ непобѣди́мымъ и҆ стѣно́ю неѡбори́мою, покро́вомъ нерꙋши́мымъ и҆ хода́тайницей къ сн҃ꙋ твоемꙋ̀ и҆ бг҃ꙋ на́шемꙋ тебѣ̀ непреста́нными гла́сы пою́щими:

Ра́дꙋйсѧ, ты̀ врагѡ́въ на́шихъ ви́димыхъ и҆ неви́димыхъ всегда̀ побѣжда́ющаѧ: ра́дꙋйсѧ, ты̀ бл҃гі́ѧ жела́нїѧ всѣ́мъ вѣ́рнымъ и҆сполнѧ́ющаѧ.

Ра́дꙋйсѧ, ты̀ ꙗ҆вле́нїемъ і҆кѡ́ны ст҃ы́ѧ твоеѧ̀ всѧ̑ вѣ́рныѧ лю́ди просвѣща́ющаѧ: ра́дꙋйсѧ, ꙗ҆́кѡ взира́ѧ на і҆кѡ́нꙋ ст҃ꙋ́ю твою̀, тебѣ̀ и҆́стиннѣй бцⷣѣ покланѧ́емсѧ.

Ра́дꙋйсѧ, ꙗ҆́кѡ ты̀ є҆сѝ всѣ́хъ сла́вѧщихъ и҆́мѧ твоѐ прославлѧ́ющаѧ: ра́дꙋйсѧ, ꙗ҆́кѡ и҆ во всѧ́кой нꙋ́ждѣ на́шей, ты̀ поле́знаѧ и҆ бл҃га́ѧ всѣ́мъ помога́ющаѧ.

Ра́дꙋйсѧ, бг҃ома́ти пречⷭ҇таѧ, гра́да ѻ҆де́ссы и҆ всеѧ̀ землѝ черномо́рскїѧ покро́ве и҆ застꙋпле́нїе.

Конда́къ г҃і

Ѽ пречⷭ҇таѧ и҆ млⷭ҇рдаѧ влⷣчце на́ша, дв҃о бцⷣе! Пред̾ ст҃о́ю твое́ю і҆кѡ́ною ᲂу҆слы́ши на́съ, предстоѧ́щихъ тѝ съ вѣ́рою и҆ любо́вїю молѧ́щихсѧ. Вонмѝ гла́сꙋ моле́бномꙋ на́шемꙋ, и҆ и҆зба́ви на́съ ѿ всѧ́кихъ бѣ́дъ и҆ напа́стей, скорбе́й и҆ болѣ́зней и҆ грѧдꙋ́щагѡ и҆змѝ мꙋче́нїѧ всѣ́хъ и҆́мѧ твоѐ призыва́ющихъ и҆ сн҃ꙋ твоемꙋ̀ вопїю́щихъ: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃лѡвъ превы́сшаѧ ꙗ҆ви́ласѧ є҆сѝ. Цр҃и́це прест҃а́ѧ, ꙗ҆вле́нїемъ і҆кѡ́ны твоеѧ̀ ст҃ы́ѧ и҆спо́лнила є҆сѝ ра́достїю хрⷭ҇тїа́не правосла́вныѧ, къ тебѣ̀ съ вѣ́рою и҆ любо́вїю прибѣга́ющыѧ. Ты́ бо, дв҃а пречⷭ҇таѧ, ꙗ҆ви́ла є҆сѝ гра́дꙋ ѻ҆де́ссы и҆ всегѡ̀ черномо́рїѧ живꙋ́щїи, ди́вныѧ застꙋпле́нїѧ, ѡ҆зарѧ́юще стрꙋѧ́ми чꙋде́съ твои́хъ всѧ̑ вѣ́рныѧ, въ ра́дости вопїю́щаѧ тѝ:

Ра́дꙋйсѧ, вѣ́рнаѧ застꙋ́пница на́ша пред̾ ѻ҆́бразомъ твои́мъ молѧ́щихсѧ: ра́дꙋйсѧ, безчи́сленныѧ щедрѡ́ты твоѧ̀, ѿ гдⷭ҇а на́мъ и҆спра́шивающаѧ.

Ра́дꙋйсѧ, ꙗ҆́кѡ глаго́лъ бж҃їй въ тебѣ̀ николи́же и҆знемо́жетъ: ра́дꙋйсѧ, ꙗ҆́кѡ ѿ тебє̀ никто́же то́щь и҆лѝ неꙋслы́шанъ ѿхо́дитъ.

Ра́дꙋйсѧ, ꙗ҆́кѡ пред̾ ѻ҆́бразомъ твои́мъ мно́гїѧ полꙋча́ше бл҃гослове́нїѧ: ра́дꙋйсѧ, ꙗ҆́кѡ пред̾ ни́мъ же ѻ҆́ными и҆сполнѧ́шесѧ проси́маѧ жела́нїѧ.

Ра́дꙋйсѧ, бг҃ома́ти пречⷭ҇таѧ, гра́да ѻ҆де́ссы и҆ всеѧ̀ землѝ черномо́рскїѧ покро́ве и҆ застꙋпле́нїе.

Конда́къ а҃

И҆збра́нной ѿ всѣ́хъ родѡ́въ и҆ ди́вной застꙋ́пницѣ всегѡ̀ ро́да хрⷭ҇тїа́нскагѡ прест҃ѣ́й бцⷣѣ дв҃ѣ мр҃і́и, похвалы̑ прино́симъ мы̀ недосто́йнїи, чꙋ́дномꙋ и҆ ст҃о́мꙋ є҆ѧ̀ ѻ҆́бразꙋ ка́сперовскомꙋ, принесе́нномꙋ въ зе́млю на́шꙋ и҆з̾ се́рбїи правосла́вной на ᲂу҆крѣпле́нїе вѣ́ры хрⷭ҇то́вой и҆ на́шегѡ сп҃се́нїѧ съ любо́вїю прибѣга́ющихъ къ не́й и҆ пою́щихъ:

Ра́дꙋйсѧ, бг҃ома́ти пречⷭ҇таѧ, гра́да ѻ҆де́ссы и҆ всеѧ̀ землѝ черномо́рскїѧ покро́ве и҆ застꙋпле́нїе.

Моли́твы

Ѽ прест҃а́ѧ дв҃о, бг҃ома́ти пречⷭ҇таѧ, гра́да ѻ҆де́ссы и҆ всеѧ̀ землѝ черномо́рскїѧ покро́ве и҆ застꙋпле́нїе! Тебѣ̀ припа́даемъ и҆ покланѧ́емсѧ пред̾ ст҃о́ю и҆ пречтⷭ҇но́ю і҆кѡ́ною твое́ю ка́сперовскою, є҆́юже ди́вныѧ и҆ пресла́вныѧ чꙋдеса̀ соверша́шасѧ. Ты̀ є҆ди́на є҆сѝ ра́дости на́ше хода́таице и҆ ꙗ҆́кѡ мт҃и бж҃їѧ мо́жеши всѣ́мъ на́мъ по́мощи. Тебѣ̀ ᲂу҆́бѡ є҆ди́нѣй даде́сѧ мт҃рнее дерзнове́нїе ᲂу҆ми́лостивити сн҃а твоегѡ̀ хрⷭ҇та̀ бг҃а на́шегѡ ѡ҆ сп҃се́нїи на́съ грѣ́шныхъ. Тѣ́мже смире́ннѡ мо́лимъ тѧ̀, всемлⷭ҇тивꙋю влⷣчцꙋ на́шꙋ, не пре́зри и҆ не возгнꙋша́йсѧ воздыха́нїй на́шихъ, но помозѝ на́мъ немѡщны́мъ скве́рнымъ и҆ неиспра́влєннымъ, скорбѧ́щимъ и҆ ѡ҆ѕло́бленнымъ, больны́мъ и҆ заблꙋ́ждшымъ, въ сокрꙋше́нїи серде́цъ на́шихъ прибѣга́ющихъ. И҆зба́ви на́съ пребл҃гослове́ннаѧ гпⷭ҇жѐ, мт҃и гдⷭ҇а вы́шнѧгѡ, ѿ всѧ́кихъ бѣ́дъ и҆ скорбе́й, ѿ всѧ́кихъ недꙋ́гѡвъ и҆ болѣ́зней, ѿ внеза́пныѧ сме́рти, ѿ напа́стей де́монскихъ и҆ навѣ́тѡвъ ѕлы́хъ чл҃вѣ́къ, ꙗ҆́кѡ тобо́ю и҆ де́моны попира́ютсѧ и҆ всѝ врагѝ на́ши посрамлѧ́ютсѧ. Оу҆молѝ, гпⷭ҇жѐ пречⷭ҇таѧ, гдⷭ҇а и҆ ѡ҆ є҆́же сохрани́тесѧ ѻ҆те́чествꙋ на́шемꙋ и҆ правосла́вной цр҃кви на́шей въ ми́рѣ и҆ тишинѣ̀. Вы́шнимъ свои́мъ бл҃гослове́нїемъ, да ᲂу҆крѣпи́тъ гдⷭ҇ь а҆рхїерє́и на́ша правосла́вныѧ, и҆ па́стыри, хрⷭ҇толюби́вое во́инство со всѣ́ми правосла́вными хрⷭ҇тїа́нами. Всѣ́хъ же на́съ ѡ҆градѝ ѿ всѧ́кагѡ ѕла̀ бл҃гостїю твое́ю, и҆ ᲂу҆тѣ́ши ми́лостивымъ твои́мъ посѣще́нїемъ и҆ всѧ̑ бл҃годѣ́ющыѧ на́мъ. Е҆ще́ же, ѽ влⷣчце, мо́лимъ тѧ̀, є҆реті́ческое воста́нїе низложѝ, разсѣ̑ѧнныѧ соберѝ, заблꙋ́ждшїѧ во є҆ди́но хрⷭ҇то́во ста́до возвратѝ, ста́рость поддержѝ, ю҆́ныѧ вразꙋмѝ, вдови́цы си̑рыѧ защитѝ, болѧ́щыѧ и҆сцѣлѝ и҆ скорбѧ́щыѧ ᲂу҆тѣ́ши. Пре́жде ѿше́дшыѧ ѻ҆тцы̀ и҆ ча̑да и҆ бра́тїю на́шꙋ во свѣ́тлостехъ ра́йскихъ и҆ селе́нїѧхъ пра́ведныхъ ᲂу҆поко́й, съ ни́ми же и҆ на́съ всѣ́хъ въ покаѧ́нїи и҆ и҆сповѣ́данїи прїимѝ, да и҆ мы́ со всѣ́ми ст҃ы́ми просла́вимъ пречтⷭ҇но́е и҆ прест҃о́е и҆́мѧ ѻ҆ц҃а̀ и҆ сн҃а и҆ ст҃а́гѡ дх҃а, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.