Кондак 1
Я́ко боже́ственнаго жи́тельства таи́нника изря́днаго и благоче́стия богоно́снаго учи́теля Правосла́вная Це́рковь тя́ почита́ет: с небесе́ бо дарова́ние прие́м, озаря́еши боже́ственными твои́ми писа́нии вопию́щия ти́: Ра́дуйся, о́тче Никоди́ме, Горы́ Святы́я сла́вное украше́ние.
Икос 1
А́нгел нра́вы и мно́гий ра́зумом, Никоди́ме, на Афо́не яви́лся еси́; а́нгельское бо имы́й житие́, ангелоле́пным гла́сом изъясни́л еси́ оте́ческая писа́ния, и́миже просвеща́еши вопию́щия:
Ра́дуйся, Накси́йское благоукраше́ние; ра́дуйся, Афо́нское озаре́ние.
Ра́дуйся, оте́ческих догма́тов изложе́ние; ра́дуйся, святы́х глаго́л изъясне́ние.
Ра́дуйся, высото́ мудрова́ния и прему́дрости реко́; ра́дуйся, глубино́ боже́ственнаго ве́дения и сокро́вище любве́.
Ра́дуйся, я́ко показа́лся еси́ кни́жник богоно́сный; ра́дуйся, я́ко толко́вник еси́ богоглаго́ливый.
Ра́дуйся, свети́льниче нра́вов че́стности; ра́дуйся, пла́менниче го́рния све́тлости.
Ра́дуйся, и́мже ве́рнии утвержда́ются; ра́дуйся, и́мже врази́ устраша́ются.
Ра́дуйся, о́тче Никоди́ме, Горы́ Святы́я сла́вное украше́ние.
Кондак 2
Жития́ освяще́нна изде́тска иски́й, я́ко о́трасль боже́ственных роди́телей, мирски́й оста́вил еси́ мра́к, и ко Спа́су Христу́ устреми́лся еси́, Ему́же неукло́нне сле́дуя, Никоди́ме, вдохнове́н взыва́л еси́: Аллилу́иа.
Икос 2
Ра́зумом богоприя́тным, я́ко уя́звлен боже́ственным жела́нием, прише́л еси́ в Го́ру Афо́нскую, и доброде́тельным жи́тельством к гора́м возвы́сился еси́ ве́чным, по Дави́ду, Никоди́ме, слы́ша от на́с сицева́я:
Ра́дуйся, жития́ преподо́бнаго сокро́вище; ра́дуйся, све́та невеще́ственнаго прия́телище.
Ра́дуйся, и́ноком Афо́нским о́бразе; ра́дуйся, благоче́ствующих все́х утвержде́ние.
Ра́дуйся, у́ме богонауче́нный, небе́сных мы́слей испо́лненный; ра́дуйся, уста́ богодви́жная богодохнове́нных уче́ний.
Ра́дуйся, я́ко от ми́ра всеце́ло удали́лся еси́; ра́дуйся, я́ко во Афо́не к го́рним напра́вился еси́.
Ра́дуйся, ли́ка преподо́бных прича́стниче; ра́дуйся, ве́рным ве́лий учи́телю.
Ра́дуйся, враго́в поража́яй помышле́ния; ра́дуйся, ду́ши утвержда́яй неради́выя.
Ра́дуйся, о́тче Никоди́ме, Горы́ Святы́я сла́вное украше́ние.
Кондак 3
На сла́ву Госпо́дню у́мне взира́яй, очи́стив себе́ от веще́ственных, небе́сным наставля́яй показа́лся еси́, богоглаго́ливый Никоди́ме, де́лом и сло́вом вся́ к Бо́гу управля́я вопию́щия: Аллилу́иа.
Икос 3
Име́яй се́рдце твое́ огне́м пали́мо стра́ха Бо́жия, неколеби́мо а́нгельское проше́л еси́ житие́, и я́же в не́м благода́ти, я́ко Ду́хом просвеще́н, Никоди́ме, изъясня́еши зову́щим:
Ра́дуйся, сто́лпе воздержа́ния; ра́дуйся, таи́нниче безстра́стия.
Ра́дуйся, воспери́вый у́м к небе́сным; ра́дуйся, стяжа́вый отту́ду неизглаго́ланная.
Ра́дуйся, благода́ти Духо́вныя до́ме светови́дный; ра́дуйся, селе́ние многоце́нное жи́тельства доброде́тельнаго.
Ра́дуйся, я́ко ре́ки уче́ний источа́еши; ра́дуйся, я́ко пото́ки страсте́й изсуша́еши.
Ра́дуйся, Христо́вым обогати́выйся осия́нием; ра́дуйся, вра́жие умертви́вый возноше́ние.
Ра́дуйся, глаго́лов душепита́тельных гу́сли; ра́дуйся, пе́сней богому́дрых цевни́це.
Ра́дуйся, о́тче Никоди́ме, Горы́ Святы́я сла́вное украше́ние.
Кондак 4
Ревни́тель богодохнове́нный яви́лся еси́ отце́в преподо́бных, умертви́в себе́ су́щим в ми́ре, и учи́телей свяще́нных отпечатле́ние и уста́ богодви́жная: бога́тая бо ти́ даде́ся благода́ть, Никоди́ме, вопию́щу: Аллилу́иа.
Икос 4
Сконча́л еси́ богому́дре преподо́бную жи́знь твою́, разли́чным искуше́нием противоста́в, и я́коже зла́то во огни́, искуше́н скорбьми́, Никоди́ме, учи́тель богому́дрый в дея́нии яви́лся еси́ взыва́ющим:
Ра́дуйся, но́вый в преподо́бных; ра́дуйся, богодохнове́нный во учи́телех.
Ра́дуйся, наставля́яй на́ше помышле́ние; ра́дуйся, разруша́яй Велиа́рово безу́мие.
Ра́дуйся, сло́вом благода́тным управля́яй ду́ши; ра́дуйся, мечу́, при́сно посеца́яй страсте́й вины́.
Ра́дуйся, я́ко очища́еши серде́чныя скве́рны; ра́дуйся, я́ко явля́еши боже́ственная дая́ния.
Ра́дуйся, пла́менниче Прему́дрости лу́чшия; ра́дуйся, мо́лние на беснова́ние ху́ждшее.
Ра́дуйся, свети́льниче к живо́тным преспе́янием; ра́дуйся, свети́ло к боже́ственным возвыше́нием.
Ра́дуйся, о́тче Никоди́ме, Горы́ Святы́я сла́вное украше́ние.
Кондак 5
Богоглаго́ливый язы́к прие́м, богогла́сне, свы́шним дохнове́нием дви́жим, глаго́лы жи́зни ве́чныя и я́же в боже́ственных отце́х неудобопости́жная всему́дре изъясни́л еси́, вся́ сподвиза́я Бо́гови пе́ти: Аллилу́иа.
Икос 5
Да воспери́ши к Бо́гу, богоно́сне, ума́ твоего́ движе́ния вся́, хране́ние чу́вств тве́рдо проше́л еси́, ему́же науча́еши хотя́щия улучи́ти боже́ственнаго едине́ния, во е́же пе́ти ти́, о́тче, си́це:
Ра́дуйся, боже́ственных возвести́телю; ра́дуйся, от ху́ждшаго неве́дения изба́вителю.
Ра́дуйся, боже́ственному науча́яй по́двигу; ра́дуйся, небе́снаго яви́телю мудрова́ния.
Ра́дуйся, широто́ боже́ственнаго ра́зума и прему́дрый наста́вниче; ра́дуйся, скрижа́ле богопечатле́нная Духо́внаго веща́ния.
Ра́дуйся, Уте́шителя пречестны́й сосу́де; ра́дуйся, правосла́вных богода́нная кре́посте.
Ра́дуйся, ча́ше душепита́тельнаго не́ктара; ра́дуйся, све́та трисо́лнечнаго испо́лненный.
Ра́дуйся, пра́вило отше́льником в де́лех; ра́дуйся, о́бразе учи́телем в словесе́х.
Ра́дуйся, о́тче Никоди́ме, Горы́ Святы́я сла́вное украше́ние.
Кондак 6
Вертогра́д боже́ственных благода́тей се́рдце соверши́в, Никоди́ме, жи́тельством твои́м, «Вертогра́д благода́тей», я́ко вои́стину испо́лнь благоуха́ния благода́тнаго, твою́ кни́гу наре́кл еси́, е́юже наслажда́ющеся, вопие́м: Аллилу́иа.
Икос 6
Возсия́в на Горе́ Афо́нстей, я́ко новоявле́нная звезда́, просвеща́еши Христо́ву Це́рковь доброде́телей твои́х заря́ми, неботаи́нниче Никоди́ме преподо́бне; отню́дуже возжиза́еми све́том твои́м зове́м:
Ра́дуйся, звездо́ церко́вная; ра́дуйся, све́точу благоче́стия.
Ра́дуйся, богосло́вов дре́вних изъясне́ние; ра́дуйся, чужды́х уче́ний низверже́ние.
Ра́дуйся, боже́ственных преда́ний храни́телю и тайноводи́телю; ра́дуйся, доброде́тельных дея́ний светоно́сче свяще́нный.
Ра́дуйся, я́ко облича́еши уче́ния нововво́дная; ра́дуйся, я́ко явля́еши доброде́тели богода́нныя.
Ра́дуйся, Бо́жий служи́телю тепле́йший; ра́дуйся, ве́рных защи́тниче неколеби́мый.
Ра́дуйся, раю́ многоразли́чныя прему́дрости; ра́дуйся, свети́ло е́же во Христе́ науче́ния.
Ра́дуйся, о́тче Никоди́ме, Горы́ Святы́я сла́вное украше́ние.
Кондак 7
Пребыва́яй в Горе́ Афо́нстей, я́коже в го́рнице, усе́рдною моли́твою и посто́м Духо́вную благода́ть, прему́дре, прия́л еси́, та́инственно в тя́ все́льшуюся, я́коже апо́столи, и́хже подража́тель яви́лся еси́, взыва́я: Аллилу́иа.
Икос 7
Побе́ду благочести́вым уче́ние твое́ подае́т, ве́рно поуча́ющимся, Никоди́ме, о́тче свяще́нный, проти́ву страсте́й и вся́кия е́реси: во Святе́м бо Ду́се де́йствует при́сно вопию́щим:
Ра́дуйся, побе́до правосла́вных; ра́дуйся, паде́ние злосла́вных.
Ра́дуйся, Це́ркве ве́лий учи́телю; ра́дуйся, святы́м дре́вним ра́вне.
Ра́дуйся, я́ко бога́тство оста́вил еси́ на́м кни́г свяще́нных; ра́дуйся, я́ко прекраща́еши вся́кое убо́жество страсте́й.
Ра́дуйся, до небесе́ досяза́яй сто́лпе богопросвеще́нный; ра́дуйся, Уте́шителя свети́льниче невече́рний.
Ра́дуйся, о́блаче, осеня́яй ве́рныя; ра́дуйся, свеще́, возсиява́ющая лу́чшая.
Ра́дуйся, боже́ственных догма́тов пропове́дниче; ра́дуйся, стру́й невеще́ственных исто́чниче.
Ра́дуйся, о́тче Никоди́ме, Горы́ Святы́я сла́вное украше́ние.
Кондак 8
Диви́т помышле́ния ве́рных, богоглаго́ливе, мно́жество прему́дрых писа́ний твои́х: ты́ бо прему́дростию боже́ственною и си́лою небе́сною, Никоди́ме, пи́шеши и веща́еши, преподо́бне, и вся́ побужда́еши пе́ти: Аллилу́иа.
Икос 8
Всю́ Це́рковь, я́коже богоде́тельнии све́ти, твоя́ богопреда́нная словеса́ просвеща́ют, о́тче, та́инственне, и к соверше́ннейших разуме́нию веду́т я́же в сия́ приница́ющия и вопию́щия ти́ единогла́сне:
Ра́дуйся, трубо́ неизрече́нных; ра́дуйся, таи́нниче небе́сных.
Ра́дуйся, Ду́ха кни́жниче богоглаго́ливый; ра́дуйся, от свы́шняго вдохнове́ния науче́нный.
Ра́дуйся, я́ко боже́ственная вла́га ти́ даде́ся с небесе́; ра́дуйся, я́ко облагодати́лся еси́ от руки́ Бо́жия.
Ра́дуйся, богосло́вия та́инственнаго гу́сли; ра́дуйся, богоглаго́лания небе́снаго цевни́це.
Ра́дуйся, страсте́й отсеца́яй те́рние; ра́дуйся, ду́ш очища́яй ни́ву.
Ра́дуйся, Бо́жия благоутро́бия язы́че; ра́дуйся, ве́рных правосла́вных сла́во.
Ра́дуйся, о́тче Никоди́ме, Горы́ Святы́я сла́вное украше́ние.
Кондак 9
К подвиго́м наставля́я проти́ву враго́в мы́сленных, Никоди́ме, преподо́бных исполне́ние, «Неви́димую бра́нь» нарица́еши ю́же прему́дре списа́л еси́ кни́гу, свя́те: от сея́ бо науча́емся к Бо́гу возводи́тися, пою́ще: Аллилу́иа.
Икос 9
Спа́совых пра́здников рече́ния богодохнове́нная и пе́сни всему́дрыя в широту́ распространя́я и глубину́, ю́же в ни́х благода́ть все́м по́дал еси́, е́юже ду́ши веселя́тся, Никоди́ме, тебе́ вопию́щих:
Ра́дуйся, пе́сней толкова́телю боже́ственных; ра́дуйся, дщи́це слове́с святы́х.
Ра́дуйся, ве́яния боже́ственнаго сокро́вищнице; ра́дуйся, Це́ркве Христо́вы украше́ние.
Ра́дуйся, Ду́ха сокро́вище и храни́лище доброде́телей; ра́дуйся, орга́не богодохнове́нный пе́сней духо́вных.
Ра́дуйся, я́ко очища́еши ве́рных сердца́; ра́дуйся, я́ко произлива́еши живоно́сная ороше́ния.
Ра́дуйся, ду́ш наста́вниче богому́дрый; ра́дуйся, честны́м отце́м равноче́стный.
Ра́дуйся, ума́ хране́нию науча́яй; ра́дуйся, ра́дость та́инственную возсиява́яй.
Ра́дуйся, о́тче Никоди́ме, Горы́ Святы́я сла́вное украше́ние.
Кондак 10
Усты́ боговеща́нными и руко́ю, двиза́емою Ду́ха благода́тию, о́тче, духо́вных степе́ней изъясня́я в широте́ смы́слы, ле́ствицу и́ну поста́вил еси́ жела́ющим Го́сподеви пе́ти: Аллилу́иа.
Икос 10
Прему́дрости боже́ственныя вла́га, я́коже Соломо́ну, даде́ся ти́, Никоди́ме, отню́дуже Це́ркве учи́тель прему́дрый яви́лся еси́ и пресла́вный, на вся́ лу́чшая наставля́я, о́тче, зову́щия:
Ра́дуйся, у́ме богосло́вия; ра́дуйся, струе́ боговеща́ния.
Ра́дуйся, пото́че наслажде́ния духо́внаго; ра́дуйся, во словесе́х и де́лех пресве́тлый.
Ра́дуйся, вети́е многому́дрый глаго́л живо́тных; ра́дуйся, уста́ блаже́нная гла́са Духо́внаго.
Ра́дуйся, насади́телю доброде́телей небе́сных; ра́дуйся, искорени́телю нра́вов зле́йших.
Ра́дуйся, те́плыя моли́твы водворе́ние; ра́дуйся, ве́рных богода́нное хвале́ние.
Ра́дуйся, Бо́жий песнопе́вче богоглаго́ливый; ра́дуйся, вождю́ на́ш богоно́сный.
Ра́дуйся, о́тче Никоди́ме, Горы́ Святы́я сла́вное украше́ние.
Кондак 11
Возвы́сив ума́ твоего́ к Бо́гу стремле́ния, умертви́л еси́ плотска́я движе́ния, и, боже́ственным све́том озаре́н, явле́нне во Афо́не просия́л еси́, сло́вом и де́лом, преподо́бне, к Бо́гу направля́я вопию́щия: Аллилу́иа.
Икос 11
Све́том Уте́шителевым прему́дрых писа́ний твои́х благода́ть, Никоди́ме, везде́ сия́ет и вдыха́ет в ду́ши та́инственное благоуха́ние, и́мже страсте́й избавля́емся злово́ния, взыва́юще:
Ра́дуйся, цве́те ра́йский; ра́дуйся, тро́сте Уте́шителева.
Ра́дуйся, мирополо́жнице боже́ственныя бла́гости; ра́дуйся, благоуха́ние жития́ чи́стаго.
Ра́дуйся, ми́ро всеблагово́нное подви́жническия жи́зни; ра́дуйся, арома́те небе́сный жи́тельства духо́внаго.
Ра́дуйся, тайнописа́телю святы́х догма́тов; ра́дуйся, краснопи́сче свяще́нных смы́слов.
Ра́дуйся, свире́ле пе́сней благода́тных; ра́дуйся, ли́ку святы́х сопричте́нный.
Ра́дуйся, ду́ш утвержде́ние коле́блющихся; ра́дуйся, прему́дрый мона́хов наста́вниче.
Ра́дуйся, о́тче Никоди́ме, Горы́ Святы́я сла́вное украше́ние.
Кондак 12
Благода́ть и води́тельство к путе́м спаси́тельным и вся́цей по́льзе боже́ственней во Святе́м Ду́се при́сно кни́г твои́х мно́жество, о Никоди́ме, подае́т и веде́т к боже́ственней сла́ве вопию́щия: Аллилу́иа.
Икос 12
Пою́ще тебе́ пе́снь, я́ко учи́теля вели́каго и боже́ственнаго и прему́драго наста́вника Це́ркве Христо́вы, о боговеща́нне, тя́ почита́ем, Никоди́ме: но не преста́й, свя́те, вся́ просвеща́ти зову́щия:
Ра́дуйся, Афо́на ве́лия сла́во; ра́дуйся, На́ксоса боже́ственная похвало́.
Ра́дуйся, мона́шествующих свети́ло присносве́тлое; ра́дуйся, правосла́вных пла́менниче неусыпа́емый.
Ра́дуйся, о́бразе и пра́вило и́ноков богоприя́тных; ра́дуйся, да́ре и ве́нче безмо́лвников благогове́йных.
Ра́дуйся, Це́ркве стено́ неколеби́мейшая; ра́дуйся, благоче́стия свети́льниче светоза́рнейший.
Ра́дуйся, и́мже восприе́млем лу́чшая; ра́дуйся, и́мже отвраща́ем ху́ждшая.
Ра́дуйся, Богоро́дицы таи́нниче; ра́дуйся, соиме́нных тебе́ предста́телю.
Ра́дуйся, о́тче Никоди́ме, Горы́ Святы́я сла́вное украше́ние.
Кондак 13
О Никоди́ме о́тче, Горы́ Афо́нския чу́до и всея́ Це́ркве сла́во, настоя́щее на́ше приноше́ние ми́лостивно приими́ и подава́й все́м све́т боже́ственный моли́твами твои́ми, я́ко да при́сно Бо́гови вопие́м: Аллилу́иа.
Повтор
Этот кондак читается трижды, затем икос 1-й и кондак 1-й.
Икос 1
А́нгел нра́вы и мно́гий ра́зумом, Никоди́ме, на Афо́не яви́лся еси́; а́нгельское бо имы́й житие́, ангелоле́пным гла́сом изъясни́л еси́ оте́ческая писа́ния, и́миже просвеща́еши вопию́щия:
Ра́дуйся, Накси́йское благоукраше́ние; ра́дуйся, Афо́нское озаре́ние.
Ра́дуйся, оте́ческих догма́тов изложе́ние; ра́дуйся, святы́х глаго́л изъясне́ние.
Ра́дуйся, высото́ мудрова́ния и прему́дрости реко́; ра́дуйся, глубино́ боже́ственнаго ве́дения и сокро́вище любве́.
Ра́дуйся, я́ко показа́лся еси́ кни́жник богоно́сный; ра́дуйся, я́ко толко́вник еси́ богоглаго́ливый.
Ра́дуйся, свети́льниче нра́вов че́стности; ра́дуйся, пла́менниче го́рния све́тлости.
Ра́дуйся, и́мже ве́рнии утвержда́ются; ра́дуйся, и́мже врази́ устраша́ются.
Ра́дуйся, о́тче Никоди́ме, Горы́ Святы́я сла́вное украше́ние.
Кондак 1
Я́ко боже́ственнаго жи́тельства таи́нника изря́днаго и благоче́стия богоно́снаго учи́теля Правосла́вная Це́рковь тя́ почита́ет: с небесе́ бо дарова́ние прие́м, озаря́еши боже́ственными твои́ми писа́нии вопию́щия ти́: Ра́дуйся, о́тче Никоди́ме, Горы́ Святы́я сла́вное украше́ние.
Молитвы
О богодохнове́нный и вселе́нский и́стины учи́телю, изря́дная Святоимени́тыя Горы́ похвало́, светле́йшая звездо́ Правосла́вныя Це́ркве Собо́рныя, всепреподо́бный и святы́й о́тче Никоди́ме! Да́ждь на́м просвеще́ние моли́твами твои́ми во исполне́ние боже́ственныя во́ли, напра́ви стопы́ на́ша ко стезя́м доброде́тельнаго жития́, осени́ на́с да́нною тебе́ благода́тию и вразуми́ у́м на́ш, во е́же разуме́ти богому́драя поуче́ния твоя́, да обря́щем в ни́х покая́ние, исцеле́ние, ра́дость, ми́р, кро́тость, поко́й, любо́вь, и а́ще что́ добро́ и бла́го и спаси́тельно, и в конце́ живо́т ве́чный, и моли́ся всегда́ ко Го́споду о все́х на́с, и́скренне лю́бящих тя́ и на вся́к де́нь и ча́с призыва́ющих оте́ческую твою́ бла́гость и по́мощь. Ами́нь.
Конда́къ а҃
Ꙗ҆́кѡ бжⷭ҇твеннагѡ жи́тельства таи́нника и҆зрѧ́днаго, и҆ бл҃гоче́стїѧ бг҃оно́снаго ᲂу҆чи́телѧ, правосла́внаѧ цр҃ковь тѧ̀ почита́етъ: съ нб҃се́ бо дарова́нїе прїе́мъ, ѡ҆зарѧ́еши бжⷭ҇твенными твои́ми писа̑нїи вопїю́щыѧ тѝ: Ра́дꙋйсѧ, ѻ҆́тче нїкоди́ме, горы̀ ст҃ы́ѧ сла́вное ᲂу҆краше́нїе.
І҆́косъ а҃
А҆́гг҃лъ нра̑вы и҆ мно́гїй ра́зꙋмомъ, нїкоди́ме, на а҆ѳѡ́нѣ ꙗ҆ви́лсѧ є҆сѝ: а҆́гг҃льское бо и҆мы́й житїѐ, а҆гг҃лолѣ́пнымъ гла́сомъ и҆з̾ѧсни́лъ є҆сѝ ѻ҆те́чєскаѧ писа̑нїѧ, и҆́миже просвѣща́еши вопїю́щыѧ:
Ра́дꙋйсѧ, наѯі́йское бл҃гоꙋкраше́нїе: ра́дꙋйсѧ, а҆ѳѡ́нское ѡ҆заре́нїе.
Ра́дꙋйсѧ, ѻ҆те́ческихъ догма́тѡвъ и҆зложе́нїе: ра́дꙋйсѧ, ст҃ы́хъ глагѡ́лъ и҆з̾ѧсне́нїе.
Ра́дꙋйсѧ, высото̀ мꙋдрова́нїѧ и҆ премꙋ́дрости рѣко̀: ра́дꙋйсѧ, глꙋбино̀ бжⷭ҇твеннагѡ вѣ́дѣнїѧ и҆ сокро́вище любвѐ.
Ра́дꙋйсѧ, ꙗ҆́кѡ показа́лсѧ є҆сѝ кни́жникъ бг҃оно́сный: ра́дꙋйсѧ, ꙗ҆́кѡ толко́вникъ є҆сѝ бг҃оглаго́ливый.
Ра́дꙋйсѧ, свѣти́льниче нра́вѡвъ че́стности: ра́дꙋйсѧ, пла́менниче го́рнїѧ свѣ́тлости.
Ра́дꙋйсѧ, и҆́мже вѣ́рнїи ᲂу҆твержда́ютсѧ: ра́дꙋйсѧ, и҆́мже вразѝ ᲂу҆страша́ютсѧ.
Ра́дꙋйсѧ, ѻ҆́тче нїкоди́ме, горы̀ ст҃ы́ѧ сла́вное ᲂу҆краше́нїе.
Конда́къ в҃
Житїѧ̀ ѡ҆сщ҃е́нна и҆здѣ́тска и҆скі́й, ꙗ҆́кѡ ѻ҆́трасль бжⷭ҇твенныхъ роди́телей, мїрскі́й ѡ҆ста́вилъ є҆сѝ мра́къ, и҆ ко сп҃сꙋ хрⷭ҇тꙋ̀ ᲂу҆стреми́лсѧ є҆сѝ, є҆мꙋ́же неꙋкло́ннѣ слѣ́дꙋѧ, нїкоди́ме, вдохнове́нъ взыва́лъ є҆сѝ: А҆ллилꙋ́їа.
І҆́косъ в҃
Ра́зꙋмомъ бг҃опрїѧ́тнымъ, ꙗ҆́кѡ ᲂу҆ѧ́звленъ бжⷭ҇твеннымъ жела́нїемъ, прише́лъ є҆сѝ въ го́рꙋ а҆ѳѡ́нскꙋю, и҆ добродѣ́тельнымъ жи́тельствомъ къ гора́мъ возвы́силсѧ є҆сѝ вѣ̑чнымъ, по дв҃дꙋ, нїкоди́ме, слы́шѧ ѿ на́съ сицева̑ѧ:
Ра́дꙋйсѧ, житїѧ̀ прпⷣбнагѡ сокро́вище: ра́дꙋйсѧ, свѣ́та невеще́ственнагѡ прїѧ́телище.
Ра́дꙋйсѧ, и҆́нокѡмъ а҆ѳѡ̑нскимъ ѻ҆́бразе: ра́дꙋйсѧ, бл҃гоче́ствꙋющихъ всѣ́хъ ᲂу҆твержде́нїе.
Ра́дꙋйсѧ, ᲂу҆́ме бг҃онаꙋче́нный, нбⷭ҇ныхъ мы́слей и҆спо́лненный: ра́дꙋйсѧ, ᲂу҆ста̀ бг҃одви̑жнаѧ бг҃одохнове́нныхъ ᲂу҆че́нїй.
Ра́дꙋйсѧ, ꙗ҆́кѡ ѿ мі́ра всецѣ́лѡ ᲂу҆дали́лсѧ є҆сѝ: ра́дꙋйсѧ, ꙗ҆́кѡ во а҆ѳѡ́нѣ къ гѡ́рнимъ напра́вилсѧ є҆сѝ.
Ра́дꙋйсѧ, ли́ка прпⷣбныхъ прича́стниче: ра́дꙋйсѧ, вѣ̑рнымъ ве́лїй ᲂу҆чи́телю.
Ра́дꙋйсѧ, врагѡ́въ поража́ѧй помышлє́нїѧ: ра́дꙋйсѧ, дꙋ́шы ᲂу҆твержда́ѧй неради̑выѧ.
Ра́дꙋйсѧ, ѻ҆́тче нїкоди́ме, горы̀ ст҃ы́ѧ сла́вное ᲂу҆краше́нїе.
Конда́къ г҃
На сла́вꙋ гдⷭ҇ню ᲂу҆́мнѣ взира́ѧй, ѡ҆чи́стивъ себѐ ѿ веще́ственныхъ, нбⷭ҇нымъ наставлѧ́ѧй показа́лсѧ є҆сѝ, бг҃оглаго́ливый нїкоди́ме, дѣ́ломъ и҆ сло́вомъ всѧ̑ къ бг҃ꙋ ᲂу҆правлѧ́ѧ вопїю́щыѧ: А҆ллилꙋ́їа.
І҆́косъ г҃
И҆мѣ́ѧй се́рдце твоѐ ѻ҆гне́мъ пали́мо стра́ха бж҃їѧ, неколеби́мѡ а҆́гг҃льское проше́лъ є҆сѝ житїѐ, и҆ ꙗ҆̀же въ не́мъ бл҃года̑ти, ꙗ҆́кѡ дх҃омъ просвѣще́нъ, нїкоди́ме, и҆з̾ѧснѧ́еши зовꙋ́щымъ:
Ра́дꙋйсѧ, сто́лпе воздержа́нїѧ: ра́дꙋйсѧ, таи́нниче безстра́стїѧ.
Ра́дꙋйсѧ, воспери́вый ᲂу҆́мъ къ нбⷭ҇нымъ: ра́дꙋйсѧ, стѧжа́вый ѿтꙋ́дꙋ неизглагѡ́ланнаѧ.
Ра́дꙋйсѧ, бл҃года́ти дх҃о́вныѧ до́ме свѣтови́дный: ра́дꙋйсѧ, селе́нїе многоцѣ́нное жи́тельства добродѣ́тельнагѡ.
Ра́дꙋйсѧ, ꙗ҆́кѡ рѣ́ки ᲂу҆че́нїй и҆сточа́еши: ра́дꙋйсѧ, ꙗ҆́кѡ пото́ки страсте́й и҆зсꙋша́еши.
Ра́дꙋйсѧ, хрⷭ҇то́вымъ ѡ҆богати́выйсѧ ѡ҆сїѧ́нїемъ: ра́дꙋйсѧ, вра́жїе ᲂу҆мертви́вый возноше́нїе.
Ра́дꙋйсѧ, глаго́лѡвъ дꙋшепита́тельныхъ гꙋ̑сли: ра́дꙋйсѧ, пѣ́сней бг҃омꙋ́дрыхъ цѣвни́це.
Ра́дꙋйсѧ, ѻ҆́тче нїкоди́ме, горы̀ ст҃ы́ѧ сла́вное ᲂу҆краше́нїе.
Конда́къ д҃
Ревни́тель бг҃одохнове́нный ꙗ҆ви́лсѧ є҆сѝ ѻ҆тцє́въ прпⷣбныхъ, ᲂу҆мертви́въ себѐ сꙋ́щымъ въ мі́рѣ, и҆ ᲂу҆чи́телей сщ҃е́нныхъ ѿпечатле́нїе и҆ ᲂу҆ста̀ бг҃одви̑жнаѧ: бога́таѧ бо тѝ даде́сѧ бл҃года́ть, нїкоди́ме, вопїю́щꙋ: А҆ллилꙋ́їа.
І҆́косъ д҃
Сконча́лъ є҆сѝ бг҃омꙋ́дрѣ прпⷣбнꙋю жи́знь твою̀, разли̑чнымъ и҆скꙋше́нїємъ противоста́въ, и҆ ꙗ҆́коже зла́то во ѻ҆гнѝ, и҆скꙋше́нъ скорбьмѝ, нїкоди́ме, ᲂу҆чи́тель бг҃омꙋ́дрый въ дѣѧ́нїи ꙗ҆ви́лсѧ є҆сѝ взыва́ющымъ:
Ра́дꙋйсѧ, но́вый въ прпⷣбныхъ: ра́дꙋйсѧ, бг҃одохнове́нный во ᲂу҆чи́телехъ.
Ра́дꙋйсѧ, наставлѧ́ѧй на́ше помышле́нїе: ра́дꙋйсѧ, разрꙋша́ѧй велїа́рово безꙋ́мїе.
Ра́дꙋйсѧ, сло́вомъ бл҃года́тнымъ ᲂу҆правлѧ́ѧй дꙋ́шы: ра́дꙋйсѧ, мечꙋ̀, при́снѡ посѣца́ѧй страсте́й вины̑.
Ра́дꙋйсѧ, ꙗ҆́кѡ ѡ҆чища́еши сердє́чныѧ сквє́рны: ра́дꙋйсѧ, ꙗ҆́кѡ ꙗ҆влѧ́еши бжⷭ҇твєннаѧ даѧ̑нїѧ.
Ра́дꙋйсѧ, пла́менниче премⷣрости лꙋ́чшїѧ: ра́дꙋйсѧ, мо́лнїе на бѣснова́нїе хꙋ́ждшее.
Ра́дꙋйсѧ, свѣти́льниче къ живѡ́тнымъ преспѣ́ѧнїємъ: ра́дꙋйсѧ, свѣти́ло къ бжⷭ҇твєннымъ возвыше́нїємъ.
Ра́дꙋйсѧ, ѻ҆́тче нїкоди́ме, горы̀ ст҃ы́ѧ сла́вное ᲂу҆краше́нїе.
Конда́къ є҃
Бг҃оглаго́ливый ѧ҆зы́къ прїе́мъ, бг҃огла́сне, свы́шнимъ дохнове́нїемъ дви́жимь, глаго́лы жи́зни вѣ́чныѧ, и҆ ꙗ҆̀же въ бжⷭ҇твенныхъ ѻ҆тцѣ́хъ неꙋдобопости̑жнаѧ всемꙋ́дрѣ и҆з̾ѧсни́лъ є҆сѝ, всѧ̑ сподвиза́ѧ бг҃ови пѣ́ти: А҆ллилꙋ́їа.
І҆́косъ є҃
Да воспери́ши къ бг҃ꙋ, бг҃оно́сне, ᲂу҆ма̀ твоегѡ̀ движє́нїѧ всѧ̑, хране́нїе чꙋ́вствъ тве́рдѡ проше́лъ є҆сѝ, є҆мꙋ́же наꙋча́еши хотѧ́щыѧ ᲂу҆лꙋчи́ти бжⷭ҇твеннагѡ є҆дине́нїѧ, во є҆́же пѣ́ти тѝ, ѻ҆́тче, си́це:
Ра́дꙋйсѧ, бжⷭ҇твєнныхъ возвѣсти́телю: ра́дꙋйсѧ, ѿ хꙋ́ждшагѡ невѣ́дѣнїѧ и҆зба́вителю.
Ра́дꙋйсѧ, бжⷭ҇твенномꙋ наꙋча́ѧй по́двигꙋ: ра́дꙋйсѧ, нбⷭ҇нагѡ ꙗ҆ви́телю мꙋдрова́нїѧ.
Ра́дꙋйсѧ, широто̀ бжⷭ҇твеннагѡ ра́зꙋма и҆ премꙋ́дрый наста́вниче: ра́дꙋйсѧ, скрижа́ле бг҃опечатлѣ́ннаѧ дх҃о́внагѡ вѣща́нїѧ.
Ра́дꙋйсѧ, ᲂу҆тѣ́шителѧ пречтⷭ҇ны́й сосꙋ́де: ра́дꙋйсѧ, правосла́вныхъ бг҃ода́ннаѧ крѣ́посте.
Ра́дꙋйсѧ, ча́ше дꙋшепита́тельнагѡ не́ктара: ра́дꙋйсѧ, свѣ́та трисл҃нечнагѡ и҆спо́лненный.
Ра́дꙋйсѧ, пра́вило ѿше́льникѡмъ въ дѣ́лѣхъ: ра́дꙋйсѧ, ѻ҆́бразе ᲂу҆чи́телємъ въ словесѣ́хъ.
Ра́дꙋйсѧ, ѻ҆́тче нїкоди́ме, горы̀ ст҃ы́ѧ сла́вное ᲂу҆краше́нїе.
Конда́къ ѕ҃
Вертогра́дъ бжⷭ҇твенныхъ бл҃года́тей се́рдце соверши́въ, нїкоди́ме, жи́тельствомъ твои́мъ, вертогра́дъ бл҃года́тей, ꙗ҆́кѡ вои́стиннꙋ и҆спо́лнь бл҃гоꙋха́нїѧ бл҃года́тнагѡ, твою̀ кни́гꙋ наре́клъ є҆сѝ, є҆́юже наслажда́ющесѧ, вопїе́мъ: А҆ллилꙋ́їа.
І҆́косъ ѕ҃
Возсїѧ́въ на горѣ̀ а҆ѳѡ́нстѣй, ꙗ҆́кѡ новоѧвле́ннаѧ ѕвѣзда̀, просвѣща́еши хрⷭ҇то́вꙋ цр҃ковь добродѣ́телей твои́хъ зарѧ́ми, нб҃отаи́нниче нїкоди́ме прпⷣбне: ѿню́дꙋже возжиза́еми свѣ́томъ твои́мъ, зове́мъ:
Ра́дꙋйсѧ, ѕвѣздо̀ цр҃ко́внаѧ: ра́дꙋйсѧ, свѣ́точꙋ бл҃гоче́стїѧ.
Ра́дꙋйсѧ, бг҃осло́вѡвъ дре́внихъ и҆з̾ѧсне́нїе: ра́дꙋйсѧ, чꙋжды́хъ ᲂу҆че́нїй низверже́нїе.
Ра́дꙋйсѧ, бжⷭ҇твенныхъ преда́нїй храни́телю и҆ тайноводи́телю: ра́дꙋйсѧ, добродѣ́тельныхъ дѣѧ́нїй свѣтоно́сче сщ҃е́нный.
Ра́дꙋйсѧ, ꙗ҆́кѡ ѡ҆блича́еши ᲂу҆чє́нїѧ нововвѡ́днаѧ: ра́дꙋйсѧ, ꙗ҆́кѡ ꙗ҆влѧ́еши добродѣ́тєли бг҃ода̑нныѧ.
Ра́дꙋйсѧ, бж҃їй слꙋжи́телю теплѣ́йшїй: ра́дꙋйсѧ, вѣ́рныхъ защи́тниче неколеби́мый.
Ра́дꙋйсѧ, раю̀ многоразли́чныѧ премꙋ́дрости: ра́дꙋйсѧ, свѣти́ло є҆́же во хрⷭ҇тѣ̀ наꙋче́нїѧ.
Ра́дꙋйсѧ, ѻ҆́тче нїкоди́ме, горы̀ ст҃ы́ѧ сла́вное ᲂу҆краше́нїе.
Конда́къ з҃
Пребыва́ѧй въ горѣ̀ а҆ѳѡ́нстѣй, ꙗ҆́коже въ го́рницѣ, ᲂу҆се́рдною мл҃твою и҆ посто́мъ дх҃о́внꙋю бл҃года́ть, премꙋ́дре, прїѧ́лъ є҆сѝ, та́инственнѡ въ тѧ̀ все́льшꙋюсѧ, ꙗ҆́коже а҆пⷭ҇ли, и҆́хже подража́тель ꙗ҆ви́лсѧ є҆сѝ, взыва́ѧ: А҆ллилꙋ́їа.
І҆́косъ з҃
Побѣ́дꙋ бл҃гочести̑вымъ ᲂу҆че́нїе твоѐ подае́тъ, вѣ́рнѡ поꙋча́ющымсѧ, нїкоди́ме ѻ҆́тче сщ҃е́нный, проти́вꙋ страсте́й и҆ всѧ́кїѧ є҆́реси: во ст҃ѣ́мъ бо дс҃ѣ дѣ́йствꙋетъ при́снѡ вопїю́щымъ:
Ра́дꙋйсѧ, побѣ́до правосла́вныхъ: ра́дꙋйсѧ, паде́нїе ѕлосла́вныхъ.
Ра́дꙋйсѧ, цр҃кве ве́лїй ᲂу҆чи́телю: ра́дꙋйсѧ, ст҃ы̑мъ дрє́внимъ ра́вне.
Ра́дꙋйсѧ, ꙗ҆́кѡ бога́тство ѡ҆ста́вилъ є҆сѝ на́мъ кни́гъ сщ҃е́нныхъ: ра́дꙋйсѧ, ꙗ҆́кѡ прекраща́еши всѧ́кое ᲂу҆бо́жество страсте́й.
Ра́дꙋйсѧ, до нб҃сѐ досѧза́ѧй сто́лпе бг҃опросвѣще́нный: ра́дꙋйсѧ, ᲂу҆тѣ́шителѧ свѣти́льниче невече́рнїй.
Ра́дꙋйсѧ, ѻ҆́блаче, ѡ҆сѣнѧ́ѧй вѣ̑рныѧ: ра́дꙋйсѧ, свѣщѐ, возсїѧва́ющаѧ лꙋ̑чшаѧ.
Ра́дꙋйсѧ, бжⷭ҇твенныхъ догма́тѡвъ проповѣ́дниче: ра́дꙋйсѧ, стрꙋ́й невеще́ственныхъ и҆сто́чниче.
Ра́дꙋйсѧ, ѻ҆́тче нїкоди́ме, горы̀ ст҃ы́ѧ сла́вное ᲂу҆краше́нїе.
Конда́къ и҃
Диви́тъ помышлє́нїѧ вѣ́рныхъ, бг҃оглаго́ливе, мно́жество премꙋ́дрыхъ писа́нїй твои́хъ: ты́ бо премꙋ́дростїю бжⷭ҇твенною и҆ си́лою нбⷭ҇ною, нїкоди́ме, пи́шеши и҆ вѣща́еши, прпⷣбне, и҆ всѧ̑ побꙋжда́еши пѣ́ти: А҆ллилꙋ́їа.
І҆́косъ и҃
Всю̀ цр҃ковь, ꙗ҆́коже бг҃одѣ́тельнїи свѣ́ти, твоѧ̑ бг҃опреда̑ннаѧ словеса̀ просвѣща́ютъ, ѻ҆́тче, та́инственнѣ, и҆ къ соверше́ннѣйшихъ разꙋмѣ́нїю ведꙋ́тъ ꙗ҆̀же въ сїѧ̑ приница́ющыѧ, и҆ вопїю́щыѧ тѝ є҆диногла́снѣ:
Ра́дꙋйсѧ, трꙋбо̀ неизрече́нныхъ: ра́дꙋйсѧ, таи́нниче нбⷭ҇ныхъ.
Ра́дꙋйсѧ, дх҃а кни́жниче бг҃оглаго́ливый: ра́дꙋйсѧ, ѿ свы́шнѧгѡ вдохнове́нїѧ наꙋче́нный.
Ра́дꙋйсѧ, ꙗ҆́кѡ бжⷭ҇твеннаѧ вла́га тѝ даде́сѧ съ нб҃сѐ: ра́дꙋйсѧ, ꙗ҆́кѡ ѡ҆бл҃годати́лсѧ є҆сѝ ѿ рꙋкѝ бж҃їѧ.
Ра́дꙋйсѧ, бг҃осло́вїѧ та́инственнагѡ гꙋ̑сли: ра́дꙋйсѧ, бг҃оглаго́ланїѧ нбⷭ҇нагѡ цѣвни́це.
Ра́дꙋйсѧ, страсте́й ѿсѣца́ѧй те́рнїе: ра́дꙋйсѧ, дꙋ́шъ ѡ҆чища́ѧй ни́вꙋ.
Ра́дꙋйсѧ, бж҃їѧ бл҃гоꙋтро́бїѧ ѧ҆зы́че: ра́дꙋйсѧ, вѣ́рныхъ правосла́вныхъ сла́во.
Ра́дꙋйсѧ, ѻ҆́тче нїкоди́ме, горы̀ ст҃ы́ѧ сла́вное ᲂу҆краше́нїе.
Конда́къ ѳ҃
Къ подвигѡ́мъ наставлѧ́ѧ проти́вꙋ врагѡ́въ мы́сленныхъ, нїкоди́ме, прпⷣбныхъ и҆сполне́нїе, неви́димꙋю бра́нь нарица́еши ю҆́же премꙋ́дрѣ списа́лъ є҆сѝ кни́гꙋ, ст҃е: ѿ сеѧ́ бо наꙋча́емсѧ къ бг҃ꙋ возводи́тисѧ, пою́ще: А҆ллилꙋ́їа.
І҆́косъ ѳ҃
Сп҃совыхъ пра́здникѡвъ речє́нїѧ бг҃одохновє́ннаѧ и҆ пѣ̑сни всемꙋ̑дрыѧ въ широтꙋ̀ распространѧ́ѧ и҆ глꙋбинꙋ̀, ю҆́же въ ни́хъ бл҃года́ть всѣ̑мъ по́далъ є҆сѝ, є҆́юже дꙋ́шы веселѧ́тсѧ, нїкоди́ме, тебѣ̀ вопїю́щихъ:
Ра́дꙋйсѧ, пѣ́сней толкова́телю бжⷭ҇твенныхъ: ра́дꙋйсѧ, дщи́це слове́съ ст҃ы́хъ.
Ра́дꙋйсѧ, вѣ́ѧнїѧ бжⷭ҇твеннагѡ сокро́вищнице: ра́дꙋйсѧ, цр҃кве хрⷭ҇то́вы ᲂу҆краше́нїе.
Ра́дꙋйсѧ, дх҃а сокро́вище и҆ храни́лище добродѣ́телей: ра́дꙋйсѧ, ѻ҆рга́не бг҃одохнове́нный пѣ́сней дх҃о́вныхъ.
Ра́дꙋйсѧ, ꙗ҆́кѡ ѡ҆чища́еши вѣ́рныхъ сердца̀: ра́дꙋйсѧ, ꙗ҆́кѡ произлива́еши живонѡ́снаѧ ѡ҆рошє́нїѧ.
Ра́дꙋйсѧ, дꙋ́шъ наста́вниче бг҃омꙋ́дрый: ра́дꙋйсѧ, чтⷭ҇ны̑мъ ѻ҆тцє́мъ равночтⷭ҇ный.
Ра́дꙋйсѧ, ᲂу҆ма̀ хране́нїю наꙋча́ѧй: ра́дꙋйсѧ, ра́дость та́инственнꙋю возсїѧва́ѧй.
Ра́дꙋйсѧ, ѻ҆́тче нїкоди́ме, горы̀ ст҃ы́ѧ сла́вное ᲂу҆краше́нїе.
Конда́къ і҃
Оу҆сты̀ бг҃овѣща́нными и҆ рꙋко́ю, двиза́емою дх҃а бл҃года́тїю, ѻ҆́тче, дх҃о́вныхъ степе́ней и҆з̾ѧснѧ́ѧ въ широтѣ̀ смы̑слы, лѣ́ствицꙋ и҆́нꙋ поста́вилъ є҆сѝ жела́ющымъ гдⷭ҇еви пѣ́ти: А҆ллилꙋ́їа.
І҆́косъ і҃
Премⷣрости бжⷭ҇твенныѧ вла́га, ꙗ҆́коже соломѡ́нꙋ, даде́сѧ тѝ, нїкоди́ме, ѿню́дꙋже цр҃кве ᲂу҆чи́тель премꙋ́дрый ꙗ҆ви́лсѧ є҆сѝ и҆ пресла́вный, на всѧ̑ лꙋ̑чшаѧ наставлѧ́ѧ, ѻ҆́тче, зовꙋ́щыѧ:
Ра́дꙋйсѧ, ᲂу҆́ме бг҃осло́вїѧ: ра́дꙋйсѧ, стрꙋѐ бг҃овѣща́нїѧ.
Ра́дꙋйсѧ, пото́че наслажде́нїѧ дꙋхо́внагѡ: ра́дꙋйсѧ, во словесѣ́хъ и҆ дѣ́лѣхъ пресвѣ́тлый.
Ра́дꙋйсѧ, вѣті́е многомꙋ́дрый глагѡ́лъ живо́тныхъ: ра́дꙋйсѧ, ᲂу҆ста̀ бл҃жє́ннаѧ гла́са дх҃о́внагѡ.
Ра́дꙋйсѧ, насади́телю добродѣ́телей нбⷭ҇ныхъ: ра́дꙋйсѧ, и҆скорени́телю нра́вѡвъ ѕлѣ́йшихъ.
Ра́дꙋйсѧ, те́плыѧ мл҃твы водворе́нїе: ра́дꙋйсѧ, вѣ́рныхъ бг҃ода́нное хвале́нїе.
Ра́дꙋйсѧ, бж҃їй пѣснопѣ́вче бг҃оглаго́ливый: ра́дꙋйсѧ, вождю̀ на́шъ бг҃оно́сный.
Ра́дꙋйсѧ, ѻ҆́тче нїкоди́ме, горы̀ ст҃ы́ѧ сла́вное ᲂу҆краше́нїе.
Конда́къ а҃і
Возвы́сивъ ᲂу҆ма̀ твоегѡ̀ къ бг҃ꙋ стремлє́нїѧ, ᲂу҆мертви́лъ є҆сѝ плотска̑ѧ движє́нїѧ, и҆ бжⷭ҇твеннымъ свѣ́томъ ѡ҆заре́нъ, ꙗ҆вле́ннѣ во а҆ѳѡ́нѣ просїѧ́лъ є҆сѝ, сло́вомъ и҆ дѣ́ломъ, прпⷣбне, къ бг҃ꙋ направлѧ́ѧ вопїю́щыѧ: А҆ллилꙋ́їа.
І҆́косъ а҃і
Свѣ́томъ ᲂу҆тѣ́шителевымъ премꙋ́дрыхъ писа́нїй твои́хъ бл҃года́ть, нїкоди́ме, вездѣ̀ сїѧ́етъ, и҆ вдыха́етъ въ дꙋ́шы та́инственное бл҃гоꙋха́нїе, и҆́мже страсте́й и҆збавлѧ́емсѧ ѕлово́нїѧ, взыва́юще:
Ра́дꙋйсѧ, цвѣ́те ра́йскїй: ра́дꙋйсѧ, тро́сте ᲂу҆тѣ́шителева.
Ра́дꙋйсѧ, мѷрополо́жнице бжⷭ҇твенныѧ бл҃гости: ра́дꙋйсѧ, бл҃гоꙋха́нїе житїѧ̀ чи́стагѡ.
Ра́дꙋйсѧ, мѵ́ро всебл҃гово́нное подви́жническїѧ жи́зни: ра́дꙋйсѧ, а҆рѡма́те нбⷭ҇ный жи́тельства дꙋхо́внагѡ.
Ра́дꙋйсѧ, тайнописа́телю ст҃ы́хъ догма́тѡвъ: ра́дꙋйсѧ, краснопи́сче сщ҃е́нныхъ смы́слѡвъ.
Ра́дꙋйсѧ, свирѣ́ле пѣ́сней бл҃года́тныхъ: ра́дꙋйсѧ, ли́кꙋ ст҃ы́хъ сопричте́нный.
Ра́дꙋйсѧ, дꙋ́шъ ᲂу҆твержде́нїе коле́блющихсѧ: ра́дꙋйсѧ, премꙋ́дрый мона́хѡвъ наста́вниче.
Ра́дꙋйсѧ, ѻ҆́тче нїкоди́ме, горы̀ ст҃ы́ѧ сла́вное ᲂу҆краше́нїе.
Конда́къ в҃і
Бл҃года́ть и҆ води́тельство къ пꙋтє́мъ сп҃си́тєльнымъ и҆ всѧ́цѣй по́льзѣ бжⷭ҇твеннѣй во ст҃ѣ́мъ дс҃ѣ при́снѡ кни́гъ твои́хъ мно́жество, ѽ нїкоди́ме, подае́тъ, и҆ веде́тъ къ бжⷭ҇твеннѣй сла́вѣ вопїю́щыѧ: А҆ллилꙋ́їа.
І҆́косъ в҃і
Пою́ще тебѣ̀ пѣ́снь, ꙗ҆́кѡ ᲂу҆чи́телѧ вели́каго и҆ бжⷭ҇твеннаго и҆ премꙋ́драго наста́вника цр҃кве хрⷭ҇то́вы, ѽ бг҃овѣща́нне, тѧ̀ почита́емъ, нїкоди́ме: но не преста́й, ст҃е, всѧ̑ просвѣща́ти зовꙋ́щыѧ:
Ра́дꙋйсѧ, а҆ѳѡ́на ве́лїѧ сла́во: ра́дꙋйсѧ, на́ѯоса бжⷭ҇твеннаѧ похвало̀.
Ра́дꙋйсѧ, мона́шествꙋющихъ свѣти́ло присносвѣ́тлое: ра́дꙋйсѧ, правосла́вныхъ пла́менниче неꙋсыпа́емый.
Ра́дꙋйсѧ, ѻ҆́бразе и҆ пра́вило и҆́нокѡвъ бг҃опрїѧ́тныхъ: ра́дꙋйсѧ, да́ре и҆ вѣ́нче безмо́лвникѡвъ бл҃гоговѣ́йныхъ.
Ра́дꙋйсѧ, цр҃кве стѣно̀ неколеби́мѣйшаѧ: ра́дꙋйсѧ, бл҃гоче́стїѧ свѣти́льниче свѣтоза́рнѣйшїй.
Ра́дꙋйсѧ, и҆́мже воспрїе́млемъ лꙋ̑чшаѧ: ра́дꙋйсѧ, и҆́мже ѿвраща́емъ хꙋ̑ждшаѧ.
Ра́дꙋйсѧ, бцⷣы таи́нниче: ра́дꙋйсѧ, соиме́нныхъ тебѣ̀ предста́телю.
Ра́дꙋйсѧ, ѻ҆́тче нїкоди́ме, горы̀ ст҃ы́ѧ сла́вное ᲂу҆краше́нїе.
Конда́къ г҃і
Ѽ нїкоди́ме ѻ҆́тче, горы̀ а҆ѳѡ́нскїѧ чꙋ́до и҆ всеѧ̀ цр҃кве сла́во, настоѧ́щее на́ше приноше́нїе млⷭ҇тивнѡ прїимѝ и҆ подава́й всѣ̑мъ свѣ́тъ бжⷭ҇твенный мл҃твами твои́ми, ꙗ҆́кѡ да при́снѡ бг҃ови вопїе́мъ: А҆ллилꙋ́їа.
Повто́ръ
Сей конда́къ глаго́лется три́жды, та́же і҆́косъ а҃-й и҆ конда́къ а҃-й.
І҆́косъ а҃
А҆́гг҃лъ нра̑вы и҆ мно́гїй ра́зꙋмомъ, нїкоди́ме, на а҆ѳѡ́нѣ ꙗ҆ви́лсѧ є҆сѝ: а҆́гг҃льское бо и҆мы́й житїѐ, а҆гг҃лолѣ́пнымъ гла́сомъ и҆з̾ѧсни́лъ є҆сѝ ѻ҆те́чєскаѧ писа̑нїѧ, и҆́миже просвѣща́еши вопїю́щыѧ:
Ра́дꙋйсѧ, наѯі́йское бл҃гоꙋкраше́нїе: ра́дꙋйсѧ, а҆ѳѡ́нское ѡ҆заре́нїе.
Ра́дꙋйсѧ, ѻ҆те́ческихъ догма́тѡвъ и҆зложе́нїе: ра́дꙋйсѧ, ст҃ы́хъ глагѡ́лъ и҆з̾ѧсне́нїе.
Ра́дꙋйсѧ, высото̀ мꙋдрова́нїѧ и҆ премꙋ́дрости рѣко̀: ра́дꙋйсѧ, глꙋбино̀ бжⷭ҇твеннагѡ вѣ́дѣнїѧ и҆ сокро́вище любвѐ.
Ра́дꙋйсѧ, ꙗ҆́кѡ показа́лсѧ є҆сѝ кни́жникъ бг҃оно́сный: ра́дꙋйсѧ, ꙗ҆́кѡ толко́вникъ є҆сѝ бг҃оглаго́ливый.
Ра́дꙋйсѧ, свѣти́льниче нра́вѡвъ че́стности: ра́дꙋйсѧ, пла́менниче го́рнїѧ свѣ́тлости.
Ра́дꙋйсѧ, и҆́мже вѣ́рнїи ᲂу҆твержда́ютсѧ: ра́дꙋйсѧ, и҆́мже вразѝ ᲂу҆страша́ютсѧ.
Ра́дꙋйсѧ, ѻ҆́тче нїкоди́ме, горы̀ ст҃ы́ѧ сла́вное ᲂу҆краше́нїе.
Конда́къ а҃
Ꙗ҆́кѡ бжⷭ҇твеннагѡ жи́тельства таи́нника и҆зрѧ́днаго, и҆ бл҃гоче́стїѧ бг҃оно́снаго ᲂу҆чи́телѧ, правосла́внаѧ цр҃ковь тѧ̀ почита́етъ: съ нб҃се́ бо дарова́нїе прїе́мъ, ѡ҆зарѧ́еши бжⷭ҇твенными твои́ми писа̑нїи вопїю́щыѧ тѝ: Ра́дꙋйсѧ, ѻ҆́тче нїкоди́ме, горы̀ ст҃ы́ѧ сла́вное ᲂу҆краше́нїе.
Моли́твы
Ѽ бг҃одохнове́нный и҆ вселе́нскїй и҆́стины ᲂу҆чи́телю, и҆зрѧ́днаѧ ст҃оимени́тыѧ горы̀ похвало̀, свѣтлѣ́йшаѧ ѕвѣздо̀ правосла́вныѧ цр҃кве собо́рныѧ, всепрпⷣбный и҆ ст҃ы́й ѻ҆́тче нїкоди́ме! Да́ждь на́мъ просвѣще́нїе мл҃твами твои́ми во и҆сполне́нїе бжⷭ҇твенныѧ во́ли, напра́ви стѡпы̀ на́шѧ ко стезѧ́мъ добродѣ́тельнагѡ житїѧ̀, ѡ҆сѣнѝ на́съ да́нною тебѣ̀ бл҃года́тїю и҆ вразꙋмѝ ᲂу҆́мъ на́шъ, во є҆́же разꙋмѣ́ти бг҃омꙋ̑драѧ поꙋчє́нїѧ твоѧ̑, да ѡ҆брѧ́щемъ въ ни́хъ покаѧ́нїе, и҆сцѣле́нїе, ра́дость, ми́ръ, кро́тость, поко́й, любо́вь, и҆ а҆́ще что̀ добро̀ и҆ бл҃го и҆ сп҃си́тельно, и҆ въ концѣ̀ живо́тъ вѣ́чный, и҆ моли́сѧ всегда̀ ко гдⷭ҇ꙋ ѡ҆ всѣ́хъ на́съ, и҆́скреннѣ лю́бѧщихъ тѧ̀ и҆ на всѧ́къ де́нь и҆ ча́съ призыва́ющихъ ѻ҆те́ческꙋю твою̀ бл҃гость и҆ по́мощь. А҆ми́нь.