Кондак 1
Избра́ннии ца́рственнии страстоте́рпцы, еди́на дома́шняя це́рковь Христо́ва, Нико́лае, Алекса́ндро, Алекси́е, О́льго, Татиа́но, Мари́е и Анастаси́е, вы́, сою́зом любве́ связу́еми, я́ко а́гнцы, Христу́ Бо́гу ве́рою после́довали есте́ и, в страда́ниих сме́рть претерпе́вше, Ца́рствия Небе́снаго насле́дницы яви́лися есте́. Ны́не же, дерзнове́ние ко Го́споду иму́ще, моли́теся о земне́м оте́честве ва́шем, да прославля́ем ва́с си́це:
Ра́дуйтеся, ца́рственнии страстоте́рпцы, земли́ Росси́йския храни́телие и моли́твенницы.
Икос 1
А́нгельскими Си́лами укрепля́еми во и́стиннем пути́, седмочи́сленнии страстоте́рпцы, о житии́ пра́веднем и богоуго́днем ревнова́ли есте́, да я́вите наро́ду ру́сскому о́браз благочести́вых царе́й. Сего́ ра́ди прославля́ем ва́с си́це:
Ра́дуйтеся, стра́х Бо́жий в се́рдце, я́ко основа́ние, положи́вшии; ра́дуйтеся, прему́дрость Бо́жию и́стинне возлюби́вшии.
Ра́дуйтеся, все́ упова́ние на Бо́га возложи́вшии; ра́дуйтеся, оте́честву ва́шему ве́рно послужи́вшии.
Ра́дуйтеся, христиа́нскаго благоче́стия тве́рдое пра́вило; ра́дуйтеся, ца́рственнаго ро́да Росси́йскаго похвало́.
Ра́дуйтеся, правосла́вныя ве́ры кре́пкое испове́дание; ра́дуйтеся, стра́ждущаго наро́да на́шего утеше́ние.
Ра́дуйтеся, ца́рственнии страстоте́рпцы, земли́ Росси́йския храни́телие и моли́твенницы.
Кондак 2
Ви́дя Госпо́дь покая́ние наро́да на́шего, егда́ сму́тная времена́ наста́ша, умилосе́рдися и яви́ ми́лость Свою́ во избра́нии Михаи́ла царя́, его́же ико́ною Пречи́стыя Богоро́дицы, Фео́доровская имену́емою, чрез роди́тельницу благослови́, да бу́дет ико́на сия́ покро́в и защище́ние ему́ и всему́ новоизбра́нному ца́рскому ро́ду и во утвержде́ние держа́вы Росси́йския. Сего́ ра́ди благода́рне вопие́м Бо́гу: Аллилу́иа.
Икос 2
Разуме́ша лю́дие росси́йстии, я́ко, избра́нием на ца́рство но́ваго ро́да благочести́ваго, утиши́ Госпо́дь нестрое́ния и сму́ты в земли́ на́шей, принесо́ша обе́т ве́рнаго служе́ния ро́ду сему́. Мы́ же, любви́ и ре́вности те́х подража́юще, к ва́м, ца́рственнии страстоте́рпцы, я́ко насле́дником сего́ избра́ния со умиле́нием вопие́м:
Ра́дуйтеся, вене́ц и похвало́ ро́да ца́рскаго и свяще́ннаго; ра́дуйтеся, ко́рене благочести́ваго пресла́вныя о́трасли.
Ра́дуйтеся, патриа́рха Росси́йскаго Филаре́та свято́е прозябе́ние; ра́дуйтеся, попече́нию его́ о Це́ркви и оте́честве подража́вшии.
Ра́дуйтеся, вели́кия ста́рицы и́нокини Ма́рфы благослове́нное насле́дие; ра́дуйтеся, поко́рность во́ли Бо́жией от нея́ восприи́мшии.
Ра́дуйтеся, пред ико́ною Бо́жия Ма́тере Фео́доровския моли́твы при́сно возноси́вшии; ра́дуйтеся, все́ упова́ние на по́мощь Богоро́дицы с ве́рою возлага́вшии.
Ра́дуйтеся, ца́рственнии страстоте́рпцы, земли́ Росси́йския храни́телие и моли́твенницы.
Кондак 3
Си́ла Бо́жия и промышле́ние Всевы́шняго яви́ся в рожде́нии твое́м, ца́рственный страстоте́рпче Нико́лае, вели́каго бо святи́теля и́мя восприе́м, засту́пник Росси́йския земли́ показа́лся еси́. Мно́гия же ско́рби и боле́зни, подо́бне И́ову пра́ведному, в житии́ претерпе́в, ны́не с ли́ки страстоте́рпцев наслажда́ешися ра́йскаго блаже́нства, воспева́я Бо́гу: Аллилу́иа.
Икос 3
Име́я сугу́быя засту́пники и покрови́тели в рожде́нии твое́м, И́ова многострада́льнаго и Никола́я чудотво́рца, держа́вный страстоте́рпче, доброде́телем те́х после́довал еси́. Мы́ же, дивя́щеся промышле́нию Творца́, во святы́х си́х о́браз благоче́стия указа́вшаго ти́, благогове́йне воспева́ем си́це:
Ра́дуйся, в моли́твах святи́теля Ми́р Лики́йских при́сно призыва́яй; ра́дуйся, по́мощию того́ Росси́йскую держа́ву пра́ведно окормля́яй.
Ра́дуйся, о́бразом кро́тости тому́ уподо́бивыйся; ра́дуйся, милосе́рдие мно́гое, я́коже о́ный, яви́вый.
Ра́дуйся, терпе́ние И́овле в се́рдце твое́м име́вый; ра́дуйся, ве́рность Бо́гу в житии́ твое́м до конца́ сохрани́вый.
Ра́дуйся, в тя́жких беда́х, я́коже о́ный, благодаре́ние Бо́гу приноси́вый; ра́дуйся, вся́ находя́щая на тя́ со смире́нием прие́мый.
Ра́дуйтеся, ца́рственнии страстоте́рпцы, земли́ Росси́йския храни́телие и моли́твенницы.
Кондак 4
Бу́рю смуще́ния, воздвиза́емую от челове́к безбо́жных в стране́ на́шей, ви́дя, страстоте́рпче Нико́лае, не смути́лся еси́ в се́рдце твое́м и, все́ упова́ние на Бо́га возложи́в, не возропта́л еси́, егда́ отверго́ша тя́ лю́ди твоя́, оба́че с ве́рою воспе́л еси́ Бо́гу: Аллилу́иа.
Икос 4
Слы́ша о мяте́жех, боле́знех и междоусо́бных бра́нех, наше́дших на зе́млю Ру́сскую, во у́зах сы́й, страстоте́рпче царю́ Нико́лае, моле́ние о лю́дех ея́ непреста́нне приноси́л еси́, милосе́рдие Бо́жие к ни́м призыва́я. Сего́ ра́ди мы́ воспева́ем тебе́ та́ко:
Ра́дуйся, от ю́ности оте́чество и наро́д тво́й возлюби́вый; ра́дуйся, я́ко и во отверже́нии любо́вь сию́ сохрани́вый.
Ра́дуйся, пома́зание на ца́рство с благогове́нием прие́мый; ра́дуйся, о́браз благочести́ваго царя́ ми́ру яви́вый.
Ра́дуйся, ца́рский вене́ц со смире́нием на ся́ возложи́вый; ра́дуйся, венца́ страда́ний от Го́спода удосто́енный.
Ра́дуйся, ца́рское служе́ние я́ко послуша́ние Бо́гу разуме́вый; ра́дуйся, поноше́ния, я́ко кре́ст, взе́мый и с терпе́нием понесы́й.
Ра́дуйтеся, ца́рственнии страстоте́рпцы, земли́ Росси́йския храни́телие и моли́твенницы.
Кондак 5
Богосве́тлый свети́льник во мра́це скорбе́й благове́рней супру́жнице твое́й яви́лся еси́, ца́рственный страстоте́рпче Нико́лае, указу́я и возглавля́я пу́ть ея́, я́коже повеле́ Госпо́дь. Мы́ же, прославля́юще ва́ш благослове́нный сою́з во Христе́, хвалу́ Бо́гу воздае́м, пою́ще: Аллилу́иа.
Икос 5
Ви́дя ца́рственный страстоте́рпец ю́ницу Алекса́ндру, я́ко голуби́цу чи́сту, избра́ ю́ себе́ в благове́рную супру́жницу, правосла́вную цари́цу и ма́терь наро́да росси́йскаго. Мы́ же, ве́дуще усе́рдное служе́ние ея́, воспева́ем си́це:
Ра́дуйся, имени́таго ро́да благочести́вое прозябе́ние; ра́дуйся, от лю́терския ве́ры к Правосла́вию о́бразе спаси́тельнаго прехожде́ния.
Ра́дуйся, все́м се́рдцем моли́тву возлюби́вшая; ра́дуйся, о слу́жбе Бо́жией серде́чно ревнова́вшая.
Ра́дуйся, сло́вом Бо́жиим и писа́нием святы́х оте́ц себе́ назда́вшая; ра́дуйся, уста́вы церко́вныя благогове́йно соблюда́вшая.
Ра́дуйся, ру́сское благоче́стие досто́йне восприе́мшая; ра́дуйся, и́стинныя жи́зни во Христе́ приобщи́вшаяся.
Ра́дуйтеся, ца́рственнии страстоте́рпцы, земли́ Росси́йския храни́телие и моли́твенницы.
Кондак 6
Пропове́дует житие́ ва́ше бра́ка свята́го чистоту́, благове́рнии Нико́лае и Алекса́ндро. Вы́ бо, благода́ть сего́ вели́каго та́инства досто́йно восприе́мше, да́же до му́ченическия кончи́ны ве́рность Христу́ и любо́вь дру́г ко дру́гу сохрани́ли есте́, при́сно воспева́юще Бо́гу: Аллилу́иа.
Икос 6
Возсия́ в стране́ Росси́йстей, я́ко прекра́сная свети́ла, благове́рная ца́рственная чета́ Никола́й и Алекса́ндра, супру́зи, сою́зом любве́ Христо́вы связу́емии. Мы́ же, прославля́юще о́браз и́х целому́дреннаго и добронра́внаго жития́ в ми́ре се́м, со благогове́нием воспева́ем си́це:
Ра́дуйтеся, все́м се́рдцем Бо́га взыска́вшии; ра́дуйтеся, в путе́х Госпо́дних непоро́чно ходи́вшии.
Ра́дуйтеся, дво́ице честна́я, свы́ше избра́нная; ра́дуйтеся, дво́ице свята́я, сла́вою и че́стию от Бо́га венча́нная.
Ра́дуйтеся, целому́дрие супру́жеское многоча́дием просла́вившии; ра́дуйтеся, ча́да ва́ша, я́ко новосажде́ния ма́сличная, о́крест трапе́зы Небе́сныя собра́вшии.
Ра́дуйтеся, супру́ги во благоче́стии и любви́ жи́ти науча́ющии; ра́дуйтеся, ми́р Христо́в о́ным ми́лостивно низпосыла́ющии.
Ра́дуйтеся, ца́рственнии страстоте́рпцы, земли́ Росси́йския храни́телие и моли́твенницы.
Кондак 7
Хотя́ще ва́ш до́м благоче́стно устро́ити, любо́вь я́ко основа́ние положи́ли есте́ и бра́к че́стен до́бре соблюли́ есте́, благове́рнии супру́зи Нико́лае и Алекса́ндро. Те́мже и дще́ри ва́ша, я́ко му́дрыя ева́нгельския де́вы, воспита́вше, в неве́сты Христу́ угото́вали есте́. С ни́миже ны́не вку́пе воспева́ете Бо́гу: Аллилу́иа.
Икос 7
Но́вую ми́лость дарова́ Госпо́дь наро́ду ру́сскому, целому́дренныя дще́ри ца́рственныя четы́, О́льгу, Татиа́ну, Мари́ю и Анастаси́ю. Ты́я бо, жена́м мироно́сицам подража́ющия, еле́ем милосе́рдия боля́щим и стра́ждущим послужи́ша и, сме́рть за Христа́ прие́мша, ны́не Престо́лу Бо́жию предстоя́т. Сего́ ра́ди прославля́ем и́х си́це:
Ра́дуйтеся, дще́ри царе́вы, обетова́ний Бо́жиих сподо́бльшияся; ра́дуйтеся, за́поведь Бо́жию о почита́нии роди́телей соблю́дшия.
Ра́дуйтеся, досто́инство ца́рственное свя́то сохра́ньшия; ра́дуйтеся, стихи́ями ми́ра сего́ не порабоще́нныя.
Ра́дуйтеся, лю́дем, су́щим в беда́х и ско́рбех, я́ко Христу́, послужи́вшия; ра́дуйтеся, за враго́в свои́х усе́рдно моли́вшияся.
Ра́дуйтеся, а́гницы непоро́чныя, в же́ртву Бо́гу себе́ прине́сшия; ра́дуйтеся, неве́сты Христо́вы, в черто́зех Жениха́ Небе́снаго пребыва́ющия.
Ра́дуйтеся, ца́рственнии страстоте́рпцы, земли́ Росси́йския храни́телие и моли́твенницы.
Кондак 8
Стра́нно и чу́дно бы́сть рожде́ние твое́, святы́й царе́вичу Алекси́е. Пло́д бо благосла́вен моли́тв Саро́вскаго чудотво́рца и ча́емый насле́дник ца́рственных роди́телей бы́в, сла́ва, наде́жда и упова́ние яви́лся еси́ все́м конце́м земли́ на́шея. Сего́ ра́ди лю́дие росси́йстии с ра́достию благода́рственно воспе́ша Бо́гу: Аллилу́иа.
Икос 8
К вы́шним душе́ю чи́стою устремля́яся, святы́й царе́вичу Алекси́е, измла́да боле́знь я́ко кре́ст, от Го́спода да́нный, безро́потно поне́сл еси́, последи́ же, я́ко а́гнец незло́бивый, рука́ми злочести́вых убие́н, моли́твенник пред Бо́гом яви́лся еси́. Сего́ ра́ди воспева́ем ти́ си́це:
Ра́дуйся, отроча́, от утро́бы ма́тере Бо́гом предызбра́нное; ра́дуйся, ча́до, моли́твами Саро́вскаго чудотво́рца Росси́и дарова́нное.
Ра́дуйся, страда́льче, измла́да ско́рби и неду́ги безро́потно понесы́й; ра́дуйся, царе́вичу, в боле́знех сострада́ние к лю́дем обреты́й.
Ра́дуйся, насле́дниче, лише́ние ца́рства земна́го со смире́нием прие́мый; ра́дуйся, страстоте́рпче, Ца́рствия Небе́снаго от Бо́га удосто́енный.
Ра́дуйся, а́гнче незло́биве, от безбо́жных закла́нный; ра́дуйся, ца́рственный о́троче, венце́м нетле́нным от Царя́ ца́рствующих увенча́нный.
Ра́дуйтеся, ца́рственнии страстоте́рпцы, земли́ Росси́йския храни́телие и моли́твенницы.
Кондак 9
Вся́к у́м челове́ческий смути́ся, егда́ в земли́ на́шей беззако́ние умно́жися, и́стина помрачи́ся и ме́рзость запусте́ния на ме́сте святе́м ста́. Ты́ же, царю́ Нико́лае, изгна́ние, поруга́ние и темни́чное заточе́ние му́жественне претерпе́в, сы́н ве́рный Святы́я Це́ркве и страстоте́рпец Христо́в яви́лся еси́. Сего́ ра́ди Це́рковь Ру́сская, прославля́ющи тя́, Бо́гу вопие́т: Аллилу́иа.
Икос 9
Вети́и злому́дреннии тща́шася оболга́ти тя́ клевето́ю, пома́занниче Бо́жий Нико́лае, ты́ же, ева́нгельски вся́ терпя́, о благоче́стии наро́да правосла́внаго попече́ние сугу́бое прилага́л еси́. Сего́ ра́ди, па́мять твою́ све́тло пра́зднующе, воспева́ем ти́ си́це:
Ра́дуйся, прославле́ния уго́дников Бо́жиих до́брый рачи́телю; ра́дуйся, па́стыря Кроншта́дтскаго благогове́йный почита́телю.
Ра́дуйся, Саро́вских торже́ств держа́вный возглави́телю; ра́дуйся, и́ноческих оби́телей благочести́вый покрови́телю.
Ра́дуйся, духо́вных вертогра́дов усе́рдный попечи́телю; ра́дуйся, правосла́вных хра́мов боголюби́вый зда́телю.
Ра́дуйся, Святы́я Земли́ и Афо́нския Горы́ ще́дрый благотвори́телю; ра́дуйся, устрое́ния Це́ркве Ру́сския му́дрый ревни́телю.
Ра́дуйтеся, ца́рственнии страстоте́рпцы, земли́ Росси́йския храни́телие и моли́твенницы.
Кондак 10
Спасти́ хотя́ лю́ди росси́йския от ро́зни братоуби́йственныя, царю́ Нико́лае, престо́л земны́й оста́вил еси́, оба́че, на ми́лость Бо́жию упова́я, непоколеби́мь в ве́ре и благоче́стии пребы́л еси́, воспева́я: Аллилу́иа.
Икос 10
Стена́ и огражде́ние бы́сть Госпо́дь тебе́, царю́ Нико́лае, Ему́же те́пле моли́лся еси́, да сохрани́т держа́ву Росси́йскую от наше́ствия иноплеме́нник и братоуби́йственныя бра́ни, наипа́че же лю́ди правосла́вныя во благоче́стии да укрепи́т. Сего́ ра́ди благода́рне воспева́ем ти́ си́це:
Ра́дуйся, полко́в росси́йских му́дрый предводи́телю; ра́дуйся, ра́тных люде́й христолюби́вый попечи́телю.
Ра́дуйся, оте́чества на́шего держа́вный храни́телю; ра́дуйся, слове́нских наро́дов ре́вностный защи́тителю.
Ра́дуйся, мечи́ на ора́ла прекова́ти наро́ды призва́вый; ра́дуйся, ми́р име́ти со все́ми язы́ки преи́скренне жела́вый.
Ра́дуйся, благове́рным князе́м в благоче́стии подража́вый; ра́дуйся, о́браз царя́ правосла́внаго во смире́нии ми́ру яви́вый.
Ра́дуйтеся, ца́рственнии страстоте́рпцы, земли́ Росси́йския храни́телие и моли́твенницы.
Кондак 11
Пе́ния вся́каго досто́йна па́мять ва́ша, святи́и ца́рственнии страстоте́рпцы. Вы́ бо, о́браз испове́дничества и ре́вности по Бо́зе ве́рным лю́дем показа́вше, запове́дасте не мсти́ти злоде́ющим, па́че же проща́ти гоня́щим и моли́тву твори́ти за ни́х, пою́ще Бо́гу: Аллилу́иа.
Икос 11
Светоно́сный свети́льник седмочи́сленный ве́мы ва́с, святи́и ца́рственнии страстоте́рпцы, ца́рским бо путе́м ше́ствующе, угото́васте себе́ за Христа́ пострада́ти. Те́мже просвети́те омраче́нная сердца́ на́ша и ева́нгельским путе́м ше́ствовати научи́те на́с, прославля́ющих ва́с си́це:
Ра́дуйтеся, а́гнцы незло́бивии, А́гнцу Бо́жию в кро́тости подража́вшии; ра́дуйтеся, о́браз терпе́ния в злострада́ниих ве́рным показа́вшии.
Ра́дуйтеся, во все́м житии́ со́весть чи́сту храни́вшии; ра́дуйтеся, убие́ние беззако́нное смире́нно восприе́мшии.
Ра́дуйтеся, седмочи́сленнии страстоте́рпцы, во еди́ном ду́се Бо́гу предста́вшии; ра́дуйтеся, кро́вию му́ченическою зе́млю на́шу обагри́вшии.
Ра́дуйтеся, ли́к благове́рных царе́й и князе́й воспо́лнившии; ра́дуйтеся, собо́р святы́х земли́ Росси́йския украси́вшии.
Ра́дуйтеся, ца́рственнии страстоте́рпцы, земли́ Росси́йския храни́телие и моли́твенницы.
Кондак 12
Благода́ть изря́дну Бо́г дарова́ Це́ркви Росси́йстей, просла́вив ва́с на Небеси́, ца́рственнии страстоте́рпцы, храни́телие и покрови́телие страны́ на́шея. Сего́ ра́ди и мы́ на земли́ почита́ем ва́с, Бо́гу вопию́ще: Аллилу́иа.
Икос 12
Воспева́юще по́двиги ва́ша, ца́рственнии страстоте́рпцы, прославля́ем Триеди́наго Бо́га. Вы́ бо, соизволе́нием Отца́ Безнача́льнаго, соверше́нием Сы́на Единоро́днаго и соде́йствием Свята́го Ду́ха Бо́жия, прича́стницы Ца́рствия Небе́снаго соде́ластеся и засту́пницы оте́чества на́шего яви́стеся. Сего́ ра́ди дерза́ем взыва́ти ва́м си́це:
Ра́дуйтеся, я́ко прославле́нию ва́шему Це́рковь ра́дуется; ра́дуйтеся, я́ко чудесы́ ва́шими ве́ра укрепля́ется.
Ра́дуйтеся, я́ко о́бразы ва́ши мироточе́нием прославля́ются; ра́дуйтеся, я́ко в че́сть ва́шу хра́мы созида́ются.
Ра́дуйтеся, я́ко житие́м ва́шим лю́ди благоче́стию науча́ются; ра́дуйтеся, я́ко терпе́нием ва́шим во страда́ниих ве́рнии назида́ются;
Ра́дуйтеся, я́ко ева́нгельския заве́ты исполня́ти на́с наставля́ете; ра́дуйтеся, я́ко беды́ и ско́рби му́жественне нести́ на́м помога́ете.
Ра́дуйтеся, ца́рственнии страстоте́рпцы, земли́ Росси́йския храни́телие и моли́твенницы.
Кондак 13
О святи́и ца́рственнии страстоте́рпцы! Приими́те от на́с похва́льное сие́ пе́ние и ми́лостивым ва́шим хода́тайством умоли́те Царя́ сла́вы ми́р стране́ на́шей дарова́ти, Це́рковь в Правосла́вии и еди́нстве сохрани́ти, на́с же во благоче́стии утверди́ти, да вопие́м Бо́гу: Аллилу́иа.
Повтор
Этот кондак читается трижды, затем икос 1-й и кондак 1-й.
Икос 1
А́нгельскими Си́лами укрепля́еми во и́стиннем пути́, седмочи́сленнии страстоте́рпцы, о житии́ пра́веднем и богоуго́днем ревнова́ли есте́, да я́вите наро́ду ру́сскому о́браз благочести́вых царе́й. Сего́ ра́ди прославля́ем ва́с си́це:
Ра́дуйтеся, стра́х Бо́жий в се́рдце, я́ко основа́ние, положи́вшии; ра́дуйтеся, прему́дрость Бо́жию и́стинне возлюби́вшии.
Ра́дуйтеся, все́ упова́ние на Бо́га возложи́вшии; ра́дуйтеся, оте́честву ва́шему ве́рно послужи́вшии.
Ра́дуйтеся, христиа́нскаго благоче́стия тве́рдое пра́вило; ра́дуйтеся, ца́рственнаго ро́да Росси́йскаго похвало́.
Ра́дуйтеся, правосла́вныя ве́ры кре́пкое испове́дание; ра́дуйтеся, стра́ждущаго наро́да на́шего утеше́ние.
Ра́дуйтеся, ца́рственнии страстоте́рпцы, земли́ Росси́йския храни́телие и моли́твенницы.
Кондак 1
Избра́ннии ца́рственнии страстоте́рпцы, еди́на дома́шняя це́рковь Христо́ва, Нико́лае, Алекса́ндро, Алекси́е, О́льго, Татиа́но, Мари́е и Анастаси́е, вы́, сою́зом любве́ связу́еми, я́ко а́гнцы, Христу́ Бо́гу ве́рою после́довали есте́ и, в страда́ниих сме́рть претерпе́вше, Ца́рствия Небе́снаго насле́дницы яви́лися есте́. Ны́не же, дерзнове́ние ко Го́споду иму́ще, моли́теся о земне́м оте́честве ва́шем, да прославля́ем ва́с си́це:
Ра́дуйтеся, ца́рственнии страстоте́рпцы, земли́ Росси́йския храни́телие и моли́твенницы.
Молитвы
О свята́я седмери́це, ца́рственнии страстоте́рпцы, Нико́лае, Алекса́ндро, Алекси́е, Мари́е, О́льго, Татиа́но и Анастаси́е!
Вы́, сою́зом любве́ Христо́вы связу́еми, до́м ва́ш, я́ко ма́лую Це́рковь, благоче́стно устро́или есте́ и смире́нием себе́ посреде́ земна́го вели́чия украси́ли есте́. В годи́ну же братоуби́йственныя бра́ни и гоне́ний безбо́жных во оте́честве на́шем, все́ упова́ние на Бо́га возложи́вше, о́браз терпе́ния и страда́ния все́й земли́ Росси́йстей яви́ли есте́ и, моля́щеся о мучи́телех, клевету́, у́зы и изгна́ние, глумле́ние, насмея́ние и оболга́ние, убие́ние и теле́с поруга́ние му́жественне претерпе́ли есте́. Сего́ ра́ди от земна́го ца́рствия к Небе́сному прешли́ есте́ и те́плии хода́таи о на́с яви́лися есте́.
О святи́и уго́дницы Бо́жии! Моли́теся о на́с Бо́гу, да Це́рковь в единомы́слии и тве́рдей ве́ре соблюде́т, страну́ на́шу ми́ром и благоде́нствием огради́т и от междоусо́бныя бра́ни и разделе́ния изба́вит, вла́сть предержа́щую умудри́т, во́инство му́жеством украси́т, супру́ги в ве́рности и любви́ укрепи́т, ча́да в благоче́стии и послуша́нии возрасти́т, и вся́ ны́ ку́пно с ва́ми сподо́бит воспева́ти пречестно́е и великоле́пое и́мя Живонача́льныя Тро́ицы, Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.
О святы́й страстоте́рпче, царю́ му́чениче Нико́лае! Госпо́дь тя́ избра́ пома́занника Своего́, во е́же ми́лостивно и пра́во суди́ти лю́дем твои́м и храни́телем Це́ркве Правосла́вныя бы́ти. Сего́ ра́ди со стра́хом Бо́жиим ца́рское служе́ние и о душа́х попече́ние соверша́л еси́. Госпо́дь же, испыту́я тя́, я́ко И́ова Многострада́льнаго, попусти́ тебе́ поноше́ния, ско́рби го́рькия, изме́ну, преда́тельство, бли́жних отчужде́ние и в душе́вных му́ках земна́го ца́рства оставле́ние. Вся́ сия́ ра́ди бла́га Росси́и я́ко ве́рный сы́н ея́ претерпе́в и я́ко и́стинный ра́б Христо́в му́ченическую кончи́ну прие́м, Небе́снаго Ца́рства дости́гл еси́, иде́же наслажда́ешися вы́шния сла́вы у Престо́ла все́х Царя́, ку́пно со свято́ю супру́жницею твое́ю, цари́цею Алекса́ндрою, и ца́рственными ча́ды, Алекси́ем, О́льгою, Татиа́ною, Мари́ею и Анастаси́ею.
Ны́не, име́я дерзнове́ние ве́лие у Христа́ Царя́, моли́, да пода́ст на́м Госпо́дь грехо́в проще́ние и на вся́кую доброде́тель наста́вит на́с, да стяжи́м смире́ние, кро́тость и любо́вь и сподо́бимся Небе́снаго Ца́рствия, иде́же ку́пно с тобо́ю и все́ми святы́ми новому́ченики и испове́дники Росси́йскими просла́вим Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.
Конда́къ а҃
И҆збра́ннїи ца́рственнїи стрⷭ҇тоте́рпцы, є҆ди́на дома́шнѧѧ цр҃ковь хрⷭ҇то́ва, нїко́лае, а҆леѯа́ндро, а҆леѯі́е, ѻ҆́льго, татїа́но, марі́е и҆ а҆настасі́е, вы̀ сою́зомъ любвѐ свѧзꙋ́еми, ꙗ҆́кѡ а҆́гнцы, хрⷭ҇тꙋ̀ бг҃ꙋ вѣ́рою послѣ́довали є҆стѐ, и҆ въ страда́нїихъ сме́рть претерпѣ́вше, црⷭ҇твїѧ нбⷭ҇нагѡ наслѣ̑дницы ꙗ҆ви́лисѧ є҆стѐ. Ны́нѣ же дерзнове́нїе ко гдⷭ҇ꙋ и҆мꙋ́ще, моли́тесѧ ѡ҆ земнѣ́мъ ѻ҆те́чествѣ ва́шемъ, да прославлѧ́емъ ва́съ си́це:
Ра́дꙋйтесѧ, ца́рственнїи стрⷭ҇тоте́рпцы, землѝ рѡссі́йскїѧ храни́телїе и҆ мл҃твєнницы.
І҆́косъ а҃
А҆́гг҃льскими си́лами ᲂу҆крѣплѧ́еми во и҆́стиннѣмъ пꙋтѝ, седмочи́сленнїи стрⷭ҇тоте́рпцы, ѡ҆ житїѝ пра́веднѣмъ и҆ бг҃оꙋго́днѣмъ ревнова́ли є҆стѐ, да ꙗ҆́вите наро́дꙋ рꙋ́сскомꙋ ѻ҆́бразъ бл҃гочести́выхъ царе́й. Сегѡ̀ ра́ди прославлѧ́емъ ва́съ си́це:
Ра́дꙋйтесѧ, стра́хъ бж҃їй въ се́рдцѣ, ꙗ҆́кѡ ѡ҆снова́нїе, положи́вшїи: ра́дꙋйтесѧ, премꙋ́дрость бж҃їю и҆́стиннѣ возлюби́вшїи.
Ра́дꙋйтесѧ, всѐ ᲂу҆пова́нїе на бг҃а возложи́вшїи: ра́дꙋйтесѧ, ѻ҆те́чествꙋ ва́шемꙋ вѣ́рнѡ послꙋжи́вшїи.
Ра́дꙋйтесѧ, хрⷭ҇тїа́нскагѡ бл҃гоче́стїѧ тве́рдое пра́вило: ра́дꙋйтесѧ, ца́рственнагѡ ро́да рѡссі́йскагѡ похвало̀.
Ра́дꙋйтесѧ, правосла́вныѧ вѣ́ры крѣ́пкое и҆сповѣ́данїе: ра́дꙋйтесѧ, стра́ждꙋщагѡ наро́да на́шегѡ ᲂу҆тѣше́нїе.
Ра́дꙋйтесѧ, ца́рственнїи стрⷭ҇тоте́рпцы, землѝ рѡссі́йскїѧ храни́телїе и҆ мл҃твєнницы.
Конда́къ в҃
Ви́дѧ гдⷭ҇ь покаѧ́нїе наро́да на́шегѡ, є҆гда̀ смꙋ̑тнаѧ времена̀ наста́ша, ᲂу҆млⷭ҇рдисѧ и҆ ꙗ҆вѝ млⷭ҇ть свою̀ во и҆збра́нїи мїхаи́ла царѧ̀, є҆го́же і҆кѡ́ною пречтⷭ҇ыѧ бцⷣы, ѳео́дѡровскаѧ и҆менꙋ́емою, чрез̾ роди́тельницꙋ бл҃гословѝ, да бꙋ́детъ і҆кѡ́на сїѧ̀ покро́въ и҆ защище́нїе є҆мꙋ̀ и҆ всемꙋ̀ новоизбра́нномꙋ ца́рскомꙋ ро́дꙋ, и҆ во ᲂу҆твержде́нїе держа́вы рѡссі́йскїѧ. Сегѡ̀ ра́ди бл҃года́рнѣ вопїе́мъ бг҃ꙋ: А҆ллилꙋ́їа.
І҆́косъ в҃
Разꙋмѣ́ша лю́дїе рѡссі́йстїи, ꙗ҆́кѡ и҆збра́нїемъ на ца́рство но́вагѡ ро́да бл҃гочести́вагѡ, ᲂу҆тишѝ гдⷭ҇ь нестроє́нїѧ и҆ смꙋ̑ты въ землѝ на́шей, принесо́ша ѻ҆бѣ́тъ вѣ́рнагѡ слꙋже́нїѧ ро́дꙋ семꙋ̀. Мы́ же любвѝ и҆ ре́вности тѣ́хъ подража́юще, къ ва́мъ, ца́рственнїи стрⷭ҇тоте́рпцы, ꙗ҆́кѡ наслѣ́дникѡмъ сегѡ̀ и҆збра́нїѧ со ᲂу҆миле́нїемъ вопїе́мъ:
Ра́дꙋйтесѧ, вѣне́цъ и҆ похвало̀ ро́да ца́рскагѡ и҆ сщ҃е́ннагѡ: ра́дꙋйтесѧ, ко́рене бл҃гочести́вагѡ пресла̑вныѧ ѻ҆́трасли.
Ра́дꙋйтесѧ, патрїа́рха рѡссі́йскагѡ фїларе́та ст҃о́е прозѧбе́нїе: ра́дꙋйтесѧ, попече́нїю є҆гѡ̀ ѡ҆ цр҃кви и҆ ѻ҆те́чествѣ подража́вшїи.
Ра́дꙋйтесѧ, вели́кїѧ ста́рицы и҆́нокини ма́рѳы бл҃гослове́нное наслѣ́дїе: ра́дꙋйтесѧ, поко́рность во́ли бж҃їей ѿ неѧ̀ воспрїи́мшїи.
Ра́дꙋйтесѧ, пред̾ і҆кѡ́ною бж҃їѧ мт҃ре ѳео́дѡровскїѧ мл҃твы при́снѡ возноси́вшїи: ра́дꙋйтесѧ, всѐ ᲂу҆пова́нїе на по́мощь бцⷣы съ вѣ́рою возлага́вшїи.
Ра́дꙋйтесѧ, ца́рственнїи стрⷭ҇тоте́рпцы, землѝ рѡссі́йскїѧ храни́телїе и҆ мл҃твєнницы.
Конда́къ г҃
Си́ла бж҃їѧ и҆ промышле́нїе всевы́шнѧгѡ ꙗ҆ви́сѧ въ рожде́нїи твое́мъ, ца́рственный стрⷭ҇тоте́рпче нїко́лае, вели́кагѡ бо ст҃и́телѧ и҆́мѧ воспрїе́мъ, застꙋ́пникъ рѡссі́йскїѧ землѝ показа́лсѧ є҆сѝ. Мнѡ́гїѧ же скѡ́рби и҆ болѣ̑зни, подо́бнѣ і҆́ѡвꙋ првⷣномꙋ, въ житїѝ претерпѣ́въ, ны́нѣ съ ли̑ки стрⷭ҇тоте́рпцєвъ наслажда́ешисѧ ра́йскагѡ бл҃же́нства, воспѣва́ѧ бг҃ꙋ: А҆ллилꙋ́їа.
І҆́косъ г҃
И҆мѣ́ѧ сꙋгꙋ̑быѧ застꙋ́пники и҆ покрови́тєли въ рожде́нїи твое́мъ, і҆́ѡва многострада́льнаго и҆ нїкола́а чꙋдотво́рца, держа́вный стрⷭ҇тоте́рпче, добродѣ́телемъ тѣ́хъ послѣ́довалъ є҆сѝ. Мы́ же дивѧ́щесѧ промышле́нїю творца̀, во ст҃ы́хъ си́хъ ѻ҆́бразъ бл҃гоче́стїѧ ᲂу҆каза́вшагѡ тѝ, бл҃гоговѣ́йнѣ воспѣва́емъ си́це:
Ра́дꙋйсѧ, въ мл҃твахъ ст҃и́телѧ мѵ́ръ лѷкі́йскихъ при́снѡ призыва́ѧй: ра́дꙋйсѧ, по́мощїю тогѡ̀ рѡссі́йскꙋю держа́вꙋ пра́веднѡ ѡ҆кормлѧ́ѧй.
Ра́дꙋйсѧ, ѻ҆́бразомъ кро́тости томꙋ̀ ᲂу҆подо́бивыйсѧ: ра́дꙋйсѧ, млⷭ҇рдїе мно́гое, ꙗ҆́коже ѻ҆́ный, ꙗ҆ви́вый.
Ра́дꙋйсѧ, терпѣ́нїе і҆́ѡвле въ се́рдцѣ твое́мъ и҆мѣ́вый. ра́дꙋйсѧ, вѣ́рность бг҃ꙋ въ житїѝ твое́мъ до конца̀ сохрани́вый.
Ра́дꙋйсѧ, въ тѧ́жкихъ бѣда́хъ, ꙗ҆́коже ѻ҆́ный, бл҃годаре́нїе бг҃ꙋ приноси́вый: ра́дꙋйсѧ, всѧ̑ находѧ̑щаѧ на тѧ̀ со смире́нїемъ прїе́мый.
Ра́дꙋйтесѧ, ца́рственнїи стрⷭ҇тоте́рпцы, землѝ рѡссі́йскїѧ храни́телїе и҆ мл҃твєнницы.
Конда́къ д҃
Бꙋ́рю смꙋще́нїѧ, воздвиза́емꙋю ѿ человѣ̑къ безбо́жныхъ въ странѣ̀ на́шей, ви́дѧ, стрⷭ҇тоте́рпче нїко́лае, не смꙋти́лсѧ є҆сѝ въ се́рдцѣ твое́мъ, и҆ всѐ ᲂу҆пова́нїе на бг҃а возложи́въ, не возропта́лъ є҆сѝ, є҆гда̀ ѿверго́ша тѧ̀ лю́ди твоѧ̑, ѻ҆ба́че съ вѣ́рою воспѣ́лъ є҆сѝ бг҃ꙋ: А҆ллилꙋ́їа.
І҆́косъ д҃
Слы́ша ѡ҆ мѧте́жехъ, болѣ́знехъ и҆ междоꙋсо́бныхъ бра́нехъ, наше́дшихъ на зе́млю рꙋ́сскꙋю, во ᲂу҆́захъ сы́й, стрⷭ҇тоте́рпче царю̀ нїко́лае, моле́нїе ѡ҆ лю́дехъ є҆ѧ̀ непреста́ннѣ приноси́лъ є҆сѝ, млⷭ҇рдїе бж҃їе къ ни̑мъ призыва́ѧ. Сегѡ̀ ра́ди мы̀ воспѣва́емъ тебѣ̀ та́кѡ:
Ра́дꙋйсѧ, ѿ ю҆́ности ѻ҆те́чество и҆ наро́дъ тво́й возлюби́вый: ра́дꙋйсѧ, ꙗ҆́кѡ и҆ во ѿверже́нїи любо́вь сїю̀ сохрани́вый.
Ра́дꙋйсѧ, пома́занїе на ца́рство съ бл҃гоговѣ́нїемъ прїе́мый: ра́дꙋйсѧ, ѻ҆́бразъ бл҃гочести́вагѡ царѧ̀ мі́рꙋ ꙗ҆ви́вый.
Ра́дꙋйсѧ, ца́рскїй вѣне́цъ со смире́нїемъ на сѧ̀ возложи́вый: ра́дꙋйсѧ, вѣнца̀ страда́нїй ѿ гдⷭ҇а ᲂу҆досто́енный.
Ра́дꙋйсѧ, ца́рское слꙋже́нїе ꙗ҆́кѡ послꙋша́нїе бг҃ꙋ разꙋмѣ́вый: ра́дꙋйсѧ, поношє́нїѧ, ꙗ҆́кѡ крⷭ҇тъ, взе́мый и҆ съ терпѣ́нїемъ понесы́й.
Ра́дꙋйтесѧ, ца́рственнїи стрⷭ҇тоте́рпцы, землѝ рѡссі́йскїѧ храни́телїе и҆ мл҃твєнницы.
Конда́къ є҃
Бг҃освѣ́тлый свѣти́льникъ во мра́цѣ скорбе́й бл҃говѣ́рнѣй сꙋпрꙋ́жницѣ твое́й ꙗ҆ви́лсѧ є҆сѝ, ца́рственный стрⷭ҇тоте́рпче нїко́лае, ᲂу҆казꙋ́ѧ и҆ возглавлѧ́ѧ пꙋ́ть є҆ѧ̀, ꙗ҆́коже повелѣ̀ гдⷭ҇ь. Мы́ же прославлѧ́юще ва́шъ бл҃гослове́нный сою́зъ во хрⷭ҇тѣ̀, хвалꙋ̀ бг҃ꙋ воздае́мъ, пою́ще: А҆ллилꙋ́їа.
І҆́косъ є҃
Ви́дѧ ца́рственный стрⷭ҇тоте́рпецъ ю҆́ницꙋ а҆леѯа́ндрꙋ, ꙗ҆́кѡ голꙋби́цꙋ чи́стꙋ, и҆збра̀ ю҆̀ себѣ̀ въ бл҃говѣ́рнꙋю сꙋпрꙋ́жницꙋ, правосла́внꙋю цари́цꙋ и҆ ма́терь наро́да рѡссі́йскагѡ. Мы́ же вѣ́дꙋще ᲂу҆се́рдное слꙋже́нїе є҆ѧ̀, воспѣва́емъ си́це:
Ра́дꙋйсѧ, и҆мени́тагѡ ро́да бл҃гочести́вое прозѧбе́нїе: ра́дꙋйсѧ, ѿ лю́терскїѧ вѣ́ры къ правосла́вїю ѻ҆́бразе сп҃си́тельнагѡ прехожде́нїѧ.
Ра́дꙋйсѧ, всѣ́мъ се́рдцемъ мл҃твꙋ возлюби́вшаѧ: ра́дꙋйсѧ, ѡ҆ слꙋ́жбѣ бж҃їей серде́чнѡ ревнова́вшаѧ.
Ра́дꙋйсѧ, сло́вомъ бж҃їимъ и҆ писа́нїемъ ст҃ы́хъ ѻ҆тє́цъ себѐ назда́вшаѧ: ра́дꙋйсѧ, ᲂу҆ста́вы цр҃кѡ́вныѧ бл҃гоговѣ́йнѡ соблюда́вшаѧ.
Ра́дꙋйсѧ, рꙋ́сское бл҃гоче́стїе досто́йнѣ воспрїе́мшаѧ: ра́дꙋйсѧ, и҆́стинныѧ жи́зни во хрⷭ҇тѣ̀ прїѡбщи́вшаѧсѧ.
Ра́дꙋйтесѧ, ца́рственнїи стрⷭ҇тоте́рпцы, землѝ рѡссі́йскїѧ храни́телїе и҆ мл҃твєнницы.
Конда́къ ѕ҃
Проповѣ́дꙋетъ житїѐ ва́ше бра́ка ст҃а́гѡ чистотꙋ̀, бл҃говѣ́рнїи нїко́лае и҆ а҆леѯа́ндро. Вы́ бо бл҃года́ть сегѡ̀ вели́кагѡ та́инства досто́йнѡ воспрїе́мше, да́же до мч҃нческїѧ кончи́ны вѣ́рность хрⷭ҇тꙋ̀ и҆ любо́вь дрꙋ́гъ ко дрꙋ́гꙋ сохрани́ли є҆стѐ, при́снѡ воспѣва́юще бг҃ꙋ: А҆ллилꙋ́їа.
І҆́косъ ѕ҃
Возсїѧ̀ въ странѣ̀ рѡссі́йстѣй, ꙗ҆́кѡ прекра̑снаѧ свѣти̑ла, бл҃говѣ́рнаѧ ца́рственнаѧ чета̀ нїкола́й и҆ а҆леѯа́ндра, сꙋпрꙋ́зи, сою́зомъ любвѐ хрⷭ҇то́вы свѧзꙋ́емїи. Мы́ же прославлѧ́юще ѻ҆́бразъ и҆́хъ цѣломꙋ́дреннагѡ и҆ добронра́внагѡ житїѧ̀ въ мі́рѣ се́мъ, со бл҃гоговѣ́нїемъ воспѣва́емъ си́це:
Ра́дꙋйтесѧ, всѣ́мъ се́рдцемъ бг҃а взыска́вшїи: ра́дꙋйтесѧ, въ пꙋте́хъ гдⷭ҇нихъ непоро́чнѡ ходи́вшїи.
Ра́дꙋйтесѧ, дво́ице чтⷭ҇на́ѧ, свы́ше и҆збра́ннаѧ: ра́дꙋйтесѧ, дво́ице ст҃а́ѧ, сла́вою и҆ че́стїю ѿ бг҃а вѣнча́ннаѧ.
Ра́дꙋйтесѧ, цѣломꙋ́дрїе сꙋпрꙋ́жеское многоча́дїемъ просла́вившїи: ра́дꙋйтесѧ, ча̑да ва̑ша, ꙗ҆́кѡ новосаждє́нїѧ ма̑сличнаѧ, ѡ҆́крестъ трапе́зы нбⷭ҇ныѧ собра́вшїи.
Ра́дꙋйтесѧ, сꙋпрꙋ́ги во бл҃гоче́стїи и҆ любвѝ жи́ти наꙋча́ющїи: ра́дꙋйтесѧ, ми́ръ хрⷭ҇то́въ ѻ҆́нымъ млⷭ҇тивнѡ низпосыла́ющїи.
Ра́дꙋйтесѧ, ца́рственнїи стрⷭ҇тоте́рпцы, землѝ рѡссі́йскїѧ храни́телїе и҆ мл҃твєнницы.
Конда́къ з҃
Хотѧ́ще ва́шъ до́мъ бл҃гоче́стнѡ ᲂу҆стро́ити, любо́вь ꙗ҆́кѡ ѡ҆снова́нїе положи́ли є҆стѐ, и҆ бра́къ че́стенъ до́брѣ соблюлѝ є҆стѐ, бл҃говѣ́рнїи сꙋпрꙋ́зи нїко́лае и҆ а҆леѯа́ндро. Тѣ́мже и҆ дщє́ри ва́шѧ, ꙗ҆́кѡ мꙋ̑дрыѧ є҆ѵⷢ҇льскїѧ дѣ̑вы воспита́вше, въ невѣ̑сты хрⷭ҇тꙋ̀ ᲂу҆гото́вали є҆стѐ. Съ ни́миже ны́нѣ вкꙋ́пѣ воспѣва́ете бг҃ꙋ: А҆ллилꙋ́їа.
І҆́косъ з҃
Но́вꙋю млⷭ҇ть дарова̀ гдⷭ҇ь наро́дꙋ рꙋ́сскомꙋ, цѣломꙋ́дрєнныѧ дщє́ри ца́рственныѧ четы̀, ѻ҆́льгꙋ, татїа́нꙋ, марі́ю и҆ а҆настасі́ю. Ты̑ѧ бо жена́мъ мѷроно́сицамъ подража́ющыѧ, є҆ле́емъ млⷭ҇рдїѧ болѧ́щымъ и҆ стра́ждꙋщымъ послꙋжи́ша, и҆ сме́рть за хрⷭ҇та̀ прїе́мшѧ, ны́нѣ прⷭ҇то́лꙋ бж҃їю предстоѧ́тъ. Сегѡ̀ ра́ди прославлѧ́емъ и҆̀хъ си́це:
Ра́дꙋйтесѧ, дщє́ри царє́вы, ѡ҆бѣтова́нїй бж҃їихъ сподо́бльшыѧсѧ: ра́дꙋйтесѧ, за́повѣдь бж҃їю ѡ҆ почита́нїи роди́телей соблю́дшыѧ.
Ра́дꙋйтесѧ, досто́инство ца́рственное ст҃о сохра́ньшыѧ: ра́дꙋйтесѧ, стїхі́ѧми мі́ра сегѡ̀ не порабощє́нныѧ.
Ра́дꙋйтесѧ, лю́демъ, сꙋ́щымъ въ бѣда́хъ и҆ ско́рбехъ, ꙗ҆́кѡ хрⷭ҇тꙋ̀, послꙋжи́вшыѧ: ра́дꙋйтесѧ, за врагѡ́въ свои́хъ ᲂу҆се́рднѡ моли́вшыѧсѧ.
Ра́дꙋйтесѧ, а҆́гницы непорѡ́чныѧ, въ же́ртвꙋ бг҃ꙋ себѐ прине́сшыѧ: ра́дꙋйтесѧ, невѣ̑сты хрⷭ҇тѡ́вы, въ черто́зѣхъ жениха̀ нбⷭ҇нагѡ пребыва́ющыѧ.
Ра́дꙋйтесѧ, ца́рственнїи стрⷭ҇тоте́рпцы, землѝ рѡссі́йскїѧ храни́телїе и҆ мл҃твєнницы.
Конда́къ и҃
Стра́нно и҆ чꙋ́дно бы́сть рожде́нїе твоѐ, ст҃ы́й царе́вичꙋ а҆леѯі́е. Пло́дъ бо бл҃госла́венъ мл҃твъ саро́вскагѡ чꙋдотво́рца, и҆ ча́емый наслѣ́дникъ ца́рственныхъ роди́телей бы́въ, сла́ва, наде́жда и҆ ᲂу҆пова́нїе ꙗ҆ви́лсѧ є҆сѝ всѣ̑мъ концє́мъ землѝ на́шеѧ. Сегѡ̀ ра́ди лю́дїе рѡссі́йстїи съ ра́достїю бл҃года́рственнѡ воспѣ́ша бг҃ꙋ: А҆ллилꙋ́їа.
І҆́косъ и҃
Къ вы̑шнимъ дꙋше́ю чи́стою ᲂу҆стремлѧ́ѧсѧ, ст҃ы́й царе́вичꙋ а҆леѯі́е, и҆змла́да болѣ́знь ꙗ҆́кѡ крⷭ҇тъ, ѿ гдⷭ҇а да́нный, безро́потнѡ поне́слъ є҆сѝ, послѣди́ же, ꙗ҆́кѡ а҆́гнецъ неѕло́бивый, рꙋка́ми ѕлочести́выхъ ᲂу҆бїе́нъ, мл҃твенникъ пред̾ бг҃омъ ꙗ҆ви́лсѧ є҆сѝ. Сегѡ̀ ра́ди воспѣва́емъ тѝ си́це:
Ра́дꙋйсѧ, ѻ҆троча̀, ѿ ᲂу҆тро́бы ма́тере бг҃омъ пред̾избра́нное: ра́дꙋйсѧ, ча́до, мл҃твами саро́вскагѡ чꙋдотво́рца рѡссі́и дарова́нное.
Ра́дꙋйсѧ, страда́льче, и҆змла́да скѡ́рби и҆ недꙋ̑ги безро́потнѡ понесы́й: ра́дꙋйсѧ, царе́вичꙋ, въ болѣ́знехъ сострада́нїе къ лю́демъ ѡ҆брѣты́й.
Ра́дꙋйсѧ, наслѣ́дниче, лише́нїе ца́рства земна́гѡ со смире́нїемъ прїе́мый: ра́дꙋйсѧ, стрⷭ҇тоте́рпче, црⷭ҇твїѧ нбⷭ҇нагѡ ѿ бг҃а ᲂу҆досто́енный.
Ра́дꙋйсѧ, а҆́гнче неѕло́биве, ѿ безбо́жныхъ закла́нный: ра́дꙋйсѧ, ца́рственный ѻ҆́троче, вѣнце́мъ нетлѣ́ннымъ ѿ цр҃ѧ̀ ца́рствꙋющихъ ᲂу҆вѣнча́нный.
Ра́дꙋйтесѧ, ца́рственнїи стрⷭ҇тоте́рпцы, землѝ рѡссі́йскїѧ храни́телїе и҆ мл҃твєнницы.
Конда́къ ѳ҃
Всѧ́къ ᲂу҆́мъ человѣ́ческїй смꙋти́сѧ, є҆гда̀ въ землѝ на́шей беззако́нїе ᲂу҆мно́жисѧ, и҆́стина помрачи́сѧ и҆ ме́рзость запꙋстѣ́нїѧ на мѣ́стѣ ст҃ѣ́мъ ста̀. Ты́ же, царю̀ нїко́лае, и҆згна́нїе, порꙋга́нїе и҆ темни́чное заточе́нїе мꙋ́жественнѣ претерпѣ́въ, сы́нъ вѣ́рный ст҃ы́ѧ цр҃кве и҆ стрⷭ҇тоте́рпецъ хрⷭ҇то́въ ꙗ҆ви́лсѧ є҆сѝ. Сегѡ̀ ра́ди цр҃ковь рꙋ́сскаѧ, прославлѧ́ющи тѧ̀, бг҃ꙋ вопїе́тъ: А҆ллилꙋ́їа.
І҆́косъ ѳ҃
Вѣті̑и ѕломꙋ́дреннїи тща́шасѧ ѡ҆болга́ти тѧ̀ клевето́ю, пома́занниче бж҃їй нїко́лае, ты́ же є҆ѵⷢ҇льски всѧ̑ терпѧ̀, ѡ҆ бл҃гоче́стїи наро́да правосла́внагѡ попече́нїе сꙋгꙋ́бое прилага́лъ є҆сѝ. Сегѡ̀ ра́ди, па́мѧть твою̀ свѣ́тлѡ пра́зднꙋюще, воспѣва́емъ тѝ си́це:
Ра́дꙋйсѧ, прославле́нїѧ ᲂу҆го́дникѡвъ бж҃їихъ до́брый рачи́телю: ра́дꙋйсѧ, па́стырѧ кроншта́дтскагѡ бл҃гоговѣ́йный почита́телю.
Ра́дꙋйсѧ, саро́вскихъ торже́ствъ держа́вный возглави́телю: ра́дꙋйсѧ, и҆́ноческихъ ѻ҆би́телей бл҃гочести́вый покрови́телю.
Ра́дꙋйсѧ, дꙋхо́вныхъ вертогра́дѡвъ ᲂу҆се́рдный попечи́телю: ра́дꙋйсѧ, правосла́вныхъ хра́мѡвъ бг҃олюби́вый зда́телю.
Ра́дꙋйсѧ, ст҃ы́ѧ землѝ и҆ а҆ѳѡ́нскїѧ горы̀ ще́дрый бл҃готвори́телю: ра́дꙋйсѧ, ᲂу҆строе́нїѧ цр҃кве рꙋ́сскїѧ мꙋ́дрый ревни́телю.
Ра́дꙋйтесѧ, ца́рственнїи стрⷭ҇тоте́рпцы, землѝ рѡссі́йскїѧ храни́телїе и҆ мл҃твєнницы.
Конда́къ і҃
Спастѝ хотѧ̀ лю́ди рѡссі́йскїѧ ѿ ро́зни братоꙋбі́йственныѧ, царю̀ нїко́лае, престо́лъ земны́й ѡ҆ста́вилъ є҆сѝ, ѻ҆ба́че на млⷭ҇ть бж҃їю ᲂу҆пова́ѧ, непоколеби́мь въ вѣ́рѣ и҆ бл҃гоче́стїи пребы́лъ є҆сѝ, воспѣва́ѧ: А҆ллилꙋ́їа.
І҆́косъ і҃
Стѣна̀ и҆ ѡ҆гражде́нїе бы́сть гдⷭ҇ь тебѣ̀, царю̀ нїко́лае, є҆мꙋ́же те́плѣ моли́лсѧ є҆сѝ, да сохрани́тъ держа́вꙋ рѡссі́йскꙋю ѿ наше́ствїѧ и҆ноплемє́нникъ и҆ братоꙋбі́йственныѧ бра́ни, наипа́че же лю́ди правосла̑вныѧ во бл҃гоче́стїи да ᲂу҆крѣпи́тъ. Сегѡ̀ ра́ди бл҃года́рнѣ воспѣва́емъ тѝ си́це:
Ра́дꙋйсѧ, полкѡ́въ рѡссі́йскихъ мꙋ́дрый предводи́телю: ра́дꙋйсѧ, ра́тныхъ люде́й хрⷭ҇толюби́вый попечи́телю.
Ра́дꙋйсѧ, ѻ҆те́чества на́шегѡ держа́вный храни́телю: ра́дꙋйсѧ, слове́нскихъ наро́дѡвъ ре́вностный защи́тителю.
Ра́дꙋйсѧ, мечы̀ на ѡ҆ра́ла прекова́ти наро́ды призва́вый: ра́дꙋйсѧ, ми́ръ и҆мѣ́ти со всѣ́ми ꙗ҆зы̑ки преи́скреннѣ жела́вый.
Ра́дꙋйсѧ, бл҃говѣ̑рнымъ кн҃зє́мъ въ бл҃гоче́стїи подража́вый: ра́дꙋйсѧ, ѻ҆́бразъ царѧ̀ правосла́внагѡ во смире́нїи мі́рꙋ ꙗ҆ви́вый.
Ра́дꙋйтесѧ, ца́рственнїи стрⷭ҇тоте́рпцы, землѝ рѡссі́йскїѧ храни́телїе и҆ мл҃твєнницы.
Конда́къ а҃і
Пѣ́нїѧ всѧ́кагѡ досто́йна па́мѧть ва́ша, ст҃і́и ца́рственнїи стрⷭ҇тоте́рпцы. Вы́ бо ѻ҆́бразъ и҆сповѣ́дничества и҆ ре́вности по бз҃ѣ вѣ̑рнымъ лю́демъ показа́вше, заповѣ́дасте не мсти́ти ѕлодѣ́ющымъ, па́че же проща́ти гонѧ́щымъ и҆ мл҃твꙋ твори́ти за ни́хъ, пою́ще бг҃ꙋ: А҆ллилꙋ́їа.
І҆́косъ а҃і
Свѣтоно́сный свѣти́льникъ седмочи́сленный вѣ́мы ва́съ, ст҃і́и ца́рственнїи стрⷭ҇тоте́рпцы, ца́рскимъ бо пꙋте́мъ ше́ствꙋюще, ᲂу҆гото́васте себѐ за хрⷭ҇та̀ пострада́ти. Тѣ́мже просвѣти́те ѡ҆мрачє́ннаѧ сердца̀ на̑ша, и҆ є҆ѵⷢ҇льскимъ пꙋте́мъ ше́ствовати наꙋчи́те на́съ, прославлѧ́ющихъ ва́съ си́це:
Ра́дꙋйтесѧ, а҆́гнцы неѕло́бивїи, а҆́гнцꙋ бж҃їю въ кро́тости подража́вшїи: ра́дꙋйтесѧ, ѻ҆́бразъ терпѣ́нїѧ въ ѕлострада́нїихъ вѣ̑рнымъ показа́вшїи.
Ра́дꙋйтесѧ, во все́мъ житїѝ со́вѣсть чи́стꙋ храни́вшїи: ра́дꙋйтесѧ, ᲂу҆бїе́нїе беззако́нное смире́ннѡ воспрїе́мшїи.
Ра́дꙋйтесѧ, седмочи́сленнїи стрⷭ҇тоте́рпцы, во є҆ди́номъ дꙋ́сѣ бг҃ꙋ предста́вшїи: ра́дꙋйтесѧ, кро́вїю мч҃нческою зе́млю на́шꙋ ѡ҆багри́вшїи.
Ра́дꙋйтесѧ, ли́къ бл҃говѣ́рныхъ царе́й и҆ кн҃зе́й воспо́лнившїи: ра́дꙋйтесѧ, собо́ръ ст҃ы́хъ землѝ рѡссі́йскїѧ ᲂу҆краси́вшїи.
Ра́дꙋйтесѧ, ца́рственнїи стрⷭ҇тоте́рпцы, землѝ рѡссі́йскїѧ храни́телїе и҆ мл҃твєнницы.
Конда́къ в҃і
Бл҃года́ть и҆зрѧ́днꙋ бг҃ъ дарова̀ цр҃кви рѡссі́йстѣй, просла́вивъ ва́съ на нб҃сѝ, ца́рственнїи стрⷭ҇тоте́рпцы, храни́телїе и҆ покрови́телїе страны̀ на́шеѧ. Сегѡ̀ ра́ди и҆ мы̀ на землѝ почита́емъ ва́съ, бг҃ꙋ вопїю́ще: А҆ллилꙋ́їа.
І҆́косъ в҃і
Воспѣва́юще по́двиги ва́шѧ, ца́рственнїи стрⷭ҇тоте́рпцы, прославлѧ́емъ трїеди́наго бг҃а. Вы́ бо соизволе́нїемъ ѻ҆ц҃а̀ безнача́льнагѡ, соверше́нїемъ сн҃а є҆диноро́днагѡ и҆ содѣ́йствїемъ ст҃а́гѡ дх҃а бж҃їѧ прича̑стницы црⷭ҇твїѧ нбⷭ҇нагѡ содѣ́ластесѧ, и҆ застꙋ̑пницы ѻ҆те́чества на́шегѡ ꙗ҆ви́стесѧ. Сегѡ̀ ра́ди дерза́емъ взыва́ти ва́мъ си́це:
Ра́дꙋйтесѧ, ꙗ҆́кѡ прославле́нїю ва́шемꙋ цр҃ковь ра́дꙋетсѧ: ра́дꙋйтесѧ, ꙗ҆́кѡ чꙋдесы̀ ва́шими вѣ́ра ᲂу҆крѣплѧ́етсѧ.
Ра́дꙋйтесѧ, ꙗ҆́кѡ ѻ҆́бразы ва́ши мѷроточе́нїемъ прославлѧ́ютсѧ: ра́дꙋйтесѧ, ꙗ҆́кѡ въ че́сть ва́шꙋ хра́мы созида́ютсѧ.
Ра́дꙋйтесѧ, ꙗ҆́кѡ житїе́мъ ва́шимъ лю́ди бл҃гоче́стїю наꙋча́ютсѧ. ра́дꙋйтесѧ, ꙗ҆́кѡ терпѣ́нїемъ ва́шимъ во страда́нїихъ вѣ́рнїи назида́ютсѧ.
Ра́дꙋйтесѧ, ꙗ҆́кѡ є҆ѵⷢ҇льскїѧ завѣ̑ты и҆сполнѧ́ти на́съ наставлѧ́ете: ра́дꙋйтесѧ, ꙗ҆́кѡ бѣды̀ и҆ скѡ́рби мꙋ́жественнѣ нестѝ на́мъ помога́ете.
Ра́дꙋйтесѧ, ца́рственнїи стрⷭ҇тоте́рпцы, землѝ рѡссі́йскїѧ храни́телїе и҆ мл҃твєнницы.
Конда́къ г҃і
Ѽ ст҃і́и ца́рственнїи стрⷭ҇тоте́рпцы! Прїими́те ѿ на́съ похва́льное сїѐ пѣ́нїе, и҆ млⷭ҇тивымъ ва́шимъ хода́тайствомъ ᲂу҆моли́те цр҃ѧ̀ сла́вы ми́ръ странѣ̀ на́шей дарова́ти, цр҃ковь въ правосла́вїи и҆ є҆ди́нствѣ сохрани́ти, на́съ же во бл҃гоче́стїи ᲂу҆тверди́ти, да вопїе́мъ бг҃ꙋ: А҆ллилꙋ́їа.
Повто́ръ
Сей конда́къ глаго́лется три́жды, та́же і҆́косъ а҃-й и҆ конда́къ а҃-й.
І҆́косъ а҃
А҆́гг҃льскими си́лами ᲂу҆крѣплѧ́еми во и҆́стиннѣмъ пꙋтѝ, седмочи́сленнїи стрⷭ҇тоте́рпцы, ѡ҆ житїѝ пра́веднѣмъ и҆ бг҃оꙋго́днѣмъ ревнова́ли є҆стѐ, да ꙗ҆́вите наро́дꙋ рꙋ́сскомꙋ ѻ҆́бразъ бл҃гочести́выхъ царе́й. Сегѡ̀ ра́ди прославлѧ́емъ ва́съ си́це:
Ра́дꙋйтесѧ, стра́хъ бж҃їй въ се́рдцѣ, ꙗ҆́кѡ ѡ҆снова́нїе, положи́вшїи: ра́дꙋйтесѧ, премꙋ́дрость бж҃їю и҆́стиннѣ возлюби́вшїи.
Ра́дꙋйтесѧ, всѐ ᲂу҆пова́нїе на бг҃а возложи́вшїи: ра́дꙋйтесѧ, ѻ҆те́чествꙋ ва́шемꙋ вѣ́рнѡ послꙋжи́вшїи.
Ра́дꙋйтесѧ, хрⷭ҇тїа́нскагѡ бл҃гоче́стїѧ тве́рдое пра́вило: ра́дꙋйтесѧ, ца́рственнагѡ ро́да рѡссі́йскагѡ похвало̀.
Ра́дꙋйтесѧ, правосла́вныѧ вѣ́ры крѣ́пкое и҆сповѣ́данїе: ра́дꙋйтесѧ, стра́ждꙋщагѡ наро́да на́шегѡ ᲂу҆тѣше́нїе.
Ра́дꙋйтесѧ, ца́рственнїи стрⷭ҇тоте́рпцы, землѝ рѡссі́йскїѧ храни́телїе и҆ мл҃твєнницы.
Конда́къ а҃
И҆збра́ннїи ца́рственнїи стрⷭ҇тоте́рпцы, є҆ди́на дома́шнѧѧ цр҃ковь хрⷭ҇то́ва, нїко́лае, а҆леѯа́ндро, а҆леѯі́е, ѻ҆́льго, татїа́но, марі́е и҆ а҆настасі́е, вы̀ сою́зомъ любвѐ свѧзꙋ́еми, ꙗ҆́кѡ а҆́гнцы, хрⷭ҇тꙋ̀ бг҃ꙋ вѣ́рою послѣ́довали є҆стѐ, и҆ въ страда́нїихъ сме́рть претерпѣ́вше, црⷭ҇твїѧ нбⷭ҇нагѡ наслѣ̑дницы ꙗ҆ви́лисѧ є҆стѐ. Ны́нѣ же дерзнове́нїе ко гдⷭ҇ꙋ и҆мꙋ́ще, моли́тесѧ ѡ҆ земнѣ́мъ ѻ҆те́чествѣ ва́шемъ, да прославлѧ́емъ ва́съ си́це:
Ра́дꙋйтесѧ, ца́рственнїи стрⷭ҇тоте́рпцы, землѝ рѡссі́йскїѧ храни́телїе и҆ мл҃твєнницы.
Моли́твы
Ѽ ст҃а́ѧ седмери́це, ца́рственнїи стрⷭ҇тоте́рпцы, нїко́лае, а҆леѯа́ндро, а҆леѯі́е, марі́е, ѻ҆́льго, татїа́но и҆ а҆настасі́е!
Вы̀ сою́зомъ любвѐ хрⷭ҇то́вы свѧзꙋ́еми, до́мъ ва́шъ, ꙗ҆́кѡ ма́лꙋю цр҃ковь, бл҃гоче́стнѡ ᲂу҆стро́или є҆стѐ и҆ смире́нїемъ себѐ посредѣ̀ земна́гѡ вели́чїѧ ᲂу҆краси́ли є҆стѐ. Въ годи́нꙋ же братоꙋбі́йственныѧ бра́ни и҆ гоне́нїй безбо́жныхъ во ѻ҆те́чествѣ на́шемъ, всѐ ᲂу҆пова́нїе на бг҃а возложи́вше, ѻ҆́бразъ терпѣ́нїѧ и҆ страда́нїѧ все́й землѝ рѡссі́йстѣй ꙗ҆ви́ли є҆стѐ, и҆ молѧ́щесѧ ѡ҆ мꙋчи́телехъ, клеветꙋ̀, ᲂу҆́зы и҆ и҆згна́нїе, глꙋмле́нїе, насмѣѧ́нїе и҆ ѡ҆болга́нїе, ᲂу҆бїе́нїе и҆ тѣле́съ порꙋга́нїе мꙋ́жественнѣ претерпѣ́ли є҆стѐ. Сегѡ̀ ра́ди ѿ земна́гѡ ца́рствїѧ къ нбⷭ҇номꙋ прешлѝ є҆стѐ и҆ те́плїи хода̑таи ѡ҆ на́съ ꙗ҆ви́лисѧ є҆стѐ.
Ѽ ст҃і́и ᲂу҆гѡ́дницы бж҃їи! Моли́тесѧ ѡ҆ на́съ бг҃ꙋ, да цр҃ковь въ є҆диномы́слїи и҆ тве́рдѣй вѣ́рѣ соблюде́тъ, странꙋ̀ на́шꙋ ми́ромъ и҆ бл҃годе́нствїемъ ѡ҆гради́тъ и҆ ѿ междоꙋсо́бныѧ бра́ни и҆ раздѣле́нїѧ и҆зба́витъ, вла́сть предержа́щꙋю ᲂу҆мꙋдри́тъ, во́инство мꙋ́жествомъ ᲂу҆краси́тъ, сꙋпрꙋ̑ги въ вѣ́рности и҆ любвѝ ᲂу҆крѣпи́тъ, ча̑да въ бл҃гоче́стїи и҆ послꙋша́нїи возрасти́тъ, и҆ всѧ̑ ны̀ кꙋ́пнѡ съ ва́ми сподо́битъ воспѣва́ти пречтⷭ҇но́е и҆ великолѣ́пое и҆́мѧ живонача́льныѧ трⷪ҇цы, ѻ҆ц҃а̀, и҆ сн҃а, и҆ ст҃а́гѡ дх҃а, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.
Ѽ ст҃ы́й стрⷭ҇тоте́рпче, царю̀ мч҃нче нїко́лае! Гдⷭ҇ь тѧ̀ и҆збра̀ пома́занника своего̀, во є҆́же млⷭ҇тивнѡ и҆ пра́вѡ сꙋди́ти лю́демъ твои̑мъ, и҆ храни́телемъ цр҃кве правосла́вныѧ бы́ти. сегѡ̀ ра́ди со стра́хомъ бж҃їимъ ца́рское слꙋже́нїе и҆ ѡ҆ дꙋша́хъ попече́нїе соверша́лъ є҆сѝ. Гдⷭ҇ь же и҆спытꙋ́ѧ тѧ̀, ꙗ҆́кѡ і҆́ѡва многострада́льнаго, попꙋстѝ тебѣ̀ поношє́нїѧ, скѡ́рби гѡ́рькїѧ, и҆змѣ́нꙋ, преда́тельство, бли́жнихъ ѿчꙋжде́нїе и҆ въ дꙋше́вныхъ мꙋ́кахъ земна́гѡ ца́рства ѡ҆ставле́нїе. Всѧ̑ сїѧ̑ ра́ди бл҃га рѡссі́и ꙗ҆́кѡ вѣ́рный сы́нъ є҆ѧ̀ претерпѣ́въ, и҆ ꙗ҆́кѡ и҆́стинный ра́бъ хрⷭ҇то́въ мч҃нческꙋю кончи́нꙋ прїе́мъ, нбⷭ҇нагѡ црⷭ҇тва дости́глъ є҆сѝ, и҆дѣ́же наслажда́ешисѧ вы́шнїѧ сла́вы ᲂу҆ прⷭ҇то́ла всѣ́хъ цр҃ѧ̀, кꙋ́пнѡ со ст҃о́ю сꙋпрꙋ́жницею твое́ю, цари́цею а҆леѯа́ндрою, и҆ ца́рственными ча́ды а҆леѯі́емъ, ѻ҆́льгою, татїа́ною, марі́ею и҆ а҆настасі́ею.
Ны́нѣ, и҆мѣ́ѧ дерзнове́нїе ве́лїе ᲂу҆ хрⷭ҇та̀ цр҃ѧ̀, молѝ, да пода́стъ на́мъ гдⷭ҇ь грѣхѡ́въ проще́нїе и҆ на всѧ́кꙋю добродѣ́тель наста́витъ на́съ, да стѧжи́мъ смире́нїе, кро́тость и҆ любо́вь, и҆ сподо́бимсѧ нбⷭ҇нагѡ црⷭ҇твїѧ, и҆дѣ́же кꙋ́пнѡ съ тобо́ю и҆ всѣ́ми ст҃ы́ми новомч҃нки и҆ и҆сповѣ̑дники рѡссі́йскими просла́вимъ ѻ҆ц҃а̀, и҆ сн҃а, и҆ ст҃а́го дх҃а, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.