Канон святому священномученику Феодоту, епископу Киринейскому

Бо́г твоя́ к Нему́ движе́ния, му́чениче, напра́ви, Его́же честны́я соблю́д за́поведи, иера́рх бы́л еси́ и муче́ния кро́вию озари́лся еси́, явле́ннейше.

Боже́ственне и благоче́стне пожи́в, пло́ти движе́ния по́стническими умертви́в по́двиги и живо́т прие́м, иера́рхов удобре́ние, му́чеников исполне́ние.

Всели́вся в прему́дрое се́рдце твое́ Ду́х Святы́й, от пеле́н, преподо́бне, пра́ва, сострада́тельна тя́, и ти́ха, и иера́рха боже́ственна, му́чениче, показа́, Феодо́те.

Сле́з твои́х стена́ньми, и крове́й пото́ки угаси́л еси́ пре́лести лю́тое у́глие, му́чениче святи́телю Феодо́те.

Житие́ твое́ чи́стое показа́в, священноде́теля боже́ственна и и́стинна свиде́теля тя́ страсте́й Христо́вых соде́ла.

Среди́ суди́ща стоя́ и уязвля́емь лю́тыми ра́нами, Христо́ва и́мене, му́чениче, не отве́рглся еси́, Феодо́те.

Сокруша́емо те́ло твое́ ра́нами, по́мысл тверде́йший и вои́стинну, му́чениче, крепча́йшь соде́ловаше, пою́ща: сла́ва си́ле Твое́й, Го́споди.

Распаля́емь любо́вию Влады́чнею, я́же от ра́н терпе́л еси́ боле́зни люте́йшия, я́коже ино́му стра́ждущу, са́м пребыва́л еси́ велича́йший в му́ченицех, Феодо́те.

Претерпе́л еси́ му́ки, богому́дре о́тче, прибли́жившияся те́лу, воздая́ния бо пребыва́ющая ви́дел еси́ ума́ чистото́ю, облегча́ющая боле́зни твоя́.

Возвыша́емь, му́дре, на дре́во, Феодо́те, претерпева́л еси́ тверде́йше терза́ния пло́ти твоея́, вельми́ удивля́емь.

Ви́симь, строга́ния терпе́л еси́ теле́сная, Феодо́те, Влады́ку укрепля́ющаго име́яй и ве́рою тя́ утвержда́юща.

Кро́вными омоче́ньми обагри́в, Феодо́те блаже́нне, оде́жду твою́ свяще́нную, светле́йшу показа́л еси́.

Всажде́н бы́л еси́ в темни́цу, я́ко злоде́й, Феодо́те, храни́тель сы́й Боже́ственных Влады́ки, сла́вне, повеле́ний, боже́ственное твое́ пра́зднество вельми́ уясни́вшаго.

Стоя́л еси́ пред суди́щем непра́ведных, суди́мь, и осужда́я челове́ки, беззако́ннующия всу́е и предпочита́ющия непра́вду, святи́телю богому́дре, па́че пра́вды.

Во́лны свере́пых му́к разруши́л еси́, я́коже не́кий ка́мень, всеблаже́нне, возше́д восхожде́нием твоего́ се́рдца к Ка́меню краеуго́льному — Христу́ Бо́гу.

Боже́ственною, о́тче, распаля́емь любо́вию Ду́ха, на о́др разжже́н весьма́ возложе́н, не опали́м пребы́л еси́, — благослове́н еси́, Бо́же мо́й, — зовы́й, — и Го́споди.

Якоже ино́му са́м пребыва́я стра́ждущу, ве́сь бо умо́м, блаже́нне, к Бо́гу прише́д, сече́ния же и жже́ния ты́ небре́гл еси́, не чу́вствуя Христо́вым манове́нием.

Прему́дростию слове́с безслове́сия су́щия, блаже́нне, испо́лнены посреди́ суди́ща обличи́л еси́, проявле́нно злоче́стием неду́говавшия и па́че сотво́ршаго де́монския изво́лившия куми́ры.

По́двиги твои́ми врагу́ противля́яся, му́чениче Феодо́те, гвоздьми́ бо, сла́вне, в но́ги пронзе́н, отводя́щею к Ца́рству небе́сному стезе́ю ше́ствовал еси́, — благослови́те, — поя́, — дела́ Госпо́дня, Го́спода.

Пропове́дая Бо́га, на зе́млю прише́дша и Боже́ственными страстьми́ стра́сть всепа́губную разру́шшаго, стра́сть боже́ственную и блаже́нную подъя́л еси́ пло́тию, вопия́, Феодо́те: благослови́те, вся́ дела́ Госпо́дня, Го́спода.

Крове́й ка́плями и свяще́нных уче́ний тече́нием, ве́рных напои́л еси́ сердца́ благода́тию, всему́дре, и прозяба́ти устро́ил еси́ Земледе́лателю благи́х Боже́ственная разуме́ния, Ему́же вопие́м: благослови́те, вся́ дела́ Госпо́дня, Го́спода.

Исцеле́ния источа́ет вся́ческая моще́й боже́ственная ра́ка свяще́ннейшаго па́стыря, и стра́сти уставля́ет, и реши́т ле́тныя я́ко вои́стинну боле́зни Спа́са Боже́ственною благода́тию.

Яко священному́ченик, вяза́ти же и реши́ти име́я вла́сть, разреши́ зо́л мои́х у́зы и ду́шу мою́, жего́му огне́м греха́, ороси́, моля́ Всеще́драго.

Дне́сь ве́рно пра́зднует Це́рковь, богоно́се, всесвяще́нную твою́ па́мять и отше́ствие к Человеколю́бцу и, ра́дуяся, плете́т тебе́ пе́сней боже́ственныя диади́мы.

Якоже днесве́тлую звезду́, тя́ стяжа́вше, богоглаго́ливе, твои́ми светолу́чными заря́ми боже́ственных боле́зней и чуде́с твои́х чи́стыми светлостьми́ озаря́емся, Феодо́те.

Бг҃ъ твоѧ̑ къ немꙋ̀ движє́нїѧ, мꙋ́чениче, напра́ви, Егѡ́же честны̑ѧ соблю́дъ за́пѡвѣди, і҆ера́рхъ бы́лъ є҆сѝ, и҆ мꙋче́нїѧ кро́вїю ѡ҆зари́лсѧ є҆сѝ, ꙗ҆вле́ннѣйше.

Бжⷭ҇твеннѣ и҆ благоче́стнѣ пожи́въ, пло́ти движє́нїѧ по́стническими ᲂу҆мертви́въ по́двиги, и҆ живо́тъ прїе́мъ, і҆ера́рхѡвъ ᲂу҆добре́нїе, мꙋ́ченикѡвъ и҆сполне́нїе.

Всели́всѧ въ премꙋ́дрое се́рдце твоѐ дх҃ъ ст҃ы́й, ѿ пеле́нъ, преподо́бне, пра́ва, сострада́тельна тѧ̀ и҆ ти́ха, и҆ і҆ера́рха бжⷭ҇твенна, мꙋ́чениче, показа̀, ѳеодо́те.

Сле́зъ твои́хъ стена́ньми, и҆ крове́й пото́ки, ᲂу҆гаси́лъ є҆сѝ пре́лести лю́тое ᲂу҆́глїе, мꙋ́чениче ст҃и́телю ѳеодо́те.

Житїѐ твоѐ чи́стое показа́въ, свѧщеннодѣ́телѧ бжⷭ҇твенна и҆ и҆́стинна свидѣ́телѧ тѧ̀ стрⷭ҇те́й хрⷭ҇то́выхъ содѣ́ла.

Средѝ сꙋди́ща стоѧ̀, и҆ ᲂу҆ѧзвлѧ́емь лю́тыми ра́нами, хрⷭ҇то́ва и҆́мене, мꙋ́чениче, не ѿве́рглсѧ є҆сѝ, ѳеодо́те.

Сокрꙋша́емо тѣ́ло твоѐ ра́нами, по́мыслъ твердѣ́йшїй, и҆ вои́стиннꙋ, мꙋ́чениче, крѣпча́йшь содѣ́ловаше, пою́ща: сла́ва си́лѣ твое́й, гдⷭ҇и.

Распалѧ́емь любо́вїю влⷣчнею, ꙗ҆̀же ѿ ра́нъ терпѣ́лъ є҆сѝ болѣ̑зни лютѣ́йшыѧ, ꙗ҆́коже и҆но́мꙋ стра́ждꙋщꙋ, са́мъ пребыва́лъ є҆сѝ, велича́йшїй въ мꙋ́ченицѣхъ ѳеодо́те.

Претерпѣ́лъ є҆сѝ мꙋ̑ки, бг҃омꙋ́дре ѻ҆́ч҃е, прибли́жившыѧсѧ тѣ́лꙋ: воздаѧ̑нїѧ бо пребыва̑ющаѧ ви́дѣлъ є҆сѝ ᲂу҆ма̀ чистото́ю, ѡ҆блегча̑ющаѧ болѣ̑зни твоѧ̑.

Возвыша́емь, мꙋ́дре, на дре́во, ѳеодо́те, претерпѣва́лъ є҆сѝ твердѣ́йше терза̑нїѧ пло́ти твоеѧ̀, вельмѝ ᲂу҆дивлѧ́емь.

Ви́симь, строга̑нїѧ терпѣ́лъ є҆сѝ тѣлє́снаѧ, ѳеодо́те, влⷣкꙋ ᲂу҆крѣплѧ́ющаго и҆мѣ́ѧй, и҆ вѣ́рою тѧ̀ ᲂу҆твержда́юща.

Кро́вными ѡ҆моче́ньми ѡ҆багри́въ, ѳеодо́те блаже́нне, ѻ҆де́ждꙋ твою̀ сщ҃е́ннꙋю, свѣтлѣ́йшꙋ показа́лъ є҆сѝ.

Всажде́нъ бы́лъ є҆сѝ въ темни́цꙋ, ꙗ҆́кѡ ѕлодѣ́й, ѳеодо́те, храни́тель сы́й бжⷭ҇твенныхъ влⷣки, сла́вне, повелѣ́нїй, бж҃е́ственное твоѐ пра́зднество вельмѝ ᲂу҆ѧсни́вшагѡ.

Стоѧ́лъ є҆сѝ предъ сꙋди́щемъ непра́ведныхъ сꙋди́мь, и҆ ѡ҆сꙋжда́ѧ человѣ́ки беззако́ннꙋющыѧ всꙋ́е, и҆ предпочита́ющыѧ непра́вдꙋ, свѧти́телю бг҃омꙋ́дре, па́че пра́вды.

Во́лны свирѣ́пыхъ мꙋ́къ разрꙋши́лъ є҆сѝ, ꙗ҆́коже нѣ́кїй ка́мень, всеблаже́нне, возше́дъ восхожде́нїемъ твоегѡ̀ се́рдца къ ка́меню краеꙋго́льномꙋ хрⷭ҇тꙋ̀ бг҃ꙋ.

Бжⷭ҇твенною, ѻ҆́ч҃е, распалѧ́емь любо́вїю дх҃а, на ѻ҆́дръ разжже́нъ весьма̀ возложе́нъ, не ѡ҆пали́мъ пребы́лъ є҆сѝ, благослове́нъ є҆сѝ, бж҃е мо́й, зовы́й, и҆ гдⷭ҇и.

Ꙗ҆́коже и҆но́мꙋ са́мъ пребыва́ѧ стра́ждꙋщꙋ, ве́сь бо ᲂу҆мо́мъ, блаже́нне, къ бг҃ꙋ прише́дъ, сѣче́нїѧ же и҆ жже́нїѧ ты̀ небре́глъ є҆сѝ, не чꙋ́вствꙋѧ хрⷭ҇то́вымъ манове́нїемъ.

Премꙋ́дростїю слове́съ безслове́сїѧ сꙋ́щыѧ, блаже́нне, и҆спо́лнєны, посредѝ сꙋди́ща ѡ҆бличи́лъ є҆сѝ, проѧвле́ннѡ ѕлоче́стїемъ недꙋ́говавшыѧ, и҆ па́че сотво́ршагѡ дє́мѡнскїѧ и҆зво́лившыѧ кꙋмі́ры.

По́двиги твои́ми врагꙋ̀ противлѧ́ѧсѧ, мꙋ́чениче ѳеодо́те, гвоздьми́ бо, сла́вне, въ но́ги пронзе́нъ, ѿводѧ́щею къ црⷭ҇твꙋ нбⷭ҇номꙋ стезе́ю ше́ствовалъ є҆сѝ, благослови́те, поѧ̀, дѣла̀ гдⷭ҇нѧ, гдⷭ҇а.

Проповѣ́даѧ бг҃а на зе́млю прише́дша, и҆ бжⷭ҇твенными страстьмѝ стра́сть всепа́гꙋбнꙋю разрꙋ́шшаго, стра́сть бжⷭ҇твеннꙋю и҆ блаже́ннꙋю под̾ѧ́лъ є҆сѝ пло́тїю, вопїѧ̀, ѳеодо́те: благослови́те, всѧ̑ дѣла̀ гдⷭ҇нѧ, гдⷭ҇а.

Крове́й ка́плѧми, и҆ сщ҃е́нныхъ ᲂу҆че́нїй тече́нїемъ, вѣ́рныхъ напои́лъ є҆сѝ сердца̀ благода́тїю, всемꙋ́дре: и҆ прозѧба́ти ᲂу҆стро́илъ є҆сѝ, земледѣ́лателю благи́хъ, бж҃е́ствєннаѧ разꙋмѣ̑нїѧ. є҆мꙋ́же вопїе́мъ: бл҃гослови́те, всѧ̑ дѣла̀ гдⷭ҇нѧ, гдⷭ҇а.

И҆сцѣлє́нїѧ и҆сточа́етъ всѧ́чєскаѧ моще́й бжⷭ҇твеннаѧ ра́ка свѧще́ннѣйшагѡ па́стырѧ, и҆ стра̑сти ᲂу҆ставлѧ́етъ, и҆ рѣши́тъ лѣ̑тныѧ ꙗ҆́кѡ вои́стиннꙋ болѣ̑зни, сп҃са бжⷭ҇твенною благода́тїю.

Ꙗ҆́кѡ сщ҃енномꙋ́ченикъ, вѧза́ти же и҆ рѣши́ти и҆мѣ́ѧ вла́сть, разрѣшѝ ѕѡ́лъ мои́хъ ᲂу҆́зы, и҆ дꙋ́шꙋ мою̀ жего́мꙋ ѻ҆гне́мъ грѣха̀ ѡ҆росѝ, молѧ̀ всеще́драго.

Дне́сь вѣ́рнѡ пра́зднꙋетъ цр҃ковь, бг҃оно́се, всесвѧще́ннꙋю твою̀ па́мѧть, и҆ ѿше́ствїе къ чл҃вѣколю́бцꙋ, и҆ ра́дꙋѧсѧ плете́тъ тебѣ̀ пѣ́сней бжⷭ҇твєнныѧ дїади̑мы.

Ꙗ҆́коже днесвѣ́тлꙋю ѕвѣздꙋ̀, тѧ̀ стѧжа́вше, бг҃оглаго́ливе, твои́ми свѣтолꙋ́чными зарѧ́ми, бжⷭ҇твенныхъ болѣ́зней, и҆ чꙋде́съ твои́хъ, чи́стыми свѣтлостьмѝ ѡ҆зарѧ́емсѧ, ѳеодо́те.