Кондак 1
Избра́нная от ро́да держа́внаго дщи́ Це́ркве Ру́сския, любо́вию изоби́льною и милосе́рдием Бо́гу и бли́жним до́бре послужи́вшая, за ве́ру во Христа́ Го́спода на́шего ду́шу свою́ положи́вшая и венце́м сла́вы Христо́вы украше́нная, восхваля́юще по́двиги и страда́ния твоя́, с любо́вию воспева́ем ти́ си́це: Ра́дуйся, благове́рная княги́не Елисаве́то, преподобному́ченице достосла́вная.
Икос 1
А́нгельским попече́нием храни́мая и ма́терию твое́ю благоче́стию поуча́емая, в труде́х, моли́твах и ми́лостыни измла́да о́браз доброде́тельнаго жития́ яви́ла еси́. По кончи́не же ма́тере твоея́ и бли́жних сро́дников кре́стный пу́ть, Го́сподем запове́данный, уразуме́ла еси́. Те́мже, дивя́щеся таково́му от ю́ности твоему́ избра́нию, со умиле́нием взыва́ем ти́:
Ра́дуйся, от ю́ности Христа́ возлюби́вшая; ра́дуйся, во мла́дости нача́тки благоче́стия прии́мшая.
Ра́дуйся, Христо́ва а́гнице избра́нная; ра́дуйся, стра́х Бо́жий в души́ восприя́вшая.
Ра́дуйся, доброде́тели ма́тере твоея́ насле́дствовавшая; ра́дуйся, трудолю́бию и милосе́рдию е́ю науче́нная.
Ра́дуйся, се́рдцем в Бо́зе утвержде́нная; ра́дуйся, с ве́рою и упова́нием кре́ст тво́й поне́сшая.
Ра́дуйся, земли́ оте́чества твоего́ цве́те благоуха́нный; ра́дуйся, чистото́ю жи́зни твоея́ Небеса́ возвесели́вшая.
Ра́дуйся, на служе́ние стра́ждущим Бо́гом избра́нная; ра́дуйся, пред Го́сподем о на́с те́плая моли́твеннице.
Ра́дуйся, благове́рная княги́не Елисаве́то, преподобному́ченице достосла́вная.
Кондак 2
Ви́де Госпо́дь благо́е се́рдца твоего́ изволе́ние, я́ко возжеле́ла еси́ житие́ проводи́ти во благоче́стии и чистоте́, к небе́сней красоте́ о́чи се́рдца твоего́ устремля́ющи и любо́вь к Бо́гу в себе́ возгрева́ющи. Моли́твами твои́ми и на́ша сердца́ то́ю же любо́вию просвети́, да с тобо́ю воспое́м Бо́гу: Аллилу́иа.
Икос 2
Ра́зум просвеще́н иму́щи и все́ упова́ние на Бо́га возложи́вши, не убоя́лася еси́, свята́я Елисаве́то, оста́вити до́м отца́ твоего́ и в но́вое Оте́чество всели́тися, егда́ бра́ком сочета́лася еси́ с росси́йским вели́ким кня́зем Се́ргием. Мы́ же с любо́вию взыва́ем ти́ си́це:
Ра́дуйся, от За́пада на Восто́к прише́дшая; ра́дуйся, в но́вем Оте́чествии едине́ние с Це́рковию обре́тшая.
Ра́дуйся, за́поведи Госпо́дни испо́лнити возжеле́вшая; ра́дуйся, в сердца́х на́ших по Бо́зе ревнова́ние воспламеня́ющая.
Ра́дуйся, в супру́жестве целому́дренне пожи́вшая; ра́дуйся, в доброде́лании на́с наставля́ющая.
Ра́дуйся, благове́рная княги́не, стране́ на́шей ве́рно послужи́вшая; ра́дуйся, супру́гу твоему́ в де́лех благи́х му́драя помо́щнице.
Ра́дуйся, семе́йств благочести́вых покрови́тельнице; ра́дуйся, матери́нскою любо́вию на́с согрева́ющая.
Ра́дуйся, красото́ю душе́вною и теле́сною все́х удивля́ющая; ра́дуйся, всего́ ми́ра христиа́нскаго украше́ние.
Ра́дуйся, благове́рная княги́не Елисаве́то, преподобному́ченице достосла́вная.
Кондак 3
Си́лою Боже́ственныя благода́ти ко спасе́нию умудре́нная, позна́ла еси́ ве́ру и́стинную, княги́не ми́лостивая Елисаве́то. Те́мже, во Святе́й Земли́ пребыва́ющи и в жела́нии се́рдца своего́ прия́ти Правосла́вие укрепи́вшися, воспе́ла еси́ просвети́вшему тя́ Бо́гу: Аллилу́иа.
Икос 3
Иму́щи се́рдце, до́брей земли́ подо́бное, ве́ру правосла́вную удо́бь восприя́ла еси́, те́мже Свята́го Миропома́зания и причаще́ния Святы́х Христо́вых Та́ин в пра́здник Воскреше́ния пра́веднаго Ла́заря сподо́билася еси́. Мы́ же, сла́вяще просвеще́ние твое́ благода́тию Свята́го Ду́ха, велича́ем тя́:
Ра́дуйся, от заблужде́ний отре́кшаяся; ра́дуйся, ве́ру правосла́вную прие́мшая.
Ра́дуйся, пома́занием Свята́го Ду́ха запечатле́нная; ра́дуйся, с Це́рковию и́стинною воссоедине́нная.
Ра́дуйся, святе́й пра́ведней Елисаве́те тезоимени́тая; ра́дуйся, в по́двизех е́й усе́рдно подража́вшая.
Ра́дуйся, сыново́м За́пада пу́ть к и́стинней ве́ре показу́ющая; ра́дуйся, от благочести́вых люде́й росси́йских любо́вию почита́емая.
Ра́дуйся, ми́лостивая ма́ти, ми́лость у Влады́ки и Го́спода обре́тшая; ра́дуйся, и о на́шем поми́ловании усе́рдно моля́щаяся.
Ра́дуйся, све́т Боже́ственный в се́рдце свое́м носи́вшая; ра́дуйся, тьму́ жи́зни на́шея све́том Христо́вых за́поведей озаря́ющая.
Ра́дуйся, благове́рная княги́не Елисаве́то, преподобному́ченице достосла́вная.
Кондак 4
Бу́ря зло́бы врага́ ро́да челове́ческаго не поколеба́ тя́, свята́я, егда́ благове́рный супру́г тво́й внеза́пную сме́рть от уби́йц злонра́вных восприя́т, ему́же сострада́ющи, ве́лие му́жество и христиа́нскую любо́вь яви́ла еси́, о покая́нии же уби́йц моля́щися, твори́ла еси́ пе́снь: Аллилу́иа.
Икос 4
Слы́шавше росси́йстии лю́дие о убие́нии супру́га твоего́, моля́ху Бо́га, да укрепи́т тя́, свята́я Елисаве́то, в несе́нии ско́рби сея́. Ты́ же, ева́нгельскою любо́вию дви́жима, в темни́це уби́йцу посети́ла еси́, к покая́нию его́ подвиза́ющи и моли́твы вознося́щи ко Го́споду о проще́нии его́. Сего́ ра́ди приими́ от на́с, недосто́йных, похвалы́ сия́:
Ра́дуйся, за́поведь Христо́ву о любви́ ко враго́м испо́лнившая; ра́дуйся, уби́йцу супру́га твоего́ ева́нгельски прости́вшая.
Ра́дуйся, мно́ги ско́рби и беды́ претерпе́вшая; ра́дуйся, в ско́рбех и печа́лех на́м помога́ющая.
Ра́дуйся, заблу́ждших на пу́ть и́стины и покая́ния наставля́ющая; ра́дуйся, о поми́ловании гре́шных те́пле хода́тайствующая.
Ра́дуйся, во тьме́ печа́лей све́том наде́жды на́с озаря́ющая; ра́дуйся, путево́дная звездо́ все́м спасе́ния ча́ющим.
Ра́дуйся, окамене́нная сердца́ на́ша во умиле́ние приводя́щая; ра́дуйся, о вся́кой ско́рби на́шей Христа́ умоля́ющая.
Ра́дуйся, зло́бу ми́ра добро́м побежда́вшая; ра́дуйся, лю́дем росси́йским любо́вь и́стинную показа́вшая.
Ра́дуйся, благове́рная княги́не Елисаве́то, преподобному́ченице достосла́вная.
Кондак 5
Боготе́чная звезда́ яви́лася еси́ в земли́ Росси́йстей, свята́я Елисаве́то, егда́ бога́тство и сла́ву я́ко пра́х вмени́вши, в ру́це Бо́жии жи́знь свою́ предала́ еси́, Кре́ст Госпо́день вы́ну пред очи́ма иму́щи. Те́мже, моли́твою и де́лы милосе́рдия Бо́гу угоди́вши, дне́сь в ра́дости Ему́ пое́ши: Аллилу́иа.
Икос 5
Ви́девше тя́ лю́дие богоспаса́емаго гра́да Москвы́ ди́вную устрои́тельницу оби́тели милосе́рдия, возра́довашася, я́ко мно́ги жены́, де́вы и ста́рицы росси́йския обрето́ша зде́ ти́хое и душеспаси́тельное приста́нище, подража́юще святы́м жена́м-мироно́сицам Ма́рфе и Мари́и в служе́нии Бо́гу и бли́жним. Сего́ ра́ди, прославля́юще тя́, глаго́лем си́це:
Ра́дуйся, среди́ сла́вы земны́я суету́ мирска́го жития́ уразуме́вшая; ра́дуйся, име́ние свое́ разда́вшая и нищету́ Христо́ву возлюби́вшая.
Ра́дуйся, гра́д Москву́ оби́телию ди́вною украси́вшая; ра́дуйся, благо́е и́го Христо́во на ра́мо восприи́мшая.
Ра́дуйся, служе́нию святы́х же́н-мироно́сиц подража́вшая; ра́дуйся, мно́гия жены́ во оби́тель милосе́рдия приве́дшая.
Ра́дуйся, ко спасе́нию се́стр твои́х му́драя упра́вительнице; ра́дуйся, оби́тели твоея́ неусы́пная храни́тельнице.
Ра́дуйся, в по́двизех теле́сных и духо́вных на́с укрепля́ющая; ра́дуйся, пу́ть от земли́ на Не́бо на́м показу́ющая.
Ра́дуйся, свети́ло милосе́рдия, над гра́дом Москво́ю возше́дшее; ра́дуйся, все́х служа́щих бли́жним покрови́тельнице.
Ра́дуйся, благове́рная княги́не Елисаве́то, преподобному́ченице достосла́вная.
Кондак 6
Пропове́дница любве́ Боже́ственныя и милосе́рдия неистощи́маго была́ еси́ в земли́ на́шей, свята́я Елисаве́то, благоче́стия ревни́тельнице, в сердца́х люде́й росси́йских любо́вь ко Го́споду и милосе́рдие к бра́тиям бе́дствующим возгрева́ющи. Те́мже и мы́, твои́м заве́том после́дующе, вку́пе с си́рыми и убо́гими Бо́гу воспои́м: Аллилу́иа.
Икос 6
Возсия́ла еси́ све́том и́ноческаго жития́ в стране́ Росси́йстей, преподо́бная ма́ти на́ша Елисаве́то, в посте́ и моли́тве, в нощны́х бде́ниих и стро́гом воздержа́нии пребыва́ющи, благоче́стию и смире́нию се́стры оби́тели твоея́ поуча́ла еси́. Мы́ же, тобо́ю на пу́ть те́сный по́двига духо́внаго наставля́еми, ублажа́ем тя́:
Ра́дуйся, пу́ть равноа́нгельнаго жития́ избра́вшая; ра́дуйся, в целому́дрии чистоту́ се́рдца твоего́ сохра́ньшая.
Ра́дуйся, в нестяжа́нии высоту́ ду́ха твоего́ показа́вшая; ра́дуйся, в послуша́нии Бо́гу и бли́жним послужи́вшая.
Ра́дуйся, му́драя княги́не и и́нокине пречестна́я; ра́дуйся, о́бразе жена́м христиа́нским.
Ра́дуйся, посто́м, бде́нием и непреста́нными моли́твами Бо́гу угоди́вшая; ра́дуйся, от сна́ грехо́внаго ду́ши на́ша пробужда́ющая.
Ра́дуйся, ко исполне́нию за́поведи о любви́ к Бо́гу и бли́жним все́х наставля́ющая; ра́дуйся, моли́тве те́плой на́с науча́ющая.
Ра́дуйся, наста́внице и́нокиням и собесе́днице а́нгелом; ра́дуйся, в со́нме преподо́бных же́н на Небеси́ просла́вленная.
Ра́дуйся, благове́рная княги́не Елисаве́то, преподобному́ченице достосла́вная.
Кондак 7
Хотя́щи во́лю Госпо́дню твори́ти, свята́я Елисаве́то, на вся́кий ча́с свою́ во́лю отсека́ла еси́, к сове́ту пусты́нных ста́рцев Гаврии́ла и Алекси́я притека́ющи и и́ны му́жи духоно́сныя вопроша́ющи, и́хже му́дрыми наставле́нии житие́ во оби́тели милосе́рдия до́бре устроя́ла еси́, непреста́нно с се́страми взыва́ющи Бо́гу: Аллилу́иа.
Икос 7
Но́вое чу́до показа́ Госпо́дь, егда́ дарова́ ти́, свята́я Елисаве́то, благода́ть и си́лу немощны́я исцеля́ти, безнаде́жныя утеша́ти, заблу́ждшия вразумля́ти. Ты́ же, облегче́ние и отра́ду с любо́вию подаю́щи, си́рым, забве́нным и немощны́м смире́нно послужи́ла еси́. Те́мже и на́с, убо́гих, твое́ю моли́твою от страсте́й грехо́вных исцели́ и бу́ди на́м ко спасе́нию упра́вительница, да благода́рственно воспое́м ти́:
Ра́дуйся, в послуша́нии духо́вным отце́м и вели́ким ста́рцем пожи́вшая; ра́дуйся, вели́кая ма́тушка людьми́ росси́йскими нарече́нная.
Ра́дуйся, да́р немощны́я ду́ши врачева́ти от Бо́га стяжа́вшая; ра́дуйся, боля́щия от одра́ боле́зни возставля́ющая.
Ра́дуйся, вдови́ц и сиро́т благосе́рдая попечи́тельнице; ра́дуйся, а́лчущих пита́тельнице и су́щим в беда́х ско́рая засту́пнице.
Ра́дуйся, все́ми презре́нных и отве́рженных не оставля́ющая; ра́дуйся, мно́гия ду́ши от тьмы́ грехо́вныя и поги́бели спаса́ющая.
Ра́дуйся, уныва́ющим в ско́рбех и обстоя́ниих му́драя уте́шительнице; ра́дуйся, и на́с, удруче́нных боле́зньми и немощьми́, укрепля́ющая.
Ра́дуйся, ка́ющимся гре́шником пред Го́сподем предста́тельнице; ра́дуйся, лю́дем росси́йским богодарова́нная помо́щнице.
Ра́дуйся, благове́рная княги́не Елисаве́то, преподобному́ченице достосла́вная.
Кондак 8
Стра́нное и стра́шное виде́ние яви́ Госпо́дь духовнику́ оби́тели милосе́рдия иере́ю Митрофа́ну, ты́ же, о свята́я ма́ти, сие́ виде́ние изъясня́ющи, прорекла́ еси́, я́ко ве́лие и гро́зное испыта́ние гряде́т на Це́рковь Ру́сскую и держа́ву на́шу: святы́нь поруга́ние, бра́нь братоуби́йственная, сму́та ве́лия, кончи́на му́ченическая семе́йства ца́рскаго; но поми́лует Бо́г Росси́ю по моли́твам святы́х ея́, с ни́миже ты́ ны́не воспева́еши Бо́гу: Аллилу́иа.
Икос 8
Вся́ благода́тию Боже́ственною просвеща́ема, свята́я Елисаве́то, мы́сленныма очи́ма гне́вное посеще́ние Бо́жие страны́ на́шея зре́ла еси́ и проро́чески веща́ла еси́, я́ко мно́зи му́ченицы и испове́дницы в земли́ Ру́сстей возсия́ют. Те́мже все́ упова́ние на Бо́жию Ма́терь возложи́ти лю́ди росси́йския призыва́ла еси́, ве́рующи, я́ко моли́твами Ея́ устро́ится и благослови́тся земля́ на́ша. Мы́ же, ве́дуще прорече́ния твоего́ о судьбе́ отчи́зны на́шея сбытие́, ублажа́ем тя́ си́це:
Ра́дуйся, хра́м Покро́ва Пресвяты́я Богоро́дицы во оби́тели воздви́гшая; ра́дуйся, в ру́це Пречи́стей Ма́тери оби́тель твою́ преда́вшая.
Ра́дуйся, хра́мов святы́х и благоле́пных устрои́тельнице; ра́дуйся, к Богоро́дице неусы́пная моли́твеннице.
Ра́дуйся, хра́мы Бо́жии сосу́дами и ри́зами благоукраси́вшая; ра́дуйся, я́ко се́рдце твое́ оби́телию Свята́го Ду́ха соде́лася.
Ра́дуйся, житие́м свои́м Го́споду и Ма́тери Его́ ве́рно послужи́вшая; ра́дуйся, все́ упова́ние на Бо́га возлага́ти на́с науча́ющая.
Ра́дуйся, кро́тость, тишину́ и ми́р сердца́м на́шим подаю́щая; ра́дуйся, благода́тными да́ры све́тло украше́нная.
Ра́дуйся, му́жественне ско́рби и клевету́ претерпе́вшая; ра́дуйся, себе́ в же́ртву Бо́гу угото́вившая.
Ра́дуйся, благове́рная княги́не Елисаве́то, преподобному́ченице достосла́вная.
Кондак 9
Вся́ любо́вию к Бо́гу пламене́ющи, свята́я Елисаве́то, не убоя́лася еси́, егда́ приидо́ша во оби́тель твою́ лю́дие безбо́жнии, хотя́щии су́д непра́веден над тобо́ю соверши́ти. Ты́ же, Го́сподем сохраня́ема, сме́рти тогда́ избе́гла еси́, о вразумле́нии и просвеще́нии неразу́мных и заблу́ждших моля́щися, Бо́гу же во благодаре́нии воспева́ющи: Аллилу́иа.
Икос 9
Вети́й челове́ческих уста́ не возмо́гут досто́йно восхвали́ти кре́пость любве́ твоея́ во дни́ бе́д и напа́стей вели́ких, обыше́дших Оте́чество на́ше, егда́ не восхоте́ла еси́ поки́нути Росси́ю и оби́тель, тобо́ю созда́нную, се́стры тоя́ за ве́ру правосла́вную да́же до сме́рти стоя́ти увещава́ющи. Мы́ же с любо́вию восхваля́ем тя́:
Ра́дуйся, зе́млю на́шу возлюби́вшая; ра́дуйся, от люде́й правосла́вных с любо́вию прославля́емая.
Ра́дуйся, щито́м ве́ры огражда́тися на́с науча́ющая; ра́дуйся, жела́ние кре́стным путе́м сле́довати в на́с укрепля́ющая.
Ра́дуйся, от ро́ва поги́бели мно́гия спа́сшая; ра́дуйся, оби́тели твое́й и гра́ду Москве́ покро́ве и защи́тнице.
Ра́дуйся, се́стры оби́тели милосе́рдия в ве́ре и наде́жди утверди́вшая; ра́дуйся, на по́двиг му́ченичества за Христа́ и́х наста́вльшая.
Ра́дуйся, приобщи́тися страсте́м Христо́вым удосто́ившаяся; ра́дуйся, в по́двизе испове́дничества ве́рныя утвержда́ющая.
Ра́дуйся, любви́ же́ртвенней, ве́чней на́с науча́ющая; ра́дуйся, в ра́дость Го́спода твоего́ вше́дшая.
Ра́дуйся, благове́рная княги́не Елисаве́то, преподобному́ченице достосла́вная.
Кондак 10
Спаси́тельнаго по́двига и́щущи, свята́я Елисаве́то, с ра́достию благодари́ла еси́ Бо́га, я́ко сподо́би тя́ понести́ кре́ст Его́. Те́мже просия́ побе́дою ве́ра твоя́, егда́, к Голго́фе свое́й восходя́щи, непреста́нно возглаша́ла еси́: Сла́ва Бо́гу за вся́! Умоли́, о ма́ти на́ша, да да́рует на́м Госпо́дь стяжа́ти му́дрость и си́лу за ве́ру пра́вую да́же до сме́рти стоя́ти и воспева́ти Ему́ еди́ными усты́ и еди́ным се́рдцем: Аллилу́иа.
Икос 10
Стена́ необори́мая и заступле́ние стране́ на́шей дарова́ся свята́я ико́на Бо́жия Ма́тере Держа́вная, ю́же прия́ла еси́ во оби́тели милосе́рдия, свята́я Елисаве́то, я́ко зна́мение побе́ды над миродержи́тели тьмы́ ве́ка сего́. Сего́ ра́ди и мы́, все́ упова́ние на Держа́вную Влады́чицу возложи́вше, тебе́ я́ко и́стинную служи́тельницу и послу́шницу Пречи́стыя Ма́тере Го́спода восхваля́ем:
Ра́дуйся, испо́лненная благода́ти и си́лы Бо́жия; ра́дуйся, избра́вшая благу́ю ча́сть, я́же не оты́мется от тебе́.
Ра́дуйся, в кро́тости и смире́нии Бо́жией Ма́тери подража́вшая; ра́дуйся, я́ко му́драя ева́нгельская де́ва еле́й благода́ти собра́вшая.
Ра́дуйся, Пресвяты́я Богоро́дицы благогове́йная служи́тельнице; ра́дуйся, у Престо́ла Сы́на Ея́ непреста́нная моли́твеннице.
Ра́дуйся, о́браз самоотверже́ния на́м яви́вшая; ра́дуйся, дру́г дру́га тяготы́ носи́ти науча́ющая.
Ра́дуйся, скорбьми́ и слеза́ми в Ца́рство Небе́сное возше́дшая; ра́дуйся, любви́ и терпе́нию в страда́нии су́щих все́х науча́ющая.
Ра́дуйся, а́нгельски на земли́ пожи́вшая; ра́дуйся, на Небеси́ вене́ц сла́вы улучи́вшая.
Ра́дуйся, благове́рная княги́не Елисаве́то, преподобному́ченице достосла́вная.
Кондак 11
Пе́ние моле́бное Бо́жией Ма́тери возноси́ла еси́, свята́я Елисаве́то, в де́нь пра́зднования И́верския ико́ны Ея́, егда́ взя́ша тя́ нечести́вии и в темни́цу вверго́ша. Ты́ же благодари́ла еси́ Христа́ Бо́га на́шего, да́вшаго тебе́ не то́чию е́же в Него́ ве́ровати, но и е́же по Не́м страда́ти, в у́зах темни́чных воспева́ющи Ему́: Аллилу́иа.
Икос 11
Све́т Боже́ственный осия́ тя́, страстоте́рпице свята́я княги́не Елисаве́то, ку́пно с преподобному́ченицею Варва́рою, о Христе́ сестро́ю твое́ю, и с про́чими страстоте́рпцы имени́тыми, егда́ в глубо́кий ро́в низри́нуша ва́с нечести́вии. Ты́ же, ра́ны вели́каго кня́зя Иоа́нна обязу́ющи и страда́ния бли́жних облегча́ющи, воспева́ла еси́ свяще́нная песнопе́ния, за убива́ющих си́це моля́щися: О́тче, отпусти́ и́м, не ве́дят бо, что́ творя́т. Уврачу́й и на́ших ду́ш ра́ны, преподо́бная ма́ти, да с любо́вию воспое́м ти́:
Ра́дуйся, му́ченическую кончи́ну свою́ предуве́девшая; ра́дуйся, страстоте́рпице великоимени́тая.
Ра́дуйся, Страсте́м Христо́вым приобщи́вшаяся; ра́дуйся, си́лою Боже́ственною в страда́ниих укрепля́емая.
Ра́дуйся, за мучи́телей свои́х, Христу́ подража́ющи, моли́вшаяся; ра́дуйся, до са́мыя кончи́ны твоея́ пе́снь Бо́гу воспева́вшая.
Ра́дуйся, кро́вию свое́ю зе́млю Ру́сскую ороси́вшая; ра́дуйся, со́нму но́вых му́ченик сопричте́нная.
Ра́дуйся, я́ко ли́ку преподо́бных и пра́ведных же́н приобщи́лася еси́; ра́дуйся, святы́х благове́рных княги́нь земли́ Ру́сския досто́йная сонасле́днице.
Ра́дуйся, же́ртво непоро́чная и благоприя́тная, Бо́гу принесе́нная; ра́дуйся, со все́ми святы́ми земли́ на́шея торжеству́ющая.
Ра́дуйся, благове́рная княги́не Елисаве́то, преподобному́ченице достосла́вная.
Кондак 12
Благода́ть источа́ют честны́я мо́щи ва́ша, святы́я преподобному́ченицы Елисаве́то и Варва́ро, и́хже от поруга́ния и безче́стия спа́сше, благочести́вии лю́дие из Росси́и во святы́й гра́д Иерусали́м принесо́ша и в ве́си Гефсимани́йстей погребо́ша, иде́же мно́зии к ни́м приходя́ще, ублажа́ют ва́с, воспева́юще Бо́гу, ди́вному во святы́х Свои́х: Аллилу́иа.
Икос 12
Све́та небе́снаго и благоуха́ния чу́днаго хра́м святы́я мироно́сицы Мари́и Магдали́ни во Иерусали́ме испо́лнися, егда́ гро́б с те́лом твои́м отве́рст бы́сть. Те́мже ны́не Це́ркве Правосла́вныя ча́да вси́ ра́дуются и лику́ют о Го́споде, притека́юще к чудото́чней ра́це моще́й твои́х, преподобному́ченице Елисаве́то, и благодаря́ще просла́вльшаго тя́ Го́спода, пою́т си́це:
Ра́дуйся, я́ко мо́щи твоя́ нетле́нием процвето́ша; ра́дуйся, во Святу́ю Зе́млю те́лом принесе́нная.
Ра́дуйся, в саду́ моле́ния Госпо́дня погребе́нная; ра́дуйся, во хра́ме святы́я мироно́сицы упокое́нная.
Ра́дуйся, явле́нием моще́й твои́х Це́рковь Ру́сскую возвесели́вшая; ра́дуйся, су́щих в разсе́янии росси́йских люде́й духо́вно укрепи́вшая.
Ра́дуйся, я́ко Госпо́дь чрез мо́щи твоя́ исцеля́ет вся́кия ско́рби и боле́зни; ра́дуйся, по мо́рю жите́йскому пла́вающих ти́хое приста́нище.
Ра́дуйся, вене́ц доброде́телей собра́вшая; ра́дуйся, сла́вою и че́стию от Бо́га венча́нная.
Ра́дуйся, Го́рняго Иерусали́ма блаже́нная обита́тельнице; ра́дуйся, ко Иерусали́му Небе́сному все́м на́м путеводи́тельнице.
Ра́дуйся, благове́рная княги́не Елисаве́то, преподобному́ченице достосла́вная.
Кондак 13
О, вели́кая страстоте́рпице, же́н росси́йских украше́ние и ра́досте на́ша, княги́не ми́лостивая Елисаве́то, приими́ от се́рдца воздыха́ние на́ше, с любо́вию тебе́ приноси́мое, и твои́м предста́тельством ко Го́споду ду́х пра́выя ве́ры и благоче́стия в на́с укрепи́, в доброде́тели и милосе́рдии утверди́, помози́ кре́ст скорбе́й с терпе́нием и наде́ждою понести́, в любви́ и согла́сии наро́д на́ш сохрани́, да сподо́бимся в ра́дость Го́спода вни́ти, со А́нгелы и все́ми святы́ми пою́ще Ему́: Аллилу́иа.
Повтор
Этот кондак читается трижды, затем икос 1-й и кондак 1-й.
Икос 1
А́нгельским попече́нием храни́мая и ма́терию твое́ю благоче́стию поуча́емая, в труде́х, моли́твах и ми́лостыни измла́да о́браз доброде́тельнаго жития́ яви́ла еси́. По кончи́не же ма́тере твоея́ и бли́жних сро́дников кре́стный пу́ть, Го́сподем запове́данный, уразуме́ла еси́. Те́мже, дивя́щеся таково́му от ю́ности твоему́ избра́нию, со умиле́нием взыва́ем ти́:
Ра́дуйся, от ю́ности Христа́ возлюби́вшая; ра́дуйся, во мла́дости нача́тки благоче́стия прии́мшая.
Ра́дуйся, Христо́ва а́гнице избра́нная; ра́дуйся, стра́х Бо́жий в души́ восприя́вшая.
Ра́дуйся, доброде́тели ма́тере твоея́ насле́дствовавшая; ра́дуйся, трудолю́бию и милосе́рдию е́ю науче́нная.
Ра́дуйся, се́рдцем в Бо́зе утвержде́нная; ра́дуйся, с ве́рою и упова́нием кре́ст тво́й поне́сшая.
Ра́дуйся, земли́ оте́чества твоего́ цве́те благоуха́нный; ра́дуйся, чистото́ю жи́зни твоея́ Небеса́ возвесели́вшая.
Ра́дуйся, на служе́ние стра́ждущим Бо́гом избра́нная; ра́дуйся, пред Го́сподем о на́с те́плая моли́твеннице.
Ра́дуйся, благове́рная княги́не Елисаве́то, преподобному́ченице достосла́вная.
Кондак 1
Избра́нная от ро́да держа́внаго дщи́ Це́ркве Ру́сския, любо́вию изоби́льною и милосе́рдием Бо́гу и бли́жним до́бре послужи́вшая, за ве́ру во Христа́ Го́спода на́шего ду́шу свою́ положи́вшая и венце́м сла́вы Христо́вы украше́нная, восхваля́юще по́двиги и страда́ния твоя́, с любо́вию воспева́ем ти́ си́це: Ра́дуйся, благове́рная княги́не Елисаве́то, преподобному́ченице достосла́вная.
Молитвы
О, вели́кая княги́не, свята́я преподобному́ченице Елисаве́то, Росси́йская похвало́, гра́да Москвы́ пресла́вное украше́ние и Святы́я Земли́ свяще́нное достоя́ние!
Ты́ во дни́ жития́ твоего́ ве́ру, наде́жду, любо́вь нело́жны стяжа́вши, милосе́рдием к стра́ждущим све́тло просия́ла еси́. Терпе́нием же скорбе́й и искуше́ний о́браз смире́ния бли́жним яви́вши, изгна́нием и страда́ньми житие́ увенча́ла еси́ и во Ца́рствии Небе́снем ны́не пребыва́еши.
Сего́ ра́ди мо́лим тя́, страстоте́рпице свята́я, моли́твами твои́ми да́руй на́м се́рдце смире́нное и покая́нное, милосе́рдие неоскудева́ющее, служе́ние бли́жним же́ртвенное, терпе́ние непоколе́блемое, му́жество в ско́рбех и обстоя́ниих неослабева́ющее, в стра́шный же ча́с сме́ртный упова́ние тве́рдое на Го́спода на́шего Иису́са Христа́, Ему́же подоба́ет вся́кая сла́ва, че́сть и поклоне́ние со Безнача́льным Его́ Отце́м, и Пресвяты́м, Благи́м и Животворя́щим Его́ Ду́хом ны́не и при́сно и во ве́ки веко́в. Ами́нь.
О, святы́я новому́ченицы Це́ркве Ру́сския, вели́кая княги́не Елисаве́то и пречестна́я и́нокине Варва́ро, ку́пно ева́нгельския за́поведи де́лом во оби́тели милосе́рдия соверши́вшия, ве́ры ра́ди правосла́вныя до сме́рти подвиза́вшияся и до́брый пло́д в терпе́нии страсте́й Христу́ прине́сшия! Моли́теся Ему́, я́ко победи́телю сме́рти, да утверди́т Це́рковь Ру́сскую Правосла́вную и Оте́чество на́ше. Се́ бо лука́вый вра́г вооружа́ется на ны́, хотя́ на́с погуби́ти в междоусо́бных бра́нех, ско́рбех, печа́лех, боле́знех, ну́ждах и беда́х лю́тых. Умоли́те Го́спода низложи́ти вся́ немощны́я де́рзости его́; ве́ру в сердца́х люде́й правосла́вных укрепи́те, на́м же му́жества да́р низпосли́те, да, отве́ргшеся себе́ и взе́мше кре́ст сво́й, после́дуем Христу́, распина́юще пло́ть свою́ со страстьми́ и похотьми́. Сохрани́те на́с от вся́каго зла́, освяти́те пути́ жи́зни на́шея, да́руйте покая́ние нелицеме́рное, тишину́ и ми́р душа́м на́шим, испроси́те у Го́спода все́м на́м мыта́рств го́рьких и ве́чныя му́ки изба́витися и Небе́сному Ца́рствию насле́дником бы́ти со все́ми святы́ми, от ве́ка угоди́вшими Бо́гу, да ра́дующеся воздади́м хвалу́, че́сть и поклоне́ние Отцу́ и Сы́ну и Свято́му Ду́ху во ве́ки веко́в. Ами́нь.
Конда́къ а҃
И҆збра́ннаѧ ѿ ро́да держа́внагѡ дщѝ цр҃кве рꙋ́сскїѧ, любо́вїю и҆з̾ѻби́льною и҆ млⷭ҇рдїемъ бг҃ꙋ и҆ бли̑жнимъ до́брѣ послꙋжи́вшаѧ, за вѣ́рꙋ во хрⷭ҇та̀ гдⷭ҇а на́шего дꙋ́шꙋ свою̀ положи́вшаѧ и҆ вѣнце́мъ сла́вы хрⷭ҇то́вы ᲂу҆краше́ннаѧ, восхвалѧ́юще по́двиги и҆ страда̑нїѧ твоѧ̑, съ любо́вїю воспѣва́емъ тѝ си́це: Ра́дꙋйсѧ, бл҃говѣ́рнаѧ кнѧги́не є҆лїсаве́то, прпⷣбномч҃нце достосла́внаѧ.
І҆́косъ а҃
А҆́гг҃льскимъ попече́нїемъ храни́маѧ и҆ ма́терїю твое́ю бл҃гоче́стїю поꙋча́емаѧ, въ трꙋдѣ́хъ, мл҃твахъ и҆ ми́лостыни и҆змла́да ѻ҆́бразъ добродѣ́тельнагѡ житїѧ̀ ꙗ҆ви́ла є҆сѝ. По кончи́нѣ же ма́тере твоеѧ̀ и҆ бли́жнихъ сро́дникѡвъ крⷭ҇тный пꙋ́ть, гдⷭ҇емъ заповѣ́данный, ᲂу҆разꙋмѣ́ла є҆сѝ. Тѣ́мже, дивѧ́щесѧ таково́мꙋ ѿ ю҆́ности твоемꙋ̀ и҆збра́нїю, со ᲂу҆миле́нїемъ взыва́емъ тѝ:
Ра́дꙋйсѧ, ѿ ю҆́ности хрⷭ҇та̀ возлюби́вшаѧ: ра́дꙋйсѧ, во мла́дости нача́тки бл҃гоче́стїѧ прїи́мшаѧ.
Ра́дꙋйсѧ, хрⷭ҇то́ва а҆́гнице и҆збра́ннаѧ: ра́дꙋйсѧ, стра́хъ бж҃їй въ дꙋшѝ воспрїѧ́вшаѧ.
Ра́дꙋйсѧ, добродѣ́тєли ма́тере твоеѧ̀ наслѣ́дствовавшаѧ: ра́дꙋйсѧ, трꙋдолю́бїю и҆ млⷭ҇рдїю є҆́ю наꙋче́ннаѧ.
Ра́дꙋйсѧ, се́рдцемъ въ бз҃ѣ ᲂу҆твержде́ннаѧ: ра́дꙋйсѧ, съ вѣ́рою и҆ ᲂу҆пова́нїемъ крⷭ҇тъ тво́й поне́сшаѧ.
Ра́дꙋйсѧ, землѝ ѻ҆те́чества твоегѡ̀ цвѣ́те бл҃гоꙋха́нный: ра́дꙋйсѧ, чистото́ю жи́зни твоеѧ̀ нб҃са̀ возвесели́вшаѧ.
Ра́дꙋйсѧ, на слꙋже́нїе стра́ждꙋщымъ бг҃омъ и҆збра́ннаѧ: ра́дꙋйсѧ, пред̾ гдⷭ҇емъ ѡ҆ на́съ те́плаѧ мл҃твеннице.
Ра́дꙋйсѧ, бл҃говѣ́рнаѧ кнѧги́не є҆лїсаве́то, прпⷣбномч҃нце достосла́внаѧ.
Конда́къ в҃
Ви́дѣ гдⷭ҇ь бл҃го́е се́рдца твоегѡ̀ и҆зволе́нїе, ꙗ҆́кѡ возжелѣ́ла є҆сѝ житїѐ проводи́ти во бл҃гоче́стїи и҆ чистотѣ̀, къ нбⷭ҇нѣй красотѣ̀ ѻ҆́чи се́рдца твоегѡ̀ ᲂу҆стремлѧ́ющи и҆ любо́вь къ бг҃ꙋ въ себѣ̀ возгрѣва́ющи. Мл҃твами твои́ми и҆ на̑ша сердца̀ то́ю же любо́вїю просвѣтѝ, да съ тобо́ю воспое́мъ бг҃ꙋ: А҆ллилꙋ́їа.
І҆́косъ в҃
Ра́зꙋмъ просвѣще́нъ и҆мꙋ́щи и҆ всѐ ᲂу҆пова́нїе на бг҃а возложи́вши, не ᲂу҆боѧ́ласѧ є҆сѝ, ст҃а́ѧ є҆лїсаве́то, ѡ҆ста́вити до́мъ ѻ҆тца̀ твоегѡ̀ и҆ въ но́вое ѻ҆те́чество всели́тисѧ, є҆гда̀ бра́комъ сочета́ласѧ є҆сѝ съ рѡссі́йскимъ вели́кимъ кнѧ́земъ се́ргїемъ. Мы́ же съ любо́вїю взыва́емъ тѝ си́це:
Ра́дꙋйсѧ, ѿ за́пада на восто́къ прише́дшаѧ: ра́дꙋйсѧ, въ но́вѣмъ ѻ҆те́чествїи є҆дине́нїе съ цр҃ковїю ѡ҆брѣ́тшаѧ.
Ра́дꙋйсѧ, за́пѡвѣди гдⷭ҇ни и҆спо́лнити возжелѣ́вшаѧ: ра́дꙋйсѧ, въ сердца́хъ на́шихъ по бз҃ѣ ревнова́нїе воспламенѧ́ющаѧ.
Ра́дꙋйсѧ, въ сꙋпрꙋ́жествѣ цѣломꙋ́дреннѣ пожи́вшаѧ: ра́дꙋйсѧ, въ добродѣ́ланїи на́съ наставлѧ́ющаѧ.
Ра́дꙋйсѧ, бл҃говѣ́рнаѧ кнѧги́не, странѣ̀ на́шей вѣ́рнѡ послꙋжи́вшаѧ: ра́дꙋйсѧ, сꙋпрꙋ́гꙋ твоемꙋ̀ въ дѣ́лѣхъ бл҃ги́хъ мꙋ́драѧ помо́щнице.
Ра́дꙋйсѧ, семе́йствъ бл҃гочести́выхъ покрови́тельнице: ра́дꙋйсѧ, матери́нскою любо́вїю на́съ согрѣва́ющаѧ.
Ра́дꙋйсѧ, красото́ю дꙋше́вною и҆ тѣле́сною всѣ́хъ ᲂу҆дивлѧ́ющаѧ: ра́дꙋйсѧ, всегѡ̀ мі́ра хрⷭ҇тїа́нскагѡ ᲂу҆краше́нїе.
Ра́дꙋйсѧ, бл҃говѣ́рнаѧ кнѧги́не є҆лїсаве́то, прпⷣбномч҃нце достосла́внаѧ.
Конда́къ г҃
Си́лою бжⷭ҇твенныѧ бл҃года́ти ко сп҃се́нїю ᲂу҆мꙋдре́ннаѧ, позна́ла є҆сѝ вѣ́рꙋ и҆́стиннꙋю, кнѧги́не млⷭ҇тиваѧ є҆лїсаве́то. Тѣ́мже, во ст҃ѣ́й землѝ пребыва́ющи и҆ въ жела́нїи се́рдца своегѡ̀ прїѧ́ти правосла́вїе ᲂу҆крѣпи́вшисѧ, воспѣ́ла є҆сѝ просвѣти́вшемꙋ тѧ̀ бг҃ꙋ: А҆ллилꙋ́їа.
І҆́косъ г҃
И҆мꙋ́щи се́рдце, до́брѣй землѝ подо́бное, вѣ́рꙋ правосла́внꙋю ᲂу҆до́бь воспрїѧ́ла є҆сѝ, тѣ́мже ст҃а́гѡ мѷропома́занїѧ и҆ причаще́нїѧ ст҃ы́хъ хрⷭ҇то́выхъ та̑инъ въ пра́здникъ воскреше́нїѧ првⷣнагѡ ла́зарѧ сподо́биласѧ є҆сѝ. Мы́ же, сла́вѧще просвѣще́нїе твоѐ бл҃года́тїю ст҃а́гѡ дх҃а, велича́емъ тѧ̀:
Ра́дꙋйсѧ, ѿ заблꙋжде́нїй ѿре́кшаѧсѧ: ра́дꙋйсѧ, вѣ́рꙋ правосла́внꙋю прїе́мшаѧ.
Ра́дꙋйсѧ, пома́занїемъ ст҃а́гѡ дх҃а запечатлѣ́ннаѧ: ра́дꙋйсѧ, съ цр҃ковїю и҆́стинною воссоедине́ннаѧ.
Ра́дꙋйсѧ, ст҃ѣ́й првⷣнѣй є҆лїсаве́тѣ тезоимени́таѧ: ра́дꙋйсѧ, въ по́двизѣхъ є҆́й ᲂу҆се́рднѡ подража́вшаѧ.
Ра́дꙋйсѧ, сыновѡ́мъ за́пада пꙋ́ть къ и҆́стиннѣй вѣ́рѣ показꙋ́ющаѧ: ра́дꙋйсѧ, ѿ бл҃гочести́выхъ люде́й рѡссі́йскихъ любо́вїю почита́емаѧ.
Ра́дꙋйсѧ, млⷭ҇тиваѧ ма́ти, млⷭ҇ть ᲂу҆ влⷣки и҆ гдⷭ҇а ѡ҆брѣ́тшаѧ: ра́дꙋйсѧ, и҆ ѡ҆ на́шемъ поми́лованїи ᲂу҆се́рднѡ молѧ́щаѧсѧ.
Ра́дꙋйсѧ, свѣ́тъ бжⷭ҇твенный въ се́рдцѣ свое́мъ носи́вшаѧ: ра́дꙋйсѧ, тьмꙋ̀ жи́зни на́шеѧ свѣ́томъ хрⷭ҇то́выхъ за́повѣдей ѡ҆зарѧ́ющаѧ.
Ра́дꙋйсѧ, бл҃говѣ́рнаѧ кнѧги́не є҆лїсаве́то, прпⷣбномч҃нце достосла́внаѧ.
Конда́къ д҃
Бꙋ́рѧ ѕло́бы врага̀ ро́да человѣ́ческагѡ не поколеба̀ тѧ̀, ст҃а́ѧ, є҆гда̀ бл҃говѣ́рный сꙋпрꙋ́гъ тво́й внеза́пнꙋю сме́рть ѿ ᲂу҆бі́йцъ ѕлонра́вныхъ воспрїѧ́тъ, є҆мꙋ́же сострада́ющи, ве́лїе мꙋ́жество и҆ хрⷭ҇тїа́нскꙋю любо́вь ꙗ҆ви́ла є҆сѝ, ѡ҆ покаѧ́нїи же ᲂу҆бі́йцъ молѧ́щисѧ, твори́ла є҆сѝ пѣ́снь: А҆ллилꙋ́їа.
І҆́косъ д҃
Слы́шавше рѡссі́йстїи лю́дїе ѡ҆ ᲂу҆бїе́нїи сꙋпрꙋ́га твоегѡ̀, молѧ́хꙋ бг҃а, да ᲂу҆крѣпи́тъ тѧ̀, ст҃а́ѧ є҆лїсаве́то, въ несе́нїи ско́рби сеѧ̀. Ты́ же, є҆ѵⷢ҇льскою любо́вїю дви́жима, въ темни́цѣ ᲂу҆бі́йцꙋ посѣти́ла є҆сѝ, къ покаѧ́нїю є҆го̀ подвиза́ющи и҆ мл҃твы возносѧ́щи ко гдⷭ҇ꙋ ѡ҆ проще́нїи є҆го̀. Сегѡ̀ ра́ди прїимѝ ѿ на́съ недосто́йныхъ похвалы̑ сїѧ̑:
Ра́дꙋйсѧ, за́повѣдь хрⷭ҇то́вꙋ ѡ҆ любвѝ ко врагѡ́мъ и҆спо́лнившаѧ: ра́дꙋйсѧ, ᲂу҆бі́йцꙋ сꙋпрꙋ́га твоегѡ̀ є҆ѵⷢ҇льски прости́вшаѧ.
Ра́дꙋйсѧ, мнѡ́ги скѡ́рби и҆ бѣды̑ претерпѣ́вшаѧ: ра́дꙋйсѧ, въ ско́рбехъ и҆ печа́лехъ на́мъ помога́ющаѧ.
Ра́дꙋйсѧ, заблꙋ́ждшихъ на пꙋ́ть и҆́стины и҆ покаѧ́нїѧ наставлѧ́ющаѧ: ра́дꙋйсѧ, ѡ҆ поми́лованїи грѣ́шныхъ те́плѣ хода́тайствꙋющаѧ.
Ра́дꙋйсѧ, во тьмѣ̀ печа́лей свѣ́томъ наде́жды на́съ ѡ҆зарѧ́ющаѧ: ра́дꙋйсѧ, пꙋтево́днаѧ ѕвѣздо̀ всѣ̑мъ сп҃се́нїѧ ча́ющымъ.
Ра́дꙋйсѧ, ѡ҆каменѣ̑ннаѧ сердца̀ на̑ша во ᲂу҆миле́нїе приводѧ́щаѧ: ра́дꙋйсѧ, ѡ҆ всѧ́кой ско́рби на́шей хрⷭ҇та̀ ᲂу҆молѧ́ющаѧ.
Ра́дꙋйсѧ, ѕло́бꙋ мі́ра добро́мъ побѣжда́вшаѧ: ра́дꙋйсѧ, лю́демъ рѡссі̑йскимъ любо́вь и҆́стиннꙋю показа́вшаѧ.
Ра́дꙋйсѧ, бл҃говѣ́рнаѧ кнѧги́не є҆лїсаве́то, прпⷣбномч҃нце достосла́внаѧ.
Конда́къ є҃
Бг҃оте́чнаѧ ѕвѣзда̀ ꙗ҆ви́ласѧ є҆сѝ въ землѝ рѡссі́йстѣй, ст҃а́ѧ є҆лїсаве́то, є҆гда̀ бога́тство и҆ сла́вꙋ ꙗ҆́кѡ пра́хъ вмѣни́вши, въ рꙋ́цѣ бж҃їи жи́знь свою̀ предала̀ є҆сѝ, крⷭ҇тъ гдⷭ҇ень вы́нꙋ пред̾ ѻ҆чи́ма и҆мꙋ́щи. Тѣ́мже, мл҃твою и҆ дѣ́лы млⷭ҇рдїѧ бг҃ꙋ ᲂу҆годи́вши, дне́сь въ ра́дости є҆мꙋ̀ пое́ши: А҆ллилꙋ́їа.
І҆́косъ є҃
Ви́дѣвше тѧ̀ лю́дїе бг҃оспаса́емагѡ гра́да москвы̀ ди́внꙋю ᲂу҆строи́тельницꙋ ѻ҆би́тели млⷭ҇рдїѧ, возра́довашасѧ, ꙗ҆́кѡ мнѡ́ги жєны̀, дѣ̑вы и҆ ста̑рицы рѡссі̑йскїѧ ѡ҆брѣто́ша здѣ̀ ти́хое и҆ дꙋшесп҃си́тельное приста́нище, подража́юще ст҃ы̑мъ жена́мъ мѷроно́сицамъ ма́рѳѣ и҆ марі́и въ слꙋже́нїи бг҃ꙋ и҆ бли̑жнимъ. Сегѡ̀ ра́ди, прославлѧ́юще тѧ̀, глаго́лемъ си́це:
Ра́дꙋйсѧ, средѝ сла́вы земны́ѧ сꙋетꙋ̀ мїрска́гѡ житїѧ̀ ᲂу҆разꙋмѣ́вшаѧ: ра́дꙋйсѧ, и҆мѣ́нїе своѐ разда́вшаѧ и҆ нищетꙋ̀ хрⷭ҇то́вꙋ возлюби́вшаѧ.
Ра́дꙋйсѧ, гра́дъ москвꙋ̀ ѻ҆би́телїю ди́вною ᲂу҆краси́вшаѧ: ра́дꙋйсѧ, бл҃го́е и҆́го хрⷭ҇то́во на ра́мо воспрїи́мшаѧ.
Ра́дꙋйсѧ, слꙋже́нїю ст҃ы́хъ же́нъ мѷроно́сицъ подража́вшаѧ: ра́дꙋйсѧ, мнѡ́гїѧ жєны̀ во ѻ҆би́тель млⷭ҇рдїѧ приве́дшаѧ.
Ра́дꙋйсѧ, ко сп҃се́нїю се́стръ твои́хъ мꙋ́драѧ ᲂу҆пра́вительнице: ра́дꙋйсѧ, ѻ҆би́тели твоеѧ̀ неꙋсы́пнаѧ храни́тельнице.
Ра́дꙋйсѧ, въ по́двизѣхъ тѣле́сныхъ и҆ дꙋхо́вныхъ на́съ ᲂу҆крѣплѧ́ющаѧ: ра́дꙋйсѧ, пꙋ́ть ѿ землѝ на нб҃о на́мъ показꙋ́ющаѧ.
Ра́дꙋйсѧ, свѣти́ло млⷭ҇рдїѧ, над̾ гра́домъ москво́ю возше́дшее: ра́дꙋйсѧ, всѣ́хъ слꙋжа́щихъ бли̑жнимъ покрови́тельнице.
Ра́дꙋйсѧ, бл҃говѣ́рнаѧ кнѧги́не є҆лїсаве́то, прпⷣбномч҃нце достосла́внаѧ.
Конда́къ ѕ҃
Проповѣ́дница любвѐ бжⷭ҇твенныѧ и҆ млⷭ҇рдїѧ неистощи́магѡ была̀ є҆сѝ въ землѝ на́шей, ст҃а́ѧ є҆лїсаве́то, бл҃гоче́стїѧ ревни́тельнице, въ сердца́хъ люде́й рѡссі́йскихъ любо́вь ко гдⷭ҇ꙋ и҆ млⷭ҇рдїе къ бра́тїѧмъ бѣ́дствꙋющымъ возгрѣва́ющи. Тѣ́мже и҆ мы̀, твои̑мъ завѣ́тѡмъ послѣ́дꙋюще, вкꙋ́пѣ съ си́рыми и҆ ᲂу҆бо́гими бг҃ꙋ воспои́мъ: А҆ллилꙋ́їа.
І҆́косъ ѕ҃
Возсїѧ́ла є҆сѝ свѣ́томъ и҆́ноческагѡ житїѧ̀ въ странѣ̀ рѡссі́йстѣй, прпⷣбнаѧ ма́ти на́ша є҆лїсаве́то, въ постѣ̀ и҆ мл҃твѣ, въ нощны́хъ бдѣ́нїихъ и҆ стро́гомъ воздержа́нїи пребыва́ющи, бл҃гоче́стїю и҆ смире́нїю се́стры ѻ҆би́тели твоеѧ̀ поꙋча́ла є҆сѝ. Мы́ же, тобо́ю на пꙋ́ть тѣ́сный по́двига дꙋхо́внагѡ наставлѧ́еми, ᲂу҆бл҃жа́емъ тѧ̀:
Ра́дꙋйсѧ, пꙋ́ть равноа́гг҃льнагѡ житїѧ̀ и҆збра́вшаѧ: ра́дꙋйсѧ, въ цѣломꙋ́дрїи чистотꙋ̀ се́рдца твоегѡ̀ сохра́ньшаѧ.
Ра́дꙋйсѧ, въ нестѧжа́нїи высотꙋ̀ дꙋ́ха твоегѡ̀ показа́вшаѧ: ра́дꙋйсѧ, въ послꙋша́нїи бг҃ꙋ и҆ бли̑жнимъ послꙋжи́вшаѧ.
Ра́дꙋйсѧ, мꙋ́драѧ кнѧги́не и҆ и҆́нокине пречтⷭ҇на́ѧ: ра́дꙋйсѧ, ѻ҆́бразе жена́мъ хрⷭ҇тїа̑нскимъ.
Ра́дꙋйсѧ, посто́мъ, бдѣ́нїемъ и҆ непреста́нными мл҃твами бг҃ꙋ ᲂу҆годи́вшаѧ: ра́дꙋйсѧ, ѿ сна̀ грѣхо́внагѡ дꙋ́шы на́шѧ пробꙋжда́ющаѧ.
Ра́дꙋйсѧ, ко и҆сполне́нїю за́повѣди ѡ҆ любвѝ къ бг҃ꙋ и҆ бли̑жнимъ всѣ́хъ наставлѧ́ющаѧ: ра́дꙋйсѧ, мл҃твѣ те́плой на́съ наꙋча́ющаѧ.
Ра́дꙋйсѧ, наста́внице и҆́нокинѧмъ и҆ собесѣ́днице а҆́гг҃лѡмъ: ра́дꙋйсѧ, въ со́нмѣ прпⷣбныхъ же́нъ на нб҃сѝ просла́вленнаѧ.
Ра́дꙋйсѧ, бл҃говѣ́рнаѧ кнѧги́не є҆лїсаве́то, прпⷣбномч҃нце достосла́внаѧ.
Конда́къ з҃
Хотѧ́щи во́лю гдⷭ҇ню твори́ти, ст҃а́ѧ є҆лїсаве́то, на всѧ́кїй ча́съ свою̀ во́лю ѿсѣка́ла є҆сѝ, къ совѣ́тꙋ пꙋсты́нныхъ ста́рцєвъ гаврїи́ла и҆ а҆леѯі́а притека́ющи и҆ и҆́ны мꙋ́жы дх҃онѡ́сныѧ вопроша́ющи, и҆́хже мꙋ́дрыми наставлє́нїи житїѐ во ѻ҆би́тели млⷭ҇рдїѧ до́брѣ ᲂу҆строѧ́ла є҆сѝ, непреста́ннѡ съ се́страми взыва́ющи бг҃ꙋ: А҆ллилꙋ́їа.
І҆́косъ з҃
Но́вое чꙋ́до показа̀ гдⷭ҇ь, є҆гда̀ дарова̀ тѝ, ст҃а́ѧ є҆лїсаве́то, бл҃года́ть и҆ си́лꙋ немощны̑ѧ и҆сцѣлѧ́ти, безнадє́жныѧ ᲂу҆тѣша́ти, заблꙋ́ждшыѧ вразꙋмлѧ́ти. Ты́ же, ѡ҆блегче́нїе и҆ ѿра́дꙋ съ любо́вїю подаю́щи, си̑рымъ, забвє́ннымъ и҆ немощны̑мъ смире́ннѡ послꙋжи́ла є҆сѝ. Тѣ́мже и҆ на́съ ᲂу҆бо́гихъ твое́ю мл҃твою ѿ страсте́й грѣхо́вныхъ и҆сцѣлѝ и҆ бꙋ́ди на́мъ ко сп҃се́нїю ᲂу҆пра́вительница, да бл҃года́рственнѡ воспое́мъ тѝ:
Ра́дꙋйсѧ, въ послꙋша́нїи дꙋхѡ́внымъ ѻ҆тцє́мъ и҆ вели̑кимъ ста́рцємъ пожи́вшаѧ: ра́дꙋйсѧ, вели́каѧ ма́тꙋшка людьмѝ рѡссі́йскими нарече́ннаѧ.
Ра́дꙋйсѧ, да́ръ немощны̑ѧ дꙋ́шы врачева́ти ѿ бг҃а стѧжа́вшаѧ: ра́дꙋйсѧ, болѧ́щыѧ ѿ ѻ҆дра̀ болѣ́зни возставлѧ́ющаѧ.
Ра́дꙋйсѧ, вдови́цъ и҆ сиро́тъ бл҃госе́рдаѧ попечи́тельнице: ра́дꙋйсѧ, а҆́лчꙋщихъ пита́тельнице и҆ сꙋ́щымъ въ бѣда́хъ ско́раѧ застꙋ́пнице.
Ра́дꙋйсѧ, всѣ́ми презрѣ́нныхъ и҆ ѿве́рженныхъ не ѡ҆ставлѧ́ющаѧ: ра́дꙋйсѧ, мнѡ́гїѧ дꙋ́шы ѿ тьмы̀ грѣхо́вныѧ и҆ поги́бели сп҃са́ющаѧ.
Ра́дꙋйсѧ, ᲂу҆ныва́ющымъ въ ско́рбехъ и҆ ѡ҆бстоѧ́нїихъ мꙋ́драѧ ᲂу҆тѣ́шительнице: ра́дꙋйсѧ, и҆ на́съ, ᲂу҆дрꙋче́нныхъ болѣ́зньми и҆ немощьмѝ, ᲂу҆крѣплѧ́ющаѧ.
Ра́дꙋйсѧ, ка́ющымсѧ грѣ́шникѡмъ пред̾ гдⷭ҇емъ предста́тельнице: ра́дꙋйсѧ, лю́демъ рѡссі̑йскимъ бг҃одарова́ннаѧ помо́щнице.
Ра́дꙋйсѧ, бл҃говѣ́рнаѧ кнѧги́не є҆лїсаве́то, прпⷣбномч҃нце достосла́внаѧ.
Конда́къ и҃
Стра́нное и҆ стра́шное видѣ́нїе ꙗ҆вѝ гдⷭ҇ь дꙋховникꙋ̀ ѻ҆би́тели млⷭ҇рдїѧ і҆ере́ю митрофа́нꙋ, ты́ же, ѽ ст҃а́ѧ ма́ти, сїѐ видѣ́нїе и҆з̾ѧснѧ́ющи, прорекла̀ є҆сѝ, ꙗ҆́кѡ ве́лїе и҆ гро́зное и҆спыта́нїе грѧде́тъ на цр҃ковь рꙋ́сскꙋю и҆ держа́вꙋ на́шꙋ: ст҃ы́нь порꙋга́нїе, бра́нь братоꙋбі́йственнаѧ, смꙋ́та ве́лїѧ, кончи́на мч҃нческаѧ семе́йства ца́рскагѡ: но поми́лꙋетъ бг҃ъ рѡссі́ю по мл҃твамъ ст҃ы́хъ є҆ѧ̀, съ ни́миже ты̀ ны́нѣ воспѣва́еши бг҃ꙋ: А҆ллилꙋ́їа.
І҆́косъ и҃
Всѧ̀ бл҃года́тїю бжⷭ҇твенною просвѣща́ема, ст҃а́ѧ є҆лїсаве́то, мы́сленныма ѻ҆чи́ма гнѣ́вное посѣще́нїе бж҃їе страны̀ на́шеѧ зрѣ́ла є҆сѝ и҆ прⷪ҇ро́чески вѣща́ла є҆сѝ, ꙗ҆́кѡ мно́зи мч҃нцы и҆ и҆сповѣ̑дницы въ землѝ рꙋ́сстѣй возсїѧ́ютъ. Тѣ́мже всѐ ᲂу҆пова́нїе на бж҃їю мт҃рь возложи́ти лю́ди рѡссі̑йскїѧ призыва́ла є҆сѝ, вѣ́рꙋющи, ꙗ҆́кѡ мл҃твами є҆ѧ̀ ᲂу҆стро́итсѧ и҆ бл҃гослови́тсѧ землѧ̀ на́ша. Мы́ же, вѣ́дꙋще прорече́нїѧ твоегѡ̀ ѡ҆ сꙋдьбѣ̀ ѻ҆тчи́зны на́шеѧ сбытїѐ, ᲂу҆бл҃жа́емъ тѧ̀ си́це:
Ра́дꙋйсѧ, хра́мъ покро́ва прест҃ы́ѧ бцⷣы во ѻ҆би́тели воздви́гшаѧ: ра́дꙋйсѧ, въ рꙋ́цѣ пречⷭ҇тѣй мт҃ри ѻ҆би́тель твою̀ преда́вшаѧ.
Ра́дꙋйсѧ, хра́мѡвъ ст҃ы́хъ и҆ бл҃голѣ́пныхъ ᲂу҆строи́тельнице: ра́дꙋйсѧ, къ бцⷣѣ неꙋсы́пнаѧ мл҃твеннице.
Ра́дꙋйсѧ, хра́мы бж҃їи сосꙋ́дами и҆ ри́зами бл҃гоꙋкраси́вшаѧ: ра́дꙋйсѧ, ꙗ҆́кѡ се́рдце твоѐ ѻ҆би́телїю ст҃а́гѡ дх҃а содѣ́ласѧ.
Ра́дꙋйсѧ, житїе́мъ свои́мъ гдⷭ҇ꙋ и҆ мт҃ри є҆гѡ̀ вѣ́рнѡ послꙋжи́вшаѧ: ра́дꙋйсѧ, всѐ ᲂу҆пова́нїе на бг҃а возлага́ти на́съ наꙋча́ющаѧ.
Ра́дꙋйсѧ, кро́тость, тишинꙋ̀ и҆ ми́ръ сердца́мъ на́шымъ подаю́щаѧ: ра́дꙋйсѧ, бл҃года́тными да̑ры свѣ́тлѡ ᲂу҆краше́ннаѧ.
Ра́дꙋйсѧ, мꙋ́жественнѣ скѡ́рби и҆ клеветꙋ̀ претерпѣ́вшаѧ: ра́дꙋйсѧ, себѣ̀ въ же́ртвꙋ бг҃ꙋ ᲂу҆гото́вившаѧ.
Ра́дꙋйсѧ, бл҃говѣ́рнаѧ кнѧги́не є҆лїсаве́то, прпⷣбномч҃нце достосла́внаѧ.
Конда́къ ѳ҃
Всѧ̀ любо́вїю къ бг҃ꙋ пламенѣ́ющи, ст҃а́ѧ є҆лїсаве́то, не ᲂу҆боѧ́ласѧ є҆сѝ, є҆гда̀ прїидо́ша во ѻ҆би́тель твою̀ лю́дїе безбо́жнїи, хотѧ́щїи сꙋ́дъ непра́веденъ над̾ тобо́ю соверши́ти. Ты́ же, гдⷭ҇емъ сохранѧ́ема, сме́рти тогда̀ и҆збѣ́гла є҆сѝ, ѡ҆ вразꙋмле́нїи и҆ просвѣще́нїи неразꙋ́мныхъ и҆ заблꙋ́ждшихъ молѧ́щисѧ, бг҃ꙋ же во бл҃годаре́нїи воспѣва́ющи: А҆ллилꙋ́їа.
І҆́косъ ѳ҃
Вѣті́й человѣ́ческихъ ᲂу҆ста̀ не возмо́гꙋтъ досто́йнѡ восхвали́ти крѣ́пость любвѐ твоеѧ̀ во дни̑ бѣ́дъ и҆ напа́стей вели́кихъ, ѡ҆быше́дшихъ ѻ҆те́чество на́ше, є҆гда̀ не восхотѣ́ла є҆сѝ поки́нꙋти рѡссі́ю и҆ ѻ҆би́тель, тобо́ю созда́ннꙋю, се́стры тоѧ̀ за вѣ́рꙋ правосла́внꙋю да́же до сме́рти стоѧ́ти ᲂу҆вѣщава́ющи. Мы́ же съ любо́вїю восхвалѧ́емъ тѧ̀:
Ра́дꙋйсѧ, зе́млю на́шꙋ возлюби́вшаѧ: ра́дꙋйсѧ, ѿ люде́й правосла́вныхъ съ любо́вїю прославлѧ́емаѧ.
Ра́дꙋйсѧ, щито́мъ вѣ́ры ѡ҆гражда́тисѧ на́съ наꙋча́ющаѧ: ра́дꙋйсѧ, жела́нїе крⷭ҇тнымъ пꙋте́мъ слѣ́довати въ на́съ ᲂу҆крѣплѧ́ющаѧ.
Ра́дꙋйсѧ, ѿ ро́ва поги́бели мнѡ́гїѧ сп҃сшаѧ: ра́дꙋйсѧ, ѻ҆би́тели твое́й и҆ гра́дꙋ москвѣ̀ покро́ве и҆ защи́тнице.
Ра́дꙋйсѧ, се́стры ѻ҆би́тели млⷭ҇рдїѧ въ вѣ́рѣ и҆ наде́жди ᲂу҆тверди́вшаѧ: ра́дꙋйсѧ, на по́двигъ мч҃нчества за хрⷭ҇та̀ и҆̀хъ наста́вльшаѧ.
Ра́дꙋйсѧ, прїѡбщи́тисѧ стрⷭ҇те́мъ хрⷭ҇тѡ́вымъ ᲂу҆досто́ившаѧсѧ: ра́дꙋйсѧ, въ по́двизѣ и҆сповѣ́дничества вѣ̑рныѧ ᲂу҆твержда́ющаѧ.
Ра́дꙋйсѧ, любвѝ же́ртвеннѣй, вѣ́чнѣй на́съ наꙋча́ющаѧ: ра́дꙋйсѧ, въ ра́дость гдⷭ҇а твоегѡ̀ вше́дшаѧ.
Ра́дꙋйсѧ, бл҃говѣ́рнаѧ кнѧги́не є҆лїсаве́то, прпⷣбномч҃нце достосла́внаѧ.
Конда́къ і҃
Сп҃си́тельнагѡ по́двига и҆́щꙋщи, ст҃а́ѧ є҆лїсаве́то, съ ра́достїю бл҃годари́ла є҆сѝ бг҃а, ꙗ҆́кѡ сподо́би тѧ̀ понестѝ крⷭ҇тъ є҆гѡ̀. Тѣ́мже просїѧ̀ побѣ́дою вѣ́ра твоѧ̀, є҆гда̀ къ голго́ѳѣ свое́й восходѧ́щи, непреста́ннѡ возглаша́ла є҆сѝ: сла́ва бг҃ꙋ за всѧ̑! ᲂу҆молѝ, ѽ ма́ти на́ша, да да́рꙋетъ на́мъ гдⷭ҇ь стѧжа́ти мꙋ́дрость и҆ си́лꙋ за вѣ́рꙋ пра́вꙋю да́же до сме́рти стоѧ́ти и҆ воспѣва́ти є҆мꙋ̀ є҆ди́ными ᲂу҆сты̀ и҆ є҆ди́нымъ се́рдцемъ: А҆ллилꙋ́їа.
І҆́косъ і҃
Стѣна̀ неѡбори́маѧ и҆ застꙋпле́нїе странѣ̀ на́шей дарова́сѧ ст҃а́ѧ і҆кѡ́на бж҃їѧ мт҃ре держа́внаѧ, ю҆́же прїѧ́ла є҆сѝ во ѻ҆би́тели млⷭ҇рдїѧ, ст҃а́ѧ є҆лїсаве́то, ꙗ҆́кѡ зна́менїе побѣ́ды над̾ мїродержи́тєли тьмы̀ вѣ́ка сегѡ̀. Сегѡ̀ ра́ди и҆ мы̀, всѐ ᲂу҆пова́нїе на держа́внꙋю влⷣчцꙋ возложи́вше, тебѐ ꙗ҆́кѡ и҆́стиннꙋю слꙋжи́тельницꙋ и҆ послꙋ́шницꙋ пречⷭ҇тыѧ мт҃ре гдⷭ҇а восхвалѧ́емъ:
Ра́дꙋйсѧ, и҆спо́лненнаѧ бл҃года́ти и҆ си́лы бж҃їѧ: ра́дꙋйсѧ, и҆збра́вшаѧ бл҃гꙋ́ю ча́сть, ꙗ҆́же не ѿи́метсѧ ѿ тебє̀.
Ра́дꙋйсѧ, въ кро́тости и҆ смире́нїи бж҃їей мт҃ри подража́вшаѧ: ра́дꙋйсѧ, ꙗ҆́кѡ мꙋ́драѧ є҆ѵⷢ҇льскаѧ дѣ́ва є҆ле́й бл҃года́ти собра́вшаѧ.
Ра́дꙋйсѧ, прест҃ы́ѧ бцⷣы бл҃гоговѣ́йнаѧ слꙋжи́тельнице: ра́дꙋйсѧ, ᲂу҆ прⷭ҇то́ла сн҃а є҆ѧ̀ непреста́ннаѧ мл҃твеннице.
Ра́дꙋйсѧ, ѻ҆́бразъ самоѿверже́нїѧ на́мъ ꙗ҆ви́вшаѧ: ра́дꙋйсѧ, дрꙋ́гъ дрꙋ́га тѧготы̑ носи́ти наꙋча́ющаѧ.
Ра́дꙋйсѧ, скорбьмѝ и҆ слеза́ми въ црⷭ҇тво нбⷭ҇ное возше́дшаѧ: ра́дꙋйсѧ, любвѝ и҆ терпѣ́нїю въ страда́нїи сꙋ́щихъ всѣ́хъ наꙋча́ющаѧ.
Ра́дꙋйсѧ, а҆́гг҃льски на землѝ пожи́вшаѧ: ра́дꙋйсѧ, на нб҃сѝ вѣне́цъ сла́вы ᲂу҆лꙋчи́вшаѧ.
Ра́дꙋйсѧ, бл҃говѣ́рнаѧ кнѧги́не є҆лїсаве́то, прпⷣбномч҃нце достосла́внаѧ.
Конда́къ а҃і
Пѣ́нїе моле́бное бж҃їей мт҃ри возноси́ла є҆сѝ, ст҃а́ѧ є҆лїсаве́то, въ де́нь пра́зднованїѧ і҆́верскїѧ і҆кѡ́ны є҆ѧ̀, є҆гда̀ взѧ́ша тѧ̀ нечести́вїи и҆ въ темни́цꙋ вверго́ша. Ты́ же бл҃годари́ла є҆сѝ хрⷭ҇та̀ бг҃а на́шего, да́вшаго тебѣ̀ не то́чїю є҆́же въ него̀ вѣ́ровати, но и҆ є҆́же по не́мъ страда́ти, въ ᲂу҆́захъ темни́чныхъ воспѣва́ющи є҆мꙋ̀: А҆ллилꙋ́їа.
І҆́косъ а҃і
Свѣ́тъ бжⷭ҇твенный ѡ҆сїѧ̀ тѧ̀, стрⷭ҇тоте́рпице ст҃а́ѧ кнѧги́не є҆лїсаве́то, кꙋ́пнѡ съ прпⷣбномч҃нцею варва́рою, ѡ҆ хрⷭ҇тѣ̀ сестро́ю твое́ю, и҆ съ про́чими стрⷭ҇тотє́рпцы и҆мени́тыми, є҆гда̀ въ глꙋбо́кїй ро́въ низри́нꙋша ва́съ нечести́вїи. Ты́ же, ра̑ны вели́кагѡ кнѧ́зѧ і҆ѡа́нна ѡ҆бѧзꙋ́ющи и҆ страда̑нїѧ бли́жнихъ ѡ҆блегча́ющи, воспѣва́ла є҆сѝ сщ҃є́ннаѧ пѣснопѣ̑нїѧ, за ᲂу҆бива́ющихъ си́це молѧ́щисѧ: ѻ҆́ч҃е, ѿпꙋстѝ и҆̀мъ, не вѣ́дѧтъ бо, что̀ творѧ́тъ. Оу҆врачꙋ́й и҆ на́шихъ дꙋ́шъ ра̑ны, прпⷣбнаѧ ма́ти, да съ любо́вїю воспое́мъ тѝ:
Ра́дꙋйсѧ, мч҃нческꙋю кончи́нꙋ свою̀ пред̾ꙋвѣ́дѣвшаѧ: ра́дꙋйсѧ, стрⷭ҇тоте́рпице великоимени́таѧ.
Ра́дꙋйсѧ, стрⷭ҇те́мъ хрⷭ҇тѡ́вымъ прїѡбщи́вшаѧсѧ: ра́дꙋйсѧ, си́лою бжⷭ҇твенною въ страда́нїихъ ᲂу҆крѣплѧ́емаѧ.
Ра́дꙋйсѧ, за мꙋчи́телей свои́хъ, хрⷭ҇тꙋ̀ подража́ющи, моли́вшаѧсѧ: ра́дꙋйсѧ, до са́мыѧ кончи́ны твоеѧ̀ пѣ́снь бг҃ꙋ воспѣва́вшаѧ.
Ра́дꙋйсѧ, кро́вїю свое́ю зе́млю рꙋ́сскꙋю ѡ҆роси́вшаѧ: ра́дꙋйсѧ, со́нмꙋ но́выхъ мч҃нкъ сопричте́ннаѧ.
Ра́дꙋйсѧ, ꙗ҆́кѡ ли́кꙋ прпⷣбныхъ и҆ првⷣныхъ же́нъ прїѡбщи́ласѧ є҆сѝ: ра́дꙋйсѧ, ст҃ы́хъ бл҃говѣ́рныхъ кнѧги́нь землѝ рꙋ́сскїѧ досто́йнаѧ сонаслѣ́днице.
Ра́дꙋйсѧ, же́ртво непоро́чнаѧ и҆ бл҃гопрїѧ́тнаѧ, бг҃ꙋ принесе́ннаѧ: ра́дꙋйсѧ, со всѣ́ми ст҃ы́ми землѝ на́шеѧ торжествꙋ́ющаѧ.
Ра́дꙋйсѧ, бл҃говѣ́рнаѧ кнѧги́не є҆лїсаве́то, прпⷣбномч҃нце достосла́внаѧ.
Конда́къ в҃і
Бл҃года́ть и҆сточа́ютъ чтⷭ҇ны̑ѧ мо́щи ва́шѧ, ст҃ы̑ѧ прпⷣбномч҃нцы є҆лїсаве́то и҆ варва́ро, и҆̀хже ѿ порꙋга́нїѧ и҆ безче́стїѧ спа́сше, бл҃гочести́вїи лю́дїе и҆з̾ рѡссі́и во ст҃ы́й гра́дъ і҆ерⷭ҇ли́мъ принесо́ша и҆ въ ве́си геѳсимані́йстѣй погребо́ша, и҆дѣ́же мно́зїи къ ни̑мъ приходѧ́ще, ᲂу҆бл҃жа́ютъ ва́съ, воспѣва́юще бг҃ꙋ, ди́вномꙋ во ст҃ы́хъ свои́хъ: А҆ллилꙋ́їа.
І҆́косъ в҃і
Свѣ́та нбⷭ҇нагѡ и҆ бл҃гоꙋха́нїѧ чꙋ́днагѡ хра́мъ ст҃ы́ѧ мѷроно́сицы марі́и магдали́ни во і҆ерⷭ҇ли́мѣ и҆спо́лнисѧ, є҆гда̀ гро́бъ съ тѣ́ломъ твои́мъ ѿве́рстъ бы́сть. Тѣ́мже ны́нѣ цр҃кве правосла́вныѧ ча̑да всѝ ра́дꙋютсѧ и҆ ликꙋ́ютъ ѡ҆ гдⷭ҇ѣ, притека́юще къ чꙋдото́чнѣй ра́цѣ моще́й твои́хъ, прпⷣбномч҃нце є҆лїсаве́то, и҆ бл҃годарѧ́ще просла́вльшаго тѧ̀ гдⷭ҇а, пою́тъ си́це:
Ра́дꙋйсѧ, ꙗ҆́кѡ мо́щи твоѧ̑ нетлѣ́нїемъ процвѣто́ша: ра́дꙋйсѧ, во ст҃ꙋ́ю зе́млю тѣ́ломъ принесе́ннаѧ.
Ра́дꙋйсѧ, въ садꙋ̀ моле́нїѧ гдⷭ҇нѧ погребе́ннаѧ: ра́дꙋйсѧ, во хра́мѣ ст҃ы́ѧ мѷроно́сицы ᲂу҆покое́ннаѧ.
Ра́дꙋйсѧ, ꙗ҆вле́нїемъ моще́й твои́хъ цр҃ковь рꙋ́сскꙋю возвесели́вшаѧ: ра́дꙋйсѧ, сꙋ́щихъ въ разсѣ́ѧнїи рѡссі́йскихъ люде́й дꙋхо́внѡ ᲂу҆крѣпи́вшаѧ.
Ра́дꙋйсѧ, ꙗ҆́кѡ гдⷭ҇ь чрез̾ мо́щи твоѧ̑ и҆сцѣлѧ́етъ всѧ̑кїѧ скѡ́рби и҆ болѣ̑зни: ра́дꙋйсѧ, по мо́рю жите́йскомꙋ пла́вающихъ ти́хое приста́нище.
Ра́дꙋйсѧ, вѣне́цъ добродѣ́телей собра́вшаѧ: ра́дꙋйсѧ, сла́вою и҆ че́стїю ѿ бг҃а вѣнча́ннаѧ.
Ра́дꙋйсѧ, го́рнѧгѡ і҆ерⷭ҇ли́ма бл҃же́ннаѧ ѡ҆бита́тельнице: ра́дꙋйсѧ, ко і҆ерⷭ҇ли́мꙋ нбⷭ҇номꙋ всѣ̑мъ на́мъ пꙋтеводи́тельнице.
Ра́дꙋйсѧ, бл҃говѣ́рнаѧ кнѧги́не є҆лїсаве́то, прпⷣбномч҃нце достосла́внаѧ.
Конда́къ г҃і
ѽ вели́каѧ стрⷭ҇тоте́рпице, же́нъ рѡссі́йскихъ ᲂу҆краше́нїе и҆ ра́досте на́ша, кнѧги́не млⷭ҇тиваѧ є҆лїсаве́то, прїимѝ ѿ се́рдца воздыха́нїе на́ше, съ любо́вїю тебѣ̀ приноси́мое, и҆ твои́мъ предста́тельствомъ ко гдⷭ҇ꙋ дꙋ́хъ пра́выѧ вѣ́ры и҆ бл҃гоче́стїѧ въ на́съ ᲂу҆крѣпѝ, въ добродѣ́тели и҆ млⷭ҇рдїи ᲂу҆твердѝ, помозѝ кре́стъ скорбе́й съ терпѣ́нїемъ и҆ наде́ждою понестѝ, въ любвѝ и҆ согла́сїи наро́дъ на́шъ сохранѝ, да сподо́бимсѧ въ ра́дость гдⷭ҇а вни́ти, со а҆́гг҃лы и҆ всѣ́ми ст҃ы́ми пою́ще є҆мꙋ̀: А҆ллилꙋ́їа.
Повто́ръ
Сей конда́къ глаго́лется три́жды, та́же і҆́косъ а҃-й и҆ конда́къ а҃-й.
І҆́косъ а҃
А҆́гг҃льскимъ попече́нїемъ храни́маѧ и҆ ма́терїю твое́ю бл҃гоче́стїю поꙋча́емаѧ, въ трꙋдѣ́хъ, мл҃твахъ и҆ ми́лостыни и҆змла́да ѻ҆́бразъ добродѣ́тельнагѡ житїѧ̀ ꙗ҆ви́ла є҆сѝ. По кончи́нѣ же ма́тере твоеѧ̀ и҆ бли́жнихъ сро́дникѡвъ крⷭ҇тный пꙋ́ть, гдⷭ҇емъ заповѣ́данный, ᲂу҆разꙋмѣ́ла є҆сѝ. Тѣ́мже, дивѧ́щесѧ таково́мꙋ ѿ ю҆́ности твоемꙋ̀ и҆збра́нїю, со ᲂу҆миле́нїемъ взыва́емъ тѝ:
Ра́дꙋйсѧ, ѿ ю҆́ности хрⷭ҇та̀ возлюби́вшаѧ: ра́дꙋйсѧ, во мла́дости нача́тки бл҃гоче́стїѧ прїи́мшаѧ.
Ра́дꙋйсѧ, хрⷭ҇то́ва а҆́гнице и҆збра́ннаѧ: ра́дꙋйсѧ, стра́хъ бж҃їй въ дꙋшѝ воспрїѧ́вшаѧ.
Ра́дꙋйсѧ, добродѣ́тєли ма́тере твоеѧ̀ наслѣ́дствовавшаѧ: ра́дꙋйсѧ, трꙋдолю́бїю и҆ млⷭ҇рдїю є҆́ю наꙋче́ннаѧ.
Ра́дꙋйсѧ, се́рдцемъ въ бз҃ѣ ᲂу҆твержде́ннаѧ: ра́дꙋйсѧ, съ вѣ́рою и҆ ᲂу҆пова́нїемъ крⷭ҇тъ тво́й поне́сшаѧ.
Ра́дꙋйсѧ, землѝ ѻ҆те́чества твоегѡ̀ цвѣ́те бл҃гоꙋха́нный: ра́дꙋйсѧ, чистото́ю жи́зни твоеѧ̀ нб҃са̀ возвесели́вшаѧ.
Ра́дꙋйсѧ, на слꙋже́нїе стра́ждꙋщымъ бг҃омъ и҆збра́ннаѧ: ра́дꙋйсѧ, пред̾ гдⷭ҇емъ ѡ҆ на́съ те́плаѧ мл҃твеннице.
Ра́дꙋйсѧ, бл҃говѣ́рнаѧ кнѧги́не є҆лїсаве́то, прпⷣбномч҃нце достосла́внаѧ.
Конда́къ а҃
И҆збра́ннаѧ ѿ ро́да держа́внагѡ дщѝ цр҃кве рꙋ́сскїѧ, любо́вїю и҆з̾ѻби́льною и҆ млⷭ҇рдїемъ бг҃ꙋ и҆ бли̑жнимъ до́брѣ послꙋжи́вшаѧ, за вѣ́рꙋ во хрⷭ҇та̀ гдⷭ҇а на́шего дꙋ́шꙋ свою̀ положи́вшаѧ и҆ вѣнце́мъ сла́вы хрⷭ҇то́вы ᲂу҆краше́ннаѧ, восхвалѧ́юще по́двиги и҆ страда̑нїѧ твоѧ̑, съ любо́вїю воспѣва́емъ тѝ си́це: Ра́дꙋйсѧ, бл҃говѣ́рнаѧ кнѧги́не є҆лїсаве́то, прпⷣбномч҃нце достосла́внаѧ.
Моли́твы
ѽ вели́каѧ кнѧги́не, ст҃а́ѧ прпⷣбномч҃нце є҆лїсаве́то, рѡссі́йскаѧ похвало̀, гра́да москвы̀ пресла́вное ᲂу҆краше́нїе и҆ ст҃ы́ѧ землѝ сщ҃е́нное достоѧ́нїе!
Ты̀ во дни̑ житїѧ̀ твоегѡ̀ вѣ́рꙋ, наде́ждꙋ, любо́вь нелѡ́жны стѧжа́вши, млⷭ҇рдїемъ къ стра́ждꙋщымъ свѣ́тлѡ просїѧ́ла є҆сѝ. Терпѣ́нїемъ же скорбе́й и҆ и҆скꙋше́нїй ѻ҆́бразъ смире́нїѧ бли̑жнимъ ꙗ҆ви́вши, и҆згна́нїемъ и҆ страда́ньми житїѐ ᲂу҆вѣнча́ла є҆сѝ и҆ во црⷭ҇твїи нбⷭ҇нѣмъ ны́нѣ пребыва́еши.
Сегѡ̀ ра́ди мо́лимъ тѧ̀, стрⷭ҇тоте́рпице ст҃а́ѧ, мл҃твами твои́ми да́рꙋй на́мъ се́рдце смире́нное и҆ покаѧ́нное, млⷭ҇рдїе неѡскꙋдѣва́ющее, слꙋже́нїе бли̑жнимъ же́ртвенное, терпѣ́нїе непоколе́блемое, мꙋ́жество въ ско́рбехъ и҆ ѡ҆бстоѧ́нїихъ неѡслабѣва́ющее, въ стра́шный же ча́съ сме́ртный ᲂу҆пова́нїе тве́рдое на гдⷭ҇а на́шего і҆и҃са хрⷭ҇та̀, є҆мꙋ́же подоба́етъ всѧ́каѧ сла́ва, че́сть и҆ поклоне́нїе со безнача́льнымъ є҆гѡ̀ ѻ҆ц҃е́мъ, и҆ прест҃ы́мъ, бл҃ги́мъ и҆ животворѧ́щимъ є҆гѡ̀ дх҃омъ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.
ѽ ст҃ы̑ѧ новомч҃нцы цр҃кве рꙋ́сскїѧ, вели́каѧ кнѧги́не є҆лїсаве́то и҆ пречтⷭ҇на́ѧ и҆́нокине варва́ро, кꙋ́пнѡ є҆ѵⷢ҇льскїѧ за́пѡвѣди дѣ́ломъ во ѻ҆би́тели млⷭ҇рдїѧ соверши́вшыѧ, вѣ́ры ра́ди правосла́вныѧ до сме́рти подвиза́вшыѧсѧ и҆ до́брый пло́дъ въ терпѣ́нїи стрⷭ҇те́й хрⷭ҇тꙋ̀ прине́сшыѧ! Моли́тесѧ є҆мꙋ̀, ꙗ҆́кѡ побѣди́телю сме́рти, да ᲂу҆тверди́тъ цр҃ковь рꙋ́сскꙋю правосла́внꙋю и҆ ѻ҆те́чество на́ше. Се́ бо лꙋка́вый вра́гъ воѡрꙋжа́етсѧ на ны̀, хотѧ̀ на́съ погꙋби́ти въ междоꙋсо́бныхъ бра́нехъ, ско́рбехъ, печа́лехъ, болѣ́знехъ, нꙋ́ждахъ и҆ бѣда́хъ лю́тыхъ. Оу҆моли́те гдⷭ҇а низложи́ти всѧ̑ немощны̑ѧ де́рзѡсти є҆гѡ̀: вѣ́рꙋ въ сердца́хъ люде́й правосла́вныхъ ᲂу҆крѣпи́те, на́мъ же мꙋ́жества да́ръ низпосли́те, да, ѿве́ргшесѧ себє̀ и҆ взе́мше крⷭ҇тъ сво́й, послѣ́дꙋемъ хрⷭ҇тꙋ̀, распина́юще пло́ть свою̀ со страстьмѝ и҆ похотьмѝ. Сохрани́те на́съ ѿ всѧ́кагѡ ѕла̀, ѡ҆ст҃и́те пꙋти̑ жи́зни на́шеѧ, да́рꙋйте покаѧ́нїе нелицемѣ́рное, тишинꙋ̀ и҆ ми́ръ дꙋша́мъ на́шымъ, и҆спроси́те ᲂу҆ гдⷭ҇а всѣ̑мъ на́мъ мыта́рствъ го́рькихъ и҆ вѣ́чныѧ мꙋ́ки и҆зба́витисѧ и҆ нбⷭ҇номꙋ црⷭ҇твїю наслѣ́дникѡмъ бы́ти со всѣ́ми ст҃ы́ми, ѿ вѣ́ка ᲂу҆годи́вшими бг҃ꙋ, да ра́дꙋющесѧ воздади́мъ хвалꙋ̀, че́сть и҆ поклоне́нїе ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, во вѣ́ки вѣкѡ́въ. А҆ми́нь.