Православный календарь
Размер шрифта:

Ака́ѳістъ

А҆ка́ѳїстъ прест҃ѣ́й бцⷣѣ въ че́сть є҆ѧ̀ і҆кѡ́ны, и҆менꙋ́емыѧ є҆кономі́сса.

Иконы Божией Матери, именуемой "Экономисса" 18 июля 2026

Конда́къ а҃

И҆збра́ннѣй ѿ всѣ́хъ родѡ́въ прест҃ѣ́й дв҃ѣ бцⷣѣ, сп҃си́телѧ и҆ бг҃а на́шего і҆и҃са хрⷭ҇та̀ пло́тїю ро́ждшей, ꙗ҆́кѡ влⷣчцѣ нб҃сѐ и҆ землѝ, похва́льное прино́симъ пѣ́нїе. Ты́ же, любвеѻби́льнаѧ на́ша мт҃и, сохранѧ́й и҆ сп҃са́й на́съ ѿ всѣ́хъ врагѡ́въ ви́димыхъ и҆ неви́димыхъ, да со ᲂу҆миле́нїемъ зове́мъ тѝ:

Ра́дꙋйсѧ, бл҃га́ѧ домострои́тельнице, житїѐ на́ше до́брѣ ᲂу҆строѧ́ющаѧ.

І҆́косъ а҃

А҆́гг҃лѡвъ ли́цы и҆ всѧ̑ нбⷭ҇ныѧ си̑лы тебѣ̀, цр҃и́це нбⷭ҇наѧ, бл҃гоговѣ́йнѡ слꙋ́жатъ и҆ немо́лчными гла̑сы тѧ̀ ᲂу҆бл҃жа́ютъ: мы́ же земноро́днїи, тѧ̀ ꙗ҆́кѡ всемлⷭ҇тивꙋю влⷣчцꙋ и҆ всебл҃гꙋ́ю мт҃рь на́шꙋ почита́емъ и҆ съ любо́вїю вопїе́мъ:

Ра́дꙋйсѧ, ѿ всѣ́хъ родѡ́въ бг҃омъ и҆збра́ннаѧ: ра́дꙋйсѧ, дв҃ственною чⷭ҇тото́ю, ꙗ҆́кѡ дїади́мою, ᲂу҆вѣнча́ннаѧ.

Ра́дꙋйсѧ, бл҃говоле́нїемъ ѻ҆ц҃а̀ нбⷭ҇нагѡ ѡ҆сѣне́ннаѧ: ра́дꙋйсѧ, дх҃а ст҃а́гѡ ѻ҆би́тель сщ҃е́ннаѧ.

Ра́дꙋйсѧ, хрⷭ҇та̀ бг҃а на́шегѡ мт҃и неискꙋсобра́чнаѧ: ра́дꙋйсѧ, ко́рене дв҃дова ѻ҆́трасле многопло́днаѧ.

Ра́дꙋйсѧ, ско́раѧ человѣ́кѡмъ помо́щнице: ра́дꙋйсѧ, и҆́щꙋщихъ црⷭ҇твїѧ бж҃їѧ пꙋтеводи́тельнице.

Ра́дꙋйсѧ, бл҃га́ѧ домострои́тельнице, житїѐ на́ше до́брѣ ᲂу҆строѧ́ющаѧ.

Конда́къ в҃

Ви́дѧще тѧ̀ на і҆кѡ́нѣ твое́й, съ бг҃омладе́нцемъ хрⷭ҇то́мъ на прⷭ҇то́лѣ возсѣда́ющꙋю, и҆ предстоѧ́щихъ прпⷣбныхъ а҆ѳана́сїа а҆ѳѡ́нскаго и҆ мїхаи́ла сѷна́дскаго, со бл҃гоговѣ́нїемъ сн҃ꙋ твоемꙋ̀ бжⷭ҇твенномꙋ и҆ тебѣ̀, пречⷭ҇тѣй є҆гѡ̀ мт҃ри, покланѧ́ющихсѧ, велича́емъ тѧ̀, ꙗ҆́кѡ бл҃гꙋ́ю попечи́тельницꙋ и҆ покрови́тельницꙋ и҆́нокѡвъ ст҃ы́ѧ горы̀ а҆ѳѡ́нскїѧ, под̾ твои́мъ пречⷭ҇тны́мъ ѡ҆мофо́ромъ пребыва́ющихъ и҆ непреста́ннѡ сп҃си́телю бг҃ꙋ ѡ҆ тебѣ̀ пою́щихъ: А҆ллилꙋ́їа.

І҆́косъ в҃

Ра́зꙋмъ человѣ́ческїй пости́гнꙋти не мо́жетъ вели́кагѡ твоегѡ̀ млⷭ҇рдїѧ къ лю́демъ, и҆̀хже сн҃ъ тво́й и҆ бг҃ъ на крⷭ҇тѣ̀ кро́вїю свое́ю чтⷭ҇но́ю ѿ грѣхѡ́въ и҆скꙋпѝ, нижѐ ѧ҆зы́къ си́лꙋ и҆́мать и҆счи́слити мно́жество бл҃годѣѧ́нїй и҆ чꙋдотворе́нїй, тобо́ю на́мъ низпосыла́емыхъ, но все́ю дꙋше́ю покланѧ́ющесѧ ст҃ѣ́й твое́й і҆кѡ́нѣ, прест҃а́ѧ дв҃о, и҆ со ᲂу҆миле́нїемъ ю҆̀ лобыза́юще, и҆з̾ глꙋбины̀ се́рдца взыва́емъ тѝ:

Ра́дꙋйсѧ, любвѐ всесвѣ́тлое жили́ще: ра́дꙋйсѧ, млⷭ҇тей гдⷭ҇нихъ сокро́вище.

Ра́дꙋйсѧ, цвѣ́те бжⷭ҇твеннагѡ прозѧбе́нїѧ: ра́дꙋйсѧ, ра́досте всемі́рнагѡ застꙋпле́нїѧ.

Ра́дꙋйсѧ, а҆́гг҃лѡвъ и҆ ст҃ы́хъ ликова́нїе: ра́дꙋйсѧ, и҆́нокѡвъ и҆ и҆́нокинь ᲂу҆краше́нїе.

Ра́дꙋйсѧ, съ вѣ́рою тебѣ̀ молѧ́щихсѧ ско́рое ᲂу҆слы́шанїе: ра́дꙋйсѧ, дꙋ́шъ и҆ серде́цъ на́шихъ наде́жное ᲂу҆спокое́нїе.

Ра́дꙋйсѧ, бл҃га́ѧ домострои́тельнице, житїѐ на́ше до́брѣ ᲂу҆строѧ́ющаѧ.

Конда́къ г҃

Си́лꙋ бжⷭ҇твенныѧ бл҃года́ти млⷭ҇тивнѡ да́рꙋеши, пребл҃гослове́ннаѧ мт҃и, всѣ̑мъ, во ст҃ѣ́мъ ᲂу҆дѣ́лѣ твое́мъ, горѣ̀ а҆ѳѡ́нской, подвиза́ющымсѧ и҆ и҆́ноческимъ житїе́мъ сн҃ꙋ твоемꙋ̀ и҆ сп҃си́телю на́шемꙋ і҆и҃сꙋ хрⷭ҇тꙋ̀ бл҃гоꙋгожда́ющымъ, и҆̀же и҆ вопїю́тъ є҆мꙋ̀ непреста́ннѡ: А҆ллилꙋ́їа.

І҆́косъ г҃

И҆́мꙋтъ тѧ̀ вои́стиннꙋ бл҃гꙋ́ю домострои́тельницꙋ и҆́нокѡвъ чи́ни, во ст҃ѣ́й ла́ѵрѣ прпⷣбнагѡ а҆ѳана́сїа подвиза́ющїисѧ, и҆̀мже ты̀ въ зало́гъ бл҃говоле́нїѧ своегѡ̀ млⷭ҇тивѡ дарова́ла є҆сѝ чꙋдотво́рнꙋю і҆кѡ́нꙋ твою̀, є҆кономі́сса и҆менꙋ́емꙋю: сегѡ̀ ра́ди вопїе́мъ тѝ:

Ра́дꙋйсѧ, ст҃ы́ѧ горы̀ а҆ѳѡ́нскїѧ неꙋсы́пнаѧ храни́тельнице: ра́дꙋйсѧ, и҆́нокѡвъ а҆ѳѡ́нскихъ бл҃га́ѧ попечи́тельнице.

Ра́дꙋйсѧ, хрⷭ҇то́выхъ подви́жникѡвъ нбⷭ҇наѧ сла́во: ра́дꙋйсѧ, пꙋстынножи́телей бжⷭ҇твеннаѧ ѿра́до.

Ра́дꙋйсѧ, дꙋхо́внагѡ са́да въ жре́бїи твое́мъ насади́тельнице: ра́дꙋйсѧ, бл҃гочести́вѡ живꙋ́щихъ въ ра̑йскїѧ ѻ҆би́тєли води́тельнице.

Ра́дꙋйсѧ, мона́шествꙋющихъ верхо́внаѧ и҆гꙋ́менїе: ра́дꙋйсѧ, ст҃ы́хъ ѻ҆би́телей ѡ҆кормле́нїе и҆ ра́дованїе.

Ра́дꙋйсѧ, бл҃га́ѧ домострои́тельнице, житїѐ на́ше до́брѣ ᲂу҆строѧ́ющаѧ.

Конда́къ д҃

Бꙋ́рю недоꙋмѣ́нїй въ себѣ̀ превозмога́ѧ, прпⷣбный а҆ѳана́сїй, ѡ҆ста́вивый ѻ҆би́тель свою̀, срѣ́те тѧ̀ на пꙋтѝ, прест҃а́ѧ дв҃о, и҆ ᲂу҆слы́ша ѿ тебє̀ словеса̀ сїѧ̑: а҆́зъ помогꙋ́ ти, ѻ҆ба́че не ѡ҆ставлѧ́й ла́ѵры своеѧ̀, просла́витисѧ бо и҆́мать средѝ ѻ҆би́телей а҆ѳѡ́нскихъ, въ не́йже и҆́ноцы вы́нꙋ воспѣва́ти бꙋ́дꙋтъ а҆́гг҃льскꙋю пѣ́снь бг҃ꙋ: А҆ллилꙋ́їа.

І҆́косъ д҃

Слы́шавъ ѿ тебє̀, пребл҃га́ѧ влⷣчце, ꙗ҆́кѡ ты̀ є҆сѝ мт҃и гдⷭ҇а і҆и҃са хрⷭ҇та̀, ѕѣлѡ̀ ᲂу҆диви́сѧ пребл҃же́нный ста́рецъ, и҆ зна́менїѧ ѿ тебє̀ и҆спроси́въ во ᲂу҆вѣре́нїе, ꙗ҆́кѡ и҆́стинно є҆́сть ѡ҆бѣтова́нїе твоѐ, со ᲂу҆миле́нїемъ серде́чнымъ возопѝ тебѣ̀ си́це:

Ра́дꙋйсѧ, въ жена́хъ пребл҃гослове́ннаѧ: ра́дꙋйсѧ, гдⷭ҇нѧ и҆ на́ша мт҃и всесла́внаѧ.

Ра́дꙋйсѧ, бжⷭ҇твеннаѧ ра́досте а҆́гг҃лѡвъ и҆ человѣ́кѡвъ: ра́дꙋйсѧ, прибѣ́жище ка́ющихсѧ грѣ́шникѡвъ.

Ра́дꙋйсѧ, сла́вити бг҃а на́съ наꙋча́ющаѧ: ра́дꙋйсѧ, лѣ́ствице, ѿ землѝ на нб҃о приводѧ́щаѧ.

Ра́дꙋйсѧ, и҆́нокѡвъ ᲂу҆се́рднаѧ храни́тельнице: ра́дꙋйсѧ, млⷭ҇тиваѧ на́ша хода́таице и҆ застꙋ́пнице.

Ра́дꙋйсѧ, бл҃га́ѧ домострои́тельнице, житїѐ на́ше до́брѣ ᲂу҆строѧ́ющаѧ.

Конда́къ є҃

Бг҃оте́чнаѧ ѕвѣзда̀ ꙗ҆влѧ́ешисѧ, цр҃и́це нбⷭ҇наѧ, всѣ̑мъ и҆́щꙋщымъ сп҃се́нїѧ и҆ под̾ кро́въ тво́й всемо́щный прибѣга́ющымъ, къ сл҃нцꙋ пра́вды си́хъ приво́диши, да во ᲂу҆миле́нїи серде́чнѣмъ вопїю́тъ бг҃ꙋ: А҆ллилꙋ́їа.

І҆́косъ є҃

Ви́дѣ прпⷣбный а҆ѳана́сїй, ꙗ҆́кѡ по глаго́лꙋ мт҃ре бж҃їѧ ѿ ᲂу҆даре́нїѧ по́соха є҆гѡ̀ вода̀ и҆з̾ ка́мене и҆стечѐ, со бл҃гоговѣ́нїемъ къ нога́мъ є҆ѧ̀ пречⷭ҇тымъ припа́сти восхотѣ̀, ѻ҆ба́че дв҃а прест҃а́ѧ въ то́йже ча́съ неви́дима бы́сть. Мы́ же вели́кагѡ ра́ди чꙋдесѐ сегѡ̀ бл҃гоговѣ́нїѧ и҆сполнѧ́ющесѧ, воспѣва́емъ пребл҃гослове́ннѣй та́кѡ:

Ра́дꙋйсѧ, дꙋ́шъ на́шихъ вѣ́рное сп҃се́нїе: ра́дꙋйсѧ, всѣ́хъ скорбѧ́щихъ ᲂу҆тѣше́нїе.

Ра́дꙋйсѧ, ст҃ы́ѧ горы̀ а҆ѳѡ́нскїѧ просвѣти́тельнице: ра́дꙋйсѧ, всеѧ̀ вселе́нныѧ попечи́тельнице.

Ра́дꙋйсѧ, наде́жное прибѣ́жище всѣ̑мъ ка́ющымсѧ: ра́дꙋйсѧ, ти́хое приста́нище ѿ бѣ́дъ стра́ждꙋщымъ.

Ра́дꙋйсѧ, всѣ́хъ притека́ющихъ къ і҆кѡ́нѣ твое́й покро́вомъ твои́мъ ѡ҆сѣнѧ́ющаѧ: ра́дꙋйсѧ, гла́сꙋ моле́нїѧ всѣ́хъ скорбѧ́щихъ внима́ющаѧ.

Ра́дꙋйсѧ, бл҃га́ѧ домострои́тельнице, житїѐ на́ше до́брѣ ᲂу҆строѧ́ющаѧ.

Конда́къ ѕ҃

Проповѣ́дникъ чꙋде́съ твои́хъ, пребл҃га́ѧ влⷣчце, ꙗ҆ви́сѧ прпⷣбный а҆ѳана́сїй, є҆гда̀ по возвраще́нїи во ст҃ꙋ́ю ѻ҆би́тель свою̀ со и҆зꙋмле́нїемъ ве́лїимъ ѡ҆брѣ́те кладовы̑ѧ всѣ́мъ потре́бнымъ преиспо́лнєнныѧ. Сегѡ̀ ра́ди, прославлѧ́юще попече́нїе твоѐ ѡ҆ всѣ́хъ на тѧ̀ ᲂу҆пова́ющихъ, мт҃и бж҃їѧ, со ᲂу҆миле́нїемъ вопїе́мъ бг҃ꙋ: А҆ллилꙋ́їа.

І҆́косъ ѕ҃

Возсїѧ̀ неизрече́нный свѣ́тъ твоеѧ̀ бл҃гости, пребл҃гослове́ннаѧ дв҃о, всѣ̑мъ скорбѧ́щымъ, пла́чꙋщымъ и҆ во и҆скꙋше́нїи сꙋ́щымъ: слы́шащи бо на́шѧ слє́зныѧ мл҃твы, подае́ши всѣ̑мъ чꙋде́сное ѿ бѣ́дъ и҆збавле́нїе, восхвалѧ́ющымъ тѧ̀ за млⷭ҇ти твоѧ̑ та́кѡ:

Ра́дꙋйсѧ, сп҃си́телѧ мі́ра ро́ждшаѧ: ра́дꙋйсѧ, мі́ръ ѿ пото́па грѣхо́внагѡ сп҃са́ющаѧ.

Ра́дꙋйсѧ, зна́менїе млⷭ҇ти бж҃їѧ собо́ю на́мъ ꙗ҆влѧ́ющаѧ: ра́дꙋйсѧ, ꙗ҆вле́нїемъ чꙋде́съ ѿ ст҃ы́ѧ і҆кѡ́ны твоеѧ̀ всѣ́хъ свѣ́тлѡ веселѧ́щаѧ.

Ра́дꙋйсѧ, скѡ́рби и҆ сле́зы на́шѧ въ ра́дость претворѧ́ющаѧ: ра́дꙋйсѧ, стра́ждꙋщихъ и҆ безпомо́щныхъ неви́димѡ ᲂу҆крѣплѧ́ющаѧ.

Ра́дꙋйсѧ, всѣ́хъ пра́ведныхъ лю́бѧщаѧ: ра́дꙋйсѧ, ка́ющихсѧ грѣ́шникѡвъ ми́лꙋющаѧ.

Ра́дꙋйсѧ, бл҃га́ѧ домострои́тельнице, житїѐ на́ше до́брѣ ᲂу҆строѧ́ющаѧ.

Конда́къ з҃

Хотѧ̀ всемлⷭ҇тивый гдⷭ҇ь ꙗ҆ви́ти свою̀ бжⷭ҇твеннꙋю любо́вь къ созда́нїю своемꙋ̀, дарова̀ на́мъ твою̀, бг҃омт҃и, і҆кѡ́нꙋ, є҆кономі́сса и҆менꙋ́емꙋю, да ви́дѧще чꙋдеса̀, ѿ неѧ̀ быва́ємаѧ, всѝ лю́дїе съ вѣ́рою и҆ наде́ждою ᲂу҆миле́ннѡ взыва́ютъ пода́телю бла̑гъ: А҆ллилꙋ́їа.

І҆́косъ з҃

Но́вое свидѣ́тельство неви́димагѡ присꙋ́тствїѧ твоегѡ̀ показа́ла є҆сѝ на́мъ, нбⷭ҇наѧ цр҃и́це, є҆гда̀ въ ла́ѵрѣ ст҃а́гѡ а҆ѳана́сїа зва́нїе є҆коно́ма ᲂу҆праздни́ла є҆сѝ, сама̀ є҆кономі́сса ѻ҆би́тели сеѧ̀ бы́ти восхотѣ́вши и҆ всѐ попече́нїе ѡ҆ не́й себѣ̀ ᲂу҆сво́ивши. Тѣ́мже смире́ннѡ мо́лимъ тѧ̀, пречⷭ҇таѧ: не ѡ҆ста́ви по́мощїю твое́ю и҆ на́съ, вопїю́щихъ тѝ си́це:

Ра́дꙋйсѧ, би́серъ бжⷭ҇твенный произве́дшаѧ: ра́дꙋйсѧ, чⷭ҇тото́ю свое́ю тва́рь превозше́дшаѧ.

Ра́дꙋйсѧ, двє́ри ра̑йскїѧ на́мъ ѿверза́ющаѧ: ра́дꙋйсѧ, ст҃остїю свое́ю нб҃са̀ ᲂу҆краша́ющаѧ.

Ра́дꙋйсѧ, бл҃говѣ́стїе нбⷭ҇нагѡ ѻ҆ч҃ества: ра́дꙋйсѧ, дꙋхо́вный сто́лпе правосла́внагѡ мона́шества.

Ра́дꙋйсѧ, ѡ҆ ро́дѣ человѣ́честѣмъ ᲂу҆се́рднаѧ мл҃твеннице: ра́дꙋйсѧ, во грѣсѣ́хъ погиба́ющихъ неча́ѧннаѧ сп҃се́нїѧ ра́досте.

Ра́дꙋйсѧ, бл҃га́ѧ домострои́тельнице, житїѐ на́ше до́брѣ ᲂу҆строѧ́ющаѧ.

Конда́къ и҃

Стра́ннїи и҆ прише́льцы є҆смы̀ на землѝ, ѻ҆ба́че ты̀, влⷣчце, ѡ҆блегча́еши многоско́рбное житїѐ на́ше, подаю́щи по́мощь, ᲂу҆тѣше́нїе и҆ ра́дость дꙋхо́внꙋю. Сегѡ̀ ра́ди, почита́юще чꙋдотво́рнꙋю і҆кѡ́нꙋ твою̀, во ᲂу҆миле́нїи серде́чнѣмъ тобо́ю на́мъ бл҃годѣ́ющемꙋ бг҃ꙋ вопїе́мъ: А҆ллилꙋ́їа.

І҆́косъ и҃

Всѣ̑мъ, во ст҃ѣ́й горѣ̀ а҆ѳѡ́нской жи́тельствꙋющымъ, ᲂу҆тѣ́шительно є҆́сть возноси́ти молє́нїѧ своѧ̑ на мѣ́стѣ ꙗ҆вле́нїѧ прест҃ы́ѧ бцⷣы ст҃о́мꙋ а҆ѳана́сїю, и҆ пред̾ і҆кѡ́ною, соверши́вшеесѧ здѣ̀ чꙋ́до и҆з̾ѡбража́ющею, воспѣва́ти пребл҃гослове́ннѣй дв҃ѣ хвалє́нїѧ такова̑ѧ:

Ра́дꙋйсѧ, на нб҃сѝ бл҃гословлѧ́емаѧ и҆ на землѝ сла́вимаѧ: ра́дꙋйсѧ, всеѧ̀ тва́ри чтⷭ҇нѣ́йшаѧ и҆ бл҃голѣ́пнѣйшаѧ.

Ра́дꙋйсѧ, бжⷭ҇твенный и҆сто́чниче сладча́йшїѧ сла́дости: ра́дꙋйсѧ, дв҃о пречⷭ҇таѧ, преиспо́лненнаѧ неизрече́нныѧ ра́дости.

Ра́дꙋйсѧ, всегѡ̀ мі́ра бжⷭ҇твенное ᲂу҆тѣше́нїе: ра́дꙋйсѧ, ро́да человѣ́ческагѡ наде́ждо и҆ ᲂу҆пова́нїе.

Ра́дꙋйсѧ, ѿ бѣ́дъ и҆ напа́стей на́ша ѡ҆храни́тельнице: ра́дꙋйсѧ, ко бл҃гоче́стїю всебл҃га́ѧ на́ша наста́внице.

Ра́дꙋйсѧ, бл҃га́ѧ домострои́тельнице, житїѐ на́ше до́брѣ ᲂу҆строѧ́ющаѧ.

Конда́къ ѳ҃

Всѐ ᲂу҆пова́нїе на́ше на тѧ̀ возлага́емъ, мт҃и бж҃їѧ, вѣ́мы бо, ꙗ҆́кѡ млⷭ҇рдїю твоемꙋ̀ нѣ́сть конца̀: ты́ бо и҆ грѣ́шныхъ ми́лꙋеши, и҆ погиба́ющихъ взыскꙋ́еши, и҆ печа́льныхъ возвеселѧ́еши, и҆ недꙋ́жныхъ ѿ ѻ҆дра̀ болѣ́зненнагѡ возставлѧ́еши, и҆ непреста́ннѡ ѡ҆ на́съ хода́тайствꙋеши пред̾ сн҃омъ твои́мъ и҆ бг҃омъ на́шимъ, є҆мꙋ́же мы̀ съ любо́вїю пое́мъ: А҆ллилꙋ́їа.

І҆́косъ ѳ҃

Вѣті̑и многовѣща́ннїи не мо́гꙋтъ и҆счестѝ бе́зднꙋ щедро́тъ твои́хъ, всебл҃га́ѧ мт҃и, ро́дꙋ человѣ́ческомꙋ тобо́ю и҆злива́емыхъ. И҆ мы̀, сла́дость ᲂу҆тѣше́нїѧ въ нꙋ́ждахъ и҆ печа́лехъ на́шихъ позна́вше, съ вѣ́рою и҆ любо́вїю пред̾ ѻ҆́бразомъ твои́мъ чꙋдотво́рнымъ молє́нїѧ возно́симъ сицева̑ѧ:

Ра́дꙋйсѧ, всеѧ̀ вселе́нныѧ держа́внаѧ влⷣчце: ра́дꙋйсѧ, сп҃се́нїѧ на́шегѡ при́снаѧ хода́таице.

Ра́дꙋйсѧ, бг҃а ѻ҆ц҃а̀ дщѝ возлю́бленнаѧ: ра́дꙋйсѧ, сн҃а бж҃їѧ мт҃и прест҃а́ѧ.

Ра́дꙋйсѧ, бг҃а дх҃а ст҃а́гѡ пала́то прекра́снаѧ: ра́дꙋйсѧ, нб҃сѐ и҆ землѝ цр҃и́це всепѣ́таѧ.

Ра́дꙋйсѧ, болѧ́щихъ млⷭ҇рдаѧ цѣли́тельнице: ра́дꙋйсѧ, вдѡ́въ и҆ сиро́тъ незри́маѧ пита́тельнице.

Ра́дꙋйсѧ, бл҃га́ѧ домострои́тельнице, житїѐ на́ше до́брѣ ᲂу҆строѧ́ющаѧ.

Конда́къ і҃

Сп҃се́нїѧ зало́гъ ѿ ѡ҆бдержа́щихъ на́съ скорбе́й и҆ болѣ́зней дарова́сѧ на́мъ чтⷭ҇на́ѧ і҆кѡ́на твоѧ̀, бг҃ороди́тельнице дв҃о, да всѝ, ви́дѧще ꙗ҆влѧ́емꙋю тобо́ю млⷭ҇ть, вопїю́тъ со ᲂу҆миле́нїемъ бг҃ꙋ: А҆ллилꙋ́їа.

І҆́косъ і҃

Стѣна̀ є҆сѝ ликѡ́мъ и҆́ночєскимъ, бцⷣе дв҃о, и҆ всѣ̑мъ ᲂу҆се́рднѡ къ тебѣ̀ прибѣга́ющымъ, и҆́бо нб҃сѐ и҆ землѝ творе́цъ дарова̀ мі́рови тѧ̀, мт҃рь свою̀, да бꙋ́деши всѣ̑мъ земнорѡ́днымъ въ по́мощь и҆ сп҃се́нїе. Сегѡ̀ ра́ди, предстоѧ́ще пред̾ ѻ҆́бразомъ твои́мъ ст҃ы́мъ, бл҃гоговѣ́йнѡ воспѣва́емъ тѧ̀ пѣ̑нїи си́ми:

Ра́дꙋйсѧ, всю̀ вселе́ннꙋю любо́вїю покрыва́ющаѧ: ра́дꙋйсѧ, ѿ па́гꙋбныхъ сѣ́тей вѣ̑рныѧ сп҃са́ющаѧ.

Ра́дꙋйсѧ, а҆́гг҃льскихъ ᲂу҆мѡ́въ ᲂу҆дивле́нїе: ра́дꙋйсѧ, человѣ́ческагѡ ро́да ᲂу҆краше́нїе.

Ра́дꙋйсѧ, сп҃се́нїѧ на́шегѡ глави́зно: ра́дꙋйсѧ, ра́досте на́ша и҆ въ се́й, и҆ въ бꙋ́дꙋщей жи́зни.

Ра́дꙋйсѧ, мл҃твамъ вѣ́рныхъ млⷭ҇тивнѡ вне́млющаѧ: ра́дꙋйсѧ, лю́бѧщымъ тѧ̀ любо́вїю твое́ю воздаю́щаѧ.

Ра́дꙋйсѧ, бл҃га́ѧ домострои́тельнице, житїѐ на́ше до́брѣ ᲂу҆строѧ́ющаѧ.

Конда́къ а҃і

Пѣ́нїе всеꙋмиле́нное прино́симъ тѝ, нб҃сѐ и҆ землѝ цр҃и́це, и҆ бл҃годарѧ́ще сн҃а твоего̀ и҆ бг҃а на́шего за всѧ̑ є҆гѡ̀ бл҃годѣѧ̑нїѧ на́мъ, недостѡ́йнымъ, хода́тайствомъ твои́мъ подава́ємаѧ, со бл҃гоговѣ́нїемъ вопїе́мъ є҆мꙋ̀: А҆ллилꙋ́їа.

І҆́косъ а҃і

Свѣтопрїе́мнꙋю свѣщꙋ̀ зри́мъ тѧ̀, влⷣчце на́ша бцⷣе, ѻ҆́бразъ бо тво́й ст҃ы́й немерца́ющими лꙋча́ми бл҃года́ти мглꙋ̀ грѣхо́внꙋю прогонѧ́етъ и҆ на свѣ́тлꙋю стезю̀ добродѣ́телей наставлѧ́етъ съ вѣ́рою зовꙋ́щихъ тѝ сицева̑ѧ:

Ра́дꙋйсѧ, ю҆́же воспѣва́ютъ нбⷭ҇наѧ вѡ́инства: ра́дꙋйсѧ, ю҆́же превозно́сѧтъ ст҃ы́хъ со́нми.

Ра́дꙋйсѧ, ра́дость ве́лїю всемꙋ̀ ро́дꙋ человѣ́ческомꙋ дарова́вшаѧ: ра́дꙋйсѧ, правосла̑внымъ хрⷭ҇тїа́нѡмъ пꙋ́ть сп҃се́нїѧ ᲂу҆казꙋ́ющаѧ.

Ра́дꙋйсѧ, ра́досте бжⷭ҇твеннагѡ весе́лїѧ: ра́дꙋйсѧ, мі́ра всегѡ̀ покро́ве и҆ сп҃се́нїе.

Ра́дꙋйсѧ, ти́хое приста́нище стра́нствꙋющымъ: ра́дꙋйсѧ, бл҃же́нное поко́ище ста́рости.

Ра́дꙋйсѧ, бл҃га́ѧ домострои́тельнице, житїѐ на́ше до́брѣ ᲂу҆строѧ́ющаѧ.

Конда́къ в҃і

Благода́ть бжⷭ҇твеннꙋю пода́ждь на́мъ, пречⷭ҇таѧ мт҃и, да се́ю вспомоществꙋ́еми, по пꙋтѝ сп҃си́тельномꙋ ше́ствовати возмо́жемъ и҆ житїе́мъ добродѣ́тельнымъ гдⷭ҇ꙋ на́шемꙋ ᲂу҆годи́ти потщи́мсѧ, є҆мꙋ́же непреста́ннѡ пое́мъ: А҆ллилꙋ́їа.

І҆́косъ в҃і

Пою́ще ми́лѡсти твоѧ̑ и҆ вели́чїе твоѐ прославлѧ́юще, влⷣчце на́ша бцⷣе, ра́дꙋемсѧ ѡ҆ тебѣ̀, ꙗ҆́кѡ и҆́мамы таковꙋ́ю всебл҃гꙋ́ю и҆ премлⷭ҇рдꙋю застꙋ́пницꙋ и҆ хода́таицꙋ ѡ҆ на́съ пред̾ бг҃омъ, и҆ съ любо́вїю воспѣва́емъ тѝ си́це:

Ра́дꙋйсѧ, кꙋпино̀ неѡпали́маѧ: ра́дꙋйсѧ, стѣно̀ нерꙋши́маѧ.

Ра́дꙋйсѧ, и҆́ноческихъ ѻ҆би́телей покро́ве и҆ снабдѣ́нїе: ра́дꙋйсѧ, бл҃гочести́выхъ домѡ́въ и҆ сꙋпрꙋ́жествъ бл҃гослове́нїе.

Ра́дꙋйсѧ, ско́рбныхъ ᲂу҆тѣша́ющаѧ: ра́дꙋйсѧ, недꙋ́жныхъ и҆сцѣлѧ́ющаѧ.

Ра́дꙋйсѧ, немощны̑мъ и҆ ста̑рымъ помо́щнице: ра́дꙋйсѧ, а҆́лчꙋщихъ и҆ жа́ждꙋщихъ пита́тельнице.

Ра́дꙋйсѧ, бл҃га́ѧ домострои́тельнице, житїѐ на́ше до́брѣ ᲂу҆строѧ́ющаѧ.

Конда́къ г҃і

ѽ всепѣ́таѧ мт҃и, пресла́внаѧ влⷣчце бцⷣе! Прїимѝ сїѧ̑ молє́нїѧ на̑ша, ѿ всеѧ̀ дꙋшѝ тебѣ̀ ны́нѣ на́ми возноси̑маѧ, и҆ сн҃а твоего̀ и҆ бг҃а на́шего ѡ҆ на́съ ᲂу҆молѝ, є҆мꙋ́же смире́ннѡ покланѧ́емсѧ и҆ со ᲂу҆миле́нїемъ пое́мъ: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃лѡвъ ли́цы и҆ всѧ̑ нбⷭ҇ныѧ си̑лы тебѣ̀, цр҃и́це нбⷭ҇наѧ, бл҃гоговѣ́йнѡ слꙋ́жатъ и҆ немо́лчными гла̑сы тѧ̀ ᲂу҆бл҃жа́ютъ: мы́ же земноро́днїи, тѧ̀ ꙗ҆́кѡ всемлⷭ҇тивꙋю влⷣчцꙋ и҆ всебл҃гꙋ́ю мт҃рь на́шꙋ почита́емъ и҆ съ любо́вїю вопїе́мъ:

Ра́дꙋйсѧ, ѿ всѣ́хъ родѡ́въ бг҃омъ и҆збра́ннаѧ: ра́дꙋйсѧ, дв҃ственною чⷭ҇тото́ю, ꙗ҆́кѡ дїади́мою, ᲂу҆вѣнча́ннаѧ.

Ра́дꙋйсѧ, бл҃говоле́нїемъ ѻ҆ц҃а̀ нбⷭ҇нагѡ ѡ҆сѣне́ннаѧ: ра́дꙋйсѧ, дх҃а ст҃а́гѡ ѻ҆би́тель сщ҃е́ннаѧ.

Ра́дꙋйсѧ, хрⷭ҇та̀ бг҃а на́шегѡ мт҃и неискꙋсобра́чнаѧ: ра́дꙋйсѧ, ко́рене дв҃дова ѻ҆́трасле многопло́днаѧ.

Ра́дꙋйсѧ, ско́раѧ человѣ́кѡмъ помо́щнице: ра́дꙋйсѧ, и҆́щꙋщихъ црⷭ҇твїѧ бж҃їѧ пꙋтеводи́тельнице.

Ра́дꙋйсѧ, бл҃га́ѧ домострои́тельнице, житїѐ на́ше до́брѣ ᲂу҆строѧ́ющаѧ.

Конда́къ а҃

И҆збра́ннѣй ѿ всѣ́хъ родѡ́въ прест҃ѣ́й дв҃ѣ бцⷣѣ, сп҃си́телѧ и҆ бг҃а на́шего і҆и҃са хрⷭ҇та̀ пло́тїю ро́ждшей, ꙗ҆́кѡ влⷣчцѣ нб҃сѐ и҆ землѝ, похва́льное прино́симъ пѣ́нїе. Ты́ же, любвеѻби́льнаѧ на́ша мт҃и, сохранѧ́й и҆ сп҃са́й на́съ ѿ всѣ́хъ врагѡ́въ ви́димыхъ и҆ неви́димыхъ, да со ᲂу҆миле́нїемъ зове́мъ тѝ:

Ра́дꙋйсѧ, бл҃га́ѧ домострои́тельнице, житїѐ на́ше до́брѣ ᲂу҆строѧ́ющаѧ.

Моли́твы

Ѽ пречⷭ҇таѧ дв҃о бцⷣе, премлⷭ҇тиваѧ влⷣчце, вы́шшаѧ а҆́гг҃лъ и҆ а҆рха́гг҃лъ, цр҃и́це нб҃сѐ и҆ землѝ, люде́й правосла́вныхъ тве́рдое ѡ҆гражде́нїе, всѧ́кагѡ до́ма и҆ семе́йства хрⷭ҇тїа́нскагѡ бл҃гоꙋстрои́тельнице, трꙋжда́ющихсѧ во бл҃гоче́стїи бл҃гослове́нїе, нꙋжда́ющихсѧ неистощи́мое бога́тство, си́рыхъ и҆ вдови́цъ пита́тельнице, дѣ́вствꙋющихъ чⷭ҇тото̀ и҆ сла́во, ма́терей ти́хое весе́лїе, ѻ҆трокѡ́въ мꙋ́дросте и҆ наꙋче́нїе, наста́вникѡвъ и҆ дѣтоводи́телей соверше́нный ра́зꙋме. Вѣ́рꙋемъ въ держа́вный тво́й покро́въ над̾ ѻ҆те́чествомъ на́шимъ и҆ над̾ малѣ́йшимъ и҆з̾ на́съ, и҆скꙋпле́ннымъ бжⷭ҇твенною кро́вїю сн҃а твоегѡ̀. Вѣ́рꙋемъ, ꙗ҆́кѡ въ се́й і҆кѡ́нѣ твое́й, во бл҃гослове́нїе ѿ ст҃ы́ѧ горы̀ а҆ѳѡ́нскїѧ на́мъ да́ннѣй, сама́ ты низпосыла́еши твоѐ мт҃рнее бл҃гослове́нїе градѡ́мъ и҆ ве́семъ на́шымъ и҆ всѧ́комꙋ до́мꙋ, на тѧ̀ ᲂу҆пова́нїе и҆мꙋ́щемꙋ. Тѣ́мже со бл҃гоговѣ́йнымъ тре́петомъ бл҃года́рнымъ се́рдцемъ преклонѧ́емсѧ пред̾ си́мъ но́вымъ зна́менїемъ вели́кїѧ любвѐ твоеѧ̀, влⷣчце, къ на́мъ недостѡ́йнымъ. Воспомина́юще же твоѐ чꙋде́сное ꙗ҆вле́нїе прпⷣбномꙋ а҆ѳана́сїю, нѣ́когда въ нꙋ́ждѣ и҆ ско́рби бы́вшемꙋ, и҆ ꙗ҆́кѡ пребꙋ́деши при́снаѧ домострои́тельница є҆гѡ̀ ѻ҆би́тели, ѿ тебє̀ млⷭ҇тивное ѡ҆бѣща́нїе прїе́мшемꙋ, смире́ннѡ мо́лимъ тѧ̀: ѽ премлⷭ҇рдаѧ мт҃и ро́да хрⷭ҇тїа́нскагѡ, бꙋ́ди и҆ на́мъ, грѣ̑шнымъ и҆ недостѡ́йнымъ рабѡ́мъ твои̑мъ, мꙋ́драѧ домострои́тельница, житїѐ на́ше до́брѣ ᲂу҆строѧ́ющаѧ. Всѧ́кое соѻ́бщество, всѧ́кїй до́мъ и҆ семе́йство во бл҃гоче́стїи и҆ правосла́вїи, є҆диномы́слїи, послꙋша́нїи и҆ дово́льствѣ соблюдѝ, заблꙋ́ждшыѧ на пꙋ́ть пра́вый наста́ви, ста́рость поддержѝ, младе́нцы воспита́й, всѣ́хъ на́съ вразꙋмѝ. Ѡ҆блегчѝ и҆ возста́ви и҆знемога́ющыѧ, сохранѝ лю́ди твоѧ̑ ѿ всѧ́кїѧ нꙋ́жды, болѣ́зни, гла́да, гꙋби́тельства, гра́да, ѻ҆гнѧ̀, ѿ всѧ́кагѡ ѕла́гѡ ѡ҆бстоѧ́нїѧ и҆ всѧ́кагѡ нестрое́нїѧ. Странѣ̀ на́шей, гра́дꙋ на́шемꙋ [и҆лѝ: ве́си на́шей, и҆лѝ: ѻ҆би́тели на́шей] и҆ всѧ́кой дꙋшѝ хрⷭ҇тїа́нстѣй и҆схода́тайствꙋй ми́ръ и҆ ве́лїю млⷭ҇ть, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.