Песнь 1
Ирмос
Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло есть:/ препросла́вленный Госпо́дь сла́вно бо просла́вися.
Блаже́нне о́тче Проко́пие, моли́ Бо́га о на́с.
Тропарь
Высоко́ житие́ име́я и восхожде́нии Боже́ственными весь све́тел быв,/ просвеще́ние ми испроси́, похваля́ющу честны́я твоя́ по́двиги,/ и́миже до́бре пожи́в, получи́л еси́, и́хже наде́ялся еси́, блаже́нне Проко́пие.
Тропарь
Мироуха́нная любя́ уче́ния и во чте́нии Святы́х Писа́ний упражня́яся,/ сласте́й уклони́лся еси́, блаже́нне, смра́дных и безче́стных/ и облагово́нился еси́, Боже́ственными дарова́ньми удобря́яся.
Тропарь
Сла́ва Отцу́ и Сы́ну и Свято́му Ду́ху.
Дрема́ние ве́ждома от души́, блаже́нне, отгна́л еси́,/ бдя и Бо́гу приединева́яся всено́щными стоя́нии, непрекло́нен ну́ждами есте́ственными,/ те́мже ко дню невече́рнему прише́л еси́.
Богородичен
И ны́не и при́сно и во ве́ки веко́в. Ами́нь.
Я́ко черто́г одушевле́нный Бо́жий и кади́льницу разу́мнаго и светоно́снаго У́гля,/ приснора́дованную блажи́м Богоро́дицу, зову́ще:/ ра́дуйся, Хода́таице спасе́ннаго воззва́ния.
Песнь 3
Ирмос
На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́ бо ся дух мой, внегда́ пе́ти:/ несть свят, я́коже Бог наш,/ и несть пра́веден, па́че Тебе́, Го́споди.
Блаже́нне о́тче Проко́пие, моли́ Бо́га о на́с.
Тропарь
Глаго́лом живото́чным внима́я, испи́л еси́ во́ду спасе́ния,/ возгнуша́вся го́рькаго греха́, и, поя́, глаго́лал еси́ Бо́гу, Проко́пие,/ я́ко несть свят, па́че Тебе́, Го́споди.
Тропарь
Ми́лование стяжа́л еси́ христоподо́бно,/ разда́л еси́ бога́тство тре́бующим,/ Небе́сное бога́тство, хода́тайствующее тебе́,/ его́же и получи́л еси́, вопия́, Проко́пие:/ я́ко несть свят, па́че Тебе́, Го́споди.
Тропарь
Сла́ва Отцу́ и Сы́ну и Свято́му Ду́ху.
Присво́ився Зижди́телю любо́вию Боже́ственною, прия́л еси́ Небе́сное насле́дие./ Дре́ва живо́тнаго получи́ти сподо́бился еси́, блаже́нне,/ боготворе́нием обожа́яся и поя́, сла́вне,/ я́ко несть свят, па́че Тебе́, Го́споди.
Богородичен
И ны́не и при́сно и во ве́ки веко́в. Ами́нь.
Су́щи А́нгел святе́йши, Зижди́теля А́нгелов во Твою́ боку́ носи́ла еси́/ и родила́ еси́, Богома́ти, на избавле́ние челове́ком, пою́щим Ти,/ я́ко несть пречи́сты, ра́зве Тебе́, Влады́чице.
Песнь 4
Ирмос
Прише́л еси от Де́вы, не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди.
Блаже́нне о́тче Проко́пие, моли́ Бо́га о на́с.
Тропарь
Повеле́ния оте́ческая храня́ невреди́мо, правове́рным смы́слом,/ ты от ю́ности име́л еси́ житие́ чи́сто/ и ми́лостивен нрав, досточу́дне.
Тропарь
Ни смуще́ние мирско́е, ни вла́сти держа́ние, ни сла́ва вре́менная/ твоего́ к Бо́гу раче́ния, Проко́пие, преврати́,/ но благоволи́л еси́ вои́стинну Боже́ственным дея́нием.
Тропарь
Сла́ва Отцу́ и Сы́ну и Свято́му Ду́ху.
Возне́сся Боже́ственными поуче́нии вы́ну, врага́ смири́л еси́,/ исцеле́ния де́тель прия́л еси́, Проко́пие,/ судо́м пра́ведным вся́ческая пра́вящаго.
Богородичен
И ны́не и при́сно и во ве́ки веко́в. Ами́нь.
Препе́тая, во́инствы горе́ препе́таго Бо́га родила́ еси́,/ Челове́ка вои́стинну бы́вша,/ Его́же за рабы́ Твоя́ моля́щи не преста́й, Присноде́во.
Песнь 5
Ирмос
Просвеще́ние во тьме лежа́щих,/ спасе́ние отча́янных, Христе́, Спа́се мой,/ к Тебе́ у́тренюю, Царю́ ми́ра,/ просвети́ мя сия́нием Твои́м,/ ино́го бо, ра́зве Тебе́, бо́га не зна́ю.
Блаже́нне о́тче Проко́пие, моли́ Бо́га о на́с.
Тропарь
Све́том чи́стым Святы́я Тро́ицы просвеще́н, зако́ном же Сея́ огражде́н,/ нощь жите́йскую без претыка́ния преше́л еси́,/ виде́нии Боже́ственными возвыша́яся, блаже́нне,/ в Боже́ственный живо́т всели́лся еси́.
Тропарь
Ны́не на тебе́ чу́до ве́лие ви́дится и у́жаса испо́лнено:/ ка́ко по погребе́нии вои́стинну надо́лзе соблюда́ется невреди́мо, блаже́нне, твое́ те́ло, во гро́бе лежа́що,/ судо́м, и́мже весть Бог, прославля́яй тя.
Тропарь
Сла́ва Отцу́ и Сы́ну и Свято́му Ду́ху.
Блаже́нне Проко́пие, твое́ дерзнове́ние к Бо́гу/ и любо́вь, ю́же от се́рдца к Тому́ име́ти благоволи́в,/ и́стинно имени́то же возсия́в пресла́вно,/ Боже́ственными светлостьми́ просвети́ ве́рных со́нмища.
Богородичен
И ны́не и при́сно и во ве́ки веко́в. Ами́нь.
За ны из Тебе́ вопло́щшагося, Де́во Ма́ти, всегда́ моли́,/ благоче́стно Тя блажа́щим изба́витися бед, душетле́нных страсте́й и печа́лей/ и ве́чнующаго пла́мене муче́ния.
Песнь 6
Ирмос
В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.
Блаже́нне о́тче Проко́пие, моли́ Бо́га о на́с.
Тропарь
Ка́пли сла́дкия иска́павше, блаже́нне, пот твои́х сла́дость/ и исцеле́ний сия́ния, на хвалу́ Христа́ Бо́га на́шего.
Тропарь
Во дво́рех Бо́га процве́л еси́, виногра́д многопло́ден прозя́б,/ и доброде́телей гро́здие Де́лателю душа́м оби́лие пода́в.
Тропарь
Сла́ва Отцу́ и Сы́ну и Свято́му Ду́ху.
Ца́рства Бо́жия возжеле́л еси́, над страстьми́ ца́рствовав, Проко́пие,/ и, по произволе́нию лу́чшему, ра́дость пра́ведных получи́л еси́.
Богородичен
И ны́не и при́сно и во ве́ки веко́в. Ами́нь.
Избра́нно Бо́гу бывши я́ко прекра́сное селе́ние/ и простра́нное Сему́, Де́во, была́ еси́, и черто́г, и све́щник, и трапе́за.
Песнь 7
Ирмос
Богопроти́вное веле́ние беззако́ннующаго мучи́теля/ высо́к пла́мень вознесло́ есть./ Христо́с же простре́ богочести́вым отроко́м ро́су духо́вную,/ Сый благослове́н и препросла́влен.
Блаже́нне о́тче Проко́пие, моли́ Бо́га о на́с.
Тропарь
Кре́постию возмо́г Живода́вца, плотско́е удержа́л еси́ жела́ние, пребога́те,/ и ум возвы́сил еси́ на Небе́сная, поя́ кре́пко:/ Сый благослове́н и препросла́влен.
Тропарь
Сам неблагоро́ден сотвори́вся, благоро́дны нра́вы стяжа́л еси́ умо́м це́лым,/ поуче́нием же упражня́яся Богодохнове́нных писа́ний,/ все жела́ние твое́ к Бо́гу Всеви́дцу, блаже́нне, возложи́л еси́.
Тропарь
Сла́ва Отцу́ и Сы́ну и Свято́му Ду́ху.
Го́рнее Ца́рство, Вы́шний град, Бо́жий рай,/ пра́ведных наслажде́ние и пи́щу несоде́янную,/ бога́тство некра́домое, Свет невече́рний,/ обрести́ сподо́бился еси́, блаже́нне Проко́пие.
Богородичен
И ны́не и при́сно и во ве́ки веко́в. Ами́нь.
Его́же породила́ еси́, Влады́чице, при́сно моли́,/ от рабо́ты изба́вити мя страсте́й, и осужде́ния,/ и стужа́ющаго ми лю́таго окамене́ния,/ и оскорбля́ющаго, Чи́стая, одержа́ния, Богора́дованная.
Песнь 8
Ирмос
Пещь иногда́ о́гненная в Вавило́не де́йства разделя́ше/ Бо́жиим веле́нием, халде́и опаля́ющая,/ ве́рныя же ороша́ющая, пою́щия:/ благослови́те, вся дела́ Госпо́дня, Го́спода.
Блаже́нне о́тче Проко́пие, моли́ Бо́га о на́с.
Тропарь
Огнь помышля́я стра́шный, пред престо́лом Христо́вым хотя́щ изы́ти,/ умиле́нием се́рдца те́плы пролива́еши пото́ки сле́зныя,/ погаша́я те́ми страсте́й пещь, Проко́пие Богому́дре.
Тропарь
Любо́вию предложи́л еси́ твою́, му́дре, к Бо́гу ду́шу/ и к Тому́ прилепи́лся еси́, вопия́ пе́сненно:/ Христе́ мой, Ты ны́не мя изба́ви страсте́й смертоно́сных во ве́ки.
Тропарь
Благослови́м Отца́ и Сы́на и Свята́го Ду́ха, Го́спода.
Терпе́нием пожда́тель и се́рдцем смире́н, ты ви́ден был еси́,/ ми́лостив тре́бующим, обы́чай при́сно благ име́я и нрав доброде́тельный, всече́стне,/ в ни́хже до́бре пожи́в, чуде́с то́чиши благода́ть.
Богородичен
И ны́не и при́сно и во ве́ки веко́в. Ами́нь.
Ада́мов Соде́тель от крове́й Твои́х чи́стых зи́ждется/ и млеко́м пита́ется, пита́яй вся́ко дыха́ние, Де́во Богоро́дице./ Тем я́ко Ма́терь Тя Бо́жию прославля́ем.
Песнь 9
Ирмос
Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем.
Блаже́нне о́тче Проко́пие, моли́ Бо́га о на́с.
Тропарь
Ви́дети жела́я сла́ву Бо́га на́шего, доброде́тельми богоразу́мия себе́ удобри́л еси́/ и, свещу́ нося́, вшел еси́ во све́тлый черто́г,/ со А́нгелы живы́й ясне́е наслажда́яся Божества́.
Тропарь
Я́ко у́треннее со́лнце, взы́де па́мять твоя́, су́щия во мра́це сердца́ просвеща́ющи:/ ты бо све́та и дне яви́лся еси́ вои́стинну сын, Богому́дре Проко́пие./ Сего́ ра́ди тя почита́ем.
Тропарь
Сла́ва Отцу́ и Сы́ну и Свято́му Ду́ху.
Му́дростию украша́яся и ра́зумом просвеща́яся, смире́нием се́рдца красу́яся,/ высото́ю жития́, досточу́дне, в разу́мныя дворы́ вшел еси́,/ иде́же нас помяни́, чту́щих тя, блаже́нне Проко́пие.
Богородичен
И ны́не и при́сно и во ве́ки веко́в. Ами́нь.
Све́та жили́ще, вся озари́вшаго,/ и сень ви́дена была́ еси́, Богоблагода́тная,/ мост и ле́ствица, на высоту́ земны́я возводя́щи, Де́во./ Тем Тя ублажа́ем и ве́рно велича́ем.