Канѡ́нъ прест҃ѣ́й бцⷣѣ, ꙗ҆вле́нїѧ ра́ди чꙋдотво́рныѧ є҆ѧ̀ і҆кѡ́ны каза́нскїѧ.

Благогове́ют Ти́, Богоро́дице, а́нгелов нача́льницы, и святы́х чи́ни че́стно слу́жат, пра́веднии красу́ются, небе́сных Хода́таицу блажа́т Тя́. Ку́пно же и земля́ и не́бо в весе́лии све́тло восхваля́ют Тя́, и мы́, гре́шнии, ми́лости про́сим: озари́ на́ша сердца́, Влады́чице, воспе́ти пе́снь святы́я Твоея́ ико́ны явле́нию.

Прииди́те, собери́теся, христоимени́тии лю́дие, умы́ та́йно очи́стившеся, во святу́ю це́рковь Ма́тере Христа́ Бо́га на́шего: источа́ет бо на́м неоску́дно от святы́я ико́ны исто́чник духо́вен, целе́бен душа́м и те́лом, пе́снь вопию́щим: благослове́н из Тебе́ рожде́йся Бо́г на́ш.

Диви́т, Пренепоро́чная, и ужаса́ет вся́к слу́х стра́нно чу́до боже́ственнаго Твоего́ Рождества́: ка́ко херуви́мскаго Творца́ зачала́ еси́? ка́ко О́гнь нестерпи́мый во утро́бе носи́ла еси́? ка́ко су́щую Жи́знь пло́тию облекла́ еси́ и Живо́т всему́ ми́ру родила́ еси́, Бо́га ку́пно и челове́ка?

Под кро́в Тво́й, Де́во Госпоже́, прибега́ем вси́ ро́ди челове́честии: просвети́ ны́ све́том Рождества́ Твоего́, гре́шныя рабы́ Твоя́, моля́щияся приле́жно и кла́няющияся пречи́стей Твое́й ико́не, прося́ще от Тебе́ прия́ти вели́кия ми́лости.

Ку́ю Ти́ досто́йную похвалу́ на́ше принесе́т коне́чное неможе́ние? Я́ко явле́нием пречи́стыя Твоея́ боже́ственныя ико́ны незави́стныя исто́чники целе́бныя источа́еши, ве́рно прибега́ющим к Тебе́ рабо́м Твои́м.

Боже́ственныя Твоея́ ико́ны свято́е явле́ние, Богоро́дице Де́во, я́ко светоза́рное возсия́ на́м со́лнце, пресла́вных чуде́с лучи́ пуща́ющи, тьмы́ лю́тых обстоя́ний отгоня́ющи свяще́нными Твои́ми, Влады́чице, предста́тельствы.

Испо́лнила еси́ благода́ти иногда́ первопи́санную Твою́ ико́ну, Госпоже́ Де́во Богоро́дице, и ны́не та́ же благода́ть и́стинствует сия́нием ве́ры чуде́с, я́ко тоя́ ра́ди первопи́санныя, ко спасе́нию ве́рно к Тебе́ по Бо́зе прибега́ющим.

Покланя́емся, Богоро́дице, Твоему́ пречи́стому о́бразу и пресла́дкому Твоему́ Младе́нцу, преве́чному и незаходи́мому Све́ту, Христу́, И́мже спасла́ еси́ от лю́тых зо́л и тле́ния сме́ртнаго все́ челове́ческое естество́.

Почти́м, лю́дие, Чи́стыя в чистоте́ ико́ну Де́вы Богоро́дицы и Тоя́ Боже́ственнаго Младе́нца, Христа́ Бо́га на́шего, и лобыза́ем и прославля́ем со стра́хом и тре́петом: почита́ем бо ико́ну благоче́стно, па́че же почита́ем Са́мую Ту́ю су́щую Чи́стую Богома́терь.

Дави́д, боже́ственный и чу́дный проро́к, издале́ча прови́дя, глаго́ла: лицу́ Твоему́ помо́лятся бога́тии лю́дие. Мы́ же, ве́рнии, покланя́емся и лобыза́ем честну́ю ико́ну, душа́ми ку́пно и телесы́ освяща́ющеся.

Ева́нгелия Христо́ва богогла́сный списа́тель Лука́, Бо́жиим манове́нием всенепоро́чный Тво́й напису́ет о́браз, Богоро́дице, и Младе́нца Преве́чнаго на рука́х Твои́х вообрази́в, к нему́же притека́ющия напа́стей и бе́д избавля́еши, и вся́ покрыва́еши, и спаса́еши Твое́ю ми́лостию.

Ты́ еси́ похвало́ и вене́ц святы́м все́м, о Цари́це! Ты́ упова́ние на́ше и Помо́щница по Бо́зе, и на Тя́ наде́жду спасе́ния на́шего возложи́хом вси́. Тебе́ мо́лимся, я́ко Бо́жии Ма́тери: одожди́ гре́шным рабо́м Твои́м бога́тыя Твоя́ душеспаси́тельныя ми́лости.

Вся́ко, Пречи́стая, существо́ воспе́ти недоуме́ет Тя́, па́че бо го́рних умо́в превозвы́силася еси́, ро́ждши непристу́пнаго и стра́шнаго Всецаря́ и Бо́га, но, я́ко Ми́лостива и ско́рая челове́ком Помо́щница, вонми́ моле́нию ра́б Твои́х и да́руй Твою́ по́мощь.

Иде́же осени́т благода́ть Твоя́, Богоро́дице, стра́хом исчеза́ют де́мони и разруша́ется злоко́зненное те́х мечта́ние, бе́гают ду́си те́мнии, ра́дуется же ве́рных все́ мно́жество, Тебе́ пе́снь хва́льну от се́рдца вопию́ще: ра́дуйся, боже́ственный Покро́ве ду́ш на́ших.

Безоче́сным сла́дкое зре́ние дае́тся, глухи́м слы́шание, немы́м благоглаго́лание, хромы́м хожде́ние, прокаже́нным очище́ние, де́монствуемым целому́дрие и в боле́знех су́щим разли́чных исцеле́ние, осене́нием Пречи́стыя Твоея́, Богоро́дице, ико́ны.

Не умолчи́м никогда́же, Богоро́дице, псалмы́ и пе́сньми воспева́ти вели́чия Твоя́, Обра́дованная: Бо́га бо вои́стинну воплоти́вшагося родила́ еси́, во спасе́ние на́ше всеми́рное и избавле́ние.

Боже́ственнаго Твоего́ Рождества́, Де́во Госпоже́, пребога́тая благода́ть, ю́же дре́вле изглаше́нием предала́ еси́ пречи́стому Твоему́ о́бразу, неоску́дне де́йствовати вели́кая же и пресла́вная, во спасе́ние на Тя́ наде́ющимся.

Иде́же прославля́ется свято́е и́мя Обра́дованныя Богоро́дицы, та́мо вся́ческих благи́х исто́чницы пролива́ются; прииди́те в чистоте́, челове́цы, се́ бо явле́ние боже́ственныя Де́вы ико́ны сказу́ет Цари́цы прише́ствие, во спасе́ние все́х ве́рных.

Целе́ния боле́зней, отгна́ние же страсте́й и душепита́тельное спасе́ние, грехо́в проще́ние и ве́чное избавле́ние от пречи́стыя Твоея́ ико́ны, Влады́чице, ве́рно приходя́ще, прие́млем, Богома́ти Всенепоро́чная.

К Тебе́, Госпоже́, прибега́ют ро́ди правове́рных, про́сят вели́кия ми́лости и прие́млют неоску́дно су́щии в неду́зех исцеле́ние, в страсте́х премене́ние, в печа́лех утеше́ние. Источи́ и мне́, Влады́чице, ка́плю душеспаси́тельную, да со все́ми и а́з пою́ Твое́ вели́чие.

Прииди́те, почерпе́м отпуще́ние от неистощи́маго исто́чника, точа́щаго святы́ню — Пречи́стыя Де́вы, и Тоя́ Пречи́стаго Младе́нца, Бо́жия Сло́ва, на́с ра́ди вочелове́чшагося. К Нему́ же возопии́м: Тво́рче Изба́вителю, препросла́вленный со Отце́м и Ду́хом, Бо́же, благослове́н еси́.

Неусы́пную, Чи́стая, и богоприя́тную иму́щи моли́тву, и непреодоле́емую держа́ву кре́пости, враго́в на́ших де́рзость, я́же на ны́, разори́, и вы́я и́х под но́зе ве́рному Импера́тору на́шему низложи́, да возвесели́мся о Тебе́, раби́, Сы́ну Твоему́ вопию́ще: оте́ц на́ших Бо́же, благослове́н еси́.

Ра́дуемся и весели́мся, ве́рнии лю́дие, чу́дному явле́нию ико́ны Пречи́стыя Влады́чицы Богоро́дицы, река́ бо яви́ся неисчерпа́ема, целе́бную во́ду точа́щи: слепы́м бо ви́дети дае́т и глухи́м слы́шание, хромы́м хожде́ние и все́м су́щим в неду́зех безме́здное исцеле́ние.

Неиспы́тана глубина́, недове́домо та́инство, непостижи́м о́браз, Де́во, зача́тия Твоего́: зача́тие без се́мене, без му́жа рождество́, Безпло́тный воплоти́ся, Преве́чный младе́нствует, Сы́н Бо́жий, Сы́н Тебе́, Де́вы, быва́ет. Ему́же вопие́м: Бо́же, благослове́н еси́.

У́м а́нгельский и челове́ческий ужаса́ется, Богоро́дице, ка́ко Бо́га небе́снаго, ложесна́ми объе́мши, воплоти́ла еси́? ка́ко, Младе́нца ро́ждши, я́ко Сы́на на руку́ но́сиши? Его́же ужаса́ется тва́рь и трепе́щут го́рнии престо́ли, вопию́ще непреста́нно: Свя́т, Свя́т, Свя́т еси́, Бо́же, препе́тый и превозноси́мый во ве́ки.

Ра́дуйся, су́щая ра́досте всего́ ми́ра, со арха́нгелом Гаврии́лом вопие́м Ти́, Богоро́дице: ра́дуйся, вмести́лище Невмести́маго; ра́дуйся, Благода́тная, носи́ло Божества́ всего́; ра́дуйся, Ада́мово воззва́ние, с Тобо́ю Госпо́дь, и Тебе́ ра́ди с на́ми, спаса́я на́с. Его́же пое́м и превозно́сим во ве́ки.

Ко́рень Иессе́ев освяще́нный — ко́рень греха́ на́шего исто́ргнула еси́; же́зл Ааро́нов процве́тший — Жизнода́теля цве́та израсти́вши Христа́; ста́мно манноприе́мная — сме́рти всю́ си́лу сокруши́ла еси́ и в поро́ду жи́зни возвела́ еси́ ро́д челове́ческий. Те́мже Тя́ пое́м, до́брых вино́вную.

Ты́ похвала́ христиа́ном еси́, Влады́чице, Ты́ ору́жие на враги́ и стена́ к Тебе́ прибега́ющим. Тя́ и ны́не на по́мощь призыва́ем, Госпоже́, не да́ждь враго́м вознести́ся на лю́ди Твоя́, и́же Тебе́ не хва́лят, ни Сы́на Твоего́, Богоро́дице, и Твое́й ико́не не кла́няются: си́х победи́ и ду́ши на́ша спаси́.

Тебе́, тве́рдую помо́щницу ро́ду челове́ческому, Богоро́дице Мари́е, ли́к проро́ческий многообра́зно провозвести́, се́нь святу́ю, небе́с простра́ннейшую, скрижа́ль богопи́санную и купину́ неопали́мую, две́рь богопрохо́дную, го́ру же и ле́ствицу, и мо́ст, и же́зл процве́тший; мы́ же вои́стину Богоро́дицу Тя́ велича́ем.

Та́йна глубины́ Рождества́ Твоего́ у́м а́нгельский ужаса́ет, Де́во, и пречи́стая ико́на де́моны прого́нит, и ли́ца нечести́вых омрача́ет, и в сту́д порева́ет: не терпя́т бо взира́ти на си́лу ея́, бе́гают же и исчеза́ют. Мы́ же любе́зно покланя́емся и лобыза́ем, и Тя́, Богоро́дицу, велича́ем.

Предста́тельница су́щи неотсту́пна к Вы́шнему Царю́, я́ко иму́щи ма́терне дерзнове́ние непосты́дно, в ми́ре глубо́це правосла́вных житие́ утверди́ и Благове́рнаго Импера́тора на́шего возвы́си, и вся́ поле́зная да́руй всегда́ рабо́м Твои́м, да Тя́, Богоро́дице, велича́ем.

О, Всеми́лостивая христиа́ном помо́щнице! Не мо́жет Тя́ воспе́ти досто́йно у́м челове́ческий и а́нгельский, я́ко всея́ тва́ри честне́йши, небе́сных и земны́х сла́внейши: все́х бо родила́ еси́ Творца́ и Бо́га. Но, о Влады́чице! приими́ ми́лостивно ю́же Тебе́ от се́рдца возложи́хом пе́снь, спаса́й на́с всегда́, на Тя́ бо наде́емся.

Бл҃гоговѣ́ютъ тѝ, бцⷣе, а҆́гг҃лѡвъ нача̑льницы, и҆ ст҃ы́хъ чи́ни че́стнѡ слꙋ́жатъ, првⷣнїи красꙋ́ютсѧ, нбⷭ҇ныхъ хода́таицꙋ бл҃жа́тъ тѧ̀. кꙋ́пнѡ же и҆ землѧ̀ и҆ нб҃о въ весе́лїи свѣ́тлѡ восхвалѧ́ютъ тѧ̀, и҆ мы̀ грѣ́шнїи млⷭ҇ти про́симъ: ѡ҆зарѝ на̑ша сердца̀, влⷣчце, воспѣ́ти пѣ́снь ст҃ы́ѧ твоеѧ̀ і҆кѡ́ны ꙗ҆вле́нїю.

Прїиди́те, собери́тесѧ хрⷭ҇тоимени́тїи лю́дїе, ᲂу҆мы̀ та́йнѡ ѡ҆чи́стившесѧ, во ст҃ꙋ́ю цр҃ковь мт҃ре хрⷭ҇та̀ бг҃а на́шегѡ: и҆сточа́етъ бо на́мъ неѡскꙋ́днѡ ѿ ст҃ы́ѧ і҆кѡ́ны и҆сто́чникъ дꙋхо́венъ, цѣле́бенъ дꙋша́мъ и҆ тѣ́лѡмъ, пѣ́снь вопїю́щымъ: бл҃гослове́нъ и҆з̾ тебѐ рожде́йсѧ бг҃ъ на́шъ.

Диви́тъ, пренепоро́чнаѧ, и҆ ᲂу҆жаса́етъ всѧ́къ слꙋ́хъ стра́нно чꙋ́до бж҃е́ственнагѡ твоегѡ̀ ржⷭ҇тва̀: ка́кѡ херꙋві́мскаго творца̀ зачала̀ є҆сѝ; ка́кѡ ѻ҆́гнь нестерпи́мый во ᲂу҆тро́бѣ носи́ла є҆сѝ; ка́кѡ сꙋ́щꙋю жи́знь пло́тїю ѡ҆блекла̀ є҆сѝ, и҆ живо́тъ всемꙋ̀ мі́рꙋ родила̀ є҆сѝ, бг҃а кꙋ́пнѡ и҆ чл҃вѣ́ка;

Под̾ кро́въ тво́й дв҃о, гпⷭ҇жѐ, прибѣга́емъ всѝ ро́ди человѣ́честїи: просвѣти́ ны свѣ́томъ ржⷭ҇тва̀ твоегѡ̀, грѣ̑шныѧ рабы̑ твоѧ̑, молѧ́щыѧсѧ прилѣ́жнѡ, и҆ кла́нѧющыѧсѧ пречⷭ҇тѣй твое́й і҆кѡ́нѣ, просѧ́ще ѿ тебѐ прїѧ́ти вели̑кїѧ млⷭ҇ти.

Кꙋ́ю ти досто́йнꙋю похвалꙋ̀ на́ше принесе́тъ коне́чное неможе́нїе; ꙗ҆́кѡ ꙗ҆вле́нїемъ пречⷭ҇тыѧ твоеѧ̀ бж҃е́ственныѧ і҆кѡ́ны, незави̑стныѧ и҆сто́чники цѣлє́бныѧ и҆сточа́еши, вѣ́рнѡ, прибѣга́ющымъ къ тебѣ̀ рабѡ́мъ твои̑мъ.

Бж҃е́ственныѧ твоеѧ̀ і҆кѡ́ны свѧто́е ꙗ҆вле́нїе, бцⷣе дв҃о, ꙗ҆́кѡ свѣтоза́рное возсїѧ̀ на́мъ со́лнце, пресла́вныхъ чꙋде́съ лꙋчѝ пꙋща́ющи, тьмы̑ лю́тыхъ ѡ҆бстоѧ́нїй ѿгонѧ́ющи, сщ҃е́нными твои́ми, влⷣчце, предста́тельствы.

И҆спо́лнила є҆сѝ бл҃года́ти и҆ногда̀ первопи́саннꙋю твою̀ і҆кѡ́нꙋ, гпⷭ҇жѐ дв҃о бцⷣе: и҆ ны́нѣ та́же бл҃года́ть и҆́стинствꙋетъ сїѧ́нїемъ вѣ́ры чꙋде́съ, ꙗ҆́кѡ тоѧ̀ ра́ди первопи́санныѧ, ко сп҃се́нїю вѣ́рнѡ къ тебѣ̀ по бз҃ѣ прибѣга́ющымъ.

Покланѧ́емсѧ, бцⷣе, твоемꙋ̀ пречⷭ҇томꙋ ѡ҆́бразꙋ, и҆ пресла́дкомꙋ твоемꙋ̀ млⷣнцꙋ, превѣ́чномꙋ и҆ незаходи́момꙋ свѣ́тꙋ хрⷭ҇тꙋ̀, и҆́мже сп҃сла̀ є҆сѝ ѿ лю́тыхъ ѕѡ́лъ, и҆ тлѣ́нїѧ сме́ртнагѡ всѐ человѣ́ческое є҆стество̀.

Почти́мъ лю́дїе чтⷭ҇ыѧ въ чистотѣ̀ і҆кѡ́нꙋ дв҃ы бцⷣы, и҆ тоѧ̀ бж҃е́ственнагѡ млⷣнца хрⷭ҇та̀ бг҃а на́шегѡ, и҆ лобыза́емъ и҆ прославлѧ́емъ со стра́хомъ и҆ тре́петомъ: почита́емъ бо і҆кѡ́нꙋ бл҃гоче́стнѡ, па́че же почита́емъ са́мꙋю тꙋ́ю сꙋ́щꙋю чтⷭ҇ꙋю бг҃омт҃рь.

Дв҃дъ бж҃е́ственный и҆ чꙋ́дный прⷪ҇ро́къ и҆здале́ча прови́дѧ, глаго́ла: лицꙋ̀ твоемꙋ̀ помо́лѧтсѧ бога́тїи лю́дїе. мы́ же вѣ́рнїи покланѧ́емсѧ, и҆ лобыза́емъ чтⷭ҇нꙋ́ю і҆кѡ́нꙋ, дꙋша́ми кꙋ́пнѡ и҆ тѣлесы̀ ѡ҆свѧща́ющесѧ.

Є҆ѵⷢ҇лїа хрⷭ҇то́ва бг҃огла́сный списа́тель лꙋка̀, бж҃їимъ манове́нїемъ всенепоро́чный тво́й написꙋ́етъ ѡ҆́бразъ бцⷣе, и҆ млⷣнца превѣ́чнаго на рꙋка́хъ твои́хъ воѡбрази́въ: къ немꙋ́же притека́ющыѧ напа́стей и҆ бѣ́дъ и҆збавлѧ́еши, и҆ всѧ̑ покрыва́еши, и҆ сп҃са́еши твое́ю млⷭ҇тїю.

Ты̀ є҆сѝ похвало̀ и҆ вѣне́цъ ст҃ы̑мъ всѣ̑мъ, ѽ цр҃и́це! ты̀ ᲂу҆пова́нїе на́ше и҆ помо́щнице по бз҃ѣ, и҆ на тѧ̀ наде́ждꙋ сп҃се́нїѧ на́шегѡ возложи́хомъ всѝ. тебѣ̀ мо́лимсѧ ꙗ҆́кѡ бж҃їи мт҃ри: ѡ҆дождѝ грѣ̑шнымъ рабѡ́мъ твои̑мъ, бога̑тыѧ твоѧ̑ дꙋшесп҃си́тєльныѧ млⷭ҇ти.

Всѧ́ко пречтⷭ҇аѧ сꙋщество̀ воспѣ́ти недоꙋмѣ́етъ тѧ̀, па́че бо го́рнихъ ᲂу҆мѡ́въ превозвы́силасѧ є҆сѝ, ро́ждши непристꙋ́пнаго и҆ стра́шнаго всецр҃ѧ̀, и҆ бг҃а: но ꙗ҆́кѡ ми́лостива, и҆ ско́раѧ человѣ́кѡмъ помо́щница, вонмѝ моле́нїю ра̑бъ твои́хъ, и҆ да́рꙋй твою̀ по́мощь.

И҆дѣ́же ѡ҆сѣни́тъ бл҃года́ть твоѧ̀, бцⷣе, стра́хомъ и҆счеза́ютъ де́мѡни, и҆ разрꙋша́етсѧ ѕлоко́зненное тѣ́хъ мечта́нїе, бѣ́гаютъ дꙋ́си те́мнїи, ра́дꙋетсѧ же вѣ́рныхъ всѐ мно́жество, тебѣ̀ пѣ́снь хва́льнꙋ ѿ се́рдца вопїю́ще: ра́дꙋйсѧ, бж҃е́ственный покро́ве дꙋ́шъ на́шихъ.

Без̾ѻчє́снымъ сла́дкое зрѣ́нїе дае́тсѧ, глꙋхи̑мъ слы́шанїе, нѣмы̑мъ бл҃гоглаго́ланїе, хромы̑мъ хожде́нїе, прокажє́ннымъ ѡ҆чище́нїе, де́мѡнствꙋємымъ цѣломꙋ́дрїе, и҆ въ болѣ́знехъ сꙋ́щымъ разли́чныхъ и҆сцѣле́нїе, ѡ҆сѣне́нїемъ пречтⷭ҇ыѧ твоеѧ̀, бцⷣе, і҆кѡ́ны.

Не ᲂу҆молчи́мъ никогда́же бцⷣе, ѱалмы̀ и҆ пѣ́сньми воспѣва́ти вели̑чїѧ твоѧ̑, ѡ҆бра́дованнаѧ: бг҃а бо вои́стиннꙋ воплоти́вшагосѧ родила̀ є҆сѝ, во сп҃се́нїе на́ше всемі́рное, и҆ и҆збавле́нїе.

Бж҃е́ственнагѡ твоегѡ̀ ржⷭ҇тва̀ дв҃о гпⷭ҇жѐ, пребога́таѧ бл҃года́ть, ю҆́же дре́вле и҆зглаше́нїемъ предала̀ є҆сѝ пречтⷭ҇омꙋ твоемꙋ̀ ѡ҆́бразꙋ, неѡскꙋ́днѣ дѣ́йствовати вели̑каѧ же и҆ пресла̑внаѧ, во сп҃се́нїе на тѧ̀ надѣ́ющымсѧ.

И҆дѣ́же прославлѧ́етсѧ ст҃о́е и҆́мѧ ѡ҆бра́дованныѧ бцⷣы, та́мѡ всѧ́ческихъ бл҃ги́хъ и҆сто́чницы пролива́ютсѧ: прїиди́те въ чистотѣ̀ человѣ́цы, се́ бо ꙗ҆вле́нїе бж҃е́ственныѧ дв҃ы і҆кѡ́ны, сказꙋ́етъ цр҃и́цы прише́ствїе, во сп҃се́нїе всѣ́хъ вѣ́рныхъ.

Цѣлє́нїѧ болѣ́зней, ѿгна́нїе же страсте́й, и҆ дꙋшепита́тельное сп҃се́нїе, грѣхѡ́въ проще́нїе, и҆ вѣ́чное и҆збавле́нїе, ѿ пречⷭ҇тыѧ твоеѧ̀ і҆кѡ́ны, влⷣчце, вѣ́рнѡ приходѧ́ще прїе́млемъ, бг҃омт҃и всенепоро́чнаѧ.

Къ тебѣ̀, гпⷭ҇жѐ, прибѣга́ютъ ро́ди правовѣ́рныхъ, про́сѧтъ вели́кїѧ млⷭ҇ти, и҆ прїе́млютъ неѡскꙋ́днѡ сꙋ́щїи въ недꙋ́зѣхъ и҆сцѣле́нїе, въ страсте́хъ премѣне́нїе, въ печа́лѣхъ ᲂу҆тѣше́нїе. и҆сточѝ и҆ мнѣ̀, влⷣчце ка́плю дꙋшесп҃си́тельнꙋю, да со всѣ́ми и҆ а҆́зъ пою̀ твоѐ вели́чїе.

Прїиди́те, почерпе́мъ ѿпꙋще́нїе ѿ неистощи́магѡ и҆сто́чника, точа́щагѡ ст҃ы́ню пречⷭ҇тыѧ дв҃ы, и҆ тоѧ̀ пречⷭ҇тагѡ млⷣнца бж҃їѧ сло́ва, на́съ ра́ди вочл҃вѣ́чшагѡсѧ, къ немꙋ́же возопїи́мъ: тво́рче и҆зба́вителю, препросла́вленный со ѻ҆ц҃е́мъ и҆ дх҃омъ, бж҃е бл҃гослове́нъ є҆сѝ.

Неꙋсы́пнꙋю, чтⷭ҇аѧ, и҆ бг҃опрїѧ́тнꙋю и҆мꙋ́щи мл҃твꙋ, и҆ непреѡдолѣ́емꙋю держа́вꙋ крѣ́пости, врагѡ́въ на́шихъ де́рзость, ꙗ҆́же на ны̀ разорѝ, и҆ вы̑ѧ и҆́хъ под̾ но́зѣ вѣ́рномꙋ і҆мпера́торꙋ на́шемꙋ низложѝ, да возвесели́мсѧ ѡ҆ тебѣ̀ рабѝ, сн҃ꙋ твоемꙋ̀ вопїю́ще: ѻ҆тє́цъ на́шихъ бж҃е, бл҃гослове́нъ є҆сѝ.

Ра́дꙋемсѧ и҆ весели́мсѧ, вѣ́рнїи лю́дїе, чꙋ́дномꙋ ꙗ҆вле́нїю і҆кѡ́ны пречⷭ҇тыѧ влⷣчцы бцⷣы: рѣка́ бо ꙗ҆ви́сѧ неисчерпа́ема, цѣле́бнꙋю во́дꙋ точа́щи, слѣпы̑мъ бо ви́дѣти дае́тъ, и҆ глꙋхи̑мъ слы́шанїе, хромы̑мъ хожде́нїе, и҆ всѣ̑мъ сꙋ́щымъ въ недꙋ́зѣхъ безме́здное и҆сцѣле́нїе.

Неиспы́тана глꙋбина̀, недовѣ́домо та́инство, непостижи́мь ѡ҆́бразъ, дв҃о, зача́тїѧ твоегѡ̀, зача́тїе без̾ сѣ́мене, без̾ мꙋ́жа ржⷭ҇тво̀. безпло́тный воплоти́сѧ, превѣ́чный млⷣнствꙋетъ, сн҃ъ бж҃їй сн҃ъ тебѐ дв҃ы быва́етъ, є҆мꙋ́же вопїе́мъ: бж҃е, бл҃гослове́нъ є҆сѝ.

Оу҆́мъ а҆́гг҃льскїй и҆ человѣ́ческїй ᲂу҆жаса́етсѧ, бцⷣе, ка́кѡ бг҃а нбⷭ҇наго ложесна́ми ѡ҆б̾е́мши воплоти́ла є҆сѝ; ка́кѡ млⷣнца ро́ждши, ꙗ҆́кѡ сн҃а на рꙋкꙋ̀ но́сиши; є҆гѡ́же ᲂу҆жаса́етсѧ тва́рь, и҆ трепе́щꙋтъ го́рнїи прⷭ҇то́ли, вопїю́ще непреста́ннѡ: ст҃ъ, ст҃ъ, ст҃ъ є҆сѝ бж҃е, препѣ́тый и҆ превозноси́мый во вѣ́ки.

Ра́дꙋйсѧ, сꙋ́щаѧ ра́досте всегѡ̀ мі́ра, со а҆рха́гг҃ломъ гаврїи́ломъ вопїе́мъ тѝ, бцⷣе: ра́дꙋйсѧ, вмѣсти́лище невмѣсти́магѡ. ра́дꙋйсѧ, бл҃года́тнаѧ, носи́ло бж҃ества̀ всегѡ̀. ра́дꙋйсѧ, а҆да́мово воззва́нїе, съ тобо́ю гдⷭ҇ь, и҆ тебѐ ра́ди съ на́ми сп҃са́ѧ на́съ. є҆го́же пое́мъ и҆ превозно́симъ во вѣ́ки.

Ко́рень і҆ессе́евъ ѡ҆свѧще́нный, ко́рень грѣха̀ на́шегѡ и҆сто́ргнꙋла є҆сѝ. же́злъ а҆арѡ́новъ процвѣ́тшїй, жизнода́телѧ цвѣ́та и҆зрасти́вши хрⷭ҇та̀, ста́мно маннопрїе́мнаѧ, сме́рти всю̀ си́лꙋ сокрꙋши́ла є҆сѝ, и҆ въ поро́дꙋ жи́зни возвела̀ є҆сѝ ро́дъ человѣ́ческїй: тѣ́мже тѧ̀ пое́мъ до́брыхъ вино́внꙋю.

Ты̀ похвала̀ хрⷭ҇тїа́нѡмъ є҆сѝ, влⷣчце, ты̀ ѻ҆рꙋ́жїе на врагѝ, и҆ стѣна̀ къ тебѣ̀ прибѣга́ющымъ. тѧ̀ и҆ ны́нѣ на по́мощь призыва́емъ гпⷭ҇жѐ, не да́ждь врагѡ́мъ вознести́сѧ на лю́ди твоѧ̑, и҆́же тебѐ не хва́лѧтъ, ни сн҃а твоегѡ̀, бцⷣе, и҆ твое́й і҆кѡ́нѣ не кла́нѧютсѧ: си́хъ побѣдѝ, и҆ дꙋ́шы на́шѧ сп҃сѝ.

Тебѐ тве́рдꙋю помо́щницꙋ ро́дꙋ человѣ́ческомꙋ, бцⷣе мр҃і́е, ли́къ прⷪ҇ро́ческїй многоѡбра́знѡ провозвѣстѝ, сѣ́нь свѧтꙋ́ю, нб҃съ простра́ннѣйшꙋю, скрижа́ль бг҃опи́саннꙋю, и҆ кꙋпинꙋ̀ неѡпали́мꙋю, две́рь бг҃опрохо́днꙋю, го́рꙋ же и҆ лѣ́ствицꙋ, и҆ мо́стъ и҆ же́злъ процвѣ́тшїй: мы́ же вои́стиннꙋ бцⷣꙋ тѧ̀ велича́емъ.

Та́йна глꙋбины̀ ржⷭ҇тва̀ твоегѡ̀ ᲂу҆́мъ а҆́гг҃льскїй ᲂу҆жаса́етъ, дв҃о, и҆ пречⷭ҇таѧ і҆кѡ́на де́мѡны прого́нитъ, и҆ ли́ца нечести́выхъ ѡ҆мрача́етъ, и҆ въ стꙋ́дъ порѣва́етъ: не терпѧ́тъ бо взира́ти на си́лꙋ є҆ѧ̀, бѣ́гаютъ же и҆ и҆счеза́ютъ. мы́ же любе́знѡ покланѧ́емсѧ и҆ лобыза́емъ, и҆ тѧ̀ бцⷣꙋ велича́емъ.

Предста́тельница сꙋ́щи неѿстꙋ́пна къ вы́шнемꙋ цр҃ю̀, ꙗ҆́кѡ и҆мꙋ́щи мт҃рне дерзнове́нїе непосты́днѡ, въ ми́рѣ глꙋбо́цѣ правосла́вныхъ житїѐ ᲂу҆твердѝ, и҆ бл҃говѣ́рнаго і҆мпера́тора на́шего возвы́си, и҆ всѧ̑ полє́знаѧ да́рꙋй всегда̀ рабѡ́мъ твои̑мъ, да тѧ̀, бцⷣе, велича́емъ.

Ѽ всемлⷭ҇тиваѧ хрⷭ҇тїа́нѡмъ помо́щнице! не мо́жетъ тѧ̀ воспѣ́ти досто́йнѡ ᲂу҆́мъ человѣ́ческїй и҆ а҆́гг҃льскїй, ꙗ҆́кѡ всеѧ̀ тва́ри чтⷭ҇нѣ́йши, нбⷭ҇ныхъ и҆ земны́хъ сла́внѣйши: всѣ́хъ бо родила̀ є҆сѝ творца̀ и҆ бг҃а. но ѽ влⷣчце! прїимѝ млⷭ҇тивнѡ, ю҆́же тебѣ̀ ѿ се́рдца возложи́хомъ пѣ́снь, сп҃са́й на́съ всегда̀, на тѧ́ бо надѣ́емсѧ.