Канон святому священномученику Панкратию Тавроменийскому, Антиохийскому

Пречестны́й ка́мень тя́ Це́рковь познава́ет, Панкра́тие, водруже́нием слове́с твои́х утвержда́ема при́сно, и сего́ ра́ди твою́ почита́ем па́мять дне́сь.

Обнови́л еси́ ра́лом твои́х боже́ственных слове́с сердца́, Панкра́тие, олядене́вшая пе́рвее злове́рия мгло́ю, плодоно́сна показа́л еси́ я́ве ве́ры ра́ди.

Еди́ницу тричи́сленную, соединя́ему в то́жде естество́, возвеща́я, погаси́л еси́ безбо́жия мглу́ и светолу́чными уче́нии лю́ди просвети́л еси́.

Ду́хом утвержда́емь, лука́выя отгна́л еси́ ду́хи и трудо́м моли́тв хра́мы разори́л еси́ и́дольския, це́ркви возставля́я, досточу́дне.

Сечи́тельным сло́вом твои́м посе́кл еси́ злоче́стия, преподо́бне, те́рние и насади́л еси́ душа́м спаси́тельная уче́ния доброде́телей, оби́лующа плодо́в, свяще́нне.

Сосу́д обре́т тя́, Боже́ственнаго Ду́ха чи́стыя зари́ прие́млюща, верхо́вный учени́к, к за́паду посла́ безбо́жия изгна́ти мглу́, всече́стне.

Огне́м Уте́шителя огнедохнове́нен я́влься, ле́сть попали́л еси́, Панкра́тие му́дре, и, возсия́в, я́ко све́щник, в мо́ри потопля́емым неве́дения, ко приста́нищем Боже́ственныя вво́диши во́ли.

От Ка́мене некраесеко́ма Пе́тр напои́вся и насы́щся, я́ко и́ну тя́ посыла́ет реку́, олядене́вшия напои́ти ду́ши, богому́дре, и нече́стия ре́ки изсуши́ти тече́нием боже́ственнаго пропове́дания.

Глаго́л твои́х веща́ние излия́ся, му́дре, сия́нием просвеща́емь ра́зума Христо́ва. Те́мже и е́ллинская му́дрость обуи́ся, и зло́бы мудре́ц сожже́ся, му́чениче святи́телю Панкра́тие.

Житие́ твое́, боже́ственными блиста́яся добро́тами, вся́ омрачи́ де́монская стремле́ния и, разори́в тму́ безбо́жия, сы́ны дне́ показа́, любо́вию твои́м уче́нием покори́вшияся.

Чуде́с показа́нии улови́л еси́ лю́ди, сло́вом же тре́бища разори́л еси́ и созда́л еси́, свяще́нне, церкве́й добро́ты во обновле́ние челове́ком.

Кровьми́ обагри́л еси́ оде́жду свяще́нную, кро́вь же де́монскую изсуши́л еси́ и победоно́сец возше́л еси́ к небеси́, побе́ды прии́м вене́ц.

Разсе́деся пред лице́м твои́м хра́м и́дольский, две́рь же отве́рзеся язы́ком, и даде́ся благода́ть Боже́ственная ве́рных в сердца́, священнотаи́нниче о́тче.

Облагодати́в тво́й у́м и просвети́в бога́тно, Иису́с, просвеще́ние все́х и Бо́г, сло́вом твои́м безслове́сия лю́ди изба́ви.

Священноде́йствовав Бо́жие Ева́нгелие, му́дре, боже́ственная уче́ния запеча́тствовав све́тло кро́вию, священнотаи́нниче му́чениче Панкра́тие.

Кропле́ний и́дольских и крове́й скве́рных изба́вил еси́ лю́ди и, поже́рся, я́коже а́гнец, Панкра́тие, же́ртва жива́ Бо́гу прине́слся еси́.

Кро́вию крести́лся еси́ твое́ю, Панкра́тие, пе́рвее в воде́ крести́в лю́ди, и ко Христу́ преше́л еси́, ра́дуяся; с ни́миже водворя́яся, прича́стием обожа́ешися све́тло при́сно, преблаже́нне.

Сла́ностию погруже́нныя лю́тых у́дицею твои́х слове́с возве́л еси́, свяще́нне, и моли́тв чи́стым одожде́нием му́тную изсуши́л еси́ злове́рия глубину́, священнотаи́нниче Христо́в.

Ка́мень тя́ вои́стинну неразсе́дный основа́ние положи́ и степе́нь недви́жимь, свяще́нныя священнояви́тель Це́ркве, в не́йже сокруша́ется вся́ка зло́ба, му́дре, младе́нствующаго врага́.

Огне́м изнуря́емь разли́чных искуше́ний, невреди́мь пребы́л еси́, изостри́в у́м све́тлыми виде́нии, яви́лся еси́, му́дре, ме́чь, посека́я ве́щь многобо́жия.

Лю́ди приводя́ в ра́зум Христо́в, зна́мения и чудеса́ твори́л еси́ я́ве, предглаго́ля хотя́щая бы́ти, я́ко проро́к Бо́жий, Уте́шителя, богому́дре, дохнове́ньми.

О́браз Зижди́теля показу́я лю́дем, во́лею И́же поноси́, соединя́яся на́м, зна́мения и си́лы те́м сотворя́еши, многобо́жия де́рзость отгоня́.

Светолу́чными Петра́ сия́нии просве́щся душе́ю и мы́слию, я́ко звезда́ многосве́тлая, к за́паду дости́гл еси́, просвеща́я уче́нии заше́дшия в неве́дения, Панкра́тие, глубину́.

Ико́нную че́сть преходя́щу в первообра́зную ты́ ве́дый, всю́ду честну́ю поставля́л еси́, сла́вне, Иису́са и Бо́га на́шего ико́ну, ка́пищем де́монским на потребле́ние.

Светоно́сное твое́ сие́ торжество́ гра́д и собо́р сотворя́ет, ра́дуяся, чу́дный Панкра́тие, тя́ ве́рно почита́юще. И́хже благослови́ти я́ко па́стырь не преста́й, о все́х моли́тву творя́.

Пречестны́й ка́мень тѧ̀ цр҃ковь познава́етъ, пагкра́тїе, водрꙋже́нїемъ слове́съ твои́хъ ᲂу҆твержда́ема при́снѡ: и҆ сегѡ̀ ра́ди твою̀ почита́емъ па́мѧть дне́сь.

Ѡ҆бнови́лъ є҆сѝ ра́ломъ твои́хъ бжⷭ҇твенныхъ слове́съ сердца̀, пагкра́тїе, ѡ҆лѧденѣ̑вшаѧ пе́рвѣе ѕловѣ́рїѧ мгло́ю, плодонѡ́сна показа́лъ є҆сѝ ꙗ҆́вѣ вѣ́ры ра́ди.

Є҆ди́ницꙋ тричи́сленнꙋю, соединѧ́емꙋ въ то́жде є҆стество̀ возвѣща́ѧ, погаси́лъ є҆сѝ безбо́жїѧ мглꙋ̀, и҆ свѣтолꙋ́чными ᲂу҆чє́нїи лю́ди просвѣти́лъ є҆сѝ.

Дх҃омъ ᲂу҆твержда́емь, лꙋка̑выѧ ѿгна́лъ є҆сѝ дꙋ́хи: и҆ трꙋдо́мъ моли́твъ хра́мы разори́лъ є҆сѝ і҆́дѡльскїѧ, цє́ркви возставлѧ́ѧ, досточꙋ́дне.

Сѣчи́тельнымъ сло́вомъ твои́мъ посѣ́клъ є҆сѝ ѕлоче́стїѧ, прпⷣбне, те́рнїе, и҆ насади́лъ є҆сѝ дꙋша́мъ спаси́тєльнаѧ ᲂу҆чє́нїѧ добродѣ́телей, ѻ҆би̑лꙋюща плодѡ́въ, свѧще́нне.

Сосꙋ́дъ ѡ҆брѣ́тъ тѧ̀ бжⷭ҇твеннагѡ дх҃а, чи̑стыѧ зари̑ прїе́млюща, верхо́вный ᲂу҆ч҃ни́къ, къ за́падꙋ посла̀ безбо́жїѧ и҆згна́ти мглꙋ̀, всече́стне.

Ѻ҆гне́мъ ᲂу҆тѣ́шителѧ, ѻ҆гнедохнове́ненъ ꙗ҆́вльсѧ, ле́сть попали́лъ є҆сѝ, пагкра́тїе мꙋ́дре, и҆ возсїѧ́въ ꙗ҆́кѡ свѣ́щникъ въ мо́ри потоплѧ́ємымъ невѣ́дѣнїѧ, ко приста́нищємъ бжⷭ҇твенныѧ вво́диши во́ли.

Ѿ ка́мене некраесѣко́ма пе́тръ напои́всѧ и҆ насы́щсѧ, ꙗ҆́кѡ и҆́нꙋ тѧ̀ посыла́етъ рѣкꙋ̀, ѡ҆лѧденѣ́вшыѧ напои́ти дꙋ́шы, бг҃омꙋ́дре, и҆ нече́стїѧ рѣ́ки и҆зсꙋши́ти тече́нїемъ бжⷭ҇твеннагѡ проповѣ́данїѧ.

Глагѡ́лъ твои́хъ вѣща́нїе и҆злїѧ́сѧ, мꙋ́дре, сїѧ́нїемъ просвѣща́емь ра́зꙋма хрⷭ҇то́ва. тѣ́мже и҆ є҆́ллинскаѧ мꙋ́дрость ѡ҆бꙋи́сѧ, и҆ ѕло́бы мꙋдре́цъ сожже́сѧ, мꙋ́чениче свѧти́телю пагкра́тїе.

Житїѐ твоѐ бжⷭ҇твенными блиста́ѧсѧ добро́тами всѧ̑ ѡ҆мрачѝ де́мѡнскаѧ стремлє́нїѧ, и҆ разори́въ тмꙋ̀ безбо́жїѧ, сы́ны днѐ показа̀, любо́вїю твои̑мъ ᲂу҆че́нїємъ покори́вшыѧсѧ.

Чꙋде́съ показа̑нїи ᲂу҆лови́лъ є҆сѝ лю́ди, сло́вомъ же трє́бища разори́лъ є҆сѝ, и҆ созда́лъ є҆сѝ, свѧще́нне, цр҃кве́й добрѡ́ты, во ѡ҆бновле́нїе человѣ́кѡмъ.

Кровьмѝ ѡ҆багри́лъ є҆сѝ ѻ҆де́ждꙋ свѧще́ннꙋю, кро́вь же де́мѡнскꙋю и҆зсꙋши́лъ є҆сѝ: и҆ побѣдоно́сецъ возше́лъ є҆сѝ къ небесѝ, побѣ́ды прїи́мъ вѣне́цъ.

Разсѣ́десѧ предъ лице́мъ твои́мъ хра́мъ і҆́дѡльскїй, две́рь же ѿве́рзесѧ ꙗ҆зы́кѡмъ, и҆ даде́сѧ благода́ть бжⷭ҇твеннаѧ вѣ́рныхъ въ сердца̀, свѧщеннотаи́нниче ѻ҆́тче.

Ѡ҆благодати́въ тво́й ᲂу҆́мъ, и҆ просвѣти́въ бога́тнѡ і҆и҃съ просвѣще́нїе всѣ́хъ и҆ бг҃ъ: сло́вомъ твои́мъ безслове́сїѧ лю́ди и҆зба́ви.

Свѧщеннодѣ́йствовавъ бж҃їе є҆ѵⷢ҇лїе, мꙋ́дре, бжⷭ҇твеннаѧ ᲂу҆чє́нїѧ запеча́тствовавъ свѣ́тлѡ кро́вїю, свѧщеннотаи́нниче мꙋ́чениче пагкра́тїе.

Кропле́нїй і҆́дѡльскихъ, и҆ крове́й скве́рныхъ и҆зба́вилъ є҆сѝ лю́ди, и҆ поже́рсѧ ꙗ҆́коже а҆́гнецъ, пагкра́тїе, же́ртва жива̀ бг҃ꙋ прине́слсѧ є҆сѝ.

Кро́вїю крести́лсѧ є҆сѝ твое́ю, пагкра́тїе, пе́рвѣе въ водѣ̀ крести́въ лю́ди, и҆ ко хрⷭ҇тꙋ̀ преше́лъ є҆сѝ ра́дꙋѧсѧ: съ ни́миже водворѧ́ѧсѧ, прича́стїемъ ѡ҆божа́ешисѧ свѣ́тлѡ при́снѡ преблаже́нне.

Сла́ностїю погрꙋжє́нныѧ лю́тыхъ, ᲂу҆́дицею твои́хъ слове́съ возве́лъ є҆сѝ, свѧще́нне, и҆ моли́твъ чи́стымъ ѡ҆дожде́нїемъ мꙋ́тнꙋю и҆зсꙋши́лъ є҆сѝ ѕловѣ́рїѧ глꙋбинꙋ̀, свѧщеннотаи́нниче хрⷭ҇то́въ.

Ка́мень тѧ̀ вои́стиннꙋ неразсѣ́дный, ѡ҆снова́нїе положѝ, и҆ степе́нь недви́жимь, свѧще́нныѧ свѧщенноѧви́тель цр҃кве: въ не́йже сокрꙋша́етсѧ всѧ́ка ѕло́ба, мꙋ́дре, младе́нствꙋющагѡ врага̀.

Ѻ҆гне́мъ и҆знꙋрѧ́емь разли́чныхъ и҆скꙋше́нїй, невреди́мь пребы́лъ є҆сѝ, и҆з̾ѡстри́въ ᲂу҆́мъ свѣ́тлыми видѣ̑нїи, и҆ ꙗ҆ви́лсѧ є҆сѝ, мꙋ́дре, ме́чь, посѣка́ѧ ве́щь многобо́жїѧ.

Лю́ди приводѧ̀ въ ра́зꙋмъ хрⷭ҇то́въ, зна́мєнїѧ и҆ чꙋдеса̀ твори́лъ є҆сѝ ꙗ҆́вѣ, предглаго́лѧ хотѧ̑щаѧ бы́ти, ꙗ҆́кѡ прⷪ҇ро́къ бж҃їй, ᲂу҆тѣ́шителѧ, бг҃омꙋ́дре, дохнове́ньми.

Ѻ҆́бразъ зижди́телѧ показꙋ́ѧ лю́демъ, во́лею и҆́же поносѝ соединѧ́ѧсѧ на́мъ, зна́мєнїѧ и҆ си̑лы тѣ́мъ сотворѧ́еши многобо́жїѧ де́рзость ѿгонѧ̀.

Свѣтолꙋ́чными петра̀ сїѧ̑нїи просвѣ́щсѧ дꙋше́ю и҆ мы́слїю, ꙗ҆́кѡ ѕвѣзда̀ многосвѣ́тлаѧ, къ за́падꙋ дости́глъ є҆сѝ просвѣща́ѧ ᲂу҆чє́нїи заше́дшыѧ въ невѣ́дѣнїѧ, пагкра́тїе, глꙋбинꙋ̀.

І҆кѡ́ннꙋю че́сть преходѧ́щꙋ въ первоѻбра́знꙋю ты̀ вѣ́дый, всю́дꙋ честнꙋ́ю поставлѧ́лъ є҆сѝ, сла́вне, і҆и҃са и҆ бг҃а на́шегѡ і҆кѡ́нꙋ, ка́пищємъ де́мѡнскимъ на потребле́нїе.

Свѣтоно́сное твоѐ сїѐ торжество̀, гра́дъ и҆ собо́ръ сотворѧ́етъ ра́дꙋѧсѧ, чꙋ́дный пагкра́тїе, тѧ̀ вѣ́рнѡ почита́юще. и҆̀хже благослови́ти ꙗ҆́кѡ па́стырь не преста́й, ѡ҆ всѣ́хъ моли́твꙋ творѧ̀.