Православный календарь
Размер шрифта:

Ака́ѳістъ

А҆ка́ѳїстъ прест҃ѣ́й бцⷣѣ въ че́сть є҆ѧ̀ і҆кѡ́ны, и҆менꙋ́емыѧ ко́лочскаѧ.

Колочской (1413) и Кипрской в с. Стромыни (Московская обл.) икон Божией Матери 22 июля 2026

Конда́къ а҃

Взбра́нной воево́дѣ влⷣчцѣ на́шей бцⷣѣ бл҃года́рственное прино́симъ пѣ́нїе ѡ҆ ꙗ҆вле́нїи ди́вныѧ і҆кѡ́ны є҆ѧ̀ ко́лочскїѧ, зе́млю можа́йскꙋю просвѣти́вшїѧ и҆ всѧ̑ вѣ̑рнаѧ ча̑да цр҃кве возвесели́вшїѧ. Ты́ же, ꙗ҆́кѡ всемлⷭ҇тиваѧ застꙋ́пница и҆ всебл҃га́ѧ помо́щница, всѣ́хъ вѣ́рою притека́ющихъ къ тебѣ̀ ѿ всѧ́кихъ бѣ́дъ и҆ напа́стей защитѝ, да зове́мъ тѝ:

Ра́дꙋйсѧ, влⷣчце, і҆кѡ́ною твое́ю любо́вь и҆ млⷭ҇ть на́мъ ꙗ҆влѧ́ющаѧ.

І҆́косъ а҃

А҆́гг҃лъ мно́жество и҆ человѣ̑къ собо́ри сла́вѧтъ тебѐ, нб҃сѐ и҆ землѝ цр҃и́цꙋ, ѡ҆ ꙗ҆вле́нїи і҆кѡ́ны твоеѧ̀ ко́лочскїѧ, въ землѝ моско́вской дре́вле просїѧ́вшїѧ, ꙗ҆́кѡ сокро́вище неисчерпа́емое, ꙗ҆вле́нное длѧ вѣ́чнагѡ сп҃се́нїѧ на́шегѡ. Тѣ́мже мы̀, всѐ ᲂу҆пова́нїе на тѧ̀ возложи́вше и҆ на ст҃ы́й ѻ҆́бразъ тво́й взира́юще, во ᲂу҆миле́нїи серде́цъ взыва́емъ та́кѡ:

Ра́дꙋйсѧ, странꙋ̀ рѡссі́йскꙋю въ жре́бїй и҆ достоѧ́нїе себѣ̀ и҆збра́вшаѧ: ра́дꙋйсѧ, і҆кѡ̑ны твоѧ̑ чꙋдотвѡ́рныѧ, ꙗ҆́кѡ ѕвѣ́зды, въ не́й ᲂу҆мно́жившаѧ.

Ра́дꙋйсѧ, дв҃о прест҃а́ѧ, ѻ҆́бразъ тво́й чꙋде́снѡ на́мъ ꙗ҆ви́вшаѧ: ра́дꙋйсѧ, зе́млю моско́вскꙋю свѣ́томъ є҆гѡ̀ ѡ҆зари́вшаѧ.

Ра́дꙋйсѧ, землѝ можа́йской і҆кѡ́нꙋ твою̀ въ зало́гъ бл҃говоле́нїѧ дарова́вшаѧ: ра́дꙋйсѧ, чꙋдесы̀ твои́ми вѣ́рꙋ въ не́й ᲂу҆тверди́вшаѧ.

Ра́дꙋйсѧ, ѻ҆би́тели ко́лочскїѧ ди́внаѧ строи́тельнице: ра́дꙋйсѧ, вѣ́рнаѧ є҆ѧ̀ защи́тнице.

Ра́дꙋйсѧ, болѣ̑зни дꙋшє́вныѧ и҆ тѣлє́сныѧ і҆кѡ́ною твое́ю ско́рѡ врачꙋ́ющаѧ: ра́дꙋйсѧ, во всѧ́кихъ бѣда́хъ и҆ нꙋ́ждахъ ско́раѧ на́ша помо́щнице.

Ра́дꙋйсѧ, лѣ́ствице, ѿ землѝ къ нб҃сѝ возводѧ́щаѧ: ра́дꙋйсѧ, ра́дости вѣ́чныѧ на́съ сподоблѧ́ющаѧ.

Ра́дꙋйсѧ, влⷣчце, і҆кѡ́ною твое́ю любо́вь и҆ млⷭ҇ть на́мъ ꙗ҆влѧ́ющаѧ.

Конда́къ в҃

Ви́дѧ мꙋ́жъ бл҃гочести́вый лꙋка̀, є҆гда̀ и҆зы́де на дѣ́ланїе своѐ, пречꙋ́днꙋю і҆кѡ́нꙋ твою̀, влⷣчце, на дре́вѣ ꙗ҆вле́ннꙋю, въ до́мъ сво́й принесѐ ю҆̀. Оу҆разꙋмѣ́въ же, ꙗ҆́кѡ ст҃а́ѧ і҆кѡ́на твоѧ̀ да́ръ є҆́сть млⷭ҇рдїѧ лю́демъ, тобо́ю низпосыла́емый, возопѝ бг҃ꙋ бл҃года́рственнꙋю пѣ́снь: А҆ллилꙋ́їа.

І҆́косъ в҃

Ра́зꙋмъ бг҃опросвѣще́нъ и҆ вѣ́рꙋ въ бл҃года́тнꙋю си́лꙋ бг҃омт҃ре и҆мѣ́ѧ, человѣ́къ нѣ́кїй, мнѡ́га лѣ̑та разсла́бленъ лежа́й въ домꙋ̀ лꙋкѝ, ᲂу҆молѝ є҆го̀, да принесе́тъ къ немꙋ̀ і҆кѡ́нꙋ ѡ҆брѣ́теннꙋю, ю҆́же ѡ҆блобыза́въ, въ то́й же ча́съ воста̀ здра́въ, ꙗ҆́кѡ николи́же болѣ́въ. Мы́ же сїѐ пе́рвое чꙋ́до ѿ і҆кѡ́ны твоеѧ̀, всемлⷭ҇тиваѧ мт҃и, прославлѧ́юще, похва́льными пѣ́сньми тебѣ̀ взыва́емъ:

Ра́дꙋйсѧ, ст҃ꙋ́ю і҆кѡ́нꙋ дарова́ти на́мъ и҆зво́лившаѧ: ра́дꙋйсѧ, покро́въ сво́й над̾ земле́ю на́шею просте́ршаѧ.

Ра́дꙋйсѧ, селѧни́нꙋ бл҃гочести́вомꙋ і҆кѡ́нꙋ твою̀ ꙗ҆ви́вшаѧ: ра́дꙋйсѧ, чꙋдотво́рнꙋю си́лꙋ є҆́й пода́вшаѧ.

Ра́дꙋйсѧ, і҆кѡ́ною твое́ю разсла́бленнаго ѿ ѻ҆дра̀ воздви́гшаѧ: ра́дꙋйсѧ, во бл҃ги́хъ прошє́нїѧ на̑ша и҆сполнѧ́ющаѧ.

Ра́дꙋйсѧ, мт҃и гдⷭ҇а си́лъ, разсла́бленныхъ возставлѧ́ющаѧ: ра́дꙋйсѧ, болѣ́зней многолѣ́тныхъ и҆сцѣле́нїе ско́рое и҆ соверше́нное.

Ра́дꙋйсѧ, прошє́нїѧ молѧ́щихсѧ тебѣ̀ къ бг҃ꙋ возносѧ́щаѧ: ра́дꙋйсѧ, крⷭ҇тъ жи́зни на́шеѧ нестѝ помога́ющаѧ.

Ра́дꙋйсѧ, всегѡ̀ мі́ра бжⷭ҇твенное ᲂу҆тѣше́нїе: ра́дꙋйсѧ, наде́ждо на́шегѡ сп҃се́нїѧ.

Ра́дꙋйсѧ, влⷣчце, і҆кѡ́ною твое́ю любо́вь и҆ млⷭ҇ть на́мъ ꙗ҆влѧ́ющаѧ.

Конда́къ г҃

Си́лою бж҃їею, чрез̾ ст҃ы̑ѧ і҆кѡ̑ны твоѧ̑ ꙗ҆влѧ́емою, сп҃са́ти зе́млю на́шꙋ не престае́ши, всебл҃га́ѧ влⷣчце, та́кѡ и҆ въ ве́си ко́лочской, вели̑каѧ и҆ мнѡ́гаѧ чꙋдеса̀ показа́ла є҆сѝ ѿ многоцѣле́бнагѡ ѻ҆́браза твоегѡ̀, тѣ́мже всѝ съ вѣ́рою молѧ́щїисѧ пред̾ ни́мъ въ ра́дости взыва́ютъ: А҆ллилꙋ́їа.

І҆́косъ г҃

И҆мы́й ве́лїю ре́вность по бз҃ѣ и҆ позна́въ въ ꙗ҆вле́нїи ѻ҆́браза твоегѡ̀, бг҃омт҃и, млⷭ҇рдїе твоѐ ко всѣ̑мъ сп҃се́нїѧ хотѧ́щымъ, кнѧ́зь можа́йскїй а҆ндре́й возжелѣ̀ ви́дѣти ст҃ꙋ́ю і҆кѡ́нꙋ во гра́дѣ кнѧже́нїѧ своегѡ̀. Тогда̀ по́йде лꙋка̀ съ і҆кѡ́ною и҆з̾ ко́лочи къ можа́йскꙋ, и҆ ве́сь гра́дъ и҆зы́де въ срѣ́тенїе ст҃ы́ни. И҆ бы́ша зна́мєнїѧ и҆ чꙋдеса̀ ѿ і҆кѡ́ны твоеѧ̀, пречⷭ҇таѧ, и҆ всѝ лю́дїе покланѧ́хꙋсѧ є҆́й и҆ со слеза́ми взыва́хꙋ тебѣ̀:

Ра́дꙋйсѧ, почита́нїѧ ст҃ы́хъ і҆кѡ́нъ ѡ҆сщ҃е́нїе: ра́дꙋйсѧ, вѣ́ры хрⷭ҇тїа́нскїѧ ᲂу҆твержде́нїе.

Ра́дꙋйсѧ, ве́сь ко́лочскꙋю чꙋдесы̀ вели́кими просла́вившаѧ: ра́дꙋйсѧ, страны̀ на́шеѧ сокро́вище дꙋхо́вное.

Ра́дꙋйсѧ, ѻ҆́бразъ тво́й ст҃ы́й въ землѝ моско́вской чꙋде́снѡ ꙗ҆ви́вшаѧ: ра́дꙋйсѧ, ꙗ҆́кѡ і҆кѡ́на твоѧ̀ въ наслѣ́дїе сп҃си́тельное землѝ можа́йской дарова́сѧ.

Ра́дꙋйсѧ, ꙗ҆вле́нїемъ і҆кѡ́ны твоеѧ̀ гра́дъ можа́йскъ возвесели́вшаѧ: ра́дꙋйсѧ, млⷭ҇тивымъ ли́комъ твои́мъ сердца̀ жи́телей є҆гѡ̀ возра́довавшаѧ.

Ра́дꙋйсѧ, чꙋдесы̀ ше́ствїе і҆кѡ́ны твоеѧ̀ по землѝ на́шей зна́меновавшаѧ: ра́дꙋйсѧ, ве́снꙋ сп҃се́нїѧ мнѡ́гимъ лю́демъ возвѣсти́вшаѧ.

Ра́дꙋйсѧ, пред̾ сн҃омъ твои́мъ дерзнове́ннаѧ на́ша предста́тельнице: ра́дꙋйсѧ, неисчерпа́емый и҆сто́чниче млⷭ҇тей и҆ щедро́тъ.

Ра́дꙋйсѧ, влⷣчце, і҆кѡ́ною твое́ю любо́вь и҆ млⷭ҇ть на́мъ ꙗ҆влѧ́ющаѧ.

Конда́къ д҃

Бꙋ́рею скорбе́й и҆ и҆скꙋше́нїй ѡ҆держи́ми, жи́телїе гра́да москвы̀ дꙋше́внꙋю ра́дость и҆ поко́й ѡ҆брѣта́ютъ, молѧ́щесѧ пред̾ чꙋдотво́рною і҆кѡ́ною твое́ю, бг҃омт҃и. И҆́бо принесѐ лꙋка̀ ст҃ꙋ́ю і҆кѡ́нꙋ въ первопресто́льный гра́дъ, и҆дѣ́же ст҃и́тель фѡ́тїй со є҆пⷭ҇кѡпы и҆ всѣ́мъ собо́ромъ срѣто́ша ю҆̀ съ ра́достїю ве́лїею. Мно́жество же наро́да къ ди́внѣй і҆кѡ́нѣ съ вѣ́рою прихожда́хꙋ и҆ и҆сцѣле́нїе недꙋ́гѡвъ прїима́хꙋ, бл҃года́рственнѡ воспѣва́юще ко гдⷭ҇ꙋ, и҆́стинномꙋ врачꙋ̀ дꙋ́шъ и҆ тѣле́съ: А҆ллилꙋ́їа.

І҆́косъ д҃

Слы́шавше ѡ҆ вели́кихъ чꙋдесѣ́хъ и҆ зна́менїихъ ѿ і҆кѡ́ны твоеѧ̀, влⷣчце, вѣ̑рнаѧ ча̑да цр҃кве притека́хꙋ къ цѣле́бномꙋ ѻ҆́бразꙋ твоемꙋ̀, прїе́млюще ѿ негѡ̀ да́ры млⷭ҇тей твои́хъ. И҆ хожда́ше лꙋка̀ ѿ гра́да во гра́дъ съ і҆кѡ́ною твое́ю, и҆ вездѣ̀ безчи́слєннаѧ и҆сцѣлє́нїѧ быва́хꙋ, и҆ всѝ лю́дїе даѧ́хꙋ ми́лостыню, зрѧ́ще бл҃года́ть, ѿ і҆кѡ́ны твоеѧ̀ и҆сточа́емꙋю, и҆ прославлѧ́хꙋ тѧ̀ си́це:

Ра́дꙋйсѧ, торжество̀ вѣ́ры правосла́вныѧ въ ше́ствїи твоеѧ̀ і҆кѡ́ны ꙗ҆ви́вшаѧ: ра́дꙋйсѧ, градѡ́въ и҆ ве́сей землѝ на́шеѧ покро́ве и҆ ѡ҆гражде́нїе.

Ра́дꙋйсѧ, первопресто́льный гра́дъ і҆кѡ́ною твое́ю посѣти́вшаѧ: ра́дꙋйсѧ, бл҃гослове́нїемъ твои́мъ є҆го̀ ѡ҆сѣни́вшаѧ.

Ра́дꙋйсѧ, ꙗ҆вле́нїемъ чꙋде́съ ѿ і҆кѡ́ны твоеѧ̀ жи́телей є҆гѡ̀ ѡ҆бра́довавшаѧ: ра́дꙋйсѧ, прише́ствїемъ і҆кѡ́ны твоеѧ̀ мнѡ́гїѧ бѣды̑ и҆ скѡ́рби ѿ вѣ́рныхъ ѿгна́вшаѧ.

Ра́дꙋйсѧ, ꙗ҆́кѡ пред̾ і҆кѡ́ною твое́ю лю́дїе правосла́внїи бл҃гоговѣ́йнѡ покланѧ́ютсѧ: ра́дꙋйсѧ, ꙗ҆́кѡ ди̑внаѧ зна́мєнїѧ то́ю соверша́ютсѧ.

Ра́дꙋйсѧ, въ ско́рбехъ и҆ печа́лехъ ѿра́дꙋ въ сердца̀ на̑ша и҆злива́ющаѧ: ра́дꙋйсѧ, застꙋ́пнице ᲂу҆се́рднаѧ, ѿ бг҃а на́мъ дарова́ннаѧ.

Ра́дꙋйсѧ, ꙗ҆́кѡ въ ви́димѣмъ ѻ҆́бразѣ твое́мъ неви́димѡ си́лꙋ бл҃года́ти ѡ҆брѣта́емъ: ра́дꙋйсѧ, все́й землѝ на́шей си́лꙋ всемогꙋ́щества хрⷭ҇то́ва возвѣща́ющаѧ.

Ра́дꙋйсѧ, влⷣчце, і҆кѡ́ною твое́ю любо́вь и҆ млⷭ҇ть на́мъ ꙗ҆влѧ́ющаѧ.

Конда́къ є҃

Бг҃оте́чною ѕвѣздо́ю возсїѧ̀ і҆кѡ́на твоѧ̀, влⷣчце, ѡ҆зарѧ́ющи сердца̀ рꙋ́сскихъ люде́й, мра́къ печа́лей и҆ мглꙋ̀ всѧ́ческихъ недꙋ̑гъ и҆ скорбе́й прогонѧ́ющаѧ и҆ на пꙋ́ть сп҃се́нїѧ наставлѧ́ющаѧ всѣ́хъ лю́бѧщихъ тѧ̀. Лꙋка́ же и҆мѣ́ѧ всеꙋсе́рдное жела́нїе ѻ҆́бразъ тво́й чꙋдотво́рный досто́йнѡ почти́ти, воздви́же цр҃ковь ка́меннꙋю во и҆́мѧ ᲂу҆спе́нїѧ твоегѡ̀ на мѣ́стѣ ꙗ҆вле́нїѧ ст҃ы́ѧ і҆кѡ́ны, да всѝ ви́дѣвшїи чꙋдеса̀ ѿ неѧ̀, мл҃твы въ цр҃кви то́й возно́сѧтъ, непреста́ннѡ воспѣва́юще бг҃ꙋ: А҆ллилꙋ́їа.

І҆́косъ є҃

Ви́дѣвше лю́дїе храни́телѧ і҆кѡ́ны твоеѧ̀ лꙋкꙋ̀ хвали́ма и҆ даѧ́ньми ᲂу҆бл҃жа́ема, ѻ҆ба́че страстьмѝ сребролю́бїѧ и҆ пїѧ́нства снѣда́ема, моли́шасѧ тебѣ̀, пречⷭ҇таѧ, да вразꙋми́ши и҆збра́нника своего̀. Ты́ же, всемлⷭ҇тиваѧ влⷣчце, сп҃стѝ хотѧ́щи є҆го̀ ѿ заблꙋжде́нїѧ, нападе́нїемъ лю́тагѡ ѕвѣ́рѧ наказа́ла є҆сѝ: лꙋка́ же возлежа̀ на ѻ҆дрѣ̀ сме́ртнѣмъ, и҆́скреннее покаѧ́нїе принесѐ, и҆ воста́въ со ѻ҆дра̀ болѣ́зни, пред̾ і҆кѡ́ною твое́ю съ вѣ́рою несꙋмнѣ́нною и҆ бл҃года́рнымъ се́рдцемъ вознесѐ тебѣ̀ похвалы̑ сїѧ̑:

Ра́дꙋйсѧ, рꙋ́кꙋ млⷭ҇рдїѧ погиба́ющымъ простира́ющаѧ: ра́дꙋйсѧ, на пꙋ́ть пра́вды заблꙋ́ждшихъ ѡ҆браща́ющаѧ.

Ра́дꙋйсѧ, борю́щихсѧ со страстьмѝ всегда́шнѧѧ помо́щнице: ра́дꙋйсѧ, ка́ющихсѧ грѣ́шникѡвъ пред̾ бг҃омъ крѣ́пкаѧ застꙋ́пнице.

Ра́дꙋйсѧ, сле́зномꙋ покаѧ́нїю па́дшихъ наꙋча́ющаѧ: ра́дꙋйсѧ, житїѐ на́ше до́брѣ ᲂу҆строѧ́ющаѧ.

Ра́дꙋйсѧ, ѡ҆ всѣ́хъ чтꙋ́щихъ ѻ҆́бразъ тво́й промышлѧ́ющаѧ: ра́дꙋйсѧ, молѧ́щымсѧ пред̾ ни́мъ сп҃се́нїе подаю́щаѧ.

Ра́дꙋйсѧ, бл҃голѣ́пный хра́мъ ᲂу҆спе́нїѧ твоегѡ̀ чꙋдотво́рною і҆кѡ́ною твое́ю ᲂу҆краси́вшаѧ: ра́дꙋйсѧ, мл҃твы вѣ́рныхъ млⷭ҇тивѡ въ не́мъ прїе́млющаѧ.

Ра́дꙋйсѧ, чꙋдесы̀ мно́гими є҆го̀ ѡ҆ст҃и́вшаѧ: ра́дꙋйсѧ, во хра́мѣ се́мъ красотꙋ̀ хра́ма нбⷭ҇нагѡ показа́вшаѧ.

Ра́дꙋйсѧ, влⷣчце, і҆кѡ́ною твое́ю любо́вь и҆ млⷭ҇ть на́мъ ꙗ҆влѧ́ющаѧ.

Конда́къ ѕ҃

Проповѣ́дникъ неизрече́ннагѡ млⷭ҇рдїѧ твоегѡ̀ ꙗ҆ви́сѧ раска́ѧвшїйсѧ лꙋка̀, и҆́же споспѣ́шествова и҆мѣ́нїемъ свои́мъ на мѣ́стѣ ѡ҆брѣ́тенїѧ і҆кѡ́ны монасты́рь во и҆́мѧ ᲂу҆спе́нїѧ твоегѡ̀ ᲂу҆стро́ити, въ не́мже постриже́сѧ са́мъ и҆ поживѐ во ᲂу҆миле́нїи и҆ слеза́хъ, до́ндеже преста́висѧ и҆ погребе́нъ въ не́мъ бы́сть. Ты́ же, всебл҃га́ѧ, под̾ кро́въ сво́й ст҃ы́й мно́гихъ и҆́нокѡвъ собрала̀ є҆сѝ, да во сла́вꙋ бж҃їю и҆ ра́ди сп҃се́нїѧ дꙋ́шъ свои́хъ трꙋжда́ютсѧ, неꙋста́ннѡ воспѣва́юще бг҃ꙋ: А҆ллилꙋ́їа.

І҆́косъ ѕ҃

Возсїѧ̀ ра́дость ве́лїѧ въ лю́дехъ, ꙗ҆́кѡ не то́кмѡ ѿ ѻ҆́браза твоегѡ̀, прест҃а́ѧ влⷣчце, бл҃года́тнїи да́ры и҆сцѣле́нїй подаю́тсѧ, но и҆ въ водны́хъ стрꙋѧ́хъ и҆сто́чника, близ̾ мѣ́ста ꙗ҆вле́нїѧ і҆кѡ́ны происте́кшагѡ, и҆з̾ѻби́льнѡ почерпа́ютъ бл҃года́тное врачева́нїе всѝ болѧ́щїи, стра́ждꙋщїи и҆ по́мощи тре́бꙋющїи, тѣ́мже серде́чною вѣ́рою прославлѧ́ютъ тѧ̀, нбⷭ҇нꙋю цѣли́тельницꙋ на́шꙋ, воспѣва́юще тебѣ̀ похвалы̑ сїѧ̑:

Ра́дꙋйсѧ, ѻ҆́бразомъ твои́мъ чꙋдотво́рнымъ стрꙋи̑ водны̑ѧ ѡ҆ст҃и́вшаѧ: ра́дꙋйсѧ, водо́ю и҆сто́чника твоегѡ̀ болѧ́щихъ возставлѧ́ющаѧ.

Ра́дꙋйсѧ, ѿ и҆сто́чника нетлѣ́нїѧ и҆ ра́дости дꙋ́шы жа́ждꙋщихъ напаѧ́ющаѧ: ра́дꙋйсѧ, дꙋхо́внꙋю жа́ждꙋ на́шꙋ ᲂу҆толѧ́ющаѧ.

Ра́дꙋйсѧ, ка́меню, во́дꙋ жи́зни и҆сточи́вый жа́ждꙋщымъ: ра́дꙋйсѧ, ꙗ҆́кѡ живоно́снꙋю си́лꙋ водны́й и҆сто́чникъ тво́й доны́нѣ сохранѧ́етъ.

Ра́дꙋйсѧ, цр҃кве правосла́вныѧ храни́тельнице: ра́дꙋйсѧ, премꙋ́драѧ и҆гꙋ́менїе всѣ́хъ ѻ҆би́телей правосла́вныхъ.

Ра́дꙋйсѧ, ѻ҆би́тели ко́лочскїѧ ра́досте и҆ покро́ве: ра́дꙋйсѧ, сїѧ́нїемъ і҆кѡ́ны твоеѧ̀ подвиза́ющихсѧ въ не́й просвѣти́вшаѧ.

Ра́дꙋйсѧ, ѻ҆би́телей ст҃ы́хъ и҆ хра́мѡвъ бл҃гослове́нїе и҆ ᲂу҆твержде́нїе: ра́дꙋйсѧ, и҆́нокѡвъ и҆ и҆́нокинь ко бл҃гоговѣ́нїю наста́внице.

Ра́дꙋйсѧ, влⷣчце, і҆кѡ́ною твое́ю любо́вь и҆ млⷭ҇ть на́мъ ꙗ҆влѧ́ющаѧ.

Конда́къ з҃

Хотѧ́щи рꙋсѝ ѿ врагѡ́въ разорѧ́емѣй млⷭ҇рдїе ꙗ҆ви́ти, бл҃гоизво́лила є҆сѝ, влⷣчце, дарова́ти во́инствꙋ рꙋ́сскомꙋ і҆кѡ́нꙋ твою̀ ко́лочскꙋю: тогда̀, ꙗ҆́коже лѣтопи́сецъ глаго́летъ, и҆зво́ли ца́рь і҆ѡа́ннъ взѧ́ти чꙋдотво́рнꙋю твою̀ і҆кѡ́нꙋ въ похо́дъ на по́лоцкъ, и҆ поведѐ во́ины своѧ̑ на врагѝ, и҆ побѣ́дꙋ ѡ҆держа̀. Сегѡ̀ ра́ди прославлѧ́юще тѧ̀, воспѣва́емъ сн҃ꙋ твоемꙋ̀ и҆ бг҃ꙋ на́шемꙋ побѣ́днꙋю пѣ́снь: А҆ллилꙋ́їа.

І҆́косъ з҃

Но́вое зна́менїе млⷭ҇ти твоеѧ̀ ꙗ҆ви́ла є҆сѝ, прест҃а́ѧ бцⷣе, во дни̑ наше́ствїѧ га́ллѡвъ и҆ съ ни́ми два́десѧте ꙗ҆зы̑къ на зе́млю на́шꙋ, є҆гда̀ наде́жда спасе́нїѧ ᲂу҆гасѐ, ꙗ҆́кѡ и҆ се́рдце рѡссі́и, гра́дъ москва̀ плѣне́нъ и҆ сожже́нъ бы́сть. Ты́ же, влⷣчце, ст҃ы́ми і҆кѡ́нами твои́ми, смоле́нскою, ко́лочскою и҆ и҆ны́ми мно́гими ᲂу҆крѣпи́ла є҆сѝ хрⷭ҇толюби́вое во́инство на́ше, та́же и҆ побѣ́дꙋ ди́внꙋю на врагѝ си̑льныѧ и҆ во бране́хъ и҆скꙋ̑сныѧ дарова́ла є҆сѝ, и҆ съ безче́стїемъ и҆̀хъ ѿ ѻ҆те́чества на́шегѡ ѿгна́ла є҆сѝ. Тѣ́мже хвалꙋ̀ и҆ бл҃годаре́нїе тебѣ̀ приносѧ́ще, взыва́емъ:

Ра́дꙋйсѧ, держа́вы рѡссі́йскїѧ бл҃года́тное ᲂу҆твержде́нїе: ра́дꙋйсѧ, врагѡ́въ є҆ѧ̀ гро́зное посрамле́нїе.

Ра́дꙋйсѧ, ѿ наше́ствїѧ и҆ноплеме́нныхъ ѻ҆те́чество на́ше спаса́ющаѧ: ра́дꙋйсѧ, во бране́хъ си́лꙋ дꙋ́ха во́инѡвъ рꙋ́сскихъ возвыша́ющаѧ.

Ра́дꙋйсѧ, бг҃олюби́выхъ во́инѡвъ вѣ́рнаѧ храни́тельнице: ра́дꙋйсѧ, бл҃га́ѧ и҆́хъ покрови́тельнице.

Ра́дꙋйсѧ, во́инѡвъ рꙋ́сскихъ на по́двигъ ра́тный ᲂу҆крѣплѧ́ющаѧ: ра́дꙋйсѧ, вѣне́цъ побѣ́ды и҆̀мъ сплета́ющаѧ.

Ра́дꙋйсѧ, всѣ́хъ за дрꙋ́ги своѧ̑ дꙋ́шꙋ положи́вшихъ ᲂу҆покое́нїе: ра́дꙋйсѧ, за вѣ́рꙋ и҆ ѻ҆те́чество на по́ли бра́ни ᲂу҆бїе́нныхъ прославле́нїе.

Ра́дꙋйсѧ, і҆кѡ̑ны твоѧ̑ чꙋдотвѡ́рныѧ, ꙗ҆́кѡ зна́мѧ побѣ́ды, наро́дꙋ на́шемꙋ дарова́вшаѧ: ра́дꙋйсѧ, непобѣди́маѧ воево́до вожде́й и҆ во́инѡвъ правосла́вныхъ.

Ра́дꙋйсѧ, влⷣчце, і҆кѡ́ною твое́ю любо́вь и҆ млⷭ҇ть на́мъ ꙗ҆влѧ́ющаѧ.

Конда́къ и҃

Стра́нное и҆ пресла́вное чꙋ́до зри́мъ ѡ҆ тебѣ̀, бг҃омт҃и, є҆гда̀ гꙋби́тельнаѧ ꙗ҆́зва на странꙋ̀ на́шꙋ на́йде и҆ мно́жество человѣ̑къ ᲂу҆мертвѝ, лю́дїе же гнѣ́въ бж҃їй ви́дѧще, со слеза́ми ко ст҃ѣ́й і҆кѡ́нѣ твое́й припа́дахꙋ, ꙗ҆́кѡ къ и҆сто́чникꙋ твоегѡ̀ млⷭ҇рдїѧ, и҆ и҆сцѣлѧ́хꙋсѧ. Сегѡ̀ ра́ди вѣ́рнїи въ землѝ можа́йской на всѧ́ко лѣ́то возно́сѧтъ моле́нїе те́плое въ па́мѧть сегѡ̀ ра́достнагѡ торжества̀ спасе́нїѧ мно́гихъ ѿ поги́бели, воспѣва́юще бг҃ꙋ бл҃года́рственнѡ: А҆ллилꙋ́їа.

І҆́косъ и҃

Ве́сь мі́ръ хрⷭ҇тїа́нскїй сла́витъ и҆́мѧ твоѐ, пребл҃гослове́ннаѧ мт҃и гдⷭ҇а, и҆ всѣ̑мъ вѣ̑рнымъ ᲂу҆тѣ́шительно є҆́сть взира́ти на ст҃ꙋ́ю і҆кѡ́нꙋ твою̀, на не́йже ви́димъ тѧ̀, на рꙋкꙋ̀ держа́щꙋю превѣ́чнаго млⷣнца, съ предстоѧ́щими ст҃и́телемъ нїкола́емъ и҆ прⷪ҇ро́комъ и҆лїе́ю. Всѧ́къ бо съ вѣ́рою къ не́й приходѧ́й въ болѣ́знехъ и҆сцѣле́нїе, въ ско́рбехъ ᲂу҆тѣше́нїе, въ бѣда́хъ вспоможе́нїе ско́рѡ прїе́млетъ, се́рдце же своѐ въ любвѝ бж҃їей ᲂу҆твержда́етъ, вопїѧ̀ къ тебѣ̀, ᲂу҆тѣ́шительницѣ и҆ помо́щницѣ на́шей, такова̑ѧ:

Ра́дꙋйсѧ, кꙋ́пнѡ со ст҃и́телемъ нїкола́емъ и҆ прⷪ҇ро́комъ и҆лїе́ю зе́млю на́шꙋ ѡ҆гражда́ющаѧ: ра́дꙋйсѧ, въ годи́нꙋ бѣ́дствїй на по́мощь на́мъ ᲂу҆скорѧ́ющаѧ.

Ра́дꙋйсѧ, во дни̑ мо́ра непрело́жнаѧ на́ша наде́ждо и҆ сп҃си́тельнице: ра́дꙋйсѧ, ѿ смертоно́сныѧ ꙗ҆́звы млⷭ҇тиваѧ и҆зба́вительнице.

Ра́дꙋйсѧ, прекраще́нїемъ ꙗ҆́звы бл҃года́тнꙋю си́лꙋ і҆кѡ́ны твоеѧ̀ возвѣсти́вшаѧ: ра́дꙋйсѧ, застꙋпле́нїемъ твои́мъ првⷣный гнѣ́въ бж҃їй ᲂу҆толи́вшаѧ.

Ра́дꙋйсѧ, ꙗ҆́звъ дꙋше́вныхъ и҆ тѣле́сныхъ цѣли́тельнице: ра́дꙋйсѧ, всѣ́хъ дх҃о́вныхъ дарѡ́въ ще́драѧ пода́тельнице.

Ра́дꙋйсѧ, дꙋ́шы и҆ сердца̀ на̑ша любо́вїю бжⷭ҇твенною воспламенѧ́ющаѧ: ра́дꙋйсѧ, самоѿверже́нїю и҆ послꙋша́нїю на́съ наꙋча́ющаѧ.

Ра́дꙋйсѧ, хлѣ́бомъ жи́зни на́съ пита́ющаѧ: ра́дꙋйсѧ, ꙗ҆́кѡ тобо́ю сла́достей дꙋхо́вныхъ и҆сполнѧ́емсѧ.

Ра́дꙋйсѧ, влⷣчце, і҆кѡ́ною твое́ю любо́вь и҆ млⷭ҇ть на́мъ ꙗ҆влѧ́ющаѧ.

Конда́къ ѳ҃

Всю̀ странꙋ̀ рѡссі́йскꙋю попꙋще́нїемъ бж҃їимъ потрѧсѐ бꙋ́рѧ гоне́нїй на цр҃ковь хрⷭ҇то́вꙋ, за грѣхѝ людскі̑ѧ и҆ беззакѡ́нїѧ: безꙋ́мнїи бг҃обо́рцы ст҃ы̑ни на́шѧ разори́ша, хра́мы бж҃їѧ ѡ҆скверни́ша и҆ кро́вь хрⷭ҇тїа́нскꙋю проли́ша. Тогда̀ ѻ҆би́тель ко́лочскаѧ разрꙋше́на бы́сть ѿ неи́стовыхъ гони́телей, і҆кѡ́на же твоѧ̀, бг҃омт҃и, ѿѧ́та и҆ сокры́та бѣ̀ ѿ вѣ́рныхъ. Но не возмо́же вра́гъ ро́да человѣ́ческагѡ ᲂу҆гаси́ти вѣ́рꙋ въ покро́въ тво́й люде́й правосла́вныхъ, въ сокрꙋше́нїи серде́цъ взыва́ющихъ бг҃ꙋ: А҆ллилꙋ́їа.

І҆́косъ ѳ҃

Вѣті̑и многовѣща́ннїи не возмо́гꙋтъ просла́вити по достоѧ́нїю ди́вное вои́стиннꙋ промышле́нїе твоѐ, влⷣчце: цр҃ковь рꙋ́сскаѧ, ѿ плѣне́нїѧ вла́стїю безбо́жною, свобожда́етсѧ, разорє́нныѧ ѻ҆би́тєли и҆ хра́мы возсозида́ютсѧ, и҆ красота̀ цр҃ко́внаѧ ѡ҆бновлѧ́етсѧ. Та́кѡ и҆ ко́лочскаѧ ѻ҆би́тель, наси́лїемъ безбо́жныхъ ѿто́рженнаѧ, застꙋпле́нїемъ твои́мъ, бг҃омт҃и, па́ки возвраще́на бы́сть лю́демъ правосла̑внымъ, въ не́йже ны́нѣ со́бранныхъ тобо́ю се́стръ во хрⷭ҇тѣ̀ просвѣща́еши и҆ на пꙋ́ть сп҃се́нїѧ наставлѧ́еши, подвиза́ющи и҆̀хъ воспѣва́ти тебѣ̀ съ любо́вїю такова̑ѧ:

Ра́дꙋйсѧ, цр҃ковь хрⷭ҇то́вꙋ во дни̑ гоне́нїй ѡ҆мофо́ромъ твои́мъ покры́вшаѧ: ра́дꙋйсѧ, страда́льцємъ за вѣ́рꙋ бл҃года́тное ᲂу҆тѣше́нїе посыла́вшаѧ.

Ра́дꙋйсѧ, и҆знемога́ющихъ под̾ тѧ́жестїю крⷭ҇та̀ ᲂу҆крѣпле́нїе: ра́дꙋйсѧ, и҆́стины распина́емыѧ въ землѝ на́шей сохране́нїе.

Ра́дꙋйсѧ, въ заточе́нїи пра́вды ра́ди сꙋ́щихъ посѣща́ющаѧ: ра́дꙋйсѧ, врагѡ́въ вѣ́ры правосла́вныѧ посрамлѧ́ющаѧ.

Ра́дꙋйсѧ, гони̑мымъ за пра́вдꙋ црⷭ҇твїе нбⷭ҇ное ᲂу҆готовлѧ́ющаѧ: ра́дꙋйсѧ, собо́ромъ новомч҃нкѡвъ и҆ и҆сповѣ́дникѡвъ сꙋгꙋ́бѡ воспѣва́емаѧ.

Ра́дꙋйсѧ, ѻ҆би́тель твою̀, ѿ безбо́жныхъ разоре́ннꙋю, возста́вившаѧ: ра́дꙋйсѧ, бл҃года́ть твою̀ возста́вленнѣй ѻ҆би́тели низпосла́вшаѧ.

Ра́дꙋйсѧ, мно́гихъ дѣ́въ и҆ же́нъ ко слꙋже́нїю бг҃ꙋ въ не́й собира́ющаѧ: ра́дꙋйсѧ, ко сп҃се́нїю и҆̀хъ до́брѣ наставлѧ́ющаѧ.

Ра́дꙋйсѧ, влⷣчце, і҆кѡ́ною твое́ю любо́вь и҆ млⷭ҇ть на́мъ ꙗ҆влѧ́ющаѧ.

Конда́къ і҃

Сп҃стѝ хотѧ́щи мнѡ́гїѧ лю́ди ѿ находѧ́щихъ скорбе́й и҆ болѣ́зней и҆ вѣ́рꙋ и҆́хъ ᲂу҆тверди́ти во всеси́льное застꙋпле́нїе твоѐ, прест҃а́ѧ дв҃о, ꙗ҆ви́ла є҆сѝ ди́вное зна́менїе, є҆гда̀ спи́сокъ ѻ҆́браза твоегѡ̀ ко́лочскагѡ торже́ственнѡ принесе́нъ бы́сть во ѻ҆би́тель твою̀. Ны́нѣ же, всемлⷭ҇тиваѧ мт҃и, ѻ҆́бразъ тво́й то́читъ и҆сцѣлє́нїѧ мнѡ́гимъ немощствꙋ́ющымъ, прибѣга́ющымъ къ тебѣ̀, да всѝ ѡ҆бл҃года́тствованнїи тобо́ю согла́снѡ воспѣва́ютъ бг҃ꙋ пѣ́снь: А҆ллилꙋ́їа.

І҆́косъ і҃

Стѣна̀ є҆сѝ, влⷣчце, и҆ прибѣ́жище сестра́мъ ѻ҆би́тели ко́лочскїѧ, бл҃гослови́ла бо є҆сѝ ѻ҆би́тель ст҃ы́нею свое́ю, ѡ҆гражда́ющи и҆́нокинь ѿ вра́жїихъ ко́зней, ѿ бѣ́дъ, скорбе́й и҆ напа́стей, тѣ́мже те́плитсѧ лампа́да неꙋгаси́маѧ пред̾ чꙋдотво́рнымъ ѻ҆́бразомъ твои́мъ, и҆ да́же въ нощѝ не ᲂу҆молка́ютъ воздыха̑нїѧ мл҃твєннаѧ и҆ похвалы̑ сїѧ̑:

Ра́дꙋйсѧ, ѻ҆би́тели ко́лочскїѧ неꙋсы́пнаѧ блюсти́тельнице: ра́дꙋйсѧ, і҆кѡ́нъ свои́хъ чꙋдотво́рныхъ пода́тельнице.

Ра́дꙋйсѧ, ст҃ꙋ́ю і҆кѡ́нꙋ твою̀ дарова́ти сестра́мъ ѻ҆би́тели и҆зво́лившаѧ: ра́дꙋйсѧ, вни́ти съ мꙋ́дрыми дѣ́вами въ црⷭ҇твїе нбⷭ҇ное и҆̀мъ помога́ющаѧ.

Ра́дꙋйсѧ, ѻ҆би́тель твою̀ і҆кѡ́ною, а҆́ки да́ромъ драгоцѣ́ннымъ, ѡ҆богати́вшаѧ: ра́дꙋйсѧ, сердца̀ и҆́нокинь ѻ҆би́тели прише́ствїемъ і҆кѡ́ны возвесели́вшаѧ.

Ра́дꙋйсѧ, чꙋдесы̀ ѿ і҆кѡ́ны сеѧ̀ ѻ҆би́тель ко́лочскꙋю просла́вльшаѧ: ра́дꙋйсѧ, ми́рное житїѐ се́стръ въ не́й ᲂу҆строѧ́ющаѧ.

Ра́дꙋйсѧ, но́вꙋю млⷭ҇ть и҆ бл҃года́ть і҆кѡ́ною твое́ю показа́вшаѧ: ра́дꙋйсѧ, покланѧ́ющымсѧ і҆кѡ́нѣ твое́й ра́дость дꙋхо́внꙋю подаю́щаѧ.

Ра́дꙋйсѧ, приходѧ́щихъ къ не́й съ вѣ́рою хрⷭ҇тїа́нъ покрови́тельнице: ра́дꙋйсѧ, ꙗ҆́кѡ мл҃твою пред̾ не́ю прїе́млемъ бл҃года́тное ᲂу҆тѣше́нїе.

Ра́дꙋйсѧ, влⷣчце, і҆кѡ́ною твое́ю любо́вь и҆ млⷭ҇ть на́мъ ꙗ҆влѧ́ющаѧ.

Конда́къ а҃і

Пѣ́нїе хвале́бное прино́симъ тѝ съ любо́вїю, бцⷣе, вели́кое бо мно́жество чꙋде́съ ꙗ҆влѧ́еши: сѐ, непра́зднаѧ раба̀ бж҃їѧ, спастѝ хотѧ́щи ѡ҆бме́ршаго во чре́вѣ младе́нца своего̀, вознесѐ сле́знꙋю мл҃твꙋ тебѣ̀, бл҃года́тнаѧ, во ѻ҆би́тели ко́лочской, и҆ пома́за себѐ є҆ле́емъ ѿ чꙋдотво́рныѧ і҆кѡ́ны: и҆ ѡ҆брѣ́тесѧ ча́до жи́во. Є҆гда́ же роди́сѧ, нареко́ша ю҆̀ а҆настасі́а, си́рѣчь воскрⷭ҇нїе, бл҃года́рными ᲂу҆сты̀ воспѣва́юще пѣ́снь: А҆ллилꙋ́їа.

І҆́косъ а҃і

Свѣтопрїе́мнꙋю свѣщꙋ̀, во тьмѣ̀ сꙋ́щымъ ꙗ҆́вльшꙋюсѧ, зри́мъ ст҃ꙋ́ю і҆кѡ́нꙋ твою̀, влⷣчце всемлⷭ҇тиваѧ, сїѧ́ бо сердца̀ на̑ша любо́вїю согрѣва́етъ, бг҃охрани́мꙋю странꙋ̀ на́шꙋ бл҃года́тїю ѡ҆зарѧ́етъ и҆ ѻ҆би́тель ко́лочскꙋю ѡ҆свѣща́етъ. Тѣ́мже мо́лимъ тѧ̀: до послѣ́днихъ дне́й мі́ра ѻ҆би́тель сїю̀ сохранѝ, подвиза́ющымсѧ въ не́й сестра́мъ во хрⷭ҇тѣ̀ пꙋ́ть вѣ́рный къ нб҃сѝ ᲂу҆кажѝ, мꙋ́дрость и҆ терпѣ́нїе и҆̀мъ да́рꙋй, да сподо́бѧтсѧ до сконча́нїѧ дне́й свои́хъ въ ра́дости воспѣва́ти тебѣ̀ си́це:

Ра́дꙋйсѧ, ѻ҆би́тели ко́лочскїѧ бл҃года́тное сокро́вище: ра́дꙋйсѧ, и҆́нокинь є҆ѧ̀ незри́маѧ воспита́тельнице.

Ра́дꙋйсѧ, нощны́хъ моле́нїй се́стръ є҆ѧ̀ ско́рое ᲂу҆слы́шанїе: ра́дꙋйсѧ, и҆́нокинѧмъ ѻ҆би́тели наде́ждо вѣ́чнагѡ сп҃се́нїѧ.

Ра́дꙋйсѧ, всѣ̑мъ подвиза́ющымсѧ всемо́щнаѧ покрови́тельнице: ра́дꙋйсѧ, бл҃гоче́стнѡ живꙋ́щихъ дѣ́въ и҆ же́нъ ᲂу҆се́рднаѧ застꙋ́пнице.

Ра́дꙋйсѧ, ѡ҆бме́ршаго во чре́вѣ младе́нца ѡ҆животвори́вшаѧ: ра́дꙋйсѧ, пред̾ і҆кѡ́ною твое́ю женꙋ̀ разсла́бленнꙋю и҆сцѣли́вшаѧ.

Ра́дꙋйсѧ, непло́дныхъ сꙋпрꙋ́гѡвъ чадоро́дїемъ ᲂу҆тѣша́ющаѧ: ра́дꙋйсѧ, молѧ́щихсѧ тебѣ̀ свѣ́томъ бл҃года́ти ѡ҆зарѧ́ющаѧ.

Ра́дꙋйсѧ, притека́ющихъ къ і҆кѡ́нѣ твое́й бл҃гословлѧ́ющаѧ: ра́дꙋйсѧ, просѧ́щымъ щедрѡ́ты твоѧ̑ и҆злива́ющаѧ.

Ра́дꙋйсѧ, влⷣчце, і҆кѡ́ною твое́ю любо́вь и҆ млⷭ҇ть на́мъ ꙗ҆влѧ́ющаѧ.

Конда́къ в҃і

Бл҃года́ти неистощи́мыѧ зна́менїе ꙗ҆ви́ла є҆сѝ прите́кшымъ во ѻ҆би́тель ко́лочскꙋю безча̑днымъ сꙋпрꙋ́гѡмъ, мл҃твꙋ тебѣ̀ возносѧ́щымъ и҆ бцⷣꙋ и҆ мт҃рь свѣ́та тѧ̀ въ пѣ́снехъ велича́ющымъ: не ѡ҆ста́вила є҆сѝ и҆̀хъ тщє́тны, но дарова́ла є҆сѝ и҆̀мъ младе́нца, є҆го́же нареко́ша и҆́менемъ ѳео́дѡръ, си́рѣчь бж҃їй да́ръ. Мы́ же ви́дѧще такова̑ѧ чꙋдеса̀, тобо́ю и҆злива́ємаѧ, и҆з̾ глꙋбины̀ се́рдца воспѣва́емъ бл҃года́рственнꙋю пѣ́снь: А҆ллилꙋ́їа.

І҆́косъ в҃і

Пою́ще твоѧ̑ дрє́внїѧ и҆ нѡ́выѧ млⷭ҇ти, восхвалѧ́емъ і҆кѡ́нꙋ твою̀ ко́лочскꙋю, бг҃омт҃и, къ не́йже въ па́мѧть ꙗ҆вле́нїѧ є҆ѧ̀ лю́дїе ѿ всѣ́хъ концє́въ землѝ притека́ютъ, ча́юще ѿ тебє̀ скорбе́й и҆збавле́нїѧ, недꙋ́гѡвъ и҆сцѣле́нїѧ, ра́дости и҆сполне́нїѧ и҆ бла̑гъ вѣ́чныхъ сподобле́нїѧ. Ты́ же, всемлⷭ҇тиваѧ, бл҃годѣѧ̑нїѧ неисчє́тнаѧ і҆кѡ́ною твое́ю да́рꙋеши, да всѝ со́браннїи во ѻ҆би́тели на ко́лочи въ ра́дости воспѣва́ютъ тебѣ̀:

Ра́дꙋйсѧ, бл҃года́ть ве́лїю і҆кѡ́намъ твои̑мъ дарова́вшаѧ: ра́дꙋйсѧ, всю̀ вселе́ннꙋю свѣ́томъ ли́ка твоегѡ̀ ѡ҆зари́вшаѧ.

Ра́дꙋйсѧ, ѻ҆те́чества на́шегѡ свѣ́тъ невече́рнїй: ра́дꙋйсѧ, стѣно̀ нерꙋши́маѧ, ѿ всѧ́кихъ бѣ́дъ на́съ ѡ҆гражда́ющаѧ.

Ра́дꙋйсѧ, і҆кѡ́ною твое́ю мра́къ грѣхо́вный ѿгонѧ́ющаѧ: ра́дꙋйсѧ, на по́двигъ дꙋхо́вный неви́димѡ на́съ ᲂу҆крѣплѧ́ющаѧ.

Ра́дꙋйсѧ, съ сн҃омъ твои́мъ бл҃года́рнѡ покланѧ́емаѧ: ра́дꙋйсѧ, нбⷭ҇нымъ во́инствомъ неви́димѡ славосло́вимаѧ.

Ра́дꙋйсѧ, ѻ҆би́телей и҆́ноческихъ ди́внаѧ попечи́тельнице: ра́дꙋйсѧ, мѵ́ро бл҃гоꙋха́нное, всемꙋ̀ мі́рꙋ и҆злїѧ́нное.

Ра́дꙋйсѧ, ѡ҆бра́дованнаѧ, во ᲂу҆спе́нїи твое́мъ на́съ не ѡ҆ставлѧ́ющаѧ: ра́дꙋйсѧ, бл҃га́ѧ врата́рнице, двє́ри ра̑йскїѧ вѣ̑рнымъ ѿверза́ющаѧ.

Ра́дꙋйсѧ, влⷣчце, і҆кѡ́ною твое́ю любо́вь и҆ млⷭ҇ть на́мъ ꙗ҆влѧ́ющаѧ.

Конда́къ г҃і

ѽ всепѣ́таѧ мт҃и, ро́ждшаѧ всѣ́хъ ст҃ы́хъ ст҃ѣ́йшее сло́во! Прїимѝ моле́бное пѣ́нїе на́ше, пред̾ чꙋдотво́рною і҆кѡ́ною твое́ю съ вѣ́рою и҆ бл҃гоговѣ́нїемъ возноси́мое, и҆зба́ви на́съ ѿ всѧ́кихъ бѣ́дъ, скорбе́й и҆ напа́стей, недꙋ́ги на́шѧ и҆сцѣлѝ, всѧ́кꙋ ѕло́бꙋ и҆ враждꙋ̀ ѿженѝ ѿ на́съ и҆ бꙋ́дꙋщїѧ и҆змѝ мꙋ́ки ѡ҆ тебѣ̀ вопїю́щихъ: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃лъ мно́жество и҆ человѣ̑къ собо́ри сла́вѧтъ тебѐ, нб҃сѐ и҆ землѝ цр҃и́цꙋ, ѡ҆ ꙗ҆вле́нїи і҆кѡ́ны твоеѧ̀ ко́лочскїѧ, въ землѝ моско́вской дре́вле просїѧ́вшїѧ, ꙗ҆́кѡ сокро́вище неисчерпа́емое, ꙗ҆вле́нное длѧ вѣ́чнагѡ сп҃се́нїѧ на́шегѡ. Тѣ́мже мы̀, всѐ ᲂу҆пова́нїе на тѧ̀ возложи́вше и҆ на ст҃ы́й ѻ҆́бразъ тво́й взира́юще, во ᲂу҆миле́нїи серде́цъ взыва́емъ та́кѡ:

Ра́дꙋйсѧ, странꙋ̀ рѡссі́йскꙋю въ жре́бїй и҆ достоѧ́нїе себѣ̀ и҆збра́вшаѧ: ра́дꙋйсѧ, і҆кѡ̑ны твоѧ̑ чꙋдотвѡ́рныѧ, ꙗ҆́кѡ ѕвѣ́зды, въ не́й ᲂу҆мно́жившаѧ.

Ра́дꙋйсѧ, дв҃о прест҃а́ѧ, ѻ҆́бразъ тво́й чꙋде́снѡ на́мъ ꙗ҆ви́вшаѧ: ра́дꙋйсѧ, зе́млю моско́вскꙋю свѣ́томъ є҆гѡ̀ ѡ҆зари́вшаѧ.

Ра́дꙋйсѧ, землѝ можа́йской і҆кѡ́нꙋ твою̀ въ зало́гъ бл҃говоле́нїѧ дарова́вшаѧ: ра́дꙋйсѧ, чꙋдесы̀ твои́ми вѣ́рꙋ въ не́й ᲂу҆тверди́вшаѧ.

Ра́дꙋйсѧ, ѻ҆би́тели ко́лочскїѧ ди́внаѧ строи́тельнице: ра́дꙋйсѧ, вѣ́рнаѧ є҆ѧ̀ защи́тнице.

Ра́дꙋйсѧ, болѣ̑зни дꙋшє́вныѧ и҆ тѣлє́сныѧ і҆кѡ́ною твое́ю ско́рѡ врачꙋ́ющаѧ: ра́дꙋйсѧ, во всѧ́кихъ бѣда́хъ и҆ нꙋ́ждахъ ско́раѧ на́ша помо́щнице.

Ра́дꙋйсѧ, лѣ́ствице, ѿ землѝ къ нб҃сѝ возводѧ́щаѧ: ра́дꙋйсѧ, ра́дости вѣ́чныѧ на́съ сподоблѧ́ющаѧ.

Ра́дꙋйсѧ, влⷣчце, і҆кѡ́ною твое́ю любо́вь и҆ млⷭ҇ть на́мъ ꙗ҆влѧ́ющаѧ.

Конда́къ а҃

Взбра́нной воево́дѣ влⷣчцѣ на́шей бцⷣѣ бл҃года́рственное прино́симъ пѣ́нїе ѡ҆ ꙗ҆вле́нїи ди́вныѧ і҆кѡ́ны є҆ѧ̀ ко́лочскїѧ, зе́млю можа́йскꙋю просвѣти́вшїѧ и҆ всѧ̑ вѣ̑рнаѧ ча̑да цр҃кве возвесели́вшїѧ. Ты́ же, ꙗ҆́кѡ всемлⷭ҇тиваѧ застꙋ́пница и҆ всебл҃га́ѧ помо́щница, всѣ́хъ вѣ́рою притека́ющихъ къ тебѣ̀ ѿ всѧ́кихъ бѣ́дъ и҆ напа́стей защитѝ, да зове́мъ тѝ:

Ра́дꙋйсѧ, влⷣчце, і҆кѡ́ною твое́ю любо́вь и҆ млⷭ҇ть на́мъ ꙗ҆влѧ́ющаѧ.

Моли́твы

Ѽ прест҃а́ѧ влⷣчце бцⷣе, цр҃и́це нб҃сѐ и҆ землѝ, вы́шшаѧ а҆́гг҃лъ и҆ а҆рха̑гг҃лъ, и҆ всеѧ̀ тва́ри чтⷭ҇нѣ́йшаѧ, чⷭ҇таѧ дв҃о мр҃і́е, мі́рꙋ бл҃га́ѧ помо́щнице, всѣ́хъ хрⷭ҇тїа́нъ поможе́нїе и҆ ᲂу҆твержде́нїе, и҆ всѣ̑мъ во всѧ́кихъ нꙋ́ждахъ и҆збавле́нїе! При́зри ны́нѣ, ѽ всемлⷭ҇тиваѧ гпⷭ҇жѐ, на рабы̑ твоѧ̑, ᲂу҆миле́нною дꙋше́ю и҆ сокрꙋше́ннымъ се́рдцемъ тебѣ̀ молѧ́щыѧсѧ, со слеза́ми къ тебѣ̀ припа́дающыѧ и҆ пречⷭ҇томꙋ и҆ цѣльбоно́сномꙋ ѻ҆́бразꙋ твоемꙋ̀ покланѧ́ющыѧсѧ, твоеѧ̀ же по́мощи и҆ застꙋпле́нїѧ въ ско́рбехъ и҆ напа́стехъ свои́хъ просѧ́щыѧ. Бꙋ́ди за на́съ хода́таица къ сн҃ꙋ твоемꙋ̀, хрⷭ҇тꙋ̀ бг҃ꙋ на́шемꙋ: мы́ бо грѣ́шнїи не и҆́мамы и҆ны́ѧ помо́щницы ра́звѣ тебє̀, влⷣчце. Ты̀ є҆сѝ на́ша наде́жда и҆ ᲂу҆пова́нїе, ты̀ є҆сѝ застꙋ́пница и҆ предста́тельница на́ша, ты̀ є҆сѝ ѡ҆би́димыхъ защище́нїе, печа́льныхъ ᲂу҆тѣше́нїе, скорбѧ́щихъ ра́дованїе, си́рыхъ прибѣ́жище, вдѡ́въ храни́тельница, дѣ́въ сла́ва, пла́чꙋщихъ весе́лїе, больны́хъ посѣще́нїе, немощны́хъ и҆сцѣле́нїе, грѣ́шныхъ сп҃се́нїе. Сегѡ̀ ра́ди, ѽ бг҃омт҃и, къ тебѣ̀ прибѣга́емъ, и҆ на тво́й ст҃ы́й ѻ҆́бразъ взира́юще, съ любо́вїю покланѧ́емсѧ тебѣ̀ съ предвѣ́чнымъ, на рꙋкꙋ̀ твоє́ю держи́мымъ млⷣнцемъ, гдⷭ҇емъ на́шимъ і҆и҃сомъ хрⷭ҇то́мъ, и҆ моле́бное пѣ́нїе прино́симъ, вопїю́ще: поми́лꙋй ны̀, мт҃и бж҃їѧ, и҆ прошє́нїѧ на̑ша и҆спо́лни во бл҃го, всѧ̑ бо возмѡ́жна сꙋ́ть хода́тайствꙋ твоемꙋ̀ къ сн҃ꙋ твоемꙋ̀ и҆ бг҃ꙋ на́шемꙋ, є҆мꙋ́же подоба́етъ всѧ́каѧ сла́ва и҆ че́сть, поклоне́нїе и҆ бл҃годаре́нїе, со безнача́льнымъ є҆гѡ̀ ѻ҆ц҃е́мъ, и҆ со присносꙋ́щнымъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Ѽ пребл҃гослове́ннаѧ гпⷭ҇жѐ влⷣчце бцⷣе, премꙋ́драѧ нбⷭ҇наѧ и҆гꙋ́менїе и҆ пꙋтеводи́тельнице ко сп҃се́нїю и҆́нокинь ѻ҆би́тели, и҆́менемъ ᲂу҆спе́нїѧ твоегѡ̀ нарече́нныѧ, ю҆́же и҆збра́ла є҆сѝ въ достоѧ́нїе своѐ на мѣ́стѣ се́мъ, твои́мъ бл҃гослове́нїемъ ѡ҆сѣне́нномъ! Оу҆молѝ сн҃а твоего̀ и҆ бг҃а на́шего сп҃стѝ ѿ поги́бели всѣ́хъ подвиза́ющихсѧ во ѻ҆би́тели на́шей, и҆ ꙗ҆́коже дре́вле на мѣ́стѣ се́мъ мнѡ́гїѧ млⷭ҇ти своѧ̑ ꙗ҆ви́ла є҆сѝ, та́кѡ и҆ ны́нѣ прострѝ покро́въ тво́й над̾ на́ми, недосто́йными ча́ды твои́ми, грѣ́шнїи бо є҆смы̀, но рабѝ твоѝ до вѣ́ка. Тѣ́мже мо́лимъ тѧ̀: ѡ҆зарѝ дꙋ́шы на́шѧ свѣ́томъ бжⷭ҇твенныѧ бл҃года́ти, покры́й на́съ ѿ всѧ́кагѡ ѕла̀, сохранѝ ѿ всѧ́кїѧ напа́сти, и҆ клеветы̀ человѣ́ческїѧ, и҆ ѿ навѣ́та вра́жїѧ: болѧ́щымъ здра́вїе да́рꙋй, дꙋ́шы на́шѧ ѿ плѣ́на страсте́й свободѝ, ᲂу҆твердѝ въ ми́рѣ и҆ согла́сїи житїѐ на́ше, да́рꙋй на́мъ кончи́нꙋ хрⷭ҇тїа́нскꙋю, безболѣ́зненнꙋ, непосты́днꙋ, ми́рнꙋ, бжⷭ҇твенныхъ та̑инъ прича́стнꙋ, и҆ сама̀ на́съ въ то́й ча́съ сп҃сѝ ѿ го́рькихъ мыта́рствъ, и҆ сподо́би въ де́нь сꙋда̀ ста́ти ѡ҆деснꙋ́ю сн҃а твоегѡ̀, хрⷭ҇та̀ бг҃а на́шегѡ. При́зри на ѻ҆би́тель сїю̀ и҆ сохранѝ ю҆̀ цѣ́лꙋ и҆ неврежде́нꙋ, да возвыша́етсѧ и҆ сла́витсѧ въ не́й и҆́мѧ прест҃ы́ѧ трⷪ҇цы и҆ твоѐ, бг҃омт҃и, пребл҃гослове́нное и҆́мѧ, во вѣ́ки вѣкѡ́въ. А҆ми́нь.