Православный календарь
Размер шрифта:

Ака́ѳістъ

А҆ка́ѳїстъ ст҃ѣ́й равноапⷭ҇льнѣй вели́цѣй кн҃ги́нѣ ѻ҆́льгѣ.

Равноап. Ольги, вел. кнг. Киевской, во св. крещении Елены (969) 24 июля 2026

Конда́къ а҃

Первоизбра́ннѣй ѿ всегѡ̀ рѡссі́йскагѡ ро́да, сла́внѣй и҆ равноапⷭ҇льнѣй ᲂу҆го́дницѣ бж҃їей ѻ҆́льгѣ соста́вимъ похвалꙋ̀, ꙗ҆́кѡ зарѣ̀ во тьмѣ̀ і҆дѡлопоклоне́нїѧ свѣ́томъ вѣ́ры возсїѧ́вшей и҆ пꙋ́ть ко хрⷭ҇тꙋ̀ всѣ̑мъ рѡссїѧ́нѡмъ показа́вшей. ты́ же, ꙗ҆́кѡ и҆мꙋ́щаѧ дерзнове́нїе къ просла́вльшемꙋ тѧ̀ гдⷭ҇ꙋ, свобожда́й на́съ ѿ всѧ́кихъ бѣ́дъ мл҃твами твои́ми, да зове́мъ тѝ:

Ра́дꙋйсѧ, ст҃а́ѧ равноапⷭ҇льнаѧ кн҃ги́не ѻ҆́льго бг҃омꙋ́драѧ.

І҆́косъ а҃

А҆́гг҃лѡвъ и҆ человѣ́кѡвъ творе́цъ, времена̀ и҆ лѣ̑та во свое́й вла́сти положи́вый и҆ сꙋдьбы̑ ца́рствъ и҆ наро́дѡвъ по свое́й во́ли ᲂу҆правлѧ́ѧй, є҆гда̀ восхотѣ̀ ро́дъ рѡссі́йскїй ст҃ы́мъ кр҃ще́нїемъ просвѣти́ти, тогда̀, ви́дѧ бл҃го́е и҆зволе́нїе се́рдца твоегѡ̀, призва́ тѧ пе́рвѣе въ позна́нїе себѐ, да бꙋ́деши всѣ̑мъ рѡссїѧ́нѡмъ ѡ҆́бразъ и҆ наста́вница въ хрⷭ҇тїа́нстѣй вѣ́рѣ. сегѡ̀ ра́ди восхвалѧ́емъ тѧ̀ си́це:

Ра́дꙋйсѧ, рѡссі́йскагѡ небесѐ ᲂу҆́треннѧѧ ѕвѣздо̀, ѿ первозва́ннагѡ а҆пⷭ҇ла на гора́хъ кі́евскихъ предвозвѣще́ннаѧ: ра́дꙋйсѧ, зарѐ, во мра́цѣ невѣ́денїѧ свѣ́тлѡ возѡблиста́вшаѧ.

Ра́дꙋйсѧ, до́браѧ лозо̀ вїногра́да хрⷭ҇то́ва, ѿ ди́вїѧ ꙗ҆зы́ческагѡ ко́рене прозѧ́бшаѧ: Ра́дꙋйсѧ, пречꙋ́днаѧ лѣ́торасле и҆з̾ неѧ́же ве́лїе правовѣ́рїѧ дре́во на землѝ на́шей возрастѐ.

Ра́дꙋйсѧ, первоꙋчи́тельнице и҆ просвѣти́тельнице на́ша: ра́дꙋйсѧ, ꙗ҆́кѡ тобо́ю позна́хомъ покланѧ́тисѧ въ трⷪ҇цѣ творцꙋ̀.

Ра́дꙋйсѧ, ꙗ҆́кѡ тебѐ ра́ди прест҃о́е и҆́мѧ гдⷭ҇не ѿ всѣ́хъ рѡссїѧ́нъ прославлѧ́етсѧ: ра́дꙋйсѧ, ꙗ҆́кѡ и҆ твоѐ пресла́вное и҆́мѧ вкꙋ́пѣ съ равноапⷭ҇льнымъ влади́мїромъ во всѣ́хъ предѣ́лѣхъ мі́ра восхвалѧ́етсѧ.

Ра́дꙋйсѧ, страны̀ на́шеѧ рѡссі́йскїѧ дꙋхо́вное сокро́вище: ра́дꙋйсѧ, всеѧ̀ хрⷭ҇то́вы цр҃кве пресла́вное ᲂу҆краше́нїе.

Ра́дꙋйсѧ, градѡ́въ кі́ева и҆ пско́ва и҆зрѧ́днаѧ добро́то: ра́дꙋйсѧ, лю́демъ на́шимъ на врагѝ бл҃га́ѧ помо́щнице.

Ра́дꙋйсѧ, ст҃а́ѧ равноапⷭ҇льнаѧ кн҃ги́не ѻ҆́льго бг҃омꙋ́драѧ.

Конда́къ в҃

Ви́дѧще тѧ̀, ст҃а́ѧ ѻ҆́льго, ꙗ҆́кѡ крі́нъ въ те́рнїи прозѧ́бшїй: ты́ бо а҆́ще и҆ въ ро́дѣ ꙗ҆зы́честѣмъ рожде́на є҆сѝ, ѻ҆ба́че зако́нъ бж҃їй въ се́рдцѣ твое́мъ напи́санъ всегда̀ и҆мѣ́ла є҆сѝ, и҆ цѣломꙋ́дрїе твоѐ ꙗ҆́кѡ зѣ́ницꙋ ѻ҆́ка блюла̀ є҆сѝ: благода́рнѡ пое́мъ ди́вномꙋ во ст҃ы́хъ свои́хъ бг҃ꙋ: А҆ллилꙋ́їа.

І҆́косъ в҃

Ра́зꙋмомъ твои́мъ всѧ̑ до́брѣ вѣ́дѧщи, позна́ла є҆сѝ, бг҃омꙋ́драѧ ѻ҆́льго, ꙗ҆́кѡ і҆́дѡли, рꙋка́ми человѣ́ческими сотворе́ннїи, не сꙋ́ть бо́зи. тѣ́мже, ѿве́ргши ты́ѧ, потща́ласѧ є҆сѝ позна́ти бг҃а и҆́стиннаго. сегѡ̀ ра́ди, похвалѧ́юще сицево́е твоѐ бл҃горазꙋ́мїе, вопїе́мъ тѝ си́це:

Ра́дꙋйсѧ, до́браѧ же́но, пе́рвѣе всѣ́хъ заблꙋжде́нїе рѡссїѧ́нъ позна́вшаѧ: ра́дꙋйсѧ, тщетꙋ̀ і҆дѡлопоклоне́нїѧ разꙋмѣ́вшаѧ.

Ра́дꙋйсѧ, и҆́стиннагѡ бг҃опозна́нїѧ и҆ пра́выѧ вѣ́ры ᲂу҆се́рднѡ и҆ска́вшаѧ: ра́дꙋйсѧ, є҆щѐ не вѣ́дꙋщи и҆́стиннагѡ бг҃а, ꙗ҆́кѡже корни́лїй со́тникъ, до́брыми дѣ́лы томꙋ̀ ᲂу҆гожда́вшаѧ.

Ра́дꙋйсѧ, пре́жде разꙋмѣ́нїѧ зако́на бж҃їѧ, по зако́нꙋ со́вѣсти пра́веднѡ жи́вшаѧ: ра́дꙋйсѧ, пре́жде прїѧ́тїѧ хрⷭ҇тїа́нскїѧ вѣ́ры дѣла̀ хрїстїа́нѡмъ подоба̑ющаѧ твори́вшаѧ.

Ра́дꙋйсѧ, держа́вꙋ твою̀ ѿ наше́ствїѧ сꙋпоста̑тъ мꙋ́жественнѡ защити́вшаѧ: ра́дꙋйсѧ, въ подчине́нныхъ тѝ лю́дехъ сꙋды̀ пра́вєдныѧ твори́вшаѧ.

Ра́дꙋйсѧ, премꙋ́дростїю ѿ бг҃а ѡ҆даре́ннаѧ: ра́дꙋйсѧ, црⷭ҇твенною сла́вою на землѝ и҆ на нб҃сѝ почте́ннаѧ.

Ра́дꙋйсѧ, нетлѣ́нїемъ ст҃ы́хъ моще́й твои́хъ ѿ бг҃а просла́вленнаѧ: ра́дꙋйсѧ, тѣ́ми мнѡ́гаѧ и҆сцѣлє́нїѧ всѧ́кимъ недꙋ́гѡмъ подава́ющаѧ.

Ра́дꙋйсѧ, ст҃а́ѧ равноапⷭ҇льнаѧ кн҃ги́не ѻ҆́льго бг҃омꙋ́драѧ.

Конда́къ г҃

Си́лою бл҃года́ти бж҃їей дви́жима, потща́ласѧ є҆сѝ, бг҃омꙋ́драѧ ѻ҆́льго, дости́гнꙋти царьгра́да и҆дѣ́же зрѧ́щи красотꙋ̀ цр҃ко́внагѡ бл҃голѣ́пїѧ, и҆ послꙋ́шающи ᲂу҆че́нїѧ слове́съ бж҃е́ственныхъ, распалѧ́ласѧ є҆сѝ всѣ́мъ се́рдцемъ твои́мъ въ любо́вь хрⷭ҇то́вꙋ, бл҃года́рственнѡ вопїю́щи є҆мꙋ̀: А҆ллилꙋ́їа.

І҆́косъ г҃

И҆мꙋ́щи се́рдце ꙗ҆́кѡ до́брꙋю зе́млю, ᲂу҆до́бь воспрїѧ́ла є҆сѝ, ѻ҆́льго, сѣ́мѧ ст҃ы́ѧ вѣ́ры, позна́вши хрⷭ҇та̀ бг҃а и҆́стиннаго. тѣ́мже и҆ креще́нїе ст҃о́е прїѧ́ла є҆сѝ ѿ рꙋкꙋ̀ патрїа́рха царьгра́да, и҆́же и҆ предречѐ тѝ, ꙗ҆́кѡ ѿны́нѣ блажи́ти тѧ̀ и҆́мꙋтъ рѡссі́йстїи сы́нове. и҆спо́лнити ᲂу҆́бѡ хотѧ́ще прорече́нїе сїѐ, взыва́емъ тѝ си́це:

Ра́дꙋйсѧ, тмꙋ̀ і҆дѡлослꙋже́нїѧ ѡ҆ста́вльшаѧ: ра́дꙋйсѧ, свѣ́тъ бг҃опозна́нїѧ взыска́вшаѧ.

Ра́дꙋйсѧ, безконе́чныѧ па́гꙋбы вѣ́рою и҆збѣжа́вшаѧ: ра́дꙋйсѧ, жи́знь вѣ́чнꙋю во хрⷭ҇тѣ̀ стѧжа́вшаѧ.

Ра́дꙋйсѧ, въ кꙋпѣ́ли ст҃а́гѡ креще́нїѧ ѿ скве́рны грѣхо́вныѧ ѡ҆мы́вшаѧсѧ: ра́дꙋйсѧ, бл҃года́тїю ст҃а́гѡ дх҃а дꙋхо́внѡ роди́вшаѧсѧ.

Ра́дꙋйсѧ, разꙋ́мнаѧ го́рлице, ѿ когте́й дꙋшепа́гꙋбнагѡ вра́на и҆злетѣ́вшаѧ: ра́дꙋйсѧ, под̾ крилѣ̀ ѻ҆рла̀ небе́снагѡ прилетѣ́вшаѧ.

Ра́дꙋйсѧ, мно́жество дꙋ́шъ кр҃ще́нїемъ съ собо́ю ко хрⷭ҇тꙋ̀ приве́дшаѧ: ра́дꙋйсѧ, сегѡ̀ ра́ди сꙋгꙋ́бое воздаѧ́нїе ѿ бг҃а полꙋчи́вшаѧ.

Ра́дꙋйсѧ, съ вѣ́рою несꙋмне́нною приходѧ́щихъ свѣ́томъ ѿ честны́хъ твои́хъ моще́й ѡ҆сїѧва́ющаѧ: ра́дꙋйсѧ, дꙋша́мъ и҆ тѣлесє́мъ тѣ́хъ, ꙗ҆̀же на по́льзꙋ, подава́ющаѧ.

Ра́дꙋйсѧ, ст҃а́ѧ равноапⷭ҇льнаѧ кн҃ги́не ѻ҆́льго бг҃омꙋ́драѧ.

Конда́къ д҃

Ка́кѡ не диви́мсѧ бл҃горазꙋ́мїю твоемꙋ̀, ѻ҆́льго пребл҃же́ннаѧ, и҆́бо ты̀ предложе́нїе царѧ̀ є҆́ллинѡвъ ѡ҆ бра́цѣ съ ни́мъ разꙋ́мнѡ ѿве́ргла є҆сѝ, ре́кши томꙋ̀: не бра́ка ра́ди прїидо́хъ сѣ́мѡ, и҆ не соца́рствованїѧ ра́ди съ тобо́ю, но да ᲂу҆невѣ́щꙋсѧ кр҃ще́нїемъ безсме́ртномꙋ женихꙋ̀ хрⷭ҇тꙋ̀ бг҃ꙋ: є҆го́же па́че всегѡ̀ возлюбѝ дꙋша̀ моѧ̀, и҆ є҆мꙋ́же ѿны́нѣ во вѣ́ки не преста́нꙋ воспѣва́ти: А҆ллилꙋ́їа.

І҆́косъ д҃

Слы́шавши ѿ крⷭ҇ти́вшаго тѧ̀ патрїа́рха напꙋ́тственное сло́во ѡ҆ чистотѣ̀, постѣ̀, моли́твѣ и҆ ѡ҆ всѣ́хъ добродѣ́телехъ, хрїстїа́нѡмъ подоба́ющихъ, слага́ла є҆сѝ сїѧ̑ въ се́рдцы твое́мъ, дѣ́лы всѧ̑ та̑ и҆сполнѧ́ти ѡ҆бѣщава́ѧсѧ. тѣ́мже ᲂу҆́бѡ по до́лгꙋ воспѣва́емъ тѝ си́це:

Ра́дꙋйсѧ, ᲂу҆се́рднаѧ слы́шательнице слове́съ бж҃е́ственныхъ: ра́дꙋйсѧ, ре́вностнаѧ и҆сполни́тельнице зако́на хрⷭ҇тїа́нскагѡ.

Ра́дꙋйсѧ, ни́вꙋ се́рдца твоегѡ̀ ѡ҆чи́стившаѧ ѿ те́рнїѧ дꙋшевре́дныхъ страсте́й: ра́дꙋйсѧ, слеза́ми покаѧ́нїѧ ѡ҆роси́вшаѧ ю҆̀.

Ра́дꙋйсѧ, ꙗ҆́кѡ сѣ́мѧ сло́ва бж҃їѧ въ се́рдцы твое́мъ, ꙗ҆́кѡ на землѝ до́брѣй, ᲂу҆корени́сѧ: ра́дꙋйсѧ, ꙗ҆́кѡ сѣ́мѧ сїѐ прозѧбѐ и҆ стори́чный пло́дъ бл҃ги́хъ дѣ́лъ принесѐ.

Ра́дꙋйсѧ, вдо́вственнꙋю твою̀ чистотꙋ̀ непоро́чнѡ сохрани́вшаѧ: ра́дꙋйсѧ, воздержа́нїемъ и҆ мл҃твою бг҃ꙋ ᲂу҆годи́вшаѧ.

Ра́дꙋйсѧ, млⷭ҇тынею творца̀ ᲂу҆ми́лостивившаѧ: ра́дꙋйсѧ, ни́щыѧ и҆ ᲂу҆бѡ́гїѧ потре́бами снабди́вшаѧ.

Ра́дꙋйсѧ, сы́нꙋ своемꙋ̀ кнѧ́зю свѧтосла́вꙋ, непослꙋ́шливꙋ сꙋ́щꙋ ма́тери свое́й, кончи́нꙋ ѕлꙋ́ю предре́кшаѧ: ра́дꙋйсѧ, просвѣще́нїе землѝ рѡссі́йскїѧ свѣ́томъ хрⷭ҇то́ва ᲂу҆че́нїѧ прови́дѣвшаѧ.

Ра́дꙋйсѧ, ст҃а́ѧ равноапⷭ҇льнаѧ кн҃ги́не ѻ҆́льго бг҃омꙋ́драѧ.

Конда́къ є҃

Бг҃отка́нною ѡ҆де́ждою ст҃а́гѡ креще́нїѧ ѡ҆бле́кшисѧ, и҆ нетлѣ́нною пи́щею пречⷭ҇тагѡ тѣ́ла и҆ кро́ве хрⷭ҇то́вы дꙋхо́внѡ ᲂу҆крѣ́пльшисѧ, ѻ҆́льго пребл҃же́ннаѧ, не ᲂу҆боѧ́ласѧ є҆сѝ потещѝ къ невѣ̑рнымъ соѻте́чественникѡмъ твои̑мъ, пре́дкѡмъ на́шымъ, проповѣ́дати и҆̀мъ є҆ди́наго и҆́стиннаго бг҃а, є҆мꙋ́же ны́нѣ всѧ̑ рѡссі́ѧ, ꙗ҆́кѡ є҆ди́нѣми ᲂу҆сты̀, воспѣва́етъ: А҆ллилꙋ́їа.

І҆́косъ є҃

Ви́дѣвши, ст҃а́ѧ ѻ҆́льго, всѧ̑ лю́ди землѝ рѡссі́йскїѧ во тмѣ̀ і҆дѡлослꙋже́нїѧ погрꙋжє́нныѧ, ᲂу҆се́рднѡ потща́ласѧ є҆сѝ просвѣти́ти ты́ѧ свѣ́томъ хрⷭ҇то́вы вѣ́ры и҆ сотвори́ти ѧ҆̀ сы́ны днѐ и҆ наслѣ́дники црⷭ҇твїѧ нбⷭ҇нагѡ. помина́юще ᲂу҆́бѡ сицево́е твоѐ попече́нїе ѡ҆ ни́хъ, бл҃года́рственнѡ зове́мъ тѝ:

Ра́дꙋйсѧ, премꙋ́драѧ власти́тельнице наро́да рѡссі́йскагѡ: ра́дꙋйсѧ, до́браѧ наста́внице ввѣ́реннагѡ тѝ ста́да.

Ра́дꙋйсѧ, пе́рвѣй хрїстїа́нстѣй цари́цѣ є҆ле́нѣ въ ре́вности бж҃е́ственнѣй подража́вшаѧ: ра́дꙋйсѧ, и҆ и҆́мѧ тоѧ̀ во ст҃ѣ́мъ креще́нїи прїѧ́вшаѧ.

Ра́дꙋйсѧ, чⷭ҇тны́й крⷭ҇тъ хрⷭ҇то́въ и҆ ст҃ы̑ѧ і҆кѡ́ны и҆з̾ царьгра́да во гра́дъ кі́евъ прине́сшаѧ: ра́дꙋйсѧ, і҆ерє́и и҆ кли́рїки съ собо́ю въ рѡссі́ю приве́дшаѧ.

Ра́дꙋйсѧ, мꙋ́дрыми твои́ми глаго́лы поꙋча́вшаѧ лю́ди ѡ҆ста́вити тмꙋ̀ ꙗ҆зы́ческагѡ нече́стїѧ: ра́дꙋйсѧ, ᲂу҆вѣща́вшаѧ и҆̀хъ воспрїѧ́ти свѣ́тъ хрїстїа́нскагѡ бл҃гоче́стїѧ.

Ра́дꙋйсѧ, мнѡ́гїѧ рѡссїѧ́ны свѣ́томъ вѣ́ры хрⷭ҇то́вы просвѣти́вшаѧ: ра́дꙋйсѧ, нача́ло просвѣще́нїѧ всеѧ̀ землѝ рѡссі́йскїѧ положи́вшаѧ.

Ра́дꙋйсѧ, гра̑ды рѡссі̑йскїѧ проповѣ́данїемъ хрⷭ҇то́ва ᲂу҆че́нїѧ ѡ҆гласи́вшаѧ: ра́дꙋйсѧ, пе́рваѧ ѿ землѝ рѡссі́йскїѧ ли́кꙋ ст҃ы́хъ причте́ннаѧ.

Ра́дꙋйсѧ, ст҃а́ѧ равноапⷭ҇льнаѧ кн҃ги́не ѻ҆́льго бг҃омꙋ́драѧ.

Конда́къ ѕ҃

Проповѣ́дникѡмъ дх҃онѡ́снымъ а҆пⷭ҇лѡмъ подража́вши, ѻ҆́льго бг҃омꙋ́драѧ, ѡ҆бтекла̀ є҆сѝ гра́ды и҆ вє́си держа́вы твоеѧ̀, приводѧ́щи, є҆ли́кѡ мо́щно бѣ̀, лю́ди къ вѣ́рѣ хрⷭ҇то́вѣй и҆ наꙋча́ющи и҆̀хъ воспѣва́ти є҆ди́номꙋ въ трⷪ҇цѣ сла́вимомꙋ бг҃ꙋ: А҆ллилꙋ́їа.

І҆́косъ ѕ҃

Оу҆твержда́ѧ въ держа́вѣ твое́й нача́токъ вѣ́ры хрⷭ҇тїа́нскїѧ, создала̀ є҆сѝ хра́мы бж҃їи во гра́дѣ кі́евѣ и҆ въ странѣ̀ рожде́нїѧ твоегѡ̀, при рѣцѣ̀ вели́цѣй ᲂу҆ гра́да пско́ва. и҆ та́кѡ нача́ша рѡссїѧ́не прославлѧ́ти повсю́дꙋ хрⷭ҇та̀ бг҃а на́шего, тебѣ́ же, просвѣти́тельницѣ свое́й, похва̑льнаѧ воспѣва́ти:

Ра́дꙋйсѧ, ꙗ҆́кѡ ѿ чи́стагѡ и҆сто́чника ст҃ы́ѧ собо́рныѧ и҆ а҆пⷭ҇льскїѧ цр҃кве чи́стое ᲂу҆че́нїе прїѧ́ла є҆сѝ: ра́дꙋйсѧ, ꙗ҆́кѡ тѣ́мъ на́съ наꙋчи́ла є҆сѝ позна́ти є҆ди́наго и҆́стиннаго бг҃а.

Ра́дꙋйсѧ, і҆́дѡльскихъ тре́бищъ и҆ кꙋмі́рѡвъ потреби́тельнице: ра́дꙋйсѧ, ст҃ы́хъ бж҃їихъ хра́мѡвъ созида́тельнице.

Ра́дꙋйсѧ, ꙗ҆́кѡ же и҆ первозва́нный а҆пⷭ҇лъ, съ про́повѣдїю є҆ѵⷢ҇лїа зе́млю рꙋ́сскꙋю ѡ҆бходи́вшаѧ: ра́дꙋйсѧ, вели́комꙋ новꙋгра́дꙋ и҆ прѡ́чимъ рѡссі̑йскимъ градѡ́мъ хрⷭ҇то́во въ мі́ръ прише́ствїе бл҃говѣсти́вшаѧ.

Ра́дꙋйсѧ, на разли́чныхъ мѣ́стѣхъ про́повѣди твоеѧ̀ честны̑ѧ кресты̀ водрꙋзи́вшаѧ: ра́дꙋйсѧ, ꙗ҆́кѡ ѿ тѣ́хъ мнѡ́гаѧ зна́мєнїѧ и҆ чꙋдеса̀, ᲂу҆вѣре́нїѧ ра́ди невѣ́рныхъ, си́лою бж҃їею содѣва́хꙋсѧ.

Ра́дꙋйсѧ, ꙗ҆́кѡ тобо́ю всебл҃гі́й гдⷭ҇ь сыновѡ́мъ рѡссі̑йскимъ позна́нїе своѐ ꙗ҆ви́лъ є҆́сть: ра́дꙋйсѧ, ꙗ҆́кѡ чрез̾ ни́хъ и҆ прѡ́чїѧ мнѡ́гїѧ наро́ды свѣ́томъ вѣ́ры просвѣти́лъ є҆́сть.

Ра́дꙋйсѧ, ꙗ҆́кѡ ѿ ко́рене твоегѡ̀ честна́гѡ гдⷭ҇ь ст҃а́го равноапⷭ҇льнаго кн҃зѧ влади́мїра показа́лъ на́мъ є҆́сть: ра́дꙋйсѧ, ꙗ҆́кѡ ѡ҆́бразомъ житїѧ̀ твоегѡ̀ ст҃ы́й кн҃зь влади́мїръ подви́гсѧ прїѧ́ти хрїстїа́нскꙋю вѣ́рꙋ.

Ра́дꙋйсѧ, ст҃а́ѧ равноапⷭ҇льнаѧ кн҃ги́не ѻ҆́льго бг҃омꙋ́драѧ.

Конда́къ з҃

Хотѧ̀ и҆зба́вити сы́на твоего̀ свѧтосла́ва ѿ па́гꙋбы вѣ́чныѧ, прилѣ́жнѡ ᲂу҆вѣщева́ла є҆сѝ є҆го̀ ѡ҆ста́вити почита́нїе і҆́дѡлѡвъ и҆ вѣ́ровати въ бг҃а и҆́стиннаго. но то́й не внѧ́тъ ма́тернемꙋ наказа́нїю твоемꙋ̀ и҆ не восхотѣ̀ нече́стїе своѐ премѣни́ти на бл҃гоче́стїе. тѣ́мже, ꙗ҆́кѡ невѣ́рный, ѿчꙋжди́сѧ жи́зни вѣ́чныѧ и҆ не сподо́бисѧ съ тобо́ю въ го́рнѣмъ црⷭ҇твїи воспѣва́ти: А҆ллилꙋ́їа.

І҆́косъ з҃

Но́вое зна́менїе бл҃говоле́нїѧ своегѡ̀ ꙗ҆вѝ тебѣ̀ гдⷭ҇ь, є҆гда̀, во ѡ҆́бразъ прест҃ы́ѧ трⷪ҇цы, трѝ пресвѣ̑тлыѧ лꙋча̀ съ нб҃есѐ ѡ҆блиста̀ на мѣ́стѣ дꙋбра́внѣ, и҆́хже не то́чїю є҆ди́на ты̀ зрѣ́ла є҆сѝ, но и҆ всѝ сꙋ́щїи та́мѡ лю́дїе ви́дѣша, и҆ вкꙋ́пѣ съ тобо́ю просла́виша трїеди́наго бг҃а. мы́ же, вѣ́дꙋще сбытїѐ прорече́нїѧ твоегѡ̀ ѡ҆ созда́нїи на мѣ́стѣ ѻ҆́номъ хра́ма и҆ гра́да, ᲂу҆блажа́емъ тѧ̀ си́це:

Ра́дꙋйсѧ, вели́каѧ бж҃їѧ ᲂу҆го́днице: ра́дꙋйсѧ, да́ра прⷪ҇ро́чествїѧ ѿ негѡ̀ сподо́бльшаѧсѧ.

Ра́дꙋйсѧ, трисїѧ́ннагѡ нбⷭ҇нагѡ свѣ́та зри́тельнице: ра́дꙋйсѧ, всебл҃гі́ѧ во́ли бж҃їей ѡ҆ просвѣще́нїи наро́да рꙋ́сскагѡ пе́рваѧ и҆сполни́тельнице.

Ра́дꙋйсѧ, гра́да пско́ва нача́льнаѧ ѡ҆снова́тельнице: ра́дꙋйсѧ, всеѧ̀ рѡссі́йскїѧ держа́вы застꙋ́пнице и҆ покрови́тельнице.

Ра́дꙋйсѧ, ꙗ҆́кѡ и҆зволе́нїемъ бж҃їимъ держа́ва рѡссі́йскаѧ ны́нѣ ѿ мо́рѧ до мо́рѧ распространи́сѧ: ра́дꙋйсѧ, ꙗ҆́кѡ всѧ̑ гра́ды и҆ вє́си є҆ѧ̀ мно́жествомъ хра́мѡвъ бж҃їихъ ᲂу҆краси́шасѧ.

Ра́дꙋйсѧ, ꙗ҆́кѡ въ хра́мѣхъ си́хъ ст҃и́тели и҆ і҆ерє́и безкро́внꙋю же́ртвꙋ ѡ҆ лю́дехъ бг҃ꙋ прино́сѧтъ: ра́дꙋйсѧ, ꙗ҆́кѡ со́нмы и҆́ночествꙋющихъ по всемꙋ̀ лицꙋ̀ землѝ рѡссі́йскїѧ денноно́щнѡ хвалꙋ̀ ст҃ѣ́й трⷪ҇цѣ воспѣва́ютъ.

Ра́дꙋйсѧ, ꙗ҆́кѡ ѡ҆бита́телїе гра́да кі́ева тѧ̀ превозно́сѧтъ и҆ ᲂу҆блажа́ютъ: ра́дꙋйсѧ, ꙗ҆́кѡ и҆ всѝ правосла́внїи рѡссїѧ́не съ лѣ́тъ дре́внихъ тѧ̀ почита́ютъ и҆ прославлѧ́ютъ.

Ра́дꙋйсѧ, ст҃а́ѧ равноапⷭ҇льнаѧ кн҃ги́не ѻ҆́льго бг҃омꙋ́драѧ.

Конда́къ и҃

Стра́нствїѧ земна́го тече́нїе скончава́ѧ, те́плѣ гдⷭ҇а моли́ла є҆сѝ, ѻ҆́льго бл҃же́ннаѧ, да по преставле́нїи твое́мъ не ѡ҆ста́витъ ѻ҆́нъ землѝ рѡссі́йскїѧ во тмѣ̀ невѣ́дѣнїѧ пребыва́ти, но да просвѣти́тъ ю҆̀ свѣ́томъ ст҃ы́ѧ вѣ́ры, и҆ всѧ̑ сы́ны рѡссі̑йскїѧ да наꙋчи́тъ воспѣва́ти є҆мꙋ̀: А҆ллилꙋ́їа.

І҆́косъ и҃

Всѧ̀ ѡ҆б̾ѧ́та бы́вши бл҃года́тїю бж҃е́ственною, достохва́льнаѧ ѻ҆́льго, мы́сленными ѻ҆чесы̀ зрѣ́ла є҆сѝ просвѣще́нїе всегѡ̀ наро́да твоегѡ̀ и҆ проро́чески предрекла̀ є҆сѝ, ꙗ҆́кѡ мно́зи вели́цїи ᲂу҆го́дницы бж҃їи, ꙗ҆́кѡ ѕвѣзды̑ свѣ̑тлыѧ, въ землѝ рѡссі́йстѣй возсїѧ́ютъ, є҆́же ᲂу҆жѐ и҆ сбы́стсѧ и҆зволе́нїемъ и҆ бл҃года́тїю всемогꙋ́щагѡ бг҃а. сегѡ̀ ра́ди по до́лгꙋ воспѣва́емъ тѝ си́це:

Ра́дꙋйсѧ, дꙋхо́внаѧ на́ша ма́ти, и҆спроси́вшаѧ ᲂу҆ бг҃а просвѣще́нїе пра́отцємъ на́шымъ: ра́дꙋйсѧ, ꙗ҆́кѡ всебл҃гі́й гдⷭ҇ь, зрѧ̀ добро́тꙋ дꙋшѝ твоеѧ̀, тебє̀ ра́ди всѧ̑ лю́ди рꙋ́сскїѧ возлюбѝ.

Ра́дꙋйсѧ, ꙗ҆́кѡ тѧ̀ ѡ҆брѣ́те хрⷭ҇то́съ досто́инъ сосꙋ́дъ, чрез̾ него́же нача̀ и҆злива́ти бл҃года́ть свою̀ землѝ рѡссі́йстѣй: ра́дꙋйсѧ, ꙗ҆́кѡ ты̀ пред̾ꙋгото́вала є҆сѝ лю́ди твоѧ̑ ко прїѧ́тїю вѣ́ры и҆ бл҃года́ти хрⷭ҇то́вы.

Ра́дꙋйсѧ, ꙗ҆́кѡ прозорли́вѡ предзрѣ́ла є҆сѝ вели́чїе и҆ сла́вꙋ держа́вы твоеѧ̀: ра́дꙋйсѧ, ꙗ҆́кѡ весели́ласѧ є҆сѝ ѡ҆ предви́дѣнномъ тобо́ю бл҃гоче́стїи сынѡ́въ рѡссі́йскихъ.

Ра́дꙋйсѧ, ꙗ҆́кѡ, по прорече́нїю твоемꙋ̀, мно́зи ст҃і́и ѿ ро́да на́шегѡ возсїѧ́ша: ра́дꙋйсѧ, ꙗ҆́кѡ и҆ ѿ пле́мене твоегѡ̀ мно́зи кнѧ́зи рѡссі́йстїи бг҃ꙋ бл҃гоꙋгоди́ша и҆ вѣнцы̀ сла́вы полꙋчи́ша.

Ра́дꙋйсѧ, ꙗ҆́кѡ и҆ до ны́нѣ въ наро́дѣ рꙋ́сскомъ блюде́тсѧ вѣ́ра и҆ бл҃гоче́стїе: ра́дꙋйсѧ, ꙗ҆́кѡ не ѡ҆скꙋдѣ́ша въ не́мъ подви́жницы бл҃гоꙋгожда́ющїи гдⷭ҇еви и҆сполне́нїемъ ст҃ы́хъ є҆гѡ̀ за́повѣдей.

Ра́дꙋйсѧ, мл҃твами твои́ми въ ско́рбехъ и҆ напа́стехъ на́съ застꙋпа́ющаѧ: ра́дꙋйсѧ, во ѡ҆бстоѧ́нїихъ ѕлы́хъ ѻ҆те́чество на́ше сохранѧ́ющаѧ и҆ ѿ врагѡ́въ и҆збавлѧ́ющаѧ.

Ра́дꙋйсѧ, ст҃а́ѧ равноапⷭ҇льнаѧ кн҃ги́не ѻ҆́льго бг҃омꙋ́драѧ.

Конда́къ ѳ҃

Всѧ́кихъ добродѣ́телей и҆спо́лнена бы́вши, ѻ҆́льго бл҃же́ннаѧ, съ мл҃твою во ᲂу҆стѣ́хъ предала̀ є҆сѝ дꙋ́хъ тво́й въ рꙋ́цѣ бж҃їи, и҆́же всели́ тѧ въ нбⷭ҇ныѧ ѡ҆би́тєли и҆ пе́рвꙋю ѿ рѡссїѧ́нъ сопричтѐ ли́кꙋ ст҃ы́хъ ᲂу҆го́дникѡвъ свои́хъ. тѣ́мже и҆спросѝ ᲂу҆́бѡ и҆ на́мъ ᲂу҆ гдⷭ҇а ми́рнꙋю хрⷭ҇тїа́нскꙋю кончи́нꙋ, да предади́мъ дꙋ́шы на́шѧ въ рꙋ́цѣ хрⷭ҇та̀ бг҃а на́шегѡ, пою́ще томꙋ̀ хвале́бнꙋю пѣ́снь. А҆ллилꙋ́їа.

І҆́косъ ѳ҃

Вѣті̑и многовѣща́ннїи не мо́гꙋтъ досто́йнѡ восхвали́ти тѧ̀, ѻ҆́льго бг҃омꙋ́драѧ: ка́кѡ ты̀, ни ки́мъ же ѿ человѣ̑къ ᲂу҆чи́ма и҆ ᲂу҆вѣщева́ема, позна́ла є҆сѝ тщетꙋ̀ і҆дѡлослꙋже́нїѧ, пра́выѧ же вѣ́ры взыска́ла є҆сѝ, и҆ ꙗ҆́коже мꙋ́дрый кꙋпе́цъ, ѡ҆брѣла̀ є҆сѝ безцѣ́нный би́серъ, хрⷭ҇та̀, є҆го́же лицезрѣ́нїѧ на нб҃сѝ наслажда́ѧсѧ ны́нѣ, не забꙋ́ди на́съ, пре́лестьми мі́ра сегѡ̀ ѡ҆мрача́емыхъ и҆ ѡ҆ бл҃гахъ вѣ́чныхъ забыва́ющихъ, да тобо́ю на пꙋ́ть пра́вый наставлѧ́еми, взыва́емъ тѝ ра́достнѡ:

Ра́дꙋйсѧ, до́брыми твои́ми дѣ́лы и҆ пра́вымъ ᲂу҆ма̀ и҆ се́рдца и҆зволе́нїемъ прїꙋгото́вившаѧ себѐ жили́ще бж҃е́ственной бл҃года́ти: ра́дꙋйсѧ, ꙗ҆́кѡ са́мъ дх҃ъ ст҃ы́й ᲂу҆чи́тель тебѣ̀ бы́сть къ позна́нїю хрⷭ҇та̀ сн҃а бж҃їѧ.

Ра́дꙋйсѧ, ни кі́ихъ же зна́менїй и҆ чꙋде́съ ви́дѣвшаѧ и҆ во хрⷭ҇та̀ вѣ́ровавшаѧ: ра́дꙋйсѧ, таково́ю вѣ́рою твое́ю мно́гихъ гони́телей и҆ мꙋчи́телей, ви́дѣвшихъ зна́мєнїѧ и҆ чꙋдеса̀ и҆ не вѣ́ровавшихъ, посрами́вшаѧ.

Ра́дꙋйсѧ, води́тельствꙋ ст҃а́гѡ дх҃а себє̀ преда́вшаѧ: ра́дꙋйсѧ, соверше́ннꙋю поко́рность во́лѣ бж҃їей показа́вшаѧ.

Ра́дꙋйсѧ, зва́вшемꙋ тѧ̀ гла́сꙋ бл҃года́ти послꙋ́шна ꙗ҆ви́вшаѧсѧ: ра́дꙋйсѧ, съ є҆динонадесѧ́тагѡ часа̀ въ вертогра́дѣ гдⷭ҇немъ потрꙋди́вшаѧсѧ и҆ мздꙋ̀ съ пе́рвыми полꙋчи́вшаѧ.

Ра́дꙋйсѧ, ꙗ҆́кѡ ᲂу҆мꙋдри́ тѧ гдⷭ҇ь, че́сть ца́рскꙋю, бога́тство и҆ сла́вꙋ, сочета́ти со смире́нїемъ хрⷭ҇тїа́нскимъ: ра́дꙋйсѧ, ꙗ҆́кѡ си́мъ ѡ҆́бразомъ ꙗ҆́вѣ показа́вшаѧ на́мъ, ꙗ҆́кѡ бла̑га зємны́ѧ не сꙋ́ть препѧ́тїе дꙋшѝ бг҃олюби́вѣй къ достиже́нїю бл҃гъ нбⷭ҇ныхъ.

Ра́дꙋйсѧ, добро́тою цѣломꙋ́дрїѧ и҆ свѣ́тлостїю разꙋмѣ́нїѧ просла́вившаѧсѧ: ра́дꙋйсѧ, крѣ́постїю вѣ́ры и҆ чⷭ҇тото́ю житїѧ̀ твоегѡ̀ проро́чества да́ръ ѿ бг҃а воспрїѧ́вшаѧ.

Ра́дꙋйсѧ, ст҃а́ѧ равноапⷭ҇льнаѧ кн҃ги́не ѻ҆́льго бг҃омꙋ́драѧ.

Конда́къ і҃

Пꙋ́ть сп҃се́нїѧ сыновѡ́мъ рѡссі̑йскимъ ᲂу҆строѧ́ѧ, и҆ предсме́ртное проше́нїе твоѐ и҆сполнѧ́ѧ, всебл҃гі́й гдⷭ҇ь возрастѝ во внꙋ́цѣ твое́мъ влади́мїрѣ всѣ́ѧнное тобо́ю сѣ́мѧ вѣ́ры и҆ чрез̾ него̀ всю̀ зе́млю рѡссі́йскꙋю просвѣтѝ ст҃ы́мъ креще́нїемъ. тѣ́мже ᲂу҆́бѡ прославлѧ́емъ тѧ̀, ѻ҆́льго бл҃же́ннаѧ, ꙗ҆́кѡ пе́рвꙋю вино́вницꙋ просвѣще́нїѧ на́шегѡ свѣ́томъ ст҃ы́ѧ вѣ́ры, и҆ ᲂу҆ми́льнѡ пое́мъ хрⷭ҇тꙋ̀ сп҃си́телю на́шемꙋ: А҆ллилꙋ́їа.

І҆́косъ і҃

Прїѧ́въ ст҃о́е креще́нїе внꙋ́къ тво́й влади́мїръ, потща́сѧ и҆з̾ѧ́ти и҆з̾ землѝ нетлѣ̑нныѧ, и҆спо́лнєнныѧ чꙋ́днагѡ бл҃гоꙋха́нїѧ, мо́щи твоѧ̑, и҆ со ст҃и́телемъ лео́нтїемъ и҆ всѣ́мъ мно́жествомъ наро́да поста́ви ѧ҆̀ въ це́ркви пречⷭ҇тыѧ бг҃омт҃ри, и҆ ѿто́лѣ нача́ша и҆сточа́тисѧ ѿ ни́хъ цѣльбы̑ всѧ̑кимъ недꙋ́гѡмъ, притека́ющымъ съ вѣ́рою. сегѡ̀ ра́ди восхвалѧ́емъ тѧ̀ си́це:

Ра́дꙋйсѧ, ꙗ҆́кѡ бл҃года́ть ст҃а́гѡ дх҃а, въ тѧ̀ все́льшаѧсѧ, подадѐ нетлѣ́нїе мощє́мъ твои̑мъ: ра́дꙋйсѧ, ꙗ҆́кѡ сотворѝ ты́ѧ цѣльбопода́тельный и҆сто́чникъ всѧ́кимъ недꙋ́гѡмъ.

Ра́дꙋйсѧ, ст҃ы̑ѧ мѡ́щи твоѧ̑ ѡ҆ста́вльшаѧ въ подтвержде́нїе правоты̀ прїѧ́тыѧ тобо́ю во хрⷭ҇та̀ вѣ́ры: ра́дꙋйсѧ, ꙗ҆́кѡ бы́вшими ѿ ни́хъ чꙋдесы̑ мнѡ́зи невѣ́рнїи ко хрⷭ҇тꙋ̀ ѡ҆брати́шасѧ.

Ра́дꙋйсѧ, чꙋ́дное сїѧ́нїе ѿ моще́й твои́хъ и҆спꙋска́вшаѧ: ра́дꙋйсѧ, съ маловѣ́рїемъ къ ни̑мъ приходѧ́щихъ ви́дѣти ѧ҆̀ не попꙋска́вшаѧ.

Ра́дꙋйсѧ, ꙗ҆вле́нїемъ моще́й твои́хъ младе́нствовавшꙋю цр҃ковь рѡссі́йскꙋю возвесели́вшаѧ: ра́дꙋйсѧ, прославле́нїемъ и҆̀хъ внꙋ́ка твоего̀ влади́мїра ѕѣлѡ̀ ѡ҆бра́довавшаѧ.

Ра́дꙋйсѧ, ꙗ҆́кѡ и҆ до ны́нѣ бл҃гочести́вїи лю́дїе землѝ рѡссі́йскїѧ сла́вною па́мѧтїю твое́ю ᲂу҆слажда́ютсѧ: ра́дꙋйсѧ, ꙗ҆́кѡ твои́мъ къ бг҃ꙋ хода́тайствомъ вѣ́рнїи рѡссїѧ́не мно́гихъ бл҃гъ ѿ гдⷭ҇а сподоблѧ́ютсѧ.

Ра́дꙋйсѧ, мл҃твами твои́ми ѡ҆ просвѣще́нїи землѝ рѡссі́йскїѧ бг҃а ᲂу҆моли́вшаѧ: ра́дꙋйсѧ, вско́рѣ мнѡ́гимъ вели̑кимъ ст҃ы̑мъ ꙗ҆ви́тисѧ на землѝ рѡссі́йстѣй прорекова́вшаѧ.

Ра́дꙋйсѧ, ст҃а́ѧ равноапⷭ҇льнаѧ кн҃ги́не ѻ҆́льго бг҃омꙋ́драѧ.

Конда́къ а҃і

Пѣ́нїе ᲂу҆миле́нное прино́симъ тѝ, ᲂу҆го́днице бж҃їѧ, и҆ смире́ннѡ тѧ̀ мо́лимъ: молѝ ѡ҆ на́съ є҆ди́наго человѣколю́бца бг҃а, да не ѿврати́тъ лица̀ своегѡ̀ ѿ на́съ недосто́йныхъ, при́снѡ согрѣша́ющихъ и҆ преѡгорчева́ющихъ бл҃гость є҆гѡ̀, но да нака́жетъ на́съ здѣ̀ ꙗ҆́кѡ ѻ҆ц҃ъ чадолюби́вый, ѻ҆на́може, въ бꙋ́дꙋщемъ вѣ́цѣ, да сп҃се́тъ и҆ поми́лꙋетъ ꙗ҆́кѡ сꙋдїѧ̀ и҆ мздовоздаѧ́тель пра́ведный, да та́кѡ, и҆зба́вльшесѧ вѣ́чнагѡ мꙋче́нїѧ, сподо́бимсѧ съ тобо́ю въ ра́йскихъ ѡ҆би́телехъ воспѣва́ти є҆мꙋ̀: А҆ллилꙋ́їа.

І҆́косъ а҃і

Трисїѧ́ннымъ свѣ́томъ ѡ҆сїѧва́ема, со всѣ́ми ст҃ы́ми предстои́ши ны́нѣ на нб҃сѝ прⷭ҇то́лꙋ цр҃ѧ̀ ца́рствꙋющихъ, ѻ҆́льго всебл҃же́ннаѧ, и҆ ѿтꙋ́дꙋ, ꙗ҆́кѡ свѣтоза́рное свѣти́ло, просвѣща́еши всю̀ странꙋ̀ рѡссі́йскꙋю, разгонѧ́ѧ мра́къ заблꙋжде́нїй, и҆ показꙋ́ѧ пꙋ́ть къ и҆́стинномꙋ просвѣще́нїю и҆ нбⷭ҇номꙋ бл҃же́нствꙋ. сегѡ̀ ра́ди прославлѧ́юще тѧ̀ глаго́лемъ:

Ра́дꙋйсѧ, лꙋно̀ просвѣще́ннаѧ ѿ незаходи́магѡ сл҃нца пра́вды: ра́дꙋйсѧ, пꙋтеводи́тельнице, пра́вꙋю стезю̀ къ вѣ́чномꙋ спасе́нїю на́мъ показꙋ́ющаѧ.

Ра́дꙋйсѧ, мо́щнаѧ споспѣ́шнице и҆ ᲂу҆крѣпи́тельнице проповѣ́дникѡвъ правосла́вныѧ вѣ́ры: ра́дꙋйсѧ, при́снаѧ покрови́тельнице бл҃ги́хъ наста́вникѡвъ ю҆́ношества и҆ всѣ́хъ бл҃готрꙋдѧ́щихсѧ на по́льзꙋ ѻ҆́бщꙋю.

Ра́дꙋйсѧ, законода́телей страны̀ рѡссі́йскїѧ наста́внице и҆ просвѣти́тельнице: ра́дꙋйсѧ, народоправи́телей и҆ нача́льникѡвъ страны̀ сеѧ̀ мꙋ́драѧ и҆ до́браѧ свѣтопода́тельнице.

Ра́дꙋйсѧ, крамо́лъ и҆ раздо́рѡвъ потреби́тельнице: ра́дꙋйсѧ, всѣ́хъ ѡ҆би́димыхъ и҆ непра́веднѡ гони́мыхъ застꙋ́пнице.

Ра́дꙋйсѧ, скорбѧ́щихъ ско́раѧ ᲂу҆тѣ́шительнице: ра́дꙋйсѧ, болѧ́щихъ млⷭ҇тиваѧ и҆сцѣли́тельнице.

Ра́дꙋйсѧ, лю́демъ на́шимъ по́мощь мл҃твами твои́ми ѿ бг҃а подава́ющаѧ: ра́дꙋйсѧ, всеѧ̀ страны̀ рѡссі́йскїѧ предста́тельнице и҆ застꙋ́пнице.

Ра́дꙋйсѧ, ст҃а́ѧ равноапⷭ҇льнаѧ кн҃ги́не ѻ҆́льго бг҃омꙋ́драѧ.

Конда́къ в҃і

Бл҃года́ть прест҃а́гѡ дх҃а и҆спросѝ на́мъ, наста́внице на́ша, ѿ всеще́драгѡ бг҃а и҆ сп҃са на́шегѡ, вразꙋмлѧ́ющꙋю и҆ ᲂу҆крѣплѧ́ющꙋю на́съ въ дѣ́лѣ сп҃се́нїѧ, да не безпло́днѡ бꙋ́детъ въ на́съ всѣ́ѧнное тобо́ю сѣ́мѧ ст҃ы́ѧ вѣ́ры, но да прозѧ́бнетъ и҆ пло́дъ сотвори́тъ, и҆́мже бы возмощѝ на́мъ пита́ти дꙋ́шы на́шѧ въ бꙋ́дꙋщей вѣ́чнѣй жи́зни, и҆дѣ́же всѝ ст҃і́и воспѣва́ютъ бг҃ꙋ: А҆ллилꙋ́їа.

І҆́косъ в҃і

Пою́ще твоѧ̑ мнѡ́гаѧ и҆ пресла̑внаѧ бл҃годѣѧ̑нїѧ, ꙗ҆влє́ннаѧ странѣ̀ рѡссі́йской въ просвѣще́нїи то́й свѣ́томъ вѣ́ры хрⷭ҇то́вой, бл҃года́рственнѡ прино́симъ тѝ, съ любо́вїю зовꙋ́ще сицева̑ѧ:

Ра́дꙋйсѧ, бг҃оизбра́ннаѧ и҆ бг҃опросла́вленнаѧ самоде́ржице землѝ рꙋ́сскїѧ: ра́дꙋйсѧ, несокрꙋши́мое ѡ҆гражде́нїе є҆ѧ̀, покро́въ и҆ защище́нїе.

Ра́дꙋйсѧ, дѣ́вамъ рѡссі̑йскимъ ѡ҆́бразе цѣломꙋ́дреннагѡ житїѧ̀: ра́дꙋйсѧ, ма́теремъ наста́внице зако́ннагѡ сꙋпрꙋ́жества и҆ до́брагѡ ча́дъ воспита́нїѧ.

Ра́дꙋйсѧ, вдови́цамъ пра́вило бг҃оꙋго́днагѡ житїѧ̀: ра́дꙋйсѧ, всѣ̑мъ рѡссїѧ́нѡмъ ᲂу҆чи́тельнице и҆ ѡ҆́бразе всѣ́хъ добродѣ́телей.

Ра́дꙋйсѧ, соꙋча́стнице на нб҃есѝ жре́бїѧ проповѣ́дникѡвъ вѣ́ры хрⷭ҇то́вы: ра́дꙋйсѧ, соприча́стнице вѣ́чнагѡ бл҃же́нства пра́ведныхъ.

Ра́дꙋйсѧ, те́плаѧ ѡ҆ на́съ пред̾ бг҃омъ мл҃твеннице: ра́дꙋйсѧ, ᲂу҆се́рднаѧ ѡ҆ сп҃се́нїи хода́таице.

Ра́дꙋйсѧ, въ ча́съ сме́рти на́шеѧ ѡ҆ на́съ къ бг҃ꙋ мл҃твеннице: ра́дꙋйсѧ, по и҆схо́дѣ на́шемъ ѿ сме́ртнагѡ сегѡ̀ тѣлесѐ по́мощь и҆ ᲂу҆тѣше́нїе подаю́щаѧ.

Ра́дꙋйсѧ, ст҃а́ѧ равноапⷭ҇льнаѧ кн҃ги́не ѻ҆́льго бг҃омꙋ́драѧ.

Конда́къ г҃і

Ѽ ст҃а́ѧ равноапⷭ҇льнаѧ вели́каѧ кн҃ги́не ѻ҆́льго, прїимѝ ми́лостивнѡ ѿ на́съ хвале́бное благодаре́нїе сїѐ ѡ҆ всѣ́хъ, ꙗ҆̀же тобо́ю воздадѐ гдⷭ҇ь на́мъ, ѻ҆тцє́мъ и҆ пра́ѻтцємъ на́шымъ и҆ все́й держа́вѣ рѡссі́йстѣй, и҆ молѝ всебл҃га́го бг҃а проба́вити млⷭ҇ть свою̀ на ны̀ и҆ на рѡ́ды родѡ́въ на́шихъ, ᲂу҆тверди́ти ны̀ въ правовѣ́рїи и҆ бл҃гоче́стїи, храни́ти же ѿ всѣ́хъ напа́стей бѣ́дъ и҆ ѕѡ́лъ, да сподо́бимсѧ съ тобо́ю, ꙗ҆́кѡ ча̑да съ ма́терїю, во вѣ́ки воспѣва́ти бг҃ꙋ: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃лѡвъ и҆ человѣ́кѡвъ творе́цъ, времена̀ и҆ лѣ̑та во свое́й вла́сти положи́вый и҆ сꙋдьбы̑ ца́рствъ и҆ наро́дѡвъ по свое́й во́ли ᲂу҆правлѧ́ѧй, є҆гда̀ восхотѣ̀ ро́дъ рѡссі́йскїй ст҃ы́мъ кр҃ще́нїемъ просвѣти́ти, тогда̀, ви́дѧ бл҃го́е и҆зволе́нїе се́рдца твоегѡ̀, призва́ тѧ пе́рвѣе въ позна́нїе себѐ, да бꙋ́деши всѣ̑мъ рѡссїѧ́нѡмъ ѡ҆́бразъ и҆ наста́вница въ хрⷭ҇тїа́нстѣй вѣ́рѣ. сегѡ̀ ра́ди восхвалѧ́емъ тѧ̀ си́це:

Ра́дꙋйсѧ, рѡссі́йскагѡ небесѐ ᲂу҆́треннѧѧ ѕвѣздо̀, ѿ первозва́ннагѡ а҆пⷭ҇ла на гора́хъ кі́евскихъ предвозвѣще́ннаѧ: ра́дꙋйсѧ, зарѐ, во мра́цѣ невѣ́денїѧ свѣ́тлѡ возѡблиста́вшаѧ.

Ра́дꙋйсѧ, до́браѧ лозо̀ вїногра́да хрⷭ҇то́ва, ѿ ди́вїѧ ꙗ҆зы́ческагѡ ко́рене прозѧ́бшаѧ: Ра́дꙋйсѧ, пречꙋ́днаѧ лѣ́торасле и҆з̾ неѧ́же ве́лїе правовѣ́рїѧ дре́во на землѝ на́шей возрастѐ.

Ра́дꙋйсѧ, первоꙋчи́тельнице и҆ просвѣти́тельнице на́ша: ра́дꙋйсѧ, ꙗ҆́кѡ тобо́ю позна́хомъ покланѧ́тисѧ въ трⷪ҇цѣ творцꙋ̀.

Ра́дꙋйсѧ, ꙗ҆́кѡ тебѐ ра́ди прест҃о́е и҆́мѧ гдⷭ҇не ѿ всѣ́хъ рѡссїѧ́нъ прославлѧ́етсѧ: ра́дꙋйсѧ, ꙗ҆́кѡ и҆ твоѐ пресла́вное и҆́мѧ вкꙋ́пѣ съ равноапⷭ҇льнымъ влади́мїромъ во всѣ́хъ предѣ́лѣхъ мі́ра восхвалѧ́етсѧ.

Ра́дꙋйсѧ, страны̀ на́шеѧ рѡссі́йскїѧ дꙋхо́вное сокро́вище: ра́дꙋйсѧ, всеѧ̀ хрⷭ҇то́вы цр҃кве пресла́вное ᲂу҆краше́нїе.

Ра́дꙋйсѧ, градѡ́въ кі́ева и҆ пско́ва и҆зрѧ́днаѧ добро́то: ра́дꙋйсѧ, лю́демъ на́шимъ на врагѝ бл҃га́ѧ помо́щнице.

Ра́дꙋйсѧ, ст҃а́ѧ равноапⷭ҇льнаѧ кн҃ги́не ѻ҆́льго бг҃омꙋ́драѧ.

Конда́къ а҃

Первоизбра́ннѣй ѿ всегѡ̀ рѡссі́йскагѡ ро́да, сла́внѣй и҆ равноапⷭ҇льнѣй ᲂу҆го́дницѣ бж҃їей ѻ҆́льгѣ соста́вимъ похвалꙋ̀, ꙗ҆́кѡ зарѣ̀ во тьмѣ̀ і҆дѡлопоклоне́нїѧ свѣ́томъ вѣ́ры возсїѧ́вшей и҆ пꙋ́ть ко хрⷭ҇тꙋ̀ всѣ̑мъ рѡссїѧ́нѡмъ показа́вшей. ты́ же, ꙗ҆́кѡ и҆мꙋ́щаѧ дерзнове́нїе къ просла́вльшемꙋ тѧ̀ гдⷭ҇ꙋ, свобожда́й на́съ ѿ всѧ́кихъ бѣ́дъ мл҃твами твои́ми, да зове́мъ тѝ:

Ра́дꙋйсѧ, ст҃а́ѧ равноапⷭ҇льнаѧ кн҃ги́не ѻ҆́льго бг҃омꙋ́драѧ.

Моли́твы

Ѽ ст҃а́ѧ равноапⷭ҇льнаѧ вели́каѧ кн҃ги́не ѻ҆́льго, первоꙋго́днице рѡссі́йскаѧ, те́плаѧ ѡ҆ на́съ пред̾ бг҃омъ хода́таице и҆ мл҃твеннице: къ тебѣ̀ прибѣга́емъ съ вѣ́рою и҆ мо́лимсѧ съ любо́вїю: бꙋ́ди на́мъ ко бл҃гꙋ помо́щница и҆ споспѣ́шница и҆ ꙗ҆́коже во вре́меннѣй жи́зни тща́ласѧ є҆сѝ просвѣти́ти пра́ѻтцы на́шѧ свѣ́томъ ст҃ы́ѧ вѣ́ры и҆ наста́вити ѧ҆̀ твори́ти во́лю гдⷭ҇ню, та́кѡ и҆ ны́нѣ, въ нбⷭ҇нѣй пребыва́ѧ свѣ́тлости бл҃гопрїѧ́тными твои́ми къ бг҃ꙋ мл҃твами, вспомоществꙋ́й на́мъ въ просвѣще́нїи ᲂу҆ма̀ и҆ се́рдца на́шегѡ свѣ́томъ є҆ѵⷢ҇лїа хрⷭ҇то́ва, да преспѣва́емъ въ вѣ́рѣ, бл҃гоче́стїи и҆ любвѝ хрⷭ҇то́вѣ. въ нищетѣ̀ и҆ ско́рби сꙋ́щыѧ ᲂу҆тѣ́ши, бѣ́дствꙋющымъ пода́ждь рꙋ́кꙋ по́мощи, ѡ҆би̑димыѧ и҆ напа́ствꙋємыѧ застꙋпѝ, заблꙋ́ждшыѧ ѿ пра́выѧ вѣ́ры и҆ є҆́ресьми ѡ҆слѣплє́нныѧ вразꙋмѝ, и҆ и҆спросѝ на́мъ ᲂу҆ всеще́драгѡ бг҃а всѧ̑ бл҃га̑ѧ и҆ полє́знаѧ въ жи́зни вре́меннѣй и҆ вѣ́чнѣй, да та́кѡ бг҃оꙋго́днѣ здѣ̀ пожи́вше, сподо́бимсѧ наслѣ́дїѧ бл҃гъ вѣ́чныхъ въ безконе́чнѣмъ црⷭ҇твїи хрⷭ҇та̀ бг҃а на́шегѡ, є҆мꙋ́же со ѻ҆ц҃е́мъ и҆ ст҃ы́мъ дх҃омъ подоба́етъ всѧ̑каѧ сла́ва, че́сть и҆ поклоне́нїе всегда̀, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.

Ѽ вели́каѧ ᲂу҆го́днице бж҃їѧ, бг҃оизбра́ннаѧ и҆ бг҃опросла́вленнаѧ, равноапⷭ҇льнаѧ вели́каѧ кн҃ги́не ѻ҆́льго, ты̀ ѿри́нꙋла є҆сѝ ѕловѣ́рїе и҆ нече́стїе ꙗ҆зы́ческое, ᲂу҆вѣ́ровала є҆сѝ во є҆ди́наго и҆́стиннаго трїѷпоста́снаго бг҃а, и҆ воспрїѧ́ла є҆сѝ ст҃о́е кр҃ще́нїе и҆ положи́ла є҆сѝ нача́ло просвѣще́нїѧ землѝ рѡссі́йскїѧ свѣ́томъ вѣ́ры и҆ бл҃гоче́стїѧ. ты̀ є҆сѝ дꙋхо́внаѧ родонача́льнице на́ша, ты̀ по хрⷭ҇тѣ̀ сп҃си́телѣ на́шемъ пе́рваѧ вино́вница просвѣще́нїѧ и҆ сп҃се́нїѧ ро́да на́шегѡ. ты̀ є҆сѝ те́плаѧ мл҃твенница и҆ хода́таица ѡ҆б̾ ѻ҆те́чествѣ всерѡссі́йстѣмъ, во́инствѣ и҆ ѡ҆ всѣ́хъ лю́дехъ. сегѡ̀ ра́ди смире́ннѡ мо́лимъ тѧ̀: при́зри на не́мѡщи на́шѧ и҆ ᲂу҆молѝ премилосе́рдаго цр҃ѧ̀ нбⷭ҇наго, да не прогнѣ́ваетсѧ на ны̀ ѕѣлѡ̀, ꙗ҆́кѡ по не́мощемъ на́шымъ по всѧ̑ дни̑ согрѣша́емъ, да не погꙋби́тъ на́съ со беззако́ньми на́шими, но да поми́лꙋетъ и҆ сп҃се́тъ на́съ по млⷭ҇ти свое́й, да всади́тъ въ сердца̀ на̑ша сп҃си́тельный стра́хъ сво́й, да просвѣти́тъ свое́ю бл҃года́тїю ᲂу҆́мъ на́шъ, во є҆́же разꙋмѣ́ти на́мъ пꙋти̑ гдⷭ҇ни, ѡ҆ста́вити стези̑ нече́стїѧ и҆ заблꙋжде́нїй, тща́тисѧ же во стезѧ́хъ сп҃се́нїѧ и҆ и҆́стины, неꙋкло́ннагѡ и҆сполне́нїѧ за́повѣдей бж҃їихъ и҆ ᲂу҆ста́вѡвъ ст҃ы́ѧ цр҃кве. молѝ, бл҃же́ннаѧ ѻ҆́льго, чл҃вѣколю́бца бг҃а, да проба́витъ на́мъ вели́кꙋю млⷭ҇ть свою̀: да и҆зба́витъ на́съ ѿ наше́ствїѧ и҆ноплеме́нныхъ, ѿ внꙋ́треннихъ нестрое́нїй, мѧте́жей и҆ раздо́рѡвъ, ѿ гла́да, смертоно́сныхъ болѣ́зней и҆ ѿ всѧ́кагѡ ѕла̀: да пода́стъ на́мъ бл҃горастворе́нїе воздꙋ́ха и҆ плодоно́сїе землѝ. да сохрани́тъ ѿ всѣ́хъ ко́зней и҆ навѣ́тѡвъ вра́жїихъ, да соблюде́тъ въ сꙋдїѧ́хъ и҆ прави́телехъ пра́вдꙋ и҆ ми́лость, да да́стъ па́стырємъ ре́вность ѡ҆ сп҃се́нїи пасо́мыхъ, всѣ̑мъ же лю́демъ споспѣше́нїе ѡ҆ є҆́же ᲂу҆се́рднѡ слꙋ́жбы своѧ̑ и҆справлѧ́ти, любо́вь междꙋ̀ собо́ю и҆ є҆диномы́слїе и҆мѣ́ти на бл҃го ѻ҆те́чества и҆ ст҃ы́ѧ цр҃кве вѣ́рнѣ подвиза́тисѧ: да возсїѧ́етъ свѣ́тъ сп҃си́тельныѧ вѣ́ры въ странѣ̀ на́шей во всѣ́хъ концѣ́хъ є҆ѧ̀: да ѡ҆братѧ́тсѧ къ вѣ́рѣ невѣ́рꙋющїи: да ᲂу҆празднѧ́тсѧ всѧ̑ є҆́реси и҆ раско́лы: да та́кѡ пожи́вше въ ми́рѣ на землѝ, сподо́бимсѧ съ тобо́ю вѣ́чнагѡ бл҃же́нства на нб҃сѝ, хва́лѧще и҆ превозносѧ́ще бг҃а во вѣ́ки вѣкѡ́въ. А҆ми́нь.