Православный календарь
Размер шрифта:

Канѡ́нъ

Канѡ́нъ ст҃ѣ́й равноапⷭ҇льнѣй кнѧги́нѣ ѻ҆́льзѣ.

Равноап. Ольги, вел. кнг. Киевской, во св. крещении Елены (969) 24 июля 2026
Глас 3

Пѣ́снь а҃

І҆рмо́съ

Велича́ваго фараѡ́на въ мо́ри потопи́вша со ѻ҆рꙋ́жїемъ и҆ вса̑дники, і҆и҃лѧ же пресла́внѡ спа́сша, и҆ по сꙋ́хꙋ прове́дша, пое́мъ хрⷭ҇та̀, ꙗ҆́кѡ просла́висѧ.

Тропа́рь

Вели́чїе на́ше и҆ похвала̀ ты̀ є҆сѝ, ѻ҆́льго бг҃омꙋ́драѧ: тобо́ю бо ѿ і҆́дѡльскїѧ ле́сти свободи́хомсѧ, ны́нѣ моли́сѧ за ро́дъ и҆ ро́ды, и҆̀хже бг҃ꙋ привела̀ є҆сѝ, пою́щи хрⷭ҇та̀: ꙗ҆́кѡ просла́висѧ.

Тропа́рь

Велича́ваго дїа́вола и҆зъ рѡссі́и прогна́ла є҆сѝ, нечести̑выѧ кꙋмі́ры ѿню́дъ сокрꙋши́вши: всѧ̑ лю́ди ѿ беззако́нїѧ свободи́ла є҆сѝ, мꙋ́дростїю наꙋча́ющи, пѣ́ти хрⷭ҇та̀, ꙗ҆́кѡ просла́висѧ.

Тропа́рь

Че́рность грѣхо́внꙋю ба́нею креще́нїѧ ѿню́дъ ѿмы́ла є҆сѝ, хрⷭ҇та̀ возлюби́ла є҆сѝ: є҆мꙋ́же предстоѧ́щи, моли́сѧ за рабы̑ твоѧ̑, вѣ́рнѡ сла́вѧщыѧ тѧ̀.

Богороди́ченъ

И҆са́їа тѧ̀ же́злъ нарица́етъ, пречⷭ҇таѧ, дв҃дъ же тѧ̀ прⷭ҇то́лъ гдⷭ҇ень, а҆ввакꙋ́мъ приѡсѣне́ннꙋю го́рꙋ, кꙋпинꙋ́ же тѧ̀ мѡѷсе́й: мы́ же тѧ̀ мт҃рь бж҃їю нарица́емъ.

Пѣ́снь г҃

І҆рмо́съ

Держа́вною рꙋко́ю и҆ си́льнымъ сло́вомъ нб҃о и҆ зе́млю сотвори́лъ є҆сѝ: ю҆́же твое́ю кро́вїю и҆скꙋпи́лъ є҆сѝ цр҃ковь твою̀, ꙗ҆̀же ѡ҆ тебѣ̀ ᲂу҆твержда́етсѧ зовꙋ́щи: ꙗ҆́кѡ нѣ́сть свѧ́тъ, ра́звѣ тебє̀, гдⷭ҇и.

Тропа́рь

Держа́вною рꙋко́ю, и҆ мꙋ́дрыми словесы̀, и҆ си́льнымъ сло́вомъ, ᲂу҆чи́ла є҆сѝ твоего̀ сы́на зако́нꙋ хрⷭ҇то́вꙋ, и҆ лю́демъ возбрани́ла є҆сѝ жре́ти і҆́дѡлѡмъ, ѻ҆́льго пресла́внаѧ: въ па́мѧть твою̀ ны́нѣ соше́дшесѧ, тебѐ прославлѧ́емъ.

Тропа́рь

Ты̀ ꙗ҆́кѡ пчела̀ добрꙋ̀ ра́зꙋмꙋ дале́че цвѣтꙋ́щїѧ хрⷭ҇то́вы вѣ́ры взыска́ла є҆сѝ, и҆ ꙗ҆́кѡ поро́дный ме́дъ креще́нїе, въ ца́рствꙋющемъ гра́дѣ ѡ҆брѣ́тши, твоемꙋ̀ гра́дꙋ и҆ лю́демъ дарова́ла є҆сѝ: є҆го́же всѝ насыще́ни, го́рести грѣха̀ ѿбѣга́ютъ.

Тропа́рь

Ве́сь похва́льный гла́съ, и҆ мольбꙋ́ ти, ѻ҆́льго, прино́симъ, тобо́ю бо бг҃а позна́хомъ. є҆мꙋ́же ны́нѣ предстои́ши, просѝ ми́ра ѻ҆те́чествꙋ, и҆ на пога̑ныѧ побѣ́ды, и҆ дꙋша́мъ на́шымъ ѡ҆ставле́нїѧ грѣхѡ́въ, пою́щымъ тѧ̀, присноблаже́ннаѧ.

Богороди́ченъ

Прїѧ́телище ꙗ҆ви́ласѧ є҆сѝ, дв҃о, непристꙋ́пнагѡ бг҃а, тѣ́мъ тѧ̀ пою́тъ непреста́ннѡ а҆́гг҃льстїи чи́ни, повинꙋ́ющесѧ влⷣцѣ: ты́ бо родила̀ є҆сѝ сло́во ѻ҆́ч҃ее, собезнача́льное, безъ ѻ҆тца̀: ѽ чꙋ́до. ст҃ы́й дх҃ъ ѡ҆сѣни́ тѧ.

Пѣ́снь д҃

І҆рмо́съ

Дх҃омъ бж҃їимъ ѡ҆чи́щсѧ прⷪ҇ро́къ дыха́ющимъ въ не́мъ, а҆ввакꙋ́мъ бжⷭ҇твенный боѧ́сѧ глаго́лаше: внегда̀ прибли́жатсѧ лѣ́та, позна́нъ бꙋ́деши, бж҃е, на спасе́нїе человѣ́кѡвъ.

Тропа́рь

Дх҃ъ бж҃їй почѝ на тебѣ̀, ꙗ҆́кѡ на деввѡ́рѣ прⷪ҇ро́чицѣ дре́вле: и҆́мже просвѣти́вшисѧ, ᲂу҆крѣплѧ́ющи влади́мїра разꙋ́мнаго, сїса́рꙋ дїа́вола низложи́ла є҆сѝ въ сѣ́ти є҆гѡ̀ креще́нїемъ, ꙗ҆́кѡ и҆ вара́комъ въ пото́цѣ кі́ссѡвѣ пре́жде.

Тропа́рь

Быстринѣ̀ подо́бѧщисѧ, ѻ҆́льго бг҃омꙋ́драѧ, сокрꙋше́ннымъ се́рдцемъ ста̀ молѧ́щисѧ къ бг҃ꙋ, и҆зба́вила є҆сѝ ро́дъ твои́хъ люде́й ѿ ѡ҆скорбле́нїѧ кꙋмі́рскагѡ, и҆ ѿ плѣне́нїѧ вра́жїѧ свободи́ла є҆сѝ, хрⷭ҇та̀ призыва́ющи на по́мощь на́шꙋ.

Тропа́рь

Въ наро́читый де́нь ст҃а́гѡ твоегѡ̀ преставле́нїѧ, ра́достнѡ пра́зднꙋемъ, пѣ́снь моле́бнꙋю хрⷭ҇тꙋ̀ возсыла́юще, нетлѣ́ннымъ вѣнце́мъ вѣнча́вшемꙋ тѧ̀, ѻ҆́льго бг҃омꙋ́драѧ: просѝ на́мъ ѡ҆ставле́нїѧ грѣхѡ́въ, сла́вѧщымъ тѧ̀ вѣ́рнѡ.

Богороди́ченъ

Тѧ̀ ѿ ко́рене і҆ессе́ева процвѣ́тшꙋю, и҆са́їа ꙗ҆́коже проречѐ, хрⷭ҇та̀ цвѣ́тъ прозѧ́бшꙋю, и҆ первонача́льнаго пло́тїю носи́вшꙋю и҆ же́злъ бж҃їѧ дх҃а, хва́лимъ тѧ̀, ꙗ҆́кѡ бж҃їю мт҃рь, и҆ чⷭ҇тꙋю дв҃ꙋ.

Пѣ́снь є҃

І҆рмо́съ

Сло́во бж҃їе всеси́льное, ми́ръ всемꙋ̀ мі́рꙋ послѝ, и҆ свѣ́томъ и҆́стиннымъ ѡ҆свѣща́ѧ и҆ просвѣща́ѧ всѧ̑, и҆зъ но́щи тѧ̀ сла́вѧщыѧ.

Тропа́рь

Ꙗ҆́кѡ голꙋби́ца цѣломꙋ́дреннаѧ, на фі́нїѯъ добродѣ́телей возшла̀ є҆сѝ, крилѣ̀ свѧщє́ннѣ посрє́бреннѣ и҆мꙋ́щи: и҆́миже возлетѣ́вши въ ра́йстѣй пи́щи возгнѣзди́ласѧ є҆сѝ, сла́внаѧ ѻ҆́льго.

Тропа́рь

Ѡ҆ тебѣ̀ поѧ́ше соломѡ́нъ пре́жде: внѣ̀ вїногра́да ца́рскаѧ ма́слина процвѣтѐ. ты́ бо ст҃ы́й гре́знъ креще́нїемъ въ рѡссі́и насади́ла є҆сѝ, творѧ́щи пло́дъ покаѧ́нїѧ, ѡ҆ не́мже са́мъ хрⷭ҇то́съ весели́тсѧ.

Тропа́рь

Оу҆милосе́рдисѧ, влⷣко, на новопросвѣщє́нныѧ лю́ди твоѧ̑, не преда́ждь на́съ въ рꙋ́ки пога́ныхъ, за мно́жество беззако́нїй на́шихъ: но моли́твами наста́вницы на́шеѧ ѻ҆́льги, и҆зба́ви ны̀ ѿ всѧ́кїѧ напа́сти.

Богороди́ченъ

Кропи́те всѝ, ꙗ҆́коже пи́шетсѧ, ѻ҆́блацы весє́лїѧ зємны́мъ: бж҃їй бо дѣ́тищь хрⷭ҇то́съ, ѡ҆чища́ѧй мі́ръ ѿ грѣхѡ́въ, воплоти́сѧ ѿ дв҃ы, и҆ да́нъ бы́сть на́мъ.

Пѣ́снь ѕ҃

І҆рмо́съ

Въ цр҃ковь нбⷭ҇нꙋю ст҃ꙋ́ю твою̀, да прїи́детъ моли́тва моѧ̀, вопїю́ ти, ꙗ҆́кѡ і҆ѡ́на, и҆зъ глꙋбины̀ се́рдца морска́гѡ: ѿ грѣ̑хъ мои́хъ возведи́ мѧ, молю́сѧ тебѣ̀, гдⷭ҇и.

Тропа́рь

Ре́вность ст҃а́гѡ дх҃а въ се́рдцы прїе́мши, ѻ҆те́ческое ѕловѣ́рїе возненави́дѣла є҆сѝ: и҆ хрⷭ҇та̀ и҆́стиннаго бг҃а взыска́вши, ча́до свѣ́та ꙗ҆ви́ласѧ є҆сѝ, и҆ съ пе́рвєнцы ст҃ы́хъ на нб҃сѣ́хъ ликꙋ́еши.

Тропа́рь

Но́ваѧ ᲂу҆чени́ца хрⷭ҇то́ва въ рѡссі́и ꙗ҆ви́ласѧ є҆сѝ, ѡ҆бходѧ́щи гра́ды и҆ сє́ла, кꙋмі́ры сокрꙋша́ющи, и҆ лю́ди ᲂу҆ча́щи є҆ди́номꙋ бг҃ꙋ покланѧ́тисѧ: є҆го́же молѝ за пою́щыѧ тѧ̀.

Тропа́рь

Ѽ бг҃облаже́ннаѧ ѻ҆́льго, помоли́сѧ за твоѧ̀ ча̑да къ бг҃ꙋ, ми́ръ неподви́жимый ѻ҆те́чествꙋ на́шемꙋ и҆спросѝ: и҆ на́мъ ѿпꙋще́нїе грѣхѡ́въ, при́снѡ тѧ̀ прославлѧ́ющымъ.

Богороди́ченъ

Позна́вше тобо́ю неѡпи́санное сло́во бж҃їе, сн҃а є҆диноча́даго вседержи́телева, вопїе́мъ тѝ земні́и: ра́дꙋйсѧ, бл҃гослове́ннаѧ бцⷣе, ᲂу҆пова́нїе дꙋ́шъ на́шихъ.

Пѣ́снь з҃

І҆рмо́съ

Пла́мень пе́щный порабо́тиша благочести́вїи ѻ҆́троцы, тѣ́мъ свы́ше ѡ҆росѝ ѧ҆̀, гото́вы пали́мы по є҆стествꙋ̀, но па́че є҆стества̀ мꙋ́жески поѧ́хꙋ: бл҃гослове́нъ є҆сѝ, гдⷭ҇и, на престо́лѣ сла́вы ца́рствїѧ твоегѡ̀.

Тропа́рь

Подо́бнѡ і҆ꙋді́ѳи сотвори́ла є҆сѝ, посредѣ̀ кꙋмі́рскихъ тѣли́щь вше́дши, тѣ́хъ нача́льника сокрꙋши́ла є҆сѝ, и҆ демѡноче́тцы посрами́ла є҆сѝ, всѧ̑ же лю́ди наꙋчи́ла є҆сѝ въ чистотѣ̀ вопи́ти хрⷭ҇тꙋ̀: бл҃гослове́нъ є҆сѝ, гдⷭ҇и, на престо́лѣ сла́вы црⷭ҇твїѧ твоегѡ̀.

Тропа́рь

Похва́льными цвѣ́ты, а҆́ки ца́рскїй вѣне́цъ бг҃омꙋ́дрѣй твое́й главѣ̀, въ па́мѧть твою̀ прино́симъ: ю҆́же хрⷭ҇то́съ нетлѣ́нїемъ вѣнча̀, ѻ҆́льго досточꙋ́днаѧ, моли́сѧ за твоѐ ста́до, и҆зба́витисѧ ѿ всѧ́кагѡ ѕла̀, вопїю́щымъ: бл҃гослове́нъ є҆сѝ, гдⷭ҇и, на прⷭ҇то́лѣ сла́вы црⷭ҇твїѧ твоегѡ̀.

Тропа́рь

Лїва́нскꙋю ли го́рꙋ нарече́мъ тѧ̀; на тѧ́ бо роса̀ нбⷭ҇наѧ сни́де. и҆лѝ фїсо́нъ рѣкꙋ̀, добрѣ́йшїй сапфѵ́ръ ка́мень честны́й, влади́мїра и҆мꙋ́щꙋю, и҆́мже просвѣти́сѧ рѡссі́йскаѧ землѧ̀; но моли́тесѧ за ны̀ взыва́юще: бл҃гослове́нъ є҆сѝ, гдⷭ҇и, на прⷭ҇то́лѣ сла́вы црⷭ҇твїѧ твоегѡ̀.

Богороди́ченъ

Кївѡ́тъ позлаще́нъ тѧ̀ дх҃омъ и҆менꙋ́емъ, спа́сшꙋю мі́ръ ѿ пото́па разꙋ́мнагѡ, дв҃о, спасѝ на́съ. на тѧ́ бо надѣ́емсѧ, и҆ къ тебѣ̀ прибѣга́емъ. ѿча̑ѧнныѧ въ пꙋчи́нѣ ѿ грѣ̑хъ и҆ напа́стей и҆зба́ви вопїю́щыѧ: бл҃гослове́нъ є҆сѝ, гдⷭ҇и, на прⷭ҇то́лѣ сла́вы црⷭ҇твїѧ твоегѡ̀.

Пѣ́снь и҃

І҆рмо́съ

Крѣ́пцыи ѻ҆́троцы трїѐ сꙋ́ще, си́лою ѡ҆бо́лкшесѧ ст҃ы́ѧ трⷪ҇цы, ᲂу҆лови́ша и҆ побѣди́ша халдє́и, и҆ ди́внѡ и҆змѣни́сѧ є҆стество̀: ка́кѡ ѻ҆́гнь въ ро́сꙋ прелага́шесѧ, безъ тꙋгѝ ѧ҆̀ сохранѝ ꙗ҆́кѡ пелена́ми. ѽ пролїѧ́вый мꙋ́дрость на всѣ́хъ дѣ́лѣхъ твои́хъ, бж҃е, тѧ̀ превозно́симъ во вѣ́ки.

Тропа́рь

Крѣпка̀ ꙗ҆́кѡ льви́ца, си́лою ст҃а́гѡ дх҃а ѡ҆болче́на, є҆ди́на ᲂу҆стреми́сѧ всю́дꙋ и҆стерза́ти кꙋмі́ры, и҆ ди́внѡ на нб҃сѝ и҆ на землѝ: ка́кѡ жена̀ пре́жде бг҃а познава́етъ, є҆́юже и҆спе́рва всемꙋ̀ ро́дꙋ паде́нїе бы́сть, то́ю же ны́нѣ спасе́ни пое́мъ: ѽ пролїѧ́вый мꙋ́дрость на всѣ́хъ дѣ́лѣхъ твои́хъ бж҃е, тѧ̀ превозно́симъ во вѣ́ки.

Тропа́рь

Премꙋ́дрость бж҃їѧ пре́жде ѡ҆ тебѣ̀ написа́ла є҆́сть: сѐ є҆сѝ до́браѧ моѧ̀ и҆ прекра́снаѧ, и҆ поро́ка нѣ́сть въ тебѣ̀. бле́скъ лица̀ твоегѡ̀ ꙗ҆́кѡ мѵ́ра ѡ҆бонѧ́нїе, назна́меноваше твоѐ, ѻ҆́льго, креще́нїе: є҆́же посредѣ̀ кꙋмі́рскїѧ ле́сти на тебѣ̀ ѡ҆бонѧ̀ хрⷭ҇то́съ, и҆ всѣ́хъ на́съ ѿ смра́да де́мѡнскагѡ къ покаѧ́нїю ми́лостїю свое́ю приве́лъ є҆́сть.

Тропа́рь

Помѧнѝ менѐ, госпожѐ ѻ҆́льго, ᲂу҆бо́гаго твоего̀ раба̀, ѡ҆кра́денаго ѿ врага̀, и҆ согрѣши́вшаго па́че человѣ̑къ: и҆ помоли́сѧ хрⷭ҇тꙋ̀, пода́ти мѝ проще́нїе ѡ҆ всѣ́хъ согрѣше́нїихъ, ꙗ҆̀же нечꙋ́вственнѡ содѣ́ѧхъ ѻ҆каѧ́нный, да покаѧ́нїемъ вопїю̀: ѽ пролїѧ́вый мꙋ́дрость на всѣ́хъ дѣ́лѣхъ твои́хъ, бж҃е, тѧ̀ превозно́симъ во вѣ́ки.

Богороди́ченъ

Не пре́зри, дв҃о, твои́хъ ра̑бъ мольбы̑, ѡ҆ тебѣ́ бо хва́лимсѧ, твоѐ ма́лое ста́до мы̀ є҆смы̀: потщи́сѧ въ застꙋпле́нїе на́ше, и҆ и҆зми́ ны ѿ вра̑гъ на́шихъ, ᲂу҆ще́дри зна́ющыѧ тѧ̀ мт҃рь бж҃їю, и҆ сн҃ꙋ твоемꙋ̀ вопїю́щыѧ: ѽ пролїѧ́вый мꙋ́дрость на всѣ́хъ дѣ́лѣхъ твои́хъ, бж҃е, тѧ̀ превозно́симъ во вѣ́ки.

Пѣ́снь ѳ҃

І҆рмо́съ

И҆з̾ є҆де́ма и҆зы́де ро́дъ на́шъ пра́бабы ра́ди є҆́ѵы: при́званъ же тобо́ю, ро́ждшею на́мъ но́ваго а҆да́ма хрⷭ҇та̀, во двою̀ є҆стєствꙋ̀, дв҃о чⷭ҇таѧ, взыгра́сѧ а҆да́мъ пра́дѣдъ, ꙗ҆́кѡ и҆збы́въ пе́рвыѧ клѧ́твы: мы́ же тобо́ю хва́лѧщесѧ, ꙗ҆́кѡ тебє̀ ра́ди бг҃а позна́хомъ, и҆ тебѐ велича́емъ.

Тропа́рь

Весели́сѧ є҆́ѵо прароди́тельнице, и҆́же бо тѧ̀ прельсти́въ и҆з̾ є҆де́ма и҆зведѐ, ны́нѣ же попра́нъ є҆́сть твои́мъ и҆сча́дїемъ. се́ бо ѻ҆́льга живо́тное дре́во крⷭ҇тъ хрⷭ҇то́въ въ рѡссі́и водрꙋзѝ, и҆́мже всѣ̑мъ вѣ̑рнымъ ра́й ѿве́рзесѧ: мы́ же хва́лѧщесѧ, ꙗ҆́кѡ тоѧ̀ ра́ди бг҃а позна́хомъ, со влади́мїромъ сїю̀ велича́емъ.

Тропа́рь

Женꙋ̀ по є҆стествꙋ̀ нарица́емъ тѧ̀, но па́че си́лы же́нскїѧ подви́гласѧ є҆сѝ. тмы̑ твоегѡ̀ зла́та и҆стощи́ла є҆сѝ, да хрⷭ҇то́въ зако́нъ и҆ ᲂу҆чи́телѧ приѡбрѧ́щеши, и҆́мже просвѣти́ла є҆сѝ зе́млю рѡссі́йскꙋю: мы́ же тобо́ю хва́лѧщесѧ, ꙗ҆́кѡ тебє̀ ра́ди бг҃а позна́хомъ, съ мꙋ́ченики тѧ̀ велича́емъ.

Тропа́рь

Зако́на наста́внице чи́стаѧ, и҆ ᲂу҆чи́тельнице вѣ́ры хрⷭ҇то́вы, прїимѝ похвалꙋ̀ ѿ ра̑бъ недосто́йныхъ, и҆ моли́твꙋ ѡ҆ на́съ сотворѝ къ бг҃ꙋ, че́стнѡ творѧ́щихъ твою̀ па́мѧть: да ѿ напа́стей и҆ бѣ́дъ и҆ печа́лей и҆ лю́тыхъ грѣхѡ́въ свободи́мсѧ: є҆ще́ же и҆ мꙋ́къ ждꙋ́щихъ на́съ и҆зба́ви, мо́лимсѧ тѝ, тебѐ непреста́ннѡ велича́ющїи.

Богороди́ченъ

Сѐ цр҃ковь: сѐ две́рь: сѐ бж҃їѧ гора̀ ст҃а́ѧ: сѐ же́злъ, и҆ сосꙋ́дъ зла́тъ: сѐ и҆сто́чникъ печа́танъ: сѐ ра́й ст҃ы́й но́вагѡ а҆да́ма: сѐ прⷭ҇то́лъ стра́шный: сѐ мт҃и бж҃їѧ пречⷭ҇таѧ, застꙋ́пница всѣ́хъ на́съ, пою́щихъ ю҆̀.