Православный календарь
Размер шрифта:

Ака́ѳістъ

А҆ка́ѳїстъ прпⷣбномꙋ а҆рка́дїю новото́ржскомꙋ.

Преп. Аркадия Вяземского (1592) 24 июля 2026

Конда́къ а҃

И҆збра́нный чꙋдотво́рче, преди́вный ᲂу҆го́дниче хрⷭ҇то́въ, ско́рый помо́щниче и҆ те́плый мл҃твенниче ѡ҆ всѣ́хъ, съ вѣ́рою и҆ любо́вїю къ тебѣ̀ прибѣга́ющихъ, а҆рка́дїе бг҃обл҃же́нне, ꙗ҆́кѡ и҆мѣ́ѧй дерзнове́нїе ко гдⷭ҇ꙋ, молѝ ѡ҆ сп҃се́нїи на́съ, пою́щихъ тѝ:

Ра́дꙋйсѧ, прпⷣбне а҆рка́дїе, новото́ржскїй чꙋдотво́рче.

І҆́косъ а҃

А҆́гг҃лѡвъ подража́тель ꙗ҆ви́лсѧ є҆сѝ, прпⷣбне и҆ бг҃оно́сне ѻ҆́тче на́шъ а҆рка́дїе, а҆́гг҃льски пожи́въ на землѝ и҆ на́мъ ѡ҆ста́вивъ ѻ҆́бразъ соверше́нства дꙋхо́внагѡ. Сегѡ̀ ра́ди просла́ви тѧ̀ нетлѣ́нїемъ и҆ чꙋдесы̀ хрⷭ҇то́съ бг҃ъ, є҆мꙋ́же предстои́ши ны́нѣ во сла́вѣ невече́рней нбⷭ҇нагѡ црⷭ҇твїѧ, ѿ на́съ же, чтꙋ́щихъ тѧ̀, слы́шиши пѣ́нїе таково́е:

Ра́дꙋйсѧ, любвѐ ра́ди гдⷭ҇ни всѧ́кое наслажде́нїе земно́е ѡ҆ста́вивый: ра́дꙋйсѧ, всѧ̑ сꙋ́єтнаѧ мі́ра сегѡ̀ хрⷭ҇та̀ ра́ди презрѣ́вый.

Ра́дꙋйсѧ, и҆́го хрⷭ҇то́во бл҃го́е и҆ ле́гкое возлюби́вый: ра́дꙋйсѧ, бога́тство нетлѣ́нное ѡ҆брѣты́й.

Ра́дꙋйсѧ, ꙗ҆́кѡ ко хрⷭ҇тꙋ̀ прилѣпи́лсѧ є҆сѝ: ра́дꙋйсѧ, ꙗ҆́кѡ ᲂу҆́мныма ѻ҆чи́ма бг҃а зрѣ́ти наꙋчи́лсѧ є҆сѝ.

Ра́дꙋйсѧ, во пло́ти ꙗ҆́кѡ безпло́тенъ пожи́вый: ра́дꙋйсѧ, чтⷭ҇нꙋ́ю и҆ бг҃олюбе́знꙋю чистотꙋ̀ сохрани́вый.

Ра́дꙋйсѧ, ꙗ҆́кѡ ᲂу҆́зкими враты̀ въ простра́нство црⷭ҇твїѧ нбⷭ҇нагѡ возше́лъ є҆сѝ: ра́дꙋйсѧ, ꙗ҆́кѡ равноа́гг҃льнꙋю че́сть досто́йнѡ прїѧ́лъ є҆сѝ.

Ра́дꙋйсѧ, вѣнце́мъ неꙋвѧда́емымъ ѿ гдⷭ҇а вѣнча́нный: ра́дꙋйсѧ, на нб҃сѝ и҆ на землѝ чꙋдесы̀ твои́ми просла́вленный.

Ра́дꙋйсѧ, прпⷣбне а҆рка́дїе, новото́ржскїй чꙋдотво́рче.

Конда́къ в҃

Ви́дѧ непостоѧ́нство и҆ сꙋетꙋ̀ мїрскꙋ́ю, земнꙋ́ю же красотꙋ̀ и҆ сла́вꙋ нивочто́же вмѣни́въ, по́двигъ по́стническїй и҆змла́да на себѐ под̾ѧ́лъ є҆сѝ и҆ въ безмо́лвїи мно́зѣ, слеза́хъ и҆ пла́чѣ непреста́ннѣмъ ѡ҆ грѣсѣ́хъ свои́хъ подвиза́лсѧ є҆сѝ, поѧ̀ бг҃ови: А҆ллилꙋ́їа.

І҆́косъ в҃

Ра́зꙋмъ ѿ ю҆́ности несꙋмнѣ́нный и҆мѣ́лъ є҆сѝ, а҆рка́дїе бл҃же́нне, сꙋ́етнꙋю сла́вꙋ мі́ра сегѡ̀ презрѣ́въ, не престаѧ̀ помышлѧ́ти ѡ҆ го́рнѣмъ, тѣ́мже ѡ҆ста́вилъ є҆сѝ до́мъ ѻ҆́тчїй ра́ди ѻ҆те́чествїѧ нбⷭ҇нагѡ. Сегѡ̀ ра́ди прїимѝ ѿ на́съ похвалы̑ сїѧ̑:

Ра́дꙋйсѧ, землѝ новопросвѣще́нныѧ ча́до бг҃оизбра́нное: ра́дꙋйсѧ, жела́нїемъ ѻ҆те́чества нбⷭ҇нагѡ преиспо́лненный.

Ра́дꙋйсѧ, по́стническое житїѐ ѿ ю҆́ности возлюби́вый: ра́дꙋйсѧ, го́рдаго ѕмі́ѧ смире́нїемъ свои́мъ препобѣди́вый.

Ра́дꙋйсѧ, на и҆́ночєскїѧ по́двиги до́брѣ себѐ ᲂу҆гото́вивый: ра́дꙋйсѧ, любвѐ гдⷭ҇ни ра́ди до́мъ ѻ҆те́ческїй ѡ҆ста́вивый.

Ра́дꙋйсѧ, на землѝ а҆́ки а҆́гг҃лъ пожи́вый: ра́дꙋйсѧ, дх҃а всест҃а́гѡ прїѧ́телище и҆ жили́ще бы́вый.

Ра́дꙋйсѧ, бл҃гоче́стїѧ ᲂу҆твержде́нїе: ра́дꙋйсѧ, правосла́вїѧ проповѣ́данїе.

Ра́дꙋйсѧ, ᲂу҆се́рдный и҆ бг҃опрїѧ́тный подви́жниче: ра́дꙋйсѧ, те́плый ѡ҆ на́съ мл҃твенниче.

Ра́дꙋйсѧ, прпⷣбне а҆рка́дїе, новото́ржскїй чꙋдотво́рче.

Конда́къ г҃

Си́лою бж҃їею просвѣще́нъ, ᲂу҆разꙋмѣ́лъ є҆сѝ, ꙗ҆́кѡ вѣ́къ, и҆́же на землѝ, преходѧ́щъ є҆́сть, вѣ́къ же бꙋ́дꙋщїй, ꙗ҆́кѡ непреходѧ́щїй, возлюби́лъ є҆сѝ: сегѡ̀ ра́ди є҆щѐ ю҆́нъ сы́й тѣ́ломъ и҆ мла́дъ лѣ́ты, ѻ҆ба́че вели́къ и҆ си́ленъ пред̾ бг҃омъ и҆ человѣ̑ки бы́лъ є҆сѝ. Ѡ҆ се́мъ ᲂу҆̀бо диви́мсѧ, и҆ бг҃ови ѡ҆ тебѣ̀ вопїе́мъ: А҆ллилꙋ́їа.

І҆́косъ г҃

И҆мꙋ́ще тѧ̀, ѻ҆́тче а҆рка́дїе, ско́раго въ бѣда́хъ помо́щника, бл҃говѣ́рнїи лю́дїе въ напа́стехъ и҆ ско́рбехъ тѧ̀ на по́мощь мл҃твеннѡ призыва́ютъ, и҆ да́ры бл҃гости бж҃їѧ мл҃твами твои́ми ѿ щедрода́вца ѻ҆би́льнѡ прїе́млютъ, тебѣ́ же ѿ любвѐ те́плыѧ хвале́бнѡ вопїю́тъ:

Ра́дꙋйсѧ, ско́рый послꙋ́шателю вѣ́рнѡ тебѣ̀ молѧ́щихсѧ: ра́дꙋйсѧ, бо́дрый споспѣ́шниче чистосерде́чнѣ ка́ющихсѧ.

Ра́дꙋйсѧ, болѧ́щихъ врачꙋ̀ бл҃гоискꙋ́сный и҆ безме́здный: ра́дꙋйсѧ, ᲂу҆ныва́ющихъ ᲂу҆тѣ́шителю бл҃года́тный.

Ра́дꙋйсѧ, дꙋшетлѣ́нныхъ страсте́й прогони́телю: ра́дꙋйсѧ, бѣ́сныхъ ѿ наси́лїѧ де́монскагѡ свободи́телю.

Ра́дꙋйсѧ, безпомо́щныхъ скоропредста́тельный помо́щниче: ра́дꙋйсѧ, соверше́ннагѡ послꙋша́нїѧ и҆скꙋ́сный наста́вниче.

Ра́дꙋйсѧ, дꙋ́хови пло́ть свою̀ покори́вый: ра́дꙋйсѧ, дꙋ́шꙋ свою̀ ѿ страсте́й ѡ҆чи́стивый.

Ра́дꙋйсѧ, прошє́нїѧ на̑ша и҆сполне́нїемъ предварѧ́ѧй: ра́дꙋйсѧ, ᲂу҆́мъ въ се́рдцѣ мл҃твеннѡ ᲂу҆твержда́ѧй.

Ра́дꙋйсѧ, прпⷣбне а҆рка́дїе, новото́ржскїй чꙋдотво́рче.

Конда́къ д҃

Бꙋ́рю многомѧте́жнагѡ сꙋ́етнагѡ мі́ра зрѧ̀, въ ти́хое приста́нище сп҃се́нїѧ, ѻ҆би́тель борисоглѣ́бскꙋю гра́да торжка̀, напра́вилъ є҆сѝ пꙋ́ть тво́й, ѻ҆́тче прпⷣбне, всѧ̑ бо бл҃га̑ѧ и҆ кра̑снаѧ мі́ра презрѣ́въ и҆ стра́нника въ мі́рѣ себѐ помышлѧ́ѧ, и҆́ночество возлюби́лъ є҆сѝ и҆ въ послꙋша́нїи прпⷣбномꙋ є҆фре́мꙋ послѣ́довалъ є҆сѝ, поѧ̀ бг҃ꙋ: А҆ллилꙋ́їа.

І҆́косъ д҃

Слы́шаще и҆ ви́дѧще ст҃о́е житїѐ твоѐ, прпⷣбне ѻ҆́тче а҆рка́дїе, всѧ̑ бра́тїѧ ᲂу҆дивлѧ́хꙋсѧ и҆ поꙋча́хꙋсѧ въ ди́внѣмъ житїѝ твое́мъ и҆ по́двизѣхъ, сла́вѧще гдⷭ҇а, ди́внаго во ст҃ы́хъ свои́хъ. Мы́ же всѝ съ вѣ́рою и҆ любо́вїю восхвалѧ́емъ тѧ̀, прпⷣбне, и҆ вопїе́мъ тѝ си́це:

Ра́дꙋйсѧ, на высотꙋ̀ безстра́стїѧ возше́дый: ра́дꙋйсѧ, всего̀ себѐ въ же́ртвꙋ гдⷭ҇еви принесы́й.

Ра́дꙋйсѧ, во́ине хрⷭ҇то́въ добропобѣ́дный: ра́дꙋйсѧ, слꙋжи́телю а҆́гнца и҆ па́стырѧ вѣ́рный.

Ра́дꙋйсѧ, предста́телю ѡ҆ на́съ пред̾ гдⷭ҇емъ непосты́дный: ра́дꙋйсѧ, сле́знагѡ ᲂу҆миле́нїѧ въ мл҃твѣ преиспо́лненный.

Ра́дꙋйсѧ, де́ннѡ и҆ но́щнѡ въ мл҃твѣ пребы́вый: ра́дꙋйсѧ, человѣ́че бж҃їй, въ мі́рѣ се́мъ а҆́гг҃льски пожи́вый.

Ра́дꙋйсѧ, и҆́стиннагѡ смире́нїѧ наста́вниче: ра́дꙋйсѧ, соверше́ннагѡ терпѣ́нїѧ подви́жниче.

Ра́дꙋйсѧ, дарѡ́въ ст҃а́гѡ дх҃а чтⷭ҇но́е вмѣсти́лище: ра́дꙋйсѧ, прест҃ы́ѧ трⷪ҇цы и҆збра́нное жили́ще.

Ра́дꙋйсѧ, прпⷣбне а҆рка́дїе, новото́ржскїй чꙋдотво́рче.

Конда́къ є҃

Бг҃оте́чнѣй ѕвѣздѣ̀ подо́бенъ бы́лъ є҆сѝ, бл҃же́нне а҆рка́дїе, є҆гда̀ прише́лъ є҆сѝ во гра́дъ торжо́къ ко и҆збра́нномꙋ ᲂу҆го́дникꙋ бж҃їю прпⷣбномꙋ є҆фре́мꙋ, ᲂу҆че́нїемъ и҆ житїе́мъ свѣ́тлѡ сїѧ́ющемꙋ, съ ни́мже во ѡ҆заре́нїи свѣ́тлѣмъ непристꙋ́пнагѡ свѣ́та дости́глъ є҆сѝ, кꙋ́пнѡ поѧ̀ бг҃ꙋ: А҆ллилꙋ́їа.

І҆́косъ є҃

Ви́димъ тѧ̀, прпⷣбне ѻ҆́тче а҆рка́дїе, ꙗ҆́кѡ а҆́гг҃ла бж҃їѧ, ѡ҆блече́ннаго въ преподо́бїе и҆ ст҃ы́ню ѿ ю҆́ности, и҆ въ добродѣ́тели соверше́нна, съ прпⷣбнымъ є҆фре́момъ въ по́двизѣхъ дꙋхо́вныхъ просїѧ́вшаго, съ ни́мже и҆ ны́нѣ предстои́ши прⷭ҇то́лꙋ вседержи́телѧ во сла́вѣ вѣ́чнѣй. Тѣ́мже моли́сѧ ко гдⷭ҇ꙋ ѡ҆ сп҃се́нїи на́съ грѣ́шныхъ, пою́щихъ тебѣ̀:

Ра́дꙋйсѧ, ꙗ҆́кѡ возлю́бленномꙋ твоемꙋ̀ ᲂу҆чи́телю послѣ́довалъ є҆сѝ: ра́дꙋйсѧ, ꙗ҆́кѡ съ ни́мъ сла́вꙋ нбⷭ҇нꙋю ᲂу҆наслѣ́довалъ є҆сѝ.

Ра́дꙋйсѧ, въ послꙋша́нїи наста́вникꙋ твоемꙋ̀ до́брѣ пребы́вый: ра́дꙋйсѧ, житїе́мъ твои́мъ ѻ҆ц҃а̀ нбⷭ҇наго просла́вивый.

Ра́дꙋйсѧ, ѻ҆би́тели борисоглѣ́бскїѧ сла́во и҆ строе́нїе: ра́дꙋйсѧ, мл҃твы бг҃оꙋго́дныѧ приноше́нїе.

Ра́дꙋйсѧ, по́стническагѡ ли́ка ᲂу҆краше́нїе: ра́дꙋйсѧ, ѕвѣздо̀ сїѧ́ющаѧ ᲂу҆тѣше́нїѧ.

Ра́дꙋйсѧ, ꙗ҆́кѡ тѣ́сный пꙋ́ть па́че простра́ннагѡ возлюби́лъ є҆сѝ: ра́дꙋйсѧ, ꙗ҆́кѡ ѻ҆́бразъ цѣломꙋ́дрїѧ и҆ воздержа́нїѧ ꙗ҆ви́лъ є҆сѝ.

Ра́дꙋйсѧ, во смире́нїи хрⷭ҇тꙋ̀ подража́нїе: ра́дꙋйсѧ, ст҃ы́ѧ цр҃кве похвало̀ и҆ ра́дованїе.

Ра́дꙋйсѧ, прпⷣбне а҆рка́дїе, новото́ржскїй чꙋдотво́рче.

Конда́къ ѕ҃

Посто́мъ и҆ сле́зною мл҃твою пло́ть твою̀ дꙋ́хови порабо́тилъ є҆сѝ, и҆ добродѣ́телей вѣне́цъ себѣ̀ и҆спле́лъ є҆сѝ. Сегѡ̀ ра́ди ны́нѣ предстои́ши прⷭ҇то́лꙋ прест҃ы́ѧ трⷪ҇цы, воспѣва́ѧ пѣ́снь побѣ́днꙋю: А҆ллилꙋ́їа.

І҆́косъ ѕ҃

Возсїѧ̀ на́мъ, ꙗ҆́кѡ ѕвѣзда̀ пꙋтево́днаѧ, возде́ржное по́стническое житїѐ твоѐ, прпⷣбне ѻ҆́тче а҆рка́дїе: не скорбѣ́лъ бо є҆сѝ ѡ҆ бра́шнѣ, вѣ́дый, ꙗ҆́кѡ сїѐ не поста́витъ на́съ пред̾ бг҃омъ, не радѣ́лъ є҆сѝ ѡ҆ добро́тѣ ри́зной, но дꙋ́шꙋ свою̀ добродѣ́тельми ᲂу҆краша́ти предпоче́лъ є҆сѝ. Сегѡ̀ ра́ди нетлѣ́нїемъ и҆ чꙋдесы̀ просла́вленъ є҆сѝ ѿ подвигополо́жника хрⷭ҇та̀, ѿ на́съ же прїимѝ сїѧ̑ пѣ́снєнныѧ хвалы̑:

Ра́дꙋйсѧ, є҆ѵⷢ҇лїа хрⷭ҇то́ва и҆́стинный послѣ́дователю: ра́дꙋйсѧ, за́повѣдей бж҃їихъ ᲂу҆се́рдный и҆сполни́телю.

Ра́дꙋйсѧ, хлѣ́бомъ жи́зни насыще́нный: ра́дꙋйсѧ, питїе́мъ безсме́ртїѧ напое́нный.

Ра́дꙋйсѧ, въ ри́зꙋ сп҃се́нїѧ ѡ҆блече́нный: ра́дꙋйсѧ, пото́комъ сле́зъ сп҃си́тельныхъ ѡ҆роше́нный.

Ра́дꙋйсѧ, всѧ̑ стра̑сти воздержа́нїемъ ᲂу҆мертви́вый: ра́дꙋйсѧ, пре́жде ᲂу҆ме́ртвїѧ твоегѡ̀ грѣхꙋ̀ ᲂу҆ме́рый.

Ра́дꙋйсѧ, де́монѡвъ прогони́телю: ра́дꙋйсѧ, а҆́гг҃лѡмъ соревни́телю.

Ра́дꙋйсѧ, тлѣ̑ннаѧ всѧ̑, ꙗ҆̀же на землѝ, ѡ҆ста́вивый: ра́дꙋйсѧ, пре́жде ѻ҆́бщагѡ воскрⷭ҇нїѧ нетлѣ́нїемъ ѿ гдⷭ҇а просла́вленный.

Ра́дꙋйсѧ, прпⷣбне а҆рка́дїе, новото́ржскїй чꙋдотво́рче.

Конда́къ з҃

Хотѧ̀ послѣ́довати и҆ подража́ти а҆́гнцꙋ бж҃їю, взе́мшемꙋ грѣхѝ мі́ра, кро́тость и҆ смире́нїе є҆гѡ̀ себѣ̀ ᲂу҆сво́илъ є҆сѝ, ѻ҆́тче на́шъ а҆рка́дїе, всѧ̑кїѧ скѡ́рби и҆ ѻ҆би̑ды безро́потнѡ претерпѣва́ѧ, вѣ́дый, ꙗ҆́кѡ скорбьмѝ вре́менными ѡ҆брѣта́етсѧ вѣ́чное сп҃се́нїе, и҆ та́кѡ соверше́ннагѡ безстра́стїѧ дости́глъ є҆сѝ, а҆́гг҃льскꙋю пѣ́снь воспѣва́ѧ вседержи́телю: А҆ллилꙋ́їа.

І҆́косъ з҃

Но́вый вои́стиннꙋ побѣдоно́сецъ показа́лсѧ є҆сѝ на стра̑сти плотскі̑ѧ, прпⷣбне ѻ҆́тче а҆рка́дїе, всѧ̑ разжжє́нныѧ стрѣ́лы врага̀ сп҃се́нїѧ человѣ́ческагѡ посто́мъ и҆ сле́зною мл҃твою ᲂу҆гаси́лъ є҆сѝ и҆ во пло́ти а҆́гг҃льское житїѐ без̾ преткнове́нїѧ проходи́лъ є҆сѝ, бж҃їею бл҃года́тїю ᲂу҆крѣплѧ́емый. Тѣ́мже вопїе́мъ тѝ:

Ра́дꙋйсѧ, бдѣ̑нїи всено́щными проти́вꙋ и҆скꙋше́нїй вра́жїихъ ѡ҆полчи́выйсѧ: ра́дꙋйсѧ, мл҃твами непреста́нными ѿ всѧ́кїѧ скве́рны ѡ҆чи́стивыйсѧ.

Ра́дꙋйсѧ, поще́нїемъ неѡсла́бнымъ всѧ́кое плотско́е жела́нїе ѡ҆бꙋзда́вый: ра́дꙋйсѧ, трезве́нїемъ неꙋсы́пнымъ соверше́нство дꙋхо́вное стѧжа́вый.

Ра́дꙋйсѧ, всего̀ себѐ бг҃ꙋ посвѧти́вый: ра́дꙋйсѧ, за словеса̀ гдⷭ҇нѧ пꙋти̑ же́стѡки сохрани́вый.

Ра́дꙋйсѧ, ꙗ҆́кѡ сѣ́ѧвый слеза́ми, ра́дость пожина́еши присноживо́тнꙋю: ра́дꙋйсѧ, ꙗ҆́кѡ ча́дѡмъ твои̑мъ и҆сточа́еши бл҃года́ть, тебѣ̀ дарова́ннꙋю.

Ра́дꙋйсѧ, ꙗ҆́кѡ свѣ́тъ ᲂу҆че́нїѧ хрⷭ҇то́ва въ се́рдцы свое́мъ носи́лъ є҆сѝ: ра́дꙋйсѧ, ꙗ҆́кѡ тѣ́мъ просвѣща́емь, тьмꙋ̀ страсте́й всегꙋби́тельныхъ разгна́лъ є҆сѝ.

Ра́дꙋйсѧ, ꙗ҆́кѡ нелѣ́ностнѡ всѧ́кꙋю добродѣ́тель и҆спра́вилъ є҆сѝ: ра́дꙋйсѧ, ꙗ҆́кѡ побѣ̑дныѧ по́чєсти ѿ хрⷭ҇та̀ бг҃а свы́ше прїѧ́лъ є҆сѝ.

Ра́дꙋйсѧ, прпⷣбне а҆рка́дїе, новото́ржскїй чꙋдотво́рче.

Конда́къ и҃

Стра́нника и҆ прише́льца себѐ бы́ти въ мі́рѣ се́мъ непостоѧ́ннѣмъ помышлѧ́лъ є҆сѝ, прпⷣбне ѻ҆́тче, и҆ грѧдꙋ́щагѡ гра́да і҆ерⷭ҇ли́ма нбⷭ҇нагѡ взыскꙋ́ѧ, всѧ̑ помышлє́нїѧ твоѧ̑ къ бг҃ꙋ возноси́лъ є҆сѝ, и҆ распина́лъ є҆сѝ пло́ть твою̀ со страстьмѝ и҆ похотьмѝ, сла́дцѣ воспѣва́ѧ, ꙗ҆́кѡ въ тѷмпа́нѣ, во ᲂу҆мерщвле́нїи тѣлесѐ побѣ́днꙋю пѣ́снь хрⷭ҇тꙋ̀: А҆ллилꙋ́їа.

І҆́косъ и҃

Ве́сь ѡ҆бле́клсѧ є҆сѝ во всѧ̑ ѻ҆рꙋ̑жїѧ бж҃їѧ, ꙗ҆́кѡ во́инъ хрⷭ҇то́въ, препоѧ́савъ чресла̀ твоѧ̑ и҆́стиною, ѡ҆бо́лксѧ въ бронѧ̀ пра́вды и҆ ѡ҆бꙋ́въ но́зѣ твоѝ во ᲂу҆гото́ванїе бл҃говѣствова́нїѧ ми́ра, воспрїѧ́лъ є҆сѝ щи́тъ вѣ́ры, и҆ шле́мъ сп҃се́нїѧ, и҆ ме́чь дꙋхо́вный, и҆́же є҆́сть глаго́лъ бж҃їй. И҆́мже и҆ возмо́глъ є҆сѝ всѧ̑ навѣ́ты лꙋка́вагѡ побѣди́ти. Тѣ́мже помозѝ и҆ на́мъ, ѻ҆́тче прпⷣбне а҆рка́дїе, подража́ти тебѣ̀ въ побѣжде́нїи страсте́й на́шихъ, да зове́мъ тѝ:

Ра́дꙋйсѧ, смире́нїемъ ст҃ы́мъ горды́ню дꙋшепа́гꙋбнꙋю попра́вый: ра́дꙋйсѧ, кро́тостїю соверше́нною ꙗ҆́рости пла́мень погаси́вый.

Ра́дꙋйсѧ, ꙗ҆́кѡ ѡ҆ѕлоблѧ́ємымъ бы́лъ є҆сѝ ᲂу҆тѣ́шитель: ра́дꙋйсѧ, за и҆́стинꙋ гоне́нїе терпѧ́щымъ подкрѣпи́телю.

Ра́дꙋйсѧ, недꙋ́гꙋющымъ и҆сцѣле́нїе подава́ѧй: ра́дꙋйсѧ, въ бѣда́хъ сꙋ́щымъ застꙋпле́нїе ꙗ҆влѧ́ѧй.

Ра́дꙋйсѧ, свѣщѐ неꙋгаси́маѧ, мл҃твою во ѻ҆би́тели пламенѣ́ющаѧ: ра́дꙋйсѧ, лампа́до бг҃освѣ́тлаѧ, дꙋ́шы просвѣща́ющаѧ.

Ра́дꙋйсѧ, всѧ̑каѧ досаждє́нїѧ и҆ ѻ҆би̑ды без̾ гнѣ́ва претерпѣ́вый: ра́дꙋйсѧ, бо́дреннымъ трꙋдолю́бїемъ ᲂу҆ны́нїе прогна́вый.

Ра́дꙋйсѧ, ѿ десни́цы вседержи́телевы ᲂу҆вѣнча́нный: ра́дꙋйсѧ, и҆ ѿ на́съ грѣ́шныхъ на землѝ просла́вленный.

Ра́дꙋйсѧ, прпⷣбне а҆рка́дїе, новото́ржскїй чꙋдотво́рче.

Конда́къ ѳ҃

Всѧ́кое наслажде́нїе плотско́е возненави́дѣлъ є҆сѝ, а҆рка́дїе пребл҃же́нне, и҆ є҆ди́наго бг҃а всѣ́мъ се́рдцемъ возлюби́лъ є҆сѝ, и҆ чꙋдесы̀ того̀ просла́вилъ є҆сѝ. Тѣ́мже смире́ннѡ мо́лимъ тѧ̀: є҆гда̀ и҆́мамы предста́ти пред̾ сꙋдїе́ю првⷣнымъ, ᲂу҆молѝ є҆го̀ за на́съ, да не помѧне́тъ беззако́нїй на́шихъ, но сподо́битъ на́съ бл҃же́нныѧ ча́сти ѡ҆деснꙋ́ю стоѧ́щихъ и҆ вопїю́щихъ є҆мꙋ̀: А҆ллилꙋ́їа.

І҆́косъ ѳ҃

Вѣті̑и многовѣща́ннїи не возмо́гꙋтъ и҆зглаго́лати всѧ̑ по́двиги твоѧ̑ и҆ чꙋдеса̀, бг҃омꙋ́дре ѻ҆́тче а҆рка́дїе, ꙗ҆́кѡ добро́та житїѧ̀ твоегѡ̀ вои́стиннꙋ превосхо́дитъ всѧ́кꙋю похвалꙋ̀ человѣ́ческꙋю. Ѻ҆ба́че мы̀, любо́вїю къ тебѣ̀ побѣжда́еми, дерза́емъ смиреномꙋ́дреннѡ бл҃гохвали́ти тѧ̀ пѣ́нїемъ таковы́мъ:

Ра́дꙋйсѧ, цр҃кве правосла́вныѧ свѣти́льниче немерца́ѧй: ра́дꙋйсѧ, проповѣ́дниче, бг҃а прославлѧ́ѧй.

Ра́дꙋйсѧ, гра́да вѧ́зьмы ѡ҆гражде́нїе несокрꙋши́мое: ра́дꙋйсѧ, гра́да торжка̀ забра́ло неѡбори́мое.

Ра́дꙋйсѧ, ст҃ы́ѧ ѻ҆би́тели ᲂу҆твержде́нїе и҆ похвало̀: ра́дꙋйсѧ, мона́шествꙋющихъ ликѡ́въ пречꙋ́днаѧ красото̀.

Ра́дꙋйсѧ, хрⷭ҇тїа́нскомꙋ ро́дꙋ при́сное ᲂу҆тѣше́нїе: ра́дꙋйсѧ, лю́бѧщымъ и҆ чтꙋ́щымъ тѧ̀ хода́таю сп҃се́нїѧ.

Ра́дꙋйсѧ, приводѧ́й грѣ̑шныѧ къ покаѧ́нїю: ра́дꙋйсѧ, цр҃ѧ̀ нбⷭ҇нагѡ ᲂу҆млⷭ҇тивле́нїе.

Ра́дꙋйсѧ, нбⷭ҇ныхъ черто́гѡвъ ѡ҆бита́телю: ра́дꙋйсѧ, ра́йскихъ селе́нїй граждани́не.

Ра́дꙋйсѧ, прпⷣбне а҆рка́дїе, новото́ржскїй чꙋдотво́рче.

Конда́къ і҃

Сп҃сти́сѧ на́мъ ѿ поги́бели вѣ́чныѧ ᲂу҆молѝ всевы́шнѧго творца̀, ᲂу҆го́дниче бж҃їй а҆рка́дїе, и҆ не лишѝ на́съ по́мощи твоеѧ̀ ст҃ы́ѧ въ ча́съ кончи́ны, є҆гда̀ скѡ́рби лю̑тыѧ ѡ҆б̾и́мꙋтъ и҆ дꙋ́си нечи́стїи ᲂу҆страша́тъ на́съ: тогда̀ ꙗ҆ви́сѧ на́мъ застꙋ́пникъ ᲂу҆се́рденъ, мл҃твами твои́ми и҆збавлѧ́ѧ на́съ ѿ навѣ́тѡвъ и҆́хъ и҆ сподоблѧ́ѧ лицезрѣ́нїѧ а҆́гг҃лѡвъ и҆ пѣ́нїѧ съ ни́ми бг҃ꙋ: А҆ллилꙋ́їа.

І҆́косъ і҃

Стѣ́нꙋ застꙋпле́нїѧ и҆ мл҃твенника бл҃гопрїѧ́тна къ бг҃ꙋ ѡ҆брѣ́тше тѧ̀, ѻ҆́тче а҆рка́дїе, бл҃годаре́нїе ѻ҆ц҃ꙋ̀ нбⷭ҇номꙋ ᲂу҆се́рднѡ возсыла́емъ за всѧ̑ бл҃годѣѧ̑нїѧ є҆гѡ̀, тобо́ю на́мъ ѻ҆би́льнѡ ꙗ҆влѧ́ємаѧ, тебѣ́ же, предста́телю на́шемꙋ, прино́симъ пѣ́нїе таково́е:

Ра́дꙋйсѧ, ᲂу҆го́дниче гдⷭ҇ень, преди́вный въ чꙋдесѣ́хъ: ра́дꙋйсѧ, и҆збра́нниче хрⷭ҇то́въ, неꙋтоми́мый въ по́двизѣхъ.

Ра́дꙋйсѧ, всевы́шнѧгѡ домовлⷣки слꙋго̀ добропослꙋшли́вый: ра́дꙋйсѧ, цр҃ѧ̀ царе́й ра́бе бл҃гі́й и҆ вѣ́рный.

Ра́дꙋйсѧ, си́льный ѡ҆би́димыхъ застꙋ́пниче: ра́дꙋйсѧ, си́рыхъ и҆ ᲂу҆бо́гихъ приста́нище.

Ра́дꙋйсѧ, дꙋше́вныхъ и҆ тѣле́сныхъ недꙋ́гѡвъ цѣли́телю: ра́дꙋйсѧ, ра́дости на́мъ вѣ́чныѧ хода́таю.

Ра́дꙋйсѧ, є҆ле́емъ ра́дованїѧ дꙋхо́внагѡ на́съ ᲂу҆маща́ѧй: ра́дꙋйсѧ, блиста́нїемъ чꙋде́съ твои́хъ на́съ ѡ҆зарѧ́ѧй.

Ра́дꙋйсѧ, грѣ́шникѡвъ ка́ющихсѧ съ бг҃омъ примири́телю: ра́дꙋйсѧ, нбⷭ҇ный на́шъ покрови́телю.

Ра́дꙋйсѧ, прпⷣбне а҆рка́дїе, новото́ржскїй чꙋдотво́рче.

Конда́къ а҃і

Пѣ́нїе хвале́бное воспѣва́емъ тебѣ̀, прпⷣбне ѻ҆́тче а҆рка́дїе, и҆ съ любо́вїю припа́даемъ ко і҆кѡ́нѣ твое́й, прославлѧ́юще терпѣли́вное житїѐ твоѐ, воздержа́нїе соверше́нное и҆ чистотꙋ̀ бг҃олюбе́знꙋю дꙋшѝ и҆ тѣ́ла: ты́ же, всебл҃же́нне, помозѝ на́мъ подража́ти твои̑мъ добродѣ́телемъ, да возмо́жемъ бг҃оꙋго́днѡ пѣ́ти созда́телю на́шемꙋ: А҆ллилꙋ́їа.

І҆́косъ а҃і

Свѣти́льникъ до́брыхъ дѣ́лъ бы́лъ є҆сѝ въ житїѝ твое́мъ, ѻ҆́тче прпⷣбне, тѣ́мже и҆ по сме́рти просїѧ́лъ є҆сѝ чꙋдесы̀, и҆ и҆сцѣлє́нїѧ и҆сточа́лъ є҆сѝ ѿ нетлѣ́нныхъ моще́й твои́хъ, ꙗ҆̀же ꙗ҆́кѡ сокро́вище драгоцѣ́нное, ѿ нѣ́дръ земны́хъ цѣ̑лы и҆ бл҃гоꙋха̑нны ѡ҆брѣ́тєны бы́ша. Тебѣ̀ ᲂу҆̀бо, си́це просла́вленномꙋ ѿ гдⷭ҇а, да́ры пѣ́сней дꙋхо́вныхъ приносѧ́ще, ᲂу҆миле́ннѡ зове́мъ:

Ра́дꙋйсѧ, нетлѣ́нїѧ цвѣ́те бл҃гоꙋха́нный: ра́дꙋйсѧ, раѧ̀ і҆и҃сова крі́не прекра́сный.

Ра́дꙋйсѧ, свѣ́тлостїю чꙋде́съ твои́хъ мра́къ дꙋ́шъ на́шихъ ѡ҆зарѧ́ѧй: ра́дꙋйсѧ, ѿ болѣ́зней многоразли́чныхъ тѣлеса̀ на̑ша и҆сцѣлѧ́ѧй.

Ра́дꙋйсѧ, грѣхо́вныхъ ра́нъ врачꙋ̀ бл҃гоискꙋ́сный: ра́дꙋйсѧ, скорбѧ́щихъ серде́цъ ᲂу҆тѣ́шителю радостотво́рный.

Ра́дꙋйсѧ, гро́зный наказа́телю ѡ҆би́дѧщихъ: ра́дꙋйсѧ, ᲂу҆тѣше́нїе всѣ̑мъ тре́бꙋющымъ твоеѧ̀ по́мощи.

Ра́дꙋйсѧ, ѻ҆би́тели твоеѧ̀ стра́же неꙋсы́пный: ра́дꙋйсѧ, любвѐ хрⷭ҇то́вы послѣ́дователю вѣ́рный.

Ра́дꙋйсѧ, мл҃твъ на́шихъ бл҃гопрїѧ́тное кади́ло: ра́дꙋйсѧ, бл҃гоче́стнѡ жи́тельствꙋющихъ многосвѣ́тлое со́лнце.

Ра́дꙋйсѧ, прпⷣбне а҆рка́дїе, новото́ржскїй чꙋдотво́рче.

Конда́къ в҃і

Бл҃года́ть вели́кихъ чꙋде́съ ѿ гдⷭ҇а прїѧ́лъ є҆сѝ, прпⷣбне а҆рка́дїе, и҆ по достоѧ́нїю чꙋдотво́рецъ бы́лъ є҆сѝ: и҆́бо не то́кмѡ въ житїѝ, но и҆ по сме́рти вели́чїемъ чꙋде́съ твои́хъ всѣ́хъ ᲂу҆дивлѧ́еши, и҆ ко славосло́вїю всемогꙋ́щества хрⷭ҇то́ва подвиза́еши, во є҆́же пѣ́ти верхо́вномꙋ чꙋде́съ творцꙋ̀ и҆ ст҃ы́хъ ст҃ѣ́йшемꙋ сло́вꙋ: А҆ллилꙋ́їа.

І҆́косъ в҃і

Пое́мъ до́блествєнныѧ по́двиги твоѧ̑, добропобѣ́дный во́ине хрⷭ҇то́въ, ѻ҆́тче на́шъ а҆рка́дїе, ᲂу҆бл҃жа́емъ чтⷭ҇нꙋ́ю кончи́нꙋ твою̀ и҆ мл҃твеннѡ торжествꙋ́емъ ст҃ꙋ́ю па́мѧть твою̀, тебѣ̀ ᲂу҆се́рднѡ воспѣва́юще:

Ра́дꙋйсѧ, ꙗ҆́кѡ ст҃ѡ и҆ пра́веднѡ на землѝ пожи́лъ є҆сѝ: ра́дꙋйсѧ, ꙗ҆́кѡ вои́стиннꙋ а҆́гг҃лъ земны́й и҆ человѣ́къ нбⷭ҇ный бы́лъ є҆сѝ.

Ра́дꙋйсѧ, ꙗ҆́кѡ бл҃года́тїю бж҃їею бл҃гоꙋха́еши: ра́дꙋйсѧ, ꙗ҆́кѡ то́ю мра́къ грѣхо́вный разгонѧ́еши.

Ра́дꙋйсѧ, ꙗ҆́кѡ па́мѧть твоѧ̀ съ похвала́ми и҆ ᲂу҆спе́нїе со ст҃ы́ми: ра́дꙋйсѧ, ꙗ҆́кѡ въ ра́дость гдⷭ҇а твоегѡ̀ вше́лъ є҆сѝ.

Ра́дꙋйсѧ, ꙗ҆́кѡ дꙋ́шꙋ твою̀ хрⷭ҇то́съ въ нбⷭ҇наѧ селє́нїѧ прїѧ́тъ: ра́дꙋйсѧ, ꙗ҆́кѡ и҆ тѣ́ло твоѐ на землѝ чꙋдесы̀ и҆ нетлѣ́нїемъ просла́ви.

Ра́дꙋйсѧ, ꙗ҆́кѡ со безпло́тными си́лами горѣ̀ трист҃ꙋ́ю пѣ́снь бг҃ови немо́лчнѡ пое́ши: ра́дꙋйсѧ, ꙗ҆́кѡ со прⷪ҇рѡ́ки и҆ а҆пⷭ҇лы свѣ́тлѡ торжествꙋ́еши.

Ра́дꙋйсѧ, со ст҃и́тєли и҆ мч҃нки просла́вленный: ра́дꙋйсѧ, съ прпⷣбными и҆ првⷣными безсме́ртїѧ вѣнце́мъ ᲂу҆вѣнча́нный.

Ра́дꙋйсѧ, прпⷣбне а҆рка́дїе, новото́ржскїй чꙋдотво́рче.

Конда́къ г҃і

ѽ прпⷣбне и҆ бг҃оно́сне ѻ҆́тче на́шъ а҆рка́дїе, тебѣ̀ мо́лимсѧ и҆ тебѐ про́симъ: вонмѝ похва́льномꙋ пѣ́нїю на́шемꙋ, тебѣ̀ ѿ ᲂу҆се́рдїѧ приноси́момꙋ, молѝ гдⷭ҇а бг҃а, всеѧ̀ тва́ри содѣ́телѧ, да прости́тъ на́мъ согрѣшє́нїѧ на̑ша вѡ́льнаѧ и҆ невѡ́льнаѧ и҆ сподо́битъ црⷭ҇твїѧ своегѡ̀ нбⷭ҇нагѡ вопїю́щихъ є҆мꙋ̀: А҆ллилꙋ́їа.

Повто́ръ

Сей конда́къ глаго́лется три́жды, та́же і҆́косъ а҃-й и҆ конда́къ а҃-й.

І҆́косъ а҃

А҆́гг҃лѡвъ подража́тель ꙗ҆ви́лсѧ є҆сѝ, прпⷣбне и҆ бг҃оно́сне ѻ҆́тче на́шъ а҆рка́дїе, а҆́гг҃льски пожи́въ на землѝ и҆ на́мъ ѡ҆ста́вивъ ѻ҆́бразъ соверше́нства дꙋхо́внагѡ. Сегѡ̀ ра́ди просла́ви тѧ̀ нетлѣ́нїемъ и҆ чꙋдесы̀ хрⷭ҇то́съ бг҃ъ, є҆мꙋ́же предстои́ши ны́нѣ во сла́вѣ невече́рней нбⷭ҇нагѡ црⷭ҇твїѧ, ѿ на́съ же, чтꙋ́щихъ тѧ̀, слы́шиши пѣ́нїе таково́е:

Ра́дꙋйсѧ, любвѐ ра́ди гдⷭ҇ни всѧ́кое наслажде́нїе земно́е ѡ҆ста́вивый: ра́дꙋйсѧ, всѧ̑ сꙋ́єтнаѧ мі́ра сегѡ̀ хрⷭ҇та̀ ра́ди презрѣ́вый.

Ра́дꙋйсѧ, и҆́го хрⷭ҇то́во бл҃го́е и҆ ле́гкое возлюби́вый: ра́дꙋйсѧ, бога́тство нетлѣ́нное ѡ҆брѣты́й.

Ра́дꙋйсѧ, ꙗ҆́кѡ ко хрⷭ҇тꙋ̀ прилѣпи́лсѧ є҆сѝ: ра́дꙋйсѧ, ꙗ҆́кѡ ᲂу҆́мныма ѻ҆чи́ма бг҃а зрѣ́ти наꙋчи́лсѧ є҆сѝ.

Ра́дꙋйсѧ, во пло́ти ꙗ҆́кѡ безпло́тенъ пожи́вый: ра́дꙋйсѧ, чтⷭ҇нꙋ́ю и҆ бг҃олюбе́знꙋю чистотꙋ̀ сохрани́вый.

Ра́дꙋйсѧ, ꙗ҆́кѡ ᲂу҆́зкими враты̀ въ простра́нство црⷭ҇твїѧ нбⷭ҇нагѡ возше́лъ є҆сѝ: ра́дꙋйсѧ, ꙗ҆́кѡ равноа́гг҃льнꙋю че́сть досто́йнѡ прїѧ́лъ є҆сѝ.

Ра́дꙋйсѧ, вѣнце́мъ неꙋвѧда́емымъ ѿ гдⷭ҇а вѣнча́нный: ра́дꙋйсѧ, на нб҃сѝ и҆ на землѝ чꙋдесы̀ твои́ми просла́вленный.

Ра́дꙋйсѧ, прпⷣбне а҆рка́дїе, новото́ржскїй чꙋдотво́рче.

Конда́къ а҃

И҆збра́нный чꙋдотво́рче, преди́вный ᲂу҆го́дниче хрⷭ҇то́въ, ско́рый помо́щниче и҆ те́плый мл҃твенниче ѡ҆ всѣ́хъ, съ вѣ́рою и҆ любо́вїю къ тебѣ̀ прибѣга́ющихъ, а҆рка́дїе бг҃обл҃же́нне, ꙗ҆́кѡ и҆мѣ́ѧй дерзнове́нїе ко гдⷭ҇ꙋ, молѝ ѡ҆ сп҃се́нїи на́съ, пою́щихъ тѝ:

Ра́дꙋйсѧ, прпⷣбне а҆рка́дїе, новото́ржскїй чꙋдотво́рче.

Моли́твы

ѽ бл҃же́ннѣйшїй и҆ преди́вный чꙋдотво́рче, ѻ҆́тче на́шъ а҆рка́дїе! Къ тебѣ̀ ꙗ҆́кѡ ско́ромꙋ помо́щникꙋ и҆ ᲂу҆се́рдномꙋ ѡ҆ на́съ мл҃твенникꙋ смире́ннѡ прибѣга́емъ и҆ мл҃твеннѡ про́симъ тѧ̀: на́съ, ско́рбныхъ и҆ ѡ҆бремене́нныхъ грѣхмѝ мно́гими, не ѡ҆ста́ви по́мощїю твое́ю ст҃о́ю и҆ застꙋпле́нїемъ бл҃года́тнымъ. Не забꙋ́ди на́съ, ча̑дъ твои́хъ, но помина́й на́съ при́снѡ въ нбⷭ҇ныхъ бл҃гопрїѧ́тныхъ мл҃твахъ твои́хъ ᲂу҆ прⷭ҇то́ла прест҃ы́ѧ трⷪ҇цы, и҆дѣ́же со а҆́гг҃лы и҆ всѣ́ми ст҃ы́ми предстои́ши и҆ зри́ши всѧ̑ на́шѧ нꙋ̑жды и҆ бѣды̑, ꙗ҆́кѡ ѡ҆бꙋрева́еми є҆смы̀ страстьмѝ мно́гими и҆ не и҆́мамы дерзнове́нїѧ ко гдⷭ҇ꙋ, проси́ти є҆го̀ ѡ҆ поми́лованїи и҆ сп҃се́нїи. Къ тебѣ̀ прибѣга́емъ и҆ на тѧ̀ ᲂу҆пова́емъ, млⷭ҇ть бж҃їю и҆ проще́нїе грѣхѡ́въ на́шихъ ѿ вседержи́телѧ полꙋчи́ти и҆ сп҃се́нїе вѣ́чное ᲂу҆наслѣ́дити. Да сла́вимъ и҆ пое́мъ вели́чїе, бл҃года́ть и҆ чл҃вѣколю́бїе ѻ҆ц҃а̀, и҆ сн҃а, и҆ ст҃а́гѡ дх҃а, и҆ твоѐ ѻ҆те́ческое застꙋпле́нїе, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

ѽ прпⷣбне и҆ бг҃оно́сне ѻ҆́тче на́шъ а҆рка́дїе! Оу҆слы́ши на́съ, молѧ́щихсѧ тебѣ̀, и҆ бꙋ́ди на́мъ помо́щникъ въ ско́рбехъ на́шихъ, и҆ и҆зба́ви на́съ ѿ напа́стей, за мно́жество прегрѣше́нїй находѧ́щихъ на ны̀: ᲂу҆молѝ, ᲂу҆го́дниче хрⷭ҇то́въ, всебл҃га́го бг҃а дарова́ти на́мъ ѡ҆ставле́нїе всѣ́хъ ѿ ю҆́ности на́шеѧ до настоѧ́щагѡ днѐ и҆ часа̀ дѣ́ломъ, сло́вомъ, помышле́нїемъ и҆ всѣ́ми чꙋ́вствы содѣ́ѧнныхъ на́ми согрѣше́нїй, и҆схода́тайствꙋй на́мъ невозбра́нный вхо́дъ въ нбⷭ҇ное црⷭ҇твїе, да прославлѧ́емъ непреста́ннѡ сла́вимꙋю ѿ а҆́гг҃лъ всест҃ꙋ́ю трⷪ҇цꙋ, ѻ҆ц҃а̀ и҆ сн҃а и҆ ст҃а́го дх҃а, и҆ твоѐ млⷭ҇тивное предста́тельство, въ безконє́чныѧ вѣ́ки вѣкѡ́въ. А҆ми́нь.